| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১৪. সারিপুত্তমোগ্গল্লানপব্বজ্জাকথা
14. Sāriputtamoggallānapabbajjākathā
৬০. তেন খো পন সমযেন সঞ্চযো 1 পরিব্বাজকো রাজগহে পটিৰসতি মহতিযা পরিব্বাজকপরিসায সদ্ধিং অড্ঢতেয্যেহি পরিব্বাজকসতেহি। তেন খো পন সমযেন সারিপুত্তমোগ্গল্লানা সঞ্চযে পরিব্বাজকে ব্রহ্মচরিযং চরন্তি। তেহি কতিকা কতা হোতি – যো পঠমং অমতং অধিগচ্ছতি, সো ইতরস্স আরোচেতূতি। অথ খো আযস্মা অস্সজি পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসি পাসাদিকেন অভিক্কন্তেন পটিক্কন্তেন আলোকিতেন ৰিলোকিতেন সমিঞ্জিতেন পসারিতেন, ওক্খিত্তচক্খু ইরিযাপথসম্পন্নো। অদ্দসা খো সারিপুত্তো পরিব্বাজকো আযস্মন্তং অস্সজিং রাজগহে পিণ্ডায চরন্তং পাসাদিকেন অভিক্কন্তেন পটিক্কন্তেন আলোকিতেন ৰিলোকিতেন সমিঞ্জিতেন পসারিতেন ওক্খিত্তচক্খুং ইরিযাপথসম্পন্নং। দিস্ৰানস্স এতদহোসি – ‘‘যে ৰত লোকে অরহন্তো ৰা অরহত্তমগ্গং ৰা সমাপন্না, অযং তেসং ভিক্খু অঞ্ঞতরো। যংনূনাহং ইমং ভিক্খুং উপসঙ্কমিত্ৰা পুচ্ছেয্যং – ‘কংসি ত্ৰং, আৰুসো, উদ্দিস্স পব্বজিতো, কো ৰা তে সত্থা, কস্স ৰা ত্ৰং ধম্মং রোচেসী’’’তি? অথ খো সারিপুত্তস্স পরিব্বাজকস্স এতদহোসি – ‘‘অকালো খো ইমং ভিক্খুং পুচ্ছিতুং, অন্তরঘরং পৰিট্ঠো পিণ্ডায চরতি। যংনূনাহং ইমং ভিক্খুং পিট্ঠিতো পিট্ঠিতো অনুবন্ধেয্যং, অত্থিকেহি উপঞ্ঞাতং মগ্গ’’ন্তি। অথ খো আযস্মা অস্সজি রাজগহে পিণ্ডায চরিত্ৰা পিণ্ডপাতং আদায পটিক্কমি। অথ খো সারিপুত্তোপি পরিব্বাজকো যেনাযস্মা অস্সজি তেনুপসঙ্কমি, উপসঙ্কমিত্ৰা আযস্মতা অস্সজিনা সদ্ধিং সম্মোদি, সম্মোদনীযং কথং সারণীযং ৰীতিসারেত্ৰা একমন্তং অট্ঠাসি। একমন্তং ঠিতো খো সারিপুত্তো পরিব্বাজকো আযস্মন্তং অস্সজিং এতদৰোচ – ‘‘ৰিপ্পসন্নানি খো তে, আৰুসো, ইন্দ্রিযানি, পরিসুদ্ধো ছৰিৰণ্ণো পরিযোদাতো। কংসি ত্ৰং, আৰুসো, উদ্দিস্স পব্বজিতো, কো ৰা তে সত্থা, কস্স ৰা ত্ৰং ধম্মং রোচেসী’’তি? ‘‘অত্থাৰুসো, মহাসমণো সক্যপুত্তো সক্যকুলা পব্বজিতো, তাহং ভগৰন্তং উদ্দিস্স পব্বজিতো, সো চ মে ভগৰা সত্থা, তস্স চাহং ভগৰতো ধম্মং রোচেমী’’তি। ‘‘কিংৰাদী পনাযস্মতো সত্থা, কিমক্খাযী’’তি? ‘‘অহং খো, আৰুসো, নৰো অচিরপব্বজিতো, অধুনাগতো ইমং ধম্মৰিনযং, ন তাহং সক্কোমি ৰিত্থারেন ধম্মং দেসেতুং, অপি চ তে সংখিত্তেন অত্থং ৰক্খামী’’তি। অথ খো সারিপুত্তো পরিব্বাজকো আযস্মন্তং অস্সজিং এতদৰোচ – ‘‘হোতু, আৰুসো –
