| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
সাসনপট্ঠানং
Sāsanapaṭṭhānaṃ
৮৯. তত্থ অট্ঠারস মূলপদা কুহিং দট্ঠব্বা? সাসনপট্ঠানে। তত্থ কতমং সাসনপট্ঠানং? সংকিলেসভাগিযং সুত্তং, ৰাসনাভাগিযং সুত্তং, নিব্বেধভাগিযং সুত্তং, অসেক্খভাগিযং সুত্তং, সংকিলেসভাগিযঞ্চ ৰাসনাভাগিযঞ্চ সুত্তং, সংকিলেসভাগিযঞ্চ নিব্বেধভাগিযঞ্চ সুত্তং, সংকিলেসভাগিযঞ্চ অসেক্খভাগিযঞ্চ সুত্তং, সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্তং, সংকিলেসভাগিযঞ্চ ৰাসনাভাগিযঞ্চ নিব্বেধভাগিযঞ্চ সুত্তং, ৰাসনাভাগিযঞ্চ নিব্বেধভাগিযঞ্চ সুত্তং, তণ্হাসংকিলেসভাগিযং সুত্তং, দিট্ঠিসংকিলেসভাগিযং সুত্তং, দুচ্চরিতসংকিলেসভাগিযং সুত্তং, তণ্হাৰোদানভাগিযং সুত্তং, দিট্ঠিৰোদানভাগিযং সুত্তং, দুচ্চরিতৰোদানভাগিযং সুত্তং।
89. Tattha aṭṭhārasa mūlapadā kuhiṃ daṭṭhabbā? Sāsanapaṭṭhāne. Tattha katamaṃ sāsanapaṭṭhānaṃ? Saṃkilesabhāgiyaṃ suttaṃ, vāsanābhāgiyaṃ suttaṃ, nibbedhabhāgiyaṃ suttaṃ, asekkhabhāgiyaṃ suttaṃ, saṃkilesabhāgiyañca vāsanābhāgiyañca suttaṃ, saṃkilesabhāgiyañca nibbedhabhāgiyañca suttaṃ, saṃkilesabhāgiyañca asekkhabhāgiyañca suttaṃ, saṃkilesabhāgiyañca nibbedhabhāgiyañca asekkhabhāgiyañca suttaṃ, saṃkilesabhāgiyañca vāsanābhāgiyañca nibbedhabhāgiyañca suttaṃ, vāsanābhāgiyañca nibbedhabhāgiyañca suttaṃ, taṇhāsaṃkilesabhāgiyaṃ suttaṃ, diṭṭhisaṃkilesabhāgiyaṃ suttaṃ, duccaritasaṃkilesabhāgiyaṃ suttaṃ, taṇhāvodānabhāgiyaṃ suttaṃ, diṭṭhivodānabhāgiyaṃ suttaṃ, duccaritavodānabhāgiyaṃ suttaṃ.
তত্থ সংকিলেসো তিৰিধো – তণ্হাসংকিলেসো দিট্ঠিসংকিলেসো দুচ্চরিতসংকিলেসো। তত্থ তণ্হাসংকিলেসো সমথেন ৰিসুজ্ঝতি, সো সমথো সমাধিক্খন্ধো। দিট্ঠিসংকিলেসো ৰিপস্সনায ৰিসুজ্ঝতি, সা ৰিপস্সনা পঞ্ঞাক্খন্ধো। দুচ্চরিতসংকিলেসো সুচরিতেন ৰিসুজ্ঝতি, তং সুচরিতং সীলক্খন্ধো। তস্স সীলে পতিট্ঠিতস্স যদি আসত্তি উপ্পজ্জতি ভৰেসু, এৰং সাযং সমথৰিপস্সনা ভাৰনামযং পুঞ্ঞক্রিযৰত্থু ভৰতি তত্রূপপত্তিযা সংৰত্ততি। ইমানি চত্তারি সুত্তানি, সাধারণানি কতানি অট্ঠ ভৰন্তি, তানিযেৰ অট্ঠ সুত্তানি সাধারণানি কতানি সোল়স ভৰন্তি।
Tattha saṃkileso tividho – taṇhāsaṃkileso diṭṭhisaṃkileso duccaritasaṃkileso. Tattha taṇhāsaṃkileso samathena visujjhati, so samatho samādhikkhandho. Diṭṭhisaṃkileso vipassanāya visujjhati, sā vipassanā paññākkhandho. Duccaritasaṃkileso sucaritena visujjhati, taṃ sucaritaṃ sīlakkhandho. Tassa sīle patiṭṭhitassa yadi āsatti uppajjati bhavesu, evaṃ sāyaṃ samathavipassanā bhāvanāmayaṃ puññakriyavatthu bhavati tatrūpapattiyā saṃvattati. Imāni cattāri suttāni, sādhāraṇāni katāni aṭṭha bhavanti, tāniyeva aṭṭha suttāni sādhāraṇāni katāni soḷasa bhavanti.
ইমেহি সোল়সহি সুত্তেহি ভিন্নেহি নৰৰিধং সুত্তং ভিন্নং ভৰতি। গাথায গাথা অনুমিনিতব্বা, ৰেয্যাকরণেন ৰেয্যাকরণং অনুমিনিতব্বং। সুত্তেন সুত্তং অনুমিনিতব্বং।
Imehi soḷasahi suttehi bhinnehi navavidhaṃ suttaṃ bhinnaṃ bhavati. Gāthāya gāthā anuminitabbā, veyyākaraṇena veyyākaraṇaṃ anuminitabbaṃ. Suttena suttaṃ anuminitabbaṃ.
৯০. তত্থ কতমং সংকিলেসভাগিযং সুত্তং?
90. Tattha katamaṃ saṃkilesabhāgiyaṃ suttaṃ?
‘‘কামন্ধা জালসঞ্ছন্না, তণ্হাছদনছাদিতা।
‘‘Kāmandhā jālasañchannā, taṇhāchadanachāditā;
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
চত্তারিমানি , ভিক্খৰে, অগতিগমনানি। কতমানি চত্তারি? ছন্দাগতিং 5 গচ্ছতি, দোসাগতিং গচ্ছতি, মোহাগতিং গচ্ছতি, ভযাগতিং গচ্ছতি। ইমানি খো, ভিক্খৰে, চত্তারি অগতিগমনানি। ইদমৰোচ ভগৰা, ইদং ৰত্ৰান সুগতো, অথাপরং এতদৰোচ সত্থা –
Cattārimāni , bhikkhave, agatigamanāni. Katamāni cattāri? Chandāgatiṃ 6 gacchati, dosāgatiṃ gacchati, mohāgatiṃ gacchati, bhayāgatiṃ gacchati. Imāni kho, bhikkhave, cattāri agatigamanāni. Idamavoca bhagavā, idaṃ vatvāna sugato, athāparaṃ etadavoca satthā –
‘‘ছন্দা দোসা ভযা মোহা, যো ধম্মং অতিৰত্ততি।
‘‘Chandā dosā bhayā mohā, yo dhammaṃ ativattati;
নিহীযতি তস্স যসো, কাল়পক্খেৰ চন্দিমা’’তি॥
Nihīyati tassa yaso, kāḷapakkheva candimā’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘মনোপুব্বঙ্গমা ধম্মা, মনোসেট্ঠা মনোমযা।
‘‘Manopubbaṅgamā dhammā, manoseṭṭhā manomayā;
মনসা চে পদুট্ঠেন, ভাসতি ৰা করোতি ৰা।
Manasā ce paduṭṭhena, bhāsati vā karoti vā;
ততো নং দুক্খমন্ৰেতি, চক্কংৰ ৰহতো পদ’’ন্তি॥
Tato naṃ dukkhamanveti, cakkaṃva vahato pada’’nti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘মিদ্ধী 7 যদা হোতি মহগ্ঘসো চ, নিদ্দাযিতা সম্পরিৰত্তসাযী।
‘‘Middhī 8 yadā hoti mahagghaso ca, niddāyitā samparivattasāyī;
মহাৰরাহোৰ নিৰাপপুট্ঠো, পুনপ্পুনং গব্ভমুপেতি মন্দো’’তি॥
Mahāvarāhova nivāpapuṭṭho, punappunaṃ gabbhamupeti mando’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘অযসাৰ মলং সমুট্ঠিতং, ততুট্ঠায 9 তমেৰ খাদতি।
‘‘Ayasāva malaṃ samuṭṭhitaṃ, tatuṭṭhāya 10 tameva khādati;
এৰং অতিধোনচারিনং, সানি 11 কম্মানি নযন্তি দুগ্গতি’’ন্তি॥
Evaṃ atidhonacārinaṃ, sāni 12 kammāni nayanti duggati’’nti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘চোরো যথা সন্ধিমুখে গহীতো, সকম্মুনা হঞ্ঞতি বজ্ঝতে চ।
‘‘Coro yathā sandhimukhe gahīto, sakammunā haññati bajjhate ca;
এৰং অযং পেচ্চ পজা পরত্থ, সকম্মুনা হঞ্ঞতি বজ্ঝতে চা’’তি॥
Evaṃ ayaṃ pecca pajā parattha, sakammunā haññati bajjhate cā’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘সুখকামানি ভূতানি, যো দণ্ডেন ৰিহিংসতি।
‘‘Sukhakāmāni bhūtāni, yo daṇḍena vihiṃsati;
অত্তনো সুখমেসানো, পেচ্চ সো ন লভতে 13 সুখ’’ন্তি॥
Attano sukhamesāno, pecca so na labhate 14 sukha’’nti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘গুন্নং চে তরমানানং, জিম্হং গচ্ছতি পুঙ্গৰো।
‘‘Gunnaṃ ce taramānānaṃ, jimhaṃ gacchati puṅgavo;
সব্বা তা জিম্হং গচ্ছন্তি, নেত্তে জিম্হং গতে 15 সতি॥
Sabbā tā jimhaṃ gacchanti, nette jimhaṃ gate 16 sati.
‘‘এৰমেৰ মনুস্সেসু, যো হোতি সেট্ঠসম্মতো।
‘‘Evameva manussesu, yo hoti seṭṭhasammato;
সো চে অধম্মং চরতি, পগেৰ ইতরা পজা।
So ce adhammaṃ carati, pageva itarā pajā;
সব্বং রট্ঠং দুক্খং সেতি, রাজা চে হোতি অধম্মিকো’’তি॥
Sabbaṃ raṭṭhaṃ dukkhaṃ seti, rājā ce hoti adhammiko’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘সুকিচ্ছরূপাৰতিমে মনুস্সা, করোন্তি পাপং উপধীসু রত্তা।
‘‘Sukiccharūpāvatime manussā, karonti pāpaṃ upadhīsu rattā;
গচ্ছন্তি তে বহুজনসন্নিৰাসং, নিরযং অৰীচিং কটুকং ভযানক’’ন্তি॥
Gacchanti te bahujanasannivāsaṃ, nirayaṃ avīciṃ kaṭukaṃ bhayānaka’’nti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘ফলং ৰে 17 কদলিং হন্তি, ফলং ৰেল়ুং ফলং নল়ং।
‘‘Phalaṃ ve 18 kadaliṃ hanti, phalaṃ veḷuṃ phalaṃ naḷaṃ;
সক্কারো কাপুরিসং হন্তি, গব্ভো অস্সতরিং যথা’’তি॥
Sakkāro kāpurisaṃ hanti, gabbho assatariṃ yathā’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
সুখেত্তে পূতিবীজংৰ, সদ্ধম্মে ন ৰিরূহতী’’তি॥
Sukhette pūtibījaṃva, saddhamme na virūhatī’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
৯১. ‘‘ইধাহং, ভিক্খৰে, একচ্চং পুগ্গলং পদুট্ঠচিত্তং এৰং চেতসা চেতো পরিচ্চ পজানামি, (যথা খো অযং পুগ্গলো ইরিযতি, যঞ্চ পটিপদং পটিপন্নো, যঞ্চ মগ্গং সমারূল়্হো) 21। ইমম্হি চাযং সমযে কালং করেয্য, যথাভতং নিক্খিত্তো, এৰং নিরযে। তং কিস্স হেতু? চিত্তং হিস্স, ভিক্খৰে, পদুট্ঠং 22, চেতোপদোসহেতু 23 খো পন, ভিক্খৰে, এৰমিধেকচ্চে সত্তা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তী’’তি। এতমত্থং ভগৰা অৰোচ, তত্থেতং ইতি ৰুচ্চতি –
91. ‘‘Idhāhaṃ, bhikkhave, ekaccaṃ puggalaṃ paduṭṭhacittaṃ evaṃ cetasā ceto paricca pajānāmi, (yathā kho ayaṃ puggalo iriyati, yañca paṭipadaṃ paṭipanno, yañca maggaṃ samārūḷho) 24. Imamhi cāyaṃ samaye kālaṃ kareyya, yathābhataṃ nikkhitto, evaṃ niraye. Taṃ kissa hetu? Cittaṃ hissa, bhikkhave, paduṭṭhaṃ 25, cetopadosahetu 26 kho pana, bhikkhave, evamidhekacce sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjantī’’ti. Etamatthaṃ bhagavā avoca, tatthetaṃ iti vuccati –
‘‘পদুট্ঠচিত্তং ঞত্ৰান, একচ্চং ইধ পুগ্গলং।
‘‘Paduṭṭhacittaṃ ñatvāna, ekaccaṃ idha puggalaṃ;
ইমম্হি চাযং সমযে, কালং কযিরাথ পুগ্গলো।
Imamhi cāyaṃ samaye, kālaṃ kayirātha puggalo;
নিরযং উপপজ্জেয্য, চিত্তং হিস্স পদূসিতং।
Nirayaṃ upapajjeyya, cittaṃ hissa padūsitaṃ;
চেতোপদোসহেতু হি, সত্তা গচ্ছন্তি দুগ্গতিং॥
Cetopadosahetu hi, sattā gacchanti duggatiṃ.
যথাভতং নিক্খিপেয্য, এৰমেৰ তথাৰিধো।
Yathābhataṃ nikkhipeyya, evameva tathāvidho;
কাযস্স ভেদা দুপ্পঞ্ঞো, নিরযং সোপপজ্জতী’’তি॥
Kāyassa bhedā duppañño, nirayaṃ sopapajjatī’’ti.
অযম্পি অত্থো ৰুত্তো ভগৰতা ইতি মে সুতন্তি।
Ayampi attho vutto bhagavatā iti me sutanti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘সচে ভাযথ দুক্খস্স, সচে ৰো দুক্খমপ্পিযং।
‘‘Sace bhāyatha dukkhassa, sace vo dukkhamappiyaṃ;
‘‘সচে চ পাপকং কম্মং, করিস্সথ করোথ ৰা।
‘‘Sace ca pāpakaṃ kammaṃ, karissatha karotha vā;
ন ৰো দুক্খা পমুত্যত্থি, উপেচ্চপি পলাযত’’ন্তি॥
Na vo dukkhā pamutyatthi, upeccapi palāyata’’nti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘অধম্মেন ধনং লদ্ধা, মুসাৰাদেন চূভযং।
‘‘Adhammena dhanaṃ laddhā, musāvādena cūbhayaṃ;
মমেতি বালা মঞ্ঞন্তি, তং কথং নু ভৰিস্সতি॥
Mameti bālā maññanti, taṃ kathaṃ nu bhavissati.
‘‘অন্তরাযা সু ভৰিস্সন্তি, সম্ভতস্স ৰিনস্সতি।
‘‘Antarāyā su bhavissanti, sambhatassa vinassati;
মতা সগ্গং ন গচ্ছন্তি, ননু এত্তাৰতা হতা’’তি॥
Matā saggaṃ na gacchanti, nanu ettāvatā hatā’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘কথং খণতি অত্তানং, কথং মিত্তেহি জীরতি।
‘‘Kathaṃ khaṇati attānaṃ, kathaṃ mittehi jīrati;
কথং ৰিৰট্টতে ধম্মা, কথং সগ্গং ন গচ্ছতি॥
Kathaṃ vivaṭṭate dhammā, kathaṃ saggaṃ na gacchati.
‘‘লোভা খণতি অত্তানং, লুদ্ধো মিত্তেহি জীরতি।
‘‘Lobhā khaṇati attānaṃ, luddho mittehi jīrati;
লোভা ৰিৰট্টতে ধম্মা, লোভা সগ্গং ন গচ্ছতী’’তি॥
Lobhā vivaṭṭate dhammā, lobhā saggaṃ na gacchatī’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘চরন্তি বালা দুম্মেধা, অমিত্তেনেৰ অত্তনা।
‘‘Caranti bālā dummedhā, amitteneva attanā;
‘‘ন তং কম্মং কতং সাধু, যং কত্ৰা অনুতপ্পতি।
‘‘Na taṃ kammaṃ kataṃ sādhu, yaṃ katvā anutappati;
যস্স অস্সুমুখো রোদং, ৰিপাকং পটিসেৰতী’’তি॥
Yassa assumukho rodaṃ, vipākaṃ paṭisevatī’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘দুক্করং দুত্তিতিক্খঞ্চ, অব্যত্তেন চ 33 সামঞ্ঞং।
‘‘Dukkaraṃ duttitikkhañca, abyattena ca 34 sāmaññaṃ;
বহূ হি তত্থ সম্বাধা, যত্থ বালো ৰিসীদতি॥
Bahū hi tattha sambādhā, yattha bālo visīdati.
‘‘যো হি অত্থঞ্চ ধম্মঞ্চ, ভাসমানে তথাগতে।
‘‘Yo hi atthañca dhammañca, bhāsamāne tathāgate;
মনং পদোসযে বালো, মোঘং খো তস্স জীৰিতং॥
Manaṃ padosaye bālo, moghaṃ kho tassa jīvitaṃ.
‘‘এতঞ্চাহং অরহামি, দুক্খঞ্চ ইতো চ পাপিযতরং ভন্তে।
‘‘Etañcāhaṃ arahāmi, dukkhañca ito ca pāpiyataraṃ bhante;
যো অপ্পমেয্যেসু তথাগতেসু, চিত্তং পদোসেমি অৰীতরাগো’’তি॥
Yo appameyyesu tathāgatesu, cittaṃ padosemi avītarāgo’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘অপ্পমেয্যং পমিনন্তো, কোধ ৰিদ্ৰা ৰিকপ্পযে।
‘‘Appameyyaṃ paminanto, kodha vidvā vikappaye;
অপ্পমেয্যং পমাযিনং 35, নিৰুতং তং মঞ্ঞে অকিস্সৰ’’ন্তি॥
Appameyyaṃ pamāyinaṃ 36, nivutaṃ taṃ maññe akissava’’nti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
যায ছিন্দতি অত্তানং, বালো দুব্ভাসিতং ভণং॥
Yāya chindati attānaṃ, bālo dubbhāsitaṃ bhaṇaṃ.
‘‘ন হি সত্থং সুনিসিতং, ৰিসং হলাহলং ইৰ।
‘‘Na hi satthaṃ sunisitaṃ, visaṃ halāhalaṃ iva;
এৰং ৰিরদ্ধং পাতেতি, ৰাচা দুব্ভাসিতা যথা’’তি॥
Evaṃ viraddhaṃ pāteti, vācā dubbhāsitā yathā’’ti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
৯২.
92.
‘‘যো নিন্দিযং পসংসতি, তং ৰা নিন্দতি যো পসংসিযো।
‘‘Yo nindiyaṃ pasaṃsati, taṃ vā nindati yo pasaṃsiyo.
ৰিচিনাতি মুখেন সো কলিং, কলিনা তেন সুখং ন ৰিন্দতি॥
Vicināti mukhena so kaliṃ, kalinā tena sukhaṃ na vindati.
‘‘অপ্পমত্তো অযং কলি, যো অক্খেসু ধনপরাজযো।
‘‘Appamatto ayaṃ kali, yo akkhesu dhanaparājayo;
সব্বস্সাপি সহাপি অত্তনা, অযমেৰ মহন্ততরো 39 কলি।
Sabbassāpi sahāpi attanā, ayameva mahantataro 40 kali;
যো সুগতেসু মনং পদোসযে॥
Yo sugatesu manaṃ padosaye.
‘‘সতং সহস্সানং নিরব্বুদানং, ছত্তিংসতী পঞ্চ চ অব্বুদানি।
‘‘Sataṃ sahassānaṃ nirabbudānaṃ, chattiṃsatī pañca ca abbudāni;
যমরিযগরহী নিরযং উপেতি, ৰাচং মনঞ্চ পণিধায পাপক’’ন্তি॥
Yamariyagarahī nirayaṃ upeti, vācaṃ manañca paṇidhāya pāpaka’’nti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
‘‘যো লোভগুণে অনুযুত্তো, সো ৰচসা 41 পরিভাসতি অঞ্ঞে।
‘‘Yo lobhaguṇe anuyutto, so vacasā 42 paribhāsati aññe;
অস্সদ্ধো কদরিযো 43 অৰদঞ্ঞূ, মচ্ছরি পেসুণিযং অনুযুত্তো॥
Assaddho kadariyo 44 avadaññū, macchari pesuṇiyaṃ anuyutto.
‘‘মুখদুগ্গ ৰিভূত অনরিয, ভূনহু পাপক দুক্কটকারি।
‘‘Mukhadugga vibhūta anariya, bhūnahu pāpaka dukkaṭakāri;
পুরিসন্ত কলী অৰজাতপুত্ত 45, মা বহুভাণিধ নেরযিকোসি॥
Purisanta kalī avajātaputta 46, mā bahubhāṇidha nerayikosi.
‘‘রজমাকিরসী অহিতায, সন্তে গরহসি কিব্বিসকারী।
‘‘Rajamākirasī ahitāya, sante garahasi kibbisakārī;
বহূনি দুচ্চরিতানি চরিত্ৰা, গচ্ছসি খো পপতং চিররত্ত’’ন্তি॥
Bahūni duccaritāni caritvā, gacchasi kho papataṃ ciraratta’’nti.
ইদং সংকিলেসভাগিযং সুত্তং।
Idaṃ saṃkilesabhāgiyaṃ suttaṃ.
তত্থ কতমং ৰাসনাভাগিযং সুত্তং?
Tattha katamaṃ vāsanābhāgiyaṃ suttaṃ?
‘‘মনোপুব্বঙ্গমা ধম্মা, মনোসেট্ঠা মনোমযা।
‘‘Manopubbaṅgamā dhammā, manoseṭṭhā manomayā;
মনসা চে পসন্নেন, ভাসতি ৰা করোতি ৰা।
Manasā ce pasannena, bhāsati vā karoti vā;
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
৯৩. মহানামো সক্কো ভগৰন্তং এতদৰোচ – ‘‘ইদং, ভন্তে, কপিলৰত্থু ইদ্ধঞ্চেৰ ফীতঞ্চ বাহুজঞ্ঞং 49 আকিণ্ণমনুস্সং সম্বাধব্যূহং, সো খো অহং, ভন্তে, ভগৰন্তং ৰা পযিরুপাসিত্ৰা মনোভাৰনীযে ৰা ভিক্খূ সাযন্হসমযং কপিলৰত্থুং পৰিসন্তো ভন্তেনপি হত্থিনা সমাগচ্ছামি, ভন্তেনপি অস্সেন সমাগচ্ছামি, ভন্তেনপি রথেন সমাগচ্ছামি, ভন্তেনপি সকটেন সমাগচ্ছামি, ভন্তেনপি পুরিসেন সমাগচ্ছামি, তস্স ময্হং, ভন্তে, তস্মিং সমযে মুস্সতেৰ ভগৰন্তং আরব্ভ সতি, মুস্সতি ধম্মং আরব্ভ সতি, মুস্সতি সঙ্ঘং আরব্ভ সতি। তস্স ময্হং, ভন্তে, এৰং হোতি ‘ইমম্হি চাহং সাযন্হসমযে কালং করেয্যং, কা ময্হং 50 গতি, কো অভিসম্পরাযো’’’তি।
93. Mahānāmo sakko bhagavantaṃ etadavoca – ‘‘idaṃ, bhante, kapilavatthu iddhañceva phītañca bāhujaññaṃ 51 ākiṇṇamanussaṃ sambādhabyūhaṃ, so kho ahaṃ, bhante, bhagavantaṃ vā payirupāsitvā manobhāvanīye vā bhikkhū sāyanhasamayaṃ kapilavatthuṃ pavisanto bhantenapi hatthinā samāgacchāmi, bhantenapi assena samāgacchāmi, bhantenapi rathena samāgacchāmi, bhantenapi sakaṭena samāgacchāmi, bhantenapi purisena samāgacchāmi, tassa mayhaṃ, bhante, tasmiṃ samaye mussateva bhagavantaṃ ārabbha sati, mussati dhammaṃ ārabbha sati, mussati saṅghaṃ ārabbha sati. Tassa mayhaṃ, bhante, evaṃ hoti ‘imamhi cāhaṃ sāyanhasamaye kālaṃ kareyyaṃ, kā mayhaṃ 52 gati, ko abhisamparāyo’’’ti.
‘‘মা ভাযি, মহানাম, মা ভাযি, মহানাম, অপাপকং তে মরণং ভৰিস্সতি, অপাপিকা 53 কালঙ্কিরিযা। চতূহি খো, মহানাম, ধম্মেহি সমন্নাগতো অরিযসাৰকো নিব্বাননিন্নো হোতি নিব্বানপোণো নিব্বানপব্ভারো। কতমেহি চতূহি? ইধ, মহানাম, অরিযসাৰকো বুদ্ধে অৰেচ্চপ্পসাদেন সমন্নাগতো হোতি, ইতিপি সো ভগৰা অরহং…পে॰… বুদ্ধো ভগৰাতি। ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগতো হোতি অখণ্ডেহি…পে॰… সমাধিসংৰত্তনিকেহি। সেয্যথাপি, মহানাম, রুক্খো পাচীননিন্নো পাচীনপোণো পাচীনপব্ভারো, সো মূলচ্ছিন্নো 54 কতমেন পপতেয্যা’’তি? ‘‘যেন, ভন্তে, নিন্নো যেন পোণো যেন পব্ভারো’’তি। ‘‘এৰমেৰ খো, মহানাম, ইমেহি চতূহি ধম্মেহি সমন্নাগতো অরিযসাৰকো নিব্বাননিন্নো হোতি নিব্বানপোণো নিব্বানপব্ভারো। মা ভাযি, মহানাম, মা ভাযি, মহানাম, অপাপকং তে মরণং ভৰিস্সতি, অপাপিকা কালঙ্কিরিযা’’তি।
‘‘Mā bhāyi, mahānāma, mā bhāyi, mahānāma, apāpakaṃ te maraṇaṃ bhavissati, apāpikā 55 kālaṅkiriyā. Catūhi kho, mahānāma, dhammehi samannāgato ariyasāvako nibbānaninno hoti nibbānapoṇo nibbānapabbhāro. Katamehi catūhi? Idha, mahānāma, ariyasāvako buddhe aveccappasādena samannāgato hoti, itipi so bhagavā arahaṃ…pe… buddho bhagavāti. Dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Seyyathāpi, mahānāma, rukkho pācīnaninno pācīnapoṇo pācīnapabbhāro, so mūlacchinno 56 katamena papateyyā’’ti? ‘‘Yena, bhante, ninno yena poṇo yena pabbhāro’’ti. ‘‘Evameva kho, mahānāma, imehi catūhi dhammehi samannāgato ariyasāvako nibbānaninno hoti nibbānapoṇo nibbānapabbhāro. Mā bhāyi, mahānāma, mā bhāyi, mahānāma, apāpakaṃ te maraṇaṃ bhavissati, apāpikā kālaṅkiriyā’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘সুখকামানি ভূতানি, যো দণ্ডেন ন হিংসতি।
‘‘Sukhakāmāni bhūtāni, yo daṇḍena na hiṃsati;
অত্তনো সুখমেসানো, পেচ্চ সো লভতে সুখ’’ন্তি॥
Attano sukhamesāno, pecca so labhate sukha’’nti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘গুন্নঞ্চে তরমানানং, উজুং গচ্ছতি পুঙ্গৰো।
‘‘Gunnañce taramānānaṃ, ujuṃ gacchati puṅgavo;
সব্বা তা উজুং গচ্ছন্তি, নেত্তে উজুং গতে সতি॥
Sabbā tā ujuṃ gacchanti, nette ujuṃ gate sati.
‘‘এৰমেৰ মনুস্সেসু, যো হোতি সেট্ঠসম্মতো।
‘‘Evameva manussesu, yo hoti seṭṭhasammato;
সব্বং রট্ঠং সুখং সেতি, রাজা চে হোতি ধম্মিকো’’তি॥
Sabbaṃ raṭṭhaṃ sukhaṃ seti, rājā ce hoti dhammiko’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
৯৪. ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন সম্বহুলা ভিক্খূ ভগৰতো চীৰরকম্মং করোন্তি ‘‘নিট্ঠিতচীৰরো ভগৰা তেমাসচ্চযেন চারিকং পক্কমিস্সতী’’তি। তেন খো পন সমযেন ইসিদত্তপুরাণা থপতযো সাকেতে 59 পটিৰসন্তি কেনচি দেৰ করণীযেন। অস্সোসুং খো ইসিদত্তপুরাণা থপতযো ‘‘সম্বহুলা কির ভিক্খূ ভগৰতো চীৰরকম্মং করোন্তি। নিট্ঠিতচীৰরো ভগৰা তেমাসচ্চযেন চারিকং পক্কমিস্সতী’’তি।
94. Bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā bhikkhū bhagavato cīvarakammaṃ karonti ‘‘niṭṭhitacīvaro bhagavā temāsaccayena cārikaṃ pakkamissatī’’ti. Tena kho pana samayena isidattapurāṇā thapatayo sākete 60 paṭivasanti kenaci deva karaṇīyena. Assosuṃ kho isidattapurāṇā thapatayo ‘‘sambahulā kira bhikkhū bhagavato cīvarakammaṃ karonti. Niṭṭhitacīvaro bhagavā temāsaccayena cārikaṃ pakkamissatī’’ti.
অথ খো ইসিদত্তপুরাণা থপতযো মগ্গে পুরিসং ঠপেসুং ‘‘যদা ত্ৰং অম্ভো পুরিস পস্সেয্যাসি ভগৰন্তং আগচ্ছন্তং অরহন্তং সম্মাসম্বুদ্ধং, অথ অম্হাকং আরোচেয্যাসী’’তি। দ্ৰীহতীহং ঠিতো খো সো পুরিসো অদ্দস ভগৰন্তং দূরতোৰ আগচ্ছন্তং, দিস্ৰান যেন ইসিদত্তপুরাণা থপতযো তেনুপসঙ্কমি, উপসঙ্কমিত্ৰা ইসিদত্তপুরাণে থপতযো এতদৰোচ ‘‘অযং সো ভন্তে 61 ভগৰা আগচ্ছতি অরহং সম্মাসম্বুদ্ধো, যস্সদানি কালং মঞ্ঞথা’’তি।
Atha kho isidattapurāṇā thapatayo magge purisaṃ ṭhapesuṃ ‘‘yadā tvaṃ ambho purisa passeyyāsi bhagavantaṃ āgacchantaṃ arahantaṃ sammāsambuddhaṃ, atha amhākaṃ āroceyyāsī’’ti. Dvīhatīhaṃ ṭhito kho so puriso addasa bhagavantaṃ dūratova āgacchantaṃ, disvāna yena isidattapurāṇā thapatayo tenupasaṅkami, upasaṅkamitvā isidattapurāṇe thapatayo etadavoca ‘‘ayaṃ so bhante 62 bhagavā āgacchati arahaṃ sammāsambuddho, yassadāni kālaṃ maññathā’’ti.
অথ খো ইসিদত্তপুরাণা থপতযো যেন ভগৰা তেনুপসঙ্কমিংসু, উপসঙ্কমিত্ৰা ভগৰন্তং অভিৰাদেত্ৰা ভগৰন্তং পিট্ঠিতো পিট্ঠিতো অনুবন্ধিংসু। অথ খো ভগৰা মগ্গা ওক্কম্ম যেন অঞ্ঞতরং রুক্খমূলং তেনুপসঙ্কমি, উপসঙ্কমিত্ৰা পঞ্ঞত্তে আসনে নিসীদি। ইসিদত্তপুরাণা থপতযো ভগৰন্তং অভিৰাদেত্ৰা একমন্তং নিসীদিংসু, একমন্তং নিসিন্না খো ইসিদত্তপুরাণা থপতযো ভগৰন্তং এতদৰোচুং –
Atha kho isidattapurāṇā thapatayo yena bhagavā tenupasaṅkamiṃsu, upasaṅkamitvā bhagavantaṃ abhivādetvā bhagavantaṃ piṭṭhito piṭṭhito anubandhiṃsu. Atha kho bhagavā maggā okkamma yena aññataraṃ rukkhamūlaṃ tenupasaṅkami, upasaṅkamitvā paññatte āsane nisīdi. Isidattapurāṇā thapatayo bhagavantaṃ abhivādetvā ekamantaṃ nisīdiṃsu, ekamantaṃ nisinnā kho isidattapurāṇā thapatayo bhagavantaṃ etadavocuṃ –
‘‘যদা মযং ভন্তে ভগৰন্তং সুণোম ‘সাৰত্থিযা কোসলেসু চারিকং পক্কমিস্সতী’তি, হোতি নো তস্মিং সমযে অনত্তমনতা হোতি দোমনস্সং ‘দূরে নো ভগৰা ভৰিস্সতী’তি। যদা পন মযং ভন্তে ভগৰন্তং সুণোম ‘সাৰত্থিযা কোসলেসু চারিকং পক্কন্তো’তি, হোতি নো তস্মিং সমযে অনত্তমনতা হোতি দোমনস্সং ‘দূরে নো ভগৰা’তি…পে॰…।
‘‘Yadā mayaṃ bhante bhagavantaṃ suṇoma ‘sāvatthiyā kosalesu cārikaṃ pakkamissatī’ti, hoti no tasmiṃ samaye anattamanatā hoti domanassaṃ ‘dūre no bhagavā bhavissatī’ti. Yadā pana mayaṃ bhante bhagavantaṃ suṇoma ‘sāvatthiyā kosalesu cārikaṃ pakkanto’ti, hoti no tasmiṃ samaye anattamanatā hoti domanassaṃ ‘dūre no bhagavā’ti…pe….
‘‘যদা পন মযং ভন্তে ভগৰন্তং সুণোম ‘কাসীসু মগধেসু 63 চারিকং পক্কমিস্সতী’তি, হোতি নো তস্মিং সমযে অনত্তমনতা হোতি দোমনস্সং ‘দূরে নো ভগৰা ভৰিস্সতী’তি । যদা পন মযং ভন্তে ভগৰন্তং সুণোম ‘কাসীসু মগধেসু চারিকং পক্কন্তো’তি, অনপ্পকা নো তস্মিং সমযে অনত্তমনতা হোতি অনপ্পকং দোমনস্সং ‘দূরে নো ভগৰা’তি।
‘‘Yadā pana mayaṃ bhante bhagavantaṃ suṇoma ‘kāsīsu magadhesu 64 cārikaṃ pakkamissatī’ti, hoti no tasmiṃ samaye anattamanatā hoti domanassaṃ ‘dūre no bhagavā bhavissatī’ti . Yadā pana mayaṃ bhante bhagavantaṃ suṇoma ‘kāsīsu magadhesu cārikaṃ pakkanto’ti, anappakā no tasmiṃ samaye anattamanatā hoti anappakaṃ domanassaṃ ‘dūre no bhagavā’ti.
‘‘যদা পন মযং ভন্তে ভগৰন্তং সুণোম ‘মগধেসু কাসীসু চারিকং পক্কমিস্সতী’তি, হোতি নো তস্মিং সমযে অত্তমনতা হোতি সোমনস্সং ‘আসন্নে নো ভগৰা ভৰিস্সতী’তি। যদা পন মযং ভন্তে ভগৰন্তং সুণোম ‘মগধেসু কাসীসু চারিকং পক্কন্তো’তি, হোতি নো তস্মিং সমযে অত্তমনতা হোতি সোমনস্সং ‘আসন্নে নো ভগৰা’তি…পে॰…।
‘‘Yadā pana mayaṃ bhante bhagavantaṃ suṇoma ‘magadhesu kāsīsu cārikaṃ pakkamissatī’ti, hoti no tasmiṃ samaye attamanatā hoti somanassaṃ ‘āsanne no bhagavā bhavissatī’ti. Yadā pana mayaṃ bhante bhagavantaṃ suṇoma ‘magadhesu kāsīsu cārikaṃ pakkanto’ti, hoti no tasmiṃ samaye attamanatā hoti somanassaṃ ‘āsanne no bhagavā’ti…pe….
