Library / Tipiṭaka / তিপিটক • Tipiṭaka / মহানিদ্দেসপাল়ি • Mahāniddesapāḷi

১৬. সারিপুত্তসুত্তনিদ্দেসো

16. Sāriputtasuttaniddeso

অথ সারিপুত্তসুত্তনিদ্দেসং ৰক্খতি –

Atha sāriputtasuttaniddesaṃ vakkhati –

১৯০.

190.

ন মে দিট্ঠো ইতো পুব্বে, [ইচ্চাযস্মা সারিপুত্তো]

Name diṭṭho ito pubbe, [iccāyasmā sāriputto]

ন সুতো উদ কস্সচি।

Na suto uda kassaci;

এৰং ৰগ্গুৰদো সত্থা, তুসিতা গণিমাগতো॥

Evaṃ vagguvado satthā, tusitā gaṇimāgato.

ন মে দিট্ঠো ইতো পুব্বেতি। ইতো পুব্বে মে মযা ন দিট্ঠপুব্বো সো ভগৰা ইমিনা চক্খুনা ইমিনা অত্তভাৰেন। যদা ভগৰা তাৰতিংসভৰনে পারিচ্ছত্তকমূলে পণ্ডুকম্বলসিলাযং ৰস্সংৰুত্থো ¹ দেৰগণপরিৰুতো মজ্ঝে মণিমযেন সোপাণেন সঙ্কস্সনগরং ওতিণ্ণো ইমং দস্সনং পুব্বে ন দিট্ঠোতি – ন মে দিট্ঠো ইতো পুব্বে।

Na me diṭṭho ito pubbeti. Ito pubbe me mayā na diṭṭhapubbo so bhagavā iminā cakkhunā iminā attabhāvena. Yadā bhagavā tāvatiṃsabhavane pāricchattakamūle paṇḍukambalasilāyaṃ vassaṃvuttho ² devagaṇaparivuto majjhe maṇimayena sopāṇena saṅkassanagaraṃ otiṇṇo imaṃ dassanaṃ pubbe na diṭṭhoti – na me diṭṭho ito pubbe.

ইচ্চাযস্মা সারিপুত্তোতি। ইচ্চাতি পদসন্ধি পদসংসগ্গো পদপারিপূরী অক্খরসমৰাযো ব্যঞ্জনসিলিট্ঠতা পদানুপুব্বতাপেতং – ইচ্চাতি। আযস্মাতি পিযৰচনং গরুৰচনং সগারৰসপ্পতিস্সৰচনমেতং – আযস্মাতি। সারিপুত্তোতি তস্স থেরস্স নামং সঙ্খা সমঞ্ঞা পঞ্ঞত্তি ৰোহারো নামং নামকম্মং নামধেয্যং নিরুত্তি ব্যঞ্জনং অভিলাপোতি – ইচ্চাযস্মা সারিপুত্তো।

Iccāyasmā sāriputtoti. Iccāti padasandhi padasaṃsaggo padapāripūrī akkharasamavāyo byañjanasiliṭṭhatā padānupubbatāpetaṃ – iccāti. Āyasmāti piyavacanaṃ garuvacanaṃ sagāravasappatissavacanametaṃ – āyasmāti. Sāriputtoti tassa therassa nāmaṃ saṅkhā samaññā paññatti vohāro nāmaṃ nāmakammaṃ nāmadheyyaṃ nirutti byañjanaṃ abhilāpoti – iccāyasmā sāriputto.

ন সুতো উদ কস্সচীতি। নাতি পটিক্খেপো। উদাতি পদসন্ধি পদসংসগ্গো পদপারিপূরী অক্খরসমৰাযো ব্যঞ্জনসিলিট্ঠতা পদানুপুব্বতাপেতং – উদাতি। কস্সচীতি খত্তিযস্স ৰা ব্রাহ্মণস্স ৰা ৰেস্সস্স ৰা সুদ্দস্স ৰা গহট্ঠস্স ৰা পব্বজিতস্স ৰা দেৰস্স ৰা মনুস্সস্স ৰাতি – ন সুতো উদ কস্সচি।

Na suto uda kassacīti. Nāti paṭikkhepo. Udāti padasandhi padasaṃsaggo padapāripūrī akkharasamavāyo byañjanasiliṭṭhatā padānupubbatāpetaṃ – udāti. Kassacīti khattiyassa vā brāhmaṇassa vā vessassa vā suddassa vā gahaṭṭhassa vā pabbajitassa vā devassa vā manussassa vāti – na suto uda kassaci.

এৰং ৰগ্গুৰদো সত্থাতি। এৰং ৰগ্গুৰদো মধুরৰদো পেমনীযৰদো হদযঙ্গমৰদো করৰীকরুতমঞ্জুঘোসো ³। অট্ঠঙ্গসমন্নাগতো খো পন তস্স ভগৰতো মুখতো ঘোসো নিচ্ছরতি – ৰিসট্ঠো চ ৰিঞ্ঞেয্যো চ মঞ্জু চ সৰনীযো চ বিন্দু চ অৰিসারী চ গম্ভীরো চ নিন্নাদি চ। যথা পরিসং খো পন সো ভগৰা সরেন ৰিঞ্ঞাপেতি, ন অস্স বহিদ্ধা পরিসায ঘোসো নিচ্ছরতি, ব্রহ্মস্সরো খো পন সো ভগৰা করৰীকভাণীতি – এৰং ৰগ্গুৰদো।

Evaṃvagguvado satthāti. Evaṃ vagguvado madhuravado pemanīyavado hadayaṅgamavado karavīkarutamañjughoso ⁴. Aṭṭhaṅgasamannāgato kho pana tassa bhagavato mukhato ghoso niccharati – visaṭṭho ca viññeyyo ca mañju ca savanīyo ca bindu ca avisārī ca gambhīro ca ninnādi ca. Yathā parisaṃ kho pana so bhagavā sarena viññāpeti, na assa bahiddhā parisāya ghoso niccharati, brahmassaro kho pana so bhagavā karavīkabhāṇīti – evaṃ vagguvado.

সত্থাতি সত্থা ভগৰা সত্থৰাহো। যথা সত্থৰাহো সত্তে কন্তারং তারেতি, চোরকন্তারং তারেতি, ৰাল়কন্তারং তারেতি, দুব্ভিক্খকন্তারং তারেতি, নিরুদককন্তারং তারেতি উত্তারেতি নিত্তারেতি পতারেতি খেমন্তভূমিং সম্পাপেতি; এৰমেৰ ভগৰা সত্থৰাহো সত্তে কন্তারং তারেতি, জাতিকন্তারং তারেতি, জরাকন্তারং তারেতি, ব্যাধিকন্তারং…পে॰… মরণকন্তারং… সোকপরিদেৰদুক্খদোমনস্সুপাযাসকন্তারং তারেতি রাগকন্তারং তারেতি দোসকন্তারং… মোহকন্তারং… মানকন্তারং… দিট্ঠিকন্তারং… কিলেসকন্তারং… দুচ্চরিতকন্তারং তারেতি, রাগগহনং তারেতি, দোসগহনং… মোহগহনং… মানগহনং… দিট্ঠিগহনং… কিলেসগহনং… দুচ্চরিতগহনং তারেতি উত্তারেতি নিত্তারেতি পতারেতি খেমন্তং অমতং নিব্বানং সম্পাপেতীতি । এৰম্পি ভগৰা সত্থৰাহো।

Satthāti satthā bhagavā satthavāho. Yathā satthavāho satte kantāraṃ tāreti, corakantāraṃ tāreti, vāḷakantāraṃ tāreti, dubbhikkhakantāraṃ tāreti, nirudakakantāraṃ tāreti uttāreti nittāreti patāreti khemantabhūmiṃ sampāpeti; evameva bhagavā satthavāho satte kantāraṃ tāreti, jātikantāraṃ tāreti, jarākantāraṃ tāreti, byādhikantāraṃ…pe… maraṇakantāraṃ… sokaparidevadukkhadomanassupāyāsakantāraṃ tāreti rāgakantāraṃ tāreti dosakantāraṃ… mohakantāraṃ… mānakantāraṃ… diṭṭhikantāraṃ… kilesakantāraṃ… duccaritakantāraṃ tāreti, rāgagahanaṃ tāreti, dosagahanaṃ… mohagahanaṃ… mānagahanaṃ… diṭṭhigahanaṃ… kilesagahanaṃ… duccaritagahanaṃ tāreti uttāreti nittāreti patāreti khemantaṃ amataṃ nibbānaṃ sampāpetīti . Evampi bhagavā satthavāho.

অথ ৰা ভগৰা নেতা ৰিনেতা অনুনেতা পঞ্ঞপেতা নিজ্ঝাপেতা পেক্খেতা পসাদেতাতি। এৰম্পি ভগৰা সত্থৰাহো।

Atha vā bhagavā netā vinetā anunetā paññapetā nijjhāpetā pekkhetā pasādetāti. Evampi bhagavā satthavāho.

অথ ৰা ভগৰা অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা, অনক্খাতস্স মগ্গস্স অক্খাতা, মগ্গঞ্ঞূ মগ্গৰিদূ মগ্গকোৰিদো মগ্গানুগা চ পন এতরহি সাৰকা ৰিহরন্তি পচ্ছা সমন্নাগতাতি। এৰম্পি ভগৰা সত্থৰাহোতি – এৰং ৰগ্গুৰদো সত্থা।

Atha vā bhagavā anuppannassa maggassa uppādetā, asañjātassa maggassa sañjanetā, anakkhātassa maggassa akkhātā, maggaññū maggavidū maggakovido maggānugā ca pana etarahi sāvakā viharanti pacchā samannāgatāti. Evampi bhagavā satthavāhoti – evaṃ vagguvado satthā.

তুসিতা গণিমাগতোতি। ভগৰা তুসিতকাযা চৰিত্ৰা সতো সম্পজানো মাতুকুচ্ছিং ওক্কন্তোতি। এৰম্পি তুসিতা গণিমাগতো।

Tusitā gaṇimāgatoti. Bhagavā tusitakāyā cavitvā sato sampajāno mātukucchiṃ okkantoti. Evampi tusitā gaṇimāgato.

অথ ৰা দেৰা ৰুচ্চন্তি তুসিতা। তে তুট্ঠা সন্তুট্ঠা অত্তমনা পমুদিতা পীতিসোমনস্সজাতা দেৰলোকতো গণিং আগতোতি। এৰম্পি তুসিতা গণিমাগতো। অথ ৰা অরহন্তো ৰুচ্চন্তি তুসিতা। তে তুট্ঠা সন্তুট্ঠা অত্তমনা পরিপুণ্ণসঙ্কপ্পা অরহন্তানং গণিং আগতোতি। এৰম্পি তুসিতা গণিমাগতো। গণীতি গণী ভগৰা। গণাচরিযোতি গণী, গণস্স সত্থাতি গণী, গণং পরিহরতীতি গণী, গণং ওৰদতীতি গণী, গণমনুসাসতীতি গণী, ৰিসারদো গণং উপসঙ্কমতীতি গণী, গণস্স ⁵ সুস্সূসতি সোতং ওদহতি অঞ্ঞা চিত্তং উপট্ঠপেতীতি গণী, গণং অকুসলা ৰুট্ঠাপেত্ৰা কুসলে পতিট্ঠাপেতীতি গণী, ভিক্খুগণস্স গণী, ভিক্খুনিগণস্স গণী, উপাসকগণস্স গণী, উপাসিকাগণস্স গণী , রাজগণস্স গণী, খত্তিযগণস্স… ব্রাহ্মণগণস্স… ৰেস্সগণস্স… সুদ্দগণস্স… দেৰগণস্স… ব্রহ্মগণস্স গণী, সঙ্ঘী গণী গণাচরিযো। আগতোতি উপগতো সমুপগতো সমুপপন্নো ⁶ সঙ্কস্সনগরন্তি – তুসিতা গণিমাগতো।

Atha vā devā vuccanti tusitā. Te tuṭṭhā santuṭṭhā attamanā pamuditā pītisomanassajātā devalokato gaṇiṃ āgatoti. Evampi tusitā gaṇimāgato. Atha vā arahanto vuccanti tusitā. Te tuṭṭhā santuṭṭhā attamanā paripuṇṇasaṅkappā arahantānaṃ gaṇiṃ āgatoti. Evampi tusitā gaṇimāgato. Gaṇīti gaṇī bhagavā. Gaṇācariyoti gaṇī, gaṇassa satthāti gaṇī, gaṇaṃ pariharatīti gaṇī, gaṇaṃ ovadatīti gaṇī, gaṇamanusāsatīti gaṇī, visārado gaṇaṃ upasaṅkamatīti gaṇī, gaṇassa ⁷ sussūsati sotaṃ odahati aññā cittaṃ upaṭṭhapetīti gaṇī, gaṇaṃ akusalā vuṭṭhāpetvā kusale patiṭṭhāpetīti gaṇī, bhikkhugaṇassa gaṇī, bhikkhunigaṇassa gaṇī, upāsakagaṇassa gaṇī, upāsikāgaṇassa gaṇī , rājagaṇassa gaṇī, khattiyagaṇassa… brāhmaṇagaṇassa… vessagaṇassa… suddagaṇassa… devagaṇassa… brahmagaṇassa gaṇī, saṅghī gaṇī gaṇācariyo. Āgatoti upagato samupagato samupapanno ⁸ saṅkassanagaranti – tusitā gaṇimāgato.

তেনাহ থেরো সারিপুত্তো –

Tenāha thero sāriputto –

‘‘ন মে দিট্ঠো ইতো পুব্বে, [ইচ্চাযস্মা সারিপুত্তো]

‘‘Na me diṭṭho ito pubbe, [iccāyasmā sāriputto]

ন সুতো উদ কস্সচি।

Na suto uda kassaci;

এৰং ৰগ্গুৰদো সত্থা, তুসিতা গণিমাগতো’’তি॥

Evaṃ vagguvado satthā, tusitā gaṇimāgato’’ti.

১৯১.

191.

সদেৰকস্স লোকস্স, যথা দিস্সতি চক্খুমা।

Sadevakassa lokassa, yathā dissati cakkhumā;

সব্বং তমং ৰিনোদেত্ৰা, একোৰ রতিমজ্ঝগা॥

Sabbaṃ tamaṃ vinodetvā, ekova ratimajjhagā.

সদেৰকস্স লোকস্সাতি সদেৰকস্স লোকস্স সমারকস্স সব্রহ্মকস্স সস্সমণব্রাহ্মণিযা পজায সদেৰমনুস্সাযাতি – সদেৰকস্স লোকস্স।

Sadevakassalokassāti sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāyāti – sadevakassa lokassa.

যথা দিস্সতি চক্খুমাতি যথা ভগৰন্তং তাৰতিংসভৰনে পারিচ্ছত্তকমূলে পণ্ডুকম্বলসিলাযং নিসিন্নং ধম্মং দেসেন্তং দেৰতা পস্সন্তি তথা মনুস্সা পস্সন্তি । যথা মনুস্সা পস্সন্তি তথা দেৰতা পস্সন্তি। যথা দেৰানং দিস্সতি তথা মনুস্সানং দিস্সতি। যথা মনুস্সানং দিস্সতি তথা দেৰানং দিস্সতীতি। এৰম্পি যথা দিস্সতি চক্খুমা। যথা ৰা পনেকে ভোন্তো সমণব্রাহ্মণা অদন্তা দন্তৰণ্ণেন দিস্সন্তি, অসন্তা সন্তৰণ্ণেন দিস্সন্তি, অনুপসন্তা উপসন্তৰণ্ণেন দিস্সন্তি, অনিব্বুতা নিব্বুতৰণ্ণেন দিস্সন্তি।

Yathā dissati cakkhumāti yathā bhagavantaṃ tāvatiṃsabhavane pāricchattakamūle paṇḍukambalasilāyaṃ nisinnaṃ dhammaṃ desentaṃ devatā passanti tathā manussā passanti . Yathā manussā passanti tathā devatā passanti. Yathā devānaṃ dissati tathā manussānaṃ dissati. Yathā manussānaṃ dissati tathā devānaṃ dissatīti. Evampi yathā dissati cakkhumā. Yathā vā paneke bhonto samaṇabrāhmaṇā adantā dantavaṇṇena dissanti, asantā santavaṇṇena dissanti, anupasantā upasantavaṇṇena dissanti, anibbutā nibbutavaṇṇena dissanti.

‘‘পতিরূপকো মত্তিকাকুণ্ডলোৰ, লোহড্ঢমাসোৰ ⁹ সুৰণ্ণছন্নো।

‘‘Patirūpako mattikākuṇḍalova, lohaḍḍhamāsova ¹⁰ suvaṇṇachanno;

চরন্তি লোকে পরিৰারছন্না, অন্তো অসুদ্ধা বহি সোভমানা’’তি ¹¹॥

Caranti loke parivārachannā, anto asuddhā bahi sobhamānā’’ti ¹².

ন ভগৰা এৰং দিস্সতি। ভগৰা ভূতেন তচ্ছেন তথেন যাথাৰেন অৰিপরীতেন সভাৰেন দন্তো দন্তৰণ্ণেন দিস্সতি, সন্তো সন্তৰণ্ণেন দিস্সতি, উপসন্তো উপসন্তৰণ্ণেন দিস্সতি, নিব্বুতো নিব্বুতৰণ্ণেন দিস্সতি, অকপ্পিতইরিযাপথা চ বুদ্ধা ভগৰন্তো পণিধিসম্পন্নাতি। এৰম্পি যথা দিস্সতি চক্খুমা।

Na bhagavā evaṃ dissati. Bhagavā bhūtena tacchena tathena yāthāvena aviparītena sabhāvena danto dantavaṇṇena dissati, santo santavaṇṇena dissati, upasanto upasantavaṇṇena dissati, nibbuto nibbutavaṇṇena dissati, akappitairiyāpathā ca buddhā bhagavanto paṇidhisampannāti. Evampi yathā dissati cakkhumā.

অথ ৰা ভগৰা ৰিসুদ্ধসদ্দো গতকিত্তিসদ্দসিলোকো ¹³ নাগভৰনে চ সুপণ্ণভৰনে চ যক্খভৰনে চ অসুরভৰনে চ গন্ধব্বভৰনে চ মহারাজভৰনে চ ইন্দভৰনে চ ব্রহ্মভৰনে চ দেৰভৰনে চ এদিসো চ তাদিসো চ ততো চ ভিয্যোতি। এৰম্পি যথা দিস্সতি চক্খুমা।

Atha vā bhagavā visuddhasaddo gatakittisaddasiloko ¹⁴ nāgabhavane ca supaṇṇabhavane ca yakkhabhavane ca asurabhavane ca gandhabbabhavane ca mahārājabhavane ca indabhavane ca brahmabhavane ca devabhavane ca ediso ca tādiso ca tato ca bhiyyoti. Evampi yathā dissati cakkhumā.

অথ ৰা ভগৰা দসহি বলেহি সমন্নাগতো, চতূহি ৰেসারজ্জেহি, চতূহি পটিসম্ভিদাহি, ছহি অভিঞ্ঞাহি, ছহি বুদ্ধধম্মেহি, তেজেন চ বলেন চ গুণেন চ ৰীরিযেন চ পঞ্ঞায চ দিস্সতি ঞাযতি পঞ্ঞাযতি।

Atha vā bhagavā dasahi balehi samannāgato, catūhi vesārajjehi, catūhi paṭisambhidāhi, chahi abhiññāhi, chahi buddhadhammehi, tejena ca balena ca guṇena ca vīriyena ca paññāya ca dissati ñāyati paññāyati.

‘‘দূরে সন্তো পকাসেন্তি, হিমৰন্তোৰ পব্বতো।

‘‘Dūre santo pakāsenti, himavantova pabbato;

অসন্তেত্থ ন দিস্সন্তি, রত্তিং খিত্তা ¹⁵ যথা সরা’’তি॥

Asantettha na dissanti, rattiṃ khittā ¹⁶ yathā sarā’’ti.

এৰম্পি যথা দিস্সতি চক্খুমা।

Evampi yathā dissati cakkhumā.

চক্খুমাতি ভগৰা পঞ্চহি চক্খূহি চক্খুমা – মংসচক্খুনাপি চক্খুমা, দিব্বচক্খুনাপি চক্খুমা, পঞ্ঞাচক্খুনাপি চক্খুমা, বুদ্ধচক্খুনাপি চক্খুমা, সমন্তচক্খুনাপি চক্খুমা।

Cakkhumāti bhagavā pañcahi cakkhūhi cakkhumā – maṃsacakkhunāpi cakkhumā, dibbacakkhunāpi cakkhumā, paññācakkhunāpi cakkhumā, buddhacakkhunāpi cakkhumā, samantacakkhunāpi cakkhumā.

কথং ভগৰা মংসচক্খুনাপি চক্খুমা? মংসচক্খুম্হি ভগৰতো পঞ্চ ৰণ্ণা সংৰিজ্জন্তি – নীলো চ ৰণ্ণো, পীতকো চ ৰণ্ণো, লোহিতকো চ ৰণ্ণো, কণ্হো চ ৰণ্ণো, ওদাতো চ ৰণ্ণো। অক্খিলোমানি চ ভগৰতো। যত্থ চ অক্খিলোমানি পতিট্ঠিতানি তং নীলং হোতি সুনীলং পাসাদিকং দস্সনেয্যং উমাপুপ্ফসমানং। তস্স পরতো পীতকং হোতি সুপীতকং সুৰণ্ণৰণ্ণং পাসাদিকং দস্সনেয্যং কণিকারপুপ্ফসমানং। উভতো অক্খিকূটানি ভগৰতো লোহিতকানি হোন্তি সুলোহিতকানি পাসাদিকানি দস্সনেয্যানি ইন্দগোপকসমানানি। মজ্ঝে কণ্হং হোতি সুকণ্হং অলূখং সুদ্ধং পাসাদিকং দস্সনেয্যং অদ্দারিট্ঠকসমানং। তস্স পরতো ওদাতং হোতি সুওদাতং সেতং পণ্ডরং পাসাদিকং দস্সনেয্যং ওসধিতারকসমানং । তেন ভগৰা পাকতিকেন মংসচক্খুনা অত্তভাৰপরিযাপন্নেন পুরিমসুচরিতকম্মাভিনিব্বত্তেন সমন্তা যোজনং পস্সতি দিৰা চেৰ রত্তিঞ্চ। যদাপি চতুরঙ্গসমন্নাগতো অন্ধকারো হোতি সূরিযো চ অত্থঙ্গতো হোতি ; কাল়পক্খো চ উপোসথো হোতি, তিব্বো চ ৰনসণ্ডো হোতি, মহা চ কাল়মেঘো অব্ভুট্ঠিতো হোতি। এৰরূপেপি চতুরঙ্গসমন্নাগতে অন্ধকারে সমন্তা যোজনং পস্সতি। নত্থি সো কুট্টো ৰা কৰাটং ৰা পাকারো ৰা পব্বতো ৰা গচ্ছো ৰা লতা ৰা আৰরণং রূপানং দস্সনায। একঞ্চে তিলফলং নিমিত্তং কত্ৰা তিলৰাহে পক্খিপেয্য, তঞ্ঞেৰ তিলফলং উদ্ধরেয্য। এৰং পরিসুদ্ধং ভগৰতো পাকতিকমংসচক্খু। এৰং ভগৰা মংসচক্খুনাপি চক্খুমা।

Kathaṃ bhagavā maṃsacakkhunāpi cakkhumā? Maṃsacakkhumhi bhagavato pañca vaṇṇā saṃvijjanti – nīlo ca vaṇṇo, pītako ca vaṇṇo, lohitako ca vaṇṇo, kaṇho ca vaṇṇo, odāto ca vaṇṇo. Akkhilomāni ca bhagavato. Yattha ca akkhilomāni patiṭṭhitāni taṃ nīlaṃ hoti sunīlaṃ pāsādikaṃ dassaneyyaṃ umāpupphasamānaṃ. Tassa parato pītakaṃ hoti supītakaṃ suvaṇṇavaṇṇaṃ pāsādikaṃ dassaneyyaṃ kaṇikārapupphasamānaṃ. Ubhato akkhikūṭāni bhagavato lohitakāni honti sulohitakāni pāsādikāni dassaneyyāni indagopakasamānāni. Majjhe kaṇhaṃ hoti sukaṇhaṃ alūkhaṃ suddhaṃ pāsādikaṃ dassaneyyaṃ addāriṭṭhakasamānaṃ. Tassa parato odātaṃ hoti suodātaṃ setaṃ paṇḍaraṃ pāsādikaṃ dassaneyyaṃ osadhitārakasamānaṃ . Tena bhagavā pākatikena maṃsacakkhunā attabhāvapariyāpannena purimasucaritakammābhinibbattena samantā yojanaṃ passati divā ceva rattiñca. Yadāpi caturaṅgasamannāgato andhakāro hoti sūriyo ca atthaṅgato hoti ; kāḷapakkho ca uposatho hoti, tibbo ca vanasaṇḍo hoti, mahā ca kāḷamegho abbhuṭṭhito hoti. Evarūpepi caturaṅgasamannāgate andhakāre samantā yojanaṃ passati. Natthi so kuṭṭo vā kavāṭaṃ vā pākāro vā pabbato vā gaccho vā latā vā āvaraṇaṃ rūpānaṃ dassanāya. Ekañce tilaphalaṃ nimittaṃ katvā tilavāhe pakkhipeyya, taññeva tilaphalaṃ uddhareyya. Evaṃ parisuddhaṃ bhagavato pākatikamaṃsacakkhu. Evaṃ bhagavā maṃsacakkhunāpi cakkhumā.

কথং ভগৰা দিব্বেন চক্খুনাপি চক্খুমা? ভগৰা দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে; যথাকম্মূপগে সত্তে পজানাতি – ‘‘ইমে ৰত ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না; ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা, তে কাযস্স ভেদা পরং মরণা সুগতিং সগ্গং লোকং উপপন্না’’তি। ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে; যথাকম্মূপগে সত্তে পজানাতি। আকঙ্খমানো চ ভগৰা একম্পি লোকধাতুং পস্সেয্য, দ্ৰেপি লোকধাতুযো পস্সেয্য, তিস্সোপি লোকধাতুযো পস্সেয্য, চতস্সোপি লোকধাতুযো পস্সেয্য, পঞ্চপি লোকধাতুযো পস্সেয্য, দসপি লোকধাতুযো পস্সেয্য, ৰীসম্পি ¹⁷ লোকধাতুযো পস্সেয্য, তিংসম্পি লোকধাতুযো পস্সেয্য, চত্তালীসম্পি লোকধাতুযো পস্সেয্য, পঞ্ঞাসম্পি লোকধাতুযো পস্সেয্য, সতম্পি লোকধাতুং পস্সেয্য, সহস্সিম্পি চূল়নিকং লোকধাতুং পস্সেয্য, দ্ৰিসহস্সিম্পি মজ্ঝিমিকং লোকধাতুং পস্সেয্য, তিসহস্সিম্পি লোকধাতুং পস্সেয্য, মহাসহস্সিম্পি লোকধাতুং পস্সেয্য, যাৰতকং পন আকঙ্খেয্য তাৰতকং পস্সেয্য। এৰং পরিসুদ্ধং ভগৰতো দিব্বচক্খু। এৰং ভগৰা দিব্বেন চক্খুনাপি চক্খুমা।

Kathaṃ bhagavā dibbena cakkhunāpi cakkhumā? Bhagavā dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate; yathākammūpage satte pajānāti – ‘‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā, te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā; ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā, te kāyassa bhedā paraṃ maraṇā sugatiṃ saggaṃ lokaṃ upapannā’’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate; yathākammūpage satte pajānāti. Ākaṅkhamāno ca bhagavā ekampi lokadhātuṃ passeyya, dvepi lokadhātuyo passeyya, tissopi lokadhātuyo passeyya, catassopi lokadhātuyo passeyya, pañcapi lokadhātuyo passeyya, dasapi lokadhātuyo passeyya, vīsampi ¹⁸ lokadhātuyo passeyya, tiṃsampi lokadhātuyo passeyya, cattālīsampi lokadhātuyo passeyya, paññāsampi lokadhātuyo passeyya, satampi lokadhātuṃ passeyya, sahassimpi cūḷanikaṃ lokadhātuṃ passeyya, dvisahassimpi majjhimikaṃ lokadhātuṃ passeyya, tisahassimpi lokadhātuṃ passeyya, mahāsahassimpi lokadhātuṃ passeyya, yāvatakaṃ pana ākaṅkheyya tāvatakaṃ passeyya. Evaṃ parisuddhaṃ bhagavato dibbacakkhu. Evaṃ bhagavā dibbena cakkhunāpi cakkhumā.

কথং ভগৰা পঞ্ঞাচক্খুনাপি চক্খুমা? ভগৰা মহাপঞ্ঞো পুথুপঞ্ঞো হাসপঞ্ঞো জৰনপঞ্ঞো তিক্খপঞ্ঞো নিব্বেধিকপঞ্ঞো পঞ্ঞাপভেদকুসলো পভিন্নঞাণো অধিগতপটিসম্ভিদো চতুৰেসারজ্জপ্পত্তো দসবলধারী পুরিসাসভো পুরিসসীহো পুরিসনাগো পুরিসাজঞ্ঞো পুরিসধোরয্হো অনন্তঞাণো অনন্ততেজো অনন্তযসো অড্ঢো মহদ্ধনো ধনৰা নেতা ৰিনেতা অনুনেতা পঞ্ঞপেতা নিজ্ঝাপেতা পেক্খেতা পসাদেতা। সো হি ভগৰা অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা, অনক্খাতস্স মগ্গস্স অক্খাতা, মগ্গঞ্ঞূ মগ্গৰিদূ মগ্গকোৰিদো মগ্গানুগা চ পন এতরহি সাৰকা ৰিহরন্তি পচ্ছা সমন্নাগতা।

Kathaṃ bhagavā paññācakkhunāpi cakkhumā? Bhagavā mahāpañño puthupañño hāsapañño javanapañño tikkhapañño nibbedhikapañño paññāpabhedakusalo pabhinnañāṇo adhigatapaṭisambhido catuvesārajjappatto dasabaladhārī purisāsabho purisasīho purisanāgo purisājañño purisadhorayho anantañāṇo anantatejo anantayaso aḍḍho mahaddhano dhanavā netā vinetā anunetā paññapetā nijjhāpetā pekkhetā pasādetā. So hi bhagavā anuppannassa maggassa uppādetā, asañjātassa maggassa sañjanetā, anakkhātassa maggassa akkhātā, maggaññū maggavidū maggakovido maggānugā ca pana etarahi sāvakā viharanti pacchā samannāgatā.

সো হি ভগৰা জানং জানাতি, পস্সং পস্সতি, চক্খুভূতো ঞাণভূতো ধম্মভূতো ব্রহ্মভূতো ৰত্তা পৰত্তা অত্থস্স নিন্নেতা অমতস্স দাতা ধম্মস্সামী তথাগতো। নত্থি তস্স ভগৰতো অঞ্ঞাতং অদিট্ঠং অৰিদিতং অসচ্ছিকতং অফস্সিতং পঞ্ঞায। অতীতং অনাগতং পচ্চুপ্পন্নং উপাদায সব্বে ধম্মা সব্বাকারেন বুদ্ধস্স ভগৰতো ঞাণমুখে আপাথং আগচ্ছন্তি। যং কিঞ্চি নেয্যং নাম অত্থি জানিতব্বং ¹⁹ অত্তত্থো ৰা, পরত্থো ৰা, উভযত্থো ৰা, দিট্ঠধম্মিকো ৰা অত্থো, সম্পরাযিকো ৰা অত্থো, উত্তানো ৰা অত্থো, গম্ভীরো ৰা অত্থো, গূল়্হো ৰা অত্থো, পটিচ্ছন্নো ৰা অত্থো, নেয্যো ৰা অত্থো, নীতো ৰা অত্থো, অনৰজ্জো ৰা অত্থো, নিক্কিলেসো ৰা অত্থো, ৰোদানো ৰা অত্থো, পরমত্থো ৰা অত্থো, সব্বং তং অন্তোবুদ্ধঞাণে পরিৰত্ততি।

So hi bhagavā jānaṃ jānāti, passaṃ passati, cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato. Natthi tassa bhagavato aññātaṃ adiṭṭhaṃ aviditaṃ asacchikataṃ aphassitaṃ paññāya. Atītaṃ anāgataṃ paccuppannaṃ upādāya sabbe dhammā sabbākārena buddhassa bhagavato ñāṇamukhe āpāthaṃ āgacchanti. Yaṃ kiñci neyyaṃ nāma atthi jānitabbaṃ ²⁰ attattho vā, parattho vā, ubhayattho vā, diṭṭhadhammiko vā attho, samparāyiko vā attho, uttāno vā attho, gambhīro vā attho, gūḷho vā attho, paṭicchanno vā attho, neyyo vā attho, nīto vā attho, anavajjo vā attho, nikkileso vā attho, vodāno vā attho, paramattho vā attho, sabbaṃ taṃ antobuddhañāṇe parivattati.

অতীতে বুদ্ধস্স ভগৰতো অপ্পটিহতং ঞাণং, অনাগতে অপ্পটিহতং ঞাণং, পচ্চুপ্পন্নে অপ্পটিহতং ঞাণং। সব্বং কাযকম্মং বুদ্ধস্স ভগৰতো ঞাণানুপরিৰত্তি। সব্বং ৰচীকম্মং… সব্বং মনোকম্মং বুদ্ধস্স ভগৰতো ঞাণানুপরিৰত্তি। যাৰতকং নেয্যং তাৰতকং ঞাণং, যাৰতকং ঞাণং তাৰতকং নেয্যং; নেয্যপরিযন্তিকং ঞাণং, ঞাণপরিযন্তিকং নেয্যং; নেয্যং অতিক্কমিত্ৰা ঞাণং নপ্পৰত্ততি, ঞাণং অতিক্কমিত্ৰা নেয্যপথো নত্থি; অঞ্ঞমঞ্ঞপরিযন্তট্ঠাযিনো তে ধম্মা। যথা দ্ৰিন্নং সমুগ্গপটলানং সম্মাফুসিতানং হেট্ঠিমং সমুগ্গপটলং উপরিমং নাতিৰত্ততি, উপরিমং সমুগ্গপটলং হেট্ঠিমং নাতিৰত্ততি, অঞ্ঞমঞ্ঞপরিযন্তট্ঠাযিনো; এৰমেৰং বুদ্ধস্স ভগৰতো নেয্যঞ্চ ঞাণঞ্চ অঞ্ঞমঞ্ঞপরিযন্তট্ঠাযিনো । যাৰতকং নেয্যং তাৰতকং ঞাণং, যাৰতকং ঞাণং তাৰতকং নেয্যং, নেয্যপরিযন্তিকং ঞাণং, ঞাণপরিযন্তিকং নেয্যং; নেয্যং অতিক্কমিত্ৰা ঞাণং ন পৰত্ততি, ঞাণং অতিক্কমিত্ৰা নেয্যপথো নত্থি; অঞ্ঞমঞ্ঞপরিযন্তট্ঠাযিনো তে ধম্মা।

Atīte buddhassa bhagavato appaṭihataṃ ñāṇaṃ, anāgate appaṭihataṃ ñāṇaṃ, paccuppanne appaṭihataṃ ñāṇaṃ. Sabbaṃ kāyakammaṃ buddhassa bhagavato ñāṇānuparivatti. Sabbaṃ vacīkammaṃ… sabbaṃ manokammaṃ buddhassa bhagavato ñāṇānuparivatti. Yāvatakaṃ neyyaṃ tāvatakaṃ ñāṇaṃ, yāvatakaṃ ñāṇaṃ tāvatakaṃ neyyaṃ; neyyapariyantikaṃ ñāṇaṃ, ñāṇapariyantikaṃ neyyaṃ; neyyaṃ atikkamitvā ñāṇaṃ nappavattati, ñāṇaṃ atikkamitvā neyyapatho natthi; aññamaññapariyantaṭṭhāyino te dhammā. Yathā dvinnaṃ samuggapaṭalānaṃ sammāphusitānaṃ heṭṭhimaṃ samuggapaṭalaṃ uparimaṃ nātivattati, uparimaṃ samuggapaṭalaṃ heṭṭhimaṃ nātivattati, aññamaññapariyantaṭṭhāyino; evamevaṃ buddhassa bhagavato neyyañca ñāṇañca aññamaññapariyantaṭṭhāyino . Yāvatakaṃ neyyaṃ tāvatakaṃ ñāṇaṃ, yāvatakaṃ ñāṇaṃ tāvatakaṃ neyyaṃ, neyyapariyantikaṃ ñāṇaṃ, ñāṇapariyantikaṃ neyyaṃ; neyyaṃ atikkamitvā ñāṇaṃ na pavattati, ñāṇaṃ atikkamitvā neyyapatho natthi; aññamaññapariyantaṭṭhāyino te dhammā.

সব্বধম্মেসু বুদ্ধস্স ভগৰতো ঞাণং পৰত্ততি। সব্বে ধম্মা বুদ্ধস্স ভগৰতো আৰজ্জনপটিবদ্ধা আকঙ্খপটিবদ্ধা মনসিকারপটিবদ্ধা চিত্তুপ্পাদপটিবদ্ধা। সব্বসত্তেসু বুদ্ধস্স ভগৰতো ঞাণং পৰত্ততি। সব্বেসং সত্তানং ভগৰা আসযং জানাতি, অনুসযং জানাতি, চরিতং জানাতি, অধিমুত্তিং জানাতি, অপ্পরজক্খে মহারজক্খে তিক্খিন্দ্রিযে মুদিন্দ্রিযে স্ৰাকারে দ্ৰাকারে সুৰিঞ্ঞাপযে দুৰিঞ্ঞাপযে ভব্বাভব্বে সত্তে পজানাতি। সদেৰকো লোকো সমারকো সব্রহ্মকো সস্সমণব্রাহ্মণী পজা সদেৰমনুস্সা অন্তোবুদ্ধঞাণে পরিৰত্ততি।

Sabbadhammesu buddhassa bhagavato ñāṇaṃ pavattati. Sabbe dhammā buddhassa bhagavato āvajjanapaṭibaddhā ākaṅkhapaṭibaddhā manasikārapaṭibaddhā cittuppādapaṭibaddhā. Sabbasattesu buddhassa bhagavato ñāṇaṃ pavattati. Sabbesaṃ sattānaṃ bhagavā āsayaṃ jānāti, anusayaṃ jānāti, caritaṃ jānāti, adhimuttiṃ jānāti, apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye bhabbābhabbe satte pajānāti. Sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati.

যথা যে কেচি মচ্ছকচ্ছপা অন্তমসো তিমিতিমিঙ্গলং উপাদায অন্তোমহাসমুদ্দে পরিৰত্তন্তি; এৰমেৰ সদেৰকো লোকো সমারকো সব্রহ্মকো সস্সমণব্রাহ্মণী পজা সদেৰমনুস্সা অন্তোবুদ্ধঞাণে পরিৰত্ততি। যথা যে কেচি পক্খী অন্তমসো গরুল়ং ৰেনতেয্যং উপাদায আকাসস্স পদেসে পরিৰত্তন্তি; এৰমেৰ যেপি তে সারিপুত্তসমা পঞ্ঞায তেপি বুদ্ধঞাণস্স পদেসে পরিৰত্তন্তি; বুদ্ধঞাণং দেৰমনুস্সানং পঞ্ঞং ফরিত্ৰা অভিভৰিত্ৰা তিট্ঠতি। যেপি তে খত্তিযপণ্ডিতা ব্রাহ্মণপণ্ডিতা গহপতিপণ্ডিতা সমণপণ্ডিতা নিপুণা কতপরপ্পৰাদা ৰালৰেধিরূপা ৰোভিন্দন্তা মঞ্ঞে চরন্তি পঞ্ঞাগতেন দিট্ঠিগতানি, তে পঞ্হে অভিসঙ্খরিত্ৰা অভিসঙ্খরিত্ৰা তথাগতং উপসঙ্কমিত্ৰা পুচ্ছন্তি গূল়্হানি চ পটিচ্ছন্নানি চ। কথিতা ৰিসজ্জিতাৰ তে পঞ্হা ভগৰতা হোন্তি নিদ্দিট্ঠকারণা উপক্খিত্তকা চ। তে ভগৰতো সম্পজ্জন্তি। অথ খো ভগৰাৰ তত্থ অতিরোচতি , যদিদং পঞ্ঞাযাতি। এৰং ভগৰা পঞ্ঞাচক্খুনাপি চক্খুমা।

Yathā ye keci macchakacchapā antamaso timitimiṅgalaṃ upādāya antomahāsamudde parivattanti; evameva sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati. Yathā ye keci pakkhī antamaso garuḷaṃ venateyyaṃ upādāya ākāsassa padese parivattanti; evameva yepi te sāriputtasamā paññāya tepi buddhañāṇassa padese parivattanti; buddhañāṇaṃ devamanussānaṃ paññaṃ pharitvā abhibhavitvā tiṭṭhati. Yepi te khattiyapaṇḍitā brāhmaṇapaṇḍitā gahapatipaṇḍitā samaṇapaṇḍitā nipuṇā kataparappavādā vālavedhirūpā vobhindantā maññe caranti paññāgatena diṭṭhigatāni, te pañhe abhisaṅkharitvā abhisaṅkharitvā tathāgataṃ upasaṅkamitvā pucchanti gūḷhāni ca paṭicchannāni ca. Kathitā visajjitāva te pañhā bhagavatā honti niddiṭṭhakāraṇā upakkhittakā ca. Te bhagavato sampajjanti. Atha kho bhagavāva tattha atirocati , yadidaṃ paññāyāti. Evaṃ bhagavā paññācakkhunāpi cakkhumā.

কথং ভগৰা বুদ্ধচক্খুনাপি চক্খুমা? ভগৰা বুদ্ধচক্খুনা লোকং ৰোলোকেন্তো ²¹ অদ্দস সত্তে অপ্পরজক্খে মহারজক্খে তিক্খিন্দ্রিযে মুদিন্দ্রিযে স্ৰাকারে দ্ৰাকারে সুৰিঞ্ঞাপযে দুৰিঞ্ঞাপযে অপ্পেকচ্চে পরলোকৰজ্জভযদস্সাৰিনো ৰিহরন্তে অপ্পেকচ্চে নপরলোকৰজ্জভযদস্সাৰিনো ৰিহরন্তে। সেয্যথাপি নাম উপ্পলিনিযং ৰা পদুমিনিযং ৰা পুণ্ডরীকিনিযং ৰা অপ্পেকচ্চানি উপ্পলানি ৰা পদুমানি ৰা পুণ্ডরীকানি ৰা উদকে জাতানি উদকে সংৰড্ঢানি উদকানুগ্গতানি অন্তোনিমুগ্গপোসীনি, অপ্পেকচ্চানি উপ্পলানি ৰা পদুমানি ৰা পুণ্ডরীকানি ৰা উদকে জাতানি উদকে সংৰড্ঢানি সমোদকং ঠিতানি, অপ্পেকচ্চানি উপ্পলানি ৰা পদুমানি ৰা পুণ্ডরীকানি ৰা উদকে জাতানি উদকে সংৰড্ঢানি উদকং অচ্চুগ্গম্ম তিট্ঠন্তি অনুপলিত্তানি উদকেন; এৰমেৰং ভগৰা বুদ্ধচক্খুনা লোকং ৰোলোকেন্তো অদ্দস সত্তে অপ্পরজক্খে মহারজক্খে তিক্খিন্দ্রিযে মুদিন্দ্রিযে স্ৰাকারে দ্ৰাকারে সুৰিঞ্ঞাপযে দুৰিঞ্ঞাপযে অপ্পেকচ্চে পরলোকৰজ্জভযদস্সাৰিনো ৰিহরন্তে অপ্পেকচ্চে নপরলোকৰজ্জভযদস্সাৰিনো ৰিহরন্তে। জানাতি ভগৰা – ‘‘অযং পুগ্গলো রাগচরিতো, অযং দোসচরিতো, অযং মোহচরিতো, অযং ৰিতক্কচরিতো, অযং সদ্ধাচরিতো, অযং ঞাণচরিতো’’তি। রাগচরিতস্স ভগৰা পুগ্গলস্স অসুভকথং কথেতি; দোসচরিতস্স ভগৰা পুগ্গলস্স মেত্তাভাৰনং আচিক্খতি; মোহচরিতস্স ভগৰা পুগ্গলস্স উদ্দেসে পরিপুচ্ছায কালেন ধম্মস্সৰনে কালেন ধম্মসাকচ্ছায গরুসংৰাসে নিৰেসেতি; ৰিতক্কচরিতস্স ভগৰা পুগ্গলস্স আনাপানস্সতিং আচিক্খতি; সদ্ধাচরিতস্স ভগৰা পুগ্গলস্স পসাদনীযং নিমিত্তং আচিক্খতি বুদ্ধসুবোধিং ধম্মসুধম্মতং সঙ্ঘসুপ্পটিপত্তিং সীলানি চ অত্তনো; ঞাণচরিতস্স ভগৰা পুগ্গলস্স ৰিপস্সনানিমিত্তং আচিক্খতি অনিচ্চাকারং দুক্খাকারং অনত্তাকারং।

Kathaṃ bhagavā buddhacakkhunāpi cakkhumā? Bhagavā buddhacakkhunā lokaṃ volokento ²² addasa satte apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino viharante appekacce naparalokavajjabhayadassāvino viharante. Seyyathāpi nāma uppaliniyaṃ vā paduminiyaṃ vā puṇḍarīkiniyaṃ vā appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakānuggatāni antonimuggaposīni, appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni samodakaṃ ṭhitāni, appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakaṃ accuggamma tiṭṭhanti anupalittāni udakena; evamevaṃ bhagavā buddhacakkhunā lokaṃ volokento addasa satte apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino viharante appekacce naparalokavajjabhayadassāvino viharante. Jānāti bhagavā – ‘‘ayaṃ puggalo rāgacarito, ayaṃ dosacarito, ayaṃ mohacarito, ayaṃ vitakkacarito, ayaṃ saddhācarito, ayaṃ ñāṇacarito’’ti. Rāgacaritassa bhagavā puggalassa asubhakathaṃ katheti; dosacaritassa bhagavā puggalassa mettābhāvanaṃ ācikkhati; mohacaritassa bhagavā puggalassa uddese paripucchāya kālena dhammassavane kālena dhammasākacchāya garusaṃvāse niveseti; vitakkacaritassa bhagavā puggalassa ānāpānassatiṃ ācikkhati; saddhācaritassa bhagavā puggalassa pasādanīyaṃ nimittaṃ ācikkhati buddhasubodhiṃ dhammasudhammataṃ saṅghasuppaṭipattiṃ sīlāni ca attano; ñāṇacaritassa bhagavā puggalassa vipassanānimittaṃ ācikkhati aniccākāraṃ dukkhākāraṃ anattākāraṃ.

