| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
16. ஸாரிபுத்தஸுத்தவண்ணனா
16. Sāriputtasuttavaṇṇanā
962. ந மே தி³ட்டோ²தி ஸாரிபுத்தஸுத்தங், ‘‘தே²ரபஞ்ஹஸுத்த’’ந்திபி வுச்சதி. கா உப்பத்தி? இமஸ்ஸ ஸுத்தஸ்ஸ உப்பத்தி – ராஜக³ஹகஸ்ஸ ஸெட்டி²ஸ்ஸ சந்த³னக⁴டிகாய படிலாப⁴ங் ஆதி³ங் கத்வா தாய சந்த³னக⁴டிகாய கதஸ்ஸ பத்தஸ்ஸ ஆகாஸே உஸ்ஸாபனங் ஆயஸ்மதோ பிண்டோ³லபா⁴ரத்³வாஜஸ்ஸ இத்³தி⁴யா பத்தக்³க³ஹணங், தஸ்மிங் வத்து²ஸ்மிங் ஸாவகானங் இத்³தி⁴படிக்கே²போ, தித்தி²யானங் ப⁴க³வதா ஸத்³தி⁴ங் பாடிஹாரியங் கத்துகாமதா, பாடிஹாரியகரணங், ப⁴க³வதோ ஸாவத்தி²க³மனங், தித்தி²யானுப³ந்த⁴னங், ஸாவத்தி²யங் பஸேனதி³னோ பு³த்³தூ⁴பக³மனங் கண்ட³ம்ப³பாதுபா⁴வோ, சதுன்னங் பரிஸானங் தித்தி²யஜயத்த²ங் பாடிஹாரியகரணுஸ்ஸுக்கனிவாரணங், யமகபாடிஹாரியகரணங், கதபாடிஹாரியஸ்ஸ ப⁴க³வதோ தாவதிங்ஸப⁴வனக³மனங், தத்த² தேமாஸங் த⁴ம்மதே³ஸனா, ஆயஸ்மதா மஹாமொக்³க³ல்லானத்தே²ரேன யாசிதஸ்ஸ தே³வலோகதோ ஸங்கஸ்ஸனக³ரே ஓரோஹணந்தி இமானி வத்தூ²னி அந்தரந்தரே ச ஜாதகானி வித்தா²ரெத்வா யாவ த³ஸஸஹஸ்ஸசக்கவாளதே³வதாஹி பூஜியமானோ ப⁴க³வா மஜ்ஜே² மணிமயேன ஸோபானேன ஸங்கஸ்ஸனக³ரே ஓருய்ஹ ஸோபானகளேவரே அட்டா²ஸி –
962.Name diṭṭhoti sāriputtasuttaṃ, ‘‘therapañhasutta’’ntipi vuccati. Kā uppatti? Imassa suttassa uppatti – rājagahakassa seṭṭhissa candanaghaṭikāya paṭilābhaṃ ādiṃ katvā tāya candanaghaṭikāya katassa pattassa ākāse ussāpanaṃ āyasmato piṇḍolabhāradvājassa iddhiyā pattaggahaṇaṃ, tasmiṃ vatthusmiṃ sāvakānaṃ iddhipaṭikkhepo, titthiyānaṃ bhagavatā saddhiṃ pāṭihāriyaṃ kattukāmatā, pāṭihāriyakaraṇaṃ, bhagavato sāvatthigamanaṃ, titthiyānubandhanaṃ, sāvatthiyaṃ pasenadino buddhūpagamanaṃ kaṇḍambapātubhāvo, catunnaṃ parisānaṃ titthiyajayatthaṃ pāṭihāriyakaraṇussukkanivāraṇaṃ, yamakapāṭihāriyakaraṇaṃ, katapāṭihāriyassa bhagavato tāvatiṃsabhavanagamanaṃ, tattha temāsaṃ dhammadesanā, āyasmatā mahāmoggallānattherena yācitassa devalokato saṅkassanagare orohaṇanti imāni vatthūni antarantare ca jātakāni vitthāretvā yāva dasasahassacakkavāḷadevatāhi pūjiyamāno bhagavā majjhe maṇimayena sopānena saṅkassanagare oruyha sopānakaḷevare aṭṭhāsi –
‘‘யே ஜா²னப்பஸுதா தீ⁴ரா, நெக்க²ம்மூபஸமே ரதா;
‘‘Ye jhānappasutā dhīrā, nekkhammūpasame ratā;
தே³வாபி தேஸங் பிஹயந்தி, ஸம்பு³த்³தா⁴னங் ஸதீமத’’ந்தி. (த⁴॰ ப॰ 181) –
