| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಸಾರಿಪುತ್ತಮೋಗ್ಗಲ್ಲಾನಪಬ್ಬಜ್ಜಾಕಥಾ
Sāriputtamoggallānapabbajjākathā
೬೦. ಸಾರಿಪುತ್ತಮೋಗ್ಗಲ್ಲಾನಾತಿ ಸಾರಿಪುತ್ತೋ ಚ ಮೋಗ್ಗಲ್ಲಾನೋ ಚ। ತೇಹಿ ಕತಿಕಾ ಕತಾ ಹೋತಿ ‘‘ಯೋ ಪಠಮಂ ಅಮತಂ ಅಧಿಗಚ್ಛತಿ, ಸೋ ಆರೋಚೇತೂ’’ತಿ ತೇ ಕಿರ ಉಭೋಪಿ ಗಿಹಿಕಾಲೇ ಉಪತಿಸ್ಸೋ ಕೋಲಿತೋತಿ ಏವಂ ಪಞ್ಞಾಯಮಾನನಾಮಾ ಅಡ್ಢತೇಯ್ಯಸತಮಾಣವಕಪರಿವಾರಾ ಗಿರಗ್ಗಸಮಜ್ಜಂ ಅಗಮಂಸು। ತತ್ರ ನೇಸಂ ಮಹಾಜನಂ ದಿಸ್ವಾ ಏತದಹೋಸಿ – ‘‘ಅಯಂ ನಾಮ ಏವಂ ಮಹಾಸತ್ತನಿಕಾಯೋ ಅಪ್ಪತ್ತೇ ವಸ್ಸಸತೇ ಮರಣಮುಖೇ ಪತಿಸ್ಸತೀ’’ತಿ। ಅಥ ಉಭೋಪಿ ಉಟ್ಠಿತಾಯ ಪರಿಸಾಯ ಅಞ್ಞಮಞ್ಞಂ ಪುಚ್ಛಿತ್ವಾ ಏಕಜ್ಝಾಸಯಾ ಪಚ್ಚುಪಟ್ಠಿತಮರಣಸಞ್ಞಾ ಸಮ್ಮನ್ತಯಿಂಸು ‘‘ಸಮ್ಮ ಮರಣೇ ಸತಿ ಅಮತೇನಾಪಿ ಭವಿತಬ್ಬಂ, ಹನ್ದ ಮಯಂ ಅಮತಂ ಪರಿಯೇಸಾಮಾ’’ತಿ ಅಮತಪರಿಯೇಸನತ್ಥಂ ಸಞ್ಚಯಸ್ಸ ಛನ್ನಪರಿಬ್ಬಾಜಕಸ್ಸ ಸನ್ತಿಕೇ ಸಪರಿಸಾ ಪಬ್ಬಜಿತ್ವಾ ಕತಿಪಾಹೇನೇವ ತಸ್ಸ ಞಾಣವಿಸಯೇ ಪಾರಂ ಗನ್ತ್ವಾ ಅಮತಂ ಅಪಸ್ಸನ್ತಾ ಪುಚ್ಛಿಂಸು ‘‘ಕಿಂ ನು ಖೋ, ಆಚರಿಯ, ಅಞ್ಞೋಪೇತ್ಥ ಸಾರೋ ಅತ್ಥೀ’’ತಿ? ‘‘ನತ್ಥಾವುಸೋ, ಏತ್ತಕಮೇವ ಇದ’’ನ್ತಿ ಚ ಸುತ್ವಾ ‘‘ತುಚ್ಛಂ ಇದಂ ಆವುಸೋ ನಿಸ್ಸಾರಂ, ಯೋ ದಾನಿ ಅಮ್ಹೇಸು ಪಠಮಂ ಅಮತಂ ಅಧಿಗಚ್ಛತಿ, ಸೋ ಇತರಸ್ಸ ಆರೋಚೇತೂ’’ತಿ ಕತಿಕಂ ಅಕಂಸು। ತೇನ ವುತ್ತಂ – ‘‘ತೇಹಿ ಕತಿಕಾ ಕತಾ ಹೋತೀ’’ತಿಆದಿ।
60.Sāriputtamoggallānāti sāriputto ca moggallāno ca. Tehi katikā katā hoti‘‘yo paṭhamaṃ amataṃ adhigacchati, so ārocetū’’ti te kira ubhopi gihikāle upatisso kolitoti evaṃ paññāyamānanāmā aḍḍhateyyasatamāṇavakaparivārā giraggasamajjaṃ agamaṃsu. Tatra nesaṃ mahājanaṃ disvā etadahosi – ‘‘ayaṃ nāma evaṃ mahāsattanikāyo appatte vassasate maraṇamukhe patissatī’’ti. Atha ubhopi uṭṭhitāya parisāya aññamaññaṃ pucchitvā ekajjhāsayā paccupaṭṭhitamaraṇasaññā sammantayiṃsu ‘‘samma maraṇe sati amatenāpi bhavitabbaṃ, handa mayaṃ amataṃ pariyesāmā’’ti amatapariyesanatthaṃ sañcayassa channaparibbājakassa santike saparisā pabbajitvā katipāheneva tassa ñāṇavisaye pāraṃ gantvā amataṃ apassantā pucchiṃsu ‘‘kiṃ nu kho, ācariya, aññopettha sāro atthī’’ti? ‘‘Natthāvuso, ettakameva ida’’nti ca sutvā ‘‘tucchaṃ idaṃ āvuso nissāraṃ, yo dāni amhesu paṭhamaṃ amataṃ adhigacchati, so itarassa ārocetū’’ti katikaṃ akaṃsu. Tena vuttaṃ – ‘‘tehi katikā katā hotī’’tiādi.
ಪಾಸಾದಿಕೇನ ಅಭಿಕ್ಕನ್ತೇನಾತಿಆದೀಸು ಇತ್ಥಮ್ಭೂತಲಕ್ಖಣೇ ಕರಣವಚನಂ ವೇದಿತಬ್ಬಂ। ಅತ್ಥಿಕೇಹಿ ಉಪಞ್ಞಾತಂ ಮಗ್ಗನ್ತಿ ಏತಂ ಅನುಬನ್ಧನಸ್ಸ ಕಾರಣವಚನಂ; ಇದಞ್ಹಿ ವುತ್ತಂ ಹೋತಿ – ‘‘ಯಂನೂನಾಹಂ ಇಮಂ ಭಿಕ್ಖುಂ ಪಿಟ್ಠಿತೋ ಪಿಟ್ಠಿತೋ ಅನುಬನ್ಧೇಯ್ಯಂ, ಕಸ್ಮಾ ? ಯಸ್ಮಾ ಇದಂ ಪಿಟ್ಠಿತೋ ಪಿಟ್ಠಿತೋ ಅನುಬನ್ಧನಂ ನಾಮ ಅತ್ಥಿಕೇಹಿ ಉಪಞ್ಞಾತಂ ಮಗ್ಗಂ ಞಾತೋ ಚೇವ ಉಪಗತೋ ಚ ಮಗ್ಗೋ’’ತಿ ಅತ್ಥೋ। ಅಥ ವಾ ಅತ್ಥಿಕೇಹಿ ಅಮ್ಹೇಹಿ ‘‘ಮರಣೇ ಸತಿ ಅಮತೇನಾಪಿ ಭವಿತಬ್ಬ’’ನ್ತಿ ಏವಂ ಕೇವಲಂ ಅತ್ಥೀತಿ ಉಪಞ್ಞಾತಂ ನಿಬ್ಬಾನಂ ನಾಮ, ತಂ ಮಗ್ಗನ್ತೋ ಪರಿಯೇಸನ್ತೋತಿ ಏವಮ್ಪೇತ್ಥ ಅತ್ಥೋ ದಟ್ಠಬ್ಬೋ।
Pāsādikena abhikkantenātiādīsu itthambhūtalakkhaṇe karaṇavacanaṃ veditabbaṃ. Atthikehi upaññātaṃ magganti etaṃ anubandhanassa kāraṇavacanaṃ; idañhi vuttaṃ hoti – ‘‘yaṃnūnāhaṃ imaṃ bhikkhuṃ piṭṭhito piṭṭhito anubandheyyaṃ, kasmā ? Yasmā idaṃ piṭṭhito piṭṭhito anubandhanaṃ nāma atthikehi upaññātaṃ maggaṃ ñāto ceva upagato ca maggo’’ti attho. Atha vā atthikehi amhehi ‘‘maraṇe sati amatenāpi bhavitabba’’nti evaṃ kevalaṃ atthīti upaññātaṃ nibbānaṃ nāma, taṃ magganto pariyesantoti evampettha attho daṭṭhabbo.
ಪಿಣ್ಡಪಾತಂ ಆದಾಯ ಪಟಿಕ್ಕಮೀತಿ ಸುದಿನ್ನಕಣ್ಡೇ ವುತ್ತಪ್ಪಕಾರಂ ಅಞ್ಞತರಂ ಕುಟ್ಟಮೂಲಂ ಉಪಸಙ್ಕಮಿತ್ವಾ ನಿಸೀದಿ। ಸಾರಿಪುತ್ತೋಪಿ ಖೋ ‘‘ಅಕಾಲೋ ಖೋ ತಾವ ಪಞ್ಹಂ ಪುಚ್ಛಿತು’’ನ್ತಿ ಕಾಲಂ ಆಗಮಯಮಾನೋ ಏಕಮನ್ತಂ ಠತ್ವಾ ವತ್ತಪಟಿಪತ್ತಿಪೂರಣತ್ಥಂ ಕತಭತ್ತಕಿಚ್ಚಸ್ಸ ಥೇರಸ್ಸ ಅತ್ತನೋ ಕಮಣ್ಡಲುತೋ ಉದಕಂ ದತ್ವಾ ಧೋತಹತ್ಥಪಾದೇನ ಥೇರೇನ ಸದ್ಧಿಂ ಪಟಿಸನ್ಥಾರಂ ಕತ್ವಾ ಪಞ್ಹಂ ಪುಚ್ಛಿ। ತೇನ ವುತ್ತಂ – ‘‘ಅಥ ಖೋ ಸಾರಿಪುತ್ತೋ ಪರಿಬ್ಬಾಜಕೋ’’ತಿಆದಿ। ನ ತಾಹಂ ಸಕ್ಕೋಮೀತಿ ನ ತೇ ಅಹಂ ಸಕ್ಕೋಮಿ। ಏತ್ಥ ಚ ಪಟಿಸಮ್ಭಿದಾಪ್ಪತ್ತೋ ಥೇರೋ ನ ಏತ್ತಕಂ ನ ಸಕ್ಕೋತಿ। ಅಥ ಖೋ ಇಮಸ್ಸ ಧಮ್ಮಗಾರವಂ ಉಪ್ಪಾದೇಸ್ಸಾಮೀತಿ ಸಬ್ಬಾಕಾರೇನ ಬುದ್ಧವಿಸಯೇ ಅವಿಸಯಭಾವಂ ಗಹೇತ್ವಾ ಏವಮಾಹ।
Piṇḍapātaṃ ādāya paṭikkamīti sudinnakaṇḍe vuttappakāraṃ aññataraṃ kuṭṭamūlaṃ upasaṅkamitvā nisīdi. Sāriputtopi kho ‘‘akālo kho tāva pañhaṃ pucchitu’’nti kālaṃ āgamayamāno ekamantaṃ ṭhatvā vattapaṭipattipūraṇatthaṃ katabhattakiccassa therassa attano kamaṇḍaluto udakaṃ datvā dhotahatthapādena therena saddhiṃ paṭisanthāraṃ katvā pañhaṃ pucchi. Tena vuttaṃ – ‘‘atha kho sāriputto paribbājako’’tiādi. Na tāhaṃ sakkomīti na te ahaṃ sakkomi. Ettha ca paṭisambhidāppatto thero na ettakaṃ na sakkoti. Atha kho imassa dhammagāravaṃ uppādessāmīti sabbākārena buddhavisaye avisayabhāvaṃ gahetvā evamāha.
ಯೇ ಧಮ್ಮಾ ಹೇತುಪ್ಪಭವಾತಿ ಹೇತುಪ್ಪಭವಾ ನಾಮ ಪಞ್ಚಕ್ಖನ್ಧಾ; ತೇನಸ್ಸ ದುಕ್ಖಸಚ್ಚಂ ದಸ್ಸೇತಿ। ತೇಸಂ ಹೇತುಂ ತಥಾಗತೋ ಆಹಾತಿ ತೇಸಂ ಹೇತು ನಾಮ ಸಮುದಯಸಚ್ಚಂ; ತಞ್ಚ ತಥಾಗತೋ ಆಹಾತಿ ದಸ್ಸೇತಿ। ತೇಸಞ್ಚ ಯೋ ನಿರೋಧೋತಿ ತೇಸಂ ಉಭಿನ್ನಮ್ಪಿ ಸಚ್ಚಾನಂ ಯೋ ಅಪ್ಪವತ್ತಿನಿರೋಧೋ; ತಞ್ಚ ತಥಾಗತೋ ಆಹಾತಿ ಅತ್ಥೋ। ತೇನಸ್ಸ ನಿರೋಧಸಚ್ಚಂ ದಸ್ಸೇತಿ। ಮಗ್ಗಸಚ್ಚಂ ಪನೇತ್ಥ ಸರೂಪತೋ ಅದಸ್ಸಿತಮ್ಪಿ ನಯತೋ ದಸ್ಸಿತಂ ಹೋತಿ, ನಿರೋಧೇ ಹಿ ವುತ್ತೇ ತಸ್ಸ ಸಮ್ಪಾಪಕೋ ಮಗ್ಗೋ ವುತ್ತೋವ ಹೋತಿ। ಅಥ ವಾ ತೇಸಞ್ಚ ಯೋ ನಿರೋಧೋತಿ ಏತ್ಥ ತೇಸಂ ಯೋ ನಿರೋಧೋ ಚ ನಿರೋಧುಪಾಯೋ ಚಾತಿ ಏವಂ ದ್ವೇಪಿ ಸಚ್ಚಾನಿ ದಸ್ಸಿತಾನಿ ಹೋನ್ತೀತಿ। ಇದಾನಿ ತಮೇವತ್ಥಂ ಪಟಿಪಾದೇನ್ತೋ ಆಹ – ‘‘ಏವಂವಾದೀ ಮಹಾಸಮಣೋ’’ತಿ।
Ye dhammā hetuppabhavāti hetuppabhavā nāma pañcakkhandhā; tenassa dukkhasaccaṃ dasseti. Tesaṃ hetuṃ tathāgato āhāti tesaṃ hetu nāma samudayasaccaṃ; tañca tathāgato āhāti dasseti. Tesañca yo nirodhoti tesaṃ ubhinnampi saccānaṃ yo appavattinirodho; tañca tathāgato āhāti attho. Tenassa nirodhasaccaṃ dasseti. Maggasaccaṃ panettha sarūpato adassitampi nayato dassitaṃ hoti, nirodhe hi vutte tassa sampāpako maggo vuttova hoti. Atha vā tesañca yo nirodhoti ettha tesaṃ yo nirodho ca nirodhupāyo cāti evaṃ dvepi saccāni dassitāni hontīti. Idāni tamevatthaṃ paṭipādento āha – ‘‘evaṃvādī mahāsamaṇo’’ti.
ಏಸೇವ ಧಮ್ಮೋ ಯದಿ ತಾವದೇವಾತಿ ಸಚೇಪಿ ಇತೋ ಉತ್ತರಿ ನತ್ಥಿ, ಏತ್ತಕಮೇವ ಇದಂ ಸೋತಾಪತ್ತಿಫಲಮತ್ತಮೇವ ಪತ್ತಬ್ಬಂ, ತಥಾಪಿ ಏಸೋ ಏವ ಧಮ್ಮೋತಿ ಅತ್ಥೋ। ಪಚ್ಚಬ್ಯತ್ಥ ಪದಮಸೋಕನ್ತಿ ಯಂ ಮಯಂ ಪರಿಯೇಸಮಾನಾ ವಿಚರಾಮ, ತಂ ಪದಮಸೋಕಂ ಪಟಿವಿದ್ಧಾತ್ಥ ತುಮ್ಹೇ; ಪತ್ತಂ ತಂ ತುಮ್ಹೇಹೀತಿ ಅತ್ಥೋ। ಅದಿಟ್ಠಂ ಅಬ್ಭತೀತಂ ಬಹುಕೇಹಿ ಕಪ್ಪನಹುತೇಹೀತಿ ಅಮ್ಹೇಹಿ ನಾಮ ಇದಂ ಪದಂ ಬಹುಕೇಹಿ ಕಪ್ಪನಹುತೇಹಿ ಅದಿಟ್ಠಮೇವ ಅಬ್ಭತೀತಂ; ಇತಿ ತಸ್ಸ ಪದಸ್ಸ ಅದಿಟ್ಠಭಾವೇನ ದೀಘರತ್ತಂ ಅತ್ತನೋ ಮಹಾಜಾನಿಭಾವಂ ದೀಪೇತಿ।
Eseva dhammo yadi tāvadevāti sacepi ito uttari natthi, ettakameva idaṃ sotāpattiphalamattameva pattabbaṃ, tathāpi eso eva dhammoti attho. Paccabyattha padamasokanti yaṃ mayaṃ pariyesamānā vicarāma, taṃ padamasokaṃ paṭividdhāttha tumhe; pattaṃ taṃ tumhehīti attho. Adiṭṭhaṃ abbhatītaṃ bahukehi kappanahutehīti amhehi nāma idaṃ padaṃ bahukehi kappanahutehi adiṭṭhameva abbhatītaṃ; iti tassa padassa adiṭṭhabhāvena dīgharattaṃ attano mahājānibhāvaṃ dīpeti.
೬೨. ಗಮ್ಭೀರೇ ಞಾಣವಿಸಯೇತಿ ಗಮ್ಭೀರೇ ಚೇವ ಗಮ್ಭೀರಸ್ಸ ಚ ಞಾಣಸ್ಸ ವಿಸಯಭೂತೇ। ಅನುತ್ತರೇ ಉಪಧಿಸಙ್ಖಯೇತಿ ನಿಬ್ಬಾನೇ। ವಿಮುತ್ತೇತಿ ತದಾರಮ್ಮಣಾಯ ವಿಮುತ್ತಿಯಾ ವಿಮುತ್ತೇ। ಬ್ಯಾಕಾಸೀತಿ ‘‘ಏತಂ ಮೇ ಸಾವಕಯುಗಂ ಭವಿಸ್ಸತಿ ಅಗ್ಗಂ ಭದ್ದಯುಗ’’ನ್ತಿ ವದನ್ತೋ ಸಾವಕಪಾರಮಿಞ್ಞಾಣೇ ಬ್ಯಾಕಾಸಿ। ಸಾವ ತೇಸಂ ಆಯಸ್ಮನ್ತಾನಂ ಉಪಸಮ್ಪದಾ ಅಹೋಸೀತಿ ಸಾ ಏಹಿಭಿಕ್ಖೂಪಸಮ್ಪದಾಯೇವ ತೇಸಂ ಉಪಸಮ್ಪದಾ ಅಹೋಸಿ। ಏವಂ ಉಪಸಮ್ಪನ್ನೇಸು ಚ ತೇಸು ಮಹಾಮೋಗ್ಗಲ್ಲಾನತ್ಥೇರೋ ಸತ್ತಹಿ ದಿವಸೇಹಿ ಅರಹತ್ತೇ ಪತಿಟ್ಠಿತೋ, ಸಾರಿಪುತ್ತತ್ಥೇರೋ ಅಡ್ಢಮಾಸೇನ।
62.Gambhīre ñāṇavisayeti gambhīre ceva gambhīrassa ca ñāṇassa visayabhūte. Anuttare upadhisaṅkhayeti nibbāne. Vimutteti tadārammaṇāya vimuttiyā vimutte. Byākāsīti ‘‘etaṃ me sāvakayugaṃ bhavissati aggaṃ bhaddayuga’’nti vadanto sāvakapāramiññāṇe byākāsi. Sāva tesaṃ āyasmantānaṃ upasampadā ahosīti sā ehibhikkhūpasampadāyeva tesaṃ upasampadā ahosi. Evaṃ upasampannesu ca tesu mahāmoggallānatthero sattahi divasehi arahatte patiṭṭhito, sāriputtatthero aḍḍhamāsena.
ಅತೀತೇ ಕಿರ ಅನೋಮದಸ್ಸೀ ನಾಮ ಬುದ್ಧೋ ಲೋಕೇ ಉದಪಾದಿ। ತಸ್ಸ ಸರದೋ ನಾಮ ತಾಪಸೋ ಸಕೇ ಅಸ್ಸಮೇ ನಾನಾಪುಪ್ಫೇಹಿ ಮಣ್ಡಪಂ ಕತ್ವಾ ಪುಪ್ಫಾಸನೇಯೇವ ಭಗವನ್ತಂ ನಿಸೀದಾಪೇತ್ವಾ ಭಿಕ್ಖುಸಙ್ಘಸ್ಸಾಪಿ ತಥೇವ ಮಣ್ಡಪಂ ಕತ್ವಾ ಪುಪ್ಫಾಸನಾನಿ ಪಞ್ಞಪೇತ್ವಾ ಅಗ್ಗಸಾವಕಭಾವಂ ಪತ್ಥೇಸಿ। ಪತ್ಥಯಿತ್ವಾ ಚ ಸಿರೀವಡ್ಢಸ್ಸ ನಾಮ ಸೇಟ್ಠಿನೋ ಪೇಸೇಸಿ ‘‘ಮಯಾ ಅಗ್ಗಸಾವಕಟ್ಠಾನಂ ಪತ್ಥಿತಂ, ತ್ವಮ್ಪಿ ಆಗನ್ತ್ವಾ ಏಕಂ ಠಾನಂ ಪತ್ಥೇಹೀ’’ತಿ। ಸೇಟ್ಠಿ ನೀಲುಪ್ಪಲಮಣ್ಡಪಂ ಕತ್ವಾ ಬುದ್ಧಪ್ಪಮುಖಂ ಭಿಕ್ಖುಸಙ್ಘಂ, ತತ್ಥ ಭೋಜೇತ್ವಾ ದುತಿಯಸಾವಕಭಾವಂ ಪತ್ಥೇಸಿ। ತೇಸು ಸರದತಾಪಸೋ ಸಾರಿಪುತ್ತತ್ಥೇರೋ ಜಾತೋ, ಸಿರೀವಡ್ಢೋ ಮಹಾಮೋಗ್ಗಲ್ಲಾನತ್ಥೇರೋತಿ ಇದಂ ನೇಸಂ ಪುಬ್ಬಕಮ್ಮಂ।
Atīte kira anomadassī nāma buddho loke udapādi. Tassa sarado nāma tāpaso sake assame nānāpupphehi maṇḍapaṃ katvā pupphāsaneyeva bhagavantaṃ nisīdāpetvā bhikkhusaṅghassāpi tatheva maṇḍapaṃ katvā pupphāsanāni paññapetvā aggasāvakabhāvaṃ patthesi. Patthayitvā ca sirīvaḍḍhassa nāma seṭṭhino pesesi ‘‘mayā aggasāvakaṭṭhānaṃ patthitaṃ, tvampi āgantvā ekaṃ ṭhānaṃ patthehī’’ti. Seṭṭhi nīluppalamaṇḍapaṃ katvā buddhappamukhaṃ bhikkhusaṅghaṃ, tattha bhojetvā dutiyasāvakabhāvaṃ patthesi. Tesu saradatāpaso sāriputtatthero jāto, sirīvaḍḍho mahāmoggallānattheroti idaṃ nesaṃ pubbakammaṃ.
೬೩. ಅಪುತ್ತಕತಾಯಾತಿಆದೀಸು ಯೇಸಂ ಪುತ್ತಾ ಪಬ್ಬಜನ್ತಿ, ತೇಸಂ ಅಪುತ್ತಕತಾಯ। ಯಾಸಂ ಪತೀ ಪಬ್ಬಜನ್ತಿ, ತಾಸಂ ವೇಧಬ್ಯಾಯ ವಿಧವಾಭಾವಾಯ। ಉಭಯೇನಾಪಿ ಕುಲುಪಚ್ಛೇದಾಯ। ಸಞ್ಚಯಾನೀತಿ ಸಞ್ಚಯಸ್ಸ ಅನ್ತೇವಾಸಿಕಾನಿ। ಮಗಧಾನಂ ಗಿರಿಬ್ಬಜನ್ತಿ ಮಗಧಾನಂ ಜನಪದಸ್ಸ ಗಿರಿಬ್ಬಜಂ ನಗರಂ। ಮಹಾವೀರಾತಿ ಮಹಾವೀರಿಯವನ್ತೋ। ನಯಮಾನಾನನ್ತಿ ನಯಮಾನೇಸು। ಭುಮ್ಮತ್ಥೇ ಸಾಮಿವಚನಂ, ಉಪಯೋಗತ್ಥೇ ವಾ। ಕಾ ಉಸೂಯಾ ವಿಜಾನತನ್ತಿ ಧಮ್ಮೇನ ನಯನ್ತೀತಿ ಏವಂ ವಿಜಾನನ್ತಾನಂ ಕಾ ಇಸ್ಸಾ।
63.Aputtakatāyātiādīsu yesaṃ puttā pabbajanti, tesaṃ aputtakatāya. Yāsaṃ patī pabbajanti, tāsaṃ vedhabyāya vidhavābhāvāya. Ubhayenāpi kulupacchedāya. Sañcayānīti sañcayassa antevāsikāni. Magadhānaṃ giribbajanti magadhānaṃ janapadassa giribbajaṃ nagaraṃ. Mahāvīrāti mahāvīriyavanto. Nayamānānanti nayamānesu. Bhummatthe sāmivacanaṃ, upayogatthe vā. Kā usūyā vijānatanti dhammena nayantīti evaṃ vijānantānaṃ kā issā.
ಸಾರಿಪುತ್ತಮೋಗ್ಗಲ್ಲಾನಪಬ್ಬಜ್ಜಾಕಥಾ ನಿಟ್ಠಿತಾ।
Sāriputtamoggallānapabbajjākathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೧೪. ಸಾರಿಪುತ್ತಮೋಗ್ಗಲ್ಲಾನಪಬ್ಬಜ್ಜಾಕಥಾ • 14. Sāriputtamoggallānapabbajjākathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಸಾರಿಪುತ್ತಮೋಗ್ಗಲ್ಲಾನಪಬ್ಬಜ್ಜಾಕಥಾವಣ್ಣನಾ • Sāriputtamoggallānapabbajjākathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಸಾರಿಪುತ್ತಮೋಗ್ಗಲ್ಲಾನಪಬ್ಬಜ್ಜಾಕಥಾವಣ್ಣನಾ • Sāriputtamoggallānapabbajjākathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಸಾರಿಪುತ್ತಮೋಗ್ಗಲ್ಲಾನಪಬ್ಬಜ್ಜಾಕಥಾವಣ್ಣನಾ • Sāriputtamoggallānapabbajjākathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೪. ಸಾರಿಪುತ್ತಮೋಗ್ಗಲ್ಲಾನ ಪಬ್ಬಜ್ಜಾಕಥಾ • 14. Sāriputtamoggallāna pabbajjākathā
