| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. வஜ்ஜிஸத்தகவக்³கோ³
3. Vajjisattakavaggo
1. ஸாரந்த³த³ஸுத்தவண்ணனா
1. Sārandadasuttavaṇṇanā
21. ததியஸ்ஸ பட²மே ஸாரந்த³தே³ சேதியேதி ஏவங்னாமகே விஹாரே. அனுப்பன்னே கிர ததா²க³தே தத்த² ஸாரந்த³த³ஸ்ஸ யக்க²ஸ்ஸ நிவாஸனட்டா²னங் சேதியங் அஹோஸி, அதெ²த்த² ப⁴க³வதோ விஹாரங் காரேஸுங். ஸோ ஸாரந்த³த³சேதியங்த்வேவ ஸங்க²ங் க³தோ. யாவகீவஞ்சாதி யத்தகங் காலங். அபி⁴ண்ஹங் ஸன்னிபாதாதி தி³வஸஸ்ஸ திக்க²த்துங் ஸன்னிபதந்தாபி அந்தரந்தரா ஸன்னிபதந்தாபி அபி⁴ண்ஹங் ஸன்னிபாதாவ. ஸன்னிபாதப³ஹுலாதி ‘‘ஹிய்யோபி புரிமதி³வஸம்பி ஸன்னிபதம்ஹ, புன அஜ்ஜ கிமத்த²ங் ஸன்னிபதாமா’’தி வோஸானமனாபஜ்ஜனேன ஸன்னிபாதப³ஹுலா. வுத்³தி⁴யேவ லிச்ச²வீ வஜ்ஜீனங் பாடிகங்கா² நோ பரிஹானீதி அபி⁴ண்ஹங் அஸன்னிபதந்தா ஹி தி³ஸாஸு ஆக³தங் ஸாஸனங் ந ஸுணந்தி, ததோ ‘‘அஸுககா³மஸீமா வா நிக³மஸீமா வா ஆகுலா, அஸுகட்டா²னே சோரா பரியுட்டி²தா’’தி ந ஜானந்தி. சோராபி ‘‘பமத்தா ராஜானோ’’தி ஞத்வா கா³மனிக³மாதீ³னி பஹரந்தா ஜனபத³ங் நாஸெந்தி. ஏவங் ராஜூனங் பரிஹானி ஹோதி . அபி⁴ண்ஹங் ஸன்னிபதந்தா பன தங் பவத்திங் ஸுணந்தி, ததோ ப³லங் பேஸெத்வா அமித்தமத்³த³னங் கரொந்தி. சோராபி ‘‘அப்பமத்தா ராஜானோ, ந ஸக்கா அம்ஹேஹி வக்³க³ப³ந்த⁴னேன விசரிது’’ந்தி பி⁴ஜ்ஜித்வா பலாயந்தி. ஏவங் ராஜூனங் வுத்³தி⁴ ஹோதி. தேன வுத்தங் – ‘‘வுத்³தி⁴யேவ லிச்ச²வீ வஜ்ஜீனங் பாடிகங்கா² நோ பரிஹானீ’’தி.
21. Tatiyassa paṭhame sārandade cetiyeti evaṃnāmake vihāre. Anuppanne kira tathāgate tattha sārandadassa yakkhassa nivāsanaṭṭhānaṃ cetiyaṃ ahosi, athettha bhagavato vihāraṃ kāresuṃ. So sārandadacetiyaṃtveva saṅkhaṃ gato. Yāvakīvañcāti yattakaṃ kālaṃ. Abhiṇhaṃ sannipātāti divasassa tikkhattuṃ sannipatantāpi antarantarā sannipatantāpi abhiṇhaṃ sannipātāva. Sannipātabahulāti ‘‘hiyyopi purimadivasampi sannipatamha, puna ajja kimatthaṃ sannipatāmā’’ti vosānamanāpajjanena sannipātabahulā. Vuddhiyeva licchavī vajjīnaṃ pāṭikaṅkhā no parihānīti abhiṇhaṃ asannipatantā hi disāsu āgataṃ sāsanaṃ na suṇanti, tato ‘‘asukagāmasīmā vā nigamasīmā vā ākulā, asukaṭṭhāne corā pariyuṭṭhitā’’ti na jānanti. Corāpi ‘‘pamattā rājāno’’ti ñatvā gāmanigamādīni paharantā janapadaṃ nāsenti. Evaṃ rājūnaṃ parihāni hoti . Abhiṇhaṃ sannipatantā pana taṃ pavattiṃ suṇanti, tato balaṃ pesetvā amittamaddanaṃ karonti. Corāpi ‘‘appamattā rājāno, na sakkā amhehi vaggabandhanena vicaritu’’nti bhijjitvā palāyanti. Evaṃ rājūnaṃ vuddhi hoti. Tena vuttaṃ – ‘‘vuddhiyeva licchavī vajjīnaṃ pāṭikaṅkhā no parihānī’’ti.