60. Tena kho pana samayena sañcayo 2 paribbājako rājagahe paṭivasati mahatiyā paribbājakaparisāya saddhiṃ aḍḍhateyyehi paribbājakasatehi. Tena kho pana samayena sāriputtamoggallānā sañcaye paribbājake brahmacariyaṃ caranti. Tehi katikā katā hoti – yo paṭhamaṃ amataṃ adhigacchati, so itarassa ārocetūti. Atha kho āyasmā assaji pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi pāsādikena abhikkantena paṭikkantena ālokitena vilokitena samiñjitena pasāritena, okkhittacakkhu iriyāpathasampanno. Addasā kho sāriputto paribbājako āyasmantaṃ assajiṃ rājagahe piṇḍāya carantaṃ pāsādikena abhikkantena paṭikkantena ālokitena vilokitena samiñjitena pasāritena okkhittacakkhuṃ iriyāpathasampannaṃ. Disvānassa etadahosi – ‘‘ye vata loke arahanto vā arahattamaggaṃ vā samāpannā, ayaṃ tesaṃ bhikkhu aññataro. Yaṃnūnāhaṃ imaṃ bhikkhuṃ upasaṅkamitvā puccheyyaṃ – ‘kaṃsi tvaṃ, āvuso, uddissa pabbajito, ko vā te satthā, kassa vā tvaṃ dhammaṃ rocesī’’’ti? Atha kho sāriputtassa paribbājakassa etadahosi – ‘‘akālo kho imaṃ bhikkhuṃ pucchituṃ, antaragharaṃ paviṭṭho piṇḍāya carati. Yaṃnūnāhaṃ imaṃ bhikkhuṃ piṭṭhito piṭṭhito anubandheyyaṃ, atthikehi upaññātaṃ magga’’nti. Atha kho āyasmā assaji rājagahe piṇḍāya caritvā piṇḍapātaṃ ādāya paṭikkami. Atha kho sāriputtopi paribbājako yenāyasmā assaji tenupasaṅkami, upasaṅkamitvā āyasmatā assajinā saddhiṃ sammodi, sammodanīyaṃ kathaṃ sāraṇīyaṃ vītisāretvā ekamantaṃ aṭṭhāsi. Ekamantaṃ ṭhito kho sāriputto paribbājako āyasmantaṃ assajiṃ etadavoca – ‘‘vippasannāni kho te, āvuso, indriyāni, parisuddho chavivaṇṇo pariyodāto. Kaṃsi tvaṃ, āvuso, uddissa pabbajito, ko vā te satthā, kassa vā tvaṃ dhammaṃ rocesī’’ti? ‘‘Atthāvuso, mahāsamaṇo sakyaputto sakyakulā pabbajito, tāhaṃ bhagavantaṃ uddissa pabbajito, so ca me bhagavā satthā, tassa cāhaṃ bhagavato dhammaṃ rocemī’’ti. ‘‘Kiṃvādī panāyasmato satthā, kimakkhāyī’’ti? ‘‘Ahaṃ kho, āvuso, navo acirapabbajito, adhunāgato imaṃ dhammavinayaṃ, na tāhaṃ sakkomi vitthārena dhammaṃ desetuṃ, api ca te saṃkhittena atthaṃ vakkhāmī’’ti. Atha kho sāriputto paribbājako āyasmantaṃ assajiṃ etadavoca – ‘‘hotu, āvuso –
‘‘অপ্পং ৰা বহুং ৰা ভাসস্সু, অত্থংযেৰ মে ব্রূহি।
‘‘Appaṃ vā bahuṃ vā bhāsassu, atthaṃyeva me brūhi;
অত্থেনেৰ মে অত্থো, কিং কাহসি ব্যঞ্জনং বহু’’ন্তি॥
Attheneva me attho, kiṃ kāhasi byañjanaṃ bahu’’nti.
