| Library / Tipiṭaka / তিপিটক • Tipiṭaka / উদানপাল়ি • Udānapāḷi |
১০. সারিপুত্তউপসমসুত্তং
10. Sāriputtaupasamasuttaṃ
৪০. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা সারিপুত্তো ভগৰতো অৰিদূরে নিসিন্নো হোতি পল্লঙ্কং আভুজিত্ৰা উজুং কাযং পণিধায অত্তনো উপসমং পচ্চৰেক্খমানো।
40. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā sāriputto bhagavato avidūre nisinno hoti pallaṅkaṃ ābhujitvā ujuṃ kāyaṃ paṇidhāya attano upasamaṃ paccavekkhamāno.
অদ্দসা খো ভগৰা আযস্মন্তং সারিপুত্তং অৰিদূরে নিসিন্নং পল্লঙ্কং আভুজিত্ৰা উজুং কাযং পণিধায অত্তনো উপসমং পচ্চৰেক্খমানং।
Addasā kho bhagavā āyasmantaṃ sāriputtaṃ avidūre nisinnaṃ pallaṅkaṃ ābhujitvā ujuṃ kāyaṃ paṇidhāya attano upasamaṃ paccavekkhamānaṃ.
অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘উপসন্তসন্তচিত্তস্স, নেত্তিচ্ছিন্নস্স ভিক্খুনো।
‘‘Upasantasantacittassa, netticchinnassa bhikkhuno;
ৰিক্খীণো জাতিসংসারো, মুত্তো সো মারবন্ধনা’’তি॥ দসমং।
Vikkhīṇo jātisaṃsāro, mutto so mārabandhanā’’ti. dasamaṃ;
মেঘিযৰগ্গো চতুত্থো নিট্ঠিতো।
Meghiyavaggo catuttho niṭṭhito.
তস্সুদ্দানং –
Tassuddānaṃ –
পিণ্ডোলো সারিপুত্তো চ, সুন্দরী ভৰতি অট্ঠমং।
Piṇḍolo sāriputto ca, sundarī bhavati aṭṭhamaṃ;
উপসেনো ৰঙ্গন্তপুত্তো, সারিপুত্তো চ তে দসাতি॥
Upaseno vaṅgantaputto, sāriputto ca te dasāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / উদান-অট্ঠকথা • Udāna-aṭṭhakathā / ১০. সারিপুত্তউপসমসুত্তৰণ্ণনা • 10. Sāriputtaupasamasuttavaṇṇanā