ஸமக்³கா³திஆதீ³ஸு ஸன்னிபாதபே⁴ரியா நிக்³க³தாய ‘‘அஜ்ஜ மே கிச்சங் அத்தி² மங்க³லங் அத்தீ²’’தி விக்கே²பங் கரொந்தா ந ஸமக்³கா³ ஸன்னிபதந்தி நாம. பே⁴ரிஸத்³த³ங் பன ஸுத்வாவ பு⁴ஞ்ஜமானாபி அலங்குருமானாபி வத்தா²னி நிவாஸயமானாபி அத்³த⁴பு⁴த்தா அத்³தா⁴லங்கதா வத்த²ங் நிவாஸெந்தாவ ஸன்னிபதந்தா ஸமக்³கா³ ஸன்னிபதந்தி நாம. ஸன்னிபதிதா பன சிந்தெத்வா மந்தெத்வா கத்தப்³ப³ங் கத்வா ஏகதோவ அவுட்ட²ஹந்தா ந ஸமக்³கா³ வுட்ட²ஹந்தி நாம. ஏவங் வுட்டி²தேஸு ஹி யே பட²மங் க³ச்ச²ந்தி, தேஸங் ஏவங் ஹோதி – ‘‘அம்ஹேஹி பா³ஹிரகதா²வ ஸுதா, இதா³னி வினிச்ச²யகதா² ப⁴விஸ்ஸதீ’’தி. ஏகதோ வுட்ட²ஹந்தா பன ஸமக்³கா³ வுட்ட²ஹந்தி நாம. அபிச ‘‘அஸுகட்டா²னே கா³மஸீமா வா நிக³மஸீமா வா ஆகுலா, சோரா வா பரியுட்டி²தா’’தி ஸுத்வா ‘‘கோ க³ந்த்வா அமித்தமத்³த³னங் கரிஸ்ஸதீ’’தி வுத்தே ‘‘அஹங் பட²மங் அஹங் பட²ம’’ந்தி வத்வா க³ச்ச²ந்தாபி ஸமக்³கா³ வுட்ட²ஹந்தி நாம. ஏகஸ்ஸ பன கம்மந்தே ஓஸீத³மானே ஸேஸா புத்தபா⁴தரோ பேஸெத்வா தஸ்ஸ கம்மந்தங் உபத்த²ம்ப⁴யமானாபி ஆக³ந்துகராஜானங் ‘‘அஸுகஸ்ஸ கே³ஹங் க³ச்ச²து, அஸுகஸ்ஸ கே³ஹங் க³ச்ச²தூ’’தி அவத்வா ஸப்³பே³ ஏகதோ ஸங்க³ண்ஹந்தாபி ஏகஸ்ஸ மங்க³லே வா ரோகே³ வா அஞ்ஞஸ்மிங் வா பன தாதி³ஸே ஸுக²து³க்கே² உப்பன்னே ஸப்³பே³ தத்த² ஸஹாயபா⁴வங் க³ச்ச²ந்தாபி ஸமக்³கா³ வஜ்ஜிகரணீயானி கரொந்தி நாம.