‘‘সেলে যথা পব্বতমুদ্ধনিট্ঠিতো, যথাপি পস্সে জনতং সমন্ততো।

‘‘Sele yathā pabbatamuddhaniṭṭhito, yathāpi passe janataṃ samantato;

তথূপমং ধম্মমযং সুমেধ, পাসাদমারুয্হ সমন্তচক্খু।

Tathūpamaṃ dhammamayaṃ sumedha, pāsādamāruyha samantacakkhu;

সোকাৰতিণ্ণং জনতমপেতসোকো, অৰেক্খস্সু জাতিজরাভিভূত’’ন্তি॥

Sokāvatiṇṇaṃ janatamapetasoko, avekkhassu jātijarābhibhūta’’nti.

এৰং ভগৰা বুদ্ধচক্খুনাপি চক্খুমা।

Evaṃ bhagavā buddhacakkhunāpi cakkhumā.

কথং ভগৰা সমন্তচক্খুনাপি চক্খুমা? সমন্তচক্খু ৰুচ্চতি সব্বঞ্ঞুতঞাণং। ভগৰা সব্বঞ্ঞুতঞাণেন উপেতো সমুপেতো উপগতো সমুপগতো উপপন্নো সমুপপন্নো সমন্নাগতো।

Kathaṃ bhagavā samantacakkhunāpi cakkhumā? Samantacakkhu vuccati sabbaññutañāṇaṃ. Bhagavā sabbaññutañāṇena upeto samupeto upagato samupagato upapanno samupapanno samannāgato.

‘‘ন তস্স অদিট্ঠমিধত্থি কিঞ্চি, অথো অৰিঞ্ঞাতমজানিতব্বং।

‘‘Na tassa adiṭṭhamidhatthi kiñci, atho aviññātamajānitabbaṃ;

সব্বং অভিঞ্ঞাসি যদত্থি নেয্যং, তথাগতো তেন সমন্তচক্খূ’’তি॥

Sabbaṃ abhiññāsi yadatthi neyyaṃ, tathāgato tena samantacakkhū’’ti.

এৰং ভগৰা সমন্তচক্খুনাপি চক্খুমাতি – যথা দিস্সতি চক্খুমা।

Evaṃ bhagavā samantacakkhunāpi cakkhumāti – yathā dissati cakkhumā.

সব্বং তমং ৰিনোদেত্ৰাতি সব্বং রাগতমং দোসতমং মোহতমং মানতমং দিট্ঠিতমং কিলেসতমং দুচ্চরিততমং অন্ধকরণং অচক্খুকরণং অঞ্ঞাণকরণং পঞ্ঞানিরোধিকং ৰিঘাতপক্খিকং অনিব্বানসংৰত্তনিকং নুদিত্ৰা পনুদিত্ৰা জহিত্ৰা পজহিত্ৰা ৰিনোদেত্ৰা ব্যন্তিং করিত্ৰা অনভাৰং গমেত্ৰাতি – সব্বং তমং ৰিনোদেত্ৰা।

Sabbaṃtamaṃ vinodetvāti sabbaṃ rāgatamaṃ dosatamaṃ mohatamaṃ mānatamaṃ diṭṭhitamaṃ kilesatamaṃ duccaritatamaṃ andhakaraṇaṃ acakkhukaraṇaṃ aññāṇakaraṇaṃ paññānirodhikaṃ vighātapakkhikaṃ anibbānasaṃvattanikaṃ nuditvā panuditvā jahitvā pajahitvā vinodetvā byantiṃ karitvā anabhāvaṃ gametvāti – sabbaṃ tamaṃ vinodetvā.

একোৰ রতিমজ্ঝগাতি। একোতি ভগৰা পব্বজ্জাসঙ্খাতেন একো, অদুতিযট্ঠেন একো, তণ্হায পহানট্ঠেন একো, একন্তৰীতরাগোতি একো, একন্তৰীতদোসোতি একো, একন্তৰীতমোহোতি একো, একন্তনিক্কিলেসোতি একো, একাযনমগ্গং গতোতি একো, অনুত্তরং সম্মাসম্বোধিং অভিসম্বুদ্ধোতি একো।

Ekova ratimajjhagāti. Ekoti bhagavā pabbajjāsaṅkhātena eko, adutiyaṭṭhena eko, taṇhāya pahānaṭṭhena eko, ekantavītarāgoti eko, ekantavītadosoti eko, ekantavītamohoti eko, ekantanikkilesoti eko, ekāyanamaggaṃ gatoti eko, anuttaraṃ sammāsambodhiṃ abhisambuddhoti eko.

কথং ভগৰা পব্বজ্জাসঙ্খাতেন একো? ভগৰা দহরোৰ সমানো সুসু কাল়কেসো ভদ্রেন ²³ যোব্বনেন সমন্নাগতো পঠমেন ৰযসা অকামকানং মাতাপিতূনং অস্সুমুখানং রুদন্তানং ৰিলপন্তানং ঞাতিসঙ্ঘং পহায সব্বং ঘরাৰাসপলিবোধং ছিন্দিত্ৰা পুত্তদারপলিবোধং ছিন্দিত্ৰা ঞাতিপলিবোধং ছিন্দিত্ৰা মিত্তামচ্চপলিবোধং ছিন্দিত্ৰা সন্নিধিপলিবোধং ছিন্দিত্ৰা কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজিত্ৰা অকিঞ্চনভাৰং উপগন্ত্ৰা একো চরতি ৰিহরতি ইরিযতি ৰত্ততি পালেতি যপেতি যাপেতি – এৰং ভগৰা পব্বজ্জাসঙ্খাতেন একো।

Kathaṃ bhagavā pabbajjāsaṅkhātena eko? Bhagavā daharova samāno susu kāḷakeso bhadrena ²⁴ yobbanena samannāgato paṭhamena vayasā akāmakānaṃ mātāpitūnaṃ assumukhānaṃ rudantānaṃ vilapantānaṃ ñātisaṅghaṃ pahāya sabbaṃ gharāvāsapalibodhaṃ chinditvā puttadārapalibodhaṃ chinditvā ñātipalibodhaṃ chinditvā mittāmaccapalibodhaṃ chinditvā sannidhipalibodhaṃ chinditvā kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajitvā akiñcanabhāvaṃ upagantvā eko carati viharati iriyati vattati pāleti yapeti yāpeti – evaṃ bhagavā pabbajjāsaṅkhātena eko.

কথং ভগৰা অদুতিযট্ঠেন একো? সো এৰং পব্বজিতো সমানো একো অরঞ্ঞৰনপত্থানি পন্তানি সেনাসনানি পটিসেৰতি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানি। সো একো চরতি, একো গচ্ছতি, একো তিট্ঠতি, একো নিসীদতি, একো সেয্যং কপ্পেতি, একো গামং পিণ্ডায পৰিসতি, একো পটিক্কমতি, একো রহো নিসীদতি, একো চঙ্কমং অধিট্ঠাতি, একো চরতি ৰিহরতি ইরিযতি ৰত্ততি পালেতি যপেতি যাপেতি – এৰং ভগৰা অদুতিযট্ঠেন একো।

Kathaṃ bhagavā adutiyaṭṭhena eko? So evaṃ pabbajito samāno eko araññavanapatthāni pantāni senāsanāni paṭisevati appasaddāni appanigghosāni vijanavātāni manussarāhasseyyakāni paṭisallānasāruppāni. So eko carati, eko gacchati, eko tiṭṭhati, eko nisīdati, eko seyyaṃ kappeti, eko gāmaṃ piṇḍāya pavisati, eko paṭikkamati, eko raho nisīdati, eko caṅkamaṃ adhiṭṭhāti, eko carati viharati iriyati vattati pāleti yapeti yāpeti – evaṃ bhagavā adutiyaṭṭhena eko.

কথং ভগৰা তণ্হায পহানট্ঠেন একো? সো এৰং একো অদুতিযো অপ্পমত্তো আতাপী পহিতত্তো ৰিহরন্তো নজ্জা নেরঞ্জরায তীরে বোধিরুক্খমূলে মহাপধানং পদহন্তো মারং সসেনং কণ্হং নমুচিং পমত্তবন্ধুং ৰিধমিত্ৰা তণ্হাজালিনিং ৰিসরিতং ৰিসত্তিকং পজহসি ৰিনোদেসি ব্যন্তিং অকাসি অনভাৰং গমেসি।

Kathaṃ bhagavā taṇhāya pahānaṭṭhena eko? So evaṃ eko adutiyo appamatto ātāpī pahitatto viharanto najjā nerañjarāya tīre bodhirukkhamūle mahāpadhānaṃ padahanto māraṃ sasenaṃ kaṇhaṃ namuciṃ pamattabandhuṃ vidhamitvā taṇhājāliniṃ visaritaṃ visattikaṃ pajahasi vinodesi byantiṃ akāsi anabhāvaṃ gamesi.

‘‘তণ্হাদুতিযো পুরিসো, দীঘমদ্ধানসংসরং।

‘‘Taṇhādutiyo puriso, dīghamaddhānasaṃsaraṃ;

ইত্থভাৰঞ্ঞথাভাৰং ²⁵, সংসারং নাতিৰত্ততি॥

Itthabhāvaññathābhāvaṃ ²⁶, saṃsāraṃ nātivattati.

‘‘এতমাদীনৰং ঞত্ৰা, তণ্হং দুক্খস্স সম্ভৰং।

‘‘Etamādīnavaṃ ñatvā, taṇhaṃ dukkhassa sambhavaṃ;

ৰীততণ্হো অনাদানো, সতো ভিক্খু পরিব্বজে’’তি॥

Vītataṇho anādāno, sato bhikkhu paribbaje’’ti.

এৰং ভগৰা তণ্হায পহানট্ঠেন একো।

Evaṃ bhagavā taṇhāya pahānaṭṭhena eko.

কথং ভগৰা একন্তৰীতরাগোতি একো? রাগস্স পহীনত্তা একন্তৰীতরাগোতি একো, দোসস্স পহীনত্তা একন্তৰীতদোসোতি একো, মোহস্স পহীনত্তা একন্তৰীতমোহোতি একো, কিলেসানং পহীনত্তা একন্তনিক্কিলেসোতি একো।

Kathaṃ bhagavā ekantavītarāgoti eko? Rāgassa pahīnattā ekantavītarāgoti eko, dosassa pahīnattā ekantavītadosoti eko, mohassa pahīnattā ekantavītamohoti eko, kilesānaṃ pahīnattā ekantanikkilesoti eko.

কথং ভগৰা একাযনমগ্গং গতোতি একো? একাযনমগ্গো ৰুচ্চতি চত্তারো সতিপট্ঠানা চত্তারো সম্মপ্পধানা চত্তারো ইদ্ধিপাদা পঞ্চিন্দ্রিযানি পঞ্চ বলানি সত্ত বোজ্ঝঙ্গা অরিযো অট্ঠঙ্গিকো মগ্গো।

Kathaṃ bhagavā ekāyanamaggaṃ gatoti eko? Ekāyanamaggo vuccati cattāro satipaṭṭhānā cattāro sammappadhānā cattāro iddhipādā pañcindriyāni pañca balāni satta bojjhaṅgā ariyo aṭṭhaṅgiko maggo.

‘‘একাযনং জাতিখযন্তদস্সী, মগ্গং পজানাতি হিতানুকম্পী।

‘‘Ekāyanaṃ jātikhayantadassī, maggaṃ pajānāti hitānukampī;

এতেন মগ্গেন তরিংসু ²⁷ পুব্বে, তরিস্সন্তি যে চ তরন্তি ওঘ’’ন্তি॥

Etena maggena tariṃsu ²⁸ pubbe, tarissanti ye ca taranti ogha’’nti.

এৰং ভগৰা একাযনমগ্গং গতোতি একো।

Evaṃ bhagavā ekāyanamaggaṃ gatoti eko.

কথং ভগৰা একো অনুত্তরং সম্মাসম্বোধিং অভিসম্বুদ্ধোতি একো? বোধি ৰুচ্চতি চতূসু মগ্গেসু ঞাণং পঞ্ঞিন্দ্রিযং পঞ্ঞাবলং ধম্মৰিচযসম্বোজ্ঝঙ্গো ৰীমংসা ৰিপস্সনা সম্মাদিট্ঠি। ভগৰা তেন বোধিঞাণেন ‘‘সব্বে সঙ্খারা অনিচ্চা’’তি বুজ্ঝি, ‘‘সব্বে সঙ্খারা দুক্খা’’তি বুজ্ঝি, ‘‘সব্বে ধম্মা অনত্তা’’তি বুজ্ঝি, ‘‘অৰিজ্জাপচ্চযা সঙ্খারা’’তি বুজ্ঝি…পে॰… ‘‘জাতিপচ্চযা জরামরণ’’ন্তি বুজ্ঝি; ‘‘অৰিজ্জানিরোধা সঙ্খারনিরোধো’’তি বুজ্ঝি…পে॰… ‘‘জাতিনিরোধা জরামরণনিরোধো’’তি বুজ্ঝি; ‘‘ইদং দুক্খ’’ন্তি বুজ্ঝি, ‘‘অযং দুক্খসমুদযো’’তি বুজ্ঝি, ‘‘অযং দুক্খনিরোধো’’তি বুজ্ঝি, ‘‘অযং দুক্খনিরোধগামিনী পটিপদা’’তি বুজ্ঝি; ‘‘ইমে আসৰা’’তি বুজ্ঝি…পে॰… ‘‘অযং আসৰনিরোধগামিনী পটিপদা’’তি বুজ্ঝি; ‘‘ইমে ধম্মা পরিঞ্ঞেয্যা’’তি বুজ্ঝি… পহাতব্বাতি… ভাৰেতব্বাতি… সচ্ছিকাতব্বাতি বুজ্ঝি, ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ বুজ্ঝি, পঞ্চন্নং উপাদানক্খন্ধানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ বুজ্ঝি, চতুন্নং মহাভূতানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ বুজ্ঝি, ‘‘যং কিঞ্চি সমুদযধম্মং, সব্বং তং নিরোধধম্ম’’ন্ত্ন্ত্তি বুজ্ঝি।

Kathaṃ bhagavā eko anuttaraṃ sammāsambodhiṃ abhisambuddhoti eko? Bodhi vuccati catūsu maggesu ñāṇaṃ paññindriyaṃ paññābalaṃ dhammavicayasambojjhaṅgo vīmaṃsā vipassanā sammādiṭṭhi. Bhagavā tena bodhiñāṇena ‘‘sabbe saṅkhārā aniccā’’ti bujjhi, ‘‘sabbe saṅkhārā dukkhā’’ti bujjhi, ‘‘sabbe dhammā anattā’’ti bujjhi, ‘‘avijjāpaccayā saṅkhārā’’ti bujjhi…pe… ‘‘jātipaccayā jarāmaraṇa’’nti bujjhi; ‘‘avijjānirodhā saṅkhāranirodho’’ti bujjhi…pe… ‘‘jātinirodhā jarāmaraṇanirodho’’ti bujjhi; ‘‘idaṃ dukkha’’nti bujjhi, ‘‘ayaṃ dukkhasamudayo’’ti bujjhi, ‘‘ayaṃ dukkhanirodho’’ti bujjhi, ‘‘ayaṃ dukkhanirodhagāminī paṭipadā’’ti bujjhi; ‘‘ime āsavā’’ti bujjhi…pe… ‘‘ayaṃ āsavanirodhagāminī paṭipadā’’ti bujjhi; ‘‘ime dhammā pariññeyyā’’ti bujjhi… pahātabbāti… bhāvetabbāti… sacchikātabbāti bujjhi, channaṃ phassāyatanānaṃ samudayañca atthaṅgamañca assādañca ādīnavañca nissaraṇañca bujjhi, pañcannaṃ upādānakkhandhānaṃ samudayañca atthaṅgamañca assādañca ādīnavañca nissaraṇañca bujjhi, catunnaṃ mahābhūtānaṃ samudayañca atthaṅgamañca assādañca ādīnavañca nissaraṇañca bujjhi, ‘‘yaṃ kiñci samudayadhammaṃ, sabbaṃ taṃ nirodhadhamma’’ntntti bujjhi.

অথ ৰা যং কিঞ্চি বুজ্ঝিতব্বং অনুবুজ্ঝিতব্বং পটিবুজ্ঝিতব্বং সম্বুজ্ঝিতব্বং অধিগন্তব্বং ফস্সিতব্বং সচ্ছিকাতব্বং, সব্বং তং তেন বোধিঞাণেন বুজ্ঝি অনুবুজ্ঝি পটিবুজ্ঝি সম্বুজ্ঝি সম্মাবুজ্ঝি অধিগচ্ছি ফস্সেসি সচ্ছাকাসি। এৰং ভগৰা একো অনুত্তরং সম্মাসম্বোধিং অভিসম্বুদ্ধোতি একো।

Atha vā yaṃ kiñci bujjhitabbaṃ anubujjhitabbaṃ paṭibujjhitabbaṃ sambujjhitabbaṃ adhigantabbaṃ phassitabbaṃ sacchikātabbaṃ, sabbaṃ taṃ tena bodhiñāṇena bujjhi anubujjhi paṭibujjhi sambujjhi sammābujjhi adhigacchi phassesi sacchākāsi. Evaṃ bhagavā eko anuttaraṃ sammāsambodhiṃ abhisambuddhoti eko.

রতিমজ্ঝগাতি। রতিন্তি নেক্খম্মরতিং ৰিৰেকরতিং উপসমরতিং সম্বোধিরতিং অজ্ঝগা সমজ্ঝগা অধিগচ্ছি ফস্সেসি সচ্ছাকাসীতি – একোৰ রতিমজ্ঝগা।

Ratimajjhagāti. Ratinti nekkhammaratiṃ vivekaratiṃ upasamaratiṃ sambodhiratiṃ ajjhagā samajjhagā adhigacchi phassesi sacchākāsīti – ekova ratimajjhagā.

তেনাহ থেরো সারিপুত্তো –

Tenāha thero sāriputto –

‘‘সদেৰকস্স লোকস্স, যথা দিস্সতি চক্খুমা।

‘‘Sadevakassa lokassa, yathā dissati cakkhumā;

সব্বং তমং ৰিনোদেত্ৰা, একোৰ রতিমজ্ঝগা’’তি॥

Sabbaṃ tamaṃ vinodetvā, ekova ratimajjhagā’’ti.

১৯২.

192.

তং বুদ্ধং অসিতং তাদিং, অকুহং গণিমাগতং।

Taṃ buddhaṃ asitaṃ tādiṃ, akuhaṃ gaṇimāgataṃ;

বহূনমিধ বদ্ধানং, অত্থি পঞ্হেন আগমং॥

Bahūnamidha baddhānaṃ, atthi pañhena āgamaṃ.

তং বুদ্ধং অসিতং তাদিন্তি। বুদ্ধোতি যো সো ভগৰা সযম্ভূ অনাচরিযকো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝি, তত্থ চ সব্বঞ্ঞুতং পাপুণি ²⁹, বলেসু চ ৰসীভাৰং পাপুণি। বুদ্ধোতি কেনট্ঠেন বুদ্ধো? বুজ্ঝিতা সচ্চানীতি বুদ্ধো, বোধেতা পজাযাতি বুদ্ধো, সব্বঞ্ঞুতায বুদ্ধো, সব্বদস্সাৰিতায বুদ্ধো, অনঞ্ঞনেয্যতায বুদ্ধো, ৰিসৰিতায বুদ্ধো, খীণাসৰসঙ্খাতেন বুদ্ধো, নিরুপক্কিলেসসঙ্খাতেন বুদ্ধো, একন্তৰীতরাগোতি বুদ্ধো, একন্তৰীতদোসোতি বুদ্ধো, একন্তৰীতমোহোতি বুদ্ধো, একন্তনিক্কিলেসোতি বুদ্ধো, একাযনমগ্গং গতোতি বুদ্ধো, একো অনুত্তরং সম্মাসম্বোধিং অভিসম্বুদ্ধোতি বুদ্ধো, অবুদ্ধিৰিহতত্তা বুদ্ধিপটিলাভত্তা বুদ্ধো। বুদ্ধোতি নেতং মাতরা কতং ন পিতরা কতং, ন ভাতরা কতং, ন ভগিনিযা কতং, ন মিত্তামচ্চেহি কতং, ন ঞাতিসালোহিতেহি কতং, ন সমণব্রাহ্মণেহি কতং, ন দেৰতাহি কতং। ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞাণস্স পটিলাভা সচ্ছিকা পঞ্ঞত্তি, যদিদং বুদ্ধোতি – তং বুদ্ধং। অসিতন্তি দ্ৰে নিস্সযা – তণ্হানিস্সযো চ দিট্ঠিনিস্সযো চ। কতমো তণ্হানিস্সযো? যাৰ তণ্হাসঙ্খাতেন সীমকতং ওধিকতং ³⁰ পরিযন্তকতং পরিগ্গহিতং মমাযিতং – ইদং মম, এতং মম, এত্তকং মম, এত্তাৰতা মম, মম রূপা সদ্দা গন্ধা রসা ফোট্ঠব্বা, অত্থরণা পাৰুরণা দাসিদাসা অজেল়কা কুক্কুটসূকরা হত্থিগৰাস্সৰল়ৰা, খেত্তং ৰত্থুং হিরঞ্ঞং সুৰণ্ণং, গামনিগমরাজধানিযো রট্ঠঞ্চ জনপদো চ কোসো চ কোট্ঠাগারঞ্চ, কেৰলম্পি মহাপথৰিং তণ্হাৰসেন মমাযতি, যাৰতা অট্ঠসতং তণ্হাৰিচরিতং – অযং তণ্হানিস্সযো।

Taṃ buddhaṃ asitaṃ tādinti. Buddhoti yo so bhagavā sayambhū anācariyako pubbe ananussutesu dhammesu sāmaṃ saccāni abhisambujjhi, tattha ca sabbaññutaṃ pāpuṇi ³¹, balesu ca vasībhāvaṃ pāpuṇi. Buddhoti kenaṭṭhena buddho? Bujjhitā saccānīti buddho, bodhetā pajāyāti buddho, sabbaññutāya buddho, sabbadassāvitāya buddho, anaññaneyyatāya buddho, visavitāya buddho, khīṇāsavasaṅkhātena buddho, nirupakkilesasaṅkhātena buddho, ekantavītarāgoti buddho, ekantavītadosoti buddho, ekantavītamohoti buddho, ekantanikkilesoti buddho, ekāyanamaggaṃ gatoti buddho, eko anuttaraṃ sammāsambodhiṃ abhisambuddhoti buddho, abuddhivihatattā buddhipaṭilābhattā buddho. Buddhoti netaṃ mātarā kataṃ na pitarā kataṃ, na bhātarā kataṃ, na bhaginiyā kataṃ, na mittāmaccehi kataṃ, na ñātisālohitehi kataṃ, na samaṇabrāhmaṇehi kataṃ, na devatāhi kataṃ. Vimokkhantikametaṃ buddhānaṃ bhagavantānaṃ bodhiyā mūle saha sabbaññutañāṇassa paṭilābhā sacchikā paññatti, yadidaṃ buddhoti – taṃ buddhaṃ. Asitanti dve nissayā – taṇhānissayo ca diṭṭhinissayo ca. Katamo taṇhānissayo? Yāva taṇhāsaṅkhātena sīmakataṃ odhikataṃ ³² pariyantakataṃ pariggahitaṃ mamāyitaṃ – idaṃ mama, etaṃ mama, ettakaṃ mama, ettāvatā mama, mama rūpā saddā gandhā rasā phoṭṭhabbā, attharaṇā pāvuraṇā dāsidāsā ajeḷakā kukkuṭasūkarā hatthigavāssavaḷavā, khettaṃ vatthuṃ hiraññaṃ suvaṇṇaṃ, gāmanigamarājadhāniyo raṭṭhañca janapado ca koso ca koṭṭhāgārañca, kevalampi mahāpathaviṃ taṇhāvasena mamāyati, yāvatā aṭṭhasataṃ taṇhāvicaritaṃ – ayaṃ taṇhānissayo.

কতমো দিট্ঠিনিস্সযো? ৰীসতিৰত্থুকা সক্কাযদিট্ঠি, দসৰত্থুকা মিচ্ছাদিট্ঠি, দসৰত্থুকা অন্তগ্গাহিকা দিট্ঠি। যা এৰরূপা দিট্ঠি দিট্ঠিগতং দিট্ঠিগহনং দিট্ঠিকন্তারো দিট্ঠিৰিসূকাযিকং দিট্ঠিৰিপ্ফন্দিতং দিট্ঠিসঞ্ঞোজনং গাহো পটিগ্গাহো অভিনিৰেসো পরামাসো কুম্মগ্গো মিচ্ছাপথো মিচ্ছত্তং তিত্থাযতনং ৰিপরিযাসগ্গাহো ৰিপরীতগ্গাহো ৰিপল্লাসগ্গাহো মিচ্ছাগাহো ‘‘অযাথাৰকস্মিং যাথাৰক’’ন্তি গাহো যাৰতা দ্ৰাসট্ঠি দিট্ঠিগতানি – অযং দিট্ঠিনিস্সযো।

Katamo diṭṭhinissayo? Vīsativatthukā sakkāyadiṭṭhi, dasavatthukā micchādiṭṭhi, dasavatthukā antaggāhikā diṭṭhi. Yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ diṭṭhivipphanditaṃ diṭṭhisaññojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyāsaggāho viparītaggāho vipallāsaggāho micchāgāho ‘‘ayāthāvakasmiṃ yāthāvaka’’nti gāho yāvatā dvāsaṭṭhi diṭṭhigatāni – ayaṃ diṭṭhinissayo.

বুদ্ধস্স ভগৰতো তণ্হানিস্সযো পহীনো, দিট্ঠিনিস্সযো পটিনিস্সট্ঠো; তণ্হানিস্সযস্স পহীনত্তা দিট্ঠিনিস্সযস্স পটিনিস্সট্ঠত্তা ভগৰা চক্খুং অসিতো, সোতং… ঘানং… জিৰ্হং… কাযং… মনং অসিতো, রূপে… সদ্দে… গন্ধে… রসে… ফোট্ঠব্বে… কুলং… গণং… আৰাসং… লাভং… যসং… পসংসং… সুখং… চীৰরং… পিণ্ডপাতং… সেনাসনং… গিলানপচ্চযভেসজ্জপরিক্খারং… কামধাতুং… রূপধাতুং… অরূপধাতুং … কামভৰং… রূপভৰং… অরূপভৰং… সঞ্ঞাভৰং… অসঞ্ঞাভৰং… নেৰসঞ্ঞানাসঞ্ঞাভৰং… একৰোকারভৰং… চতুৰোকারভৰং… পঞ্চৰোকারভৰং… অতীতং… অনাগতং… পচ্চুপ্পন্নং… দিট্ঠসুতমুতৰিঞ্ঞাতব্বে ধম্মে অসিতো অনিস্সিতো অনল্লীনো অনুপগতো অনজ্ঝোসিতো অনধিমুত্তো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতীতি – তং বুদ্ধং অসিতং।

Buddhassa bhagavato taṇhānissayo pahīno, diṭṭhinissayo paṭinissaṭṭho; taṇhānissayassa pahīnattā diṭṭhinissayassa paṭinissaṭṭhattā bhagavā cakkhuṃ asito, sotaṃ… ghānaṃ… jivhaṃ… kāyaṃ… manaṃ asito, rūpe… sadde… gandhe… rase… phoṭṭhabbe… kulaṃ… gaṇaṃ… āvāsaṃ… lābhaṃ… yasaṃ… pasaṃsaṃ… sukhaṃ… cīvaraṃ… piṇḍapātaṃ… senāsanaṃ… gilānapaccayabhesajjaparikkhāraṃ… kāmadhātuṃ… rūpadhātuṃ… arūpadhātuṃ … kāmabhavaṃ… rūpabhavaṃ… arūpabhavaṃ… saññābhavaṃ… asaññābhavaṃ… nevasaññānāsaññābhavaṃ… ekavokārabhavaṃ… catuvokārabhavaṃ… pañcavokārabhavaṃ… atītaṃ… anāgataṃ… paccuppannaṃ… diṭṭhasutamutaviññātabbe dhamme asito anissito anallīno anupagato anajjhosito anadhimutto nikkhanto nissaṭo vippamutto visaññutto vimariyādikatena cetasā viharatīti – taṃ buddhaṃ asitaṃ.

তাদিন্তি ভগৰা পঞ্চহাকারেহি তাদী – ইট্ঠানিট্ঠে তাদী, চত্তাৰীতি তাদী, তিণ্ণাৰীতি তাদী, মুত্তাৰীতি তাদী, তংনিদ্দেসা তাদী।

Tādinti bhagavā pañcahākārehi tādī – iṭṭhāniṭṭhe tādī, cattāvīti tādī, tiṇṇāvīti tādī, muttāvīti tādī, taṃniddesā tādī.

কথং ভগৰা ইট্ঠানিট্ঠে তাদী? ভগৰা লাভেপি তাদী, অলাভেপি তাদী, যসেপি তাদী, অযসেপি তাদী, পসংসাযপি তাদী নিন্দাযপি তাদী, সুখেপি তাদী, দুক্খেপি তাদী; একচ্চে বাহং গন্ধেন লিম্পেয্যুং, একচ্চে বাহং ৰাসিযা তচ্ছেয্যুং, অমুকস্মিং নত্থি রাগো , অমুকস্মিং নত্থি পটিঘং, অনুনযপটিঘৰিপ্পহীনো উগ্ঘাতিনিগ্ঘাতিৰীতিৰত্তো অনুরোধৰিরোধং সমতিক্কন্তো। এৰং ভগৰা ইট্ঠানিট্ঠে তাদী।

Kathaṃ bhagavā iṭṭhāniṭṭhe tādī? Bhagavā lābhepi tādī, alābhepi tādī, yasepi tādī, ayasepi tādī, pasaṃsāyapi tādī nindāyapi tādī, sukhepi tādī, dukkhepi tādī; ekacce bāhaṃ gandhena limpeyyuṃ, ekacce bāhaṃ vāsiyā taccheyyuṃ, amukasmiṃ natthi rāgo , amukasmiṃ natthi paṭighaṃ, anunayapaṭighavippahīno ugghātinigghātivītivatto anurodhavirodhaṃ samatikkanto. Evaṃ bhagavā iṭṭhāniṭṭhe tādī.

কথং ভগৰা চত্তাৰীতি তাদী? ভগৰতা ³³ রাগো চত্তো ৰন্তো মুত্তো পহীনো পটিনিস্সট্ঠো, দোসো…পে॰… মোহো… কোধো… উপনাহো… মক্খো… পল়াসো… ইস্সা… মচ্ছরিযং… মাযা… সাঠেয্যং… থম্ভো… সারম্ভো… মানো… অতিমানো… মদো… পমাদো… সব্বে কিলেসা… সব্বে দুচ্চরিতা… সব্বে দরথা… সব্বে পরিল়াহা… সব্বে সন্তাপা … সব্বাকুসলাভিসঙ্খারা চত্তা ৰন্তা মুত্তা পহীনা পটিনিস্সট্ঠা। এৰং ভগৰা চত্তাৰীতি তাদী।

Kathaṃ bhagavā cattāvīti tādī? Bhagavatā ³⁴ rāgo catto vanto mutto pahīno paṭinissaṭṭho, doso…pe… moho… kodho… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe darathā… sabbe pariḷāhā… sabbe santāpā … sabbākusalābhisaṅkhārā cattā vantā muttā pahīnā paṭinissaṭṭhā. Evaṃ bhagavā cattāvīti tādī.

কথং ভগৰা তিণ্ণাৰীতি তাদী? ভগৰা কামোঘং তিণ্ণো, ভৰোঘং তিণ্ণো, দিট্ঠোঘং তিণ্ণো, অৰিজ্জোঘং তিণ্ণো, সব্বং সংসারপথং তিণ্ণো উত্তিণ্ণো নিত্তিণ্ণো অতিক্কন্তো সমতিক্কন্তো ৰীতিৰত্তো। সো ৰুট্ঠৰাসো চিণ্ণচরণো গতদ্ধো গতদিসো গতকোটিযো পালিতব্রহ্মচরিযো উত্তমদিট্ঠিপ্পত্তো ভাৰিতমগ্গো পহীনকিলেসো পটিৰিদ্ধাকুপ্পো সচ্ছিকতনিরোধো। দুক্খং তস্স পরিঞ্ঞাতং, সমুদযো পহীনো, মগ্গো ভাৰিতো, নিরোধো সচ্ছিকতো, অভিঞ্ঞেয্যং অভিঞ্ঞাতং , পরিঞ্ঞেয্যং পরিঞ্ঞাতং, পহাতব্বং পহীনং, ভাৰেতব্বং ভাৰিতং, সচ্ছিকাতব্বং সচ্ছিকতং। সো উক্খিত্তপল়িঘো ³⁵ সংকিণ্ণপরিক্খো অব্বূল়্হেসিকো নিরগ্গল়ো অরিযো পন্নদ্ধজো পন্নভারো ৰিসঞ্ঞুত্তো পঞ্চঙ্গৰিপ্পহীনো ছল়ঙ্গসমন্নাগতো একারক্খো চতুরাপস্সেনো পনুণ্ণপচ্চেকসচ্চো সমৰযসট্ঠেসনো অনাৰিলসঙ্কপ্পো পস্সদ্ধকাযসঙ্খারো সুৰিমুত্তচিত্তো সুৰিমুত্তপঞ্ঞো কেৰলী ৰুসিতৰা উত্তমপুরিসো পরমপুরিসো পরমপত্তিপ্পত্তো। সো নেৰাচিনতি, নাপচিনতি; অপচিনিত্ৰা ঠিতো নেৰ পজহতি, ন উপাদিযতি; পজহিত্ৰা ঠিতো নেৰ সংসিব্বতি, ন উসিনেতি; ৰিসিনেত্ৰা ঠিতো নেৰ ৰিধূপেতি, ন সন্ধূপেতি; ৰিধূপেত্ৰা ঠিতো, অসেখেন সীলক্খন্ধেন সমন্নাগতত্তা ঠিতো, অসেখেন সমাধিক্খন্ধেন সমন্নাগতত্তা ঠিতো, অসেখেন পঞ্ঞাক্খন্ধেন সমন্নাগতত্তা ঠিতো, অসেখেন ৰিমুত্তিক্খন্ধেন সমন্নাগতত্তা ঠিতো, অসেখেন ৰিমুত্তিঞাণদস্সনক্খন্ধেন সমন্নাগতত্তা ঠিতো, সচ্চং সম্পটিপাদিযিত্ৰা ঠিতো, এজং সমতিক্কমিত্ৰা ঠিতো, কিলেসগ্গিং পরিযাদিযিত্ৰা ঠিতো, অপরিগমনতায ঠিতো, কটং সমাদায ঠিতো, মুত্তপটিসেৰনতায ঠিতো, মেত্তায পারিসুদ্ধিযা ঠিতো, করুণায পারিসুদ্ধিযা ঠিতো, মুদিতায পারিসুদ্ধিযা ঠিতো, উপেক্খায পারিসুদ্ধিযা ঠিতো, অচ্চন্তপারিসুদ্ধিযা ঠিতো, অতম্মযতায পারিসুদ্ধিযা ঠিতো, ৰিমুত্তত্তা ঠিতো, সন্তুসিতত্তা ঠিতো, খন্ধপরিযন্তে ঠিতো, ধাতুপরিযন্তে ঠিতো, আযতনপরিযন্তে ঠিতো, গতিপরিযন্তে ঠিতো, উপপত্তিপরিযন্তে ঠিতো, পটিসন্ধিপরিযন্তে ঠিতো, ভৰপরিযন্তে ঠিতো, সংসারপরিযন্তে ঠিতো, ৰট্টপরিযন্তে ঠিতো, অন্তিমে ভৰে ঠিতো, অন্তিমে সমুস্সযে ঠিতো, অন্তিমদেহধরো ভগৰা।

Kathaṃ bhagavā tiṇṇāvīti tādī? Bhagavā kāmoghaṃ tiṇṇo, bhavoghaṃ tiṇṇo, diṭṭhoghaṃ tiṇṇo, avijjoghaṃ tiṇṇo, sabbaṃ saṃsārapathaṃ tiṇṇo uttiṇṇo nittiṇṇo atikkanto samatikkanto vītivatto. So vuṭṭhavāso ciṇṇacaraṇo gataddho gatadiso gatakoṭiyo pālitabrahmacariyo uttamadiṭṭhippatto bhāvitamaggo pahīnakileso paṭividdhākuppo sacchikatanirodho. Dukkhaṃ tassa pariññātaṃ, samudayo pahīno, maggo bhāvito, nirodho sacchikato, abhiññeyyaṃ abhiññātaṃ , pariññeyyaṃ pariññātaṃ, pahātabbaṃ pahīnaṃ, bhāvetabbaṃ bhāvitaṃ, sacchikātabbaṃ sacchikataṃ. So ukkhittapaḷigho ³⁶ saṃkiṇṇaparikkho abbūḷhesiko niraggaḷo ariyo pannaddhajo pannabhāro visaññutto pañcaṅgavippahīno chaḷaṅgasamannāgato ekārakkho caturāpasseno panuṇṇapaccekasacco samavayasaṭṭhesano anāvilasaṅkappo passaddhakāyasaṅkhāro suvimuttacitto suvimuttapañño kevalī vusitavā uttamapuriso paramapuriso paramapattippatto. So nevācinati, nāpacinati; apacinitvā ṭhito neva pajahati, na upādiyati; pajahitvā ṭhito neva saṃsibbati, na usineti; visinetvā ṭhito neva vidhūpeti, na sandhūpeti; vidhūpetvā ṭhito, asekhena sīlakkhandhena samannāgatattā ṭhito, asekhena samādhikkhandhena samannāgatattā ṭhito, asekhena paññākkhandhena samannāgatattā ṭhito, asekhena vimuttikkhandhena samannāgatattā ṭhito, asekhena vimuttiñāṇadassanakkhandhena samannāgatattā ṭhito, saccaṃ sampaṭipādiyitvā ṭhito, ejaṃ samatikkamitvā ṭhito, kilesaggiṃ pariyādiyitvā ṭhito, aparigamanatāya ṭhito, kaṭaṃ samādāya ṭhito, muttapaṭisevanatāya ṭhito, mettāya pārisuddhiyā ṭhito, karuṇāya pārisuddhiyā ṭhito, muditāya pārisuddhiyā ṭhito, upekkhāya pārisuddhiyā ṭhito, accantapārisuddhiyā ṭhito, atammayatāya pārisuddhiyā ṭhito, vimuttattā ṭhito, santusitattā ṭhito, khandhapariyante ṭhito, dhātupariyante ṭhito, āyatanapariyante ṭhito, gatipariyante ṭhito, upapattipariyante ṭhito, paṭisandhipariyante ṭhito, bhavapariyante ṭhito, saṃsārapariyante ṭhito, vaṭṭapariyante ṭhito, antime bhave ṭhito, antime samussaye ṭhito, antimadehadharo bhagavā.

‘‘তস্সাযং পচ্ছিমকো ভৰো, চরিমোযং সমুস্সযো।

‘‘Tassāyaṃ pacchimako bhavo, carimoyaṃ samussayo;

জাতিমরণসংসারো, নত্থি তস্স পুনব্ভৰো’’তি॥

Jātimaraṇasaṃsāro, natthi tassa punabbhavo’’ti.

এৰং ভগৰা তিণ্ণাৰীতি তাদী।

Evaṃ bhagavā tiṇṇāvīti tādī.

কথং ভগৰা মুত্তাৰীতি তাদী? ভগৰতো রাগা চিত্তং মুত্তং ৰিমুত্তং সুৰিমুত্তং, দোসা চিত্তং… মোহা চিত্তং… কোধা… উপনাহা… মক্খা… পল়াসা… ইস্সায… মচ্ছরিযা… মাযায… সাঠেয্যা… থম্ভা… সারম্ভা… মানা… অতিমানা… মদা… পমাদা… সব্বকিলেসেহি… সব্বদুচ্চরিতেহি… সব্বদরথেহি… সব্বপরিল়াহেহি… সব্বসন্তাপেহি… সব্বাকুসলাভিসঙ্খারেহি চিত্তং মুত্তং ৰিমুত্তং সুৰিমুত্তং। এৰং ভগৰা মুত্তাৰীতি তাদী।

Kathaṃ bhagavā muttāvīti tādī? Bhagavato rāgā cittaṃ muttaṃ vimuttaṃ suvimuttaṃ, dosā cittaṃ… mohā cittaṃ… kodhā… upanāhā… makkhā… paḷāsā… issāya… macchariyā… māyāya… sāṭheyyā… thambhā… sārambhā… mānā… atimānā… madā… pamādā… sabbakilesehi… sabbaduccaritehi… sabbadarathehi… sabbapariḷāhehi… sabbasantāpehi… sabbākusalābhisaṅkhārehi cittaṃ muttaṃ vimuttaṃ suvimuttaṃ. Evaṃ bhagavā muttāvīti tādī.

কথং ভগৰা তংনিদ্দেসা তাদী? ভগৰা সীলে সতি সীলৰাতি তংনিদ্দেসা তাদী, সদ্ধায সতি সদ্ধোতি তংনিদ্দেসা তাদী, ৰীরিযে সতি ৰীরিযৰাতি তংনিদ্দেসা তাদী, সতিযা সতি সতিমাতি তংনিদ্দেসা তাদী, সমাধিস্মিং সতি সমাহিতোতি তংনিদ্দেসা তাদী, পঞ্ঞায সতি পঞ্ঞৰাতি তংনিদ্দেসা তাদী, ৰিজ্জায সতি তেৰিজ্জোতি তংনিদ্দেসা তাদী, অভিঞ্ঞায সতি ছল়ভিঞ্ঞোতি তংনিদ্দেসা তাদী, দসবলে সতি দসবলোতি তংনিদ্দেসা তাদী। এৰং ভগৰা তংনিদ্দেসা তাদীতি – তং বুদ্ধং অসিতং তাদিং।

Kathaṃ bhagavā taṃniddesā tādī? Bhagavā sīle sati sīlavāti taṃniddesā tādī, saddhāya sati saddhoti taṃniddesā tādī, vīriye sati vīriyavāti taṃniddesā tādī, satiyā sati satimāti taṃniddesā tādī, samādhismiṃ sati samāhitoti taṃniddesā tādī, paññāya sati paññavāti taṃniddesā tādī, vijjāya sati tevijjoti taṃniddesā tādī, abhiññāya sati chaḷabhiññoti taṃniddesā tādī, dasabale sati dasabaloti taṃniddesā tādī. Evaṃ bhagavā taṃniddesā tādīti – taṃ buddhaṃ asitaṃ tādiṃ.

অকুহং গণিমাগতন্তি। অকুহোতি তীণি কুহনৰত্থূনি – পচ্চযপটিসেৰনসঙ্খাতং কুহনৰত্থু, ইরিযাপথসঙ্খাতং কুহনৰত্থু, সামন্তজপ্পনসঙ্খাতং কুহনৰত্থু।

Akuhaṃ gaṇimāgatanti. Akuhoti tīṇi kuhanavatthūni – paccayapaṭisevanasaṅkhātaṃ kuhanavatthu, iriyāpathasaṅkhātaṃ kuhanavatthu, sāmantajappanasaṅkhātaṃ kuhanavatthu.