‘‘যদা পন মযং ভন্তে ভগৰন্তং সুণোম ‘কোসলেসু সাৰত্থিং 65 চারিকং পক্কমিস্সতী’তি। হোতি নো তস্মিং সমযে অত্তমনতা হোতি সোমনস্সং ‘আসন্নে নো ভগৰা ভৰিস্সতী’তি।
‘‘Yadā pana mayaṃ bhante bhagavantaṃ suṇoma ‘kosalesu sāvatthiṃ 66 cārikaṃ pakkamissatī’ti. Hoti no tasmiṃ samaye attamanatā hoti somanassaṃ ‘āsanne no bhagavā bhavissatī’ti.
‘‘যদা পন মযং ভন্তে ভগৰন্তং সুণোম ‘সাৰত্থিযং ৰিহরতি জেতৰনে অনাথপিণ্ডিকস্স আরামে’তি হোতি অনপ্পকা নো তস্মিং সমযে অত্তমনতা, হোতি অনপ্পকং সোমনস্সং ‘আসন্নে নো ভগৰা’’’তি।
‘‘Yadā pana mayaṃ bhante bhagavantaṃ suṇoma ‘sāvatthiyaṃ viharati jetavane anāthapiṇḍikassa ārāme’ti hoti anappakā no tasmiṃ samaye attamanatā, hoti anappakaṃ somanassaṃ ‘āsanne no bhagavā’’’ti.
‘‘তস্মাতিহ, থপতযো, সম্বাধো ঘরাৰাসো রজাপথো, অব্ভোকাসো পব্বজ্জা, অলঞ্চ পন ৰো, থপতযো, অপ্পমাদাযা’’তি। ‘‘অত্থি খো নো, ভন্তে, এতম্হা সম্বাধা অঞ্ঞো সম্বাধো সম্বাধতরো চেৰ সম্বাধসঙ্খাততরো চা’’তি? ‘‘কতমো পন ৰো, থপতযো, এতম্হা সম্বাধা অঞ্ঞো সম্বাধো সম্বাধতরো চেৰ সম্বাধসঙ্খাততরো চা’’তি?
‘‘Tasmātiha, thapatayo, sambādho gharāvāso rajāpatho, abbhokāso pabbajjā, alañca pana vo, thapatayo, appamādāyā’’ti. ‘‘Atthi kho no, bhante, etamhā sambādhā añño sambādho sambādhataro ceva sambādhasaṅkhātataro cā’’ti? ‘‘Katamo pana vo, thapatayo, etamhā sambādhā añño sambādho sambādhataro ceva sambādhasaṅkhātataro cā’’ti?
‘‘ইধ মযং, ভন্তে, যদা রাজা পসেনদি কোসলো উয্যানভূমিং নিয্যাতুকামো 67 হোতি, যে তে রঞ্ঞো পসেনদিস্স কোসলস্স নাগা ওপৰয্হা, তে কপ্পেত্ৰা যা তা রঞ্ঞো পসেনদিস্স কোসলস্স পজাপতিযো পিযা মনাপা, তা 68 একং পুরতো একং পচ্ছতো নিসীদাপেম, তাসং খো পন, ভন্তে, ভগিনীনং এৰরূপো গন্ধো হোতি। সেয্যথাপি নাম গন্ধকরণ্ডকস্স তাৰদেৰ ৰিৰরিযমানস্স, যথা তং রাজকঞ্ঞানং 69 গন্ধেন ৰিভূসিতানং। তাসং খো পন, ভন্তে, ভগিনীনং এৰরূপো কাযসম্ফস্সো হোতি, সেয্যথাপি নাম তূলপিচুনো ৰা কপ্পাহপিচুনো ৰা, যথা তং রাজকঞ্ঞানং সুখেধিতানং। তস্মিং খো পন, ভন্তে, সমযে নাগোপি রক্খিতব্বো হোতি। তাপি ভগিনিযো রক্খিতব্বা হোতি। অত্তাপি রক্খিতব্বা হোতি। ন খো পন মযং, ভন্তে, অভিজানাম তাসু ভগীনিসু পাপকং চিত্তং ঞপ্পাদেন্তা, অযং খো নো, ভন্তে, এতম্হা সম্বাধা অঞ্ঞো সম্বাধো সম্বাধতরো চেৰ সম্বাধসঙ্ঘাততরো চাতি।
‘‘Idha mayaṃ, bhante, yadā rājā pasenadi kosalo uyyānabhūmiṃ niyyātukāmo 70 hoti, ye te rañño pasenadissa kosalassa nāgā opavayhā, te kappetvā yā tā rañño pasenadissa kosalassa pajāpatiyo piyā manāpā, tā 71 ekaṃ purato ekaṃ pacchato nisīdāpema, tāsaṃ kho pana, bhante, bhaginīnaṃ evarūpo gandho hoti. Seyyathāpi nāma gandhakaraṇḍakassa tāvadeva vivariyamānassa, yathā taṃ rājakaññānaṃ 72 gandhena vibhūsitānaṃ. Tāsaṃ kho pana, bhante, bhaginīnaṃ evarūpo kāyasamphasso hoti, seyyathāpi nāma tūlapicuno vā kappāhapicuno vā, yathā taṃ rājakaññānaṃ sukhedhitānaṃ. Tasmiṃ kho pana, bhante, samaye nāgopi rakkhitabbo hoti. Tāpi bhaginiyo rakkhitabbā hoti. Attāpi rakkhitabbā hoti. Na kho pana mayaṃ, bhante, abhijānāma tāsu bhagīnisu pāpakaṃ cittaṃ ñappādentā, ayaṃ kho no, bhante, etamhā sambādhā añño sambādho sambādhataro ceva sambādhasaṅghātataro cāti.
‘‘তস্মাতিহ , থপতযো, সম্বাধো ঘরাৰাসো রজাপথো, অব্ভোকাসো পব্বজ্জা। অলঞ্চ পন ৰো, থপতযো, অপ্পমাদায। চতূহি খো থপতযো, ধম্মেহি সমন্নাগতো অরিযসাৰকো সোতাপন্নো হোতি অৰিনিপাতধম্মো নিযতো সম্বোধিপরাযণো।
‘‘Tasmātiha , thapatayo, sambādho gharāvāso rajāpatho, abbhokāso pabbajjā. Alañca pana vo, thapatayo, appamādāya. Catūhi kho thapatayo, dhammehi samannāgato ariyasāvako sotāpanno hoti avinipātadhammo niyato sambodhiparāyaṇo.
‘‘কতমেহি চতূহি? ইধ, থপতযো, সুতৰা অরিযসাৰকো বুদ্ধে অৰেচ্চপ্পসাদেন সমন্নাগতো হোতি ইতিপি সো ভগৰা অরহং…পে॰… বুদ্ধো ভগৰাতি, ধম্মে…পে॰… সঙ্ঘে…পে॰… ৰিগতমলমচ্ছেরেন চেতসা অগারং অজ্ঝাৰসতি, মুত্তচাগো পযতপাণি ৰোস্সগ্গরতো যাচযোগো দানসংৰিভাগরতো অপ্পটিৰিভত্তং। ইমেহি খো, থপতযো, চতূহি ধম্মেহি সমন্নাগতো অরিযসাৰকো সোতাপন্নো হোতি অৰিনিপাতধম্মো নিযতো সম্বোধিপরাযণো।
‘‘Katamehi catūhi? Idha, thapatayo, sutavā ariyasāvako buddhe aveccappasādena samannāgato hoti itipi so bhagavā arahaṃ…pe… buddho bhagavāti, dhamme…pe… saṅghe…pe… vigatamalamaccherena cetasā agāraṃ ajjhāvasati, muttacāgo payatapāṇi vossaggarato yācayogo dānasaṃvibhāgarato appaṭivibhattaṃ. Imehi kho, thapatayo, catūhi dhammehi samannāgato ariyasāvako sotāpanno hoti avinipātadhammo niyato sambodhiparāyaṇo.
‘‘তুম্হে খো, থপতযো, বুদ্ধে অৰেচ্চপ্পসাদেন সমন্নাগতা ইতিপি সো ভগৰা অরহং…পে॰… বুদ্ধো ভগৰাতি, ধম্মে…পে॰… সঙ্ঘে…পে॰… যং খো পন কিঞ্চি কুলে দেয্যধম্মং, সব্বং তং অপ্পটিৰিভত্তং সীলৰন্তেহি কল্যাণধম্মেহি, তং কিং মঞ্ঞথ, থপতযো, কতিৰিধা তে কোসলেসু মনুস্সা যে তুম্হাকং সমসমা যদিদং দানসংৰিভাগেহী’’তি? ‘‘লাভা নো, ভন্তে, সুলদ্ধং নো, ভন্তে, যেসং নো ভগৰা এৰং পজানাতী’’তি।
‘‘Tumhe kho, thapatayo, buddhe aveccappasādena samannāgatā itipi so bhagavā arahaṃ…pe… buddho bhagavāti, dhamme…pe… saṅghe…pe… yaṃ kho pana kiñci kule deyyadhammaṃ, sabbaṃ taṃ appaṭivibhattaṃ sīlavantehi kalyāṇadhammehi, taṃ kiṃ maññatha, thapatayo, katividhā te kosalesu manussā ye tumhākaṃ samasamā yadidaṃ dānasaṃvibhāgehī’’ti? ‘‘Lābhā no, bhante, suladdhaṃ no, bhante, yesaṃ no bhagavā evaṃ pajānātī’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
৯৫.
95.
দেৰে চেৰ মনুস্সে চ, সেসেন পরিনিব্বুতো’’তি॥
Deve ceva manusse ca, sesena parinibbuto’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘অস্সত্থে হরিতোভাসে, সংৰিরূল়্হম্হি পাদপে।
‘‘Assatthe haritobhāse, saṃvirūḷhamhi pādape;
‘‘অজ্জ তিংসং ততো কপ্পা, নাভিজানামি দুগ্গতিং।
‘‘Ajja tiṃsaṃ tato kappā, nābhijānāmi duggatiṃ;
তিস্সো ৰিজ্জা সচ্ছিকতা, তস্সা সঞ্ঞায ৰাসনা’’তি॥
Tisso vijjā sacchikatā, tassā saññāya vāsanā’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘পিণ্ডায কোসলং পুরং, পাৰিসি অগ্গপুগ্গলো।
‘‘Piṇḍāya kosalaṃ puraṃ, pāvisi aggapuggalo;
অনুকম্পকো পুরেভত্তং, তণ্হানিঘাতকো মুনি॥
Anukampako purebhattaṃ, taṇhānighātako muni.
‘‘পুরিসস্স ৰটংসকো হত্থে, সব্বপুপ্ফেহিলঙ্কতো।
‘‘Purisassa vaṭaṃsako hatthe, sabbapupphehilaṅkato;
সো অদ্দসাসি সম্বুদ্ধং, ভিক্খুসঙ্ঘপুরক্খতং॥
So addasāsi sambuddhaṃ, bhikkhusaṅghapurakkhataṃ.
‘‘পৰিসন্তং রাজমগ্গেন, দেৰমানুসপূজিতং।
‘‘Pavisantaṃ rājamaggena, devamānusapūjitaṃ;
হট্ঠো চিত্তং পসাদেত্ৰা, সম্বুদ্ধমুপসঙ্কমি॥
Haṭṭho cittaṃ pasādetvā, sambuddhamupasaṅkami.
‘‘সো তং ৰটংসকং সুরভিং, ৰণ্ণৰন্তং মনোরমং।
‘‘So taṃ vaṭaṃsakaṃ surabhiṃ, vaṇṇavantaṃ manoramaṃ;
সম্বুদ্ধস্সুপনামেসি, পসন্নো সেহি পাণিভি॥
Sambuddhassupanāmesi, pasanno sehi pāṇibhi.
‘‘ততো অগ্গিসিখা ৰণ্ণা, বুদ্ধস্স লপনন্তরা।
‘‘Tato aggisikhā vaṇṇā, buddhassa lapanantarā;
সহস্সরংসি ৰিজ্জুরিৰ, ওক্কা নিক্খমি আননা॥
Sahassaraṃsi vijjuriva, okkā nikkhami ānanā.
‘‘পদক্খিণং করিত্ৰান, সীসে আদিচ্চবন্ধুনো।
‘‘Padakkhiṇaṃ karitvāna, sīse ādiccabandhuno;
তিক্খত্তুং পরিৰট্টেত্ৰা, মুদ্ধনন্তরধাযথ॥
Tikkhattuṃ parivaṭṭetvā, muddhanantaradhāyatha.
‘‘ইদং দিস্ৰা অচ্ছরিযং, অব্ভুতং লোমহংসনং।
‘‘Idaṃ disvā acchariyaṃ, abbhutaṃ lomahaṃsanaṃ;
একংসং চীৰরং কত্ৰা, আনন্দো এতদব্রৰি॥
Ekaṃsaṃ cīvaraṃ katvā, ānando etadabravi.
‘‘‘কো হেতু সিতকম্মস্স, ব্যাকরোহি মহামুনে।
‘‘‘Ko hetu sitakammassa, byākarohi mahāmune;
ধম্মালোকো ভৰিস্সতি, কঙ্খং ৰিতর নো মুনে॥
Dhammāloko bhavissati, kaṅkhaṃ vitara no mune.
‘‘‘যস্স তং সব্বধম্মেসু, সদা ঞাণং পৰত্ততি।
‘‘‘Yassa taṃ sabbadhammesu, sadā ñāṇaṃ pavattati;
কঙ্খিং ৰেমতিকং থেরং, আনন্দং এতদব্রৰি॥
Kaṅkhiṃ vematikaṃ theraṃ, ānandaṃ etadabravi.
‘‘‘যো সো আনন্দ পুরিসো, মযি চিত্তং পসাদযি।
‘‘‘Yo so ānanda puriso, mayi cittaṃ pasādayi;
চতুরাসীতিকপ্পানি, দুগ্গতিং ন গমিস্সতি॥
Caturāsītikappāni, duggatiṃ na gamissati.
‘‘‘দেৰেসু দেৰসোভগ্গং, দিব্বং রজ্জং পসাসিয।
‘‘‘Devesu devasobhaggaṃ, dibbaṃ rajjaṃ pasāsiya;
মনুজেসু মনুজিন্দো, রাজা রট্ঠে ভৰিস্সতি॥
Manujesu manujindo, rājā raṭṭhe bhavissati.
‘‘‘সো চরিমং পব্বজিত্ৰা, সচ্ছিকত্ৰান 79 ধম্মতং।
‘‘‘So carimaṃ pabbajitvā, sacchikatvāna 80 dhammataṃ;
পচ্চেকবুদ্ধো ধুতরাগো, ৰটংসকো নাম ভৰিস্সতি॥
Paccekabuddho dhutarāgo, vaṭaṃsako nāma bhavissati.
‘‘‘নত্থি চিত্তে 81 পসন্নম্হি, অপ্পকা নাম দক্খিণা।
‘‘‘Natthi citte 82 pasannamhi, appakā nāma dakkhiṇā;
তথাগতে ৰা সম্বুদ্ধে, অথ ৰা তস্স সাৰকে॥
Tathāgate vā sambuddhe, atha vā tassa sāvake.
‘‘‘এৰং অচিন্তিযা 83 বুদ্ধা, বুদ্ধধম্মা অচিন্তিযা।
‘‘‘Evaṃ acintiyā 84 buddhā, buddhadhammā acintiyā;
অচিন্তিযে পসন্নানং, ৰিপাকো হোতি অচিন্তিযো’’’তি॥
Acintiye pasannānaṃ, vipāko hoti acintiyo’’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
৯৬. ‘‘ইধাহং, ভিক্খৰে, একচ্চং পুগ্গলং পসন্নচিত্তং এৰং চেতসা চেতো পরিচ্চ পজানামি ‘‘(যথা খো অযং পুগ্গলো ইরিযতি, যঞ্চ পটিপদং পটিপন্নো, যঞ্চ মগ্গং সমারূল়্হো) 85। ইমম্হি চাযং সমযে কালং করেয্য, যথাভতং নিক্খিত্তো এৰং সগ্গে। তং কিস্স হেতু? চিত্তং হিস্স, ভিক্খৰে, পসন্নং, চেতোপসাদহেতু 86 খো পন এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তী’’তি। এতমত্থং ভগৰা অৰোচ, তত্থেতং ইতি ৰুচ্চতি –
96. ‘‘Idhāhaṃ, bhikkhave, ekaccaṃ puggalaṃ pasannacittaṃ evaṃ cetasā ceto paricca pajānāmi ‘‘(yathā kho ayaṃ puggalo iriyati, yañca paṭipadaṃ paṭipanno, yañca maggaṃ samārūḷho) 87. Imamhi cāyaṃ samaye kālaṃ kareyya, yathābhataṃ nikkhitto evaṃ sagge. Taṃ kissa hetu? Cittaṃ hissa, bhikkhave, pasannaṃ, cetopasādahetu 88 kho pana evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti. Etamatthaṃ bhagavā avoca, tatthetaṃ iti vuccati –
‘‘পসন্নচিত্তং ঞত্ৰান, একচ্চং ইধ পুগ্গলং।
‘‘Pasannacittaṃ ñatvāna, ekaccaṃ idha puggalaṃ;
‘‘ইমম্হি চাযং সমযে, কালং কযিরাথ পুগ্গলো।
‘‘Imamhi cāyaṃ samaye, kālaṃ kayirātha puggalo;
সগ্গম্হি উপপজ্জেয্য, চিত্তং হিস্স পসাদিতং॥
Saggamhi upapajjeyya, cittaṃ hissa pasāditaṃ.
‘‘চেতোপসাদহেতু হি, সত্তা গচ্ছন্তি সুগ্গতিং।
‘‘Cetopasādahetu hi, sattā gacchanti suggatiṃ;
যথাভতং নিক্খিপেয্য, এৰমেৰং তথাৰিধো।
Yathābhataṃ nikkhipeyya, evamevaṃ tathāvidho;
কাযস্স ভেদা সপ্পঞ্ঞো, সগ্গং সো উপপজ্জতী’’তি॥
Kāyassa bhedā sappañño, saggaṃ so upapajjatī’’ti.
‘‘অযম্পি অত্থো ৰুত্তো ভগৰতা ইতি মে সুত’’ন্তি।
‘‘Ayampi attho vutto bhagavatā iti me suta’’nti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘সুৰণ্ণচ্ছদনং নাৰং, নারি আরুয্হ তিট্ঠসি।
‘‘Suvaṇṇacchadanaṃ nāvaṃ, nāri āruyha tiṭṭhasi;
‘‘কেন তে তাদিসো ৰণ্ণো, আনুভাৰো জুতি চ তে।
‘‘Kena te tādiso vaṇṇo, ānubhāvo juti ca te;
উপ্পজ্জন্তি চ তে ভোগা, যে কেচি মনসিচ্ছিতা॥
Uppajjanti ca te bhogā, ye keci manasicchitā.
‘‘পুচ্ছিতা দেৰতে সংস, কিস্স কম্মস্সিদং ফলং।
‘‘Pucchitā devate saṃsa, kissa kammassidaṃ phalaṃ;
সা দেৰতা অত্তমনা, দেৰরাজেন পুচ্ছিতা॥
Sā devatā attamanā, devarājena pucchitā.
‘‘পঞ্হং পুট্ঠা ৰিযাকাসি, সক্কস্স ইতি মে সুতং।
‘‘Pañhaṃ puṭṭhā viyākāsi, sakkassa iti me sutaṃ;
অদ্ধানং পটিপন্নাহং, দিস্ৰা থূপং মনোরমং॥
Addhānaṃ paṭipannāhaṃ, disvā thūpaṃ manoramaṃ.
‘‘তত্থ চিত্তং পসাদেসিং, কস্সপস্স যসস্সিনো।
‘‘Tattha cittaṃ pasādesiṃ, kassapassa yasassino;
পদ্ধপুপ্ফেহি পূজেসিং, পসন্না সেহি তস্সেৰ।
Paddhapupphehi pūjesiṃ, pasannā sehi tasseva;
কম্মস্স ফলং ৰিপাকো, এতাদিসং কতপুঞ্ঞা লভন্তী’’তি॥
Kammassa phalaṃ vipāko, etādisaṃ katapuññā labhantī’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘দানকথা সীলকথা সগ্গকথা পুঞ্ঞকথা পুঞ্ঞৰিপাককথা’’তি।
‘‘Dānakathā sīlakathā saggakathā puññakathā puññavipākakathā’’ti;
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘অপিচাপি পংসুথূপেসু উদ্দিস্সকতেসু দসবলধরানং তত্থপি কারং কত্ৰা সগ্গেসু নরা পমোদন্তী’’তি।
‘‘Apicāpi paṃsuthūpesu uddissakatesu dasabaladharānaṃ tatthapi kāraṃ katvā saggesu narā pamodantī’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
৯৭.
97.
‘‘দেৰপুত্তসরীরৰণ্ণা, সব্বে সুভগসণ্ঠিতী।
‘‘Devaputtasarīravaṇṇā, sabbe subhagasaṇṭhitī.
উদকেন পংসুং তেমেত্ৰা, থূপং ৰড্ঢেথ কস্সপং॥
Udakena paṃsuṃ temetvā, thūpaṃ vaḍḍhetha kassapaṃ.
‘‘অযং সুগত্তে সুগতস্স থূপো, মহেসিনো দসবলধম্মধারিনো।
‘‘Ayaṃ sugatte sugatassa thūpo, mahesino dasabaladhammadhārino;
তস্মিং 93 ইমে দেৰমনুজা পসন্না, কারং করোন্তা জরামরণা পমুচ্চরে’’তি॥
Tasmiṃ 94 ime devamanujā pasannā, kāraṃ karontā jarāmaraṇā pamuccare’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘উল়ারং ৰত তং আসি, যাহং থূপং মহেসিনো।
‘‘Uḷāraṃ vata taṃ āsi, yāhaṃ thūpaṃ mahesino;
উপ্পলানি চ চত্তারি, মালঞ্চ অভিরোপযিং॥
Uppalāni ca cattāri, mālañca abhiropayiṃ.
‘‘অজ্জ তিংসং ততো কপ্পা, নাভিজানামি দুগ্গতিং।
‘‘Ajja tiṃsaṃ tato kappā, nābhijānāmi duggatiṃ;
ৰিনিপাতং ন গচ্ছামি, থূপং পূজেত্ৰ 95 সত্থুনো’’তি॥
Vinipātaṃ na gacchāmi, thūpaṃ pūjetva 96 satthuno’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘বাত্তিংসলক্খণধরস্স, ৰিজিতৰিজযস্স লোকনাথস্স।
‘‘Bāttiṃsalakkhaṇadharassa, vijitavijayassa lokanāthassa;
সতসহস্সং কপ্পে, মুদিতো থূপং অপূজেসি॥
Satasahassaṃ kappe, mudito thūpaṃ apūjesi.
‘‘যং মযা পসুতং পুঞ্ঞং, তেন চ পুঞ্ঞেন দেৰ সোভগ্গং।
‘‘Yaṃ mayā pasutaṃ puññaṃ, tena ca puññena deva sobhaggaṃ;
রজ্জানি চ কারিতানি, অনাগন্তুন ৰিনিপাতং॥
Rajjāni ca kāritāni, anāgantuna vinipātaṃ.
‘‘যং চক্খু অদন্তদমকস্স, সাসনে পণিহিতং তথা।
‘‘Yaṃ cakkhu adantadamakassa, sāsane paṇihitaṃ tathā;
চিত্তং তং মে সব্বং, লদ্ধং ৰিমুত্তচিত্তম্হি ৰিধূতলতো’’তি॥
Cittaṃ taṃ me sabbaṃ, laddhaṃ vimuttacittamhi vidhūtalato’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
৯৮.
98.
‘‘সামাকপত্থোদনমত্তমেৰ হি, পচ্চেকবুদ্ধম্হি অদাসি দক্খিণং।
‘‘Sāmākapatthodanamattameva hi, paccekabuddhamhi adāsi dakkhiṇaṃ.
ৰিমুত্তচিত্তে অখিলে অনাসৰে, অরণৰিহারিম্হি অসঙ্গমানসে॥
Vimuttacitte akhile anāsave, araṇavihārimhi asaṅgamānase.
‘‘তস্মিঞ্চ ওকপ্পযি ধম্মমুত্তমং, তস্মিঞ্চ ধম্মে পণিধেসিং মানসং।
‘‘Tasmiñca okappayi dhammamuttamaṃ, tasmiñca dhamme paṇidhesiṃ mānasaṃ;
এৰং ৰিহারীহি মে সঙ্গমো সিযা, ভৰে কুদাসুপি চ মা অপেক্খৰা॥
Evaṃ vihārīhi me saṅgamo siyā, bhave kudāsupi ca mā apekkhavā.
‘‘তস্সেৰ কম্মস্স ৰিপাকতো অহং, সহস্সক্খত্তুং কুরুসূপপজ্জথ 97।
‘‘Tasseva kammassa vipākato ahaṃ, sahassakkhattuṃ kurusūpapajjatha 98;
দীঘাযুকেসু অমমেসু পাণিসু, ৰিসেসগামীসু অহীনগামিসু॥
Dīghāyukesu amamesu pāṇisu, visesagāmīsu ahīnagāmisu.
‘‘তস্সেৰ কম্মস্স ৰিপাকতো অহং, সহস্সক্খত্তুং তিদসোপপজ্জথ।
‘‘Tasseva kammassa vipākato ahaṃ, sahassakkhattuṃ tidasopapajjatha;
ৰিচিত্রমালাভরণানুলেপিসু, ৰিসিট্ঠকাযূপগতো যসস্সিসু॥
Vicitramālābharaṇānulepisu, visiṭṭhakāyūpagato yasassisu.
‘‘তস্সেৰ কম্মস্স ৰিপাকতো অহং, ৰিমুত্তচিত্তো অখিলো অনাসৰো।
‘‘Tasseva kammassa vipākato ahaṃ, vimuttacitto akhilo anāsavo;
ইমেহি মে অন্তিমদেহধারিভি, সমাগমো আসিহি তাহি তাসিহি॥
Imehi me antimadehadhāribhi, samāgamo āsihi tāhi tāsihi.
‘‘পচ্চক্খং খ্ৰিমং অৰচ তথাগতো জিনো, সমিজ্ঝতে সীলৰতো যদিচ্ছতি।
‘‘Paccakkhaṃ khvimaṃ avaca tathāgato jino, samijjhate sīlavato yadicchati;
যথা যথা মে মনসা ৰিচিন্তিতং, তথা সমিদ্ধং অযমন্তিমো ভৰো’’তি॥
Yathā yathā me manasā vicintitaṃ, tathā samiddhaṃ ayamantimo bhavo’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘একতিংসম্হি কপ্পম্হি জিনো অনেজো, অনন্তদস্সী ভগৰা সিখীতি।
‘‘Ekatiṃsamhi kappamhi jino anejo, anantadassī bhagavā sikhīti;
তস্সাপি রাজা ভাতা সিখিদ্ধে 99, বুদ্ধে চ ধম্মে চ অভিপ্পসন্নো॥
Tassāpi rājā bhātā sikhiddhe 100, buddhe ca dhamme ca abhippasanno.
‘‘পরিনিব্বুতে লোকৰিনাযকম্হি, থূপং সকাসি ৰিপুলং মহন্তং।
‘‘Parinibbute lokavināyakamhi, thūpaṃ sakāsi vipulaṃ mahantaṃ;
সমন্ততো গাৰুতিকং মহেসিনো, দেৰাতিদেৰস্স নরুত্তমস্স॥
Samantato gāvutikaṃ mahesino, devātidevassa naruttamassa.
‘‘তস্মিং মনুস্সো বলিমাভিহারী, পগ্গয্হ জাতিসুমনং পহট্ঠো।
‘‘Tasmiṃ manusso balimābhihārī, paggayha jātisumanaṃ pahaṭṭho;
ৰাতেন পুপ্ফং পতিতস্স একং, তাহং গহেত্ৰান তস্সেৰ দাসি॥
Vātena pupphaṃ patitassa ekaṃ, tāhaṃ gahetvāna tasseva dāsi.
‘‘সো মং অৰোচাভিপসন্নচিত্তো, তুয্হমেৰ এতং পুপ্ফং দদামি।
‘‘So maṃ avocābhipasannacitto, tuyhameva etaṃ pupphaṃ dadāmi;
তাহং গহেত্ৰা অভিরোপযেসিং, পুনপ্পুনং বুদ্ধমনুস্সরন্তো॥
Tāhaṃ gahetvā abhiropayesiṃ, punappunaṃ buddhamanussaranto.
‘‘অজ্জ তিংসং ততো কপ্পা, নাভিজানামি দুগ্গতিং।
‘‘Ajja tiṃsaṃ tato kappā, nābhijānāmi duggatiṃ;
ৰিনিপাতঞ্চ ন গচ্ছামি, থূপপূজাযিদং ফল’’ন্তি॥
Vinipātañca na gacchāmi, thūpapūjāyidaṃ phala’’nti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
‘‘কপিলং নাম নগরং, সুৰিভত্তং মহাপথং।
‘‘Kapilaṃ nāma nagaraṃ, suvibhattaṃ mahāpathaṃ;
আকিণ্ণমিদ্ধং ফীতঞ্চ, ব্রহ্মদত্তস্স রাজিনো॥
Ākiṇṇamiddhaṃ phītañca, brahmadattassa rājino.
‘‘কুম্মাসং ৰিক্কিণিং তত্থ, পঞ্চালানং পুরুত্তমে।
‘‘Kummāsaṃ vikkiṇiṃ tattha, pañcālānaṃ puruttame;
সোহং অদ্দসিং সম্বুদ্ধং, উপরিট্ঠং যসস্সিনং॥
Sohaṃ addasiṃ sambuddhaṃ, upariṭṭhaṃ yasassinaṃ.
‘‘হট্ঠো চিত্তং পসাদেত্ৰা, নিমন্তেসিং নরুত্তমং।
‘‘Haṭṭho cittaṃ pasādetvā, nimantesiṃ naruttamaṃ;
অরিট্ঠং ধুৰভত্তেন, যং মে গেহম্হি ৰিজ্জথ॥
Ariṭṭhaṃ dhuvabhattena, yaṃ me gehamhi vijjatha.
নৰং দুস্সযুগং গয্হ, অরিট্ঠস্সোপনামযিং॥
Navaṃ dussayugaṃ gayha, ariṭṭhassopanāmayiṃ.
‘‘পসন্নচিত্তং ঞত্ৰান, পটিগ্গণ্হি নরুত্তমো।
‘‘Pasannacittaṃ ñatvāna, paṭiggaṇhi naruttamo;
অনুকম্পকো কারুণিকো, তণ্হানিঘাতকো মুনি॥
Anukampako kāruṇiko, taṇhānighātako muni.
‘‘তাহং কম্মং করিত্ৰান, কল্যাণং বুদ্ধৰণ্ণিতং।
‘‘Tāhaṃ kammaṃ karitvāna, kalyāṇaṃ buddhavaṇṇitaṃ;
দেৰে চেৰ মনুস্সে চ, সন্ধাৰিত্ৰা ততো চুতো॥
Deve ceva manusse ca, sandhāvitvā tato cuto.
‘‘বারাণসিযং নগরে, সেট্ঠিস্স একপুত্তকো।
‘‘Bārāṇasiyaṃ nagare, seṭṭhissa ekaputtako;
অড্ঢে কুলস্মিং উপ্পজ্জিং, পাণেহি চ পিযতরো॥
Aḍḍhe kulasmiṃ uppajjiṃ, pāṇehi ca piyataro.
‘‘ততো চ ৰিঞ্ঞুতং পত্তো, দেৰপুত্তেন চোদিতো।
‘‘Tato ca viññutaṃ patto, devaputtena codito;
পাসাদা ওরূহিত্ৰান, সম্বুদ্ধমুপসঙ্কমিং॥
Pāsādā orūhitvāna, sambuddhamupasaṅkamiṃ.
‘‘সো মে ধম্মমদেসযি, অনুকম্পায গোতমো।
‘‘So me dhammamadesayi, anukampāya gotamo;
দুক্খং দুক্খসমুপ্পাদং, দুক্খস্স চ অতিক্কমং॥
Dukkhaṃ dukkhasamuppādaṃ, dukkhassa ca atikkamaṃ.
‘‘অরিযং অট্ঠঙ্গিকং মগ্গং, দুক্খূপসমগামিনং।
‘‘Ariyaṃ aṭṭhaṅgikaṃ maggaṃ, dukkhūpasamagāminaṃ;
চত্তারি অরিযসচ্চানি, মুনি ধম্মমদেসযি॥
Cattāri ariyasaccāni, muni dhammamadesayi.
‘‘তস্সাহং ৰচনং সুত্ৰা, ৰিহরিং সাসনে রতো।
‘‘Tassāhaṃ vacanaṃ sutvā, vihariṃ sāsane rato;
সমথং পটিৰিজ্ঝাহং, রত্তিন্দিৰমতন্দিতো॥
Samathaṃ paṭivijjhāhaṃ, rattindivamatandito.
‘‘অজ্ঝত্তঞ্চ বহিদ্ধা চ, যে মে ৰিজ্জিংসু 103 আসৰা।
‘‘Ajjhattañca bahiddhā ca, ye me vijjiṃsu 104 āsavā;
সব্বে আসুং সমুচ্ছিন্না, ন চ উপ্পজ্জরে পুন॥
Sabbe āsuṃ samucchinnā, na ca uppajjare puna.
‘‘পরিযন্তকতং দুক্খং, চরিমোযং সমুস্সযো।
‘‘Pariyantakataṃ dukkhaṃ, carimoyaṃ samussayo;
জাতিমরণসংসারো, নত্থিদানি পুনব্ভৰো’’তি॥
Jātimaraṇasaṃsāro, natthidāni punabbhavo’’ti.
ইদং ৰাসনাভাগিযং সুত্তং।
Idaṃ vāsanābhāgiyaṃ suttaṃ.
৯৯. তত্থ কতমং নিব্বেধভাগিযং সুত্তং?
