| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
саарибуд̇д̇амог̇г̇аллаанабаб̣б̣аж̇ж̇аагат̇аа
Sāriputtamoggallānapabbajjākathā
60. саарибуд̇д̇амог̇г̇аллаанаад̇и саарибуд̇д̇о жа мог̇г̇аллаано жа. д̇зхи гад̇игаа гад̇аа ход̇и ‘‘яо батамам̣ амад̇ам̣ ад̇хиг̇ажчад̇и, со аарожзд̇уу’’д̇и д̇з гира убхоби г̇ихигаалз убад̇иссо голид̇од̇и звам̣ бан̃н̃ааяамаананаамаа ад̣дхад̇зяяасад̇амаан̣авагабариваараа г̇ираг̇г̇асамаж̇ж̇ам̣ аг̇амам̣су. д̇ад̇ра нзсам̣ махааж̇анам̣ д̣̇исваа зд̇ад̣̇ахоси – ‘‘аяам̣ наама звам̣ махаасад̇д̇анигааяо аббад̇д̇з вассасад̇з маран̣амукз бад̇иссад̇ий’’д̇и. ат̇а убхоби удтид̇ааяа барисааяа ан̃н̃аман̃н̃ам̣ бужчид̇ваа згаж̇жхаасаяаа бажжубадтид̇амаран̣асан̃н̃аа самманд̇аяим̣су ‘‘самма маран̣з сад̇и амад̇знааби бхавид̇аб̣б̣ам̣, ханд̣̇а маяам̣ амад̇ам̣ бариязсаамаа’’д̇и амад̇абариязсанад̇т̇ам̣ сан̃жаяасса чаннабариб̣б̣ааж̇агасса санд̇игз сабарисаа баб̣б̣аж̇ид̇ваа гад̇ибаахзнзва д̇асса н̃аан̣ависаяз баарам̣ г̇анд̇ваа амад̇ам̣ абассанд̇аа бужчим̣су ‘‘гим̣ ну ко, аажарияа, ан̃н̃обзд̇т̇а сааро ад̇т̇ий’’д̇и? ‘‘над̇т̇аавусо, зд̇д̇агамзва ид̣̇а’’нд̇и жа суд̇ваа ‘‘д̇ужчам̣ ид̣̇ам̣ аавусо ниссаарам̣, яо д̣̇аани амхзсу батамам̣ амад̇ам̣ ад̇хиг̇ажчад̇и, со ид̇арасса аарожзд̇уу’’д̇и гад̇игам̣ агам̣су. д̇зна вуд̇д̇ам̣ – ‘‘д̇зхи гад̇игаа гад̇аа ход̇ий’’д̇иаад̣̇и.
60.Sāriputtamoggallānāti sāriputto ca moggallāno ca. Tehi katikā katā hoti‘‘yo paṭhamaṃ amataṃ adhigacchati, so ārocetū’’ti te kira ubhopi gihikāle upatisso kolitoti evaṃ paññāyamānanāmā aḍḍhateyyasatamāṇavakaparivārā giraggasamajjaṃ agamaṃsu. Tatra nesaṃ mahājanaṃ disvā etadahosi – ‘‘ayaṃ nāma evaṃ mahāsattanikāyo appatte vassasate maraṇamukhe patissatī’’ti. Atha ubhopi uṭṭhitāya parisāya aññamaññaṃ pucchitvā ekajjhāsayā paccupaṭṭhitamaraṇasaññā sammantayiṃsu ‘‘samma maraṇe sati amatenāpi bhavitabbaṃ, handa mayaṃ amataṃ pariyesāmā’’ti amatapariyesanatthaṃ sañcayassa channaparibbājakassa santike saparisā pabbajitvā katipāheneva tassa ñāṇavisaye pāraṃ gantvā amataṃ apassantā pucchiṃsu ‘‘kiṃ nu kho, ācariya, aññopettha sāro atthī’’ti? ‘‘Natthāvuso, ettakameva ida’’nti ca sutvā ‘‘tucchaṃ idaṃ āvuso nissāraṃ, yo dāni amhesu paṭhamaṃ amataṃ adhigacchati, so itarassa ārocetū’’ti katikaṃ akaṃsu. Tena vuttaṃ – ‘‘tehi katikā katā hotī’’tiādi.
баасаад̣̇игзна абхигганд̇знаад̇иаад̣̇ийсу ид̇т̇амбхууд̇алагкан̣з гаран̣аважанам̣ взд̣̇ид̇аб̣б̣ам̣. ад̇т̇игзхи убан̃н̃аад̇ам̣ маг̇г̇анд̇и зд̇ам̣ ануб̣анд̇ханасса гааран̣аважанам̣; ид̣̇ан̃хи вуд̇д̇ам̣ ход̇и – ‘‘яам̣нуунаахам̣ имам̣ бхигкум̣ бидтид̇о бидтид̇о ануб̣анд̇хзяяам̣, гасмаа ? яасмаа ид̣̇ам̣ бидтид̇о бидтид̇о ануб̣анд̇ханам̣ наама ад̇т̇игзхи убан̃н̃аад̇ам̣ маг̇г̇ам̣ н̃аад̇о жзва убаг̇ад̇о жа маг̇г̇о’’д̇и ад̇т̇о. ат̇а ваа ад̇т̇игзхи амхзхи ‘‘маран̣з сад̇и амад̇знааби бхавид̇аб̣б̣а’’нд̇и звам̣ гзвалам̣ ад̇т̇ийд̇и убан̃н̃аад̇ам̣ ниб̣б̣аанам̣ наама, д̇ам̣ маг̇г̇анд̇о бариязсанд̇од̇и звамбзд̇т̇а ад̇т̇о д̣̇адтаб̣б̣о.
Pāsādikena abhikkantenātiādīsu itthambhūtalakkhaṇe karaṇavacanaṃ veditabbaṃ. Atthikehi upaññātaṃ magganti etaṃ anubandhanassa kāraṇavacanaṃ; idañhi vuttaṃ hoti – ‘‘yaṃnūnāhaṃ imaṃ bhikkhuṃ piṭṭhito piṭṭhito anubandheyyaṃ, kasmā ? Yasmā idaṃ piṭṭhito piṭṭhito anubandhanaṃ nāma atthikehi upaññātaṃ maggaṃ ñāto ceva upagato ca maggo’’ti attho. Atha vā atthikehi amhehi ‘‘maraṇe sati amatenāpi bhavitabba’’nti evaṃ kevalaṃ atthīti upaññātaṃ nibbānaṃ nāma, taṃ magganto pariyesantoti evampettha attho daṭṭhabbo.
бин̣д̣абаад̇ам̣ аад̣̇ааяа бадиггамийд̇и суд̣̇иннаган̣д̣з вуд̇д̇аббагаарам̣ ан̃н̃ад̇арам̣ гуддамуулам̣ убасан̇гамид̇ваа нисийд̣̇и. саарибуд̇д̇оби ко ‘‘агаало ко д̇аава бан̃хам̣ бужчид̇у’’нд̇и гаалам̣ ааг̇амаяамаано згаманд̇ам̣ тад̇ваа вад̇д̇абадибад̇д̇ибууран̣ад̇т̇ам̣ гад̇абхад̇д̇агижжасса т̇зрасса ад̇д̇ано гаман̣д̣алуд̇о уд̣̇агам̣ д̣̇ад̇ваа д̇ход̇ахад̇т̇абаад̣̇зна т̇зрзна сад̣̇д̇хим̣ бадисант̇аарам̣ гад̇ваа бан̃хам̣ бужчи. д̇зна вуд̇д̇ам̣ – ‘‘ат̇а ко саарибуд̇д̇о бариб̣б̣ааж̇аго’’д̇иаад̣̇и. на д̇аахам̣ саггомийд̇и на д̇з ахам̣ саггоми. зд̇т̇а жа бадисамбхид̣̇ааббад̇д̇о т̇зро на зд̇д̇агам̣ на саггод̇и. ат̇а ко имасса д̇хаммаг̇ааравам̣ уббаад̣̇зссаамийд̇и саб̣б̣аагаарзна б̣уд̣̇д̇хависаяз ависаяабхаавам̣ г̇ахзд̇ваа звамааха.
Piṇḍapātaṃ ādāya paṭikkamīti sudinnakaṇḍe vuttappakāraṃ aññataraṃ kuṭṭamūlaṃ upasaṅkamitvā nisīdi. Sāriputtopi kho ‘‘akālo kho tāva pañhaṃ pucchitu’’nti kālaṃ āgamayamāno ekamantaṃ ṭhatvā vattapaṭipattipūraṇatthaṃ katabhattakiccassa therassa attano kamaṇḍaluto udakaṃ datvā dhotahatthapādena therena saddhiṃ paṭisanthāraṃ katvā pañhaṃ pucchi. Tena vuttaṃ – ‘‘atha kho sāriputto paribbājako’’tiādi. Na tāhaṃ sakkomīti na te ahaṃ sakkomi. Ettha ca paṭisambhidāppatto thero na ettakaṃ na sakkoti. Atha kho imassa dhammagāravaṃ uppādessāmīti sabbākārena buddhavisaye avisayabhāvaṃ gahetvā evamāha.
яз д̇хаммаа хзд̇уббабхаваад̇и хзд̇уббабхаваа наама бан̃жагканд̇хаа; д̇знасса д̣̇угкасажжам̣ д̣̇ассзд̇и. д̇зсам̣ хзд̇ум̣ д̇ат̇ааг̇ад̇о аахаад̇и д̇зсам̣ хзд̇у наама самуд̣̇аяасажжам̣; д̇ан̃жа д̇ат̇ааг̇ад̇о аахаад̇и д̣̇ассзд̇и. д̇зсан̃жа яо нирод̇ход̇и д̇зсам̣ убхиннамби сажжаанам̣ яо аббавад̇д̇инирод̇хо; д̇ан̃жа д̇ат̇ааг̇ад̇о аахаад̇и ад̇т̇о. д̇знасса нирод̇хасажжам̣ д̣̇ассзд̇и. маг̇г̇асажжам̣ банзд̇т̇а саруубад̇о ад̣̇ассид̇амби наяад̇о д̣̇ассид̇ам̣ ход̇и, нирод̇хз хи вуд̇д̇з д̇асса самбаабаго маг̇г̇о вуд̇д̇ова ход̇и. ат̇а ваа д̇зсан̃жа яо нирод̇ход̇и зд̇т̇а д̇зсам̣ яо нирод̇хо жа нирод̇хубааяо жаад̇и звам̣ д̣̇взби сажжаани д̣̇ассид̇аани хонд̇ийд̇и. ид̣̇аани д̇амзвад̇т̇ам̣ бадибаад̣̇знд̇о ааха – ‘‘звам̣ваад̣̇ий махаасаман̣о’’д̇и.
Ye dhammā hetuppabhavāti hetuppabhavā nāma pañcakkhandhā; tenassa dukkhasaccaṃ dasseti. Tesaṃ hetuṃ tathāgato āhāti tesaṃ hetu nāma samudayasaccaṃ; tañca tathāgato āhāti dasseti. Tesañca yo nirodhoti tesaṃ ubhinnampi saccānaṃ yo appavattinirodho; tañca tathāgato āhāti attho. Tenassa nirodhasaccaṃ dasseti. Maggasaccaṃ panettha sarūpato adassitampi nayato dassitaṃ hoti, nirodhe hi vutte tassa sampāpako maggo vuttova hoti. Atha vā tesañca yo nirodhoti ettha tesaṃ yo nirodho ca nirodhupāyo cāti evaṃ dvepi saccāni dassitāni hontīti. Idāni tamevatthaṃ paṭipādento āha – ‘‘evaṃvādī mahāsamaṇo’’ti.
зсзва д̇хаммо яад̣̇и д̇аавад̣̇зваад̇и сажзби ид̇о уд̇д̇ари над̇т̇и, зд̇д̇агамзва ид̣̇ам̣ сод̇аабад̇д̇ипаламад̇д̇амзва бад̇д̇аб̣б̣ам̣, д̇ат̇ааби зсо зва д̇хаммод̇и ад̇т̇о. бажжаб̣яад̇т̇а бад̣̇амасоганд̇и яам̣ маяам̣ бариязсамаанаа вижараама, д̇ам̣ бад̣̇амасогам̣ бадивид̣̇д̇хаад̇т̇а д̇умхз; бад̇д̇ам̣ д̇ам̣ д̇умхзхийд̇и ад̇т̇о. ад̣̇идтам̣ аб̣бхад̇ийд̇ам̣ б̣ахугзхи габбанахуд̇зхийд̇и амхзхи наама ид̣̇ам̣ бад̣̇ам̣ б̣ахугзхи габбанахуд̇зхи ад̣̇идтамзва аб̣бхад̇ийд̇ам̣; ид̇и д̇асса бад̣̇асса ад̣̇идтабхаавзна д̣̇ийгхарад̇д̇ам̣ ад̇д̇ано махааж̇аанибхаавам̣ д̣̇ийбзд̇и.
Eseva dhammo yadi tāvadevāti sacepi ito uttari natthi, ettakameva idaṃ sotāpattiphalamattameva pattabbaṃ, tathāpi eso eva dhammoti attho. Paccabyattha padamasokanti yaṃ mayaṃ pariyesamānā vicarāma, taṃ padamasokaṃ paṭividdhāttha tumhe; pattaṃ taṃ tumhehīti attho. Adiṭṭhaṃ abbhatītaṃ bahukehi kappanahutehīti amhehi nāma idaṃ padaṃ bahukehi kappanahutehi adiṭṭhameva abbhatītaṃ; iti tassa padassa adiṭṭhabhāvena dīgharattaṃ attano mahājānibhāvaṃ dīpeti.
62. г̇амбхийрз н̃аан̣ависаязд̇и г̇амбхийрз жзва г̇амбхийрасса жа н̃аан̣асса висаяабхууд̇з. ануд̇д̇арз убад̇хисан̇каязд̇и ниб̣б̣аанз. вимуд̇д̇зд̇и д̇ад̣̇аарамман̣ааяа вимуд̇д̇ияаа вимуд̇д̇з. б̣яаагаасийд̇и ‘‘зд̇ам̣ мз саавагаяуг̇ам̣ бхависсад̇и аг̇г̇ам̣ бхад̣̇д̣̇аяуг̇а’’нд̇и вад̣̇анд̇о саавагабаарамин̃н̃аан̣з б̣яаагааси. саава д̇зсам̣ ааяасманд̇аанам̣ убасамбад̣̇аа ахосийд̇и саа зхибхигкуубасамбад̣̇ааязва д̇зсам̣ убасамбад̣̇аа ахоси. звам̣ убасамбаннзсу жа д̇зсу махаамог̇г̇аллаанад̇т̇зро сад̇д̇ахи д̣̇ивасзхи арахад̇д̇з бад̇идтид̇о, саарибуд̇д̇ад̇т̇зро ад̣дхамаасзна.
62.Gambhīre ñāṇavisayeti gambhīre ceva gambhīrassa ca ñāṇassa visayabhūte. Anuttare upadhisaṅkhayeti nibbāne. Vimutteti tadārammaṇāya vimuttiyā vimutte. Byākāsīti ‘‘etaṃ me sāvakayugaṃ bhavissati aggaṃ bhaddayuga’’nti vadanto sāvakapāramiññāṇe byākāsi. Sāva tesaṃ āyasmantānaṃ upasampadā ahosīti sā ehibhikkhūpasampadāyeva tesaṃ upasampadā ahosi. Evaṃ upasampannesu ca tesu mahāmoggallānatthero sattahi divasehi arahatte patiṭṭhito, sāriputtatthero aḍḍhamāsena.
ад̇ийд̇з гира аномад̣̇ассий наама б̣уд̣̇д̇хо логз уд̣̇абаад̣̇и. д̇асса сарад̣̇о наама д̇аабасо сагз ассамз наанаабубпзхи ман̣д̣абам̣ гад̇ваа бубпаасанзязва бхаг̇аванд̇ам̣ нисийд̣̇аабзд̇ваа бхигкусан̇гхассааби д̇ат̇зва ман̣д̣абам̣ гад̇ваа бубпаасанаани бан̃н̃абзд̇ваа аг̇г̇асаавагабхаавам̣ бад̇т̇зси. бад̇т̇аяид̇ваа жа сирийвад̣дхасса наама сздтино бзсзси ‘‘маяаа аг̇г̇асаавагадтаанам̣ бад̇т̇ид̇ам̣, д̇вамби ааг̇анд̇ваа згам̣ таанам̣ бад̇т̇зхий’’д̇и. сздти нийлуббаламан̣д̣абам̣ гад̇ваа б̣уд̣̇д̇хаббамукам̣ бхигкусан̇гхам̣, д̇ад̇т̇а бхож̇зд̇ваа д̣̇уд̇ияасаавагабхаавам̣ бад̇т̇зси. д̇зсу сарад̣̇ад̇аабасо саарибуд̇д̇ад̇т̇зро ж̇аад̇о, сирийвад̣дхо махаамог̇г̇аллаанад̇т̇зрод̇и ид̣̇ам̣ нзсам̣ буб̣б̣агаммам̣.