Samaggātiādīsu sannipātabheriyā niggatāya ‘‘ajja me kiccaṃ atthi maṅgalaṃ atthī’’ti vikkhepaṃ karontā na samaggā sannipatanti nāma. Bherisaddaṃ pana sutvāva bhuñjamānāpi alaṅkurumānāpi vatthāni nivāsayamānāpi addhabhuttā addhālaṅkatā vatthaṃ nivāsentāva sannipatantā samaggā sannipatanti nāma. Sannipatitā pana cintetvā mantetvā kattabbaṃ katvā ekatova avuṭṭhahantā na samaggā vuṭṭhahanti nāma. Evaṃ vuṭṭhitesu hi ye paṭhamaṃ gacchanti, tesaṃ evaṃ hoti – ‘‘amhehi bāhirakathāva sutā, idāni vinicchayakathā bhavissatī’’ti. Ekato vuṭṭhahantā pana samaggā vuṭṭhahanti nāma. Apica ‘‘asukaṭṭhāne gāmasīmā vā nigamasīmā vā ākulā, corā vā pariyuṭṭhitā’’ti sutvā ‘‘ko gantvā amittamaddanaṃ karissatī’’ti vutte ‘‘ahaṃ paṭhamaṃ ahaṃ paṭhama’’nti vatvā gacchantāpi samaggā vuṭṭhahanti nāma. Ekassa pana kammante osīdamāne sesā puttabhātaro pesetvā tassa kammantaṃ upatthambhayamānāpi āgantukarājānaṃ ‘‘asukassa gehaṃ gacchatu, asukassa gehaṃ gacchatū’’ti avatvā sabbe ekato saṅgaṇhantāpi ekassa maṅgale vā roge vā aññasmiṃ vā pana tādise sukhadukkhe uppanne sabbe tattha sahāyabhāvaṃ gacchantāpi samaggā vajjikaraṇīyāni karonti nāma.
அப்பஞ்ஞத்தந்திஆதீ³ஸு புப்³பே³ அகதங் ஸுங்கங் வா ப³லிங் வா த³ண்ட³ங் வா ஆஹராபெந்தா அப்பஞ்ஞத்தங் பஞ்ஞாபெந்தி நாம. போராணபவேணியா ஆக³தமேவ பன அனாஹராபெந்தா பஞ்ஞத்தங் ஸமுச்சி²ந்த³ந்தி நாம. சோரோதி க³ஹெத்வா த³ஸ்ஸிதே அவிசினித்வா சே²ஜ்ஜபே⁴ஜ்ஜங் அனுஸாஸந்தா போராணங் வஜ்ஜித⁴ம்மங் ஸமாதா³ய ந வத்தந்தி நாம. தேஸங் அபஞ்ஞத்தங் பஞ்ஞாபெந்தானங் அபி⁴னவஸுங்காதி³பீளிதா மனுஸ்ஸா ‘‘அதிஉபத்³து³தம்ஹ, கே இமேஸங் விஜிதே வஸிஸ்ஸந்தீ’’தி பச்சந்தங் பவிஸித்வா சோரா வா சோரஸஹாயா வா ஹுத்வா ஜனபத³ங் ஹனந்தி. பஞ்ஞத்தங் ஸமுச்சி²ந்த³ந்தானங் பவேணிஆக³தானி ஸுங்காதீ³னி அக³ண்ஹந்தானங் கோஸோ பரிஹாயதி, ததோ ஹத்தி²அஸ்ஸப³லகாயஓரோதா⁴த³யோ யதா²னிப³த்³த⁴ங் வட்டங் அலப⁴மானா தா²மப³லேன பரிஹாயந்தி. தே நேவ யுத்³த⁴க்க²மா ஹொந்தி ந பாரிசரியக்க²மா. போராணங் வஜ்ஜித⁴ம்மங் ஸமாதா³ய அவத்தந்தானங் விஜிதே மனுஸ்ஸா ‘‘அம்ஹாகங் புத்தங் பிதரங் பா⁴தரங் அசோரங்யேவ சோரோதி கத்வா சி²ந்தி³ங்ஸு பி⁴ந்தி³ங்ஸூ’’தி குஜ்ஜி²த்வா பச்சந்தங் பவிஸித்வா சோரா வா சோரஸஹாயா வா ஹுத்வா ஜனபத³ங் ஹனந்தி. ஏவங் ராஜூனங் பரிஹானி ஹோதி. அபஞ்ஞத்தங் ந பஞ்ஞாபெந்தானங் பன ‘‘பவேணிஆக³தங்யேவ ராஜானோ கரொந்தீ’’தி மனுஸ்ஸா