| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. ஸாரிபுத்தஸுத்தங்
3. Sāriputtasuttaṃ
3. ஸாவத்தி²னிதா³னங். அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸாரிபுத்தோ ப⁴க³வந்தங் ஏதத³வோச – ‘‘ஸகலமித³ங், ப⁴ந்தே, ப்³ரஹ்மசரியங், யதி³த³ங் – கல்யாணமித்ததா கல்யாணஸஹாயதா கல்யாணஸம்பவங்கதா’’தி.
3. Sāvatthinidānaṃ. Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhagavantaṃ etadavoca – ‘‘sakalamidaṃ, bhante, brahmacariyaṃ, yadidaṃ – kalyāṇamittatā kalyāṇasahāyatā kalyāṇasampavaṅkatā’’ti.
‘‘ஸாது⁴ ஸாது⁴, ஸாரிபுத்த! ஸகலமித³ங், ஸாரிபுத்த, ப்³ரஹ்மசரியங், யதி³த³ங் – கல்யாணமித்ததா கல்யாணஸஹாயதா கல்யாணஸம்பவங்கதா. கல்யாணமித்தஸ்ஸேதங், ஸாரிபுத்த, பி⁴க்கு²னோ பாடிகங்க²ங் கல்யாணஸஹாயஸ்ஸ கல்யாணஸம்பவங்கஸ்ஸ – அரியங் அட்ட²ங்கி³கங் மக்³க³ங் பா⁴வெஸ்ஸதி, அரியங் அட்ட²ங்கி³கங் மக்³க³ங் ப³ஹுலீகரிஸ்ஸதி. கத²ஞ்ச, ஸாரிபுத்த, பி⁴க்கு² கல்யாணமித்தோ கல்யாணஸஹாயோ கல்யாணஸம்பவங்கோ அரியங் அட்ட²ங்கி³கங் மக்³க³ங் பா⁴வேதி, அரியங் அட்ட²ங்கி³கங் மக்³க³ங் ப³ஹுலீகரோதி?
‘‘Sādhu sādhu, sāriputta! Sakalamidaṃ, sāriputta, brahmacariyaṃ, yadidaṃ – kalyāṇamittatā kalyāṇasahāyatā kalyāṇasampavaṅkatā. Kalyāṇamittassetaṃ, sāriputta, bhikkhuno pāṭikaṅkhaṃ kalyāṇasahāyassa kalyāṇasampavaṅkassa – ariyaṃ aṭṭhaṅgikaṃ maggaṃ bhāvessati, ariyaṃ aṭṭhaṅgikaṃ maggaṃ bahulīkarissati. Kathañca, sāriputta, bhikkhu kalyāṇamitto kalyāṇasahāyo kalyāṇasampavaṅko ariyaṃ aṭṭhaṅgikaṃ maggaṃ bhāveti, ariyaṃ aṭṭhaṅgikaṃ maggaṃ bahulīkaroti?
‘‘இத⁴, ஸாரிபுத்த, பி⁴க்கு² ஸம்மாதி³ட்டி²ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங்…பே॰… ஸம்மாஸமாதி⁴ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங். ஏவங் கோ², ஸாரிபுத்த, பி⁴க்கு² கல்யாணமித்தோ கல்யாணஸஹாயோ கல்யாணஸம்பவங்கோ அரியங் அட்ட²ங்கி³கங் மக்³க³ங் பா⁴வேதி, அரியங் அட்ட²ங்கி³கங் மக்³க³ங் ப³ஹுலீகரோதி.
‘‘Idha, sāriputta, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, sāriputta, bhikkhu kalyāṇamitto kalyāṇasahāyo kalyāṇasampavaṅko ariyaṃ aṭṭhaṅgikaṃ maggaṃ bhāveti, ariyaṃ aṭṭhaṅgikaṃ maggaṃ bahulīkaroti.
‘‘தத³மினாபேதங், ஸாரிபுத்த, பரியாயேன வேதி³தப்³ப³ங் யதா² ஸகலமித³ங் ப்³ரஹ்மசரியங், யதி³த³ங் – கல்யாணமித்ததா கல்யாணஸஹாயதா கல்யாணஸம்பவங்கதா. மமஞ்ஹி, ஸாரிபுத்த, கல்யாணமித்தங் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி; ஜராத⁴ம்மா ஸத்தா ஜராய பரிமுச்சந்தி; மரணத⁴ம்மா ஸத்தா மரணேன பரிமுச்சந்தி; ஸோகபரிதே³வது³க்க²தோ³மனஸ்ஸுபாயாஸத⁴ம்மா ஸத்தா ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தி. இமினா கோ² ஏதங், ஸாரிபுத்த, பரியாயேன வேதி³தப்³ப³ங் யதா² ஸகலமித³ங் ப்³ரஹ்மசரியங், யதி³த³ங் – கல்யாணமித்ததா கல்யாணஸஹாயதா கல்யாணஸம்பவங்கதா’’தி. ததியங்.
‘‘Tadamināpetaṃ, sāriputta, pariyāyena veditabbaṃ yathā sakalamidaṃ brahmacariyaṃ, yadidaṃ – kalyāṇamittatā kalyāṇasahāyatā kalyāṇasampavaṅkatā. Mamañhi, sāriputta, kalyāṇamittaṃ āgamma jātidhammā sattā jātiyā parimuccanti; jarādhammā sattā jarāya parimuccanti; maraṇadhammā sattā maraṇena parimuccanti; sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti. Iminā kho etaṃ, sāriputta, pariyāyena veditabbaṃ yathā sakalamidaṃ brahmacariyaṃ, yadidaṃ – kalyāṇamittatā kalyāṇasahāyatā kalyāṇasampavaṅkatā’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. ஸாரிபுத்தஸுத்தவண்ணனா • 3. Sāriputtasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஸாரிபுத்தஸுத்தவண்ணனா • 3. Sāriputtasuttavaṇṇanā
