| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. ஸாரிபுத்தஸுத்தவண்ணனா
3. Sāriputtasuttavaṇṇanā
33. ததியே, ‘‘ஸாரிபுத்த, மயா ஸங்கி²த்தேன தே³ஸிதங் த⁴ம்மங் தாதி³ஸேனபி ந ஸுகரங் விஞ்ஞாது’’ந்தி இமினா அதி⁴ப்பாயேனேவ வத³ந்தோ தே²ரஸ்ஸ ஞாணங் ஸப்³ப³மதிக்கமங். அஞ்ஞாதாரோ ச து³ல்லபா⁴தி ஹி இமினா ஸாமஞ்ஞவசனேன ஸாரிபுத்தத்தே²ரம்பி அந்தோக³த⁴ங் கத்வா த³ஸ்ஸெந்தோ தேனபி அத்தனோ தே³ஸனாய து³ப்படிவித்³த⁴பா⁴வங் த³ஸ்ஸேதி.
33. Tatiye, ‘‘sāriputta, mayā saṃkhittena desitaṃ dhammaṃ tādisenapi na sukaraṃ viññātu’’nti iminā adhippāyeneva vadanto therassa ñāṇaṃ sabbamatikkamaṃ. Aññātāro ca dullabhāti hi iminā sāmaññavacanena sāriputtattherampi antogadhaṃ katvā dassento tenapi attano desanāya duppaṭividdhabhāvaṃ dasseti.
ஸம்மாதி ஹேதுனா காரணேன. தேனாஹ ‘‘உபாயேனா’’திஆதி³. மானாபி⁴ஸமயாதி மானஸ்ஸ த³ஸ்ஸனாபி⁴ஸமயா. பஹானாபி⁴ஸமயோதி ச த³ஸ்ஸனாபி⁴ஸமயோதி ச பரிஞ்ஞாபி⁴ஸமயோ வுத்தோ. அரஹத்தமக்³கோ³ ஹி பரிஞ்ஞாகிச்சஸித்³தி⁴யா கிச்சவஸேன மானங் பஸ்ஸதி, அஸம்மோஹப்படிவேத⁴வஸேனாதி வுத்தங் ஹோதி, அயமஸ்ஸ த³ஸ்ஸனாபி⁴ஸமயோ. தேன தி³ட்டோ² பன பஹானாபி⁴ஸமயோ ச. த³ஸ்ஸனாபி⁴ஸமயேன ஹி பரிஞ்ஞாபி⁴ஸமயமேவ பஹீயதி. தி³ட்ட²விஸேன தி³ட்ட²ஸத்தானங் ஜீவிதங் விய அயமஸ்ஸ பஹானாபி⁴ஸமயோ . அட்ட²கதா²யங் பன பஹானாபி⁴ஸமயஸ்ஸ த³ஸ்ஸனாபி⁴ஸமயனானந்தரியகத்தா ‘‘பஹானாபி⁴ஸமயேன’’இச்சேவ வுத்தங். பஹானாபி⁴ஸமயே ஹி க³ஹிதே த³ஸ்ஸனாபி⁴ஸமயோ க³ஹிதோவ ஹோதி.
Sammāti hetunā kāraṇena. Tenāha ‘‘upāyenā’’tiādi. Mānābhisamayāti mānassa dassanābhisamayā. Pahānābhisamayoti ca dassanābhisamayoti ca pariññābhisamayo vutto. Arahattamaggo hi pariññākiccasiddhiyā kiccavasena mānaṃ passati, asammohappaṭivedhavasenāti vuttaṃ hoti, ayamassa dassanābhisamayo. Tena diṭṭho pana pahānābhisamayo ca. Dassanābhisamayena hi pariññābhisamayameva pahīyati. Diṭṭhavisena diṭṭhasattānaṃ jīvitaṃ viya ayamassa pahānābhisamayo . Aṭṭhakathāyaṃ pana pahānābhisamayassa dassanābhisamayanānantariyakattā ‘‘pahānābhisamayena’’icceva vuttaṃ. Pahānābhisamaye hi gahite dassanābhisamayo gahitova hoti.
