| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. සාරණීයසුත්‌තං
2. Sāraṇīyasuttaṃ
12. ‘‘තීණිමානි , භික්‌ඛවෙ, රඤ්‌ඤො ඛත්‌තියස්‌ස මුද්‌ධාවසිත්‌තස්‌ස යාවජීවං සාරණීයානි 1 භවන්‌ති. කතමානි තීණි? යස්‌මිං, භික්‌ඛවෙ, පදෙසෙ රාජා ඛත්‌තියො මුද්‌ධාවසිත්‌තො ජාතො හොති. ඉදං, භික්‌ඛවෙ, පඨමං රඤ්‌ඤො ඛත්‌තියස්‌ස මුද්‌ධාවසිත්‌තස්‌ස යාවජීවං සාරණීයං හොති.
12. ‘‘Tīṇimāni , bhikkhave, rañño khattiyassa muddhāvasittassa yāvajīvaṃ sāraṇīyāni 2 bhavanti. Katamāni tīṇi? Yasmiṃ, bhikkhave, padese rājā khattiyo muddhāvasitto jāto hoti. Idaṃ, bhikkhave, paṭhamaṃ rañño khattiyassa muddhāvasittassa yāvajīvaṃ sāraṇīyaṃ hoti.
‘‘පුන චපරං, භික්‌ඛවෙ, යස්‌මිං පදෙසෙ රාජා ඛත්‌තියො මුද්‌ධාවසිත්‌තො හොති. ඉදං, භික්‌ඛවෙ, දුතියං රඤ්‌ඤො ඛත්‌තියස්‌ස මුද්‌ධාවසිත්‌තස්‌ස යාවජීවං සාරණීයං හොති.
‘‘Puna caparaṃ, bhikkhave, yasmiṃ padese rājā khattiyo muddhāvasitto hoti. Idaṃ, bhikkhave, dutiyaṃ rañño khattiyassa muddhāvasittassa yāvajīvaṃ sāraṇīyaṃ hoti.
‘‘පුන චපරං, භික්‌ඛවෙ, යස්‌මිං පදෙසෙ රාජා ඛත්‌තියො මුද්‌ධාවසිත්‌තො සඞ්‌ගාමං අභිවිජිනිත්‌වා විජිතසඞ්‌ගාමො තමෙව සඞ්‌ගාමසීසං අජ්‌ඣාවසති. ඉදං, භික්‌ඛවෙ, තතියං රඤ්‌ඤො ඛත්‌තියස්‌ස මුද්‌ධාවසිත්‌තස්‌ස යාවජීවං සාරණීයං හොති. ඉමානි ඛො, භික්‌ඛවෙ, තීණි රඤ්‌ඤො ඛත්‌තියස්‌ස මුද්‌ධාවසිත්‌තස්‌ස යාවජීවං සාරණීයානි භවන්‌ති.
‘‘Puna caparaṃ, bhikkhave, yasmiṃ padese rājā khattiyo muddhāvasitto saṅgāmaṃ abhivijinitvā vijitasaṅgāmo tameva saṅgāmasīsaṃ ajjhāvasati. Idaṃ, bhikkhave, tatiyaṃ rañño khattiyassa muddhāvasittassa yāvajīvaṃ sāraṇīyaṃ hoti. Imāni kho, bhikkhave, tīṇi rañño khattiyassa muddhāvasittassa yāvajīvaṃ sāraṇīyāni bhavanti.
‘‘එවමෙවං ඛො, භික්‌ඛවෙ, තීණිමානි භික්‌ඛුස්‌ස යාවජීවං සාරණීයානි භවන්‌ති. කතමානි තීණි? යස්‌මිං, භික්‌ඛවෙ, පදෙසෙ භික්‌ඛු කෙසමස්‌සුං ඔහාරෙත්‌වා කාසායානි වත්‌ථානි අච්‌ඡාදෙත්‌වා අගාරස්‌මා අනගාරියං පබ්‌බජිතො හොති. ඉදං, භික්‌ඛවෙ, පඨමං භික්‌ඛුස්‌ස යාවජීවං සාරණීයං හොති.
‘‘Evamevaṃ kho, bhikkhave, tīṇimāni bhikkhussa yāvajīvaṃ sāraṇīyāni bhavanti. Katamāni tīṇi? Yasmiṃ, bhikkhave, padese bhikkhu kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajito hoti. Idaṃ, bhikkhave, paṭhamaṃ bhikkhussa yāvajīvaṃ sāraṇīyaṃ hoti.
‘‘පුන චපරං, භික්‌ඛවෙ, යස්‌මිං පදෙසෙ භික්‌ඛු ‘ඉදං දුක්‌ඛ’න්‌ති යථාභූතං පජානාති, ‘අයං දුක්‌ඛසමුදයො’ති යථාභූතං පජානාති, ‘අයං දුක්‌ඛනිරොධො’ති යථාභූතං පජානාති, ‘අයං දුක්‌ඛනිරොධගාමිනී පටිපදා’ති යථාභූතං පජානාති. ඉදං, භික්‌ඛවෙ, දුතියං භික්‌ඛුස්‌ස යාවජීවං සාරණීයං හොති.
‘‘Puna caparaṃ, bhikkhave, yasmiṃ padese bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Idaṃ, bhikkhave, dutiyaṃ bhikkhussa yāvajīvaṃ sāraṇīyaṃ hoti.
‘‘පුන චපරං, භික්‌ඛවෙ, යස්‌මිං පදෙසෙ භික්‌ඛු ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. ඉදං, භික්‌ඛවෙ, තතියං භික්‌ඛුස්‌ස යාවජීවං සාරණීයං හොති. ඉමානි ඛො, භික්‌ඛවෙ, තීණි භික්‌ඛුස්‌ස යාවජීවං සාරණීයානි භවන්‌තී’’ති. දුතියං.
‘‘Puna caparaṃ, bhikkhave, yasmiṃ padese bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idaṃ, bhikkhave, tatiyaṃ bhikkhussa yāvajīvaṃ sāraṇīyaṃ hoti. Imāni kho, bhikkhave, tīṇi bhikkhussa yāvajīvaṃ sāraṇīyāni bhavantī’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. සාරණීයසුත්‌තවණ්‌ණනා • 2. Sāraṇīyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2. සාරණීයසුත්‌තවණ්‌ණනා • 2. Sāraṇīyasuttavaṇṇanā