Devāpi tesaṃ pihayanti, sambuddhānaṃ satīmata’’nti. (dha. pa. 181) –
இமிஸ்ஸா த⁴ம்மபத³கா³தா²ய வுச்சமானாய வுத்தா. ஸோபானகளேவரே டி²தங் பன ப⁴க³வந்தங் ஸப்³ப³பட²மங் ஆயஸ்மா ஸாரிபுத்தோ வந்தி³, ததோ உப்பலவண்ணா பி⁴க்கு²னீ, அதா²பரோ ஜனகாயோ. தத்ர ப⁴க³வா சிந்தேஸி – ‘‘இமிஸ்ஸங் பரிஸதி மொக்³க³ல்லானோ இத்³தி⁴யா அக்³கோ³தி பாகடோ, அனுருத்³தோ⁴ தி³ப்³ப³சக்கு²னா, புண்ணோ த⁴ம்மகதி²கத்தேன, ஸாரிபுத்தங் பனாயங் பரிஸா ந கேனசி கு³ணேன ஏவங் அக்³கோ³தி ஜானாதி, யங்னூனாஹங் ஸாரிபுத்தங் பஞ்ஞாகு³ணேன பகாஸெய்ய’’ந்தி. அத² தே²ரங் பஞ்ஹங் புச்சி². தே²ரோ ப⁴க³வதா புச்சி²தங் புச்சி²தங் புது²ஜ்ஜனபஞ்ஹங், ஸெக்க²பஞ்ஹங், அஸெக்க²பஞ்ஹஞ்ச, ஸப்³ப³ங் விஸ்ஸஜ்ஜேஸி. ததா³ நங் ஜனோ ‘‘பஞ்ஞாய அக்³கோ³’’தி அஞ்ஞாஸி . அத² ப⁴க³வா ‘‘ஸாரிபுத்தோ ந இதா³னேவ பஞ்ஞாய அக்³கோ³, அதீதேபி பஞ்ஞாய அக்³கோ³’’தி ஜாதகங் ஆனேஸி.
Imissā dhammapadagāthāya vuccamānāya vuttā. Sopānakaḷevare ṭhitaṃ pana bhagavantaṃ sabbapaṭhamaṃ āyasmā sāriputto vandi, tato uppalavaṇṇā bhikkhunī, athāparo janakāyo. Tatra bhagavā cintesi – ‘‘imissaṃ parisati moggallāno iddhiyā aggoti pākaṭo, anuruddho dibbacakkhunā, puṇṇo dhammakathikattena, sāriputtaṃ panāyaṃ parisā na kenaci guṇena evaṃ aggoti jānāti, yaṃnūnāhaṃ sāriputtaṃ paññāguṇena pakāseyya’’nti. Atha theraṃ pañhaṃ pucchi. Thero bhagavatā pucchitaṃ pucchitaṃ puthujjanapañhaṃ, sekkhapañhaṃ, asekkhapañhañca, sabbaṃ vissajjesi. Tadā naṃ jano ‘‘paññāya aggo’’ti aññāsi . Atha bhagavā ‘‘sāriputto na idāneva paññāya aggo, atītepi paññāya aggo’’ti jātakaṃ ānesi.
அதீதே பரோஸஹஸ்ஸா இஸயோ வனமூலப²லாஹாரா பப்³ப³தபாதே³ வஸந்தி. தேஸங் ஆசரியஸ்ஸ ஆபா³தோ⁴ உப்பஜ்ஜி, உபட்டா²னானி வத்தந்தி. ஜெட்ட²ந்தேவாஸீ ‘‘ஸப்பாயபே⁴ஸஜ்ஜங் ஆஹரிஸ்ஸாமி, ஆசரியங் அப்பமத்தா உபட்ட²ஹதா²’’தி வத்வா மனுஸ்ஸபத²ங் அக³மாஸி. தஸ்மிங் அனாக³தேயேவ ஆசரியோ காலமகாஸி. தங் ‘‘இதா³னி காலங் கரிஸ்ஸதீ’’தி அந்தேவாஸிகா ஸமாபத்திமாரப்³ப⁴ புச்சி²ங்ஸு. ஸோ ஆகிஞ்சஞ்ஞாயதனஸமாபத்திங் ஸந்தா⁴யாஹ – ‘‘நத்தி² கிஞ்சீ’’தி, அந்தேவாஸினோ ‘‘நத்தி² ஆசரியஸ்ஸ அதி⁴க³மோ’’தி அக்³க³ஹேஸுங். அத² ஜெட்ட²ந்தேவாஸீ பே⁴ஸஜ்ஜங் ஆதா³ய ஆக³ந்த்வா தங் காலகதங் தி³ஸ்வா ஆசரியங் ‘‘கிஞ்சி புச்சி²த்தா²’’தி ஆஹ. ஆம புச்சி²ம்ஹா, ‘‘நத்தி² கிஞ்சீ’’தி ஆஹ, ந கிஞ்சி ஆசரியேன அதி⁴க³தந்தி. நத்தி² கிஞ்சீதி வத³ந்தோ ஆசரியோ ஆகிஞ்சஞ்ஞாயதனங் பவேதே³ஸி, ஸக்காதப்³போ³ ஆசரியோதி.