কতমং পচ্চযপটিসেৰনসঙ্খাতং কুহনৰত্থু? ইধ গহপতিকা ভিক্খুং নিমন্তেন্তি চীৰরপিণ্ডপাতসেনাসনগিলানপচ্চযভেসজ্জপরিক্খারেহি। সো পাপিচ্ছো ইচ্ছাপকতো অত্থিকো ³⁷ চীৰরপিণ্ডপাতসেনাসনগিলানপচ্চযভেসজ্জপরিক্খারানং ভিয্যোকম্যতং উপাদায চীৰরং পচ্চক্খাতি, পিণ্ডপাতং পচ্চক্খাতি, সেনাসনং পচ্চক্খাতি, গিলানপচ্চযভেসজ্জপরিক্খারং পচ্চক্খাতি। সো এৰমাহ – ‘‘কিং সমণস্স মহগ্ঘেন চীৰরেন! এতং সারুপ্পং, যং সমণো সুসানা ৰা সঙ্কারকূটা ৰা পাপণিকা ৰা নন্তকানি উচ্চিনিত্ৰা সঙ্ঘাটিং করিত্ৰা ধারেয্য। কিং সমণস্স মহগ্ঘেন পিণ্ডপাতেন! এতং সারুপ্পং, যং সমণো উঞ্ছাচরিযায পিণ্ডিযালোপেন জীৰিতং কপ্পেয্য । কিং সমণস্স মহগ্ঘেন সেনাসনেন! এতং সারুপ্পং, যং সমণো রুক্খমূলিকো ৰা অস্স সোসানিকো ৰা অব্ভোকাসিকো ৰা। কিং সমণস্স মহগ্ঘেন গিলানপচ্চযভেসজ্জপরিক্খারেন! এতং সারুপ্পং, যং সমণো পূতিমুত্তেন হরিতকীখণ্ডেন ওসধং করেয্যা’’তি তদুপাদায লূখং চীৰরং ধারেতি, লূখং পিণ্ডপাতং পরিভুঞ্জতি, লূখং সেনাসনং পটিসেৰতি, লূখং গিলানপচ্চযভেসজ্জপরিক্খারং পটিসেৰতি। তমেনং গহপতিকা এৰং জানন্তি – ‘‘অযং সমণো অপ্পিচ্ছো সন্তুট্ঠো পৰিৰিত্তো অসংসট্ঠো আরদ্ধৰীরিযো ধুতৰাদো’’তি ভিয্যো ভিয্যো নিমন্তেন্তি চীৰরপিণ্ডপাতসেনাসনগিলানপচ্চযভেসজ্জপরিক্খারেহি । সো এৰমাহ – ‘‘তিণ্ণং সম্মুখীভাৰা সদ্ধো কুলপুত্তো বহুং পুঞ্ঞং পসৰতি, সদ্ধায সম্মুখীভাৰা সদ্ধো কুলপুত্তো বহুং পুঞ্ঞং পসৰতি, দেয্যধম্মস্স সম্মুখীভাৰা সদ্ধো কুলপুত্তো বহুং পুঞ্ঞং পসৰতি, দক্খিণেয্যানং সম্মুখীভাৰা সদ্ধো কুলপুত্তো বহুং পুঞ্ঞং পসৰতি। তুম্হাকঞ্চেৰাযং সদ্ধা অত্থি, দেয্যধম্মো চ সংৰিজ্জতি, অহঞ্চ পটিগ্গাহকো। সচে অহং ন পটিগ্গহেস্সামি , এৰং তুম্হে পুঞ্ঞেন পরিবাহিরা ³⁸ ভৰিস্সথ, ন ময্হং ইমিনা অত্থো, অপি চ তুম্হাকংযেৰ অনুকম্পায পটিগ্গণ্হামী’’তি। তদুপাদায বহুম্পি চীৰরং পটিগ্গণ্হাতি ³⁹, বহুম্পি পিণ্ডপাতং পটিগ্গণ্হাতি, বহুম্পি সেনাসনং পটিগ্গণ্হাতি, বহুম্পি গিলানপচ্চযভেসজ্জপরিক্খারং পটিগ্গণ্হাতি। যা এৰরূপা ভাকুটিকা ভাকুটিযং কুহনা কুহাযনা কুহিতত্তং – ইদং পচ্চযপটিসেৰনসঙ্খাতং কুহনৰত্থু।

Katamaṃ paccayapaṭisevanasaṅkhātaṃ kuhanavatthu? Idha gahapatikā bhikkhuṃ nimantenti cīvarapiṇḍapātasenāsanagilānapaccayabhesajjaparikkhārehi. So pāpiccho icchāpakato atthiko ⁴⁰ cīvarapiṇḍapātasenāsanagilānapaccayabhesajjaparikkhārānaṃ bhiyyokamyataṃ upādāya cīvaraṃ paccakkhāti, piṇḍapātaṃ paccakkhāti, senāsanaṃ paccakkhāti, gilānapaccayabhesajjaparikkhāraṃ paccakkhāti. So evamāha – ‘‘kiṃ samaṇassa mahagghena cīvarena! Etaṃ sāruppaṃ, yaṃ samaṇo susānā vā saṅkārakūṭā vā pāpaṇikā vā nantakāni uccinitvā saṅghāṭiṃ karitvā dhāreyya. Kiṃ samaṇassa mahagghena piṇḍapātena! Etaṃ sāruppaṃ, yaṃ samaṇo uñchācariyāya piṇḍiyālopena jīvitaṃ kappeyya . Kiṃ samaṇassa mahagghena senāsanena! Etaṃ sāruppaṃ, yaṃ samaṇo rukkhamūliko vā assa sosāniko vā abbhokāsiko vā. Kiṃ samaṇassa mahagghena gilānapaccayabhesajjaparikkhārena! Etaṃ sāruppaṃ, yaṃ samaṇo pūtimuttena haritakīkhaṇḍena osadhaṃ kareyyā’’ti tadupādāya lūkhaṃ cīvaraṃ dhāreti, lūkhaṃ piṇḍapātaṃ paribhuñjati, lūkhaṃ senāsanaṃ paṭisevati, lūkhaṃ gilānapaccayabhesajjaparikkhāraṃ paṭisevati. Tamenaṃ gahapatikā evaṃ jānanti – ‘‘ayaṃ samaṇo appiccho santuṭṭho pavivitto asaṃsaṭṭho āraddhavīriyo dhutavādo’’ti bhiyyo bhiyyo nimantenti cīvarapiṇḍapātasenāsanagilānapaccayabhesajjaparikkhārehi . So evamāha – ‘‘tiṇṇaṃ sammukhībhāvā saddho kulaputto bahuṃ puññaṃ pasavati, saddhāya sammukhībhāvā saddho kulaputto bahuṃ puññaṃ pasavati, deyyadhammassa sammukhībhāvā saddho kulaputto bahuṃ puññaṃ pasavati, dakkhiṇeyyānaṃ sammukhībhāvā saddho kulaputto bahuṃ puññaṃ pasavati. Tumhākañcevāyaṃ saddhā atthi, deyyadhammo ca saṃvijjati, ahañca paṭiggāhako. Sace ahaṃ na paṭiggahessāmi , evaṃ tumhe puññena paribāhirā ⁴¹ bhavissatha, na mayhaṃ iminā attho, api ca tumhākaṃyeva anukampāya paṭiggaṇhāmī’’ti. Tadupādāya bahumpi cīvaraṃ paṭiggaṇhāti ⁴², bahumpi piṇḍapātaṃ paṭiggaṇhāti, bahumpi senāsanaṃ paṭiggaṇhāti, bahumpi gilānapaccayabhesajjaparikkhāraṃ paṭiggaṇhāti. Yā evarūpā bhākuṭikā bhākuṭiyaṃ kuhanā kuhāyanā kuhitattaṃ – idaṃ paccayapaṭisevanasaṅkhātaṃ kuhanavatthu.

কতমং ইরিযাপথসঙ্খাতং কুহনৰত্থু? ইধেকচ্চো পাপিচ্ছো ইচ্ছাপকতো সম্ভাৰনাধিপ্পাযো, ‘‘এৰং মং জনো সম্ভাৰেস্সতী’’তি গমনং সণ্ঠপেতি, ঠানং সণ্ঠপেতি, নিসজ্জং সণ্ঠপেতি, সযনং সণ্ঠপেতি, পণিধায গচ্ছতি, পণিধায তিট্ঠতি, পণিধায নিসীদতি, পণিধায সেয্যং কপ্পেতি, সমাহিতো ৰিয গচ্ছতি, সমাহিতো ৰিয তিট্ঠতি, সমাহিতো ৰিয নিসীদতি, সমাহিতো ৰিয সেয্যং কপ্পেতি, আপাথকজ্ঝাযীৰ হোতি। যা এৰরূপা ইরিযাপথস্স আঠপনা ঠপনা সণ্ঠপনা ভাকুটিকা ভাকুটিযং কুহনা কুহাযনা কুহিতত্তং – ইদং ইরিযাপথসঙ্খাতং কুহনৰত্থু।

Katamaṃ iriyāpathasaṅkhātaṃ kuhanavatthu? Idhekacco pāpiccho icchāpakato sambhāvanādhippāyo, ‘‘evaṃ maṃ jano sambhāvessatī’’ti gamanaṃ saṇṭhapeti, ṭhānaṃ saṇṭhapeti, nisajjaṃ saṇṭhapeti, sayanaṃ saṇṭhapeti, paṇidhāya gacchati, paṇidhāya tiṭṭhati, paṇidhāya nisīdati, paṇidhāya seyyaṃ kappeti, samāhito viya gacchati, samāhito viya tiṭṭhati, samāhito viya nisīdati, samāhito viya seyyaṃ kappeti, āpāthakajjhāyīva hoti. Yā evarūpā iriyāpathassa āṭhapanā ṭhapanā saṇṭhapanā bhākuṭikā bhākuṭiyaṃ kuhanā kuhāyanā kuhitattaṃ – idaṃ iriyāpathasaṅkhātaṃ kuhanavatthu.

কতমং সামন্তজপ্পনসঙ্খাতং কুহনৰত্থু? ইধেকচ্চো পাপিচ্ছো ইচ্ছাপকতো সম্ভাৰনাধিপ্পাযো ‘‘এৰং মং জনো সম্ভাৰেস্সতী’’তি, অরিযধম্মসন্নিস্সিতং ৰাচং ভাসতি। ‘‘যো এৰরূপং চীৰরং ধারেতি সো সমণো মহেসক্খো’’তি ভণতি; ‘‘যো এৰরূপং পত্তং ধারেতি… লোহথালকং ধারেতি… ধম্মকরণং ⁴³ ধারেতি… পরিস্সাৰনং ধারেতি… কুঞ্চিকং ধারেতি… উপাহনং ধারেতি… কাযবন্ধনং ধারেতি… আযোগং ধারেতি, সো সমণো মহেসক্খো’’তি ভণতি; ‘‘যস্স এৰরূপো উপজ্ঝাযো সো সমণো মহেসক্খো’’তি ভণতি; ‘‘যস্স এৰরূপো আচরিযো… এৰরূপা সমানুপজ্ঝাযকা… সমানাচরিযকা… মিত্তা… সন্দিট্ঠা… সম্ভত্তা… সহাযা, সো সমণো মহেসক্খো’’তি ভণতি; ‘‘যো এৰরূপে ৰিহারে ৰসতি, সো সমণো মহেসক্খো’’তি ভণতি; ‘‘যো এৰরূপে অড্ঢযোগে ৰসতি… পাসাদে ৰসতি… হম্মিযে ৰসতি… গুহাযং ৰসতি… লেণে ৰসতি… কুটিযা ৰসতি… কূটাগারে ৰসতি… অট্টে ৰসতি … মাল়ে ৰসতি… উদ্দণ্ডে ৰসতি… উপট্ঠানসালাযং ৰসতি… মণ্ডপে ৰসতি… রুক্খমূলে ৰসতি, সো সমণো মহেসক্খো’’তি ভণতি।

Katamaṃ sāmantajappanasaṅkhātaṃ kuhanavatthu? Idhekacco pāpiccho icchāpakato sambhāvanādhippāyo ‘‘evaṃ maṃ jano sambhāvessatī’’ti, ariyadhammasannissitaṃ vācaṃ bhāsati. ‘‘Yo evarūpaṃ cīvaraṃ dhāreti so samaṇo mahesakkho’’ti bhaṇati; ‘‘yo evarūpaṃ pattaṃ dhāreti… lohathālakaṃ dhāreti… dhammakaraṇaṃ ⁴⁴ dhāreti… parissāvanaṃ dhāreti… kuñcikaṃ dhāreti… upāhanaṃ dhāreti… kāyabandhanaṃ dhāreti… āyogaṃ dhāreti, so samaṇo mahesakkho’’ti bhaṇati; ‘‘yassa evarūpo upajjhāyo so samaṇo mahesakkho’’ti bhaṇati; ‘‘yassa evarūpo ācariyo… evarūpā samānupajjhāyakā… samānācariyakā… mittā… sandiṭṭhā… sambhattā… sahāyā, so samaṇo mahesakkho’’ti bhaṇati; ‘‘yo evarūpe vihāre vasati, so samaṇo mahesakkho’’ti bhaṇati; ‘‘yo evarūpe aḍḍhayoge vasati… pāsāde vasati… hammiye vasati… guhāyaṃ vasati… leṇe vasati… kuṭiyā vasati… kūṭāgāre vasati… aṭṭe vasati … māḷe vasati… uddaṇḍe vasati… upaṭṭhānasālāyaṃ vasati… maṇḍape vasati… rukkhamūle vasati, so samaṇo mahesakkho’’ti bhaṇati.

অথ ৰা কোরজিককোরজিকো, ভাকুটিকভাকুটিকো, কুহককুহকো, লপকলপকো, মুখসম্ভাৰিতো ‘‘অযং সমণো ইমাসং এৰরূপানং ৰিহারসমাপত্তীনং লাভী’’তি। তাদিসং গম্ভীরং গূল়্হং নিপুণং পটিচ্ছন্নং লোকুত্তরং সুঞ্ঞতাপটিসঞ্ঞুত্তং কথং কথেতি। যা এৰরূপা ভাকুটিকা ভাকুটিযং কুহনা কুহাযনা কুহিতত্তং – ইদং সামন্তজপ্পনসঙ্খাতং কুহনৰত্থু। বুদ্ধস্স ভগৰতো ইমানি তীণি কুহনৰত্থূনি পহীনানি সমুচ্ছিন্নানি ৰূপসন্তানি পটিপস্সদ্ধানি অভব্বুপ্পত্তিকানি ঞাণগ্গিনা দড্ঢানি। তস্মা বুদ্ধো অকুহোতি – অকুহং।

Atha vā korajikakorajiko, bhākuṭikabhākuṭiko, kuhakakuhako, lapakalapako, mukhasambhāvito ‘‘ayaṃ samaṇo imāsaṃ evarūpānaṃ vihārasamāpattīnaṃ lābhī’’ti. Tādisaṃ gambhīraṃ gūḷhaṃ nipuṇaṃ paṭicchannaṃ lokuttaraṃ suññatāpaṭisaññuttaṃ kathaṃ katheti. Yā evarūpā bhākuṭikā bhākuṭiyaṃ kuhanā kuhāyanā kuhitattaṃ – idaṃ sāmantajappanasaṅkhātaṃ kuhanavatthu. Buddhassa bhagavato imāni tīṇi kuhanavatthūni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni. Tasmā buddho akuhoti – akuhaṃ.

গণিমাগতন্তি। গণীতি গণী ভগৰা। গণাচরিযোতি গণী, গণস্স সত্থাতি গণী, গণং পরিহরতীতি গণী, গণং ওৰদতীতি গণী, গণং অনুসাসতীতি গণী, ৰিসারদো গণং উপসঙ্কমতীতি গণী, গণস্স সুস্সূসতি সোতং ওদহতি অঞ্ঞা চিত্তং উপট্ঠপেতীতি গণী, গণং অকুসলা ৰুট্ঠাপেত্ৰা কুসলে পতিট্ঠাপেতীতি গণী, ভিক্খুগণস্স গণী, ভিক্খুনীগণস্স গণী, উপাসকগণস্স গণী, উপাসিকাগণস্স গণী, রাজগণস্স গণী, খত্তিযগণস্স গণী, ব্রাহ্মণগণস্স গণী, ৰেস্সগণস্স গণী, সুদ্দগণস্স গণী, ব্রহ্মগণস্স গণী, দেৰগণস্স গণী, সঙ্ঘিং ⁴⁵ গণিং গণাচরিযং। আগতন্তি উপগতং সমুপগতং সমুপপন্নং ⁴⁶ সঙ্কস্সনগরন্তি – অকুহং গণিমাগতং।

Gaṇimāgatanti. Gaṇīti gaṇī bhagavā. Gaṇācariyoti gaṇī, gaṇassa satthāti gaṇī, gaṇaṃ pariharatīti gaṇī, gaṇaṃ ovadatīti gaṇī, gaṇaṃ anusāsatīti gaṇī, visārado gaṇaṃ upasaṅkamatīti gaṇī, gaṇassa sussūsati sotaṃ odahati aññā cittaṃ upaṭṭhapetīti gaṇī, gaṇaṃ akusalā vuṭṭhāpetvā kusale patiṭṭhāpetīti gaṇī, bhikkhugaṇassa gaṇī, bhikkhunīgaṇassa gaṇī, upāsakagaṇassa gaṇī, upāsikāgaṇassa gaṇī, rājagaṇassa gaṇī, khattiyagaṇassa gaṇī, brāhmaṇagaṇassa gaṇī, vessagaṇassa gaṇī, suddagaṇassa gaṇī, brahmagaṇassa gaṇī, devagaṇassa gaṇī, saṅghiṃ ⁴⁷ gaṇiṃ gaṇācariyaṃ. Āgatanti upagataṃ samupagataṃ samupapannaṃ ⁴⁸ saṅkassanagaranti – akuhaṃ gaṇimāgataṃ.

বহূনমিধ বদ্ধানন্তি। বহূনং খত্তিযানং ব্রাহ্মণানং ৰেস্সানং সুদ্দানং গহট্ঠানং পব্বজিতানং দেৰানং মনুস্সানং। বদ্ধানন্তি বদ্ধানং বদ্ধচরানং পরিচারকানং সিস্সানন্তি – বহূনমিধ বদ্ধানং।

Bahūnamidha baddhānanti. Bahūnaṃ khattiyānaṃ brāhmaṇānaṃ vessānaṃ suddānaṃ gahaṭṭhānaṃ pabbajitānaṃ devānaṃ manussānaṃ. Baddhānanti baddhānaṃ baddhacarānaṃ paricārakānaṃ sissānanti – bahūnamidha baddhānaṃ.

অত্থি পঞ্হেন আগমন্তি। পঞ্হেন অত্থিকো আগতোম্হি ⁴⁹, পঞ্হং পুচ্ছিতুকামো আগতোম্হি, পঞ্হং সোতুকামো আগতোম্হীতি। এৰম্পি অত্থি পঞ্হেন আগমং। অথ ৰা পঞ্হত্থিকানং পঞ্হং পুচ্ছিতুকামানং পঞ্হং সোতুকামানং আগমনং অভিক্কমনং উপসঙ্কমনং পযিরুপাসনং ⁵⁰ সিযা অত্থীতি। এৰম্পি অত্থি পঞ্হেন আগমং। অথ ৰা পঞ্হাগমো তুয্হং অত্থি, ত্ৰম্পি পহু ⁵¹, ত্ৰমসি অলমত্থো মযা পুচ্ছিতং কথেতুং ৰিসজ্জেতুং ‘‘ৰহস্সেতং ভার’’ন্তি। এৰম্পি অত্থি পঞ্হেন আগমং।

Atthi pañhena āgamanti. Pañhena atthiko āgatomhi ⁵², pañhaṃ pucchitukāmo āgatomhi, pañhaṃ sotukāmo āgatomhīti. Evampi atthi pañhena āgamaṃ. Atha vā pañhatthikānaṃ pañhaṃ pucchitukāmānaṃ pañhaṃ sotukāmānaṃ āgamanaṃ abhikkamanaṃ upasaṅkamanaṃ payirupāsanaṃ ⁵³ siyā atthīti. Evampi atthi pañhena āgamaṃ. Atha vā pañhāgamo tuyhaṃ atthi, tvampi pahu ⁵⁴, tvamasi alamattho mayā pucchitaṃ kathetuṃ visajjetuṃ ‘‘vahassetaṃ bhāra’’nti. Evampi atthi pañhena āgamaṃ.

তেনাহ থেরো সারিপুত্তো –

Tenāha thero sāriputto –

‘‘তং বুদ্ধং অসিতং তাদিং, অকুহং গণিমাগতং।

‘‘Taṃ buddhaṃ asitaṃ tādiṃ, akuhaṃ gaṇimāgataṃ;

বহূনমিধ বদ্ধানং, অত্থি পঞ্হেন আগম’’ন্তি॥

Bahūnamidha baddhānaṃ, atthi pañhena āgama’’nti.

১৯৩.

193.

ভিক্খুনো ৰিজিগুচ্ছতো, ভজতো রিত্তমাসনং।

Bhikkhuno vijigucchato, bhajato rittamāsanaṃ;

রুক্খমূলং সুসানং ৰা, পব্বতানং গুহাসু ৰা॥

Rukkhamūlaṃ susānaṃ vā, pabbatānaṃ guhāsu vā.

ভিক্খুনো ৰিজিগুচ্ছতোতি। ভিক্খুনোতি পুথুজ্জনকল্যাণস্স ৰা ভিক্খুনো সেক্খস্স ৰা ভিক্খুনো। ৰিজিগুচ্ছতোতি জাতিযা ৰিজিগুচ্ছতো, জরায… ব্যাধিনা… মরণেন… সোকেহি… পরিদেৰেহি… দুক্খেহি… দোমনস্সেহি… উপাযাসেহি ৰিজিগুচ্ছতো, নেরযিকেন দুক্খেন… তিরচ্ছানযোনিকেন দুক্খেন… পেত্তিৰিসযিকেন দুক্খেন… মানুসিকেন ⁵⁵ দুক্খেন… গব্ভোক্কন্তিমূলকেন দুক্খেন… গব্ভট্ঠিতিমূলকেন দুক্খেন… গব্ভৰুট্ঠানমূলকেন দুক্খেন… জাতস্সূপনিবন্ধকেন দুক্খেন… জাতস্স পরাধেয্যকেন দুক্খেন… অত্তূপক্কমেন দুক্খেন… পরূপক্কমেন দুক্খেন… দুক্খদুক্খেন… সঙ্খারদুক্খেন … ৰিপরিণামদুক্খেন… চক্খুরোগেন দুক্খেন… সোতরোগেন দুক্খেন… ঘানরোগেন দুক্খেন… জিৰ্হারোগেন দুক্খেন… কাযরোগেন দুক্খেন… সীসরোগেন দুক্খেন… কণ্ণরোগেন দুক্খেন… মুখরোগেন দুক্খেন… দন্তরোগেন দুক্খেন… কাসেন… সাসেন… পিনাসেন… ডাহেন… জরেন… কুচ্ছিরোগেন… মুচ্ছায… পক্খন্দিকায… সূলায… ৰিসূচিকায… কুট্ঠেন… গণ্ডেন… কিলাসেন… সোসেন… অপমারেন… দদ্দুযা… কণ্ডুযা… কচ্ছুযা… রখসায… ৰিতচ্ছিকায… লোহিতেন… পিত্তেন… মধুমেহেন… অংসায… পিল়কায… ভগন্দলেন… পিত্তসমুট্ঠানেন আবাধেন… সেম্হসমুট্ঠানেন আবাধেন… ৰাতসমুট্ঠানেন আবাধেন… সন্নিপাতিকেন আবাধেন… উতুপরিণামজেন আবাধেন… ৰিসমপরিহারজেন আবাধেন… ওপক্কমিকেন আবাধেন… কম্মৰিপাকজেন আবাধেন… সীতেন… উণ্হেন… জিঘচ্ছায… পিপাসায… উচ্চারেন … পস্সাৰেন… ডংসমকসৰাতাতপসরীসপসম্ফস্সেন দুক্খেন… মাতুমরণেন দুক্খেন… পিতুমরণেন দুক্খেন… ভাতুমরণেন… ভগিনিমরণেন… পুত্তমরণেন … ধীতুমরণেন… ঞাতিব্যসনেন… ভোগব্যসনেন… রোগব্যসনেন… সীলব্যসনেন… দিট্ঠিব্যসনেন দুক্খেন ৰিজিগুচ্ছতো অট্টীযতো হরাযতো জিগুচ্ছতোতি – ভিক্খুনো ৰিজিগুচ্ছতো।

Bhikkhuno vijigucchatoti. Bhikkhunoti puthujjanakalyāṇassa vā bhikkhuno sekkhassa vā bhikkhuno. Vijigucchatoti jātiyā vijigucchato, jarāya… byādhinā… maraṇena… sokehi… paridevehi… dukkhehi… domanassehi… upāyāsehi vijigucchato, nerayikena dukkhena… tiracchānayonikena dukkhena… pettivisayikena dukkhena… mānusikena ⁵⁶ dukkhena… gabbhokkantimūlakena dukkhena… gabbhaṭṭhitimūlakena dukkhena… gabbhavuṭṭhānamūlakena dukkhena… jātassūpanibandhakena dukkhena… jātassa parādheyyakena dukkhena… attūpakkamena dukkhena… parūpakkamena dukkhena… dukkhadukkhena… saṅkhāradukkhena … vipariṇāmadukkhena… cakkhurogena dukkhena… sotarogena dukkhena… ghānarogena dukkhena… jivhārogena dukkhena… kāyarogena dukkhena… sīsarogena dukkhena… kaṇṇarogena dukkhena… mukharogena dukkhena… dantarogena dukkhena… kāsena… sāsena… pināsena… ḍāhena… jarena… kucchirogena… mucchāya… pakkhandikāya… sūlāya… visūcikāya… kuṭṭhena… gaṇḍena… kilāsena… sosena… apamārena… dadduyā… kaṇḍuyā… kacchuyā… rakhasāya… vitacchikāya… lohitena… pittena… madhumehena… aṃsāya… piḷakāya… bhagandalena… pittasamuṭṭhānena ābādhena… semhasamuṭṭhānena ābādhena… vātasamuṭṭhānena ābādhena… sannipātikena ābādhena… utupariṇāmajena ābādhena… visamaparihārajena ābādhena… opakkamikena ābādhena… kammavipākajena ābādhena… sītena… uṇhena… jighacchāya… pipāsāya… uccārena … passāvena… ḍaṃsamakasavātātapasarīsapasamphassena dukkhena… mātumaraṇena dukkhena… pitumaraṇena dukkhena… bhātumaraṇena… bhaginimaraṇena… puttamaraṇena … dhītumaraṇena… ñātibyasanena… bhogabyasanena… rogabyasanena… sīlabyasanena… diṭṭhibyasanena dukkhena vijigucchato aṭṭīyato harāyato jigucchatoti – bhikkhuno vijigucchato.

ভজতো রিত্তমাসনন্তি। আসনং ৰুচ্চতি যত্থ নিসীদতি – মঞ্চো পীঠং ভিসি তট্টিকা চম্মখণ্ডো তিণসন্থারো পণ্ণসন্থারো পলালসন্থারো ⁵⁷। তং আসনং অসপ্পাযরূপদস্সনেন রিত্তং ৰিৰিত্তং পৰিৰিত্তং , অসপ্পাযসদ্দস্সৰনেন রিত্তং ৰিৰিত্তং পৰিৰিত্তং, অসপ্পাযেহি পঞ্চহি কামগুণেহি রিত্তং ৰিৰিত্তং পৰিৰিত্তং। তং পৰিৰিত্তং আসনং ভজতো সম্ভজতো সেৰতো নিসেৰতো সংসেৰতো পটিসেৰতোতি – ভজতো রিত্তমাসনং।

Bhajato rittamāsananti. Āsanaṃ vuccati yattha nisīdati – mañco pīṭhaṃ bhisi taṭṭikā cammakhaṇḍo tiṇasanthāro paṇṇasanthāro palālasanthāro ⁵⁸. Taṃ āsanaṃ asappāyarūpadassanena rittaṃ vivittaṃ pavivittaṃ , asappāyasaddassavanena rittaṃ vivittaṃ pavivittaṃ, asappāyehi pañcahi kāmaguṇehi rittaṃ vivittaṃ pavivittaṃ. Taṃ pavivittaṃ āsanaṃ bhajato sambhajato sevato nisevato saṃsevato paṭisevatoti – bhajato rittamāsanaṃ.

রুক্খমূলং সুসানং ৰাতি। রুক্খমূলংযেৰ রুক্খমূলং, সুসানংযেৰ সুসানন্তি – রুক্খমূলং সুসানং ৰা। পব্বতানং গুহাসু ৰাতি। পব্বতাযেৰ পব্বতা, কন্দরাযেৰ কন্দরা, গিরিগুহাযেৰ গিরিগুহা। পব্বতন্তরিকাযো ৰুচ্চন্তি পব্বতপব্ভারাতি – পব্বতানং গুহাসু ৰা।

Rukkhamūlaṃ susānaṃ vāti. Rukkhamūlaṃyeva rukkhamūlaṃ, susānaṃyeva susānanti – rukkhamūlaṃ susānaṃ vā. Pabbatānaṃ guhāsu vāti. Pabbatāyeva pabbatā, kandarāyeva kandarā, giriguhāyeva giriguhā. Pabbatantarikāyo vuccanti pabbatapabbhārāti – pabbatānaṃ guhāsu vā.

তেনাহ থেরো সারিপুত্তো –

Tenāha thero sāriputto –

‘‘ভিক্খুনো ৰিজিগুচ্ছতো, ভজতো রিত্তমাসনং।

‘‘Bhikkhuno vijigucchato, bhajato rittamāsanaṃ;

রুক্খমূলং সুসানং ৰা, পব্বতানং গুহাসু ৰা’’তি॥

Rukkhamūlaṃ susānaṃ vā, pabbatānaṃ guhāsu vā’’ti.

১৯৪.

194.

উচ্চাৰচেসু সযনেসু, কিৰন্তো ⁵⁹ তত্থ ভেরৰা।

Uccāvacesu sayanesu, kivanto⁶⁰tattha bheravā;

যে হি ভিক্খু ন ৰেধেয্য, নিগ্ঘোসে সযনাসনে॥

Ye hi bhikkhu na vedheyya, nigghose sayanāsane.

উচ্চাৰচেসু সযনেসূতি। উচ্চাৰচেসূতি উচ্চাৰচেসু হীনপ্পণীতেসু ছেকপাপকেসু। সযনং ৰুচ্চতি সেনাসনং ৰিহারো অড্ঢযোগো পাসাদো হম্মিযং গুহাতি – উচ্চাৰচেসু সযনেসু। কিৰন্তো তত্থ ভেরৰাতি। কিৰন্তোতি কিৰন্তো ⁶¹ কূজন্তো নদন্তো সদ্দং করোন্তো। অথ ৰা কিৰন্তোতি কতি কিত্তকা কীৰতকা কীৰবহুকা তে। ভেরৰাতি সীহা ব্যগ্ঘা দীপী অচ্ছা তরচ্ছা কোকা মহিংসা হত্থী অহি ৰিচ্ছিকা সতপদী, চোরা ৰা অস্সু মানৰা ৰা কতকম্মা ৰা অকতকম্মা ৰাতি – কিৰন্তো তত্থ ভেরৰা।

Uccāvacesusayanesūti. Uccāvacesūti uccāvacesu hīnappaṇītesu chekapāpakesu. Sayanaṃ vuccati senāsanaṃ vihāro aḍḍhayogo pāsādo hammiyaṃ guhāti – uccāvacesu sayanesu. Kivanto tattha bheravāti. Kivantoti kivanto ⁶² kūjanto nadanto saddaṃ karonto. Atha vā kivantoti kati kittakā kīvatakā kīvabahukā te. Bheravāti sīhā byagghā dīpī acchā taracchā kokā mahiṃsā hatthī ahi vicchikā satapadī, corā vā assu mānavā vā katakammā vā akatakammā vāti – kivanto tattha bheravā.

যে হি ভিক্খু ন ৰেধেয্যাতি। যে হীতি যে হি ভেরৰে পস্সিত্ৰা ৰা সুণিত্ৰা ৰা ন ৰেধেয্য নপ্পৰেধেয্য ন সম্পৰেধেয্য ন তসেয্য ন উত্তসেয্য ন পরিত্তসেয্য ন ভাযেয্য ন সন্তাসং আপজ্জেয্য, অভীরূ অস্স অচ্ছম্ভী অনুত্রাসী অপলাযী, পহীনভযভেরৰো ৰিগতলোমহংসো ৰিহরেয্যাতি – যে হি ভিক্খু ন ৰেধেয্য।

Ye hi bhikkhu na vedheyyāti. Ye hīti ye hi bherave passitvā vā suṇitvā vā na vedheyya nappavedheyya na sampavedheyya na taseyya na uttaseyya na parittaseyya na bhāyeyya na santāsaṃ āpajjeyya, abhīrū assa acchambhī anutrāsī apalāyī, pahīnabhayabheravo vigatalomahaṃso vihareyyāti – ye hi bhikkhu na vedheyya.

নিগ্ঘোসে সযনাসনেতি। অপ্পসদ্দে অপ্পনিগ্ঘোসে ৰিজনৰাতে মনুস্সরাহস্সেয্যকে পটিসল্লানসারুপ্পে সেনাসনেতি – নিগ্ঘোসে সযনাসনে।

Nigghose sayanāsaneti. Appasadde appanigghose vijanavāte manussarāhasseyyake paṭisallānasāruppe senāsaneti – nigghose sayanāsane.

তেনাহ থেরো সারিপুত্তো –

Tenāha thero sāriputto –

‘‘উচ্চাৰচেসু সযনেসু, কিৰন্তো তত্থ ভেরৰা।

‘‘Uccāvacesu sayanesu, kivanto tattha bheravā;

যে হি ভিক্খু ন ৰেধেয্য, নিগ্ঘোসে সযনাসনে’’তি॥

Ye hi bhikkhu na vedheyya, nigghose sayanāsane’’ti.

১৯৫.

195.

কতি পরিস্সযা লোকে, গচ্ছতো অগতং দিসং।

Kati parissayā loke, gacchato agataṃ disaṃ;

যে ভিক্খু অভিসম্ভৰে, পন্তম্হি সযনাসনে॥

Ye bhikkhu abhisambhave, pantamhi sayanāsane.

কতি পরিস্সযা লোকেতি। কতীতি কতি কিত্তকা কীৰতকা কীৰবহুকা। পরিস্সযাতি দ্ৰে পরিস্সযা – পাকটপরিস্সযা চ পটিচ্ছন্নপরিস্সযা চ। কতমে পাকটপরিস্সযা? সীহা ব্যগ্ঘা দীপী অচ্ছা তরচ্ছা কোকা মহিংসা হত্থী অহি ৰিচ্ছিকা সতপদী, চোরা ৰা অস্সু মানৰা ৰা কতকম্মা ৰা অকতকম্মা ৰা, চক্খুরোগো সোতরোগো ঘানরোগো জিৰ্হারোগো কাযরোগো সীসরোগো কণ্ণরোগো মুখরোগো দন্তরোগো কাসো সাসো পিনাসো ডাহো জরো কুচ্ছিরোগো মুচ্ছা পক্খন্দিকা সূলা ৰিসূচিকা কুট্ঠং গণ্ডো কিলাসো সোসো অপমারো দদ্দু কণ্ডু কচ্ছু রখসা ৰিতচ্ছিকা লোহিতং পিত্তং মধুমেহো অংসা পিল়কা ভগন্দলা, পিত্তসমুট্ঠানা আবাধা…পে॰… সীতং উণ্হং জিঘচ্ছা পিপাসা উচ্চারো পস্সাৰো ডংসমকসৰাতাতপসরীসপসম্ফস্সা – ইমে ৰুচ্চন্তি পাকটপরিস্সযা।

Kati parissayā loketi. Katīti kati kittakā kīvatakā kīvabahukā. Parissayāti dve parissayā – pākaṭaparissayā ca paṭicchannaparissayā ca. Katame pākaṭaparissayā? Sīhā byagghā dīpī acchā taracchā kokā mahiṃsā hatthī ahi vicchikā satapadī, corā vā assu mānavā vā katakammā vā akatakammā vā, cakkhurogo sotarogo ghānarogo jivhārogo kāyarogo sīsarogo kaṇṇarogo mukharogo dantarogo kāso sāso pināso ḍāho jaro kucchirogo mucchā pakkhandikā sūlā visūcikā kuṭṭhaṃ gaṇḍo kilāso soso apamāro daddu kaṇḍu kacchu rakhasā vitacchikā lohitaṃ pittaṃ madhumeho aṃsā piḷakā bhagandalā, pittasamuṭṭhānā ābādhā…pe… sītaṃ uṇhaṃ jighacchā pipāsā uccāro passāvo ḍaṃsamakasavātātapasarīsapasamphassā – ime vuccanti pākaṭaparissayā.

কতমে পটিচ্ছন্নপরিস্সযা? কাযদুচ্চরিতং ৰচীদুচ্চরিতং মনোদুচ্চরিতং কামচ্ছন্দনীৰরণং ব্যাপাদনীৰরণং থিনমিদ্ধনীৰরণং উদ্ধচ্চকুক্কুচ্চনীৰরণং ৰিচিকিচ্ছানীৰরণং রাগো দোসো মোহো কোধো উপনাহো মক্খো পল়াসো ইস্সা মচ্ছরিযং মাযা সাঠেয্যং থম্ভো সারম্ভো মানো অতিমানো মদো পমাদো, সব্বে কিলেসা সব্বে দুচ্চরিতা সব্বে দরথা সব্বে পরিল়াহা সব্বে সন্তাপা সব্বাকুসলাভিসঙ্খারা – ইমে ৰুচ্চন্তি পটিচ্ছন্নপরিস্সযা।

Katame paṭicchannaparissayā? Kāyaduccaritaṃ vacīduccaritaṃ manoduccaritaṃ kāmacchandanīvaraṇaṃ byāpādanīvaraṇaṃ thinamiddhanīvaraṇaṃ uddhaccakukkuccanīvaraṇaṃ vicikicchānīvaraṇaṃ rāgo doso moho kodho upanāho makkho paḷāso issā macchariyaṃ māyā sāṭheyyaṃ thambho sārambho māno atimāno mado pamādo, sabbe kilesā sabbe duccaritā sabbe darathā sabbe pariḷāhā sabbe santāpā sabbākusalābhisaṅkhārā – ime vuccanti paṭicchannaparissayā.

পরিস্সযাতি কেনট্ঠেন পরিস্সযা? পরিসহন্তীতি পরিস্সযা, পরিহানায সংৰত্তন্তীতি পরিস্সযা, তত্রাসযাতি পরিস্সযা।

Parissayāti kenaṭṭhena parissayā? Parisahantīti parissayā, parihānāya saṃvattantīti parissayā, tatrāsayāti parissayā.

কথং পরিসহন্তীতি পরিস্সযা? তে পরিস্সযা তং পুগ্গলং সহন্তি পরিসহন্তি অভিভৰন্তি অজ্ঝোত্থরন্তি পরিযাদিযন্তি মদ্দন্তি। এৰং পরিসহন্তীতি – পরিস্সযা।

Kathaṃ parisahantīti parissayā? Te parissayā taṃ puggalaṃ sahanti parisahanti abhibhavanti ajjhottharanti pariyādiyanti maddanti. Evaṃ parisahantīti – parissayā.

কথং পরিহানায সংৰত্তন্তীতি পরিস্সযা? তে পরিস্সযা কুসলানং ধম্মানং অন্তরাযায পরিহানায সংৰত্তন্তি। কতমেসং কুসলানং ধম্মানং? সম্মাপটিপদায অনুলোমপটিপদায অপচ্চনীকপটিপদায অৰিরুদ্ধপটিপদায অন্ৰত্থপটিপদায ধম্মানুধম্মপটিপদায সীলেসু পরিপূরকারিতায ইন্দ্রিযেসু গুত্তদ্ৰারতায ভোজনে মত্তঞ্ঞুতায জাগরিযানুযোগস্স সতিসম্পজঞ্ঞস্স চতুন্নং সতিপট্ঠানানং ভাৰনানুযোগস্স চতুন্নং সম্মপ্পধানানং চতুন্নং ইদ্ধিপাদানং পঞ্চন্নং ইন্দ্রিযানং পঞ্চন্নং বলানং সত্তন্নং বোজ্ঝঙ্গানং অরিযস্স অট্ঠঙ্গিকস্স মগ্গস্স ভাৰনানুযোগস্স – ইমেসং কুসলানং ধম্মানং অন্তরাযায পরিহানায সংৰত্তন্তি। এৰং পরিহানায সংৰত্তন্তীতি – পরিস্সযা।

Kathaṃ parihānāya saṃvattantīti parissayā? Te parissayā kusalānaṃ dhammānaṃ antarāyāya parihānāya saṃvattanti. Katamesaṃ kusalānaṃ dhammānaṃ? Sammāpaṭipadāya anulomapaṭipadāya apaccanīkapaṭipadāya aviruddhapaṭipadāya anvatthapaṭipadāya dhammānudhammapaṭipadāya sīlesu paripūrakāritāya indriyesu guttadvāratāya bhojane mattaññutāya jāgariyānuyogassa satisampajaññassa catunnaṃ satipaṭṭhānānaṃ bhāvanānuyogassa catunnaṃ sammappadhānānaṃ catunnaṃ iddhipādānaṃ pañcannaṃ indriyānaṃ pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa maggassa bhāvanānuyogassa – imesaṃ kusalānaṃ dhammānaṃ antarāyāya parihānāya saṃvattanti. Evaṃ parihānāya saṃvattantīti – parissayā.

কথং তত্রাসযাতি পরিস্সযা? তত্থেতে পাপকা অকুসলা ধম্মা উপ্পজ্জন্তি অত্তভাৰসন্নিস্সযা। যথা বিলে বিলাসযা পাণা সযন্তি, দকে দকাসযা পাণা সযন্তি, ৰনে ৰনাসযা পাণা সযন্তি, রুক্খে রুক্খাসযা পাণা সযন্তি; এৰমেৰ তত্থেতে পাপকা অকুসলা ধম্মা উপ্পজ্জন্তি অত্তভাৰসন্নিস্সযাতি। এৰম্পি তত্রাসযাতি – পরিস্সযা।

Kathaṃ tatrāsayāti parissayā? Tatthete pāpakā akusalā dhammā uppajjanti attabhāvasannissayā. Yathā bile bilāsayā pāṇā sayanti, dake dakāsayā pāṇā sayanti, vane vanāsayā pāṇā sayanti, rukkhe rukkhāsayā pāṇā sayanti; evameva tatthete pāpakā akusalā dhammā uppajjanti attabhāvasannissayāti. Evampi tatrāsayāti – parissayā.

ৰুত্তঞ্হেতং ভগৰতা –

Vuttañhetaṃ bhagavatā –

‘‘সান্তেৰাসিকো, ভিক্খৰে, ভিক্খু সাচরিযকো দুক্খং ন ফাসু ৰিহরতি। কথঞ্চ, ভিক্খৰে, ভিক্খু সান্তেৰাসিকো সাচরিযকো দুক্খং ন ফাসু ৰিহরতি? ইধ, ভিক্খৰে, ভিক্খুনো চক্খুনা রূপং দিস্ৰা উপ্পজ্জন্তি পাপকা অকুসলা ধম্মা সরসঙ্কপ্পা সঞ্ঞোজনিযা, ত্যস্স অন্তো ৰসন্তি অন্ৰাস্সৰন্তি পাপকা অকুসলা ধম্মাতি। তস্মা সান্তেৰাসিকোতি ৰুচ্চতি। তে নং সমুদাচরন্তি, সমুদাচরন্তি নং পাপকা অকুসলা ধম্মাতি। তস্মা সাচরিযকোতি ৰুচ্চতি।

‘‘Sāntevāsiko, bhikkhave, bhikkhu sācariyako dukkhaṃ na phāsu viharati. Kathañca, bhikkhave, bhikkhu sāntevāsiko sācariyako dukkhaṃ na phāsu viharati? Idha, bhikkhave, bhikkhuno cakkhunā rūpaṃ disvā uppajjanti pāpakā akusalā dhammā sarasaṅkappā saññojaniyā, tyassa anto vasanti anvāssavanti pāpakā akusalā dhammāti. Tasmā sāntevāsikoti vuccati. Te naṃ samudācaranti, samudācaranti naṃ pāpakā akusalā dhammāti. Tasmā sācariyakoti vuccati.

‘‘পুন চপরং, ভিক্খৰে, ভিক্খুনো সোতেন সদ্দং সুত্ৰা…পে॰… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায উপ্পজ্জন্তি পাপকা অকুসলা ধম্মা সরসঙ্কপ্পা সঞ্ঞোজনিযা, ত্যস্স অন্তো ৰসন্তি অন্ৰাস্সৰন্তি পাপকা অকুসলা ধম্মাতি। তস্মা সান্তেৰাসিকোতি ৰুচ্চতি। তে নং সমুদাচরন্তি, সমুদাচরন্তি নং পাপকা অকুসলা ধম্মাতি। তস্মা সাচরিযকোতি ৰুচ্চতি। এৰং খো, ভিক্খৰে, ভিক্খু সান্তেৰাসিকো সাচরিযকো দুক্খং ন ফাসু ৰিহরতী’’তি। এৰম্পি তত্রাসযাতি – পরিস্সযা।

‘‘Puna caparaṃ, bhikkhave, bhikkhuno sotena saddaṃ sutvā…pe… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya uppajjanti pāpakā akusalā dhammā sarasaṅkappā saññojaniyā, tyassa anto vasanti anvāssavanti pāpakā akusalā dhammāti. Tasmā sāntevāsikoti vuccati. Te naṃ samudācaranti, samudācaranti naṃ pāpakā akusalā dhammāti. Tasmā sācariyakoti vuccati. Evaṃ kho, bhikkhave, bhikkhu sāntevāsiko sācariyako dukkhaṃ na phāsu viharatī’’ti. Evampi tatrāsayāti – parissayā.

