Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā

ஸாஸனபட்டா²னவாரவண்ணனா

Sāsanapaṭṭhānavāravaṇṇanā

89.

ஏவங் ஸப்³ப³தா² நயஸமுட்டா²னங் விப⁴ஜித்வா இதா³னி ஸாஸனபட்டா²னங் விப⁴ஜந்தோ யஸ்மா ஸங்க³ஹவாராதீ³ஸு மூலபதே³ஹேவ பட்டா²னங் ஸங்க³ஹெத்வா ஸரூபதோ ந த³ஸ்ஸிதங், தஸ்மா யதா² மூலபதே³ஹி பட்டா²னங் நித்³தா⁴ரேதப்³ப³ங், ஏவங் பட்டா²னதோபி மூலபதா³னி நித்³தா⁴ரேதப்³பா³னீதி த³ஸ்ஸனத்த²ங் ‘‘அட்டா²ரஸ மூலபதா³ குஹிங் த³ட்ட²ப்³பா³? ஸாஸனபட்டா²னே’’தி ஆஹ. மூலபத³ஸாஸனபட்டா²னானஞ்ஹி அஞ்ஞமஞ்ஞஸங்க³ஹோ புப்³பே³ த³ஸ்ஸிதோ ஏவாதி. அத² ஸாஸனபட்டா²னந்தி கோ வசனத்தோ²? ஸாஸனஸ்ஸ பட்டா²னந்தி ஸாஸனபட்டா²னங் , ஸாஸனங் தே³ஸனா, தஸ்ஸா வேனெய்யஜ்ஜா²ஸயானுரூபங் தேஸங் ஹிதஸுக²னிப்பா²த³னத்த²ங் பகாரேஹி டா²னங் பவத்தி ஸாஸனபட்டா²னங். இத⁴ பன தஸ்ஸ ததா²பா⁴வதீ³பனங் ‘‘ஸாஸனபட்டா²ன’’ந்தி வேதி³தப்³ப³ங். அத² வா ஸாஸனங் அதி⁴ஸீலஸிக்கா²த³யோ. தேஸங் பவத்தனுபாயபா⁴வதோ பதிட்ட²ஹந்தி ஏதேஹீதி பட்டா²னானி, ஸங்கிலேஸாதி³த⁴ம்மா. தேஸங் பவேத³னதோ தது³பசாரேன ஸுத்தானி பட்டா²னானி. தேஸங் பன ஸமூஹபா⁴வதோ அயங் பகரணப்பதே³ஸோ பட்டா²னங் நாம.

Evaṃ sabbathā nayasamuṭṭhānaṃ vibhajitvā idāni sāsanapaṭṭhānaṃ vibhajanto yasmā saṅgahavārādīsu mūlapadeheva paṭṭhānaṃ saṅgahetvā sarūpato na dassitaṃ, tasmā yathā mūlapadehi paṭṭhānaṃ niddhāretabbaṃ, evaṃ paṭṭhānatopi mūlapadāni niddhāretabbānīti dassanatthaṃ ‘‘aṭṭhārasa mūlapadā kuhiṃ daṭṭhabbā? Sāsanapaṭṭhāne’’ti āha. Mūlapadasāsanapaṭṭhānānañhi aññamaññasaṅgaho pubbe dassito evāti. Atha sāsanapaṭṭhānanti ko vacanattho? Sāsanassa paṭṭhānanti sāsanapaṭṭhānaṃ , sāsanaṃ desanā, tassā veneyyajjhāsayānurūpaṃ tesaṃ hitasukhanipphādanatthaṃ pakārehi ṭhānaṃ pavatti sāsanapaṭṭhānaṃ. Idha pana tassa tathābhāvadīpanaṃ ‘‘sāsanapaṭṭhāna’’nti veditabbaṃ. Atha vā sāsanaṃ adhisīlasikkhādayo. Tesaṃ pavattanupāyabhāvato patiṭṭhahanti etehīti paṭṭhānāni, saṃkilesādidhammā. Tesaṃ pavedanato tadupacārena suttāni paṭṭhānāni. Tesaṃ pana samūhabhāvato ayaṃ pakaraṇappadeso paṭṭhānaṃ nāma.

அபரோ நயோ – கேனட்டே²ன பட்டா²னங்? பட்டி²தட்டே²ன க³மனட்டே²னாதி அத்தோ². ‘‘யே தே கொ³ட்டா² பட்டி²தகா³வோ’’தி (ம॰ நி॰ 1.156) ஆக³தட்டா²னஸ்மிஞ்ஹி யேன பட்டா²னேன தே ‘‘கொ³ட்டா² பட்டி²தகா³வோ’’தி வுத்தா, தங் அத்த²தோ க³மனங் ஹோதி. இதி நாதிவித்தா²ரிதனயேஸு ஹாரனயேஸு அனிஸ்ஸங்க³க³மனஸ்ஸ தே³ஸனாஞாணஸ்ஸ ஸங்கிலேஸபா⁴கி³யாதி³லோகியாதி³பே⁴தே³ஸு தது³ப⁴யவோமிஸ்ஸகபே⁴தே³ஸு ச வித்தா²ரிதனயலாப⁴தோ நிஸ்ஸங்க³வஸேன பவத்தக³மனத்தா தே ஸங்கிலேஸபா⁴கி³யாத³யோ லோகியாத³யோ ச விஸுங் விஸுங் வோமிஸ்ஸா ச அதி⁴கரணவஸேன பட்டா²னங் நாம. தேஸங் பகாஸனதோ அயங் பகரணப்பதே³ஸோ பட்டா²னந்தி வேதி³தப்³ப³ங்.

Aparo nayo – kenaṭṭhena paṭṭhānaṃ? Paṭṭhitaṭṭhena gamanaṭṭhenāti attho. ‘‘Ye te goṭṭhā paṭṭhitagāvo’’ti (ma. ni. 1.156) āgataṭṭhānasmiñhi yena paṭṭhānena te ‘‘goṭṭhā paṭṭhitagāvo’’ti vuttā, taṃ atthato gamanaṃ hoti. Iti nātivitthāritanayesu hāranayesu anissaṅgagamanassa desanāñāṇassa saṃkilesabhāgiyādilokiyādibhedesu tadubhayavomissakabhedesu ca vitthāritanayalābhato nissaṅgavasena pavattagamanattā te saṃkilesabhāgiyādayo lokiyādayo ca visuṃ visuṃ vomissā ca adhikaraṇavasena paṭṭhānaṃ nāma. Tesaṃ pakāsanato ayaṃ pakaraṇappadeso paṭṭhānanti veditabbaṃ.

‘‘ஸங்கிலேஸபா⁴கி³ய’’ந்திஆதீ³ஸு ஸங்கிலிஸ்ஸதி ஏதேனாதி ஸங்கிலேஸோ. ஸங்கிலேஸபா⁴கே³ ஸங்கிலேஸகொட்டா²ஸே பவத்தங் ஸங்கிலேஸபா⁴கி³யங். வாஸனா புஞ்ஞபா⁴வனா, வாஸனாபா⁴கே³ பவத்தங் வாஸனாபா⁴கி³யங், வாஸனங் ப⁴ஜாபேதீதி வா வாஸனாபா⁴கி³யங். நிப்³பி³ஜ்ஜ²னங் லோப⁴க்க²ந்தா⁴தீ³னங் பதா³லனங் நிப்³பே³தோ⁴. நிப்³பே³த⁴பா⁴கே³ பவத்தங், நிப்³பே³த⁴ங் ப⁴ஜாபேதீதி வா நிப்³பே³த⁴பா⁴கி³யங். பரினிட்டி²தஸிக்கா²த⁴ம்மா அஸெக்கா², அஸெக்க²பா⁴வே பவத்தங், அஸெக்கே² ப⁴ஜாபேதீதி வா அஸெக்க²பா⁴கி³யங். தேஸு யத்த² தண்ஹாதி³ஸங்கிலேஸோ விப⁴த்தோ, இத³ங் ஸங்கிலேஸபா⁴கி³யங். யத்த² தா³னாதி³புஞ்ஞகிரியவத்து² விப⁴த்தங், இத³ங் வாஸனாபா⁴கி³யங். யத்த² ஸெக்கா² ஸீலக்க²ந்தா⁴த³யோ விப⁴த்தா, இத³ங் நிப்³பே³த⁴பா⁴கி³யங். யத்த² பன அஸெக்கா² ஸீலக்க²ந்தா⁴த³யோ விப⁴த்தா, இத³ங் அஸெக்க²பா⁴கி³யங். இதரானி தேஸங் வோமிஸ்ஸகனயவஸேன வுத்தானி.

‘‘Saṃkilesabhāgiya’’ntiādīsu saṃkilissati etenāti saṃkileso. Saṃkilesabhāge saṃkilesakoṭṭhāse pavattaṃ saṃkilesabhāgiyaṃ. Vāsanā puññabhāvanā, vāsanābhāge pavattaṃ vāsanābhāgiyaṃ, vāsanaṃ bhajāpetīti vā vāsanābhāgiyaṃ. Nibbijjhanaṃ lobhakkhandhādīnaṃ padālanaṃ nibbedho. Nibbedhabhāge pavattaṃ, nibbedhaṃ bhajāpetīti vā nibbedhabhāgiyaṃ. Pariniṭṭhitasikkhādhammā asekkhā, asekkhabhāve pavattaṃ, asekkhe bhajāpetīti vā asekkhabhāgiyaṃ. Tesu yattha taṇhādisaṃkileso vibhatto, idaṃ saṃkilesabhāgiyaṃ. Yattha dānādipuññakiriyavatthu vibhattaṃ, idaṃ vāsanābhāgiyaṃ. Yattha sekkhā sīlakkhandhādayo vibhattā, idaṃ nibbedhabhāgiyaṃ. Yattha pana asekkhā sīlakkhandhādayo vibhattā, idaṃ asekkhabhāgiyaṃ. Itarāni tesaṃ vomissakanayavasena vuttāni.

தானி பன ச² து³கா சத்தாரோ திகா ஏகங் சதுக்கங் அபரம்பி ஏகங் சதுக்கந்தி த்³வாத³ஸ ஹொந்தி. தேஸு சத்தாரோ து³கா த்³வே ச திகா உத்³த⁴டா, இதரே ந உத்³த⁴டா, அனுத்³த⁴ரணே காரணங் நத்தி². இமினா நயேன தேபி க³ஹேதுங் ஸக்காதி பாளியங் ஸங்கி²த்தாதி த³ட்ட²ப்³ப³ங். ததா² ஹி வக்க²தி – ‘‘இமானி சத்தாரி ஸுத்தானி, ஸாதா⁴ரணானி கதானி அட்ட² ப⁴வந்தீ’’திஆதி³. தத்த² யஸ்மா கத்த²சி ஸுத்தே தண்ஹாஸங்கிலேஸோவ நித்³தி³ஸீயதி, கத்த²சி தி³ட்டி²ஸங்கிலேஸோவ, கத்த²சி து³ச்சரிதஸங்கிலேஸோவ நித்³தி³ஸீயதி, தஸ்மா ஸங்கிலேஸபா⁴கி³யங் ஸுத்தங் திதா⁴ விப⁴ஜித்வா உத்³தி³ட்ட²ங் ‘‘தண்ஹாஸங்கிலேஸபா⁴கி³யங் ஸுத்த’’ந்திஆதி³னா. ததா² வோதா³னங் நாம ஸங்கிலேஸே ஸதி ஹோதீதி வோதா³னபா⁴கி³யங் ஸுத்தங் ஸங்கிலேஸவிபா⁴கே³ன திதா⁴வ உத்³தி³ட்ட²ங் ‘‘தண்ஹாவோதா³னபா⁴கி³யங் ஸுத்த’’ந்திஆதி³னா. தங் பன அத்த²தோ வாஸனாபா⁴கி³யாதி³ ஏவ ஹோதி. அயஞ்ச நயோ கேஸுசி பொத்த²கேஸு நத்தி².

Tāni pana cha dukā cattāro tikā ekaṃ catukkaṃ aparampi ekaṃ catukkanti dvādasa honti. Tesu cattāro dukā dve ca tikā uddhaṭā, itare na uddhaṭā, anuddharaṇe kāraṇaṃ natthi. Iminā nayena tepi gahetuṃ sakkāti pāḷiyaṃ saṃkhittāti daṭṭhabbaṃ. Tathā hi vakkhati – ‘‘imāni cattāri suttāni, sādhāraṇāni katāni aṭṭha bhavantī’’tiādi. Tattha yasmā katthaci sutte taṇhāsaṃkilesova niddisīyati, katthaci diṭṭhisaṃkilesova, katthaci duccaritasaṃkilesova niddisīyati, tasmā saṃkilesabhāgiyaṃ suttaṃ tidhā vibhajitvā uddiṭṭhaṃ ‘‘taṇhāsaṃkilesabhāgiyaṃ sutta’’ntiādinā. Tathā vodānaṃ nāma saṃkilese sati hotīti vodānabhāgiyaṃ suttaṃ saṃkilesavibhāgena tidhāva uddiṭṭhaṃ ‘‘taṇhāvodānabhāgiyaṃ sutta’’ntiādinā. Taṃ pana atthato vāsanābhāgiyādi eva hoti. Ayañca nayo kesuci potthakesu natthi.

‘‘தத்த² ஸங்கிலேஸோ திவிதோ⁴’’திஆதி³ ஸங்கிலேஸபடிபக்க²தோ ஸமதா²தி³னித்³தா⁴ரணவஸேன வாஸனாபா⁴கி³யாதி³ஸுத்தானங் விஸயத³ஸ்ஸனத்த²ங் ஆரத்³த⁴ங். தத்த² யதி³ ஆஸத்தி உப்பஜ்ஜதி ப⁴வேஸூதி ப⁴வேஸு ச²ந்த³ராக³ங் பஜஹிதுங் அஸக்கொந்தஸ்ஸ யதி³ ப⁴வபத்த²னா உப்பஜ்ஜதி. ஏவங் ஸாயந்தி ஏவமஸ்ஸ புக்³க³லஸ்ஸ அயங் ஸமத²விபஸ்ஸனாபா⁴வனாமயங் புஞ்ஞகிரியவத்து² ப⁴வதி புஜ்ஜப⁴வப²லனிப்³ப³த்தனதோ. தத்ரூபபத்தியா ஸங்வத்ததீதி தத்ர தத்ர ப⁴வே உபபத்தியா ஸங்வத்ததி. இமானி சத்தாரி ஸுத்தானீதி இமானி ஸங்கிலேஸபா⁴கி³யாதீ³னி சத்தாரி ஸுத்தானி. ஸாதா⁴ரணானி கதானீதி ஸங்கிலேஸபா⁴கி³யஞ்ச வாஸனாபா⁴கி³யஞ்ச, ஸங்கிலேஸபா⁴கி³யஞ்ச நிப்³பே³த⁴பா⁴கி³யஞ்ச, ஸங்கிலேஸபா⁴கி³யஞ்ச அஸெக்க²பா⁴கி³யஞ்ச, வாஸனாபா⁴கி³யஞ்ச நிப்³பே³த⁴பா⁴கி³யஞ்சாதி ஏவங் பத³ந்தரஸங்யோஜனவஸேன மிஸ்ஸிதானி கதானி. அட்ட² ப⁴வந்தீதி புரிமானி சத்தாரி இமானி சத்தாரீதி ஏவங் அட்ட² ப⁴வந்தி.

‘‘Tattha saṃkileso tividho’’tiādi saṃkilesapaṭipakkhato samathādiniddhāraṇavasena vāsanābhāgiyādisuttānaṃ visayadassanatthaṃ āraddhaṃ. Tattha yadi āsatti uppajjati bhavesūti bhavesu chandarāgaṃ pajahituṃ asakkontassa yadi bhavapatthanā uppajjati. Evaṃ sāyanti evamassa puggalassa ayaṃ samathavipassanābhāvanāmayaṃ puññakiriyavatthu bhavati pujjabhavaphalanibbattanato. Tatrūpapattiyā saṃvattatīti tatra tatra bhave upapattiyā saṃvattati. Imāni cattāri suttānīti imāni saṃkilesabhāgiyādīni cattāri suttāni. Sādhāraṇāni katānīti saṃkilesabhāgiyañca vāsanābhāgiyañca, saṃkilesabhāgiyañca nibbedhabhāgiyañca, saṃkilesabhāgiyañca asekkhabhāgiyañca, vāsanābhāgiyañca nibbedhabhāgiyañcāti evaṃ padantarasaṃyojanavasena missitāni katāni. Aṭṭha bhavantīti purimāni cattāri imāni cattārīti evaṃ aṭṭha bhavanti.

தானியேவ அட்ட² ஸுத்தானி ஸாதா⁴ரணானி கதானி ஸோளஸ ப⁴வந்தீதி தானியேவ யதா²வுத்தானி அட்ட² ஸுத்தானி வாஸனாபா⁴கி³யஞ்ச அஸெக்க²பா⁴கி³யஞ்ச நிப்³பே³த⁴பா⁴கி³யஞ்ச, அஸெக்க²பா⁴கி³யஞ்ச ஸங்கிலேஸபா⁴கி³யஞ்ச வாஸனாபா⁴கி³யஞ்ச, நிப்³பே³த⁴பா⁴கி³யஞ்ச ஸங்கிலேஸபா⁴கி³யஞ்ச வாஸனாபா⁴கி³யஞ்ச, அஸெக்க²பா⁴கி³யஞ்ச ஸங்கிலேஸபா⁴கி³யஞ்ச நிப்³பே³த⁴பா⁴கி³யஞ்ச, அஸெக்க²பா⁴கி³யஞ்ச வாஸனாபா⁴கி³யஞ்ச நிப்³பே³த⁴பா⁴கி³யஞ்ச, அஸெக்க²பா⁴கி³யஞ்ச ஸங்கிலேஸபா⁴கி³யஞ்ச வாஸனாபா⁴கி³யஞ்ச, நிப்³பே³த⁴பா⁴கி³யஞ்ச அஸெக்க²பா⁴கி³யஞ்ச நேவஸங்கிலேஸபா⁴கி³யஞ்ச, நவாஸனாபா⁴கி³யஞ்ச நனிப்³பே³த⁴பா⁴கி³யஞ்ச ந அஸெக்க²பா⁴கி³யஞ்சாதி ஏவங் ஸாதா⁴ரணானி கதானி புரிமானி அட்ட² இமானி அட்டா²தி ஸோளஸ ப⁴வந்தி. தேஸு சத்தாரோ ஏககா, ச² து³கா, சத்தாரோ திகா, ஏகோ சதுக்கோ, அபரோபி ஏகோ சதுக்கோதி அயம்பி விபா⁴கோ³ வேதி³தப்³போ³. தத்தா²பி த்³வே து³கா, த்³வே திகா, த்³வே சதுக்கா ச பாளியங் அனாக³தாதி வேதி³தப்³பா³.

Tāniyeva aṭṭha suttāni sādhāraṇāni katāni soḷasa bhavantīti tāniyeva yathāvuttāni aṭṭha suttāni vāsanābhāgiyañca asekkhabhāgiyañca nibbedhabhāgiyañca, asekkhabhāgiyañca saṃkilesabhāgiyañca vāsanābhāgiyañca, nibbedhabhāgiyañca saṃkilesabhāgiyañca vāsanābhāgiyañca, asekkhabhāgiyañca saṃkilesabhāgiyañca nibbedhabhāgiyañca, asekkhabhāgiyañca vāsanābhāgiyañca nibbedhabhāgiyañca, asekkhabhāgiyañca saṃkilesabhāgiyañca vāsanābhāgiyañca, nibbedhabhāgiyañca asekkhabhāgiyañca nevasaṃkilesabhāgiyañca, navāsanābhāgiyañca nanibbedhabhāgiyañca na asekkhabhāgiyañcāti evaṃ sādhāraṇāni katāni purimāni aṭṭha imāni aṭṭhāti soḷasa bhavanti. Tesu cattāro ekakā, cha dukā, cattāro tikā, eko catukko, aparopi eko catukkoti ayampi vibhāgo veditabbo. Tatthāpi dve dukā, dve tikā, dve catukkā ca pāḷiyaṃ anāgatāti veditabbā.

இதா³னி இமஸ்ஸ பட்டா²னஸ்ஸ ஸகலஸாஸனஸங்க³ஹிதபா⁴வங் விபா⁴வேதுங் ‘‘இமேஹி ஸோளஸஹி ஸுத்தேஹி பி⁴ன்னேஹி நவவித⁴ங் ஸுத்தங் பி⁴ன்னங் ப⁴வதீ’’தி வுத்தங். தஸ்ஸத்தோ² – இமேஹி ஸங்கிலேஸபா⁴கி³யாதீ³ஹி ஸோளஸஹி ஸுத்தேஹி பட்டா²னநயேன விப⁴த்தேஹி ஸுத்தகெ³ய்யாதி³னவவித⁴ங் பரியத்திஸாஸனஸங்கா²தங் ஸுத்தங் பி⁴ன்னங் ஸோளஸதா⁴ விப⁴த்தங் ஹோதி. இமினா ஸோளஸவிதே⁴ன பட்டா²னேன அஸங்க³ஹிதோ பரியத்திஸாஸனஸ்ஸ பதே³ஸோ நத்தீ²தி அதி⁴ப்பாயோ. கத²ங் பன ஸங்கிலேஸபா⁴கி³யாதி³பா⁴வோ க³ஹேதப்³போ³தி? ஆஹ ‘‘கா³தா²ய கா³தா² அனுமினிதப்³பா³’’திஆதி³. தத்த² கா³தா²ய கா³தா² அனுமினிதப்³பா³தி அயங் கா³தா² விய கா³தா² ஸங்கிலேஸபா⁴கி³யாதி வா வாஸனாபா⁴கி³யாதி வா நிப்³பே³த⁴பா⁴கி³யாதி வா அஸெக்க²பா⁴கி³யாதி வா அனுமினிதப்³பா³, அனு அனு மினித்வா தக்கெத்வா ஜானிதப்³பா³தி அத்தோ². ஸேஸபதே³ஸுபி ஏஸேவ நயோ. எத்த² ச கா³தா²வெய்யாகரணவினிமுத்தா ஸப்³பா³ பரியத்தி ‘‘ஸுத்தேனா’’திபதே³ன ஸங்க³ஹிதாதி த³ட்ட²ப்³பா³.

Idāni imassa paṭṭhānassa sakalasāsanasaṅgahitabhāvaṃ vibhāvetuṃ ‘‘imehi soḷasahi suttehi bhinnehi navavidhaṃ suttaṃ bhinnaṃ bhavatī’’ti vuttaṃ. Tassattho – imehi saṃkilesabhāgiyādīhi soḷasahi suttehi paṭṭhānanayena vibhattehi suttageyyādinavavidhaṃ pariyattisāsanasaṅkhātaṃ suttaṃ bhinnaṃ soḷasadhā vibhattaṃ hoti. Iminā soḷasavidhena paṭṭhānena asaṅgahito pariyattisāsanassa padeso natthīti adhippāyo. Kathaṃ pana saṃkilesabhāgiyādibhāvo gahetabboti? Āha ‘‘gāthāya gāthā anuminitabbā’’tiādi. Tattha gāthāya gāthā anuminitabbāti ayaṃ gāthā viya gāthā saṃkilesabhāgiyāti vā vāsanābhāgiyāti vā nibbedhabhāgiyāti vā asekkhabhāgiyāti vā anuminitabbā, anu anu minitvā takketvā jānitabbāti attho. Sesapadesupi eseva nayo. Ettha ca gāthāveyyākaraṇavinimuttā sabbā pariyatti ‘‘suttenā’’tipadena saṅgahitāti daṭṭhabbā.

90.