Atīte parosahassā isayo vanamūlaphalāhārā pabbatapāde vasanti. Tesaṃ ācariyassa ābādho uppajji, upaṭṭhānāni vattanti. Jeṭṭhantevāsī ‘‘sappāyabhesajjaṃ āharissāmi, ācariyaṃ appamattā upaṭṭhahathā’’ti vatvā manussapathaṃ agamāsi. Tasmiṃ anāgateyeva ācariyo kālamakāsi. Taṃ ‘‘idāni kālaṃ karissatī’’ti antevāsikā samāpattimārabbha pucchiṃsu. So ākiñcaññāyatanasamāpattiṃ sandhāyāha – ‘‘natthi kiñcī’’ti, antevāsino ‘‘natthi ācariyassa adhigamo’’ti aggahesuṃ. Atha jeṭṭhantevāsī bhesajjaṃ ādāya āgantvā taṃ kālakataṃ disvā ācariyaṃ ‘‘kiñci pucchitthā’’ti āha. Āma pucchimhā, ‘‘natthi kiñcī’’ti āha, na kiñci ācariyena adhigatanti. Natthi kiñcīti vadanto ācariyo ākiñcaññāyatanaṃ pavedesi, sakkātabbo ācariyoti.
‘‘பரோஸஹஸ்ஸம்பி ஸமாக³தானங்,
‘‘Parosahassampi samāgatānaṃ,
கந்தெ³ய்யுங் தே வஸ்ஸஸதங் அபஞ்ஞா;
Kandeyyuṃ te vassasataṃ apaññā;
ஏகோபி ஸெய்யோ புரிஸோ ஸபஞ்ஞோ,
Ekopi seyyo puriso sapañño,
யோ பா⁴ஸிதஸ்ஸ விஜானாதி அத்த²’’ந்தி. (ஜா॰ 1.1.99);
Yo bhāsitassa vijānāti attha’’nti. (jā. 1.1.99);
கதி²தே ச பன ப⁴க³வதா ஜாதகே ஆயஸ்மா ஸாரிபுத்தோ அத்தனோ ஸத்³தி⁴விஹாரிகானங் பஞ்சன்னங் பி⁴க்கு²ஸதானமத்தா²ய ஸப்பாயஸேனாஸனகோ³சரஸீலவதாதீ³னி புச்சி²துங் ‘‘ந மே தி³ட்டோ² இதோ புப்³பே³’’தி இமங் து²திகா³த²ங் ஆதி³ங் கத்வா அட்ட² கா³தா²யோ அபா⁴ஸி. தமத்த²ங் விஸ்ஸஜ்ஜெந்தோ ப⁴க³வா ததோ பரா ஸேஸகா³தா²தி.
Kathite ca pana bhagavatā jātake āyasmā sāriputto attano saddhivihārikānaṃ pañcannaṃ bhikkhusatānamatthāya sappāyasenāsanagocarasīlavatādīni pucchituṃ ‘‘na me diṭṭho ito pubbe’’ti imaṃ thutigāthaṃ ādiṃ katvā aṭṭha gāthāyo abhāsi. Tamatthaṃ vissajjento bhagavā tato parā sesagāthāti.
தத்த² இதோ புப்³பே³தி இதோ ஸங்கஸ்ஸனக³ரே ஓதரணதோ புப்³பே³. வக்³கு³வதோ³தி ஸுந்த³ரவதோ³. துஸிதா க³ணிமாக³தோதி துஸிதகாயா சவித்வா மாதுகுச்சி²ங் ஆக³தத்தா துஸிதா ஆக³தோ, க³ணாசரியத்தா க³ணீ. ஸந்துட்ட²ட்டே²ன வா துஸிதஸங்கா²தா தே³வலோகா க³ணிங் ஆக³தோ துஸிதானங் வா அரஹந்தானங் க³ணிங் ஆக³தோதி.
Tattha ito pubbeti ito saṅkassanagare otaraṇato pubbe. Vagguvadoti sundaravado. Tusitā gaṇimāgatoti tusitakāyā cavitvā mātukucchiṃ āgatattā tusitā āgato, gaṇācariyattā gaṇī. Santuṭṭhaṭṭhena vā tusitasaṅkhātā devalokā gaṇiṃ āgato tusitānaṃ vā arahantānaṃ gaṇiṃ āgatoti.
963. து³தியகா³தா²ய ஸதே³வகஸ்ஸ லோகஸ்ஸ யதா² தி³ஸ்ஸதீதி ஸதே³வகஸ்ஸ லோகஸ்ஸ விய மனுஸ்ஸானம்பி தி³ஸ்ஸதி. யதா² வா தி³ஸ்ஸதீதி தச்ச²தோ அவிபரீததோ தி³ஸ்ஸதி சக்கு²மாதி உத்தமசக்கு². ஏகோதி பப்³ப³ஜ்ஜாஸங்கா²தாதீ³ஹி ஏகோ. ரதிந்தி நெக்க²ம்மரதிஆதி³ங்.
963. Dutiyagāthāya sadevakassa lokassa yathā dissatīti sadevakassa lokassa viya manussānampi dissati. Yathā vā dissatīti tacchato aviparītato dissati cakkhumāti uttamacakkhu. Ekoti pabbajjāsaṅkhātādīhi eko. Ratinti nekkhammaratiādiṃ.
964. ததியகா³தா²ய ப³ஹூனமித⁴ ப³த்³தா⁴னந்தி இத⁴ ப³ஹூனங் க²த்தியாதீ³னங் ஸிஸ்ஸானங். ஸிஸ்ஸா ஹி ஆசரியே படிப³த்³த⁴வுத்தித்தா ‘‘ப³த்³தா⁴’’தி வுச்சந்தி அத்தி² பஞ்ஹேன ஆக³மந்தி அத்தி²கோ பஞ்ஹேன ஆக³தொம்ஹி, அத்தி²கானங் வா பஞ்ஹேன ஆக³மனங், பஞ்ஹேன அத்தி² ஆக³மனங் வாதி.
964. Tatiyagāthāya bahūnamidha baddhānanti idha bahūnaṃ khattiyādīnaṃ sissānaṃ. Sissā hi ācariye paṭibaddhavuttittā ‘‘baddhā’’ti vuccanti atthi pañhena āgamanti atthiko pañhena āgatomhi, atthikānaṃ vā pañhena āgamanaṃ, pañhena atthi āgamanaṃ vāti.
965. சதுத்த²கா³தா²ய விஜிகு³ச்ச²தோதி ஜாதிஆதீ³ஹி அட்டீயதோ ரித்தமாஸனந்தி விவித்தங் மஞ்சபீட²ங். பப்³ப³தானங் கு³ஹாஸு வாதி பப்³ப³தகு³ஹாஸு வா ரித்தமாஸனங் ப⁴ஜதோதி ஸம்ப³ந்தி⁴தப்³ப³ங்.
965. Catutthagāthāya vijigucchatoti jātiādīhi aṭṭīyato rittamāsananti vivittaṃ mañcapīṭhaṃ. Pabbatānaṃ guhāsu vāti pabbataguhāsu vā rittamāsanaṃ bhajatoti sambandhitabbaṃ.
966. பஞ்சமகா³தா²ய உச்சாவசேஸூதி ஹீனபணீதேஸு. ஸயனேஸூதி விஹாராதீ³ஸு ஸேனாஸனேஸு. கீவந்தோ தத்த² பே⁴ரவாதி கித்தகா தத்த² ப⁴யகாரணா. ‘‘குவந்தோ’’திபி பாடோ², கூஜந்தோதி சஸ்ஸ அத்தோ². ந பன புப்³பே³னாபரங் ஸந்தி⁴யதி.
966. Pañcamagāthāya uccāvacesūti hīnapaṇītesu. Sayanesūti vihārādīsu senāsanesu. Kīvanto tattha bheravāti kittakā tattha bhayakāraṇā. ‘‘Kuvanto’’tipi pāṭho, kūjantoti cassa attho. Na pana pubbenāparaṃ sandhiyati.
967. ச²ட்ட²கா³தா²ய கதீ பரிஸ்ஸயாதி கித்தகா உபத்³த³வா. அக³தங் தி³ஸந்தி நிப்³பா³னங். தஞ்ஹி அக³தபுப்³ப³த்தா அக³தங் ததா² நித்³தி³ஸிதப்³ப³தோ தி³ஸா சாதி . தேன வுத்தங் ‘‘அக³தங் தி³ஸ’’ந்தி. அபி⁴ஸம்ப⁴வேதி அபி⁴ப⁴வெய்ய. பந்தம்ஹீதி பரியந்தே.
967. Chaṭṭhagāthāya katī parissayāti kittakā upaddavā. Agataṃ disanti nibbānaṃ. Tañhi agatapubbattā agataṃ tathā niddisitabbato disā cāti . Tena vuttaṃ ‘‘agataṃ disa’’nti. Abhisambhaveti abhibhaveyya. Pantamhīti pariyante.
968-9. ஸத்தமகா³தா²ய க்யாஸ்ஸ ப்³யப்பத²யோ அஸ்ஸூதி கீதி³ஸானி தஸ்ஸ வசனானி அஸ்ஸு. அட்ட²மகா³தா²ய ஏகோதி³ நிபகோதி ஏகக்³க³சித்தோ பண்டி³தோ.
968-9. Sattamagāthāya kyāssa byappathayo assūti kīdisāni tassa vacanāni assu. Aṭṭhamagāthāya ekodi nipakoti ekaggacitto paṇḍito.
970. ஏவங் ஆயஸ்மதா ஸாரிபுத்தேன தீஹி கா³தா²ஹி ப⁴க³வந்தங் தோ²மெத்வா பஞ்சஹி கா³தா²ஹி – பஞ்சஸதானங் ஸிஸ்ஸானமத்தா²ய ஸேனாஸனகோ³சரஸீலவதாதீ³னி புச்சி²தோ ப⁴க³வா தமத்த²ங் பகாஸேதுங் ‘‘விஜிகு³ச்ச²மானஸ்ஸா’’திஆதி³னா நயேன விஸ்ஸஜ்ஜனமாரத்³தோ⁴. தத்த² பட²மகா³தா²ய தாவத்தோ² – ஜாதிஆதீ³ஹி விஜிகு³ச்ச²மானஸ்ஸ ரித்தாஸனங் ஸயனங் ஸேவதோ சே ஸம்போ³தி⁴காமஸ்ஸ ஸாரிபுத்த, பி⁴க்கு²னோ யதி³த³ங் பா²ஸு யோ பா²ஸுவிஹாரோ யதா²னுத⁴ம்மங் யோ ச அனுத⁴ம்மோ, தங் தே பவக்கா²மி யதா² பஜானங் யதா² பஜானந்தோ வதெ³ய்ய, ஏவங் வதா³மீதி.
970. Evaṃ āyasmatā sāriputtena tīhi gāthāhi bhagavantaṃ thometvā pañcahi gāthāhi – pañcasatānaṃ sissānamatthāya senāsanagocarasīlavatādīni pucchito bhagavā tamatthaṃ pakāsetuṃ ‘‘vijigucchamānassā’’tiādinā nayena vissajjanamāraddho. Tattha paṭhamagāthāya tāvattho – jātiādīhi vijigucchamānassa rittāsanaṃ sayanaṃ sevato ce sambodhikāmassa sāriputta, bhikkhuno yadidaṃ phāsu yo phāsuvihāro yathānudhammaṃ yo ca anudhammo, taṃ te pavakkhāmi yathā pajānaṃ yathā pajānanto vadeyya, evaṃ vadāmīti.
971. து³தியகா³தா²ய பரியந்தசாரீதி ஸீலாதீ³ஸு சதூஸு பரியந்தேஸு சரமானோ. ட³ங்ஸாதி⁴பாதானந்தி பிங்க³லமக்கி²கானஞ்ச ஸேஸமக்கி²கானஞ்ச. ஸேஸமக்கி²கா ஹி ததோ ததோ அதி⁴பதித்வா கா²த³ந்தி, தஸ்மா ‘‘அதி⁴பாதா’’தி வுச்சந்தி. மனுஸ்ஸப²ஸ்ஸானந்தி சோராதி³ப²ஸ்ஸானங்.
971. Dutiyagāthāya pariyantacārīti sīlādīsu catūsu pariyantesu caramāno. Ḍaṃsādhipātānanti piṅgalamakkhikānañca sesamakkhikānañca. Sesamakkhikā hi tato tato adhipatitvā khādanti, tasmā ‘‘adhipātā’’ti vuccanti. Manussaphassānanti corādiphassānaṃ.
972. ததியகா³தா²ய பரத⁴ம்மிகா நாம ஸத்த ஸஹத⁴ம்மிகவஜ்ஜா ஸப்³பே³பி பா³ஹிரகா. குஸலானுஏஸீதி குஸலத⁴ம்மே அன்வேஸமானோ.
972. Tatiyagāthāya paradhammikā nāma satta sahadhammikavajjā sabbepi bāhirakā. Kusalānuesīti kusaladhamme anvesamāno.
973. சதுத்த²கா³தா²ய ஆதங்கப²ஸ்ஸேனாதி ரோக³ப²ஸ்ஸேன. ஸீதங் அதுண்ஹந்தி ஸீதஞ்ச உண்ஹஞ்ச. ஸோ தேஹி பு²ட்டோ² ப³ஹுதா⁴தி ஸோ தேஹி ஆதங்காதீ³ஹி அனேகேஹி ஆகாரேஹி பு²ட்டோ² ஸமானோபி. அனோகோதி அபி⁴ஸங்கா²ரவிஞ்ஞாணாதீ³னங் அனோகாஸபூ⁴தோ.
973. Catutthagāthāya ātaṅkaphassenāti rogaphassena. Sītaṃ atuṇhanti sītañca uṇhañca. So tehi phuṭṭho bahudhāti so tehi ātaṅkādīhi anekehi ākārehi phuṭṭho samānopi. Anokoti abhisaṅkhāraviññāṇādīnaṃ anokāsabhūto.
974. ஏவங் ‘‘பி⁴க்கு²னோ விஜிகு³ச்ச²தோ’’திஆதீ³ஹி தீஹி கா³தா²ஹி புட்ட²மத்த²ங் விஸ்ஸஜ்ஜெத்வா இதா³னி ‘‘க்யாஸ்ஸ ப்³யப்பத²யோ’’திஆதி³னா நயேன புட்ட²ங் விஸ்ஸஜ்ஜெந்தோ ‘‘தெ²ய்யங் ந காரே’’திஆதி³மாஹ. தத்த² ப²ஸ்ஸேதி ப²ரெய்ய . யதா³விலத்தங் மனஸோ விஜஞ்ஞாதி யங் சித்தஸ்ஸ ஆவிலத்தங் விஜானெய்ய, தங் ஸப்³ப³ங் ‘‘கண்ஹஸ்ஸ பக்கோ²’’தி வினோத³யெய்ய.
974. Evaṃ ‘‘bhikkhuno vijigucchato’’tiādīhi tīhi gāthāhi puṭṭhamatthaṃ vissajjetvā idāni ‘‘kyāssa byappathayo’’tiādinā nayena puṭṭhaṃ vissajjento ‘‘theyyaṃ na kāre’’tiādimāha. Tattha phasseti phareyya . Yadāvilattaṃ manaso vijaññāti yaṃ cittassa āvilattaṃ vijāneyya, taṃ sabbaṃ ‘‘kaṇhassa pakkho’’ti vinodayeyya.
975. மூலம்பி தேஸங் பலிக²ஞ்ஞ திட்டே²தி தேஸங் கோதா⁴திமானானங் யங் அவிஜ்ஜாதி³கங் மூலங், தம்பி பலிக²ணித்வா திட்டெ²ய்ய. அத்³தா⁴ ப⁴வந்தோ அபி⁴ஸம்ப⁴வெய்யாதி ஏவங் பியப்பியங் அபி⁴ப⁴வந்தோ ஏகங்ஸேனேவ அபி⁴ப⁴வெய்ய, ந தத்ர ஸிதி²லங் பரக்கமெய்யாதி அதி⁴ப்பாயோ.
975.Mūlampi tesaṃ palikhañña tiṭṭheti tesaṃ kodhātimānānaṃ yaṃ avijjādikaṃ mūlaṃ, tampi palikhaṇitvā tiṭṭheyya. Addhā bhavanto abhisambhaveyyāti evaṃ piyappiyaṃ abhibhavanto ekaṃseneva abhibhaveyya, na tatra sithilaṃ parakkameyyāti adhippāyo.
976. பஞ்ஞங் புரக்க²த்வாதி பஞ்ஞங் புப்³ப³ங்க³மங் கத்வா. கல்யாணபீதீதி கல்யாணாய பீதியா ஸமன்னாக³தோ. சதுரோ ஸஹேத² பரிதே³வத⁴ம்மேதி அனந்தரகா³தா²ய வுச்சமானே பரிதே³வனீயத⁴ம்மே ஸஹெய்ய.
976.Paññaṃ purakkhatvāti paññaṃ pubbaṅgamaṃ katvā. Kalyāṇapītīti kalyāṇāya pītiyā samannāgato. Caturo sahetha paridevadhammeti anantaragāthāya vuccamāne paridevanīyadhamme saheyya.
977. கிங்ஸூ அஸிஸ்ஸாமீதி கிங் பு⁴ஞ்ஜிஸ்ஸாமி. குவங் வா அஸிஸ்ஸந்தி குஹிங் வா அஸிஸ்ஸாமி. து³க்க²ங் வத ஸெத்த² க்வஜ்ஜ ஸெஸ்ஸந்தி இமங் ரத்திங் து³க்க²ங் ஸயிங், அஜ்ஜ ஆக³மனரத்திங் கத்த² ஸயிஸ்ஸங். ஏதே விதக்கேதி ஏதே பிண்ட³பாதனிஸ்ஸிதே த்³வே, ஸேனாஸனநிஸ்ஸிதே த்³வேதி சத்தாரோ விதக்கே. அனிகேதசாரீதி அபலிபோ³த⁴சாரீ நித்தண்ஹசாரீ.
977.Kiṃsū asissāmīti kiṃ bhuñjissāmi. Kuvaṃ vā asissanti kuhiṃ vā asissāmi. Dukkhaṃ vata settha kvajja sessanti imaṃ rattiṃ dukkhaṃ sayiṃ, ajja āgamanarattiṃ kattha sayissaṃ. Ete vitakketi ete piṇḍapātanissite dve, senāsananissite dveti cattāro vitakke. Aniketacārīti apalibodhacārī nittaṇhacārī.
978. காலேதி பிண்ட³பாதகாலே பிண்ட³பாதஸங்கா²தங் அன்னங் வா சீவரகாலே சீவரஸங்கா²தங் வஸனங் வா லத்³தா⁴ த⁴ம்மேன ஸமேனாதி அதி⁴ப்பாயோ. மத்தங் ஸோ ஜஞ்ஞாதி படிக்³க³ஹணே ச பரிபோ⁴கே³ ச ஸோ பமாணங் ஜானெய்ய. இதா⁴தி ஸாஸனே, நிபாதமத்தமேவ வா ஏதங். தோஸனத்த²ந்தி ஸந்தோஸத்த²ங், ஏதத³த்த²ங் மத்தங் ஜானெய்யாதி வுத்தங் ஹோதி. ஸோ தேஸு கு³த்தோதி ஸோ பி⁴க்கு² தேஸு பச்சயேஸு கு³த்தோ. யதசாரீதி ஸங்யதவிஹாரோ , ரக்கி²திரியாபதோ² ரக்கி²தகாயவசீமனொத்³வாரோ சாதி வுத்தங் ஹோதி. ‘‘யதிசாரீ’’திபி பாடோ², ஸோயேவத்தோ². ருஸிதோதி ரோஸிதோ, க⁴ட்டிதோதி வுத்தங் ஹோதி.
978.Kāleti piṇḍapātakāle piṇḍapātasaṅkhātaṃ annaṃ vā cīvarakāle cīvarasaṅkhātaṃ vasanaṃ vā laddhā dhammena samenāti adhippāyo. Mattaṃ so jaññāti paṭiggahaṇe ca paribhoge ca so pamāṇaṃ jāneyya. Idhāti sāsane, nipātamattameva vā etaṃ. Tosanatthanti santosatthaṃ, etadatthaṃ mattaṃ jāneyyāti vuttaṃ hoti. So tesu guttoti so bhikkhu tesu paccayesu gutto. Yatacārīti saṃyatavihāro , rakkhitiriyāpatho rakkhitakāyavacīmanodvāro cāti vuttaṃ hoti. ‘‘Yaticārī’’tipi pāṭho, soyevattho. Rusitoti rosito, ghaṭṭitoti vuttaṃ hoti.
979. ஜா²னானுயுத்தோதி அனுபன்னுப்பாத³னேன உப்பன்னாஸேவனேன ச ஜா²னே அனுயுத்தோ. உபெக்க²மாரப்³ப⁴ ஸமாஹிதத்தோதி சதுத்த²ஜ்ஜா²னுபெக்க²ங் உப்பாதெ³த்வா ஸமாஹிதசித்தோ. தக்காஸயங் குக்குச்சியூபசி²ந்தே³தி காமவிதக்காதி³ங் தக்கஞ்ச , காமஸஞ்ஞாதி³ங் தஸ்ஸ தக்கஸ்ஸ ஆஸயஞ்ச, ஹத்த²குக்குச்சாதி³ங் குக்குச்சியஞ்ச உபச்சி²ந்தெ³ய்ய.
979.Jhānānuyuttoti anupannuppādanena uppannāsevanena ca jhāne anuyutto. Upekkhamārabbha samāhitattoti catutthajjhānupekkhaṃ uppādetvā samāhitacitto. Takkāsayaṃ kukkucciyūpachindeti kāmavitakkādiṃ takkañca , kāmasaññādiṃ tassa takkassa āsayañca, hatthakukkuccādiṃ kukkucciyañca upacchindeyya.
980. சுதி³தோ வசீபி⁴ ஸதிமாபி⁴னந்தே³தி உபஜ்ஜா²யாதீ³ஹி வாசாஹி சோதி³தோ ஸமானோ ஸதிமா ஹுத்வா தங் சோத³னங் அபி⁴னந்தெ³ய்ய. வாசங் பமுஞ்சே குஸலந்தி ஞாணஸமுட்டி²தங் வாசங் பமுஞ்செய்ய. நாதிவேலந்தி அதிவேலங் பன வாசங் காலவேலஞ்ச ஸீலவேலஞ்ச அதிக்கந்தங் நப்பமுஞ்செய்ய. ஜனவாத³த⁴ம்மாயாதி ஜனவாத³கதா²ய. ந சேதயெய்யாதி சேதனங் ந உப்பாதெ³ய்ய.