অথ খো আযস্মা অস্সজি সারিপুত্তস্স পরিব্বাজকস্স ইমং ধম্মপরিযাযং অভাসি –
Atha kho āyasmā assaji sāriputtassa paribbājakassa imaṃ dhammapariyāyaṃ abhāsi –
3 ‘‘যে ধম্মা হেতুপ্পভৰা, তেসং হেতুং তথাগতো আহ।
4 ‘‘Ye dhammā hetuppabhavā, tesaṃ hetuṃ tathāgato āha;
তেসঞ্চ যো নিরোধো, এৰংৰাদী মহাসমণো’’তি॥
Tesañca yo nirodho, evaṃvādī mahāsamaṇo’’ti.
অথ খো সারিপুত্তস্স পরিব্বাজকস্স ইমং ধম্মপরিযাযং সুত্ৰা ৰিরজং ৰীতমলং ধম্মচক্খুং উদপাদি – ‘‘যং কিঞ্চি সমুদযধম্মং, সব্বং তং নিরোধধম্ম’’ন্তি।
Atha kho sāriputtassa paribbājakassa imaṃ dhammapariyāyaṃ sutvā virajaṃ vītamalaṃ dhammacakkhuṃ udapādi – ‘‘yaṃ kiñci samudayadhammaṃ, sabbaṃ taṃ nirodhadhamma’’nti.
5 এসেৰ ধম্মো যদি তাৰদেৰ, পচ্চব্যত্থ পদমসোকং।
6 Eseva dhammo yadi tāvadeva, paccabyattha padamasokaṃ;
অদিট্ঠং অব্ভতীতং, বহুকেহি কপ্পনহুতেহীতি॥
Adiṭṭhaṃ abbhatītaṃ, bahukehi kappanahutehīti.
৬১. অথ খো সারিপুত্তো পরিব্বাজকো যেন মোগ্গল্লানো পরিব্বাজকো তেনুপসঙ্কমি। অদ্দসা খো মোগ্গল্লানো পরিব্বাজকো সারিপুত্তং পরিব্বাজকং দূরতোৰ আগচ্ছন্তং, দিস্ৰান সারিপুত্তং পরিব্বাজকং এতদৰোচ – ‘‘ৰিপ্পসন্নানি খো তে, আৰুসো, ইন্দ্রিযানি, পরিসুদ্ধো ছৰিৰণ্ণো পরিযোদাতো। কচ্চি নু ত্ৰং, আৰুসো, অমতং অধিগতো’’তি? ‘‘আমাৰুসো, অমতং অধিগতো’’তি। ‘‘যথাকথং পন ত্ৰং, আৰুসো, অমতং অধিগতো’’তি? ‘‘ইধাহং, আৰুসো, অদ্দসং অস্সজিং ভিক্খুং রাজগহে পিণ্ডায চরন্তং পাসাদিকেন অভিক্কন্তেন পটিক্কন্তেন আলোকিতেন ৰিলোকিতেন সমিঞ্জিতেন পসারিতেন ওক্খিত্তচক্খুং ইরিযাপথসম্পন্নং। দিস্ৰান মে এতদহোসি – ‘যে ৰত লোকে অরহন্তো ৰা অরহত্তমগ্গং ৰা সমাপন্না, অযং তেসং ভিক্খু অঞ্ঞতরো। যংনূনাহং ইমং ভিক্খুং উপসঙ্কমিত্ৰা পুচ্ছেয্যং – কংসি ত্ৰং, আৰুসো উদ্দিস্স পব্বজিতো, কো ৰা তে সত্থা, কস্স ৰা ত্ৰং ধম্মং রোচেসী’’’তি। তস্স ময্হং, আৰুসো, এতদহোসি – ‘‘অকালো খো ইমং ভিক্খুং পুচ্ছিতুং অন্তরঘরং পৰিট্ঠো পিণ্ডায চরতি, যংনূনাহং ইমং ভিক্খুং পিট্ঠিতো পিট্ঠিতো অনুবন্ধেয্যং অত্থিকেহি উপঞ্ঞাতং মগ্গ’’ন্তি। অথ খো, আৰুসো, অস্সজি ভিক্খু রাজগহে পিণ্ডায চরিত্ৰা পিণ্ডপাতং আদায পটিক্কমি। অথ খ্ৰাহং, আৰুসো, যেন অস্সজি ভিক্খু তেনুপসঙ্কমিং, উপসঙ্কমিত্ৰা অস্সজিনা ভিক্খুনা সদ্ধিং সম্মোদিং, সম্মোদনীযং কথং সারণীযং ৰীতিসারেত্ৰা একমন্তং অট্ঠাসিং। একমন্তং ঠিতো খো অহং, আৰুসো, অস্সজিং ভিক্খুং এতদৰোচং – ‘‘ৰিপ্পসন্নানি খো তে, আৰুসো, ইন্দ্রিযানি, পরিসুদ্ধো ছৰিৰণ্ণো পরিযোদাতো। ‘কংসি ত্ৰং, আৰুসো, উদ্দিস্স পব্বজিতো, কো ৰা তে সত্থা, কস্স ৰা ত্ৰং ধম্মং রোচেসী’’’তি? ‘অত্থাৰুসো, মহাসমণো সক্যপুত্তো সক্যকুলা পব্বজিতো, তাহং ভগৰন্তং উদ্দিস্স পব্বজিতো, সো চ মে ভগৰা সত্থা, তস্স চাহং ভগৰতো ধম্মং রোচেমী’তি। ‘কিংৰাদী পনাযস্মতো সত্থা কিমক্খাযী’তি । ‘অহং খো, আৰুসো, নৰো অচিরপব্বজিতো অধুনাগতো ইমং ধম্মৰিনযং, ন তাহং সক্কোমি ৰিত্থারেন ধম্মং দেসেতুং, অপি চ তে সংখিত্তেন অত্থং ৰক্খামী’’’তি । অথ খ্ৰাহং, আৰুসো, অস্সজিং ভিক্খুং এতদৰোচং – ‘‘হোতু, আৰুসো,
