| Library / Tipiṭaka / তিপিটক • Tipiṭaka / উদান-অট্ঠকথা • Udāna-aṭṭhakathā |
৭. সারিপুত্তসুত্তৰণ্ণনা
7. Sāriputtasuttavaṇṇanā
৩৭. সত্তমে অপুব্বং নত্থি। গাথায অধিচেতসোতি অধিচিত্তৰতো, সব্বচিত্তানং অধিকেন অরহত্তফলচিত্তেন সমন্নাগতস্সাতি অত্থো। অপ্পমজ্জতোতি ন পমজ্জতো, অপ্পমাদেন অনৰজ্জধম্মেসু সাতচ্চকিরিযায সমন্নাগতস্সাতি ৰুত্তং হোতি। মুনিনোতি ‘‘যো মুনাতি উভো লোকে, মুনি তেন পৰুচ্চতী’’তি (ধ॰ প॰ ২৬৯; চূল়নি॰ মেত্তগূমাণৰপুচ্ছানিদ্দেস ২১) এৰং উভযলোকমুননেন মোনং ৰুচ্চতি ঞাণং, তেন অরহত্তফলঞাণসঙ্খাতেন ঞাণেন সমন্নাগতত্তা ৰা খীণাসৰো মুনি নাম, তস্স মুনিনো। মোনপথেসু সিক্খতোতি অরহত্তঞাণসঙ্খাতস্স মোনস্স পথেসু সত্ততিংসবোধিপক্খিযধম্মেসু তীসু ৰা সিক্খাসু সিক্খতো। ইদঞ্চ পুব্বভাগপ্পটিপদং গহেত্ৰা ৰুত্তং। পরিনিট্ঠিতসিক্খো হি অরহা, তস্মা এৰং সিক্খতো, ইমায সিক্খায মুনিভাৰং পত্তস্স মুনিনোতি এৰমেত্থ অত্থো দট্ঠব্বো। যস্মা চ এতদেৰ, তস্মা হেট্ঠিমমগ্গফলচিত্তানং ৰসেন অধিচেতসো, চতুসচ্চসম্বোধপটিপত্তিযং অপ্পমাদৰসেন অপ্পমজ্জতো, মগ্গঞাণসমন্নাগমেন মুনিনোতি এৰমেতেসং তিণ্ণং পদানং অত্থো যুজ্জতিযেৰ। অথ ৰা ‘‘অপ্পমজ্জতো সিক্খতো’’তি পদানং হেতুঅত্থতা দট্ঠব্বা অপ্পমজ্জনহেতু সিক্খনহেতু চ অধিচেতসোতি।
37. Sattame apubbaṃ natthi. Gāthāya adhicetasoti adhicittavato, sabbacittānaṃ adhikena arahattaphalacittena samannāgatassāti attho. Appamajjatoti na pamajjato, appamādena anavajjadhammesu sātaccakiriyāya samannāgatassāti vuttaṃ hoti. Muninoti ‘‘yo munāti ubho loke, muni tena pavuccatī’’ti (dha. pa. 269; cūḷani. mettagūmāṇavapucchāniddesa 21) evaṃ ubhayalokamunanena monaṃ vuccati ñāṇaṃ, tena arahattaphalañāṇasaṅkhātena ñāṇena samannāgatattā vā khīṇāsavo muni nāma, tassa munino. Monapathesu sikkhatoti arahattañāṇasaṅkhātassa monassa pathesu sattatiṃsabodhipakkhiyadhammesu tīsu vā sikkhāsu sikkhato. Idañca pubbabhāgappaṭipadaṃ gahetvā vuttaṃ. Pariniṭṭhitasikkho hi arahā, tasmā evaṃ sikkhato, imāya sikkhāya munibhāvaṃ pattassa muninoti evamettha attho daṭṭhabbo. Yasmā ca etadeva, tasmā heṭṭhimamaggaphalacittānaṃ vasena adhicetaso, catusaccasambodhapaṭipattiyaṃ appamādavasena appamajjato, maggañāṇasamannāgamena muninoti evametesaṃ tiṇṇaṃ padānaṃ attho yujjatiyeva. Atha vā ‘‘appamajjato sikkhato’’ti padānaṃ hetuatthatā daṭṭhabbā appamajjanahetu sikkhanahetu ca adhicetasoti.
সোকা ন ভৰন্তি তাদিনোতি তাদিসস্স খীণাসৰমুনিনো অব্ভন্তরে ইট্ঠৰিযোগাদিৰত্থুকা সোকা চিত্তসন্তাপা ন হোন্তি। অথ ৰা তাদিনোতি তাদিলক্খণসমন্নাগতস্স এৰরূপস্স মুনিনো সোকা ন ভৰন্তীতি অযমেত্থ অত্থো। উপসন্তস্সাতি রাগাদীনং অচ্চন্তূপসমেন উপসন্তস্স। সদা সতীমতোতি সতিৰেপুল্লপ্পত্তিযা নিচ্চকালং সতিযা অৰিরহিতস্স।
Sokā na bhavanti tādinoti tādisassa khīṇāsavamunino abbhantare iṭṭhaviyogādivatthukā sokā cittasantāpā na honti. Atha vā tādinoti tādilakkhaṇasamannāgatassa evarūpassa munino sokā na bhavantīti ayamettha attho. Upasantassāti rāgādīnaṃ accantūpasamena upasantassa. Sadā satīmatoti sativepullappattiyā niccakālaṃ satiyā avirahitassa.
এত্থ চ ‘‘অধিচেতসো’’তি ইমিনা অধিচিত্তসিক্খা, ‘‘অপ্পমজ্জতো’’তি এতেন অধিসীলসিক্খা, ‘‘মুনিনো মোনপথেসু সিক্খতো’’তি এতেহি অধিপঞ্ঞাসিক্খা। ‘‘মুনিনো’’তি ৰা এতেন অধিপঞ্ঞাসিক্খা, ‘‘মোনপথেসু সিক্খতো’’তি এতেন তাসং লোকুত্তরসিক্খানং পুব্বভাগপটিপদা, ‘‘সোকা ন ভৰন্তী’’তিআদীহি সিক্খাপারিপূরিযা আনিসংসো পকাসিতোতি ৰেদিতব্বং। সেসং ৰুত্তনযমেৰ।
Ettha ca ‘‘adhicetaso’’ti iminā adhicittasikkhā, ‘‘appamajjato’’ti etena adhisīlasikkhā, ‘‘munino monapathesu sikkhato’’ti etehi adhipaññāsikkhā. ‘‘Munino’’ti vā etena adhipaññāsikkhā, ‘‘monapathesu sikkhato’’ti etena tāsaṃ lokuttarasikkhānaṃ pubbabhāgapaṭipadā, ‘‘sokā na bhavantī’’tiādīhi sikkhāpāripūriyā ānisaṃso pakāsitoti veditabbaṃ. Sesaṃ vuttanayameva.
সত্তমসুত্তৰণ্ণনা নিট্ঠিতা।
Sattamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / উদানপাল়ি • Udānapāḷi / ৭. সারিপুত্তসুত্তং • 7. Sāriputtasuttaṃ