99. Tattha katamaṃ nibbedhabhāgiyaṃ suttaṃ?
‘‘উদ্ধং অধো সব্বধি ৰিপ্পমুত্তো, অযং অহস্মীতি 105 অনানুপস্সী।
‘‘Uddhaṃ adho sabbadhi vippamutto, ayaṃ ahasmīti 106 anānupassī;
এৰং ৰিমুত্তো উদতারি ওঘং, অতিণ্ণপুব্বং অপুনব্ভৰাযা’’তি॥
Evaṃ vimutto udatāri oghaṃ, atiṇṇapubbaṃ apunabbhavāyā’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘সীলৰতো , আনন্দ, ন চেতনা 107 করণীযা ‘কিন্তি মে অৰিপ্পটিসারো জাযেয্যা’তি। ধম্মতা এসা, আনন্দ, যং সীলৰতো অৰিপ্পটিসারো জাযেয্য। অৰিপ্পটিসারিনা, আনন্দ, ন চেতনা করণীযা ‘কিন্তি মে পামোজ্জং জাযেয্যা’তি। ধম্মতা এসা, আনন্দ, যং অৰিপ্পটিসারিনো পামোজ্জং জাযেয্য। পমুদিতেন, আনন্দ, ন চেতনা করণীযা ‘কিন্তি মে পীতি জাযেয্যা’তি। ধম্মতা এসা, আনন্দ, যং পমুদিতস্স পীতি জাযেয্য। পীতিমনস্স, আনন্দ, ন চেতনা করণীযা ‘কিন্তি মে কাযো পস্সম্ভেয্যা’তি। ধম্মতা এসা, আনন্দ, যং পীতিমনস্স কাযো পস্সম্ভেয্য। পস্সদ্ধকাযস্স আনন্দ, ন চেতনা করণীযা ‘কিন্তাহং সুখং ৰেদিযেয্য’ন্তি। ধম্মতা এসা, আনন্দ, যং পস্সদ্ধকাযো সুখং ৰেদিযেয্য। সুখিনো আনন্দ, ন চেতনা করণীযা ‘কিন্তি মে সমাধি জাযেয্যা’তি। ধম্মতা এসা, আনন্দ, যং সুখিনো সমাধি জাযেয্য। সমাহিতস্স আনন্দ, ন চেতনা করণীযা ‘কিন্তাহং যথাভূতং পজানেয্য’ন্তি। ধম্মতা এসা, আনন্দ, যং সমাহিতো যথাভূতং পজানেয্য। যথাভূতং পজানতা , আনন্দ, ন চেতনা করণীযা ‘কিন্তি মে নিব্বিদা জাযেয্যা’তি। ধম্মতা এসা, আনন্দ, যং যথাভূতং পজানন্তো নিব্বিন্দেয্য। নিব্বিন্দন্তেন, আনন্দ, ন চেতনা করণীযা ‘কিন্তি মে ৰিরাগো জাযেয্যা’তি। ধম্মতা এসা, আনন্দ, যং নিব্বিন্দন্তো ৰিরজ্জেয্য। ৰিরজ্জন্তেন আনন্দ ন চেতনা করণীযা ‘কিন্তি মে ৰিমুত্তি জাযেয্যা’তি। ধম্মতা এসা, আনন্দ, যং ৰিরজ্জন্তো ৰিমুচ্চেয্য। ৰিমুত্তেন, আনন্দ, ন চেতনা করণীযা ‘কিন্তি মে ৰিমুত্তিঞাণদস্সনং উপ্পজ্জেয্যা’তি। ধম্মতা এসা, আনন্দ, যং ৰিমুত্তস্স ৰিমুত্তিঞাণদস্সনং উপ্পজ্জেয্যা’’তি।
‘‘Sīlavato , ānanda, na cetanā 108 karaṇīyā ‘kinti me avippaṭisāro jāyeyyā’ti. Dhammatā esā, ānanda, yaṃ sīlavato avippaṭisāro jāyeyya. Avippaṭisārinā, ānanda, na cetanā karaṇīyā ‘kinti me pāmojjaṃ jāyeyyā’ti. Dhammatā esā, ānanda, yaṃ avippaṭisārino pāmojjaṃ jāyeyya. Pamuditena, ānanda, na cetanā karaṇīyā ‘kinti me pīti jāyeyyā’ti. Dhammatā esā, ānanda, yaṃ pamuditassa pīti jāyeyya. Pītimanassa, ānanda, na cetanā karaṇīyā ‘kinti me kāyo passambheyyā’ti. Dhammatā esā, ānanda, yaṃ pītimanassa kāyo passambheyya. Passaddhakāyassa ānanda, na cetanā karaṇīyā ‘kintāhaṃ sukhaṃ vediyeyya’nti. Dhammatā esā, ānanda, yaṃ passaddhakāyo sukhaṃ vediyeyya. Sukhino ānanda, na cetanā karaṇīyā ‘kinti me samādhi jāyeyyā’ti. Dhammatā esā, ānanda, yaṃ sukhino samādhi jāyeyya. Samāhitassa ānanda, na cetanā karaṇīyā ‘kintāhaṃ yathābhūtaṃ pajāneyya’nti. Dhammatā esā, ānanda, yaṃ samāhito yathābhūtaṃ pajāneyya. Yathābhūtaṃ pajānatā , ānanda, na cetanā karaṇīyā ‘kinti me nibbidā jāyeyyā’ti. Dhammatā esā, ānanda, yaṃ yathābhūtaṃ pajānanto nibbindeyya. Nibbindantena, ānanda, na cetanā karaṇīyā ‘kinti me virāgo jāyeyyā’ti. Dhammatā esā, ānanda, yaṃ nibbindanto virajjeyya. Virajjantena ānanda na cetanā karaṇīyā ‘kinti me vimutti jāyeyyā’ti. Dhammatā esā, ānanda, yaṃ virajjanto vimucceyya. Vimuttena, ānanda, na cetanā karaṇīyā ‘kinti me vimuttiñāṇadassanaṃ uppajjeyyā’ti. Dhammatā esā, ānanda, yaṃ vimuttassa vimuttiñāṇadassanaṃ uppajjeyyā’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
১০০.
100.
‘‘যদা হৰে পাতুভৰন্তি ধম্মা, আতাপিনো ঝাযতো ব্রাহ্মণস্স।
‘‘Yadā have pātubhavanti dhammā, ātāpino jhāyato brāhmaṇassa.
অথস্স কঙ্খা ৰপযন্তি সব্বা, যতো পজানাতি সহেতুধম্ম’’ন্তি॥
Athassa kaṅkhā vapayanti sabbā, yato pajānāti sahetudhamma’’nti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘যদা হৰে পাতুভৰন্তি ধম্মা, আতাপিনো ঝাযতো ব্রাহ্মণস্স।
‘‘Yadā have pātubhavanti dhammā, ātāpino jhāyato brāhmaṇassa;
অথস্স কঙ্খা ৰপযন্তি সব্বা, যতো খযং পচ্চযানং অৰেদী’’তি॥
Athassa kaṅkhā vapayanti sabbā, yato khayaṃ paccayānaṃ avedī’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘কিংনু 109 কুজ্ঝসি মা কুজ্ঝি, অক্কোধো তিস্স তে ৰরং।
‘‘Kiṃnu 110 kujjhasi mā kujjhi, akkodho tissa te varaṃ;
কোধমানমক্খৰিনযত্থং হি, তিস্স ব্রহ্মচরিযং ৰুস্সতী’’তি॥
Kodhamānamakkhavinayatthaṃ hi, tissa brahmacariyaṃ vussatī’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘কদাহং নন্দং পস্সেয্যং, আরঞ্ঞং 111 পংসুকূলিকং।
‘‘Kadāhaṃ nandaṃ passeyyaṃ, āraññaṃ 112 paṃsukūlikaṃ;
অঞ্ঞাতুঞ্ছেন যাপেন্তং, কামেসু অনপেক্খিন’’ন্তি॥
Aññātuñchena yāpentaṃ, kāmesu anapekkhina’’nti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘কিংসু ছেত্ৰা সুখং সেতি, কিংসু ছেত্ৰা ন সোচতি।
‘‘Kiṃsu chetvā sukhaṃ seti, kiṃsu chetvā na socati;
‘‘কোধং ছেত্ৰা সুখং সেতি, কোধং ছেত্ৰা ন সোচতি।
‘‘Kodhaṃ chetvā sukhaṃ seti, kodhaṃ chetvā na socati;
কোধস্স ৰিসমূলস্স, মধুরগ্গস্স ব্রাহ্মণ।
Kodhassa visamūlassa, madhuraggassa brāhmaṇa;
ৰধং অরিযা পসংসন্তি, তং হি ছেত্ৰা ন সোচতী’’তি॥
Vadhaṃ ariyā pasaṃsanti, taṃ hi chetvā na socatī’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘কিংসু হনে উপ্পতিতং, কিংসু জাতং ৰিনোদযে।
‘‘Kiṃsu hane uppatitaṃ, kiṃsu jātaṃ vinodaye;
কিঞ্চস্সু পজহে ধীরো, কিস্সাভিসমযো সুখো॥
Kiñcassu pajahe dhīro, kissābhisamayo sukho.
‘‘কোধং হনে উপ্পতিতং, রাগং জাতং ৰিনোদযে।
‘‘Kodhaṃ hane uppatitaṃ, rāgaṃ jātaṃ vinodaye;
অৰিজ্জং পজহে ধীরো, সচ্চাভিসমযো সুখো’’তি॥
Avijjaṃ pajahe dhīro, saccābhisamayo sukho’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
১০১.
101.
কামরাগপ্পহানায, সতো ভিক্খু পরিব্বজে॥
Kāmarāgappahānāya, sato bhikkhu paribbaje.
‘‘সত্তিযা ৰিয ওমট্ঠো, ডয্হমানোৰ মত্থকে।
‘‘Sattiyā viya omaṭṭho, ḍayhamānova matthake;
সক্কাযদিট্ঠিপ্পহানায, সতো ভিক্খু পরিব্বজে’’তি॥
Sakkāyadiṭṭhippahānāya, sato bhikkhu paribbaje’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘সব্বে খযন্তা নিচযা, পতনন্তা সমুস্সযা।
‘‘Sabbe khayantā nicayā, patanantā samussayā;
সব্বেসং মরণমাগম্ম, সব্বেসং জীৰিতমদ্ধুৰং।
Sabbesaṃ maraṇamāgamma, sabbesaṃ jīvitamaddhuvaṃ;
এতং ভযং মরণে 117 পেক্খমানো, পুঞ্ঞানি কযিরাথ সুখাৰহানি॥
Etaṃ bhayaṃ maraṇe 118 pekkhamāno, puññāni kayirātha sukhāvahāni.
‘‘সব্বে খযন্তা নিচযা, পতনন্তা সমুস্সযা।
‘‘Sabbe khayantā nicayā, patanantā samussayā;
সব্বেসং মরণমাগম্ম, সব্বেসং জীৰিতমদ্ধুৰং।
Sabbesaṃ maraṇamāgamma, sabbesaṃ jīvitamaddhuvaṃ;
এতং ভযং মরণে পেক্খমানো, লোকামিসং পজহে সন্তিপেক্খো’’তি॥
Etaṃ bhayaṃ maraṇe pekkhamāno, lokāmisaṃ pajahe santipekkho’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘সুখং সযন্তি মুনযো, ন তে সোচন্তি মাৰিধ।
‘‘Sukhaṃ sayanti munayo, na te socanti māvidha;
যেসং ঝানরতং চিত্তং, পঞ্ঞৰা সুসমাহিতো।
Yesaṃ jhānarataṃ cittaṃ, paññavā susamāhito;
আরদ্ধৰীরিযো পহিতত্তো, ওঘং তরতি দুত্তরং॥
Āraddhavīriyo pahitatto, oghaṃ tarati duttaraṃ.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘সদ্দহানো অরহতং, ধম্মং নিব্বানপত্তিযা।
‘‘Saddahāno arahataṃ, dhammaṃ nibbānapattiyā;
সুস্সূসং লভতে পঞ্ঞং, অপ্পমত্তো ৰিচক্খণো॥
Sussūsaṃ labhate paññaṃ, appamatto vicakkhaṇo.
পতিরূপকারী ধুরৰা, উট্ঠাতা ৰিন্দতে ধনং।
Patirūpakārī dhuravā, uṭṭhātā vindate dhanaṃ;
সচ্চেন কিত্তিং পপ্পোতি, দদং মিত্তানি গন্থতি।
Saccena kittiṃ pappoti, dadaṃ mittāni ganthati;
অস্মা লোকা পরং লোকং, এৰং 123 পেচ্চ ন সোচতী’’তি॥
Asmā lokā paraṃ lokaṃ, evaṃ 124 pecca na socatī’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘সব্বগন্থপহীনস্স, ৰিপ্পমুত্তস্স তে সতো।
‘‘Sabbaganthapahīnassa, vippamuttassa te sato;
সমণস্স ন তং সাধু, যদঞ্ঞমনুসাসসীতি॥
Samaṇassa na taṃ sādhu, yadaññamanusāsasīti.
‘‘যেন কেনচি ৰণ্ণেন, সংৰাসো সক্ক জাযতি।
‘‘Yena kenaci vaṇṇena, saṃvāso sakka jāyati;
‘‘মনসা চে পসন্নেন, যদঞ্ঞমনুসাসতি।
‘‘Manasā ce pasannena, yadaññamanusāsati;
ন তেন হোতি সংযুত্তো, যানুকম্পা অনুদ্দযা’’তি॥
Na tena hoti saṃyutto, yānukampā anuddayā’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
১০২.
102.
‘‘রাগো চ দোসো চ কুতোনিদানা, অরতী রতী 127 লোমহংসো কুতোজা।
‘‘Rāgo ca doso ca kutonidānā, aratī ratī 128 lomahaṃso kutojā.
কুতো সমুট্ঠায মনোৰিতক্কা, কুমারকা ধঙ্কমিৰোস্সজন্তি॥
Kuto samuṭṭhāya manovitakkā, kumārakā dhaṅkamivossajanti.
‘‘রাগো চ দোসো চ ইতোনিদানা, অরতী রতী লোমহংসো ইতোজা।
‘‘Rāgo ca doso ca itonidānā, aratī ratī lomahaṃso itojā;
ইতো সমুট্ঠায মনোৰিতক্কা, কুমারকা ধঙ্কমিৰোস্সজন্তি॥
Ito samuṭṭhāya manovitakkā, kumārakā dhaṅkamivossajanti.
‘‘স্নেহজা অত্তসম্ভূতা, নিগ্রোধস্সেৰ খন্ধজা।
‘‘Snehajā attasambhūtā, nigrodhasseva khandhajā;
পুথু ৰিসত্তা কামেসু, মালুৰাৰ ৰিততা ৰনে॥
Puthu visattā kāmesu, māluvāva vitatā vane.
‘‘যে নং পজানন্তি যতোনিদানং, তে নং ৰিনোদেন্তি সুণোহি যক্খ।
‘‘Ye naṃ pajānanti yatonidānaṃ, te naṃ vinodenti suṇohi yakkha;
তে দুত্তরং ওঘমিমং তরন্তি, অতিণ্ণপুব্বং অপুনব্ভৰাযা’’তি॥
Te duttaraṃ oghamimaṃ taranti, atiṇṇapubbaṃ apunabbhavāyā’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘দুক্করং ভগৰা সুদুক্করং ভগৰা’’তি।
‘‘Dukkaraṃ bhagavā sudukkaraṃ bhagavā’’ti;
‘‘দুক্করং ৰাপি করোন্তি, [কামদাতি ভগৰা]
‘‘Dukkaraṃ vāpi karonti, [kāmadāti bhagavā]
সেক্খা সীলসমাহিতা।
Sekkhā sīlasamāhitā;
ঠিতত্তা অনগারিযুপেতস্স, তুট্ঠি হোতি সুখাৰহা’’তি॥
Ṭhitattā anagāriyupetassa, tuṭṭhi hoti sukhāvahā’’ti.
‘‘দুল্লভং ৰাপি লভন্তি, [কামদাতি ভগৰা]
‘‘Dullabhaṃ vāpi labhanti, [kāmadāti bhagavā]
চিত্তৰূপসমে রতা।
Cittavūpasame ratā;
যেসং দিৰা চ রত্তো চ, ভাৰনায রতো মনো’’তি॥
Yesaṃ divā ca ratto ca, bhāvanāya rato mano’’ti.
‘‘দুস্সমাদহং ভগৰা যদিদং চিত্ত’’ন্তি।
‘‘Dussamādahaṃ bhagavā yadidaṃ citta’’nti;
‘‘দুস্সমাদহং ৰাপি সমাদহন্তি, [কামদাতি ভগৰা]
‘‘Dussamādahaṃ vāpi samādahanti, [kāmadāti bhagavā]
ইন্দ্রিযূপসমে রতা।
Indriyūpasame ratā;
তে ছেত্ৰা মচ্চুনো জালং, অরিযা গচ্ছন্তি কামদা’’তি॥
Te chetvā maccuno jālaṃ, ariyā gacchanti kāmadā’’ti.
‘‘দুগ্গমো ভগৰা ৰিসমো মগ্গো’’তি।
‘‘Duggamo bhagavā visamo maggo’’ti;
অনরিযা ৰিসমে মগ্গে, পপতন্তি অৰংসিরা।
Anariyā visame magge, papatanti avaṃsirā;
অরিযানং সমো মগ্গো, অরিযা হি ৰিসমে সমা’’তি॥
Ariyānaṃ samo maggo, ariyā hi visame samā’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
১০৩.
103.
আৰুত্থং ধম্মরাজেন, পীতিসঞ্জননং মম॥
Āvutthaṃ dhammarājena, pītisañjananaṃ mama.
‘‘কম্মং ৰিজ্জা চ ধম্মো চ, সীলং জীৰিতমুত্তমং।
‘‘Kammaṃ vijjā ca dhammo ca, sīlaṃ jīvitamuttamaṃ;
এতেন মচ্চা সুজ্ঝন্তি, ন গোত্তেন ধনেন ৰা॥
Etena maccā sujjhanti, na gottena dhanena vā.
‘‘তস্মা হি পণ্ডিতো পোসো, সম্পস্সং অত্থমত্তনো।
‘‘Tasmā hi paṇḍito poso, sampassaṃ atthamattano;
যোনিসো ৰিচিনে ধম্মং, এৰং তত্থ ৰিসুজ্ঝতি॥
Yoniso vicine dhammaṃ, evaṃ tattha visujjhati.
‘‘সারিপুত্তোৰ পঞ্ঞায, সীলেন উপসমেন চ।
‘‘Sāriputtova paññāya, sīlena upasamena ca;
যোপি পারঙ্গতো ভিক্খু, এতাৰপরমো সিযা’’তি॥
Yopi pāraṅgato bhikkhu, etāvaparamo siyā’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘অতীতং নান্ৰাগমেয্য, নপ্পটিকঙ্খে অনাগতং।
‘‘Atītaṃ nānvāgameyya, nappaṭikaṅkhe anāgataṃ;
‘‘পচ্চুপ্পন্নঞ্চ যো ধম্মং, তত্থ তত্থ ৰিপস্সতি।
‘‘Paccuppannañca yo dhammaṃ, tattha tattha vipassati;
অসংহীরং অসংকুপ্পং, তং ৰিদ্ৰা মনুব্রূহযে॥
Asaṃhīraṃ asaṃkuppaṃ, taṃ vidvā manubrūhaye.
ন হি নো সঙ্গরং তেন, মহাসেনেন মচ্চুনা॥
Na hi no saṅgaraṃ tena, mahāsenena maccunā.
‘‘এৰং ৰিহারিং আতাপিং, অহোরত্তমতন্দিতং।
‘‘Evaṃ vihāriṃ ātāpiṃ, ahorattamatanditaṃ;
তং ৰে ‘‘ভদ্দেকরত্তো’’তি, সন্তো আচিক্খতে মুনী’’তি॥
Taṃ ve ‘‘bhaddekaratto’’ti, santo ācikkhate munī’’ti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
‘‘চত্তারিমানি , ভিক্খৰে, সচ্ছিকাতব্বানি। কতমানি চত্তারি? অত্থি, ভিক্খৰে, ধম্মা চক্খুনা পঞ্ঞায চ সচ্ছিকাতব্বা, অত্থি ধম্মা সতিযা পঞ্ঞায চ সচ্ছিকাতব্বা, অত্থি ধম্মা কাযেন পঞ্ঞায চ সচ্ছিকাতব্বা, অত্থি ধম্মা পঞ্ঞায ৰেদিতব্বা, পঞ্ঞায চ সচ্ছিকাতব্বা।
‘‘Cattārimāni , bhikkhave, sacchikātabbāni. Katamāni cattāri? Atthi, bhikkhave, dhammā cakkhunā paññāya ca sacchikātabbā, atthi dhammā satiyā paññāya ca sacchikātabbā, atthi dhammā kāyena paññāya ca sacchikātabbā, atthi dhammā paññāya veditabbā, paññāya ca sacchikātabbā.
‘‘কতমে চ, ভিক্খৰে, ধম্মা চক্খুনা পঞ্ঞায চ সচ্ছিকাতব্বা? দিব্বচক্খু সুৰিসুদ্ধং অতিক্কন্তমানুসকং চক্খুনা পঞ্ঞায চ সচ্ছিকাতব্বং।
‘‘Katame ca, bhikkhave, dhammā cakkhunā paññāya ca sacchikātabbā? Dibbacakkhu suvisuddhaṃ atikkantamānusakaṃ cakkhunā paññāya ca sacchikātabbaṃ.
‘‘কতমে চ, ভিক্খৰে, ধম্মা সতিযা পঞ্ঞায চ সচ্ছিকাতব্বা? পুব্বেনিৰাসানুস্সতি সতিযা পঞ্ঞায চ সচ্ছিকাতব্বা।
‘‘Katame ca, bhikkhave, dhammā satiyā paññāya ca sacchikātabbā? Pubbenivāsānussati satiyā paññāya ca sacchikātabbā.
‘‘কতমে চ, ভিক্খৰে, ধম্মা কাযেন পঞ্ঞায চ সচ্ছিকাতব্বা? ইদ্ধিৰিধা নিরোধা কাযেন পঞ্ঞায চ সচ্ছিকাতব্বা।
‘‘Katame ca, bhikkhave, dhammā kāyena paññāya ca sacchikātabbā? Iddhividhā nirodhā kāyena paññāya ca sacchikātabbā.
‘‘কতমে চ, ভিক্খৰে, ধম্মা পঞ্ঞায ৰেদিতব্বা, পঞ্ঞায সচ্ছিকাতব্বা? আসৰানং খযে ঞাণং পঞ্ঞায ৰেদিতব্বং, পঞ্ঞায চ সচ্ছিকাতব্ব’’ন্তি।
‘‘Katame ca, bhikkhave, dhammā paññāya veditabbā, paññāya sacchikātabbā? Āsavānaṃ khaye ñāṇaṃ paññāya veditabbaṃ, paññāya ca sacchikātabba’’nti.
ইদং নিব্বেধভাগিযং সুত্তং।
Idaṃ nibbedhabhāgiyaṃ suttaṃ.
১০৪. তত্থ কতমং অসেক্খভাগিযং সুত্তং?
104. Tattha katamaṃ asekkhabhāgiyaṃ suttaṃ?
‘‘যস্স সেলূপমং চিত্তং, ঠিতং নানুপকম্পতি।
‘‘Yassa selūpamaṃ cittaṃ, ṭhitaṃ nānupakampati;
ৰিরত্তং রজনীযেসু, কোপনেয্যে ন কুপ্পতি।
Virattaṃ rajanīyesu, kopaneyye na kuppati;
যস্সেৰং ভাৰিতং চিত্তং, কুতো নং 139 দুক্খমেস্সতী’’তি॥
Yassevaṃ bhāvitaṃ cittaṃ, kuto naṃ 140 dukkhamessatī’’ti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
আযস্মতো চ সারিপুত্তস্স চারিকাদসমং ৰেয্যাকরণং কাতব্বন্তি।
Āyasmato ca sāriputtassa cārikādasamaṃ veyyākaraṇaṃ kātabbanti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
‘‘যো ব্রাহ্মণো বাহিতপাপধম্মো, নিহুংহুঙ্কো 141 নিক্কসাৰো যতত্তো।
‘‘Yo brāhmaṇo bāhitapāpadhammo, nihuṃhuṅko 142 nikkasāvo yatatto;
ৰেদন্তগূ ৰূসিতব্রহ্মচরিযো, ধম্মেন সো ব্রহ্মৰাদং ৰদেয্য।
Vedantagū vūsitabrahmacariyo, dhammena so brahmavādaṃ vadeyya;
যস্সুস্সদা নত্থি কুহিঞ্চি লোকে’’তি॥
Yassussadā natthi kuhiñci loke’’ti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
‘‘বাহিত্ৰা পাপকে ধম্মে, যে চরন্তি সদা সতা।
‘‘Bāhitvā pāpake dhamme, ye caranti sadā satā;
খীণসংযোজনা বুদ্ধা, তে ৰে লোকস্মি 143 ব্রাহ্মণা’’তি॥
Khīṇasaṃyojanā buddhā, te ve lokasmi 144 brāhmaṇā’’ti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
‘‘যত্থ আপো চ পথৰী, তেজো ৰাযো ন গাধতি।
‘‘Yattha āpo ca pathavī, tejo vāyo na gādhati;
ন তত্থ সুক্কা জোতন্তি, আদিচ্চো নপ্পকাসতি।
Na tattha sukkā jotanti, ādicco nappakāsati;
ন তত্থ চন্দিমা ভাতি, তমো তত্থ ন ৰিজ্জতি॥
Na tattha candimā bhāti, tamo tattha na vijjati.
অথ রূপা অরূপা চ, সুখদুক্খা পমুচ্চতী’’তি॥
Atha rūpā arūpā ca, sukhadukkhā pamuccatī’’ti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
অথ এতং পিসাচঞ্চ, পক্কুলঞ্চাতিৰত্ততী’’তি॥
Atha etaṃ pisācañca, pakkulañcātivattatī’’ti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
সঙ্গা সঙ্গামজিং মুত্তং, তমহং ব্রূমি ব্রাহ্মণ’’ন্তি॥
Saṅgā saṅgāmajiṃ muttaṃ, tamahaṃ brūmi brāhmaṇa’’nti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
যম্হি সচ্চঞ্চ ধম্মো চ, সো সুচী সো চ ব্রাহ্মণো’’তি॥
Yamhi saccañca dhammo ca, so sucī so ca brāhmaṇo’’ti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
‘‘যদা হৰে পাতুভৰন্তি ধম্মা, আতাপিনো ঝাযতো ব্রাহ্মণস্স।
‘‘Yadā have pātubhavanti dhammā, ātāpino jhāyato brāhmaṇassa;
ৰিধূপযং তিট্ঠতি মারসেনং, সূরিযোৰ ওভাসযমন্তলিক্খ’’ন্তি॥
Vidhūpayaṃ tiṭṭhati mārasenaṃ, sūriyova obhāsayamantalikkha’’nti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
‘‘সন্তিন্দ্রিযং পস্সথ ইরিযমানং, তেৰিজ্জপত্তং অপহানধম্মং।
‘‘Santindriyaṃ passatha iriyamānaṃ, tevijjapattaṃ apahānadhammaṃ;
সব্বানি যোগানি উপাতিৰত্তো, অকিঞ্চনো ইরিযতি পংসুকূলিকো॥
Sabbāni yogāni upātivatto, akiñcano iriyati paṃsukūliko.
‘‘তং দেৰতা সম্বহুলা উল়ারা, ব্রহ্মৰিমানং উপসঙ্কমিত্ৰা।
‘‘Taṃ devatā sambahulā uḷārā, brahmavimānaṃ upasaṅkamitvā;
আজানিযং জাতিবলং নিসেধং, নিধ নমস্সন্তি পসন্নচিত্তা॥
Ājāniyaṃ jātibalaṃ nisedhaṃ, nidha namassanti pasannacittā.
‘‘নমো তে পুরিসাজঞ্ঞ, নমো তে পুরিসুত্তম।
‘‘Namo te purisājañña, namo te purisuttama;
যস্স তে নাভিজানাম, কিং ত্ৰং নিস্সায ঝাযসী’’তি॥
Yassa te nābhijānāma, kiṃ tvaṃ nissāya jhāyasī’’ti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
‘‘সহাযা ৰতিমে ভিক্খূ, চিররত্তং সমেতিকা।
‘‘Sahāyā vatime bhikkhū, cirarattaṃ sametikā;
সমেতি নেসং সদ্ধম্মো, ধম্মে বুদ্ধপ্পৰেদিতে’’॥
Sameti nesaṃ saddhammo, dhamme buddhappavedite’’.
‘‘সুৰিনীতা কপ্পিনেন, ধম্মে অরিযপ্পৰেদিতে।
‘‘Suvinītā kappinena, dhamme ariyappavedite;
ধারেন্তি অন্তিমং দেহং, জেত্ৰা মারং সৰাহিনি’’ন্তি 155॥
Dhārenti antimaṃ dehaṃ, jetvā māraṃ savāhini’’nti 156.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
‘‘নযিদং সিথিলমারব্ভ, নযিদং অপ্পেন থামসা।
‘‘Nayidaṃ sithilamārabbha, nayidaṃ appena thāmasā;
‘‘অযঞ্চ দহরো ভিক্খু, অযমুত্তমপুরিসো।
‘‘Ayañca daharo bhikkhu, ayamuttamapuriso;
ধারেতি অন্তিমং দেহং, জেত্ৰা মারং সৰাহিনি’’ন্তি॥
Dhāreti antimaṃ dehaṃ, jetvā māraṃ savāhini’’nti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
‘‘দুব্বণ্ণকো লূখচীৰরো, মোঘরাজা সদা সতো।
‘‘Dubbaṇṇako lūkhacīvaro, mogharājā sadā sato;
খীণাসৰো ৰিসংযুত্তো, কতকিচ্চো অনাসৰো॥
Khīṇāsavo visaṃyutto, katakicco anāsavo.
ধারেতি অন্তিমং দেহং, জেত্ৰা মারং সৰাহিনি’’ন্তি॥
Dhāreti antimaṃ dehaṃ, jetvā māraṃ savāhini’’nti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
১০৫. ‘‘তথাগতো, ভিক্খৰে, অরহং সম্মাসম্বুদ্ধো রূপস্স নিব্বিদা ৰিরাগা নিরোধা অনুপাদা ৰিমুত্তো সম্মাসম্বুদ্ধোতি ৰুচ্চতি। ভিক্খুপি, ভিক্খৰে, পঞ্ঞাৰিমুত্তো রূপস্স নিব্বিদা ৰিরাগা নিরোধা অনুপাদা ৰিমুত্তো পঞ্ঞাৰিমুত্তোতি ৰুচ্চতি।
105. ‘‘Tathāgato, bhikkhave, arahaṃ sammāsambuddho rūpassa nibbidā virāgā nirodhā anupādā vimutto sammāsambuddhoti vuccati. Bhikkhupi, bhikkhave, paññāvimutto rūpassa nibbidā virāgā nirodhā anupādā vimutto paññāvimuttoti vuccati.
‘‘তথাগতো, ভিক্খৰে, অরহং সম্মাসম্বুদ্ধো ৰেদনায…পে॰… সঞ্ঞায…পে॰… সঙ্খারানং…পে॰… ৰিঞ্ঞাণস্স নিব্বিদা ৰিরাগা নিরোধা অনুপাদা ৰিমুত্তো সম্মাসম্বুদ্ধোতি ৰুচ্চতি। ভিক্খুপি, ভিক্খৰে, পঞ্ঞাৰিমুত্তো ৰিঞ্ঞাণস্স নিব্বিদা ৰিরাগা নিরোধা অনুপাদা ৰিমুত্তো পঞ্ঞাৰিমুত্তোতি ৰুচ্চতি।
‘‘Tathāgato, bhikkhave, arahaṃ sammāsambuddho vedanāya…pe… saññāya…pe… saṅkhārānaṃ…pe… viññāṇassa nibbidā virāgā nirodhā anupādā vimutto sammāsambuddhoti vuccati. Bhikkhupi, bhikkhave, paññāvimutto viññāṇassa nibbidā virāgā nirodhā anupādā vimutto paññāvimuttoti vuccati.
‘‘তত্র খো, ভিক্খৰে, কো ৰিসেসো কো অধিপ্পযাসো 161 কিং নানাকরণং তথাগতস্স অরহতো সম্মাসম্বুদ্ধস্স পঞ্ঞাৰিমুত্তেন ভিক্খুনাতি? ভগৰংমূলকা নো, ভন্তে, ধম্মা…পে॰…
‘‘Tatra kho, bhikkhave, ko viseso ko adhippayāso 162 kiṃ nānākaraṇaṃ tathāgatassa arahato sammāsambuddhassa paññāvimuttena bhikkhunāti? Bhagavaṃmūlakā no, bhante, dhammā…pe…
‘‘তথাগতো, ভিক্খৰে, অরহং সম্মাসম্বুদ্ধো অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা, অনক্খাতস্স মগ্গস্স অক্খাতা , মগ্গঞ্ঞূ মগ্গৰিদূ মগ্গকোৰিদো, মগ্গানুগা চ, ভিক্খৰে, এতরহি সাৰকা ৰিহরন্তি পচ্ছাসমন্নাগতা। অযং খো, ভিক্খৰে, ৰিসেসো, অযং অধিপ্পযাসো, ইদং নানাকরণং তথাগতস্স অরহতো সম্মাসম্বুদ্ধস্স পঞ্ঞাৰিমুত্তেন ভিক্খুনা’’তি।
‘‘Tathāgato, bhikkhave, arahaṃ sammāsambuddho anuppannassa maggassa uppādetā, asañjātassa maggassa sañjanetā, anakkhātassa maggassa akkhātā , maggaññū maggavidū maggakovido, maggānugā ca, bhikkhave, etarahi sāvakā viharanti pacchāsamannāgatā. Ayaṃ kho, bhikkhave, viseso, ayaṃ adhippayāso, idaṃ nānākaraṇaṃ tathāgatassa arahato sammāsambuddhassa paññāvimuttena bhikkhunā’’ti.
ইদং অসেক্খভাগিযং সুত্তং।
Idaṃ asekkhabhāgiyaṃ suttaṃ.
১০৬. তত্থ কতমং সংকিলেসভাগিযঞ্চ ৰাসনাভাগিযঞ্চ সুত্তং?
106. Tattha katamaṃ saṃkilesabhāgiyañca vāsanābhāgiyañca suttaṃ?
তস্মা ছন্নং ৰিৰরেথ, এৰং তং নাতিৰস্সতী’’তি॥
Tasmā channaṃ vivaretha, evaṃ taṃ nātivassatī’’ti.
‘‘ছন্নমতিৰস্সতী’’তি সংকিলেসো, ‘‘ৰিৰটং নাতিৰস্সতী’’তি ৰাসনা, ‘‘তস্মা ছন্নং ৰিৰরেথ, এৰং তং নাতিৰস্সতী’’তি অযং সংকিলেসো চ ৰাসনা চ। ইদং সংকিলেসভাগিযঞ্চ ৰাসনাভাগিযঞ্চ সুত্তং।
‘‘Channamativassatī’’ti saṃkileso, ‘‘vivaṭaṃ nātivassatī’’ti vāsanā, ‘‘tasmā channaṃ vivaretha, evaṃ taṃ nātivassatī’’ti ayaṃ saṃkileso ca vāsanā ca. Idaṃ saṃkilesabhāgiyañca vāsanābhāgiyañca suttaṃ.
‘‘চত্তারোমে, মহারাজ 165, পুগ্গলা সন্তো সংৰিজ্জমানা লোকস্মিং। কতমে চত্তারো? তমো তমপরাযণো তমো জোতিপরাযণো জোতি তমপরাযণো জোতি জোতিপরাযণো’’তি। তত্থ যো চ পুগ্গলো জোতি তমপরাযণো যো চ পুগ্গলো তমো তমপরাযণো, ইমে দ্ৰে পুগ্গলা সংকিলেসভাগিযা, যো চ পুগ্গলো তমো জোতিপরাযণো যো চ পুগ্গলো জোতি জোতিপরাযণো, ইমে দ্ৰে পুগ্গলা ৰাসনাভাগিযা। ইদং সংকিলেসভাগিযঞ্চ ৰাসনাভাগিযঞ্চ সুত্তং।
‘‘Cattārome, mahārāja 166, puggalā santo saṃvijjamānā lokasmiṃ. Katame cattāro? Tamo tamaparāyaṇo tamo jotiparāyaṇo joti tamaparāyaṇo joti jotiparāyaṇo’’ti. Tattha yo ca puggalo joti tamaparāyaṇo yo ca puggalo tamo tamaparāyaṇo, ime dve puggalā saṃkilesabhāgiyā, yo ca puggalo tamo jotiparāyaṇo yo ca puggalo joti jotiparāyaṇo, ime dve puggalā vāsanābhāgiyā. Idaṃ saṃkilesabhāgiyañca vāsanābhāgiyañca suttaṃ.
তত্থ কতমং সংকিলেসভাগিযঞ্চ নিব্বেধভাগিযঞ্চ সুত্তং?
Tattha katamaṃ saṃkilesabhāgiyañca nibbedhabhāgiyañca suttaṃ?
‘‘ন তং দল়্হং বন্ধনমাহু ধীরা, যদাযসং দারুজপব্বজঞ্চ 167।
‘‘Na taṃ daḷhaṃ bandhanamāhu dhīrā, yadāyasaṃ dārujapabbajañca 168;
সারত্তরত্তা মণিকুণ্ডলেসু, পুত্তেসু দারেসু চ যা অপেক্খা’’তি।
Sārattarattā maṇikuṇḍalesu, puttesu dāresu ca yā apekkhā’’ti;
অযং সংকিলেসো॥
Ayaṃ saṃkileso.
‘‘এতং দল়্হং বন্ধনমাহু ধীরা, ওহারিনং সিথিলং দুপ্পমুঞ্চং।
‘‘Etaṃ daḷhaṃ bandhanamāhu dhīrā, ohārinaṃ sithilaṃ duppamuñcaṃ;
এতম্পি ছেত্ৰান পরিব্বজন্তি, অনপেক্খিনো কামসুখং পহাযা’’তি॥
Etampi chetvāna paribbajanti, anapekkhino kāmasukhaṃ pahāyā’’ti.
অযং নিব্বেধো । ইদং সংকিলেসভাগিযঞ্চ নিব্বেধভাগিযঞ্চ সুত্তং।
Ayaṃ nibbedho . Idaṃ saṃkilesabhāgiyañca nibbedhabhāgiyañca suttaṃ.
১০৭. ‘‘যঞ্চ, ভিক্খৰে, চেতেতি, যঞ্চ পকপ্পেতি, যঞ্চ অনুসেতি। আরম্মণমেতং হোতি ৰিঞ্ঞাণস্স ঠিতিযা, আরম্মণে সতি পতিট্ঠা ৰিঞ্ঞাণস্স হোতি, তস্মিং পতিট্ঠিতে ৰিঞ্ঞাণে ৰিরূল়্হে আযতিং 169 পুনব্ভৰাভিনিব্বত্তি হোতি, আযতিং পুনব্ভৰাভিনিব্বত্তিযা সতি আযতিং 170 জাতিজরামরণং সোকপরিদেৰদুক্খদোমনস্সুপাযাসা সম্ভৰন্তি, এৰমেতস্স কেৰলস্স দুক্খক্খন্ধস্স সমুদযো হোতি।
107. ‘‘Yañca, bhikkhave, ceteti, yañca pakappeti, yañca anuseti. Ārammaṇametaṃ hoti viññāṇassa ṭhitiyā, ārammaṇe sati patiṭṭhā viññāṇassa hoti, tasmiṃ patiṭṭhite viññāṇe virūḷhe āyatiṃ 171 punabbhavābhinibbatti hoti, āyatiṃ punabbhavābhinibbattiyā sati āyatiṃ 172 jātijarāmaraṇaṃ sokaparidevadukkhadomanassupāyāsā sambhavanti, evametassa kevalassa dukkhakkhandhassa samudayo hoti.
