| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
14. ஸாரிபுத்தமொக்³க³ல்லான பப்³ப³ஜ்ஜாகதா²
14. Sāriputtamoggallāna pabbajjākathā
60. ‘‘தேதி ஸாரிபுத்தமொக்³க³ல்லானா. அக³மங்ஸு கிராதி யோஜனா. தத்ராதி கி³ரக்³க³ஸமஜ்ஜே. அதா²தி பரிவிதக்கனானந்தரங். தஸ்ஸாதி ஸஞ்சயஸ்ஸ. பாரந்தி பரதீரங். எத்தா²தி தும்ஹாகங் வாதே³. இத³ந்தி அயங் வாதோ³ எத்தகோயேவாதி அத்தோ². யோதி யோ கோசி. த்வஞ்ச அஹஞ்ச அம்ஹே, தேஸு. நாமதும்ஹஸங்கா²தேஸு ஹி தீஸு ஸத்³தே³ஸு ஏகஸேஸேன கத்தப்³பே³ஸு பச்சி²மஸ்ஸேவ ஏகஸேஸோ காதப்³போ³. தேனாதி கதிககரணஹேதுனா.
60.‘‘Teti sāriputtamoggallānā. Agamaṃsu kirāti yojanā. Tatrāti giraggasamajje. Athāti parivitakkanānantaraṃ. Tassāti sañcayassa. Pāranti paratīraṃ. Etthāti tumhākaṃ vāde. Idanti ayaṃ vādo ettakoyevāti attho. Yoti yo koci. Tvañca ahañca amhe, tesu. Nāmatumhasaṅkhātesu hi tīsu saddesu ekasesena kattabbesu pacchimasseva ekaseso kātabbo. Tenāti katikakaraṇahetunā.
ஸங்கே²பேன வுத்தங் வித்தா²ரேன த³ஸ்ஸெந்தோ ஆஹ ‘‘இத³ங் ஹீ’’திஆதி³. அத்தீ²கேஹீதி அமதேன அத்தி²கேஹி. உபஞ்ஞாதங் மக்³க³ந்தி அமதஸ்ஸ மக்³கோ³ உபக³ந்த்வா ஞாதோ. ஞாதோ சேவ உபக³தோ சாதி ஸஹ உபஸக்³கே³ன பத³ங் பரிவத்தித்வா அத்த²ங் கதெ²ந்தோ உபஸக்³க³த்தோ² ச தா⁴துத்தோ² ச விஸுங்யேவ ஹோதீதி ஞாபேதி. அத்தி²கேஹி அம்ஹேஹி உபஞ்ஞாதங் நிப்³பா³னங் மக்³க³ங் மக்³க³ந்தோ அனுப³ந்தெ⁴ய்யந்தி வா த³ஸ்ஸெந்தோ ஆஹ ‘‘அத² வா’’திஆதி³. மக்³க³ப²லபச்சவெக்க²ணஞாணேஹி உபக³ந்த்வா ஞாதப்³ப³ந்தி உபஞ்ஞாதங் நிப்³பா³னங். மக்³க³தா⁴து²யா அன்வேஸனத்த²ங் த³ஸ்ஸெந்தோ ஆஹ ‘‘பரியேஸந்தோ’’தி.
Saṃkhepena vuttaṃ vitthārena dassento āha ‘‘idaṃ hī’’tiādi. Atthīkehīti amatena atthikehi. Upaññātaṃ magganti amatassa maggo upagantvā ñāto. Ñāto ceva upagato cāti saha upasaggena padaṃ parivattitvā atthaṃ kathento upasaggattho ca dhātuttho ca visuṃyeva hotīti ñāpeti. Atthikehi amhehi upaññātaṃ nibbānaṃ maggaṃ magganto anubandheyyanti vā dassento āha ‘‘atha vā’’tiādi. Maggaphalapaccavekkhaṇañāṇehi upagantvā ñātabbanti upaññātaṃ nibbānaṃ. Maggadhāthuyā anvesanatthaṃ dassento āha ‘‘pariyesanto’’ti.
