| Library / Tipiṭaka / ਤਿਪਿਟਕ • Tipiṭaka / ਮਹਾવਗ੍ਗ-ਅਟ੍ਠਕਥਾ • Mahāvagga-aṭṭhakathā |
ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾ
Sāriputtamoggallānapabbajjākathā
੬੦. ਸਾਰਿਪੁਤ੍ਤਮੋਗ੍ਗਲ੍ਲਾਨਾਤਿ ਸਾਰਿਪੁਤ੍ਤੋ ਚ ਮੋਗ੍ਗਲ੍ਲਾਨੋ ਚ। ਤੇਹਿ ਕਤਿਕਾ ਕਤਾ ਹੋਤਿ ‘‘ਯੋ ਪਠਮਂ ਅਮਤਂ ਅਧਿਗਚ੍ਛਤਿ, ਸੋ ਆਰੋਚੇਤੂ’’ਤਿ ਤੇ ਕਿਰ ਉਭੋਪਿ ਗਿਹਿਕਾਲੇ ਉਪਤਿਸ੍ਸੋ ਕੋਲਿਤੋਤਿ ਏવਂ ਪਞ੍ਞਾਯਮਾਨਨਾਮਾ ਅਡ੍ਢਤੇਯ੍ਯਸਤਮਾਣવਕਪਰਿવਾਰਾ ਗਿਰਗ੍ਗਸਮਜ੍ਜਂ ਅਗਮਂਸੁ। ਤਤ੍ਰ ਨੇਸਂ ਮਹਾਜਨਂ ਦਿਸ੍વਾ ਏਤਦਹੋਸਿ – ‘‘ਅਯਂ ਨਾਮ ਏવਂ ਮਹਾਸਤ੍ਤਨਿਕਾਯੋ ਅਪ੍ਪਤ੍ਤੇ વਸ੍ਸਸਤੇ ਮਰਣਮੁਖੇ ਪਤਿਸ੍ਸਤੀ’’ਤਿ। ਅਥ ਉਭੋਪਿ ਉਟ੍ਠਿਤਾਯ ਪਰਿਸਾਯ ਅਞ੍ਞਮਞ੍ਞਂ ਪੁਚ੍ਛਿਤ੍વਾ ਏਕਜ੍ਝਾਸਯਾ ਪਚ੍ਚੁਪਟ੍ਠਿਤਮਰਣਸਞ੍ਞਾ ਸਮ੍ਮਨ੍ਤਯਿਂਸੁ ‘‘ਸਮ੍ਮ ਮਰਣੇ ਸਤਿ ਅਮਤੇਨਾਪਿ ਭવਿਤਬ੍ਬਂ, ਹਨ੍ਦ ਮਯਂ ਅਮਤਂ ਪਰਿਯੇਸਾਮਾ’’ਤਿ ਅਮਤਪਰਿਯੇਸਨਤ੍ਥਂ ਸਞ੍ਚਯਸ੍ਸ ਛਨ੍ਨਪਰਿਬ੍ਬਾਜਕਸ੍ਸ ਸਨ੍ਤਿਕੇ ਸਪਰਿਸਾ ਪਬ੍ਬਜਿਤ੍વਾ ਕਤਿਪਾਹੇਨੇવ ਤਸ੍ਸ ਞਾਣવਿਸਯੇ ਪਾਰਂ ਗਨ੍ਤ੍વਾ ਅਮਤਂ ਅਪਸ੍ਸਨ੍ਤਾ ਪੁਚ੍ਛਿਂਸੁ ‘‘ਕਿਂ ਨੁ ਖੋ, ਆਚਰਿਯ, ਅਞ੍ਞੋਪੇਤ੍ਥ ਸਾਰੋ ਅਤ੍ਥੀ’’ਤਿ? ‘‘ਨਤ੍ਥਾવੁਸੋ, ਏਤ੍ਤਕਮੇવ ਇਦ’’ਨ੍ਤਿ ਚ ਸੁਤ੍વਾ ‘‘ਤੁਚ੍ਛਂ ਇਦਂ ਆવੁਸੋ ਨਿਸ੍ਸਾਰਂ, ਯੋ ਦਾਨਿ ਅਮ੍ਹੇਸੁ ਪਠਮਂ ਅਮਤਂ ਅਧਿਗਚ੍ਛਤਿ, ਸੋ ਇਤਰਸ੍ਸ ਆਰੋਚੇਤੂ’’ਤਿ ਕਤਿਕਂ ਅਕਂਸੁ। ਤੇਨ વੁਤ੍ਤਂ – ‘‘ਤੇਹਿ ਕਤਿਕਾ ਕਤਾ ਹੋਤੀ’’ਤਿਆਦਿ।
60.Sāriputtamoggallānāti sāriputto ca moggallāno ca. Tehi katikā katā hoti‘‘yo paṭhamaṃ amataṃ adhigacchati, so ārocetū’’ti te kira ubhopi gihikāle upatisso kolitoti evaṃ paññāyamānanāmā aḍḍhateyyasatamāṇavakaparivārā giraggasamajjaṃ agamaṃsu. Tatra nesaṃ mahājanaṃ disvā etadahosi – ‘‘ayaṃ nāma evaṃ mahāsattanikāyo appatte vassasate maraṇamukhe patissatī’’ti. Atha ubhopi uṭṭhitāya parisāya aññamaññaṃ pucchitvā ekajjhāsayā paccupaṭṭhitamaraṇasaññā sammantayiṃsu ‘‘samma maraṇe sati amatenāpi bhavitabbaṃ, handa mayaṃ amataṃ pariyesāmā’’ti amatapariyesanatthaṃ sañcayassa channaparibbājakassa santike saparisā pabbajitvā katipāheneva tassa ñāṇavisaye pāraṃ gantvā amataṃ apassantā pucchiṃsu ‘‘kiṃ nu kho, ācariya, aññopettha sāro atthī’’ti? ‘‘Natthāvuso, ettakameva ida’’nti ca sutvā ‘‘tucchaṃ idaṃ āvuso nissāraṃ, yo dāni amhesu paṭhamaṃ amataṃ adhigacchati, so itarassa ārocetū’’ti katikaṃ akaṃsu. Tena vuttaṃ – ‘‘tehi katikā katā hotī’’tiādi.
ਪਾਸਾਦਿਕੇਨ ਅਭਿਕ੍ਕਨ੍ਤੇਨਾਤਿਆਦੀਸੁ ਇਤ੍ਥਮ੍ਭੂਤਲਕ੍ਖਣੇ ਕਰਣવਚਨਂ વੇਦਿਤਬ੍ਬਂ। ਅਤ੍ਥਿਕੇਹਿ ਉਪਞ੍ਞਾਤਂ ਮਗ੍ਗਨ੍ਤਿ ਏਤਂ ਅਨੁਬਨ੍ਧਨਸ੍ਸ ਕਾਰਣવਚਨਂ; ਇਦਞ੍ਹਿ વੁਤ੍ਤਂ ਹੋਤਿ – ‘‘ਯਂਨੂਨਾਹਂ ਇਮਂ ਭਿਕ੍ਖੁਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧੇਯ੍ਯਂ, ਕਸ੍ਮਾ ? ਯਸ੍ਮਾ ਇਦਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਨਂ ਨਾਮ ਅਤ੍ਥਿਕੇਹਿ ਉਪਞ੍ਞਾਤਂ ਮਗ੍ਗਂ ਞਾਤੋ ਚੇવ ਉਪਗਤੋ ਚ ਮਗ੍ਗੋ’’ਤਿ ਅਤ੍ਥੋ। ਅਥ વਾ ਅਤ੍ਥਿਕੇਹਿ ਅਮ੍ਹੇਹਿ ‘‘ਮਰਣੇ ਸਤਿ ਅਮਤੇਨਾਪਿ ਭવਿਤਬ੍ਬ’’ਨ੍ਤਿ ਏવਂ ਕੇવਲਂ ਅਤ੍ਥੀਤਿ ਉਪਞ੍ਞਾਤਂ ਨਿਬ੍ਬਾਨਂ ਨਾਮ, ਤਂ ਮਗ੍ਗਨ੍ਤੋ ਪਰਿਯੇਸਨ੍ਤੋਤਿ ਏવਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ।
Pāsādikena abhikkantenātiādīsu itthambhūtalakkhaṇe karaṇavacanaṃ veditabbaṃ. Atthikehi upaññātaṃ magganti etaṃ anubandhanassa kāraṇavacanaṃ; idañhi vuttaṃ hoti – ‘‘yaṃnūnāhaṃ imaṃ bhikkhuṃ piṭṭhito piṭṭhito anubandheyyaṃ, kasmā ? Yasmā idaṃ piṭṭhito piṭṭhito anubandhanaṃ nāma atthikehi upaññātaṃ maggaṃ ñāto ceva upagato ca maggo’’ti attho. Atha vā atthikehi amhehi ‘‘maraṇe sati amatenāpi bhavitabba’’nti evaṃ kevalaṃ atthīti upaññātaṃ nibbānaṃ nāma, taṃ magganto pariyesantoti evampettha attho daṭṭhabbo.
ਪਿਣ੍ਡਪਾਤਂ ਆਦਾਯ ਪਟਿਕ੍ਕਮੀਤਿ ਸੁਦਿਨ੍ਨਕਣ੍ਡੇ વੁਤ੍ਤਪ੍ਪਕਾਰਂ ਅਞ੍ਞਤਰਂ ਕੁਟ੍ਟਮੂਲਂ ਉਪਸਙ੍ਕਮਿਤ੍વਾ ਨਿਸੀਦਿ। ਸਾਰਿਪੁਤ੍ਤੋਪਿ ਖੋ ‘‘ਅਕਾਲੋ ਖੋ ਤਾવ ਪਞ੍ਹਂ ਪੁਚ੍ਛਿਤੁ’’ਨ੍ਤਿ ਕਾਲਂ ਆਗਮਯਮਾਨੋ ਏਕਮਨ੍ਤਂ ਠਤ੍વਾ વਤ੍ਤਪਟਿਪਤ੍ਤਿਪੂਰਣਤ੍ਥਂ ਕਤਭਤ੍ਤਕਿਚ੍ਚਸ੍ਸ ਥੇਰਸ੍ਸ ਅਤ੍ਤਨੋ ਕਮਣ੍ਡਲੁਤੋ ਉਦਕਂ ਦਤ੍વਾ ਧੋਤਹਤ੍ਥਪਾਦੇਨ ਥੇਰੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍વਾ ਪਞ੍ਹਂ ਪੁਚ੍ਛਿ। ਤੇਨ વੁਤ੍ਤਂ – ‘‘ਅਥ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ’’ਤਿਆਦਿ। ਨ ਤਾਹਂ ਸਕ੍ਕੋਮੀਤਿ ਨ ਤੇ ਅਹਂ ਸਕ੍ਕੋਮਿ। ਏਤ੍ਥ ਚ ਪਟਿਸਮ੍ਭਿਦਾਪ੍ਪਤ੍ਤੋ ਥੇਰੋ ਨ ਏਤ੍ਤਕਂ ਨ ਸਕ੍ਕੋਤਿ। ਅਥ ਖੋ ਇਮਸ੍ਸ ਧਮ੍ਮਗਾਰવਂ ਉਪ੍ਪਾਦੇਸ੍ਸਾਮੀਤਿ ਸਬ੍ਬਾਕਾਰੇਨ ਬੁਦ੍ਧવਿਸਯੇ ਅવਿਸਯਭਾવਂ ਗਹੇਤ੍વਾ ਏવਮਾਹ।
Piṇḍapātaṃ ādāya paṭikkamīti sudinnakaṇḍe vuttappakāraṃ aññataraṃ kuṭṭamūlaṃ upasaṅkamitvā nisīdi. Sāriputtopi kho ‘‘akālo kho tāva pañhaṃ pucchitu’’nti kālaṃ āgamayamāno ekamantaṃ ṭhatvā vattapaṭipattipūraṇatthaṃ katabhattakiccassa therassa attano kamaṇḍaluto udakaṃ datvā dhotahatthapādena therena saddhiṃ paṭisanthāraṃ katvā pañhaṃ pucchi. Tena vuttaṃ – ‘‘atha kho sāriputto paribbājako’’tiādi. Na tāhaṃ sakkomīti na te ahaṃ sakkomi. Ettha ca paṭisambhidāppatto thero na ettakaṃ na sakkoti. Atha kho imassa dhammagāravaṃ uppādessāmīti sabbākārena buddhavisaye avisayabhāvaṃ gahetvā evamāha.
ਯੇ ਧਮ੍ਮਾ ਹੇਤੁਪ੍ਪਭવਾਤਿ ਹੇਤੁਪ੍ਪਭવਾ ਨਾਮ ਪਞ੍ਚਕ੍ਖਨ੍ਧਾ; ਤੇਨਸ੍ਸ ਦੁਕ੍ਖਸਚ੍ਚਂ ਦਸ੍ਸੇਤਿ। ਤੇਸਂ ਹੇਤੁਂ ਤਥਾਗਤੋ ਆਹਾਤਿ ਤੇਸਂ ਹੇਤੁ ਨਾਮ ਸਮੁਦਯਸਚ੍ਚਂ; ਤਞ੍ਚ ਤਥਾਗਤੋ ਆਹਾਤਿ ਦਸ੍ਸੇਤਿ। ਤੇਸਞ੍ਚ ਯੋ ਨਿਰੋਧੋਤਿ ਤੇਸਂ ਉਭਿਨ੍ਨਮ੍ਪਿ ਸਚ੍ਚਾਨਂ ਯੋ ਅਪ੍ਪવਤ੍ਤਿਨਿਰੋਧੋ; ਤਞ੍ਚ ਤਥਾਗਤੋ ਆਹਾਤਿ ਅਤ੍ਥੋ। ਤੇਨਸ੍ਸ ਨਿਰੋਧਸਚ੍ਚਂ ਦਸ੍ਸੇਤਿ। ਮਗ੍ਗਸਚ੍ਚਂ ਪਨੇਤ੍ਥ ਸਰੂਪਤੋ ਅਦਸ੍ਸਿਤਮ੍ਪਿ ਨਯਤੋ ਦਸ੍ਸਿਤਂ ਹੋਤਿ, ਨਿਰੋਧੇ ਹਿ વੁਤ੍ਤੇ ਤਸ੍ਸ ਸਮ੍ਪਾਪਕੋ ਮਗ੍ਗੋ વੁਤ੍ਤੋવ ਹੋਤਿ। ਅਥ વਾ ਤੇਸਞ੍ਚ ਯੋ ਨਿਰੋਧੋਤਿ ਏਤ੍ਥ ਤੇਸਂ ਯੋ ਨਿਰੋਧੋ ਚ ਨਿਰੋਧੁਪਾਯੋ ਚਾਤਿ ਏવਂ ਦ੍વੇਪਿ ਸਚ੍ਚਾਨਿ ਦਸ੍ਸਿਤਾਨਿ ਹੋਨ੍ਤੀਤਿ। ਇਦਾਨਿ ਤਮੇવਤ੍ਥਂ ਪਟਿਪਾਦੇਨ੍ਤੋ ਆਹ – ‘‘ਏવਂવਾਦੀ ਮਹਾਸਮਣੋ’’ਤਿ।
Ye dhammā hetuppabhavāti hetuppabhavā nāma pañcakkhandhā; tenassa dukkhasaccaṃ dasseti. Tesaṃ hetuṃ tathāgato āhāti tesaṃ hetu nāma samudayasaccaṃ; tañca tathāgato āhāti dasseti. Tesañca yo nirodhoti tesaṃ ubhinnampi saccānaṃ yo appavattinirodho; tañca tathāgato āhāti attho. Tenassa nirodhasaccaṃ dasseti. Maggasaccaṃ panettha sarūpato adassitampi nayato dassitaṃ hoti, nirodhe hi vutte tassa sampāpako maggo vuttova hoti. Atha vā tesañca yo nirodhoti ettha tesaṃ yo nirodho ca nirodhupāyo cāti evaṃ dvepi saccāni dassitāni hontīti. Idāni tamevatthaṃ paṭipādento āha – ‘‘evaṃvādī mahāsamaṇo’’ti.
ਏਸੇવ ਧਮ੍ਮੋ ਯਦਿ ਤਾવਦੇવਾਤਿ ਸਚੇਪਿ ਇਤੋ ਉਤ੍ਤਰਿ ਨਤ੍ਥਿ, ਏਤ੍ਤਕਮੇવ ਇਦਂ ਸੋਤਾਪਤ੍ਤਿਫਲਮਤ੍ਤਮੇવ ਪਤ੍ਤਬ੍ਬਂ, ਤਥਾਪਿ ਏਸੋ ਏવ ਧਮ੍ਮੋਤਿ ਅਤ੍ਥੋ। ਪਚ੍ਚਬ੍ਯਤ੍ਥ ਪਦਮਸੋਕਨ੍ਤਿ ਯਂ ਮਯਂ ਪਰਿਯੇਸਮਾਨਾ વਿਚਰਾਮ, ਤਂ ਪਦਮਸੋਕਂ ਪਟਿવਿਦ੍ਧਾਤ੍ਥ ਤੁਮ੍ਹੇ; ਪਤ੍ਤਂ ਤਂ ਤੁਮ੍ਹੇਹੀਤਿ ਅਤ੍ਥੋ। ਅਦਿਟ੍ਠਂ ਅਬ੍ਭਤੀਤਂ ਬਹੁਕੇਹਿ ਕਪ੍ਪਨਹੁਤੇਹੀਤਿ ਅਮ੍ਹੇਹਿ ਨਾਮ ਇਦਂ ਪਦਂ ਬਹੁਕੇਹਿ ਕਪ੍ਪਨਹੁਤੇਹਿ ਅਦਿਟ੍ਠਮੇવ ਅਬ੍ਭਤੀਤਂ; ਇਤਿ ਤਸ੍ਸ ਪਦਸ੍ਸ ਅਦਿਟ੍ਠਭਾવੇਨ ਦੀਘਰਤ੍ਤਂ ਅਤ੍ਤਨੋ ਮਹਾਜਾਨਿਭਾવਂ ਦੀਪੇਤਿ।
Eseva dhammo yadi tāvadevāti sacepi ito uttari natthi, ettakameva idaṃ sotāpattiphalamattameva pattabbaṃ, tathāpi eso eva dhammoti attho. Paccabyattha padamasokanti yaṃ mayaṃ pariyesamānā vicarāma, taṃ padamasokaṃ paṭividdhāttha tumhe; pattaṃ taṃ tumhehīti attho. Adiṭṭhaṃ abbhatītaṃ bahukehi kappanahutehīti amhehi nāma idaṃ padaṃ bahukehi kappanahutehi adiṭṭhameva abbhatītaṃ; iti tassa padassa adiṭṭhabhāvena dīgharattaṃ attano mahājānibhāvaṃ dīpeti.
੬੨. ਗਮ੍ਭੀਰੇ ਞਾਣવਿਸਯੇਤਿ ਗਮ੍ਭੀਰੇ ਚੇવ ਗਮ੍ਭੀਰਸ੍ਸ ਚ ਞਾਣਸ੍ਸ વਿਸਯਭੂਤੇ। ਅਨੁਤ੍ਤਰੇ ਉਪਧਿਸਙ੍ਖਯੇਤਿ ਨਿਬ੍ਬਾਨੇ। વਿਮੁਤ੍ਤੇਤਿ ਤਦਾਰਮ੍ਮਣਾਯ વਿਮੁਤ੍ਤਿਯਾ વਿਮੁਤ੍ਤੇ। ਬ੍ਯਾਕਾਸੀਤਿ ‘‘ਏਤਂ ਮੇ ਸਾવਕਯੁਗਂ ਭવਿਸ੍ਸਤਿ ਅਗ੍ਗਂ ਭਦ੍ਦਯੁਗ’’ਨ੍ਤਿ વਦਨ੍ਤੋ ਸਾવਕਪਾਰਮਿਞ੍ਞਾਣੇ ਬ੍ਯਾਕਾਸਿ। ਸਾવ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸੀਤਿ ਸਾ ਏਹਿਭਿਕ੍ਖੂਪਸਮ੍ਪਦਾਯੇવ ਤੇਸਂ ਉਪਸਮ੍ਪਦਾ ਅਹੋਸਿ। ਏવਂ ਉਪਸਮ੍ਪਨ੍ਨੇਸੁ ਚ ਤੇਸੁ ਮਹਾਮੋਗ੍ਗਲ੍ਲਾਨਤ੍ਥੇਰੋ ਸਤ੍ਤਹਿ ਦਿવਸੇਹਿ ਅਰਹਤ੍ਤੇ ਪਤਿਟ੍ਠਿਤੋ, ਸਾਰਿਪੁਤ੍ਤਤ੍ਥੇਰੋ ਅਡ੍ਢਮਾਸੇਨ।
62.Gambhīre ñāṇavisayeti gambhīre ceva gambhīrassa ca ñāṇassa visayabhūte. Anuttare upadhisaṅkhayeti nibbāne. Vimutteti tadārammaṇāya vimuttiyā vimutte. Byākāsīti ‘‘etaṃ me sāvakayugaṃ bhavissati aggaṃ bhaddayuga’’nti vadanto sāvakapāramiññāṇe byākāsi. Sāva tesaṃ āyasmantānaṃ upasampadā ahosīti sā ehibhikkhūpasampadāyeva tesaṃ upasampadā ahosi. Evaṃ upasampannesu ca tesu mahāmoggallānatthero sattahi divasehi arahatte patiṭṭhito, sāriputtatthero aḍḍhamāsena.
ਅਤੀਤੇ ਕਿਰ ਅਨੋਮਦਸ੍ਸੀ ਨਾਮ ਬੁਦ੍ਧੋ ਲੋਕੇ ਉਦਪਾਦਿ। ਤਸ੍ਸ ਸਰਦੋ ਨਾਮ ਤਾਪਸੋ ਸਕੇ ਅਸ੍ਸਮੇ ਨਾਨਾਪੁਪ੍ਫੇਹਿ ਮਣ੍ਡਪਂ ਕਤ੍વਾ ਪੁਪ੍ਫਾਸਨੇਯੇવ ਭਗવਨ੍ਤਂ ਨਿਸੀਦਾਪੇਤ੍વਾ ਭਿਕ੍ਖੁਸਙ੍ਘਸ੍ਸਾਪਿ ਤਥੇવ ਮਣ੍ਡਪਂ ਕਤ੍વਾ ਪੁਪ੍ਫਾਸਨਾਨਿ ਪਞ੍ਞਪੇਤ੍વਾ ਅਗ੍ਗਸਾવਕਭਾવਂ ਪਤ੍ਥੇਸਿ। ਪਤ੍ਥਯਿਤ੍વਾ ਚ ਸਿਰੀવਡ੍ਢਸ੍ਸ ਨਾਮ ਸੇਟ੍ਠਿਨੋ ਪੇਸੇਸਿ ‘‘ਮਯਾ ਅਗ੍ਗਸਾવਕਟ੍ਠਾਨਂ ਪਤ੍ਥਿਤਂ, ਤ੍વਮ੍ਪਿ ਆਗਨ੍ਤ੍વਾ ਏਕਂ ਠਾਨਂ ਪਤ੍ਥੇਹੀ’’ਤਿ। ਸੇਟ੍ਠਿ ਨੀਲੁਪ੍ਪਲਮਣ੍ਡਪਂ ਕਤ੍વਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ, ਤਤ੍ਥ ਭੋਜੇਤ੍વਾ ਦੁਤਿਯਸਾવਕਭਾવਂ ਪਤ੍ਥੇਸਿ। ਤੇਸੁ ਸਰਦਤਾਪਸੋ ਸਾਰਿਪੁਤ੍ਤਤ੍ਥੇਰੋ ਜਾਤੋ, ਸਿਰੀવਡ੍ਢੋ ਮਹਾਮੋਗ੍ਗਲ੍ਲਾਨਤ੍ਥੇਰੋਤਿ ਇਦਂ ਨੇਸਂ ਪੁਬ੍ਬਕਮ੍ਮਂ।
Atīte kira anomadassī nāma buddho loke udapādi. Tassa sarado nāma tāpaso sake assame nānāpupphehi maṇḍapaṃ katvā pupphāsaneyeva bhagavantaṃ nisīdāpetvā bhikkhusaṅghassāpi tatheva maṇḍapaṃ katvā pupphāsanāni paññapetvā aggasāvakabhāvaṃ patthesi. Patthayitvā ca sirīvaḍḍhassa nāma seṭṭhino pesesi ‘‘mayā aggasāvakaṭṭhānaṃ patthitaṃ, tvampi āgantvā ekaṃ ṭhānaṃ patthehī’’ti. Seṭṭhi nīluppalamaṇḍapaṃ katvā buddhappamukhaṃ bhikkhusaṅghaṃ, tattha bhojetvā dutiyasāvakabhāvaṃ patthesi. Tesu saradatāpaso sāriputtatthero jāto, sirīvaḍḍho mahāmoggallānattheroti idaṃ nesaṃ pubbakammaṃ.
੬੩. ਅਪੁਤ੍ਤਕਤਾਯਾਤਿਆਦੀਸੁ ਯੇਸਂ ਪੁਤ੍ਤਾ ਪਬ੍ਬਜਨ੍ਤਿ, ਤੇਸਂ ਅਪੁਤ੍ਤਕਤਾਯ। ਯਾਸਂ ਪਤੀ ਪਬ੍ਬਜਨ੍ਤਿ, ਤਾਸਂ વੇਧਬ੍ਯਾਯ વਿਧવਾਭਾવਾਯ। ਉਭਯੇਨਾਪਿ ਕੁਲੁਪਚ੍ਛੇਦਾਯ। ਸਞ੍ਚਯਾਨੀਤਿ ਸਞ੍ਚਯਸ੍ਸ ਅਨ੍ਤੇવਾਸਿਕਾਨਿ। ਮਗਧਾਨਂ ਗਿਰਿਬ੍ਬਜਨ੍ਤਿ ਮਗਧਾਨਂ ਜਨਪਦਸ੍ਸ ਗਿਰਿਬ੍ਬਜਂ ਨਗਰਂ। ਮਹਾવੀਰਾਤਿ ਮਹਾવੀਰਿਯવਨ੍ਤੋ। ਨਯਮਾਨਾਨਨ੍ਤਿ ਨਯਮਾਨੇਸੁ। ਭੁਮ੍ਮਤ੍ਥੇ ਸਾਮਿવਚਨਂ, ਉਪਯੋਗਤ੍ਥੇ વਾ। ਕਾ ਉਸੂਯਾ વਿਜਾਨਤਨ੍ਤਿ ਧਮ੍ਮੇਨ ਨਯਨ੍ਤੀਤਿ ਏવਂ વਿਜਾਨਨ੍ਤਾਨਂ ਕਾ ਇਸ੍ਸਾ।
63.Aputtakatāyātiādīsu yesaṃ puttā pabbajanti, tesaṃ aputtakatāya. Yāsaṃ patī pabbajanti, tāsaṃ vedhabyāya vidhavābhāvāya. Ubhayenāpi kulupacchedāya. Sañcayānīti sañcayassa antevāsikāni. Magadhānaṃ giribbajanti magadhānaṃ janapadassa giribbajaṃ nagaraṃ. Mahāvīrāti mahāvīriyavanto. Nayamānānanti nayamānesu. Bhummatthe sāmivacanaṃ, upayogatthe vā. Kā usūyā vijānatanti dhammena nayantīti evaṃ vijānantānaṃ kā issā.
ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾ ਨਿਟ੍ਠਿਤਾ।
Sāriputtamoggallānapabbajjākathā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਗ੍ਗਪਾਲ਼ਿ • Mahāvaggapāḷi / ੧੪. ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾ • 14. Sāriputtamoggallānapabbajjākathā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾવਣ੍ਣਨਾ • Sāriputtamoggallānapabbajjākathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾવਣ੍ਣਨਾ • Sāriputtamoggallānapabbajjākathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾવਣ੍ਣਨਾ • Sāriputtamoggallānapabbajjākathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੧੪. ਸਾਰਿਪੁਤ੍ਤਮੋਗ੍ਗਲ੍ਲਾਨ ਪਬ੍ਬਜ੍ਜਾਕਥਾ • 14. Sāriputtamoggallāna pabbajjākathā
