| Library / Tipiṭaka / තිපිටක • Tipiṭaka / උදානපාළි • Udānapāḷi |
10. සාරිපුත්‌තඋපසමසුත්‌තං
10. Sāriputtaupasamasuttaṃ
40. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ආයස්‌මා සාරිපුත්‌තො භගවතො අවිදූරෙ නිසින්‌නො හොති පල්‌ලඞ්‌කං ආභුජිත්‌වා උජුං කායං පණිධාය අත්‌තනො උපසමං පච්‌චවෙක්‌ඛමානො.
40. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā sāriputto bhagavato avidūre nisinno hoti pallaṅkaṃ ābhujitvā ujuṃ kāyaṃ paṇidhāya attano upasamaṃ paccavekkhamāno.
අද්‌දසා ඛො භගවා ආයස්‌මන්‌තං සාරිපුත්‌තං අවිදූරෙ නිසින්‌නං පල්‌ලඞ්‌කං ආභුජිත්‌වා උජුං කායං පණිධාය අත්‌තනො උපසමං පච්‌චවෙක්‌ඛමානං.
Addasā kho bhagavā āyasmantaṃ sāriputtaṃ avidūre nisinnaṃ pallaṅkaṃ ābhujitvā ujuṃ kāyaṃ paṇidhāya attano upasamaṃ paccavekkhamānaṃ.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘උපසන්‌තසන්‌තචිත්‌තස්‌ස, නෙත්‌තිච්‌ඡින්‌නස්‌ස භික්‌ඛුනො;
‘‘Upasantasantacittassa, netticchinnassa bhikkhuno;
වික්‌ඛීණො ජාතිසංසාරො, මුත්‌තො සො මාරබන්‌ධනා’’ති. දසමං;
Vikkhīṇo jātisaṃsāro, mutto so mārabandhanā’’ti. dasamaṃ;
මෙඝියවග්‌ගො චතුත්‌ථො නිට්‌ඨිතො.
Meghiyavaggo catuttho niṭṭhito.
තස්‌සුද්‌දානං –
Tassuddānaṃ –
පිණ්‌ඩොලො සාරිපුත්‌තො ච, සුන්‌දරී භවති අට්‌ඨමං;
Piṇḍolo sāriputto ca, sundarī bhavati aṭṭhamaṃ;
උපසෙනො වඞ්‌ගන්‌තපුත්‌තො, සාරිපුත්‌තො ච තෙ දසාති.
Upaseno vaṅgantaputto, sāriputto ca te dasāti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 10. සාරිපුත්‌තඋපසමසුත්‌තවණ්‌ණනා • 10. Sāriputtaupasamasuttavaṇṇanā
