2. ஸாரிபுத்தத்தே²ரமாதுபேதிவத்து²வண்ணனா

நக்³கா³ து³ப்³ப³ண்ணரூபாஸீதி இத³ங் ஸத்த²ரி வேளுவனே விஹரந்தே ஆயஸ்மதோ ஸாரிபுத்தத்தே²ரஸ்ஸ இதோ பஞ்சமாய ஜாதியா மாதுபூ⁴தங் பேதிங் ஆரப்³ப⁴ வுத்தங். ஏகதி³வஸங் ஆயஸ்மா ச ஸாரிபுத்தோ ஆயஸ்மா ச மஹாமொக்³க³ல்லானோ ஆயஸ்மா ச அனுருத்³தோ⁴ ஆயஸ்மா ச கப்பினோ ராஜக³ஹஸ்ஸ அவிதூ³ரே அஞ்ஞதரஸ்மிங் அரஞ்ஞாயதனே விஹரந்தி. தேன ச ஸமயேன பா³ராணஸியங் அஞ்ஞதரோ ப்³ராஹ்மணோ அட்³டோ⁴ மஹத்³த⁴னோ மஹாபோ⁴கோ³ ஸமணப்³ராஹ்மணகபணத்³தி⁴கவனிப்³ப³கயாசகானங் ஓபானபூ⁴தோ அன்னபானவத்த²ஸயனாதீ³னி தே³தி. தெ³ந்தோ ச ஆக³தாக³தானங் யதா²காலங் யதா²ரஹஞ்ச பாதோ³த³கபாத³ப்³ப⁴ஞ்ஜனாதி³தா³னானுபுப்³ப³கங் ஸப்³பா³பி⁴தெ³ய்யங் படிபன்னோ ஹோதி, புரேப⁴த்தங் பி⁴க்கூ² அன்னபானாதி³னா ஸக்கச்சங் பரிவிஸதி. ஸோ தே³ஸந்தரங் க³ச்ச²ந்தோ ப⁴ரியங் ஆஹ – ‘‘போ⁴தி, யதா²பஞ்ஞத்தங் இமங் தா³னவிதி⁴ங் அபரிஹாபெந்தீ ஸக்கச்சங் அனுபதிட்டா²ஹீ’’தி. ஸா ‘‘ஸாதூ⁴’’தி படிஸ்ஸுணித்வா தஸ்மிங் பக்கந்தே ஏவ தாவ பி⁴க்கூ²னங் பஞ்ஞத்தங் தா³னவிதி⁴ங் பச்சி²ந்தி³, அத்³தி⁴கானங் பன நிவாஸத்தா²ய உபக³தானங் கே³ஹபிட்டி²தோ ச²ட்³டி³தங் ஜரஸாலங் த³ஸ்ஸேஸி ‘‘எத்த² வஸதா²’’தி. அன்னபானாதீ³னங் அத்தா²ய தத்த² அத்³தி⁴கேஸு ஆக³தேஸு ‘‘கூ³த²ங் கா²த³த², முத்தங் பிவத², லோஹிதங் பிவத² , தும்ஹாகங் மாது மத்த²லுங்க³ங் கா²த³தா²’’தி யங் யங் அஸுசி ஜேகு³ச்ச²ங், தஸ்ஸ தஸ்ஸ நாமங் க³ஹெத்வா நிட்டு²ரங் வத³தி.

ஸா அபரேன ஸமயேன காலங் கத்வா கம்மானுபா⁴வுக்கி²த்தா பேதயோனியங் நிப்³ப³த்தித்வா அத்தனோ வசீது³ச்சரிதானுரூபங் து³க்க²ங் அனுப⁴வந்தீ புரிமஜாதிஸம்ப³ந்த⁴ங் அனுஸ்ஸரித்வா ஆயஸ்மதோ ஸாரிபுத்தஸ்ஸ ஸந்திகங் உபஸங்கமிதுகாமா தஸ்ஸ விஹாரத்³வாரங் ஸம்பாபுணி, தஸ்ஸ விஹாரத்³வாரதே³வதாயோ விஹாரப்பவேஸனங் நிவாரேஸுங். ஸா கிர இதோ பஞ்சமாய ஜாதியா தே²ரஸ்ஸ மாதுபூ⁴தபுப்³பா³, தஸ்மா ஏவமாஹ – ‘‘அஹங் அய்யஸ்ஸ ஸாரிபுத்தத்தே²ரஸ்ஸ இதோ பஞ்சமாய ஜாதீயா மாதா, தே³த² மே த்³வாரப்பவேஸனங் தே²ரங் த³ட்டு²’’ந்தி. தங் ஸுத்வா தே³வதா தஸ்ஸா பவேஸனங் அனுஜானிங்ஸு. ஸா பவிஸித்வா சங்கமனகோடியங் ட²த்வா தே²ரஸ்ஸ அத்தானங் த³ஸ்ஸேஸி. தே²ரோ தங் தி³ஸ்வா கருணாய ஸஞ்சோதி³தமானஸோ ஹுத்வா –

116.