‘‘নো চে, ভিক্খৰে, চেতেতি, নো চে পকপ্পেতি, অথ চে অনুসেতি। আরম্মণমেতং হোতি ৰিঞ্ঞাণস্স ঠিতিযা, আরম্মণে সতি পতিট্ঠা ৰিঞ্ঞাণস্স 173 হোতি, তস্মিং পতিট্ঠিতে ৰিঞ্ঞাণে ৰিরূল়্হে আযতিং পুনব্ভৰাভিনিব্বত্তি হোতি, আযতিং পুনব্ভৰাভিনিব্বত্তিযা সতি আযতিং জাতিজরামরণং সোকপরিদেৰদুক্খদোমনস্সুপাযাসা সম্ভৰন্তি, এৰমেতস্স কেৰলস্স দুক্খক্খন্ধস্স সমুদযো হোতী’’তি। অযং সংকিলেসো।
‘‘No ce, bhikkhave, ceteti, no ce pakappeti, atha ce anuseti. Ārammaṇametaṃ hoti viññāṇassa ṭhitiyā, ārammaṇe sati patiṭṭhā viññāṇassa 174 hoti, tasmiṃ patiṭṭhite viññāṇe virūḷhe āyatiṃ punabbhavābhinibbatti hoti, āyatiṃ punabbhavābhinibbattiyā sati āyatiṃ jātijarāmaraṇaṃ sokaparidevadukkhadomanassupāyāsā sambhavanti, evametassa kevalassa dukkhakkhandhassa samudayo hotī’’ti. Ayaṃ saṃkileso.
‘‘যতো চ খো, ভিক্খৰে, নো চেৰ 175 চেতেতি, নো চ পকপ্পেতি, নো চ অনুসেতি। আরম্মণমেতং ন হোতি ৰিঞ্ঞাণস্স ঠিতিযা, আরম্মণে অসতি পতিট্ঠা ৰিঞ্ঞাণস্স ন হোতি, তস্মিং অপ্পতিট্ঠিতে ৰিঞ্ঞাণে অৰিরূল়্হে আযতিং পুনব্ভৰাভিনিব্বত্তি ন হোতি, আযতিং পুনব্ভৰাভিনিব্বত্তিযা অসতি আযতিং জাতিজরামরণং সোকপরিদেৰদুক্খদোমনস্সুপাযাসা নিরুজ্ঝন্তি। এৰমেতস্স কেৰলস্স দুক্খক্খন্ধস্স নিরোধো হোতী’’তি, অযং নিব্বেধো। ইদং সংকিলেসভাগিযঞ্চ নিব্বেধভাগিযঞ্চ সুত্তং।
‘‘Yato ca kho, bhikkhave, no ceva 176 ceteti, no ca pakappeti, no ca anuseti. Ārammaṇametaṃ na hoti viññāṇassa ṭhitiyā, ārammaṇe asati patiṭṭhā viññāṇassa na hoti, tasmiṃ appatiṭṭhite viññāṇe avirūḷhe āyatiṃ punabbhavābhinibbatti na hoti, āyatiṃ punabbhavābhinibbattiyā asati āyatiṃ jātijarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hotī’’ti, ayaṃ nibbedho. Idaṃ saṃkilesabhāgiyañca nibbedhabhāgiyañca suttaṃ.
১০৮. তত্থ কতমং সংকিলেসভাগিযঞ্চ অসেক্খভাগিযঞ্চ সুত্তং?
108. Tattha katamaṃ saṃkilesabhāgiyañca asekkhabhāgiyañca suttaṃ?
‘‘‘সমুদ্দো সমুদ্দো’তি খো, ভিক্খৰে, অস্সুতৰা পুথুজ্জনো ভাসতি, নেসো, ভিক্খৰে, অরিযস্স ৰিনযে সমুদ্দো, মহা এসো ভিক্খৰে, উদকরাসি মহাউদকণ্ণৰো। চক্খু, ভিক্খৰে, পুরিসস্স সমুদ্দো, তস্স রূপমযো ৰেগো। অযং সংকিলেসো।
‘‘‘Samuddo samuddo’ti kho, bhikkhave, assutavā puthujjano bhāsati, neso, bhikkhave, ariyassa vinaye samuddo, mahā eso bhikkhave, udakarāsi mahāudakaṇṇavo. Cakkhu, bhikkhave, purisassa samuddo, tassa rūpamayo vego. Ayaṃ saṃkileso.
‘‘‘সোতং, ভিক্খৰে…পে॰… ঘানং…পে॰… জিৰ্হা…পে॰… কাযো…পে॰… মনো, ভিক্খৰে, পুরিসস্স সমুদ্দো তস্স ধম্মমযো ৰেগোতি। অযং সংকিলেসো।
‘‘‘Sotaṃ, bhikkhave…pe… ghānaṃ…pe… jivhā…pe… kāyo…pe… mano, bhikkhave, purisassa samuddo tassa dhammamayo vegoti. Ayaṃ saṃkileso.
‘‘যো তং ধম্মমযং ৰেগং সহতি, অযং ৰুচ্চতি, ভিক্খৰে, অতরি মনোসমুদ্দং সঊমিং সাৰট্টং সগহং সরক্খসং তিণ্ণো পারঙ্গতো থলে তিট্ঠতি ব্রাহ্মণো’’তি। অযং অসেক্খো। ইদমৰোচ ভগৰা, ইদং ৰত্ৰান সুগতো, অথাপরং এতদৰোচ সত্থা –
‘‘Yo taṃ dhammamayaṃ vegaṃ sahati, ayaṃ vuccati, bhikkhave, atari manosamuddaṃ saūmiṃ sāvaṭṭaṃ sagahaṃ sarakkhasaṃ tiṇṇo pāraṅgato thale tiṭṭhati brāhmaṇo’’ti. Ayaṃ asekkho. Idamavoca bhagavā, idaṃ vatvāna sugato, athāparaṃ etadavoca satthā –
‘‘যো ইমং সমুদ্দং সগহং সরক্খসং,
‘‘Yo imaṃ samuddaṃ sagahaṃ sarakkhasaṃ,
সঊমিং সাৰট্টং সভযং দুত্তরং অচ্চতরি।
Saūmiṃ sāvaṭṭaṃ sabhayaṃ duttaraṃ accatari;
স ৰেদন্তগূ ৰুসিতব্রহ্মচরিযো, লোকন্তগূ পারগতোতি ৰুচ্চতী’’তি॥
Sa vedantagū vusitabrahmacariyo, lokantagū pāragatoti vuccatī’’ti.
অযং অসেক্খো। ইদং সংকিলেসভাগিযঞ্চ অসেক্খভাগিযঞ্চ সুত্তং।
Ayaṃ asekkho. Idaṃ saṃkilesabhāgiyañca asekkhabhāgiyañca suttaṃ.
‘‘ছযিমে, ভিক্খৰে, বল়িসা লোকস্মিং অনযায সত্তানং ব্যাবাধায 181 পাণীনং। কতমে ছ? সন্তি, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি, অযং ৰুচ্চতি, ভিক্খৰে, ভিক্খু গিলিতবল়িসো 182 মারস্স অনযং আপন্নো, ব্যসনং আপন্নো, যথাকামং করণীযো পাপিমতো।
‘‘Chayime, bhikkhave, baḷisā lokasmiṃ anayāya sattānaṃ byābādhāya 183 pāṇīnaṃ. Katame cha? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, tañce bhikkhu abhinandati abhivadati ajjhosāya tiṭṭhati, ayaṃ vuccati, bhikkhave, bhikkhu gilitabaḷiso 184 mārassa anayaṃ āpanno, byasanaṃ āpanno, yathākāmaṃ karaṇīyo pāpimato.
‘‘সন্তি, ভিক্খৰে, সোতৰিঞ্ঞেয্যা সদ্দা…পে॰… ঘানৰিঞ্ঞেয্যা গন্ধা…পে॰… জিৰ্হাৰিঞ্ঞেয্যা রসা…পে॰… কাযৰিঞ্ঞেয্যা ফোট্ঠব্বা…পে॰… মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা, তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি। অযং ৰুচ্চতি, ভিক্খৰে, ভিক্খু গিলিতবল়িসো মারস্স অনযং আপন্নো, ব্যসনং আপন্নো, যথাকামং করণীযো 185 পাপিমতো’’তি। অযং সংকিলেসো।
‘‘Santi, bhikkhave, sotaviññeyyā saddā…pe… ghānaviññeyyā gandhā…pe… jivhāviññeyyā rasā…pe… kāyaviññeyyā phoṭṭhabbā…pe… manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā, tañce bhikkhu abhinandati abhivadati ajjhosāya tiṭṭhati. Ayaṃ vuccati, bhikkhave, bhikkhu gilitabaḷiso mārassa anayaṃ āpanno, byasanaṃ āpanno, yathākāmaṃ karaṇīyo 186 pāpimato’’ti. Ayaṃ saṃkileso.
‘‘সন্তি চ, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, অযং ৰুচ্চতি, ভিক্খৰে, ভিক্খু ন গিলিতবল়িসো মারস্স, অভেদি বল়িসং, পরিভেদি বল়িসং, ন অনযং আপন্নো, ন ব্যসনং আপন্নো, ন যথাকামং করণীযো পাপিমতো।
‘‘Santi ca, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, tañce bhikkhu nābhinandati nābhivadati nājjhosāya tiṭṭhati, ayaṃ vuccati, bhikkhave, bhikkhu na gilitabaḷiso mārassa, abhedi baḷisaṃ, paribhedi baḷisaṃ, na anayaṃ āpanno, na byasanaṃ āpanno, na yathākāmaṃ karaṇīyo pāpimato.
‘‘সন্তি চ, ভিক্খৰে, সোতৰিঞ্ঞেয্যা সদ্দা…পে॰… মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা, তঞ্চে ভিক্খু নাভিনন্দতি নাভিৰদতি, নাজ্ঝোসায তিট্ঠতি। অযং ৰুচ্চতি, ভিক্খৰে, ভিক্খু ন গিলিতবল়িসো মারস্স, অভেদি বল়িসং, পরিভেদি বল়িসং, ন অনযং আপন্নো, ন ব্যসনং আপন্নো, ন যথাকামং করণীযো পাপিমতো’’তি। অযং অসেক্খো। ইদং সংকিলেসভাগিযঞ্চ অসেক্খভাগিযঞ্চ সুত্তং।
‘‘Santi ca, bhikkhave, sotaviññeyyā saddā…pe… manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā, tañce bhikkhu nābhinandati nābhivadati, nājjhosāya tiṭṭhati. Ayaṃ vuccati, bhikkhave, bhikkhu na gilitabaḷiso mārassa, abhedi baḷisaṃ, paribhedi baḷisaṃ, na anayaṃ āpanno, na byasanaṃ āpanno, na yathākāmaṃ karaṇīyo pāpimato’’ti. Ayaṃ asekkho. Idaṃ saṃkilesabhāgiyañca asekkhabhāgiyañca suttaṃ.
১০৯. তত্থ কতমং সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্তং?
109. Tattha katamaṃ saṃkilesabhāgiyañca nibbedhabhāgiyañca asekkhabhāgiyañca suttaṃ?
‘‘অযং লোকো সন্তাপজাতো, ফস্সপরেতো রোগং ৰদতি অত্ততো 187।
‘‘Ayaṃ loko santāpajāto, phassapareto rogaṃ vadati attato 188;
‘‘অঞ্ঞথাভাৰী ভৰসত্তো লোকো, ভৰপরেতো ভৰমেৰাভিনন্দতি।
‘‘Aññathābhāvī bhavasatto loko, bhavapareto bhavamevābhinandati;
যদভিনন্দতি তং ভযং।
Yadabhinandati taṃ bhayaṃ;
যস্স ভাযতি তং দুক্খ’’ন্তি। অযং সংকিলেসো॥
Yassa bhāyati taṃ dukkha’’nti; Ayaṃ saṃkileso.
‘‘ভৰৰিপ্পহানায খো পনিদং ব্রহ্মচরিযং ৰুস্সতী’’তি। অযং নিব্বেধো।
‘‘Bhavavippahānāya kho panidaṃ brahmacariyaṃ vussatī’’ti; Ayaṃ nibbedho;
‘‘যে হি কেচি সমণা ৰা ব্রাহ্মণা ৰা ভৰেন ভৰস্স ৰিপ্পমোক্খমাহংসু, সব্বে তে ‘অৰিপ্পমুত্তা ভৰস্মা’তি ৰদামি। যে ৰা পন কেচি সমণা ৰা ব্রাহ্মণা ৰা ৰিভৰেন ভৰস্স নিস্সরণমাহংসু, সব্বে তে ‘অনিস্সটা ভৰস্মা’তি ৰদামি। উপধিং 191 হি পটিচ্চ দুক্খমিদং সম্ভোতী’’তি। অযং সংকিলেসো।
‘‘Ye hi keci samaṇā vā brāhmaṇā vā bhavena bhavassa vippamokkhamāhaṃsu, sabbe te ‘avippamuttā bhavasmā’ti vadāmi. Ye vā pana keci samaṇā vā brāhmaṇā vā vibhavena bhavassa nissaraṇamāhaṃsu, sabbe te ‘anissaṭā bhavasmā’ti vadāmi. Upadhiṃ 192 hi paṭicca dukkhamidaṃ sambhotī’’ti. Ayaṃ saṃkileso.
‘‘সব্বুপাদানক্খযা নত্থি দুক্খস্স সম্ভৰো’’তি। অযং নিব্বেধো।
‘‘Sabbupādānakkhayā natthi dukkhassa sambhavo’’ti. Ayaṃ nibbedho.
‘‘লোকমিমং পস্স, পুথূ অৰিজ্জায পরেতা ভূতা ভূতরতা, ভৰা অপরিমুত্তা, যে হি কেচি ভৰা সব্বধি সব্বত্থতায, সব্বে তে ভৰা অনিচ্চা দুক্খা ৰিপরিণামধম্মা’’তি। অযং সংকিলেসো।
‘‘Lokamimaṃ passa, puthū avijjāya paretā bhūtā bhūtaratā, bhavā aparimuttā, ye hi keci bhavā sabbadhi sabbatthatāya, sabbe te bhavā aniccā dukkhā vipariṇāmadhammā’’ti. Ayaṃ saṃkileso.
‘‘এৰমেতং যথাভূতং, সম্মপ্পঞ্ঞায পস্সতো।
‘‘Evametaṃ yathābhūtaṃ, sammappaññāya passato;
ভৰতণ্হা পহীযতি, ৰিভৰং নাভিনন্দতি।
Bhavataṇhā pahīyati, vibhavaṃ nābhinandati;
সব্বসো তণ্হানং খযা, অসেসৰিরাগনিরোধো নিব্বান’’ন্তি।
Sabbaso taṇhānaṃ khayā, asesavirāganirodho nibbāna’’nti;
অযং নিব্বেধো॥
Ayaṃ nibbedho.
‘‘তস্স নিব্বুতস্স ভিক্খুনো, অনুপাদা পুনব্ভৰো ন হোতি।
‘‘Tassa nibbutassa bhikkhuno, anupādā punabbhavo na hoti;
অভিভূতো মারো ৰিজিতসঙ্গামো, উপচ্চগা সব্বভৰানি তাদী’’তি॥
Abhibhūto māro vijitasaṅgāmo, upaccagā sabbabhavāni tādī’’ti.
অযং অসেক্খো। ইদং সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্তং।
Ayaṃ asekkho. Idaṃ saṃkilesabhāgiyañca nibbedhabhāgiyañca asekkhabhāgiyañca suttaṃ.
‘‘চত্তারোমে, ভিক্খৰে 193, পুগ্গলা। কতমে চত্তারো? অনুসোতগামী পটিসোতগামী ঠিতত্তো তিণ্ণো পারঙ্গতো থলে তিট্ঠতি ব্রাহ্মণো’’তি। তত্থ যোযং পুগ্গলো অনুসোতগামী, অযং পুগ্গলো সংকিলেসভাগিযো। তত্থ যোযং পুগ্গলো পটিসোতগামী যো চ ঠিতত্তো, ইমে দ্ৰে পুগ্গলা নিব্বেধভাগিযা। তত্থ যোযং পুগ্গলো তিণ্ণো পারঙ্গতো থলে তিট্ঠতি ব্রাহ্মণো, অযং অসেক্খো। ইদং সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্তং।
‘‘Cattārome, bhikkhave 194, puggalā. Katame cattāro? Anusotagāmī paṭisotagāmī ṭhitatto tiṇṇo pāraṅgato thale tiṭṭhati brāhmaṇo’’ti. Tattha yoyaṃ puggalo anusotagāmī, ayaṃ puggalo saṃkilesabhāgiyo. Tattha yoyaṃ puggalo paṭisotagāmī yo ca ṭhitatto, ime dve puggalā nibbedhabhāgiyā. Tattha yoyaṃ puggalo tiṇṇo pāraṅgato thale tiṭṭhati brāhmaṇo, ayaṃ asekkho. Idaṃ saṃkilesabhāgiyañca nibbedhabhāgiyañca asekkhabhāgiyañca suttaṃ.
১১০. তত্থ কতমং সংকিলেসভাগিযঞ্চ ৰাসনাভাগিযঞ্চ নিব্বেধভাগিযঞ্চ সুত্তং?
110. Tattha katamaṃ saṃkilesabhāgiyañca vāsanābhāgiyañca nibbedhabhāgiyañca suttaṃ?
ছল়াভিজাতিকো অত্থি পুগ্গলো কণ্হো কণ্হাভিজাতিকো কণ্হং ধম্মং অভিজাযতি, অত্থি পুগ্গলো কণ্হো কণ্হাভিজাতিকো সুক্কং ধম্মং অভিজাযতি, অত্থি পুগ্গলো কণ্হো কণ্হাভিজাতিকো অকণ্হং অসুক্কং অকণ্হঅসুক্কৰিপাকং অচ্চন্তদিট্ঠং 195 নিব্বানং আরাধেতি, অত্থি পুগ্গলো সুক্কো সুক্কাভিজাতিকো কণ্হং ধম্মং অভিজাযতি, অত্থি পুগ্গলো সুক্কো সুক্কাভিজাতিকো সুক্কং ধম্মং অভিজাযতি, অত্থি পুগ্গলো সুক্কো সুক্কাভিজাতিকো অকণ্হং অসুক্কং অকণ্হঅসুক্কৰিপাকং অচ্চন্তদিট্ঠং নিব্বানং আরাধেতি।
Chaḷābhijātiko atthi puggalo kaṇho kaṇhābhijātiko kaṇhaṃ dhammaṃ abhijāyati, atthi puggalo kaṇho kaṇhābhijātiko sukkaṃ dhammaṃ abhijāyati, atthi puggalo kaṇho kaṇhābhijātiko akaṇhaṃ asukkaṃ akaṇhaasukkavipākaṃ accantadiṭṭhaṃ 196 nibbānaṃ ārādheti, atthi puggalo sukko sukkābhijātiko kaṇhaṃ dhammaṃ abhijāyati, atthi puggalo sukko sukkābhijātiko sukkaṃ dhammaṃ abhijāyati, atthi puggalo sukko sukkābhijātiko akaṇhaṃ asukkaṃ akaṇhaasukkavipākaṃ accantadiṭṭhaṃ nibbānaṃ ārādheti.
তত্থ যো চ পুগ্গলো কণ্হো কণ্হাভিজাতিকো কণ্হং ধম্মং অভিজাযতি, যো চ পুগ্গলো সুক্কো সুক্কাভিজাতিকো কণ্হং ধম্মং অভিজাযতি, ইমে দ্ৰে পুগ্গলা সংকিলেসভাগিযা।
Tattha yo ca puggalo kaṇho kaṇhābhijātiko kaṇhaṃ dhammaṃ abhijāyati, yo ca puggalo sukko sukkābhijātiko kaṇhaṃ dhammaṃ abhijāyati, ime dve puggalā saṃkilesabhāgiyā.
তত্থ যো চ পুগ্গলো কণ্হো কণ্হাভিজাতিকো সুক্কং ধম্মং অভিজাযতি, যো চ পুগ্গলো সুক্কো সুক্কাভিজাতিকো সুক্কং ধম্মং অভিজাযতি, ইমে দ্ৰে পুগ্গলা ৰাসনাভাগিযা।
Tattha yo ca puggalo kaṇho kaṇhābhijātiko sukkaṃ dhammaṃ abhijāyati, yo ca puggalo sukko sukkābhijātiko sukkaṃ dhammaṃ abhijāyati, ime dve puggalā vāsanābhāgiyā.
তত্থ যো চ পুগ্গলো কণ্হো কণ্হাভিজাতিকো অকণ্হং অসুক্কং অকণ্হঅসুক্কৰিপাকং অচ্চন্তদিট্ঠং নিব্বানং আরাধেতি, যো চ পুগ্গলো সুক্কো সুক্কাভিজাতিকো অকণ্হং অসুক্কং অকণ্হঅসুক্কৰিপাকং অচ্চন্তদিট্ঠং নিব্বানং আরাধেতি, ইমে দ্ৰে পুগ্গলা নিব্বেধভাগিযা, ইদং সংকিলেসভাগিযঞ্চ ৰাসনাভাগিযঞ্চ নিব্বেধভাগিযঞ্চ সুত্তং।
Tattha yo ca puggalo kaṇho kaṇhābhijātiko akaṇhaṃ asukkaṃ akaṇhaasukkavipākaṃ accantadiṭṭhaṃ nibbānaṃ ārādheti, yo ca puggalo sukko sukkābhijātiko akaṇhaṃ asukkaṃ akaṇhaasukkavipākaṃ accantadiṭṭhaṃ nibbānaṃ ārādheti, ime dve puggalā nibbedhabhāgiyā, idaṃ saṃkilesabhāgiyañca vāsanābhāgiyañca nibbedhabhāgiyañca suttaṃ.
‘‘চত্তারিমানি, ভিক্খৰে 197, কম্মানি। কতমানি চত্তারি? অত্থি কম্মং কণ্হং কণ্হৰিপাকং, অত্থি কম্মং সুক্কং সুক্কৰিপাকং, অত্থি কম্মং কণ্হসুক্কং কণ্হসুক্কৰিপাকং, অত্থি কম্মং অকণ্হং অসুক্কং অকণ্হঅসুক্কৰিপাকং কম্মুত্তমং কম্মসেট্ঠং কম্মক্খযায সংৰত্ততি’’।
‘‘Cattārimāni, bhikkhave 198, kammāni. Katamāni cattāri? Atthi kammaṃ kaṇhaṃ kaṇhavipākaṃ, atthi kammaṃ sukkaṃ sukkavipākaṃ, atthi kammaṃ kaṇhasukkaṃ kaṇhasukkavipākaṃ, atthi kammaṃ akaṇhaṃ asukkaṃ akaṇhaasukkavipākaṃ kammuttamaṃ kammaseṭṭhaṃ kammakkhayāya saṃvattati’’.
তত্থ যঞ্চ কম্মং কণ্হং কণ্হৰিপাকং, যঞ্চ কম্মং কণ্হসুক্কং কণ্হসুক্কৰিপাকং, অযং সংকিলেসো। যঞ্চ কম্মং সুক্কং সুক্কৰিপাকং, অযং ৰাসনা। যঞ্চ কম্মং অকণ্হং অসুক্কং অকণ্হঅসুক্কৰিপাকং কম্মুত্তমং কম্মসেট্ঠং কম্মক্খযায সংৰত্ততি, অযং নিব্বেধো। ইদং সংকিলেসভাগিযঞ্চ ৰাসনাভাগিযঞ্চ নিব্বেধভাগিযঞ্চ সুত্তং।
Tattha yañca kammaṃ kaṇhaṃ kaṇhavipākaṃ, yañca kammaṃ kaṇhasukkaṃ kaṇhasukkavipākaṃ, ayaṃ saṃkileso. Yañca kammaṃ sukkaṃ sukkavipākaṃ, ayaṃ vāsanā. Yañca kammaṃ akaṇhaṃ asukkaṃ akaṇhaasukkavipākaṃ kammuttamaṃ kammaseṭṭhaṃ kammakkhayāya saṃvattati, ayaṃ nibbedho. Idaṃ saṃkilesabhāgiyañca vāsanābhāgiyañca nibbedhabhāgiyañca suttaṃ.
১১১. তত্থ কতমং ৰাসনাভাগিযঞ্চ, নিব্বেধভাগিযঞ্চ সুত্তং?
111. Tattha katamaṃ vāsanābhāgiyañca, nibbedhabhāgiyañca suttaṃ?
‘‘লদ্ধান মানুসত্তং দ্ৰে, কিচ্চং অকিচ্চমেৰ চ।
‘‘Laddhāna mānusattaṃ dve, kiccaṃ akiccameva ca;
সুকিচ্চং চেৰ পুঞ্ঞানি, সংযোজনৰিপ্পহানং ৰা’’তি॥
Sukiccaṃ ceva puññāni, saṃyojanavippahānaṃ vā’’ti.
‘‘সুকিচ্চং চেৰ পুঞ্ঞানী’’তি ৰাসনা। ‘‘সংযোজনৰিপ্পহানং ৰা’’তি নিব্বেধো।
‘‘Sukiccaṃ ceva puññānī’’ti vāsanā. ‘‘Saṃyojanavippahānaṃ vā’’ti nibbedho.
‘‘পুঞ্ঞানি করিত্ৰান, সগ্গা সগ্গং ৰজন্তি কতপুঞ্ঞা।
‘‘Puññāni karitvāna, saggā saggaṃ vajanti katapuññā;
সংযোজনপ্পহানা, জরামরণা ৰিপ্পমুচ্চন্তী’’তি॥
Saṃyojanappahānā, jarāmaraṇā vippamuccantī’’ti.
‘‘পুঞ্ঞানি করিত্ৰান, সগ্গা সগ্গং ৰজন্তি কতপুঞ্ঞা’’তি ৰাসনা। ‘‘সংযোজনপ্পহানা জরামরণা ৰিপ্পমুচ্চন্তী’’তি নিব্বেধো। ইদং ৰাসনাভাগিযঞ্চ নিব্বেধভাগিযঞ্চ সুত্তং।
‘‘Puññāni karitvāna, saggā saggaṃ vajanti katapuññā’’ti vāsanā. ‘‘Saṃyojanappahānā jarāmaraṇā vippamuccantī’’ti nibbedho. Idaṃ vāsanābhāgiyañca nibbedhabhāgiyañca suttaṃ.
‘‘দ্ৰেমানি, ভিক্খৰে, পধানানি 199। কতমানি দ্ৰে? যো চ অগারস্মা অনগারিযং পব্বজিতেসু চীৰরপিণ্ডপাতসেনাসনগিলানপচ্চযভেসজ্জপরিক্খারং পরিচ্চজতি, যো চ অগারস্মা অনগারিযং পব্বজিতেসু সব্বূপধিপটিনিস্সগ্গো তণ্হক্খযো ৰিরাগো নিরোধো নিব্বান’’ন্তি। তত্থ যো অগারস্মা অনগারিযং পব্বজিতেসু চীৰরপিণ্ডপাতসেনাসনগিলানপচ্চযভেসজ্জপরিক্খারং পরিচ্চজতি, অযং ৰাসনা।
‘‘Dvemāni, bhikkhave, padhānāni 200. Katamāni dve? Yo ca agārasmā anagāriyaṃ pabbajitesu cīvarapiṇḍapātasenāsanagilānapaccayabhesajjaparikkhāraṃ pariccajati, yo ca agārasmā anagāriyaṃ pabbajitesu sabbūpadhipaṭinissaggo taṇhakkhayo virāgo nirodho nibbāna’’nti. Tattha yo agārasmā anagāriyaṃ pabbajitesu cīvarapiṇḍapātasenāsanagilānapaccayabhesajjaparikkhāraṃ pariccajati, ayaṃ vāsanā.
যো অগারস্মা অনগারিযং পব্বজিতেসু সব্বূপধিপটিনিস্সগ্গো তণ্হক্খযো ৰিরাগো নিরোধো নিব্বানং, অযং নিব্বেধো। ইদং ৰাসনাভাগিযঞ্চ নিব্বেধভাগিযঞ্চ সুত্তং।
Yo agārasmā anagāriyaṃ pabbajitesu sabbūpadhipaṭinissaggo taṇhakkhayo virāgo nirodho nibbānaṃ, ayaṃ nibbedho. Idaṃ vāsanābhāgiyañca nibbedhabhāgiyañca suttaṃ.
তত্থ তণ্হাসংকিলেসভাগিযং সুত্তং তণ্হাপক্খেনেৰ নিদ্দিসিতব্বং তীহি তণ্হাহি – কামতণ্হায ভৰতণ্হায ৰিভৰতণ্হায। যেন যেন ৰা পন ৰত্থুনা অজ্ঝোসিতা, তেন তেনেৰ নিদ্দিসিতব্বং, তস্সা ৰিত্থারো ছত্তিংসতণ্হাজালিনিযাৰিচরিতানি।
Tattha taṇhāsaṃkilesabhāgiyaṃ suttaṃ taṇhāpakkheneva niddisitabbaṃ tīhi taṇhāhi – kāmataṇhāya bhavataṇhāya vibhavataṇhāya. Yena yena vā pana vatthunā ajjhositā, tena teneva niddisitabbaṃ, tassā vitthāro chattiṃsataṇhājāliniyāvicaritāni.
তত্থ দিট্ঠিসংকিলেসভাগিযং সুত্তং দিট্ঠিপক্খেনেৰ নিদ্দিসিতব্বং উচ্ছেদসস্সতেন, যেন যেন ৰা পন ৰত্থুনা দিট্ঠিৰসেন অভিনিৰিসতি ‘‘ইদমেৰ সচ্চং মোঘমঞ্ঞ’’ন্তি, তেন তেনেৰ নিদ্দিসিতব্বং, তস্সা ৰিত্থারো দ্ৰাসট্ঠিদিট্ঠিগতানি।
Tattha diṭṭhisaṃkilesabhāgiyaṃ suttaṃ diṭṭhipakkheneva niddisitabbaṃ ucchedasassatena, yena yena vā pana vatthunā diṭṭhivasena abhinivisati ‘‘idameva saccaṃ moghamañña’’nti, tena teneva niddisitabbaṃ, tassā vitthāro dvāsaṭṭhidiṭṭhigatāni.
তত্থ দুচ্চরিতসংকিলেসভাগিযং সুত্তং চেতনায চেতসিককম্মেন নিদ্দিসিতব্বং তীহি দুচ্চরিতেহি – কাযদুচ্চরিতেন ৰচীদুচ্চরিতেন মনোদুচ্চরিতেন, তস্স ৰিত্থারো দসঅকুসলকম্মপথা।
Tattha duccaritasaṃkilesabhāgiyaṃ suttaṃ cetanāya cetasikakammena niddisitabbaṃ tīhi duccaritehi – kāyaduccaritena vacīduccaritena manoduccaritena, tassa vitthāro dasaakusalakammapathā.
তত্থ তণ্হাৰোদানভাগিযং সুত্তং সমথেন নিদ্দিসিতব্বং, দিট্ঠিৰোদানভাগিযং সুত্তং ৰিপস্সনা নিদ্দিসিতব্বং, দুচ্চরিতৰোদানভাগিযং সুত্তং সুচরিতেন নিদ্দিসিতব্বং। তীণি অকুসলমূলানি। তং কিস্স হেতু? সংসারস্স নিব্বত্তিযা। তথা নিব্বত্তে সংসারে কাযদুচ্চরিতং কাযসুচরিতং ৰচীদুচ্চরিতং ৰচীসুচরিতং মনোদুচ্চরিতং মনোসুচরিতং ইমিনা অসুভেন কম্মৰিপাকেন ইদং বাললক্খণং নিব্বত্ততীতি। ইদং সংকিলেসভাগিযং সুত্তং।
Tattha taṇhāvodānabhāgiyaṃ suttaṃ samathena niddisitabbaṃ, diṭṭhivodānabhāgiyaṃ suttaṃ vipassanā niddisitabbaṃ, duccaritavodānabhāgiyaṃ suttaṃ sucaritena niddisitabbaṃ. Tīṇi akusalamūlāni. Taṃ kissa hetu? Saṃsārassa nibbattiyā. Tathā nibbatte saṃsāre kāyaduccaritaṃ kāyasucaritaṃ vacīduccaritaṃ vacīsucaritaṃ manoduccaritaṃ manosucaritaṃ iminā asubhena kammavipākena idaṃ bālalakkhaṇaṃ nibbattatīti. Idaṃ saṃkilesabhāgiyaṃ suttaṃ.
ইমিনা সুভেন কম্মৰিপাকেন ইদং মহাপুরিসলক্খণং নিব্বত্ততীতি। ইদং ৰাসনাভাগিযং সুত্তং।
Iminā subhena kammavipākena idaṃ mahāpurisalakkhaṇaṃ nibbattatīti. Idaṃ vāsanābhāgiyaṃ suttaṃ.
তত্থ সংকিলেসভাগিযং সুত্তং চতূহি কিলেসভূমীহি নিদ্দিসিতব্বং – অনুসযভূমিযা পরিযুট্ঠানভূমিযা সংযোজনভূমিযা উপাদানভূমিযা। সানুসযস্স পরিযুট্ঠানং জাযতি, পরিযুট্ঠিতো সংযুজ্জতি, সংযুজ্জন্তো উপাদিযতি, উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি, এৰমেতস্স কেৰলস্স দুক্খক্খন্ধস্স সমুদযো হোতি। ইমাহি চতূহি কিলেসভূমীহি সব্বে কিলেসা সঙ্গহং সমোসরণং গচ্ছন্তি, ইদং সংকিলেসভাগিযং সুত্তং।
Tattha saṃkilesabhāgiyaṃ suttaṃ catūhi kilesabhūmīhi niddisitabbaṃ – anusayabhūmiyā pariyuṭṭhānabhūmiyā saṃyojanabhūmiyā upādānabhūmiyā. Sānusayassa pariyuṭṭhānaṃ jāyati, pariyuṭṭhito saṃyujjati, saṃyujjanto upādiyati, upādānapaccayā bhavo, bhavapaccayā jāti, jātipaccayā jarāmaraṇaṃ sokaparidevadukkhadomanassupāyāsā sambhavanti, evametassa kevalassa dukkhakkhandhassa samudayo hoti. Imāhi catūhi kilesabhūmīhi sabbe kilesā saṅgahaṃ samosaraṇaṃ gacchanti, idaṃ saṃkilesabhāgiyaṃ suttaṃ.
ৰাসনাভাগিযং সুত্তং তীহি সুচরিতেহি নিদ্দিসিতব্বং, নিব্বেধভাগিযং সুত্তং চতূহি সচ্চেহি নিদ্দিসিতব্বং, অসেক্খভাগিযং সুত্তং তীহি ধম্মেহি নিদ্দিসিতব্বং – বুদ্ধধম্মেহি পচ্চেকবুদ্ধধম্মেহি সাৰকভূমিযা। ঝাযিৰিসযে নিদ্দিসিতব্বন্তি।
Vāsanābhāgiyaṃ suttaṃ tīhi sucaritehi niddisitabbaṃ, nibbedhabhāgiyaṃ suttaṃ catūhi saccehi niddisitabbaṃ, asekkhabhāgiyaṃ suttaṃ tīhi dhammehi niddisitabbaṃ – buddhadhammehi paccekabuddhadhammehi sāvakabhūmiyā. Jhāyivisaye niddisitabbanti.
