| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. ஸாரணீயஸுத்தவண்ணனா
2. Sāraṇīyasuttavaṇṇanā
12. து³தியே க²த்தியஸ்ஸாதி ஜாதியா க²த்தியஸ்ஸ. முத்³தா⁴வஸித்தஸ்ஸாதி ராஜாபி⁴ஸேகேன முத்³த⁴னி அபி⁴ஸித்தஸ்ஸ. ஸாரணீயானி ப⁴வந்தீதி ஸரிதப்³பா³னி அஸம்முஸ்ஸனீயானி ஹொந்தி. ஜாதோதி நிப்³ப³த்தோ. யாவஜீவங் ஸாரணீயந்தி த³ஹரகாலே ஜானிதும்பி ந ஸக்கா, அபரபா⁴கே³ பன மாதாபிதுஆதீ³ஹி ஞாதகேஹி வா தா³ஸாதீ³ஹி வா ‘‘த்வங் அஸுகஜனபதே³ அஸுகனக³ரே அஸுகதி³வஸே அஸுகனக்க²த்தே ஜாதோ’’தி ஆசிக்கி²தே ஸுத்வா ததோ பட்டா²ய யாவஜீவங் ஸரதி ந ஸம்முஸ்ஸதி. தேன வுத்தங் – ‘‘யாவஜீவங் ஸாரணீயங் ஹோதீ’’தி.
12. Dutiye khattiyassāti jātiyā khattiyassa. Muddhāvasittassāti rājābhisekena muddhani abhisittassa. Sāraṇīyāni bhavantīti saritabbāni asammussanīyāni honti. Jātoti nibbatto. Yāvajīvaṃ sāraṇīyanti daharakāle jānitumpi na sakkā, aparabhāge pana mātāpituādīhi ñātakehi vā dāsādīhi vā ‘‘tvaṃ asukajanapade asukanagare asukadivase asukanakkhatte jāto’’ti ācikkhite sutvā tato paṭṭhāya yāvajīvaṃ sarati na sammussati. Tena vuttaṃ – ‘‘yāvajīvaṃ sāraṇīyaṃ hotī’’ti.
இத³ங் , பி⁴க்க²வே, து³தியந்தி அபி⁴ஸேகட்டா²னங் நாம ரஞ்ஞோ ப³லவதுட்டி²கரங் ஹோதி, தேனஸ்ஸ தங் யாவஜீவங் ஸாரணீயங். ஸங்கா³மவிஜயட்டா²னேபி ஏஸேவ நயோ. எத்த² பன ஸங்கா³மந்தி யுத்³த⁴ங். அபி⁴விஜினித்வாதி ஜினித்வா ஸத்துமத்³த³னங் கத்வா. தமேவ ஸங்கா³மஸீஸந்தி தமேவ ஸங்கா³மட்டா²னங். அஜ்ஜா²வஸதீதி அபி⁴ப⁴வித்வா ஆவஸதி.
Idaṃ, bhikkhave, dutiyanti abhisekaṭṭhānaṃ nāma rañño balavatuṭṭhikaraṃ hoti, tenassa taṃ yāvajīvaṃ sāraṇīyaṃ. Saṅgāmavijayaṭṭhānepi eseva nayo. Ettha pana saṅgāmanti yuddhaṃ. Abhivijinitvāti jinitvā sattumaddanaṃ katvā. Tameva saṅgāmasīsanti tameva saṅgāmaṭṭhānaṃ. Ajjhāvasatīti abhibhavitvā āvasati.
இதா³னி யஸ்மா ஸம்மாஸம்பு³த்³த⁴ஸ்ஸ ரஞ்ஞோ ஜாதிட்டா²னாதீ³ஹி கத்தப்³ப³கிச்சங் நத்தி², இமஸ்மிங் பன ஸாஸனே தப்படிபா⁴கே³ தயோ புக்³க³லே த³ஸ்ஸேதுங் இத³ங் காரணங் ஆப⁴தங், தஸ்மா தே த³ஸ்ஸெந்தோ ஏவமேவ கோ², பி⁴க்க²வேதிஆதி³மாஹ. தத்த² அனகா³ரியங் பப்³ப³ஜிதோ ஹோதீதி எத்த² சதுபாரிஸுத்³தி⁴ஸீலம்பி பப்³ப³ஜ்ஜானிஸ்ஸிதமேவாதி வேதி³தப்³ப³ங். ஸாரணீயங் ஹோதீதி ‘‘அஹங் அஸுகரட்டே² அஸுகஜனபதே³ அஸுகவிஹாரே அஸுகமாளகே அஸுகதி³வாட்டா²னே அஸுகசங்கமே அஸுகருக்க²மூலே பப்³ப³ஜிதோ’’தி ஏவங் யாவஜீவங் ஸரிதப்³ப³மேவ ஹோதி ந ஸம்முஸ்ஸிதப்³ப³ங்.
