| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. සාරසුත්‌තං
5. Sārasuttaṃ
525. ‘‘සෙය්‍යථාපි, භික්‌ඛවෙ, යෙ කෙචි සාරගන්‌ධා, ලොහිතචන්‌දනං තෙසං අග්‌ගමක්‌ඛායති; එවමෙව ඛො භික්‌ඛවෙ, යෙ කෙචි බොධිපක්‌ඛියා ධම්‌මා , පඤ්‌ඤින්‌ද්‍රියං තෙසං අග්‌ගමක්‌ඛායති, යදිදං – බොධාය. කතමෙ ච, භික්‌ඛවෙ, බොධිපක්‌ඛියා ධම්‌මා? සද්‌ධින්‌ද්‍රියං, භික්‌ඛවෙ, බොධිපක්‌ඛියො ධම්‌මො, තං බොධාය සංවත්‌තති. වීරියින්‌ද්‍රියං…පෙ.… සතින්‌ද්‍රියං …පෙ.… සමාධින්‌ද්‍රියං…පෙ.… පඤ්‌ඤින්‌ද්‍රියං බොධිපක්‌ඛියො ධම්‌මො, තං බොධාය සංවත්‌තති. සෙය්‍යථාපි, භික්‌ඛවෙ, යෙ කෙචි සාරගන්‌ධා, ලොහිතචන්‌දනං තෙසං අග්‌ගමක්‌ඛායති; එවමෙව ඛො, භික්‌ඛවෙ, යෙ කෙචි බොධිපක්‌ඛියා ධම්‌මා, පඤ්‌ඤින්‌ද්‍රියං තෙසං අග්‌ගමක්‌ඛායති, යදිදං – බොධායා’’ති. පඤ්‌චමං.
525. ‘‘Seyyathāpi, bhikkhave, ye keci sāragandhā, lohitacandanaṃ tesaṃ aggamakkhāyati; evameva kho bhikkhave, ye keci bodhipakkhiyā dhammā , paññindriyaṃ tesaṃ aggamakkhāyati, yadidaṃ – bodhāya. Katame ca, bhikkhave, bodhipakkhiyā dhammā? Saddhindriyaṃ, bhikkhave, bodhipakkhiyo dhammo, taṃ bodhāya saṃvattati. Vīriyindriyaṃ…pe… satindriyaṃ …pe… samādhindriyaṃ…pe… paññindriyaṃ bodhipakkhiyo dhammo, taṃ bodhāya saṃvattati. Seyyathāpi, bhikkhave, ye keci sāragandhā, lohitacandanaṃ tesaṃ aggamakkhāyati; evameva kho, bhikkhave, ye keci bodhipakkhiyā dhammā, paññindriyaṃ tesaṃ aggamakkhāyati, yadidaṃ – bodhāyā’’ti. Pañcamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4-5. පදසුත්‌තාදිවණ්‌ණනා • 4-5. Padasuttādivaṇṇanā