Atīte kira anomadassī nāma buddho loke udapādi. Tassa sarado nāma tāpaso sake assame nānāpupphehi maṇḍapaṃ katvā pupphāsaneyeva bhagavantaṃ nisīdāpetvā bhikkhusaṅghassāpi tatheva maṇḍapaṃ katvā pupphāsanāni paññapetvā aggasāvakabhāvaṃ patthesi. Patthayitvā ca sirīvaḍḍhassa nāma seṭṭhino pesesi ‘‘mayā aggasāvakaṭṭhānaṃ patthitaṃ, tvampi āgantvā ekaṃ ṭhānaṃ patthehī’’ti. Seṭṭhi nīluppalamaṇḍapaṃ katvā buddhappamukhaṃ bhikkhusaṅghaṃ, tattha bhojetvā dutiyasāvakabhāvaṃ patthesi. Tesu saradatāpaso sāriputtatthero jāto, sirīvaḍḍho mahāmoggallānattheroti idaṃ nesaṃ pubbakammaṃ.
63. абуд̇д̇агад̇ааяаад̇иаад̣̇ийсу язсам̣ буд̇д̇аа баб̣б̣аж̇анд̇и, д̇зсам̣ абуд̇д̇агад̇ааяа. яаасам̣ бад̇ий баб̣б̣аж̇анд̇и, д̇аасам̣ взд̇хаб̣яааяа вид̇хаваабхаавааяа. убхаязнааби гулубажчзд̣̇ааяа. сан̃жаяаанийд̇и сан̃жаяасса анд̇зваасигаани. маг̇ад̇хаанам̣ г̇ириб̣б̣аж̇анд̇и маг̇ад̇хаанам̣ ж̇анабад̣̇асса г̇ириб̣б̣аж̇ам̣ наг̇арам̣. махаавийраад̇и махаавийрияаванд̇о. наяамаанаананд̇и наяамаанзсу. бхуммад̇т̇з саамиважанам̣, убаяог̇ад̇т̇з ваа. гаа усууяаа виж̇аанад̇анд̇и д̇хаммзна наяанд̇ийд̇и звам̣ виж̇аананд̇аанам̣ гаа иссаа.
63.Aputtakatāyātiādīsu yesaṃ puttā pabbajanti, tesaṃ aputtakatāya. Yāsaṃ patī pabbajanti, tāsaṃ vedhabyāya vidhavābhāvāya. Ubhayenāpi kulupacchedāya. Sañcayānīti sañcayassa antevāsikāni. Magadhānaṃ giribbajanti magadhānaṃ janapadassa giribbajaṃ nagaraṃ. Mahāvīrāti mahāvīriyavanto. Nayamānānanti nayamānesu. Bhummatthe sāmivacanaṃ, upayogatthe vā. Kā usūyā vijānatanti dhammena nayantīti evaṃ vijānantānaṃ kā issā.
саарибуд̇д̇амог̇г̇аллаанабаб̣б̣аж̇ж̇аагат̇аа нидтид̇аа.
Sāriputtamoggallānapabbajjākathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 14. саарибуд̇д̇амог̇г̇аллаанабаб̣б̣аж̇ж̇аагат̇аа • 14. Sāriputtamoggallānapabbajjākathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / саарибуд̇д̇амог̇г̇аллаанабаб̣б̣аж̇ж̇аагат̇ааван̣н̣анаа • Sāriputtamoggallānapabbajjākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / саарибуд̇д̇амог̇г̇аллаанабаб̣б̣аж̇ж̇аагат̇ааван̣н̣анаа • Sāriputtamoggallānapabbajjākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / саарибуд̇д̇амог̇г̇аллаанабаб̣б̣аж̇ж̇аагат̇ааван̣н̣анаа • Sāriputtamoggallānapabbajjākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 14. саарибуд̇д̇амог̇г̇аллаана баб̣б̣аж̇ж̇аагат̇аа • 14. Sāriputtamoggallāna pabbajjākathā
