| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ஸாரிபுத்தமொக்³க³ல்லானபப்³ப³ஜ்ஜாகதா²
Sāriputtamoggallānapabbajjākathā
60. ஸாரிபுத்தமொக்³க³ல்லானாதி ஸாரிபுத்தோ ச மொக்³க³ல்லானோ ச. தேஹி கதிகா கதா ஹோதி ‘‘யோ பட²மங் அமதங் அதி⁴க³ச்ச²தி, ஸோ ஆரோசேதூ’’தி தே கிர உபோ⁴பி கி³ஹிகாலே உபதிஸ்ஸோ கோலிதோதி ஏவங் பஞ்ஞாயமானநாமா அட்³ட⁴தெய்யஸதமாணவகபரிவாரா கி³ரக்³க³ஸமஜ்ஜங் அக³மங்ஸு. தத்ர நேஸங் மஹாஜனங் தி³ஸ்வா ஏதத³ஹோஸி – ‘‘அயங் நாம ஏவங் மஹாஸத்தனிகாயோ அப்பத்தே வஸ்ஸஸதே மரணமுகே² பதிஸ்ஸதீ’’தி. அத² உபோ⁴பி உட்டி²தாய பரிஸாய அஞ்ஞமஞ்ஞங் புச்சி²த்வா ஏகஜ்ஜா²ஸயா பச்சுபட்டி²தமரணஸஞ்ஞா ஸம்மந்தயிங்ஸு ‘‘ஸம்ம மரணே ஸதி அமதேனாபி ப⁴விதப்³ப³ங், ஹந்த³ மயங் அமதங் பரியேஸாமா’’தி அமதபரியேஸனத்த²ங் ஸஞ்சயஸ்ஸ ச²ன்னபரிப்³பா³ஜகஸ்ஸ ஸந்திகே ஸபரிஸா பப்³ப³ஜித்வா கதிபாஹேனேவ தஸ்ஸ ஞாணவிஸயே பாரங் க³ந்த்வா அமதங் அபஸ்ஸந்தா புச்சி²ங்ஸு ‘‘கிங் நு கோ², ஆசரிய, அஞ்ஞோபெத்த² ஸாரோ அத்தீ²’’தி? ‘‘நத்தா²வுஸோ, எத்தகமேவ இத³’’ந்தி ச ஸுத்வா ‘‘துச்ச²ங் இத³ங் ஆவுஸோ நிஸ்ஸாரங், யோ தா³னி அம்ஹேஸு பட²மங் அமதங் அதி⁴க³ச்ச²தி, ஸோ இதரஸ்ஸ ஆரோசேதூ’’தி கதிகங் அகங்ஸு. தேன வுத்தங் – ‘‘தேஹி கதிகா கதா ஹோதீ’’திஆதி³.
60.Sāriputtamoggallānāti sāriputto ca moggallāno ca. Tehi katikā katā hoti‘‘yo paṭhamaṃ amataṃ adhigacchati, so ārocetū’’ti te kira ubhopi gihikāle upatisso kolitoti evaṃ paññāyamānanāmā aḍḍhateyyasatamāṇavakaparivārā giraggasamajjaṃ agamaṃsu. Tatra nesaṃ mahājanaṃ disvā etadahosi – ‘‘ayaṃ nāma evaṃ mahāsattanikāyo appatte vassasate maraṇamukhe patissatī’’ti. Atha ubhopi uṭṭhitāya parisāya aññamaññaṃ pucchitvā ekajjhāsayā paccupaṭṭhitamaraṇasaññā sammantayiṃsu ‘‘samma maraṇe sati amatenāpi bhavitabbaṃ, handa mayaṃ amataṃ pariyesāmā’’ti amatapariyesanatthaṃ sañcayassa channaparibbājakassa santike saparisā pabbajitvā katipāheneva tassa ñāṇavisaye pāraṃ gantvā amataṃ apassantā pucchiṃsu ‘‘kiṃ nu kho, ācariya, aññopettha sāro atthī’’ti? ‘‘Natthāvuso, ettakameva ida’’nti ca sutvā ‘‘tucchaṃ idaṃ āvuso nissāraṃ, yo dāni amhesu paṭhamaṃ amataṃ adhigacchati, so itarassa ārocetū’’ti katikaṃ akaṃsu. Tena vuttaṃ – ‘‘tehi katikā katā hotī’’tiādi.
