| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. வஜ்ஜிஸத்தகவக்³கோ³
3. Vajjisattakavaggo
1. ஸாரந்த³த³ஸுத்தவண்ணனா
1. Sārandadasuttavaṇṇanā
21. ததியஸ்ஸ பட²மே தே³வாயதனபா⁴வேன சித்தத்தா லோகஸ்ஸ சித்தீகாரட்டா²னதாய ச சேதியங் அஹோஸி. யாவகீவந்தி (தீ³॰ நி॰ டீ॰ 2.134) ஏகமேவேதங் பத³ங் அனியமதோ பரிமாணவாசீ. காலோ செத்த² அதி⁴ப்பேதோதி ஆஹ ‘‘யத்தகங் கால’’ந்தி. அபி⁴ண்ஹங் ஸன்னிபாதாதி நிச்சஸன்னிபாதா. தங் பன நிச்சஸன்னிபாததங் த³ஸ்ஸேதுங் ‘‘தி³வஸஸ்ஸா’’திஆதி³ வுத்தங். ஸன்னிபாதப³ஹுலாதி பசுரஸன்னிபாதா. வோஸானந்தி ஸங்கோசங். ‘‘வுத்³தி⁴யேவா’’திஆதி³னா வுத்தமத்த²ங் ப்³யதிரேகமுகே²ன த³ஸ்ஸேதுங் ‘‘அபி⁴ண்ஹங் அஸன்னிபதந்தா ஹீ’’திஆதி³ வுத்தங். ஆகுலாதி கு²பி⁴தா ந பஸன்னா. பி⁴ஜ்ஜித்வாதி வக்³க³ப³ந்த⁴தோ விப⁴ஜ்ஜ விஸுங் விஸுங் ஹுத்வா.
21. Tatiyassa paṭhame devāyatanabhāvena cittattā lokassa cittīkāraṭṭhānatāya ca cetiyaṃ ahosi. Yāvakīvanti (dī. ni. ṭī. 2.134) ekamevetaṃ padaṃ aniyamato parimāṇavācī. Kālo cettha adhippetoti āha ‘‘yattakaṃ kāla’’nti. Abhiṇhaṃ sannipātāti niccasannipātā. Taṃ pana niccasannipātataṃ dassetuṃ ‘‘divasassā’’tiādi vuttaṃ. Sannipātabahulāti pacurasannipātā. Vosānanti saṅkocaṃ. ‘‘Vuddhiyevā’’tiādinā vuttamatthaṃ byatirekamukhena dassetuṃ ‘‘abhiṇhaṃ asannipatantā hī’’tiādi vuttaṃ. Ākulāti khubhitā na pasannā. Bhijjitvāti vaggabandhato vibhajja visuṃ visuṃ hutvā.
ஸன்னிபாதபே⁴ரியாதி ஸன்னிபாதாரோசனபே⁴ரியா. அத்³த⁴பு⁴த்தா வாதி ஸாமிபு⁴த்தா வா. ஓஸீத³மானேதி ஹாயமானே.
Sannipātabheriyāti sannipātārocanabheriyā. Addhabhuttā vāti sāmibhuttā vā. Osīdamāneti hāyamāne.
ஸுங்கந்தி ப⁴ண்ட³ங் க³ஹெத்வா க³ச்ச²ந்தேஹி பப்³ப³தக²ண்ட³னாதி³தித்த²கா³மத்³வாராதீ³ஸு ராஜபுரிஸானங் தா³தப்³ப³பா⁴க³ங். ப³லிந்தி நிப்ப²ன்னஸஸ்ஸாதி³தோ ச²பா⁴க³ங் ஸத்தபா⁴க³ந்திஆதி³னா லத்³த⁴ப்³ப³கரங். த³ண்ட³ந்தி த³ஸவீஸதிகஹாபணாதி³கங் அபராதா⁴னுரூபங் க³ஹேதப்³ப³த⁴னத³ண்ட³ங். வஜ்ஜித⁴ம்மந்தி வஜ்ஜிராஜத⁴ம்மங். இதா³னி அபஞ்ஞத்தபஞ்ஞாபனாதீ³ஸு தப்படிக்கே²பே ச ஆதீ³னவானிஸங்ஸே ச வித்தா²ரதோ த³ஸ்ஸேதுங் ‘‘தேஸ’’ந்திஆதி³ வுத்தங். பாரிசரியக்க²மாதி உபட்டா²னக்க²மா. போராணங் வஜ்ஜித⁴ம்மந்தி எத்த² புப்³பே³ கிர வஜ்ஜிராஜானோ ‘‘அயங் சோரோ’’தி ஆனெத்வா த³ஸ்ஸிதே ‘‘க³ண்ஹத² நங் சோர’’ந்தி அவத்வா வினிச்ச²யமஹாமத்தானங் தெ³ந்தி. தே வினிச்சி²னித்வா ஸசே அசோரோ ஹோதி, விஸ்ஸஜ்ஜெந்தி. ஸசே சோரோ, அத்தனா கிஞ்சி அகத்வா வோஹாரிகானங் தெ³ந்தி, தேபி வினிச்சி²னித்வா