| Library / Tipiṭaka / ཏིཔིཊཀ • Tipiṭaka / ཨུདཱན-ཨཊྛཀཐཱ • Udāna-aṭṭhakathā |
༡༠. སཱརིཔུཏྟཨུཔསམསུཏྟཝཎྞནཱ
10. Sāriputtaupasamasuttavaṇṇanā
༤༠. དསམེ ཨཏྟནོ ཨུཔསམནྟི སཱཝཀཔཱརམཱིམཏྠཀཔྤཏྟིཡཱ ཧེཏུབྷཱུཏཾ ཨགྒམགྒེན ཨཏྟནོ ཨནཝསེསཀིལེསཝཱུཔསམཾ།
40. Dasame attano upasamanti sāvakapāramīmatthakappattiyā hetubhūtaṃ aggamaggena attano anavasesakilesavūpasamaṃ.
ཨཱཡསྨཱ ཧི སཱརིཔུཏྟོ ཨནུཔསནྟཀིལེསཱནཾ སཏྟཱནཾ རཱགཱདིཀིལེསཛནིཏསནྟཱཔདརཐཔརིལཱ༹ཧདུཀྑཉྩེཝ ཀིལེསཱབྷིསངྑཱརནིམིཏྟཾ ཛཱཏིཛརཱབྱཱདྷིམརཎསོཀཔརིདེཝཱདིདུཀྑཉྩ པཙྩཀྑཏོ དིསྭཱ ཨཏཱིཏཱནཱགཏེཔི ནེསཾ ཝཊྚམཱུལཀདུཀྑཾ པརིཏུལེཏྭཱ ཀརུཎཱཡམཱནོ ཨཏྟནཱཔི པུཐུཛྫནཀཱལེ ཨནུབྷཱུཏཾ ཀིལེསནིམིཏྟཾ ཝཱ ཨནཔྤཀཾ དུཀྑཾ ཨནུསྶརིཏྭཱ ‘‘ཨཱིདིསསྶ ནཱམ མཧཱདུཀྑསྶ ཧེཏུབྷཱུཏཱ ཀིལེསཱ ཨིདཱནི མེ སུཔྤཧཱིནཱ’’ཏི ཨཏྟནོ ཀིལེསཝཱུཔསམཾ ཨབྷིཎྷཾ པཙྩཝེཀྑཏི། པཙྩཝེཀྑནྟོ ཙ ‘‘ཨིམེ ཨེཏྟཀཱ ཀིལེསཱ སོཏཱཔཏྟིམགྒེན ཨུཔསམིཏཱ, ཨེཏྟཀཱ སཀདཱགཱམིམགྒེན, ཨེཏྟཀཱ ཨནཱགཱམིམགྒེན, ཨེཏྟཀཱ ཨརཧཏྟམགྒེན ཨུཔསམིཏཱ’’ཏི ཏཾཏཾམགྒཉཱཎེཧི ཨོདྷིསོ ཀིལེསཱནཾ ཨུཔསམིཏབྷཱཝཾ པཙྩཝེཀྑཏི, ཏེན ཝུཏྟཾ – ‘‘ཨཏྟནོ ཨུཔསམཾ པཙྩཝེཀྑམཱནོ’’ཏི།
Āyasmā hi sāriputto anupasantakilesānaṃ sattānaṃ rāgādikilesajanitasantāpadarathapariḷāhadukkhañceva kilesābhisaṅkhāranimittaṃ jātijarābyādhimaraṇasokaparidevādidukkhañca paccakkhato disvā atītānāgatepi nesaṃ vaṭṭamūlakadukkhaṃ parituletvā karuṇāyamāno attanāpi puthujjanakāle anubhūtaṃ kilesanimittaṃ vā anappakaṃ dukkhaṃ anussaritvā ‘‘īdisassa nāma mahādukkhassa hetubhūtā kilesā idāni me suppahīnā’’ti attano kilesavūpasamaṃ abhiṇhaṃ paccavekkhati. Paccavekkhanto ca ‘‘ime ettakā kilesā sotāpattimaggena upasamitā, ettakā sakadāgāmimaggena, ettakā anāgāmimaggena, ettakā arahattamaggena upasamitā’’ti taṃtaṃmaggañāṇehi odhiso kilesānaṃ upasamitabhāvaṃ paccavekkhati, tena vuttaṃ – ‘‘attano upasamaṃ paccavekkhamāno’’ti.
ཨཔརེ ‘‘ཐེརོ ཨརཧཏྟཕལསམཱཔཏྟིཾ སམཱཔཛྫིཏྭཱ ཏཾ པཙྩཝེཀྑིཏྭཱ ‘ཨིམསྶ ཝཏཱཡཾ སནྟཔཎཱིཏབྷཱཝོ ཨཙྩནྟསནྟཱཡ ཨསངྑཏཱཡ དྷཱཏུཡཱ ཨཱརམྨཎཏོ, སཡཉྩ སམྨདེཝ ཀིལེསཝཱུཔསམཏོ’ཏི ཨེཝཾ ཨབྷིཎྷཾ ཨུཔསམཾ པཙྩཝེཀྑཏཱི’’ཏི ཝདནྟི། ཨཉྙེ པན ‘‘ཨནཝསེསཀིལེསཱནཾ ཨུཔསམཔརིཡོསཱནེ ཛཱཏཾ ཨགྒཕལམེཝེཏྠ ཨུཔསམོ ནཱམ, ཏཾ པཙྩཝེཀྑམཱནོ ནིསིནྣོ’’ཏི།
Apare ‘‘thero arahattaphalasamāpattiṃ samāpajjitvā taṃ paccavekkhitvā ‘imassa vatāyaṃ santapaṇītabhāvo accantasantāya asaṅkhatāya dhātuyā ārammaṇato, sayañca sammadeva kilesavūpasamato’ti evaṃ abhiṇhaṃ upasamaṃ paccavekkhatī’’ti vadanti. Aññe pana ‘‘anavasesakilesānaṃ upasamapariyosāne jātaṃ aggaphalamevettha upasamo nāma, taṃ paccavekkhamāno nisinno’’ti.
ཨེཏམཏྠཾ ཝིདིཏྭཱཏི ཡདིདཾ ཨཱཡསྨཏོ སཱརིཔུཏྟསྶ མཧཱཔཉྙཏཱདིཧེཏུབྷཱུཏཾ སཱཝཀེསུ ཨནཉྙསཱདྷཱརཎཾ ཀིལེསཔྤཧཱནཾ ཨགྒཕལཾ ཝཱ ཨུཔསམཔརིཡཱཡེན ཝུཏྟཾ, ཏསྶ པཙྩཝེཀྑཎསངྑཱཏཾ ཨཏྠཾ སབྦཱཀཱརཏོ ཝིདིཏྭཱ ཏདནུབྷཱཝདཱིཔཀཾ ཨིམཾ ཨུདཱནཾ ཨུདཱནེསི།
Etamatthaṃ viditvāti yadidaṃ āyasmato sāriputtassa mahāpaññatādihetubhūtaṃ sāvakesu anaññasādhāraṇaṃ kilesappahānaṃ aggaphalaṃ vā upasamapariyāyena vuttaṃ, tassa paccavekkhaṇasaṅkhātaṃ atthaṃ sabbākārato viditvā tadanubhāvadīpakaṃ imaṃ udānaṃ udānesi.
ཏཏྠ ཨུཔསནྟསནྟཙིཏྟསྶཱཏི ཨུཔསནྟམེཝ ཧུཏྭཱ སནྟཾ ཙིཏྟཾ ཨེཏསྶཱཏི ཨུཔསནྟསནྟཙིཏྟོ། སམཱཔཏྟིཡཱ ཝིཀྑམྦྷནེན ཧི ཨུཔསནྟཀིལེསཏྟཱ ཨུཔསནྟཙིཏྟཾ ན སབྦཐཱ ‘‘ཨུཔསནྟསནྟ’’ནྟི ཝུཙྩཏི ཏསྶ ཨུཔསམསྶ ཨནཙྩནྟིཀབྷཱཝཏོ, ན ཏཐཱ ཨགྒམགྒེན། ཏེན པན ཨཙྩནྟམེཝ ཀིལེསཱནཾ སམུཙྪིནྣཏྟཱ ཨརཧཏོ ཙིཏྟཾ པུན ཀིལེསཱནཾ ཨནུཔསམེཏབྦཏཱཡ སམཐཝིཔསྶནཱཧེཊྛིམམགྒེཧི ཨུཔསནྟཀིལེསཾ ཧུཏྭཱ ཨཙྩནྟསནྟབྷཱཝཏོཝ ‘‘ཨུཔསནྟསནྟ’’ནྟི ཝུཙྩཏི། ཏེན ཝུཏྟཾ – ‘‘ཨུཔསནྟམེཝ ཧུཏྭཱ སནྟཾ ཙིཏྟཾ ཨེཏསྶཱཏི ཨུཔསནྟསནྟཙིཏྟོ’’ཏི། ཨུཔསནྟནྟི ཝཱ ཨུཔསམོ ཝུཙྩཏི, ཏསྨཱ ‘‘ཨུཔསནྟསནྟཙིཏྟསྶཱ’’ཏི ཨཙྩནྟཱུཔསམེན སནྟཙིཏྟསྶཱཏི ཨཏྠོ།
Tattha upasantasantacittassāti upasantameva hutvā santaṃ cittaṃ etassāti upasantasantacitto. Samāpattiyā vikkhambhanena hi upasantakilesattā upasantacittaṃ na sabbathā ‘‘upasantasanta’’nti vuccati tassa upasamassa anaccantikabhāvato, na tathā aggamaggena. Tena pana accantameva kilesānaṃ samucchinnattā arahato cittaṃ puna kilesānaṃ anupasametabbatāya samathavipassanāheṭṭhimamaggehi upasantakilesaṃ hutvā accantasantabhāvatova ‘‘upasantasanta’’nti vuccati. Tena vuttaṃ – ‘‘upasantameva hutvā santaṃ cittaṃ etassāti upasantasantacitto’’ti. Upasantanti vā upasamo vuccati, tasmā ‘‘upasantasantacittassā’’ti accantūpasamena santacittassāti attho.
ཨཐ ཝཱ སཏིཔི སབྦེསཾ ཁཱིཎཱསཝཱནཾ ཨནཝསེསཀིལེསཝཱུཔསམེ སཱཝཀཔཱརམཱིཉཱཎསྶ པན མཏྠཀཔྤཏྟིཧེཏུབྷཱུཏོ སཱཝཀེསུ ཨནཉྙསཱདྷཱརཎོ སཝིསེསོ དྷམྨསེནཱཔཏིནོ ཀིལེསཝཱུཔསམོཏི དསྶེཏུཾ སཏྠཱ ཨུཔསནྟསདྡེན ཝིསེསེཏྭཱ ཨཱཧ ‘‘ཨུཔསནྟསནྟཙིཏྟསྶཱ’’ཏི།
Atha vā satipi sabbesaṃ khīṇāsavānaṃ anavasesakilesavūpasame sāvakapāramīñāṇassa pana matthakappattihetubhūto sāvakesu anaññasādhāraṇo saviseso dhammasenāpatino kilesavūpasamoti dassetuṃ satthā upasantasaddena visesetvā āha ‘‘upasantasantacittassā’’ti.
ཏཏྲཱཡམཏྠོ – བྷུསཾ དལ༹ྷཾ ཝཱ སནྟཾ ཨུཔསནྟཾ, ཏེན ཨུཔསནྟེན ཨུཔསནྟམེཝ ཧུཏྭཱ སནྟཾ ཨུཔསནྟསནྟཾ , ཏཱདིསཾ ཙིཏྟཾ ཨེཏསྶཱཏི སབྦཾ པུརིམསདིསམེཝ། ཏཐཱ ཧེས བྷགཝཏཱ – ‘‘སཱརིཔུཏྟོ, བྷིཀྑཝེ, མཧཱཔཉྙོ པུཐུཔཉྙོ ཧཱསཔཉྙོ ཛཝནཔཉྙོ ཏིཀྑཔཉྙོ ནིབྦེདྷིཀཔཉྙོ’’ཏིཨཱདིནཱ (མ॰ ནི॰ ༣.༩༣) ཨནེཀཔརིཡཱཡེན ཝཎྞིཏོ ཐོམིཏོ། ནེཏྟིཙྪིནྣསྶཱཏི ནེཏྟི ཝུཙྩཏི བྷཝཏཎྷཱ སཾསཱརསྶ ནཡནཏོ, སཱ ནེཏྟི ཚིནྣཱ ཨེཏསྶཱཏི ནེཏྟིཙྪིནྣོ། ཏསྶ ནེཏྟིཙྪིནྣསྶ, པཧཱིནཏཎྷསྶཱཏི ཨཏྠོ། མུཏྟོ སོ མཱརབནྡྷནཱཏི སོ ཨེཝཾཝིདྷོ པརིཀྑཱིཎབྷཝསཾཡོཛནོ སབྦསྨཱ མཱརབནྡྷནཏོ མུཏྟོ, ན ཏསྶ མཱརབནྡྷནམོཙནཱཡ ཀརཎཱིཡཾ ཨཏྠི, ཏསྨཱ དྷམྨསེནཱཔཏི ཨཏྟནོ ཨུཔསམཾ པཙྩཝེཀྑཏཱིཏི། སེསཾ ཝུཏྟནཡམེཝ།
Tatrāyamattho – bhusaṃ daḷhaṃ vā santaṃ upasantaṃ, tena upasantena upasantameva hutvā santaṃ upasantasantaṃ , tādisaṃ cittaṃ etassāti sabbaṃ purimasadisameva. Tathā hesa bhagavatā – ‘‘sāriputto, bhikkhave, mahāpañño puthupañño hāsapañño javanapañño tikkhapañño nibbedhikapañño’’tiādinā (ma. ni. 3.93) anekapariyāyena vaṇṇito thomito. Netticchinnassāti netti vuccati bhavataṇhā saṃsārassa nayanato, sā netti chinnā etassāti netticchinno. Tassa netticchinnassa, pahīnataṇhassāti attho. Mutto so mārabandhanāti so evaṃvidho parikkhīṇabhavasaṃyojano sabbasmā mārabandhanato mutto, na tassa mārabandhanamocanāya karaṇīyaṃ atthi, tasmā dhammasenāpati attano upasamaṃ paccavekkhatīti. Sesaṃ vuttanayameva.
དསམསུཏྟཝཎྞནཱ ནིཊྛིཏཱ།
Dasamasuttavaṇṇanā niṭṭhitā.
ནིཊྛིཏཱ ཙ མེགྷིཡཝགྒཝཎྞནཱ།
Niṭṭhitā ca meghiyavaggavaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨུདཱནཔཱལི༹ • Udānapāḷi / ༡༠. སཱརིཔུཏྟཨུཔསམསུཏྟཾ • 10. Sāriputtaupasamasuttaṃ