61. Atha kho sāriputto paribbājako yena moggallāno paribbājako tenupasaṅkami. Addasā kho moggallāno paribbājako sāriputtaṃ paribbājakaṃ dūratova āgacchantaṃ, disvāna sāriputtaṃ paribbājakaṃ etadavoca – ‘‘vippasannāni kho te, āvuso, indriyāni, parisuddho chavivaṇṇo pariyodāto. Kacci nu tvaṃ, āvuso, amataṃ adhigato’’ti? ‘‘Āmāvuso, amataṃ adhigato’’ti. ‘‘Yathākathaṃ pana tvaṃ, āvuso, amataṃ adhigato’’ti? ‘‘Idhāhaṃ, āvuso, addasaṃ assajiṃ bhikkhuṃ rājagahe piṇḍāya carantaṃ pāsādikena abhikkantena paṭikkantena ālokitena vilokitena samiñjitena pasāritena okkhittacakkhuṃ iriyāpathasampannaṃ. Disvāna me etadahosi – ‘ye vata loke arahanto vā arahattamaggaṃ vā samāpannā, ayaṃ tesaṃ bhikkhu aññataro. Yaṃnūnāhaṃ imaṃ bhikkhuṃ upasaṅkamitvā puccheyyaṃ – kaṃsi tvaṃ, āvuso uddissa pabbajito, ko vā te satthā, kassa vā tvaṃ dhammaṃ rocesī’’’ti. Tassa mayhaṃ, āvuso, etadahosi – ‘‘akālo kho imaṃ bhikkhuṃ pucchituṃ antaragharaṃ paviṭṭho piṇḍāya carati, yaṃnūnāhaṃ imaṃ bhikkhuṃ piṭṭhito piṭṭhito anubandheyyaṃ atthikehi upaññātaṃ magga’’nti. Atha kho, āvuso, assaji bhikkhu rājagahe piṇḍāya caritvā piṇḍapātaṃ ādāya paṭikkami. Atha khvāhaṃ, āvuso, yena assaji bhikkhu tenupasaṅkamiṃ, upasaṅkamitvā assajinā bhikkhunā saddhiṃ sammodiṃ, sammodanīyaṃ kathaṃ sāraṇīyaṃ vītisāretvā ekamantaṃ aṭṭhāsiṃ. Ekamantaṃ ṭhito kho ahaṃ, āvuso, assajiṃ bhikkhuṃ etadavocaṃ – ‘‘vippasannāni kho te, āvuso, indriyāni, parisuddho chavivaṇṇo pariyodāto. ‘Kaṃsi tvaṃ, āvuso, uddissa pabbajito, ko vā te satthā, kassa vā tvaṃ dhammaṃ rocesī’’’ti? ‘Atthāvuso, mahāsamaṇo sakyaputto sakyakulā pabbajito, tāhaṃ bhagavantaṃ uddissa pabbajito, so ca me bhagavā satthā, tassa cāhaṃ bhagavato dhammaṃ rocemī’ti. ‘Kiṃvādī panāyasmato satthā kimakkhāyī’ti . ‘Ahaṃ kho, āvuso, navo acirapabbajito adhunāgato imaṃ dhammavinayaṃ, na tāhaṃ sakkomi vitthārena dhammaṃ desetuṃ, api ca te saṃkhittena atthaṃ vakkhāmī’’’ti . Atha khvāhaṃ, āvuso, assajiṃ bhikkhuṃ etadavocaṃ – ‘‘hotu, āvuso,
অপ্পং ৰা বহুং ৰা ভাসস্সু, অত্থংযেৰ মে ব্রূহি।
Appaṃ vā bahuṃ vā bhāsassu, atthaṃyeva me brūhi;
অত্থেনেৰ মে অত্থো, কিং কাহসি ব্যঞ্জনং বহু’’ন্তি॥
Attheneva me attho, kiṃ kāhasi byañjanaṃ bahu’’nti.
