| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၃. သရဏဂမနိယတ္ထေရအပဒာနဝဏ္ဏနာ
3. Saraṇagamaniyattheraapadānavaṇṇanā
ဥဘိန္နံ ဒေဝရာဇူနန္တ္ယာဒိကံ အာယသ္မတော သရဏဂမနိယတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော ဥပ္ပန္နုပ္ပန္နဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ပဒုမုတ္တရေ ဘဂဝတိ ဥပ္ပန္နေ အယံ ဟိမဝန္တေ ဒေဝရာဇာ ဟုတ္ဝာ နိဗ္ဗတ္တိ, တသ္မိံ အပရေန ယက္ခဒေဝရညာ သဒ္ဓိံ သင္ဂာမတ္ထာယ ဥပဋ္ဌိတေ ဒ္ဝေ အနေကယက္ခသဟသ္သပရိဝာရာ ဖလကာဝုဓာဒိဟတ္ထာ သင္ဂာမတ္ထာယ သမုပဗ္ယူဠ္ဟာ အဟေသုံ။ တဒာ ပဒုမုတ္တရော ဘဂဝာ တေသု သတ္တေသု ကာရုညံ ဥပ္ပာဒေတ္ဝာ အာကာသေန တတ္ထ ဂန္တ္ဝာ သပရိဝာရာနံ ဒ္ဝိန္နံ ဒေဝရာဇူနံ ဓမ္မံ ဒေသေသိ။ တဒာ တေ သဗ္ဗေ ဖလကာဝုဓာနိ ဆဍ္ဍေတ္ဝာ ဘဂဝန္တံ ဂာရဝဗဟုမာနေန ဝန္ဒိတ္ဝာ သရဏမဂမံသု။ တေသံ အယံ ပဌမံ သရဏမဂမာသိ။ သော တေန ပုညေန ဒေဝမနုသ္သေသု သံသရန္တော ဥဘယသမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ဝုဒ္ဓိမန္ဝာယ သတ္ထရိ ပသန္နော ပဗ္ဗဇိတ္ဝာ နစိရသ္သေဝ အရဟာ အဟောသိ။
Ubhinnaṃdevarājūnantyādikaṃ āyasmato saraṇagamaniyattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto padumuttare bhagavati uppanne ayaṃ himavante devarājā hutvā nibbatti, tasmiṃ aparena yakkhadevaraññā saddhiṃ saṅgāmatthāya upaṭṭhite dve anekayakkhasahassaparivārā phalakāvudhādihatthā saṅgāmatthāya samupabyūḷhā ahesuṃ. Tadā padumuttaro bhagavā tesu sattesu kāruññaṃ uppādetvā ākāsena tattha gantvā saparivārānaṃ dvinnaṃ devarājūnaṃ dhammaṃ desesi. Tadā te sabbe phalakāvudhāni chaḍḍetvā bhagavantaṃ gāravabahumānena vanditvā saraṇamagamaṃsu. Tesaṃ ayaṃ paṭhamaṃ saraṇamagamāsi. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
၂၀. သော အပရဘာဂေ ပုဗ္ဗကုသလံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ဥဘိန္နံ ဒေဝရာဇူနန္တိအာဒိမာဟ။ တတ္ထ သုစိလောမခရလောမအာဠဝကကုမ္ဘီရကုဝေရာဒယော ဝိယ နာမဂောတ္တေန အပာကဋာ ဒ္ဝေ ယက္ခရာဇာနော အညာပဒေသေန ဒသ္သေန္တော ‘‘ဥဘိန္နံ ဒေဝရာဇူန’’န္တိအာဒိမာဟ။ သင္ဂာမော သမုပဋ္ဌိတောတိ သံ သုဋ္ဌု ဂာမော ကလဟတ္ထာယ ဥပဂမနန္တိ သင္ဂာမော, သော သင္ဂာမော သံ သုဋ္ဌု ဥပဋ္ဌိတော, ဧကဋ္ဌာနေ ဥပဂန္တ္ဝာ ဌိတောတိ အတ္ထော။ အဟောသိ သမုပဗ္ယူဠ္ဟောတိ သံ သုဋ္ဌု ဥပသမီပေ ရာသိဘူတောတိ အတ္ထော။
20. So aparabhāge pubbakusalaṃ saritvā somanassajāto pubbacaritāpadānaṃ pakāsento ubhinnaṃ devarājūnantiādimāha. Tattha sucilomakharalomaāḷavakakumbhīrakuverādayo viya nāmagottena apākaṭā dve yakkharājāno aññāpadesena dassento ‘‘ubhinnaṃ devarājūna’’ntiādimāha. Saṅgāmo samupaṭṭhitoti saṃ suṭṭhu gāmo kalahatthāya upagamananti saṅgāmo, so saṅgāmo saṃ suṭṭhu upaṭṭhito, ekaṭṭhāne upagantvā ṭhitoti attho. Ahosi samupabyūḷhoti saṃ suṭṭhu upasamīpe rāsibhūtoti attho.
၂၁. သံဝေဇေသိ မဟာဇနန္တိ တေသံ ရာသိဘူတာနံ ယက္ခာနံ အာကာသေ နိသိန္နော ဘဂဝာ စတုသစ္စဓမ္မဒေသနာယ သံ သုဋ္ဌု ဝေဇေသိ, အာဒီနဝဒသ္သနေန ဂဏ္ဟာပေသိ ဝိညာပေသိ ဗောဓေသီတိ အတ္ထော။ သေသံ သဗ္ဗတ္ထ ဥတ္တာနမေဝာတိ။
21.Saṃvejesi mahājananti tesaṃ rāsibhūtānaṃ yakkhānaṃ ākāse nisinno bhagavā catusaccadhammadesanāya saṃ suṭṭhu vejesi, ādīnavadassanena gaṇhāpesi viññāpesi bodhesīti attho. Sesaṃ sabbattha uttānamevāti.
သရဏဂမနိယတ္ထေရအပဒာနဝဏ္ဏနာ သမတ္တာ။
Saraṇagamaniyattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၃. သရဏဂမနိယတ္ထေရအပဒာနံ • 3. Saraṇagamaniyattheraapadānaṃ