ৰুত্তঞ্হেতং ভগৰতা –

Vuttañhetaṃ bhagavatā –

‘‘তযোমে, ভিক্খৰে, অন্তরামলা অন্তরাঅমিত্তা অন্তরাসপত্তা অন্তরাৰধকা অন্তরাপচ্চত্থিকা। কতমে তযো? লোভো, ভিক্খৰে, অন্তরামলো অন্তরাঅমিত্তো অন্তরাসপত্তো অন্তরাৰধকো অন্তরাপচ্চত্থিকো, দোসো, ভিক্খৰে…পে॰… মোহো , ভিক্খৰে, অন্তরামলো অন্তরাঅমিত্তো অন্তরাসপত্তো অন্তরাৰধকো অন্তরাপচ্চত্থিকো। ইমে খো, ভিক্খৰে, তযো অন্তরামলা অন্তরাঅমিত্তা অন্তরাসপত্তা অন্তরাৰধকা অন্তরাপচ্চত্থিকা’’।

‘‘Tayome, bhikkhave, antarāmalā antarāamittā antarāsapattā antarāvadhakā antarāpaccatthikā. Katame tayo? Lobho, bhikkhave, antarāmalo antarāamitto antarāsapatto antarāvadhako antarāpaccatthiko, doso, bhikkhave…pe… moho , bhikkhave, antarāmalo antarāamitto antarāsapatto antarāvadhako antarāpaccatthiko. Ime kho, bhikkhave, tayo antarāmalā antarāamittā antarāsapattā antarāvadhakā antarāpaccatthikā’’.

‘‘অনত্থজননো লোভো, লোভো চিত্তপ্পকোপনো।

‘‘Anatthajanano lobho, lobho cittappakopano;

ভযমন্তরতো জাতং, তং জনো নাৰবুজ্ঝতি॥

Bhayamantarato jātaṃ, taṃ jano nāvabujjhati.

‘‘লুদ্ধো অত্থং ন জানাতি, লুদ্ধো ধম্মং ন পস্সতি।

‘‘Luddho atthaṃ na jānāti, luddho dhammaṃ na passati;

অন্ধন্তমং ⁶³ তদা হোতি, যং লোভো সহতে নরং॥

Andhantamaṃ ⁶⁴ tadā hoti, yaṃ lobho sahate naraṃ.

‘‘অনত্থজননো দোসো, দোসো চিত্তপ্পকোপনো।

‘‘Anatthajanano doso, doso cittappakopano;

ভযমন্তরতো জাতং, তং জনো নাৰবুজ্ঝতি॥

Bhayamantarato jātaṃ, taṃ jano nāvabujjhati.

‘‘কুদ্ধো অত্থং ন জানাতি, কুদ্ধো ধম্মং ন পস্সতি।

‘‘Kuddho atthaṃ na jānāti, kuddho dhammaṃ na passati;

অন্ধন্তমং তদা হোতি, যং দোসো সহতে নরং॥

Andhantamaṃ tadā hoti, yaṃ doso sahate naraṃ.

‘‘অনত্থজননো মোহো, মোহো চিত্তপ্পকোপনো।

‘‘Anatthajanano moho, moho cittappakopano;

ভযমন্তরতো জাতং, তং জনো নাৰবুজ্ঝতি॥

Bhayamantarato jātaṃ, taṃ jano nāvabujjhati.

‘‘মূল়্হো অত্থং ন জানাতি, মূল়্হো ধম্মং ন পস্সতি।

‘‘Mūḷho atthaṃ na jānāti, mūḷho dhammaṃ na passati;

অন্ধন্তমং তদা হোতি, যং মোহো সহতে নর’’ন্তি॥

Andhantamaṃ tadā hoti, yaṃ moho sahate nara’’nti.

এৰম্পি তত্রাসযাতি – পরিস্সযা। ৰুত্তঞ্হেতং ভগৰতা –

Evampi tatrāsayāti – parissayā. Vuttañhetaṃ bhagavatā –

‘‘তযো খো, মহারাজ, পুরিসস্স ধম্মা অজ্ঝত্তং উপ্পজ্জমানা উপ্পজ্জন্তি অহিতায দুক্খায অফাসুৰিহারায। কতমে তযো ? লোভো খো, মহারাজ, পুরিসস্স ধম্মো অজ্ঝত্তং উপ্পজ্জমানো উপ্পজ্জতি অহিতায দুক্খায অফাসুৰিহারায; দোসো খো , মহারাজ…পে॰… মোহো খো, মহারাজ, পুরিসস্স ধম্মো অজ্ঝত্তং উপ্পজ্জমানো উপ্পজ্জতি অহিতায দুক্খায অফাসুৰিহারায। ইমে খো, মহারাজ, তযো পুরিসস্স ধম্মা অজ্ঝত্তং উপ্পজ্জমানা উপ্পজ্জন্তি অহিতায দুক্খায অফাসুৰিহারাযা’’তি।

‘‘Tayo kho, mahārāja, purisassa dhammā ajjhattaṃ uppajjamānā uppajjanti ahitāya dukkhāya aphāsuvihārāya. Katame tayo ? Lobho kho, mahārāja, purisassa dhammo ajjhattaṃ uppajjamāno uppajjati ahitāya dukkhāya aphāsuvihārāya; doso kho , mahārāja…pe… moho kho, mahārāja, purisassa dhammo ajjhattaṃ uppajjamāno uppajjati ahitāya dukkhāya aphāsuvihārāya. Ime kho, mahārāja, tayo purisassa dhammā ajjhattaṃ uppajjamānā uppajjanti ahitāya dukkhāya aphāsuvihārāyā’’ti.

‘‘লোভো দোসো চ মোহো চ, পুরিসং পাপচেতসং।

‘‘Lobho doso ca moho ca, purisaṃ pāpacetasaṃ;

হিংসন্তি অত্তসম্ভূতা, তচসারংৰ সম্ফল’’ন্তি॥

Hiṃsanti attasambhūtā, tacasāraṃva samphala’’nti.

এৰম্পি তত্রাসযাতি – পরিস্সযা।

Evampi tatrāsayāti – parissayā.

ৰুত্তঞ্হেতং ভগৰতা –

Vuttañhetaṃ bhagavatā –

‘‘রাগো চ দোসো চ ইতোনিদানা, অরতী রতী লোমহংসো ইতোজা।

‘‘Rāgo ca doso ca itonidānā, aratī ratī lomahaṃso itojā;

ইতো সমুট্ঠায মনোৰিতক্কা, কুমারকা ধঙ্কমিৰোস্সজন্তী’’তি॥

Ito samuṭṭhāya manovitakkā, kumārakā dhaṅkamivossajantī’’ti.

এৰম্পি তত্রাসযাতি – পরিস্সযা। লোকেতি মনুস্সলোকেতি – কতি পরিস্সযা লোকে।

Evampi tatrāsayāti – parissayā. Loketi manussaloketi – kati parissayā loke.

গচ্ছতো অগতং দিসন্তি। অগতা দিসা ৰুচ্চতি অমতং নিব্বানং। যো সো সব্বসঙ্খারসমথো সব্বূপধিপটিনিস্সগ্গো তণ্হক্খযো ৰিরাগো নিরোধো নিব্বানং। অগতপুব্বা সা দিসা ন সা দিসা গতপুব্বা ইমিনা দীঘেন অদ্ধুনা।

Gacchato agataṃ disanti. Agatā disā vuccati amataṃ nibbānaṃ. Yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ. Agatapubbā sā disā na sā disā gatapubbā iminā dīghena addhunā.

‘‘সমতিত্তিকং অনৰসেসং, তেলপত্তং যথা পরিহরেয্য।

‘‘Samatittikaṃ anavasesaṃ, telapattaṃ yathā parihareyya;

এৰং সচিত্তমনুরক্খে, পত্থযানো ⁶⁵ দিসং অগতপুব্বং’’॥

Evaṃ sacittamanurakkhe, patthayāno ⁶⁶ disaṃ agatapubbaṃ’’.

অগতপুব্বং দিসং ৰজতো গচ্ছতো অভিক্কমতোতি – গচ্ছতো অগতং দিসং।

Agatapubbaṃ disaṃ vajato gacchato abhikkamatoti – gacchato agataṃ disaṃ.

যে ভিক্খু অভিসম্ভৰেতি। যেতি যে পরিস্সযে অভিসম্ভৰেয্য অভিভৰেয্য অজ্ঝোত্থরেয্য পরিযাদিযেয্য মদ্দেয্যাতি – যে ভিক্খু অভিসম্ভৰে।

Ye bhikkhu abhisambhaveti. Yeti ye parissaye abhisambhaveyya abhibhaveyya ajjhotthareyya pariyādiyeyya maddeyyāti – ye bhikkhu abhisambhave.

পন্তম্হি সযনাসনেতি। অন্তে পন্তে পরিযন্তে সেলন্তে ৰা ৰনন্তে ৰা নদন্তে ৰা উদকন্তে ৰা যত্থ ন কসীযতি ন ৰপীযতি, জনন্তং অতিক্কমিত্ৰা মনুস্সানং অনুপচারে সেনাসনেতি – পন্তম্হি সযনাসনে।

Pantamhisayanāsaneti. Ante pante pariyante selante vā vanante vā nadante vā udakante vā yattha na kasīyati na vapīyati, janantaṃ atikkamitvā manussānaṃ anupacāre senāsaneti – pantamhi sayanāsane.

তেনাহ থেরো সারিপুত্তো –

Tenāha thero sāriputto –

‘‘কতি পরিস্সযা লোকে, গচ্ছতো অগতং দিসং।

‘‘Kati parissayā loke, gacchato agataṃ disaṃ;

যে ভিক্খু অভিসম্ভৰে, পন্তম্হি সযনাসনে’’তি॥

Ye bhikkhu abhisambhave, pantamhi sayanāsane’’ti.

১৯৬.

196.

ক্যাস্স ব্যপ্পথযো অস্সু, ক্যাস্সস্সু ইধ গোচরা।

Kyāssa byappathayo assu, kyāssassu idha gocarā;

কানি সীলব্বতানাস্সু, পহিতত্তস্স ভিক্খুনো॥

Kāni sīlabbatānāssu, pahitattassa bhikkhuno.

ক্যাস্স ব্যপ্পথযো অস্সূতি। কীদিসেন ব্যপ্পথেন সমন্নাগতো অস্স কিংসণ্ঠিতেন কিংপকারেন কিংপটিভাগেনাতি ৰচীপারিসুদ্ধিং পুচ্ছতি। কতমা ৰচীপারিসুদ্ধি? ইধ ভিক্খু মুসাৰাদং পহায মুসাৰাদা পটিৰিরতো হোতি সচ্চৰাদী সচ্চসন্ধো থেতো পচ্চযিকো অৰিসংৰাদকো লোকস্স। পিসুণং ৰাচং পহায পিসুণায ৰাচায পটিৰিরতো হোতি, ইতো সুত্ৰা ন অমুত্র অক্খাতা ইমেসং ভেদায, অমুত্র ৰা সুত্ৰা ন ইমেসং অক্খাতা অমূসং ভেদায, ইতি ভিন্নানং ৰা সন্ধাতা, সহিতানং ৰা অনুপ্পদাতা সমগ্গারামো সমগ্গরতো সমগ্গনন্দী সমগ্গকরণিং ৰাচং ভাসিতা হোতি। ফরুসং ৰাচং পহায ফরুসায ৰাচায পটিৰিরতো হোতি; যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপিং ৰাচং ভাসিতা হোতি। সম্ফপ্পলাপং পহায সম্ফপ্পলাপা পটিৰিরতো হোতি কালৰাদী ভূতৰাদী অত্থৰাদী ধম্মৰাদী ৰিনযৰাদী, নিধানৰতিং ৰাচং ভাসিতা হোতি কালেন সাপদেসং পরিযন্তৰতিং অত্থসংহিতং। চতূহি ৰচীসুচরিতেহি সমন্নাগতো চতুদোসাপগতং ৰাচং ভাসতি, বাত্তিংসায তিরচ্ছানকথায আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতি। দস কথাৰত্থূনি কথেতি, সেয্যথিদং – অপ্পিচ্ছকথং সন্তুট্ঠিকথং পৰিৰেককথং অসংসগ্গকথং ৰীরিযারম্ভকথং সীলকথং সমাধিকথং পঞ্ঞাকথং ৰিমুত্তিকথং ৰিমুত্তিঞাণদস্সনকথং সতিপট্ঠানকথং সম্মপ্পধানকথং ইদ্ধিপাদকথং ইন্দ্রিযকথং বলকথং বোজ্ঝঙ্গকথং মগ্গকথং ফলকথং নিব্বানকথং কথেতি । ৰাচায যতো যত্তো পটিযত্তো গুত্তো গোপিতো রক্খিতো সংৰুতো – অযং ৰচীপারিসুদ্ধি। এদিসায ৰচীপারিসুদ্ধিযা সমন্নাগতো অস্সাতি – ক্যাস্স ব্যপ্পথযো অস্সু।

Kyāssa byappathayo assūti. Kīdisena byappathena samannāgato assa kiṃsaṇṭhitena kiṃpakārena kiṃpaṭibhāgenāti vacīpārisuddhiṃ pucchati. Katamā vacīpārisuddhi? Idha bhikkhu musāvādaṃ pahāya musāvādā paṭivirato hoti saccavādī saccasandho theto paccayiko avisaṃvādako lokassa. Pisuṇaṃ vācaṃ pahāya pisuṇāya vācāya paṭivirato hoti, ito sutvā na amutra akkhātā imesaṃ bhedāya, amutra vā sutvā na imesaṃ akkhātā amūsaṃ bhedāya, iti bhinnānaṃ vā sandhātā, sahitānaṃ vā anuppadātā samaggārāmo samaggarato samagganandī samaggakaraṇiṃ vācaṃ bhāsitā hoti. Pharusaṃ vācaṃ pahāya pharusāya vācāya paṭivirato hoti; yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṃ vācaṃ bhāsitā hoti. Samphappalāpaṃ pahāya samphappalāpā paṭivirato hoti kālavādī bhūtavādī atthavādī dhammavādī vinayavādī, nidhānavatiṃ vācaṃ bhāsitā hoti kālena sāpadesaṃ pariyantavatiṃ atthasaṃhitaṃ. Catūhi vacīsucaritehi samannāgato catudosāpagataṃ vācaṃ bhāsati, bāttiṃsāya tiracchānakathāya ārato assa virato paṭivirato nikkhanto nissaṭo vippamutto visaññutto vimariyādikatena cetasā viharati. Dasa kathāvatthūni katheti, seyyathidaṃ – appicchakathaṃ santuṭṭhikathaṃ pavivekakathaṃ asaṃsaggakathaṃ vīriyārambhakathaṃ sīlakathaṃ samādhikathaṃ paññākathaṃ vimuttikathaṃ vimuttiñāṇadassanakathaṃ satipaṭṭhānakathaṃ sammappadhānakathaṃ iddhipādakathaṃ indriyakathaṃ balakathaṃ bojjhaṅgakathaṃ maggakathaṃ phalakathaṃ nibbānakathaṃ katheti . Vācāya yato yatto paṭiyatto gutto gopito rakkhito saṃvuto – ayaṃ vacīpārisuddhi. Edisāya vacīpārisuddhiyā samannāgato assāti – kyāssa byappathayo assu.

ক্যাস্সস্সু ইধ গোচরাতি। কীদিসেন গোচরেন সমন্নাগতো অস্স কিংসণ্ঠিতেন কিংপকারেন কিংপটিভাগেনাতি গোচরং পুচ্ছতি। অত্থি গোচরো, অত্থি অগোচরো।

Kyāssassu idha gocarāti. Kīdisena gocarena samannāgato assa kiṃsaṇṭhitena kiṃpakārena kiṃpaṭibhāgenāti gocaraṃ pucchati. Atthi gocaro, atthi agocaro.

কতমো অগোচরো? ইধেকচ্চো ৰেসিযাগোচরো ৰা হোতি, ৰিধৰাগোচরো ৰা হোতি, থুল্লকুমারীগোচরো ⁶⁷ ৰা হোতি, পণ্ডকগোচরো ৰা হোতি, ভিক্খুনীগোচরো ৰা হোতি, পানাগারগোচরো ৰা হোতি, সংসট্ঠো ৰিহরতি রাজূহি রাজমহামত্তেহি তিত্থিযেহি তিত্থিযসাৰকেহি অননুলোমিকেন সংসগ্গেন। যানি ৰা পন তানি কুলানি অস্সদ্ধানি অপ্পসন্নানি অনোপানভূতানি অক্কোসকপরিভাসকানি অনত্থকামানি অহিতকামানি অফাসুকামানি অযোগক্খেমকামানি ভিক্খূনং ভিক্খুনীনং উপাসকানং উপাসিকানং, তথারূপানি কুলানি সেৰতি ভজতি পযিরুপাসতি – অযং ৰুচ্চতি অগোচরো।

Katamo agocaro? Idhekacco vesiyāgocaro vā hoti, vidhavāgocaro vā hoti, thullakumārīgocaro ⁶⁸ vā hoti, paṇḍakagocaro vā hoti, bhikkhunīgocaro vā hoti, pānāgāragocaro vā hoti, saṃsaṭṭho viharati rājūhi rājamahāmattehi titthiyehi titthiyasāvakehi ananulomikena saṃsaggena. Yāni vā pana tāni kulāni assaddhāni appasannāni anopānabhūtāni akkosakaparibhāsakāni anatthakāmāni ahitakāmāni aphāsukāmāni ayogakkhemakāmāni bhikkhūnaṃ bhikkhunīnaṃ upāsakānaṃ upāsikānaṃ, tathārūpāni kulāni sevati bhajati payirupāsati – ayaṃ vuccati agocaro.

অথ ৰা অন্তরঘরং পৰিট্ঠো ৰীথিং পটিপন্নো অসংৰুতো গচ্ছতি, হত্থিং ওলোকেন্তো, অস্সং ওলোকেন্তো, রথং ওলোকেন্তো, পত্তিং ওলোকেন্তো, ইত্থিযো ওলোকেন্তো, পুরিসে ওলোকেন্তো, কুমারিকাযো ওলোকেন্তো, কুমারকে ওলোকেন্তো, অন্তরাপণং ওলোকেন্তো, ঘরমুখানি ওলোকেন্তো, উদ্ধং ওলোকেন্তো ⁶⁹, অধো ওলোকেন্তো, দিসাৰিদিসং ৰিপেক্খমানো গচ্ছতি – অযম্পি ৰুচ্চতি অগোচরো।

Atha vā antaragharaṃ paviṭṭho vīthiṃ paṭipanno asaṃvuto gacchati, hatthiṃ olokento, assaṃ olokento, rathaṃ olokento, pattiṃ olokento, itthiyo olokento, purise olokento, kumārikāyo olokento, kumārake olokento, antarāpaṇaṃ olokento, gharamukhāni olokento, uddhaṃ olokento ⁷⁰, adho olokento, disāvidisaṃ vipekkhamāno gacchati – ayampi vuccati agocaro.

অথ ৰা চক্খুনা রূপং দিস্ৰা নিমিত্তগ্গাহী হোতি অনুব্যঞ্জনগ্গাহী। যত্ৰাধিকরণমেনং…পে॰… মনিন্দ্রিযং অসংৰুতং ৰিহরন্তং অভিজ্ঝা দোমনস্সা পাপকা অকুসলা ধম্মা অন্ৰাস্সৰেয্যুং, তস্স ন সংৰরায পটিপজ্জতি, ন রক্খতি মনিন্দ্রিযং মনিন্দ্রিযে ন সংৰরং আপজ্জতি – অযম্পি ৰুচ্চতি অগোচরো।

Atha vā cakkhunā rūpaṃ disvā nimittaggāhī hoti anubyañjanaggāhī. Yatvādhikaraṇamenaṃ…pe… manindriyaṃ asaṃvutaṃ viharantaṃ abhijjhā domanassā pāpakā akusalā dhammā anvāssaveyyuṃ, tassa na saṃvarāya paṭipajjati, na rakkhati manindriyaṃ manindriye na saṃvaraṃ āpajjati – ayampi vuccati agocaro.

যথা ৰা পনেকে ভোন্তো সমণব্রাহ্মণা সদ্ধাদেয্যানি ভোজনানি ভুঞ্জিত্ৰা তে এৰরূপং ৰিসূকদস্সনং অনুযুত্তা ৰিহরন্তি, সেয্যথিদং – নচ্চং গীতং ৰাদিতং পেক্খং অক্খানং পাণিস্সরং ৰেতাল়ং কুম্ভথূণং সোভনকং চণ্ডালং ৰংসং ধোৰনং হত্থিযুদ্ধং অস্সযুদ্ধং মহিংসযুদ্ধং উসভযুদ্ধং অজযুদ্ধং মেণ্ডযুদ্ধং কুক্কুটযুদ্ধং ৰট্টকযুদ্ধং দণ্ডযুদ্ধং মুট্ঠিযুদ্ধং নিব্বুদ্ধং উয্যোধিকং বলগ্গং সেনাব্যূহং অনীকদস্সনং ইতি ৰা ইতি, এৰরূপং ৰিসূকদস্সনং অনুযুত্তো হোতি – অযম্পি ৰুচ্চতি অগোচরো।

Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ visūkadassanaṃ anuyuttā viharanti, seyyathidaṃ – naccaṃ gītaṃ vāditaṃ pekkhaṃ akkhānaṃ pāṇissaraṃ vetāḷaṃ kumbhathūṇaṃ sobhanakaṃ caṇḍālaṃ vaṃsaṃ dhovanaṃ hatthiyuddhaṃ assayuddhaṃ mahiṃsayuddhaṃ usabhayuddhaṃ ajayuddhaṃ meṇḍayuddhaṃ kukkuṭayuddhaṃ vaṭṭakayuddhaṃ daṇḍayuddhaṃ muṭṭhiyuddhaṃ nibbuddhaṃ uyyodhikaṃ balaggaṃ senābyūhaṃ anīkadassanaṃ iti vā iti, evarūpaṃ visūkadassanaṃ anuyutto hoti – ayampi vuccati agocaro.

পঞ্চপি কামগুণা অগোচরা। ৰুত্তঞ্হেতং ভগৰতা – ‘‘মা, ভিক্খৰে, অগোচরে চরথ পরৰিসযে। অগোচরে, ভিক্খৰে, চরতং পরৰিসযে লচ্ছতি মারো ওতারং, লচ্ছতি মারো আরম্মণং। কো চ, ভিক্খৰে, ভিক্খুনো অগোচরো পরৰিসযো? যদিদং পঞ্চ কামগুণা। কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা। অযং ৰুচ্চতি, ভিক্খৰে, ভিক্খুনো অগোচরো পরৰিসযো’’ – অযম্পি ৰুচ্চতি অগোচরো।

Pañcapi kāmaguṇā agocarā. Vuttañhetaṃ bhagavatā – ‘‘mā, bhikkhave, agocare caratha paravisaye. Agocare, bhikkhave, carataṃ paravisaye lacchati māro otāraṃ, lacchati māro ārammaṇaṃ. Ko ca, bhikkhave, bhikkhuno agocaro paravisayo? Yadidaṃ pañca kāmaguṇā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Ayaṃ vuccati, bhikkhave, bhikkhuno agocaro paravisayo’’ – ayampi vuccati agocaro.

কতমো গোচরো? ইধ ভিক্খু ন ৰেসিযাগোচরো হোতি, ন ৰিধৰাগোচরো হোতি, ন থুল্লকুমারীগোচরো হোতি, ন পণ্ডকগোচরো হোতি, ন ভিক্খুনীগোচরো হোতি, ন পানাগারগোচরো হোতি, অসংসট্ঠো ৰিহরতি রাজূহি রাজমহামত্তেহি তিত্থিযেহি তিত্থিযসাৰকেহি অননুলোমিকেন সংসগ্গেন। যানি ৰা পন তানি কুলানি সদ্ধানি পসন্নানি ওপানভূতানি কাসাৰপজ্জোতানি ইসিৰাতপটিৰাতানি অত্থকামানি হিতকামানি ফাসুকামানি যোগক্খেমকামানি ভিক্খূনং ভিক্খুনীনং উপাসকানং উপাসিকানং, তথারূপানি কুলানি সেৰতি ভজতি পযিরুপাসতি – অযম্পি ৰুচ্চতি গোচরো।

Katamo gocaro? Idha bhikkhu na vesiyāgocaro hoti, na vidhavāgocaro hoti, na thullakumārīgocaro hoti, na paṇḍakagocaro hoti, na bhikkhunīgocaro hoti, na pānāgāragocaro hoti, asaṃsaṭṭho viharati rājūhi rājamahāmattehi titthiyehi titthiyasāvakehi ananulomikena saṃsaggena. Yāni vā pana tāni kulāni saddhāni pasannāni opānabhūtāni kāsāvapajjotāni isivātapaṭivātāni atthakāmāni hitakāmāni phāsukāmāni yogakkhemakāmāni bhikkhūnaṃ bhikkhunīnaṃ upāsakānaṃ upāsikānaṃ, tathārūpāni kulāni sevati bhajati payirupāsati – ayampi vuccati gocaro.

অথ ৰা ভিক্খু অন্তরঘরং পৰিট্ঠো ৰীথিং পটিপন্নো সংৰুতো গচ্ছতি, ন হত্থিং ওলোকেন্তো, ন অস্সং ওলোকেন্তো, ন রথং ওলোকেন্তো, ন পত্তিং ওলোকেন্তো…পে॰… ন দিসাৰিদিসং ৰিপেক্খমানো গচ্ছতি – অযম্পি ৰুচ্চতি গোচরো।

Atha vā bhikkhu antaragharaṃ paviṭṭho vīthiṃ paṭipanno saṃvuto gacchati, na hatthiṃ olokento, na assaṃ olokento, na rathaṃ olokento, na pattiṃ olokento…pe… na disāvidisaṃ vipekkhamāno gacchati – ayampi vuccati gocaro.

অথ ৰা ভিক্খু চক্খুনা রূপং দিস্ৰা ন নিমিত্তগ্গাহী হোতি…পে॰… মনিন্দ্রিযে সংৰরং আপজ্জতি – অযম্পি ৰুচ্চতি গোচরো।

Atha vā bhikkhu cakkhunā rūpaṃ disvā na nimittaggāhī hoti…pe… manindriye saṃvaraṃ āpajjati – ayampi vuccati gocaro.

যথা ৰা পনেকে ভোন্তো সমণব্রাহ্মণা সদ্ধাদেয্যানি ভোজনানি ভুঞ্জিত্ৰা তে এৰরূপং ৰিসূকদস্সনং অননুযুত্তা ৰিহরন্তি, সেয্যথিদং – নচ্চং গীতং ৰাদিতং…পে॰… অনীকদস্সনং ইতি ৰা ইতি, এৰরূপা ৰিসূকদস্সনা পটিৰিরতো হোতি – অযম্পি ৰুচ্চতি গোচরো।

Yathā vā paneke bhonto samaṇabrāhmaṇā saddhādeyyāni bhojanāni bhuñjitvā te evarūpaṃ visūkadassanaṃ ananuyuttā viharanti, seyyathidaṃ – naccaṃ gītaṃ vāditaṃ…pe… anīkadassanaṃ iti vā iti, evarūpā visūkadassanā paṭivirato hoti – ayampi vuccati gocaro.

চত্তারোপি সতিপট্ঠানা গোচরো। ৰুত্তঞ্হেতং ভগৰতা – ‘‘গোচরে, ভিক্খৰে, চরথ সকে পেত্তিকে ৰিসযে। গোচরে, ভিক্খৰে, চরতং সকে পেত্তিকে ৰিসযে ন লচ্ছতি মারো ওতারং, ন লচ্ছতি মারো আরম্মণং। কো চ, ভিক্খৰে, ভিক্খুনো গোচরো সকো পেত্তিকো ৰিসযো? যদিদং চত্তারো সতিপট্ঠানা। কতমে চত্তারো? ইধ, ভিক্খৰে, ভিক্খু কাযে কাযানুপস্সী ৰিহরতি, ৰেদনাসু…পে॰ … চিত্তে…পে॰… ধম্মেসু ধম্মানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং। অযং ৰুচ্চতি, ভিক্খৰে, ভিক্খুনো গোচরো সকো পেত্তিকো ৰিসযো – অযম্পি ৰুচ্চতি গোচরো। এদিসেন গোচরেন সমন্নাগতো অস্সা’’তি – ক্যাস্সস্সু ইধ গোচরা।

Cattāropi satipaṭṭhānā gocaro. Vuttañhetaṃ bhagavatā – ‘‘gocare, bhikkhave, caratha sake pettike visaye. Gocare, bhikkhave, carataṃ sake pettike visaye na lacchati māro otāraṃ, na lacchati māro ārammaṇaṃ. Ko ca, bhikkhave, bhikkhuno gocaro sako pettiko visayo? Yadidaṃ cattāro satipaṭṭhānā. Katame cattāro? Idha, bhikkhave, bhikkhu kāye kāyānupassī viharati, vedanāsu…pe. … citte…pe… dhammesu dhammānupassī viharati ātāpī sampajāno satimā vineyya loke abhijjhādomanassaṃ. Ayaṃ vuccati, bhikkhave, bhikkhuno gocaro sako pettiko visayo – ayampi vuccati gocaro. Edisena gocarena samannāgato assā’’ti – kyāssassu idha gocarā.

কানি সীলব্বতানাস্সূতি। কীদিসেন সীলব্বতেন সমন্নাগতো অস্স কিংসণ্ঠিতেন কিংপকারেন কিংপটিভাগেনাতি সীলব্বতপারিসুদ্ধিং পুচ্ছতি। কতমা সীলব্বতপারিসুদ্ধি? অত্থি সীলঞ্চেৰ ৰতঞ্চ, অত্থি ৰতং ন সীলং। কতমং সীলঞ্চেৰ ৰতঞ্চ? ইধ ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো, অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু। যো তত্থ সঞ্ঞমো সংৰরো অৰীতিক্কমো – ইদং সীলং। যং সমাদানং – তং ৰতং । সংৰরট্ঠেন সীলং, সমাদানট্ঠেন ৰতং – ইদং ৰুচ্চতি সীলঞ্চেৰ ৰতঞ্চ।

Kānisīlabbatānāssūti. Kīdisena sīlabbatena samannāgato assa kiṃsaṇṭhitena kiṃpakārena kiṃpaṭibhāgenāti sīlabbatapārisuddhiṃ pucchati. Katamā sīlabbatapārisuddhi? Atthi sīlañceva vatañca, atthi vataṃ na sīlaṃ. Katamaṃ sīlañceva vatañca? Idha bhikkhu sīlavā hoti, pātimokkhasaṃvarasaṃvuto viharati ācāragocarasampanno, aṇumattesu vajjesu bhayadassāvī, samādāya sikkhati sikkhāpadesu. Yo tattha saññamo saṃvaro avītikkamo – idaṃ sīlaṃ. Yaṃ samādānaṃ – taṃ vataṃ . Saṃvaraṭṭhena sīlaṃ, samādānaṭṭhena vataṃ – idaṃ vuccati sīlañceva vatañca.

কতমং ৰতং ন সীলং? অট্ঠ ধুতঙ্গানি – আরঞ্ঞিকঙ্গং, পিণ্ডপাতিকঙ্গং, পংসুকূলিকঙ্গং, তেচীৰরিকঙ্গং, সপদানচারিকঙ্গং, খলুপচ্ছাভত্তিকঙ্গং, নেসজ্জিকঙ্গং, যথাসন্থতিকঙ্গং – ইদং ৰুচ্চতি ৰতং ন সীলং। ৰীরিযসমাদানম্পি ৰুচ্চতি ৰতং ন সীলং। কামং তচো চ ন্হারু চ অট্ঠি চ অৰসিস্সতু, সরীরে উপসুস্সতু মংসলোহিতং, যং তং পুরিসথামেন পুরিসবলেন পুরিসৰীরিযেন পুরিসপরক্কমেন পত্তব্বং ন তং অপাপুণিত্ৰা ৰীরিযস্স সণ্ঠানং ভৰিস্সতীতি – চিত্তং পগ্গণ্হাতি পদহতি। এৰরূপম্পি ৰীরিযসমাদানং ৰুচ্চতি ৰতং ন সীলং।

Katamaṃ vataṃ na sīlaṃ? Aṭṭha dhutaṅgāni – āraññikaṅgaṃ, piṇḍapātikaṅgaṃ, paṃsukūlikaṅgaṃ, tecīvarikaṅgaṃ, sapadānacārikaṅgaṃ, khalupacchābhattikaṅgaṃ, nesajjikaṅgaṃ, yathāsanthatikaṅgaṃ – idaṃ vuccati vataṃ na sīlaṃ. Vīriyasamādānampi vuccati vataṃ na sīlaṃ. Kāmaṃ taco ca nhāru ca aṭṭhi ca avasissatu, sarīre upasussatu maṃsalohitaṃ, yaṃ taṃ purisathāmena purisabalena purisavīriyena purisaparakkamena pattabbaṃ na taṃ apāpuṇitvā vīriyassa saṇṭhānaṃ bhavissatīti – cittaṃ paggaṇhāti padahati. Evarūpampi vīriyasamādānaṃ vuccati vataṃ na sīlaṃ.

‘‘নাসিস্সং ন পিৰিস্সামি, ৰিহারতো ন নিক্খমে ⁷¹।

‘‘Nāsissaṃ na pivissāmi, vihārato na nikkhame ⁷²;

নপি পস্সং নিপাতেস্সং, তণ্হাসল্লে অনূহতে’’তি॥

Napi passaṃ nipātessaṃ, taṇhāsalle anūhate’’ti.

চিত্তং পগ্গণ্হাতি পদহতি। এৰরূপম্পি ৰীরিযসমাদানং ৰুচ্চতি ৰতং ন সীলং। ন তাৰাহং ইমং পল্লঙ্কং ভিন্দিস্সামি যাৰ মে ন অনুপাদায আসৰেহি চিত্তং ৰিমুচ্চিস্সতীতি – চিত্তং পগ্গণ্হাতি পদহতি। এৰরূপম্পি ৰীরিযসমাদানং ৰুচ্চতি ৰতং, ন সীলং। ন তাৰাহং ইমম্হা আসনা ৰুট্ঠহিস্সামি… ন তাৰাহং ইমম্হা চঙ্কমা ওরোহিস্সামি… ৰিহারা নিক্খমিস্সামি… অড্ঢযোগা নিক্খমিস্সামি… পাসাদা নিক্খমিস্সামি… হম্মিযা… গুহায… লেণা… কুটিযা… কূটাগারা… অট্টা… মাল়া… উদ্দণ্ডা… উপট্ঠানসালায… মণ্ডপা… রুক্খমূলা নিক্খমিস্সামি যাৰ মে ন অনুপাদায আসৰেহি চিত্তং ৰিমুচ্চিস্সতীতি – চিত্তং পগ্গণ্হাতি পদহতি। এৰরূপম্পি ৰীরিযসমাদানং ৰুচ্চতি ৰতং, ন সীলং। ইমস্মিঞ্ঞেৰ পুব্বণ্হসমযং অরিযধম্মং আহরিস্সামি সমাহরিস্সামি অধিগচ্ছিস্সামি ফস্সযিস্সামি সচ্ছিকরিস্সামীতি – চিত্তং পগ্গণ্হাতি পদহতি। এৰরূপম্পি ৰীরিযসমাদানং ৰুচ্চতি ৰতং, ন সীলং। ইমস্মিঞ্ঞেৰ মজ্ঝন্হিকসমযং… সাযন্হসমযং … পুরেভত্তং… পচ্ছাভত্তং… পুরিমযামং… মজ্ঝিমযামং… পচ্ছিমযামং… কাল়ে… জুণ্হে… ৰস্সে… হেমন্তে… গিম্হে… পুরিমে ৰযোখন্ধে… মজ্ঝিমে ৰযোখন্ধে… পচ্ছিমে ৰযোখন্ধে অরিযধম্মং আহরিস্সামি সমাহরিস্সামি অধিগচ্ছিস্সামি ফস্সযিস্সামি সচ্ছিকরিস্সামীতি – চিত্তং পগ্গণ্হাতি পদহতি। এৰরূপম্পি ৰীরিযসমাদানং ৰুচ্চতি ৰতং, ন সীলং – অযং সীলব্বতপারিসুদ্ধি। এদিসায ⁷³ সীলব্বতপারিসুদ্ধিযা সমন্নাগতো অস্সাতি – কানি সীলব্বতানাস্সু।

Cittaṃ paggaṇhāti padahati. Evarūpampi vīriyasamādānaṃ vuccati vataṃ na sīlaṃ. Na tāvāhaṃ imaṃ pallaṅkaṃ bhindissāmi yāva me na anupādāya āsavehi cittaṃ vimuccissatīti – cittaṃ paggaṇhāti padahati. Evarūpampi vīriyasamādānaṃ vuccati vataṃ, na sīlaṃ. Na tāvāhaṃ imamhā āsanā vuṭṭhahissāmi… na tāvāhaṃ imamhā caṅkamā orohissāmi… vihārā nikkhamissāmi… aḍḍhayogā nikkhamissāmi… pāsādā nikkhamissāmi… hammiyā… guhāya… leṇā… kuṭiyā… kūṭāgārā… aṭṭā… māḷā… uddaṇḍā… upaṭṭhānasālāya… maṇḍapā… rukkhamūlā nikkhamissāmi yāva me na anupādāya āsavehi cittaṃ vimuccissatīti – cittaṃ paggaṇhāti padahati. Evarūpampi vīriyasamādānaṃ vuccati vataṃ, na sīlaṃ. Imasmiññeva pubbaṇhasamayaṃ ariyadhammaṃ āharissāmi samāharissāmi adhigacchissāmi phassayissāmi sacchikarissāmīti – cittaṃ paggaṇhāti padahati. Evarūpampi vīriyasamādānaṃ vuccati vataṃ, na sīlaṃ. Imasmiññeva majjhanhikasamayaṃ… sāyanhasamayaṃ … purebhattaṃ… pacchābhattaṃ… purimayāmaṃ… majjhimayāmaṃ… pacchimayāmaṃ… kāḷe… juṇhe… vasse… hemante… gimhe… purime vayokhandhe… majjhime vayokhandhe… pacchime vayokhandhe ariyadhammaṃ āharissāmi samāharissāmi adhigacchissāmi phassayissāmi sacchikarissāmīti – cittaṃ paggaṇhāti padahati. Evarūpampi vīriyasamādānaṃ vuccati vataṃ, na sīlaṃ – ayaṃ sīlabbatapārisuddhi. Edisāya ⁷⁴ sīlabbatapārisuddhiyā samannāgato assāti – kāni sīlabbatānāssu.

পহিতত্তস্স ভিক্খুনোতি। পহিতত্তস্সাতি আরদ্ধৰীরিযস্স থামগতস্স দল়্হপরক্কমস্স অনিক্খিত্তচ্ছন্দস্স অনিক্খিত্তধুরস্স কুসলেসু ধম্মেসু। অথ ৰা পেসিতত্তস্স যস্সত্থায পেসিতো অত্তত্থে চ ঞাযে চ লক্খণে চ কারণে চ ঠানাঠানে চ। ‘‘সব্বে সঙ্খারা অনিচ্চা’’তি পেসিতত্তস্স, ‘‘সব্বে সঙ্খারা দুক্খা’’তি পেসিতত্তস্স, ‘‘সব্বে ধম্মা অনত্তা’’তি পেসিতত্তস্স, ‘‘অৰিজ্জাপচ্চযা সঙ্খারা’’তি পেসিতত্তস্স …পে॰… ‘‘জাতিপচ্চযা জরামরণ’’ন্তি পেসিতত্তস্স, ‘‘অৰিজ্জানিরোধা সঙ্খারনিরোধো’’তি পেসিতত্তস্স…পে॰… ‘‘জাতিনিরোধা জরামরণনিরোধো’’তি পেসিতত্তস্স, ‘‘ইদং দুক্খ’’ন্তি পেসিতত্তস্স…পে॰… ‘‘অযং দুক্খনিরোধগামিনী পটিপদা’’তি পেসিতত্তস্স, ‘‘ইমে আসৰা’’তি পেসিতত্তস্স…পে॰… ‘‘অযং আসৰনিরোধগামিনী পটিপদা’’তি পেসিতত্তস্স, ‘‘ইমে ধম্মা অভিঞ্ঞেয্যা’’তি পেসিতত্তস্স…পে॰… ‘‘ইমে ধম্মা সচ্ছিকাতব্বা’’তি পেসিতত্তস্স, ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ পেসিতত্তস্স, পঞ্চন্নং উপাদানক্খন্ধানং… চতুন্নং মহাভূতানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ পেসিতত্তস্স, ‘‘যং কিঞ্চি সমুদযধম্মং, সব্বং তং নিরোধধম্ম’’ন্ত্ন্ত্তি পেসিতত্তস্স। ভিক্খুনোতি পুথুজ্জনকল্যাণকস্স ৰা ভিক্খুনো সেক্খস্স ৰা ভিক্খুনোতি – পহিতত্তস্স ভিক্খুনো।

Pahitattassa bhikkhunoti. Pahitattassāti āraddhavīriyassa thāmagatassa daḷhaparakkamassa anikkhittacchandassa anikkhittadhurassa kusalesu dhammesu. Atha vā pesitattassa yassatthāya pesito attatthe ca ñāye ca lakkhaṇe ca kāraṇe ca ṭhānāṭhāne ca. ‘‘Sabbe saṅkhārā aniccā’’ti pesitattassa, ‘‘sabbe saṅkhārā dukkhā’’ti pesitattassa, ‘‘sabbe dhammā anattā’’ti pesitattassa, ‘‘avijjāpaccayā saṅkhārā’’ti pesitattassa …pe… ‘‘jātipaccayā jarāmaraṇa’’nti pesitattassa, ‘‘avijjānirodhā saṅkhāranirodho’’ti pesitattassa…pe… ‘‘jātinirodhā jarāmaraṇanirodho’’ti pesitattassa, ‘‘idaṃ dukkha’’nti pesitattassa…pe… ‘‘ayaṃ dukkhanirodhagāminī paṭipadā’’ti pesitattassa, ‘‘ime āsavā’’ti pesitattassa…pe… ‘‘ayaṃ āsavanirodhagāminī paṭipadā’’ti pesitattassa, ‘‘ime dhammā abhiññeyyā’’ti pesitattassa…pe… ‘‘ime dhammā sacchikātabbā’’ti pesitattassa, channaṃ phassāyatanānaṃ samudayañca atthaṅgamañca assādañca ādīnavañca nissaraṇañca pesitattassa, pañcannaṃ upādānakkhandhānaṃ… catunnaṃ mahābhūtānaṃ samudayañca atthaṅgamañca assādañca ādīnavañca nissaraṇañca pesitattassa, ‘‘yaṃ kiñci samudayadhammaṃ, sabbaṃ taṃ nirodhadhamma’’ntntti pesitattassa. Bhikkhunoti puthujjanakalyāṇakassa vā bhikkhuno sekkhassa vā bhikkhunoti – pahitattassa bhikkhuno.

তেনাহ থেরো সারিপুত্তো –

Tenāha thero sāriputto –

‘‘ক্যাস্স ব্যপ্পথযো অস্সু, ক্যাস্সস্সু ইধ গোচরা।

‘‘Kyāssa byappathayo assu, kyāssassu idha gocarā;

কানি সীলব্বতানাস্সু, পহিতত্তস্স ভিক্খুনো’’তি॥

Kāni sīlabbatānāssu, pahitattassa bhikkhuno’’ti.

১৯৭.

197.

কং সো সিক্খং সমাদায, একোদি নিপকো সতো।

Kaṃ so sikkhaṃ samādāya, ekodi nipako sato;

কম্মারো রজতস্সেৰ, নিদ্ধমে মলমত্তনো॥

Kammāro rajatasseva, niddhame malamattano.

কং সো সিক্খং সমাদাযাতি কং সো সিক্খং আদায সমাদায আদিযিত্ৰা সমাদিযিত্ৰা গণ্হিত্ৰা পরামসিত্ৰা অভিনিৰিসিত্ৰাতি – কং সো সিক্খং সমাদায।

Kaṃso sikkhaṃ samādāyāti kaṃ so sikkhaṃ ādāya samādāya ādiyitvā samādiyitvā gaṇhitvā parāmasitvā abhinivisitvāti – kaṃ so sikkhaṃ samādāya.