பாஸாதி³கேன அபி⁴க்கந்தேனாதிஆதீ³ஸு இத்த²ம்பூ⁴தலக்க²ணே கரணவசனங் வேதி³தப்³ப³ங். அத்தி²கேஹி உபஞ்ஞாதங் மக்³க³ந்தி ஏதங் அனுப³ந்த⁴னஸ்ஸ காரணவசனங்; இத³ஞ்ஹி வுத்தங் ஹோதி – ‘‘யங்னூனாஹங் இமங் பி⁴க்கு²ங் பிட்டி²தோ பிட்டி²தோ அனுப³ந்தெ⁴ய்யங், கஸ்மா ? யஸ்மா இத³ங் பிட்டி²தோ பிட்டி²தோ அனுப³ந்த⁴னங் நாம அத்தி²கேஹி உபஞ்ஞாதங் மக்³க³ங் ஞாதோ சேவ உபக³தோ ச மக்³கோ³’’தி அத்தோ². அத² வா அத்தி²கேஹி அம்ஹேஹி ‘‘மரணே ஸதி அமதேனாபி ப⁴விதப்³ப³’’ந்தி ஏவங் கேவலங் அத்தீ²தி உபஞ்ஞாதங் நிப்³பா³னங் நாம, தங் மக்³க³ந்தோ பரியேஸந்தோதி ஏவம்பெத்த² அத்தோ² த³ட்ட²ப்³போ³.
Pāsādikena abhikkantenātiādīsu itthambhūtalakkhaṇe karaṇavacanaṃ veditabbaṃ. Atthikehi upaññātaṃ magganti etaṃ anubandhanassa kāraṇavacanaṃ; idañhi vuttaṃ hoti – ‘‘yaṃnūnāhaṃ imaṃ bhikkhuṃ piṭṭhito piṭṭhito anubandheyyaṃ, kasmā ? Yasmā idaṃ piṭṭhito piṭṭhito anubandhanaṃ nāma atthikehi upaññātaṃ maggaṃ ñāto ceva upagato ca maggo’’ti attho. Atha vā atthikehi amhehi ‘‘maraṇe sati amatenāpi bhavitabba’’nti evaṃ kevalaṃ atthīti upaññātaṃ nibbānaṃ nāma, taṃ magganto pariyesantoti evampettha attho daṭṭhabbo.
பிண்ட³பாதங் ஆதா³ய படிக்கமீதி ஸுதி³ன்னகண்டே³ வுத்தப்பகாரங் அஞ்ஞதரங் குட்டமூலங் உபஸங்கமித்வா நிஸீதி³. ஸாரிபுத்தோபி கோ² ‘‘அகாலோ கோ² தாவ பஞ்ஹங் புச்சி²து’’ந்தி காலங் ஆக³மயமானோ ஏகமந்தங் ட²த்வா வத்தபடிபத்திபூரணத்த²ங் கதப⁴த்தகிச்சஸ்ஸ தே²ரஸ்ஸ அத்தனோ கமண்ட³லுதோ உத³கங் த³த்வா தோ⁴தஹத்த²பாதே³ன தே²ரேன ஸத்³தி⁴ங் படிஸந்தா²ரங் கத்வா பஞ்ஹங் புச்சி². தேன வுத்தங் – ‘‘அத² கோ² ஸாரிபுத்தோ பரிப்³பா³ஜகோ’’திஆதி³. ந தாஹங் ஸக்கோமீதி ந தே அஹங் ஸக்கோமி. எத்த² ச படிஸம்பி⁴தா³ப்பத்தோ தே²ரோ ந எத்தகங் ந ஸக்கோதி. அத² கோ² இமஸ்ஸ த⁴ம்மகா³ரவங் உப்பாதெ³ஸ்ஸாமீதி ஸப்³பா³காரேன பு³த்³த⁴விஸயே அவிஸயபா⁴வங் க³ஹெத்வா ஏவமாஹ.