অথ খো, আৰুসো, অস্সজি ভিক্খু ইমং ধম্মপরিযাযং অভাসি –
Atha kho, āvuso, assaji bhikkhu imaṃ dhammapariyāyaṃ abhāsi –
‘‘যে ধম্মা হেতুপ্পভৰা, তেসং হেতুং তথাগতো আহ।
‘‘Ye dhammā hetuppabhavā, tesaṃ hetuṃ tathāgato āha;
তেসঞ্চ যো নিরোধো, এৰংৰাদী মহাসমণো’’তি॥
Tesañca yo nirodho, evaṃvādī mahāsamaṇo’’ti.
অথ খো মোগ্গল্লানস্স পরিব্বাজকস্স ইমং ধম্মপরিযাযং সুত্ৰা ৰিরজং ৰীতমলং ধম্মচক্খুং উদপাদি – যং কিঞ্চি সমুদযধম্মং, সব্বং তং নিরোধধম্মন্তি।
Atha kho moggallānassa paribbājakassa imaṃ dhammapariyāyaṃ sutvā virajaṃ vītamalaṃ dhammacakkhuṃ udapādi – yaṃ kiñci samudayadhammaṃ, sabbaṃ taṃ nirodhadhammanti.
এসেৰ ধম্মো যদি তাৰদেৰ, পচ্চব্যত্থ পদমসোকং।
Eseva dhammo yadi tāvadeva, paccabyattha padamasokaṃ;
অদিট্ঠং অব্ভতীতং, বহুকেহি কপ্পনহুতেহীতি॥
Adiṭṭhaṃ abbhatītaṃ, bahukehi kappanahutehīti.
৬২. অথ খো মোগ্গল্লানো পরিব্বাজকো সারিপুত্তং পরিব্বাজকং এতদৰোচ ‘‘গচ্ছাম মযং, আৰুসো, ভগৰতো সন্তিকে, সো নো ভগৰা সত্থা’’তি। ‘‘ইমানি খো, আৰুসো, অড্ঢতেয্যানি পরিব্বাজকসতানি অম্হে নিস্সায অম্হে সম্পস্সন্তা ইধ ৰিহরন্তি, তেপি তাৰ অপলোকেম 7। যথা তে মঞ্ঞিস্সন্তি, তথা তে করিস্সন্তী’’তি। অথ খো সারিপুত্তমোগ্গল্লানা যেন তে পরিব্বাজকা তেনুপসঙ্কমিংসু, উপসঙ্কমিত্ৰা তে পরিব্বাজকে এতদৰোচুং – ‘‘গচ্ছাম মযং, আৰুসো, ভগৰতো সন্তিকে, সো নো ভগৰা সত্থা’’তি। ‘‘মযং আযস্মন্তে নিস্সায আযস্মন্তে সম্পস্সন্তা ইধ ৰিহরাম, সচে আযস্মন্তা মহাসমণে ব্রহ্মচরিযং চরিস্সন্তি, সব্বেৰ মযং মহাসমণে ব্রহ্মচরিযং চরিস্সামা’’তি। অথ খো সারিপুত্তমোগ্গল্লানা যেন সঞ্চযো পরিব্বাজকো তেনুপসঙ্কমিংসু, উপসঙ্কমিত্ৰা সঞ্চযং পরিব্বাজকং এতদৰোচুং – ‘‘গচ্ছাম মযং, আৰুসো, ভগৰতো সন্তিকে, সো নো ভগৰা সত্থা’’তি। ‘‘অলং, আৰুসো, মা অগমিত্থ, সব্বেৰ তযো ইমং গণং পরিহরিস্সামা’’তি। দুতিযম্পি খো…পে॰… ততিযম্পি খো সারিপুত্তমোগ্গল্লানা সঞ্চযং পরিব্বাজকং এতদৰোচুং – ‘‘গচ্ছাম মযং, আৰুসো, ভগৰতো সন্তিকে, সো নো ভগৰা সত্থা’’তি। ‘‘অলং, আৰুসো, মা অগমিত্থ, সব্বেৰ তযো ইমং গণং পরিহরিস্সামা’’তি। অথ খো সারিপুত্তমোগ্গল্লানা তানি অড্ঢতেয্যানি পরিব্বাজকসতানি আদায যেন ৰেল়ুৰনং তেনুপসঙ্কমিংসু। সঞ্চযস্স পন পরিব্বাজকস্স তত্থেৰ উণ্হং লোহিতং মুখতো উগ্গঞ্ছি।