ஸாரிபுத்தோபி பஞ்ஹங் புச்சீ²தி ஸம்ப³ந்தோ⁴. கமண்ட³லுதோதி குண்டி³கதோ. அத்தனோ ச பரேஸஞ்ச அகத²னேன அந்தரே விவரங் படிஸந்த³ஹதீதி படிஸந்தா⁴ரோ, தங். எத்தா²தி ‘‘ந த்யாஹங் ஸக்கோமீ’’திபதே³. அதி⁴ப்பாயோ ஏவங் வேதி³தப்³போ³தி யோஜனா. எத்தகந்தி எத்தகங் பஞ்ஹங். இமஸ்ஸாதி பரிப்³பா³ஜகஸ்ஸ. அவிஸயபா⁴வந்தி அத்தனோ அவிஸயபா⁴வங்.
Sāriputtopi pañhaṃ pucchīti sambandho. Kamaṇḍalutoti kuṇḍikato. Attano ca paresañca akathanena antare vivaraṃ paṭisandahatīti paṭisandhāro, taṃ. Etthāti ‘‘na tyāhaṃ sakkomī’’tipade. Adhippāyo evaṃ veditabboti yojanā. Ettakanti ettakaṃ pañhaṃ. Imassāti paribbājakassa. Avisayabhāvanti attano avisayabhāvaṃ.
ஹேதுங் படிச்ச ப⁴வந்தீதி ஹேதுப்பப⁴வாதி வசனத்தே²ன பஞ்சக்க²ந்தா⁴ ஹேதுப்பப⁴வா நாமாதி த³ஸ்ஸெந்தோ ஆஹ ‘‘ஹேதுப்பப⁴வா நாம பஞ்சக்க²ந்தா⁴’’தி. தேனாதி ‘‘யே த⁴ம்மா ஹேதுப்பப⁴வா’’தி பதே³ன. அஸ்ஸாதி ஸாரிபுத்தபரிப்³பா³ஜகஸ்ஸ. ‘‘தேஸங் ஹேது நாம ஸமுத³யஸச்ச’’ந்தி இமினா ஹினோதி ஏதஸ்மா ப²லந்தி ஹேதூதி வசனத்தே²ன ஸமுத³யஸச்சங் ஹேது நாமாதி த³ஸ்ஸேதி. தஞ்சாதி ஸமுத³யஸச்சஞ்ச. தேஸந்தி எத்த² தஸத்³த³ஸ்ஸ விஸயங் த³ஸ்ஸேதுங் வுத்தங் ‘‘உபி⁴ன்னம்பி ஸச்சான’’ந்தி. அபவத்திவஸேன நிருஜ்ஜ²தி எத்தா²தி நிரோதோ⁴. தஞ்சாதி நிரோத⁴ஞ்ச. தேனாதி ‘‘தேஸஞ்ச யோ நிரோதோ⁴’’திபதே³ன. அஸ்ஸாதி ஸாரிபுத்தபரிப்³பா³ஜகஸ்ஸ. எத்தா²தி இமிஸ்ஸங் கா³தா²யங், சதூஸு ஸச்சேஸு வா. நயதோதி நானந்தரிகனயதோ, அவினாபா⁴வனயதோ வா, நெத்திதே³ஸனாஹாரனயதோ வா. தமேவத்த²ங் பாகடங் கரொந்தோ ஆஹ ‘‘நிரோதே⁴ ஹீ’’திஆதி³. ஏகதே³ஸஸரூபேகஸேஸனயேன வா மக்³க³ஸச்சங் க³ஹேதப்³ப³ந்தி த³ஸ்ஸெந்தோ ஆஹ ‘‘அத² வா’’திஆதி³. நிரோதோ⁴ ச நிரோதூ⁴பாயோ ச நிரோதோ⁴தி ஏகதே³ஸஸரூபேகஸேஸோ காதப்³போ³. தேஸஞ்சாதி எத்த² அவுத்தஸம்பிண்ட³னத்தே²ன சஸத்³தே³ன மக்³க³ஸச்சங் க³ஹேதப்³ப³ந்திபி வத³ந்தி. அயங் நயோ அட்ட²கதா²யங் ந வுத்தோ. தமேவத்த²ந்தி சதுஸச்சஸங்கா²தங் தமேவத்த²ங். படிபாதெ³ந்தோதி நிக³மெந்தோ.