১১২. তত্থ কতমে অট্ঠারস মূলপদা? লোকিযং লোকুত্তরং লোকিযঞ্চ লোকুত্তরঞ্চ, সত্তাধিট্ঠানং ধম্মাধিট্ঠানং সত্তাধিট্ঠানঞ্চ ধম্মাধিট্ঠানঞ্চ, ঞাণং ঞেয্যং ঞাণঞ্চ ঞেয্যঞ্চ, দস্সনং ভাৰনা দস্সনঞ্চ ভাৰনা চ, সকৰচনং পরৰচনং সকৰচনঞ্চ পরৰচনঞ্চ, ৰিসজ্জনীযং অৰিসজ্জনীযং ৰিসজ্জনীযঞ্চ অৰিসজ্জনীযঞ্চ, কম্মং ৰিপাকো কম্মঞ্চ ৰিপাকো চ, কুসলং অকুসলং কুসলঞ্চ অকুসলঞ্চ, অনুঞ্ঞাতং পটিক্খিত্তং অনুঞ্ঞাতঞ্চ পটিক্খিত্তঞ্চ, থৰো চাতি।
112. Tattha katame aṭṭhārasa mūlapadā? Lokiyaṃ lokuttaraṃ lokiyañca lokuttarañca, sattādhiṭṭhānaṃ dhammādhiṭṭhānaṃ sattādhiṭṭhānañca dhammādhiṭṭhānañca, ñāṇaṃ ñeyyaṃ ñāṇañca ñeyyañca, dassanaṃ bhāvanā dassanañca bhāvanā ca, sakavacanaṃ paravacanaṃ sakavacanañca paravacanañca, visajjanīyaṃ avisajjanīyaṃ visajjanīyañca avisajjanīyañca, kammaṃ vipāko kammañca vipāko ca, kusalaṃ akusalaṃ kusalañca akusalañca, anuññātaṃ paṭikkhittaṃ anuññātañca paṭikkhittañca, thavo cāti.
তত্থ কতমং লোকিযং?
Tattha katamaṃ lokiyaṃ?
‘‘ন হি পাপং কতং কম্মং, সজ্জুখীরংৰ মুচ্চতি।
‘‘Na hi pāpaṃ kataṃ kammaṃ, sajjukhīraṃva muccati;
ইদং লোকিযং।
Idaṃ lokiyaṃ.
‘‘চত্তারিমানি, ভিক্খৰে, অগতিগমনানি সব্বং…পে॰… নিহীযতে তস্স যসো কাল়পক্খেৰ চন্দিমা’’তি। ইদং লোকিযং।
‘‘Cattārimāni, bhikkhave, agatigamanāni sabbaṃ…pe… nihīyate tassa yaso kāḷapakkheva candimā’’ti. Idaṃ lokiyaṃ.
‘‘অট্ঠিমে, ভিক্খৰে, লোকধম্মা 205। কতমে অট্ঠ? লাভো অলাভো, যসো অযসো, নিন্দা পসংসা, সুখং দুক্খং। ইমে খো, ভিক্খৰে, অট্ঠ লোকধম্মা’’তি। ইদং লোকিযং।
‘‘Aṭṭhime, bhikkhave, lokadhammā 206. Katame aṭṭha? Lābho alābho, yaso ayaso, nindā pasaṃsā, sukhaṃ dukkhaṃ. Ime kho, bhikkhave, aṭṭha lokadhammā’’ti. Idaṃ lokiyaṃ.
তত্থ কতমং লোকুত্তরং?
Tattha katamaṃ lokuttaraṃ?
‘‘যস্সিন্দ্রিযানি সমথঙ্গতানি 207। অস্সা যথা সারথিনা সুদন্তা।
‘‘Yassindriyāni samathaṅgatāni 208; Assā yathā sārathinā sudantā;
পহীনমানস্স অনাসৰস্স, দেৰাপি তস্স পিহযন্তি তাদিনো’’তি॥
Pahīnamānassa anāsavassa, devāpi tassa pihayanti tādino’’ti.
ইদং লোকুত্তরং।
Idaṃ lokuttaraṃ.
‘‘পঞ্চিমানি, ভিক্খৰে, ইন্দ্রিযানি লোকুত্তরানি। কতমানি পঞ্চ? সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং। ইমানি খো, ভিক্খৰে, পঞ্চিন্দ্রিযানি লোকুত্তরানী’’তি। ইদং লোকুত্তরং।
‘‘Pañcimāni, bhikkhave, indriyāni lokuttarāni. Katamāni pañca? Saddhindriyaṃ vīriyindriyaṃ satindriyaṃ samādhindriyaṃ paññindriyaṃ. Imāni kho, bhikkhave, pañcindriyāni lokuttarānī’’ti. Idaṃ lokuttaraṃ.
তত্থ কতমং লোকিযঞ্চ লোকুত্তরঞ্চ?
Tattha katamaṃ lokiyañca lokuttarañca?
‘‘লদ্ধান মানুসত্তং দ্ৰে, কিচ্চং অকিচ্চমেৰ চা’’তি দ্ৰে গাথা। যং ইহ ‘‘সুকিচ্চং চেৰ পুঞ্ঞানী’’তি চ ‘‘পুঞ্ঞানি করিত্ৰান, সগ্গা সগ্গং ৰজন্তি কতপুঞ্ঞা’’তি চ। ইদং লোকিযং।
‘‘Laddhāna mānusattaṃ dve, kiccaṃ akiccameva cā’’ti dve gāthā. Yaṃ iha ‘‘sukiccaṃ ceva puññānī’’ti ca ‘‘puññāni karitvāna, saggā saggaṃ vajanti katapuññā’’ti ca. Idaṃ lokiyaṃ.
যং ইহ ‘‘সংযোজনৰিপ্পহানং ৰা’’তি চ ‘‘সংযোজনপ্পহানা, জরামরণা ৰিপ্পমুচ্চন্তী’’তি চ, ইদং লোকুত্তরং। ইদং লোকিযঞ্চ লোকুত্তরঞ্চ।
Yaṃ iha ‘‘saṃyojanavippahānaṃ vā’’ti ca ‘‘saṃyojanappahānā, jarāmaraṇā vippamuccantī’’ti ca, idaṃ lokuttaraṃ. Idaṃ lokiyañca lokuttarañca.
‘‘ৰিঞ্ঞাণে চে, ভিক্খৰে, আহারে সতি নামরূপস্স অৰক্কন্তি হোতি, নামরূপস্স অৰক্কন্তিযা সতি পুনব্ভৰো হোতি, পুনব্ভৰে সতি জাতি হোতি, জাতিযা সতি জরামরণং সোকপরিদেৰদুক্খদোমনস্সুপাযাসা সম্ভৰন্তি। এৰমেতস্স কেৰলস্স দুক্খক্খন্ধস্স সমুদযো হোতি। সেয্যথাপি, ভিক্খৰে 209, মহারুক্খো, তস্স যানি চেৰ মূলানি অধোগমানি যানি চ তিরিযং গমানি, সব্বানি তানি উদ্ধং ওজং অভিহরন্তি। এৰং হি সো, ভিক্খৰে, মহারুক্খো তদাহারো তদুপাদানো চিরং দীঘমদ্ধানং তিট্ঠেয্য। এৰমেৰ খো, ভিক্খৰে, ৰিঞ্ঞাণে আহারে সতি নামরূপস্স অৰক্কন্তি হোতি সব্বং…পে॰… এৰমেতস্স কেৰলস্স দুক্খক্খন্ধস্স সমুদযো হোতী’’তি। ইদং লোকিযং।
‘‘Viññāṇe ce, bhikkhave, āhāre sati nāmarūpassa avakkanti hoti, nāmarūpassa avakkantiyā sati punabbhavo hoti, punabbhave sati jāti hoti, jātiyā sati jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti. Seyyathāpi, bhikkhave 210, mahārukkho, tassa yāni ceva mūlāni adhogamāni yāni ca tiriyaṃ gamāni, sabbāni tāni uddhaṃ ojaṃ abhiharanti. Evaṃ hi so, bhikkhave, mahārukkho tadāhāro tadupādāno ciraṃ dīghamaddhānaṃ tiṭṭheyya. Evameva kho, bhikkhave, viññāṇe āhāre sati nāmarūpassa avakkanti hoti sabbaṃ…pe… evametassa kevalassa dukkhakkhandhassa samudayo hotī’’ti. Idaṃ lokiyaṃ.
‘‘ৰিঞ্ঞাণে চে, ভিক্খৰে, আহারে অসতি নামরূপস্স অৰক্কন্তি ন হোতি, নামরূপস্স অৰক্কন্তিযা অসতি পুনব্ভৰো ন হোতি, পুনব্ভৰে অসতি জাতি ন হোতি, জাতিযা অসতি জরামরণং সোকপরিদেৰদুক্খদোমনস্সুপাযাসা নিরুজ্ঝন্তি। এৰমেতস্স কেৰলস্স দুক্খক্খন্ধস্স নিরোধো হোতি। সেয্যথাপি, ভিক্খৰে, মহারুক্খো অথ পুরিসো আগচ্ছেয্য কুদ্দালপিটকং 211 আদায, সো তং রুক্খং মূলে ছিন্দেয্য, মূলে 212 ছেত্ৰা পলিখণেয্য, পলিখণিত্ৰা মূলানি উদ্ধরেয্য অন্তমসো উসীরনাল়িমত্তানিপি। সো তং রুক্খং খণ্ডাখণ্ডিকং ছিন্দেয্য, খণ্ডাখণ্ডিকং ছিন্দিত্ৰা 213 ফালেয্য, ফালেত্ৰা সকলিকং সকলিকং করেয্য, সকলিকং সকলিকং করিত্ৰা ৰাতাতপে ৰিসোসেয্য, ৰাতাতপে ৰিসোসেত্ৰা অগ্গিনা ডহেয্য, অগ্গিনা ডহেত্ৰা মসিং করেয্য, মসিং করিত্ৰা মহাৰাতে ৰা ওফুনেয্য, নদিযা ৰা সীঘসোতায পৰাহেয্য, এৰং হি সো, ভিক্খৰে, মহারুক্খো উচ্ছিন্নমূলো অস্স তালাৰত্থুকতো অনভাৰংকতো 214 আযতিং অনুপ্পাদধম্মো। এৰমেৰ খো, ভিক্খৰে, ৰিঞ্ঞাণে আহারে অসতি নামরূপস্স অৰক্কন্তি ন হোতি, নামরূপস্স অৰক্কন্তিযা অসতি সব্বং…পে॰… এৰমেতস্স কেৰলস্স দুক্খক্খন্ধস্স নিরোধো হোতী’’তি। ইদং লোকুত্তরং। ইদং লোকিযঞ্চ লোকুত্তরঞ্চ।
‘‘Viññāṇe ce, bhikkhave, āhāre asati nāmarūpassa avakkanti na hoti, nāmarūpassa avakkantiyā asati punabbhavo na hoti, punabbhave asati jāti na hoti, jātiyā asati jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti. Seyyathāpi, bhikkhave, mahārukkho atha puriso āgaccheyya kuddālapiṭakaṃ 215 ādāya, so taṃ rukkhaṃ mūle chindeyya, mūle 216 chetvā palikhaṇeyya, palikhaṇitvā mūlāni uddhareyya antamaso usīranāḷimattānipi. So taṃ rukkhaṃ khaṇḍākhaṇḍikaṃ chindeyya, khaṇḍākhaṇḍikaṃ chinditvā 217 phāleyya, phāletvā sakalikaṃ sakalikaṃ kareyya, sakalikaṃ sakalikaṃ karitvā vātātape visoseyya, vātātape visosetvā agginā ḍaheyya, agginā ḍahetvā masiṃ kareyya, masiṃ karitvā mahāvāte vā ophuneyya, nadiyā vā sīghasotāya pavāheyya, evaṃ hi so, bhikkhave, mahārukkho ucchinnamūlo assa tālāvatthukato anabhāvaṃkato 218 āyatiṃ anuppādadhammo. Evameva kho, bhikkhave, viññāṇe āhāre asati nāmarūpassa avakkanti na hoti, nāmarūpassa avakkantiyā asati sabbaṃ…pe… evametassa kevalassa dukkhakkhandhassa nirodho hotī’’ti. Idaṃ lokuttaraṃ. Idaṃ lokiyañca lokuttarañca.
১১৩. তত্থ কতমং সত্তাধিট্ঠানং?
113. Tattha katamaṃ sattādhiṭṭhānaṃ?
‘‘সব্বা দিসা অনুপরিগম্ম চেতসা, নেৰজ্ঝগা পিযতরমত্তনা ক্ৰচি।
‘‘Sabbā disā anuparigamma cetasā, nevajjhagā piyataramattanā kvaci;
এৰং পিযো পুথু অত্তা পরেসং, তস্মা ন হিংসে পরমত্তকামো’’তি 219॥
Evaṃ piyo puthu attā paresaṃ, tasmā na hiṃse paramattakāmo’’ti 220.
ইদং সত্তাধিট্ঠানং।
Idaṃ sattādhiṭṭhānaṃ.
‘‘যে কেচি ভূতা ভৰিস্সন্তি যে ৰাপি 221, সব্বে গমিস্সন্তি পহায দেহং।
‘‘Ye keci bhūtā bhavissanti ye vāpi 222, sabbe gamissanti pahāya dehaṃ;
তং সব্বজানিং কুসলো ৰিদিত্ৰা, আতাপিযো 223 ব্রহ্মচরিযং চরেয্যা’’তি॥
Taṃ sabbajāniṃ kusalo viditvā, ātāpiyo 224 brahmacariyaṃ careyyā’’ti.
ইদং সত্তাধিট্ঠানং।
Idaṃ sattādhiṭṭhānaṃ.
‘‘সত্তহি, ভিক্খৰে, অঙ্গেহি সমন্নাগতং কল্যাণমিত্তং অপি ৰিৰেচিযমানেন পণামিযমানেন গলে পিসনমজ্জমানেন 225 যাৰজীৰং ন ৰিজহিতব্বং। কতমেহি সত্তহি? পিযো চ হোতি মনাপো চ গরু চ ভাৰনীযো চ ৰত্তা চ ৰচনক্খমো চ গম্ভীরঞ্চ কথং কত্তা হোতি, নো চ অট্ঠানে 226 নিযোজেতি। ইমেহি খো, ভিক্খৰে, সত্তহি…পে॰… ন ৰিজহিতব্বং। ইদমৰোচ ভগৰা, ইদং ৰত্ৰান সুগতো। অথাপরং এতদৰোচ সত্থা –
‘‘Sattahi, bhikkhave, aṅgehi samannāgataṃ kalyāṇamittaṃ api viveciyamānena paṇāmiyamānena gale pisanamajjamānena 227 yāvajīvaṃ na vijahitabbaṃ. Katamehi sattahi? Piyo ca hoti manāpo ca garu ca bhāvanīyo ca vattā ca vacanakkhamo ca gambhīrañca kathaṃ kattā hoti, no ca aṭṭhāne 228 niyojeti. Imehi kho, bhikkhave, sattahi…pe… na vijahitabbaṃ. Idamavoca bhagavā, idaṃ vatvāna sugato. Athāparaṃ etadavoca satthā –
‘‘পিযো গরু ভাৰনীযো, ৰত্তা চ ৰচনক্খমো।
‘‘Piyo garu bhāvanīyo, vattā ca vacanakkhamo;
গম্ভীরঞ্চ কথং কত্তা, ন চট্ঠানে নিযোজকো।
Gambhīrañca kathaṃ kattā, na caṭṭhāne niyojako;
তং মিত্তং মিত্তকামেন, যাৰজীৰম্পি সেৰিয’’ন্তি॥
Taṃ mittaṃ mittakāmena, yāvajīvampi seviya’’nti.
ইদং সত্তাধিট্ঠানং।
Idaṃ sattādhiṭṭhānaṃ.
তত্থ কতমং ধম্মাধিট্ঠানং?
Tattha katamaṃ dhammādhiṭṭhānaṃ?
‘‘যঞ্চ কামসুখং লোকে, যঞ্চিদং দিৰিযং সুখং।
‘‘Yañca kāmasukhaṃ loke, yañcidaṃ diviyaṃ sukhaṃ;
তণ্হক্খযসুখস্সেতে 229, কলং নাগ্ঘন্তি সোল়সি’’ন্তি॥
Taṇhakkhayasukhassete 230, kalaṃ nāgghanti soḷasi’’nti.
ইদং ধম্মাধিট্ঠানং।
Idaṃ dhammādhiṭṭhānaṃ.
অসোকং ৰিরজং খেমং, যত্থ দুক্খং নিরুজ্ঝতী’’তি॥
Asokaṃ virajaṃ khemaṃ, yattha dukkhaṃ nirujjhatī’’ti.
ইদং ধম্মাধিট্ঠানং।
Idaṃ dhammādhiṭṭhānaṃ.
তত্থ কতমং সত্তাধিট্ঠানঞ্চ ধম্মাধিট্ঠানঞ্চ
Tattha katamaṃ sattādhiṭṭhānañca dhammādhiṭṭhānañca
‘‘মাতরং পিতরং হন্ত্ৰা, রাজানো দ্ৰে চ খত্তিযে।
‘‘Mātaraṃ pitaraṃ hantvā, rājāno dve ca khattiye;
রট্ঠং সানুচরং হন্ত্ৰা’’তি ইদং ধম্মাধিট্ঠানং॥
Raṭṭhaṃ sānucaraṃ hantvā’’ti idaṃ dhammādhiṭṭhānaṃ.
‘‘অনীঘো যাতি ব্রাহ্মণো’’তি। ইদং সত্তাধিট্ঠানং।
‘‘Anīgho yāti brāhmaṇo’’ti; Idaṃ sattādhiṭṭhānaṃ;
ইদং সত্তাধিট্ঠানঞ্চ ধম্মাধিট্ঠানঞ্চ॥
Idaṃ sattādhiṭṭhānañca dhammādhiṭṭhānañca.
‘‘চত্তারোমে, ভিক্খৰে, ইদ্ধিপাদা 233। কতমে চত্তারো? ছন্দসমাধিপধানসঙ্খারসমন্নাগতো ইদ্ধিপাদো, ৰীরিয…পে॰… চিত্ত। ৰীমংসাসমাধিপধানসঙ্খারসমন্নাগতো ইদ্ধিপাদো’’তি। ইদং ধম্মাধিট্ঠানং।
‘‘Cattārome, bhikkhave, iddhipādā 234. Katame cattāro? Chandasamādhipadhānasaṅkhārasamannāgato iddhipādo, vīriya…pe… citta. Vīmaṃsāsamādhipadhānasaṅkhārasamannāgato iddhipādo’’ti. Idaṃ dhammādhiṭṭhānaṃ.
সো কাযেপি চিত্তং সমোদহতি, চিত্তেপি কাযং সমোদহতি, কাযে সুখসঞ্ঞঞ্চ লহুসঞ্ঞঞ্চ ওক্কমিত্ৰা উপসম্পজ্জ ৰিহরতি। ইদং সত্তাধিট্ঠানং, ইদং সত্তাধিট্ঠানঞ্চ ধম্মাধিট্ঠানঞ্চ।
So kāyepi cittaṃ samodahati, cittepi kāyaṃ samodahati, kāye sukhasaññañca lahusaññañca okkamitvā upasampajja viharati. Idaṃ sattādhiṭṭhānaṃ, idaṃ sattādhiṭṭhānañca dhammādhiṭṭhānañca.
১১৪. তত্থ কতমং ঞাণং?
114. Tattha katamaṃ ñāṇaṃ?
‘‘যং তং লোকুত্তরং ঞাণং, সব্বঞ্ঞূ যেন ৰুচ্চতি।
‘‘Yaṃ taṃ lokuttaraṃ ñāṇaṃ, sabbaññū yena vuccati;
ন তস্স পরিহানত্থি, সব্বকালে পৰত্ততী’’তি॥
Na tassa parihānatthi, sabbakāle pavattatī’’ti.
ইদং ঞাণং।
Idaṃ ñāṇaṃ.
‘‘পঞ্ঞা হি সেট্ঠা লোকস্মিং, যাযং নিব্বানগামিনী 235।
‘‘Paññā hi seṭṭhā lokasmiṃ, yāyaṃ nibbānagāminī 236;
যায সম্মা পজানাতি, জাতিমরণসঙ্খয’’ন্তি॥
Yāya sammā pajānāti, jātimaraṇasaṅkhaya’’nti.
ইদং ঞাণং।
Idaṃ ñāṇaṃ.
তত্থ কতমং ঞেয্যং?
Tattha katamaṃ ñeyyaṃ?
দিট্ঠে ধম্মে অনীতিহং।
Diṭṭhe dhamme anītihaṃ;
যং ৰিদিত্ৰা সতো চরং, তরে লোকে ৰিসত্তিকং॥
Yaṃ viditvā sato caraṃ, tare loke visattikaṃ.
‘‘তঞ্চাহং অভিনন্দামি, মহেসি সন্তিমুত্তমং।
‘‘Tañcāhaṃ abhinandāmi, mahesi santimuttamaṃ;
যং ৰিদিত্ৰা সতো চরং, তরে লোকে ৰিসত্তিকং॥
Yaṃ viditvā sato caraṃ, tare loke visattikaṃ.
‘‘যং কিঞ্চি সম্পজানাসি, [ধোতকাতি ভগৰা]
‘‘Yaṃ kiñci sampajānāsi, [dhotakāti bhagavā]
উদ্ধং অধো তিরিযঞ্চাপি মজ্ঝে।
Uddhaṃ adho tiriyañcāpi majjhe;
এতং ৰিদিত্ৰা সঙ্গোতি লোকে,
Etaṃ viditvā saṅgoti loke,
ভৰাভৰায মাকাসি তণ্হ’’ন্তি॥
Bhavābhavāya mākāsi taṇha’’nti.
ইদং ঞেয্যং।
Idaṃ ñeyyaṃ.
‘‘চতুন্নং, ভিক্খৰে, অরিযসচ্চানং অননুবোধা অপ্পটিৰেধা এৰমিদং দীঘমদ্ধানং সন্ধাৰিতং সংসরিতং মমঞ্চেৰ তুম্হাকঞ্চ…পে॰… তযিদং, ভিক্খৰে, দুক্খং অরিযসচ্চং অনুবুদ্ধং পটিৰিদ্ধং, দুক্খসমুদযং 239 অরিযসচ্চং অনুবুদ্ধং পটিৰিদ্ধং, দুক্খনিরোধং 240 অরিযসচ্চং অনুবুদ্ধং পটিৰিদ্ধং, দুক্খনিরোধগামিনী পটিপদা অরিযসচ্চং অনুবুদ্ধং পটিৰিদ্ধং। উচ্ছিন্না ভৰতণ্হা, খীণা ভৰনেত্তি, নত্থি দানি পুনব্ভৰো’’তি। ইদমৰোচ ভগৰা, ইদং ৰত্ৰান সুগতো, অথাপরং এতদৰোচ সত্থা –
‘‘Catunnaṃ, bhikkhave, ariyasaccānaṃ ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca…pe… tayidaṃ, bhikkhave, dukkhaṃ ariyasaccaṃ anubuddhaṃ paṭividdhaṃ, dukkhasamudayaṃ 241 ariyasaccaṃ anubuddhaṃ paṭividdhaṃ, dukkhanirodhaṃ 242 ariyasaccaṃ anubuddhaṃ paṭividdhaṃ, dukkhanirodhagāminī paṭipadā ariyasaccaṃ anubuddhaṃ paṭividdhaṃ. Ucchinnā bhavataṇhā, khīṇā bhavanetti, natthi dāni punabbhavo’’ti. Idamavoca bhagavā, idaṃ vatvāna sugato, athāparaṃ etadavoca satthā –
‘‘চতুন্নং অরিযসচ্চানং, যথাভূতং অদস্সনা।
‘‘Catunnaṃ ariyasaccānaṃ, yathābhūtaṃ adassanā;
‘‘তানি এতানি দিট্ঠানি, ভৰনেত্তি সমূহতা।
‘‘Tāni etāni diṭṭhāni, bhavanetti samūhatā;
উচ্ছিন্নং মূলং দুক্খস্স, নত্থি দানি পুনব্ভৰো’’তি॥
Ucchinnaṃ mūlaṃ dukkhassa, natthi dāni punabbhavo’’ti.
ইদং ঞেয্যং।
Idaṃ ñeyyaṃ.
তত্থ কতমং ঞাণঞ্চ ঞেয্যঞ্চ? রূপং অনিচ্চং, ৰেদনা অনিচ্চা, সঞ্ঞা অনিচ্চা, সঙ্খারা অনিচ্চা, ৰিঞ্ঞাণং অনিচ্চন্তি। ইদং ঞেয্যং।
Tattha katamaṃ ñāṇañca ñeyyañca? Rūpaṃ aniccaṃ, vedanā aniccā, saññā aniccā, saṅkhārā aniccā, viññāṇaṃ aniccanti. Idaṃ ñeyyaṃ.
এৰং জানং এৰং পস্সং অরিযসাৰকো ‘‘রূপং অনিচ্চ’’ন্তি পস্সতি, ‘‘ৰেদনা অনিচ্চা’’তি পস্সতি, ‘‘সঞ্ঞং…পে॰… সঙ্খারে…পে॰… ৰিঞ্ঞাণং অনিচ্চ’’ন্তি পস্সতীতি। ইদং ঞাণং।
Evaṃ jānaṃ evaṃ passaṃ ariyasāvako ‘‘rūpaṃ anicca’’nti passati, ‘‘vedanā aniccā’’ti passati, ‘‘saññaṃ…pe… saṅkhāre…pe… viññāṇaṃ anicca’’nti passatīti. Idaṃ ñāṇaṃ.
সো পরিমুচ্চতি রূপেন, পরিমুচ্চতি ৰেদনায, পরিমুচ্চতি সঞ্ঞায, পরিমুচ্চতি সঙ্খারেহি, পরিমুচ্চতি ৰিঞ্ঞাণম্হা, পরিমুচ্চতি দুক্খস্মাতি ৰদামীতি। ইদং ঞাণঞ্চ ঞেয্যঞ্চ।
So parimuccati rūpena, parimuccati vedanāya, parimuccati saññāya, parimuccati saṅkhārehi, parimuccati viññāṇamhā, parimuccati dukkhasmāti vadāmīti. Idaṃ ñāṇañca ñeyyañca.
‘‘সব্বে সঙ্খারা অনিচ্চা’’তি ইদং ঞেয্যং। ‘‘যদা পঞ্ঞায পস্সতী’’তি ইদং ঞাণং। ‘‘অথ নিব্বিন্দতি দুক্খে এস মগ্গো ৰিসুদ্ধিযা’’তি ইদং ঞাণঞ্চ ঞেয্যঞ্চ।
‘‘Sabbe saṅkhārā aniccā’’ti idaṃ ñeyyaṃ. ‘‘Yadā paññāya passatī’’ti idaṃ ñāṇaṃ. ‘‘Atha nibbindati dukkhe esa maggo visuddhiyā’’ti idaṃ ñāṇañca ñeyyañca.
‘‘সব্বে সঙ্খারা দুক্খা’’তি ইদং ঞেয্যং। ‘‘যদা পঞ্ঞায পস্সতী’’তি ইদং ঞাণং। ‘‘অথ নিব্বিন্দতি দুক্খে এস মগ্গো ৰিসুদ্ধিযা’’তি ইদং ঞাণঞ্চ ঞেয্যঞ্চ।
‘‘Sabbe saṅkhārā dukkhā’’ti idaṃ ñeyyaṃ. ‘‘Yadā paññāya passatī’’ti idaṃ ñāṇaṃ. ‘‘Atha nibbindati dukkhe esa maggo visuddhiyā’’ti idaṃ ñāṇañca ñeyyañca.
‘‘সব্বে ধম্মা অনত্তা’’তি ইদং ঞেয্যং। ‘‘যদা পঞ্ঞায পস্সতী’’তি ইদং ঞাণং। ‘‘অথ নিব্বিন্দতি দুক্খে এস মগ্গো ৰিসুদ্ধিযা’’তি ইদং ঞাণঞ্চ ঞেয্যঞ্চ।
‘‘Sabbe dhammā anattā’’ti idaṃ ñeyyaṃ. ‘‘Yadā paññāya passatī’’ti idaṃ ñāṇaṃ. ‘‘Atha nibbindati dukkhe esa maggo visuddhiyā’’ti idaṃ ñāṇañca ñeyyañca.
‘‘যে হি কেচি, সোণ 245, সমণা ৰা ব্রাহ্মণা ৰা অনিচ্চেন রূপেন দুক্খেন ৰিপরিণামধম্মেন ‘সেয্যোহমস্মী’তি ৰা সমনুপস্সন্তি, ‘সদিসোহমস্মী’তি ৰা সমনুপস্সন্তি, ‘হীনোহমস্মী’তি ৰা সমনুপস্সন্তি। কিমঞ্ঞত্র যথাভূতস্স অদস্সনা। অনিচ্চায ৰেদনায…পে॰… অনিচ্চায সঞ্ঞায…পে॰… অনিচ্চেহি সঙ্খারেহি…পে॰… অনিচ্চেন ৰিঞ্ঞাণেন দুক্খেন ৰিপরিণামধম্মেন ‘সেয্যোহমস্মী’তি ৰা সমনুপস্সন্তি, ‘সদিসোহমস্মী’তি ৰা সমনুপস্সন্তি, ‘হীনোহমস্মী’তি ৰা সমনুপস্সন্তি, কিমঞ্ঞত্র যথাভূতস্স অদস্সনা’’তি। ইদং ঞেয্যং।
‘‘Ye hi keci, soṇa 246, samaṇā vā brāhmaṇā vā aniccena rūpena dukkhena vipariṇāmadhammena ‘seyyohamasmī’ti vā samanupassanti, ‘sadisohamasmī’ti vā samanupassanti, ‘hīnohamasmī’ti vā samanupassanti. Kimaññatra yathābhūtassa adassanā. Aniccāya vedanāya…pe… aniccāya saññāya…pe… aniccehi saṅkhārehi…pe… aniccena viññāṇena dukkhena vipariṇāmadhammena ‘seyyohamasmī’ti vā samanupassanti, ‘sadisohamasmī’ti vā samanupassanti, ‘hīnohamasmī’ti vā samanupassanti, kimaññatra yathābhūtassa adassanā’’ti. Idaṃ ñeyyaṃ.
‘‘যে চ খো কেচি, সোণ, সমণা ৰা ব্রাহ্মণা ৰা অনিচ্চেন রূপেন দুক্খেন ৰিপরিণামধম্মেন ‘সেয্যোহমস্মী’তিপি ন সমনুপস্সন্তি, ‘সদিসোহমস্মী’তিপি ন সমনুপস্সন্তি, ‘হীনোহমস্মী’তিপি ন সমনুপস্সন্তি, কিমঞ্ঞত্র যথাভূতস্স দস্সনা। অনিচ্চায ৰেদনায…পে॰… অনিচ্চায সঞ্ঞায…পে॰… অনিচ্চেহি সঙ্খারেহি…পে॰… অনিচ্চেন ৰিঞ্ঞাণেন দুক্খেন ৰিপরিণামধম্মেন ‘সেয্যোহমস্মী’তিপি ন সমনুপস্সন্তি, ‘সদিসোহমস্মী’তিপি ন সমনুপস্সন্তি, ‘হীনোহমস্মী’তিপি ন সমনুপস্সন্তি, কিমঞ্ঞত্র যথাভূতস্স দস্সনাতি। ইদং ঞাণং।
‘‘Ye ca kho keci, soṇa, samaṇā vā brāhmaṇā vā aniccena rūpena dukkhena vipariṇāmadhammena ‘seyyohamasmī’tipi na samanupassanti, ‘sadisohamasmī’tipi na samanupassanti, ‘hīnohamasmī’tipi na samanupassanti, kimaññatra yathābhūtassa dassanā. Aniccāya vedanāya…pe… aniccāya saññāya…pe… aniccehi saṅkhārehi…pe… aniccena viññāṇena dukkhena vipariṇāmadhammena ‘seyyohamasmī’tipi na samanupassanti, ‘sadisohamasmī’tipi na samanupassanti, ‘hīnohamasmī’tipi na samanupassanti, kimaññatra yathābhūtassa dassanāti. Idaṃ ñāṇaṃ.
ইদং ঞাণঞ্চ ঞেয্যঞ্চ।
Idaṃ ñāṇañca ñeyyañca.
তত্থ কতমং দস্সনং?
Tattha katamaṃ dassanaṃ?
১১৫.
115.
‘‘যে অরিযসচ্চানি ৰিভাৰযন্তি, গম্ভীরপঞ্ঞেন সুদেসিতানি।
‘‘Ye ariyasaccāni vibhāvayanti, gambhīrapaññena sudesitāni.
কিঞ্চাপি তে হোন্তি ভুসং পমত্তা 247, ন তে ভৰং অট্ঠমমাদিযন্তী’’তি॥
Kiñcāpi te honti bhusaṃ pamattā 248, na te bhavaṃ aṭṭhamamādiyantī’’ti.
ইদং দস্সনং।
Idaṃ dassanaṃ.
‘‘যথিন্দখীলো পথৰিস্সিতো সিযা, চতুব্ভি ৰাতেহি অসম্পকম্পিযো।
‘‘Yathindakhīlo pathavissito siyā, catubbhi vātehi asampakampiyo;
তথূপমং সপ্পুরিসং ৰদামি, যো অরিযসচ্চানি অৰেচ্চ পস্সতী’’তি॥
Tathūpamaṃ sappurisaṃ vadāmi, yo ariyasaccāni avecca passatī’’ti.
ইদং দস্সনং।
Idaṃ dassanaṃ.
‘‘চতূহি, ভিক্খৰে, সোতাপত্তিযঙ্গেহি সমন্নাগতো অরিযসাৰকো আকঙ্খমানো অত্তনাৰ অত্তানং ব্যাকরেয্য ‘খীণনিরযোম্হি, খীণতিরচ্ছানযোনি, খীণপেত্তিৰিসযো, খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযণো, সত্তক্খত্তুপরমং 249 দেৰে চ মনুস্সে চ সন্ধাৰিত্ৰা সংসরিত্ৰা দুক্খস্সন্তং করিস্সামী’তি। কতমেহি চতূহি? ইধ, ভিক্খৰে, অরিযসাৰকস্স তথাগতে সদ্ধা নিৰিট্ঠা পতিট্ঠিতা ৰিরূল়্হা মূলজাতা অসংহারিযা সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং সহ ধম্মেন, ধম্মে খো পন নিট্ঠং গতো হোতি, স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহি, যদিদং মদনিম্মদনো…পে॰… নিরোধো নিব্বানং, সহ ধম্মিযা খো পনস্স হোন্তি ইট্ঠা কন্তা পিযা মনাপা গিহী চেৰ পব্বজিতা চ। অরিযকন্তেহি খো পন সীলেহি সমন্নাগতো হোতি অখণ্ডেহি অচ্ছিদ্দেহি অসবলেহি অকম্মাসেহি ভুজিস্সেহি ৰিঞ্ঞুপ্পসট্ঠেহি অপরামট্ঠেহি সমাধিসংৰত্তনিকেহি। ইমেহি খো, ভিক্খৰে, চতূহি সোতাপত্তিযঙ্গেহি সমন্নাগতো অরিযসাৰকো আকঙ্খমানো অত্তনাৰ অত্তানং ব্যাকরেয্য ‘খীণনিরযোম্হি, খীণতিরচ্ছানযোনি, খীণপেত্তিৰিসযো, খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযণো, সত্তক্খত্তুপরমং দেৰে চ মনুস্সে চ সন্ধাৰিত্ৰা সংসরিত্ৰা দুক্খস্সন্তং করিস্সামী’’’তি।
‘‘Catūhi, bhikkhave, sotāpattiyaṅgehi samannāgato ariyasāvako ākaṅkhamāno attanāva attānaṃ byākareyya ‘khīṇanirayomhi, khīṇatiracchānayoni, khīṇapettivisayo, khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo, sattakkhattuparamaṃ 250 deve ca manusse ca sandhāvitvā saṃsaritvā dukkhassantaṃ karissāmī’ti. Katamehi catūhi? Idha, bhikkhave, ariyasāvakassa tathāgate saddhā niviṭṭhā patiṭṭhitā virūḷhā mūlajātā asaṃhāriyā samaṇena vā brāhmaṇena vā devena vā mārena vā brahmunā vā kenaci vā lokasmiṃ saha dhammena, dhamme kho pana niṭṭhaṃ gato hoti, svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhi, yadidaṃ madanimmadano…pe… nirodho nibbānaṃ, saha dhammiyā kho panassa honti iṭṭhā kantā piyā manāpā gihī ceva pabbajitā ca. Ariyakantehi kho pana sīlehi samannāgato hoti akhaṇḍehi acchiddehi asabalehi akammāsehi bhujissehi viññuppasaṭṭhehi aparāmaṭṭhehi samādhisaṃvattanikehi. Imehi kho, bhikkhave, catūhi sotāpattiyaṅgehi samannāgato ariyasāvako ākaṅkhamāno attanāva attānaṃ byākareyya ‘khīṇanirayomhi, khīṇatiracchānayoni, khīṇapettivisayo, khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo, sattakkhattuparamaṃ deve ca manusse ca sandhāvitvā saṃsaritvā dukkhassantaṃ karissāmī’’’ti.