அசோரோ சே, விஸ்ஸஜ்ஜெந்தி. சோரோ சே, ஸுத்தத⁴ரானங் தெ³ந்தி. தேபி வினிச்சி²னித்வா அசோரோ சே, விஸ்ஸஜ்ஜெந்தி. சோரோ சே, அட்டகுலிகானங் தெ³ந்தி, தேபி ததே²வ கத்வா ஸேனாபதிஸ்ஸ, ஸேனாபதி உபராஜஸ்ஸ, உபராஜா ரஞ்ஞோ. ராஜா வினிச்சி²னித்வா ஸசே அசோரோ ஹோதி, விஸ்ஸஜ்ஜேதி. ஸசே பன சோரோ ஹோதி, பவேணிபண்ணகங் வாசாபேதி. தத்த² ‘‘யேன இத³ங் நாம கதங், தஸ்ஸ அயங் நாமத³ண்டோ³’’தி லிகி²தங். ராஜா தஸ்ஸ கிரியங் தேன ஸமானெத்வா தத³னுச்ச²விகங் த³ண்ட³ங் கரோதி. இதி ஏதங் போராணங் வஜ்ஜித⁴ம்மங் ஸமாதா³ய வத்தந்தானங் மனுஸ்ஸா ந உஜ்ஜா²யந்தி. பரம்பராக³தேஸு அட்டகுலேஸு ஜாதா அக³திக³மனவிரதா அட்டமஹல்லகபுரிஸா அட்டகுலிகா.
Suṅkanti bhaṇḍaṃ gahetvā gacchantehi pabbatakhaṇḍanādititthagāmadvārādīsu rājapurisānaṃ dātabbabhāgaṃ. Balinti nipphannasassādito chabhāgaṃ sattabhāgantiādinā laddhabbakaraṃ. Daṇḍanti dasavīsatikahāpaṇādikaṃ aparādhānurūpaṃ gahetabbadhanadaṇḍaṃ. Vajjidhammanti vajjirājadhammaṃ. Idāni apaññattapaññāpanādīsu tappaṭikkhepe ca ādīnavānisaṃse ca vitthārato dassetuṃ ‘‘tesa’’ntiādi vuttaṃ. Pāricariyakkhamāti upaṭṭhānakkhamā. Porāṇaṃ vajjidhammanti ettha pubbe kira vajjirājāno ‘‘ayaṃ coro’’ti ānetvā dassite ‘‘gaṇhatha naṃ cora’’nti avatvā vinicchayamahāmattānaṃ denti. Te vinicchinitvā sace acoro hoti, vissajjenti. Sace coro, attanā kiñci akatvā vohārikānaṃ denti, tepi vinicchinitvā acoro ce, vissajjenti. Coro ce, suttadharānaṃ denti. Tepi vinicchinitvā acoro ce, vissajjenti. Coro ce, aṭṭakulikānaṃ denti, tepi tatheva katvā senāpatissa, senāpati uparājassa, uparājā rañño. Rājā vinicchinitvā sace acoro hoti, vissajjeti. Sace pana coro hoti, paveṇipaṇṇakaṃ vācāpeti. Tattha ‘‘yena idaṃ nāma kataṃ, tassa ayaṃ nāmadaṇḍo’’ti likhitaṃ. Rājā tassa kiriyaṃ tena samānetvā tadanucchavikaṃ daṇḍaṃ karoti. Iti etaṃ porāṇaṃ vajjidhammaṃ samādāya vattantānaṃ manussā na ujjhāyanti. Paramparāgatesu aṭṭakulesu jātā agatigamanaviratā aṭṭamahallakapurisā aṭṭakulikā.
ஸக்காரந்தி உபகாரங். க³ருபா⁴வங் பச்சுபட்ட²பெத்வாதி ‘‘இமே அம்ஹாகங் க³ருனோ’’தி தத்த² க³ருபா⁴வங் படி படி உபட்ட²பெத்வா. மானெஸ்ஸந்தீதி ஸம்மானெஸ்ஸந்தி. தங் பன ஸம்மானநங் தேஸு நேஸங் அத்தமனதாபுப்³ப³கந்தி ஆஹ ‘‘மனேன பியாயிஸ்ஸந்தீ’’தி. நிபச்சகாரங் பணிபாதங். த³ஸ்ஸெந்தீதி க³ருசித்தபா⁴ரங் த³ஸ்ஸெந்தி. ஸந்தா⁴னேதுந்தி ஸம்ப³ந்த⁴ங் அவிச்சி²ன்னங் கத்வா க⁴டேதுங்.