Hetuṃ paṭicca bhavantīti hetuppabhavāti vacanatthena pañcakkhandhā hetuppabhavā nāmāti dassento āha ‘‘hetuppabhavā nāma pañcakkhandhā’’ti. Tenāti ‘‘ye dhammā hetuppabhavā’’ti padena. Assāti sāriputtaparibbājakassa. ‘‘Tesaṃ hetu nāma samudayasacca’’nti iminā hinoti etasmā phalanti hetūti vacanatthena samudayasaccaṃ hetu nāmāti dasseti. Tañcāti samudayasaccañca. Tesanti ettha tasaddassa visayaṃ dassetuṃ vuttaṃ ‘‘ubhinnampi saccāna’’nti. Apavattivasena nirujjhati etthāti nirodho. Tañcāti nirodhañca. Tenāti ‘‘tesañca yo nirodho’’tipadena. Assāti sāriputtaparibbājakassa. Etthāti imissaṃ gāthāyaṃ, catūsu saccesu vā. Nayatoti nānantarikanayato, avinābhāvanayato vā, nettidesanāhāranayato vā. Tamevatthaṃ pākaṭaṃ karonto āha ‘‘nirodhe hī’’tiādi. Ekadesasarūpekasesanayena vā maggasaccaṃ gahetabbanti dassento āha ‘‘atha vā’’tiādi. Nirodho ca nirodhūpāyo ca nirodhoti ekadesasarūpekaseso kātabbo. Tesañcāti ettha avuttasampiṇḍanatthena casaddena maggasaccaṃ gahetabbantipi vadanti. Ayaṃ nayo aṭṭhakathāyaṃ na vutto. Tamevatthanti catusaccasaṅkhātaṃ tamevatthaṃ. Paṭipādentoti nigamento.
‘‘ஸசேபீ’’தி இமினா யதீ³தி பத³ஸ்ஸத்த²ங் வண்ணேதி. ‘‘எத்தகமேவா’’தி இமினா தாவதே³வாதி பத³ஸ்ஸத்த²ங் வண்ணேதி. ‘‘இதோ உத்தரி நத்தீ²’’தி இமினா ஏவகாரஸ்ஸ ப²லங் த³ஸ்ஸேதி. இதோதி ஸோதாபத்திப²லதோ. ‘‘இத³ங்…பே॰… பத்தப்³ப³’’ந்தி இமினா ‘‘எத்தகமேவா’’தி பத³ஸ்ஸ அத்த²ஸரூபங் த³ஸ்ஸேதி. ‘‘ஏஸோ ஏவ த⁴ம்மோ’’தி இமினா ‘‘ஏஸேவ த⁴ம்மோ’’திபத³ஸ்ஸ அத்த²ங் வண்ணேதி. பச்சப்³யத்தா²தி பதிஅவபுப்³போ³ இதா⁴து படிவித்³த⁴த்தோ²தி ஆஹ ‘‘படிவித்³த⁴த்தா²’’தி. தும்ஹேஹீதி அஸ்ஸஜித்தே²ரங் ஸந்தா⁴யாஹ. இமினா ‘‘பச்சப்³யத்தா²’’தி எத்த² ஹிய்யத்தனீபரஸ்ஸபத³மஜ்ஜி²மபுரிஸப³ஹுவசனத்த²விப⁴த்திங் தீ³பேதி. கப்பனஹுதேஹீதி கப்பானங் நஹுதேஹி, கோடிபகோடிஸதஸஹஸ்ஸானங் ஸதேஹி நஹுதேஹீதி அத்தோ². அப்³ப⁴தீதந்தி அபி⁴அதீதங். அம்ஹேஹி அதி³ட்ட²மேவ ஹுத்வா அதிக்கமாபிதந்தி அத்தோ².
‘‘Sacepī’’ti iminā yadīti padassatthaṃ vaṇṇeti. ‘‘Ettakamevā’’ti iminā tāvadevāti padassatthaṃ vaṇṇeti. ‘‘Ito uttari natthī’’ti iminā evakārassa phalaṃ dasseti. Itoti sotāpattiphalato. ‘‘Idaṃ…pe… pattabba’’nti iminā ‘‘ettakamevā’’ti padassa atthasarūpaṃ dasseti. ‘‘Eso eva dhammo’’ti iminā ‘‘eseva dhammo’’tipadassa atthaṃ vaṇṇeti. Paccabyatthāti patiavapubbo idhātu paṭividdhatthoti āha ‘‘paṭividdhatthā’’ti. Tumhehīti assajittheraṃ sandhāyāha. Iminā ‘‘paccabyatthā’’ti ettha hiyyattanīparassapadamajjhimapurisabahuvacanatthavibhattiṃ dīpeti. Kappanahutehīti kappānaṃ nahutehi, koṭipakoṭisatasahassānaṃ satehi nahutehīti attho. Abbhatītanti abhiatītaṃ. Amhehi adiṭṭhameva hutvā atikkamāpitanti attho.
