| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৬. সারিপুত্তসুত্তৰণ্ণনা
6. Sāriputtasuttavaṇṇanā
২১৪. ৰাক্করণচাতুরিযতো ৰচনগুণহেতূনং পূরিযা পূরে ভৰাতি পোরী, তায পোরিযা। তেনাহ ‘‘অক্খরাদিপরিপুণ্ণাযা’’তি। অৰিবদ্ধাযাতি পিত্তাদীহি ন ৰিবদ্ধায অনুপদ্দুতায। তেনাহ ‘‘অপলিবুদ্ধাযা’’তিআদি। নিদ্দোসাযাতি অত্থতো ব্যঞ্জনতো ৰিগতদোসায। অক্খলিতপদব্যঞ্জনাযাতি অগলিতপদব্যঞ্জনায, অত্থস্স ৰিঞ্ঞাপনিযাতি দিট্ঠধম্মিকাদিঅত্থস্স বোধনে পরিযত্তায। ভিক্খুনন্তি গাথাসুখত্থং রস্সং কত্ৰা ৰুত্তং।
214. Vākkaraṇacāturiyato vacanaguṇahetūnaṃ pūriyā pūre bhavāti porī, tāya poriyā. Tenāha ‘‘akkharādiparipuṇṇāyā’’ti. Avibaddhāyāti pittādīhi na vibaddhāya anupaddutāya. Tenāha ‘‘apalibuddhāyā’’tiādi. Niddosāyāti atthato byañjanato vigatadosāya. Akkhalitapadabyañjanāyāti agalitapadabyañjanāya, atthassa viññāpaniyāti diṭṭhadhammikādiatthassa bodhane pariyattāya. Bhikkhunanti gāthāsukhatthaṃ rassaṃ katvā vuttaṃ.
‘‘সংখিত্তেনপি দেসেতি, ৰিত্থারেনপি ভাসতী’’তি নযিদং পঠমং উদ্দিসিত্ৰা তস্স অত্থস্স কিত্তনৰসেন পৰত্তিতং ৰচনং সন্ধায ৰুত্তং। সা হি ৰিত্থারদেসনা এৰ হোতি। যা পন দেসনা কদাচি ধম্মপটিগ্গাহকানং অজ্ঝাসযৰসেন সংখিত্তেনেৰ দস্সেত্ৰা নিক্খিপতি, যা চ কদাচি ৰিত্থারেন, তদুভযং সন্ধায ৰুত্তং। তেনাহ ‘‘চত্তারিমানী’’তিআদি। সভাৰমধুরো পচ্চযৰসেন মধুরতরো হোতীতি দস্সেতুং ‘‘যথা’’তিআদি ৰুত্তং। ৰিৰিধাকারং কত্ৰা ধম্মং কথেতুং পটিভাতীতি পটিভানং, দেসনাপকারঞাণং। তেনাহ ‘‘সমুদ্দতো’’তিআদি। ওদহন্তীতি অৰজাননৰসেন গমেন্তি।
‘‘Saṃkhittenapi deseti, vitthārenapi bhāsatī’’ti nayidaṃ paṭhamaṃ uddisitvā tassa atthassa kittanavasena pavattitaṃ vacanaṃ sandhāya vuttaṃ. Sā hi vitthāradesanā eva hoti. Yā pana desanā kadāci dhammapaṭiggāhakānaṃ ajjhāsayavasena saṃkhitteneva dassetvā nikkhipati, yā ca kadāci vitthārena, tadubhayaṃ sandhāya vuttaṃ. Tenāha ‘‘cattārimānī’’tiādi. Sabhāvamadhuro paccayavasena madhurataro hotīti dassetuṃ ‘‘yathā’’tiādi vuttaṃ. Vividhākāraṃ katvā dhammaṃ kathetuṃ paṭibhātīti paṭibhānaṃ, desanāpakārañāṇaṃ. Tenāha ‘‘samuddato’’tiādi. Odahantīti avajānanavasena gamenti.
সারিপুত্তসুত্তৰণ্ণনা নিট্ঠিতা।
Sāriputtasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৬. সারিপুত্তসুত্তং • 6. Sāriputtasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. সারিপুত্তসুত্তৰণ্ণনা • 6. Sāriputtasuttavaṇṇanā
