| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. සාරිපුත්‌තසුත්‌තං
7. Sāriputtasuttaṃ
7. අථ ඛො ආයස්‌මා ආනන්‌දො යෙනායස්‌මා සාරිපුත්‌තො තෙනුපසඞ්‌කමි; උපසඞ්‌කමිත්‌වා ආයස්‌මතා සාරිපුත්‌තෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා ආනන්‌දො ආයස්‌මන්‌තං සාරිපුත්‌තං එතදවොච –
7. Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā ānando āyasmantaṃ sāriputtaṃ etadavoca –
‘‘සියා නු ඛො, ආවුසො සාරිපුත්‌ත, භික්‌ඛුනො තථාරූපො සමාධිපටිලාභො යථා නෙව පථවියං පථවිසඤ්‌ඤී අස්‌ස, න ආපස්‌මිං ආපොසඤ්‌ඤී අස්‌ස, න තෙජස්‌මිං තෙජොසඤ්‌ඤී අස්‌ස, න වායස්‌මිං වායොසඤ්‌ඤී අස්‌ස, න ආකාසානඤ්‌චායතනෙ ආකාසානඤ්‌චායතනසඤ්‌ඤී අස්‌ස, න විඤ්‌ඤාණඤ්‌චායතනෙ විඤ්‌ඤාණඤ්‌චායතනසඤ්‌ඤී අස්‌ස, න ආකිඤ්‌චඤ්‌ඤායතනෙ ආකිඤ්‌චඤ්‌ඤායතනසඤ්‌ඤී අස්‌ස, න නෙවසඤ්‌ඤානාසඤ්‌ඤායතනෙ නෙවසඤ්‌ඤානාසඤ්‌ඤායතනසඤ්‌ඤී අස්‌ස, න ඉධලොකෙ ඉධලොකසඤ්‌ඤී අස්‌ස, න පරලොකෙ පරලොකසඤ්‌ඤී අස්‌ස; සඤ්‌ඤී ච පන අස්‌සා’’ති?
‘‘Siyā nu kho, āvuso sāriputta, bhikkhuno tathārūpo samādhipaṭilābho yathā neva pathaviyaṃ pathavisaññī assa, na āpasmiṃ āposaññī assa, na tejasmiṃ tejosaññī assa, na vāyasmiṃ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa; saññī ca pana assā’’ti?
‘‘සියා , ආවුසො ආනන්‌ද, භික්‌ඛුනො තථාරූපො සමාධිපටිලාභො යථා නෙව පථවියං පථවිසඤ්‌ඤී අස්‌ස…පෙ.… න පරලොකෙ පරලොකසඤ්‌ඤී අස්‌ස; සඤ්‌ඤී ච පන අස්‌සා’’ති.
‘‘Siyā , āvuso ānanda, bhikkhuno tathārūpo samādhipaṭilābho yathā neva pathaviyaṃ pathavisaññī assa…pe… na paraloke paralokasaññī assa; saññī ca pana assā’’ti.
‘‘යථා කථං පන, ආවුසො සාරිපුත්‌ත, සියා භික්‌ඛුනො තථාරූපො සමාධිපටිලාභො යථා නෙව පථවියං පථවිසඤ්‌ඤී අස්‌ස…පෙ.… සඤ්‌ඤී ච පන අස්‌සා’’ති? ‘‘එකමිදාහං, ආවුසො ආනන්‌ද, සමයං ඉධෙව සාවත්‌ථියං විහරාමි අන්‌ධවනස්‌මිං. තත්‌ථාහං 1 තථාරූපං සමාධිං සමාපජ්‌ජිං 2 යථා නෙව පථවියං පථවිසඤ්‌ඤී අහොසිං, න ආපස්‌මිං ආපොසඤ්‌ඤී අහොසිං, න තෙජස්‌මිං තෙජොසඤ්‌ඤී අහොසිං, න වායස්‌මිං වායොසඤ්‌ඤී අහොසිං, න ආකාසානඤ්‌චායතනෙ ආකාසානඤ්‌චායතනසඤ්‌ඤී අහොසිං, න විඤ්‌ඤාණඤ්‌චායතනෙ විඤ්‌ඤාණඤ්‌චායතනසඤ්‌ඤී අහොසිං, න ආකිඤ්‌චඤ්‌ඤායතනෙ ආකිඤ්‌චඤ්‌ඤායතනසඤ්‌ඤී අහොසිං, න නෙවසඤ්‌ඤානාසඤ්‌ඤායතනෙ නෙවසඤ්‌ඤානාසඤ්‌ඤායතනසඤ්‌ඤී අහොසිං, න ඉධලොකෙ ඉධලොකසඤ්‌ඤී අහොසිං, න පරලොකෙ පරලොකසඤ්‌ඤී අහොසිං; සඤ්‌ඤී ච පන අහොසි’’න්‌ති.