62. ஆரம்மணபூ⁴தஸ்ஸ நிப்³பா³னஸ்ஸ க³ம்பீ⁴ரத்தா ஆரம்மணிகபூ⁴தங் ஞாணம்பி க³ம்பீ⁴ரமேவாதி⁴ப்பேதந்தி ஆஹ ‘‘க³ம்பீ⁴ரஸ்ஸ ச ஞாணஸ்ஸா’’தி. யதா² ஹி ஸண்ஹவத்த²ஸ்ஸ ஸிப்³ப³னத்தா²ய ஸண்ஹஸூசி அதி⁴ப்பேதாதி. உபதீ⁴னங் ஸம்மா க²யட்டே²ன நிப்³பா³னங் உபதி⁴ஸங்க²யங் நாமாதி ஆஹ ‘‘உபதி⁴ஸங்க²யேதி நிப்³பா³னே’’தி. ததா³ரம்மணாயாதி தங்னிப்³பா³னாரம்மணாய. விமுத்தியாதி ப²லவிமுத்தியா. ஸாவகபாரமீஞாணேதி அக்³க³ஸாவகபாரமீஞாணே. தேஸூதி ஸாரிபுத்தமொக்³க³ல்லானேஸு. அட்³ட⁴மாஸேன அரஹத்தே பதிட்டி²தோதி ஸம்ப³ந்தோ⁴.
62. Ārammaṇabhūtassa nibbānassa gambhīrattā ārammaṇikabhūtaṃ ñāṇampi gambhīramevādhippetanti āha ‘‘gambhīrassa ca ñāṇassā’’ti. Yathā hi saṇhavatthassa sibbanatthāya saṇhasūci adhippetāti. Upadhīnaṃ sammā khayaṭṭhena nibbānaṃ upadhisaṅkhayaṃ nāmāti āha ‘‘upadhisaṅkhayeti nibbāne’’ti. Tadārammaṇāyāti taṃnibbānārammaṇāya. Vimuttiyāti phalavimuttiyā. Sāvakapāramīñāṇeti aggasāvakapāramīñāṇe. Tesūti sāriputtamoggallānesu. Aḍḍhamāsena arahatte patiṭṭhitoti sambandho.
அதீதேதி கப்பஸதஸஹஸ்ஸாதி⁴கே அஸங்க்²யெய்யமத்த²கே. தஸ்ஸாதி பு³த்³த⁴ஸ்ஸ ஸந்திகே அக்³க³ஸாவகபா⁴வங் பத்தே²ஸீதி யோஜனா. அஸ்ஸமேதி முனீனங் டா²னே. தஞ்ஹி ஆ கோத⁴ங், ஆ பு⁴ஸோ வா ராகா³த³யோ ஸமெந்தி எத்தா²தி அஸ்ஸமோதி வுச்சதி, தஸ்மிங். பத்த²யித்வா ச பேஸேஸீதி ஸம்ப³ந்தோ⁴. தத்தா²தி நீலுப்பலமண்ட³பே. தேஸூதி தாபஸஸெட்டீ²ஸு.
Atīteti kappasatasahassādhike asaṅkhyeyyamatthake. Tassāti buddhassa santike aggasāvakabhāvaṃ patthesīti yojanā. Assameti munīnaṃ ṭhāne. Tañhi ā kodhaṃ, ā bhuso vā rāgādayo samenti etthāti assamoti vuccati, tasmiṃ. Patthayitvā ca pesesīti sambandho. Tatthāti nīluppalamaṇḍape. Tesūti tāpasaseṭṭhīsu.
63. யேஸந்தி குலானங். ‘‘வித⁴வபா⁴வாயா’’தி இமினா வித⁴வாய பா⁴வோ வேத⁴ப்³யந்தி வசனத்த²ங் த³ஸ்ஸேதி. வித⁴வாதி ச பதிஸுஞ்ஞா. ஸா ஹி த⁴வேன விக³தாதி ‘‘வித⁴வா’’தி ச, விக³தோ த⁴வோ இமிஸ்ஸாதி ‘‘வித⁴வா’’தி ச வுச்சதி. உப⁴யேனாபீதி புத்தபப்³ப³ஜ்ஜபதிபப்³ப³ஜ்ஜஸங்கா²தேன து³விதே⁴னபி.
