| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩. সরণগমনিযত্থেরঅপদানৰণ্ণনা
3. Saraṇagamaniyattheraapadānavaṇṇanā
উভিন্নং দেৰরাজূনন্ত্যাদিকং আযস্মতো সরণগমনিযত্থেরস্স অপদানং। অযম্পি পুরিমবুদ্ধেসু কতাধিকারো উপ্পন্নুপ্পন্নভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরে ভগৰতি উপ্পন্নে অযং হিমৰন্তে দেৰরাজা হুত্ৰা নিব্বত্তি, তস্মিং অপরেন যক্খদেৰরঞ্ঞা সদ্ধিং সঙ্গামত্থায উপট্ঠিতে দ্ৰে অনেকযক্খসহস্সপরিৰারা ফলকাৰুধাদিহত্থা সঙ্গামত্থায সমুপব্যূল়্হা অহেসুং। তদা পদুমুত্তরো ভগৰা তেসু সত্তেসু কারুঞ্ঞং উপ্পাদেত্ৰা আকাসেন তত্থ গন্ত্ৰা সপরিৰারানং দ্ৰিন্নং দেৰরাজূনং ধম্মং দেসেসি। তদা তে সব্বে ফলকাৰুধানি ছড্ডেত্ৰা ভগৰন্তং গারৰবহুমানেন ৰন্দিত্ৰা সরণমগমংসু। তেসং অযং পঠমং সরণমগমাসি। সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিমন্ৰায সত্থরি পসন্নো পব্বজিত্ৰা নচিরস্সেৰ অরহা অহোসি।
Ubhinnaṃdevarājūnantyādikaṃ āyasmato saraṇagamaniyattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto padumuttare bhagavati uppanne ayaṃ himavante devarājā hutvā nibbatti, tasmiṃ aparena yakkhadevaraññā saddhiṃ saṅgāmatthāya upaṭṭhite dve anekayakkhasahassaparivārā phalakāvudhādihatthā saṅgāmatthāya samupabyūḷhā ahesuṃ. Tadā padumuttaro bhagavā tesu sattesu kāruññaṃ uppādetvā ākāsena tattha gantvā saparivārānaṃ dvinnaṃ devarājūnaṃ dhammaṃ desesi. Tadā te sabbe phalakāvudhāni chaḍḍetvā bhagavantaṃ gāravabahumānena vanditvā saraṇamagamaṃsu. Tesaṃ ayaṃ paṭhamaṃ saraṇamagamāsi. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
২০. সো অপরভাগে পুব্বকুসলং সরিত্ৰা সোমনস্সজাতো পুব্বচরিতাপদানং পকাসেন্তো উভিন্নং দেৰরাজূনন্তিআদিমাহ। তত্থ সুচিলোমখরলোমআল়ৰককুম্ভীরকুৰেরাদযো ৰিয নামগোত্তেন অপাকটা দ্ৰে যক্খরাজানো অঞ্ঞাপদেসেন দস্সেন্তো ‘‘উভিন্নং দেৰরাজূন’’ন্তিআদিমাহ। সঙ্গামো সমুপট্ঠিতোতি সং সুট্ঠু গামো কলহত্থায উপগমনন্তি সঙ্গামো, সো সঙ্গামো সং সুট্ঠু উপট্ঠিতো, একট্ঠানে উপগন্ত্ৰা ঠিতোতি অত্থো। অহোসি সমুপব্যূল়্হোতি সং সুট্ঠু উপসমীপে রাসিভূতোতি অত্থো।
20. So aparabhāge pubbakusalaṃ saritvā somanassajāto pubbacaritāpadānaṃ pakāsento ubhinnaṃ devarājūnantiādimāha. Tattha sucilomakharalomaāḷavakakumbhīrakuverādayo viya nāmagottena apākaṭā dve yakkharājāno aññāpadesena dassento ‘‘ubhinnaṃ devarājūna’’ntiādimāha. Saṅgāmo samupaṭṭhitoti saṃ suṭṭhu gāmo kalahatthāya upagamananti saṅgāmo, so saṅgāmo saṃ suṭṭhu upaṭṭhito, ekaṭṭhāne upagantvā ṭhitoti attho. Ahosi samupabyūḷhoti saṃ suṭṭhu upasamīpe rāsibhūtoti attho.
২১. সংৰেজেসি মহাজনন্তি তেসং রাসিভূতানং যক্খানং আকাসে নিসিন্নো ভগৰা চতুসচ্চধম্মদেসনায সং সুট্ঠু ৰেজেসি, আদীনৰদস্সনেন গণ্হাপেসি ৰিঞ্ঞাপেসি বোধেসীতি অত্থো। সেসং সব্বত্থ উত্তানমেৰাতি।
21.Saṃvejesi mahājananti tesaṃ rāsibhūtānaṃ yakkhānaṃ ākāse nisinno bhagavā catusaccadhammadesanāya saṃ suṭṭhu vejesi, ādīnavadassanena gaṇhāpesi viññāpesi bodhesīti attho. Sesaṃ sabbattha uttānamevāti.
সরণগমনিযত্থেরঅপদানৰণ্ণনা সমত্তা।
Saraṇagamaniyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৩. সরণগমনিযত্থেরঅপদানং • 3. Saraṇagamaniyattheraapadānaṃ