62. Atha kho moggallāno paribbājako sāriputtaṃ paribbājakaṃ etadavoca ‘‘gacchāma mayaṃ, āvuso, bhagavato santike, so no bhagavā satthā’’ti. ‘‘Imāni kho, āvuso, aḍḍhateyyāni paribbājakasatāni amhe nissāya amhe sampassantā idha viharanti, tepi tāva apalokema 8. Yathā te maññissanti, tathā te karissantī’’ti. Atha kho sāriputtamoggallānā yena te paribbājakā tenupasaṅkamiṃsu, upasaṅkamitvā te paribbājake etadavocuṃ – ‘‘gacchāma mayaṃ, āvuso, bhagavato santike, so no bhagavā satthā’’ti. ‘‘Mayaṃ āyasmante nissāya āyasmante sampassantā idha viharāma, sace āyasmantā mahāsamaṇe brahmacariyaṃ carissanti, sabbeva mayaṃ mahāsamaṇe brahmacariyaṃ carissāmā’’ti. Atha kho sāriputtamoggallānā yena sañcayo paribbājako tenupasaṅkamiṃsu, upasaṅkamitvā sañcayaṃ paribbājakaṃ etadavocuṃ – ‘‘gacchāma mayaṃ, āvuso, bhagavato santike, so no bhagavā satthā’’ti. ‘‘Alaṃ, āvuso, mā agamittha, sabbeva tayo imaṃ gaṇaṃ pariharissāmā’’ti. Dutiyampi kho…pe… tatiyampi kho sāriputtamoggallānā sañcayaṃ paribbājakaṃ etadavocuṃ – ‘‘gacchāma mayaṃ, āvuso, bhagavato santike, so no bhagavā satthā’’ti. ‘‘Alaṃ, āvuso, mā agamittha, sabbeva tayo imaṃ gaṇaṃ pariharissāmā’’ti. Atha kho sāriputtamoggallānā tāni aḍḍhateyyāni paribbājakasatāni ādāya yena veḷuvanaṃ tenupasaṅkamiṃsu. Sañcayassa pana paribbājakassa tattheva uṇhaṃ lohitaṃ mukhato uggañchi.
অদ্দসা খো ভগৰা 9 সারিপুত্তমোগ্গল্লানে দূরতোৰ আগচ্ছন্তে, দিস্ৰান ভিক্খূ আমন্তেসি – ‘‘এতে, ভিক্খৰে, দ্ৰে সহাযকা আগচ্ছন্তি, কোলিতো উপতিস্সো চ। এতং মে সাৰকযুগং ভৰিস্সতি অগ্গং ভদ্দযুগ’’ন্তি।
Addasā kho bhagavā 10 sāriputtamoggallāne dūratova āgacchante, disvāna bhikkhū āmantesi – ‘‘ete, bhikkhave, dve sahāyakā āgacchanti, kolito upatisso ca. Etaṃ me sāvakayugaṃ bhavissati aggaṃ bhaddayuga’’nti.
গম্ভীরে ঞাণৰিসযে, অনুত্তরে উপধিসঙ্খযে।
Gambhīre ñāṇavisaye, anuttare upadhisaṅkhaye;
ৰিমুত্তে অপ্পত্তে ৰেল়ুৰনং, অথ নে সত্থা ব্যাকাসি॥
Vimutte appatte veḷuvanaṃ, atha ne satthā byākāsi.
এতে দ্ৰে সহাযকা, আগচ্ছন্তি কোলিতো উপতিস্সো চ।
Ete dve sahāyakā, āgacchanti kolito upatisso ca;
এতং মে সাৰকযুগং, ভৰিস্সতি অগ্গং ভদ্দযুগন্তি॥
Etaṃ me sāvakayugaṃ, bhavissati aggaṃ bhaddayuganti.
অথ খো সারিপুত্তমোগ্গল্লানা যেন ভগৰা তেনুপসঙ্কমিংসু , উপসঙ্কমিত্ৰা
Atha kho sāriputtamoggallānā yena bhagavā tenupasaṅkamiṃsu , upasaṅkamitvā
ভগৰতো পাদেসু সিরসা নিপতিত্ৰা ভগৰন্তং এতদৰোচুং – ‘‘লভেয্যাম মযং, ভন্তে, ভগৰতো সন্তিকে পব্বজ্জং, লভেয্যাম উপসম্পদ’’ন্তি। ‘‘এথ ভিক্খৰো’’তি ভগৰা অৰোচ – ‘‘স্ৰাক্খাতো ধম্মো, চরথ ব্রহ্মচরিযং সম্মা দুক্খস্স অন্তকিরিযাযা’’তি। সাৰ তেসং আযস্মন্তানং উপসম্পদা অহোসি।
Bhagavato pādesu sirasā nipatitvā bhagavantaṃ etadavocuṃ – ‘‘labheyyāma mayaṃ, bhante, bhagavato santike pabbajjaṃ, labheyyāma upasampada’’nti. ‘‘Etha bhikkhavo’’ti bhagavā avoca – ‘‘svākkhāto dhammo, caratha brahmacariyaṃ sammā dukkhassa antakiriyāyā’’ti. Sāva tesaṃ āyasmantānaṃ upasampadā ahosi.
অভিঞ্ঞাতানং পব্বজ্জা
Abhiññātānaṃ pabbajjā
৬৩. তেন খো পন সমযেন অভিঞ্ঞাতা অভিঞ্ঞাতা মাগধিকা কুলপুত্তা ভগৰতি ব্রহ্মচরিযং চরন্তি। মনুস্সা উজ্ঝাযন্তি খিয্যন্তি ৰিপাচেন্তি – অপুত্তকতায পটিপন্নো সমণো গোতমো, ৰেধব্যায পটিপন্নো সমণো গোতমো, কুলুপচ্ছেদায পটিপন্নো সমণো গোতমো, ইদানি অনেন জটিলসহস্সং পব্বাজিতং, ইমানি চ অড্ঢতেয্যানি পরিব্বাজকসতানি সঞ্চযানি 11 পব্বাজিতানি। ইমে চ অভিঞ্ঞাতা অভিঞ্ঞাতা মাগধিকা কুলপুত্তা সমণে গোতমে ব্রহ্মচরিযং চরন্তীতি। অপিস্সু ভিক্খূ দিস্ৰা ইমায গাথায চোদেন্তি –
63. Tena kho pana samayena abhiññātā abhiññātā māgadhikā kulaputtā bhagavati brahmacariyaṃ caranti. Manussā ujjhāyanti khiyyanti vipācenti – aputtakatāya paṭipanno samaṇo gotamo, vedhabyāya paṭipanno samaṇo gotamo, kulupacchedāya paṭipanno samaṇo gotamo, idāni anena jaṭilasahassaṃ pabbājitaṃ, imāni ca aḍḍhateyyāni paribbājakasatāni sañcayāni 12 pabbājitāni. Ime ca abhiññātā abhiññātā māgadhikā kulaputtā samaṇe gotame brahmacariyaṃ carantīti. Apissu bhikkhū disvā imāya gāthāya codenti –
‘‘আগতো খো মহাসমণো, মাগধানং গিরিব্বজং।
‘‘Āgato kho mahāsamaṇo, māgadhānaṃ giribbajaṃ;
সব্বে সঞ্চযে নেত্ৰান 13, কংসু দানি নযিস্সতী’’তি॥
Sabbe sañcaye netvāna 14, kaṃsu dāni nayissatī’’ti.
অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। অথ খো তে ভিক্খূ ভগৰতো এতমত্থং আরোচেসুং…পে॰… ন, ভিক্খৰে, সো সদ্দো চিরং ভৰিস্সতি, সত্তাহমেৰ ভৰিস্সতি, সত্তাহস্স অচ্চযেন অন্তরধাযিস্সতি। তেন হি, ভিক্খৰে, যে তুম্হে ইমায গাথায চোদেন্তি –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ…pe… na, bhikkhave, so saddo ciraṃ bhavissati, sattāhameva bhavissati, sattāhassa accayena antaradhāyissati. Tena hi, bhikkhave, ye tumhe imāya gāthāya codenti –
‘‘আগতো খো মহাসমণো, মাগধানং গিরিব্বজং।
‘‘Āgato kho mahāsamaṇo, māgadhānaṃ giribbajaṃ;
সব্বে সঞ্চযে নেত্ৰান, কংসু দানি নযিস্সতী’’তি॥
Sabbe sañcaye netvāna, kaṃsu dāni nayissatī’’ti.
তে তুম্হে ইমায গাথায পটিচোদেথ –
Te tumhe imāya gāthāya paṭicodetha –
‘‘নযন্তি ৰে মহাৰীরা, সদ্ধম্মেন তথাগতা।
‘‘Nayanti ve mahāvīrā, saddhammena tathāgatā;
তেন খো পন সমযেন মনুস্সা ভিক্খূ দিস্ৰা ইমায গাথায চোদেন্তি –
Tena kho pana samayena manussā bhikkhū disvā imāya gāthāya codenti –
‘‘আগতো খো মহাসমণো, মাগধানং গিরিব্বজং।
‘‘Āgato kho mahāsamaṇo, māgadhānaṃ giribbajaṃ;
সব্বে সঞ্চযে নেত্ৰান, কংসু দানি নযিস্সতী’’তি॥
Sabbe sañcaye netvāna, kaṃsu dāni nayissatī’’ti.
ভিক্খূ তে মনুস্সে ইমায গাথায পটিচোদেন্তি –
Bhikkhū te manusse imāya gāthāya paṭicodenti –
‘‘নযন্তি ৰে মহাৰীরা, সদ্ধম্মেন তথাগতা।
‘‘Nayanti ve mahāvīrā, saddhammena tathāgatā;
ধম্মেন নযমানানং, কা উসূযা ৰিজানত’’ন্তি॥
Dhammena nayamānānaṃ, kā usūyā vijānata’’nti.
মনুস্সা ধম্মেন কির সমণা সক্যপুত্তিযা নেন্তি নো অধম্মেনাতি সত্তাহমেৰ সো সদ্দো অহোসি, সত্তাহস্স অচ্চযেন অন্তরধাযি।
Manussā dhammena kira samaṇā sakyaputtiyā nenti no adhammenāti sattāhameva so saddo ahosi, sattāhassa accayena antaradhāyi.
সারিপুত্তমোগ্গল্লানপব্বজ্জাকথা নিট্ঠিতা।
Sāriputtamoggallānapabbajjākathā niṭṭhitā.
চতুত্থভাণৰারো নিট্ঠিতো।
Catutthabhāṇavāro niṭṭhito.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সারিপুত্তমোগ্গল্লানপব্বজ্জাকথা • Sāriputtamoggallānapabbajjākathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সারিপুত্তমোগ্গল্লানপব্বজ্জাকথাৰণ্ণনা • Sāriputtamoggallānapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সারিপুত্তমোগ্গল্লানপব্বজ্জাকথাৰণ্ণনা • Sāriputtamoggallānapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সারিপুত্তমোগ্গল্লানপব্বজ্জাকথাৰণ্ণনা • Sāriputtamoggallānapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৪. সারিপুত্তমোগ্গল্লান পব্বজ্জাকথা • 14. Sāriputtamoggallāna pabbajjākathā
