| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༣. སཱརིཔུཏྟསུཏྟཝཎྞནཱ
3. Sāriputtasuttavaṇṇanā
༣༣. ཏཏིཡེ, ‘‘སཱརིཔུཏྟ, མཡཱ སཾཁིཏྟེན དེསིཏཾ དྷམྨཾ ཏཱདིསེནཔི ན སུཀརཾ ཝིཉྙཱཏུ’’ནྟི ཨིམིནཱ ཨདྷིཔྤཱཡེནེཝ ཝདནྟོ ཐེརསྶ ཉཱཎཾ སབྦམཏིཀྐམཾ། ཨཉྙཱཏཱརོ ཙ དུལླབྷཱཏི ཧི ཨིམིནཱ སཱམཉྙཝཙནེན སཱརིཔུཏྟཏྠེརམྤི ཨནྟོགདྷཾ ཀཏྭཱ དསྶེནྟོ ཏེནཔི ཨཏྟནོ དེསནཱཡ དུཔྤཊིཝིདྡྷབྷཱཝཾ དསྶེཏི།
33. Tatiye, ‘‘sāriputta, mayā saṃkhittena desitaṃ dhammaṃ tādisenapi na sukaraṃ viññātu’’nti iminā adhippāyeneva vadanto therassa ñāṇaṃ sabbamatikkamaṃ. Aññātāro ca dullabhāti hi iminā sāmaññavacanena sāriputtattherampi antogadhaṃ katvā dassento tenapi attano desanāya duppaṭividdhabhāvaṃ dasseti.
སམྨཱཏི ཧེཏུནཱ ཀཱརཎེན། ཏེནཱཧ ‘‘ཨུཔཱཡེནཱ’’ཏིཨཱདི། མཱནཱབྷིསམཡཱཏི མཱནསྶ དསྶནཱབྷིསམཡཱ། པཧཱནཱབྷིསམཡོཏི ཙ དསྶནཱབྷིསམཡོཏི ཙ པརིཉྙཱབྷིསམཡོ ཝུཏྟོ། ཨརཧཏྟམགྒོ ཧི པརིཉྙཱཀིཙྩསིདྡྷིཡཱ ཀིཙྩཝསེན མཱནཾ པསྶཏི, ཨསམྨོཧཔྤཊིཝེདྷཝསེནཱཏི ཝུཏྟཾ ཧོཏི, ཨཡམསྶ དསྶནཱབྷིསམཡོ། ཏེན དིཊྛོ པན པཧཱནཱབྷིསམཡོ ཙ། དསྶནཱབྷིསམཡེན ཧི པརིཉྙཱབྷིསམཡམེཝ པཧཱིཡཏི། དིཊྛཝིསེན དིཊྛསཏྟཱནཾ ཛཱིཝིཏཾ ཝིཡ ཨཡམསྶ པཧཱནཱབྷིསམཡོ ། ཨཊྛཀཐཱཡཾ པན པཧཱནཱབྷིསམཡསྶ དསྶནཱབྷིསམཡནཱནནྟརིཡཀཏྟཱ ‘‘པཧཱནཱབྷིསམཡེན’’ཨིཙྩེཝ ཝུཏྟཾ། པཧཱནཱབྷིསམཡེ ཧི གཧིཏེ དསྶནཱབྷིསམཡོ གཧིཏོཝ ཧོཏི།
Sammāti hetunā kāraṇena. Tenāha ‘‘upāyenā’’tiādi. Mānābhisamayāti mānassa dassanābhisamayā. Pahānābhisamayoti ca dassanābhisamayoti ca pariññābhisamayo vutto. Arahattamaggo hi pariññākiccasiddhiyā kiccavasena mānaṃ passati, asammohappaṭivedhavasenāti vuttaṃ hoti, ayamassa dassanābhisamayo. Tena diṭṭho pana pahānābhisamayo ca. Dassanābhisamayena hi pariññābhisamayameva pahīyati. Diṭṭhavisena diṭṭhasattānaṃ jīvitaṃ viya ayamassa pahānābhisamayo . Aṭṭhakathāyaṃ pana pahānābhisamayassa dassanābhisamayanānantariyakattā ‘‘pahānābhisamayena’’icceva vuttaṃ. Pahānābhisamaye hi gahite dassanābhisamayo gahitova hoti.