Piṇḍapātaṃ ādāya paṭikkamīti sudinnakaṇḍe vuttappakāraṃ aññataraṃ kuṭṭamūlaṃ upasaṅkamitvā nisīdi. Sāriputtopi kho ‘‘akālo kho tāva pañhaṃ pucchitu’’nti kālaṃ āgamayamāno ekamantaṃ ṭhatvā vattapaṭipattipūraṇatthaṃ katabhattakiccassa therassa attano kamaṇḍaluto udakaṃ datvā dhotahatthapādena therena saddhiṃ paṭisanthāraṃ katvā pañhaṃ pucchi. Tena vuttaṃ – ‘‘atha kho sāriputto paribbājako’’tiādi. Na tāhaṃ sakkomīti na te ahaṃ sakkomi. Ettha ca paṭisambhidāppatto thero na ettakaṃ na sakkoti. Atha kho imassa dhammagāravaṃ uppādessāmīti sabbākārena buddhavisaye avisayabhāvaṃ gahetvā evamāha.
யே த⁴ம்மா ஹேதுப்பப⁴வாதி ஹேதுப்பப⁴வா நாம பஞ்சக்க²ந்தா⁴; தேனஸ்ஸ து³க்க²ஸச்சங் த³ஸ்ஸேதி. தேஸங் ஹேதுங் ததா²க³தோ ஆஹாதி தேஸங் ஹேது நாம ஸமுத³யஸச்சங்; தஞ்ச ததா²க³தோ ஆஹாதி த³ஸ்ஸேதி. தேஸஞ்ச யோ நிரோதோ⁴தி தேஸங் உபி⁴ன்னம்பி ஸச்சானங் யோ அப்பவத்தினிரோதோ⁴; தஞ்ச ததா²க³தோ ஆஹாதி அத்தோ². தேனஸ்ஸ நிரோத⁴ஸச்சங் த³ஸ்ஸேதி. மக்³க³ஸச்சங் பனெத்த² ஸரூபதோ அத³ஸ்ஸிதம்பி நயதோ த³ஸ்ஸிதங் ஹோதி, நிரோதே⁴ ஹி வுத்தே தஸ்ஸ ஸம்பாபகோ மக்³கோ³ வுத்தோவ ஹோதி. அத² வா தேஸஞ்ச யோ நிரோதோ⁴தி எத்த² தேஸங் யோ நிரோதோ⁴ ச நிரோது⁴பாயோ சாதி ஏவங் த்³வேபி ஸச்சானி த³ஸ்ஸிதானி ஹொந்தீதி. இதா³னி தமேவத்த²ங் படிபாதெ³ந்தோ ஆஹ – ‘‘ஏவங்வாதீ³ மஹாஸமணோ’’தி.
Ye dhammā hetuppabhavāti hetuppabhavā nāma pañcakkhandhā; tenassa dukkhasaccaṃ dasseti. Tesaṃ hetuṃ tathāgato āhāti tesaṃ hetu nāma samudayasaccaṃ; tañca tathāgato āhāti dasseti. Tesañca yo nirodhoti tesaṃ ubhinnampi saccānaṃ yo appavattinirodho; tañca tathāgato āhāti attho. Tenassa nirodhasaccaṃ dasseti. Maggasaccaṃ panettha sarūpato adassitampi nayato dassitaṃ hoti, nirodhe hi vutte tassa sampāpako maggo vuttova hoti. Atha vā tesañca yo nirodhoti ettha tesaṃ yo nirodho ca nirodhupāyo cāti evaṃ dvepi saccāni dassitāni hontīti. Idāni tamevatthaṃ paṭipādento āha – ‘‘evaṃvādī mahāsamaṇo’’ti.
ஏஸேவ த⁴ம்மோ யதி³ தாவதே³வாதி ஸசேபி இதோ உத்தரி நத்தி², எத்தகமேவ இத³ங் ஸோதாபத்திப²லமத்தமேவ பத்தப்³ப³ங், ததா²பி ஏஸோ ஏவ த⁴ம்மோதி அத்தோ². பச்சப்³யத்த² பத³மஸோகந்தி யங் மயங் பரியேஸமானா விசராம, தங் பத³மஸோகங் படிவித்³தா⁴த்த² தும்ஹே; பத்தங் தங் தும்ஹேஹீதி அத்தோ². அதி³ட்ட²ங் அப்³ப⁴தீதங் ப³ஹுகேஹி கப்பனஹுதேஹீதி அம்ஹேஹி நாம இத³ங் பத³ங் ப³ஹுகேஹி கப்பனஹுதேஹி அதி³ட்ட²மேவ அப்³ப⁴தீதங்; இதி தஸ்ஸ பத³ஸ்ஸ அதி³ட்ட²பா⁴வேன தீ³க⁴ரத்தங் அத்தனோ மஹாஜானிபா⁴வங் தீ³பேதி.