একোদি নিপকো সতোতি। একোদীতি একগ্গচিত্তো অৰিক্খিত্তচিত্তো অৰিসাহটমানসো সমথো সমাধিন্দ্রিযং সমাধিবলং…পে॰… সম্মাসমাধি। নিপকোতি নিপকো পণ্ডিতো পঞ্ঞৰা বুদ্ধিমা ঞাণী ৰিভাৰী মেধাৰী। সতোতি চতূহি কারণেহি সতো – কাযে কাযানুপস্সনাসতিপট্ঠানং ভাৰেন্তো সতো, ৰেদনাসু…পে॰… চিত্তে…পে॰… ধম্মেসু ধম্মানুপস্সনাসতিপট্ঠানং ভাৰেন্তো সতো। সো ৰুচ্চতি সতোতি – সতো। কং সো সিক্খং সমাদাযাতি অধিসীলসিক্খং পুচ্ছতি। একোদীতি অধিচিত্তসিক্খং পুচ্ছতি। নিপকোতি অধিপঞ্ঞাসিক্খং পুচ্ছতি। সতোতি পারিসুদ্ধিং পুচ্ছতীতি – কং সো সিক্খং সমাদায, একোদি নিপকো সতো।

Ekodi nipako satoti. Ekodīti ekaggacitto avikkhittacitto avisāhaṭamānaso samatho samādhindriyaṃ samādhibalaṃ…pe… sammāsamādhi. Nipakoti nipako paṇḍito paññavā buddhimā ñāṇī vibhāvī medhāvī. Satoti catūhi kāraṇehi sato – kāye kāyānupassanāsatipaṭṭhānaṃ bhāvento sato, vedanāsu…pe… citte…pe… dhammesu dhammānupassanāsatipaṭṭhānaṃ bhāvento sato. So vuccati satoti – sato. Kaṃ so sikkhaṃ samādāyāti adhisīlasikkhaṃ pucchati. Ekodīti adhicittasikkhaṃ pucchati. Nipakoti adhipaññāsikkhaṃ pucchati. Satoti pārisuddhiṃ pucchatīti – kaṃ so sikkhaṃ samādāya, ekodi nipako sato.

কম্মারো রজতস্সেৰ, নিদ্ধমে মলমত্তনোতি। কম্মারো ৰুচ্চতি সুৰণ্ণকারো, রজতং ৰুচ্চতি জাতরূপং। যথা সুৰণ্ণকারো জাতরূপস্স ওল়ারিকম্পি মলং ধমতি সন্ধমতি নিদ্ধমতি, মজ্ঝিমকম্পি মলং ধমতি সন্ধমতি নিদ্ধমতি, সুখুমকম্পি মলং ধমতি সন্ধমতি নিদ্ধমতি; এৰমেৰ ভিক্খু অত্তনো ওল়ারিকেপি কিলেসে ধমতি সন্ধমতি নিদ্ধমতি পজহতি ৰিনোদেতি ব্যন্তিং করোতি অনভাৰং গমেতি, মজ্ঝিমকেপি কিলেসে… সুখুমকেপি কিলেসে ধমতি সন্ধমতি নিদ্ধমতি পজহতি ৰিনোদেতি ব্যন্তিং করোতি অনভাৰং গমেতি।

Kammārorajatasseva, niddhame malamattanoti. Kammāro vuccati suvaṇṇakāro, rajataṃ vuccati jātarūpaṃ. Yathā suvaṇṇakāro jātarūpassa oḷārikampi malaṃ dhamati sandhamati niddhamati, majjhimakampi malaṃ dhamati sandhamati niddhamati, sukhumakampi malaṃ dhamati sandhamati niddhamati; evameva bhikkhu attano oḷārikepi kilese dhamati sandhamati niddhamati pajahati vinodeti byantiṃ karoti anabhāvaṃ gameti, majjhimakepi kilese… sukhumakepi kilese dhamati sandhamati niddhamati pajahati vinodeti byantiṃ karoti anabhāvaṃ gameti.

অথ ৰা ভিক্খু অত্তনো রাগমলং দোসমলং মোহমলং মানমলং দিট্ঠিমলং কিলেসমলং দুচ্চরিতমলং অন্ধকরণং অচক্খুকরণং অঞ্ঞাণকরণং পঞ্ঞানিরোধিকং ৰিঘাতপক্খিকং অনিব্বানসংৰত্তনিকং ধমতি সন্ধমতি নিদ্ধমতি পজহতি ৰিনোদেতি ব্যন্তিং করোতি অনভাৰং গমেতি।

Atha vā bhikkhu attano rāgamalaṃ dosamalaṃ mohamalaṃ mānamalaṃ diṭṭhimalaṃ kilesamalaṃ duccaritamalaṃ andhakaraṇaṃ acakkhukaraṇaṃ aññāṇakaraṇaṃ paññānirodhikaṃ vighātapakkhikaṃ anibbānasaṃvattanikaṃ dhamati sandhamati niddhamati pajahati vinodeti byantiṃ karoti anabhāvaṃ gameti.

অথ ৰা সম্মাদিট্ঠিযা মিচ্ছাদিট্ঠিং ধমতি সন্ধমতি নিদ্ধমতি পজহতি ৰিনোদেতি ব্যন্তিং করোতি অনভাৰং গমেতি। সম্মাসঙ্কপ্পেন মিচ্ছাসঙ্কপ্পং…পে॰… সম্মাৰাচায মিচ্ছাৰাচং… সম্মাকম্মন্তেন মিচ্ছাকম্মন্তং… সম্মাআজীৰেন মিচ্ছাআজীৰং… সম্মাৰাযামেন মিচ্ছাৰাযামং… সম্মাসতিযা মিচ্ছাসতিং… সম্মাসমাধিনা মিচ্ছাসমাধিং… সম্মাঞাণেন মিচ্ছাঞাণং… সম্মাৰিমুত্তিযা মিচ্ছাৰিমুত্তিং ধমতি সন্ধমতি নিদ্ধমতি পজহতি ৰিনোদেতি ব্যন্তিং করোতি অনভাৰং গমেতি।

Atha vā sammādiṭṭhiyā micchādiṭṭhiṃ dhamati sandhamati niddhamati pajahati vinodeti byantiṃ karoti anabhāvaṃ gameti. Sammāsaṅkappena micchāsaṅkappaṃ…pe… sammāvācāya micchāvācaṃ… sammākammantena micchākammantaṃ… sammāājīvena micchāājīvaṃ… sammāvāyāmena micchāvāyāmaṃ… sammāsatiyā micchāsatiṃ… sammāsamādhinā micchāsamādhiṃ… sammāñāṇena micchāñāṇaṃ… sammāvimuttiyā micchāvimuttiṃ dhamati sandhamati niddhamati pajahati vinodeti byantiṃ karoti anabhāvaṃ gameti.

অথ ৰা অরিযেন অট্ঠঙ্গিকেন মগ্গেন সব্বে কিলেসে সব্বে দুচ্চরিতে সব্বে দরথে সব্বে পরিল়াহে সব্বে সন্তাপে সব্বাকুসলাভিসঙ্খারে ধমতি সন্ধমতি নিদ্ধমতি পজহতি ৰিনোদেতি ব্যন্তিং করোতি অনভাৰং গমেতীতি – কম্মারো রজতস্সেৰ নিদ্ধমে মলমত্তনো।

Atha vā ariyena aṭṭhaṅgikena maggena sabbe kilese sabbe duccarite sabbe darathe sabbe pariḷāhe sabbe santāpe sabbākusalābhisaṅkhāre dhamati sandhamati niddhamati pajahati vinodeti byantiṃ karoti anabhāvaṃ gametīti – kammāro rajatasseva niddhame malamattano.

তেনাহ থেরো সারিপুত্তো –

Tenāha thero sāriputto –

‘‘কং সো সিক্খং সমাদায, একোদি নিপকো সতো।

‘‘Kaṃ so sikkhaṃ samādāya, ekodi nipako sato;

কম্মারো রজতস্সেৰ, নিদ্ধমে মলমত্তনো’’তি॥

Kammāro rajatasseva, niddhame malamattano’’ti.

১৯৮.

198.

ৰিজিগুচ্ছমানস্স যদিদং ফাসু, [সারিপুত্তাতি ভগৰা]

Vijigucchamānassa yadidaṃ phāsu, [sāriputtāti bhagavā]

রিত্তাসনং সযনং সেৰতো ৰে।

Rittāsanaṃ sayanaṃ sevato ve;

সম্বোধিকামস্স যথানুধম্মং, তং তে পৰক্খামি যথা পজানং॥

Sambodhikāmassa yathānudhammaṃ, taṃ te pavakkhāmi yathā pajānaṃ.

ৰিজিগুচ্ছমানস্স যদিদং ফাসূতি। ৰিজিগুচ্ছমানস্সাতি জাতিযা ৰিজিগুচ্ছমানস্স, জরায… ব্যাধিনা… মরণেন… সোকেহি … পরিদেৰেহি… দুক্খেহি… দোমনস্সেহি… উপাযাসেহি…পে॰… দিট্ঠিব্যসনেন দুক্খেন ৰিজিগুচ্ছমানস্স অট্টীযমানস্স ⁷⁵ হরাযমানস্সাতি – ৰিজিগুচ্ছমানস্স। যদিদং ফাসূতি যং ফাসুৰিহারং তং কথযিস্সামি। কতমো ফাসুৰিহারো? সম্মাপটিপদা অনুলোমপটিপদা অপচ্চনীকপটিপদা অৰিরুদ্ধপটিপদা অন্ৰত্থপটিপদা ধম্মানুধম্মপটিপদা সীলেসু পরিপূরকারিতা ইন্দ্রিযেসু গুত্তদ্ৰারতা ভোজনে মত্তঞ্ঞুতা জাগরিযানুযোগো সতিসম্পজঞ্ঞং চত্তারো সতিপট্ঠানা চত্তারো সম্মপ্পধানা চত্তারো ইদ্ধিপাদা পঞ্চিন্দ্রিযানি পঞ্চ বলানি সত্ত বোজ্ঝঙ্গা অরিযো অট্ঠঙ্গিকো মগ্গো নিব্বানঞ্চ নিব্বানগামিনী চ পটিপদা – অযং ফাসুৰিহারোতি – ৰিজিগুচ্ছমানস্স যদিদং ফাসু।

Vijigucchamānassayadidaṃ phāsūti. Vijigucchamānassāti jātiyā vijigucchamānassa, jarāya… byādhinā… maraṇena… sokehi … paridevehi… dukkhehi… domanassehi… upāyāsehi…pe… diṭṭhibyasanena dukkhena vijigucchamānassa aṭṭīyamānassa ⁷⁶ harāyamānassāti – vijigucchamānassa. Yadidaṃ phāsūti yaṃ phāsuvihāraṃ taṃ kathayissāmi. Katamo phāsuvihāro? Sammāpaṭipadā anulomapaṭipadā apaccanīkapaṭipadā aviruddhapaṭipadā anvatthapaṭipadā dhammānudhammapaṭipadā sīlesu paripūrakāritā indriyesu guttadvāratā bhojane mattaññutā jāgariyānuyogo satisampajaññaṃ cattāro satipaṭṭhānā cattāro sammappadhānā cattāro iddhipādā pañcindriyāni pañca balāni satta bojjhaṅgā ariyo aṭṭhaṅgiko maggo nibbānañca nibbānagāminī ca paṭipadā – ayaṃ phāsuvihāroti – vijigucchamānassa yadidaṃ phāsu.

সারিপুত্তাতি ভগৰাতি। তং থেরং নামেনালপতি। ভগৰাতি গারৰাধিৰচনং। অপি চ ভগ্গরাগোতি ভগৰা, ভগ্গদোসোতি ভগৰা, ভগ্গমোহোতি ভগৰা, ভগ্গমানোতি ভগৰা, ভগ্গদিট্ঠীতি ভগৰা, ভগ্গকণ্ডকোতি ভগৰা, ভগ্গকিলেসোতি ভগৰা, ভজি ৰিভজি পৰিভজি ⁷⁷ ধম্মরতনন্তি ভগৰা, ভৰানং অন্তকরোতি ভগৰা, ভাৰিতকাযো ভাৰিতসীলো ভাৰিতচিত্তো ভাৰিতপঞ্ঞোতি ভগৰা; ভজি ৰা ভগৰা অরঞ্ঞৰনপত্থানি পন্তানি সেনাসনানি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানীতি ভগৰা, ভাগী ৰা ভগৰা চীৰরপিণ্ডপাতসেনাসনগিলানপচ্চযভেসজ্জপরিক্খারানন্তি ভগৰা, ভাগী ৰা ভগৰা অত্থরসস্স ধম্মরসস্স ৰিমুত্তিরসস্স অধিসীলস্স অধিচিত্তস্স অধিপঞ্ঞাযাতি ভগৰা, ভাগী ৰা ভগৰা চতুন্নং ঝানানং চতুন্নং অপ্পমঞ্ঞানং চতুন্নং আরুপ্পসমাপত্তীনন্তি ভগৰা, ভাগী ৰা ভগৰা অট্ঠন্নং ৰিমোক্খানং অট্ঠন্নং অভিঞ্ঞাযতনানং নৰন্নং অনুপুব্বৰিহারসমাপত্তীনন্তি ভগৰা, ভাগী ৰা ভগৰা দসন্নং সঞ্ঞাভাৰনানং দসন্নং কসিণসমাপত্তীনং আনাপানস্সতিসমাধিস্স অসুভসমাপত্তিযাতি ভগৰা, ভাগী ৰা ভগৰা চতুন্নং সতিপট্ঠানানং চতুন্নং সম্মপ্পধানানং চতুন্নং ইদ্ধিপাদানং পঞ্চন্নং ইন্দ্রিযানং পঞ্চন্নং বলানং সত্তন্নং বোজ্ঝঙ্গানং অরিযস্স অট্ঠঙ্গিকস্স মগ্গস্সাতি ভগৰা, ভাগী ৰা ভগৰা দসন্নং তথাগতবলানং চতুন্নং ৰেসারজ্জানং চতুন্নং পটিসম্ভিদানং ছন্নং অভিঞ্ঞানং ছন্নং বুদ্ধধম্মানন্তি ভগৰা ; ভগৰাতি নেতং নামং মাতরা কতং, ন পিতরা কতং, ন ভাতরা কতং, ন ভগিনিযা কতং, ন মিত্তামচ্চেহি কতং, ন ঞাতিসালোহিতেহি কতং, ন সমণব্রাহ্মণেহি কতং, ন দেৰতাহি কতং; ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞাণস্স পটিলাভা সচ্ছিকা পঞ্ঞত্তি যদিদং ভগৰাতি – সারিপুত্তাতি ভগৰা।

Sāriputtāti bhagavāti. Taṃ theraṃ nāmenālapati. Bhagavāti gāravādhivacanaṃ. Api ca bhaggarāgoti bhagavā, bhaggadosoti bhagavā, bhaggamohoti bhagavā, bhaggamānoti bhagavā, bhaggadiṭṭhīti bhagavā, bhaggakaṇḍakoti bhagavā, bhaggakilesoti bhagavā, bhaji vibhaji pavibhaji ⁷⁸ dhammaratananti bhagavā, bhavānaṃ antakaroti bhagavā, bhāvitakāyo bhāvitasīlo bhāvitacitto bhāvitapaññoti bhagavā; bhaji vā bhagavā araññavanapatthāni pantāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppānīti bhagavā, bhāgī vā bhagavā cīvarapiṇḍapātasenāsanagilānapaccayabhesajjaparikkhārānanti bhagavā, bhāgī vā bhagavā attharasassa dhammarasassa vimuttirasassa adhisīlassa adhicittassa adhipaññāyāti bhagavā, bhāgī vā bhagavā catunnaṃ jhānānaṃ catunnaṃ appamaññānaṃ catunnaṃ āruppasamāpattīnanti bhagavā, bhāgī vā bhagavā aṭṭhannaṃ vimokkhānaṃ aṭṭhannaṃ abhiññāyatanānaṃ navannaṃ anupubbavihārasamāpattīnanti bhagavā, bhāgī vā bhagavā dasannaṃ saññābhāvanānaṃ dasannaṃ kasiṇasamāpattīnaṃ ānāpānassatisamādhissa asubhasamāpattiyāti bhagavā, bhāgī vā bhagavā catunnaṃ satipaṭṭhānānaṃ catunnaṃ sammappadhānānaṃ catunnaṃ iddhipādānaṃ pañcannaṃ indriyānaṃ pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa maggassāti bhagavā, bhāgī vā bhagavā dasannaṃ tathāgatabalānaṃ catunnaṃ vesārajjānaṃ catunnaṃ paṭisambhidānaṃ channaṃ abhiññānaṃ channaṃ buddhadhammānanti bhagavā ; bhagavāti netaṃ nāmaṃ mātarā kataṃ, na pitarā kataṃ, na bhātarā kataṃ, na bhaginiyā kataṃ, na mittāmaccehi kataṃ, na ñātisālohitehi kataṃ, na samaṇabrāhmaṇehi kataṃ, na devatāhi kataṃ; vimokkhantikametaṃ buddhānaṃ bhagavantānaṃ bodhiyā mūle saha sabbaññutañāṇassa paṭilābhā sacchikā paññatti yadidaṃ bhagavāti – sāriputtāti bhagavā.

রিত্তাসনং সযনং সেৰতো ৰেতি। আসনং ৰুচ্চতি যত্থ নিসীদতি – মঞ্চো পীঠং ভিসি তট্টিকা চম্মখণ্ডো তিণসন্থারো পণ্ণসন্থারো পলালসন্থারো। সযনং ৰুচ্চতি সেনাসনং ৰিহারো অড্ঢযোগো পাসাদো হম্মিযং গুহা। তং সযনাসনং অসপ্পাযরূপদস্সনেন রিত্তং ৰিৰিত্তং পৰিৰিত্তং, অসপ্পাযসদ্দস্সৰনেন…পে॰… অসপ্পাযেহি পঞ্চহি কামগুণেহি রিত্তং ৰিৰিত্তং পৰিৰিত্তং। তং সযনাসনং সেৰতো নিসেৰতো সংসেৰতো পটিসেৰতোতি – রিত্তাসনং সযনং সেৰতো ৰে।

Rittāsanaṃ sayanaṃ sevato veti. Āsanaṃ vuccati yattha nisīdati – mañco pīṭhaṃ bhisi taṭṭikā cammakhaṇḍo tiṇasanthāro paṇṇasanthāro palālasanthāro. Sayanaṃ vuccati senāsanaṃ vihāro aḍḍhayogo pāsādo hammiyaṃ guhā. Taṃ sayanāsanaṃ asappāyarūpadassanena rittaṃ vivittaṃ pavivittaṃ, asappāyasaddassavanena…pe… asappāyehi pañcahi kāmaguṇehi rittaṃ vivittaṃ pavivittaṃ. Taṃ sayanāsanaṃ sevato nisevato saṃsevato paṭisevatoti – rittāsanaṃ sayanaṃ sevato ve.

সম্বোধিকামস্স যথানুধম্মন্তি। সম্বোধি ৰুচ্চতি চতূসু মগ্গেসু ঞাণং পঞ্ঞা পঞ্ঞিন্দ্রিযং পঞ্ঞাবলং…পে॰… ধম্মৰিচযসম্বোজ্ঝঙ্গো ৰীমংসা ৰিপস্সনা সম্মাদিট্ঠি। তং সম্বোধিং বুজ্ঝিতুকামস্স অনুবুজ্ঝিতুকামস্স পটিবুজ্ঝিতুকামস্স সম্বুজ্ঝিতুকামস্স অধিগন্তুকামস্স ফস্সিতুকামস্স সচ্ছিকাতুকামস্সাতি – সম্বোধিকামস্স।

Sambodhikāmassa yathānudhammanti. Sambodhi vuccati catūsu maggesu ñāṇaṃ paññā paññindriyaṃ paññābalaṃ…pe… dhammavicayasambojjhaṅgo vīmaṃsā vipassanā sammādiṭṭhi. Taṃ sambodhiṃ bujjhitukāmassa anubujjhitukāmassa paṭibujjhitukāmassa sambujjhitukāmassa adhigantukāmassa phassitukāmassa sacchikātukāmassāti – sambodhikāmassa.

যথানুধম্মন্তি কতমে বোধিযা অনুধম্মা? সম্মাপটিপদা অনুলোমপটিপদা অপচ্চনীকপটিপদা অৰিরুদ্ধপটিপদা অন্ৰত্থপটিপদা ধম্মানুধম্মপটিপদা সীলেসু পরিপূরকারিতা ইন্দ্রিযেসু গুত্তদ্ৰারতা ভোজনে মত্তঞ্ঞুতা জাগরিযানুযোগো সতিসম্পজঞ্ঞং – ইমে ৰুচ্চন্তি বোধিযা অনুধম্মা। অথ ৰা চতুন্নং মগ্গানং পুব্বভাগে ৰিপস্সনা – ইমে ৰুচ্চন্তি বোধিযা অনুধম্মাতি – সম্বোধিকামস্স যথানুধম্মং।

Yathānudhammanti katame bodhiyā anudhammā? Sammāpaṭipadā anulomapaṭipadā apaccanīkapaṭipadā aviruddhapaṭipadā anvatthapaṭipadā dhammānudhammapaṭipadā sīlesu paripūrakāritā indriyesu guttadvāratā bhojane mattaññutā jāgariyānuyogo satisampajaññaṃ – ime vuccanti bodhiyā anudhammā. Atha vā catunnaṃ maggānaṃ pubbabhāge vipassanā – ime vuccanti bodhiyā anudhammāti – sambodhikāmassa yathānudhammaṃ.

তং তে পৰক্খামি যথা পজানন্তি। তন্তি বোধিযা অনুধম্মং। পৰক্খামীতি পৰক্খামি আচিক্খিস্সামি দেসেস্সামি পঞ্ঞপেস্সামি পঠপেস্সামি ৰিৰরিস্সামি ৰিভজিস্সামি উত্তানীকরিস্সামি পকাসিস্সামি। যথা পজানন্তি যথা পজানং যথা পজানন্তো আজানন্তো ৰিজানন্তো পটিৰিজানন্তো পটিৰিজ্ঝন্তো ন ইতিহিতিহং ন ইতিকিরায ন পরম্পরায ন পিটকসম্পদায ন তক্কহেতু ন নযহেতু ন আকারপরিৰিতক্কেন ন দিট্ঠিনিজ্ঝানক্খন্তিযা সামং সযমভিঞ্ঞাতং অত্তপচ্চক্খং ধম্মং, তং কথযিস্সামীতি – তং তে পৰক্খামি যথা পজানং।

Taṃte pavakkhāmi yathā pajānanti. Tanti bodhiyā anudhammaṃ. Pavakkhāmīti pavakkhāmi ācikkhissāmi desessāmi paññapessāmi paṭhapessāmi vivarissāmi vibhajissāmi uttānīkarissāmi pakāsissāmi. Yathā pajānanti yathā pajānaṃ yathā pajānanto ājānanto vijānanto paṭivijānanto paṭivijjhanto na itihitihaṃ na itikirāya na paramparāya na piṭakasampadāya na takkahetu na nayahetu na ākāraparivitakkena na diṭṭhinijjhānakkhantiyā sāmaṃ sayamabhiññātaṃ attapaccakkhaṃ dhammaṃ, taṃ kathayissāmīti – taṃ te pavakkhāmi yathā pajānaṃ.

তেনাহ ভগৰা –

Tenāha bhagavā –

‘‘ৰিজিগুচ্ছমানস্স যদিদং ফাসু, [সারিপুত্তাতি ভগৰা]

‘‘Vijigucchamānassa yadidaṃ phāsu, [sāriputtāti bhagavā]

রিত্তাসনং সযনং সেৰতো ৰে।

Rittāsanaṃ sayanaṃ sevato ve;

সম্বোধিকামস্স যথানুধম্মং, তং তে পৰক্খামি যথা পজান’’ন্তি॥

Sambodhikāmassa yathānudhammaṃ, taṃ te pavakkhāmi yathā pajāna’’nti.

১৯৯.

199.

পঞ্চন্নং ধীরো ভযানং ন ভাযে, ভিক্খু সতো সপরিযন্তচারী।

Pañcannaṃ dhīro bhayānaṃ na bhāye, bhikkhu sato sapariyantacārī;

ডংসাধিপাতানং সরীসপানং ⁷⁹, মনুস্সফস্সানং চতুপ্পদানং॥

Ḍaṃsādhipātānaṃ sarīsapānaṃ⁸⁰, manussaphassānaṃ catuppadānaṃ.

পঞ্চন্নং ধীরো ভযানং ন ভাযেতি। ধীরোতি ধীরো পণ্ডিতো পঞ্ঞৰা বুদ্ধিমা ঞাণী ৰিভাৰী মেধাৰী। ধীরো পঞ্চন্নং ভযানং ন ভাযেয্য ন তসেয্য ন সন্তসেয্য ন উত্তসেয্য ন পরিত্তসেয্য ন সন্তাসং আপজ্জেয্য , অভীরূ অস্স অচ্ছম্ভী অনুত্রাসী অপলাযী পহীনভযভেরৰো ৰিগতলোমহংসো ৰিহরেয্যাতি – পঞ্চন্নং ধীরো ভযানং ন ভাযে।

Pañcannaṃ dhīro bhayānaṃ na bhāyeti. Dhīroti dhīro paṇḍito paññavā buddhimā ñāṇī vibhāvī medhāvī. Dhīro pañcannaṃ bhayānaṃ na bhāyeyya na taseyya na santaseyya na uttaseyya na parittaseyya na santāsaṃ āpajjeyya , abhīrū assa acchambhī anutrāsī apalāyī pahīnabhayabheravo vigatalomahaṃso vihareyyāti – pañcannaṃ dhīro bhayānaṃ na bhāye.

ভিক্খু সতো সপরিযন্তচারীতি। ভিক্খূতি পুথুজ্জনকল্যাণকো ৰা ভিক্খু সেক্খো ৰা ভিক্খু। সতোতি চতূহি কারণেহি সতো – কাযে কাযানুপস্সনাসতিপট্ঠানং ভাৰেন্তো সতো, ৰেদনাসু…পে॰… চিত্তে… ধম্মেসু ধম্মানুপস্সনাসতিপট্ঠানং ভাৰেন্তো সতো – সো ৰুচ্চতি সতো। সপরিযন্তচারীতি চত্তারো পরিযন্তা – সীলসংৰরপরিযন্তো, ইন্দ্রিযসংৰরপরিযন্তো, ভোজনে মত্তঞ্ঞুতাপরিযন্তো, জাগরিযানুযোগপরিযন্তো।

Bhikkhu sato sapariyantacārīti. Bhikkhūti puthujjanakalyāṇako vā bhikkhu sekkho vā bhikkhu. Satoti catūhi kāraṇehi sato – kāye kāyānupassanāsatipaṭṭhānaṃ bhāvento sato, vedanāsu…pe… citte… dhammesu dhammānupassanāsatipaṭṭhānaṃ bhāvento sato – so vuccati sato. Sapariyantacārīti cattāro pariyantā – sīlasaṃvarapariyanto, indriyasaṃvarapariyanto, bhojane mattaññutāpariyanto, jāgariyānuyogapariyanto.

কতমো সীলসংৰরপরিযন্তো? ইধ ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো, অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু । অন্তোপূতিভাৰং পচ্চৰেক্খমানো অন্তো সীলসংৰরপরিযন্তে চরতি, মরিযাদং ন ভিন্দতি – অযং সীলসংৰরপরিযন্তো।

Katamo sīlasaṃvarapariyanto? Idha bhikkhu sīlavā hoti, pātimokkhasaṃvarasaṃvuto viharati ācāragocarasampanno, aṇumattesu vajjesu bhayadassāvī, samādāya sikkhati sikkhāpadesu . Antopūtibhāvaṃ paccavekkhamāno anto sīlasaṃvarapariyante carati, mariyādaṃ na bhindati – ayaṃ sīlasaṃvarapariyanto.

কতমো ইন্দ্রিযসংৰরপরিযন্তো? ইধ ভিক্খু চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী। যত্ৰাধিকরণমেনং…পে॰… চক্খুন্দ্রিযে সংৰরং আপজ্জতি। সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায ন নিমিত্তগ্গাহী হোতি নানুব্যঞ্জনগ্গাহী। যত্ৰাধিকরণমেনং মনিন্দ্রিযং সুসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা নান্ৰাস্সৰেয্যুং, তস্স সংৰরায পটিপজ্জতি, রক্খতি মনিন্দ্রিযং, মনিন্দ্রিযে সংৰরং আপজ্জতি। আদিত্তপরিযাযং পচ্চৰেক্খমানো অন্তো ইন্দ্রিযসংৰরপরিযন্তে চরতি, মরিযাদং ন ভিন্দতি – অযং ইন্দ্রিযসংৰরপরিযন্তো।

Katamo indriyasaṃvarapariyanto? Idha bhikkhu cakkhunā rūpaṃ disvā na nimittaggāhī hoti nānubyañjanaggāhī. Yatvādhikaraṇamenaṃ…pe… cakkhundriye saṃvaraṃ āpajjati. Sotena saddaṃ sutvā… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya na nimittaggāhī hoti nānubyañjanaggāhī. Yatvādhikaraṇamenaṃ manindriyaṃ susaṃvutaṃ viharantaṃ abhijjhādomanassā pāpakā akusalā dhammā nānvāssaveyyuṃ, tassa saṃvarāya paṭipajjati, rakkhati manindriyaṃ, manindriye saṃvaraṃ āpajjati. Ādittapariyāyaṃ paccavekkhamāno anto indriyasaṃvarapariyante carati, mariyādaṃ na bhindati – ayaṃ indriyasaṃvarapariyanto.

কতমো ভোজনে মত্তঞ্ঞুতাপরিযন্তো? ইধ ভিক্খু পটিসঙ্খা যোনিসো আহারং আহারেতি নেৰ দৰায ন মদায ন মণ্ডনায ন ৰিভূসনায, যাৰদেৰ ইমস্স কাযস্স ঠিতিযা যাপনায ৰিহিংসূপরতিযা ব্রহ্মচরিযানুগ্গহায। ইতি পুরাণঞ্চ ৰেদনং পটিহঙ্খামি নৰঞ্চ ৰেদনং ন উপ্পাদেস্সামি, যাত্রা চ মে ভৰিস্সতি অনৰজ্জতা চ ফাসুৰিহারো চাতি। অক্খব্ভঞ্জনৰণপটিচ্ছাদনপুত্তমংসূপমং পচ্চৰেক্খমানো অন্তো ভোজনে মত্তঞ্ঞুতাপরিযন্তে চরতি, মরিযাদং ন ভিন্দতি – অযং ভোজনে মত্তঞ্ঞুতাপরিযন্তো।

Katamo bhojane mattaññutāpariyanto? Idha bhikkhu paṭisaṅkhā yoniso āhāraṃ āhāreti neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṃsūparatiyā brahmacariyānuggahāya. Iti purāṇañca vedanaṃ paṭihaṅkhāmi navañca vedanaṃ na uppādessāmi, yātrā ca me bhavissati anavajjatā ca phāsuvihāro cāti. Akkhabbhañjanavaṇapaṭicchādanaputtamaṃsūpamaṃ paccavekkhamāno anto bhojane mattaññutāpariyante carati, mariyādaṃ na bhindati – ayaṃ bhojane mattaññutāpariyanto.

কতমো জাগরিযানুযোগপরিযন্তো? ইধ ভিক্খু দিৰসং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি, রত্তিযা পঠমং যামং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি, রত্তিযা মজ্ঝিমং যামং দক্খিণেন পস্সেন সীহসেয্যং কপ্পেতি পাদে পাদং অচ্চাধায সতো সম্পজানো উট্ঠানসঞ্ঞং মনসি করিত্ৰা, রত্তিযা পচ্ছিমং যামং পচ্চুট্ঠায চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি। ভদ্দেকরত্তৰিহারং ⁸¹ পচ্চৰেক্খমানো অন্তো জাগরিযানুযোগপরিযন্তে চরতি, মরিযাদং ন ভিন্দতি – অযং জাগরিযানুযোগপরিযন্তোতি – ভিক্খু সতো সপরিযন্তচারী।

Katamo jāgariyānuyogapariyanto? Idha bhikkhu divasaṃ caṅkamena nisajjāya āvaraṇīyehi dhammehi cittaṃ parisodheti, rattiyā paṭhamaṃ yāmaṃ caṅkamena nisajjāya āvaraṇīyehi dhammehi cittaṃ parisodheti, rattiyā majjhimaṃ yāmaṃ dakkhiṇena passena sīhaseyyaṃ kappeti pāde pādaṃ accādhāya sato sampajāno uṭṭhānasaññaṃ manasi karitvā, rattiyā pacchimaṃ yāmaṃ paccuṭṭhāya caṅkamena nisajjāya āvaraṇīyehi dhammehi cittaṃ parisodheti. Bhaddekarattavihāraṃ ⁸² paccavekkhamāno anto jāgariyānuyogapariyante carati, mariyādaṃ na bhindati – ayaṃ jāgariyānuyogapariyantoti – bhikkhu sato sapariyantacārī.

ডংসাধিপাতানং সরীসপানন্তি। ডংসা ৰুচ্চন্তি পিঙ্গলমক্খিকাযো। অধিপাতকা ৰুচ্চন্তি সব্বাপি মক্খিকাযো। কিংকারণা অধিপাতকা ৰুচ্চন্তি সব্বাপি মক্খিকাযো? তা উপ্পতিত্ৰা উপ্পতিত্ৰা খাদন্তি; তংকারণা অধিপাতকা ৰুচ্চন্তি সব্বাপি মক্খিকাযো। সরীসপা ৰুচ্চন্তি অহীতি – ডংসাধিপাতানং সরীসপানং।

Ḍaṃsādhipātānaṃ sarīsapānanti. Ḍaṃsā vuccanti piṅgalamakkhikāyo. Adhipātakā vuccanti sabbāpi makkhikāyo. Kiṃkāraṇā adhipātakā vuccanti sabbāpi makkhikāyo? Tā uppatitvā uppatitvā khādanti; taṃkāraṇā adhipātakā vuccanti sabbāpi makkhikāyo. Sarīsapā vuccanti ahīti – ḍaṃsādhipātānaṃ sarīsapānaṃ.

মনুস্সফস্সানং চতুপ্পদানন্তি। মনুস্সফস্সা ৰুচ্চন্তি চোরা ৰা অস্সু মানৰা ৰা কতকম্মা ৰা অকতকম্মা ৰা। তে ভিক্খুং পঞ্হং ৰা পুচ্ছেয্যুং ৰাদং ৰা আরোপেয্যুং অক্কোসেয্যুং পরিভাসেয্যুং রোসেয্যুং ৰিরোসেয্যুং হিংসেয্যুং ৰিহিংসেয্যুং হেঠেয্যুং ৰিহেঠেয্যুং ঘাতেয্যুং উপঘাতেয্যুং উপঘাতং ৰা করেয্যুং। যো কোচি মনুস্সতো উপঘাতো – মনুস্সফস্সো। চতুপ্পদানন্তি সীহা ব্যগ্ঘা দীপি অচ্ছা তরচ্ছা কোকা মহিংসা হত্থী। তে ভিক্খুং মদ্দেয্যুং খাদেয্যুং হিংসেয্যুং ৰিহিংসেয্যুং হেঠেয্যুং ৰিহেঠেয্যুং ঘাতেয্যুং উপঘাতেয্যুং উপঘাতং ৰা করেয্যুং। চতুপ্পদতো উপঘাতো যং কিঞ্চি চতুপ্পদভযন্তি – মনুস্সফস্সানং চতুপ্পদানং।

Manussaphassānaṃcatuppadānanti. Manussaphassā vuccanti corā vā assu mānavā vā katakammā vā akatakammā vā. Te bhikkhuṃ pañhaṃ vā puccheyyuṃ vādaṃ vā āropeyyuṃ akkoseyyuṃ paribhāseyyuṃ roseyyuṃ viroseyyuṃ hiṃseyyuṃ vihiṃseyyuṃ heṭheyyuṃ viheṭheyyuṃ ghāteyyuṃ upaghāteyyuṃ upaghātaṃ vā kareyyuṃ. Yo koci manussato upaghāto – manussaphasso. Catuppadānanti sīhā byagghā dīpi acchā taracchā kokā mahiṃsā hatthī. Te bhikkhuṃ maddeyyuṃ khādeyyuṃ hiṃseyyuṃ vihiṃseyyuṃ heṭheyyuṃ viheṭheyyuṃ ghāteyyuṃ upaghāteyyuṃ upaghātaṃ vā kareyyuṃ. Catuppadato upaghāto yaṃ kiñci catuppadabhayanti – manussaphassānaṃ catuppadānaṃ.

তেনাহ ভগৰা –

Tenāha bhagavā –

‘‘পঞ্চন্নং ধীরো ভযানং ন ভাযে, ভিক্খু সতো সপরিযন্তচারী।

‘‘Pañcannaṃ dhīro bhayānaṃ na bhāye, bhikkhu sato sapariyantacārī;

ডংসাধিপাতানং সরীসপানং, মনুস্সফস্সানং চতুপ্পদান’’ন্তি॥

Ḍaṃsādhipātānaṃ sarīsapānaṃ, manussaphassānaṃ catuppadāna’’nti.

২০০.

200.

পরধম্মিকানম্পি ন সন্তসেয্য, দিস্ৰাপি তেসং বহুভেরৰানি।

Paradhammikānampi na santaseyya, disvāpi tesaṃ bahubheravāni;

অথাপরানি অভিসম্ভৰেয্য, পরিস্সযানি কুসলানুএসী॥

Athāparāni abhisambhaveyya, parissayāni kusalānuesī.

পরধম্মিকানম্পি ন সন্তসেয্য, দিস্ৰাপি তেসং বহুভেরৰানীতি। পরধম্মিকা ৰুচ্চন্তি সত্ত সহধম্মিকে ঠপেত্ৰা যে কেচি বুদ্ধে ধম্মে সঙ্ঘে অপ্পসন্না । তে ভিক্খুং পঞ্হং ৰা পুচ্ছেয্যুং ৰাদং ৰা আরোপেয্যুং অক্কোসেয্যুং পরিভাসেয্যুং রোসেয্যুং ৰিরোসেয্যুং হিংসেয্যুং ৰিহিংসেয্যুং হেঠেয্যুং ৰিহেঠেয্যুং ঘাতেয্যুং উপঘাতেয্যুং উপঘাতং ৰা করেয্যুং। তেসং বহুভেরৰে পস্সিত্ৰা ৰা সুণিত্ৰা ৰা ন ৰেধেয্য ন পৰেধেয্য ন সম্পৰেধেয্য ন তসেয্য ন সন্তসেয্য ন উত্তসেয্য ন পরিত্তসেয্য ন ভাযেয্য ন সন্তাসং আপজ্জেয্য, অভীরূ অস্স অচ্ছম্ভী অনুত্রাসী অপলাযী পহীনভযভেরৰো ৰিগতলোমহংসো ৰিহরেয্যাতি – পরধম্মিকানম্পি ন সন্তসেয্য দিস্ৰাপি তেসং বহুভেরৰানি।

Paradhammikānampi na santaseyya, disvāpi tesaṃ bahubheravānīti. Paradhammikā vuccanti satta sahadhammike ṭhapetvā ye keci buddhe dhamme saṅghe appasannā . Te bhikkhuṃ pañhaṃ vā puccheyyuṃ vādaṃ vā āropeyyuṃ akkoseyyuṃ paribhāseyyuṃ roseyyuṃ viroseyyuṃ hiṃseyyuṃ vihiṃseyyuṃ heṭheyyuṃ viheṭheyyuṃ ghāteyyuṃ upaghāteyyuṃ upaghātaṃ vā kareyyuṃ. Tesaṃ bahubherave passitvā vā suṇitvā vā na vedheyya na pavedheyya na sampavedheyya na taseyya na santaseyya na uttaseyya na parittaseyya na bhāyeyya na santāsaṃ āpajjeyya, abhīrū assa acchambhī anutrāsī apalāyī pahīnabhayabheravo vigatalomahaṃso vihareyyāti – paradhammikānampi na santaseyya disvāpi tesaṃ bahubheravāni.

অথাপরানি অভিসম্ভৰেয্য, পরিস্সযানি কুসলানুএসীতি। অথাপরানিপি অত্থি অভিসম্ভোতব্বানি অভিভৰিতব্বানি অজ্ঝোত্থরিতব্বানি পরিযাদিযিতব্বানি মদ্দিতব্বানি। পরিস্সযাতি দ্ৰে পরিস্সযা – পাকটপরিস্সযা চ পটিচ্ছন্নপরিস্সযা চ…পে॰… এৰম্পি তত্রাসযাতি – পরিস্সযা। কুসলানুএসীতি সম্মাপটিপদং অনুলোমপটিপদং অপচ্চনীকপটিপদং অৰিরুদ্ধপটিপদং অন্ৰত্থপটিপদং…পে॰… অরিযং অট্ঠঙ্গিকং মগ্গং নিব্বানঞ্চ নিব্বানগামিনিঞ্চ পটিপদং এসন্তেন গৰেসন্তেন পরিযেসন্তেন পরিস্সযা অভিসম্ভোতব্বা অভিভৰিতব্বা অজ্ঝোত্থরিতব্বা পরিযাদিযিতব্বা মদ্দিতব্বাতি – অথাপরানি অভিসম্ভৰেয্য পরিস্সযানি কুসলানুএসী।

Athāparāni abhisambhaveyya, parissayāni kusalānuesīti. Athāparānipi atthi abhisambhotabbāni abhibhavitabbāni ajjhottharitabbāni pariyādiyitabbāni madditabbāni. Parissayāti dve parissayā – pākaṭaparissayā ca paṭicchannaparissayā ca…pe… evampi tatrāsayāti – parissayā. Kusalānuesīti sammāpaṭipadaṃ anulomapaṭipadaṃ apaccanīkapaṭipadaṃ aviruddhapaṭipadaṃ anvatthapaṭipadaṃ…pe… ariyaṃ aṭṭhaṅgikaṃ maggaṃ nibbānañca nibbānagāminiñca paṭipadaṃ esantena gavesantena pariyesantena parissayā abhisambhotabbā abhibhavitabbā ajjhottharitabbā pariyādiyitabbā madditabbāti – athāparāni abhisambhaveyya parissayāni kusalānuesī.

তেনাহ ভগৰা –

Tenāha bhagavā –

‘‘পরধম্মিকানম্পি ন সন্তসেয্য, দিস্ৰাপি তেসং বহুভেরৰানি।

‘‘Paradhammikānampi na santaseyya, disvāpi tesaṃ bahubheravāni;

অথাপরানি অভিসম্ভৰেয্য, পরিস্সযানি কুসলানুএসী’’তি॥

Athāparāni abhisambhaveyya, parissayāni kusalānuesī’’ti.

২০১.

201.

আতঙ্কফস্সেন খুদায ফুট্ঠো, সীতং অথুণ্হং ⁸³ অধিৰাসযেয্য।

Ātaṅkaphassena khudāya phuṭṭho, sītaṃ athuṇhaṃ⁸⁴adhivāsayeyya;

সো তেহি ফুট্ঠো বহুধা অনোকো, ৰীরিযপরক্কমং দল়্হং করেয্য॥

So tehi phuṭṭho bahudhā anoko, vīriyaparakkamaṃ daḷhaṃ kareyya.

আতঙ্কফস্সেন খুদায ফুট্ঠোতি। আতঙ্কফস্সো ৰুচ্চতি রোগফস্সো। রোগফস্সেন ফুট্ঠো পরেতো সমোহিতো সমন্নাগতো অস্স; চক্খুরোগেন ফুট্ঠো পরেতো সমোহিতো সমন্নাগতো অস্স, সোতরোগেন… ঘানরোগেন… জিৰ্হারোগেন… কাযরোগেন…পে॰… ডংসমকসৰাতাতপসরীসপসম্ফস্সেন ফুট্ঠো পরেতো সমোহিতো সমন্নাগতো অস্স। খুদা ৰুচ্চতি ছাতকো। ছাতকেন ফুট্ঠো পরেতো সমোহিতো সমন্নাগতো অস্সাতি – আতঙ্কফস্সেন খুদায ফুট্ঠো।

Ātaṅkaphassena khudāya phuṭṭhoti. Ātaṅkaphasso vuccati rogaphasso. Rogaphassena phuṭṭho pareto samohito samannāgato assa; cakkhurogena phuṭṭho pareto samohito samannāgato assa, sotarogena… ghānarogena… jivhārogena… kāyarogena…pe… ḍaṃsamakasavātātapasarīsapasamphassena phuṭṭho pareto samohito samannāgato assa. Khudā vuccati chātako. Chātakena phuṭṭho pareto samohito samannāgato assāti – ātaṅkaphassena khudāya phuṭṭho.

