| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. སཱརཎཱིཡསུཏྟཾ
2. Sāraṇīyasuttaṃ
༡༢. ‘‘ཏཱིཎིམཱནི , བྷིཀྑཝེ, རཉྙོ ཁཏྟིཡསྶ མུདྡྷཱཝསིཏྟསྶ ཡཱཝཛཱིཝཾ སཱརཎཱིཡཱནི 1 བྷཝནྟི། ཀཏམཱནི ཏཱིཎི? ཡསྨིཾ, བྷིཀྑཝེ, པདེསེ རཱཛཱ ཁཏྟིཡོ མུདྡྷཱཝསིཏྟོ ཛཱཏོ ཧོཏི། ཨིདཾ, བྷིཀྑཝེ, པཋམཾ རཉྙོ ཁཏྟིཡསྶ མུདྡྷཱཝསིཏྟསྶ ཡཱཝཛཱིཝཾ སཱརཎཱིཡཾ ཧོཏི།
12. ‘‘Tīṇimāni , bhikkhave, rañño khattiyassa muddhāvasittassa yāvajīvaṃ sāraṇīyāni 2 bhavanti. Katamāni tīṇi? Yasmiṃ, bhikkhave, padese rājā khattiyo muddhāvasitto jāto hoti. Idaṃ, bhikkhave, paṭhamaṃ rañño khattiyassa muddhāvasittassa yāvajīvaṃ sāraṇīyaṃ hoti.
‘‘པུན ཙཔརཾ, བྷིཀྑཝེ, ཡསྨིཾ པདེསེ རཱཛཱ ཁཏྟིཡོ མུདྡྷཱཝསིཏྟོ ཧོཏི། ཨིདཾ, བྷིཀྑཝེ, དུཏིཡཾ རཉྙོ ཁཏྟིཡསྶ མུདྡྷཱཝསིཏྟསྶ ཡཱཝཛཱིཝཾ སཱརཎཱིཡཾ ཧོཏི།
‘‘Puna caparaṃ, bhikkhave, yasmiṃ padese rājā khattiyo muddhāvasitto hoti. Idaṃ, bhikkhave, dutiyaṃ rañño khattiyassa muddhāvasittassa yāvajīvaṃ sāraṇīyaṃ hoti.
‘‘པུན ཙཔརཾ, བྷིཀྑཝེ, ཡསྨིཾ པདེསེ རཱཛཱ ཁཏྟིཡོ མུདྡྷཱཝསིཏྟོ སངྒཱམཾ ཨབྷིཝིཛིནིཏྭཱ ཝིཛིཏསངྒཱམོ ཏམེཝ སངྒཱམསཱིསཾ ཨཛ྄ཛྷཱཝསཏི། ཨིདཾ, བྷིཀྑཝེ, ཏཏིཡཾ རཉྙོ ཁཏྟིཡསྶ མུདྡྷཱཝསིཏྟསྶ ཡཱཝཛཱིཝཾ སཱརཎཱིཡཾ ཧོཏི། ཨིམཱནི ཁོ, བྷིཀྑཝེ, ཏཱིཎི རཉྙོ ཁཏྟིཡསྶ མུདྡྷཱཝསིཏྟསྶ ཡཱཝཛཱིཝཾ སཱརཎཱིཡཱནི བྷཝནྟི།
‘‘Puna caparaṃ, bhikkhave, yasmiṃ padese rājā khattiyo muddhāvasitto saṅgāmaṃ abhivijinitvā vijitasaṅgāmo tameva saṅgāmasīsaṃ ajjhāvasati. Idaṃ, bhikkhave, tatiyaṃ rañño khattiyassa muddhāvasittassa yāvajīvaṃ sāraṇīyaṃ hoti. Imāni kho, bhikkhave, tīṇi rañño khattiyassa muddhāvasittassa yāvajīvaṃ sāraṇīyāni bhavanti.
‘‘ཨེཝམེཝཾ ཁོ, བྷིཀྑཝེ, ཏཱིཎིམཱནི བྷིཀྑུསྶ ཡཱཝཛཱིཝཾ སཱརཎཱིཡཱནི བྷཝནྟི། ཀཏམཱནི ཏཱིཎི? ཡསྨིཾ, བྷིཀྑཝེ, པདེསེ བྷིཀྑུ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛིཏོ ཧོཏི། ཨིདཾ, བྷིཀྑཝེ, པཋམཾ བྷིཀྑུསྶ ཡཱཝཛཱིཝཾ སཱརཎཱིཡཾ ཧོཏི།
‘‘Evamevaṃ kho, bhikkhave, tīṇimāni bhikkhussa yāvajīvaṃ sāraṇīyāni bhavanti. Katamāni tīṇi? Yasmiṃ, bhikkhave, padese bhikkhu kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajito hoti. Idaṃ, bhikkhave, paṭhamaṃ bhikkhussa yāvajīvaṃ sāraṇīyaṃ hoti.
‘‘པུན ཙཔརཾ, བྷིཀྑཝེ, ཡསྨིཾ པདེསེ བྷིཀྑུ ‘ཨིདཾ དུཀྑ’ནྟི ཡཐཱབྷཱུཏཾ པཛཱནཱཏི, ‘ཨཡཾ དུཀྑསམུདཡོ’ཏི ཡཐཱབྷཱུཏཾ པཛཱནཱཏི, ‘ཨཡཾ དུཀྑནིརོདྷོ’ཏི ཡཐཱབྷཱུཏཾ པཛཱནཱཏི, ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡཐཱབྷཱུཏཾ པཛཱནཱཏི། ཨིདཾ, བྷིཀྑཝེ, དུཏིཡཾ བྷིཀྑུསྶ ཡཱཝཛཱིཝཾ སཱརཎཱིཡཾ ཧོཏི།
‘‘Puna caparaṃ, bhikkhave, yasmiṃ padese bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Idaṃ, bhikkhave, dutiyaṃ bhikkhussa yāvajīvaṃ sāraṇīyaṃ hoti.
‘‘པུན ཙཔརཾ, བྷིཀྑཝེ, ཡསྨིཾ པདེསེ བྷིཀྑུ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི། ཨིདཾ, བྷིཀྑཝེ, ཏཏིཡཾ བྷིཀྑུསྶ ཡཱཝཛཱིཝཾ སཱརཎཱིཡཾ ཧོཏི། ཨིམཱནི ཁོ, བྷིཀྑཝེ, ཏཱིཎི བྷིཀྑུསྶ ཡཱཝཛཱིཝཾ སཱརཎཱིཡཱནི བྷཝནྟཱི’’ཏི། དུཏིཡཾ།
‘‘Puna caparaṃ, bhikkhave, yasmiṃ padese bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idaṃ, bhikkhave, tatiyaṃ bhikkhussa yāvajīvaṃ sāraṇīyaṃ hoti. Imāni kho, bhikkhave, tīṇi bhikkhussa yāvajīvaṃ sāraṇīyāni bhavantī’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༢. སཱརཎཱིཡསུཏྟཝཎྞནཱ • 2. Sāraṇīyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢. སཱརཎཱིཡསུཏྟཝཎྞནཱ • 2. Sāraṇīyasuttavaṇṇanā