இதா³னி ஸங்கிலேஸபா⁴கி³யாதீ³னி ஸுத்தானி யதா²னித்³தி³ட்டா²னி உதா³ஹரணவஸேன விபா⁴வேதுங் ‘‘தத்த² கதமங் ஸங்கிலேஸபா⁴கி³யங் ஸுத்த’’ந்திஆதி³ ஆரத்³த⁴ங். தத்த² ‘‘காமந்தா⁴ ஜாலஸஞ்ச²ன்னா’’தி கா³தா²ய அத்தோ² ஹெட்டா² வுத்தோயேவ. யதா² இமஸ்ஸ, ஏவங் இதோ பரானம்பி ஹெட்டா² வுத்தத்தா²னங் உத்தானபதா³னஞ்ச அத்த²ங் ந வண்ணயிஸ்ஸாம.

Idāni saṃkilesabhāgiyādīni suttāni yathāniddiṭṭhāni udāharaṇavasena vibhāvetuṃ ‘‘tattha katamaṃ saṃkilesabhāgiyaṃ sutta’’ntiādi āraddhaṃ. Tattha ‘‘kāmandhā jālasañchannā’’ti gāthāya attho heṭṭhā vuttoyeva. Yathā imassa, evaṃ ito parānampi heṭṭhā vuttatthānaṃ uttānapadānañca atthaṃ na vaṇṇayissāma.

அக³திக³மனானீதி காயாதீ³ஹி அயுத்தக³மனானி, அகத்தப்³ப³கரணானீதி அத்தோ². ச²ந்தா³தி ச²ந்த³ஹேது இச்சா²பச்சயா. அக³திங் க³ச்ச²தீதி அக³ந்தப்³ப³ங் க³திங் க³ச்ச²தி, அகத்தப்³ப³ங் கரோதீதி அத்தோ². த⁴ம்மந்தி ஸாதூ⁴னங் அரியானங் த⁴ம்மங். அதிவத்ததீதி அதிமத்³தி³த்வா வீதிக்கமதி. நிஹீயதீதி ஹாயதி. யஸோதி கித்தி ச பரிவாரோ ச.

Agatigamanānīti kāyādīhi ayuttagamanāni, akattabbakaraṇānīti attho. Chandāti chandahetu icchāpaccayā. Agatiṃ gacchatīti agantabbaṃ gatiṃ gacchati, akattabbaṃ karotīti attho. Dhammanti sādhūnaṃ ariyānaṃ dhammaṃ. Ativattatīti atimadditvā vītikkamati. Nihīyatīti hāyati. Yasoti kitti ca parivāro ca.

‘‘மனோபுப்³ப³ங்க³மா த⁴ம்மா’’தி கா³தா²யங் மனோதி யதி³பி காமாவசரகுஸலாதி³பே⁴த³ங் ஸப்³ப³ம்பி சதுபூ⁴மகசித்தங் மனோ, இமஸ்மிங் பன டா²னே சக்கு²பாலத்தே²ரஸ்ஸ (த⁴॰ ப॰ 1-2; தே²ரகா³॰ 95) புரிமஜாதியங் வேஜ்ஜபூ⁴தஸ்ஸ உப்பன்னவஸேன நியமியமானங் படிக⁴ஸம்பயுத்தசித்தமேவ லப்³ப⁴தி. ஸோ மனோ புப்³ப³ங்க³மோ ஏதேஸந்தி மனோபுப்³ப³ங்க³மா, மனஸா பட²மகா³மினா ஸமன்னாக³தாதி அத்தோ². த⁴ம்மாதி நிஸ்ஸத்தனிஜ்ஜீவட்டே²ன த⁴ம்மா, தே பன வேத³னாத³யோ தயோ அரூபினோ க²ந்தா⁴. ஏதே ஹி மனோபுப்³ப³ங்க³மா. கத²ங் பனேதேஹி ஸத்³தி⁴ங் ஏகஸ்மிங் வத்து²ஸ்மிங் ஏகஸ்மிஞ்ச ஆரம்மணே ஏகக்க²ணே உப்பஜ்ஜமானோ மனோ புப்³ப³ங்க³மோ நாம ஹோதீதி? உப்பாத³பச்சயட்டே²ன. யதா² ஹி ப³ஹூஸு ஏகதோ கா³மகா⁴தாதி³கம்மானி கரொந்தேஸு ‘‘கோ ஏதேஸங் புப்³ப³ங்க³மோ’’தி வுத்தே யோ தேஸங் பச்சயோ ஹோதி, யங் யங் நிஸ்ஸாய தே தங் கம்மங் கரொந்தி, ஸோ த³த்தோ வா மித்தோ வா தேஸங் புப்³ப³ங்க³மோதி வுச்சதி, ஏவங்ஸம்பத³மித³ங் த³ட்ட²ப்³ப³ங். இதி உப்பாத³பச்சயட்டே²ன மனோ புப்³ப³ங்க³மோ ஏதேஸந்தி மனோபுப்³ப³ங்க³மா. ந ஹி தே மனே அனுப்பஜ்ஜந்தே உப்பஜ்ஜிதுங் ஸக்குணந்தி, மனோ பன ஏகச்சேஸு சேதஸிகேஸு அனுப்பஜ்ஜந்தேஸுபி உப்பஜ்ஜதி ஏவ.

‘‘Manopubbaṅgamā dhammā’’ti gāthāyaṃ manoti yadipi kāmāvacarakusalādibhedaṃ sabbampi catubhūmakacittaṃ mano, imasmiṃ pana ṭhāne cakkhupālattherassa (dha. pa. 1-2; theragā. 95) purimajātiyaṃ vejjabhūtassa uppannavasena niyamiyamānaṃ paṭighasampayuttacittameva labbhati. So mano pubbaṅgamo etesanti manopubbaṅgamā, manasā paṭhamagāminā samannāgatāti attho. Dhammāti nissattanijjīvaṭṭhena dhammā, te pana vedanādayo tayo arūpino khandhā. Ete hi manopubbaṅgamā. Kathaṃ panetehi saddhiṃ ekasmiṃ vatthusmiṃ ekasmiñca ārammaṇe ekakkhaṇe uppajjamāno mano pubbaṅgamo nāma hotīti? Uppādapaccayaṭṭhena. Yathā hi bahūsu ekato gāmaghātādikammāni karontesu ‘‘ko etesaṃ pubbaṅgamo’’ti vutte yo tesaṃ paccayo hoti, yaṃ yaṃ nissāya te taṃ kammaṃ karonti, so datto vā mitto vā tesaṃ pubbaṅgamoti vuccati, evaṃsampadamidaṃ daṭṭhabbaṃ. Iti uppādapaccayaṭṭhena mano pubbaṅgamo etesanti manopubbaṅgamā. Na hi te mane anuppajjante uppajjituṃ sakkuṇanti, mano pana ekaccesu cetasikesu anuppajjantesupi uppajjati eva.

அதி⁴பதிவஸேன மனோ ஸெட்டோ² ஏதேஸந்தி மனோஸெட்டா². யதா² ஹி சோராதீ³னங் சோரஜெட்ட²காத³யோ அதி⁴பதினோ ஸெட்டா², ததா² தேஸம்பி மனோ ஸெட்டோ². யதா² பன தா³ருஆதீ³ஹி நிப்ப²ன்னானி ப⁴ண்டா³னி தா³ருமயாதீ³னி நாம ஹொந்தி, ததா² ஏதேபி மனதோ நிப்ப²ன்னத்தா மனோமயா நாம. பது³ட்டே²னாதி அபி⁴ஜ்ஜா²தீ³ஹி தோ³ஸேஹி பது³ட்டே²ன தூ³ஸிதேன பா⁴ஸதி வா கரோதி வா. ஸோ ஹி பா⁴ஸந்தோ சதுப்³பி³த⁴ங் வசீது³ச்சரிதமேவ பா⁴ஸதி, கரொந்தோபி திவித⁴ங் காயது³ச்சரிதமேவ கரோதி, அபா⁴ஸந்தோ அகரொந்தோ தேஹி அபி⁴ஜ்ஜா²தீ³ஹி பது³ட்ட²மனதாய திவித⁴ங் மனோது³ச்சரிதங் பூரேதி. ஏவமஸ்ஸ த³ஸ அகுஸலகம்மபதா² பாரிபூரிங் க³ச்ச²ந்தி. ததோ நங் து³க்க²மன்வேதீதி ததோ திவித⁴து³ச்சரிததோ தங் புக்³க³லங் து³க்க²ங் அன்வேதி து³ச்சரிதானுபா⁴வேன சதூஸு அபாயேஸு து³க்க²ங் அனுக³ச்ச²தி. யதா² கிங்? சக்கங்வ வஹதோ பத³ந்தி, யதா² நாம ஸகடங் வஹதோ ப³லீப³த்³த³ஸ்ஸ பத³ங் பஹரந்தங் சக்கங் அனுக³ச்ச²தி, ஏவங் நங் புக்³க³லங் து³க்க²மனுக³ச்ச²தீதி.

Adhipativasena mano seṭṭho etesanti manoseṭṭhā. Yathā hi corādīnaṃ corajeṭṭhakādayo adhipatino seṭṭhā, tathā tesampi mano seṭṭho. Yathā pana dāruādīhi nipphannāni bhaṇḍāni dārumayādīni nāma honti, tathā etepi manato nipphannattā manomayā nāma. Paduṭṭhenāti abhijjhādīhi dosehi paduṭṭhena dūsitena bhāsati vā karoti vā. So hi bhāsanto catubbidhaṃ vacīduccaritameva bhāsati, karontopi tividhaṃ kāyaduccaritameva karoti, abhāsanto akaronto tehi abhijjhādīhi paduṭṭhamanatāya tividhaṃ manoduccaritaṃ pūreti. Evamassa dasa akusalakammapathā pāripūriṃ gacchanti. Tato naṃ dukkhamanvetīti tato tividhaduccaritato taṃ puggalaṃ dukkhaṃ anveti duccaritānubhāvena catūsu apāyesu dukkhaṃ anugacchati. Yathā kiṃ? Cakkaṃva vahato padanti, yathā nāma sakaṭaṃ vahato balībaddassa padaṃ paharantaṃ cakkaṃ anugacchati, evaṃ naṃ puggalaṃ dukkhamanugacchatīti.

‘‘மித்³தீ⁴ யதா³ ஹோதீ’’தி கா³தா²யங் மித்³தீ⁴தி தி²னமித்³தா⁴பி⁴பூ⁴தோ. மஹக்³க⁴ஸோதி மஹாபோ⁴ஜனோ ஆஹரஹத்த²கஅலங்ஸாடகதத்ரவட்டககாகமாஸகபு⁴த்தவமிதகானங் அஞ்ஞதரோ விய. நித்³தா³யிதாதி ஸுபனஸீலோ. ஸம்பரிவத்தஸாயீதி ஸெய்யஸுக²பஸ்ஸஸுகா²னங் அனுயுஞ்ஜனவஸேன ஸம்பரிவத்தகஸயனஸீலோ . நிவாபபுட்டோ²தி குண்ட³காதி³னா ஸூகரப⁴த்தேன புட்டோ². க⁴ரஸூகரோ ஹி பா³லகாலதோ பட்டா²ய போஸியமானோ தூ²லஸரீரகாலே கே³ஹதோ ப³ஹி நிக்க²மிதுங் அலப⁴ந்தோ ஹெட்டா²மஞ்சாதீ³ஸு ஸம்பரிவத்தித்வா ஸம்பரிவத்தித்வா அஸ்ஸஸந்தோ பஸ்ஸஸந்தோ ஸயதேவ. இத³ங் வுத்தங் ஹோதி – யதா³ புரிஸோ மித்³தீ⁴ ச ஹோதி மஹக்³க⁴ஸோ ச, நிவாபபுட்டோ² மஹாவராஹோ விய அஞ்ஞேன இரியாபதே²ன யாபேதுங் அஸக்கொந்தோ நித்³தா³ஸீலோ ஸங்பரிவத்தஸாயீ, ததா³ ஸோ ‘‘அனிச்சங் து³க்க²ங் அனத்தா’’தி தீணி லக்க²ணானி மனஸி காதுங் ந ஸக்கோதி. தேஸங் அமனஸிகாரா மந்த³பஞ்ஞோ புனப்புனங் க³ப்³ப⁴ங் உபேதி, க³ப்³ப⁴வாஸதோ ந பரிமுச்சதீதி.

‘‘Middhī yadā hotī’’ti gāthāyaṃ middhīti thinamiddhābhibhūto. Mahagghasoti mahābhojano āharahatthakaalaṃsāṭakatatravaṭṭakakākamāsakabhuttavamitakānaṃ aññataro viya. Niddāyitāti supanasīlo. Samparivattasāyīti seyyasukhapassasukhānaṃ anuyuñjanavasena samparivattakasayanasīlo . Nivāpapuṭṭhoti kuṇḍakādinā sūkarabhattena puṭṭho. Gharasūkaro hi bālakālato paṭṭhāya posiyamāno thūlasarīrakāle gehato bahi nikkhamituṃ alabhanto heṭṭhāmañcādīsu samparivattitvā samparivattitvā assasanto passasanto sayateva. Idaṃ vuttaṃ hoti – yadā puriso middhī ca hoti mahagghaso ca, nivāpapuṭṭho mahāvarāho viya aññena iriyāpathena yāpetuṃ asakkonto niddāsīlo saṃparivattasāyī, tadā so ‘‘aniccaṃ dukkhaṃ anattā’’ti tīṇi lakkhaṇāni manasi kātuṃ na sakkoti. Tesaṃ amanasikārā mandapañño punappunaṃ gabbhaṃ upeti, gabbhavāsato na parimuccatīti.

‘‘அயஸாவ மல’’ந்தி கா³தா²யங் அயஸாதி அயதோ. ஸமுட்டி²தந்தி ஜாதங். ததுட்டா²யாதி ததோ உட்ட²ஹித்வா. அதிதோ⁴னசாரினந்தி தோ⁴னா வுச்சதி சத்தாரோ பச்சயே இத³மத்தி²தாய அலமேதேனாதி பச்சவெக்கி²த்வா பரிபு⁴ஞ்ஜனபஞ்ஞா, தங் அதிக்கமித்வா சரந்தோ அதிதோ⁴னசாரீ நாம. இத³ங் வுத்தங் ஹோதி – யதா² அயதோ மலங் ஸமுட்டா²ய யதோ தங் ஸமுட்டி²தங், தமேவ கா²த³தி வினாஸேதி, ஏவமேவங் சத்தாரோ பச்சயே அப்பச்சவெக்கி²த்வா பரிபு⁴ஞ்ஜந்தங் அதிதோ⁴னசாரினங் ஸானி கம்மானி அத்தனோ ஸந்தானே உட்டி²தத்தா அத்தனோ ஸந்தகானேவ தானி கம்மானி து³க்³க³திங் நயந்தீதி.

‘‘Ayasāva mala’’nti gāthāyaṃ ayasāti ayato. Samuṭṭhitanti jātaṃ. Tatuṭṭhāyāti tato uṭṭhahitvā. Atidhonacārinanti dhonā vuccati cattāro paccaye idamatthitāya alametenāti paccavekkhitvā paribhuñjanapaññā, taṃ atikkamitvā caranto atidhonacārī nāma. Idaṃ vuttaṃ hoti – yathā ayato malaṃ samuṭṭhāya yato taṃ samuṭṭhitaṃ, tameva khādati vināseti, evamevaṃ cattāro paccaye appaccavekkhitvā paribhuñjantaṃ atidhonacārinaṃ sāni kammāni attano santāne uṭṭhitattā attano santakāneva tāni kammāni duggatiṃ nayantīti.

‘‘சோரோ யதா²’’தி கா³தா²யங் சோரோ யதா² ஸந்தி⁴முகே² க³ஹீதோதி யதா² சோரோ க⁴ரஸந்தி⁴ங் சி²ந்தி³த்வா கே³ஹங் பவிஸந்தோ க⁴ரஸந்தி⁴முகே² ஏவ ராஜபுரிஸேஹி க³ஹிதோ. ஸகம்முனா ஹஞ்ஞதி ப³ஜ்ஜ²தே சாதி தேன அத்தனா கதகம்மேன கஸாபி⁴தாளனாதி³னா ஹஞ்ஞதி சேவ அத்³து³ப³ந்த⁴னாதி³னா ப³ஜ்ஜ²தி ச. ஏவங் அயங் பேச்ச பஜா பரத்தா²தி ஏவம்பி அயங் பாபகாரினீ பஜா இதோ சவித்வா பரலோகே. ஸகம்முனா ஹஞ்ஞதி ப³ஜ்ஜ²தே சாதி அத்தனாவ கதேன பாபகம்மேன நிரயாதீ³ஸு நானப்பகாரேஹி கம்மகாரணாதீ³ஹி ஹஞ்ஞதி சேவ பரிப³ஜ்ஜ²தி சாதி.

‘‘Coro yathā’’ti gāthāyaṃ coro yathā sandhimukhe gahītoti yathā coro gharasandhiṃ chinditvā gehaṃ pavisanto gharasandhimukhe eva rājapurisehi gahito. Sakammunā haññati bajjhate cāti tena attanā katakammena kasābhitāḷanādinā haññati ceva addubandhanādinā bajjhati ca. Evaṃ ayaṃ pecca pajā paratthāti evampi ayaṃ pāpakārinī pajā ito cavitvā paraloke. Sakammunā haññati bajjhate cāti attanāva katena pāpakammena nirayādīsu nānappakārehi kammakāraṇādīhi haññati ceva paribajjhati cāti.

‘‘ஸுக²காமானீ’’தி கா³தா²யங் யோ த³ண்டே³ன விஹிங்ஸதீதி யோ புக்³க³லோ த³ண்டே³ன வா லெட்³டு³ஆதீ³ஹி வா விபா³த⁴தி. பேச்ச ஸோ ந லபே⁴ ஸுக²ந்தி ஸோ புக்³க³லோ பரலோகே மனுஸ்ஸஸுக²ங் வா தி³ப்³ப³ஸுக²ங் வா ந லப⁴தி, நிப்³பா³னஸுகே² பன வத்தப்³ப³மேவ நத்தி².

‘‘Sukhakāmānī’’ti gāthāyaṃ yo daṇḍena vihiṃsatīti yo puggalo daṇḍena vā leḍḍuādīhi vā vibādhati. Pecca so na labhe sukhanti so puggalo paraloke manussasukhaṃ vā dibbasukhaṃ vā na labhati, nibbānasukhe pana vattabbameva natthi.

கு³ன்னங் சே தரமானானந்தி கா³வீஸு மஹோக⁴ங் தரந்தீஸு. ஜிம்ஹங் க³ச்ச²தி புங்க³வோதி யதி³ யூத²பதி உஸபோ⁴ குடிலங் க³ச்ச²தி. ஸப்³பா³ தா ஜிம்ஹங் க³ச்ச²ந்தீதி ஸப்³பா³பி தா கா³வியோ குடிலமேவ க³ச்ச²ந்தி. கஸ்மா? நெத்தே ஜிம்ஹங் க³தே ஸதீதி நெத்தரி குடிலங் க³தே ஸதி, நெத்தஸ்ஸ குடிலங் க³தத்தாதி அத்தோ². ஸோ ஹி தாஸங் பச்சயிகோ உபத்³த³வஹரோ ச.

Gunnaṃce taramānānanti gāvīsu mahoghaṃ tarantīsu. Jimhaṃ gacchati puṅgavoti yadi yūthapati usabho kuṭilaṃ gacchati. Sabbā tā jimhaṃ gacchantīti sabbāpi tā gāviyo kuṭilameva gacchanti. Kasmā? Nette jimhaṃ gate satīti nettari kuṭilaṃ gate sati, nettassa kuṭilaṃ gatattāti attho. So hi tāsaṃ paccayiko upaddavaharo ca.

‘‘ஏவமேவ’’ந்தி கா³தா²யங் யதா² சேதங், ஏவமேவங் யோ மனுஸ்ஸேஸு பதா⁴னஸம்மதோ, யதி³ ஸோ அத⁴ம்மசாரீ ஸியா. யே தஸ்ஸ அனுஜீவினோ, ஸப்³பே³பி அத⁴ம்மிகாவ ஹொந்தி. ஸாமிஸம்பதா³ ஹி பகதிஸம்பத³ங் ஸம்பாதே³தி. யஸ்மா ச ஏததே³வ, தஸ்மா ஸப்³ப³ங் ரட்ட²ங் து³க்க²ங் ஸேதி, ராஜா சே ஹோதி அத⁴ம்மிகோ. ஸுகிச்ச²ரூபா வதாதி ஸுட்டு² கிச்சா²பன்னரூபா வத. உபதீ⁴ஸூதி காமகு³ணூபதீ⁴ஸு. ரத்தாதி ராகா³பி⁴பூ⁴தா. கடுகந்தி து³க்க²ங்.

‘‘Evameva’’nti gāthāyaṃ yathā cetaṃ, evamevaṃ yo manussesu padhānasammato, yadi so adhammacārī siyā. Ye tassa anujīvino, sabbepi adhammikāva honti. Sāmisampadā hi pakatisampadaṃ sampādeti. Yasmā ca etadeva, tasmā sabbaṃ raṭṭhaṃ dukkhaṃ seti, rājā ce hoti adhammiko. Sukiccharūpā vatāti suṭṭhu kicchāpannarūpā vata. Upadhīsūti kāmaguṇūpadhīsu. Rattāti rāgābhibhūtā. Kaṭukanti dukkhaṃ.

குக்குச்சஜனகேனேவ பத்தவட்டிப்பப⁴வஸ்ஸ உபச்சி²ன்னத்தா ப²லுப்பத்தி கத³லியா பராப⁴வாய ஹோதீதி ஆஹ – ‘‘ப²லங் வே கத³லிங் ஹந்தீ’’தி. ததா² ப²லபரியோஸானத்தா ஓஸதீ⁴னங் ‘‘ப²லங் வேளுங் ப²லங் நள’’ந்தி வுத்தங். வளவாய குச்சி²ஸ்மிங் க³த்³ரப⁴ஸ்ஸ ஜாதா அஸ்ஸதரீ நாம, ஸா க³ப்³ப⁴ங் க³ண்ஹித்வா காலே ஸம்பத்தே விஜாயிதுங் ந ஸக்கோதி. பாதே³ஹி பூ⁴மிங் பஹரந்தீ திட்ட²தி, அத²ஸ்ஸ சத்தாரோ பாதே³ சதூஸு கா²ணுகேஸு ப³ந்தி⁴த்வா குச்சி²ங் பா²லெத்வா போதகங் நீஹரந்தி, ஸா தத்தே²வ மரதி. தேன வுத்தங் – ‘‘க³ப்³போ⁴ அஸ்ஸதரிங் யதா²’’தி. இத³ங் வுத்தங் ஹோதி – யதா² அத்தனோ ப²லங் கத³லிவேளுனளேபி வினாஸேதி, க³ப்³போ⁴ ச அஸ்ஸதரிங், ஏவங் அத்தனோ கம்மப²லபூ⁴தோ ஸக்காரோ அஸப்புரிஸங் வினாஸேதீதி.

Kukkuccajanakeneva pattavaṭṭippabhavassa upacchinnattā phaluppatti kadaliyā parābhavāya hotīti āha – ‘‘phalaṃ ve kadaliṃ hantī’’ti. Tathā phalapariyosānattā osadhīnaṃ ‘‘phalaṃ veḷuṃ phalaṃ naḷa’’nti vuttaṃ. Vaḷavāya kucchismiṃ gadrabhassa jātā assatarī nāma, sā gabbhaṃ gaṇhitvā kāle sampatte vijāyituṃ na sakkoti. Pādehi bhūmiṃ paharantī tiṭṭhati, athassa cattāro pāde catūsu khāṇukesu bandhitvā kucchiṃ phāletvā potakaṃ nīharanti, sā tattheva marati. Tena vuttaṃ – ‘‘gabbho assatariṃ yathā’’ti. Idaṃ vuttaṃ hoti – yathā attano phalaṃ kadaliveḷunaḷepi vināseti, gabbho ca assatariṃ, evaṃ attano kammaphalabhūto sakkāro asappurisaṃ vināsetīti.