ཨནྟམཀཱསི དུཀྑསྶཱཏི ཨརཧཏྟམགྒེན མཱནསྶ པཧཱིནཏྟཱ ཡེ ཨིམེ ‘‘ཀཱཡབནྡྷནསྶ ཨནྟོ ཛཱིརཏི (ཙཱུལ༹ཝ॰ ༢༧༨), ཧརིཏནྟཾ ཝཱ’’ཏི (མ॰ ནི॰ ༡.༣༠༤) ཨེཝཾ ཝུཏྟཨནྟིམམརིཡཱདནྟོ ཙ ‘‘ཨནྟམིདཾ, བྷིཀྑཝེ, ཛཱིཝིཀཱན’’ནྟི (སཾ॰ ནི॰ ༣.༨༠; ཨིཏིཝུ॰ ༩༡) ཨེཝཾ ཝུཏྟལཱམཀནྟོ ཙ ‘‘སཀྐཱཡོ ཨེཀོ ཨནྟོ’’ཏི (སཾ॰ ནི॰ ༣.༡༠༣) ཨེཝཾ ཝུཏྟཀོཊྛཱསནྟོ ཙ ‘‘ཨེསེཝནྟོ དུཀྑསྶ སཔཙྩཡསངྑཡཱ’’ཏི ཨེཝཾ ཝུཏྟཀོཊྛཱསནྟོ ཙཱཏི ཙཏྟཱརོ ཨནྟཱ, ཏེསུ སབྦསྶེཝ ཝཊྚདུཀྑསྶ ཨདུཾ ཙཏུཏྠཀོཊིསངྑཱཏཾ ཨནྟམཀཱསི, པརིཙྪེདཾ པརིཝཊུམཾ ཨཀཱསི, ཨནྟིམསམུདཡམཏྟཱཝསེསཾ དུཀྑམཀཱསཱིཏི ཝུཏྟཾ ཧོཏི། ཏེནཱཧ ‘‘ཝཊྚདུཀྑསྶ ཨནྟམཀཱསཱི’’ཏི།
Antamakāsidukkhassāti arahattamaggena mānassa pahīnattā ye ime ‘‘kāyabandhanassa anto jīrati (cūḷava. 278), haritantaṃ vā’’ti (ma. ni. 1.304) evaṃ vuttaantimamariyādanto ca ‘‘antamidaṃ, bhikkhave, jīvikāna’’nti (saṃ. ni. 3.80; itivu. 91) evaṃ vuttalāmakanto ca ‘‘sakkāyo eko anto’’ti (saṃ. ni. 3.103) evaṃ vuttakoṭṭhāsanto ca ‘‘esevanto dukkhassa sapaccayasaṅkhayā’’ti evaṃ vuttakoṭṭhāsanto cāti cattāro antā, tesu sabbasseva vaṭṭadukkhassa aduṃ catutthakoṭisaṅkhātaṃ antamakāsi, paricchedaṃ parivaṭumaṃ akāsi, antimasamudayamattāvasesaṃ dukkhamakāsīti vuttaṃ hoti. Tenāha ‘‘vaṭṭadukkhassa antamakāsī’’ti.
ནནུ ཙ ‘‘པཧཱན’’ནྟི ཨིམསྶ ནིདྡེསེ ནིབྦཱནཾ ཨཱགཏཾ? ཨིདྷ པཊིཔྤསྶདྡྷིཔྤཧཱནསངྑཱཏཾ ཨརཧཏྟཕལཾ ཝུཏྟཾ, ཏསྨཱ ནིདྡེསེནཱཡཾ ཝཎྞནཱ ཝིརུཛ྄ཛྷཏཱིཏི ཨཱཧ ‘‘ནིདྡེསེ པནཱ’’ཏིཨཱདི། ཏཏྠ ཏཱནི པདཱནི ཨཱགཏཱནཱིཏི ཏསྨིཾ ནིདྡེསེ ‘‘པཧཱནཾ ཝཱུཔསམཾ པཊིནིསྶགྒ’’ནྟིཨཱདཱིནི (ཙཱུལ༹ནི॰ ༧༥ ཨུདཡམཱཎཝཔུཙྪཱནིདྡེསོ) པདཱནི ཨཱགཏཱནི།
Nanu ca ‘‘pahāna’’nti imassa niddese nibbānaṃ āgataṃ? Idha paṭippassaddhippahānasaṅkhātaṃ arahattaphalaṃ vuttaṃ, tasmā niddesenāyaṃ vaṇṇanā virujjhatīti āha ‘‘niddese panā’’tiādi. Tattha tāni padāni āgatānīti tasmiṃ niddese ‘‘pahānaṃ vūpasamaṃ paṭinissagga’’ntiādīni (cūḷani. 75 udayamāṇavapucchāniddeso) padāni āgatāni.
དྷམྨཏཀྐཔུརེཛཝནྟི ཨིམིནཱ ཏསྨིཾ ཙཏུཏྠཛ྄ཛྷཱནཝིམོཀྑེ ཋཏྭཱ ཛྷཱནངྒཱནི ཝིཔསྶིཏྭཱ ཨདྷིགཏཾ ཨརཧཏྟཝིམོཀྑཾ ཝདཏི། ཨརཧཏྟཝིམོཀྑསྶ ཧི མགྒསམྤཡུཏྟསམྨཱསངྐཔྤསངྑཱཏོ དྷམྨཏཀྐོ པུརེཛཝོ ཧོཏི།
Dhammatakkapurejavanti iminā tasmiṃ catutthajjhānavimokkhe ṭhatvā jhānaṅgāni vipassitvā adhigataṃ arahattavimokkhaṃ vadati. Arahattavimokkhassa hi maggasampayuttasammāsaṅkappasaṅkhāto dhammatakko purejavo hoti.
སཱརིཔུཏྟསུཏྟཝཎྞནཱ ནིཊྛིཏཱ།
Sāriputtasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༣. སཱརིཔུཏྟསུཏྟཾ • 3. Sāriputtasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༣. སཱརིཔུཏྟསུཏྟཝཎྞནཱ • 3. Sāriputtasuttavaṇṇanā
