၁. သာရန္ဒဒသုတ္တဝဏ္ဏနာ

1. Sārandadasuttavaṇṇanā

၂၁. တတိယသ္သ ပဌမေ သာရန္ဒဒေ စေတိယေတိ ဧဝံနာမကေ ဝိဟာရေ။ အနုပ္ပန္နေ ကိရ တထာဂတေ တတ္ထ သာရန္ဒဒသ္သ ယက္ခသ္သ နိဝာသနဋ္ဌာနံ စေတိယံ အဟောသိ, အထေတ္ထ ဘဂဝတော ဝိဟာရံ ကာရေသုံ။ သော သာရန္ဒဒစေတိယံတ္ဝေဝ သင္ခံ ဂတော။ ယာဝကီဝဉ္စာတိ ယတ္တကံ ကာလံ။ အဘိဏ္ဟံ သန္နိပာတာတိ ဒိဝသသ္သ တိက္ခတ္တုံ သန္နိပတန္တာပိ အန္တရန္တရာ သန္နိပတန္တာပိ အဘိဏ္ဟံ သန္နိပာတာဝ။ သန္နိပာတဗဟုလာတိ ‘‘ဟိယ္ယောပိ ပုရိမဒိဝသမ္ပိ သန္နိပတမ္ဟ, ပုန အဇ္ဇ ကိမတ္ထံ သန္နိပတာမာ’’တိ ဝောသာနမနာပဇ္ဇနေန သန္နိပာတဗဟုလာ။ ဝုဒ္ဓိယေဝ လိစ္ဆဝီ ဝဇ္ဇီနံ ပာဋိကင္ခာ နော ပရိဟာနီတိ အဘိဏ္ဟံ အသန္နိပတန္တာ ဟိ ဒိသာသု အာဂတံ သာသနံ န သုဏန္တိ, တတော ‘‘အသုကဂာမသီမာ ဝာ နိဂမသီမာ ဝာ အာကုလာ, အသုကဋ္ဌာနေ စောရာ ပရိယုဋ္ဌိတာ’’တိ န ဇာနန္တိ။ စောရာပိ ‘‘ပမတ္တာ ရာဇာနော’’တိ ဉတ္ဝာ ဂာမနိဂမာဒီနိ ပဟရန္တာ ဇနပဒံ နာသေန္တိ။ ဧဝံ ရာဇူနံ ပရိဟာနိ ဟောတိ ။ အဘိဏ္ဟံ သန္နိပတန္တာ ပန တံ ပဝတ္တိံ သုဏန္တိ, တတော ဗလံ ပေသေတ္ဝာ အမိတ္တမဒ္ဒနံ ကရောန္တိ။ စောရာပိ ‘‘အပ္ပမတ္တာ ရာဇာနော, န သက္ကာ အမ္ဟေဟိ ဝဂ္ဂဗန္ဓနေန ဝိစရိတု’’န္တိ ဘိဇ္ဇိတ္ဝာ ပလာယန္တိ။ ဧဝံ ရာဇူနံ ဝုဒ္ဓိ ဟောတိ။ တေန ဝုတ္တံ – ‘‘ဝုဒ္ဓိယေဝ လိစ္ဆဝီ ဝဇ္ဇီနံ ပာဋိကင္ခာ နော ပရိဟာနီ’’တိ။

21. Tatiyassa paṭhame sārandade cetiyeti evaṃnāmake vihāre. Anuppanne kira tathāgate tattha sārandadassa yakkhassa nivāsanaṭṭhānaṃ cetiyaṃ ahosi, athettha bhagavato vihāraṃ kāresuṃ. So sārandadacetiyaṃtveva saṅkhaṃ gato. Yāvakīvañcāti yattakaṃ kālaṃ. Abhiṇhaṃ sannipātāti divasassa tikkhattuṃ sannipatantāpi antarantarā sannipatantāpi abhiṇhaṃ sannipātāva. Sannipātabahulāti ‘‘hiyyopi purimadivasampi sannipatamha, puna ajja kimatthaṃ sannipatāmā’’ti vosānamanāpajjanena sannipātabahulā. Vuddhiyeva licchavī vajjīnaṃ pāṭikaṅkhā no parihānīti abhiṇhaṃ asannipatantā hi disāsu āgataṃ sāsanaṃ na suṇanti, tato ‘‘asukagāmasīmā vā nigamasīmā vā ākulā, asukaṭṭhāne corā pariyuṭṭhitā’’ti na jānanti. Corāpi ‘‘pamattā rājāno’’ti ñatvā gāmanigamādīni paharantā janapadaṃ nāsenti. Evaṃ rājūnaṃ parihāni hoti . Abhiṇhaṃ sannipatantā pana taṃ pavattiṃ suṇanti, tato balaṃ pesetvā amittamaddanaṃ karonti. Corāpi ‘‘appamattā rājāno, na sakkā amhehi vaggabandhanena vicaritu’’nti bhijjitvā palāyanti. Evaṃ rājūnaṃ vuddhi hoti. Tena vuttaṃ – ‘‘vuddhiyeva licchavī vajjīnaṃ pāṭikaṅkhā no parihānī’’ti.