ইদং দস্সনং।
Idaṃ dassanaṃ.
তত্থ কতমা ভাৰনা?
Tattha katamā bhāvanā?
‘‘যস্সিন্দ্রিযানি ভাৰিতানি 251, অজ্ঝত্তং বহিদ্ধা চ সব্বলোকে।
‘‘Yassindriyāni bhāvitāni 252, ajjhattaṃ bahiddhā ca sabbaloke;
নিব্বিজ্ঝ ইমং পরঞ্চ লোকং, কালং কঙ্খতি ভাৰিতো সদন্তো’’তি॥
Nibbijjha imaṃ parañca lokaṃ, kālaṃ kaṅkhati bhāvito sadanto’’ti.
অযং ভাৰনা।
Ayaṃ bhāvanā.
‘‘চত্তারিমানি, ভিক্খৰে, ধম্মপদানি 253। কতমানি চত্তারি? অনভিজ্ঝা ধম্মপদং, অব্যাপাদো ধম্মপদং, সম্মাসতি ধম্মপদং, সম্মাসমাধি ধম্মপদং, ইমানি খো, ভিক্খৰে, চত্তারি ধম্মপদানী’’তি। অযং ভাৰনা।
‘‘Cattārimāni, bhikkhave, dhammapadāni 254. Katamāni cattāri? Anabhijjhā dhammapadaṃ, abyāpādo dhammapadaṃ, sammāsati dhammapadaṃ, sammāsamādhi dhammapadaṃ, imāni kho, bhikkhave, cattāri dhammapadānī’’ti. Ayaṃ bhāvanā.
তত্থ কতমং দস্সনঞ্চ ভাৰনা চ? ‘‘পঞ্চ ছিন্দে পঞ্চ জহে’’তি ইদং দস্সনং। ‘‘পঞ্চ চুত্তরি ভাৰযে। পঞ্চ সঙ্গাতিগো ভিক্খু, ওঘতিণ্ণোতি ৰুচ্চতী’’তি অযং ভাৰনা। ইদং দস্সনঞ্চ ভাৰনা চ।
Tattha katamaṃ dassanañca bhāvanā ca? ‘‘Pañca chinde pañca jahe’’ti idaṃ dassanaṃ. ‘‘Pañca cuttari bhāvaye. Pañca saṅgātigo bhikkhu, oghatiṇṇoti vuccatī’’ti ayaṃ bhāvanā. Idaṃ dassanañca bhāvanā ca.
‘‘তীণিমানি, ভিক্খৰে, ইন্দ্রিযানি 255। কতমানি তীণি, অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযং। কতমঞ্চ, ভিক্খৰে, অনঞ্ঞাতঞ্ঞস্সামীতিন্দ্রিযং? ইধ, ভিক্খৰে, ভিক্খু অনভিসমেতস্স দুক্খস্স অরিযসচ্চস্স অভিসমযায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি, অনভিসমেতস্স দুক্খসমুদযস্স অরিযসচ্চস্স…পে॰… দুক্খনিরোধস্স…পে॰… দুক্খনিরোধগামিনিযা পটিপদায অরিযসচ্চস্স অভিসমযায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি। ইদং, ভিক্খৰে, অনঞ্ঞাতঞ্ঞস্সামীতিন্দ্রিয’’ন্তি। ইদং দস্সনং।
‘‘Tīṇimāni, bhikkhave, indriyāni 256. Katamāni tīṇi, anaññātaññassāmītindriyaṃ aññindriyaṃ aññātāvindriyaṃ. Katamañca, bhikkhave, anaññātaññassāmītindriyaṃ? Idha, bhikkhave, bhikkhu anabhisametassa dukkhassa ariyasaccassa abhisamayāya chandaṃ janeti vāyamati vīriyaṃ ārabhati cittaṃ paggaṇhāti padahati, anabhisametassa dukkhasamudayassa ariyasaccassa…pe… dukkhanirodhassa…pe… dukkhanirodhagāminiyā paṭipadāya ariyasaccassa abhisamayāya chandaṃ janeti vāyamati vīriyaṃ ārabhati cittaṃ paggaṇhāti padahati. Idaṃ, bhikkhave, anaññātaññassāmītindriya’’nti. Idaṃ dassanaṃ.
‘‘কতমঞ্চ, ভিক্খৰে, অঞ্ঞিন্দ্রিযং? ইধ, ভিক্খৰে, ভিক্খু ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি…পে॰… ‘অযং দুক্খনিরোধগামিনী পটিপদা’তি যথাভূতং পজানাতি। ইদং, ভিক্খৰে, অঞ্ঞিন্দ্রিযং।
‘‘Katamañca, bhikkhave, aññindriyaṃ? Idha, bhikkhave, bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Idaṃ, bhikkhave, aññindriyaṃ.
‘‘কতমঞ্চ , ভিক্খৰে, অঞ্ঞাতাৰিন্দ্রিযং? ইধ, ভিক্খৰে, ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি, খীণা জাতি, ৰুসিতং ব্রহ্মচরিযং, কতং করণীযং নাপরং ইত্থত্তাযাতি পজানাতি। ইদং, ভিক্খৰে, অঞ্ঞাতাৰিন্দ্রিয’’ন্তি। অযং ভাৰনা।
‘‘Katamañca , bhikkhave, aññātāvindriyaṃ? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyāti pajānāti. Idaṃ, bhikkhave, aññātāvindriya’’nti. Ayaṃ bhāvanā.
ইদং দস্সনঞ্চ ভাৰনা চ।
Idaṃ dassanañca bhāvanā ca.
১১৬. তত্থ কতমং সকৰচনং?
116. Tattha katamaṃ sakavacanaṃ?
‘‘সব্বপাপস্স অকরণং, কুসলস্স উপসম্পদা।
‘‘Sabbapāpassa akaraṇaṃ, kusalassa upasampadā;
সচিত্তপরিযোদাপনং, এতং বুদ্ধান সাসন’’ন্তি॥
Sacittapariyodāpanaṃ, etaṃ buddhāna sāsana’’nti.
ইদং সকৰচনং।
Idaṃ sakavacanaṃ.
‘‘তীণিমানি, ভিক্খৰে, বালস্স বাললক্খণানি বালনিমিত্তানি বালাপদানানি, যেহি বালং বালোতি পরে সঞ্জানন্তি। কতমানি তীণি? বালো, ভিক্খৰে, দুচ্চিন্তিতচিন্তী চ হোতি, দুব্ভাসিতভাসী চ হোতি, দুক্কটকম্মকারী 257 চ হোতি। ইমানি খো, ভিক্খৰে, তীণি বালস্স বাললক্খণানি বালনিমিত্তানি বালাপদানানি।
‘‘Tīṇimāni, bhikkhave, bālassa bālalakkhaṇāni bālanimittāni bālāpadānāni, yehi bālaṃ bāloti pare sañjānanti. Katamāni tīṇi? Bālo, bhikkhave, duccintitacintī ca hoti, dubbhāsitabhāsī ca hoti, dukkaṭakammakārī 258 ca hoti. Imāni kho, bhikkhave, tīṇi bālassa bālalakkhaṇāni bālanimittāni bālāpadānāni.
‘‘তীণিমানি , ভিক্খৰে, পণ্ডিতস্স পণ্ডিতলক্খণানি পণ্ডিতনিমিত্তানি পণ্ডিতাপদানানি, যেহি পণ্ডিতং পণ্ডিতোতি পরে সঞ্জানন্তি। কতমানি তীণি? পণ্ডিতো, ভিক্খৰে, সুচিন্তিতচিন্তী চ হোতি, সুভাসিতভাসী চ হোতি, সুকতকম্মকারী চ হোতি। ইমানি খো, ভিক্খৰে, তীণি পণ্ডিতস্স পণ্ডিতলক্খণানি পণ্ডিতনিমিত্তানি পণ্ডিতাপদানানী’’তি।
‘‘Tīṇimāni , bhikkhave, paṇḍitassa paṇḍitalakkhaṇāni paṇḍitanimittāni paṇḍitāpadānāni, yehi paṇḍitaṃ paṇḍitoti pare sañjānanti. Katamāni tīṇi? Paṇḍito, bhikkhave, sucintitacintī ca hoti, subhāsitabhāsī ca hoti, sukatakammakārī ca hoti. Imāni kho, bhikkhave, tīṇi paṇḍitassa paṇḍitalakkhaṇāni paṇḍitanimittāni paṇḍitāpadānānī’’ti.
ইদং সকৰচনং।
Idaṃ sakavacanaṃ.
তত্থ কতমং পরৰচনং?
Tattha katamaṃ paravacanaṃ?
‘‘পথৰীসমো নত্থি ৰিত্থতো, নিন্নো পাতালসমো ন ৰিজ্জতি।
‘‘Pathavīsamo natthi vitthato, ninno pātālasamo na vijjati;
মেরুসমো নত্থি উন্নতো, চক্কৰত্তিসদিসো নত্থি পোরিসো’’তি॥
Merusamo natthi unnato, cakkavattisadiso natthi poriso’’ti.
ইদং পরৰচনং।
Idaṃ paravacanaṃ.
‘‘‘হোতু , দেৰানমিন্দ, সুভাসিতেন জযোতি। হোতু, ৰেপচিত্তি সুভাসিতেন জযোতি। ভণ, ৰেপচিত্তি, গাথ’ন্তি। অথ খো, ভিক্খৰে, ৰেপচিত্তি অসুরিন্দো ইমং গাথং অভাসি –
‘‘‘Hotu , devānaminda, subhāsitena jayoti. Hotu, vepacitti subhāsitena jayoti. Bhaṇa, vepacitti, gātha’nti. Atha kho, bhikkhave, vepacitti asurindo imaṃ gāthaṃ abhāsi –
‘‘ভিয্যো বালা পভিজ্জেয্যুং 259, নো চস্স পটিসেধকো।
‘‘Bhiyyo bālā pabhijjeyyuṃ 260, no cassa paṭisedhako;
তস্মা ভুসেন দণ্ডেন, ধীরো বালং নিসেধযে’’তি॥
Tasmā bhusena daṇḍena, dhīro bālaṃ nisedhaye’’ti.
‘‘ভাসিতায খো পন, ভিক্খৰে, ৰেপচিত্তিনা অসুরিন্দেন গাথায অসুরা অনুমোদিংসু, দেৰা তুণ্হী অহেসুং। অথ খো, ভিক্খৰে, ৰেপচিত্তি অসুরিন্দো সক্কং দেৰানমিন্দং এতদৰোচ ‘ভণ, দেৰানমিন্দ, গাথ’ন্তি। এৰং ৰুত্তে, ভিক্খৰে, সক্কো দেৰানমিন্দো ইমং গাথং অভাসি –
‘‘Bhāsitāya kho pana, bhikkhave, vepacittinā asurindena gāthāya asurā anumodiṃsu, devā tuṇhī ahesuṃ. Atha kho, bhikkhave, vepacitti asurindo sakkaṃ devānamindaṃ etadavoca ‘bhaṇa, devānaminda, gātha’nti. Evaṃ vutte, bhikkhave, sakko devānamindo imaṃ gāthaṃ abhāsi –
‘‘এতদেৰ অহং মঞ্ঞে, বালস্স পটিসেধনং।
‘‘Etadeva ahaṃ maññe, bālassa paṭisedhanaṃ;
পরং সঙ্কুপিতং ঞত্ৰা, যো সতো উপসম্মতী’’তি॥
Paraṃ saṅkupitaṃ ñatvā, yo sato upasammatī’’ti.
‘‘ভাসিতায খো পন, ভিক্খৰে, সক্কেন দেৰানমিন্দেন গাথায দেৰা অনুমোদিংসু, অসুরা তুণ্হী অহেসুং। অথ খো, ভিক্খৰে, সক্কো দেৰানমিন্দো ৰেপচিত্তিং অসুরিন্দং এতদৰোচ ‘ভণ, ৰেপচিত্তি, গাথ’ন্তি। এৰং ৰুত্তে, ভিক্খৰে, ৰেপচিত্তি অসুরিন্দো ইমং গাথং অভাসি –
‘‘Bhāsitāya kho pana, bhikkhave, sakkena devānamindena gāthāya devā anumodiṃsu, asurā tuṇhī ahesuṃ. Atha kho, bhikkhave, sakko devānamindo vepacittiṃ asurindaṃ etadavoca ‘bhaṇa, vepacitti, gātha’nti. Evaṃ vutte, bhikkhave, vepacitti asurindo imaṃ gāthaṃ abhāsi –
‘‘এতদেৰ তিতিক্খায, ৰজ্জং পস্সামি ৰাসৰ।
‘‘Etadeva titikkhāya, vajjaṃ passāmi vāsava;
অজ্ঝারুহতি দুম্মেধো, গোৰ ভিয্যো পলাযিন’’ন্তি॥
Ajjhāruhati dummedho, gova bhiyyo palāyina’’nti.
‘‘ভাসিতায খো পন, ভিক্খৰে, ৰেপচিত্তিনা অসুরিন্দেন গাথায অসুরা অনুমোদিংসু, দেৰা তুণ্হী অহেসুং। অথ খো ৰেপচিত্তি অসুরিন্দো সক্কং দেৰানমিন্দং এতদৰোচ ‘ভণ, দেৰানমিন্দ, গাথ’ন্তি। এৰং ৰুত্তে, ভিক্খৰে, সক্কো দেৰানমিন্দো ইমা গাথাযো অভাসি –
‘‘Bhāsitāya kho pana, bhikkhave, vepacittinā asurindena gāthāya asurā anumodiṃsu, devā tuṇhī ahesuṃ. Atha kho vepacitti asurindo sakkaṃ devānamindaṃ etadavoca ‘bhaṇa, devānaminda, gātha’nti. Evaṃ vutte, bhikkhave, sakko devānamindo imā gāthāyo abhāsi –
‘‘কামং মঞ্ঞতু ৰা মা ৰা, ভযা ম্যাযং তিতিক্খতি।
‘‘Kāmaṃ maññatu vā mā vā, bhayā myāyaṃ titikkhati;
সদত্থপরমা অত্থা, খন্তা ভিয্যো ন ৰিজ্জতি॥
Sadatthaparamā atthā, khantā bhiyyo na vijjati.
‘‘যো হৰে বলৰা সন্তো, দুব্বলস্স তিতিক্খতি।
‘‘Yo have balavā santo, dubbalassa titikkhati;
তমাহু পরমং খন্তিং, নিচ্চং খমতি দুব্বলো॥
Tamāhu paramaṃ khantiṃ, niccaṃ khamati dubbalo.
‘‘অবলং তং বলং আহু, যস্স বালবলং বলং।
‘‘Abalaṃ taṃ balaṃ āhu, yassa bālabalaṃ balaṃ;
বলস্স ধম্মগুত্তস্স, পটিৰত্তা ন ৰিজ্জতি॥
Balassa dhammaguttassa, paṭivattā na vijjati.
‘‘তস্সেৰ তেন পাপিযো, যো কুদ্ধং পটিকুজ্ঝতি।
‘‘Tasseva tena pāpiyo, yo kuddhaṃ paṭikujjhati;
কুদ্ধং অপ্পটিকুজ্ঝন্তো, সঙ্গামং জেতি দুজ্জযং॥
Kuddhaṃ appaṭikujjhanto, saṅgāmaṃ jeti dujjayaṃ.
‘‘উভিন্নমত্থং চরতি, অত্তনো চ পরস্স চ।
‘‘Ubhinnamatthaṃ carati, attano ca parassa ca;
পরং সঙ্কুপিতং ঞত্ৰা, যো সতো উপসম্মতি॥
Paraṃ saṅkupitaṃ ñatvā, yo sato upasammati.
‘‘উভিন্নং তিকিচ্ছন্তানং, অত্তনো চ পরস্স চ।
‘‘Ubhinnaṃ tikicchantānaṃ, attano ca parassa ca;
জনা মঞ্ঞন্তি বালোতি, যে ধম্মস্স অকোৰিদা’’তি॥
Janā maññanti bāloti, ye dhammassa akovidā’’ti.
‘‘ভাসিতাসু খো পন, ভিক্খৰে, সক্কেন দেৰানমিন্দেন গাথাসু দেৰা অনুমোদিংসু, অসুরা তুণ্হী অহেসু’’ন্তি। ইদং পরৰচনং।
‘‘Bhāsitāsu kho pana, bhikkhave, sakkena devānamindena gāthāsu devā anumodiṃsu, asurā tuṇhī ahesu’’nti. Idaṃ paravacanaṃ.
১১৭. তত্থ কতমং সকৰচনঞ্চ পরৰচনঞ্চ?
117. Tattha katamaṃ sakavacanañca paravacanañca?
যঞ্চ পত্তং যঞ্চ পত্তব্বং উভযমেতং রজানুকিণ্ণং আতুরস্সানুসিক্খতো। যে চ সিক্খাসারা সীলং ৰতং জীৰিতং ব্রহ্মচরিযং উপট্ঠানসারা, অযমেকো অন্তো। যে চ এৰংৰাদিনো এৰংদিট্ঠিনো ‘‘নত্থি কামেসু দোসো’’তি, অযং দুতিযো অন্তো। ইচ্চেতে উভো অন্তা কটসিৰড্ঢনা কটসিযো দিট্ঠিং ৰড্ঢেন্তি। এতে উভো অন্তে অনভিঞ্ঞায ওলীযন্তি একে অতিধাৰন্তি একেতি। ইদং পরৰচনং।
Yañca pattaṃ yañca pattabbaṃ ubhayametaṃ rajānukiṇṇaṃ āturassānusikkhato. Ye ca sikkhāsārā sīlaṃ vataṃ jīvitaṃ brahmacariyaṃ upaṭṭhānasārā, ayameko anto. Ye ca evaṃvādino evaṃdiṭṭhino ‘‘natthi kāmesu doso’’ti, ayaṃ dutiyo anto. Iccete ubho antā kaṭasivaḍḍhanā kaṭasiyo diṭṭhiṃ vaḍḍhenti. Ete ubho ante anabhiññāya olīyanti eke atidhāvanti eketi. Idaṃ paravacanaṃ.
যে চ খো তে উভো অন্তে অভিঞ্ঞায তত্র চ ন অহেসুং, তেন চ অমঞ্ঞিংসু, ৰট্টং তেসং নত্থি পঞ্ঞাপনাযাতি। ইদং সকৰচনং। অযং উদানো সকৰচনঞ্চ পরৰচনঞ্চ।
Ye ca kho te ubho ante abhiññāya tatra ca na ahesuṃ, tena ca amaññiṃsu, vaṭṭaṃ tesaṃ natthi paññāpanāyāti. Idaṃ sakavacanaṃ. Ayaṃ udāno sakavacanañca paravacanañca.
রাজা পসেনদি 263 কোসলো ভগৰন্তং এতদৰোচ – ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি ‘‘কেসং নু খো পিযো অত্তা, কেসং অপ্পিযো অত্তা’’তি। তস্স ময্হং, ভন্তে, এতদহোসি ‘‘যে চ খো কেচি কাযেন দুচ্চরিতং চরন্তি, ৰাচায দুচ্চরিতং চরন্তি, মনসা দুচ্চরিতং চরন্তি, তেসং অপ্পিযো অত্তা। কিঞ্চাপি তে এৰং ৰদেয্যুং ‘পিযো নো অত্তা’তি, অথ খো তেসং অপ্পিযো অত্তা। তং কিস্স হেতু? যং হি অপ্পিযো অপ্পিযস্স করেয্য, তং তে অত্তনাৰ অত্তনো করোন্তি, তস্মা তেসং অপ্পিযো অত্তা। যে চ খো কেচি কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি, তেসং পিযো অত্তা। কিঞ্চাপি তে এৰং ৰদেয্যুং ‘অপ্পিযো নো অত্তা’তি, অথ খো তেসং পিযো অত্তা। তং কিস্স হেতু? যং হি পিযো পিযস্স করেয্য । তং তে অত্তনাৰ অত্তনো করোন্তি। তস্মা তেসং পিযো অত্তা’’তি।
Rājā pasenadi 264 kosalo bhagavantaṃ etadavoca – idha mayhaṃ, bhante, rahogatassa paṭisallīnassa evaṃ cetaso parivitakko udapādi ‘‘kesaṃ nu kho piyo attā, kesaṃ appiyo attā’’ti. Tassa mayhaṃ, bhante, etadahosi ‘‘ye ca kho keci kāyena duccaritaṃ caranti, vācāya duccaritaṃ caranti, manasā duccaritaṃ caranti, tesaṃ appiyo attā. Kiñcāpi te evaṃ vadeyyuṃ ‘piyo no attā’ti, atha kho tesaṃ appiyo attā. Taṃ kissa hetu? Yaṃ hi appiyo appiyassa kareyya, taṃ te attanāva attano karonti, tasmā tesaṃ appiyo attā. Ye ca kho keci kāyena sucaritaṃ caranti, vācāya sucaritaṃ caranti, manasā sucaritaṃ caranti, tesaṃ piyo attā. Kiñcāpi te evaṃ vadeyyuṃ ‘appiyo no attā’ti, atha kho tesaṃ piyo attā. Taṃ kissa hetu? Yaṃ hi piyo piyassa kareyya . Taṃ te attanāva attano karonti. Tasmā tesaṃ piyo attā’’ti.
‘‘এৰমেতং, মহারাজ, এৰমেতং, মহারাজ, যে হি কেচি, মহারাজ, কাযেন দুচ্চরিতং চরন্তি, ৰাচায দুচ্চরিতং চরন্তি, মনসা দুচ্চরিতং চরন্তি তস্মা তেসং অপ্পিযো অত্তা। কিঞ্চাপি তে এৰং ৰদেয্যুং ‘পিযো নো অত্তা’তি, অথ খো তেসং অপ্পিযো অত্তা। তং কিস্স হেতু? যং হি, মহারাজ, অপ্পিযো অপ্পিযস্স করেয্য, তং তে অত্তনাৰ অত্তনো করোন্তি, তস্মা তেসং অপ্পিযো অত্তা। যে চ খো কেচি মহারাজ কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি, তেসং পিযো অত্তা। কিঞ্চাপি তে এৰং ৰদেয্যুং ‘অপ্পিযো নো অত্তা’তি, অথ খো তেসং পিযো অত্তা। তং কিস্স হেতু? যং হি, মহারাজ, পিযো পিযস্স করেয্য, তং তে অত্তনাৰ অত্তনো করোন্তি, তস্মা তেসং পিযো অত্তাতি। ইদমৰোচ ভগৰা…পে॰… সত্থা –
‘‘Evametaṃ, mahārāja, evametaṃ, mahārāja, ye hi keci, mahārāja, kāyena duccaritaṃ caranti, vācāya duccaritaṃ caranti, manasā duccaritaṃ caranti tasmā tesaṃ appiyo attā. Kiñcāpi te evaṃ vadeyyuṃ ‘piyo no attā’ti, atha kho tesaṃ appiyo attā. Taṃ kissa hetu? Yaṃ hi, mahārāja, appiyo appiyassa kareyya, taṃ te attanāva attano karonti, tasmā tesaṃ appiyo attā. Ye ca kho keci mahārāja kāyena sucaritaṃ caranti, vācāya sucaritaṃ caranti, manasā sucaritaṃ caranti, tesaṃ piyo attā. Kiñcāpi te evaṃ vadeyyuṃ ‘appiyo no attā’ti, atha kho tesaṃ piyo attā. Taṃ kissa hetu? Yaṃ hi, mahārāja, piyo piyassa kareyya, taṃ te attanāva attano karonti, tasmā tesaṃ piyo attāti. Idamavoca bhagavā…pe… satthā –
‘‘অত্তানঞ্চে পিযং জঞ্ঞা, ন নং পাপেন সংযুজে।
‘‘Attānañce piyaṃ jaññā, na naṃ pāpena saṃyuje;
ন হি তং সুলভং হোতি, সুখং দুক্কটকারিনা॥
Na hi taṃ sulabhaṃ hoti, sukhaṃ dukkaṭakārinā.
কিং হি তস্স সকং হোতি, কিঞ্চ আদায গচ্ছতি।
Kiṃ hi tassa sakaṃ hoti, kiñca ādāya gacchati;
কিঞ্চস্স অনুগং হোতি, ছাযাৰ অনপাযিনী॥
Kiñcassa anugaṃ hoti, chāyāva anapāyinī.
‘‘উভো পুঞ্ঞঞ্চ পাপঞ্চ, যং মচ্চো কুরুতে ইধ।
‘‘Ubho puññañca pāpañca, yaṃ macco kurute idha;
তঞ্হি তস্স সকং হোতি, তংৰ আদায গচ্ছতি।
Tañhi tassa sakaṃ hoti, taṃva ādāya gacchati;
তংৰস্স অনুগং হোতি, ছাযাৰ অনপাযিনী॥
Taṃvassa anugaṃ hoti, chāyāva anapāyinī.
‘‘তস্মা করেয্য কল্যাণং, নিচযং সম্পরাযিকং।
‘‘Tasmā kareyya kalyāṇaṃ, nicayaṃ samparāyikaṃ;
পুঞ্ঞানি পরলোকস্মিং, পতিট্ঠা হোন্তি পাণিন’’ন্তি॥
Puññāni paralokasmiṃ, patiṭṭhā honti pāṇina’’nti.
ইদং সুত্তং পরৰচনং। অনুগীতি সকৰচনং। ইদং সকৰচনঞ্চ পরৰচনঞ্চ।
Idaṃ suttaṃ paravacanaṃ. Anugīti sakavacanaṃ. Idaṃ sakavacanañca paravacanañca.
১১৮. তত্থ কতমং ৰিসজ্জনীযং?
118. Tattha katamaṃ visajjanīyaṃ?
পঞ্হে পুচ্ছিতে ইদং অভিঞ্ঞেয্যং, ইদং পরিঞ্ঞেয্যং, ইদং পহাতব্বং, ইদং ভাৰেতব্বং, ইদং সচ্ছিকাতব্বং, ইমে ধম্মা এৰংগহিতা ইদং ফলং নিব্বত্তযন্তি। তেসং এৰংগহিতানং অযমত্থো ইতি ইদং ৰিসজ্জনীযং। ‘‘উল়ারো বুদ্ধো ভগৰা’’তি বুদ্ধউল়ারতং ধম্মস্ৰাক্খাততং সঙ্ঘসুপ্পটিপত্তিঞ্চ একংসেনেৰ নিদ্দিসে। ‘‘সব্বে সঙ্খারা অনিচ্চা’’তি ‘‘সব্বে সঙ্খারা দুক্খা’’তি ‘‘সব্বে ধম্মা অনত্তা’’তি একংসেনেৰ নিদ্দিসে। যং ৰা পনঞ্ঞম্পি এৰং জাতিযং। ইদং ৰিসজ্জনীযং।
Pañhe pucchite idaṃ abhiññeyyaṃ, idaṃ pariññeyyaṃ, idaṃ pahātabbaṃ, idaṃ bhāvetabbaṃ, idaṃ sacchikātabbaṃ, ime dhammā evaṃgahitā idaṃ phalaṃ nibbattayanti. Tesaṃ evaṃgahitānaṃ ayamattho iti idaṃ visajjanīyaṃ. ‘‘Uḷāro buddho bhagavā’’ti buddhauḷārataṃ dhammasvākkhātataṃ saṅghasuppaṭipattiñca ekaṃseneva niddise. ‘‘Sabbe saṅkhārā aniccā’’ti ‘‘sabbe saṅkhārā dukkhā’’ti ‘‘sabbe dhammā anattā’’ti ekaṃseneva niddise. Yaṃ vā panaññampi evaṃ jātiyaṃ. Idaṃ visajjanīyaṃ.
তত্থ কতমং অৰিসজ্জনীযং?
Tattha katamaṃ avisajjanīyaṃ?
‘‘আকঙ্খতো তে নরদম্মসারথি 267, দেৰা মনুস্সা মনসা ৰিচিন্তিতং।
‘‘Ākaṅkhato te naradammasārathi 268, devā manussā manasā vicintitaṃ;
সব্বে ন জঞ্ঞা কসিণাপি পাণিনো, সন্তং সমাধিং অরণং নিসেৰতো।
Sabbe na jaññā kasiṇāpi pāṇino, santaṃ samādhiṃ araṇaṃ nisevato;
কিন্তং ভগৰা আকঙ্খতী’’তি॥
Kintaṃ bhagavā ākaṅkhatī’’ti.
ইদং অৰিসজ্জনীযং।
Idaṃ avisajjanīyaṃ.
এত্তকো ভগৰা সীলক্খন্ধে সমাধিক্খন্ধে পঞ্ঞাক্খন্ধে ৰিমুত্তিক্খন্ধে ৰিমুত্তিঞাণদস্সনক্খন্ধে ইরিযাযং পভাৰে হিতেসিতাযং করুণাযং ইদ্ধিযন্তি। ইদং অৰিসজ্জনীযং।
Ettako bhagavā sīlakkhandhe samādhikkhandhe paññākkhandhe vimuttikkhandhe vimuttiñāṇadassanakkhandhe iriyāyaṃ pabhāve hitesitāyaṃ karuṇāyaṃ iddhiyanti. Idaṃ avisajjanīyaṃ.
‘‘তথাগতস্স, ভিক্খৰে, অরহতো সম্মাসম্বুদ্ধস্স লোকে উপ্পাদা তিণ্ণং রতনানং উপ্পাদো বুদ্ধরতনস্স ধম্মরতনস্স সঙ্ঘরতনস্স’’। কিং পমাণানি তীণি রতনানীতি? ইদং অৰিসজ্জনীযং।
‘‘Tathāgatassa, bhikkhave, arahato sammāsambuddhassa loke uppādā tiṇṇaṃ ratanānaṃ uppādo buddharatanassa dhammaratanassa saṅgharatanassa’’. Kiṃ pamāṇāni tīṇi ratanānīti? Idaṃ avisajjanīyaṃ.
বুদ্ধৰিসযো অৰিসজ্জনীযো। পুগ্গলপরোপরঞ্ঞুতা অৰিসজ্জনীযা। ‘‘পুব্বা, ভিক্খৰে, কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সকিং নিরযং সকিং তিরচ্ছানযোনিং সকিং পেত্তিৰিসযং সকিং অসুরযোনিং সকিং দেৰে সকিং মনুস্সে সন্ধাৰিতং সংসরিতং’’। কতমা পুব্বা কোটীতি অৰিসজ্জনীযং। ন পঞ্ঞাযতীতি সাৰকানং ঞাণৰেকল্লেন। দুৰিধা বুদ্ধানং ভগৰন্তানং দেসনা অত্তূপনাযিকা চ পরূপনাযিকা চ। ন পঞ্ঞাযতীতি পরূপনাযিকা। নত্থি বুদ্ধানং ভগৰন্তানং অৰিজাননাতি 269 অত্তূপনাযিকা। যথা ভগৰা কোকালিকং ভিক্খুং আরব্ভ অঞ্ঞতরং ভিক্খুং এৰমাহ –
Buddhavisayo avisajjanīyo. Puggalaparoparaññutā avisajjanīyā. ‘‘Pubbā, bhikkhave, koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sakiṃ nirayaṃ sakiṃ tiracchānayoniṃ sakiṃ pettivisayaṃ sakiṃ asurayoniṃ sakiṃ deve sakiṃ manusse sandhāvitaṃ saṃsaritaṃ’’. Katamā pubbā koṭīti avisajjanīyaṃ. Na paññāyatīti sāvakānaṃ ñāṇavekallena. Duvidhā buddhānaṃ bhagavantānaṃ desanā attūpanāyikā ca parūpanāyikā ca. Na paññāyatīti parūpanāyikā. Natthi buddhānaṃ bhagavantānaṃ avijānanāti 270 attūpanāyikā. Yathā bhagavā kokālikaṃ bhikkhuṃ ārabbha aññataraṃ bhikkhuṃ evamāha –
‘‘সেয্যথাপি , ভিক্খু, ৰীসতিখারিকো কোসলকো তিলৰাহো…পে॰… ন ত্ৰেৰ একো অব্বুদো নিরযো। সেয্যথাপি ভিক্খু, ৰীসতি অব্বুদা নিরযা, এৰমেকো নিরব্বুদো নিরযো 271। সেয্যথাপি, ভিক্খু, ৰীসতি নিরব্বুদা নিরযা, এৰমেকো অববো নিরযো। সেয্যথাপি, ভিক্খু, ৰীসতি অববা নিরযা, এৰমেকো অটটো নিরযো। সেয্যথাপি, ভিক্খু, ৰীসতি অটটা নিরযা, এৰমেকো অহহো নিরযো। সেয্যথাপি, ভিক্খু, ৰীসতি অহহা নিরযা, এৰমেকো কুমুদো নিরযো। সেয্যথাপি, ভিক্খু, ৰীসতি কুমুদা নিরযা, এৰমেকো সোগন্ধিকো নিরযো। সেয্যথাপি, ভিক্খু, ৰীসতি সোগন্ধিকা নিরযা, এৰমেকো উপ্পলকো নিরযো 272। সেয্যথাপি, ভিক্খু, ৰীসতি উপ্পলকা নিরযা, এৰমেকো পুণ্ডরীকো নিরযো। সেয্যথাপি, ভিক্খু, ৰীসতি পুণ্ডরীকা নিরযা, এৰমেকো পদুমো নিরযো। পদুমে পন, ভিক্খু, নিরযে কোকালিকো ভিক্খু উপপন্নো সারিপুত্তমোগ্গল্লানেসু চিত্তং আঘাতেত্ৰা’’তি। যং ৰা পন কিঞ্চি ভগৰা আহ ‘‘অযং অপ্পমেয্যো অসঙ্খ্যেযো’’তি। সব্বং তং অৰিসজ্জনীযং। ইদং অৰিসজ্জনীযং।
‘‘Seyyathāpi , bhikkhu, vīsatikhāriko kosalako tilavāho…pe… na tveva eko abbudo nirayo. Seyyathāpi bhikkhu, vīsati abbudā nirayā, evameko nirabbudo nirayo 273. Seyyathāpi, bhikkhu, vīsati nirabbudā nirayā, evameko ababo nirayo. Seyyathāpi, bhikkhu, vīsati ababā nirayā, evameko aṭaṭo nirayo. Seyyathāpi, bhikkhu, vīsati aṭaṭā nirayā, evameko ahaho nirayo. Seyyathāpi, bhikkhu, vīsati ahahā nirayā, evameko kumudo nirayo. Seyyathāpi, bhikkhu, vīsati kumudā nirayā, evameko sogandhiko nirayo. Seyyathāpi, bhikkhu, vīsati sogandhikā nirayā, evameko uppalako nirayo 274. Seyyathāpi, bhikkhu, vīsati uppalakā nirayā, evameko puṇḍarīko nirayo. Seyyathāpi, bhikkhu, vīsati puṇḍarīkā nirayā, evameko padumo nirayo. Padume pana, bhikkhu, niraye kokāliko bhikkhu upapanno sāriputtamoggallānesu cittaṃ āghātetvā’’ti. Yaṃ vā pana kiñci bhagavā āha ‘‘ayaṃ appameyyo asaṅkhyeyo’’ti. Sabbaṃ taṃ avisajjanīyaṃ. Idaṃ avisajjanīyaṃ.
১১৯. তত্থ কতমং ৰিসজ্জনীযঞ্চ অৰিসজ্জনীযঞ্চ, যদা সো উপকো আজীৰকো ভগৰন্তং আহ ‘‘কুহিং, আৰুসো গোতম, গমিস্সসী’’তি। ভগৰা আহ –
119. Tattha katamaṃ visajjanīyañca avisajjanīyañca, yadā so upako ājīvako bhagavantaṃ āha ‘‘kuhiṃ, āvuso gotama, gamissasī’’ti. Bhagavā āha –
‘‘বারাণসিং গমিস্সামি, অহং তং অমতদুন্দুভিং।
‘‘Bārāṇasiṃ gamissāmi, ahaṃ taṃ amatadundubhiṃ;
ধম্মচক্কং পৰত্তেতুং, লোকে অপ্পটিৰত্তিয’’ন্তি॥
Dhammacakkaṃ pavattetuṃ, loke appaṭivattiya’’nti.
উপকো আজীৰকো আহ ‘‘‘জিনো’তি খো আৰুসো, ভো গোতম, পটিজানাসী’’তি। ভগৰা আহ –
Upako ājīvako āha ‘‘‘jino’ti kho āvuso, bho gotama, paṭijānāsī’’ti. Bhagavā āha –
জিতা মে পাপকা ধম্মা, তস্মাহং উপকা জিনো’’তি॥
Jitā me pāpakā dhammā, tasmāhaṃ upakā jino’’ti.
