| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
२. सारणीयसुत्तवण्णना
2. Sāraṇīyasuttavaṇṇanā
१२. दुतिये चतुपारिसुद्धिसीलम्पि पब्बज्जानिस्सितमेवाति इमिना पब्बज्जूपगतसमनन्तरमेव चतुपारिसुद्धिसीलम्पि समादिन्नमेव होतीति दस्सेति। मग्गसन्निस्सितानेव होन्तीति मग्गाधिगमत्थाय पटिपज्जितब्बत्ता कसिणपरिकम्मादीनि मग्गसन्निस्सितानेव होन्ति, तस्मा मग्गग्गहणेनेव तेसम्पि गहणं वेदितब्बं, तेहि विना मग्गाधिगमस्स असम्भवतोति अधिप्पायो।
12. Dutiye catupārisuddhisīlampi pabbajjānissitamevāti iminā pabbajjūpagatasamanantarameva catupārisuddhisīlampi samādinnameva hotīti dasseti. Maggasannissitāneva hontīti maggādhigamatthāya paṭipajjitabbattā kasiṇaparikammādīni maggasannissitāneva honti, tasmā maggaggahaṇeneva tesampi gahaṇaṃ veditabbaṃ, tehi vinā maggādhigamassa asambhavatoti adhippāyo.
अग्गमग्गाधिगमेन असम्मोहप्पटिवेधस्स सिखापत्तत्ता मग्गधम्मेसु विय फलधम्मेसुपि सातिसयो असम्मोहोति ‘‘सयं अभिञ्ञा’’ति वुत्तं, सामं जानित्वाति अत्थो। तथा जानना पनस्स सच्छिकरणं अत्तपच्चक्खकिरियाति ‘‘सच्छिकत्वा’’ति वुत्तं। तेनाह ‘‘अत्तनाव अभिविसिट्ठाय पञ्ञाय पच्चक्खं कत्वा’’ति। तथा सच्छिकिरिया चस्स अत्तनि पटिलाभोति ‘‘उपसम्पज्जा’’ति वुत्तन्ति आह ‘‘पटिलभित्वा’’ति।
Aggamaggādhigamena asammohappaṭivedhassa sikhāpattattā maggadhammesu viya phaladhammesupi sātisayo asammohoti ‘‘sayaṃ abhiññā’’ti vuttaṃ, sāmaṃ jānitvāti attho. Tathā jānanā panassa sacchikaraṇaṃ attapaccakkhakiriyāti ‘‘sacchikatvā’’ti vuttaṃ. Tenāha ‘‘attanāva abhivisiṭṭhāya paññāya paccakkhaṃ katvā’’ti. Tathā sacchikiriyā cassa attani paṭilābhoti ‘‘upasampajjā’’ti vuttanti āha ‘‘paṭilabhitvā’’ti.
सारणीयसुत्तवण्णना निट्ठिता।
Sāraṇīyasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / २. सारणीयसुत्तं • 2. Sāraṇīyasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / २. सारणीयसुत्तवण्णना • 2. Sāraṇīyasuttavaṇṇanā