கோத⁴மக்க²க³ரூதி குஜ்ஜ²னலக்க²ணங் கோத⁴ங், பரகு³ணமக்க²னலக்க²ணங் மக்க²ஞ்ச க³ருங் கத்வா உத்³த⁴ங் கத்வா உக்கி²பித்வா சரந்தோ. ஸுகெ²த்தேதி ஸுகெ²த்தேபி. பூதிபீ³ஜங்வாதி பூதிபா⁴வங் க³தங் பீ³ஜங் விய. ச²கணரஸாதி³பரிபா⁴வனஸுக்கா²பனஸுக²ஸயாதீ³னி அகரணேன பீ³ஜதோ³ஸது³ட்ட²ந்தி அத்தோ².

Kodhamakkhagarūti kujjhanalakkhaṇaṃ kodhaṃ, paraguṇamakkhanalakkhaṇaṃ makkhañca garuṃ katvā uddhaṃ katvā ukkhipitvā caranto. Sukhetteti sukhettepi. Pūtibījaṃvāti pūtibhāvaṃ gataṃ bījaṃ viya. Chakaṇarasādiparibhāvanasukkhāpanasukhasayādīni akaraṇena bījadosaduṭṭhanti attho.

91.

சேதஸாதி அத்தனோ சித்தேன. சேதோதி தஸ்ஸ புக்³க³லஸ்ஸ சித்தங். பரிச்சாதி பரிச்சி²ந்தி³த்வா. இரியதீதி பவத்ததி. யதா²ப⁴தந்தி யதா² கிஞ்சி ஆஹரித்வா ட²பிதங்.

Cetasāti attano cittena. Cetoti tassa puggalassa cittaṃ. Pariccāti paricchinditvā. Iriyatīti pavattati. Yathābhatanti yathā kiñci āharitvā ṭhapitaṃ.

மாகத்தா²தி மா அகத்த². ந பமுத்யத்தீ²தி பமொக்கோ² நத்தி². உபேச்சாபீதி ஸஞ்சிச்சாபி, பு³த்³தி⁴புப்³பே³னாபீதி அத்தோ².

Mākatthāti mā akattha. Na pamutyatthīti pamokkho natthi. Upeccāpīti sañciccāpi, buddhipubbenāpīti attho.

‘‘அத⁴ம்மேனா’’தி வத்வாபி ‘‘முஸாவாதே³னா’’தி வசனங் முஸாவாத³ஸ்ஸ மஹாஸாவஜ்ஜபா⁴வத³ஸ்ஸனத்த²ங். தேனேவாஹ – ‘‘ஏகங் த⁴ம்மங் அதீதஸ்ஸா’’திஆதி³ (த⁴॰ ப॰ 176), ததா² ‘‘ஏவங் பரித்தங் கோ², ராஹுல, தேஸங் ஸாமஞ்ஞங், யேஸங் நத்தி² ஸம்பஜானமுஸாவாதே³ லஜ்ஜா’’திஆதி³ (ம॰ நி॰ 2.108). தங் கத²ங் நு ப⁴விஸ்ஸதீதி தங் த⁴னங் கேன நு பகாரேன தேஸங் ப⁴விஸ்ஸதி. அத⁴ம்மேன தேஸங் ஸம்ப⁴தத்தா தேஸு நசிரட்டி²திகங் ஹோதீதி அத்தோ². அந்தராயா ஸு ப⁴விஸ்ஸந்தீதி அத⁴ம்மியவோஹாராதி³தோ ராஜந்தராயாத³யோ ப⁴விஸ்ஸந்தி. ஸூதி நிபாதமத்தங். ஸம்ப⁴தஸ்ஸ வினஸ்ஸதீதி இமஸ்ஸ ஸம்ப⁴தங் ஸஜ்ஜிதங் வினஸ்ஸதி. ஸக்³க³ந்தி ஸுக³திங். ஸா ஹி ரூபாதீ³ஹி ஸோப⁴னேஹி அக்³கோ³தி ஸக்³கோ³தி அதி⁴ப்பேதா. எத்தாவதாதி தி³ட்ட²த⁴ம்மிகஸம்பராயிகானங் அத்தா²னங் ஹானியா. ஹதாதி வினட்டா².

‘‘Adhammenā’’ti vatvāpi ‘‘musāvādenā’’ti vacanaṃ musāvādassa mahāsāvajjabhāvadassanatthaṃ. Tenevāha – ‘‘ekaṃ dhammaṃ atītassā’’tiādi (dha. pa. 176), tathā ‘‘evaṃ parittaṃ kho, rāhula, tesaṃ sāmaññaṃ, yesaṃ natthi sampajānamusāvāde lajjā’’tiādi (ma. ni. 2.108). Taṃ kathaṃ nu bhavissatīti taṃ dhanaṃ kena nu pakārena tesaṃ bhavissati. Adhammena tesaṃ sambhatattā tesu naciraṭṭhitikaṃ hotīti attho. Antarāyā su bhavissantīti adhammiyavohārādito rājantarāyādayo bhavissanti. Sūti nipātamattaṃ. Sambhatassa vinassatīti imassa sambhataṃ sajjitaṃ vinassati. Sagganti sugatiṃ. Sā hi rūpādīhi sobhanehi aggoti saggoti adhippetā. Ettāvatāti diṭṭhadhammikasamparāyikānaṃ atthānaṃ hāniyā. Hatāti vinaṭṭhā.

விவட்டதேதி நிவட்டதி. லோபா⁴ க²ணதி அத்தானந்தி லோப⁴ஹேது அபுஞ்ஞானி கரொந்தோ காயவிஸமாதி³யோகே³ன அத்தானங் க²ணதி நாம. மித்தேஹி ஜீரதீதி மித்தபா⁴வேஹி ஹாயதி.

Vivaṭṭateti nivaṭṭati. Lobhā khaṇati attānanti lobhahetu apuññāni karonto kāyavisamādiyogena attānaṃ khaṇati nāma. Mittehi jīratīti mittabhāvehi hāyati.

சரந்தீதி சதூஹி இரியாபதே²ஹி அகுஸலமேவ கரொந்தா விசரந்தி. பா³லாதி இத⁴லோகத்த²ங் பரலோகத்த²ஞ்ச அஜானந்தா இத⁴ பா³லா நாம. து³ம்மேதா⁴தி நிப்பஞ்ஞா. ந ஹி பஞ்ஞாய து³ட்ட²த்தங் நாம அத்தி². அமித்தேனேவாதி அமித்தபூ⁴தேன விய வேரினா விய ஹுத்வா. கடுகப்ப²லந்தி திகி²ணப²லங், து³க்க²ப²லந்தி அத்தோ². ந தங் கம்மங் கதங் ஸாது⁴, யங் கத்வா அனுதப்பதீதி யங் கம்மங் நிரயாதீ³ஸு நிப்³ப³த்தனஸமத்த²ங் து³க்கு²த³யங் கத்வா அனுஸ்ஸரிதானுஸ்ஸரிதக்க²ணே அனுதப்பதி அனுஸோசதி, தங் கதங் ந ஸாது⁴ ந ஸுந்த³ரங் ந ப⁴த்³த³கங். யஸ்ஸ அஸ்ஸுமுகோ²தி யஸ்ஸ அஸ்ஸூஹி திந்தமுகோ² ரோத³ந்தோ விபாகங் படிஸேவதி அனுபோ⁴தி.

Carantīti catūhi iriyāpathehi akusalameva karontā vicaranti. Bālāti idhalokatthaṃ paralokatthañca ajānantā idha bālā nāma. Dummedhāti nippaññā. Na hi paññāya duṭṭhattaṃ nāma atthi. Amittenevāti amittabhūtena viya verinā viya hutvā. Kaṭukapphalanti tikhiṇaphalaṃ, dukkhaphalanti attho. Na taṃ kammaṃ kataṃ sādhu, yaṃ katvā anutappatīti yaṃ kammaṃ nirayādīsu nibbattanasamatthaṃ dukkhudayaṃ katvā anussaritānussaritakkhaṇe anutappati anusocati, taṃ kataṃ na sādhu na sundaraṃ na bhaddakaṃ. Yassa assumukhoti yassa assūhi tintamukho rodanto vipākaṃ paṭisevati anubhoti.

து³க்கரந்தி வத்தபடிவத்தபூரணாதி³வஸேன ஆபி⁴ஸமாசாரிகஸீலஸ்ஸ காதுங் அஸக்குணெய்யதாய து³க்கரங். ஸமாதா³னதோ பட்டா²ய க²ண்ட³ங் அகத்வா விஸேஸதோ ஆதி³ப்³ரஹ்மசரியகஸ்ஸ சரிமகசித்தங் பாபேதப்³ப³தாய து³த்திதிக்க²ங், ஸீலஸங்வராத³யோ வா அபரிக்க²தே கத்வா ஸம்பாதே³துங் அஸக்குணெய்யதாய து³க்கரங். அதி⁴வாஸேதப்³பா³னங் பன து³ஸ்ஸஹனதோ க²ந்திஸங்வரங்வஸேன து³த்திதிக்க²ங். அப்³யத்தேனாதி மந்த³பஞ்ஞேன. ஸாமஞ்ஞந்தி ஸமணபா⁴வோ. தத்தா²தி தஸ்ஸ ஸாமஞ்ஞஸ்ஸ. ஸம்பா³தா⁴தி து³ன்னிவத்த²து³ப்பாருதமாதுகா³மாதி³ஸம்மத்³தா³. யத்தா²தி ஸீலஸங்வராதீ³னங் பரிப³ந்த⁴பூ⁴தேஸு ஸம்பா³த⁴ஸங்கா²தேஸு விஸபா⁴கா³ரம்மணாதீ³ஸு . அத² வா து³க்கரந்திபத³ஸ்ஸ அத்த²ங் த³ஸ்ஸேதுங் து³த்திதிக்க²ந்தி வுத்தங். து³த்திதிக்க²ந்தி து³க்க²மங் து³ரதி⁴வாஸியங். அப்³யத்தேனாதி பா³லேன. ஸாமஞ்ஞந்தி ஸமணத⁴ம்மோ. இத³ங் வுத்தங் ஹோதி – யங் பண்டி³தா குலபுத்தா த³ஸபி வஸ்ஸானி வீஸதிபி…பே॰… ஸட்டி²பி வஸ்ஸானி த³ந்தேபி⁴ த³ந்தமாதா⁴ய ஜிவ்ஹாய தாலுங் ஆஹச்ச சேதஸா சித்தங் அபி⁴னிக்³க³ண்ஹித்வா ஏகாஸனங் ஏகப⁴த்தங் படிஸேவமானா ஆபாணகோடிகங் ப்³ரஹ்மசரியங் சரந்தா ஸாமஞ்ஞங் கரொந்தி, தங் பா³லா அப்³யத்தா காதுங் ந ஸக்கொந்தீதி. ப³ஹூஹி தத்த² ஸம்பா³தா⁴தி தஸ்மிங் ஸாமஞ்ஞஸங்கா²தே அரியமக்³கே³ ப³ஹூ ஸம்பா³தா⁴, மக்³கா³தி⁴க³மாய படிபன்னஸ்ஸ ப³ஹூ பரிஸ்ஸயாதி அத்தோ².

Dukkaranti vattapaṭivattapūraṇādivasena ābhisamācārikasīlassa kātuṃ asakkuṇeyyatāya dukkaraṃ. Samādānato paṭṭhāya khaṇḍaṃ akatvā visesato ādibrahmacariyakassa carimakacittaṃ pāpetabbatāya duttitikkhaṃ, sīlasaṃvarādayo vā aparikkhate katvā sampādetuṃ asakkuṇeyyatāya dukkaraṃ. Adhivāsetabbānaṃ pana dussahanato khantisaṃvaraṃvasena duttitikkhaṃ. Abyattenāti mandapaññena. Sāmaññanti samaṇabhāvo. Tatthāti tassa sāmaññassa. Sambādhāti dunnivatthaduppārutamātugāmādisammaddā. Yatthāti sīlasaṃvarādīnaṃ paribandhabhūtesu sambādhasaṅkhātesu visabhāgārammaṇādīsu . Atha vā dukkarantipadassa atthaṃ dassetuṃ duttitikkhanti vuttaṃ. Duttitikkhanti dukkhamaṃ duradhivāsiyaṃ. Abyattenāti bālena. Sāmaññanti samaṇadhammo. Idaṃ vuttaṃ hoti – yaṃ paṇḍitā kulaputtā dasapi vassāni vīsatipi…pe… saṭṭhipi vassāni dantebhi dantamādhāya jivhāya tāluṃ āhacca cetasā cittaṃ abhiniggaṇhitvā ekāsanaṃ ekabhattaṃ paṭisevamānā āpāṇakoṭikaṃ brahmacariyaṃ carantā sāmaññaṃ karonti, taṃ bālā abyattā kātuṃ na sakkontīti. Bahūhi tattha sambādhāti tasmiṃ sāmaññasaṅkhāte ariyamagge bahū sambādhā, maggādhigamāya paṭipannassa bahū parissayāti attho.

அப்பமெய்யங் பமினந்தோதி அப்பமெய்யங் கீ²ணாஸவபுக்³க³லங் ‘‘எத்தகஸீலோ அயங் எத்தகஸமாதி⁴ எத்தகபஞ்ஞோ’’தி ஏவங் மினந்தோ. கோத⁴ வித்³வா விகப்பயேதி கோ இத⁴ வித்³வா மேதா⁴வீ விகப்பெய்ய, கீ²ணாஸவோவ கீ²ணாஸவங் மினந்தோ விகப்பெய்யாதி தீ³பேதி. நிவுதங் மஞ்ஞேதி யோ பன புது²ஜ்ஜனோ மினேதுங் ஆரப⁴தி, தங் நிவுதங் அவகுஜ்ஜபஞ்ஞங் மஞ்ஞாமி. அகிஸ்ஸவந்தி கிஸ்ஸவா வுச்சதி பஞ்ஞா, நிப்பஞ்ஞந்தி அத்தோ².

Appameyyaṃ paminantoti appameyyaṃ khīṇāsavapuggalaṃ ‘‘ettakasīlo ayaṃ ettakasamādhi ettakapañño’’ti evaṃ minanto. Kodha vidvā vikappayeti ko idha vidvā medhāvī vikappeyya, khīṇāsavova khīṇāsavaṃ minanto vikappeyyāti dīpeti. Nivutaṃ maññeti yo pana puthujjano minetuṃ ārabhati, taṃ nivutaṃ avakujjapaññaṃ maññāmi. Akissavanti kissavā vuccati paññā, nippaññanti attho.

குடா²ரீதி அத்தச்சே²த³கட்டே²ன குடா²ரிஸதி³ஸீ ப²ருஸவாசா. சி²ந்த³தீதி குஸலமூலஸங்கா²தே மூலேயேவ நிகந்ததி. விஸங் ஹலாஹலங் இவாதி ஹலாஹலஸங்கா²தங் விஸங் இவ. ஏவங் விரத்³த⁴ங் பாதேதீதி விரத்³த⁴ங் அபரத்³த⁴ங் க²லிதபுக்³க³லங் ஏவங் அபாயேஸு வினிபாதேதி. வாசா து³ப்³பா⁴ஸிதா யதா²தி யதா² வாசா அரியூபவாத³னவஸேன து³ப்³பா⁴ஸிதா.

Kuṭhārīti attacchedakaṭṭhena kuṭhārisadisī pharusavācā. Chindatīti kusalamūlasaṅkhāte mūleyeva nikantati. Visaṃ halāhalaṃ ivāti halāhalasaṅkhātaṃ visaṃ iva. Evaṃ viraddhaṃ pātetīti viraddhaṃ aparaddhaṃ khalitapuggalaṃ evaṃ apāyesu vinipāteti. Vācā dubbhāsitā yathāti yathā vācā ariyūpavādanavasena dubbhāsitā.

92.

நிந்தி³யந்தி நிந்த³னீயங். தங் வா நிந்த³தி யோ பஸங்ஸியோதி யோ கு³ணவிஸிட்ட²தாய பஸங்ஸாரஹோ புக்³க³லோ, தங் வா ஸோ பாபிச்ச²தாதீ³னி ஆரோபெத்வா க³ரஹதி. விசினாதீதி உபசினாதி. கலிந்தி அபராத⁴ங். அயங் கலீதி அயங் அபராதோ⁴. அக்கே²ஸூதி ஜூதகீளனக்கே²ஸு. ஸப்³ப³ஸ்ஸாபி ஸஹாபி அத்தனாதி ஸப்³பே³ன அத்தனோ த⁴னேனாபி அத்தனாபி ஸத்³தி⁴ங். ஸுக³தேஸூதி ஸோப⁴னக³மனத்தா, ஸுந்த³ரங் டா²னங் க³தத்தா, ஸம்மா க³தத்தா, ஸம்மா ச க³த³த்தா ஸுக³தஸங்கா²தேஸு பு³த்³தா⁴தீ³ஸு. மனங் பதோ³ஸயேதி யோ மனங் பதோ³ஸெய்ய, தஸ்ஸ அயங் மனோபதோ³ஸோ ஏவ மஹத்தரோ கலீதி வுத்தங் ஹோதி. கஸ்மா? யஸ்மா ஸதங் ஸஹஸ்ஸானங்…பே॰… பாபகந்தி. தத்த² ஸதங் ஸஹஸ்ஸானந்தி நிரப்³பு³த³க³ணனாய ஸதஸஹஸ்ஸங். ச²த்திங்ஸதீதி அபரானி ச²த்திங்ஸதி நிரப்³பு³தா³னி. பஞ்ச சாதி அப்³பு³த³க³ணனாய பஞ்ச ச அப்³பு³தா³னி. தஸ்மா வஸ்ஸக³ணனாய எத்தகோ ஸோ காலோ, யங் காலங் அரியக³ரஹிவாசங் மனஞ்ச பணிதா⁴ய பாபகங் நிரயங் உபேதி, தத்த² பச்சதீதி வுத்தங் ஹோதி. இத³ஞ்ச ஸங்கே²பேன பது³மனிரயே ஆயுப்பமாணங், வித்தா²ரேன பன பரதோ ஆக³மிஸ்ஸதி.

Nindiyanti nindanīyaṃ. Taṃ vā nindati yo pasaṃsiyoti yo guṇavisiṭṭhatāya pasaṃsāraho puggalo, taṃ vā so pāpicchatādīni āropetvā garahati. Vicinātīti upacināti. Kalinti aparādhaṃ. Ayaṃ kalīti ayaṃ aparādho. Akkhesūti jūtakīḷanakkhesu. Sabbassāpi sahāpi attanāti sabbena attano dhanenāpi attanāpi saddhiṃ. Sugatesūti sobhanagamanattā, sundaraṃ ṭhānaṃ gatattā, sammā gatattā, sammā ca gadattā sugatasaṅkhātesu buddhādīsu. Manaṃ padosayeti yo manaṃ padoseyya, tassa ayaṃ manopadoso eva mahattaro kalīti vuttaṃ hoti. Kasmā? Yasmā sataṃ sahassānaṃ…pe… pāpakanti. Tattha sataṃ sahassānanti nirabbudagaṇanāya satasahassaṃ. Chattiṃsatīti aparāni chattiṃsati nirabbudāni. Pañca cāti abbudagaṇanāya pañca ca abbudāni. Tasmā vassagaṇanāya ettako so kālo, yaṃ kālaṃ ariyagarahivācaṃ manañca paṇidhāya pāpakaṃ nirayaṃ upeti, tattha paccatīti vuttaṃ hoti. Idañca saṅkhepena padumaniraye āyuppamāṇaṃ, vitthārena pana parato āgamissati.

லோப⁴கு³ணேதி ‘‘கு³ணோ’’தி பா³லேஹி தி³ட்ட²த்தா, அனேகக்க²த்துங் பவத்திதத்தா ச லோபோ⁴யேவ லோப⁴கு³ணோ, தஸ்மிங் லோப⁴கு³ணே, தண்ஹாயாதி அத்தோ². அனுயுத்தோதி அனு அனு யுத்தோ. அவத³ஞ்ஞூதி அவசனஞ்ஞூ, பு³த்³தா⁴னம்பி ஓவாத³ஸ்ஸ அக்³க³ஹணதோ. மச்ச²ரீதி பஞ்சவித⁴மச்ச²ரியேன மச்ச²ரீ. பேஸுணியங் அனுயுத்தோதி பேஸுணியஸ்மிங் அனுயுத்தோ அக்³க³ஸாவகானங் பே⁴த³னேன. கோகாலிகஞ்ஹி மீயமானங் ஓவத³ந்தேன ஆயஸ்மதா மஹாமொக்³க³ல்லானேன பா⁴ஸிதா இமா கா³தா²தி. முக²து³க்³கா³தி முக²விஸம. விபூ⁴தாதி விக³தபூ⁴த அலிகவாதி³. அனரியாதி அஸப்புரிஸ. பூ⁴னஹூதி பூ⁴திஹனக அத்தனோ பு³த்³தி⁴வினாஸக. புரிஸந்தாதி புரிஸாத⁴ம. கலீதி அலக்கி²புரிஸ. அவஜாதகபுத்தாதி பு³த்³த⁴ஸ்ஸ ப⁴க³வதோ அவஜாதபுத்த. மா ப³ஹுபா⁴ணித⁴ நேரயிகோஸீதி இதா³னி ப³ஹுபா⁴ணீ மா ஹோஹி, நேரயிகோ அஸி ஜாதோ. ரஜமாகிரஸீதி கிலேஸரஜங் அத்தனி பக்கி²பஸி. ஸந்தேதி ஸமிதகிலேஸே கீ²ணாஸவே. கிப்³பி³ஸகாரீதி பாபகாரி. பபதந்தி நரகங்.

Lobhaguṇeti ‘‘guṇo’’ti bālehi diṭṭhattā, anekakkhattuṃ pavattitattā ca lobhoyeva lobhaguṇo, tasmiṃ lobhaguṇe, taṇhāyāti attho. Anuyuttoti anu anu yutto. Avadaññūti avacanaññū, buddhānampi ovādassa aggahaṇato. Maccharīti pañcavidhamacchariyena maccharī. Pesuṇiyaṃ anuyuttoti pesuṇiyasmiṃ anuyutto aggasāvakānaṃ bhedanena. Kokālikañhi mīyamānaṃ ovadantena āyasmatā mahāmoggallānena bhāsitā imā gāthāti. Mukhaduggāti mukhavisama. Vibhūtāti vigatabhūta alikavādi. Anariyāti asappurisa. Bhūnahūti bhūtihanaka attano buddhivināsaka. Purisantāti purisādhama. Kalīti alakkhipurisa. Avajātakaputtāti buddhassa bhagavato avajātaputta. Mā bahubhāṇidha nerayikosīti idāni bahubhāṇī mā hohi, nerayiko asi jāto. Rajamākirasīti kilesarajaṃ attani pakkhipasi. Santeti samitakilese khīṇāsave. Kibbisakārīti pāpakāri. Papatanti narakaṃ.

இத³ங் ஸங்கிலேஸபா⁴கி³யந்தி இத³ங் தண்ஹாதீ³னங் ஸபா⁴வபே⁴த³தோ அவத்தா²பே⁴த³தோ ச அனேகபே⁴த³கங் த³ஸ்ஸேதுங் அனேகேஹி ஸுத்தபதே³ஹி உதா³ஹரணவஸேன த³ஸ்ஸிதங் ஸங்கிலேஸபா⁴கி³யங் ஸுத்தந்தி வேதி³தப்³ப³ங்.