সীতং অথুণ্হং অধিৰাসযেয্যাতি। সীতন্তি দ্ৰীহি কারণেহি সীতং হোতি – অব্ভন্তরধাতুপ্পকোপৰসেন ⁸⁵ ৰা সীতং হোতি, বহিদ্ধা উতুৰসেন ৰা সীতং হোতি। উণ্হন্তি দ্ৰীহি কারণেহি উণ্হং হোতি – অব্ভন্তরধাতুপ্পকোপৰসেন ৰা উণ্হং হোতি, বহিদ্ধা উতুৰসেন ৰা উণ্হং হোতীতি – সীতং অথুণ্হং । অধিৰাসযেয্যাতি খমো অস্স সীতস্স উণ্হস্স জিঘচ্ছায পিপাসায ডংসমকসৰাতাতপসরীসপসম্ফস্সানং দুরুত্তানং দুরাগতানং ৰচনপথানং উপ্পন্নানং সারীরিকানং ৰেদনানং দুক্খানং তিব্বানং ⁸⁶ খরানং কটুকানং অসাতানং অমনাপানং পাণহরানং অধিৰাসকজাতিকো অস্সাতি – সীতং অথুণ্হং অধিৰাসযেয্য।

Sītaṃ athuṇhaṃ adhivāsayeyyāti. Sītanti dvīhi kāraṇehi sītaṃ hoti – abbhantaradhātuppakopavasena ⁸⁷ vā sītaṃ hoti, bahiddhā utuvasena vā sītaṃ hoti. Uṇhanti dvīhi kāraṇehi uṇhaṃ hoti – abbhantaradhātuppakopavasena vā uṇhaṃ hoti, bahiddhā utuvasena vā uṇhaṃ hotīti – sītaṃ athuṇhaṃ . Adhivāsayeyyāti khamo assa sītassa uṇhassa jighacchāya pipāsāya ḍaṃsamakasavātātapasarīsapasamphassānaṃ duruttānaṃ durāgatānaṃ vacanapathānaṃ uppannānaṃ sārīrikānaṃ vedanānaṃ dukkhānaṃ tibbānaṃ ⁸⁸ kharānaṃ kaṭukānaṃ asātānaṃ amanāpānaṃ pāṇaharānaṃ adhivāsakajātiko assāti – sītaṃ athuṇhaṃ adhivāsayeyya.

সো তেহি ফুট্ঠো বহুধা অনোকোতি। সো তেহীতি আতঙ্কফস্সেন চ খুদায চ সীতেন চ উণ্হেন চ ফুট্ঠো পরেতো সমোহিতো সমন্নাগতো অস্সাতি – সো তেহি ফুট্ঠো। বহুধাতি অনেকৰিধেহি আকারেহি ফুট্ঠো পরেতো সমোহিতো সমন্নাগতো অস্সাতি – সো তেহি ফুট্ঠো বহুধা । অনোকোতি অভিসঙ্খারসহগতৰিঞ্ঞাণস্স ওকাসং ন করোতীতিপি – অনোকো। অথ ৰা কাযদুচ্চরিতস্স ৰচীদুচ্চরিতস্স মনোদুচ্চরিতস্স ওকাসং ন করোতীতিপি – অনোকোতি – সো তেহি ফুট্ঠো বহুধা অনোকো।

So tehi phuṭṭho bahudhā anokoti. So tehīti ātaṅkaphassena ca khudāya ca sītena ca uṇhena ca phuṭṭho pareto samohito samannāgato assāti – so tehi phuṭṭho. Bahudhāti anekavidhehi ākārehi phuṭṭho pareto samohito samannāgato assāti – so tehi phuṭṭho bahudhā . Anokoti abhisaṅkhārasahagataviññāṇassa okāsaṃ na karotītipi – anoko. Atha vā kāyaduccaritassa vacīduccaritassa manoduccaritassa okāsaṃ na karotītipi – anokoti – so tehi phuṭṭho bahudhā anoko.

ৰীরিযপরক্কমং দল়্হং করেয্যাতি। ৰীরিযপরক্কমো ৰুচ্চতি যো চেতসিকো ৰীরিযারম্ভো নিক্কমো পরক্কমো উয্যামো ৰাযামো উস্সাহো উস্সোল়্হী অপ্পটিৰানী থামো ধিতি অসিথিলপরক্কমতা অনিক্খিত্তচ্ছন্দতা অনিক্খিত্তধুরতা ধুরসম্পগ্গাহো ৰীরিযং ৰীরিযিন্দ্রিযং ৰীরিযবলং সম্মাৰাযামো। ৰীরিযপরক্কমং দল়্হং করেয্যাতি। ৰীরিযং পরক্কমং দল়্হং করেয্য থিরং করেয্য, দল়্হসমাদানো অস্স অৰত্থিতসমাদানোতি – ৰীরিযপরক্কমং দল়্হং করেয্য।

Vīriyaparakkamaṃ daḷhaṃ kareyyāti. Vīriyaparakkamo vuccati yo cetasiko vīriyārambho nikkamo parakkamo uyyāmo vāyāmo ussāho ussoḷhī appaṭivānī thāmo dhiti asithilaparakkamatā anikkhittacchandatā anikkhittadhuratā dhurasampaggāho vīriyaṃ vīriyindriyaṃ vīriyabalaṃ sammāvāyāmo. Vīriyaparakkamaṃ daḷhaṃ kareyyāti. Vīriyaṃ parakkamaṃ daḷhaṃ kareyya thiraṃ kareyya, daḷhasamādāno assa avatthitasamādānoti – vīriyaparakkamaṃ daḷhaṃ kareyya.

তেনাহ ভগৰা –

Tenāha bhagavā –

‘‘আতঙ্কফস্সেন খুদায ফুট্ঠো, সীতং অথুণ্হং অধিৰাসযেয্য।

‘‘Ātaṅkaphassena khudāya phuṭṭho, sītaṃ athuṇhaṃ adhivāsayeyya;

সো তেহি ফুট্ঠো বহুধা অনোকো, ৰীরিযপরক্কমং দল়্হং করেয্যা’’তি॥

So tehi phuṭṭho bahudhā anoko, vīriyaparakkamaṃ daḷhaṃ kareyyā’’ti.

২০২.

202.

থেয্যং ন কারে ন মুসা ভণেয্য, মেত্তায ফস্সে তসথাৰরানি।

Theyyaṃ na kāre na musā bhaṇeyya, mettāya phasse tasathāvarāni;

যদাৰিলত্তং মনসো ৰিজঞ্ঞা, কণ্হস্স পক্খোতি ৰিনোদযেয্য॥

Yadāvilattaṃ manaso vijaññā, kaṇhassa pakkhoti vinodayeyya.

থেয্যং ন কারে ন মুসা ভণেয্যাতি। থেয্যং ন কারেতি ইধ ভিক্খু অদিন্নাদানং পহায অদিন্নাদানা পটিৰিরতো অস্স দিন্নাদাযী দিন্নপাটিকঙ্খী, অথেনেন সুচিভূতেন অত্তনা ৰিহরেয্যাতি – থেয্যং ন কারে। ন মুসা ভণেয্যাতি ইধ ভিক্খু মুসাৰাদং পহায মুসাৰাদা পটিৰিরতো অস্স সচ্চৰাদী সচ্চসন্ধো থেতো পচ্চযিকো অৰিসংৰাদকো লোকস্সাতি – থেয্যং ন কারে ন মুসা ভণেয্য।

Theyyaṃna kāre na musā bhaṇeyyāti. Theyyaṃ na kāreti idha bhikkhu adinnādānaṃ pahāya adinnādānā paṭivirato assa dinnādāyī dinnapāṭikaṅkhī, athenena sucibhūtena attanā vihareyyāti – theyyaṃ na kāre. Na musā bhaṇeyyāti idha bhikkhu musāvādaṃ pahāya musāvādā paṭivirato assa saccavādī saccasandho theto paccayiko avisaṃvādako lokassāti – theyyaṃ na kāre na musā bhaṇeyya.

মেত্তায ফস্সে তসথাৰরানীতি। মেত্তাতি যা সত্তেসু মেত্তি মেত্তাযনা মেত্তাযিতত্তং অনুদযা অনুদযনা অনুদযিতত্তং ⁸⁹ হিতেসিতা অনুকম্পা অব্যাপাদো অব্যাপজ্জো ⁹⁰ অদোসো কুসলমূলং। তসাতি যেসং তসিতা তণ্হা অপ্পহীনা, যেসঞ্চ ভযভেরৰা অপ্পহীনা। কিংকারণা ৰুচ্চন্তি তসা? তে তসন্তি উত্তসন্তি পরিতসন্তি ভাযন্তি সন্তাসং আপজ্জন্তি; তংকারণা ৰুচ্চন্তি তসা। থাৰরাতি যেসং তসিতা তণ্হা পহীনা, যেসঞ্চ ভযভেরৰা পহীনা। কিংকারণা ৰুচ্চন্তি থাৰরা? তে ন তসন্তি ন উত্তসন্তি ন পরিতসন্তি ন ভাযন্তি সন্তাসং ন আপজ্জন্তি; তংকারণা ৰুচ্চন্তি থাৰরা। মেত্তায ফস্সে তসথাৰরানীতি। তসে চ থাৰরে চ মেত্তায ফস্সেয্য ফরেয্য, মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরেয্যাতি – মেত্তায ফস্সে তসথাৰরানি।

Mettāya phasse tasathāvarānīti. Mettāti yā sattesu metti mettāyanā mettāyitattaṃ anudayā anudayanā anudayitattaṃ ⁹¹ hitesitā anukampā abyāpādo abyāpajjo ⁹² adoso kusalamūlaṃ. Tasāti yesaṃ tasitā taṇhā appahīnā, yesañca bhayabheravā appahīnā. Kiṃkāraṇā vuccanti tasā? Te tasanti uttasanti paritasanti bhāyanti santāsaṃ āpajjanti; taṃkāraṇā vuccanti tasā. Thāvarāti yesaṃ tasitā taṇhā pahīnā, yesañca bhayabheravā pahīnā. Kiṃkāraṇā vuccanti thāvarā? Te na tasanti na uttasanti na paritasanti na bhāyanti santāsaṃ na āpajjanti; taṃkāraṇā vuccanti thāvarā. Mettāya phasse tasathāvarānīti. Tase ca thāvare ca mettāya phasseyya phareyya, mettāsahagatena cetasā vipulena mahaggatena appamāṇena averena abyāpajjena pharitvā vihareyyāti – mettāya phasse tasathāvarāni.

যদাৰিলত্তং মনসো ৰিজঞ্ঞাতি। যদাতি যদা। মনসোতি যং চিত্তং মনো মানসং হদযং পণ্ডরং মনো মনাযতনং মনিন্দ্রিযং ৰিঞ্ঞাণং ৰিঞ্ঞাণক্খন্ধো তজ্জা মনোৰিঞ্ঞাণধাতু। কাযদুচ্চরিতেন চিত্তং আৰিলং হোতি লুল়িতং এরিতং ঘট্টিতং চলিতং ভন্তং অৰূপসন্তং। ৰচীদুচ্চরিতেন…পে॰… মনোদুচ্চরিতেন… রাগেন… দোসেন… মোহেন… কোধেন… উপনাহেন… মক্খেন… পল়াসেন… ইস্সায… মচ্ছরিযেন… মাযায… সাঠেয্যেন… থম্ভেন… সারম্ভেন… মানেন… অতিমানেন… মদেন… পমাদেন… সব্বকিলেসেহি… সব্বদুচ্চরিতেহি… সব্বদরথেহি… সব্বপরিল়াহেহি… সব্বসন্তাপেহি… সব্বাকুসলাভিসঙ্খারেহি চিত্তং আৰিলং হোতি লুল়িতং এরিতং ঘট্টিতং চলিতং ভন্তং অৰূপসন্তং। যদাৰিলত্তং মনসো ৰিজঞ্ঞাতি। চিত্তস্স আৰিলভাৰং জানেয্য আজানেয্য ৰিজানেয্য পটিৰিজানেয্য পটিৰিজ্ঝেয্যাতি – যদাৰিলত্তং মনসো ৰিজঞ্ঞা।

Yadāvilattaṃ manaso vijaññāti. Yadāti yadā. Manasoti yaṃ cittaṃ mano mānasaṃ hadayaṃ paṇḍaraṃ mano manāyatanaṃ manindriyaṃ viññāṇaṃ viññāṇakkhandho tajjā manoviññāṇadhātu. Kāyaduccaritena cittaṃ āvilaṃ hoti luḷitaṃ eritaṃ ghaṭṭitaṃ calitaṃ bhantaṃ avūpasantaṃ. Vacīduccaritena…pe… manoduccaritena… rāgena… dosena… mohena… kodhena… upanāhena… makkhena… paḷāsena… issāya… macchariyena… māyāya… sāṭheyyena… thambhena… sārambhena… mānena… atimānena… madena… pamādena… sabbakilesehi… sabbaduccaritehi… sabbadarathehi… sabbapariḷāhehi… sabbasantāpehi… sabbākusalābhisaṅkhārehi cittaṃ āvilaṃ hoti luḷitaṃ eritaṃ ghaṭṭitaṃ calitaṃ bhantaṃ avūpasantaṃ. Yadāvilattaṃ manaso vijaññāti. Cittassa āvilabhāvaṃ jāneyya ājāneyya vijāneyya paṭivijāneyya paṭivijjheyyāti – yadāvilattaṃ manaso vijaññā.

কণ্হস্স পক্খোতি ৰিনোদযেয্যাতি। কণ্হোতি যো সো মারো কণ্হো অধিপতি অন্তগু নমুচি পমত্তবন্ধু। কণ্হস্স পক্খো মারপক্খো মারপাসো মারবল়িসং মারামিসং মারৰিসযো মারনিৰাসো মারগোচরো মারবন্ধনন্তি পজহেয্য ৰিনোদেয্য ব্যন্তিং করেয্য অনভাৰং গমেয্যাতি। এৰম্পি কণ্হস্স পক্খোতি ৰিনোদযেয্য। অথ ৰা কণ্হস্স পক্খো মারপক্খো অকুসলপক্খো দুক্খুদ্দযো দুক্খৰিপাকো নিরযসংৰত্তনিকো তিরচ্ছানযোনিসংৰত্তনিকো পেত্তিৰিসযসংৰত্তনিকোতি পজহেয্য ৰিনোদেয্য ব্যন্তিং করেয্য অনভাৰং গমেয্যাতি। এৰম্পি কণ্হস্স পক্খোতি ৰিনোদযেয্য।

Kaṇhassa pakkhoti vinodayeyyāti. Kaṇhoti yo so māro kaṇho adhipati antagu namuci pamattabandhu. Kaṇhassa pakkho mārapakkho mārapāso mārabaḷisaṃ mārāmisaṃ māravisayo māranivāso māragocaro mārabandhananti pajaheyya vinodeyya byantiṃ kareyya anabhāvaṃ gameyyāti. Evampi kaṇhassa pakkhoti vinodayeyya. Atha vā kaṇhassa pakkho mārapakkho akusalapakkho dukkhuddayo dukkhavipāko nirayasaṃvattaniko tiracchānayonisaṃvattaniko pettivisayasaṃvattanikoti pajaheyya vinodeyya byantiṃ kareyya anabhāvaṃ gameyyāti. Evampi kaṇhassa pakkhoti vinodayeyya.

তেনাহ ভগৰা –

Tenāha bhagavā –

‘‘থেয্যং ন কারে ন মুসা ভণেয্য, মেত্তায ফস্সে তসথাৰরানি।

‘‘Theyyaṃ na kāre na musā bhaṇeyya, mettāya phasse tasathāvarāni;

যদাৰিলত্তং মনসো ৰিজঞ্ঞা, কণ্হস্স পক্খোতি ৰিনোদযেয্যা’’তি॥

Yadāvilattaṃ manaso vijaññā, kaṇhassa pakkhoti vinodayeyyā’’ti.

২০৩.

203.

কোধাতিমানস্স ৰসং ন গচ্ছে, মূলম্পি তেসং পলিখঞ্ঞ তিট্ঠে।

Kodhātimānassa vasaṃ na gacche, mūlampi tesaṃ palikhañña tiṭṭhe;

অথপ্পিযং ৰা পন অপ্পিযং ৰা, অদ্ধা ভৰন্তো অভিসম্ভৰেয্য॥

Athappiyaṃ vā pana appiyaṃ vā, addhā bhavanto abhisambhaveyya.

কোধাতিমানস্স ৰসং ন গচ্ছেতি। কোধোতি যো চিত্তস্স আঘাতো পটিঘাতো…পে॰… চণ্ডিক্কং অসুরোপো অনত্তমনতা চিত্তস্স। অতিমানোতি ইধেকচ্চো পরং অতিমঞ্ঞতি জাতিযা ৰা গোত্তেন ৰা…পে॰… অঞ্ঞতরঞ্ঞতরেন ৰা ৰত্থুনা। কোধাতিমানস্স ৰসং ন গচ্ছেতি। কোধস্স চ অতিমানস্স চ ৰসং ন গচ্ছেয্য, কোধঞ্চ অতিমানঞ্চ পজহেয্য ৰিনোদেয্য ব্যন্তিং করেয্য অনভাৰং গমেয্যাতি – কোধাতিমানস্স ৰসং ন গচ্ছে।

Kodhātimānassa vasaṃ na gaccheti. Kodhoti yo cittassa āghāto paṭighāto…pe… caṇḍikkaṃ asuropo anattamanatā cittassa. Atimānoti idhekacco paraṃ atimaññati jātiyā vā gottena vā…pe… aññataraññatarena vā vatthunā. Kodhātimānassa vasaṃ na gaccheti. Kodhassa ca atimānassa ca vasaṃ na gaccheyya, kodhañca atimānañca pajaheyya vinodeyya byantiṃ kareyya anabhāvaṃ gameyyāti – kodhātimānassa vasaṃ na gacche.

মূলম্পি তেসং পলিখঞ্ঞ তিট্ঠেতি। কতমং কোধস্স মূলং? অৰিজ্জা মূলং, অযোনিসো মনসিকারো মূলং, অস্মিমানো মূলং, অহিরিকং মূলং, অনোত্তপ্পং মূলং, উদ্ধচ্চং মূলং – ইদং কোধস্স মূলং। কতমং অতিমানস্স মূলং? অৰিজ্জা মূলং, অযোনিসো মনসিকারো মূলং, অস্মিমানো মূলং, অহিরিকং মূলং , অনোত্তপ্পং মূলং, উদ্ধচ্চং মূলং – ইদং অতিমানস্স মূলং। মূলম্পি তেসং পলিখঞ্ঞ তিট্ঠেতি। কোধস্স চ অতিমানস্স চ মূলং পলিখণিত্ৰা উদ্ধরিত্ৰা সমুদ্ধরিত্ৰা উপ্পাটযিত্ৰা সমুপ্পাটযিত্ৰা পজহিত্ৰা ৰিনোদেত্ৰা ব্যন্তিং করিত্ৰা অনভাৰং গমেত্ৰা তিট্ঠেয্য সন্তিট্ঠেয্যাতি – মূলম্পি তেসং পলিখঞ্ঞ তিট্ঠে।

Mūlampitesaṃ palikhañña tiṭṭheti. Katamaṃ kodhassa mūlaṃ? Avijjā mūlaṃ, ayoniso manasikāro mūlaṃ, asmimāno mūlaṃ, ahirikaṃ mūlaṃ, anottappaṃ mūlaṃ, uddhaccaṃ mūlaṃ – idaṃ kodhassa mūlaṃ. Katamaṃ atimānassa mūlaṃ? Avijjā mūlaṃ, ayoniso manasikāro mūlaṃ, asmimāno mūlaṃ, ahirikaṃ mūlaṃ , anottappaṃ mūlaṃ, uddhaccaṃ mūlaṃ – idaṃ atimānassa mūlaṃ. Mūlampi tesaṃ palikhañña tiṭṭheti. Kodhassa ca atimānassa ca mūlaṃ palikhaṇitvā uddharitvā samuddharitvā uppāṭayitvā samuppāṭayitvā pajahitvā vinodetvā byantiṃ karitvā anabhāvaṃ gametvā tiṭṭheyya santiṭṭheyyāti – mūlampi tesaṃ palikhañña tiṭṭhe.

অথপ্পিযং ৰা পন অপ্পিযং ৰা, অদ্ধা ভৰন্তো অভিসম্ভৰৈয্যাতি। অথাতি পদসন্ধি পদসংসগ্গো পদপারিপূরী অক্খরসমৰাযো ব্যঞ্জনসিলিট্ঠতা পদানুপুব্বতাপেতং – অথাতি। পিযাতি দ্ৰে পিযা – সত্তা ৰা সঙ্খারা ৰা। কতমে সত্তা পিযা? ইধ যাস্স ⁹³ তে হোন্তি অত্থকামা হিতকামা ফাসুকামা যোগক্খেমকামা মাতা ৰা পিতা ৰা ভাতা ৰা ভগিনী ৰা পুত্তা ৰা ধীতা ৰা মিত্তা ৰা অমচ্চা ৰা ঞাতী ৰা সালোহিতা ৰা – ইমে সত্তা পিযা। কতমে সঙ্খারা পিযা? মনাপিকা রূপা মনাপিকা সদ্দা… গন্ধা… রসা… ফোট্ঠব্বা – ইমে সঙ্খারা পিযা। অপ্পিযাতি দ্ৰে অপ্পিযা – সত্তা ৰা সঙ্খারা ৰা। কতমে সত্তা অপ্পিযা? ইধ যাস্স তে হোন্তি অনত্থকামা অহিতকামা অফাসুকামা অযোগক্খেমকামা জীৰিতা ৰোরোপেতুকামা – ইমে সত্তা অপ্পিযা। কতমে সঙ্খারা অপ্পিযা? অমনাপিকা রূপা অমনাপিকা সদ্দা, গন্ধা… রসা… ফোট্ঠব্বা – ইমে সঙ্খারা অপ্পিযা। অদ্ধাতি একংসৰচনং নিস্সংসযৰচনং নিক্কঙ্খৰচনং অদ্ৰেজ্ঝৰচনং অদ্ৰেল়্হকৰচনং নিয্যানিকৰচনং অপণ্ণকৰচনং অৰত্থাপনৰচনমেতং – অদ্ধাতি। অথপ্পিযং ৰা পন অপ্পিযং ৰা, অদ্ধা ভৰন্তো অভিসম্ভৰেয্যাতি। পিযাপ্পিযং সাতাসাতং সুখদুক্খং সোমনস্সদোমনস্সং ইট্ঠানিট্ঠং অভিসম্ভৰন্তো ৰা অভিভৰেয্য অধিভৰন্তো ৰা অভিসম্ভৰেয্যাতি – অথপ্পিযং ৰা পন অপ্পিযং ৰা অদ্ধা ভৰন্তো অভিসম্ভৰেয্য।

Athappiyaṃ vā pana appiyaṃ vā, addhā bhavanto abhisambhavैyyāti. Athāti padasandhi padasaṃsaggo padapāripūrī akkharasamavāyo byañjanasiliṭṭhatā padānupubbatāpetaṃ – athāti. Piyāti dve piyā – sattā vā saṅkhārā vā. Katame sattā piyā? Idha yāssa ⁹⁴ te honti atthakāmā hitakāmā phāsukāmā yogakkhemakāmā mātā vā pitā vā bhātā vā bhaginī vā puttā vā dhītā vā mittā vā amaccā vā ñātī vā sālohitā vā – ime sattā piyā. Katame saṅkhārā piyā? Manāpikā rūpā manāpikā saddā… gandhā… rasā… phoṭṭhabbā – ime saṅkhārā piyā. Appiyāti dve appiyā – sattā vā saṅkhārā vā. Katame sattā appiyā? Idha yāssa te honti anatthakāmā ahitakāmā aphāsukāmā ayogakkhemakāmā jīvitā voropetukāmā – ime sattā appiyā. Katame saṅkhārā appiyā? Amanāpikā rūpā amanāpikā saddā, gandhā… rasā… phoṭṭhabbā – ime saṅkhārā appiyā. Addhāti ekaṃsavacanaṃ nissaṃsayavacanaṃ nikkaṅkhavacanaṃ advejjhavacanaṃ adveḷhakavacanaṃ niyyānikavacanaṃ apaṇṇakavacanaṃ avatthāpanavacanametaṃ – addhāti. Athappiyaṃ vā pana appiyaṃ vā, addhā bhavanto abhisambhaveyyāti. Piyāppiyaṃ sātāsātaṃ sukhadukkhaṃ somanassadomanassaṃ iṭṭhāniṭṭhaṃ abhisambhavanto vā abhibhaveyya adhibhavanto vā abhisambhaveyyāti – athappiyaṃ vā pana appiyaṃ vā addhā bhavanto abhisambhaveyya.

তেনাহ ভগৰা –

Tenāha bhagavā –

‘‘কোধাতিমানস্স ৰসং ন গচ্ছে, মূলম্পি তেসং পলিখঞ্ঞ তিট্ঠে।

‘‘Kodhātimānassa vasaṃ na gacche, mūlampi tesaṃ palikhañña tiṭṭhe;

অথপ্পিযং ৰা পন অপ্পিযং ৰা, অদ্ধা ভৰন্তো অভিসম্ভৰেয্যা’’তি॥

Athappiyaṃ vā pana appiyaṃ vā, addhā bhavanto abhisambhaveyyā’’ti.

২০৪.

204.

পঞ্ঞং পুরক্খত্ৰা কল্যাণপীতি, ৰিক্খম্ভযে তানি পরিস্সযানি।

Paññaṃpurakkhatvā kalyāṇapīti, vikkhambhaye tāni parissayāni;

অরতিং সহেথ সযনম্হি পন্তে, চতুরো সহেথ পরিদেৰধম্মে॥

Aratiṃ sahetha sayanamhi pante, caturo sahetha paridevadhamme.

পঞ্ঞং পুরক্খত্ৰা কল্যাণপীতীতি। পঞ্ঞাতি যা পঞ্ঞা পজাননা ৰিচযো পৰিচযো ধম্মৰিচযো…পে॰… অমোহো সম্মাদিট্ঠি। পঞ্ঞং পুরক্খত্ৰাতি ইধেকচ্চো পঞ্ঞং পুরতো কত্ৰা চরতি পঞ্ঞাধজো পঞ্ঞাকেতু পঞ্ঞাধিপতেয্যো ৰিচযবহুলো পৰিচযবহুলো পেক্খাযনবহুলো ⁹⁵ সম্পেক্খাযনবহুলো ⁹⁶ ৰিভূতৰিহারী তচ্চরিতো তব্বহুলো তগ্গরুকো তন্নিন্নো তপ্পোণো তপ্পব্ভারো তদধিমুত্তো তদধিপতেয্যোতি। এৰম্পি পঞ্ঞং পুরক্খত্ৰা।

Paññaṃ purakkhatvā kalyāṇapītīti. Paññāti yā paññā pajānanā vicayo pavicayo dhammavicayo…pe… amoho sammādiṭṭhi. Paññaṃ purakkhatvāti idhekacco paññaṃ purato katvā carati paññādhajo paññāketu paññādhipateyyo vicayabahulo pavicayabahulo pekkhāyanabahulo ⁹⁷ sampekkhāyanabahulo ⁹⁸ vibhūtavihārī taccarito tabbahulo taggaruko tanninno tappoṇo tappabbhāro tadadhimutto tadadhipateyyoti. Evampi paññaṃ purakkhatvā.

অথ ৰা গচ্ছন্তো ৰা ‘‘গচ্ছামী’’তি পজানাতি, ঠিতো ৰা ‘‘ঠিতোম্হী’’তি পজানাতি, নিসিন্নো ৰা ‘‘নিসিন্নোম্হী’’তি পজানাতি, সযানো ৰা ‘‘সযানোম্হী’’তি পজানাতি, যথা যথা ৰা পনস্স কাযো পণিহিতো হোতি তথা তথা নং পজানাতীতি। এৰম্পি পঞ্ঞং পুরক্খত্ৰা।

Atha vā gacchanto vā ‘‘gacchāmī’’ti pajānāti, ṭhito vā ‘‘ṭhitomhī’’ti pajānāti, nisinno vā ‘‘nisinnomhī’’ti pajānāti, sayāno vā ‘‘sayānomhī’’ti pajānāti, yathā yathā vā panassa kāyo paṇihito hoti tathā tathā naṃ pajānātīti. Evampi paññaṃ purakkhatvā.

অথ ৰা অভিক্কন্তে পটিক্কন্তে সম্পজানকারী হোতি, আলোকিতে ৰিলোকিতে সম্পজানকারী হোতি, সমিঞ্জিতে পসারিতে সম্পজানকারী হোতি, সঙ্ঘাটিপত্তচীৰরধারণে সম্পজানকারী হোতি, অসিতে পীতে খাযিতে সাযিতে সম্পজানকারী হোতি, উচ্চারপস্সাৰকম্মে সম্পজানকারী হোতি, গতে ঠিতে নিসিন্নে সুত্তে জাগরিতে ভাসিতে তুণ্হিভাৰে সম্পজানকারী হোতীতি। এৰম্পি পঞ্ঞং পুরক্খত্ৰা।

Atha vā abhikkante paṭikkante sampajānakārī hoti, ālokite vilokite sampajānakārī hoti, samiñjite pasārite sampajānakārī hoti, saṅghāṭipattacīvaradhāraṇe sampajānakārī hoti, asite pīte khāyite sāyite sampajānakārī hoti, uccārapassāvakamme sampajānakārī hoti, gate ṭhite nisinne sutte jāgarite bhāsite tuṇhibhāve sampajānakārī hotīti. Evampi paññaṃ purakkhatvā.

কল্যাণপীতীতি বুদ্ধানুস্সতিৰসেন উপ্পজ্জতি পীতি পামোজ্জং ⁹⁹ – কল্যাণপীতীতি। ধম্মানুস্সতি সঙ্ঘানুস্সতি সীলানুস্সতি চাগানুস্সতি দেৰতানুস্সতি আনাপানস্সতি মরণস্সতি কাযগতাসতিৰসেন উপসমানুস্সতিৰসেন উপ্পজ্জতি পীতি পামোজ্জং – কল্যাণপীতীতি – পঞ্ঞং পুরক্খত্ৰা কল্যাণপীতি।

Kalyāṇapītīti buddhānussativasena uppajjati pīti pāmojjaṃ ¹⁰⁰ – kalyāṇapītīti. Dhammānussati saṅghānussati sīlānussati cāgānussati devatānussati ānāpānassati maraṇassati kāyagatāsativasena upasamānussativasena uppajjati pīti pāmojjaṃ – kalyāṇapītīti – paññaṃ purakkhatvā kalyāṇapīti.

ৰিক্খম্ভযে তানি পরিস্সযানীতি। পরিস্সযাতি দ্ৰে পরিস্সযা – পাকটপরিস্সযা চ পটিচ্ছন্নপরিস্সযা চ…পে॰… ইমে ৰুচ্চন্তি পাকটপরিস্সযা…পে॰… ইমে ৰুচ্চন্তি পটিচ্ছন্নপরিস্সযা…পে॰… এৰম্পি তত্রাসযাতি – পরিস্সযা। ৰিক্খম্ভযে তানি পরিস্সযানীতি। তানি পরিস্সযানি ৰিক্খম্ভেয্য অভিভৰেয্য অজ্ঝোত্থরেয্য পরিযাদিযেয্য মদ্দেয্যাতি – ৰিক্খম্ভযে তানি পরিস্সযানি।

Vikkhambhaye tāni parissayānīti. Parissayāti dve parissayā – pākaṭaparissayā ca paṭicchannaparissayā ca…pe… ime vuccanti pākaṭaparissayā…pe… ime vuccanti paṭicchannaparissayā…pe… evampi tatrāsayāti – parissayā. Vikkhambhaye tāni parissayānīti. Tāni parissayāni vikkhambheyya abhibhaveyya ajjhotthareyya pariyādiyeyya maddeyyāti – vikkhambhaye tāni parissayāni.

অরতিং সহেথ সযনম্হি পন্তেতি। অরতীতি যা অরতি অরতিতা অনভিরতি অনভিরমণা ¹⁰¹ উক্কণ্ঠিতা পরিতস্সিতা। সযনম্হি পন্তেতি পন্তেসু ৰা সেনাসনেসু অঞ্ঞতরঞ্ঞতরেসু ৰা অধিকুসলেসু ধম্মেসু অরতিং সহেয্য অভিভৰেয্য অজ্ঝোত্থরেয্য পরিযাদিযেয্য মদ্দেয্যাতি – অরতিং সহেথ সযনম্হি পন্তে।

Aratiṃ sahetha sayanamhi panteti. Aratīti yā arati aratitā anabhirati anabhiramaṇā ¹⁰² ukkaṇṭhitā paritassitā. Sayanamhi panteti pantesu vā senāsanesu aññataraññataresu vā adhikusalesu dhammesu aratiṃ saheyya abhibhaveyya ajjhotthareyya pariyādiyeyya maddeyyāti – aratiṃ sahetha sayanamhi pante.

চতুরো সহেথ পরিদেৰধম্মেতি। চত্তারো পরিদেৰনীযে ধম্মে সহেয্য পরিসহেয্য অভিভৰেয্য অজ্ঝোত্থরেয্য পরিযাদিযেয্য মদ্দেয্যাতি – চতুরো সহেথ পরিদেৰধম্মে।

Caturo sahetha paridevadhammeti. Cattāro paridevanīye dhamme saheyya parisaheyya abhibhaveyya ajjhotthareyya pariyādiyeyya maddeyyāti – caturo sahetha paridevadhamme.

তেনাহ ভগৰা –

Tenāha bhagavā –

‘‘পঞ্ঞং পুরক্খত্ৰা কল্যাণপীতি, ৰিক্খম্ভযে তানি পরিস্সযানি।

‘‘Paññaṃ purakkhatvā kalyāṇapīti, vikkhambhaye tāni parissayāni;

অরতিং সহেথ সযনম্হি পন্তে, চতুরো সহেথ পরিদেৰধম্মে’’তি॥

Aratiṃ sahetha sayanamhi pante, caturo sahetha paridevadhamme’’ti.

২০৫.

205.

কিংসূ অসিস্সং কুৰ ৰা ¹⁰³ অসিস্সং, দুক্খং ৰত সেত্থ কুৰজ্জ সেস্সং।

Kiṃsū asissaṃ kuva vā¹⁰⁴asissaṃ, dukkhaṃ vata settha kuvajja sessaṃ;

এতে ৰিতক্কে পরিদেৰনেয্যে, ৰিনযেথ সেখো অনিকেতচারী ¹⁰⁵ ॥

Ete vitakke paridevaneyye, vinayetha sekho aniketacārī¹⁰⁶.

কিংসূ অসিস্সং কুৰ ৰা অসিস্সন্তি। কিংসূ অসিস্সামীতি কিং ভুঞ্জিস্সামি ওদনং ৰা কুম্মাসং ৰা সত্তুং ৰা মচ্ছং ৰা মংসং ৰাতি – কিংসূ অসিস্সং। কুৰ ৰা অসিস্সন্তি কত্থ ভুঞ্জিস্সামি খত্তিযকুলে ৰা ব্রাহ্মণকুলে ৰা ৰেস্সকুলে ৰা সুদ্দকুলে ৰাতি – কিংসূ অসিস্সং কুৰ ৰা অসিস্সং।

Kiṃsūasissaṃ kuva vā asissanti. Kiṃsū asissāmīti kiṃ bhuñjissāmi odanaṃ vā kummāsaṃ vā sattuṃ vā macchaṃ vā maṃsaṃ vāti – kiṃsū asissaṃ. Kuva vā asissanti kattha bhuñjissāmi khattiyakule vā brāhmaṇakule vā vessakule vā suddakule vāti – kiṃsū asissaṃ kuva vā asissaṃ.

দুক্খং ৰত সেত্থ কুৰজ্জ সেস্সন্তি ইমং রত্তিং দুক্খং সযিত্থ ফলকে ৰা তট্টিকায ৰা চম্মখণ্ডে ৰা তিণসন্থারে ৰা পণ্ণসন্থারে ৰা পলালসন্থারে ৰা। আগামিরত্তিং ¹⁰⁷ কত্থ সুখং সযিস্সামি মঞ্চে ৰা পীঠে ৰা ভিসিযা ৰা বিম্বোহনে ৰা ৰিহারে ৰা অড্ঢযোগে ৰা পাসাদে ৰা হম্মিযে ৰা গুহায ৰাতি – দুক্খং ৰত সেত্থ কুৰজ্জ সেস্সং।

Dukkhaṃ vata settha kuvajja sessanti imaṃ rattiṃ dukkhaṃ sayittha phalake vā taṭṭikāya vā cammakhaṇḍe vā tiṇasanthāre vā paṇṇasanthāre vā palālasanthāre vā. Āgāmirattiṃ ¹⁰⁸ kattha sukhaṃ sayissāmi mañce vā pīṭhe vā bhisiyā vā bimbohane vā vihāre vā aḍḍhayoge vā pāsāde vā hammiye vā guhāya vāti – dukkhaṃ vata settha kuvajja sessaṃ.

এতে ৰিতক্কে পরিদেৰনেয্যেতি। এতে ৰিতক্কেতি দ্ৰে পিণ্ডপাতপটিসঞ্ঞুত্তে ৰিতক্কে, দ্ৰে সেনাসনপটিসঞ্ঞুত্তে ৰিতক্কে। পরিদেৰনেয্যেতি আদেৰনেয্যে পরিদেৰনেয্যেতি – এতে ৰিতক্কে পরিদেৰনেয্যে।

Etevitakke paridevaneyyeti. Ete vitakketi dve piṇḍapātapaṭisaññutte vitakke, dve senāsanapaṭisaññutte vitakke. Paridevaneyyeti ādevaneyye paridevaneyyeti – ete vitakke paridevaneyye.

ৰিনযেথ সেখো অনিকেতচারীতি। সেখোতি কিংকারণা ৰুচ্চতি সেখো? সিক্খতীতি – সেখো। কিঞ্চ সিক্খতি? অধিসীলম্পি সিক্খতি, অধিচিত্তম্পি সিক্খতি, অধিপঞ্ঞম্পি সিক্খতি। কতমা অধিসীলসিক্খা…পে॰… অযং অধিপঞ্ঞাসিক্খা। ইমা তিস্সো সিক্খাযো আৰজ্জন্তো সিক্খতি, জানন্তো পস্সন্তো পচ্চৰেক্খন্তো চিত্তং অধিট্ঠহন্তো সিক্খতি, সদ্ধায অধিমুচ্চন্তো সিক্খতি, ৰীরিযং পগ্গণ্হন্তো, সতিং উপট্ঠপেন্তো, চিত্তং সমাদহন্তো, পঞ্ঞায পজানন্তো সিক্খতি, অভিঞ্ঞেয্যং অভিজানন্তো সিক্খতি, পরিঞ্ঞেয্যং পরিজানন্তো, পহাতব্বং পজহন্তো, ভাৰেতব্বং ভাৰেন্তো, সচ্ছিকাতব্বং সচ্ছিকরোন্তো সিক্খতি আচরতি সমাচরতি সমাদায সিক্খতি। তংকারণা ৰুচ্চতি – সেখো। ৰিনযায পটিৰিনযায পহানায ৰূপসমায পটিনিস্সগ্গায পটিপস্সদ্ধিযা অধিসীলম্পি সিক্খেয্য, অধিচিত্তম্পি সিক্খেয্য, অধিপঞ্ঞম্পি সিক্খেয্য। ইমা তিস্সো সিক্খাযো আৰজ্জন্তো সিক্খেয্য জানন্তো…পে॰… সচ্ছিকাতব্বং সচ্ছিকরোন্তো সিক্খেয্য আচরেয্য সমাচরেয্য সমাদায ৰত্তেয্যাতি – ৰিনযেথ সেখো।

Vinayetha sekho aniketacārīti. Sekhoti kiṃkāraṇā vuccati sekho? Sikkhatīti – sekho. Kiñca sikkhati? Adhisīlampi sikkhati, adhicittampi sikkhati, adhipaññampi sikkhati. Katamā adhisīlasikkhā…pe… ayaṃ adhipaññāsikkhā. Imā tisso sikkhāyo āvajjanto sikkhati, jānanto passanto paccavekkhanto cittaṃ adhiṭṭhahanto sikkhati, saddhāya adhimuccanto sikkhati, vīriyaṃ paggaṇhanto, satiṃ upaṭṭhapento, cittaṃ samādahanto, paññāya pajānanto sikkhati, abhiññeyyaṃ abhijānanto sikkhati, pariññeyyaṃ parijānanto, pahātabbaṃ pajahanto, bhāvetabbaṃ bhāvento, sacchikātabbaṃ sacchikaronto sikkhati ācarati samācarati samādāya sikkhati. Taṃkāraṇā vuccati – sekho. Vinayāya paṭivinayāya pahānāya vūpasamāya paṭinissaggāya paṭipassaddhiyā adhisīlampi sikkheyya, adhicittampi sikkheyya, adhipaññampi sikkheyya. Imā tisso sikkhāyo āvajjanto sikkheyya jānanto…pe… sacchikātabbaṃ sacchikaronto sikkheyya ācareyya samācareyya samādāya vatteyyāti – vinayetha sekho.

অনিকেতচারীতি । কথং নিকেতচারী হোতি? ইধেকচ্চো কুলপলিবোধেন সমন্নাগতো হোতি, গণপলিবোধেন… আৰাসপলিবোধেন… চীৰরপলিবোধেন… পিণ্ডপাতপলিবোধেন… সেনাসনপলিবোধেন… গিলানপচ্চযভেসজ্জপরিক্খারপলিবোধেন সমন্নাগতো হোতি। এৰং নিকেতচারী হোতি। কথং অনিকেতচারী হোতি? ইধ ভিক্খু ন কুলপলিবোধেন সমন্নাগতো হোতি, ন গণপলিবোধেন… ন আৰাসপলিবোধেন… ন চীৰরপলিবোধেন… ন পিণ্ডপাতপলিবোধেন… ন সেনাসনপলিবোধেন… ন গিলানপচ্চযভেসজ্জপরিক্খারপলিবোধেন সমন্নাগতো হোতি। এৰং অনিকেতচারী হোতি।

Aniketacārīti . Kathaṃ niketacārī hoti? Idhekacco kulapalibodhena samannāgato hoti, gaṇapalibodhena… āvāsapalibodhena… cīvarapalibodhena… piṇḍapātapalibodhena… senāsanapalibodhena… gilānapaccayabhesajjaparikkhārapalibodhena samannāgato hoti. Evaṃ niketacārī hoti. Kathaṃ aniketacārī hoti? Idha bhikkhu na kulapalibodhena samannāgato hoti, na gaṇapalibodhena… na āvāsapalibodhena… na cīvarapalibodhena… na piṇḍapātapalibodhena… na senāsanapalibodhena… na gilānapaccayabhesajjaparikkhārapalibodhena samannāgato hoti. Evaṃ aniketacārī hoti.

‘‘মগধং গতা কোসলং গতা, একচ্চিযা পন ৰজ্জিভূমিযা।

‘‘Magadhaṃ gatā kosalaṃ gatā, ekacciyā pana vajjibhūmiyā;

মিগা ৰিয অসঙ্ঘচারিনো ¹⁰⁹, অনিকেতা ৰিহরন্তি ভিক্খৰো॥

Migā viya asaṅghacārino ¹¹⁰, aniketā viharanti bhikkhavo.

‘‘সাধু চরিতকং সাধু সুচরিতং, সাধু সদা অনিকেতৰিহারো।

‘‘Sādhu caritakaṃ sādhu sucaritaṃ, sādhu sadā aniketavihāro;

অত্থপুচ্ছনং পদক্খিণং কম্মং, এতং সামঞ্ঞং অকিঞ্চনস্সা’’তি॥

Atthapucchanaṃ padakkhiṇaṃ kammaṃ, etaṃ sāmaññaṃ akiñcanassā’’ti.

ৰিনযেথ সেখো অনিকেতচারী। তেনাহ ভগৰা –

Vinayetha sekho aniketacārī. Tenāha bhagavā –

‘‘কিংসূ অসিস্সং কুৰ ৰা অসিস্সং, দুক্খং ৰত সেত্থ কুৰজ্জ সেস্সং।

‘‘Kiṃsū asissaṃ kuva vā asissaṃ, dukkhaṃ vata settha kuvajja sessaṃ;

এতে ৰিতক্কে পরিদেৰনেয্যে, ৰিনযেথ সেখো অনিকেতচারী’’তি॥

Ete vitakke paridevaneyye, vinayetha sekho aniketacārī’’ti.

২০৬.

206.

অন্নঞ্চ লদ্ধা ৰসনঞ্চ কালে, মত্তং স জঞ্ঞা ¹¹¹ ইধ তোসনত্থং।

Annañca laddhā vasanañca kāle, mattaṃ sa jaññā¹¹²idha tosanatthaṃ;

সো তেসু গুত্তো যতচারি গামে, রুসিতোপি ¹¹³ ৰাচং ফরুসং ন ৰজ্জা॥

So tesu gutto yatacāri gāme, rusitopi¹¹⁴vācaṃ pharusaṃ na vajjā.