அந்தமகாஸி து³க்க²ஸ்ஸாதி அரஹத்தமக்³கே³ன மானஸ்ஸ பஹீனத்தா யே இமே ‘‘காயப³ந்த⁴னஸ்ஸ அந்தோ ஜீரதி (சூளவ॰ 278), ஹரிதந்தங் வா’’தி (ம॰ நி॰ 1.304) ஏவங் வுத்தஅந்திமமரியாத³ந்தோ ச ‘‘அந்தமித³ங், பி⁴க்க²வே, ஜீவிகான’’ந்தி (ஸங்॰ நி॰ 3.80; இதிவு॰ 91) ஏவங் வுத்தலாமகந்தோ ச ‘‘ஸக்காயோ ஏகோ அந்தோ’’தி (ஸங்॰ நி॰ 3.103) ஏவங் வுத்தகொட்டா²ஸந்தோ ச ‘‘ஏஸேவந்தோ து³க்க²ஸ்ஸ ஸபச்சயஸங்க²யா’’தி ஏவங் வுத்தகொட்டா²ஸந்தோ சாதி சத்தாரோ அந்தா, தேஸு ஸப்³ப³ஸ்ஸேவ வட்டது³க்க²ஸ்ஸ அது³ங் சதுத்த²கோடிஸங்கா²தங் அந்தமகாஸி, பரிச்சே²த³ங் பரிவடுமங் அகாஸி, அந்திமஸமுத³யமத்தாவஸேஸங் து³க்க²மகாஸீதி வுத்தங் ஹோதி. தேனாஹ ‘‘வட்டது³க்க²ஸ்ஸ அந்தமகாஸீ’’தி.
Antamakāsidukkhassāti arahattamaggena mānassa pahīnattā ye ime ‘‘kāyabandhanassa anto jīrati (cūḷava. 278), haritantaṃ vā’’ti (ma. ni. 1.304) evaṃ vuttaantimamariyādanto ca ‘‘antamidaṃ, bhikkhave, jīvikāna’’nti (saṃ. ni. 3.80; itivu. 91) evaṃ vuttalāmakanto ca ‘‘sakkāyo eko anto’’ti (saṃ. ni. 3.103) evaṃ vuttakoṭṭhāsanto ca ‘‘esevanto dukkhassa sapaccayasaṅkhayā’’ti evaṃ vuttakoṭṭhāsanto cāti cattāro antā, tesu sabbasseva vaṭṭadukkhassa aduṃ catutthakoṭisaṅkhātaṃ antamakāsi, paricchedaṃ parivaṭumaṃ akāsi, antimasamudayamattāvasesaṃ dukkhamakāsīti vuttaṃ hoti. Tenāha ‘‘vaṭṭadukkhassa antamakāsī’’ti.
நனு ச ‘‘பஹான’’ந்தி இமஸ்ஸ நித்³தே³ஸே நிப்³பா³னங் ஆக³தங்? இத⁴ படிப்பஸ்ஸத்³தி⁴ப்பஹானஸங்கா²தங் அரஹத்தப²லங் வுத்தங், தஸ்மா நித்³தே³ஸேனாயங் வண்ணனா விருஜ்ஜ²தீதி ஆஹ ‘‘நித்³தே³ஸே பனா’’திஆதி³. தத்த² தானி பதா³னி ஆக³தானீதி தஸ்மிங் நித்³தே³ஸே ‘‘பஹானங் வூபஸமங் படினிஸ்ஸக்³க³’’ந்திஆதீ³னி (சூளனி॰ 75 உத³யமாணவபுச்சா²னித்³தே³ஸோ) பதா³னி ஆக³தானி.
Nanu ca ‘‘pahāna’’nti imassa niddese nibbānaṃ āgataṃ? Idha paṭippassaddhippahānasaṅkhātaṃ arahattaphalaṃ vuttaṃ, tasmā niddesenāyaṃ vaṇṇanā virujjhatīti āha ‘‘niddese panā’’tiādi. Tattha tāni padāni āgatānīti tasmiṃ niddese ‘‘pahānaṃ vūpasamaṃ paṭinissagga’’ntiādīni (cūḷani. 75 udayamāṇavapucchāniddeso) padāni āgatāni.
த⁴ம்மதக்கபுரேஜவந்தி இமினா தஸ்மிங் சதுத்த²ஜ்ஜா²னவிமொக்கே² ட²த்வா ஜா²னங்கா³னி விபஸ்ஸித்வா அதி⁴க³தங் அரஹத்தவிமொக்க²ங் வத³தி. அரஹத்தவிமொக்க²ஸ்ஸ ஹி மக்³க³ஸம்பயுத்தஸம்மாஸங்கப்பஸங்கா²தோ த⁴ம்மதக்கோ புரேஜவோ ஹோதி.
Dhammatakkapurejavanti iminā tasmiṃ catutthajjhānavimokkhe ṭhatvā jhānaṅgāni vipassitvā adhigataṃ arahattavimokkhaṃ vadati. Arahattavimokkhassa hi maggasampayuttasammāsaṅkappasaṅkhāto dhammatakko purejavo hoti.
ஸாரிபுத்தஸுத்தவண்ணனா நிட்டி²தா.
Sāriputtasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஸாரிபுத்தஸுத்தங் • 3. Sāriputtasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. ஸாரிபுத்தஸுத்தவண்ணனா • 3. Sāriputtasuttavaṇṇanā