Idaṃ saṃkilesabhāgiyanti idaṃ taṇhādīnaṃ sabhāvabhedato avatthābhedato ca anekabhedakaṃ dassetuṃ anekehi suttapadehi udāharaṇavasena dassitaṃ saṃkilesabhāgiyaṃ suttanti veditabbaṃ.

பஸன்னேனாதி கம்மகம்மப²லாதீ³னி ஸத்³த³ஹந்தேன.

Pasannenāti kammakammaphalādīni saddahantena.

93.

இத்³த⁴ந்தி ஹத்தூ²பக³ஸீஸூபகா³தி³அலங்காரேஹி மணிகனகாதீ³ஹி ச ஸமித்³த⁴ங். பீ²தந்தி தேலமது⁴பா²ணிதாதீ³ஹி ச த⁴னத⁴ஞ்ஞாதீ³ஹி ச விபுலங். ஆகிண்ணமனுஸ்ஸந்தி நிரந்தரமனுஸ்ஸங். ஸம்பா³த⁴ப்³யூஹந்தி ப்³யூஹா வுச்சந்தி அனிப்³பி³த்³த⁴ரச்சா²யோ. யேஸு பவிட்ட²மக்³கே³னேவ நிக்³க³ச்ச²ந்தி, தே ஸம்பா³தா⁴ ப்³யூஹகா எத்தா²தி ஸம்பா³த⁴ப்³யூஹங். இமினாபி தஸ்ஸ நக³ரஸ்ஸ க⁴னவாஸமேவ தீ³பேதி. ப⁴ந்தேனாதி த³மத²ங் அனுபக³தேன, இதோ சிதோ ச பரிப்³ப⁴மந்தேன வா. அபாபகந்தி அலாமகங். அவேச்சப்பஸாதே³னாதி அசலப்பஸாதே³ன, ஸச்சப்படிவேத⁴தோ ஆக³தேன பஸாதே³ன.

Iddhanti hatthūpagasīsūpagādialaṅkārehi maṇikanakādīhi ca samiddhaṃ. Phītanti telamadhuphāṇitādīhi ca dhanadhaññādīhi ca vipulaṃ. Ākiṇṇamanussanti nirantaramanussaṃ. Sambādhabyūhanti byūhā vuccanti anibbiddharacchāyo. Yesu paviṭṭhamaggeneva niggacchanti, te sambādhā byūhakā etthāti sambādhabyūhaṃ. Imināpi tassa nagarassa ghanavāsameva dīpeti. Bhantenāti damathaṃ anupagatena, ito cito ca paribbhamantena vā. Apāpakanti alāmakaṃ. Aveccappasādenāti acalappasādena, saccappaṭivedhato āgatena pasādena.

பேச்ச ஸோ லப⁴தேதி யோ பூ⁴தே த³ண்டே³ன ந ஹிங்ஸதி, ஸோ புக்³க³லோ பரலோகே மனுஸ்ஸபூ⁴தோ மனுஸ்ஸஸுக²ங் தே³வபூ⁴தோ தி³ப்³ப³ஸுக²ங் உப⁴யங் அதிக்கந்தோ நிப்³பா³னஸுக²ங் லப⁴தீதி அத்தோ².

Peccaso labhateti yo bhūte daṇḍena na hiṃsati, so puggalo paraloke manussabhūto manussasukhaṃ devabhūto dibbasukhaṃ ubhayaṃ atikkanto nibbānasukhaṃ labhatīti attho.

94.

சாரிகங் பக்கமிஸ்ஸதீதி ஜனபத³சாரிகங் க³மிஸ்ஸதி. கஸ்மா பன ப⁴க³வா ஜனபத³சாரிகங் சரதீதி? ஸத்தஹி காரணேஹி பு³த்³தா⁴ ப⁴க³வந்தோ ஜனபத³சாரிகங் சரந்தி – தே³ஸந்தரக³தானங் வேனெய்யானங் வினயனத்தங், தத்ர டி²தானங் உஸ்ஸுக்கஸமுப்பாத³னங், பா⁴வகானங் ஏகஸ்மிங் டா²னே நிப³த்³த⁴வாஸபரிஹரணங் அத்தனோ ச தத்த² அனாஸங்க³த³ஸ்ஸனங், ஸம்பு³த்³த⁴வஸிதட்டா²னதாய தே³ஸானங் சேதியபா⁴வஸம்பாத³னங், ப³ஹூனங் ஸத்தானங் த³ஸ்ஸனூபஸங்கமனாதீ³ஹி புஞ்ஞோக⁴ப்பஸவனங், அவுட்டி²ஆதி³உபத்³த³வூபஸமனஞ்சாதி இமேஹி ஸத்தஹி காரணேஹி பு³த்³தா⁴ ப⁴க³வந்தோ ஜனபத³சாரிகங் சரந்தீதி வேதி³தப்³ப³ங்.

Cārikaṃ pakkamissatīti janapadacārikaṃ gamissati. Kasmā pana bhagavā janapadacārikaṃ caratīti? Sattahi kāraṇehi buddhā bhagavanto janapadacārikaṃ caranti – desantaragatānaṃ veneyyānaṃ vinayanattaṃ, tatra ṭhitānaṃ ussukkasamuppādanaṃ, bhāvakānaṃ ekasmiṃ ṭhāne nibaddhavāsapariharaṇaṃ attano ca tattha anāsaṅgadassanaṃ, sambuddhavasitaṭṭhānatāya desānaṃ cetiyabhāvasampādanaṃ, bahūnaṃ sattānaṃ dassanūpasaṅkamanādīhi puññoghappasavanaṃ, avuṭṭhiādiupaddavūpasamanañcāti imehi sattahi kāraṇehi buddhā bhagavanto janapadacārikaṃ carantīti veditabbaṃ.

இஸித³த்தபுராணாதி இஸித³த்தோ ச புராணோ ச, தேஸு இஸித³த்தோ ஸகதா³கா³மீ. புராணோ ஸோதாபன்னோ. ஸாகேதேதி ‘‘ஸாகேதோ’’தி லத்³த⁴னாமே அத்தனோ போ⁴க³கா³மகே. மக்³கே³ புரிஸங் ட²பேஸுந்தி தேஸங் கிர கா³மத்³வாரேன ப⁴க³வதோ க³மனமக்³கோ³, தஸ்மா ‘‘ஸசே ப⁴க³வா அம்ஹாகங் ஸுத்தானங் வா பமத்தானங் வா க³ச்செ²ய்ய, அத² பஸ்ஸிதுங் ந லபெ⁴ய்யாமா’’தி மக்³க³மஜ்ஜே² புரிஸங் ட²பேஸுங். அனுப³ந்தி⁴ங்ஸூதி ந தூ³ரதோவ, பிட்டி²தோ பிட்டி²தோ அனுப³ந்தி⁴ங்ஸு. ப⁴க³வா ஹி ஸகடமக்³க³ஸ்ஸ மஜ்ஜே² ஜங்க⁴மக்³கே³ன அக³மாஸி, இதரே உபோ⁴ஸு பஸ்ஸேஸு அனுக³ச்ச²ந்தா அக³மங்ஸு. மக்³கா³ ஓக்கம்மாதி பு³த்³தா⁴ ஹி கேனசி ஸத்³தி⁴ங் க³ச்ச²ந்தாவ படிஸந்தா²ரங் கரொந்தி கேனசி ஸத்³தி⁴ங் டி²தா கேனசி ஸத்³தி⁴ங் தி³வஸபா⁴க³ம்பி நிஸின்னா, தஸ்மா ப⁴க³வா சிந்தேஸி – ‘‘இமே மய்ஹங் ஸாஸனே வல்லபா⁴ ஆக³தப²லா, இமேஹி ஸத்³தி⁴ங் நிஸீதி³த்வா தி³வஸபா⁴க³ங் படிஸந்தா²ரங் கரிஸ்ஸாமீ’’தி. மக்³க³தோ ஓக்கமித்வா யேனஞ்ஞதரங் ருக்க²மூலங் தேனுபஸங்கமி. பஞ்ஞத்தே ஆஸனே நிஸீதீ³தி தே கிர ச²த்துபாஹனகத்தரத³ண்ட³பாத³ப்³ப⁴ஞ்ஜனதேலானி சேவ அட்ட²வித⁴ஞ்ச பானகங் ஸரப⁴பாத³பல்லங்கஞ்ச கா³ஹாபெத்வா ஆக³மங்ஸு. அத² நங் பல்லங்கங் பஞ்ஞபெத்வா அத³ங்ஸு. ஸத்தா² தத்த² நிஸீதி³. ஏகமந்தங் நிஸீதி³ங்ஸூதி ‘‘ச²த்துபாஹனாதீ³னி பி⁴க்கு²ஸங்க⁴ஸ்ஸ தே³தா²’’தி வத்வா ப⁴க³வந்தங் வந்தி³த்வா ஏகமந்தங் நிஸீதி³ங்ஸு.

Isidattapurāṇāti isidatto ca purāṇo ca, tesu isidatto sakadāgāmī. Purāṇo sotāpanno. Sāketeti ‘‘sāketo’’ti laddhanāme attano bhogagāmake. Magge purisaṃ ṭhapesunti tesaṃ kira gāmadvārena bhagavato gamanamaggo, tasmā ‘‘sace bhagavā amhākaṃ suttānaṃ vā pamattānaṃ vā gaccheyya, atha passituṃ na labheyyāmā’’ti maggamajjhe purisaṃ ṭhapesuṃ. Anubandhiṃsūti na dūratova, piṭṭhito piṭṭhito anubandhiṃsu. Bhagavā hi sakaṭamaggassa majjhe jaṅghamaggena agamāsi, itare ubhosu passesu anugacchantā agamaṃsu. Maggā okkammāti buddhā hi kenaci saddhiṃ gacchantāva paṭisanthāraṃ karonti kenaci saddhiṃ ṭhitā kenaci saddhiṃ divasabhāgampi nisinnā, tasmā bhagavā cintesi – ‘‘ime mayhaṃ sāsane vallabhā āgataphalā, imehi saddhiṃ nisīditvā divasabhāgaṃ paṭisanthāraṃ karissāmī’’ti. Maggato okkamitvā yenaññataraṃ rukkhamūlaṃ tenupasaṅkami. Paññatte āsane nisīdīti te kira chattupāhanakattaradaṇḍapādabbhañjanatelāni ceva aṭṭhavidhañca pānakaṃ sarabhapādapallaṅkañca gāhāpetvā āgamaṃsu. Atha naṃ pallaṅkaṃ paññapetvā adaṃsu. Satthā tattha nisīdi. Ekamantaṃ nisīdiṃsūti ‘‘chattupāhanādīni bhikkhusaṅghassa dethā’’ti vatvā bhagavantaṃ vanditvā ekamantaṃ nisīdiṃsu.

ஸாவத்தி²யா கோஸலேஸு சாரிகங் பக்கமிஸ்ஸதீதிஆதி³ ஸப்³ப³ங் மஜ்ஜி²மதே³ஸவஸேனேவ வுத்தங். கஸ்மா? நியதாசிண்ணத்தா. ப⁴க³வதோ ஹி சாரிகசரணங் மஜ்ஜி²மதே³ஸேயேவ. ஸசேபி பச்சந்ததே³ஸே க³ச்ச²தி, மஜ்ஜி²மதே³ஸேயேவ அருணங் உட்டா²பேதீதி நியதாசிண்ணங், தஸ்மா மஜ்ஜி²மதே³ஸவஸேனேவ வுத்தங். காஸீஸூதி காஸிரட்ட²தோ. ததா² மக³தே⁴ஸூதி மக³த⁴ரட்ட²தோ. ஆஸன்னே நோ ப⁴க³வா ப⁴விஸ்ஸதீதி எத்த² ந கேவலங் ஆஸன்னத்தா ஏவ தேஸங் ஸோமனஸ்ஸங் ஹோதி, அத² கோ² ‘‘இதா³னி தா³னங் தா³துங் க³ந்த⁴மாலாதி³பூஜங் காதுங் த⁴ம்மங் ஸோதுங் பஞ்ஹங் புச்சி²துங் லபி⁴ஸ்ஸாமா’’தி நேஸங் ஸோமனஸ்ஸங் ஹோதி.

Sāvatthiyākosalesu cārikaṃ pakkamissatītiādi sabbaṃ majjhimadesavaseneva vuttaṃ. Kasmā? Niyatāciṇṇattā. Bhagavato hi cārikacaraṇaṃ majjhimadeseyeva. Sacepi paccantadese gacchati, majjhimadeseyeva aruṇaṃ uṭṭhāpetīti niyatāciṇṇaṃ, tasmā majjhimadesavaseneva vuttaṃ. Kāsīsūti kāsiraṭṭhato. Tathā magadhesūti magadharaṭṭhato. Āsanne no bhagavā bhavissatīti ettha na kevalaṃ āsannattā eva tesaṃ somanassaṃ hoti, atha kho ‘‘idāni dānaṃ dātuṃ gandhamālādipūjaṃ kātuṃ dhammaṃ sotuṃ pañhaṃ pucchituṃ labhissāmā’’ti nesaṃ somanassaṃ hoti.

தஸ்மாதிஹ த²பதயோ ஸம்பா³தோ⁴ க⁴ராவாஸோதி த²பதயோ யஸ்மா தும்ஹாகங் மயி தூ³ரீபூ⁴தே அனப்பகங் தோ³மனஸ்ஸங் ஆஸன்னே அனப்பகங் ஸோமனஸ்ஸங் ஹோதி, தஸ்மாபி வேதி³தப்³ப³மேதங் ‘‘ஸம்பா³தோ⁴ க⁴ராவாஸோ’’தி. க⁴ராவாஸஸ்ஸ ஹி தோ³ஸேன தும்ஹாகங் ஏவங் ஹோதி. ஸசே பன க⁴ராவாஸங் பஹாய பப்³ப³ஜிதா அஸ்ஸத², ஏவங் வோ மயா ஸத்³தி⁴ங்யேவ க³ச்ச²ந்தானஞ்ச ஆக³ச்ச²ந்தானஞ்ச தங் ந ப⁴வெய்யாதி இமமத்த²ங் தீ³பெந்தோ ஏவமாஹ. தத்த² ஸகிஞ்சனஸபலிபோ³த⁴ட்டே²ன ஸம்பா³த⁴தா வேதி³தப்³பா³. மஹாக⁴ரே வஸந்தஸ்ஸாபி ஹி ஸகிஞ்சனஸபலிபோ³த⁴ட்டே²ன க⁴ராவாஸோ ஸம்பா³தோ⁴வ. ரஜோபதோ²தி ராகா³தி³ரஜானங் ஆக³மனபதோ², ஆக³மனட்டா²னந்தி அத்தோ². அப்³போ⁴காஸோ பப்³ப³ஜ்ஜாதி பப்³ப³ஜ்ஜா பன அகிஞ்சனஅபலிபோ³த⁴ட்டே²ன அப்³போ⁴காஸோ. சதுரதனிகேபி ஹி க³ப்³பே⁴ த்³வின்னங் பி⁴க்கூ²னங் பல்லங்கேன பல்லங்கங் க⁴ட்டெத்வா நிஸின்னானம்பி அகிஞ்சனாபலிபோ³த⁴ட்டே²ன பப்³ப³ஜ்ஜா அப்³போ⁴காஸோ நாம ஹோதி. அலஞ்ச பன வோ த²பதயோ அப்பமாதா³யாதி ஏவங் ஸம்பா³த⁴க⁴ராவாஸே வஸந்தானங் தும்ஹாகங் அப்பமாத³மேவ காதுங் யுத்தந்தி அத்தோ².

Tasmātiha thapatayo sambādho gharāvāsoti thapatayo yasmā tumhākaṃ mayi dūrībhūte anappakaṃ domanassaṃ āsanne anappakaṃ somanassaṃ hoti, tasmāpi veditabbametaṃ ‘‘sambādho gharāvāso’’ti. Gharāvāsassa hi dosena tumhākaṃ evaṃ hoti. Sace pana gharāvāsaṃ pahāya pabbajitā assatha, evaṃ vo mayā saddhiṃyeva gacchantānañca āgacchantānañca taṃ na bhaveyyāti imamatthaṃ dīpento evamāha. Tattha sakiñcanasapalibodhaṭṭhena sambādhatā veditabbā. Mahāghare vasantassāpi hi sakiñcanasapalibodhaṭṭhena gharāvāso sambādhova. Rajopathoti rāgādirajānaṃ āgamanapatho, āgamanaṭṭhānanti attho. Abbhokāso pabbajjāti pabbajjā pana akiñcanaapalibodhaṭṭhena abbhokāso. Caturatanikepi hi gabbhe dvinnaṃ bhikkhūnaṃ pallaṅkena pallaṅkaṃ ghaṭṭetvā nisinnānampi akiñcanāpalibodhaṭṭhena pabbajjā abbhokāso nāma hoti. Alañca pana vo thapatayo appamādāyāti evaṃ sambādhagharāvāse vasantānaṃ tumhākaṃ appamādameva kātuṃ yuttanti attho.

நாகா³தி ஹத்தி²னோ. ஓபவய்ஹாதி ரஞ்ஞோ ஆரோஹனயொக்³கா³. ஏகங் புரதோ ஏகங் பச்ச²தோ நிஸீதா³பேமாதி தே கிர த்³வேபி ஜனா ஸப்³பா³லங்காரபடிமண்டி³தா த்³வீஸு நாகே³ஸு தா இத்தி²யோ ஏவங் நிஸீதா³பெத்வா ரஞ்ஞோ நாக³ங் மஜ்ஜே² கத்வா உபோ⁴ஸு பஸ்ஸேஸு க³ச்ச²ந்தி, தஸ்மா ஏவமாஹங்ஸு. நாகோ³பி ரக்கி²தப்³போ³தி யதா² கிஞ்சி விஸேஸிதங் ந கரோதி, ஏவங் ரக்கி²தப்³போ³ ஹோதி. தாபி ப⁴கி³னியோதி யதா² பமாத³ங் நாபஜ்ஜந்தி, ஏவங் ரக்கி²தப்³பா³ ஹொந்தி. அத்தாபீதி ஸிதகதி²தவிக்கே²பிதாதீ³னி அகரொந்தேஹி அத்தாபி ரக்கி²தப்³போ³ ஹோதி . ஏவங் கரொந்தோ ஹி ‘‘ஸாமிது³ப்³ப⁴கோ ஏஸோ’’தி நிக்³க³ஹேதப்³போ³ ஹோதி.

Nāgāti hatthino. Opavayhāti rañño ārohanayoggā. Ekaṃ purato ekaṃ pacchato nisīdāpemāti te kira dvepi janā sabbālaṅkārapaṭimaṇḍitā dvīsu nāgesu tā itthiyo evaṃ nisīdāpetvā rañño nāgaṃ majjhe katvā ubhosu passesu gacchanti, tasmā evamāhaṃsu. Nāgopi rakkhitabboti yathā kiñci visesitaṃ na karoti, evaṃ rakkhitabbo hoti. Tāpi bhaginiyoti yathā pamādaṃ nāpajjanti, evaṃ rakkhitabbā honti. Attāpīti sitakathitavikkhepitādīni akarontehi attāpi rakkhitabbo hoti . Evaṃ karonto hi ‘‘sāmidubbhako eso’’ti niggahetabbo hoti.

தஸ்மாதிஹ த²பதயோதி யஸ்மா தும்ஹே ராஜா நிச்சங் ராஜப⁴ண்ட³ங் படிச்சா²பேதி, தஸ்மாபி ஸம்பா³தோ⁴ க⁴ராவாஸோ ரஜோபதோ². யஸ்மா பன பங்ஸுகூலிகங் பி⁴க்கு²ங் ஏவங் படிச்சா²பெந்தோ நத்தி², தஸ்மா அப்³போ⁴காஸோ பப்³ப³ஜ்ஜா, ஏவங் ஸப்³ப³த்தா²பி. அலஞ்ச கோ² த²பதயோ அப்பமாதா³ய, அப்பமாத³மேவ கரோதா²தி த³ஸ்ஸேதி.

Tasmātiha thapatayoti yasmā tumhe rājā niccaṃ rājabhaṇḍaṃ paṭicchāpeti, tasmāpi sambādho gharāvāso rajopatho. Yasmā pana paṃsukūlikaṃ bhikkhuṃ evaṃ paṭicchāpento natthi, tasmā abbhokāso pabbajjā, evaṃ sabbatthāpi. Alañca kho thapatayo appamādāya, appamādameva karothāti dasseti.

முத்தசாகோ³தி விஸ்ஸட்ட²சாகோ³. பயதபாணீதி ஆக³தாக³தானங் தா³னத்தா²ய தோ⁴தஹத்தோ². வோஸக்³க³ரதோதி வோஸக்³க³ஸங்கா²தே சாகே³ ரதோ. யாசயோகோ³தி யாசிதப்³ப³யுத்தோ. ‘‘யாஜயோகோ³’’திபி பாடோ², தா³னயுத்தோதி அத்தோ². தா³னஸங்விபா⁴க³ரதோதி ஏதேன அப்பமத்தகம்பி கிஞ்சி லபி⁴த்வா ததோபி ஸங்விபா⁴கே³ ரதோ. அப்படிவிப⁴த்தந்தி ‘‘இத³ங் அம்ஹாகங் ப⁴விஸ்ஸதி, இத³ங் அய்யான’’ந்தி ஏவங் அகதவிபா⁴க³ங், ஸப்³ப³ங் தா³தப்³ப³மேவ ஹுத்வா டி²தந்தி அத்தோ². இமேஹி கோ² த²பதயோ சதூஹி த⁴ம்மேஹி ஸமன்னாக³தோ அரியஸாவகோ ஸோதாபன்னோ ஹோதீதி ஸோதாபன்னோ இமேஹி த⁴ம்மேஹி ஸமன்னாக³தோ ஹோதீதி அத்தோ². ஏதேன ஸோதாபன்னேன இமேஸங் சதுன்னங் த⁴ம்மானங் ஏகந்ததோ லப்³ப⁴மானதங் த³ஸ்ஸேதி.

Muttacāgoti vissaṭṭhacāgo. Payatapāṇīti āgatāgatānaṃ dānatthāya dhotahattho. Vosaggaratoti vosaggasaṅkhāte cāge rato. Yācayogoti yācitabbayutto. ‘‘Yājayogo’’tipi pāṭho, dānayuttoti attho. Dānasaṃvibhāgaratoti etena appamattakampi kiñci labhitvā tatopi saṃvibhāge rato. Appaṭivibhattanti ‘‘idaṃ amhākaṃ bhavissati, idaṃ ayyāna’’nti evaṃ akatavibhāgaṃ, sabbaṃ dātabbameva hutvā ṭhitanti attho. Imehi kho thapatayo catūhi dhammehi samannāgato ariyasāvako sotāpanno hotīti sotāpanno imehi dhammehi samannāgato hotīti attho. Etena sotāpannena imesaṃ catunnaṃ dhammānaṃ ekantato labbhamānataṃ dasseti.

ஏவங் தேஸங் த²பதீனங் இமேஹி சதூஹி த⁴ம்மேஹி ஸமன்னாக³தங் பரியாயேன த³ஸ்ஸெத்வா இதா³னி நிப்பரியாயேன தங் த³ஸ்ஸேதுங் ‘‘தும்ஹே கோ² த²பதயோ’’திஆதி³ வுத்தங்.

Evaṃ tesaṃ thapatīnaṃ imehi catūhi dhammehi samannāgataṃ pariyāyena dassetvā idāni nippariyāyena taṃ dassetuṃ ‘‘tumhe kho thapatayo’’tiādi vuttaṃ.