980.Cudito vacībhi satimābhinandeti upajjhāyādīhi vācāhi codito samāno satimā hutvā taṃ codanaṃ abhinandeyya. Vācaṃ pamuñce kusalanti ñāṇasamuṭṭhitaṃ vācaṃ pamuñceyya. Nātivelanti ativelaṃ pana vācaṃ kālavelañca sīlavelañca atikkantaṃ nappamuñceyya. Janavādadhammāyāti janavādakathāya. Na cetayeyyāti cetanaṃ na uppādeyya.
981. அதா²பரந்தி அத² இதா³னி இதோ பரம்பி. பஞ்ச ரஜானீதி ரூபராகா³தீ³னி பஞ்ச ரஜானி. யேஸங் ஸதீமா வினயாய ஸிக்கே²தி யேஸங் உபட்டி²தஸ்ஸதி ஹுத்வா வினயனத்த²ங் திஸ்ஸோ ஸிக்கா² ஸிக்கெ²ய்ய. ஏவங் ஸிக்க²ந்தோ ஹி ரூபேஸு…பே॰… ப²ஸ்ஸேஸு ஸஹேத² ராக³ங், ந அஞ்ஞேதி.
981.Athāparanti atha idāni ito parampi. Pañca rajānīti rūparāgādīni pañca rajāni. Yesaṃ satīmā vinayāya sikkheti yesaṃ upaṭṭhitassati hutvā vinayanatthaṃ tisso sikkhā sikkheyya. Evaṃ sikkhanto hi rūpesu…pe… phassesu sahetha rāgaṃ, na aññeti.
982. ததோ ஸோ தேஸங் வினயாய ஸிக்க²ந்தோ அனுக்கமேன – ஏதேஸு த⁴ம்மேஸூதி கா³தா². தத்த² ஏதேஸூதி ரூபாதீ³ஸு. காலேன ஸோ ஸம்மா த⁴ம்மங் பரிவீமங்ஸமானோதி ஸோ பி⁴க்கு² ய்வாயங் ‘‘உத்³த⁴தே சித்தே ஸமாதி⁴ஸ்ஸ காலோ’’திஆதி³னா நயேன காலோ வுத்தோ, தேன காலேன ஸப்³ப³ங் ஸங்க²தத⁴ம்மங் அனிச்சாதி³னயேன பரிவீமங்ஸமானோ. ஏகோதி³பூ⁴தோ விஹனே தமங் ஸோதி ஸோ ஏகக்³க³சித்தோ ஸப்³ப³ங் மோஹாதி³தமங் விஹனெய்ய. நத்தி² எத்த² ஸங்ஸயோ. ஸேஸங் ஸப்³ப³த்த² பாகடமேவ.
982. Tato so tesaṃ vinayāya sikkhanto anukkamena – etesu dhammesūti gāthā. Tattha etesūti rūpādīsu. Kālena so sammā dhammaṃ parivīmaṃsamānoti so bhikkhu yvāyaṃ ‘‘uddhate citte samādhissa kālo’’tiādinā nayena kālo vutto, tena kālena sabbaṃ saṅkhatadhammaṃ aniccādinayena parivīmaṃsamāno. Ekodibhūto vihane tamaṃ soti so ekaggacitto sabbaṃ mohāditamaṃ vihaneyya. Natthi ettha saṃsayo. Sesaṃ sabbattha pākaṭameva.
ஏவங் ப⁴க³வா அரஹத்தனிகூடேன தே³ஸனங் நிட்டா²பேஸி. தே³ஸனாபரியோஸானே பஞ்சஸதா பி⁴க்கூ² அரஹத்தங் பத்தா, திங்ஸகோடிஸங்க்²யானஞ்ச தே³வமனுஸ்ஸானங் த⁴ம்மாபி⁴ஸமயோ அஹோஸீதி.
Evaṃ bhagavā arahattanikūṭena desanaṃ niṭṭhāpesi. Desanāpariyosāne pañcasatā bhikkhū arahattaṃ pattā, tiṃsakoṭisaṅkhyānañca devamanussānaṃ dhammābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய ஸாரிபுத்தஸுத்தவண்ணனா நிட்டி²தா.
Suttanipāta-aṭṭhakathāya sāriputtasuttavaṇṇanā niṭṭhitā.
நிட்டி²தோ ச சதுத்தோ² வக்³கோ³ அத்த²வண்ணனானயதோ, நாமேன
Niṭṭhito ca catuttho vaggo atthavaṇṇanānayato, nāmena
அட்ட²கவக்³கோ³தி.
Aṭṭhakavaggoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 16. ஸாரிபுத்தஸுத்தங் • 16. Sāriputtasuttaṃ