Eseva dhammo yadi tāvadevāti sacepi ito uttari natthi, ettakameva idaṃ sotāpattiphalamattameva pattabbaṃ, tathāpi eso eva dhammoti attho. Paccabyattha padamasokanti yaṃ mayaṃ pariyesamānā vicarāma, taṃ padamasokaṃ paṭividdhāttha tumhe; pattaṃ taṃ tumhehīti attho. Adiṭṭhaṃ abbhatītaṃ bahukehi kappanahutehīti amhehi nāma idaṃ padaṃ bahukehi kappanahutehi adiṭṭhameva abbhatītaṃ; iti tassa padassa adiṭṭhabhāvena dīgharattaṃ attano mahājānibhāvaṃ dīpeti.
62. க³ம்பீ⁴ரே ஞாணவிஸயேதி க³ம்பீ⁴ரே சேவ க³ம்பீ⁴ரஸ்ஸ ச ஞாணஸ்ஸ விஸயபூ⁴தே. அனுத்தரே உபதி⁴ஸங்க²யேதி நிப்³பா³னே. விமுத்தேதி ததா³ரம்மணாய விமுத்தியா விமுத்தே. ப்³யாகாஸீதி ‘‘ஏதங் மே ஸாவகயுக³ங் ப⁴விஸ்ஸதி அக்³க³ங் ப⁴த்³த³யுக³’’ந்தி வத³ந்தோ ஸாவகபாரமிஞ்ஞாணே ப்³யாகாஸி. ஸாவ தேஸங் ஆயஸ்மந்தானங் உபஸம்பதா³ அஹோஸீதி ஸா ஏஹிபி⁴க்கூ²பஸம்பதா³யேவ தேஸங் உபஸம்பதா³ அஹோஸி. ஏவங் உபஸம்பன்னேஸு ச தேஸு மஹாமொக்³க³ல்லானத்தே²ரோ ஸத்தஹி தி³வஸேஹி அரஹத்தே பதிட்டி²தோ, ஸாரிபுத்தத்தே²ரோ அட்³ட⁴மாஸேன.
62.Gambhīre ñāṇavisayeti gambhīre ceva gambhīrassa ca ñāṇassa visayabhūte. Anuttare upadhisaṅkhayeti nibbāne. Vimutteti tadārammaṇāya vimuttiyā vimutte. Byākāsīti ‘‘etaṃ me sāvakayugaṃ bhavissati aggaṃ bhaddayuga’’nti vadanto sāvakapāramiññāṇe byākāsi. Sāva tesaṃ āyasmantānaṃ upasampadā ahosīti sā ehibhikkhūpasampadāyeva tesaṃ upasampadā ahosi. Evaṃ upasampannesu ca tesu mahāmoggallānatthero sattahi divasehi arahatte patiṭṭhito, sāriputtatthero aḍḍhamāsena.
அதீதே கிர அனோமத³ஸ்ஸீ நாம பு³த்³தோ⁴ லோகே உத³பாதி³. தஸ்ஸ ஸரதோ³ நாம தாபஸோ ஸகே அஸ்ஸமே நானாபுப்பே²ஹி மண்ட³பங் கத்வா புப்பா²ஸனேயேவ ப⁴க³வந்தங் நிஸீதா³பெத்வா பி⁴க்கு²ஸங்க⁴ஸ்ஸாபி ததே²வ மண்ட³பங் கத்வா புப்பா²ஸனானி பஞ்ஞபெத்வா அக்³க³ஸாவகபா⁴வங் பத்தே²ஸி. பத்த²யித்வா ச ஸிரீவட்³ட⁴ஸ்ஸ நாம ஸெட்டி²னோ பேஸேஸி ‘‘மயா அக்³க³ஸாவகட்டா²னங் பத்தி²தங், த்வம்பி ஆக³ந்த்வா ஏகங் டா²னங் பத்தே²ஹீ’’தி. ஸெட்டி² நீலுப்பலமண்ட³பங் கத்வா பு³த்³த⁴ப்பமுக²ங் பி⁴க்கு²ஸங்க⁴ங், தத்த² போ⁴ஜெத்வா து³தியஸாவகபா⁴வங் பத்தே²ஸி. தேஸு ஸரத³தாபஸோ ஸாரிபுத்தத்தே²ரோ ஜாதோ, ஸிரீவட்³டோ⁴ மஹாமொக்³க³ல்லானத்தே²ரோதி இத³ங் நேஸங் புப்³ப³கம்மங்.
Atīte kira anomadassī nāma buddho loke udapādi. Tassa sarado nāma tāpaso sake assame nānāpupphehi maṇḍapaṃ katvā pupphāsaneyeva bhagavantaṃ nisīdāpetvā bhikkhusaṅghassāpi tatheva maṇḍapaṃ katvā pupphāsanāni paññapetvā aggasāvakabhāvaṃ patthesi. Patthayitvā ca sirīvaḍḍhassa nāma seṭṭhino pesesi ‘‘mayā aggasāvakaṭṭhānaṃ patthitaṃ, tvampi āgantvā ekaṃ ṭhānaṃ patthehī’’ti. Seṭṭhi nīluppalamaṇḍapaṃ katvā buddhappamukhaṃ bhikkhusaṅghaṃ, tattha bhojetvā dutiyasāvakabhāvaṃ patthesi. Tesu saradatāpaso sāriputtatthero jāto, sirīvaḍḍho mahāmoggallānattheroti idaṃ nesaṃ pubbakammaṃ.
63. அபுத்தகதாயாதிஆதீ³ஸு யேஸங் புத்தா பப்³ப³ஜந்தி, தேஸங் அபுத்தகதாய. யாஸங் பதீ பப்³ப³ஜந்தி, தாஸங் வேத⁴ப்³யாய வித⁴வாபா⁴வாய. உப⁴யேனாபி குலுபச்சே²தா³ய. ஸஞ்சயானீதி ஸஞ்சயஸ்ஸ அந்தேவாஸிகானி. மக³தா⁴னங் கி³ரிப்³ப³ஜந்தி மக³தா⁴னங் ஜனபத³ஸ்ஸ கி³ரிப்³ப³ஜங் நக³ரங். மஹாவீராதி மஹாவீரியவந்தோ. நயமானானந்தி நயமானேஸு. பு⁴ம்மத்தே² ஸாமிவசனங், உபயோக³த்தே² வா. கா உஸூயா விஜானதந்தி த⁴ம்மேன நயந்தீதி ஏவங் விஜானந்தானங் கா இஸ்ஸா.
63.Aputtakatāyātiādīsu yesaṃ puttā pabbajanti, tesaṃ aputtakatāya. Yāsaṃ patī pabbajanti, tāsaṃ vedhabyāya vidhavābhāvāya. Ubhayenāpi kulupacchedāya. Sañcayānīti sañcayassa antevāsikāni. Magadhānaṃ giribbajanti magadhānaṃ janapadassa giribbajaṃ nagaraṃ. Mahāvīrāti mahāvīriyavanto. Nayamānānanti nayamānesu. Bhummatthe sāmivacanaṃ, upayogatthe vā. Kā usūyā vijānatanti dhammena nayantīti evaṃ vijānantānaṃ kā issā.
ஸாரிபுத்தமொக்³க³ல்லானபப்³ப³ஜ்ஜாகதா² நிட்டி²தா.
Sāriputtamoggallānapabbajjākathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 14. ஸாரிபுத்தமொக்³க³ல்லானபப்³ப³ஜ்ஜாகதா² • 14. Sāriputtamoggallānapabbajjākathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸாரிபுத்தமொக்³க³ல்லானபப்³ப³ஜ்ஜாகதா²வண்ணனா • Sāriputtamoggallānapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸாரிபுத்தமொக்³க³ல்லானபப்³ப³ஜ்ஜாகதா²வண்ணனா • Sāriputtamoggallānapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸாரிபுத்தமொக்³க³ல்லானபப்³ப³ஜ்ஜாகதா²வண்ணனா • Sāriputtamoggallānapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 14. ஸாரிபுத்தமொக்³க³ல்லான பப்³ப³ஜ்ஜாகதா² • 14. Sāriputtamoggallāna pabbajjākathā
