| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೩. ಸರಣಗಮನಿಯತ್ಥೇರಅಪದಾನವಣ್ಣನಾ
3. Saraṇagamaniyattheraapadānavaṇṇanā
ಉಭಿನ್ನಂ ದೇವರಾಜೂನನ್ತ್ಯಾದಿಕಂ ಆಯಸ್ಮತೋ ಸರಣಗಮನಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ಉಪ್ಪನ್ನುಪ್ಪನ್ನಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರೇ ಭಗವತಿ ಉಪ್ಪನ್ನೇ ಅಯಂ ಹಿಮವನ್ತೇ ದೇವರಾಜಾ ಹುತ್ವಾ ನಿಬ್ಬತ್ತಿ, ತಸ್ಮಿಂ ಅಪರೇನ ಯಕ್ಖದೇವರಞ್ಞಾ ಸದ್ಧಿಂ ಸಙ್ಗಾಮತ್ಥಾಯ ಉಪಟ್ಠಿತೇ ದ್ವೇ ಅನೇಕಯಕ್ಖಸಹಸ್ಸಪರಿವಾರಾ ಫಲಕಾವುಧಾದಿಹತ್ಥಾ ಸಙ್ಗಾಮತ್ಥಾಯ ಸಮುಪಬ್ಯೂಳ್ಹಾ ಅಹೇಸುಂ। ತದಾ ಪದುಮುತ್ತರೋ ಭಗವಾ ತೇಸು ಸತ್ತೇಸು ಕಾರುಞ್ಞಂ ಉಪ್ಪಾದೇತ್ವಾ ಆಕಾಸೇನ ತತ್ಥ ಗನ್ತ್ವಾ ಸಪರಿವಾರಾನಂ ದ್ವಿನ್ನಂ ದೇವರಾಜೂನಂ ಧಮ್ಮಂ ದೇಸೇಸಿ। ತದಾ ತೇ ಸಬ್ಬೇ ಫಲಕಾವುಧಾನಿ ಛಡ್ಡೇತ್ವಾ ಭಗವನ್ತಂ ಗಾರವಬಹುಮಾನೇನ ವನ್ದಿತ್ವಾ ಸರಣಮಗಮಂಸು। ತೇಸಂ ಅಯಂ ಪಠಮಂ ಸರಣಮಗಮಾಸಿ। ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಉಭಯಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸತ್ಥರಿ ಪಸನ್ನೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Ubhinnaṃdevarājūnantyādikaṃ āyasmato saraṇagamaniyattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto padumuttare bhagavati uppanne ayaṃ himavante devarājā hutvā nibbatti, tasmiṃ aparena yakkhadevaraññā saddhiṃ saṅgāmatthāya upaṭṭhite dve anekayakkhasahassaparivārā phalakāvudhādihatthā saṅgāmatthāya samupabyūḷhā ahesuṃ. Tadā padumuttaro bhagavā tesu sattesu kāruññaṃ uppādetvā ākāsena tattha gantvā saparivārānaṃ dvinnaṃ devarājūnaṃ dhammaṃ desesi. Tadā te sabbe phalakāvudhāni chaḍḍetvā bhagavantaṃ gāravabahumānena vanditvā saraṇamagamaṃsu. Tesaṃ ayaṃ paṭhamaṃ saraṇamagamāsi. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
೨೦. ಸೋ ಅಪರಭಾಗೇ ಪುಬ್ಬಕುಸಲಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಉಭಿನ್ನಂ ದೇವರಾಜೂನನ್ತಿಆದಿಮಾಹ। ತತ್ಥ ಸುಚಿಲೋಮಖರಲೋಮಆಳವಕಕುಮ್ಭೀರಕುವೇರಾದಯೋ ವಿಯ ನಾಮಗೋತ್ತೇನ ಅಪಾಕಟಾ ದ್ವೇ ಯಕ್ಖರಾಜಾನೋ ಅಞ್ಞಾಪದೇಸೇನ ದಸ್ಸೇನ್ತೋ ‘‘ಉಭಿನ್ನಂ ದೇವರಾಜೂನ’’ನ್ತಿಆದಿಮಾಹ। ಸಙ್ಗಾಮೋ ಸಮುಪಟ್ಠಿತೋತಿ ಸಂ ಸುಟ್ಠು ಗಾಮೋ ಕಲಹತ್ಥಾಯ ಉಪಗಮನನ್ತಿ ಸಙ್ಗಾಮೋ, ಸೋ ಸಙ್ಗಾಮೋ ಸಂ ಸುಟ್ಠು ಉಪಟ್ಠಿತೋ, ಏಕಟ್ಠಾನೇ ಉಪಗನ್ತ್ವಾ ಠಿತೋತಿ ಅತ್ಥೋ। ಅಹೋಸಿ ಸಮುಪಬ್ಯೂಳ್ಹೋತಿ ಸಂ ಸುಟ್ಠು ಉಪಸಮೀಪೇ ರಾಸಿಭೂತೋತಿ ಅತ್ಥೋ।
20. So aparabhāge pubbakusalaṃ saritvā somanassajāto pubbacaritāpadānaṃ pakāsento ubhinnaṃ devarājūnantiādimāha. Tattha sucilomakharalomaāḷavakakumbhīrakuverādayo viya nāmagottena apākaṭā dve yakkharājāno aññāpadesena dassento ‘‘ubhinnaṃ devarājūna’’ntiādimāha. Saṅgāmo samupaṭṭhitoti saṃ suṭṭhu gāmo kalahatthāya upagamananti saṅgāmo, so saṅgāmo saṃ suṭṭhu upaṭṭhito, ekaṭṭhāne upagantvā ṭhitoti attho. Ahosi samupabyūḷhoti saṃ suṭṭhu upasamīpe rāsibhūtoti attho.
೨೧. ಸಂವೇಜೇಸಿ ಮಹಾಜನನ್ತಿ ತೇಸಂ ರಾಸಿಭೂತಾನಂ ಯಕ್ಖಾನಂ ಆಕಾಸೇ ನಿಸಿನ್ನೋ ಭಗವಾ ಚತುಸಚ್ಚಧಮ್ಮದೇಸನಾಯ ಸಂ ಸುಟ್ಠು ವೇಜೇಸಿ, ಆದೀನವದಸ್ಸನೇನ ಗಣ್ಹಾಪೇಸಿ ವಿಞ್ಞಾಪೇಸಿ ಬೋಧೇಸೀತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
21.Saṃvejesi mahājananti tesaṃ rāsibhūtānaṃ yakkhānaṃ ākāse nisinno bhagavā catusaccadhammadesanāya saṃ suṭṭhu vejesi, ādīnavadassanena gaṇhāpesi viññāpesi bodhesīti attho. Sesaṃ sabbattha uttānamevāti.
ಸರಣಗಮನಿಯತ್ಥೇರಅಪದಾನವಣ್ಣನಾ ಸಮತ್ತಾ।
Saraṇagamaniyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೩. ಸರಣಗಮನಿಯತ್ಥೇರಅಪದಾನಂ • 3. Saraṇagamaniyattheraapadānaṃ