‘‘நக்³கா³ து³ப்³ப³ண்ணரூபாஸி, கிஸா த⁴மனிஸந்த²தா;

உப்பா²ஸுலிகே கிஸிகே, கா நு த்வங் இத⁴ திட்ட²ஸீ’’தி. –

கா³தா²ய புச்சி². ஸா தே²ரேன புட்டா² படிவசனங் தெ³ந்தீ –

117.

‘‘அஹங் தே ஸகியா மாதா, புப்³பே³ அஞ்ஞாஸு ஜாதீஸு;

உபபன்னா பெத்திவிஸயங், கு²ப்பிபாஸஸமப்பிதா.

118.

‘‘ச²ட்³டி³தங் கி²பிதங் கே²ளங், ஸிங்கா⁴ணிகங் ஸிலேஸுமங்;

வஸஞ்ச ட³ய்ஹமானானங், விஜாதானஞ்ச லோஹிதங்.

119.

‘‘வணிகானஞ்ச யங் கா⁴ன-ஸீஸச்சி²ன்னான லோஹிதங்;

கு²தா³பரேதா பு⁴ஞ்ஜாமி, இச்சி²புரிஸனிஸ்ஸிதங்.

120.

‘‘புப்³ப³லோஹிதங் ப⁴க்கா²மி, பஸூனங் மானுஸான ச;

அலேணா அனகா³ரா ச, நீலமஞ்சபராயணா.

121.

‘‘தே³ஹி புத்தக மே தா³னங், த³த்வா அன்வாதி³ஸாஹி மே;

அப்பேவ நாம முச்செய்யங், புப்³ப³லோஹிதபோ⁴ஜனா’’தி. – பஞ்சகா³தா² அபா⁴ஸி;

117. தத்த² அஹங் தே ஸகியா மாதாதி அஹங் துய்ஹங் ஜனநிபா⁴வதோ ஸகியா மாதா. புப்³பே³ அஞ்ஞாஸு ஜாதீஸூதி மாதா ஹொந்தீபி ந இமிஸ்ஸங் ஜாதியங், அத² கோ² புப்³பே³ அஞ்ஞாஸு ஜாதீஸு, இதோ பஞ்சமியந்தி த³ட்ட²ப்³ப³ங். உபபன்னா பெத்திவிஸயந்தி படிஸந்தி⁴வஸேன பேதலோகங் உபக³தா. கு²ப்பிபாஸஸமப்பிதாதி கு²தா³ய ச பிபாஸாய ச அபி⁴பூ⁴தா, நிரந்தரங் ஜிக⁴ச்சா²பிபாஸாஹி அபி⁴பு⁴ய்யமானாதி அத்தோ².

118-119. ச²ட்³டி³தந்தி உச்சி²ட்ட²கங், வந்தந்தி அத்தோ². கி²பிதந்தி கி²பிதேன ஸத்³தி⁴ங் முக²தோ நிக்க²ந்தமலங். கே²ளந்தி நிட்டு²ப⁴ங். ஸிங்கா⁴ணிகந்தி மத்த²லுங்க³தோ விஸ்ஸந்தி³த்வா நாஸிகாய நிக்க²ந்தமலங். ஸிலேஸுமந்தி ஸெம்ஹங். வஸஞ்ச ட³ய்ஹமானானந்தி சிதகஸ்மிங் ட³ய்ஹமானானங் களேவரானங் வஸாதேலஞ்ச. விஜாதானஞ்ச லோஹிதந்தி பஸூதானங் இத்தீ²னங் லோஹிதங், க³ப்³ப⁴மலங் ச-ஸத்³தே³ன ஸங்க³ண்ஹாதி. வணிகானந்தி ஸஞ்ஜாதவணானங். யந்தி யங் லோஹிதந்தி ஸம்ப³ந்தோ⁴. கா⁴னஸீஸச்சி²ன்னானந்தி கா⁴னச்சி²ன்னானங் ஸீஸச்சி²ன்னானஞ்ச யங் லோஹிதங், தங் பு⁴ஞ்ஜாமீதி யோஜனா. தே³ஸனாஸீஸமேதங் ‘‘கா⁴னஸீஸச்சி²ன்னான’’ந்தி, யஸ்மா ஹத்த²பாதா³தி³ச்சி²ன்னானம்பி லோஹிதங் பு⁴ஞ்ஜாமியேவ. ததா² ‘‘வணிகான’’ந்தி இமினா தேஸம்பி லோஹிதங் ஸங்க³ஹிதந்தி த³ட்ட²ப்³ப³ங். கு²தா³பரேதாதி ஜிக⁴ச்சா²பி⁴பூ⁴தா ஹுத்வா. இத்தி²புரிஸனிஸ்ஸிதந்தி இத்தி²புரிஸஸரீரனிஸ்ஸிதங் யதா²வுத்தங் அஞ்ஞஞ்ச சம்மமங்ஸன்ஹாருபுப்³பா³தி³கங் பரிபு⁴ஞ்ஜாமீதி த³ஸ்ஸேதி.

120-121. பஸூனந்தி அஜகோ³மஹிங்ஸாதீ³னங். அலேணாதி அஸரணா. அனகா³ராதி அனாவாஸா. நீலமஞ்சபராயணாதி ஸுஸானே ச²ட்³டி³தமலமஞ்சஸயனா. அத² வா நீலாதி சா²ரிகங்கா³ரப³ஹுலா ஸுஸானபூ⁴மி அதி⁴ப்பேதா, தங்யேவ மஞ்சங் விய அதி⁴ஸயனாதி அத்தோ². அன்வாதி³ஸாஹி மேதி யதா² தி³ன்னங் த³க்கி²ணங் மய்ஹங் உபகப்பதி, ததா² உத்³தி³ஸ பத்திதா³னங் தே³ஹி. அப்பேவ நாம முச்செய்யங், புப்³ப³லோஹிதபோ⁴ஜனாதி தவ உத்³தி³ஸனேன ஏதஸ்மா புப்³ப³லோஹிதபோ⁴ஜனா பேதஜீவிகா அபி நாம முச்செய்யங்.

தங் ஸுத்வா ஆயஸ்மா ஸாரிபுத்தத்தே²ரோ து³தியதி³வஸே மஹாமொக்³க³ல்லானத்தே²ராதி³கே தயோ தே²ரே ஆமந்தெத்வா தேஹி ஸத்³தி⁴ங் ராஜக³ஹே பிண்டா³ய சரந்தோ ரஞ்ஞோ பி³ம்பி³ஸாரஸ்ஸ நிவேஸனங் அக³மாஸி. ராஜா தே²ரே தி³ஸ்வா வந்தி³த்வா ‘‘கிங், ப⁴ந்தே, ஆக³தத்தா²’’தி ஆக³மனகாரணங் புச்சி². ஆயஸ்மா மஹாமொக்³க³ல்லானோ தங் பவத்திங் ரஞ்ஞோ ஆரோசேஸி. ராஜா ‘‘அஞ்ஞாதங், ப⁴ந்தே’’தி வத்வா தே²ரே விஸ்ஸஜ்ஜெத்வா ஸப்³ப³கம்மிகங் அமச்சங் பக்கோஸாபெத்வா ஆணாபேஸி ‘‘நக³ரஸ்ஸ அவிதூ³ரே விவித்தே சா²யூத³கஸம்பன்னே டா²னே சதஸ்ஸோ குடியோ காரேஹீ’’தி. அந்தேபுரே ச பஹோனகவிஸேஸவஸேன திதா⁴ விப⁴ஜித்வா சதஸ்ஸோ குடியோ படிச்சா²பேஸி, ஸயஞ்ச தத்த² க³ந்த்வா காதப்³ப³யுத்தகங் அகாஸி. நிட்டி²தாஸு குடிகாஸு ஸப்³ப³ங் ப³லிகரணங் ஸஜ்ஜாபெத்வா அன்னபானவத்தா²தீ³னி பு³த்³த⁴ப்பமுக²ஸ்ஸ சாதுத்³தி³ஸஸ்ஸ பி⁴க்கு²ஸங்க⁴ஸ்ஸ அனுச்ச²விகே ஸப்³ப³பரிக்கா²ரே ச உபட்டா²பெத்வா ஆயஸ்மதோ ஸாரிபுத்தத்தே²ரஸ்ஸ தங் ஸப்³ப³ங் நிய்யாதே³ஸி. அத² தே²ரோ தங் பேதிங் உத்³தி³ஸ்ஸ தங் ஸப்³ப³ங் பு³த்³த⁴ப்பமுக²ஸ்ஸ சாதுத்³தி³ஸஸ்ஸ பி⁴க்கு²ஸங்க⁴ஸ்ஸ அதா³ஸி. ஸா பேதீ தங் அனுமோதி³த்வா தே³வலோகே நிப்³ப³த்தித்வா ஸப்³ப³காமஸமித்³தா⁴ ச ஹுத்வா அபரதி³வஸே ஆயஸ்மதோ மஹாமொக்³க³ல்லானத்தே²ரஸ்ஸ ஸந்திகங் உபக³ந்த்வா வந்தி³த்வா அட்டா²ஸி. தங் தே²ரோ படிபுச்சி², ஸா அத்தனோ பேதூபபத்திங் புன தே³வூபபத்திஞ்ச வித்தா²ரதோ கதே²ஸி. தேன வுத்தங் –

122.

‘‘மாதுயா வசனங் ஸுத்வா, உபதிஸ்ஸோனுகம்பகோ;

ஆமந்தயி மொக்³க³ல்லானங், அனுருத்³த⁴ஞ்ச கப்பினங்.

123.

‘‘சதஸ்ஸோ குடியோ கத்வா, ஸங்கே⁴ சாதுத்³தி³ஸே அதா³;

குடியோ அன்னபானஞ்ச, மாது த³க்கி²ணமாதி³ஸீ.

124.

‘‘ஸமனந்தரானுத்³தி³ட்டே², விபாகோ உத³பஜ்ஜத²;

போ⁴ஜனங் பானீயங் வத்த²ங், த³க்கி²ணாய இத³ங் ப²லங்.

125.

‘‘ததோ ஸுத்³தா⁴ ஸுசிவஸனா, காஸிகுத்தமதா⁴ரினீ;

விசித்தவத்தா²ப⁴ரணா, கோலிகங் உபஸங்கமீ’’தி.

123. தத்த² ஸங்கே⁴ சாதுத்³தி³ஸே அதா³தி சாதுத்³தி³ஸஸ்ஸ ஸங்க⁴ஸ்ஸ அதா³ஸி, நிய்யாதே³ஸீதி அத்தோ². ஸேஸங் வுத்தத்த²மேவ.

அதா²யஸ்மா மஹாமொக்³க³ல்லானோ தங் பேதிங் –

126.

‘‘அபி⁴க்கந்தேன வண்ணேன, யா த்வங் திட்ட²ஸி தே³வதே;

ஓபா⁴ஸெந்தீ தி³ஸா ஸப்³பா³, ஓஸதீ⁴ விய தாரகா.

127.

‘‘கேன தேதாதி³ஸோ வண்ணோ, தேன தே இத⁴ மிஜ்ஜ²தி;

உப்பஜ்ஜந்தி ச தே போ⁴கா³, யே கேசி மனஸோ பியா.

128.

‘‘புச்சா²மி தங் தே³வி மஹானுபா⁴வே, மனுஸ்ஸபூ⁴தா கிமகாஸி புஞ்ஞங்;

கேனாஸி ஏவங் ஜலிதானுபா⁴வா,

வண்ணோ ச தே ஸப்³ப³தி³ஸா பபா⁴ஸதீ’’தி. – புச்சி²;

129-133. அத² ஸா ‘‘ஸாரிபுத்தஸ்ஸாஹங் மாதா’’திஆதி³னா விஸ்ஸஜ்ஜேஸி. ஸேஸங் வுத்தத்த²மேவ. அதா²யஸ்மா மஹாமொக்³க³ல்லானோ தங் பவத்திங் ப⁴க³வதோ ஆரோசேஸி. ப⁴க³வா தமத்த²ங் அட்டு²ப்பத்திங் கத்வா ஸம்பத்தபரிஸாய த⁴ம்மங் தே³ஸேஸி, ஸா தே³ஸனா மஹாஜனஸ்ஸ ஸாத்தி²கா அஹோஸீதி.

ஸாரிபுத்தத்தே²ரமாதுபேதிவத்து²வண்ணனா நிட்டி²தா.