অন্নঞ্চ লদ্ধা ৰসনঞ্চ কালেতি। অন্নন্তি ওদনো কুম্মাসো সত্তু মচ্ছো মংসং। ৰসনন্তি ছ চীৰরানি – খোমং, কপ্পাসিকং, কোসেয্যং, কম্বলং, সাণং, ভঙ্গং। অন্নঞ্চ লদ্ধা ৰসনঞ্চ কালেতি। চীৰরং লভিত্ৰা পিণ্ডপাতং লভিত্ৰা ন কুহনায, ন লপনায, ন নেমিত্তিকতায, ন নিপ্পেসিকতায, ন লাভেন লাভং নিজিগীসনতায, ন দারুদানেন, ন ৰেল়ুদানেন, ন পত্তদানেন, ন পুপ্ফদানেন, ন ফলদানেন, ন সিনানদানেন, ন চুণ্ণদানেন, ন মত্তিকাদানেন, ন দন্তকট্ঠদানেন, ন মুখোদকদানেন, ন চাতুকম্যতায, ন মুগ্গসূপ্যতায, ন পারিভট্যতায, ন পীঠমদ্দিকতায, ন ৰত্থুৰিজ্জায, ন তিরচ্ছানৰিজ্জায, ন অঙ্গৰিজ্জায, ন নক্খত্তৰিজ্জায, ন দূতগমনেন, ন পহিণগমনেন, ন জঙ্ঘপেসনিকেন, ন ৰেজ্জকম্মেন, ন পিণ্ডপটিপিণ্ডকেন, ন দানানুপ্পদানেন ধম্মেন সমেন লদ্ধা লভিত্ৰা অধিগন্ত্ৰা ৰিন্দিত্ৰা পটিলভিত্ৰাতি – অন্নঞ্চ লদ্ধা ৰসনঞ্চ কালে।

Annañca laddhā vasanañca kāleti. Annanti odano kummāso sattu maccho maṃsaṃ. Vasananti cha cīvarāni – khomaṃ, kappāsikaṃ, koseyyaṃ, kambalaṃ, sāṇaṃ, bhaṅgaṃ. Annañca laddhā vasanañca kāleti. Cīvaraṃ labhitvā piṇḍapātaṃ labhitvā na kuhanāya, na lapanāya, na nemittikatāya, na nippesikatāya, na lābhena lābhaṃ nijigīsanatāya, na dārudānena, na veḷudānena, na pattadānena, na pupphadānena, na phaladānena, na sinānadānena, na cuṇṇadānena, na mattikādānena, na dantakaṭṭhadānena, na mukhodakadānena, na cātukamyatāya, na muggasūpyatāya, na pāribhaṭyatāya, na pīṭhamaddikatāya, na vatthuvijjāya, na tiracchānavijjāya, na aṅgavijjāya, na nakkhattavijjāya, na dūtagamanena, na pahiṇagamanena, na jaṅghapesanikena, na vejjakammena, na piṇḍapaṭipiṇḍakena, na dānānuppadānena dhammena samena laddhā labhitvā adhigantvā vinditvā paṭilabhitvāti – annañca laddhā vasanañca kāle.

মত্তং স জঞ্ঞা ইধ তোসনত্থন্তি। মত্তং স জঞ্ঞাতি দ্ৰীহি কারণেহি মত্তং জানেয্য – পটিগ্গহণতো ৰা পরিভোগতো ৰা। কথং পটিগ্গহণতো মত্তং জানাতি? থোকেপি দিয্যমানে কুলানুদযায ¹¹⁵ কুলানুরক্খায কুলানুকম্পায পটিগ্গণ্হাতি, বহুকেপি দিয্যমানে কাযপরিহারিকং চীৰরং পটিগ্গণ্হাতি কুচ্ছিপরিহারিকং পিণ্ডপাতং পটিগ্গণ্হাতি। এৰং পটিগ্গহণতো মত্তং জানাতি। কথং পরিভোগতো মত্তং জানাতি?

Mattaṃsa jaññā idha tosanatthanti. Mattaṃ sa jaññāti dvīhi kāraṇehi mattaṃ jāneyya – paṭiggahaṇato vā paribhogato vā. Kathaṃ paṭiggahaṇato mattaṃ jānāti? Thokepi diyyamāne kulānudayāya ¹¹⁶ kulānurakkhāya kulānukampāya paṭiggaṇhāti, bahukepi diyyamāne kāyaparihārikaṃ cīvaraṃ paṭiggaṇhāti kucchiparihārikaṃ piṇḍapātaṃ paṭiggaṇhāti. Evaṃ paṭiggahaṇato mattaṃ jānāti. Kathaṃ paribhogato mattaṃ jānāti?

পটিসঙ্খা যোনিসো চীৰরং পটিসেৰতি যাৰদেৰ সীতস্স পটিঘাতায উণ্হস্স পটিঘাতায ডংসমকসৰাতাতপসরীসপসম্ফস্সানং পটিঘাতায, যাৰদেৰ হিরিকোপীনপটিচ্ছাদনত্থং।

Paṭisaṅkhā yoniso cīvaraṃ paṭisevati yāvadeva sītassa paṭighātāya uṇhassa paṭighātāya ḍaṃsamakasavātātapasarīsapasamphassānaṃ paṭighātāya, yāvadeva hirikopīnapaṭicchādanatthaṃ.

পটিসঙ্খা যোনিসো পিণ্ডপাতং পটিসেৰতি নেৰ দৰায ন মদায ন মণ্ডনায ন ৰিভূসনায, যাৰদেৰ ইমস্স কাযস্স ঠিতিযা যাপনায ৰিহিংসূপরতিযা ব্রহ্মচরিযানুগ্গহায। ইতি পুরাণঞ্চ ৰেদনং পটিহঙ্খামি নৰঞ্চ ৰেদনং ন উপ্পাদেস্সামি, যাত্রা চ মে ভৰিস্সতি অনৰজ্জতা চ ফাসুৰিহারো চ।

Paṭisaṅkhā yoniso piṇḍapātaṃ paṭisevati neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṃsūparatiyā brahmacariyānuggahāya. Iti purāṇañca vedanaṃ paṭihaṅkhāmi navañca vedanaṃ na uppādessāmi, yātrā ca me bhavissati anavajjatā ca phāsuvihāro ca.

পটিসঙ্খা যোনিসো সেনাসনং পটিসেৰতি যাৰদেৰ সীতস্স পটিঘাতায উণ্হস্স পটিঘাতায ডংসমকসৰাতাতপসরীসপসম্ফস্সানং পটিঘাতায, যাৰদেৰ উতুপরিস্সযৰিনোদনপটিসল্লানারামত্থং।

Paṭisaṅkhā yoniso senāsanaṃ paṭisevati yāvadeva sītassa paṭighātāya uṇhassa paṭighātāya ḍaṃsamakasavātātapasarīsapasamphassānaṃ paṭighātāya, yāvadeva utuparissayavinodanapaṭisallānārāmatthaṃ.

পটিসঙ্খা যোনিসো গিলানপচ্চযভেসজ্জপরিক্খারং পটিসেৰতি যাৰদেৰ উপ্পন্নানং ৰেয্যাব্যাধিকানং ¹¹⁷ ৰেদনানং পটিঘাতায অব্যাপজ্জপরমতায।

Paṭisaṅkhā yoniso gilānapaccayabhesajjaparikkhāraṃ paṭisevati yāvadeva uppannānaṃ veyyābyādhikānaṃ ¹¹⁸ vedanānaṃ paṭighātāya abyāpajjaparamatāya.

এৰং পরিভোগতো মত্তং জানাতি। মত্তং স জঞ্ঞাতি। ইমেহি দ্ৰীহি কারণেহি মত্তং জানেয্য আজানেয্য পটিৰিজানেয্য পটিৰিজ্ঝেয্যাতি – মত্তং স জঞ্ঞা।

Evaṃ paribhogato mattaṃ jānāti. Mattaṃ sa jaññāti. Imehi dvīhi kāraṇehi mattaṃ jāneyya ājāneyya paṭivijāneyya paṭivijjheyyāti – mattaṃ sa jaññā.

ইধ তোসনত্থন্তি। ইধ ভিক্খু সন্তুট্ঠো হোতি ইতরীতরেন চীৰরেন ইতরীতরচীৰরসন্তুট্ঠিযা চ ৰণ্ণৰাদী, ন চ চীৰরহেতু অনেসনং অপ্পতিরূপং আপজ্জতি; অলদ্ধা চ চীৰরং ন পরিতস্সতি, লদ্ধা চ চীৰরং অগধিতো অমুচ্ছিতো অনজ্ঝাপন্নো, আদীনৰদস্সাৰী নিস্সরণপঞ্ঞো পরিভুঞ্জতি; তায চ পন ইতরীতরচীৰরসন্তুট্ঠিযা নেৰত্তানুক্কংসেতি, ন পরং ৰম্ভেতি। যো হি তত্থ দক্খো অনলসো সম্পজানো পটিস্সতো – অযং ৰুচ্চতি ভিক্খু পোরাণে অগ্গঞ্ঞে অরিযৰংসে ঠিতো।

Idha tosanatthanti. Idha bhikkhu santuṭṭho hoti itarītarena cīvarena itarītaracīvarasantuṭṭhiyā ca vaṇṇavādī, na ca cīvarahetu anesanaṃ appatirūpaṃ āpajjati; aladdhā ca cīvaraṃ na paritassati, laddhā ca cīvaraṃ agadhito amucchito anajjhāpanno, ādīnavadassāvī nissaraṇapañño paribhuñjati; tāya ca pana itarītaracīvarasantuṭṭhiyā nevattānukkaṃseti, na paraṃ vambheti. Yo hi tattha dakkho analaso sampajāno paṭissato – ayaṃ vuccati bhikkhu porāṇe aggaññe ariyavaṃse ṭhito.

পুন চপরং ভিক্খু সন্তুট্ঠো হোতি ইতরীতরেন পিণ্ডপাতেন ইতরীতরপিণ্ডপাতসন্তুট্ঠিযা চ ৰণ্ণৰাদী, ন চ পিণ্ডপাতহেতু অনেসনং অপ্পতিরূপং আপজ্জতি, অলদ্ধা চ পিণ্ডপাতং ন পরিতস্সতি, লদ্ধা চ পিণ্ডপাতং অগধিতো অমুচ্ছিতো অনজ্ঝাপন্নো, আদীনৰদস্সাৰী নিস্সরণপঞ্ঞো পরিভুঞ্জতি; তায চ পন ইতরীতরপিণ্ডপাতসন্তুট্ঠিযা নেৰত্তানুক্কংসেতি, ন পরং ৰম্ভেতি। যো হি তত্থ দক্খো অনলসো সম্পজানো পটিস্সতো – অযং ৰুচ্চতি ভিক্খু পোরাণে অগ্গঞ্ঞে অরিযৰংসে ঠিতো।

Puna caparaṃ bhikkhu santuṭṭho hoti itarītarena piṇḍapātena itarītarapiṇḍapātasantuṭṭhiyā ca vaṇṇavādī, na ca piṇḍapātahetu anesanaṃ appatirūpaṃ āpajjati, aladdhā ca piṇḍapātaṃ na paritassati, laddhā ca piṇḍapātaṃ agadhito amucchito anajjhāpanno, ādīnavadassāvī nissaraṇapañño paribhuñjati; tāya ca pana itarītarapiṇḍapātasantuṭṭhiyā nevattānukkaṃseti, na paraṃ vambheti. Yo hi tattha dakkho analaso sampajāno paṭissato – ayaṃ vuccati bhikkhu porāṇe aggaññe ariyavaṃse ṭhito.

পুন চপরং ভিক্খু সন্তুট্ঠো হোতি ইতরীতরেন সেনাসনেন ইতরীতরসেনাসনসন্তুট্ঠিযা চ ৰণ্ণৰাদী, ন চ সেনাসনহেতু অনেসনং অপ্পতিরূপং আপজ্জতি , অলদ্ধা চ সেনাসনং ন পরিতস্সতি, লদ্ধা চ সেনাসনং অগধিতো অমুচ্ছিতো অনজ্ঝাপন্নো, আদীনৰদস্সাৰী নিস্সরণপঞ্ঞো পরিভুঞ্জতি; তায চ পন ইতরীতরসেনাসনসন্তুট্ঠিযা নেৰত্তানুক্কংসেতি, ন পরং ৰম্ভেতি। যো হি তত্থ দক্খো অনলসো সম্পজানো পটিস্সতো – অযং ৰুচ্চতি ভিক্খু পোরাণে অগ্গঞ্ঞে অরিযৰংসে ঠিতো।

Puna caparaṃ bhikkhu santuṭṭho hoti itarītarena senāsanena itarītarasenāsanasantuṭṭhiyā ca vaṇṇavādī, na ca senāsanahetu anesanaṃ appatirūpaṃ āpajjati , aladdhā ca senāsanaṃ na paritassati, laddhā ca senāsanaṃ agadhito amucchito anajjhāpanno, ādīnavadassāvī nissaraṇapañño paribhuñjati; tāya ca pana itarītarasenāsanasantuṭṭhiyā nevattānukkaṃseti, na paraṃ vambheti. Yo hi tattha dakkho analaso sampajāno paṭissato – ayaṃ vuccati bhikkhu porāṇe aggaññe ariyavaṃse ṭhito.

পুন চপরং ভিক্খু সন্তুট্ঠো হোতি ইতরীতরেন গিলানপচ্চযভেসজ্জপরিক্খারেন, ইতরীতরগিলানপচ্চযভেসজ্জপরিক্খারসন্তুট্ঠিযা চ ৰণ্ণৰাদী, ন চ গিলানপচ্চযভেসজ্জপরিক্খারহেতু অনেসনং অপ্পতিরূপং আপজ্জতি, অলদ্ধা চ গিলানপচ্চযভেসজ্জপরিক্খারং ন পরিতস্সতি, লদ্ধা চ গিলানপচ্চযভেসজ্জপরিক্খারং অগধিতো অমুচ্ছিতো অনজ্ঝাপন্নো, আদীনৰদস্সাৰী নিস্সরণপঞ্ঞো পরিভুঞ্জতি; তায চ পন ইতরীতরগিলানপচ্চযভেসজ্জপরিক্খারসন্তুট্ঠিযা নেৰত্তানুক্কংসেতি, ন পরং ৰম্ভেতি। যো হি তত্থ দক্খো অনলসো সম্পজানো পটিস্সতো – অযং ৰুচ্চতি ভিক্খু পোরাণে অগ্গঞ্ঞে অরিযৰংসে ঠিতোতি – মত্তং স জঞ্ঞা ইধ তোসনত্থং।

Puna caparaṃ bhikkhu santuṭṭho hoti itarītarena gilānapaccayabhesajjaparikkhārena, itarītaragilānapaccayabhesajjaparikkhārasantuṭṭhiyā ca vaṇṇavādī, na ca gilānapaccayabhesajjaparikkhārahetu anesanaṃ appatirūpaṃ āpajjati, aladdhā ca gilānapaccayabhesajjaparikkhāraṃ na paritassati, laddhā ca gilānapaccayabhesajjaparikkhāraṃ agadhito amucchito anajjhāpanno, ādīnavadassāvī nissaraṇapañño paribhuñjati; tāya ca pana itarītaragilānapaccayabhesajjaparikkhārasantuṭṭhiyā nevattānukkaṃseti, na paraṃ vambheti. Yo hi tattha dakkho analaso sampajāno paṭissato – ayaṃ vuccati bhikkhu porāṇe aggaññe ariyavaṃse ṭhitoti – mattaṃ sa jaññā idha tosanatthaṃ.

সো তেসু গুত্তো যতচারি গামেতি। সো তেসু গুত্তোতি চীৰরে পিণ্ডপাতে সেনাসনে গিলানপচ্চযভেসজ্জপরিক্খারে গুত্তো গোপিতো রক্খিতো সংৰুতোতি। এৰম্পি সো তেসু গুত্তো। অথ ৰা আযতনেসু গুত্তো গোপিতো রক্খিতো সংৰুতোতি। এৰম্পি সো তেসু গুত্তো।

Sotesu gutto yatacāri gāmeti. So tesu guttoti cīvare piṇḍapāte senāsane gilānapaccayabhesajjaparikkhāre gutto gopito rakkhito saṃvutoti. Evampi so tesu gutto. Atha vā āyatanesu gutto gopito rakkhito saṃvutoti. Evampi so tesu gutto.

যতচারি গামেতি গামে যতো যত্তো পটিযত্তো গুত্তো গোপিতো রক্খিতো সংৰুতোতি – সো তেসু গুত্তো যতচারি গামে।

Yatacāri gāmeti gāme yato yatto paṭiyatto gutto gopito rakkhito saṃvutoti – so tesu gutto yatacāri gāme.

রুসিতোপি ৰাচং ফরুসং ন ৰজ্জাতি। দূসিতো খুংসিতো ৰম্ভিতো ঘট্টিতো গরহিতো উপৰদিতো ফরুসেন কক্খল়েন নপ্পটিৰজ্জা নপ্পটিভণেয্য, অক্কোসন্তং ন পচ্চক্কোসেয্য, রোসন্তং নপ্পটিরোসেয্য, ভণ্ডন্তং ন পটিভণ্ডেয্য, ন কলহং করেয্য, ন ভণ্ডনং করেয্য, ন ৰিগ্গহং করেয্য, ন ৰিৰাদং করেয্য, ন মেধগং করেয্য, কলহং ভণ্ডনং ৰিগ্গহং ৰিৰাদং মেধগং পজহেয্য ৰিনোদেয্য ব্যন্তিং করেয্য অনভাৰং গমেয্য, কলহভণ্ডনৰিগ্গহৰিৰাদমেধগা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – রুসিতোপি ৰাচং ফরুসং ন ৰজ্জা।

Rusitopi vācaṃ pharusaṃ na vajjāti. Dūsito khuṃsito vambhito ghaṭṭito garahito upavadito pharusena kakkhaḷena nappaṭivajjā nappaṭibhaṇeyya, akkosantaṃ na paccakkoseyya, rosantaṃ nappaṭiroseyya, bhaṇḍantaṃ na paṭibhaṇḍeyya, na kalahaṃ kareyya, na bhaṇḍanaṃ kareyya, na viggahaṃ kareyya, na vivādaṃ kareyya, na medhagaṃ kareyya, kalahaṃ bhaṇḍanaṃ viggahaṃ vivādaṃ medhagaṃ pajaheyya vinodeyya byantiṃ kareyya anabhāvaṃ gameyya, kalahabhaṇḍanaviggahavivādamedhagā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – rusitopi vācaṃ pharusaṃ na vajjā.

তেনাহ ভগৰা –

Tenāha bhagavā –

‘‘অন্নঞ্চ লদ্ধা ৰসনঞ্চ কালে, মত্তং স জঞ্ঞা ইধ তোসনত্থং।

‘‘Annañca laddhā vasanañca kāle, mattaṃ sa jaññā idha tosanatthaṃ;

সো তেসু গুত্তো যতচারি গামে, রুসিতোপি ৰাচং ফরুসং ন ৰজ্জা’’তি॥

So tesu gutto yatacāri gāme, rusitopi vācaṃ pharusaṃ na vajjā’’ti.

২০৭.

207.

ওক্খিত্তচক্খু ন চ পাদলোলো, ঝানানুযুত্তো বহুজাগরস্স।

Okkhittacakkhu na ca pādalolo, jhānānuyutto bahujāgarassa;

উপেক্খমারব্ভ সমাহিতত্তো, তক্কাসযং কুক্কুচ্চঞ্চুপচ্ছিন্দে ¹¹⁹ ॥

Upekkhamārabbha samāhitatto, takkāsayaṃ kukkuccañcupacchinde¹²⁰.

ওক্খিত্তচক্খু ন চ পাদলোলোতি। কথং খিত্তচক্খু হোতি ? ইধেকচ্চো ভিক্খু চক্খুলোলো, চক্খুলোলিযেন সমন্নাগতো হোতি, ‘‘অদিট্ঠং দক্খিতব্বং, দিট্ঠং সমতিক্কমিতব্ব’’ন্তি আরামেন আরামং উয্যানেন উয্যানং গামেন গামং নিগমেন নিগমং নগরেন নগরং রট্ঠেন রট্ঠং জনপদেন জনপদং দীঘচারিকং অনৰট্ঠিতচারিকং অনুযুত্তো চ হোতি রূপদস্সনায। এৰম্পি খিত্তচক্খু হোতি।

Okkhittacakkhu na ca pādaloloti. Kathaṃ khittacakkhu hoti ? Idhekacco bhikkhu cakkhulolo, cakkhuloliyena samannāgato hoti, ‘‘adiṭṭhaṃ dakkhitabbaṃ, diṭṭhaṃ samatikkamitabba’’nti ārāmena ārāmaṃ uyyānena uyyānaṃ gāmena gāmaṃ nigamena nigamaṃ nagarena nagaraṃ raṭṭhena raṭṭhaṃ janapadena janapadaṃ dīghacārikaṃ anavaṭṭhitacārikaṃ anuyutto ca hoti rūpadassanāya. Evampi khittacakkhu hoti.

অথ ৰা ভিক্খু অন্তরঘরং পৰিট্ঠো ৰীথিং পটিপন্নো অসংৰুতো গচ্ছতি হত্থিং ওলোকেন্তো, অস্সং ওলোকেন্তো, রথং ওলোকেন্তো, পত্তিং ওলোকেন্তো, ইত্থিযো ওলোকেন্তো, পুরিসে ওলোকেন্তো, কুমারকে ওলোকেন্তো, কুমারিকাযো ওলোকেন্তো, অন্তরাপণং ওলোকেন্তো, ঘরমুখানি ওলোকেন্তো, উদ্ধং ওলোকেন্তো, অধো ওলোকেন্তো, দিসাৰিদিসং ৰিপেক্খমানো ¹²¹ গচ্ছতি। এৰম্পি খিত্তচক্খু হোতি।

Atha vā bhikkhu antaragharaṃ paviṭṭho vīthiṃ paṭipanno asaṃvuto gacchati hatthiṃ olokento, assaṃ olokento, rathaṃ olokento, pattiṃ olokento, itthiyo olokento, purise olokento, kumārake olokento, kumārikāyo olokento, antarāpaṇaṃ olokento, gharamukhāni olokento, uddhaṃ olokento, adho olokento, disāvidisaṃ vipekkhamāno ¹²² gacchati. Evampi khittacakkhu hoti.

অথ ৰা ভিক্খু চক্খুনা রূপং দিস্ৰা নিমিত্তগ্গাহী হোতি অনুব্যঞ্জনগ্গাহী। যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায নপ্পটিপজ্জতি, ন রক্খতি চক্খুন্দ্রিযং, চক্খুন্দ্রিযে ন সংৰরং আপজ্জতি। এৰম্পি খিত্তচক্খু হোতি।

Atha vā bhikkhu cakkhunā rūpaṃ disvā nimittaggāhī hoti anubyañjanaggāhī. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya nappaṭipajjati, na rakkhati cakkhundriyaṃ, cakkhundriye na saṃvaraṃ āpajjati. Evampi khittacakkhu hoti.

যথা ৰা পনেকে ভোন্তো সমণব্রাহ্মণা সদ্ধাদেয্যানি ভোজনানি ভুঞ্জিত্ৰা তে এৰরূপং ৰিসূকদস্সনং অনুযুত্তা ৰিহরন্তি, সেয্যথিদং – নচ্চং গীতং ৰাদিতং পেক্খং অক্খানং পাণিস্সরং ৰেতাল়ং কুম্ভথূণং সোভনকং চণ্ডালং ৰংসং ধোৰনং হত্থিযুদ্ধং অস্সযুদ্ধং মহিংসযুদ্ধং উসভযুদ্ধং অজযুদ্ধং মেণ্ডযুদ্ধং কুক্কুটযুদ্ধং ৰট্টকযুদ্ধং দণ্ডযুদ্ধং মুট্ঠিযুদ্ধং নিব্বুদ্ধং উয্যোধিকং বলগ্গং সেনাব্যূহং অনীকদস্সনং ইতি ৰা। এৰম্পি খিত্তচক্খু হোতি।

কথং ন খিত্তচক্খু হোতি? ইধেকচ্চো ভিক্খু ন চক্খুলোলো ন চক্খুলোলিযেন সমন্নাগতো হোতি ‘‘অদিট্ঠং দক্খিতব্বং দিট্ঠং সমতিক্কমিতব্ব’’ন্তি ন আরামেন আরামং ন উয্যানেন উয্যানং ন গামেন গামং ন নিগমেন নিগমং ন নগরেন নগরং ন রট্ঠেন রট্ঠং ন জনপদেন জনপদং দীঘচারিকং অনৰট্ঠিতচারিকং অননুযুত্তো চ হোতি রূপদস্সনায । এৰম্পি ন খিত্তচক্খু হোতি।

Kathaṃ na khittacakkhu hoti? Idhekacco bhikkhu na cakkhulolo na cakkhuloliyena samannāgato hoti ‘‘adiṭṭhaṃ dakkhitabbaṃ diṭṭhaṃ samatikkamitabba’’nti na ārāmena ārāmaṃ na uyyānena uyyānaṃ na gāmena gāmaṃ na nigamena nigamaṃ na nagarena nagaraṃ na raṭṭhena raṭṭhaṃ na janapadena janapadaṃ dīghacārikaṃ anavaṭṭhitacārikaṃ ananuyutto ca hoti rūpadassanāya . Evampi na khittacakkhu hoti.

অথ ৰা ভিক্খু অন্তরঘরং পৰিট্ঠো ৰীথিং পটিপন্নো সংৰুতো গচ্ছতি ন হত্থিং ওলোকেন্তো…পে॰… ন দিসাৰিদিসং ৰিপেক্খমানো গচ্ছতি। এৰম্পি ন খিত্তচক্খু হোতি।

Atha vā bhikkhu antaragharaṃ paviṭṭho vīthiṃ paṭipanno saṃvuto gacchati na hatthiṃ olokento…pe… na disāvidisaṃ vipekkhamāno gacchati. Evampi na khittacakkhu hoti.

অথ ৰা ভিক্খু চক্খুনা রূপং দিস্ৰা ন নিমিত্তগ্গাহী হোতি…পে॰… চক্খুন্দ্রিযে সংৰরং আপজ্জতি। এৰম্পি ন খিত্তচক্খু হোতি।

Atha vā bhikkhu cakkhunā rūpaṃ disvā na nimittaggāhī hoti…pe… cakkhundriye saṃvaraṃ āpajjati. Evampi na khittacakkhu hoti.

যথা ৰা পনেকে ভোন্তো সমণব্রাহ্মণা সদ্ধাদেয্যানি ভোজনানি ভুঞ্জিত্ৰা…পে॰… অনীকদস্সনং ইতি ৰা। এৰরূপা ৰিসূকদস্সনানুযোগা পটিৰিরতো হোতি। এৰম্পি ন খিত্তচক্খু হোতীতি – ওক্খিত্তচক্খু।

Yathā vā paneke bhonto samaṇabrāhmaṇā saddhādeyyāni bhojanāni bhuñjitvā…pe… anīkadassanaṃ iti vā. Evarūpā visūkadassanānuyogā paṭivirato hoti. Evampi na khittacakkhu hotīti – okkhittacakkhu.

ন চ পাদলোলোতি। কথং পাদলোলো হোতি? ইধেকচ্চো ভিক্খু পাদলোলো পাদলোলিযেন সমন্নাগতো হোতি, আরামেন আরামং…পে॰… দীঘচারিকং অনৰট্ঠিতচারিকং অনুযুত্তো হোতি রূপদস্সনায। এৰম্পি পাদলোলো হোতি।

Na ca pādaloloti. Kathaṃ pādalolo hoti? Idhekacco bhikkhu pādalolo pādaloliyena samannāgato hoti, ārāmena ārāmaṃ…pe… dīghacārikaṃ anavaṭṭhitacārikaṃ anuyutto hoti rūpadassanāya. Evampi pādalolo hoti.

অথ ৰা ভিক্খু অন্তোপি সঙ্ঘারামে পাদলোলো পাদলোলিযেন সমন্নাগতো হোতি, ন অত্থহেতু ন কারণহেতু উদ্ধতো অৰূপসন্তচিত্তো পরিৰেণতো পরিৰেণং গচ্ছতি। ৰিহারতো…পে॰… ইতি ভৰাভৰকথং কথেতি। এৰম্পি পাদলোলো হোতি।

Atha vā bhikkhu antopi saṅghārāme pādalolo pādaloliyena samannāgato hoti, na atthahetu na kāraṇahetu uddhato avūpasantacitto pariveṇato pariveṇaṃ gacchati. Vihārato…pe… iti bhavābhavakathaṃ katheti. Evampi pādalolo hoti.

ন চ পাদলোলোতি। পাদলোলিযং পজহেয্য ৰিনোদেয্য ব্যন্তিং করেয্য অনভাৰং গমেয্য, পাদলোলিযা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্য, পটিসল্লানারামো অস্স পটিসল্লানরতো অজ্ঝত্তং চেতোসমথমনুযুত্তো অনিরাকতজ্ঝানো ৰিপস্সনায সমন্নাগতো ব্রূহেতা সুঞ্ঞাগারং ঝাযী ঝানরতো একত্তমনুযুত্তো সদত্থগরুকোতি – ওক্খিত্তচক্খু ন চ পাদলোলো।

Na ca pādaloloti. Pādaloliyaṃ pajaheyya vinodeyya byantiṃ kareyya anabhāvaṃ gameyya, pādaloliyā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyya, paṭisallānārāmo assa paṭisallānarato ajjhattaṃ cetosamathamanuyutto anirākatajjhāno vipassanāya samannāgato brūhetā suññāgāraṃ jhāyī jhānarato ekattamanuyutto sadatthagarukoti – okkhittacakkhu na ca pādalolo.

ঝানানুযুত্তো বহুজাগরস্সাতি। ঝানানুযুত্তোতি দ্ৰীহি কারণেহি ঝানানুযুত্তো – অনুপ্পন্নস্স ৰা পঠমস্স ঝানস্স উপ্পাদায যুত্তো পযুত্তো আযুত্তো সমাযুত্তো, অনুপ্পন্নস্স ৰা দুতিযস্স ঝানস্স… ততিযস্স ঝানস্স… চতুত্থস্স ঝানস্স উপ্পাদায যুত্তো পযুত্তো আযুত্তো সমাযুত্তোতি। এৰম্পি ঝানানুযুত্তো। অথ ৰা উপ্পন্নং ৰা পঠমং ঝানং আসেৰতি ভাৰেতি বহুলীকরোতি ¹²³, উপ্পন্নং ৰা দুতিযং ঝানং … ততিযং ঝানং… চতুত্থং ঝানং আসেৰতি ভাৰেতি বহুলীকরোতীতি। এৰম্পি ঝানানুযুত্তো।

Jhānānuyutto bahujāgarassāti. Jhānānuyuttoti dvīhi kāraṇehi jhānānuyutto – anuppannassa vā paṭhamassa jhānassa uppādāya yutto payutto āyutto samāyutto, anuppannassa vā dutiyassa jhānassa… tatiyassa jhānassa… catutthassa jhānassa uppādāya yutto payutto āyutto samāyuttoti. Evampi jhānānuyutto. Atha vā uppannaṃ vā paṭhamaṃ jhānaṃ āsevati bhāveti bahulīkaroti ¹²⁴, uppannaṃ vā dutiyaṃ jhānaṃ … tatiyaṃ jhānaṃ… catutthaṃ jhānaṃ āsevati bhāveti bahulīkarotīti. Evampi jhānānuyutto.

বহুজাগরস্সাতি ইধ ভিক্খু দিৰসং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি, রত্তিযা পঠমং যামং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি, রত্তিযা মজ্ঝিমং যামং দক্খিণেন পস্সেন সীহসেয্যং কপ্পেতি পাদে পাদং অচ্চাধায সতো সম্পজানো উট্ঠানসঞ্ঞং মনসি কত্ৰা, রত্তিযা পচ্ছিমং যামং পচ্চুট্ঠায চঙ্কমেন নিসজ্জায আৰরণীযেহি ধম্মেহি চিত্তং পরিসোধেতীতি – ঝানানুযুত্তো বহুজাগরস্স।

Bahujāgarassāti idha bhikkhu divasaṃ caṅkamena nisajjāya āvaraṇīyehi dhammehi cittaṃ parisodheti, rattiyā paṭhamaṃ yāmaṃ caṅkamena nisajjāya āvaraṇīyehi dhammehi cittaṃ parisodheti, rattiyā majjhimaṃ yāmaṃ dakkhiṇena passena sīhaseyyaṃ kappeti pāde pādaṃ accādhāya sato sampajāno uṭṭhānasaññaṃ manasi katvā, rattiyā pacchimaṃ yāmaṃ paccuṭṭhāya caṅkamena nisajjāya āvaraṇīyehi dhammehi cittaṃ parisodhetīti – jhānānuyutto bahujāgarassa.

উপেক্খমারব্ভ সমাহিতত্তোতি। উপেক্খাতি যা চতুত্থে ঝানে উপেক্খা উপেক্খনা অজ্ঝুপেক্খনা চিত্তসমতা চিত্তপ্পস্সদ্ধতা মজ্ঝত্ততা চিত্তস্স। সমাহিতত্তোতি যা চিত্তস্স ঠিতি সণ্ঠিতি অৰট্ঠিতি অৰিসাহারো অৰিক্খেপো অৰিসাহটমানসতা সমথো সমাধিন্দ্রিযং সমাধিবলং সম্মাসমাধি। উপেক্খমারব্ভ সমাহিতত্তোতি। চতুত্থে ঝানে উপেক্খং আরব্ভ একগ্গচিত্তো অৰিক্খিত্তচিত্তো অৰিসাহটমানসোতি – উপেক্খমারব্ভ সমাহিতত্তো।

Upekkhamārabbha samāhitattoti. Upekkhāti yā catutthe jhāne upekkhā upekkhanā ajjhupekkhanā cittasamatā cittappassaddhatā majjhattatā cittassa. Samāhitattoti yā cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṃ samādhibalaṃ sammāsamādhi. Upekkhamārabbha samāhitattoti. Catutthe jhāne upekkhaṃ ārabbha ekaggacitto avikkhittacitto avisāhaṭamānasoti – upekkhamārabbha samāhitatto.

তক্কাসযং কুক্কুচ্চঞ্চুপচ্ছিন্দেতি। তক্কাতি নৰ ৰিতক্কা – কামৰিতক্কো, ব্যাপাদৰিতক্কো, ৰিহিংসাৰিতক্কো, ঞাতিৰিতক্কো, জনপদৰিতক্কো, অমরৰিতক্কো, পরানুদযতাপটিসঞ্ঞুত্তো ৰিতক্কো, লাভসক্কারসিলোকপটিসঞ্ঞুত্তো ৰিতক্কো, অনৰঞ্ঞত্তিপটিসঞ্ঞুত্তো ৰিতক্কো – ইমে ৰুচ্চন্তি নৰ ৰিতক্কা। কামৰিতক্কানং কামসঞ্ঞাসযো, ব্যাপাদৰিতক্কানং ব্যাপাদসঞ্ঞাসযো, ৰিহিংসাৰিতক্কানং ৰিহিংসাসঞ্ঞাসযো। অথ ৰা তক্কানং ৰিতক্কানং সঙ্কপ্পানং অৰিজ্জাসযো, অযোনিসো মনসিকারো আসযো, অস্মিমানো আসযো, অনোত্তপ্পং আসযো, উদ্ধচ্চং আসযো।

Takkāsayaṃ kukkuccañcupacchindeti. Takkāti nava vitakkā – kāmavitakko, byāpādavitakko, vihiṃsāvitakko, ñātivitakko, janapadavitakko, amaravitakko, parānudayatāpaṭisaññutto vitakko, lābhasakkārasilokapaṭisaññutto vitakko, anavaññattipaṭisaññutto vitakko – ime vuccanti nava vitakkā. Kāmavitakkānaṃ kāmasaññāsayo, byāpādavitakkānaṃ byāpādasaññāsayo, vihiṃsāvitakkānaṃ vihiṃsāsaññāsayo. Atha vā takkānaṃ vitakkānaṃ saṅkappānaṃ avijjāsayo, ayoniso manasikāro āsayo, asmimāno āsayo, anottappaṃ āsayo, uddhaccaṃ āsayo.

কুক্কুচ্চন্তি হত্থকুক্কুচ্চম্পি কুক্কুচ্চং পাদকুক্কুচ্চম্পি কুক্কুচ্চং হত্থপাদকুক্কুচ্চম্পি কুক্কুচ্চং, অকপ্পিযে কপ্পিযসঞ্ঞিতা কপ্পিযে অকপ্পিযসঞ্ঞিতা, অৰজ্জে ৰজ্জসঞ্ঞিতা, ৰজ্জে অৰজ্জসঞ্ঞিতা। যং এৰরূপং কুক্কুচ্চং কুক্কুচ্চাযনা কুক্কুচ্চাযিতত্তং চেতসো ৰিপ্পটিসারো মনোৰিলেখো – ইদং ৰুচ্চতি কুক্কুচ্চং।

Kukkuccanti hatthakukkuccampi kukkuccaṃ pādakukkuccampi kukkuccaṃ hatthapādakukkuccampi kukkuccaṃ, akappiye kappiyasaññitā kappiye akappiyasaññitā, avajje vajjasaññitā, vajje avajjasaññitā. Yaṃ evarūpaṃ kukkuccaṃ kukkuccāyanā kukkuccāyitattaṃ cetaso vippaṭisāro manovilekho – idaṃ vuccati kukkuccaṃ.

অপি চ দ্ৰীহি কারণেহি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো – কতত্তা চ অকতত্তা চ। কথং কতত্তা চ অকতত্তা চ উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো? ‘‘কতং মে কাযদুচ্চরিতং, অকতং মে কাযসুচরিত’’ন্তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো। ‘‘কতং মে ৰচীদুচ্চরিতং… কতং মে মনোদুচ্চরিতং… কতো মে পাণাতিপাতো, অকতা মে পাণাতিপাতা ৰেরমণী’’তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো। ‘‘কতং মে অদিন্নাদানং… কতো মে কামেসুমিচ্ছাচারো… কতো মে মুসাৰাদো… কতা মে পিসুণৰাচা… কতা মে ফরুসৰাচা… কতো মে সম্ফপ্পলাপো… কতা মে অভিজ্ঝা… কতো মে ব্যাপাদো… কতা মে মিচ্ছাদিট্ঠি, অকতা মে সম্মাদিট্ঠী’’তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো। এৰং কতত্তা চ অকতত্তা চ উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো।

Api ca dvīhi kāraṇehi uppajjati kukkuccaṃ cetaso vippaṭisāro manovilekho – katattā ca akatattā ca. Kathaṃ katattā ca akatattā ca uppajjati kukkuccaṃ cetaso vippaṭisāro manovilekho? ‘‘Kataṃ me kāyaduccaritaṃ, akataṃ me kāyasucarita’’nti uppajjati kukkuccaṃ cetaso vippaṭisāro manovilekho. ‘‘Kataṃ me vacīduccaritaṃ… kataṃ me manoduccaritaṃ… kato me pāṇātipāto, akatā me pāṇātipātā veramaṇī’’ti uppajjati kukkuccaṃ cetaso vippaṭisāro manovilekho. ‘‘Kataṃ me adinnādānaṃ… kato me kāmesumicchācāro… kato me musāvādo… katā me pisuṇavācā… katā me pharusavācā… kato me samphappalāpo… katā me abhijjhā… kato me byāpādo… katā me micchādiṭṭhi, akatā me sammādiṭṭhī’’ti uppajjati kukkuccaṃ cetaso vippaṭisāro manovilekho. Evaṃ katattā ca akatattā ca uppajjati kukkuccaṃ cetaso vippaṭisāro manovilekho.

অথ ৰা ‘‘সীলেসুম্হি ন পরিপূরকারী’’তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো; ‘‘ইন্দ্রিযেসুম্হি অগুত্তদ্ৰারো’’তি… ‘‘ভোজনে অমত্তঞ্ঞূম্হী’’তি… ‘‘জাগরিযং অননুযুত্তোম্হী’’তি… ‘‘ন সতিসম্পজঞ্ঞেন সমন্নাগতোম্হী’’তি… ‘‘অভাৰিতা মে চত্তারো সতিপট্ঠানা’’তি… ‘‘অভাৰিতা মে চত্তারো সম্মপ্পধানা’’তি… ‘‘অভাৰিতা মে চত্তারো ইদ্ধিপাদা’’তি… ‘‘অভাৰিতানি মে পঞ্চিন্দ্রিযানী’’তি… ‘‘অভাৰিতানি মে পঞ্চ বলানী’’তি… ‘‘অভাৰিতা মে সত্ত বোজ্ঝঙ্গা’’তি… ‘‘অভাৰিতো মে অরিযো অট্ঠঙ্গিকো মগ্গো’’তি… ‘‘দুক্খং মে অপরিঞ্ঞাত’’ন্তি… ‘‘দুক্খসমুদযো মে অপ্পহীনো’’তি… ‘‘মগ্গো মে অভাৰিতো’’তি… ‘‘নিরোধো মে অসচ্ছিকতো’’তি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো। তক্কাসযং কুক্কুচ্চঞ্চুপচ্ছিন্দেতি। তক্কঞ্চ তক্কাসযঞ্চ কুক্কুচ্চঞ্চ উপচ্ছিন্দেয্য ছিন্দেয্য উচ্ছিন্দেয্য সমুচ্ছিন্দেয্য পজহেয্য ৰিনোদেয্য ব্যন্তিং করেয্য অনভাৰং গমেয্যাতি – তক্কাসযং কুক্কুচ্চঞ্চুপচ্ছিন্দে।

Atha vā ‘‘sīlesumhi na paripūrakārī’’ti uppajjati kukkuccaṃ cetaso vippaṭisāro manovilekho; ‘‘indriyesumhi aguttadvāro’’ti… ‘‘bhojane amattaññūmhī’’ti… ‘‘jāgariyaṃ ananuyuttomhī’’ti… ‘‘na satisampajaññena samannāgatomhī’’ti… ‘‘abhāvitā me cattāro satipaṭṭhānā’’ti… ‘‘abhāvitā me cattāro sammappadhānā’’ti… ‘‘abhāvitā me cattāro iddhipādā’’ti… ‘‘abhāvitāni me pañcindriyānī’’ti… ‘‘abhāvitāni me pañca balānī’’ti… ‘‘abhāvitā me satta bojjhaṅgā’’ti… ‘‘abhāvito me ariyo aṭṭhaṅgiko maggo’’ti… ‘‘dukkhaṃ me apariññāta’’nti… ‘‘dukkhasamudayo me appahīno’’ti… ‘‘maggo me abhāvito’’ti… ‘‘nirodho me asacchikato’’ti uppajjati kukkuccaṃ cetaso vippaṭisāro manovilekho. Takkāsayaṃ kukkuccañcupacchindeti. Takkañca takkāsayañca kukkuccañca upacchindeyya chindeyya ucchindeyya samucchindeyya pajaheyya vinodeyya byantiṃ kareyya anabhāvaṃ gameyyāti – takkāsayaṃ kukkuccañcupacchinde.

তেনাহ ভগৰা –

Tenāha bhagavā –

‘‘ওক্খিত্তচক্খু ন চ পাদলোলো, ঝানানুযুত্তো বহুজাগরস্স।

‘‘Okkhittacakkhu na ca pādalolo, jhānānuyutto bahujāgarassa;

উপেক্খমারব্ভ সমাহিতত্তো, তক্কাসযং কুক্কুচ্চঞ্চুপচ্ছিন্দে’’তি॥

Upekkhamārabbha samāhitatto, takkāsayaṃ kukkuccañcupacchinde’’ti.

২০৮.

208.

চুদিতো ৰচীভি সতিমাভিনন্দে, সব্রহ্মচারীসু খিলং পভিন্দে।

Cuditovacībhi satimābhinande, sabrahmacārīsu khilaṃ pabhinde;

ৰাচং পমুঞ্চে কুসলং নাতিৰেলং, জনৰাদধম্মায ন চেতযেয্য॥

Vācaṃ pamuñce kusalaṃ nātivelaṃ, janavādadhammāya na cetayeyya.

চুদিতো ৰচীভি সতিমাভিনন্দেতি। চুদিতোতি উপজ্ঝাযা ৰা আচরিযা ৰা সমানুপজ্ঝাযকা ৰা সমানাচরিযকা ৰা মিত্তা ৰা সন্দিট্ঠা ৰা সম্ভত্তা ৰা সহাযা ৰা চোদেন্তি – ‘‘ইদং তে, আৰুসো, অযুত্তং, ইদং তে অপ্পত্তং, ইদং তে অসারুপ্পং, ইদং তে অসীলট্ঠ’’ন্তি। সতিং উপট্ঠপেত্ৰা তং চোদনং নন্দেয্য অভিনন্দেয্য মোদেয্য অনুমোদেয্য ইচ্ছেয্য সাদিযেয্য পত্থযেয্য পিহযেয্য অভিজপ্পেয্য। যথা ইত্থী ৰা পুরিসো ৰা দহরো যুৰা মণ্ডনজাতিকো সীসংন্হাতো উপ্পলমালং ৰা ৰস্সিকমালং ৰা অধিমুত্তকমালং ৰা লভিত্ৰা উভোহি হত্থেহি পটিগ্গহেত্ৰা উত্তমঙ্গে সিরস্মিং পতিট্ঠাপেত্ৰা নন্দেয্য অভিনন্দেয্য মোদেয্য অনুমোদেয্য ইচ্ছেয্য সাদিযেয্য পত্থযেয্য পিহযেয্য অভিজপ্পেয্য; এৰমেৰ সতিং উপট্ঠপেত্ৰা তং চোদনং নন্দেয্য অভিনন্দেয্য মোদেয্য অনুমোদেয্য ইচ্ছেয্য সাদিযেয্য পত্থযেয্য পিহযেয্য অভিজপ্পেয্য।

Cudito vacībhi satimābhinandeti. Cuditoti upajjhāyā vā ācariyā vā samānupajjhāyakā vā samānācariyakā vā mittā vā sandiṭṭhā vā sambhattā vā sahāyā vā codenti – ‘‘idaṃ te, āvuso, ayuttaṃ, idaṃ te appattaṃ, idaṃ te asāruppaṃ, idaṃ te asīlaṭṭha’’nti. Satiṃ upaṭṭhapetvā taṃ codanaṃ nandeyya abhinandeyya modeyya anumodeyya iccheyya sādiyeyya patthayeyya pihayeyya abhijappeyya. Yathā itthī vā puriso vā daharo yuvā maṇḍanajātiko sīsaṃnhāto uppalamālaṃ vā vassikamālaṃ vā adhimuttakamālaṃ vā labhitvā ubhohi hatthehi paṭiggahetvā uttamaṅge sirasmiṃ patiṭṭhāpetvā nandeyya abhinandeyya modeyya anumodeyya iccheyya sādiyeyya patthayeyya pihayeyya abhijappeyya; evameva satiṃ upaṭṭhapetvā taṃ codanaṃ nandeyya abhinandeyya modeyya anumodeyya iccheyya sādiyeyya patthayeyya pihayeyya abhijappeyya.