95.

ஸஹஸ்ஸங் கப்பகோடியோதி ஸஹஸ்ஸங் அத்தபா⁴வா அஹேஸுந்தி அத்தோ². ‘‘அஸீதி கப்பகோடியோ’’திபி பாடோ², அஸீதிஆயுகப்பகோடியோ அஹேஸுந்தி அத்தோ². கத்த² பன தே அஹேஸுந்தி? ஆஹ ‘‘தே³வே சேவ மனுஸ்ஸே சா’’தி, தே³வேஸு சேவ மனுஸ்ஸேஸு சாதி அத்தோ². ஸங்விருள்ஹம்ஹீதி ஸமந்ததோ பல்லவக்³க³ஹணேன விருள்ஹே. அலபி⁴ங்ஹந்தி அலபி⁴ங் அஹங். அஜ்ஜ திங்ஸங் ததோ கப்பாதி ததோ கப்பதோ அஜ்ஜ ஸம்பதி அயங் கப்போ திங்ஸதிமோ. தஸ்ஸா ஸஞ்ஞாய வாஸனாதி தஸ்ஸ பு³த்³த⁴க³தாய ஸஞ்ஞாய வாஸனதோ.

Sahassaṃ kappakoṭiyoti sahassaṃ attabhāvā ahesunti attho. ‘‘Asīti kappakoṭiyo’’tipi pāṭho, asītiāyukappakoṭiyo ahesunti attho. Kattha pana te ahesunti? Āha ‘‘deve ceva manusse cā’’ti, devesu ceva manussesu cāti attho. Saṃviruḷhamhīti samantato pallavaggahaṇena viruḷhe. Alabhiṃhanti alabhiṃ ahaṃ. Ajja tiṃsaṃ tato kappāti tato kappato ajja sampati ayaṃ kappo tiṃsatimo. Tassā saññāya vāsanāti tassa buddhagatāya saññāya vāsanato.

தண்ஹானிகா⁴தகோதி தண்ஹாய ஸமுச்சே²த³கோ. வடங்ஸகோதி புப்ப²மயகண்ணிகோ. ஸப்³ப³புப்பே²ஹிலங்கதோதி நானாபுப்பே²ஹி அலங்கதோ. லபனந்தராதி உத்தராத⁴ரொட்டா²னங் அந்தரதோ. ஓக்காதி பபா⁴. முத்³த⁴னந்தரதா⁴யதா²தி முத்³த⁴னி அந்தரதா⁴யத². கங்க²ங் விதராதி விமதிங் வினோதே³ஹி. யஸ்ஸ தங் ஸப்³ப³த⁴ம்மேஸு , ஸதா³ ஞாணங் பவத்ததீதி தந்தி நிபாதமத்தங். யஸ்ஸ ஸப்³ப³த⁴ம்மேஸு ஆகங்க²ப்படிப³த்³த⁴த்தா ஸதா³ ஞாணங் பவத்ததி. ஸோ ஸப்³ப³ஞ்ஞூ ப⁴க³வா தே²ரங் ஆனந்த³ங் ஏதத³ப்³ரவீதி ஸம்ப³ந்தோ⁴. ராஜா ரட்டே² ப⁴விஸ்ஸதீதி ஸப்³ப³ஸ்மிங் ரட்டே² ராஜா ப⁴விஸ்ஸதி. சரிமந்தி சரிமப⁴வங். ஸச்சி²கத்வாதி பச்சக்க²ங் கத்வா. த⁴ம்மதந்தி சதுஸச்சத⁴ம்மங், பச்சேகபோ³தி⁴ங் வா.

Taṇhānighātakoti taṇhāya samucchedako. Vaṭaṃsakoti pupphamayakaṇṇiko. Sabbapupphehilaṅkatoti nānāpupphehi alaṅkato. Lapanantarāti uttarādharoṭṭhānaṃ antarato. Okkāti pabhā. Muddhanantaradhāyathāti muddhani antaradhāyatha. Kaṅkhaṃ vitarāti vimatiṃ vinodehi. Yassa taṃ sabbadhammesu, sadā ñāṇaṃ pavattatīti tanti nipātamattaṃ. Yassa sabbadhammesu ākaṅkhappaṭibaddhattā sadā ñāṇaṃ pavattati. So sabbaññū bhagavā theraṃ ānandaṃ etadabravīti sambandho. Rājā raṭṭhe bhavissatīti sabbasmiṃ raṭṭhe rājā bhavissati. Carimanti carimabhavaṃ. Sacchikatvāti paccakkhaṃ katvā. Dhammatanti catusaccadhammaṃ, paccekabodhiṃ vā.

96.

ஸுவண்ணச்ச²த³னங் நாவந்தி உபோ⁴ஸு பஸ்ஸேஸு ஸுவண்ணாலங்காரேஹி படிமண்டி³தவஸேன சா²தி³தங் ஸுவண்ணனாவங். பஞ்ஹங் புட்டா² வியாகாஸி, ஸக்கஸ்ஸ இதி மே ஸுதந்தி யதா² ஸா தே³வதா பஞ்ஹங் புட்டா² ஸக்கஸ்ஸ ப்³யாகாஸி, ஏவங் மயாபி ஸுதந்தி ஆயஸ்மா மஹாமொக்³க³ல்லானோ அத்தனா யதா²ஸுதங் தங் ப⁴க³வதோ வத³தி.

Suvaṇṇacchadanaṃ nāvanti ubhosu passesu suvaṇṇālaṅkārehi paṭimaṇḍitavasena chāditaṃ suvaṇṇanāvaṃ. Pañhaṃ puṭṭhā viyākāsi, sakkassa iti me sutanti yathā sā devatā pañhaṃ puṭṭhā sakkassa byākāsi, evaṃ mayāpi sutanti āyasmā mahāmoggallāno attanā yathāsutaṃ taṃ bhagavato vadati.

பங்ஸுதூ²பேஸூதி ஸரீரதா⁴துங் அப்³ப⁴ந்தரே ட²பெத்வா பங்ஸூஹி கததூ²பேஸு. ஏவஞ்ஹி தே ப⁴க³வந்தங் உத்³தி³ஸ்ஸகதா நாம ஹொந்தி, தேனேவாஹ – ‘‘உத்³தி³ஸ்ஸகதேஸு த³ஸப³லத⁴ரான’’ந்தி.

Paṃsuthūpesūti sarīradhātuṃ abbhantare ṭhapetvā paṃsūhi katathūpesu. Evañhi te bhagavantaṃ uddissakatā nāma honti, tenevāha – ‘‘uddissakatesu dasabaladharāna’’nti.

97.

தே³வபுத்தஸரீரவண்ணாதி தே³வபுத்தஸரீரஸதி³ஸவண்ணா. ஸுப⁴க³ஸண்டி²தீதி ஸோப⁴க்³க³யுத்தஸண்டா²னா. உளாரங் வத தங் ஆஸீதி தங் மயா கதங் புஞ்ஞங் உளாரங் வத அஹோஸி. யாஹந்தி யா அஹங். ஸதஸஹஸ்ஸங் கப்பே, முதி³தோ தூ²பங் அபூஜேஸீதி தூ²பங் பூஜெத்வா ஸதஸஹஸ்ஸங் ஆயுகப்பே அஹங் முதி³தோதி அத்தோ². அனாக³ந்துன வினிபாதந்தி அபாயுபபத்திங் அனுபக³ந்த்வா. யங் சக்கு²ந்தி யங் பஞ்ஞாசக்கு²ங். பணிஹிதந்தி ட²பிதங். விமுத்தசித்தம்ஹீதி விமுத்தசித்தோ அம்ஹி. விதூ⁴தலதோதி விதூ⁴ததண்ஹாலதோ, ஸமுச்சி²ன்னதண்ஹோதி அத்தோ².

Devaputtasarīravaṇṇāti devaputtasarīrasadisavaṇṇā. Subhagasaṇṭhitīti sobhaggayuttasaṇṭhānā. Uḷāraṃ vata taṃ āsīti taṃ mayā kataṃ puññaṃ uḷāraṃ vata ahosi. Yāhanti yā ahaṃ. Satasahassaṃ kappe, mudito thūpaṃ apūjesīti thūpaṃ pūjetvā satasahassaṃ āyukappe ahaṃ muditoti attho. Anāgantuna vinipātanti apāyupapattiṃ anupagantvā. Yaṃ cakkhunti yaṃ paññācakkhuṃ. Paṇihitanti ṭhapitaṃ. Vimuttacittamhīti vimuttacitto amhi. Vidhūtalatoti vidhūtataṇhālato, samucchinnataṇhoti attho.

98.

ஸாமாகபத்தோ²த³னமத்தந்தி ஸாமாகதிணானங் நாளிகோத³னமத்தங். அகி²லேதி பஞ்சன்னங் சேதோகி²லானங் அபா⁴வேன அகி²லே. தஸ்மிஞ்ச ஓகப்பயி த⁴ம்மமுத்தமந்தி தஸ்மிங் பச்சேகபு³த்³தே⁴ உத்தமத⁴ம்மங் பச்சேகபோ³தி⁴ங் ‘‘உத்தமத⁴ம்மேன நாம இமஸ்மிங் ப⁴விதப்³ப³’’ந்தி ஸத்³த³ஹிங். ‘‘தஸ்மிஞ்ச த⁴ம்மே பணிதே⁴ஸிங் மானஸ’’ந்தி இமினா படிலத்³த⁴த⁴ம்மங் அஹம்பி ஸச்சி²கரெய்யந்தி சித்தங் பணித³ஹிங். ப⁴வே குதா³ஸுபி ச மா அபெக்க²வாதி கத்த²சி ப⁴வே அபெக்க²வா மா ப⁴வெய்யந்தி ச பணிதே⁴ஸிங் மானஸந்தி ஸம்ப³ந்தோ⁴.

Sāmākapatthodanamattanti sāmākatiṇānaṃ nāḷikodanamattaṃ. Akhileti pañcannaṃ cetokhilānaṃ abhāvena akhile. Tasmiñca okappayi dhammamuttamanti tasmiṃ paccekabuddhe uttamadhammaṃ paccekabodhiṃ ‘‘uttamadhammena nāma imasmiṃ bhavitabba’’nti saddahiṃ. ‘‘Tasmiñca dhamme paṇidhesiṃ mānasa’’nti iminā paṭiladdhadhammaṃ ahampi sacchikareyyanti cittaṃ paṇidahiṃ. Bhave kudāsupi ca mā apekkhavāti katthaci bhave apekkhavā mā bhaveyyanti ca paṇidhesiṃ mānasanti sambandho.

குரூஸூதி உத்தரகுரூஸு. தீ³கா⁴யுகேஸூதி தேஸங் வஸ்ஸஸஹஸ்ஸாயுகதாய வுத்தங். அமமேஸூதி அபரிக்³க³ஹேஸு. பாணீஸூதி ஸத்தேஸு. அஹீனகா³மீஸூதி யதா²லத்³த⁴ஸம்பத்தீஹி யாவதாயுகங் அபரிஹீனஸபா⁴வேஸு . தித³ஸோபபஜ்ஜதா²தி தாவதிங்ஸோ ஹுத்வா உபபஜ்ஜிங், தித³ஸே வா தாவதிங்ஸப⁴வனே உபபஜ்ஜிங். விஸிட்ட²காயூபக³தோதி விஸிட்ட²காயேஸு நானாவண்ணகாயேஸு உபக³தோ. யஸஸ்ஸிஸூதி பரிவாரவந்தேஸு. ஹிதாஹிதாஸிஹீதி குஸலாகுஸலே வீதிவத்தீஹி. பச்சக்க²ங் க்²விமந்தி பச்சக்க²ங் கோ² இமங் வசனந்தி அதி⁴ப்பாயோ.

Kurūsūti uttarakurūsu. Dīghāyukesūti tesaṃ vassasahassāyukatāya vuttaṃ. Amamesūti apariggahesu. Pāṇīsūti sattesu. Ahīnagāmīsūti yathāladdhasampattīhi yāvatāyukaṃ aparihīnasabhāvesu . Tidasopapajjathāti tāvatiṃso hutvā upapajjiṃ, tidase vā tāvatiṃsabhavane upapajjiṃ. Visiṭṭhakāyūpagatoti visiṭṭhakāyesu nānāvaṇṇakāyesu upagato. Yasassisūti parivāravantesu. Hitāhitāsihīti kusalākusale vītivattīhi. Paccakkhaṃ khvimanti paccakkhaṃ kho imaṃ vacananti adhippāyo.

ஸகாஸீதி ஸோ அகாஸி. ப³லிமாபி⁴ஹாரீதி பூஜாப³லிங் அபி⁴ஹரி. பதிதஸ்ஸ ஏகந்தி தஸ்ஸ ஹத்த²தோ ஏகபுப்ப²ங் பதிதங்.

Sakāsīti so akāsi. Balimābhihārīti pūjābaliṃ abhihari. Patitassa ekanti tassa hatthato ekapupphaṃ patitaṃ.

உபரிட்ட²ந்தி உபரி வேஹாஸே டி²தங். அரிட்ட²ந்தி அரிட்ட²ங் நாம பச்சேகஸம்பு³த்³த⁴ங். அஜ்ஜ²த்தஞ்ச ப³ஹித்³தா⁴ சாதி அஜ்ஜ²த்தவிஸயா ச ப³ஹித்³த⁴விஸயா ச. யே மே விஜ்ஜிங்ஸூதி யே மே புப்³பே³ விஜ்ஜமானா அஹேஸுங். ஜாதிமரணஸங்ஸாரோ, நத்தி² தா³னி புனப்³ப⁴வோதி புனப்புனங் ஜாயனமீயனபூ⁴தோ ஸங்ஸாரோ புனப்³ப⁴வோதி ச வுச்சதி, ஸோ ச தா³னி நத்தீ²தி அத்தோ².

Upariṭṭhanti upari vehāse ṭhitaṃ. Ariṭṭhanti ariṭṭhaṃ nāma paccekasambuddhaṃ. Ajjhattañca bahiddhā cāti ajjhattavisayā ca bahiddhavisayā ca. Ye me vijjiṃsūti ye me pubbe vijjamānā ahesuṃ. Jātimaraṇasaṃsāro, natthi dāni punabbhavoti punappunaṃ jāyanamīyanabhūto saṃsāro punabbhavoti ca vuccati, so ca dāni natthīti attho.

இத³ங் வாஸனாபா⁴கி³யங் ஸுத்தந்தி இத³ங் வாஸனாபா⁴க³புஞ்ஞவிபா⁴வனானங் நானாஸுத்தபதா³னங் உதா³ஹரணவஸேன த³ஸ்ஸிதங் வாஸனாபா⁴கி³யங் ஸுத்தந்தி வேதி³தப்³ப³ங்.

Idaṃ vāsanābhāgiyaṃ suttanti idaṃ vāsanābhāgapuññavibhāvanānaṃ nānāsuttapadānaṃ udāharaṇavasena dassitaṃ vāsanābhāgiyaṃ suttanti veditabbaṃ.

99.

‘‘உத்³த⁴ங் அதோ⁴…பே॰… அபுனப்³ப⁴வாயா’’தி இத³ங் நிப்³பே³த⁴பா⁴கி³யங் ஸுத்தந்தி வுத்தங் ஓக⁴தரணஸ்ஸ அரியமக்³க³கிச்சத்தா. ந சேதனா கரணீயாதி ந சித்தங் உப்பாதே³தப்³ப³ங். த⁴ம்மதாதி த⁴ம்மஸபா⁴வோ.

‘‘Uddhaṃ adho…pe… apunabbhavāyā’’ti idaṃ nibbedhabhāgiyaṃ suttanti vuttaṃ oghataraṇassa ariyamaggakiccattā. Na cetanā karaṇīyāti na cittaṃ uppādetabbaṃ. Dhammatāti dhammasabhāvo.

100.

யதா³ ஹவேதி யஸ்மிங் ஹவே காலே. பாதுப⁴வந்தீதி உப்பஜ்ஜந்தி. த⁴ம்மாதி அனுலோமபச்சயாகாரபடிவேத⁴ஸாத⁴கா போ³தி⁴பக்கி²யத⁴ம்மா. பாதுப⁴வந்தீதி வா பகாஸெந்தி, அபி⁴ஸமயவஸேன பாகடா ஹொந்தி. த⁴ம்மாதி சதுஅரியஸச்சத⁴ம்மா. ஆதாபோ வுச்சதி கிலேஸஸந்தாபனட்டே²ன வீரியங். ஆதாபினோதி ஸம்மப்பதா⁴னவீரியவதோ. ஜா²யதோதி ஆரம்மணூபனிஜ்ஜா²னலக்க²ணேன லக்க²ணூபனிஜ்ஜா²னலக்க²ணேன ச ஜா²னேன ஜா²யந்தஸ்ஸ. ப்³ராஹ்மணஸ்ஸாதி பா³ஹிதபாபஸ்ஸ கீ²ணாஸவஸ்ஸ. அத²ஸ்ஸ கங்கா² வபயந்தி ஸப்³பா³தி அத²ஸ்ஸ ஏவங் பாதுபூ⁴தத⁴ம்மஸ்ஸ யா தா ‘‘கோ நு கோ², ப⁴ந்தே, பு²ஸதீதி? நோ கல்லோ பஞ்ஹோதி ப⁴க³வா அவோசா’’திஆதி³னா (ஸங்॰ நி॰ 2.12) நயேன ‘‘கதமங் நு கோ², ப⁴ந்தே, ஜராமரணங், கஸ்ஸ பனித³ங் ஜராமரணந்தி? நோ கல்லோ பஞ்ஹோதி ப⁴க³வா அவோசா’’திஆதி³னா (ஸங்॰ நி॰ 2.35) ச நயேன பச்சயாகாரகங்கா² வுத்தா. யா ச பச்சயாகாரஸ்ஸேவ அப்படிவித்³த⁴த்தா ‘‘அஹோஸிங் நு கோ² அஹமதீதமத்³தா⁴ன’’ந்திஆதி³கா (ம॰ நி॰ 1.18; ஸங்॰ நி॰ 2.20) ஸோளஸகங்கா² ‘‘பு³த்³தே⁴ கங்க²தி த⁴ம்மே கங்க²தீ’’திஆதி³கா (த⁴॰ ஸ॰ 1008) அட்ட² ச கங்கா² ஆக³தா, தா ஸப்³பா³ வபயந்தி அபக³ச்ச²ந்தி நிருஜ்ஜ²ந்தி, கஸ்மா? யதோ பஜானாதி ஸஹேதுத⁴ம்மங், யஸ்மா அவிஜ்ஜாதி³கேன ஹேதுனா ஸஹேதுகங் இமங் ஸங்கா²ராதி³ங் கேவலங் து³க்க²க்க²ந்த⁴த⁴ம்மங் பஜானாதி அஞ்ஞாஸி படிவிஜ்ஜ²தி.

Yadā haveti yasmiṃ have kāle. Pātubhavantīti uppajjanti. Dhammāti anulomapaccayākārapaṭivedhasādhakā bodhipakkhiyadhammā. Pātubhavantīti vā pakāsenti, abhisamayavasena pākaṭā honti. Dhammāti catuariyasaccadhammā. Ātāpo vuccati kilesasantāpanaṭṭhena vīriyaṃ. Ātāpinoti sammappadhānavīriyavato. Jhāyatoti ārammaṇūpanijjhānalakkhaṇena lakkhaṇūpanijjhānalakkhaṇena ca jhānena jhāyantassa. Brāhmaṇassāti bāhitapāpassa khīṇāsavassa. Athassa kaṅkhā vapayanti sabbāti athassa evaṃ pātubhūtadhammassa yā tā ‘‘ko nu kho, bhante, phusatīti? No kallo pañhoti bhagavā avocā’’tiādinā (saṃ. ni. 2.12) nayena ‘‘katamaṃ nu kho, bhante, jarāmaraṇaṃ, kassa panidaṃ jarāmaraṇanti? No kallo pañhoti bhagavā avocā’’tiādinā (saṃ. ni. 2.35) ca nayena paccayākārakaṅkhā vuttā. Yā ca paccayākārasseva appaṭividdhattā ‘‘ahosiṃ nu kho ahamatītamaddhāna’’ntiādikā (ma. ni. 1.18; saṃ. ni. 2.20) soḷasakaṅkhā ‘‘buddhe kaṅkhati dhamme kaṅkhatī’’tiādikā (dha. sa. 1008) aṭṭha ca kaṅkhā āgatā, tā sabbā vapayanti apagacchanti nirujjhanti, kasmā? Yato pajānāti sahetudhammaṃ, yasmā avijjādikena hetunā sahetukaṃ imaṃ saṅkhārādiṃ kevalaṃ dukkhakkhandhadhammaṃ pajānāti aññāsi paṭivijjhati.

யதோ க²யங் பச்சயானங் அவேதீ³ஹி யஸ்மா பச்சயானங் க²யஸங்கா²தங் நிப்³பா³னங் அவேதி³ அஞ்ஞாஸி படிவிஜ்ஜி², தஸ்மா யதா³ஸ்ஸ ஆதாபினோ ஜா²யதோ ப்³ராஹ்மணஸ்ஸ வுத்தப்பகாரா த⁴ம்மா பாதுப⁴வந்தி. அத²ஸ்ஸ யா நிப்³பா³னஸ்ஸ அவிதி³தத்தா கங்கா² உப்பஜ்ஜெய்யுங், ஸப்³பா³பி தா கங்கா² வபயந்தீதி.

Yato khayaṃ paccayānaṃ avedīhi yasmā paccayānaṃ khayasaṅkhātaṃ nibbānaṃ avedi aññāsi paṭivijjhi, tasmā yadāssa ātāpino jhāyato brāhmaṇassa vuttappakārā dhammā pātubhavanti. Athassa yā nibbānassa aviditattā kaṅkhā uppajjeyyuṃ, sabbāpi tā kaṅkhā vapayantīti.

ஆரஞ்ஞந்தி ஆரஞ்ஞகங். அஞ்ஞாதுஞ்சே²ன யாபெந்தந்தி குலேஸு அஞ்ஞாதோ நிச்சனவோயேவ ஹுத்வா உஞ்சே²ன பிண்ட³சரியாய யாபெந்தங். அத² வா அபி⁴லக்கி²தேஸு இஸ்ஸரஜனகே³ஹேஸு கடுகப⁴ண்ட³ஸம்பா⁴ரங் ஸுக³ந்த⁴போ⁴ஜனங் பரியேஸந்தஸ்ஸ உஞ்ச²னங் ஞாதுஞ்ச²னங் நாம, க⁴ரபடிபாடியா பன த்³வாரே டி²தேன லத்³த⁴மிஸ்ஸகபோ⁴ஜனங் அஞ்ஞாதுஞ்ச²னங் நாம. இத³ங் இத⁴ அதி⁴ப்பேதங். தேன யாபெந்தங். காமேஸு அனபெக்கி²னந்தி வத்து²காமகிலேஸகாமேஸு நிரபெக்க²ங்.

Āraññanti āraññakaṃ. Aññātuñchena yāpentanti kulesu aññāto niccanavoyeva hutvā uñchena piṇḍacariyāya yāpentaṃ. Atha vā abhilakkhitesu issarajanagehesu kaṭukabhaṇḍasambhāraṃ sugandhabhojanaṃ pariyesantassa uñchanaṃ ñātuñchanaṃ nāma, gharapaṭipāṭiyā pana dvāre ṭhitena laddhamissakabhojanaṃ aññātuñchanaṃ nāma. Idaṃ idha adhippetaṃ. Tena yāpentaṃ. Kāmesu anapekkhinanti vatthukāmakilesakāmesu nirapekkhaṃ.