Sakkāranti upakāraṃ. Garubhāvaṃ paccupaṭṭhapetvāti ‘‘ime amhākaṃ garuno’’ti tattha garubhāvaṃ paṭi paṭi upaṭṭhapetvā. Mānessantīti sammānessanti. Taṃ pana sammānanaṃ tesu nesaṃ attamanatāpubbakanti āha ‘‘manena piyāyissantī’’ti. Nipaccakāraṃ paṇipātaṃ. Dassentīti garucittabhāraṃ dassenti. Sandhānetunti sambandhaṃ avicchinnaṃ katvā ghaṭetuṃ.
பஸய்ஹகாரஸ்ஸாதி ப³லக்காரஸ்ஸ. காமங் வுத்³தி⁴யா பூஜனீயதாய ‘‘வுத்³தி⁴ஹானியோ’’தி வுத்தங், அத்தோ² பன வுத்தானுக்கமேனேவ யோஜேதப்³போ³. பாளியங் வா யஸ்மா ‘‘வுத்³தி⁴யேவ பாடிகங்கா², நோ பரிஹானீ’’தி வுத்தங், தஸ்மா தத³னுக்கமேன ‘‘வுத்³தி⁴ஹானியோ’’தி வுத்தங்.
Pasayhakārassāti balakkārassa. Kāmaṃ vuddhiyā pūjanīyatāya ‘‘vuddhihāniyo’’ti vuttaṃ, attho pana vuttānukkameneva yojetabbo. Pāḷiyaṃ vā yasmā ‘‘vuddhiyeva pāṭikaṅkhā, no parihānī’’ti vuttaṃ, tasmā tadanukkamena ‘‘vuddhihāniyo’’ti vuttaṃ.
விபச்சிதுங் அலத்³தோ⁴காஸே பாபகம்மே, தஸ்ஸ கம்மஸ்ஸ விபாகே வா அனவஸரோவ தே³வஸோபஸக்³கோ³. தஸ்மிங் பன லத்³தோ⁴காஸே ஸியா தே³வதோபஸக்³க³ஸ்ஸ அவஸரோதி ஆஹ ‘‘அனுப்பன்னங்…பே॰… வட்³டெ⁴ந்தீ’’தி. ஏதேனேவ அனுப்பன்னங் ஸுக²ந்தி எத்தா²பி அத்தோ² வேதி³தப்³போ³. ப³லகாயஸ்ஸ தி³கு³ணதிகு³ணதாத³ஸ்ஸனங் படிப⁴யபா⁴வத³ஸ்ஸனந்தி ஏவமாதி³னா தே³வதானங் ஸங்கா³மஸீஸே ஸஹாயதா வேதி³தப்³பா³.
Vipaccituṃ aladdhokāse pāpakamme, tassa kammassa vipāke vā anavasarova devasopasaggo. Tasmiṃ pana laddhokāse siyā devatopasaggassa avasaroti āha ‘‘anuppannaṃ…pe… vaḍḍhentī’’ti. Eteneva anuppannaṃ sukhanti etthāpi attho veditabbo. Balakāyassa diguṇatiguṇatādassanaṃ paṭibhayabhāvadassananti evamādinā devatānaṃ saṅgāmasīse sahāyatā veditabbā.
அனிச்சி²தந்தி அனிட்ட²ங். ஆவரணதோதி நிஸேத⁴னதோ. த⁴ம்மதோ அனபேதா த⁴ம்மியாதி இத⁴ ‘‘த⁴ம்மிகா’’தி வுத்தா. மிக³ஸூகராதி³கா⁴தாய ஸுனகா²தீ³னங் கட்³டி⁴த்வா வனசரணங் வாஜோ, தத்த² நியுத்தா, தே வா வாஜெந்தீதி வாஜிகா, மிக³வத⁴சாரினோ.
Anicchitanti aniṭṭhaṃ. Āvaraṇatoti nisedhanato. Dhammato anapetā dhammiyāti idha ‘‘dhammikā’’ti vuttā. Migasūkarādighātāya sunakhādīnaṃ kaḍḍhitvā vanacaraṇaṃ vājo, tattha niyuttā, te vā vājentīti vājikā, migavadhacārino.
ஸாரந்த³த³ஸுத்தவண்ணனா நிட்டி²தா.
Sārandadasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸாரந்த³த³ஸுத்தங் • 1. Sārandadasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸாரந்த³த³ஸுத்தவண்ணனா • 1. Sārandadasuttavaṇṇanā