သမဂ္ဂာတိအာဒီသု သန္နိပာတဘေရိယာ နိဂ္ဂတာယ ‘‘အဇ္ဇ မေ ကိစ္စံ အတ္ထိ မင္ဂလံ အတ္ထီ’’တိ ဝိက္ခေပံ ကရောန္တာ န သမဂ္ဂာ သန္နိပတန္တိ နာမ။ ဘေရိသဒ္ဒံ ပန သုတ္ဝာဝ ဘုဉ္ဇမာနာပိ အလင္ကုရုမာနာပိ ဝတ္ထာနိ နိဝာသယမာနာပိ အဒ္ဓဘုတ္တာ အဒ္ဓာလင္ကတာ ဝတ္ထံ နိဝာသေန္တာဝ သန္နိပတန္တာ သမဂ္ဂာ သန္နိပတန္တိ နာမ။ သန္နိပတိတာ ပန စိန္တေတ္ဝာ မန္တေတ္ဝာ ကတ္တဗ္ဗံ ကတ္ဝာ ဧကတောဝ အဝုဋ္ဌဟန္တာ န သမဂ္ဂာ ဝုဋ္ဌဟန္တိ နာမ။ ဧဝံ ဝုဋ္ဌိတေသု ဟိ ယေ ပဌမံ ဂစ္ဆန္တိ, တေသံ ဧဝံ ဟောတိ – ‘‘အမ္ဟေဟိ ဗာဟိရကထာဝ သုတာ, ဣဒာနိ ဝိနိစ္ဆယကထာ ဘဝိသ္သတီ’’တိ။ ဧကတော ဝုဋ္ဌဟန္တာ ပန သမဂ္ဂာ ဝုဋ္ဌဟန္တိ နာမ။ အပိစ ‘‘အသုကဋ္ဌာနေ ဂာမသီမာ ဝာ နိဂမသီမာ ဝာ အာကုလာ, စောရာ ဝာ ပရိယုဋ္ဌိတာ’’တိ သုတ္ဝာ ‘‘ကော ဂန္တ္ဝာ အမိတ္တမဒ္ဒနံ ကရိသ္သတီ’’တိ ဝုတ္တေ ‘‘အဟံ ပဌမံ အဟံ ပဌမ’’န္တိ ဝတ္ဝာ ဂစ္ဆန္တာပိ သမဂ္ဂာ ဝုဋ္ဌဟန္တိ နာမ။ ဧကသ္သ ပန ကမ္မန္တေ ဩသီဒမာနေ သေသာ ပုတ္တဘာတရော ပေသေတ္ဝာ တသ္သ ကမ္မန္တံ ဥပတ္ထမ္ဘယမာနာပိ အာဂန္တုကရာဇာနံ ‘‘အသုကသ္သ ဂေဟံ ဂစ္ဆတု, အသုကသ္သ ဂေဟံ ဂစ္ဆတူ’’တိ အဝတ္ဝာ သဗ္ဗေ ဧကတော သင္ဂဏ္ဟန္တာပိ ဧကသ္သ မင္ဂလေ ဝာ ရောဂေ ဝာ အညသ္မိံ ဝာ ပန တာဒိသေ သုခဒုက္ခေ ဥပ္ပန္နေ သဗ္ဗေ တတ္ထ သဟာယဘာဝံ ဂစ္ဆန္တာပိ သမဂ္ဂာ ဝဇ္ဇိကရဏီယာနိ ကရောန္တိ နာမ။

Samaggātiādīsu sannipātabheriyā niggatāya ‘‘ajja me kiccaṃ atthi maṅgalaṃ atthī’’ti vikkhepaṃ karontā na samaggā sannipatanti nāma. Bherisaddaṃ pana sutvāva bhuñjamānāpi alaṅkurumānāpi vatthāni nivāsayamānāpi addhabhuttā addhālaṅkatā vatthaṃ nivāsentāva sannipatantā samaggā sannipatanti nāma. Sannipatitā pana cintetvā mantetvā kattabbaṃ katvā ekatova avuṭṭhahantā na samaggā vuṭṭhahanti nāma. Evaṃ vuṭṭhitesu hi ye paṭhamaṃ gacchanti, tesaṃ evaṃ hoti – ‘‘amhehi bāhirakathāva sutā, idāni vinicchayakathā bhavissatī’’ti. Ekato vuṭṭhahantā pana samaggā vuṭṭhahanti nāma. Apica ‘‘asukaṭṭhāne gāmasīmā vā nigamasīmā vā ākulā, corā vā pariyuṭṭhitā’’ti sutvā ‘‘ko gantvā amittamaddanaṃ karissatī’’ti vutte ‘‘ahaṃ paṭhamaṃ ahaṃ paṭhama’’nti vatvā gacchantāpi samaggā vuṭṭhahanti nāma. Ekassa pana kammante osīdamāne sesā puttabhātaro pesetvā tassa kammantaṃ upatthambhayamānāpi āgantukarājānaṃ ‘‘asukassa gehaṃ gacchatu, asukassa gehaṃ gacchatū’’ti avatvā sabbe ekato saṅgaṇhantāpi ekassa maṅgale vā roge vā aññasmiṃ vā pana tādise sukhadukkhe uppanne sabbe tattha sahāyabhāvaṃ gacchantāpi samaggā vajjikaraṇīyāni karonti nāma.

အပ္ပညတ္တန္တိအာဒီသု ပုဗ္ဗေ အကတံ သုင္ကံ ဝာ ဗလိံ ဝာ ဒဏ္ဍံ ဝာ အာဟရာပေန္တာ အပ္ပညတ္တံ ပညာပေန္တိ နာမ။ ပောရာဏပဝေဏိယာ အာဂတမေဝ ပန အနာဟရာပေန္တာ ပညတ္တံ သမုစ္ဆိန္ဒန္တိ နာမ။ စောရောတိ ဂဟေတ္ဝာ ဒသ္သိတေ အဝိစိနိတ္ဝာ ဆေဇ္ဇဘေဇ္ဇံ အနုသာသန္တာ ပောရာဏံ ဝဇ္ဇိဓမ္မံ သမာဒာယ န ဝတ္တန္တိ နာမ။ တေသံ အပညတ္တံ ပညာပေန္တာနံ အဘိနဝသုင္ကာဒိပီဠိတာ မနုသ္သာ ‘‘အတိဥပဒ္ဒုတမ္ဟ, ကေ ဣမေသံ ဝိဇိတေ ဝသိသ္သန္တီ’’တိ ပစ္စန္တံ ပဝိသိတ္ဝာ စောရာ ဝာ စောရသဟာယာ ဝာ ဟုတ္ဝာ ဇနပဒံ ဟနန္တိ။ ပညတ္တံ သမုစ္ဆိန္ဒန္တာနံ ပဝေဏိအာဂတာနိ သုင္ကာဒီနိ အဂဏ္ဟန္တာနံ ကောသော ပရိဟာယတိ, တတော ဟတ္ထိအသ္သဗလကာယဩရောဓာဒယော ယထာနိဗဒ္ဓံ ဝဋ္ဋံ အလဘမာနာ ထာမဗလေန ပရိဟာယန္တိ။ တေ နေဝ ယုဒ္ဓက္ခမာ ဟောန္တိ န ပာရိစရိယက္ခမာ။ ပောရာဏံ ဝဇ္ဇိဓမ္မံ သမာဒာယ အဝတ္တန္တာနံ ဝိဇိတေ မနုသ္သာ ‘‘အမ္ဟာကံ ပုတ္တံ ပိတရံ ဘာတရံ အစောရံယေဝ စောရောတိ ကတ္ဝာ ဆိန္ဒိံသု ဘိန္ဒိံသူ’’တိ ကုဇ္ဈိတ္ဝာ ပစ္စန္တံ ပဝိသိတ္ဝာ စောရာ ဝာ စောရသဟာယာ ဝာ ဟုတ္ဝာ ဇနပဒံ ဟနန္တိ။ ဧဝံ ရာဇူနံ ပရိဟာနိ ဟောတိ။ အပညတ္တံ န ပညာပေန္တာနံ ပန ‘‘ပဝေဏိအာဂတံယေဝ ရာဇာနော ကရောန္တီ’’တိ မနုသ္သာ ဟဋ္ဌတုဋ္ဌာ ကသိဝာဏိဇ္ဇာဒိကေ ကမ္မန္တေ သမ္ပာဒေန္တိ။ ပညတ္တံ အသမုစ္ဆိန္ဒန္တာနံ ပဝေဏိအာဂတာနိ သုင္ကာဒီနိ ဂဏ္ဟန္တာနံ ကောသော ဝဍ္ဎတိ, တတော ဟတ္ထိအသ္သဗလကာယဩရောဓာဒယော ယထာနိဗဒ္ဓံ ဝဋ္ဋံ လဘမာနာ ထာမဗလသမ္ပန္နာ ယုဒ္ဓက္ခမာ စေဝ ပာရိစရိယက္ခမာ စ ဟောန္တိ။ ပောရာဏေ ဝဇ္ဇိဓမ္မေ သမာဒာယ ဝတ္တန္တာနံ မနုသ္သာ န ဥဇ္ဈာယန္တိ။ ‘‘ရာဇာနော ပောရာဏပဝေဏိယာ ကရောန္တိ, အဋ္ဋကုလိကသေနာပတိဥပရာဇူဟိ ပရိက္ခိတံ သယမ္ပိ ပရိက္ခိပိတ္ဝာ ပဝေဏိပောတ္ထကံ ဝာစာပေတ္ဝာ အနုစ္ဆဝိကမေဝ ဒဏ္ဍံ ပဝတ္တယန္တိ, ဧတေသံ ဒောသော နတ္ထိ, အမ္ဟာကံယေဝ ဒောသော’’တိ အပ္ပမတ္တာ ကမ္မန္တေ ကရောန္တိ။ ဧဝံ ရာဇူနံ ဝုဒ္ဓိ ဟောတိ။

Appaññattantiādīsu pubbe akataṃ suṅkaṃ vā baliṃ vā daṇḍaṃ vā āharāpentā appaññattaṃ paññāpenti nāma. Porāṇapaveṇiyā āgatameva pana anāharāpentā paññattaṃ samucchindanti nāma. Coroti gahetvā dassite avicinitvā chejjabhejjaṃ anusāsantā porāṇaṃ vajjidhammaṃ samādāya na vattanti nāma. Tesaṃ apaññattaṃ paññāpentānaṃ abhinavasuṅkādipīḷitā manussā ‘‘atiupaddutamha, ke imesaṃ vijite vasissantī’’ti paccantaṃ pavisitvā corā vā corasahāyā vā hutvā janapadaṃ hananti. Paññattaṃ samucchindantānaṃ paveṇiāgatāni suṅkādīni agaṇhantānaṃ koso parihāyati, tato hatthiassabalakāyaorodhādayo yathānibaddhaṃ vaṭṭaṃ alabhamānā thāmabalena parihāyanti. Te neva yuddhakkhamā honti na pāricariyakkhamā. Porāṇaṃ vajjidhammaṃ samādāya avattantānaṃ vijite manussā ‘‘amhākaṃ puttaṃ pitaraṃ bhātaraṃ acoraṃyeva coroti katvā chindiṃsu bhindiṃsū’’ti kujjhitvā paccantaṃ pavisitvā corā vā corasahāyā vā hutvā janapadaṃ hananti. Evaṃ rājūnaṃ parihāni hoti. Apaññattaṃ na paññāpentānaṃ pana ‘‘paveṇiāgataṃyeva rājāno karontī’’ti manussā haṭṭhatuṭṭhā kasivāṇijjādike kammante sampādenti. Paññattaṃ asamucchindantānaṃ paveṇiāgatāni suṅkādīni gaṇhantānaṃ koso vaḍḍhati, tato hatthiassabalakāyaorodhādayo yathānibaddhaṃ vaṭṭaṃ labhamānā thāmabalasampannā yuddhakkhamā ceva pāricariyakkhamā ca honti. Porāṇe vajjidhamme samādāya vattantānaṃ manussā na ujjhāyanti. ‘‘Rājāno porāṇapaveṇiyā karonti, aṭṭakulikasenāpatiuparājūhi parikkhitaṃ sayampi parikkhipitvā paveṇipotthakaṃ vācāpetvā anucchavikameva daṇḍaṃ pavattayanti, etesaṃ doso natthi, amhākaṃyeva doso’’ti appamattā kammante karonti. Evaṃ rājūnaṃ vuddhi hoti.

သက္ကရိသ္သန္တီတိ ယံကိဉ္စိ တေသံ သက္ကာရံ ကရောန္တာ သုန္ဒရမေဝ ကရိသ္သန္တိ။ ဂရုံ ကရိသ္သန္တီတိ ဂရုဘာဝံ ပစ္စုပဋ္ဌပေတ္ဝာ ကရိသ္သန္တိ။ မာနေသ္သန္တီတိ မနေန ပိယာယိသ္သန္တိ။ ပူဇေသ္သန္တီတိ ပစ္စယပူဇာယ ပူဇေသ္သန္တိ။ သောတဗ္ဗံ မညိသ္သန္တီတိ ဒိဝသသ္သ ဒ္ဝေ တယော ဝာရေ ဥပဋ္ဌာနံ ဂန္တ္ဝာ တေသံ ကထံ သောတဗ္ဗံ သဒ္ဓာတဗ္ဗံ မညိသ္သန္တိ။ တတ္ထ ယေ ဧဝံ မဟလ္လကာနံ ရာဇူနံ သက္ကာရာဒီနိ န ကရောန္တိ, ဩဝာဒတ္ထာယ ဝာ နေသံ ဥပဋ္ဌာနံ န ဂစ္ဆန္တိ, တေ တေဟိ ဝိသ္သဋ္ဌာ အနောဝဒိယမာနာ ကီဠာပသုတာ ရဇ္ဇတော ပရိဟာယန္တိ။ ယေ ပန တထာ ပဋိပဇ္ဇန္တိ, တေသံ မဟလ္လကရာဇာနော ‘‘ဣဒံ ကာတဗ္ဗံ ဣဒံ န ကာတဗ္ဗ’’န္တိ ပောရာဏပဝေဏိံ အာစိက္ခန္တိ။ သင္ဂာမံ ပတ္ဝာပိ ‘‘ဧဝံ ပဝိသိတဗ္ဗံ, ဧဝံ နိက္ခမိတဗ္ဗ’’န္တိ ဥပာယံ ဒသ္သေန္တိ။ တေ တေဟိ ဩဝဒိယမာနာ ယထာဩဝာဒံ ပဋိပဇ္ဇမာနာ သက္ကောန္တိ ရဇ္ဇပဝေဏိံ သန္ဓာရေတုံ။ တေန ဝုတ္တံ – ‘‘ဝုဒ္ဓိယေဝ လိစ္ဆဝီ ဝဇ္ဇီနံ ပာဋိကင္ခာ’’တိ။

Sakkarissantīti yaṃkiñci tesaṃ sakkāraṃ karontā sundarameva karissanti. Garuṃ karissantīti garubhāvaṃ paccupaṭṭhapetvā karissanti. Mānessantīti manena piyāyissanti. Pūjessantīti paccayapūjāya pūjessanti. Sotabbaṃ maññissantīti divasassa dve tayo vāre upaṭṭhānaṃ gantvā tesaṃ kathaṃ sotabbaṃ saddhātabbaṃ maññissanti. Tattha ye evaṃ mahallakānaṃ rājūnaṃ sakkārādīni na karonti, ovādatthāya vā nesaṃ upaṭṭhānaṃ na gacchanti, te tehi vissaṭṭhā anovadiyamānā kīḷāpasutā rajjato parihāyanti. Ye pana tathā paṭipajjanti, tesaṃ mahallakarājāno ‘‘idaṃ kātabbaṃ idaṃ na kātabba’’nti porāṇapaveṇiṃ ācikkhanti. Saṅgāmaṃ patvāpi ‘‘evaṃ pavisitabbaṃ, evaṃ nikkhamitabba’’nti upāyaṃ dassenti. Te tehi ovadiyamānā yathāovādaṃ paṭipajjamānā sakkonti rajjapaveṇiṃ sandhāretuṃ. Tena vuttaṃ – ‘‘vuddhiyeva licchavī vajjīnaṃ pāṭikaṅkhā’’ti.

ကုလိတ္ထိယောတိ ကုလဃရဏိယော။ ကုလကုမာရိယောတိ အနိဝိဒ္ဓာ တာသံ ဓီတရော။ ဩကသ္သာတိ ဝာ ပသယ္ဟာတိ ဝာ ပသယ္ဟာကာရသ္သေဝေတံ နာမံ။ ဩကာသာတိပိ ပဌန္တိ။ တတ္ထ ဩကသ္သာတိ အဝကသိတ္ဝာ အာကဍ္ဎိတ္ဝာ။ ပသယ္ဟာတိ အဘိဘဝိတ္ဝာ အဇ္ဈောတ္ထရိတ္ဝာတိ အယံ ဝစနတ္ထော။ ဧဝဉ္ဟိ ကရောန္တာနံ ဝိဇိတေ မနုသ္သာ ‘‘အမ္ဟာကံ ဂေဟေ ပုတ္တဘာတရောပိ, ခေဠသိင္ဃာနိကာဒီနိ မုခေန အပနေတ္ဝာ သံဝဍ္ဎိတာ ဓီတရောပိ ဣမေ ဗလက္ကာရေန ဂဟေတ္ဝာ အတ္တနော ဃရေ ဝာသေန္တီ’’တိ ကုပိတာ ပစ္စန္တံ ပဝိသိတ္ဝာ စောရာ ဝာ စောရသဟာယာ ဝာ ဟုတ္ဝာ ဇနပဒံ ဟနန္တိ။ ဧဝံ အကရောန္တာနံ ပန ဝိဇိတေ မနုသ္သာ အပ္ပောသ္သုက္ကာ သကာနိ ကမ္မာနိ ကရောန္တာ ရာဇကောသံ ဝဍ္ဎေန္တိ။ ဧဝမေတ္ထ ဝုဒ္ဓိဟာနိယော ဝေဒိတဗ္ဗာ။

Kulitthiyoti kulagharaṇiyo. Kulakumāriyoti anividdhā tāsaṃ dhītaro. Okassāti vā pasayhāti vā pasayhākārassevetaṃ nāmaṃ. Okāsātipi paṭhanti. Tattha okassāti avakasitvā ākaḍḍhitvā. Pasayhāti abhibhavitvā ajjhottharitvāti ayaṃ vacanattho. Evañhi karontānaṃ vijite manussā ‘‘amhākaṃ gehe puttabhātaropi, kheḷasiṅghānikādīni mukhena apanetvā saṃvaḍḍhitā dhītaropi ime balakkārena gahetvā attano ghare vāsentī’’ti kupitā paccantaṃ pavisitvā corā vā corasahāyā vā hutvā janapadaṃ hananti. Evaṃ akarontānaṃ pana vijite manussā appossukkā sakāni kammāni karontā rājakosaṃ vaḍḍhenti. Evamettha vuddhihāniyo veditabbā.

ဝဇ္ဇီနံ ဝဇ္ဇိစေတိယာနီတိ ဝဇ္ဇိရာဇူနံ ဝဇ္ဇိရဋ္ဌေ စိတ္တီကတဋ္ဌေန စေတိယာနီတိ လဒ္ဓနာမာနိ ယက္ခဋ္ဌာနာနိ။ အဗ္ဘန္တရာနီတိ အန္တောနဂရေ ဌိတာနိ။ ဗာဟိရာနီတိ ဗဟိနဂရေ ဌိတာနိ။ ဒိန္နပုဗ္ဗံ ကတပုဗ္ဗန္တိ ပုဗ္ဗေ ဒိန္နဉ္စ ကတဉ္စ။ နော ပရိဟာပေသ္သန္တီတိ အဟာပေတ္ဝာ ယထာပဝတ္တမေဝ ကရိသ္သန္တိ။ ဓမ္မိကံ ဗလိံ ပရိဟာပေန္တာနဉ္ဟိ ဒေဝတာ အာရက္ခံ သုသံဝိဟိတံ န ကရောန္တိ, အနုပ္ပန္နံ ဒုက္ခံ ဥပ္ပာဒေတုံ အသက္ကောန္တိယောပိ ဥပ္ပန္နံ ကာသသီသရောဂာဒိံ ဝဍ္ဎေန္တိ, သင္ဂာမေ ပတ္တေ သဟာယာ န ဟောန္တိ။ အပရိဟာပေန္တာနံ ပန အာရက္ခံ သုသံဝိဟိတံ ကရောန္တိ, အနုပ္ပန္နံ သုခံ ဥပ္ပာဒေတုံ အသက္ကောန္တိယောပိ ဥပ္ပန္နံ ကာသသီသရောဂာဒိံ ဟရန္တိ, သင္ဂာမသီသေ သဟာယာ ဟောန္တီတိ။ ဧဝမေတ္ထ ဝုဒ္ဓိဟာနိယော ဝေဒိတဗ္ဗာ။

Vajjīnaṃvajjicetiyānīti vajjirājūnaṃ vajjiraṭṭhe cittīkataṭṭhena cetiyānīti laddhanāmāni yakkhaṭṭhānāni. Abbhantarānīti antonagare ṭhitāni. Bāhirānīti bahinagare ṭhitāni. Dinnapubbaṃ katapubbanti pubbe dinnañca katañca. No parihāpessantīti ahāpetvā yathāpavattameva karissanti. Dhammikaṃ baliṃ parihāpentānañhi devatā ārakkhaṃ susaṃvihitaṃ na karonti, anuppannaṃ dukkhaṃ uppādetuṃ asakkontiyopi uppannaṃ kāsasīsarogādiṃ vaḍḍhenti, saṅgāme patte sahāyā na honti. Aparihāpentānaṃ pana ārakkhaṃ susaṃvihitaṃ karonti, anuppannaṃ sukhaṃ uppādetuṃ asakkontiyopi uppannaṃ kāsasīsarogādiṃ haranti, saṅgāmasīse sahāyā hontīti. Evamettha vuddhihāniyo veditabbā.

ဓမ္မိကာ ရက္ခာဝရဏဂုတ္တီတိ ဧတ္ထ ရက္ခာ ဧဝ ယထာ အနိစ္ဆိတံ နာဂစ္ဆတိ, ဧဝံ အာဝရဏတော အာဝရဏံ။ ယထာ ဣစ္ဆိတံ န နသ္သတိ, ဧဝံ ဂောပာယနတော ဂုတ္တိ။ တတ္ထ ဗလကာယေန ပရိဝာရေတ္ဝာ ရက္ခနံ ပဗ္ဗဇိတာနံ ဓမ္မိကာ ရက္ခာဝရဏဂုတ္တိ နာမ န ဟောတိ။ ယထာ ပန ဝိဟာရသ္သ ဥပဝနေ ရုက္ခေ န ဆိန္ဒန္တိ, ဝာဇိကာ ဝာဇံ န ကရောန္တိ, ပောက္ခရဏီသု မစ္ဆေ န ဂဏ္ဟန္တိ, ဧဝံ ကရဏံ ဓမ္မိကာ ရက္ခာဝရဏဂုတ္တိ နာမ။ ကိန္တီတိ ကေန နု ခော ကာရဏေန။

Dhammikā rakkhāvaraṇaguttīti ettha rakkhā eva yathā anicchitaṃ nāgacchati, evaṃ āvaraṇato āvaraṇaṃ. Yathā icchitaṃ na nassati, evaṃ gopāyanato gutti. Tattha balakāyena parivāretvā rakkhanaṃ pabbajitānaṃ dhammikā rakkhāvaraṇagutti nāma na hoti. Yathā pana vihārassa upavane rukkhe na chindanti, vājikā vājaṃ na karonti, pokkharaṇīsu macche na gaṇhanti, evaṃ karaṇaṃ dhammikā rakkhāvaraṇagutti nāma. Kintīti kena nu kho kāraṇena.

တတ္ထ ယေ အနာဂတာနံ အရဟန္တာနံ အာဂမနံ န ဣစ္ဆန္တိ, တေ အသ္သဒ္ဓာ ဟောန္တိ အပ္ပသန္နာ။ ပဗ္ဗဇိတေ သမ္ပတ္တေ ပစ္စုဂ္ဂမနံ န ကရောန္တိ, ဂန္တ္ဝာ န ပသ္သန္တိ, ပဋိသန္ထာရံ န ကရောန္တိ, ပဉ္ဟံ န ပုစ္ဆန္တိ, ဓမ္မံ န သုဏန္တိ, ဒာနံ န ဒေန္တိ, အနုမောဒနံ န သုဏန္တိ, နိဝာသနဋ္ဌာနံ န သံဝိဒဟန္တိ။ အထ နေသံ အဝဏ္ဏော ဥဂ္ဂစ္ဆတိ ‘‘အသုကော နာမ ရာဇာ အသ္သဒ္ဓော အပ္ပသန္နော, ပဗ္ဗဇိတေ သမ္ပတ္တေ ပစ္စုဂ္ဂမနံ န ကရောတိ။ပေ.။ နိဝာသနဋ္ဌာနံ န သံဝိဒဟတီ’’တိ။ တံ သုတ္ဝာ ပဗ္ဗဇိတာ တသ္သ နဂရဒ္ဝာရေန ဂစ္ဆန္တာပိ နဂရံ န ပဝိသန္တိ။ ဧဝံ အနာဂတာနံ အရဟန္တာနံ အနာဂမနမေဝ ဟောတိ။ အာဂတာနံ ပန ဖာသုဝိဟာရေ အသတိ ယေပိ အဇာနိတ္ဝာ အာဂတာ, တေ ‘‘ဝသိသ္သာမာတိ တာဝ စိန္တေတ္ဝာ အာဂတမ္ဟာ, ဣမေသံ ပန ရာဇူနံ ဣမိနာ နီဟာရေန ကေ ဝသိသ္သန္တီ’’တိ နိက္ခမိတ္ဝာ ဂစ္ဆန္တိ။ ဧဝံ အနာဂတေသု အနာဂစ္ဆန္တေသု အာဂတေသု ဒုက္ခံ ဝိဟရန္တေသု သော ဒောသော ပဗ္ဗဇိတာနံ အနာဝာသော ဟောတိ။ တတော ဒေဝတာရက္ခာ န ဟောတိ, ဒေဝတာရက္ခာယ အသတိ အမနုသ္သာ ဩကာသံ လဘန္တိ, အမနုသ္သာ ဥသ္သန္နာ အနုပ္ပန္နံ ဗ္ယာဓိံ ဥပ္ပာဒေန္တိ။ သီလဝန္တာနံ ဒသ္သနပဉ္ဟပုစ္ဆနာဒိဝတ္ထုကသ္သ ပုညသ္သ အနာဂမော ဟောတိ။ ဝိပရိယာယေန ယထာဝုတ္တကဏ္ဟပက္ခဝိပရီတသ္သ သုက္ကပက္ခသ္သ သမ္ဘဝော ဟောတီတိ ဧဝမေတ္ထ ဝုဒ္ဓိဟာနိယော ဝေဒိတဗ္ဗာ။

Tattha ye anāgatānaṃ arahantānaṃ āgamanaṃ na icchanti, te assaddhā honti appasannā. Pabbajite sampatte paccuggamanaṃ na karonti, gantvā na passanti, paṭisanthāraṃ na karonti, pañhaṃ na pucchanti, dhammaṃ na suṇanti, dānaṃ na denti, anumodanaṃ na suṇanti, nivāsanaṭṭhānaṃ na saṃvidahanti. Atha nesaṃ avaṇṇo uggacchati ‘‘asuko nāma rājā assaddho appasanno, pabbajite sampatte paccuggamanaṃ na karoti…pe… nivāsanaṭṭhānaṃ na saṃvidahatī’’ti. Taṃ sutvā pabbajitā tassa nagaradvārena gacchantāpi nagaraṃ na pavisanti. Evaṃ anāgatānaṃ arahantānaṃ anāgamanameva hoti. Āgatānaṃ pana phāsuvihāre asati yepi ajānitvā āgatā, te ‘‘vasissāmāti tāva cintetvā āgatamhā, imesaṃ pana rājūnaṃ iminā nīhārena ke vasissantī’’ti nikkhamitvā gacchanti. Evaṃ anāgatesu anāgacchantesu āgatesu dukkhaṃ viharantesu so doso pabbajitānaṃ anāvāso hoti. Tato devatārakkhā na hoti, devatārakkhāya asati amanussā okāsaṃ labhanti, amanussā ussannā anuppannaṃ byādhiṃ uppādenti. Sīlavantānaṃ dassanapañhapucchanādivatthukassa puññassa anāgamo hoti. Vipariyāyena yathāvuttakaṇhapakkhaviparītassa sukkapakkhassa sambhavo hotīti evamettha vuddhihāniyo veditabbā.

Next: ၂. ဝသ္သကာရသုတ္တဝဏ္ဏနာ • 2. Vassakārasuttavaṇṇanā

Related texts:

တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. သာရန္ဒဒသုတ္တံ • 1. Sārandadasuttaṃ

ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. သာရန္ဒဒသုတ္တဝဏ္ဏနာ • 1. Sārandadasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact