| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. সারণীযসুত্তং
2. Sāraṇīyasuttaṃ
১২. ‘‘তীণিমানি , ভিক্খৰে, রঞ্ঞো খত্তিযস্স মুদ্ধাৰসিত্তস্স যাৰজীৰং সারণীযানি 1 ভৰন্তি। কতমানি তীণি? যস্মিং, ভিক্খৰে, পদেসে রাজা খত্তিযো মুদ্ধাৰসিত্তো জাতো হোতি। ইদং, ভিক্খৰে, পঠমং রঞ্ঞো খত্তিযস্স মুদ্ধাৰসিত্তস্স যাৰজীৰং সারণীযং হোতি।
12. ‘‘Tīṇimāni , bhikkhave, rañño khattiyassa muddhāvasittassa yāvajīvaṃ sāraṇīyāni 2 bhavanti. Katamāni tīṇi? Yasmiṃ, bhikkhave, padese rājā khattiyo muddhāvasitto jāto hoti. Idaṃ, bhikkhave, paṭhamaṃ rañño khattiyassa muddhāvasittassa yāvajīvaṃ sāraṇīyaṃ hoti.
‘‘পুন চপরং, ভিক্খৰে, যস্মিং পদেসে রাজা খত্তিযো মুদ্ধাৰসিত্তো হোতি। ইদং, ভিক্খৰে, দুতিযং রঞ্ঞো খত্তিযস্স মুদ্ধাৰসিত্তস্স যাৰজীৰং সারণীযং হোতি।
‘‘Puna caparaṃ, bhikkhave, yasmiṃ padese rājā khattiyo muddhāvasitto hoti. Idaṃ, bhikkhave, dutiyaṃ rañño khattiyassa muddhāvasittassa yāvajīvaṃ sāraṇīyaṃ hoti.
‘‘পুন চপরং, ভিক্খৰে, যস্মিং পদেসে রাজা খত্তিযো মুদ্ধাৰসিত্তো সঙ্গামং অভিৰিজিনিত্ৰা ৰিজিতসঙ্গামো তমেৰ সঙ্গামসীসং অজ্ঝাৰসতি। ইদং, ভিক্খৰে, ততিযং রঞ্ঞো খত্তিযস্স মুদ্ধাৰসিত্তস্স যাৰজীৰং সারণীযং হোতি। ইমানি খো, ভিক্খৰে, তীণি রঞ্ঞো খত্তিযস্স মুদ্ধাৰসিত্তস্স যাৰজীৰং সারণীযানি ভৰন্তি।
‘‘Puna caparaṃ, bhikkhave, yasmiṃ padese rājā khattiyo muddhāvasitto saṅgāmaṃ abhivijinitvā vijitasaṅgāmo tameva saṅgāmasīsaṃ ajjhāvasati. Idaṃ, bhikkhave, tatiyaṃ rañño khattiyassa muddhāvasittassa yāvajīvaṃ sāraṇīyaṃ hoti. Imāni kho, bhikkhave, tīṇi rañño khattiyassa muddhāvasittassa yāvajīvaṃ sāraṇīyāni bhavanti.
‘‘এৰমেৰং খো, ভিক্খৰে, তীণিমানি ভিক্খুস্স যাৰজীৰং সারণীযানি ভৰন্তি। কতমানি তীণি? যস্মিং, ভিক্খৰে, পদেসে ভিক্খু কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজিতো হোতি। ইদং, ভিক্খৰে, পঠমং ভিক্খুস্স যাৰজীৰং সারণীযং হোতি।
‘‘Evamevaṃ kho, bhikkhave, tīṇimāni bhikkhussa yāvajīvaṃ sāraṇīyāni bhavanti. Katamāni tīṇi? Yasmiṃ, bhikkhave, padese bhikkhu kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajito hoti. Idaṃ, bhikkhave, paṭhamaṃ bhikkhussa yāvajīvaṃ sāraṇīyaṃ hoti.
‘‘পুন চপরং, ভিক্খৰে, যস্মিং পদেসে ভিক্খু ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি। ইদং, ভিক্খৰে, দুতিযং ভিক্খুস্স যাৰজীৰং সারণীযং হোতি।
‘‘Puna caparaṃ, bhikkhave, yasmiṃ padese bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Idaṃ, bhikkhave, dutiyaṃ bhikkhussa yāvajīvaṃ sāraṇīyaṃ hoti.
‘‘পুন চপরং, ভিক্খৰে, যস্মিং পদেসে ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি। ইদং, ভিক্খৰে, ততিযং ভিক্খুস্স যাৰজীৰং সারণীযং হোতি। ইমানি খো, ভিক্খৰে, তীণি ভিক্খুস্স যাৰজীৰং সারণীযানি ভৰন্তী’’তি। দুতিযং।
‘‘Puna caparaṃ, bhikkhave, yasmiṃ padese bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idaṃ, bhikkhave, tatiyaṃ bhikkhussa yāvajīvaṃ sāraṇīyaṃ hoti. Imāni kho, bhikkhave, tīṇi bhikkhussa yāvajīvaṃ sāraṇīyāni bhavantī’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. সারণীযসুত্তৰণ্ণনা • 2. Sāraṇīyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. সারণীযসুত্তৰণ্ণনা • 2. Sāraṇīyasuttavaṇṇanā