63.Yesanti kulānaṃ. ‘‘Vidhavabhāvāyā’’ti iminā vidhavāya bhāvo vedhabyanti vacanatthaṃ dasseti. Vidhavāti ca patisuññā. Sā hi dhavena vigatāti ‘‘vidhavā’’ti ca, vigato dhavo imissāti ‘‘vidhavā’’ti ca vuccati. Ubhayenāpīti puttapabbajjapatipabbajjasaṅkhātena duvidhenapi.
ஸஞ்சயானீதி எத்த² நிஸ்ஸயூபசாரேன நிஸ்ஸயே நிஸ்ஸிதூபசாரோ ஹோதீதி ஆஹ ‘‘ஸஞ்சயஸ்ஸ அந்தேவாஸிகானீ’’தி. அத² வா ணபச்சயோ தஸ்ஸேத³மத்தே² ஹோதீதி ஆஹ ‘‘ஸஞ்சயஸ்ஸ அந்தேவாஸிகானீ’’தி. ‘‘மக³தா⁴ன’’ந்தி ப³ஹுவசனவஸேன வுத்தத்தா ஜனபத³ஸ்ஸ நாமந்தி ஆஹ ‘‘மக³தா⁴னங் ஜனபத³ஸ்ஸா’’தி. கி³ரிப்³ப³ஜந்தி எத்த² வஜோ வியாதி வஜோ, கி³ரி. வஜஸதி³ஸோ கி³ரி எத்தா²தி கி³ரிப்³ப³ஜங் பத³ஹெட்டு²பரியவஸேன, நக³ரங். ‘‘மஹாவீரியவந்தோ’’தி இமினா மஹந்தோ வீரோ ஏதேஸங் ததா²க³தானந்தி மஹாவீராதி வசனத்த²ங் த³ஸ்ஸேதி. த⁴ம்மேன நயமானானங் கா உஸூயா விஜானதந்தி எத்த² கச்சாயனநயேன (கச்சாயனே 277 ஸுத்தே) உஸூயபயோகே³ ஸம்பதா³னங் ஹோதீதி ஆஸங்கா ப⁴வெய்யாதி ஆஹ ‘‘பு⁴ம்மத்தே² ஸாமிவசனங், உபயோக³த்தே² வா’’தி. விஜானந்தானந்தி விஜானந்தேஸு ததா²க³தேஸு, விஜானந்தே வா.
Sañcayānīti ettha nissayūpacārena nissaye nissitūpacāro hotīti āha ‘‘sañcayassa antevāsikānī’’ti. Atha vā ṇapaccayo tassedamatthe hotīti āha ‘‘sañcayassa antevāsikānī’’ti. ‘‘Magadhāna’’nti bahuvacanavasena vuttattā janapadassa nāmanti āha ‘‘magadhānaṃ janapadassā’’ti. Giribbajanti ettha vajo viyāti vajo, giri. Vajasadiso giri etthāti giribbajaṃ padaheṭṭhupariyavasena, nagaraṃ. ‘‘Mahāvīriyavanto’’ti iminā mahanto vīro etesaṃ tathāgatānanti mahāvīrāti vacanatthaṃ dasseti. Dhammena nayamānānaṃ kā usūyā vijānatanti ettha kaccāyananayena (kaccāyane 277 sutte) usūyapayoge sampadānaṃ hotīti āsaṅkā bhaveyyāti āha ‘‘bhummatthe sāmivacanaṃ, upayogatthe vā’’ti. Vijānantānanti vijānantesu tathāgatesu, vijānante vā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 14. ஸாரிபுத்தமொக்³க³ல்லானபப்³ப³ஜ்ஜாகதா² • 14. Sāriputtamoggallānapabbajjākathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸாரிபுத்தமொக்³க³ல்லானபப்³ப³ஜ்ஜாகதா² • Sāriputtamoggallānapabbajjākathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸாரிபுத்தமொக்³க³ல்லானபப்³ப³ஜ்ஜாகதா²வண்ணனா • Sāriputtamoggallānapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸாரிபுத்தமொக்³க³ல்லானபப்³ப³ஜ்ஜாகதா²வண்ணனா • Sāriputtamoggallānapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸாரிபுத்தமொக்³க³ல்லானபப்³ப³ஜ்ஜாகதா²வண்ணனா • Sāriputtamoggallānapabbajjākathāvaṇṇanā