‘‘নিধীনংৰ ¹²⁵ পৰত্তারং, যং পস্সে ৰজ্জদস্সিনং।

‘‘Nidhīnaṃva ¹²⁶ pavattāraṃ, yaṃ passe vajjadassinaṃ;

নিগ্গয্হৰাদিং মেধাৰিং, তাদিসং পণ্ডিতং ভজে॥

Niggayhavādiṃ medhāviṃ, tādisaṃ paṇḍitaṃ bhaje.

‘‘তাদিসং ভজমানস্স, সেয্যো হোতি ন পাপিযো।

‘‘Tādisaṃ bhajamānassa, seyyo hoti na pāpiyo;

ওৰদেয্যানুসাসেয্য, অসব্ভা চ নিৰারযে।

Ovadeyyānusāseyya, asabbhā ca nivāraye;

সতঞ্হি সো পিযো হোতি, অসতং হোতি অপ্পিযো’’তি॥

Satañhi so piyo hoti, asataṃ hoti appiyo’’ti.

চুদিতো ৰচীভি সতিমাভিনন্দে, সব্রহ্মচারীসু খিলং পভিন্দেতি। সব্রহ্মচারীতি এককম্মং একুদ্দেসো সমসিক্খতা। সব্রহ্মচারীসু খিলং পভিন্দেতি। সব্রহ্মচারীসু আহতচিত্ততং খিলজাততং পভিন্দেয্য , পঞ্চপি চেতোখিলে ভিন্দেয্য, তযোপি চেতোখিলে ভিন্দেয্য, রাগখিলং দোসখিলং মোহখিলং ভিন্দেয্য পভিন্দেয্য সম্ভিন্দেয্যাতি – সব্রহ্মচারীসু খিলং পভিন্দে।

Cudito vacībhi satimābhinande, sabrahmacārīsu khilaṃ pabhindeti. Sabrahmacārīti ekakammaṃ ekuddeso samasikkhatā. Sabrahmacārīsu khilaṃ pabhindeti. Sabrahmacārīsu āhatacittataṃ khilajātataṃ pabhindeyya , pañcapi cetokhile bhindeyya, tayopi cetokhile bhindeyya, rāgakhilaṃ dosakhilaṃ mohakhilaṃ bhindeyya pabhindeyya sambhindeyyāti – sabrahmacārīsu khilaṃ pabhinde.

ৰাচং পমুঞ্চে কুসলং নাতিৰেলন্তি। ঞাণসমুট্ঠিতং ৰাচং মুঞ্চেয্য, অত্থূপসংহিতং ধম্মূপসংহিতং কালেন সাপদেসং পরিযন্তৰতিং ৰাচং মুঞ্চেয্য পমুঞ্চেয্যাতি – ৰাচং পমুঞ্চে কুসলং। নাতিৰেলন্তি। ৰেলাতি দ্ৰে ৰেলা – কালৰেলা চ সীলৰেলা চ। কতমা কালৰেলা? কালাতিক্কন্তং ৰাচং ন ভাসেয্য, ৰেলাতিক্কন্তং ৰাচং ন ভাসেয্য, কালৰেলাতিক্কন্তং ৰাচং ন ভাসেয্য, কালং অসম্পত্তং ৰাচং ন ভাসেয্য, ৰেলং অসম্পত্তং ৰাচং ন ভাসেয্য, কালৰেলং অসম্পত্তং ৰাচং ন ভাসেয্য।

Vācaṃpamuñce kusalaṃ nātivelanti. Ñāṇasamuṭṭhitaṃ vācaṃ muñceyya, atthūpasaṃhitaṃ dhammūpasaṃhitaṃ kālena sāpadesaṃ pariyantavatiṃ vācaṃ muñceyya pamuñceyyāti – vācaṃ pamuñce kusalaṃ. Nātivelanti. Velāti dve velā – kālavelā ca sīlavelā ca. Katamā kālavelā? Kālātikkantaṃ vācaṃ na bhāseyya, velātikkantaṃ vācaṃ na bhāseyya, kālavelātikkantaṃ vācaṃ na bhāseyya, kālaṃ asampattaṃ vācaṃ na bhāseyya, velaṃ asampattaṃ vācaṃ na bhāseyya, kālavelaṃ asampattaṃ vācaṃ na bhāseyya.

‘‘যো ৰে ¹²⁷ কালে অসম্পত্তে, অতিৰেলঞ্চ ভাসতি।

‘‘Yo ve ¹²⁸ kāle asampatte, ativelañca bhāsati;

এৰং সো নিহতো সেতি, কোকিলাযেৰ ¹²⁹ অত্রজো’’তি॥

Evaṃ so nihato seti, kokilāyeva ¹³⁰ atrajo’’ti.

অযং কালৰেলা। কতমা সীলৰেলা? রত্তো ৰাচং ন ভাসেয্য, দুট্ঠো ৰাচং ন ভাসেয্য, মূল়্হো ৰাচং ন ভাসেয্য, মুসাৰাদং ন ভাসেয্য, পিসুণৰাচং ন ভাসেয্য, ফরুসৰাচং ন ভাসেয্য, সম্ফপ্পলাপং ন ভাসেয্য ন কথেয্য ন ভণেয্য ন দীপযেয্য ন ৰোহরেয্য। অযং সীলৰেলাতি – ৰাচং পমুঞ্চে কুসলং নাতিৰেলং।

Ayaṃ kālavelā. Katamā sīlavelā? Ratto vācaṃ na bhāseyya, duṭṭho vācaṃ na bhāseyya, mūḷho vācaṃ na bhāseyya, musāvādaṃ na bhāseyya, pisuṇavācaṃ na bhāseyya, pharusavācaṃ na bhāseyya, samphappalāpaṃ na bhāseyya na katheyya na bhaṇeyya na dīpayeyya na vohareyya. Ayaṃ sīlavelāti – vācaṃ pamuñce kusalaṃ nātivelaṃ.

জনৰাদধম্মায ন চেতযেয্যাতি। জনাতি খত্তিযা চ ব্রাহ্মণা চ ৰেস্সা চ সুদ্দা চ গহট্ঠা চ পব্বজিতা চ দেৰা চ মনুস্সা চ। জনস্স ৰাদায উপৰাদায নিন্দায গরহায অকিত্তিযা অৰণ্ণহারিকায সীলৰিপত্তিযা ৰা আচারৰিপত্তিযা ৰা দিট্ঠিৰিপত্তিযা ৰা আজীৰৰিপত্তিযা ৰা ন চেতযেয্য চেতনং ন উপ্পাদেয্য চিত্তং ন উপ্পাদেয্য সঙ্কপ্পং ন উপ্পাদেয্য মনসিকারং ন উপ্পাদেয্যাতি – জনৰাদধম্মায ন চেতযেয্য।

Janavādadhammāya na cetayeyyāti. Janāti khattiyā ca brāhmaṇā ca vessā ca suddā ca gahaṭṭhā ca pabbajitā ca devā ca manussā ca. Janassa vādāya upavādāya nindāya garahāya akittiyā avaṇṇahārikāya sīlavipattiyā vā ācāravipattiyā vā diṭṭhivipattiyā vā ājīvavipattiyā vā na cetayeyya cetanaṃ na uppādeyya cittaṃ na uppādeyya saṅkappaṃ na uppādeyya manasikāraṃ na uppādeyyāti – janavādadhammāya na cetayeyya.

তেনাহ ভগৰা –

Tenāha bhagavā –

‘‘চুদিতো ৰচীভি সতিমাভিনন্দে, সব্রহ্মচারীসু খিলং পভিন্দে।

‘‘Cudito vacībhi satimābhinande, sabrahmacārīsu khilaṃ pabhinde;

ৰাচং পমুঞ্চে কুসলং নাতিৰেলং, জনৰাদধম্মায ন চেতযেয্যা’’তি॥

Vācaṃ pamuñce kusalaṃ nātivelaṃ, janavādadhammāya na cetayeyyā’’ti.

২০৯.

209.

অথাপরং পঞ্চ রজানি লোকে, যেসং সতীমা ৰিনযায সিক্খে।

Athāparaṃ pañca rajāni loke, yesaṃ satīmā vinayāya sikkhe;

রূপেসু সদ্দেসু অথো রসেসু, গন্ধেসু ফস্সেসু সহেথ রাগং॥

Rūpesu saddesu atho rasesu, gandhesu phassesu sahetha rāgaṃ.

অথাপরং পঞ্চ রজানি লোকেতি। অথাতি পদসন্ধি পদসংসগ্গো পদপারিপূরী অক্খরসমৰাযো ব্যঞ্জনসিলিট্ঠতা পদানুপুব্বতাপেতং – অথাতি। পঞ্চ রজানীতি রূপরজো, সদ্দরজো, গন্ধরজো, রসরজো, ফোট্ঠব্বরজো।

Athāparaṃpañca rajāni loketi. Athāti padasandhi padasaṃsaggo padapāripūrī akkharasamavāyo byañjanasiliṭṭhatā padānupubbatāpetaṃ – athāti. Pañca rajānīti rūparajo, saddarajo, gandharajo, rasarajo, phoṭṭhabbarajo.

‘‘রাগো রজো ন চ পন রেণু ৰুচ্চতি, রাগস্সেতং অধিৰচনং রজোতি।

‘‘Rāgo rajo na ca pana reṇu vuccati, rāgassetaṃ adhivacanaṃ rajoti;

এতং রজং ৰিপ্পজহিত্ৰা ¹³¹ পণ্ডিতা, ৰিহরন্তি তে ৰিগতরজস্স সাসনে॥

Etaṃ rajaṃ vippajahitvā ¹³² paṇḍitā, viharanti te vigatarajassa sāsane.

‘‘দোসো রজো ন চ পন রেণু ৰুচ্চতি…পে॰…।

‘‘Doso rajo na ca pana reṇu vuccati…pe…;

ৰিহরন্তি তে ৰিগতরজস্স সাসনে॥

Viharanti te vigatarajassa sāsane.

‘‘মোহো রজো ন চ পন রেণু ৰুচ্চতি…পে॰…।

‘‘Moho rajo na ca pana reṇu vuccati…pe…;

ৰিহরন্তি তে ৰিগতরজস্স সাসনে’’॥

Viharanti te vigatarajassa sāsane’’.

লোকেতি অপাযলোকে মনুস্সলোকে দেৰলোকে খন্ধলোকে ধাতুলোকে আযতনলোকেতি – অথাপরং পঞ্চ রজানি লোকে।

Loketi apāyaloke manussaloke devaloke khandhaloke dhātuloke āyatanaloketi – athāparaṃ pañca rajāni loke.

যেসং সতীমা ৰিনযায সিক্খেতি। যেসন্তি রূপরাগস্স সদ্দরাগস্স গন্ধরাগস্স রসরাগস্স ফোট্ঠব্বরাগস্স। সতীমাতি যা সতি অনুস্সতি পটিস্সতি সতি সরণতা ধারণতা অপিলাপনতা অসম্মুস্সনতা সতিন্দ্রিযং সতিবলং সম্মাসতি সতিসম্বোজ্ঝঙ্গো একাযনমগ্গো – অযং ৰুচ্চতি সতি। ইমায সতিযা উপেতো সমুপেতো উপগতো সমুপগতো উপপন্নো সমুপপন্নো সমন্নাগতো। সো ৰুচ্চতি সতিমা । সিক্খেতি তিস্সো সিক্খা – অধিসীলসিক্খা, অধিচিত্তসিক্খা, অধিপঞ্ঞাসিক্খা। কতমা অধিসীলসিক্খা…পে॰… অযং অধিপঞ্ঞাসিক্খা। যেসং সতীমা ৰিনযায সিক্খেতি। সতিমা পুগ্গলো যেসং রূপরাগস্স সদ্দরাগস্স গন্ধরাগস্স রসরাগস্স ফোট্ঠব্বরাগস্স ৰিনযায পটিৰিনযায পহানায ৰূপসমায পটিনিস্সগ্গায পটিপস্সদ্ধিযা অধিসীলম্পি সিক্খেয্য অধিচিত্তম্পি সিক্খেয্য অধিপঞ্ঞম্পি সিক্খেয্য, ইমা তিস্সো সিক্খাযো আৰজ্জন্তো সিক্খেয্য, জানন্তো সিক্খেয্য…পে॰… সচ্ছিকাতব্বং সচ্ছিকরোন্তো সিক্খেয্য আচরেয্য সমাচরেয্য সমাদায ৰত্তেয্যাতি – যেসং সতীমা ৰিনযায সিক্খে।

Yesaṃ satīmā vinayāya sikkheti. Yesanti rūparāgassa saddarāgassa gandharāgassa rasarāgassa phoṭṭhabbarāgassa. Satīmāti yā sati anussati paṭissati sati saraṇatā dhāraṇatā apilāpanatā asammussanatā satindriyaṃ satibalaṃ sammāsati satisambojjhaṅgo ekāyanamaggo – ayaṃ vuccati sati. Imāya satiyā upeto samupeto upagato samupagato upapanno samupapanno samannāgato. So vuccati satimā . Sikkheti tisso sikkhā – adhisīlasikkhā, adhicittasikkhā, adhipaññāsikkhā. Katamā adhisīlasikkhā…pe… ayaṃ adhipaññāsikkhā. Yesaṃ satīmā vinayāya sikkheti. Satimā puggalo yesaṃ rūparāgassa saddarāgassa gandharāgassa rasarāgassa phoṭṭhabbarāgassa vinayāya paṭivinayāya pahānāya vūpasamāya paṭinissaggāya paṭipassaddhiyā adhisīlampi sikkheyya adhicittampi sikkheyya adhipaññampi sikkheyya, imā tisso sikkhāyo āvajjanto sikkheyya, jānanto sikkheyya…pe… sacchikātabbaṃ sacchikaronto sikkheyya ācareyya samācareyya samādāya vatteyyāti – yesaṃ satīmā vinayāya sikkhe.

রূপেসু সদ্দেসু অথো রসেসু, গন্ধেসু ফস্সেসু সহেথ রাগন্তি। রূপেসু সদ্দেসু গন্ধেসু রসেসু ফোট্ঠব্বেসু রাগং সহেয্য পরিসহেয্য অভিভৰেয্য অজ্ঝোত্থরেয্য পরিযাদিযেয্য মদ্দেয্যাতি – রূপেসু সদ্দেসু অথো রসেসু গন্ধেসু ফস্সেসু সহেথ রাগং।

Rūpesusaddesu atho rasesu, gandhesu phassesu sahetha rāganti. Rūpesu saddesu gandhesu rasesu phoṭṭhabbesu rāgaṃ saheyya parisaheyya abhibhaveyya ajjhotthareyya pariyādiyeyya maddeyyāti – rūpesu saddesu atho rasesu gandhesu phassesu sahetha rāgaṃ.

তেনাহ ভগৰা –

Tenāha bhagavā –

‘‘অথাপরং পঞ্চ রজানি লোকে, যেসং সতীমা ৰিনযায সিক্খে।

‘‘Athāparaṃ pañca rajāni loke, yesaṃ satīmā vinayāya sikkhe;

রূপেসু সদ্দেসু অথো রসেসু, গন্ধেসু ফস্সেসু সহেথ রাগ’’ন্তি॥

Rūpesu saddesu atho rasesu, gandhesu phassesu sahetha rāga’’nti.

২১০.

210.

এতেসু ধম্মেসু ৰিনেয্য ছন্দং, ভিক্খু সতিমা সুৰিমুত্তচিত্তো।

Etesu dhammesu vineyya chandaṃ, bhikkhu satimā suvimuttacitto;

কালে সো সম্মা ধম্মং পরিৰীমংসমানো, একোদিভূতো ৰিহনে তমং সো॥ [ইতি ভগৰা]

Kāle so sammā dhammaṃ parivīmaṃsamāno, ekodibhūto vihane tamaṃ so. [iti bhagavā]

এতেসু ধম্মেসু ৰিনেয্য ছন্দন্তি। এতেসূতি রূপেসু সদ্দেসু গন্ধেসু রসেসু ফোট্ঠব্বেসু। ছন্দোতি যো কামেসু কামচ্ছন্দো কামরাগো কামনন্দী কামতণ্হা কামস্নেহো কামপরিল়াহো কামমুচ্ছা কামজ্ঝোসানং কামোঘো কামযোগো কামুপাদানং…পে॰… কামচ্ছন্দনীৰরণং। এতেসু ধম্মেসু ৰিনেয্য ছন্দন্তি। এতেসু ধম্মেসু ছন্দং ৰিনেয্য পটিৰিনেয্য পজহেয্য ৰিনোদেয্য ব্যন্তিং করেয্য অনভাৰং গমেয্যাতি – এতেসু ধম্মেসু ৰিনেয্য ছন্দং।

Etesu dhammesu vineyya chandanti. Etesūti rūpesu saddesu gandhesu rasesu phoṭṭhabbesu. Chandoti yo kāmesu kāmacchando kāmarāgo kāmanandī kāmataṇhā kāmasneho kāmapariḷāho kāmamucchā kāmajjhosānaṃ kāmogho kāmayogo kāmupādānaṃ…pe… kāmacchandanīvaraṇaṃ. Etesu dhammesu vineyya chandanti. Etesu dhammesu chandaṃ vineyya paṭivineyya pajaheyya vinodeyya byantiṃ kareyya anabhāvaṃ gameyyāti – etesu dhammesu vineyya chandaṃ.

ভিক্খু সতিমা সুৰিমুত্তচিত্তোতি। ভিক্খূতি পুথুজ্জনকল্যাণকো ৰা ভিক্খু, সেখো ৰা ভিক্খু। সতিমাতি যা সতি অনুস্সতি…পে॰… সম্মাসতি সতিসম্বোজ্ঝঙ্গো একাযনমগ্গো – অযং ৰুচ্চতি সতি। ইমায সতিযা উপেতো সমুপেতো…পে॰… সো ৰুচ্চতি সতিমা।

Bhikkhu satimā suvimuttacittoti. Bhikkhūti puthujjanakalyāṇako vā bhikkhu, sekho vā bhikkhu. Satimāti yā sati anussati…pe… sammāsati satisambojjhaṅgo ekāyanamaggo – ayaṃ vuccati sati. Imāya satiyā upeto samupeto…pe… so vuccati satimā.

ভিক্খু সতিমা সুৰিমুত্তচিত্তোতি। পঠমং ঝানং সমাপন্নস্স নীৰরণেহি চিত্তং মুত্তং ৰিমুত্তং সুৰিমুত্তং, দুতিযং ঝানং সমাপন্নস্স ৰিতক্কৰিচারেহি চিত্তং মুত্তং ৰিমুত্তং সুৰিমুত্তং, ততিযং ঝানং সমাপন্নস্স পীতিযা চ চিত্তং মুত্তং ৰিমুত্তং সুৰিমুত্তং, চতুত্থং ঝানং সমাপন্নস্স সুখদুক্খেহি চিত্তং মুত্তং ৰিমুত্তং সুৰিমুত্তং; আকাসানঞ্চাযতনং সমাপন্নস্স রূপসঞ্ঞায পটিঘসঞ্ঞায নানত্তসঞ্ঞায চিত্তং মুত্তং ৰিমুত্তং সুৰিমুত্তং, ৰিঞ্ঞাণঞ্চাযতনং সমাপন্নস্স আকাসানঞ্চাযতনসঞ্ঞায চিত্তং… আকিঞ্চঞ্ঞাযতনং সমাপন্নস্স ৰিঞ্ঞাণঞ্চাযতনসঞ্ঞায চিত্তং… নেৰসঞ্ঞানাসঞ্ঞাযতনং সমাপন্নস্স আকিঞ্চঞ্ঞাযতনসঞ্ঞায চিত্তং মুত্তং ৰিমুত্তং সুৰিমুত্তং; সোতাপন্নস্স সক্কাযদিট্ঠিযা ৰিচিকিচ্ছায সীলব্বতপরামাসা দিট্ঠানুসযা ৰিচিকিচ্ছানুসযা তদেকট্ঠেহি চ কিলেসেহি চিত্তং মুত্তং ৰিমুত্তং সুৰিমুত্তং, সকদাগামিস্স ওল়ারিকা কামরাগানুসযা পটিঘানুসযা তদেকট্ঠেহি চ কিলেসেহি চিত্তং মুত্তং ৰিমুত্তং সুৰিমুত্তং , অনাগামিস্স অনুসহগতা কামরাগসঞ্ঞোজনা পটিঘসঞ্ঞোজনা অনুসহগতা কামরাগানুসযা পটিঘানুসযা তদেকট্ঠেহি চ কিলেসেহি চিত্তং মুত্তং ৰিমুত্তং সুৰিমুত্তং, অরহতো রূপরাগা অরূপরাগা মানা উদ্ধচ্চা অৰিজ্জায মানানুসযা ভৰরাগানুসযা অৰিজ্জানুসযা তদেকট্ঠেহি চ কিলেসেহি বহিদ্ধা চ সব্বনিমিত্তেহি চিত্তং মুত্তং ৰিমুত্তং সুৰিমুত্তন্তি – ভিক্খু সতিমা সুৰিমুত্তচিত্তো।

Bhikkhu satimā suvimuttacittoti. Paṭhamaṃ jhānaṃ samāpannassa nīvaraṇehi cittaṃ muttaṃ vimuttaṃ suvimuttaṃ, dutiyaṃ jhānaṃ samāpannassa vitakkavicārehi cittaṃ muttaṃ vimuttaṃ suvimuttaṃ, tatiyaṃ jhānaṃ samāpannassa pītiyā ca cittaṃ muttaṃ vimuttaṃ suvimuttaṃ, catutthaṃ jhānaṃ samāpannassa sukhadukkhehi cittaṃ muttaṃ vimuttaṃ suvimuttaṃ; ākāsānañcāyatanaṃ samāpannassa rūpasaññāya paṭighasaññāya nānattasaññāya cittaṃ muttaṃ vimuttaṃ suvimuttaṃ, viññāṇañcāyatanaṃ samāpannassa ākāsānañcāyatanasaññāya cittaṃ… ākiñcaññāyatanaṃ samāpannassa viññāṇañcāyatanasaññāya cittaṃ… nevasaññānāsaññāyatanaṃ samāpannassa ākiñcaññāyatanasaññāya cittaṃ muttaṃ vimuttaṃ suvimuttaṃ; sotāpannassa sakkāyadiṭṭhiyā vicikicchāya sīlabbataparāmāsā diṭṭhānusayā vicikicchānusayā tadekaṭṭhehi ca kilesehi cittaṃ muttaṃ vimuttaṃ suvimuttaṃ, sakadāgāmissa oḷārikā kāmarāgānusayā paṭighānusayā tadekaṭṭhehi ca kilesehi cittaṃ muttaṃ vimuttaṃ suvimuttaṃ , anāgāmissa anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā tadekaṭṭhehi ca kilesehi cittaṃ muttaṃ vimuttaṃ suvimuttaṃ, arahato rūparāgā arūparāgā mānā uddhaccā avijjāya mānānusayā bhavarāgānusayā avijjānusayā tadekaṭṭhehi ca kilesehi bahiddhā ca sabbanimittehi cittaṃ muttaṃ vimuttaṃ suvimuttanti – bhikkhu satimā suvimuttacitto.

কালেন সো সম্মা ধম্মং পরিৰীমংসমানোতি। কালেনাতি উদ্ধতে চিত্তে সমথস্স ¹³³ কালো, সমাহিতে চিত্তে ৰিপস্সনায কালো।

Kālena so sammā dhammaṃ parivīmaṃsamānoti. Kālenāti uddhate citte samathassa ¹³⁴ kālo, samāhite citte vipassanāya kālo.

‘‘কালে পগ্গণ্হতি চিত্তং, নিগ্গণ্হতি পুনাপরে ¹³⁵।

‘‘Kāle paggaṇhati cittaṃ, niggaṇhati punāpare ¹³⁶;

সম্পহংসতি কালেন, কালে চিত্তং সমাদহে॥

Sampahaṃsati kālena, kāle cittaṃ samādahe.

‘‘অজ্ঝুপেক্খতি কালেন, সো যোগী কালকোৰিদো।

‘‘Ajjhupekkhati kālena, so yogī kālakovido;

কিম্হি কালম্হি পগ্গাহো, কিম্হি কালে ৰিনিগ্গহো॥

Kimhi kālamhi paggāho, kimhi kāle viniggaho.

‘‘কিম্হি পহংসনাকালো, সমথকালো চ কীদিসো।

‘‘Kimhi pahaṃsanākālo, samathakālo ca kīdiso;

উপেক্খাকালং চিত্তস্স, কথং দস্সেতি যোগিনো॥

Upekkhākālaṃ cittassa, kathaṃ dasseti yogino.

‘‘লীনে চিত্তম্হি পগ্গাহো, উদ্ধতস্মিং ৰিনিগ্গহো।

‘‘Līne cittamhi paggāho, uddhatasmiṃ viniggaho;

নিরস্সাদগতং চিত্তং, সম্পহংসেয্য তাৰদে॥

Nirassādagataṃ cittaṃ, sampahaṃseyya tāvade.

‘‘সম্পহট্ঠং যদা চিত্তং, অলীনং ভৰতিনুদ্ধতং।

‘‘Sampahaṭṭhaṃ yadā cittaṃ, alīnaṃ bhavatinuddhataṃ;

সমথস্স চ সো ¹³⁷ কালো, অজ্ঝত্তং রমযে মনো॥

Samathassa ca so ¹³⁸ kālo, ajjhattaṃ ramaye mano.

‘‘এতেন মেৰুপাযেন, যদা হোতি সমাহিতং।

‘‘Etena mevupāyena, yadā hoti samāhitaṃ;

সমাহিতচিত্তমঞ্ঞায, অজ্ঝুপেক্খেয্য তাৰদে॥

Samāhitacittamaññāya, ajjhupekkheyya tāvade.

‘‘এৰং কালৰিদূ ধীরো, কালঞ্ঞূ কালকোৰিদো।

‘‘Evaṃ kālavidū dhīro, kālaññū kālakovido;

কালেন কালং চিত্তস্স, নিমিত্তমুপলক্খযে’’তি॥

Kālena kālaṃ cittassa, nimittamupalakkhaye’’ti.

কালেন সো সম্মা ধম্মং পরিৰীমংসমানোতি। ‘‘সব্বে সঙ্খারা অনিচ্চা’’তি সম্মা ধম্মং পরিৰীমংসমানো, ‘‘সব্বে সঙ্খারা দুক্খা’’তি সম্মা ধম্মং পরিৰীমংসমানো, ‘‘সব্বে ধম্মা অনত্তা’’তি সম্মা ধম্মং পরিৰীমংসমানো…পে॰… ‘‘যং কিঞ্চি সমুদযধম্মং সব্বং তং নিরোধধম্ম’’ন্তি – সম্মা ধম্মং পরিৰীমংসমানো।

Kālena so sammā dhammaṃ parivīmaṃsamānoti. ‘‘Sabbe saṅkhārā aniccā’’ti sammā dhammaṃ parivīmaṃsamāno, ‘‘sabbe saṅkhārā dukkhā’’ti sammā dhammaṃ parivīmaṃsamāno, ‘‘sabbe dhammā anattā’’ti sammā dhammaṃ parivīmaṃsamāno…pe… ‘‘yaṃ kiñci samudayadhammaṃ sabbaṃ taṃ nirodhadhamma’’nti – sammā dhammaṃ parivīmaṃsamāno.

একোদিভূতো ৰিহনে তমং সো, ইতি ভগৰাতি। একোদীতি একগ্গচিত্তো অৰিক্খিত্তচিত্তো অৰিসাহটমানসো সমথো সমাধিন্দ্রিযং সমাধিবলং সম্মাসমাধীতি – একোদিভূতো। ৰিহনে তমং সোতি রাগতমং দোসতমং মোহতমং দিট্ঠিতমং মানতমং কিলেসতমং দুচ্চরিততমং অন্ধকরণং অচক্খুকরণং অঞ্ঞাণকরণং পঞ্ঞানিরোধিকং ৰিঘাতপক্খিকং অনিব্বানসংৰত্তনিকং হনেয্য ৰিহনেয্য পজহেয্য ৰিনোদেয্য ব্যন্তিং করেয্য অনভাৰং গমেয্য।

Ekodibhūto vihane tamaṃ so, iti bhagavāti. Ekodīti ekaggacitto avikkhittacitto avisāhaṭamānaso samatho samādhindriyaṃ samādhibalaṃ sammāsamādhīti – ekodibhūto. Vihane tamaṃ soti rāgatamaṃ dosatamaṃ mohatamaṃ diṭṭhitamaṃ mānatamaṃ kilesatamaṃ duccaritatamaṃ andhakaraṇaṃ acakkhukaraṇaṃ aññāṇakaraṇaṃ paññānirodhikaṃ vighātapakkhikaṃ anibbānasaṃvattanikaṃ haneyya vihaneyya pajaheyya vinodeyya byantiṃ kareyya anabhāvaṃ gameyya.

ভগৰাতি গারৰাধিৰচনং। অপি চ ভগ্গরাগোতি ভগৰা, ভগ্গদোসোতি ভগৰা, ভগ্গমোহোতি ভগৰা, ভগ্গমানোতি ভগৰা, ভগ্গদিট্ঠীতি ভগৰা, ভগ্গকণ্ডকোতি ভগৰা, ভগ্গকিলেসোতি ভগৰা, ভজি ৰিভজি পৰিভজি ধম্মরতনন্তি ভগৰা, ভৰানং অন্তকরোতি ভগৰা, ভাৰিতকাযো ভাৰিতসীলো ভাৰিতচিত্তো ভাৰিতপঞ্ঞোতি ভগৰা, ভজি ৰা ভগৰা অরঞ্ঞৰনপত্থানি পন্তানি সেনাসনানি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানীতি ভগৰা, ভাগী ৰা ভগৰা চীৰরপিণ্ডপাতসেনাসনগিলানপচ্চযভেসজ্জপরিক্খারানন্তি ভগৰা, ভাগী ৰা ভগৰা অত্থরসস্স ধম্মরসস্স ৰিমুত্তিরসস্স অধিসীলস্স অধিচিত্তস্স অধিপঞ্ঞাযাতি ভগৰা, ভাগী ৰা ভগৰা চতুন্নং ঝানানং চতুন্নং অপ্পমঞ্ঞানং চতুন্নং অরূপসমাপত্তীনন্তি ভগৰা, ভাগী ৰা ভগৰা অট্ঠন্নং ৰিমোক্খানং অট্ঠন্নং অভিভাযতনানং নৰন্নং অনুপুব্বৰিহারসমাপত্তীনন্তি ভগৰা, ভাগী ৰা ভগৰা দসন্নং সঞ্ঞাভাৰনানং দসন্নং কসিণসমাপত্তীনং আনাপানস্সতিসমাধিস্স অসুভসমাপত্তিযাতি ভগৰা, ভাগী ৰা ভগৰা চতুন্নং সতিপট্ঠানানং চতুন্নং সম্মপ্পধানানং চতুন্নং ইদ্ধিপাদানং পঞ্চন্নং ইন্দ্রিযানং পঞ্চন্নং বলানং সত্তন্নং বোজ্ঝঙ্গানং অরিযস্স অট্ঠঙ্গিকস্স মগ্গস্সাতি ভগৰা, ভাগী ৰা ভগৰা দসন্নং তথাগতবলানং চতুন্নং ৰেসারজ্জানং চতুন্নং পটিসম্ভিদানং ছন্নং অভিঞ্ঞানং ছন্নং বুদ্ধধম্মানন্তি ভগৰা , ভগৰাতি নেতং নামং মাতরা কতং ন পিতরা কতং ন ভাতরা কতং ন ভগিনিযা কতং ন মিত্তামচ্চেহি কতং ন ঞাতিসালোহিতেহি কতং ন সমণব্রাহ্মণেহি কতং ন দেৰতাহি কতং; ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞাণস্স পটিলাভা সচ্ছিকা পঞ্ঞত্তি যদিদং ভগৰাতি – একোদিভূতো ৰিহনে তমং সো ইতি ভগৰা।

Bhagavāti gāravādhivacanaṃ. Api ca bhaggarāgoti bhagavā, bhaggadosoti bhagavā, bhaggamohoti bhagavā, bhaggamānoti bhagavā, bhaggadiṭṭhīti bhagavā, bhaggakaṇḍakoti bhagavā, bhaggakilesoti bhagavā, bhaji vibhaji pavibhaji dhammaratananti bhagavā, bhavānaṃ antakaroti bhagavā, bhāvitakāyo bhāvitasīlo bhāvitacitto bhāvitapaññoti bhagavā, bhaji vā bhagavā araññavanapatthāni pantāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppānīti bhagavā, bhāgī vā bhagavā cīvarapiṇḍapātasenāsanagilānapaccayabhesajjaparikkhārānanti bhagavā, bhāgī vā bhagavā attharasassa dhammarasassa vimuttirasassa adhisīlassa adhicittassa adhipaññāyāti bhagavā, bhāgī vā bhagavā catunnaṃ jhānānaṃ catunnaṃ appamaññānaṃ catunnaṃ arūpasamāpattīnanti bhagavā, bhāgī vā bhagavā aṭṭhannaṃ vimokkhānaṃ aṭṭhannaṃ abhibhāyatanānaṃ navannaṃ anupubbavihārasamāpattīnanti bhagavā, bhāgī vā bhagavā dasannaṃ saññābhāvanānaṃ dasannaṃ kasiṇasamāpattīnaṃ ānāpānassatisamādhissa asubhasamāpattiyāti bhagavā, bhāgī vā bhagavā catunnaṃ satipaṭṭhānānaṃ catunnaṃ sammappadhānānaṃ catunnaṃ iddhipādānaṃ pañcannaṃ indriyānaṃ pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa maggassāti bhagavā, bhāgī vā bhagavā dasannaṃ tathāgatabalānaṃ catunnaṃ vesārajjānaṃ catunnaṃ paṭisambhidānaṃ channaṃ abhiññānaṃ channaṃ buddhadhammānanti bhagavā , bhagavāti netaṃ nāmaṃ mātarā kataṃ na pitarā kataṃ na bhātarā kataṃ na bhaginiyā kataṃ na mittāmaccehi kataṃ na ñātisālohitehi kataṃ na samaṇabrāhmaṇehi kataṃ na devatāhi kataṃ; vimokkhantikametaṃ buddhānaṃ bhagavantānaṃ bodhiyā mūle saha sabbaññutañāṇassa paṭilābhā sacchikā paññatti yadidaṃ bhagavāti – ekodibhūto vihane tamaṃ so iti bhagavā.

তেনাহ ভগৰা –

Tenāha bhagavā –

‘‘এতেসু ধম্মেসু ৰিনেয্য ছন্দং, ভিক্খু সতিমা সুৰিমুত্তচিত্তো।

‘‘Etesu dhammesu vineyya chandaṃ, bhikkhu satimā suvimuttacitto;

কালেন সো সম্মা ধম্মং পরিৰীমংসমানো, একোদিভূতো ৰিহনে তমং সো’’॥ [ইতি ভগৰাতি]

Kālena so sammā dhammaṃ parivīmaṃsamāno, ekodibhūto vihane tamaṃ so’’. [iti bhagavāti]

সারিপুত্তসুত্তনিদ্দেসো সোল়সমো।

Sāriputtasuttaniddeso soḷasamo.

অট্ঠকৰগ্গম্হি সোল়স সুত্তনিদ্দেসা সমত্তা।

Aṭṭhakavaggamhi soḷasa suttaniddesā samattā.

মহানিদ্দেসপাল়ি নিট্ঠিতা।

Mahāniddesapāḷi niṭṭhitā.

Footnotes:

1. ৰস্সংৰুট্ঠো (স্যা॰)

2. vassaṃvuṭṭho (syā.)

3. করৰিকরুদমঞ্জুস্সরো (স্যা॰)

4. karavikarudamañjussaro (syā.)

5. গণোস্স (সী॰)

6. সম্পত্তো (স্যা॰ ক॰)

7. gaṇossa (sī.)

8. sampatto (syā. ka.)

9. লোহমাসোৰ (স্যা॰)

10. lohamāsova (syā.)

11. অযং গাথা সং॰ নি॰ ১.১২২ দিস্সতি

12. ayaṃ gāthā saṃ. ni. 1.122 dissati

13. ভটকিত্তিসদ্দসিলোকো (স্যা॰)

14. bhaṭakittisaddasiloko (syā.)

15. রত্তিখিত্তা (সী॰) ধ॰ প॰ ৩০৪

16. rattikhittā (sī.) dha. pa. 304

17. ৰীসতিম্পি (সী॰)

18. vīsatimpi (sī.)

19. অত্থি ধম্মং জানিতব্বং (ক॰) মহানি॰ ১৫৬

20. atthi dhammaṃ jānitabbaṃ (ka.) mahāni. 156

21. ওলোকেন্তো (সী॰)

22. olokento (sī.)

23. ভদ্দেন (স্যা॰)

24. bhaddena (syā.)

25. ইত্থং ভাৰঞ্ঞথাভাৰং (ক॰) ইতিৰু॰ ১৫, ১০৫

26. itthaṃ bhāvaññathābhāvaṃ (ka.) itivu. 15, 105

27. অতরিংসু (স্যা॰)

28. atariṃsu (syā.)

29. পত্তো (স্যা॰)

30. পরিযাদিকতং (স্যা॰)

31. patto (syā.)

32. pariyādikataṃ (syā.)

33. ভগৰতো (স্যা॰)

34. bhagavato (syā.)

35. উক্খিত্তপলিঘো (স্যা॰ ক॰) মহানি॰ ৬

36. ukkhittapaligho (syā. ka.) mahāni. 6

37. অতিত্তিকো (সী॰), ইত্থিকো (স্যা॰), পুরাভেদসুত্তনিদ্দেসে পাঠনানত্তং নত্থি

38. পটিবাহিরা (ক॰)

39. পটিগণ্হতি (সী॰)

40. atittiko (sī.), itthiko (syā.), purābhedasuttaniddese pāṭhanānattaṃ natthi

41. paṭibāhirā (ka.)

42. paṭigaṇhati (sī.)

43. ধম্মকরকং (সী॰ স্যা॰) অভিধানপ্পদীপিকাভিনৰনিস্সযং ওলোকেতব্বং

44. dhammakarakaṃ (sī. syā.) abhidhānappadīpikābhinavanissayaṃ oloketabbaṃ

45. সংঘগণস্স গণী (সী॰)

46. সম্পত্তং (বহূসু)

47. saṃghagaṇassa gaṇī (sī.)

48. sampattaṃ (bahūsu)

49. অত্থিকাম্হ আগতা (সী॰ ক॰) এৰমীদিসেসু দ্ৰীসু পদেসুপি বহুৰচনেন

50. পযিরুপাসনা (স্যা॰ ক॰)

51. ইমানি তীণি পদানি নত্থি স্যা॰ পোত্থকে

52. atthikāmha āgatā (sī. ka.) evamīdisesu dvīsu padesupi bahuvacanena

53. payirupāsanā (syā. ka.)

54. imāni tīṇi padāni natthi syā. potthake

55. মানুসকেন (সী॰ স্যা॰) মহানি॰ ১৭১

56. mānusakena (sī. syā.) mahāni. 171

57. পলাসসন্থারো (সী॰ স্যা॰)

58. palāsasanthāro (sī. syā.)

59. গীৰন্তো (স্যা॰) মোগ্গল্লানব্যাকরণং ওলোকেতব্বং

60. gīvanto (syā.) moggallānabyākaraṇaṃ oloketabbaṃ

61. কুৰন্তো (সী॰), গীৰন্তো (স্যা॰)

62. kuvanto (sī.), gīvanto (syā.)

63. অন্ধতমং (স্যা॰ ক॰) মহানি॰ ১৫৬; ইতিৰু॰ ৮৮

64. andhatamaṃ (syā. ka.) mahāni. 156; itivu. 88

65. পত্থযমানো (স্যা॰)

66. patthayamāno (syā.)

67. থূলকুমারীগোচরো (স্যা॰ ক॰)

68. thūlakumārīgocaro (syā. ka.)

69. উল্লোকেন্তো (সী॰ ক॰) মহানি॰ ১৫৭ নত্থি পাঠনানত্তং

70. ullokento (sī. ka.) mahāni. 157 natthi pāṭhanānattaṃ

71. ন নিক্খমিং (স্যা॰) মহানি॰ ১৭

72. na nikkhamiṃ (syā.) mahāni. 17

73. কীদিসায (সী॰), ঈদিসায (স্যা॰)

74. kīdisāya (sī.), īdisāya (syā.)

75. অট্টিযমানস্স (স্যা॰ ক॰)

76. aṭṭiyamānassa (syā. ka.)

77. পটিভজি (সী॰ স্যা॰) মহানি॰ ৫০ নত্থি পাঠনানত্তং

78. paṭibhaji (sī. syā.) mahāni. 50 natthi pāṭhanānattaṃ

79. সিরিংসপানং (সী॰ ক॰)

80. siriṃsapānaṃ (sī. ka.)

81. ভদ্দেকরত্তিৰিহারং (সী॰ ক॰)

82. bhaddekarattivihāraṃ (sī. ka.)

83. অতুণ্হং (সী॰ ক॰)

84. atuṇhaṃ (sī. ka.)

85. অব্ভন্তরধাতুসঙ্কোপৰসেন (স্যা॰)

86. তিপ্পানং (সী॰ স্যা॰)

87. abbhantaradhātusaṅkopavasena (syā.)

88. tippānaṃ (sī. syā.)

89. অনুদ্দযা (সী॰) এৰমীদিসেসু দ্ৰীসু পদেসুপি দ্ৰিভাৰৰসেন। অনুদা অনুদাযনা অনুদাযিতত্তং (স্যা॰ ক॰)

90. অব্যাপজ্ঝো (স্যা॰ ক॰)

91. anuddayā (sī.) evamīdisesu dvīsu padesupi dvibhāvavasena. anudā anudāyanā anudāyitattaṃ (syā. ka.)

92. abyāpajjho (syā. ka.)

93. যস্স (স্যা॰) সুত্তমালা ওলোকেতব্বা

94. yassa (syā.) suttamālā oloketabbā

95. ওক্খাযনবহুলো (বহূসু)

96. সমোক্খাযনবহুলো (সী॰ স্যা॰)

97. okkhāyanabahulo (bahūsu)

98. samokkhāyanabahulo (sī. syā.)

99. পামুজ্জং (স্যা॰)

100. pāmujjaṃ (syā.)

101. অনভিরমনা (বহূসু) ৰিভ॰ ৮৫৬

102. anabhiramanā (bahūsu) vibha. 856

103. কুহিং ৰা (সী॰), কুৰং ৰা (স্যা॰), কুথ ৰা (ক॰)

104. kuhiṃ vā (sī.), kuvaṃ vā (syā.), kutha vā (ka.)

105. অনিকেতসারী (স্যা॰)

106. aniketasārī (syā.)

107. আগমনরত্তিং (স্যা॰)

108. āgamanarattiṃ (syā.)

109. মাগধা ৰিসঙ্ঘচারিনো (স্যা॰)

110. māgadhā visaṅghacārino (syā.)

111. মত্তং সো জঞ্ঞা (স্যা॰)

112. mattaṃ so jaññā (syā.)

113. দূসিতোপি (ক॰)

114. dūsitopi (ka.)

115. কুলানুদ্দযায (সী॰ ক॰)

116. kulānuddayāya (sī. ka.)

117. ৰেয্যাবাধিকানং (সী॰ স্যা॰)

118. veyyābādhikānaṃ (sī. syā.)

119. কুক্কুচ্চিযূপচ্ছিন্দে (স্যা॰)

120. kukkucciyūpacchinde (syā.)

121. পেক্খমানো (বহূসু)

122. pekkhamāno (bahūsu)

123. বহুলিং করোতি (ক॰)

124. bahuliṃ karoti (ka.)

125. নিধিনংৰ (ক॰) ধ॰ প॰ ৭৬

126. nidhinaṃva (ka.) dha. pa. 76

127. চ (স্যা॰)

128. ca (syā.)

129. কোকিলিযাৰ (স্যা॰)

130. kokiliyāva (syā.)

131. পটিৰিনোদিত্ৰা (ক॰)

132. paṭivinoditvā (ka.)

133. সমাধিস্স (সী॰)

134. samādhissa (sī.)

135. অথাপরে (স্যা॰)

136. athāpare (syā.)

137. সমথনিমিত্তস্স সো (সী॰ ক॰)

138. samathanimittassa so (sī. ka.)

Related texts:

অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / মহানিদ্দেস-অট্ঠকথা • Mahāniddesa-aṭṭhakathā / ১৬. সারিপুত্তসুত্তনিদ্দেসৰণ্ণনা • 16. Sāriputtasuttaniddesavaṇṇanā

© 1991-2024 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact