| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. සාරිපුත්‌තසුත්‌තං
8. Sāriputtasuttaṃ
168. අථ ඛො ආයස්‌මා මහාමොග්‌ගල්‌ලානො යෙනායස්‌මා සාරිපුත්‌තො තෙනුපසඞ්‌කමි; උපසඞ්‌කමිත්‌වා ආයස්‌මතා සාරිපුත්‌තෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා මහාමොග්‌ගල්‌ලානො ආයස්‌මන්‌තං සාරිපුත්‌තං එතදවොච –
168. Atha kho āyasmā mahāmoggallāno yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā mahāmoggallāno āyasmantaṃ sāriputtaṃ etadavoca –
‘‘චතස්‌සො ඉමා, ආවුසො සාරිපුත්‌ත, පටිපදා. කතමා චතස්‌සො? දුක්‌ඛා පටිපදා දන්‌ධාභිඤ්‌ඤා, දුක්‌ඛා පටිපදා ඛිප්‌පාභිඤ්‌ඤා, සුඛා පටිපදා දන්‌ධාභිඤ්‌ඤා, සුඛා පටිපදා ඛිප්‌පාභිඤ්‌ඤා. ඉමා ඛො, ආවුසො, චතස්‌සො පටිපදා. ඉමාසං, ආවුසො, චතුන්‌නං පටිපදානං කතමං තෙ පටිපදං ආගම්‌ම අනුපාදාය ආසවෙහි චිත්‌තං විමුත්‌ත’’න්‌ති?
‘‘Catasso imā, āvuso sāriputta, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā. Imā kho, āvuso, catasso paṭipadā. Imāsaṃ, āvuso, catunnaṃ paṭipadānaṃ katamaṃ te paṭipadaṃ āgamma anupādāya āsavehi cittaṃ vimutta’’nti?
‘‘චතස්‌සො ඉමා, ආවුසො මොග්‌ගල්‌ලාන, පටිපදා. කතමා චතස්‌සො? දුක්‌ඛා පටිපදා දන්‌ධාභිඤ්‌ඤා, දුක්‌ඛා පටිපදා ඛිප්‌පාභිඤ්‌ඤා, සුඛා පටිපදා දන්‌ධාභිඤ්‌ඤා, සුඛා පටිපදා ඛිප්‌පාභිඤ්‌ඤා. ඉමා ඛො, ආවුසො, චතස්‌සො පටිපදා. ඉමාසං, ආවුසො, චතුන්‌නං පටිපදානං යායං පටිපදා සුඛා ඛිප්‌පාභිඤ්‌ඤා, ඉමං මෙ පටිපදං ආගම්‌ම අනුපාදාය ආසවෙහි චිත්‌තං විමුත්‌ත’’න්‌ති. අට්‌ඨමං.
‘‘Catasso imā, āvuso moggallāna, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā. Imā kho, āvuso, catasso paṭipadā. Imāsaṃ, āvuso, catunnaṃ paṭipadānaṃ yāyaṃ paṭipadā sukhā khippābhiññā, imaṃ me paṭipadaṃ āgamma anupādāya āsavehi cittaṃ vimutta’’nti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. සාරිපුත්‌තසුත්‌තවණ්‌ණනා • 8. Sāriputtasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7-8. මහාමොග්‌ගල්‌ලානසුත්‌තාදිවණ්‌ණනා • 7-8. Mahāmoggallānasuttādivaṇṇanā