Idāni yasmā sammāsambuddhassa rañño jātiṭṭhānādīhi kattabbakiccaṃ natthi, imasmiṃ pana sāsane tappaṭibhāge tayo puggale dassetuṃ idaṃ kāraṇaṃ ābhataṃ, tasmā te dassento evameva kho, bhikkhavetiādimāha. Tattha anagāriyaṃ pabbajito hotīti ettha catupārisuddhisīlampi pabbajjānissitamevāti veditabbaṃ. Sāraṇīyaṃ hotīti ‘‘ahaṃ asukaraṭṭhe asukajanapade asukavihāre asukamāḷake asukadivāṭṭhāne asukacaṅkame asukarukkhamūle pabbajito’’ti evaṃ yāvajīvaṃ saritabbameva hoti na sammussitabbaṃ.
இத³ங் து³க்க²ந்தி எத்தகங் து³க்க²ங், ந இதோ உத்³த⁴ங் து³க்க²ங் அத்தி². அயங் து³க்க²ஸமுத³யோதி எத்தகோ து³க்க²ஸமுத³யோ, ந இதோ உத்³த⁴ங் து³க்க²ஸமுத³யோ அத்தீ²தி. ஸேஸபத³த்³வயேபி ஏஸேவ நயோ. ஏவமெத்த² சதூஹி ஸச்சேஹி ஸோதாபத்திமக்³கோ³ கதி²தோ. கஸிணபரிகம்மவிபஸ்ஸனாஞாணானி பன மக்³க³ஸன்னிஸ்ஸிதானேவ ஹொந்தி. ஸாரணீயங் ஹோதீதி ‘‘அஹங் அஸுகரட்டே²…பே॰… அஸுகருக்க²மூலே ஸோதாபன்னோ ஜாதோ’’தி யாவஜீவங் ஸாரணீயங் ஹோதி அஸம்முஸ்ஸனீயங்.
Idaṃdukkhanti ettakaṃ dukkhaṃ, na ito uddhaṃ dukkhaṃ atthi. Ayaṃ dukkhasamudayoti ettako dukkhasamudayo, na ito uddhaṃ dukkhasamudayo atthīti. Sesapadadvayepi eseva nayo. Evamettha catūhi saccehi sotāpattimaggo kathito. Kasiṇaparikammavipassanāñāṇāni pana maggasannissitāneva honti. Sāraṇīyaṃhotīti ‘‘ahaṃ asukaraṭṭhe…pe… asukarukkhamūle sotāpanno jāto’’ti yāvajīvaṃ sāraṇīyaṃ hoti asammussanīyaṃ.
ஆஸவானங் க²யாதி ஆஸவானங் க²யேன. சேதோவிமுத்திந்தி ப²லஸமாதி⁴ங். பஞ்ஞாவிமுத்திந்தி ப²லபஞ்ஞங். ஸயங் அபி⁴ஞ்ஞா ஸச்சி²கத்வாதி அத்தனாவ அபி⁴விஸிட்டா²ய பஞ்ஞாய பச்சக்க²ங் கத்வா. உபஸம்பஜ்ஜ விஹரதீதி படிலபி⁴த்வா விஹரதி. ஸாரணீயந்தி ‘‘மயா அஸுகரட்டே²…பே॰… அஸுகருக்க²மூலே அரஹத்தங் பத்த’’ந்தி அத்தனோ அரஹத்தபத்திட்டா²னங் நாம யாவஜீவங் ஸாரணீயங் ஹோதி அஸம்முஸ்ஸனீயந்தி யதா²னுஸந்தி⁴னாவ தே³ஸனங் நிட்ட²பேஸி.
Āsavānaṃ khayāti āsavānaṃ khayena. Cetovimuttinti phalasamādhiṃ. Paññāvimuttinti phalapaññaṃ. Sayaṃ abhiññā sacchikatvāti attanāva abhivisiṭṭhāya paññāya paccakkhaṃ katvā. Upasampajja viharatīti paṭilabhitvā viharati. Sāraṇīyanti ‘‘mayā asukaraṭṭhe…pe… asukarukkhamūle arahattaṃ patta’’nti attano arahattapattiṭṭhānaṃ nāma yāvajīvaṃ sāraṇīyaṃ hoti asammussanīyanti yathānusandhināva desanaṃ niṭṭhapesi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ஸாரணீயஸுத்தங் • 2. Sāraṇīyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. ஸாரணீயஸுத்தவண்ணனா • 2. Sāraṇīyasuttavaṇṇanā