ஹட்ட²துட்டா² கஸிவாணிஜ்ஜாதி³கே கம்மந்தே ஸம்பாதெ³ந்தி. பஞ்ஞத்தங் அஸமுச்சி²ந்த³ந்தானங் பவேணிஆக³தானி ஸுங்காதீ³னி க³ண்ஹந்தானங் கோஸோ வட்³ட⁴தி, ததோ ஹத்தி²அஸ்ஸப³லகாயஓரோதா⁴த³யோ யதா²னிப³த்³த⁴ங் வட்டங் லப⁴மானா தா²மப³லஸம்பன்னா யுத்³த⁴க்க²மா சேவ பாரிசரியக்க²மா ச ஹொந்தி. போராணே வஜ்ஜித⁴ம்மே ஸமாதா³ய வத்தந்தானங் மனுஸ்ஸா ந உஜ்ஜா²யந்தி. ‘‘ராஜானோ போராணபவேணியா கரொந்தி, அட்டகுலிகஸேனாபதிஉபராஜூஹி பரிக்கி²தங் ஸயம்பி பரிக்கி²பித்வா பவேணிபொத்த²கங் வாசாபெத்வா அனுச்ச²விகமேவ த³ண்ட³ங் பவத்தயந்தி, ஏதேஸங் தோ³ஸோ நத்தி², அம்ஹாகங்யேவ தோ³ஸோ’’தி அப்பமத்தா கம்மந்தே கரொந்தி. ஏவங் ராஜூனங் வுத்³தி⁴ ஹோதி.
Appaññattantiādīsu pubbe akataṃ suṅkaṃ vā baliṃ vā daṇḍaṃ vā āharāpentā appaññattaṃ paññāpenti nāma. Porāṇapaveṇiyā āgatameva pana anāharāpentā paññattaṃ samucchindanti nāma. Coroti gahetvā dassite avicinitvā chejjabhejjaṃ anusāsantā porāṇaṃ vajjidhammaṃ samādāya na vattanti nāma. Tesaṃ apaññattaṃ paññāpentānaṃ abhinavasuṅkādipīḷitā manussā ‘‘atiupaddutamha, ke imesaṃ vijite vasissantī’’ti paccantaṃ pavisitvā corā vā corasahāyā vā hutvā janapadaṃ hananti. Paññattaṃ samucchindantānaṃ paveṇiāgatāni suṅkādīni agaṇhantānaṃ koso parihāyati, tato hatthiassabalakāyaorodhādayo yathānibaddhaṃ vaṭṭaṃ alabhamānā thāmabalena parihāyanti. Te neva yuddhakkhamā honti na pāricariyakkhamā. Porāṇaṃ vajjidhammaṃ samādāya avattantānaṃ vijite manussā ‘‘amhākaṃ puttaṃ pitaraṃ bhātaraṃ acoraṃyeva coroti katvā chindiṃsu bhindiṃsū’’ti kujjhitvā paccantaṃ pavisitvā corā vā corasahāyā vā hutvā janapadaṃ hananti. Evaṃ rājūnaṃ parihāni hoti. Apaññattaṃ na paññāpentānaṃ pana ‘‘paveṇiāgataṃyeva rājāno karontī’’ti manussā haṭṭhatuṭṭhā kasivāṇijjādike kammante sampādenti. Paññattaṃ asamucchindantānaṃ paveṇiāgatāni suṅkādīni gaṇhantānaṃ koso vaḍḍhati, tato hatthiassabalakāyaorodhādayo yathānibaddhaṃ vaṭṭaṃ labhamānā thāmabalasampannā yuddhakkhamā ceva pāricariyakkhamā ca honti. Porāṇe vajjidhamme samādāya vattantānaṃ manussā na ujjhāyanti. ‘‘Rājāno porāṇapaveṇiyā karonti, aṭṭakulikasenāpatiuparājūhi parikkhitaṃ sayampi parikkhipitvā paveṇipotthakaṃ vācāpetvā anucchavikameva daṇḍaṃ pavattayanti, etesaṃ doso natthi, amhākaṃyeva doso’’ti appamattā kammante karonti. Evaṃ rājūnaṃ vuddhi hoti.
ஸக்கரிஸ்ஸந்தீதி யங்கிஞ்சி தேஸங் ஸக்காரங் கரொந்தா ஸுந்த³ரமேவ கரிஸ்ஸந்தி. க³ருங் கரிஸ்ஸந்தீதி க³ருபா⁴வங் பச்சுபட்ட²பெத்வா கரிஸ்ஸந்தி. மானெஸ்ஸந்தீதி மனேன பியாயிஸ்ஸந்தி. பூஜெஸ்ஸந்தீதி பச்சயபூஜாய பூஜெஸ்ஸந்தி. ஸோதப்³ப³ங் மஞ்ஞிஸ்ஸந்தீதி தி³வஸஸ்ஸ த்³வே தயோ வாரே உபட்டா²னங் க³ந்த்வா தேஸங் கத²ங் ஸோதப்³ப³ங் ஸத்³தா⁴தப்³ப³ங் மஞ்ஞிஸ்ஸந்தி. தத்த² யே ஏவங் மஹல்லகானங் ராஜூனங் ஸக்காராதீ³னி ந கரொந்தி, ஓவாத³த்தா²ய வா நேஸங் உபட்டா²னங் ந க³ச்ச²ந்தி, தே தேஹி விஸ்ஸட்டா² அனோவதி³யமானா கீளாபஸுதா ரஜ்ஜதோ பரிஹாயந்தி. யே பன ததா² படிபஜ்ஜந்தி, தேஸங் மஹல்லகராஜானோ ‘‘இத³ங் காதப்³ப³ங் இத³ங் ந காதப்³ப³’’ந்தி போராணபவேணிங் ஆசிக்க²ந்தி. ஸங்கா³மங் பத்வாபி ‘‘ஏவங் பவிஸிதப்³ப³ங், ஏவங் நிக்க²மிதப்³ப³’’ந்தி உபாயங் த³ஸ்ஸெந்தி. தே தேஹி ஓவதி³யமானா யதா²ஓவாத³ங் படிபஜ்ஜமானா ஸக்கொந்தி ரஜ்ஜபவேணிங் ஸந்தா⁴ரேதுங். தேன வுத்தங் – ‘‘வுத்³தி⁴யேவ லிச்ச²வீ வஜ்ஜீனங் பாடிகங்கா²’’தி.
Sakkarissantīti yaṃkiñci tesaṃ sakkāraṃ karontā sundarameva karissanti. Garuṃ karissantīti garubhāvaṃ paccupaṭṭhapetvā karissanti. Mānessantīti manena piyāyissanti. Pūjessantīti paccayapūjāya pūjessanti. Sotabbaṃ maññissantīti divasassa dve tayo vāre upaṭṭhānaṃ gantvā tesaṃ kathaṃ sotabbaṃ saddhātabbaṃ maññissanti. Tattha ye evaṃ mahallakānaṃ rājūnaṃ sakkārādīni na karonti, ovādatthāya vā nesaṃ upaṭṭhānaṃ na gacchanti, te tehi vissaṭṭhā anovadiyamānā kīḷāpasutā rajjato parihāyanti. Ye pana tathā paṭipajjanti, tesaṃ mahallakarājāno ‘‘idaṃ kātabbaṃ idaṃ na kātabba’’nti porāṇapaveṇiṃ ācikkhanti. Saṅgāmaṃ patvāpi ‘‘evaṃ pavisitabbaṃ, evaṃ nikkhamitabba’’nti upāyaṃ dassenti. Te tehi ovadiyamānā yathāovādaṃ paṭipajjamānā sakkonti rajjapaveṇiṃ sandhāretuṃ. Tena vuttaṃ – ‘‘vuddhiyeva licchavī vajjīnaṃ pāṭikaṅkhā’’ti.
குலித்தி²யோதி குலக⁴ரணியோ. குலகுமாரியோதி அனிவித்³தா⁴ தாஸங் தீ⁴தரோ. ஓகஸ்ஸாதி வா பஸய்ஹாதி வா பஸய்ஹாகாரஸ்ஸேவேதங் நாமங். ஓகாஸாதிபி பட²ந்தி. தத்த² ஓகஸ்ஸாதி அவகஸித்வா ஆகட்³டி⁴த்வா. பஸய்ஹாதி அபி⁴ப⁴வித்வா அஜ்ஜொ²த்த²ரித்வாதி அயங் வசனத்தோ². ஏவஞ்ஹி கரொந்தானங் விஜிதே மனுஸ்ஸா ‘‘அம்ஹாகங் கே³ஹே புத்தபா⁴தரோபி, கே²ளஸிங்கா⁴னிகாதீ³னி முகே²ன அபனெத்வா ஸங்வட்³டி⁴தா தீ⁴தரோபி இமே ப³லக்காரேன க³ஹெத்வா அத்தனோ க⁴ரே வாஸெந்தீ’’தி குபிதா பச்சந்தங் பவிஸித்வா சோரா வா சோரஸஹாயா வா ஹுத்வா ஜனபத³ங் ஹனந்தி. ஏவங் அகரொந்தானங் பன விஜிதே மனுஸ்ஸா அப்பொஸ்ஸுக்கா ஸகானி கம்மானி கரொந்தா ராஜகோஸங் வட்³டெ⁴ந்தி. ஏவமெத்த² வுத்³தி⁴ஹானியோ வேதி³தப்³பா³.
Kulitthiyoti kulagharaṇiyo. Kulakumāriyoti anividdhā tāsaṃ dhītaro. Okassāti vā pasayhāti vā pasayhākārassevetaṃ nāmaṃ. Okāsātipi paṭhanti. Tattha okassāti avakasitvā ākaḍḍhitvā. Pasayhāti abhibhavitvā ajjhottharitvāti ayaṃ vacanattho. Evañhi karontānaṃ vijite manussā ‘‘amhākaṃ gehe puttabhātaropi, kheḷasiṅghānikādīni mukhena apanetvā saṃvaḍḍhitā dhītaropi ime balakkārena gahetvā attano ghare vāsentī’’ti kupitā paccantaṃ pavisitvā corā vā corasahāyā vā hutvā janapadaṃ hananti. Evaṃ akarontānaṃ pana vijite manussā appossukkā sakāni kammāni karontā rājakosaṃ vaḍḍhenti. Evamettha vuddhihāniyo veditabbā.
வஜ்ஜீனங் வஜ்ஜிசேதியானீதி வஜ்ஜிராஜூனங் வஜ்ஜிரட்டே² சித்தீகதட்டே²ன சேதியானீதி லத்³த⁴னாமானி யக்க²ட்டா²னானி. அப்³ப⁴ந்தரானீதி அந்தோனக³ரே டி²தானி. பா³ஹிரானீதி ப³ஹினக³ரே டி²தானி. தி³ன்னபுப்³ப³ங் கதபுப்³ப³ந்தி புப்³பே³ தி³ன்னஞ்ச கதஞ்ச. நோ பரிஹாபெஸ்ஸந்தீதி அஹாபெத்வா யதா²பவத்தமேவ கரிஸ்ஸந்தி. த⁴ம்மிகங் ப³லிங் பரிஹாபெந்தானஞ்ஹி தே³வதா ஆரக்க²ங் ஸுஸங்விஹிதங் ந கரொந்தி, அனுப்பன்னங் து³க்க²ங் உப்பாதே³துங் அஸக்கொந்தியோபி உப்பன்னங் காஸஸீஸரோகா³தி³ங் வட்³டெ⁴ந்தி, ஸங்கா³மே பத்தே ஸஹாயா ந ஹொந்தி. அபரிஹாபெந்தானங் பன ஆரக்க²ங் ஸுஸங்விஹிதங் கரொந்தி, அனுப்பன்னங் ஸுக²ங் உப்பாதே³துங் அஸக்கொந்தியோபி உப்பன்னங் காஸஸீஸரோகா³தி³ங் ஹரந்தி, ஸங்கா³மஸீஸே ஸஹாயா ஹொந்தீதி. ஏவமெத்த² வுத்³தி⁴ஹானியோ வேதி³தப்³பா³.
Vajjīnaṃvajjicetiyānīti vajjirājūnaṃ vajjiraṭṭhe cittīkataṭṭhena cetiyānīti laddhanāmāni yakkhaṭṭhānāni. Abbhantarānīti antonagare ṭhitāni. Bāhirānīti bahinagare ṭhitāni. Dinnapubbaṃ katapubbanti pubbe dinnañca katañca. No parihāpessantīti ahāpetvā yathāpavattameva karissanti. Dhammikaṃ baliṃ parihāpentānañhi devatā ārakkhaṃ susaṃvihitaṃ na karonti, anuppannaṃ dukkhaṃ uppādetuṃ asakkontiyopi uppannaṃ kāsasīsarogādiṃ vaḍḍhenti, saṅgāme patte sahāyā na honti. Aparihāpentānaṃ pana ārakkhaṃ susaṃvihitaṃ karonti, anuppannaṃ sukhaṃ uppādetuṃ asakkontiyopi uppannaṃ kāsasīsarogādiṃ haranti, saṅgāmasīse sahāyā hontīti. Evamettha vuddhihāniyo veditabbā.
த⁴ம்மிகா ரக்கா²வரணகு³த்தீதி எத்த² ரக்கா² ஏவ யதா² அனிச்சி²தங் நாக³ச்ச²தி, ஏவங் ஆவரணதோ ஆவரணங். யதா² இச்சி²தங் ந நஸ்ஸதி, ஏவங் கோ³பாயனதோ கு³த்தி. தத்த² ப³லகாயேன பரிவாரெத்வா ரக்க²னங் பப்³ப³ஜிதானங் த⁴ம்மிகா ரக்கா²வரணகு³த்தி நாம ந ஹோதி. யதா² பன விஹாரஸ்ஸ உபவனே ருக்கே² ந சி²ந்த³ந்தி, வாஜிகா வாஜங் ந கரொந்தி, பொக்க²ரணீஸு மச்சே² ந க³ண்ஹந்தி, ஏவங் கரணங் த⁴ம்மிகா ரக்கா²வரணகு³த்தி நாம. கிந்தீதி கேன நு கோ² காரணேன.
Dhammikā rakkhāvaraṇaguttīti ettha rakkhā eva yathā anicchitaṃ nāgacchati, evaṃ āvaraṇato āvaraṇaṃ. Yathā icchitaṃ na nassati, evaṃ gopāyanato gutti. Tattha balakāyena parivāretvā rakkhanaṃ pabbajitānaṃ dhammikā rakkhāvaraṇagutti nāma na hoti. Yathā pana vihārassa upavane rukkhe na chindanti, vājikā vājaṃ na karonti, pokkharaṇīsu macche na gaṇhanti, evaṃ karaṇaṃ dhammikā rakkhāvaraṇagutti nāma. Kintīti kena nu kho kāraṇena.