செ²த்வாதி வதி⁴த்வா. ஸுக²ங் ஸேதீதி கோத⁴பரிளாஹேன அபரித³ய்ஹமானத்தா ஸுக²ங் ஸயதி. ந ஸோசதீதி கோத⁴வினாஸேன வினட்ட²தோ³மனஸ்ஸத்தா ந ஸோசதி. விஸமூலஸ்ஸாதி து³க்க²விபாகஸ்ஸ. மது⁴ரக்³க³ஸ்ஸாதி யங் அக்குட்ட²ஸ்ஸ பச்சக்கோஸித்வா பஹடஸ்ஸ படிப்பஹரித்வா ஸுக²ங் உப்பஜ்ஜதி, தங் ஸந்தா⁴ய ஸோ ‘‘மது⁴ரக்³கோ³’’தி வுத்தோ. இமஸ்மிஞ்ஹி டா²னே பரியோஸானங் ‘‘அக்³க³’’ந்தி வுத்தங். அரியாதி பு³த்³தா⁴த³யோ.

Chetvāti vadhitvā. Sukhaṃ setīti kodhapariḷāhena aparidayhamānattā sukhaṃ sayati. Na socatīti kodhavināsena vinaṭṭhadomanassattā na socati. Visamūlassāti dukkhavipākassa. Madhuraggassāti yaṃ akkuṭṭhassa paccakkositvā pahaṭassa paṭippaharitvā sukhaṃ uppajjati, taṃ sandhāya so ‘‘madhuraggo’’ti vutto. Imasmiñhi ṭhāne pariyosānaṃ ‘‘agga’’nti vuttaṃ. Ariyāti buddhādayo.

ஹனேதி ஹனெய்ய. உப்பதிதந்தி அஸமுக்³கா⁴டிதங் அவிக்க²ம்பி⁴துப்பன்னவஸேன ஸமுதா³சாருப்பன்னவஸேன ஸமுதா³சரந்தங். வினோத³யேதி அத்தனோ ஸந்தானதோ நீஹரெய்ய.

Haneti haneyya. Uppatitanti asamugghāṭitaṃ avikkhambhituppannavasena samudācāruppannavasena samudācarantaṃ. Vinodayeti attano santānato nīhareyya.

101.

ஸத்தியாதி தே³ஸனாஸீஸமேதங், ஏகதோதா⁴ராதி³னா ஸத்தே²னாதி அத்தோ². ஓமட்டோ²தி பஹடோ. சத்தாரோ ஹி பஹாரா ஓமட்டோ² உம்மட்டோ² மட்டோ² விமட்டோ²தி. தத்த² உபரி ட²த்வா அதோ⁴முக²ங் தி³ன்னப்பஹாரோ ஓமட்டோ² நாம, அதோ⁴ ட²த்வா உத்³த⁴ங் முக²ங் தி³ன்னப்பஹாரோ உம்மட்டோ² நாம, அக்³க³ளஸூசி விய வினிவிஜ்ஜி²த்வா கதோ மட்டோ² நாம, ஸேஸோ ஸப்³போ³பி விமட்டோ² நாம. இமஸ்மிங் பன டா²னே ஓமட்டோ² க³ஹிதோ. ஸோ ஹி ஸப்³ப³தா³ருணோ து³ருத்³த⁴ரணஸல்லோ து³த்திகிச்சோ² அந்தோதோ³ஸோ அந்தோபுப்³ப³லோஹிதோ ச ஹோதி. புப்³ப³லோஹிதங் அனிக்க²மித்வா வணமுக²ங் பரியோனந்தி⁴த்வா திட்ட²தி. புப்³ப³லோஹிதங் நீஹரிதுகாமேஹி மஞ்சேன ஸத்³தி⁴ங் ப³ந்தி⁴த்வா அதோ⁴ஸிரோ காதப்³போ³ ஹோதி, மரணங் வா மரணமத்தங் வா து³க்க²ங் பாபுணாதி. பரிப்³ப³ஜேதி விஹரெய்ய.

Sattiyāti desanāsīsametaṃ, ekatodhārādinā satthenāti attho. Omaṭṭhoti pahaṭo. Cattāro hi pahārā omaṭṭho ummaṭṭho maṭṭho vimaṭṭhoti. Tattha upari ṭhatvā adhomukhaṃ dinnappahāro omaṭṭho nāma, adho ṭhatvā uddhaṃ mukhaṃ dinnappahāro ummaṭṭho nāma, aggaḷasūci viya vinivijjhitvā kato maṭṭho nāma, seso sabbopi vimaṭṭho nāma. Imasmiṃ pana ṭhāne omaṭṭho gahito. So hi sabbadāruṇo duruddharaṇasallo duttikiccho antodoso antopubbalohito ca hoti. Pubbalohitaṃ anikkhamitvā vaṇamukhaṃ pariyonandhitvā tiṭṭhati. Pubbalohitaṃ nīharitukāmehi mañcena saddhiṃ bandhitvā adhosiro kātabbo hoti, maraṇaṃ vā maraṇamattaṃ vā dukkhaṃ pāpuṇāti. Paribbajeti vihareyya.

இமாய கா³தா²ய கிங் கதி²தங்? யதா² ஸத்தியா ஓமட்ட²புரிஸோ ஸல்லுப்³பா³ஹனவணதிகிச்ச²னானங் அத்தா²ய வீரியங் ஆரப⁴தி பயோக³ங் கரோதி பரக்கமதி. யதா² ச த³ய்ஹமானே மத்த²கே ஆதி³த்தஸிரோ தஸ்ஸ நிப்³பா³பனத்தா²ய வீரியங் ஆரப⁴தி பயோக³ங் கரோதி பரக்கமதி, ஏவமேவங் பி⁴க்கு² காமராக³ப்பஹானாய ஸதோ அப்பமத்தோ ஹுத்வா விஹரெய்ய ப⁴க³வாதி கதே²ஸி.

Imāya gāthāya kiṃ kathitaṃ? Yathā sattiyā omaṭṭhapuriso sallubbāhanavaṇatikicchanānaṃ atthāya vīriyaṃ ārabhati payogaṃ karoti parakkamati. Yathā ca dayhamāne matthake ādittasiro tassa nibbāpanatthāya vīriyaṃ ārabhati payogaṃ karoti parakkamati, evamevaṃ bhikkhu kāmarāgappahānāya sato appamatto hutvā vihareyya bhagavāti kathesi.

ஏவங் தே³வதாய கதி²தே அத² ப⁴க³வா சிந்தேஸி – ‘‘இமாய தே³வதாய உபமா த³ள்ஹங் கத்வா ஆனீதா, அத்த²ங் பன பரித்தகங் க³ஹெத்வா டி²தா. புனப்புனங் கதெ²ந்தீபி ஹி ஏஸா காமராக³ஸ்ஸ விக்க²ம்ப⁴னப்பஹானமேவ கதெ²ய்ய, யாவ ச காமராகோ³ மக்³கே³ன ந ஸமுக்³கா⁴டிய்யதி, தாவ அனுப³ந்தோ⁴வ ஹோதீ’’தி தமேவ உபமங் க³ஹெத்வா பட²மமக்³க³வஸேன தே³வதாய வினிவட்டெத்வா த³ஸ்ஸெந்தோ ‘‘ஸத்தியா விய ஓமட்டோ²’’தி து³தியகா³த²மாஹ. தஸ்ஸத்தோ² புரிமனயானுஸாரேன வேதி³தப்³போ³.

Evaṃ devatāya kathite atha bhagavā cintesi – ‘‘imāya devatāya upamā daḷhaṃ katvā ānītā, atthaṃ pana parittakaṃ gahetvā ṭhitā. Punappunaṃ kathentīpi hi esā kāmarāgassa vikkhambhanappahānameva katheyya, yāva ca kāmarāgo maggena na samugghāṭiyyati, tāva anubandhova hotī’’ti tameva upamaṃ gahetvā paṭhamamaggavasena devatāya vinivaṭṭetvā dassento ‘‘sattiyā viya omaṭṭho’’ti dutiyagāthamāha. Tassattho purimanayānusārena veditabbo.

லோகாமிஸந்தி காமகு³ணோ. ஸந்திபெக்கோ²தி ஸப்³ப³ஸங்கா²ரூபஸமங் நிப்³பா³னங் அபெக்க²மானோ. பஞ்ஞவாதி பஞ்ஞவந்தோ. பஹிதத்தோதி நிப்³பா³னங் பதிபேஸிதசித்தோ. விரதோ காமஸஞ்ஞாயாதி யாய காயசி ஸப்³ப³தோ காமஸஞ்ஞாய சதுத்த²மக்³க³ஸம்பயுத்தாய ஸமுச்சே²த³விரதியா விரதோ. ‘‘விரத்தோ’’திபி பாடோ². காமஸஞ்ஞாயாதி பன பு⁴ம்மவசனங் ஹோதி. ஸகா³தா²வக்³கே³ (ஸங்॰ நி॰ 1.96) ‘‘காமஸஞ்ஞாஸூ’’தி பாடோ². சதூஹி மக்³கே³ஹி த³ஸன்னம்பி ஸங்யோஜனானங் அதீதத்தா ஸப்³ப³ஸங்யோஜனாதீதோ. சதுத்த²மக்³கே³னேவ வா உத்³த⁴ம்பா⁴கி³யஸங்யோஜனாதீதோ தத்ர தத்ராபி⁴னந்த³னதோ நந்தி³ஸங்கா²தாய தண்ஹாய திண்ணஞ்ச ப⁴வானங் பரிக்கீ²ணத்தா நந்தி³ப⁴வபரிக்கீ²ணோ. ஸோ தாதி³ஸோ கீ²ணாஸவோ பி⁴க்கு² க³ம்பீ⁴ரே ஸங்ஸாரண்ணவே ந ஸீத³தி.

Lokāmisanti kāmaguṇo. Santipekkhoti sabbasaṅkhārūpasamaṃ nibbānaṃ apekkhamāno. Paññavāti paññavanto. Pahitattoti nibbānaṃ patipesitacitto. Virato kāmasaññāyāti yāya kāyaci sabbato kāmasaññāya catutthamaggasampayuttāya samucchedaviratiyā virato. ‘‘Viratto’’tipi pāṭho. Kāmasaññāyāti pana bhummavacanaṃ hoti. Sagāthāvagge (saṃ. ni. 1.96) ‘‘kāmasaññāsū’’ti pāṭho. Catūhi maggehi dasannampi saṃyojanānaṃ atītattā sabbasaṃyojanātīto. Catutthamaggeneva vā uddhambhāgiyasaṃyojanātīto tatra tatrābhinandanato nandisaṅkhātāya taṇhāya tiṇṇañca bhavānaṃ parikkhīṇattā nandibhavaparikkhīṇo. So tādiso khīṇāsavo bhikkhu gambhīre saṃsāraṇṇave na sīdati.

ஸத்³த³ஹானோதி யேன புப்³ப³பா⁴கே³ காயஸுசரிதாதி³பே⁴தே³ன, அபரபா⁴கே³ ச ஸத்தத்திங்ஸபோ³தி⁴பக்கி²யபே⁴தே³ன த⁴ம்மேன அரஹந்தோ பு³த்³த⁴பச்சேகபு³த்³த⁴பு³த்³த⁴ஸாவகா நிப்³பா³னங் பத்தா. தங் ஸத்³த³ஹானோ அரஹதங் த⁴ம்மங் நிப்³பா³னப்பத்தியா லோகியலோகுத்தரபஞ்ஞங் லப⁴தி, தஞ்ச கோ² ந ஸத்³தா⁴மத்தகேனேவ. யஸ்மா பன ஸத்³தா⁴ஜாதோ உபஸங்கமதி, உபஸங்கமந்தோ பயிருபாஸதி, பயிருபாஸந்தோ ஸோதங் ஓத³ஹதி, ஓத³ஹிதஸோதோ த⁴ம்மங் ஸுணாதி, தஸ்மா உபஸங்கமனதோ பட்டா²ய யாவ த⁴ம்மஸ்ஸவனேன ஸுஸ்ஸூஸங் லப⁴தே பஞ்ஞங்.

Saddahānoti yena pubbabhāge kāyasucaritādibhedena, aparabhāge ca sattattiṃsabodhipakkhiyabhedena dhammena arahanto buddhapaccekabuddhabuddhasāvakā nibbānaṃ pattā. Taṃ saddahāno arahataṃ dhammaṃ nibbānappattiyā lokiyalokuttarapaññaṃ labhati, tañca kho na saddhāmattakeneva. Yasmā pana saddhājāto upasaṅkamati, upasaṅkamanto payirupāsati, payirupāsanto sotaṃ odahati, odahitasoto dhammaṃ suṇāti, tasmā upasaṅkamanato paṭṭhāya yāva dhammassavanena sussūsaṃ labhate paññaṃ.

கிங் வுத்தங் ஹோதி? தங் த⁴ம்மங் ஸத்³த³ஹித்வாபி ஆசரியுபஜ்ஜா²யே காலேன காலங் உபஸங்கமித்வாபி வத்தகரணேன பயிருபாஸித்வா யதா³ பயிருபாஸனாய ஆராதி⁴தசித்தா கிஞ்சி வத்துகாமா ஹொந்தி. அத² அதி⁴க³தாய ஸோதுகாமதாய ஸோதங் ஓத³ஹித்வா ஸுணந்தோ லப⁴தீதி ஏவங் ஸுஸ்ஸூஸம்பி ச ஸதிஅவிப்பவாஸேன அப்பமத்தோ ஸுபா⁴ஸிதது³ப்³பா⁴ஸிதஞ்ஞுதாய விசக்க²ணோ ஏவ லப⁴தி, ந இதரோ. தேனாஹ – ‘‘அப்பமத்தோ விசக்க²ணோ’’தி.

Kiṃ vuttaṃ hoti? Taṃ dhammaṃ saddahitvāpi ācariyupajjhāye kālena kālaṃ upasaṅkamitvāpi vattakaraṇena payirupāsitvā yadā payirupāsanāya ārādhitacittā kiñci vattukāmā honti. Atha adhigatāya sotukāmatāya sotaṃ odahitvā suṇanto labhatīti evaṃ sussūsampi ca satiavippavāsena appamatto subhāsitadubbhāsitaññutāya vicakkhaṇo eva labhati, na itaro. Tenāha – ‘‘appamatto vicakkhaṇo’’ti.

பதிரூபகாரீதி தே³ஸகாலாதீ³னி அஹாபெத்வா லோகியஸ்ஸ லோகுத்தரஸ்ஸ த⁴ம்மஸ்ஸ பதிரூபங் அதி⁴க³மூபாயங் கரோதீதி பதிரூபகாரீ. து⁴ரவாதி சேதஸிகவீரியவஸேன அனிக்கி²த்தது⁴ரோ. உட்டா²தாதி காயிகவீரியவஸேன உட்டா²னஸம்பன்னோ அஸிதி²லபரக்கமோ. விந்த³தே த⁴னந்தி லோகியலோகுத்தரத⁴னங் அதி⁴க³ச்ச²தி. ஸச்சேனாதி வசீஸச்சேன பரமத்த²ஸச்சேன ச. பு³த்³த⁴பச்சேகபு³த்³த⁴அரியஸாவகா நிப்³பு³திங் பாபுணந்தா கித்திம்பி பாபுணந்தியேவ. த³த³ந்தி பரேஸங் யங் கிஞ்சி இச்சி²தங் பத்தி²தங் தெ³ந்தோ மித்தானி க³ந்த²தி ஸம்பாதே³தி கரோதீதி அத்தோ². து³த்³த³த³ங் வா த³த³ந்தோ க³ந்த²தி, தா³னமுகே²ன சத்தாரிபி ஸங்க³ஹவத்தூ²னி க³ஹிதானீதி வேதி³தப்³பா³னி. தேஹி மித்தானி கரொந்தி. அஸ்மா லோகா பரங் லோகங், ஸ வே பேச்ச ந ஸோசதீதி யஸ்ஸ புக்³க³லஸ்ஸ இமே ஸத்³தா⁴த³யோ த⁴ம்மா விஜ்ஜந்தி, ஸோ இமஸ்மா லோகா பரங் லோகங் க³ந்த்வா ந ஸோசதி, ஸோககாரணங் தஸ்ஸ நத்தீ²தி அத்தோ².

Patirūpakārīti desakālādīni ahāpetvā lokiyassa lokuttarassa dhammassa patirūpaṃ adhigamūpāyaṃ karotīti patirūpakārī. Dhuravāti cetasikavīriyavasena anikkhittadhuro. Uṭṭhātāti kāyikavīriyavasena uṭṭhānasampanno asithilaparakkamo. Vindate dhananti lokiyalokuttaradhanaṃ adhigacchati. Saccenāti vacīsaccena paramatthasaccena ca. Buddhapaccekabuddhaariyasāvakā nibbutiṃ pāpuṇantā kittimpi pāpuṇantiyeva. Dadanti paresaṃ yaṃ kiñci icchitaṃ patthitaṃ dento mittāni ganthati sampādeti karotīti attho. Duddadaṃ vā dadanto ganthati, dānamukhena cattāripi saṅgahavatthūni gahitānīti veditabbāni. Tehi mittāni karonti. Asmā lokā paraṃ lokaṃ, sa ve pecca na socatīti yassa puggalassa ime saddhādayo dhammā vijjanti, so imasmā lokā paraṃ lokaṃ gantvā na socati, sokakāraṇaṃ tassa natthīti attho.

‘‘யஸ்ஸேதே சதுரோ த⁴ம்மா, ஸத்³த⁴ஸ்ஸ க⁴ரமேஸினோ;

‘‘Yassete caturo dhammā, saddhassa gharamesino;

ஸச்சங் த⁴ம்மோ தி⁴தி சாகோ³, ஸ வே பேச்ச ந ஸோசதீ’’தி. (ஸங்॰ நி॰ 1.246; ஸு॰ நி॰ 190) –

Saccaṃ dhammo dhiti cāgo, sa ve pecca na socatī’’ti. (saṃ. ni. 1.246; su. ni. 190) –

கா³த²ங் அவஸேஸங் கத்வா உதா³ஹடங். ஆளவகஸுத்தே ஹி இமா கா³தா² ஆளவகேன ‘‘கத²ங் ஸு லப⁴தே பஞ்ஞ’’ந்திஆதி³னா (ஸங்॰ நி॰ 1.246; ஸு॰ நி॰ 187) புட்டே²ன ப⁴க³வதா பா⁴ஸிதாதி.

Gāthaṃ avasesaṃ katvā udāhaṭaṃ. Āḷavakasutte hi imā gāthā āḷavakena ‘‘kathaṃ su labhate pañña’’ntiādinā (saṃ. ni. 1.246; su. ni. 187) puṭṭhena bhagavatā bhāsitāti.

யேன கேனசி வண்ணேனாதி யேன கேனசி காரணேன, பகாரேன வா. ஸங்வாஸோதி ஏகஸ்மிங் டா²னே ஸஹவாஸோ ஸமாக³மோ. தந்தி ததா² ஸமாக³தங் அனுகம்பிதப்³ப³ங் புரிஸங். மனஸா சே பஸன்னேனாதி கருணாஸமுஸ்ஸாஹிதேன பஸாதே³ன பஸன்னேன மனஸா. ந தேன ஹோதி ஸங்யுத்தோதி தேன யதா²வுத்தேன அனுஸாஸனேன காமச்ச²ந்தா³தீ³னங் ஸங்யோஜனவஸேன ஸங்யுத்தோ நாம ந ஹோதி. யானுகம்பா அனுத்³த³யாதி யா அரியமக்³க³ஸம்பாபனவஸேன கருணாயனா, மெத்தாயனா சாதி அத்தோ².

Yena kenaci vaṇṇenāti yena kenaci kāraṇena, pakārena vā. Saṃvāsoti ekasmiṃ ṭhāne sahavāso samāgamo. Tanti tathā samāgataṃ anukampitabbaṃ purisaṃ. Manasā ce pasannenāti karuṇāsamussāhitena pasādena pasannena manasā. Na tena hoti saṃyuttoti tena yathāvuttena anusāsanena kāmacchandādīnaṃ saṃyojanavasena saṃyutto nāma na hoti. Yānukampā anuddayāti yā ariyamaggasampāpanavasena karuṇāyanā, mettāyanā cāti attho.

102.

ராகோ³ ச தோ³ஸோ சாதி ராக³தோ³ஸா ஹெட்டா² வுத்தனயாவ. குதோனிதா³னாதி கிங்னிதா³னா கிங்ஹேதுகா. பச்சத்தவசனஸ்ஸ ஹி அயங் தோ-ஆதே³ஸோ, ஸமாஸே சஸ்ஸ லோபாபா⁴வோ வேதி³தப்³போ³. அரதீ ரதீ லோமஹங்ஸோ குதோஜாதி யாயங் பந்தேஸு ஸேனாஸனேஸு, அதி⁴குஸலேஸு ச த⁴ம்மேஸு அரதி உக்கண்டி²தா, யா ச பஞ்சஸு காமகு³ணேஸு ரதி அபி⁴ரதி ஆஸத்தி கீளனாதி³, யோ ச லோமஹங்ஸஸமுட்டா²னதோ லோமஹங்ஸஸங்கா²தோ சித்துத்ராஸோ, இமே தயோ த⁴ம்மா குதோ ஜாதா குதோ நிப்³ப³த்தாதி புச்சா². குதோ ஸமுட்டா²யாதி குதோ உப்பஜ்ஜித்வா. மனோதி குஸலசித்தங். விதக்காதி காமவிதக்காத³யோ. குமாரகா த⁴ங்கமிவோஸஜந்தீதி யதா² குமாரகா கீளந்தா காகங் ஸுத்தேன பாதே³ ப³ந்தி⁴த்வா ஓஸஜந்தி கி²பந்தி, ஏவங் குஸலமனங் அகுஸலவிதக்கா குதோ ஸமுட்டா²ய ஓஸஜந்தீதி புச்சா².

Rāgo ca doso cāti rāgadosā heṭṭhā vuttanayāva. Kutonidānāti kiṃnidānā kiṃhetukā. Paccattavacanassa hi ayaṃ to-ādeso, samāse cassa lopābhāvo veditabbo. Aratī ratī lomahaṃso kutojāti yāyaṃ pantesu senāsanesu, adhikusalesu ca dhammesu arati ukkaṇṭhitā, yā ca pañcasu kāmaguṇesu rati abhirati āsatti kīḷanādi, yo ca lomahaṃsasamuṭṭhānato lomahaṃsasaṅkhāto cittutrāso, ime tayo dhammā kuto jātā kuto nibbattāti pucchā. Kuto samuṭṭhāyāti kuto uppajjitvā. Manoti kusalacittaṃ. Vitakkāti kāmavitakkādayo. Kumārakā dhaṅkamivosajantīti yathā kumārakā kīḷantā kākaṃ suttena pāde bandhitvā osajanti khipanti, evaṃ kusalamanaṃ akusalavitakkā kuto samuṭṭhāya osajantīti pucchā.

ராகோ³ சாதி து³தியகா³தா² தஸ்ஸா விஸ்ஸஜ்ஜனங். தத்த² இதோதி அத்தபா⁴வங் ஸந்தா⁴யாஹ. அத்தபா⁴வனிதா³னா ஹி ராக³தோ³ஸா, அரதி ரதி லோமஹங்ஸா ச அத்தபா⁴வதோ ஜாதா. காமவிதக்காத³யோ அத்தபா⁴வதோ ஏவ ஸமுட்டா²ய குஸலமனங் ஓஸஜந்தி. தேன தத³ஞ்ஞங் பகதிஆதி³காரணங் படிக்கி²பந்தோ ஆஹ – ‘‘இதோனிதா³னா இதோ ஸமுட்டா²யா’’தி. புரிமகா³தா²ய வுத்தனயேனெத்த² ஸத்³த³ஸித்³தி⁴ வேதி³தப்³பா³.