কথং জিনো কেন জিনোতি ৰিসজ্জনীযং। কতমো জিনোতি অৰিসজ্জনীযং। কতমো আসৰক্খযো, রাগক্খযো দোসক্খযো মোহক্খযোতি ৰিসজ্জনীযং। কিত্তকো আসৰক্খযোতি অৰিসজ্জনীযং। ইদং ৰিসজ্জনীযঞ্চ অৰিসজ্জনীযঞ্চ।
Kathaṃ jino kena jinoti visajjanīyaṃ. Katamo jinoti avisajjanīyaṃ. Katamo āsavakkhayo, rāgakkhayo dosakkhayo mohakkhayoti visajjanīyaṃ. Kittako āsavakkhayoti avisajjanīyaṃ. Idaṃ visajjanīyañca avisajjanīyañca.
অত্থি তথাগতোতি ৰিসজ্জনীযং। অত্থি রূপন্তি ৰিসজ্জনীযং। রূপং তথাগতোতি অৰিসজ্জনীযং। রূপৰা তথাগতোতি অৰিসজ্জনীযং। রূপে তথাগতোতি অৰিসজ্জনীযং। তথাগতে রূপন্তি অৰিসজ্জনীযং। এৰং অত্থি ৰেদনা…পে॰… সঞ্ঞা…পে॰… সঙ্খারা…পে॰… অত্থি ৰিঞ্ঞাণন্তি ৰিসজ্জনীযং। ৰিঞ্ঞাণং তথাগতোতি অৰিসজ্জনীযং। ৰিঞ্ঞাণৰা তথাগতোতি অৰিসজ্জনীযং। ৰিঞ্ঞাণে তথাগতোতি অৰিসজ্জনীযং। তথাগতে ৰিঞ্ঞাণন্তি অৰিসজ্জনীযং। অঞ্ঞত্র রূপেন তথাগতোতি অৰিসজ্জনীযং। অঞ্ঞত্র ৰেদনায…পে॰… সঞ্ঞায…পে॰… সঙ্খারেহি…পে॰… ৰিঞ্ঞাণেন তথাগতোতি অৰিসজ্জনীযং। অযং সো তথাগতো অরূপকো…পে॰… অৰেদনকো…পে॰… অসঞ্ঞকো…পে॰… অসঙ্খারকো…পে॰… অৰিঞ্ঞাণকোতি অৰিসজ্জনীযং। ইদং ৰিসজ্জনীযঞ্চ অৰিসজ্জনীযঞ্চ।
Atthi tathāgatoti visajjanīyaṃ. Atthi rūpanti visajjanīyaṃ. Rūpaṃ tathāgatoti avisajjanīyaṃ. Rūpavā tathāgatoti avisajjanīyaṃ. Rūpe tathāgatoti avisajjanīyaṃ. Tathāgate rūpanti avisajjanīyaṃ. Evaṃ atthi vedanā…pe… saññā…pe… saṅkhārā…pe… atthi viññāṇanti visajjanīyaṃ. Viññāṇaṃ tathāgatoti avisajjanīyaṃ. Viññāṇavā tathāgatoti avisajjanīyaṃ. Viññāṇe tathāgatoti avisajjanīyaṃ. Tathāgate viññāṇanti avisajjanīyaṃ. Aññatra rūpena tathāgatoti avisajjanīyaṃ. Aññatra vedanāya…pe… saññāya…pe… saṅkhārehi…pe… viññāṇena tathāgatoti avisajjanīyaṃ. Ayaṃ so tathāgato arūpako…pe… avedanako…pe… asaññako…pe… asaṅkhārako…pe… aviññāṇakoti avisajjanīyaṃ. Idaṃ visajjanīyañca avisajjanīyañca.
পস্সতি ভগৰা দিব্বেন চক্খুনা ৰিসুদ্ধেন অতিক্কন্তমানুসকেন সত্তে চৰমানে উপপজ্জমানে এৰং সব্বং…পে॰… যথাকম্মূপগে সত্তে পজানাতীতি ৰিসজ্জনীযং। কতমে সত্তা, কতমো তথাগতোতি অৰিসজ্জনীযং। ইদং ৰিসজ্জনীযঞ্চ অৰিসজ্জনীযঞ্চ।
Passati bhagavā dibbena cakkhunā visuddhena atikkantamānusakena satte cavamāne upapajjamāne evaṃ sabbaṃ…pe… yathākammūpage satte pajānātīti visajjanīyaṃ. Katame sattā, katamo tathāgatoti avisajjanīyaṃ. Idaṃ visajjanīyañca avisajjanīyañca.
অত্থি তথাগতোতি ৰিসজ্জনীযং। অত্থি তথাগতো পরং মরণাতি অৰিসজ্জনীযং। ইদং ৰিসজ্জনীযঞ্চ অৰিসজ্জনীযঞ্চ।
Atthi tathāgatoti visajjanīyaṃ. Atthi tathāgato paraṃ maraṇāti avisajjanīyaṃ. Idaṃ visajjanīyañca avisajjanīyañca.
১২০. তত্থ কতমং কম্মং?
120. Tattha katamaṃ kammaṃ?
‘‘অন্তকেনাধিপন্নস্স , জহতো মানুসং ভৰং।
‘‘Antakenādhipannassa , jahato mānusaṃ bhavaṃ;
কিং হি তস্স সকং হোতি, কিঞ্চ আদায গচ্ছতি।
Kiṃ hi tassa sakaṃ hoti, kiñca ādāya gacchati;
কিঞ্চস্স অনুগং হোতি, ছাযাৰ অনপাযিনী॥
Kiñcassa anugaṃ hoti, chāyāva anapāyinī.
‘‘উভো পুঞ্ঞঞ্চ পাপঞ্চ, যং মচ্চো কুরুতে ইধ।
‘‘Ubho puññañca pāpañca, yaṃ macco kurute idha;
তংৰস্স অনুগং হোতি, ছাযাৰ অনপাযিনী’’তি॥
Taṃvassa anugaṃ hoti, chāyāva anapāyinī’’ti.
ইদং কম্মং।
Idaṃ kammaṃ.
‘‘পুন চপরং, ভিক্খৰে, বালং পীঠসমারূল়্হং ৰা মঞ্চসমারূল়্হং ৰা ছমাযং 279 ৰা সেমানং যানিস্স পুব্বে পাপকানি কম্মানি কতানি কাযেন দুচ্চরিতানি ৰাচায দুচ্চরিতানি মনসা দুচ্চরিতানি, তানিস্স তম্হি সমযে ওলম্বন্তি অজ্ঝোলম্বন্তি অভিপ্পলম্বন্তি। সেয্যথাপি, ভিক্খৰে, মহতং পব্বতকূটানং ছাযা সাযন্হসমযং পথৰিযং ওলম্বন্তি অজ্ঝোলম্বন্তি অভিপ্পলম্বন্তি। এৰমেৰ খো, ভিক্খৰে, বালং পীঠসমারূল়্হং ৰা মঞ্চসমারূল়্হং ৰা ছমাযং ৰা সেমানং যানিস্স পুব্বে পাপকানি কম্মানি কতানি কাযেন দুচ্চরিতানি ৰাচায দুচ্চরিতানি মনসা দুচ্চরিতানি, তানিস্স তম্হি সমযে ওলম্বন্তি অজ্ঝোলম্বন্তি অভিপ্পলম্বন্তি। তত্র, ভিক্খৰে, বালস্স এৰং হোতি ‘অকতং ৰত মে কল্যাণং, অকতং কুসলং, অকতং ভীরুত্তাণং। কতং পাপং, কতং লুদ্দং, কতং কিব্বিসং, যাৰতা ভো অকতকল্যাণানং অকতকুসলানং অকতভীরুত্তাণানং কতপাপানং কতলুদ্দানং কতকিব্বিসানং গতি, তং গতিং পেচ্চ গচ্ছামী’তি, সো সোচতি কিলমতি পরিদেৰতি উরত্তাল়িং কন্দতি সম্মোহং আপজ্জতী’’তি।
‘‘Puna caparaṃ, bhikkhave, bālaṃ pīṭhasamārūḷhaṃ vā mañcasamārūḷhaṃ vā chamāyaṃ 280 vā semānaṃ yānissa pubbe pāpakāni kammāni katāni kāyena duccaritāni vācāya duccaritāni manasā duccaritāni, tānissa tamhi samaye olambanti ajjholambanti abhippalambanti. Seyyathāpi, bhikkhave, mahataṃ pabbatakūṭānaṃ chāyā sāyanhasamayaṃ pathaviyaṃ olambanti ajjholambanti abhippalambanti. Evameva kho, bhikkhave, bālaṃ pīṭhasamārūḷhaṃ vā mañcasamārūḷhaṃ vā chamāyaṃ vā semānaṃ yānissa pubbe pāpakāni kammāni katāni kāyena duccaritāni vācāya duccaritāni manasā duccaritāni, tānissa tamhi samaye olambanti ajjholambanti abhippalambanti. Tatra, bhikkhave, bālassa evaṃ hoti ‘akataṃ vata me kalyāṇaṃ, akataṃ kusalaṃ, akataṃ bhīruttāṇaṃ. Kataṃ pāpaṃ, kataṃ luddaṃ, kataṃ kibbisaṃ, yāvatā bho akatakalyāṇānaṃ akatakusalānaṃ akatabhīruttāṇānaṃ katapāpānaṃ kataluddānaṃ katakibbisānaṃ gati, taṃ gatiṃ pecca gacchāmī’ti, so socati kilamati paridevati urattāḷiṃ kandati sammohaṃ āpajjatī’’ti.
‘‘পুন চপরং, ভিক্খৰে, পণ্ডিতং পীঠসমারূল়্হং ৰা মঞ্চসমারূল়্হং ৰা ছমাযং ৰা সেমানং যানিস্স পুব্বে কল্যাণানি কম্মানি কতানি কাযেন সুচরিতানি ৰাচায সুচরিতানি মনসা সুচরিতানি, তানিস্স তম্হি সমযে ওলম্বন্তি অজ্ঝোলম্বন্তি অভিপ্পলম্বন্তি। সেয্যথাপি, ভিক্খৰে, মহতং পব্বতকূটানং ছাযা সাযন্হসমযং পথৰিযং ওলম্বন্তি অজ্ঝোলম্বন্তি অভিপ্পলম্বন্তি। এৰমেৰ খো, ভিক্খৰে, পণ্ডিতং পীঠসমারূল়্হং ৰা মঞ্চসমারূল়্হং ৰা ছমাযং ৰা সেমানং যানিস্স পুব্বে কল্যাণানি কম্মানি কতানি কাযেন সুচরিতানি ৰাচায সুচরিতানি মনসা সুচরিতানি, তানিস্স তম্হি সমযে ওলম্বন্তি অজ্ঝোলম্বন্তি অভিপ্পলম্বন্তি। তত্র, ভিক্খৰে, পণ্ডিতস্স ‘এৰং হোতি অকতং ৰত মে পাপং , অকতং লুদ্দং, অকতং কিব্বিসং। কতং কল্যাণং, কতং কুসলং, কতং ভীরুত্তাণং, যাৰতা ভো অকতপাপানং অকতলুদ্দানং অকতকিব্বিসানং কতকল্যাণানং কতকুসলানং কতভীরুত্তাণানং গতি, তং গতিং পেচ্চ গচ্ছামী’তি, সো ন সোচতি ন কিলমতি ন পরিদেৰতি ন উরত্তাল়িং কন্দতি ন সম্মোহং আপজ্জতি, ‘কতং মে পুঞ্ঞং, অকতং পাপং, যা ভৰিস্সতি গতি অকতপাপস্স অকতলুদ্দস্স অকতকিব্বিসস্স কতপুঞ্ঞস্স কতকুসলস্স কতভীরুত্তাণস্স, তং পেচ্চ ভৰে গতিং পচ্চনুভৰিস্সামী’তি ৰিপ্পটিসারো ন জাযতি। অৰিপ্পটিসারিনো খো, ভিক্খৰে, ইত্থিযা ৰা পুরিসস্স ৰা গিহিনো ৰা পব্বজিতস্স ৰা ভদ্দকং মরণং ভদ্দিকা কালঙ্কিরিযাতি ৰদামী’’তি। ইদং কম্মং।
‘‘Puna caparaṃ, bhikkhave, paṇḍitaṃ pīṭhasamārūḷhaṃ vā mañcasamārūḷhaṃ vā chamāyaṃ vā semānaṃ yānissa pubbe kalyāṇāni kammāni katāni kāyena sucaritāni vācāya sucaritāni manasā sucaritāni, tānissa tamhi samaye olambanti ajjholambanti abhippalambanti. Seyyathāpi, bhikkhave, mahataṃ pabbatakūṭānaṃ chāyā sāyanhasamayaṃ pathaviyaṃ olambanti ajjholambanti abhippalambanti. Evameva kho, bhikkhave, paṇḍitaṃ pīṭhasamārūḷhaṃ vā mañcasamārūḷhaṃ vā chamāyaṃ vā semānaṃ yānissa pubbe kalyāṇāni kammāni katāni kāyena sucaritāni vācāya sucaritāni manasā sucaritāni, tānissa tamhi samaye olambanti ajjholambanti abhippalambanti. Tatra, bhikkhave, paṇḍitassa ‘evaṃ hoti akataṃ vata me pāpaṃ , akataṃ luddaṃ, akataṃ kibbisaṃ. Kataṃ kalyāṇaṃ, kataṃ kusalaṃ, kataṃ bhīruttāṇaṃ, yāvatā bho akatapāpānaṃ akataluddānaṃ akatakibbisānaṃ katakalyāṇānaṃ katakusalānaṃ katabhīruttāṇānaṃ gati, taṃ gatiṃ pecca gacchāmī’ti, so na socati na kilamati na paridevati na urattāḷiṃ kandati na sammohaṃ āpajjati, ‘kataṃ me puññaṃ, akataṃ pāpaṃ, yā bhavissati gati akatapāpassa akataluddassa akatakibbisassa katapuññassa katakusalassa katabhīruttāṇassa, taṃ pecca bhave gatiṃ paccanubhavissāmī’ti vippaṭisāro na jāyati. Avippaṭisārino kho, bhikkhave, itthiyā vā purisassa vā gihino vā pabbajitassa vā bhaddakaṃ maraṇaṃ bhaddikā kālaṅkiriyāti vadāmī’’ti. Idaṃ kammaṃ.
‘‘তীণিমানি , ভিক্খৰে, দুচ্চরিতানি। কতমানি তীণি, কাযদুচ্চরিতং ৰচীদুচ্চরিতং মনোদুচ্চরিতং। ইমানি খো, ভিক্খৰে, তীণি দুচ্চরিতানি। তীণিমানি, ভিক্খৰে, সুচরিতানি। কতমানি তীণি? কাযসুচরিতং ৰচীসুচরিতং মনোসুচরিতং। ইমানি খো, ভিক্খৰে, তীণি সুচরিতানি। ইদং কম্মং।
‘‘Tīṇimāni , bhikkhave, duccaritāni. Katamāni tīṇi, kāyaduccaritaṃ vacīduccaritaṃ manoduccaritaṃ. Imāni kho, bhikkhave, tīṇi duccaritāni. Tīṇimāni, bhikkhave, sucaritāni. Katamāni tīṇi? Kāyasucaritaṃ vacīsucaritaṃ manosucaritaṃ. Imāni kho, bhikkhave, tīṇi sucaritāni. Idaṃ kammaṃ.
তত্থ কতমো ৰিপাকো?
Tattha katamo vipāko?
‘‘লাভা ৰো, ভিক্খৰে, সুলদ্ধং ৰো, ভিক্খৰে, খণো ৰো, ভিক্খৰে, পটিলদ্ধো ব্রহ্মচরিযৰাসায। দিট্ঠা মযা, ভিক্খৰে, ছ ফস্সাযতনিকা নাম নিরযা। তত্থ যং কিঞ্চি চক্খুনা রূপং পস্সতি অনিট্ঠরূপংযেৰ পস্সতি, নো ইট্ঠরূপং। অকন্তরূপংযেৰ পস্সতি, নো কন্তরূপং। অমনাপরূপংযেৰ পস্সতি, নো মনাপরূপং।
‘‘Lābhā vo, bhikkhave, suladdhaṃ vo, bhikkhave, khaṇo vo, bhikkhave, paṭiladdho brahmacariyavāsāya. Diṭṭhā mayā, bhikkhave, cha phassāyatanikā nāma nirayā. Tattha yaṃ kiñci cakkhunā rūpaṃ passati aniṭṭharūpaṃyeva passati, no iṭṭharūpaṃ. Akantarūpaṃyeva passati, no kantarūpaṃ. Amanāparūpaṃyeva passati, no manāparūpaṃ.
যং কিঞ্চি সোতেন সদ্দং সুণাতি…পে॰… ঘানেন…পে॰… জিৰ্হায…পে॰… কাযেন…পে॰… যং কিঞ্চি মনসা ধম্মং ৰিজানাতি অনিট্ঠধম্মংযেৰ ৰিজানাতি, নো ইট্ঠধম্মং। অকন্তধম্মংযেৰ ৰিজানাতি, নো কন্তধম্মং। অমনাপধম্মংযেৰ ৰিজানাতি, নো মনাপধম্মং। লাভা ৰো, ভিক্খৰে, সুলদ্ধং ৰো, ভিক্খৰে, খণো ৰো, ভিক্খৰে, পটিলদ্ধো ব্রহ্মচরিযৰাসায।
Yaṃ kiñci sotena saddaṃ suṇāti…pe… ghānena…pe… jivhāya…pe… kāyena…pe… yaṃ kiñci manasā dhammaṃ vijānāti aniṭṭhadhammaṃyeva vijānāti, no iṭṭhadhammaṃ. Akantadhammaṃyeva vijānāti, no kantadhammaṃ. Amanāpadhammaṃyeva vijānāti, no manāpadhammaṃ. Lābhā vo, bhikkhave, suladdhaṃ vo, bhikkhave, khaṇo vo, bhikkhave, paṭiladdho brahmacariyavāsāya.
‘‘দিট্ঠা মযা, ভিক্খৰে, ছ ফস্সাযতনিকা নাম সগ্গা। তত্থ যং কিঞ্চি চক্খুনা রূপং পস্সতি ইট্ঠরূপংযেৰ পস্সতি, নো অনিট্ঠরূপং। কন্তরূপংযেৰ পস্সতি, নো অকন্তরূপং। মনাপরূপংযেৰ পস্সতি, নো অমনাপরূপং। যং কিঞ্চি সোতেন সদ্দং সুণাতি…পে॰… ঘানেন …পে॰… জিৰ্হায…পে॰… কাযেন…পে॰… মনসা ধম্মং ৰিজানাতি ইট্ঠধম্মংযেৰ ৰিজানাতি, নো অনিট্ঠধম্মং। কন্তধম্মংযেৰ ৰিজানাতি, নো অকন্তধম্মং। মনাপধম্মংযেৰ ৰিজানাতি, নো অমনাপধম্মং। লাভা ৰো, ভিক্খৰে, সুলদ্ধং ৰো, ভিক্খৰে, খণো ৰো, ভিক্খৰে, পটিলদ্ধো ব্রহ্মচরিযৰাসাযা’’তি। অযং ৰিপাকো।
‘‘Diṭṭhā mayā, bhikkhave, cha phassāyatanikā nāma saggā. Tattha yaṃ kiñci cakkhunā rūpaṃ passati iṭṭharūpaṃyeva passati, no aniṭṭharūpaṃ. Kantarūpaṃyeva passati, no akantarūpaṃ. Manāparūpaṃyeva passati, no amanāparūpaṃ. Yaṃ kiñci sotena saddaṃ suṇāti…pe… ghānena …pe… jivhāya…pe… kāyena…pe… manasā dhammaṃ vijānāti iṭṭhadhammaṃyeva vijānāti, no aniṭṭhadhammaṃ. Kantadhammaṃyeva vijānāti, no akantadhammaṃ. Manāpadhammaṃyeva vijānāti, no amanāpadhammaṃ. Lābhā vo, bhikkhave, suladdhaṃ vo, bhikkhave, khaṇo vo, bhikkhave, paṭiladdho brahmacariyavāsāyā’’ti. Ayaṃ vipāko.
‘‘সট্ঠিৰস্সসহস্সানি, পরিপুণ্ণানি সব্বসো।
‘‘Saṭṭhivassasahassāni, paripuṇṇāni sabbaso;
তদা হি পকতং পাপং, তুয্হং ময্হঞ্চ মারিসা’’তি॥
Tadā hi pakataṃ pāpaṃ, tuyhaṃ mayhañca mārisā’’ti.
অযং ৰিপাকো।
Ayaṃ vipāko.
১২১. তত্থ কতমং কম্মঞ্চ ৰিপাকো চ?
121. Tattha katamaṃ kammañca vipāko ca?
‘‘অধম্মচারী হি নরো পমত্তো, যহিং যহিং গচ্ছতি দুগ্গতিং যো।
‘‘Adhammacārī hi naro pamatto, yahiṃ yahiṃ gacchati duggatiṃ yo;
সো নং অধম্মো চরিতো হনাতি, সযং গহীতো যথা কণ্হসপ্পো॥
So naṃ adhammo carito hanāti, sayaṃ gahīto yathā kaṇhasappo.
অধম্মো নিরযং নেতি, ধম্মো পাপেতি সুগ্গতি’’ন্তি॥
Adhammo nirayaṃ neti, dhammo pāpeti suggati’’nti.
ইদং কম্মঞ্চ ৰিপাকো চ।
Idaṃ kammañca vipāko ca.
‘‘মা, ভিক্খৰে, পুঞ্ঞানং ভাযিত্থ, সুখস্সেতং, ভিক্খৰে, অধিৰচনং ইট্ঠস্স কন্তস্স পিযস্স মনাপস্স যদিদং পুঞ্ঞানি। অভিজানামি খো পনাহং, ভিক্খৰে, দীঘরত্তং কতানং পুঞ্ঞানং ইট্ঠং 287 কন্তং পিযং মনাপং ৰিপাকং পচ্চনুভূতং, সত্ত ৰস্সানি মেত্তচিত্তং ভাৰেত্ৰা সত্ত সংৰট্টৰিৰট্টকপ্পে ন ইমং 288 লোকং পুনরাগমাসিং। সংৰট্টমানে সুদাহং, ভিক্খৰে, কপ্পে আভস্সরূপগো হোমি। ৰিৰট্টমানে কপ্পে সুঞ্ঞং ব্রহ্মৰিমানং উপপজ্জামি। তত্র সুদাহং 289, ভিক্খৰে, ব্রহ্মা হোমি মহাব্রহ্মা অভিভূ অনভিভূতো অঞ্ঞদত্থুদসো ৰসৰত্তী। ছত্তিংসক্খত্তুং খো পনাহং, ভিক্খৰে, সক্কো অহোসিং দেৰানমিন্দো, অনেকসতক্খত্তুং রাজা অহোসিং চক্কৰত্তী 290 ধম্মিকো ধম্মরাজা চাতুরন্তো ৰিজিতাৰী জনপদত্থাৰরিযপ্পত্তো সত্তরতনসমন্নাগতো, কো পন ৰাদো পদেসরজ্জস্স? তস্স ময্হং, ভিক্খৰে, এতদহোসি ‘কিস্স নু খো মে ইদং কম্মস্স ফলং, কিস্স কম্মস্স ৰিপাকো, যেনাহং এতরহি এৰংমহিদ্ধিকো এৰংমহানুভাৰো’তি। তস্স ময্হং, ভিক্খৰে, এতদহোসি ‘তিণ্ণং খো মে ইদং কম্মানং ফলং, তিণ্ণং কম্মানং ৰিপাকো। যেনাহং এতরহি এৰংমহিদ্ধিকো এৰংমহানুভাৰো’তি। সেয্যথিদং, দানস্স দমস্স সংযমস্সা’’তি। তত্থ যঞ্চ দানং যো চ দমো যো চ সংযমো, ইদং কম্মং। যো তপ্পচ্চযা ৰিপাকো পচ্চনুভূতো, অযং ৰিপাকো। তথা চূল়কম্মৰিভঙ্গো ৰত্তব্বো।
‘‘Mā, bhikkhave, puññānaṃ bhāyittha, sukhassetaṃ, bhikkhave, adhivacanaṃ iṭṭhassa kantassa piyassa manāpassa yadidaṃ puññāni. Abhijānāmi kho panāhaṃ, bhikkhave, dīgharattaṃ katānaṃ puññānaṃ iṭṭhaṃ 291 kantaṃ piyaṃ manāpaṃ vipākaṃ paccanubhūtaṃ, satta vassāni mettacittaṃ bhāvetvā satta saṃvaṭṭavivaṭṭakappe na imaṃ 292 lokaṃ punarāgamāsiṃ. Saṃvaṭṭamāne sudāhaṃ, bhikkhave, kappe ābhassarūpago homi. Vivaṭṭamāne kappe suññaṃ brahmavimānaṃ upapajjāmi. Tatra sudāhaṃ 293, bhikkhave, brahmā homi mahābrahmā abhibhū anabhibhūto aññadatthudaso vasavattī. Chattiṃsakkhattuṃ kho panāhaṃ, bhikkhave, sakko ahosiṃ devānamindo, anekasatakkhattuṃ rājā ahosiṃ cakkavattī 294 dhammiko dhammarājā cāturanto vijitāvī janapadatthāvariyappatto sattaratanasamannāgato, ko pana vādo padesarajjassa? Tassa mayhaṃ, bhikkhave, etadahosi ‘kissa nu kho me idaṃ kammassa phalaṃ, kissa kammassa vipāko, yenāhaṃ etarahi evaṃmahiddhiko evaṃmahānubhāvo’ti. Tassa mayhaṃ, bhikkhave, etadahosi ‘tiṇṇaṃ kho me idaṃ kammānaṃ phalaṃ, tiṇṇaṃ kammānaṃ vipāko. Yenāhaṃ etarahi evaṃmahiddhiko evaṃmahānubhāvo’ti. Seyyathidaṃ, dānassa damassa saṃyamassā’’ti. Tattha yañca dānaṃ yo ca damo yo ca saṃyamo, idaṃ kammaṃ. Yo tappaccayā vipāko paccanubhūto, ayaṃ vipāko. Tathā cūḷakammavibhaṅgo vattabbo.
যং সুভস্স মাণৰস্স তোদেয্যপুত্তস্স দেসিতং। তত্থ যে ধম্মা অপ্পাযুকদীঘাযুকতায সংৰত্তন্তি বহ্ৰাবাধঅপ্পাবাধতায অপ্পেসক্খমহেসক্খতায দুব্বণ্ণসুৰণ্ণতায নীচকুলিকউচ্চকুলিকতায অপ্পভোগমহাভোগতায দুপ্পঞ্ঞপঞ্ঞৰন্ততায চ সংৰত্তন্তি, ইদং কম্মং। যা তত্থ অপ্পাযুকদীঘাযুকতা…পে॰… দুপ্পঞ্ঞপঞ্ঞৰন্ততা, অযং ৰিপাকো। ইদং কম্মঞ্চ ৰিপাকো চ।
Yaṃ subhassa māṇavassa todeyyaputtassa desitaṃ. Tattha ye dhammā appāyukadīghāyukatāya saṃvattanti bahvābādhaappābādhatāya appesakkhamahesakkhatāya dubbaṇṇasuvaṇṇatāya nīcakulikauccakulikatāya appabhogamahābhogatāya duppaññapaññavantatāya ca saṃvattanti, idaṃ kammaṃ. Yā tattha appāyukadīghāyukatā…pe… duppaññapaññavantatā, ayaṃ vipāko. Idaṃ kammañca vipāko ca.
১২২. তত্থ কতমং কুসলং?
122. Tattha katamaṃ kusalaṃ?
‘‘ৰাচানুরক্খী মনসা সুসংৰুতো, কাযেন চ নাকুসলং কযিরা 295।
‘‘Vācānurakkhī manasā susaṃvuto, kāyena ca nākusalaṃ kayirā 296;
এতে তযো কম্মপথে ৰিসোধযে, আরাধযে মগ্গমিসিপ্পৰেদিত’’ন্তি॥
Ete tayo kammapathe visodhaye, ārādhaye maggamisippavedita’’nti.
ইদং কুসলং।
Idaṃ kusalaṃ.
‘‘যস্স কাযেন ৰাচায, মনসা নত্থি দুক্কটং।
‘‘Yassa kāyena vācāya, manasā natthi dukkaṭaṃ;
সংৰুতং তীহি ঠানেহি, তমহং ব্রূমি ব্রাহ্মণ’’ন্তি॥
Saṃvutaṃ tīhi ṭhānehi, tamahaṃ brūmi brāhmaṇa’’nti.
ইদং কুসলং।
Idaṃ kusalaṃ.
তত্থ কতমং অকুসলং?
Tattha katamaṃ akusalaṃ?
‘‘যস্স অচ্চন্ত দুস্সীল্যং, মালুৰা সালমিৰোত্থতং।
‘‘Yassa accanta dussīlyaṃ, māluvā sālamivotthataṃ;
করোতি সো তথত্তানং, যথা নং ইচ্ছতী দিসো’’তি॥
Karoti so tathattānaṃ, yathā naṃ icchatī diso’’ti.
ইদং অকুসলং।
Idaṃ akusalaṃ.
‘‘অত্তনা হি কতং পাপং, অত্তজং অত্তসম্ভৰং।
‘‘Attanā hi kataṃ pāpaṃ, attajaṃ attasambhavaṃ;
অভিমত্থতি 301 দুম্মেধং, ৰজিরংৰস্মমযং মণি’’ন্তি॥
Abhimatthati 302 dummedhaṃ, vajiraṃvasmamayaṃ maṇi’’nti.
ইদং অকুসলং।
Idaṃ akusalaṃ.
‘‘দস কম্মপথে নিসেৰিয, অকুসলাকুসলেহি ৰিৰজ্জিতা।
‘‘Dasa kammapathe niseviya, akusalākusalehi vivajjitā;
গরহা চ ভৰন্তি দেৰতে, বালমতী নিরযেসু পচ্চরে’’তি॥
Garahā ca bhavanti devate, bālamatī nirayesu paccare’’ti.
ইদং অকুসলং।
Idaṃ akusalaṃ.
‘‘তীণিমানি, ভিক্খৰে, অকুসলমূলানি 303, কতমানি তীণি? লোভো অকুসলমূলং, দোসো অকুসলমূলং, মোহো অকুসলমূলং। ইমানি খো, ভিক্খৰে, তীণি অকুসলমূলানি’’। ইদং অকুসলং।
‘‘Tīṇimāni, bhikkhave, akusalamūlāni 304, katamāni tīṇi? Lobho akusalamūlaṃ, doso akusalamūlaṃ, moho akusalamūlaṃ. Imāni kho, bhikkhave, tīṇi akusalamūlāni’’. Idaṃ akusalaṃ.
তত্থ কতমং কুসলঞ্চ অকুসলঞ্চ?
Tattha katamaṃ kusalañca akusalañca?
কল্যাণকারী কল্যাণং, পাপকারী চ পাপক’’ন্তি॥
Kalyāṇakārī kalyāṇaṃ, pāpakārī ca pāpaka’’nti.
তত্থ যং আহ ‘‘কল্যাণকারী কল্যাণ’’ন্তি, ইদং কুসলং। যং আহ ‘‘পাপকারী চ পাপক’’ন্তি, ইদং অকুসলং। ইদং কুসলঞ্চ অকুসলঞ্চ।
Tattha yaṃ āha ‘‘kalyāṇakārī kalyāṇa’’nti, idaṃ kusalaṃ. Yaṃ āha ‘‘pāpakārī ca pāpaka’’nti, idaṃ akusalaṃ. Idaṃ kusalañca akusalañca.
‘‘সুভেন কম্মেন ৰজন্তি সুগ্গতিং, অপাযভূমিং অসুভেন কম্মুনা।
‘‘Subhena kammena vajanti suggatiṃ, apāyabhūmiṃ asubhena kammunā;
খযা চ কম্মস্স ৰিমুত্তচেতসো, নিব্বন্তি তে জোতিরিৰিন্ধনক্খযা’’॥
Khayā ca kammassa vimuttacetaso, nibbanti te jotirivindhanakkhayā’’.
তত্থ যং আহ ‘‘সুভেন কম্মেন ৰজন্তি সুগ্গতি’’ন্তি, ইদং কুসলং। যং আহ ‘‘অপাযভূমিং অসুভেন কম্মুনা’’তি, ইদং অকুসলং। ইদং কুসলঞ্চ অকুসলঞ্চ।
Tattha yaṃ āha ‘‘subhena kammena vajanti suggati’’nti, idaṃ kusalaṃ. Yaṃ āha ‘‘apāyabhūmiṃ asubhena kammunā’’ti, idaṃ akusalaṃ. Idaṃ kusalañca akusalañca.
১২৩. তত্থ কতমং অনুঞ্ঞাতং?
123. Tattha katamaṃ anuññātaṃ?
ইদং অনুঞ্ঞাতং।
Idaṃ anuññātaṃ.
‘‘তীণিমানি , ভিক্খৰে, ভিক্খূনং করণীযানি। কতমানি তীণি, ইধ, ভিক্খৰে, ভিক্খু পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু, কাযকম্মৰচীকম্মেন সমন্নাগতো কুসলেন পরিসুদ্ধাজীৰো। আরদ্ধৰীরিযো খো পন হোতি থামৰা দল়্হপরক্কমো অনিক্খিত্তধুরো অকুসলানং ধম্মানং পহানায কুসলানং ধম্মানং ভাৰনায সচ্ছিকিরিযায। পঞ্ঞৰা খো পন হোতি উদযত্থগামিনিযা পঞ্ঞায সমন্নাগতো অরিযায নিব্বেধিকায সম্মা দুক্খক্খযগামিনিযা। ইমানি খো, ভিক্খৰে, ভিক্খূনং তীণি করণীযানী’’তি। ইদং অনুঞ্ঞাতং।
‘‘Tīṇimāni , bhikkhave, bhikkhūnaṃ karaṇīyāni. Katamāni tīṇi, idha, bhikkhave, bhikkhu pātimokkhasaṃvarasaṃvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu, kāyakammavacīkammena samannāgato kusalena parisuddhājīvo. Āraddhavīriyo kho pana hoti thāmavā daḷhaparakkamo anikkhittadhuro akusalānaṃ dhammānaṃ pahānāya kusalānaṃ dhammānaṃ bhāvanāya sacchikiriyāya. Paññavā kho pana hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā. Imāni kho, bhikkhave, bhikkhūnaṃ tīṇi karaṇīyānī’’ti. Idaṃ anuññātaṃ.
‘‘দসযিমে 311, ভিক্খৰে, ধম্মা পব্বজিতেন অভিণ্হং পচ্চৰেক্খিতব্বা। কতমে দস? ‘ৰেৰণ্ণিযম্হি অজ্ঝুপগতো’তি পব্বজিতেন অভিণ্হং পচ্চৰেক্খিতব্বং…পে॰… ইমে খো ভিক্খৰে দস ধম্মা পব্বজিতেন অভিণ্হং পচ্চৰেক্খিতব্বা’’তি। ইদং অনুঞ্ঞাতং।
‘‘Dasayime 312, bhikkhave, dhammā pabbajitena abhiṇhaṃ paccavekkhitabbā. Katame dasa? ‘Vevaṇṇiyamhi ajjhupagato’ti pabbajitena abhiṇhaṃ paccavekkhitabbaṃ…pe… ime kho bhikkhave dasa dhammā pabbajitena abhiṇhaṃ paccavekkhitabbā’’ti. Idaṃ anuññātaṃ.
‘‘তীণিমানি, ভিক্খৰে, করণীযানি। কতমানি তীণি? কাযসুচরিতং ৰচীসুচরিতং মনোসুচরিতন্তি। ইমানি খো, ভিক্খৰে, তীণি করণীযানী’’তি। ইদং অনুঞ্ঞাতং।
‘‘Tīṇimāni, bhikkhave, karaṇīyāni. Katamāni tīṇi? Kāyasucaritaṃ vacīsucaritaṃ manosucaritanti. Imāni kho, bhikkhave, tīṇi karaṇīyānī’’ti. Idaṃ anuññātaṃ.
তত্থ কতমং পটিক্খিত্তং?
Tattha katamaṃ paṭikkhittaṃ?
‘‘নত্থি পুত্তসমং পেমং, নত্থি গোসমিতং 313 ধনং।
‘‘Natthi puttasamaṃ pemaṃ, natthi gosamitaṃ 314 dhanaṃ;
ভগৰা আহ –
Bhagavā āha –
‘‘নত্থি অত্তসমং পেমং, নত্থি ধঞ্ঞসমং ধনং।
‘‘Natthi attasamaṃ pemaṃ, natthi dhaññasamaṃ dhanaṃ;
নত্থি পঞ্ঞাসমা আভা, ৰুট্ঠিৰেপরমা সরা’’তি॥
Natthi paññāsamā ābhā, vuṭṭhiveparamā sarā’’ti.
এত্থ যং পুরিমকং, ইদং পটিক্খিত্তং।
Ettha yaṃ purimakaṃ, idaṃ paṭikkhittaṃ.
‘‘তীণিমানি , ভিক্খৰেঋ অকরণীযানি। কতমানি তীণি? কাযদুচ্চরিতং ৰচীদুচ্চরিতং মনোদুচ্চরিতন্তি। ইমানি খো, ভিক্খৰে, তীণি অকরণীযানী’’তি। ইদং পটিক্খিত্তং।
‘‘Tīṇimāni , bhikkhaveऋ akaraṇīyāni. Katamāni tīṇi? Kāyaduccaritaṃ vacīduccaritaṃ manoduccaritanti. Imāni kho, bhikkhave, tīṇi akaraṇīyānī’’ti. Idaṃ paṭikkhittaṃ.
১২৪. তত্থ কতমং অনুঞ্ঞাতঞ্চ পটিক্খিত্তঞ্চ?
124. Tattha katamaṃ anuññātañca paṭikkhittañca?
‘‘কিংসূধ ভীতা জনতা অনেকা, মগ্গো চনেকাযতনো পৰুত্তো 317।
‘‘Kiṃsūdha bhītā janatā anekā, maggo canekāyatano pavutto 318;
পুচ্ছামি তং গোতম ভূরিপঞ্ঞ, কিস্মিং ঠিতো পরলোকং ন ভাযেতি॥
Pucchāmi taṃ gotama bhūripañña, kismiṃ ṭhito paralokaṃ na bhāyeti.
‘‘ৰাচং মনঞ্চ পণিধায সম্মা, কাযেন পাপানি অকুব্বমানো।
‘‘Vācaṃ manañca paṇidhāya sammā, kāyena pāpāni akubbamāno;
বহ্ৰন্নপানং ঘরমাৰসন্তো, সদ্ধো মুদূ সংৰিভাগী ৰদঞ্ঞূ।
Bahvannapānaṃ gharamāvasanto, saddho mudū saṃvibhāgī vadaññū;
এতেসু ধম্মেসু ঠিতো চতূসু, ধম্মে ঠিতো পরলোকং ন ভাযে’’তি॥
Etesu dhammesu ṭhito catūsu, dhamme ṭhito paralokaṃ na bhāye’’ti.
তত্থ যং আহ ‘‘ৰাচং মনঞ্চ পণিধায সম্মা’’তি, ইদং অনুঞ্ঞাতং। ‘‘কাযেন পাপানি অকুব্বমানো’’তি, ইদং পটিক্খিত্তং। ‘‘বহ্ৰন্নপানং ঘরমাৰসন্তো, সদ্ধো মুদূ সংৰিভাগী ৰদঞ্ঞূ। এতেসু ধম্মেসু ঠিতো চতূসু, ধম্মে ঠিতো পরলোকং ন ভাযে’’তি, ইদং অনুঞ্ঞাতং। ইদং অনুঞ্ঞাতঞ্চ পটিক্খিত্তঞ্চ।
Tattha yaṃ āha ‘‘vācaṃ manañca paṇidhāya sammā’’ti, idaṃ anuññātaṃ. ‘‘Kāyena pāpāni akubbamāno’’ti, idaṃ paṭikkhittaṃ. ‘‘Bahvannapānaṃ gharamāvasanto, saddho mudū saṃvibhāgī vadaññū. Etesu dhammesu ṭhito catūsu, dhamme ṭhito paralokaṃ na bhāye’’ti, idaṃ anuññātaṃ. Idaṃ anuññātañca paṭikkhittañca.
‘‘সব্বপাপস্স অকরণং, কুসলস্স উপসম্পদা।
‘‘Sabbapāpassa akaraṇaṃ, kusalassa upasampadā;
সচিত্তপরিযোদাপনং, এতং বুদ্ধানসাসনং’’॥
Sacittapariyodāpanaṃ, etaṃ buddhānasāsanaṃ’’.
তত্থ যং আহ ‘‘সব্বপাপস্স অকরণ’’ন্তি, ইদং পটিক্খিত্তং, যং আহ ‘‘কুসলস্স উপসম্পদা’’তি, ইদং অনুঞ্ঞাতং। ইদং অনুঞ্ঞাতঞ্চ পটিক্খিত্তঞ্চ।
Tattha yaṃ āha ‘‘sabbapāpassa akaraṇa’’nti, idaṃ paṭikkhittaṃ, yaṃ āha ‘‘kusalassa upasampadā’’ti, idaṃ anuññātaṃ. Idaṃ anuññātañca paṭikkhittañca.
‘‘কাযসমাচারম্পাহং, দেৰানমিন্দ, দুৰিধেন ৰদামি সেৰিতব্বম্পি অসেৰিতব্বম্পি। ৰচীসমাচারম্পাহং , দেৰানমিন্দ , দুৰিধেন ৰদামি সেৰিতব্বম্পি অসেৰিতব্বম্পি। মনোসমাচারম্পাহং দেৰানমিন্দ, দুৰিধেন ৰদামি…পে॰… পরিযেসনম্পাহং, দেৰানমিন্দ, দুৰিধেন ৰদামি সেৰিতব্বম্পি অসেৰিতব্বম্পি’’।
‘‘Kāyasamācārampāhaṃ, devānaminda, duvidhena vadāmi sevitabbampi asevitabbampi. Vacīsamācārampāhaṃ , devānaminda , duvidhena vadāmi sevitabbampi asevitabbampi. Manosamācārampāhaṃ devānaminda, duvidhena vadāmi…pe… pariyesanampāhaṃ, devānaminda, duvidhena vadāmi sevitabbampi asevitabbampi’’.
‘‘কাযসমাচারম্পাহং, দেৰানমিন্দ, দুৰিধেন ৰদামি সেৰিতব্বম্পি অসেৰিতব্বম্পী’’তি ইতি খো পনেতং ৰুত্তং, কিঞ্চেতং পটিচ্চ ৰুত্তং। যথারূপঞ্চ খো কাযসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি, এৰরূপো কাযসমাচারো ন সেৰিতব্বো। তত্থ যং জঞ্ঞা কাযসমাচারং ‘‘ইমং 319 খো মে কাযসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তী’’তি, এৰরূপো কাযসমাচারো সেৰিতব্বো। ‘‘কাযসমাচারম্পাহং দেৰানমিন্দ, দুৰিধেন ৰদামি সেৰিতব্বম্পি অসেৰিতব্বম্পী’’তি ইতি যং তং ৰুত্তং, ইদমেতং পটিচ্চ ৰুত্তং। ‘‘ৰচীসমাচারং…পে॰… ‘‘পরিযেসনম্পাহং, দেৰানমিন্দ, দুৰিধেন ৰদামি সেৰিতব্বম্পি অসেৰিতব্বম্পী’’তি ইতি খো পনেতং ৰুত্তং, কিঞ্চেতং পটিচ্চ ৰুত্তং। যথারূপঞ্চ খো পরিযেসনং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি, এৰরূপা পরিযেসনা ন সেৰিতব্বা। তত্থ যং জঞ্ঞা পরিযেসনং ‘‘ইমং খো মে পরিযেসনং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তী’’তি, এৰরূপা পরিযেসনা সেৰিতব্বা। ‘‘পরিযেসনম্পাহং, দেৰানমিন্দ, দুৰিধেন ৰদামি সেৰিতব্বম্পি অসেৰিতব্বম্পী’’তি ইতি যং তং ৰুত্তং, ইদমেতং পটিচ্চ ৰুত্তং।
‘‘Kāyasamācārampāhaṃ, devānaminda, duvidhena vadāmi sevitabbampi asevitabbampī’’ti iti kho panetaṃ vuttaṃ, kiñcetaṃ paṭicca vuttaṃ. Yathārūpañca kho kāyasamācāraṃ sevato akusalā dhammā abhivaḍḍhanti, kusalā dhammā parihāyanti, evarūpo kāyasamācāro na sevitabbo. Tattha yaṃ jaññā kāyasamācāraṃ ‘‘imaṃ 320 kho me kāyasamācāraṃ sevato akusalā dhammā parihāyanti, kusalā dhammā abhivaḍḍhantī’’ti, evarūpo kāyasamācāro sevitabbo. ‘‘Kāyasamācārampāhaṃ devānaminda, duvidhena vadāmi sevitabbampi asevitabbampī’’ti iti yaṃ taṃ vuttaṃ, idametaṃ paṭicca vuttaṃ. ‘‘Vacīsamācāraṃ…pe… ‘‘pariyesanampāhaṃ, devānaminda, duvidhena vadāmi sevitabbampi asevitabbampī’’ti iti kho panetaṃ vuttaṃ, kiñcetaṃ paṭicca vuttaṃ. Yathārūpañca kho pariyesanaṃ sevato akusalā dhammā abhivaḍḍhanti, kusalā dhammā parihāyanti, evarūpā pariyesanā na sevitabbā. Tattha yaṃ jaññā pariyesanaṃ ‘‘imaṃ kho me pariyesanaṃ sevato akusalā dhammā parihāyanti, kusalā dhammā abhivaḍḍhantī’’ti, evarūpā pariyesanā sevitabbā. ‘‘Pariyesanampāhaṃ, devānaminda, duvidhena vadāmi sevitabbampi asevitabbampī’’ti iti yaṃ taṃ vuttaṃ, idametaṃ paṭicca vuttaṃ.
তত্থ যং আহ ‘‘সেৰিতব্বম্পী’’তি, ইদং অনুঞ্ঞাতং। যং আহ ‘‘ন সেৰিতব্বম্পী’’তি, ইদং পটিক্খিত্তং। ইদং অনুঞ্ঞাতঞ্চ পটিক্খিত্তঞ্চ।
Tattha yaṃ āha ‘‘sevitabbampī’’ti, idaṃ anuññātaṃ. Yaṃ āha ‘‘na sevitabbampī’’ti, idaṃ paṭikkhittaṃ. Idaṃ anuññātañca paṭikkhittañca.
১৭০. তত্থ কতমো থৰো?
170. Tattha katamo thavo?
‘‘মগ্গানট্ঠঙ্গিকো 321 সেট্ঠো, সচ্চানং চতুরো পদা।
‘‘Maggānaṭṭhaṅgiko 322 seṭṭho, saccānaṃ caturo padā;
ৰিরাগো সেট্ঠো ধম্মানং, দ্ৰিপদানঞ্চ চক্খুমা’’তি॥
Virāgo seṭṭho dhammānaṃ, dvipadānañca cakkhumā’’ti.
অযং থৰো।
Ayaṃ thavo.
‘‘তীণিমানি, ভিক্খৰে, অগ্গানি। কতমানি তীণি? যাৰতা, ভিক্খৰে, সত্তা অপদা ৰা দ্ৰিপদা ৰা চতুপ্পদা ৰা বহুপ্পদা ৰা রূপিনো ৰা অরূপিনো ৰা সঞ্ঞিনো ৰা অসঞ্ঞিনো ৰা নেৰসঞ্ঞীনাসঞ্ঞিনো ৰা, তথাগতো তেসং অগ্গমক্খাযতি সেট্ঠমক্খাযতি পৰরমক্খাযতি , যদিদং অরহং সম্মাসম্বুদ্ধো। যাৰতা, ভিক্খৰে, ধম্মানং 323 পণ্ণত্তিসঙ্খতানং ৰা অসঙ্খতানং ৰা, ৰিরাগো তেসং ধম্মানং অগ্গমক্খাযতি সেট্ঠমক্খাযতি পৰরমক্খাযতি, যদিদং মদনিম্মদনো…পে॰… নিরোধো নিব্বানং। যাৰতা, ভিক্খৰে, সঙ্ঘানং পণ্ণত্তি গণানং পণ্ণত্তি মহাজনসন্নিপাতানং পণ্ণত্তি, তথাগতসাৰকসঙ্ঘো তেসং অগ্গমক্খাযতি সেট্ঠমক্খাযতি পৰরমক্খাযতি, যদিদং চত্তারি পুরিসযুগানি অট্ঠ পুরিসপুগ্গলা…পে॰… পুঞ্ঞক্খেত্তং লোকস্সাতি।
‘‘Tīṇimāni, bhikkhave, aggāni. Katamāni tīṇi? Yāvatā, bhikkhave, sattā apadā vā dvipadā vā catuppadā vā bahuppadā vā rūpino vā arūpino vā saññino vā asaññino vā nevasaññīnāsaññino vā, tathāgato tesaṃ aggamakkhāyati seṭṭhamakkhāyati pavaramakkhāyati , yadidaṃ arahaṃ sammāsambuddho. Yāvatā, bhikkhave, dhammānaṃ 324 paṇṇattisaṅkhatānaṃ vā asaṅkhatānaṃ vā, virāgo tesaṃ dhammānaṃ aggamakkhāyati seṭṭhamakkhāyati pavaramakkhāyati, yadidaṃ madanimmadano…pe… nirodho nibbānaṃ. Yāvatā, bhikkhave, saṅghānaṃ paṇṇatti gaṇānaṃ paṇṇatti mahājanasannipātānaṃ paṇṇatti, tathāgatasāvakasaṅgho tesaṃ aggamakkhāyati seṭṭhamakkhāyati pavaramakkhāyati, yadidaṃ cattāri purisayugāni aṭṭha purisapuggalā…pe… puññakkhettaṃ lokassāti.
গণো চ নরসীহস্স, তানি তীণি ৰিস্সিস্সরে॥
Gaṇo ca narasīhassa, tāni tīṇi vississare.
‘‘সমণপদুমসঞ্চযো গণো, ধম্মৰরো চ ৰিদূনং সক্কতো।
‘‘Samaṇapadumasañcayo gaṇo, dhammavaro ca vidūnaṃ sakkato;
নরৰরদমকো চ চক্খুমা, তানি তীণি লোকস্স উত্তরি॥
Naravaradamako ca cakkhumā, tāni tīṇi lokassa uttari.
‘‘সত্থা চ অপ্পটিসমো, ধম্মো চ সব্বো নিরুপদাহো।
‘‘Satthā ca appaṭisamo, dhammo ca sabbo nirupadāho;
অরিযো চ গণৰরো, তানি খলু ৰিস্সিস্সরে তীণি॥
Ariyo ca gaṇavaro, tāni khalu vississare tīṇi.
‘‘সচ্চনামো জিনো খেমো সব্বাভিভূ, সচ্চধম্মো নত্থঞ্ঞো তস্স উত্তরি।
‘‘Saccanāmo jino khemo sabbābhibhū, saccadhammo natthañño tassa uttari;
অরিযসঙ্ঘো নিচ্চং ৰিঞ্ঞূনং পূজিতো, তানি তীণি লোকস্স উত্তরি॥
Ariyasaṅgho niccaṃ viññūnaṃ pūjito, tāni tīṇi lokassa uttari.
‘‘একাযনং জাতিখযন্তদস্সী, মগ্গং পজানাতি হিতানুকম্পী।
‘‘Ekāyanaṃ jātikhayantadassī, maggaṃ pajānāti hitānukampī;
এতেন মগ্গেন তরিংসু পুব্বে, তরিস্সন্তি যে চ 327 তরন্তি ওঘং॥
Etena maggena tariṃsu pubbe, tarissanti ye ca 328 taranti oghaṃ.
‘‘তং তাদিসং দেৰমনুস্সসেট্ঠং।
‘‘Taṃ tādisaṃ devamanussaseṭṭhaṃ;
সত্তা নমস্সন্তি ৰিসুদ্ধিপেক্খা’’তি॥
Sattā namassanti visuddhipekkhā’’ti.
অযং থৰোতি।
Ayaṃ thavoti.
তত্থ লোকিযং সুত্তং দ্ৰীহি সুত্তেহি নিদ্দিসিতব্বং সংকিলেসভাগিযেন চ ৰাসনাভাগিযেন চ। লোকুত্তরংপি সুত্তং তীহি সুত্তেহি নিদ্দিসিতব্বং দস্সনভাগিযেন চ ভাৰনাভাগিযেন চ অসেক্খভাগিযেন চ। লোকিযঞ্চ লোকুত্তরঞ্চ। যস্মিং সুত্তে যং যং পদং দিস্সতি সংকিলেসভাগিযং ৰা ৰাসনাভাগিযং ৰা, তেন তেন লোকিযন্তি নিদ্দিসিতব্বং, দস্সনভাগিযং ৰা ভাৰনাভাগিযং ৰা অসেক্খভাগিযং ৰা যং যং পদং দিস্সতি তেন তেন লোকুত্তরন্তি নিদ্দিসিতব্বং।
Tattha lokiyaṃ suttaṃ dvīhi suttehi niddisitabbaṃ saṃkilesabhāgiyena ca vāsanābhāgiyena ca. Lokuttaraṃpi suttaṃ tīhi suttehi niddisitabbaṃ dassanabhāgiyena ca bhāvanābhāgiyena ca asekkhabhāgiyena ca. Lokiyañca lokuttarañca. Yasmiṃ sutte yaṃ yaṃ padaṃ dissati saṃkilesabhāgiyaṃ vā vāsanābhāgiyaṃ vā, tena tena lokiyanti niddisitabbaṃ, dassanabhāgiyaṃ vā bhāvanābhāgiyaṃ vā asekkhabhāgiyaṃ vā yaṃ yaṃ padaṃ dissati tena tena lokuttaranti niddisitabbaṃ.
ৰাসনাভাগিযং সুত্তং সংকিলেসভাগিযস্স সুত্তস্স নিগ্ঘাতায, দস্সনভাগিযং সুত্তং ৰাসনাভাগিযস্স সুত্তস্স নিগ্ঘাতায, ভাৰনাভাগিযং সুত্তং দস্সনভাগিযস্স সুত্তস্স পটিনিস্সগ্গায, অসেক্খভাগিযং সুত্তং ভাৰনাভাগিযস্স সুত্তস্স পটিনিস্সগ্গায, অসেক্খভাগিযং সুত্তং দিট্ঠধম্মসুখৰিহারত্থং।
Vāsanābhāgiyaṃ suttaṃ saṃkilesabhāgiyassa suttassa nigghātāya, dassanabhāgiyaṃ suttaṃ vāsanābhāgiyassa suttassa nigghātāya, bhāvanābhāgiyaṃ suttaṃ dassanabhāgiyassa suttassa paṭinissaggāya, asekkhabhāgiyaṃ suttaṃ bhāvanābhāgiyassa suttassa paṭinissaggāya, asekkhabhāgiyaṃ suttaṃ diṭṭhadhammasukhavihāratthaṃ.
লোকুত্তরং সুত্তং সত্তাধিট্ঠানং ছব্বীসতিযা পুগ্গলেহি নিদ্দিসিতব্বং, তে তীহি সুত্তেহি সমন্ৰেসিতব্বা দস্সনভাগিযেন ভাৰনাভাগিযেন অসেক্খভাগিযেন চাতি।
Lokuttaraṃ suttaṃ sattādhiṭṭhānaṃ chabbīsatiyā puggalehi niddisitabbaṃ, te tīhi suttehi samanvesitabbā dassanabhāgiyena bhāvanābhāgiyena asekkhabhāgiyena cāti.
তত্থ দস্সনভাগিযং সুত্তং পঞ্চহি পুগ্গলেহি নিদ্দিসিতব্বং একবীজিনা কোলংকোলেন সত্তক্খত্তুপরমেন সদ্ধানুসারিনা ধম্মানুসারিনা চাতি, দস্সনভাগিযং সুত্তং ইমেহি পঞ্চহি পুগ্গলেহি নিদ্দিসিতব্বং। ভাৰনাভাগিযং সুত্তং দ্ৰাদসহি পুগ্গলেহি নিদ্দিসিতব্বং সকদাগামিফলসচ্ছিকিরিযায পটিপন্নেন, সকদাগামিনা, অনাগামিফলসচ্ছিকিরিযায পটিপন্নেন, অনাগামিনা , অন্তরা পরিনিব্বাযিনা, উপহচ্চ পরিনিব্বাযিনা, অসঙ্খারপরিনিব্বাযিনা, সসঙ্খারপরিনিব্বাযিনা, উদ্ধংসোতেন অকনিট্ঠগামিনা, সদ্ধাৰিমুত্তেন, দিট্ঠিপ্পত্তেন, কাযসক্খিনা চাতি, ভাৰনাভাগিযং সুত্তং ইমেহি দ্ৰাদসহি পুগ্গলেহি নিদ্দিসিতব্বং। অসেক্খভাগিযং সুত্তং নৰহি পুগ্গলেহি নিদ্দিসিতব্বং সদ্ধাৰিমুত্তেন, পঞ্ঞাৰিমুত্তেন, সুঞ্ঞতৰিমুত্তেন, অনিমিত্তৰিমুত্তেন, অপ্পণিহিতৰিমুত্তেন, উভতোভাগৰিমুত্তেন সমসীসিনা পচ্চেকবুদ্ধসম্মাসম্বুদ্ধেহি চাতি, অসেক্খভাগিযং সুত্তং ইমেহি নৰহি পুগ্গলেহি নিদ্দিসিতব্বং। এৰং লোকুত্তরং সুত্তং সত্তাধিট্ঠানং ইমেহি ছব্বীসতিযা পুগ্গলেহি নিদ্দিসিতব্বং।
Tattha dassanabhāgiyaṃ suttaṃ pañcahi puggalehi niddisitabbaṃ ekabījinā kolaṃkolena sattakkhattuparamena saddhānusārinā dhammānusārinā cāti, dassanabhāgiyaṃ suttaṃ imehi pañcahi puggalehi niddisitabbaṃ. Bhāvanābhāgiyaṃ suttaṃ dvādasahi puggalehi niddisitabbaṃ sakadāgāmiphalasacchikiriyāya paṭipannena, sakadāgāminā, anāgāmiphalasacchikiriyāya paṭipannena, anāgāminā , antarā parinibbāyinā, upahacca parinibbāyinā, asaṅkhāraparinibbāyinā, sasaṅkhāraparinibbāyinā, uddhaṃsotena akaniṭṭhagāminā, saddhāvimuttena, diṭṭhippattena, kāyasakkhinā cāti, bhāvanābhāgiyaṃ suttaṃ imehi dvādasahi puggalehi niddisitabbaṃ. Asekkhabhāgiyaṃ suttaṃ navahi puggalehi niddisitabbaṃ saddhāvimuttena, paññāvimuttena, suññatavimuttena, animittavimuttena, appaṇihitavimuttena, ubhatobhāgavimuttena samasīsinā paccekabuddhasammāsambuddhehi cāti, asekkhabhāgiyaṃ suttaṃ imehi navahi puggalehi niddisitabbaṃ. Evaṃ lokuttaraṃ suttaṃ sattādhiṭṭhānaṃ imehi chabbīsatiyā puggalehi niddisitabbaṃ.
লোকিযং সুত্তং সত্তাধিট্ঠানং একূনৰীসতিযা পুগ্গলেহি নিদ্দিসিতব্বং। তে চরিতেহি নিদ্দিট্ঠা সমন্ৰেসিতব্বা কেচি রাগচরিতা, কেচি দোসচরিতা, কেচি মোহচরিতা, কেচি রাগচরিতা চ দোসচরিতা চ, কেচি রাগচরিতা চ মোহচরিতা চ, কেচি দোসচরিতা চ মোহচরিতা চ, কেচি রাগচরিতা চ দোসচরিতা চ মোহচরিতা চ, রাগমুখে ঠিতো রাগচরিতো, রাগমুখে ঠিতো দোসচরিতো, রাগমুখে ঠিতো মোহচরিতো, রাগমুখে ঠিতো রাগচরিতো চ দোসচরিতো চ মোহচরিতো চ, দোসমুখে ঠিতো দোসচরিতো, দোসমুখে ঠিতো মোহচরিতো, দোসমুখে ঠিতো রাগচরিতো, দোসমুখে ঠিতো রাগচরিতো চ দোসচরিতো চ মোহচরিতো চ, মোহমুখে ঠিতো মোহচরিতো, মোহমুখে ঠিতো রাগচরিতো মোহমুখে ঠিতো দোসচরিতো, মোহমুখে ঠিতো রাগচরিতো চ দোসচরিতো চ মোহচরিতো চাতি, লোকিযং সুত্তং সত্তাধিট্ঠানং ইমেহি একূনৰীসতিযা পুগ্গলেহি নিদ্দিসিতব্বং।
Lokiyaṃ suttaṃ sattādhiṭṭhānaṃ ekūnavīsatiyā puggalehi niddisitabbaṃ. Te caritehi niddiṭṭhā samanvesitabbā keci rāgacaritā, keci dosacaritā, keci mohacaritā, keci rāgacaritā ca dosacaritā ca, keci rāgacaritā ca mohacaritā ca, keci dosacaritā ca mohacaritā ca, keci rāgacaritā ca dosacaritā ca mohacaritā ca, rāgamukhe ṭhito rāgacarito, rāgamukhe ṭhito dosacarito, rāgamukhe ṭhito mohacarito, rāgamukhe ṭhito rāgacarito ca dosacarito ca mohacarito ca, dosamukhe ṭhito dosacarito, dosamukhe ṭhito mohacarito, dosamukhe ṭhito rāgacarito, dosamukhe ṭhito rāgacarito ca dosacarito ca mohacarito ca, mohamukhe ṭhito mohacarito, mohamukhe ṭhito rāgacarito mohamukhe ṭhito dosacarito, mohamukhe ṭhito rāgacarito ca dosacarito ca mohacarito cāti, lokiyaṃ suttaṃ sattādhiṭṭhānaṃ imehi ekūnavīsatiyā puggalehi niddisitabbaṃ.
ৰাসনাভাগিযং সুত্তং সীলৰন্তেহি নিদ্দিসিতব্বং, তে সীলৰন্তো পঞ্চ পুগ্গলা পকতিসীলং সমাদানসীলং চিত্তপ্পসাদো সমথো ৰিপস্সনা চাতি, ৰাসনাভাগিযং সুত্তং ইমেহি পঞ্চহি পুগ্গলেহি নিদ্দিসিতব্বং।
Vāsanābhāgiyaṃ suttaṃ sīlavantehi niddisitabbaṃ, te sīlavanto pañca puggalā pakatisīlaṃ samādānasīlaṃ cittappasādo samatho vipassanā cāti, vāsanābhāgiyaṃ suttaṃ imehi pañcahi puggalehi niddisitabbaṃ.
লোকুত্তরং সুত্তং ধম্মাধিট্ঠানং তীহি সুত্তেহি নিদ্দিসিতব্বং দস্সনভাগিযেন ভাৰনাভাগিযেন অসেক্খভাগিযেন চ।
Lokuttaraṃ suttaṃ dhammādhiṭṭhānaṃ tīhi suttehi niddisitabbaṃ dassanabhāgiyena bhāvanābhāgiyena asekkhabhāgiyena ca.
লোকিযঞ্চ লোকুত্তরঞ্চ সত্তাধিট্ঠানঞ্চ ধম্মাধিট্ঠানঞ্চ উভযেন নিদ্দিসিতব্বং, ঞাণং পঞ্ঞায নিদ্দিসিতব্বং পঞ্ঞিন্দ্রিযেন পঞ্ঞাবলেন অধিপঞ্ঞাসিক্খায ধম্মৰিচযসম্বোজ্ঝঙ্গেন সম্মাদিট্ঠিযা তীরণায সন্তীরণায ধম্মে ঞাণেন অন্ৰযে ঞাণেন খযে ঞাণেন অনুপ্পাদে ঞাণেন অনঞ্ঞাতঞ্ঞস্সামীতিন্দ্রিযেন অঞ্ঞিন্দ্রিযেন অঞ্ঞাতাৰিন্দ্রিযেন চক্খুনা ৰিজ্জায বুদ্ধিযা ভূরিযা মেধায, যং যং ৰা পন লব্ভতি, তেন তেন পঞ্ঞাধিৰচনেন নিদ্দিসিতব্বং।
Lokiyañca lokuttarañca sattādhiṭṭhānañca dhammādhiṭṭhānañca ubhayena niddisitabbaṃ, ñāṇaṃ paññāya niddisitabbaṃ paññindriyena paññābalena adhipaññāsikkhāya dhammavicayasambojjhaṅgena sammādiṭṭhiyā tīraṇāya santīraṇāya dhamme ñāṇena anvaye ñāṇena khaye ñāṇena anuppāde ñāṇena anaññātaññassāmītindriyena aññindriyena aññātāvindriyena cakkhunā vijjāya buddhiyā bhūriyā medhāya, yaṃ yaṃ vā pana labbhati, tena tena paññādhivacanena niddisitabbaṃ.
ঞেয্যং অতীতানাগতপচ্চুপ্পন্নেহি অজ্ঝত্তিকবাহিরেহি হীনপ্পণীতেহি দূরসন্তিকেহি সঙ্খতাসঙ্খতেহি কুসলাকুসলাব্যাকতেহি সঙ্খেপতো ৰা ছহি আরম্মণেহি নিদ্দিসিতব্বং। ঞাণঞ্চ ঞেয্যঞ্চ তদুভযেন নিদ্দিসিতব্বং, পঞ্ঞাপি আরম্মণভূতা ঞেয্যং, যং কিঞ্চি আরম্মণভূতং অজ্ঝত্তিকং ৰা বাহিরং ৰা, সব্বং তং সঙ্খতেন অসঙ্খতেন চ নিদ্দিসিতব্বং।
Ñeyyaṃ atītānāgatapaccuppannehi ajjhattikabāhirehi hīnappaṇītehi dūrasantikehi saṅkhatāsaṅkhatehi kusalākusalābyākatehi saṅkhepato vā chahi ārammaṇehi niddisitabbaṃ. Ñāṇañca ñeyyañca tadubhayena niddisitabbaṃ, paññāpi ārammaṇabhūtā ñeyyaṃ, yaṃ kiñci ārammaṇabhūtaṃ ajjhattikaṃ vā bāhiraṃ vā, sabbaṃ taṃ saṅkhatena asaṅkhatena ca niddisitabbaṃ.
দস্সনং ভাৰনা 329 সকৰচনং পরৰচনং ৰিসজ্জনীযং অৰিসজ্জনীযং কম্মং ৰিপাকোতি সব্বত্থ তদুভযং সুত্তে যথা নিদ্দিট্ঠং, তথা উপধারযিত্ৰা লব্ভমানতো নিদ্দিসিতব্বং, যং ৰা পন কিঞ্চি ভগৰা অঞ্ঞতরৰচনং ভাসতি, সব্বং তং যথানিদ্দিট্ঠং ধারযিতব্বং।
Dassanaṃ bhāvanā 330 sakavacanaṃ paravacanaṃ visajjanīyaṃ avisajjanīyaṃ kammaṃ vipākoti sabbattha tadubhayaṃ sutte yathā niddiṭṭhaṃ, tathā upadhārayitvā labbhamānato niddisitabbaṃ, yaṃ vā pana kiñci bhagavā aññataravacanaṃ bhāsati, sabbaṃ taṃ yathāniddiṭṭhaṃ dhārayitabbaṃ.
দুৰিধো হেতু যঞ্চ কম্মং যে চ কিলেসা, সমুদযো কিলেসা। তত্থ কিলেসা সংকিলেসভাগিযেন সুত্তেন নিদ্দিসিতব্বা। সমুদযো সংকিলেসভাগিযেন চ ৰাসনাভাগিযেন চ সুত্তেন নিদ্দিসিতব্বো। তত্থ কুসলং চতূহি সুত্তেহি নিদ্দিসিতব্বং ৰাসনাভাগিযেন দস্সনভাগিযেন ভাৰনাভাগিযেন অসেক্খভাগিযেন চ। অকুসলং সংকিলেসভাগিযেন সুত্তেন নিদ্দিসিতব্বং । কুসলঞ্চ অকুসলঞ্চ তদুভযেন 331 নিদ্দিসিতব্বং। অনুঞ্ঞাতং ভগৰতো অনুঞ্ঞাতায নিদ্দিসিতব্বং, তং পঞ্চৰিধং সংৰরো পহানং ভাৰনা সচ্ছিকিরিযা কপ্পিযানুলোমোতি, যং দিস্সতি তাসু তাসু ভূমীসু, তং কপ্পিযানুলোমেন নিদ্দিসিতব্বং। পটিক্খিত্তং ভগৰতা পটিক্খিত্তকারণেন নিদ্দিসিতব্বং। অনুঞ্ঞাতঞ্চ পটিক্খিত্তঞ্চ তদুভযেন নিদ্দিসিতব্বং। থৰো পসংসায নিদ্দিসিতব্বো। সো পঞ্চৰিধেন ৰেদিতব্বো ভগৰতো ধম্মস্স অরিযসঙ্ঘস্স অরিযধম্মানং সিক্খায লোকিযগুণসম্পত্তিযাতি। এৰং থৰো পঞ্চৰিধেন নিদ্দিসিতব্বো।
Duvidho hetu yañca kammaṃ ye ca kilesā, samudayo kilesā. Tattha kilesā saṃkilesabhāgiyena suttena niddisitabbā. Samudayo saṃkilesabhāgiyena ca vāsanābhāgiyena ca suttena niddisitabbo. Tattha kusalaṃ catūhi suttehi niddisitabbaṃ vāsanābhāgiyena dassanabhāgiyena bhāvanābhāgiyena asekkhabhāgiyena ca. Akusalaṃ saṃkilesabhāgiyena suttena niddisitabbaṃ . Kusalañca akusalañca tadubhayena 332 niddisitabbaṃ. Anuññātaṃ bhagavato anuññātāya niddisitabbaṃ, taṃ pañcavidhaṃ saṃvaro pahānaṃ bhāvanā sacchikiriyā kappiyānulomoti, yaṃ dissati tāsu tāsu bhūmīsu, taṃ kappiyānulomena niddisitabbaṃ. Paṭikkhittaṃ bhagavatā paṭikkhittakāraṇena niddisitabbaṃ. Anuññātañca paṭikkhittañca tadubhayena niddisitabbaṃ. Thavo pasaṃsāya niddisitabbo. So pañcavidhena veditabbo bhagavato dhammassa ariyasaṅghassa ariyadhammānaṃ sikkhāya lokiyaguṇasampattiyāti. Evaṃ thavo pañcavidhena niddisitabbo.
ইন্দ্রিযভূমি নৰহি পদেহি নিদ্দিসিতব্বা, কিলেসভূমি নৰহি পদেহি নিদ্দিসিতব্বা, এৰমেতানি অট্ঠারস পদানি হোন্তি নৰ পদানি কুসলানি নৰ পদানি অকুসলানীতি, তথাহি ৰুত্তং ‘‘অট্ঠারস মূলপদা কুহিং দট্ঠব্বা, সাসনপ্পট্ঠানে’’তি। তেনাহ আযস্মা মহাকচ্চাযনো –
Indriyabhūmi navahi padehi niddisitabbā, kilesabhūmi navahi padehi niddisitabbā, evametāni aṭṭhārasa padāni honti nava padāni kusalāni nava padāni akusalānīti, tathāhi vuttaṃ ‘‘aṭṭhārasa mūlapadā kuhiṃ daṭṭhabbā, sāsanappaṭṭhāne’’ti. Tenāha āyasmā mahākaccāyano –
‘‘নৰহি চ পদেহি কুসলা, নৰহি চ যুজ্জন্তি অকুসলপ্পক্খা।
‘‘Navahi ca padehi kusalā, navahi ca yujjanti akusalappakkhā;
এতে খলু মূলপদা, ভৰন্তি অট্ঠারস পদানী’’তি॥
Ete khalu mūlapadā, bhavanti aṭṭhārasa padānī’’ti.
নিযুত্তং সাসনপ্পট্ঠানং।
Niyuttaṃ sāsanappaṭṭhānaṃ.
এত্তাৰতা সমত্তা নেত্তি যা আযস্মতা মহাকচ্চাযনেন ভাসিতা ভগৰতা অনুমোদিতা মূলসঙ্গীতিযং সঙ্গীতাতি।
Ettāvatā samattā netti yā āyasmatā mahākaccāyanena bhāsitā bhagavatā anumoditā mūlasaṅgītiyaṃ saṅgītāti.
নেত্তিপ্পকরণং নিট্ঠিতং।
Nettippakaraṇaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / সাসনপট্ঠানৰারৰণ্ণনা • Sāsanapaṭṭhānavāravaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / সাসনপট্ঠানৰারৰণ্ণনা • Sāsanapaṭṭhānavāravaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / সাসনপট্ঠানৰিভাৰনা • Sāsanapaṭṭhānavibhāvanā
