| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၂. သာရဏီယသုတ္တဝဏ္ဏနာ
2. Sāraṇīyasuttavaṇṇanā
၁၂. ဒုတိယေ စတုပာရိသုဒ္ဓိသီလမ္ပိ ပဗ္ဗဇ္ဇာနိသ္သိတမေဝာတိ ဣမိနာ ပဗ္ဗဇ္ဇူပဂတသမနန္တရမေဝ စတုပာရိသုဒ္ဓိသီလမ္ပိ သမာဒိန္နမေဝ ဟောတီတိ ဒသ္သေတိ။ မဂ္ဂသန္နိသ္သိတာနေဝ ဟောန္တီတိ မဂ္ဂာဓိဂမတ္ထာယ ပဋိပဇ္ဇိတဗ္ဗတ္တာ ကသိဏပရိကမ္မာဒီနိ မဂ္ဂသန္နိသ္သိတာနေဝ ဟောန္တိ, တသ္မာ မဂ္ဂဂ္ဂဟဏေနေဝ တေသမ္ပိ ဂဟဏံ ဝေဒိတဗ္ဗံ, တေဟိ ဝိနာ မဂ္ဂာဓိဂမသ္သ အသမ္ဘဝတောတိ အဓိပ္ပာယော။
12. Dutiye catupārisuddhisīlampi pabbajjānissitamevāti iminā pabbajjūpagatasamanantarameva catupārisuddhisīlampi samādinnameva hotīti dasseti. Maggasannissitāneva hontīti maggādhigamatthāya paṭipajjitabbattā kasiṇaparikammādīni maggasannissitāneva honti, tasmā maggaggahaṇeneva tesampi gahaṇaṃ veditabbaṃ, tehi vinā maggādhigamassa asambhavatoti adhippāyo.
အဂ္ဂမဂ္ဂာဓိဂမေန အသမ္မောဟပ္ပဋိဝေဓသ္သ သိခာပတ္တတ္တာ မဂ္ဂဓမ္မေသု ဝိယ ဖလဓမ္မေသုပိ သာတိသယော အသမ္မောဟောတိ ‘‘သယံ အဘိညာ’’တိ ဝုတ္တံ, သာမံ ဇာနိတ္ဝာတိ အတ္ထော။ တထာ ဇာနနာ ပနသ္သ သစ္ဆိကရဏံ အတ္တပစ္စက္ခကိရိယာတိ ‘‘သစ္ဆိကတ္ဝာ’’တိ ဝုတ္တံ။ တေနာဟ ‘‘အတ္တနာဝ အဘိဝိသိဋ္ဌာယ ပညာယ ပစ္စက္ခံ ကတ္ဝာ’’တိ။ တထာ သစ္ဆိကိရိယာ စသ္သ အတ္တနိ ပဋိလာဘောတိ ‘‘ဥပသမ္ပဇ္ဇာ’’တိ ဝုတ္တန္တိ အာဟ ‘‘ပဋိလဘိတ္ဝာ’’တိ။
Aggamaggādhigamena asammohappaṭivedhassa sikhāpattattā maggadhammesu viya phaladhammesupi sātisayo asammohoti ‘‘sayaṃ abhiññā’’ti vuttaṃ, sāmaṃ jānitvāti attho. Tathā jānanā panassa sacchikaraṇaṃ attapaccakkhakiriyāti ‘‘sacchikatvā’’ti vuttaṃ. Tenāha ‘‘attanāva abhivisiṭṭhāya paññāya paccakkhaṃ katvā’’ti. Tathā sacchikiriyā cassa attani paṭilābhoti ‘‘upasampajjā’’ti vuttanti āha ‘‘paṭilabhitvā’’ti.
သာရဏီယသုတ္တဝဏ္ဏနာ နိဋ္ဌိတာ။
Sāraṇīyasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. သာရဏီယသုတ္တံ • 2. Sāraṇīyasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၂. သာရဏီယသုတ္တဝဏ္ဏနာ • 2. Sāraṇīyasuttavaṇṇanā