Rāgocāti dutiyagāthā tassā vissajjanaṃ. Tattha itoti attabhāvaṃ sandhāyāha. Attabhāvanidānā hi rāgadosā, arati rati lomahaṃsā ca attabhāvato jātā. Kāmavitakkādayo attabhāvato eva samuṭṭhāya kusalamanaṃ osajanti. Tena tadaññaṃ pakatiādikāraṇaṃ paṭikkhipanto āha – ‘‘itonidānā ito samuṭṭhāyā’’ti. Purimagāthāya vuttanayenettha saddasiddhi veditabbā.

இதா³னி ய்வாயங் ‘‘இதோனிதா³னா’’திஆதீ³ஸு அத்தபா⁴வனிதா³னா அத்தபா⁴வதோ ஜாதா அத்தபா⁴வதோ ஸமுட்டா²யாதி அத்தோ² வுத்தோ, தங் ஸாதெ⁴ந்தோ ஆஹ – ‘‘ஸ்னேஹஜா அத்தஸம்பூ⁴தா’’தி. ஏதே ஹி ராகா³த³யோ விதக்கபரியோஸானா தண்ஹாஸ்னேஹேன ஜாதா. ததா² ஜாயந்தா ச பஞ்சுபாதா³னக்க²ந்த⁴பே⁴தே³ அத்தபா⁴வஸங்கா²தே அத்தனி ஸம்பூ⁴தா. தேனாஹ – ‘‘ஸ்னேஹஜா அத்தஸம்பூ⁴தா’’தி. இதா³னி தத³த்த²ஜோதிகங் உபமங் த³ஸ்ஸேதி ‘‘நிக்³ரோத⁴ஸ்ஸேவ க²ந்த⁴ஜா’’தி. தத்த² க²ந்த⁴ஜாதி க²ந்தே⁴ஸு ஜாதா பாரோஹா. இத³ங் வுத்தங் ஹோதி – யதா² நிக்³ரோத⁴ஸ்ஸ க²ந்த⁴ஜஸங்கா²தா பாரோஹா ஆபோரஸஸங்கா²தே ஸ்னேஹே ஸதி ஜாயந்தி, ஜாயந்தா ச தஸ்மிங்யேவ நிக்³ரோதே⁴ தேஸு தேஸு ஸாக²ப்பதே³ஸேஸு ஸம்ப⁴வந்தி, ஏவங் ஏதே ராகா³த³யோ அஜ்ஜ²த்தங் தண்ஹாஸ்னேஹே ஸதி ஜாயந்தி, ஜாயந்தா ச தஸ்மிங்யேவ அத்தபா⁴வே தேஸு தேஸு சக்கா²தி³ப்பதே³ஸேஸு இட்டா²ரம்மணேஸு ஸம்ப⁴வந்தி. தேன வுத்தங் – ‘‘ஸ்னேஹஜா அத்தஸம்பூ⁴தா’’தி. புது² விஸத்தா காமேஸூதி யஸ்மா ராகோ³பி பஞ்சகாமகு³ணிகாதி³வஸேன, தோ³ஸோபி ஆகா⁴தவத்து²ஆதி³வஸேன அரதிஆத³யோபி தஸ்ஸ தஸ்ஸ பே⁴த³ஸ்ஸ வஸேனாதி ஸப்³ப³தா² ஸப்³பே³பிமே கிலேஸா புது² அனேகப்பகாரா ஹுத்வா வத்து²த்³வாராரம்மணாதி³வஸேன தேஸு தேஸு காமேஸு ததா² ததா² விஸத்தா லக்³கா³ ஸங்ஸிப்³பி³த்வா டி²தா. கிமிவ? மாலுவாவ விததா வனே யதா² வனே விததா மாலுவா தேஸு தேஸு ருக்க²ஸாக²ப்பஸாகா²தி³பே⁴தே³ஸு விஸத்தா ஹோதி லக்³கா³ ஸங்ஸிப்³பி³த்வா டி²தா, ஏவங் ஏதே கிலேஸா த⁴ம்மா, தஸ்மா எத்த² புது²பபே⁴தே³ஸு வத்து²காமேஸு விஸத்தங் கிலேஸக³ஹனங்.

Idāni yvāyaṃ ‘‘itonidānā’’tiādīsu attabhāvanidānā attabhāvato jātā attabhāvato samuṭṭhāyāti attho vutto, taṃ sādhento āha – ‘‘snehajā attasambhūtā’’ti. Ete hi rāgādayo vitakkapariyosānā taṇhāsnehena jātā. Tathā jāyantā ca pañcupādānakkhandhabhede attabhāvasaṅkhāte attani sambhūtā. Tenāha – ‘‘snehajā attasambhūtā’’ti. Idāni tadatthajotikaṃ upamaṃ dasseti ‘‘nigrodhasseva khandhajā’’ti. Tattha khandhajāti khandhesu jātā pārohā. Idaṃ vuttaṃ hoti – yathā nigrodhassa khandhajasaṅkhātā pārohā āporasasaṅkhāte snehe sati jāyanti, jāyantā ca tasmiṃyeva nigrodhe tesu tesu sākhappadesesu sambhavanti, evaṃ ete rāgādayo ajjhattaṃ taṇhāsnehe sati jāyanti, jāyantā ca tasmiṃyeva attabhāve tesu tesu cakkhādippadesesu iṭṭhārammaṇesu sambhavanti. Tena vuttaṃ – ‘‘snehajā attasambhūtā’’ti. Puthu visattā kāmesūti yasmā rāgopi pañcakāmaguṇikādivasena, dosopi āghātavatthuādivasena aratiādayopi tassa tassa bhedassa vasenāti sabbathā sabbepime kilesā puthu anekappakārā hutvā vatthudvārārammaṇādivasena tesu tesu kāmesu tathā tathā visattā laggā saṃsibbitvā ṭhitā. Kimiva? Māluvāva vitatā vane yathā vane vitatā māluvā tesu tesu rukkhasākhappasākhādibhedesu visattā hoti laggā saṃsibbitvā ṭhitā, evaṃ ete kilesā dhammā, tasmā ettha puthupabhedesu vatthukāmesu visattaṃ kilesagahanaṃ.

யே நங் பஜானந்தி யதோனிதா³னங், தே நங் வினோதெ³ந்தி ஸுணோஹி யக்க². தஸ்ஸத்தோ² – யே ஸத்தா நங் கிலேஸக³ஹனங் ‘‘இதோனிதா³னங் ஏஸ உப்பஜ்ஜதீ’’தி ஜானந்தி, தே நங் தண்ஹாஸினேஹஸினேஹிதே அத்தபா⁴வே உப்பஜ்ஜதீதி ஞத்வா தங் தண்ஹாஸினேஹங் ஆதீ³னவானுபஸ்ஸனாதி³பா⁴வனாஞாணக்³கி³னா விஸோஸெந்தா வினோதெ³ந்தி பஜஹந்தி, ஏவங் அம்ஹாகங் பா⁴ஸிதங் ஸுணோஹி யக்கா²தி. தே து³த்தரங் ஓக⁴மிமங் தரந்தி, அதிண்ணபுப்³ப³ங் அபுனப்³ப⁴வாயாதி யே ஹி ஸங்கிலேஸக³ஹனங் வினோதெ³ந்தி, தே ஏகந்தேன மக்³க³ங் பா⁴வெந்தி. ந ஹி மக்³க³பா⁴வனங் வினா கிலேஸவினோத³னங் அத்தி². ஏவங் மக்³க³ங் பா⁴வெந்தா தே பகதிஞாணேன து³த்தரங் காமோகா⁴தி³ங் சதுப்³பி³த⁴ங் ஓக⁴ங் இமினா தீ³கே⁴ன அத்³து⁴னா ஸுபினந்தேனபி அதிண்ணபுப்³ப³ங் அனதிக்கந்தபுப்³ப³ங் அபுனப்³ப⁴வாய நிப்³பா³னாய தரந்தி.

Ye naṃ pajānanti yatonidānaṃ, te naṃ vinodenti suṇohi yakkha. Tassattho – ye sattā naṃ kilesagahanaṃ ‘‘itonidānaṃ esa uppajjatī’’ti jānanti, te naṃ taṇhāsinehasinehite attabhāve uppajjatīti ñatvā taṃ taṇhāsinehaṃ ādīnavānupassanādibhāvanāñāṇagginā visosentā vinodenti pajahanti, evaṃ amhākaṃ bhāsitaṃ suṇohi yakkhāti. Te duttaraṃ oghamimaṃ taranti, atiṇṇapubbaṃ apunabbhavāyāti ye hi saṃkilesagahanaṃ vinodenti, te ekantena maggaṃ bhāventi. Na hi maggabhāvanaṃ vinā kilesavinodanaṃ atthi. Evaṃ maggaṃ bhāventā te pakatiñāṇena duttaraṃ kāmoghādiṃ catubbidhaṃ oghaṃ iminā dīghena addhunā supinantenapi atiṇṇapubbaṃ anatikkantapubbaṃ apunabbhavāya nibbānāya taranti.

து³க்கரங் ப⁴க³வாதி ஏகோ கிர தே³வபுத்தோ புப்³ப³யோகா³வசரோ ப³ஹலகிலேஸதாய ஸப்பயோகே³ன கிலேஸே விக்க²ம்பெ⁴ந்தோ ஸமணத⁴ம்மங் கத்வா புப்³ப³ஹேதுமந்த³தாய அரியபூ⁴மிங் அப்பத்வாவ காலங் கத்வா தே³வலோகே நிப்³ப³த்தோ, ஸோ ததா²க³தங் உபஸங்கமித்வா து³க்கரபா⁴வங் ஆரோசெந்தோ ஏவமாஹ. தத்த² து³க்கரந்தி த³ஸபி வஸ்ஸானி…பே॰… ஸட்டி²பி வஸ்ஸானி ஏகந்தபரிஸுத்³த⁴ஸ்ஸ ஸமணத⁴ம்மஸ்ஸ கரணங் நாமேதங் து³க்கரங். ஸெக்கா²தி ஸத்த ஸெக்கா². ஸீலஸமாஹிதாதி ஸீலேன ஸமாஹிதா ஸமுபேதா. டி²தத்தாதி பதிட்டி²தஸபா⁴வா. ஏவங் புச்சி²தபஞ்ஹங் விஸ்ஸஜ்ஜித்வா உபரிபஞ்ஹங் ஸமுட்டா²பனத்த²ங் ‘‘அனகா³ரியுபேதஸ்ஸா’’திஆதி³மாஹ. தத்த² அனகா³ரியுபேதஸ்ஸாதி அனகா³ரியங் நிக்³கே³ஹபா⁴வங் உபக³தஸ்ஸ, பப்³ப³ஜிதஸ்ஸாதி அத்தோ². துட்டீ²தி சதுபச்சயஸந்தோஸோ.

Dukkaraṃ bhagavāti eko kira devaputto pubbayogāvacaro bahalakilesatāya sappayogena kilese vikkhambhento samaṇadhammaṃ katvā pubbahetumandatāya ariyabhūmiṃ appatvāva kālaṃ katvā devaloke nibbatto, so tathāgataṃ upasaṅkamitvā dukkarabhāvaṃ ārocento evamāha. Tattha dukkaranti dasapi vassāni…pe… saṭṭhipi vassāni ekantaparisuddhassa samaṇadhammassa karaṇaṃ nāmetaṃ dukkaraṃ. Sekkhāti satta sekkhā. Sīlasamāhitāti sīlena samāhitā samupetā. Ṭhitattāti patiṭṭhitasabhāvā. Evaṃ pucchitapañhaṃ vissajjitvā uparipañhaṃ samuṭṭhāpanatthaṃ ‘‘anagāriyupetassā’’tiādimāha. Tattha anagāriyupetassāti anagāriyaṃ niggehabhāvaṃ upagatassa, pabbajitassāti attho. Tuṭṭhīti catupaccayasantoso.

பா⁴வனாயாதி சித்தவூபஸமபா⁴வனாய. தே செ²த்வா மச்சுனோ ஜாலந்தி யே ரத்திந்தி³வங் இந்த்³ரியூபஸமே ரதா, தே து³ஸ்ஸமாத³ஹங் சித்தங் ஸமாத³ஹந்தி. யே ஸமாஹிதசித்தா, தே சதுபச்சயஸந்தோஸங் பூரெந்தா ந கிலமந்தி. யே ஸந்துட்டா², தே ஸீலங் பூரெந்தா ந கிலமந்தி. யே ஸீலே பதிட்டி²தா ஸத்த ஸெக்கா², தே அரியா மச்சுனோ ஜாலஸங்கா²தங் கிலேஸஜாலங் சி²ந்தி³த்வா க³ச்ச²ந்தி.

Bhāvanāyāti cittavūpasamabhāvanāya. Te chetvā maccuno jālanti ye rattindivaṃ indriyūpasame ratā, te dussamādahaṃ cittaṃ samādahanti. Ye samāhitacittā, te catupaccayasantosaṃ pūrentā na kilamanti. Ye santuṭṭhā, te sīlaṃ pūrentā na kilamanti. Ye sīle patiṭṭhitā satta sekkhā, te ariyā maccuno jālasaṅkhātaṃ kilesajālaṃ chinditvā gacchanti.

து³க்³க³மோதி ஸச்சமேதங், ப⁴ந்தே, யே இந்த்³ரியூபஸமே ரதா, தே து³ஸ்ஸமாத³ஹங் சித்தங் ஸமாத³ஹந்தி. யே ஸமாஹிதசித்தா, தே சதுபச்சயஸந்தோஸங் பூரெந்தா ந கிலமந்தி. யே ஸந்துட்டா², தே ஸீலங் பூரெந்தா ந கிலமந்தி. யே ஸீலே பரமக்³கா³ஹினோ ஸத்த ஸெக்கா², தே அரியா மச்சுனோ ஜாலஸங்கா²தங் கிலேஸஜாலங் சி²ந்தி³த்வா க³ச்ச²ந்தி. கிங் ந க³மிஸ்ஸந்தி, அயங் பன து³க்³க³மோ ‘‘ப⁴க³வா விஸமோ மக்³கோ³’’தி ஆஹ. தத்த² கிஞ்சாபி அரியமக்³கோ³ நேவ து³க்³க³மோ ந விஸமோ, புப்³ப³பா⁴க³படிபதா³ய பனஸ்ஸ ப³ஹூ பரிஸ்ஸயா ஹொந்தி, தஸ்மா ஏவங் வுத்தோ. அவங்ஸிராதி ஞாணஸிரேன அதோ⁴ஸிரா ஹுத்வா பபதந்தி. அரியமக்³க³ங் ஆரோஹிதுங் அஸமத்த²தாய ஏவ தே மக்³கே³ பபதந்தீதி வுச்சந்தி. அரியானங் ஸமோ மக்³கோ³தி ஸ்வேவ மக்³கோ³ அரியானங் ஸமோ ஹோதி. விஸமே ஸமாதி விஸமேபி ஸத்தகாயே ஸமா ஏவ.

Duggamoti saccametaṃ, bhante, ye indriyūpasame ratā, te dussamādahaṃ cittaṃ samādahanti. Ye samāhitacittā, te catupaccayasantosaṃ pūrentā na kilamanti. Ye santuṭṭhā, te sīlaṃ pūrentā na kilamanti. Ye sīle paramaggāhino satta sekkhā, te ariyā maccuno jālasaṅkhātaṃ kilesajālaṃ chinditvā gacchanti. Kiṃ na gamissanti, ayaṃ pana duggamo ‘‘bhagavāvisamo maggo’’ti āha. Tattha kiñcāpi ariyamaggo neva duggamo na visamo, pubbabhāgapaṭipadāya panassa bahū parissayā honti, tasmā evaṃ vutto. Avaṃsirāti ñāṇasirena adhosirā hutvā papatanti. Ariyamaggaṃ ārohituṃ asamatthatāya eva te magge papatantīti vuccanti. Ariyānaṃ samo maggoti sveva maggo ariyānaṃ samo hoti. Visame samāti visamepi sattakāye samā eva.

103.

இத³ஞ்ஹி தங் ஜேதவனந்தி அனாத²பிண்டி³கோ தே³வபுத்தோ ஜேதவனஸ்ஸ சேவ பு³த்³தா⁴தீ³னஞ்ச வண்ணப⁴ணனத்த²ங் ஆக³ந்த்வா ஏவமாஹ. இஸிஸங்க⁴னிஸேவிதந்தி பி⁴க்கு²ஸங்க⁴னிவேஸிதங். ஏவங் பட²மகா³தா²ய ஜேதவனஸ்ஸ வண்ணங் கதெ²த்வா இதா³னி அரியமக்³க³ஸ்ஸ வண்ணங் கதெ²ந்தோ ‘‘கம்மங் விஜ்ஜா’’திஆதி³மாஹ. தத்த² கம்மந்தி மக்³க³சேதனா. விஜ்ஜாதி மக்³க³பஞ்ஞா. த⁴ம்மோதி ஸமாதி⁴, ஸமாதி⁴பக்கி²கா வா த⁴ம்மா. ஸீலங் ஜீவிதமுத்தமந்தி ஸீலே பதிட்டி²தஸ்ஸ ஜீவிதஞ்ச உத்தமந்தி த³ஸ்ஸேதி. அத² வா விஜ்ஜாதி தி³ட்டி²ஸங்கப்பா. த⁴ம்மோதி வாயாமஸதிஸமாத⁴யோ. ஸீலந்தி வாசாகம்மந்தாஜீவா. ஜீவிதமுத்தமந்தி ஏதஸ்மிங் ஸீலே பதிட்டி²தஸ்ஸ ஜீவிதங் நாம உத்தமந்தி. ‘‘ஏதேன மச்சா ஸுஜ்ஜ²ந்தீ’’தி ஏதேன அட்ட²ங்கி³கேன மக்³கே³ன ஸத்தா விஸுஜ்ஜ²ந்தி.

Idañhi taṃ jetavananti anāthapiṇḍiko devaputto jetavanassa ceva buddhādīnañca vaṇṇabhaṇanatthaṃ āgantvā evamāha. Isisaṅghanisevitanti bhikkhusaṅghanivesitaṃ. Evaṃ paṭhamagāthāya jetavanassa vaṇṇaṃ kathetvā idāni ariyamaggassa vaṇṇaṃ kathento ‘‘kammaṃ vijjā’’tiādimāha. Tattha kammanti maggacetanā. Vijjāti maggapaññā. Dhammoti samādhi, samādhipakkhikā vā dhammā. Sīlaṃ jīvitamuttamanti sīle patiṭṭhitassa jīvitañca uttamanti dasseti. Atha vā vijjāti diṭṭhisaṅkappā. Dhammoti vāyāmasatisamādhayo. Sīlanti vācākammantājīvā. Jīvitamuttamanti etasmiṃ sīle patiṭṭhitassa jīvitaṃ nāma uttamanti. ‘‘Etena maccā sujjhantī’’ti etena aṭṭhaṅgikena maggena sattā visujjhanti.

தஸ்மாதி யஸ்மா மக்³கே³ன ஸுஜ்ஜ²ந்தி, ந கொ³த்தத⁴னேஹி, தஸ்மா. யோனிஸோ விசினே த⁴ம்மந்தி உபாயேன போ³தி⁴பக்கி²யத⁴ம்மங் விசினெய்ய. ஏவங் தத்த² விஸுஜ்ஜ²தீதி ஏவங் தஸ்மிங் அரியமக்³கே³ விஸுஜ்ஜ²தி. அத² வா யோனிஸோ விசினே த⁴ம்மந்தி உபாயேன அரியஸச்சத⁴ம்மங் விசினெய்ய. ஏவங் தத்த² விஸுஜ்ஜ²தீதி ஏவங் தேஸு சதூஸு அரியஸச்சேஸு விஸுஜ்ஜ²தி. இதா³னி ஸாரிபுத்தத்தே²ரஸ்ஸ வண்ணங் கதெ²ந்தோ ‘‘ஸாரிபுத்தோவா’’திஆதி³மாஹ. தத்த² ஸாரிபுத்தோவாதி அவதா⁴ரணவசனங், ஏதேஹி பஞ்ஞாதீ³ஹி ஸாரிபுத்தோவ ஸெய்யோதி வத³தி. உபஸமேனாதி கிலேஸவூபஸமேன. பாரங்க³தோதி நிப்³பா³னங் க³தோ, யோ கோசி நிப்³பா³னபத்தோ பி⁴க்கு², ந தாதி³ஸோ. ஏதாவபரமோ ஸியா, ந தே²ரா உத்தரிதரோ நாம ஸாவகோ அத்தீ²தி வத³தி.

Tasmāti yasmā maggena sujjhanti, na gottadhanehi, tasmā. Yoniso vicine dhammanti upāyena bodhipakkhiyadhammaṃ vicineyya. Evaṃ tattha visujjhatīti evaṃ tasmiṃ ariyamagge visujjhati. Atha vā yoniso vicine dhammanti upāyena ariyasaccadhammaṃ vicineyya. Evaṃ tattha visujjhatīti evaṃ tesu catūsu ariyasaccesu visujjhati. Idāni sāriputtattherassa vaṇṇaṃ kathento ‘‘sāriputtovā’’tiādimāha. Tattha sāriputtovāti avadhāraṇavacanaṃ, etehi paññādīhi sāriputtova seyyoti vadati. Upasamenāti kilesavūpasamena. Pāraṅgatoti nibbānaṃ gato, yo koci nibbānapatto bhikkhu, na tādiso. Etāvaparamo siyā, na therā uttaritaro nāma sāvako atthīti vadati.

அதீதந்தி அதீதே பஞ்சக்க²ந்தே⁴. நான்வாக³மெய்யாதி தண்ஹாதி³ட்டீ²ஹி நானுக³ச்செ²ய்ய. நப்படிகங்கே²தி தண்ஹாதி³ட்டீ²ஹி ந பத்தெ²ய்ய. யத³தீதந்தி இத³மெத்த² காரணவசனங். யஸ்மா யங் அதீதங், தங் பஹீனங் நிருத்³த⁴ங் அத்த²ங்க³தங், தஸ்மா தங் நானுக³ச்செ²ய்ய. யஸ்மா ச யங் தத்த² அனாக³தங், தங் அப்பத்தங் அஜாதங் அனிப்³ப³த்தங், தஸ்மா தம்பி ந பத்தெ²ய்ய. தத்த² தத்தா²தி பச்சுப்பன்னம்பி த⁴ம்மங் யத்த² யத்தே²வ ஸோ உப்பன்னோ, தத்த² தத்தே²வ நங் அனிச்சானுபஸ்ஸனாதீ³ஹி ஸத்தஹி அனுபஸ்ஸனாஹி விபஸ்ஸதி, அரஞ்ஞாதீ³ஸு வா தத்த² தத்த² விபஸ்ஸதி. அஸங்ஹீரங் அஸங்குப்பந்தி இத³ங் விபஸ்ஸனாபடிவிபஸ்ஸனாத³ஸ்ஸனத்த²ங் வுத்தங். விபஸ்ஸனா ஹி ராகா³தீ³ஹி ந ஸங்ஹிரதி ந குப்பதீதி அஸங்ஹீரா அஸங்குப்பா, தங் அனுப்³ரூஹயே வட்³டெ⁴ய்ய படிவிபஸ்ஸெய்யாதி வுத்தங் ஹோதி. அத² வா நிப்³பா³னங் ராகா³தீ³ஹி ந ஸங்ஹிரதி ந குப்பதீதி அஸங்ஹீரங் அஸங்குப்பங், தங் வித்³வா பண்டி³தோ பி⁴க்கு² அனுப்³ரூஹயே, புனப்புனங் ததா³ரம்மணங் ப²லஸமாபத்திங் அப்பெந்தோ வட்³டெ⁴ய்யாதி அத்தோ².

