| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. སཱརིཔུཏྟསུཏྟཾ
8. Sāriputtasuttaṃ
༡༦༨. ཨཐ ཁོ ཨཱཡསྨཱ མཧཱམོགྒལླཱནོ ཡེནཱཡསྨཱ སཱརིཔུཏྟོ ཏེནུཔསངྐམི; ཨུཔསངྐམིཏྭཱ ཨཱཡསྨཏཱ སཱརིཔུཏྟེན སདྡྷིཾ སམྨོདི། སམྨོདནཱིཡཾ ཀཐཾ སཱརཎཱིཡཾ ཝཱིཏིསཱརེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ མཧཱམོགྒལླཱནོ ཨཱཡསྨནྟཾ སཱརིཔུཏྟཾ ཨེཏདཝོཙ –
168. Atha kho āyasmā mahāmoggallāno yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā mahāmoggallāno āyasmantaṃ sāriputtaṃ etadavoca –
‘‘ཙཏསྶོ ཨིམཱ, ཨཱཝུསོ སཱརིཔུཏྟ, པཊིཔདཱ། ཀཏམཱ ཙཏསྶོ? དུཀྑཱ པཊིཔདཱ དནྡྷཱབྷིཉྙཱ, དུཀྑཱ པཊིཔདཱ ཁིཔྤཱབྷིཉྙཱ, སུཁཱ པཊིཔདཱ དནྡྷཱབྷིཉྙཱ, སུཁཱ པཊིཔདཱ ཁིཔྤཱབྷིཉྙཱ། ཨིམཱ ཁོ, ཨཱཝུསོ, ཙཏསྶོ པཊིཔདཱ། ཨིམཱསཾ, ཨཱཝུསོ, ཙཏུནྣཾ པཊིཔདཱནཾ ཀཏམཾ ཏེ པཊིཔདཾ ཨཱགམྨ ཨནུཔཱདཱཡ ཨཱསཝེཧི ཙིཏྟཾ ཝིམུཏྟ’’ནྟི?
‘‘Catasso imā, āvuso sāriputta, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā. Imā kho, āvuso, catasso paṭipadā. Imāsaṃ, āvuso, catunnaṃ paṭipadānaṃ katamaṃ te paṭipadaṃ āgamma anupādāya āsavehi cittaṃ vimutta’’nti?
‘‘ཙཏསྶོ ཨིམཱ, ཨཱཝུསོ མོགྒལླཱན, པཊིཔདཱ། ཀཏམཱ ཙཏསྶོ? དུཀྑཱ པཊིཔདཱ དནྡྷཱབྷིཉྙཱ, དུཀྑཱ པཊིཔདཱ ཁིཔྤཱབྷིཉྙཱ, སུཁཱ པཊིཔདཱ དནྡྷཱབྷིཉྙཱ, སུཁཱ པཊིཔདཱ ཁིཔྤཱབྷིཉྙཱ། ཨིམཱ ཁོ, ཨཱཝུསོ, ཙཏསྶོ པཊིཔདཱ། ཨིམཱསཾ, ཨཱཝུསོ, ཙཏུནྣཾ པཊིཔདཱནཾ ཡཱཡཾ པཊིཔདཱ སུཁཱ ཁིཔྤཱབྷིཉྙཱ, ཨིམཾ མེ པཊིཔདཾ ཨཱགམྨ ཨནུཔཱདཱཡ ཨཱསཝེཧི ཙིཏྟཾ ཝིམུཏྟ’’ནྟི། ཨཊྛམཾ།
‘‘Catasso imā, āvuso moggallāna, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā. Imā kho, āvuso, catasso paṭipadā. Imāsaṃ, āvuso, catunnaṃ paṭipadānaṃ yāyaṃ paṭipadā sukhā khippābhiññā, imaṃ me paṭipadaṃ āgamma anupādāya āsavehi cittaṃ vimutta’’nti. Aṭṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. སཱརིཔུཏྟསུཏྟཝཎྞནཱ • 8. Sāriputtasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༧-༨. མཧཱམོགྒལླཱནསུཏྟཱདིཝཎྞནཱ • 7-8. Mahāmoggallānasuttādivaṇṇanā