தத்த² யே அனாக³தானங் அரஹந்தானங் ஆக³மனங் ந இச்ச²ந்தி, தே அஸ்ஸத்³தா⁴ ஹொந்தி அப்பஸன்னா. பப்³ப³ஜிதே ஸம்பத்தே பச்சுக்³க³மனங் ந கரொந்தி, க³ந்த்வா ந பஸ்ஸந்தி, படிஸந்தா²ரங் ந கரொந்தி, பஞ்ஹங் ந புச்ச²ந்தி, த⁴ம்மங் ந ஸுணந்தி, தா³னங் ந தெ³ந்தி, அனுமோத³னங் ந ஸுணந்தி, நிவாஸனட்டா²னங் ந ஸங்வித³ஹந்தி. அத² நேஸங் அவண்ணோ உக்³க³ச்ச²தி ‘‘அஸுகோ நாம ராஜா அஸ்ஸத்³தோ⁴ அப்பஸன்னோ, பப்³ப³ஜிதே ஸம்பத்தே பச்சுக்³க³மனங் ந கரோதி…பே॰… நிவாஸனட்டா²னங் ந ஸங்வித³ஹதீ’’தி. தங் ஸுத்வா பப்³ப³ஜிதா தஸ்ஸ நக³ரத்³வாரேன க³ச்ச²ந்தாபி நக³ரங் ந பவிஸந்தி. ஏவங் அனாக³தானங் அரஹந்தானங் அனாக³மனமேவ ஹோதி. ஆக³தானங் பன பா²ஸுவிஹாரே அஸதி யேபி அஜானித்வா ஆக³தா, தே ‘‘வஸிஸ்ஸாமாதி தாவ சிந்தெத்வா ஆக³தம்ஹா, இமேஸங் பன ராஜூனங் இமினா நீஹாரேன கே வஸிஸ்ஸந்தீ’’தி நிக்க²மித்வா க³ச்ச²ந்தி. ஏவங் அனாக³தேஸு அனாக³ச்ச²ந்தேஸு ஆக³தேஸு து³க்க²ங் விஹரந்தேஸு ஸோ தோ³ஸோ பப்³ப³ஜிதானங் அனாவாஸோ ஹோதி. ததோ தே³வதாரக்கா² ந ஹோதி, தே³வதாரக்கா²ய அஸதி அமனுஸ்ஸா ஓகாஸங் லப⁴ந்தி, அமனுஸ்ஸா உஸ்ஸன்னா அனுப்பன்னங் ப்³யாதி⁴ங் உப்பாதெ³ந்தி. ஸீலவந்தானங் த³ஸ்ஸனபஞ்ஹபுச்ச²னாதி³வத்து²கஸ்ஸ புஞ்ஞஸ்ஸ அனாக³மோ ஹோதி. விபரியாயேன யதா²வுத்தகண்ஹபக்க²விபரீதஸ்ஸ ஸுக்கபக்க²ஸ்ஸ ஸம்ப⁴வோ ஹோதீதி ஏவமெத்த² வுத்³தி⁴ஹானியோ வேதி³தப்³பா³.
Tattha ye anāgatānaṃ arahantānaṃ āgamanaṃ na icchanti, te assaddhā honti appasannā. Pabbajite sampatte paccuggamanaṃ na karonti, gantvā na passanti, paṭisanthāraṃ na karonti, pañhaṃ na pucchanti, dhammaṃ na suṇanti, dānaṃ na denti, anumodanaṃ na suṇanti, nivāsanaṭṭhānaṃ na saṃvidahanti. Atha nesaṃ avaṇṇo uggacchati ‘‘asuko nāma rājā assaddho appasanno, pabbajite sampatte paccuggamanaṃ na karoti…pe… nivāsanaṭṭhānaṃ na saṃvidahatī’’ti. Taṃ sutvā pabbajitā tassa nagaradvārena gacchantāpi nagaraṃ na pavisanti. Evaṃ anāgatānaṃ arahantānaṃ anāgamanameva hoti. Āgatānaṃ pana phāsuvihāre asati yepi ajānitvā āgatā, te ‘‘vasissāmāti tāva cintetvā āgatamhā, imesaṃ pana rājūnaṃ iminā nīhārena ke vasissantī’’ti nikkhamitvā gacchanti. Evaṃ anāgatesu anāgacchantesu āgatesu dukkhaṃ viharantesu so doso pabbajitānaṃ anāvāso hoti. Tato devatārakkhā na hoti, devatārakkhāya asati amanussā okāsaṃ labhanti, amanussā ussannā anuppannaṃ byādhiṃ uppādenti. Sīlavantānaṃ dassanapañhapucchanādivatthukassa puññassa anāgamo hoti. Vipariyāyena yathāvuttakaṇhapakkhaviparītassa sukkapakkhassa sambhavo hotīti evamettha vuddhihāniyo veditabbā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸாரந்த³த³ஸுத்தங் • 1. Sārandadasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. ஸாரந்த³த³ஸுத்தவண்ணனா • 1. Sārandadasuttavaṇṇanā