‘‘Yathā kathaṃ pana, āvuso sāriputta, siyā bhikkhuno tathārūpo samādhipaṭilābho yathā neva pathaviyaṃ pathavisaññī assa…pe… saññī ca pana assā’’ti? ‘‘Ekamidāhaṃ, āvuso ānanda, samayaṃ idheva sāvatthiyaṃ viharāmi andhavanasmiṃ. Tatthāhaṃ 3 tathārūpaṃ samādhiṃ samāpajjiṃ 4 yathā neva pathaviyaṃ pathavisaññī ahosiṃ, na āpasmiṃ āposaññī ahosiṃ, na tejasmiṃ tejosaññī ahosiṃ, na vāyasmiṃ vāyosaññī ahosiṃ, na ākāsānañcāyatane ākāsānañcāyatanasaññī ahosiṃ, na viññāṇañcāyatane viññāṇañcāyatanasaññī ahosiṃ, na ākiñcaññāyatane ākiñcaññāyatanasaññī ahosiṃ, na nevasaññānāsaññāyatane nevasaññānāsaññāyatanasaññī ahosiṃ, na idhaloke idhalokasaññī ahosiṃ, na paraloke paralokasaññī ahosiṃ; saññī ca pana ahosi’’nti.
‘‘කිංසඤ්‌ඤී පනායස්‌මා සාරිපුත්‌තො 5 තස්‌මිං සමයෙ අහොසී’’ති? ‘‘භවනිරොධො නිබ්‌බානං භවනිරොධො නිබ්‌බාන’’න්‌ති ඛො මෙ, ආවුසො, අඤ්‌ඤාව සඤ්‌ඤා උප්‌පජ්‌ජති අඤ්‌ඤාව සඤ්‌ඤා නිරුජ්‌ඣති. සෙය්‍යථාපි, ආවුසො, සකලිකග්‌ගිස්‌ස ඣායමානස්‌ස අඤ්‌ඤාව අච්‌චි උප්‌පජ්‌ජති අඤ්‌ඤාව අච්‌චි නිරුජ්‌ඣති; එවමෙවං ඛො, ආවුසො, ‘භවනිරොධො නිබ්‌බානං භවනිරොධො නිබ්‌බාන’න්‌ති අඤ්‌ඤාව සඤ්‌ඤා උප්‌පජ්‌ජති අඤ්‌ඤාව සඤ්‌ඤා නිරුජ්‌ඣති. ‘භවනිරොධො නිබ්‌බාන’න්‌ති 6 සඤ්‌ඤී ච පනාහං, ආවුසො, තස්‌මිං සමයෙ අහොසි’’න්‌ති. සත්‌තමං.
‘‘Kiṃsaññī panāyasmā sāriputto 7 tasmiṃ samaye ahosī’’ti? ‘‘Bhavanirodho nibbānaṃ bhavanirodho nibbāna’’nti kho me, āvuso, aññāva saññā uppajjati aññāva saññā nirujjhati. Seyyathāpi, āvuso, sakalikaggissa jhāyamānassa aññāva acci uppajjati aññāva acci nirujjhati; evamevaṃ kho, āvuso, ‘bhavanirodho nibbānaṃ bhavanirodho nibbāna’nti aññāva saññā uppajjati aññāva saññā nirujjhati. ‘Bhavanirodho nibbāna’nti 8 saññī ca panāhaṃ, āvuso, tasmiṃ samaye ahosi’’nti. Sattamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. සාරිපුත්‌තසුත්‌තවණ්‌ණනා • 7. Sāriputtasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-7. අවිජ්‌ජාසුත්‌තාදිවණ්‌ණනා • 1-7. Avijjāsuttādivaṇṇanā