Atītanti atīte pañcakkhandhe. Nānvāgameyyāti taṇhādiṭṭhīhi nānugaccheyya. Nappaṭikaṅkheti taṇhādiṭṭhīhi na pattheyya. Yadatītanti idamettha kāraṇavacanaṃ. Yasmā yaṃ atītaṃ, taṃpahīnaṃ niruddhaṃ atthaṅgataṃ, tasmā taṃ nānugaccheyya. Yasmā ca yaṃ tattha anāgataṃ, taṃ appattaṃ ajātaṃ anibbattaṃ, tasmā tampi na pattheyya. Tattha tatthāti paccuppannampi dhammaṃ yattha yattheva so uppanno, tattha tattheva naṃ aniccānupassanādīhi sattahi anupassanāhi vipassati, araññādīsu vā tattha tattha vipassati. Asaṃhīraṃ asaṃkuppanti idaṃ vipassanāpaṭivipassanādassanatthaṃ vuttaṃ. Vipassanā hi rāgādīhi na saṃhirati na kuppatīti asaṃhīrā asaṃkuppā, taṃ anubrūhaye vaḍḍheyya paṭivipasseyyāti vuttaṃ hoti. Atha vā nibbānaṃ rāgādīhi na saṃhirati na kuppatīti asaṃhīraṃ asaṃkuppaṃ, taṃ vidvā paṇḍito bhikkhu anubrūhaye, punappunaṃ tadārammaṇaṃ phalasamāpattiṃ appento vaḍḍheyyāti attho.

தஸ்ஸ பன அனுப்³ரூஹனஸ்ஸ அத்தா²ய அஜ்ஜேவ கிச்சமாதப்பந்தி கிலேஸானங் ஆதாபனபரிதாபனேன ‘‘ஆதப்ப’’ந்தி லத்³த⁴னாமங் வீரியங் அஜ்ஜேவ காதப்³ப³ங். கோ ஜஞ்ஞா மரணங் ஸுவேதி ஸ்வே ஜீவிதங் வா மரணங் வா கோ ஜானாதி. அஜ்ஜேவ தா³னங் த³ஸ்ஸாமி, ஸீலங் வா ரக்கி²ஸ்ஸாமி, அஞ்ஞதரங் வா பன குஸலங் கரிஸ்ஸாமி, ‘‘அஜ்ஜ தாவ பபஞ்சோ அத்தி², ஸ்வே வா புனதி³வஸே வா ஜானிஸ்ஸாமீ’’தி சித்தங் அனுப்பாதெ³த்வா ‘‘அஜ்ஜேவ கரிஸ்ஸாமீ’’தி ஏவங் வீரியங் காதப்³ப³ந்தி த³ஸ்ஸேதி. மஹாஸேனேனாதி அஹிவிச்சி²கவிஸஸத்தா²தீ³னி ஹி அனேகானி மரணகாரணானி தஸ்ஸ ஸேனாதி தாய மஹதியா ஸேனாய வஸேன மஹாஸேனேன ஏவரூபேன மச்சுனா ஸத்³தி⁴ங் ‘‘கதிபாஹங் தாவ ஆக³மேஹி, யாவாஹங் பு³த்³த⁴பூஜாதி³ங் அத்தனோ அவஸ்ஸயங் கம்மங் கரோமீ’’தி ஏவங் மித்தஸந்த²வாகாரஸங்கா²தோ வா ‘‘இத³ங் ஸதங் வா ஸஹஸ்ஸங் வா க³ஹெத்வா கதிபாஹங் ஆக³மேஹீ’’தி ஏவங் லஞ்ஜானுப்பதா³னஸங்கா²தோ வா ‘‘இமினா ப³லராஸினா படிபா³ஹிஸ்ஸாமீ’’தி ஏவங் ப³லராஸிஸங்கா²தோ வா ஸங்க³ரோ நத்தி². ஸங்க³ரோதி ஹி மித்தகரணலஞ்ஜதா³னப³லராஸிஸங்கட்³ட⁴னானங் நாமங், தஸ்மா அயமத்தோ² வுத்தோ. அதந்தி³தந்தி அனலஸங் உட்டா²ஹகங். ஏவங் படிபன்னத்தா ப⁴த்³தோ³ ஏகரத்தோ அஸ்ஸாதி ப⁴த்³தே³கரத்தோ. இதீதி ஏவங் படிபன்னங் புக்³க³லங் ‘‘ப⁴த்³தே³கரத்தோ அய’’ந்தி ராகா³தி³ஸந்ததாய ஸந்தோ பு³த்³த⁴முனி ஆசிக்க²தி.

Tassa pana anubrūhanassa atthāya ajjeva kiccamātappanti kilesānaṃ ātāpanaparitāpanena ‘‘ātappa’’nti laddhanāmaṃ vīriyaṃ ajjeva kātabbaṃ. Ko jaññā maraṇaṃ suveti sve jīvitaṃ vā maraṇaṃ vā ko jānāti. Ajjeva dānaṃ dassāmi, sīlaṃ vā rakkhissāmi, aññataraṃ vā pana kusalaṃ karissāmi, ‘‘ajja tāva papañco atthi, sve vā punadivase vā jānissāmī’’ti cittaṃ anuppādetvā ‘‘ajjeva karissāmī’’ti evaṃ vīriyaṃ kātabbanti dasseti. Mahāsenenāti ahivicchikavisasatthādīni hi anekāni maraṇakāraṇāni tassa senāti tāya mahatiyā senāya vasena mahāsenena evarūpena maccunā saddhiṃ ‘‘katipāhaṃ tāva āgamehi, yāvāhaṃ buddhapūjādiṃ attano avassayaṃ kammaṃ karomī’’ti evaṃ mittasanthavākārasaṅkhāto vā ‘‘idaṃ sataṃ vā sahassaṃ vā gahetvā katipāhaṃ āgamehī’’ti evaṃ lañjānuppadānasaṅkhāto vā ‘‘iminā balarāsinā paṭibāhissāmī’’ti evaṃ balarāsisaṅkhāto vā saṅgaro natthi. Saṅgaroti hi mittakaraṇalañjadānabalarāsisaṅkaḍḍhanānaṃ nāmaṃ, tasmā ayamattho vutto. Atanditanti analasaṃ uṭṭhāhakaṃ. Evaṃ paṭipannattā bhaddo ekaratto assāti bhaddekaratto. Itīti evaṃ paṭipannaṃ puggalaṃ ‘‘bhaddekaratto aya’’nti rāgādisantatāya santo buddhamuni ācikkhati.

சக்கு²னா பஞ்ஞாய சாதி சக்கு²னா ச பஞ்ஞாய ச. சக்கு²பூ⁴தாய வா பஞ்ஞாய. ஸதியா பஞ்ஞாய சாதி ஸதியா ச பஞ்ஞாய ச, ஸதிவிஸிட்டா²ய வா பஞ்ஞாய. காயேனாதி நாமகாயேன.

Cakkhunā paññāya cāti cakkhunā ca paññāya ca. Cakkhubhūtāya vā paññāya. Satiyā paññāya cāti satiyā ca paññāya ca, sativisiṭṭhāya vā paññāya. Kāyenāti nāmakāyena.

தி³ப்³ப³சக்கு² ஸுவிஸுத்³த⁴ந்தி தி³ப்³ப³ங் சக்கு² ஸுவிஸுத்³த⁴ங், யங் ஸச்சி²கரோதீதி அதி⁴ப்பாயோ. புப்³பே³னிவாஸாதி புரிமாஸு ஜாதீஸு நிவுத்த²க்க²ந்தா⁴. இத்³தி⁴விதா⁴தி இத்³தி⁴கொட்டா²ஸா. நிரோதோ⁴தி நிப்³பா³னங். ஸேஸங் ஸுவிஞ்ஞெய்யமேவ.

Dibbacakkhusuvisuddhanti dibbaṃ cakkhu suvisuddhaṃ, yaṃ sacchikarotīti adhippāyo. Pubbenivāsāti purimāsu jātīsu nivutthakkhandhā. Iddhividhāti iddhikoṭṭhāsā. Nirodhoti nibbānaṃ. Sesaṃ suviññeyyameva.

104.

யஸ்ஸ ஸேலூபமங் சித்தந்தி ஏகக⁴னங் ஸேலங் விய பகதிவாதேஹி லோகத⁴ம்மவாதேஹி அகம்பனீயதோ யஸ்ஸ சித்தங் ஸேலூபமங். தேனாஹ – ‘‘டி²தங் நானுபகம்பதீ’’தி. ரஜனீயேஸூதி லாபா⁴தீ³ஸு. கோபனெய்யேதி அலாபா⁴தி³கே. குதோ நங் து³க்க²மெஸ்ஸதீதி தங் ஏவங் பா⁴விதசித்தங் வீதிக்கந்தலோகத⁴ம்மங் உத்தமபுரிஸங் லோகத⁴ம்மஹேதுகங் து³க்க²ங் நானுக³மிஸ்ஸதி.

Yassaselūpamaṃ cittanti ekaghanaṃ selaṃ viya pakativātehi lokadhammavātehi akampanīyato yassa cittaṃ selūpamaṃ. Tenāha – ‘‘ṭhitaṃ nānupakampatī’’ti. Rajanīyesūti lābhādīsu. Kopaneyyeti alābhādike. Kuto naṃ dukkhamessatīti taṃ evaṃ bhāvitacittaṃ vītikkantalokadhammaṃ uttamapurisaṃ lokadhammahetukaṃ dukkhaṃ nānugamissati.

யோ ப்³ராஹ்மணோதி பா³ஹிதபாபத⁴ம்மதாய ப்³ராஹ்மணோ, ந தி³ட்ட²மங்க³லிகதாய ஹுங்ஹுங்காரகஸாவாதி³பாபத⁴ம்மயுத்தோ ஹுத்வா கேவலங் ஜாதிமத்தேன ப்³ராஹ்மணோதி படிஜானாதி. ஸோ ப்³ராஹ்மணோ பா³ஹிதபாபத⁴ம்மத்தா ஹுங்ஹுங்காரப்பஹானேன நிஹுங்ஹுங்கோ. ராகா³தி³கஸாவாபா⁴வேன நிக்கபா⁴வோ. ஸீலஸங்வரேன ஸங்யதசித்ததாய யதத்தோ. சதுமக்³க³ஞாணஸங்கா²தேஹி வேதே³ஹி அந்தங் நிப்³பா³னங், வேதா³னங் வா அந்தங் க³தத்தா வேத³ந்தகூ³. மக்³க³ப்³ரஹ்மசரியஸ்ஸ வுஸிதத்தா வூஸிதப்³ரஹ்மசரியோ. த⁴ம்மேன ஸோ ப்³ரஹ்மவாத³ங் வதெ³ய்யாதி ஸோ ‘‘ப்³ராஹ்மணோ அஹ’’ந்தி ஏதங் வாத³ங் வதெ³ய்ய. யஸ்ஸ ஸகலலோகஸன்னிவாஸே குஹிஞ்சி ஏகாரம்மணேபி ராகு³ஸ்ஸதோ³ தோ³ஸுஸ்ஸதோ³ மோஹுஸ்ஸதோ³ மானுஸ்ஸதோ³ தி³ட்டு²ஸ்ஸதோ³தி இமே உஸ்ஸதா³ நத்தீ²தி அத்தோ².

Yo brāhmaṇoti bāhitapāpadhammatāya brāhmaṇo, na diṭṭhamaṅgalikatāya huṃhuṅkārakasāvādipāpadhammayutto hutvā kevalaṃ jātimattena brāhmaṇoti paṭijānāti. So brāhmaṇo bāhitapāpadhammattā huṃhuṅkārappahānena nihuṃhuṅko. Rāgādikasāvābhāvena nikkabhāvo. Sīlasaṃvarena saṃyatacittatāya yatatto. Catumaggañāṇasaṅkhātehi vedehi antaṃ nibbānaṃ, vedānaṃ vā antaṃ gatattā vedantagū. Maggabrahmacariyassa vusitattā vūsitabrahmacariyo. Dhammena so brahmavādaṃ vadeyyāti so ‘‘brāhmaṇo aha’’nti etaṃ vādaṃ vadeyya. Yassa sakalalokasannivāse kuhiñci ekārammaṇepi rāgussado dosussado mohussado mānussado diṭṭhussadoti ime ussadā natthīti attho.

ந கா³த⁴தீதி ந பதிட்ட²ஹதி. ஸுக்காதி ஸுக்கஸங்கா²தா க³ஹா. யதி³ சந்தி³மஸூரியாதீ³னங் பபா⁴ தத்த² நத்தி², தமோ ஏவ ச ஸியாதி ஆஸங்கமானே ஸந்தா⁴யாஹ ‘‘தமோ தத்த² ந விஜ்ஜதீ’’தி. யதா³ ச அத்தனாவேதீ³திஆதீ³ஸு ஏவங்வித⁴ங் நிப்³பா³னங் அத்தபச்சக்கே²ன ஞாணேன யதா³ விந்த³தி, அத² ரூபாரூபத⁴ம்மதோ ஸுக²து³க்க²தோ ச விப்பமுத்தோ ஹோதீதி.

Na gādhatīti na patiṭṭhahati. Sukkāti sukkasaṅkhātā gahā. Yadi candimasūriyādīnaṃ pabhā tattha natthi, tamo eva ca siyāti āsaṅkamāne sandhāyāha ‘‘tamo tattha na vijjatī’’ti. Yadā ca attanāvedītiādīsu evaṃvidhaṃ nibbānaṃ attapaccakkhena ñāṇena yadā vindati, atha rūpārūpadhammato sukhadukkhato ca vippamutto hotīti.

ஸகேஸு த⁴ம்மேஸூதி ஸகஅத்தபா⁴வஸங்கா²தேஸு உபாதா³னக்க²ந்தே⁴ஸு. யேபு⁴ய்யேன ஹி அஜ்ஜ²த்தங் விபஸ்ஸனாபி⁴னிவேஸோ ஹோதீதி. ஏதங் பிஸாசந்தி அஜகலாபக, ஏதங் தயா வுத்தங் பிஸாசங் கிலேஸபிஸாசஞ்ச. பக்குலந்தி தயா கதங் அக்குலங் பக்குலகரணஞ்ச. அதிவத்ததீதி அதிக்கமதி.

Sakesu dhammesūti sakaattabhāvasaṅkhātesu upādānakkhandhesu. Yebhuyyena hi ajjhattaṃ vipassanābhiniveso hotīti. Etaṃ pisācanti ajakalāpaka, etaṃ tayā vuttaṃ pisācaṃ kilesapisācañca. Pakkulanti tayā kataṃ akkulaṃ pakkulakaraṇañca. Ativattatīti atikkamati.

நாபி⁴னந்த³தி ஆயந்திந்தி புராணது³தியிகங் ஆக³ச்ச²ந்திங் அஞ்ஞங் வா ந அபி⁴னந்த³தி சித்தேன ந ஸம்படிச்ச²தி. தமேவ பக்கமந்திங் ந ஸோசதி. ஸங்கா³ ஸங்கா³மஜிங் முத்தந்தி பஞ்சவிதா⁴பி ஸங்க³தோ முத்தங் ஸங்கா³மஜிங் பி⁴க்கு²ங்.

Nābhinandatiāyantinti purāṇadutiyikaṃ āgacchantiṃ aññaṃ vā na abhinandati cittena na sampaṭicchati. Tameva pakkamantiṃ na socati. Saṅgā saṅgāmajiṃ muttanti pañcavidhāpi saṅgato muttaṃ saṅgāmajiṃ bhikkhuṃ.

ப³ஹ்வெத்தா²தி ப³ஹு எத்த² ந்ஹாயதி ஜனோ, ந தேன ஸோ ஸுத்³தோ⁴ நாம ஹோதீதி அதி⁴ப்பாயோ.

Bahvetthāti bahu ettha nhāyati jano, na tena so suddho nāma hotīti adhippāyo.

ஜாதிப³லங் நிஸேத⁴ந்தி ஜாதிப³லஸ்ஸ நிஸேத⁴கங். ஸஹாயா வதாதி ஸமத²விபஸ்ஸனாபா⁴வனாய ஸஹ அயனவஸேன ஸஹாயா வத. காலேன காலங் ஸப்பாயத⁴ம்மஸ்ஸ ஸவனவஸேன சிரரத்தங் ஸமேதி ஸமாக³மோ ஏதேஸந்தி சிரரத்தஸமேதிகா. ஸிதி²லமாரப்³பா⁴தி ஸிதி²லங் வீரியங் கத்வா.

Jātibalaṃnisedhanti jātibalassa nisedhakaṃ. Sahāyā vatāti samathavipassanābhāvanāya saha ayanavasena sahāyā vata. Kālena kālaṃ sappāyadhammassa savanavasena cirarattaṃ sameti samāgamo etesanti cirarattasametikā. Sithilamārabbhāti sithilaṃ vīriyaṃ katvā.

105.

தத்ர கோ², பி⁴க்க²வே, கோ விஸேஸோதி ஸத்து² ஸாவகஸ்ஸ ச பஞ்சஸ்வேவ உபாதா³னக்க²ந்தே⁴ஸு நிப்³பி³தா³த³யோதி புப்³ப³பா⁴க³படிபத்தியங் அனுபாதா³விமுத்தியஞ்ச ஹெட்டா² உபரி ச விஸேஸாபா⁴வங் த³ஸ்ஸேதி. வுத்தஞ்ஹேதங் – ‘‘நத்தி² விமுத்தியா நானத்த’’ந்தி (அ॰ நி॰ 5.31; கதா²॰ 355 அத்த²தோ ஸமானங்). தத்த² விஸேஸாபா⁴வங் பச்சாமஸதி ‘‘தத்ர கோ விஸேஸோ’’தி. அதி⁴ப்பயாஸோதி அதி⁴கபயோகோ³. நானாகரணந்தி ச விஸேஸோயேவ வுத்தோ.

Tatra kho, bhikkhave, ko visesoti satthu sāvakassa ca pañcasveva upādānakkhandhesu nibbidādayoti pubbabhāgapaṭipattiyaṃ anupādāvimuttiyañca heṭṭhā upari ca visesābhāvaṃ dasseti. Vuttañhetaṃ – ‘‘natthi vimuttiyā nānatta’’nti (a. ni. 5.31; kathā. 355 atthato samānaṃ). Tattha visesābhāvaṃ paccāmasati ‘‘tatra ko viseso’’ti. Adhippayāsoti adhikapayogo. Nānākaraṇanti ca visesoyeva vutto.

அயங் கோ², பி⁴க்க²வே, விஸேஸோதி பி⁴க்க²வே, யதி³பி ஸாவகஸ்ஸ ஸத்து² ச விமுத்தியங் விஸேஸோ நத்தி², ஸயம்பு⁴ஞாணேன பன ஸவாஸனஸப்³ப³கிலேஸே கே²பெத்வா ஸம்மாஸம்போ³தி⁴ங் அபி⁴ஸம்பு³ஜ்ஜி²த்வா அனுப்பன்னஸ்ஸ அரியமக்³க³ஸ்ஸ பரஸந்தானே உப்பாத³னாதி³ஸகலஸப்³ப³ஞ்ஞுகு³ணஸமாயோகோ³. அயங் ஸம்மாஸம்பு³த்³த⁴ஸ்ஸ பஞ்ஞாவிமுத்ததோ விஸேஸோதி. தத்த² அனுப்பன்னஸ்ஸாதி அவத்தமானஸ்ஸ. அரியமக்³க³ஞ்ஹி கஸ்ஸபஸம்மாஸம்பு³த்³தோ⁴ உப்பாதே³ஸி. அந்தரா அஞ்ஞோ ஸத்தா² உப்பாதே³தா நாம நாஹோஸி, தஸ்மா அயங் ப⁴க³வா அனுப்பன்னஸ்ஸ மக்³க³ஸ்ஸ உப்பாதே³தா நாம. அஸஞ்ஜாதஸ்ஸாதி தஸ்ஸேவ வேவசனங். அனக்கா²தஸ்ஸாதி அகதி²தஸ்ஸ. மக்³க³ங் ஜானாதீதி மக்³க³ஞ்ஞூ. மக்³க³ங் விதி³தங் பாகடங் அகாஸீதி மக்³க³விதூ³. மக்³கே³ ச அமக்³கே³ ச கோவிதோ³தி மக்³க³கோவிதோ³. மக்³கா³னுகா³தி மக்³க³ங் அனுக³ச்ச²ந்தா. பச்சா²ஸமன்னாக³தாதி அஹங் பட²மங் ஸமன்னாக³தோ, ஸாவகா பச்சா² ஸமன்னாக³தா.

Ayaṃ kho, bhikkhave, visesoti bhikkhave, yadipi sāvakassa satthu ca vimuttiyaṃ viseso natthi, sayambhuñāṇena pana savāsanasabbakilese khepetvā sammāsambodhiṃ abhisambujjhitvā anuppannassa ariyamaggassa parasantāne uppādanādisakalasabbaññuguṇasamāyogo. Ayaṃ sammāsambuddhassa paññāvimuttato visesoti. Tattha anuppannassāti avattamānassa. Ariyamaggañhi kassapasammāsambuddho uppādesi. Antarā añño satthā uppādetā nāma nāhosi, tasmā ayaṃ bhagavā anuppannassa maggassa uppādetā nāma. Asañjātassāti tasseva vevacanaṃ. Anakkhātassāti akathitassa. Maggaṃ jānātīti maggaññū. Maggaṃ viditaṃ pākaṭaṃ akāsīti maggavidū. Magge ca amagge ca kovidoti maggakovido. Maggānugāti maggaṃ anugacchantā. Pacchāsamannāgatāti ahaṃ paṭhamaṃ samannāgato, sāvakā pacchā samannāgatā.

106.

‘‘நீசே குலே பச்சாஜாதோ’’திஆதி³னா (அ॰ நி॰ 4.85; பு॰ ப॰ 168) தமேன யுத்தோதி தமோ. காயது³ச்சரிதாதீ³ஹி புன நிரயதமுபக³மனதோ தமபராயணோ. இதி உப⁴யேனபி க²ந்த⁴தமோவ கதி²தோ ஹோதி. ‘‘அட்³டே⁴ குலே பச்சாஜாதோ’’திஆதி³னா (அ॰ நி॰ 4.85; பு॰ ப॰ 168) ஜோதினா யுத்தோதி ஜோதி, ஆலோகபூ⁴தோதி வுத்தங் ஹோதி. காயஸுசரிதாதீ³ஹி புன ஸக்³கூ³பபத்திப⁴வூபக³மனதோ ஜோதிபராயணோ. இமினா நயேன இதரேபி த்³வே வேதி³தப்³பா³.

‘‘Nīce kule paccājāto’’tiādinā (a. ni. 4.85; pu. pa. 168) tamena yuttoti tamo. Kāyaduccaritādīhi puna nirayatamupagamanato tamaparāyaṇo. Iti ubhayenapi khandhatamova kathito hoti. ‘‘Aḍḍhe kule paccājāto’’tiādinā (a. ni. 4.85; pu. pa. 168) jotinā yuttoti joti, ālokabhūtoti vuttaṃ hoti. Kāyasucaritādīhi puna saggūpapattibhavūpagamanato jotiparāyaṇo. Iminā nayena itarepi dve veditabbā.

ந தங் த³ள்ஹங் ப³ந்த⁴னமாஹு தீ⁴ராதி எத்த² தீ⁴ராதி பு³த்³தா⁴த³யோ பண்டி³தபுரிஸா. யங் ஸங்க²லிகஸங்கா²தங் அயேன நிப்³ப³த்தங் ஆயஸங் அத்³து³ப³ந்த⁴னஸங்கா²தங் தா³ருமயஞ்ச பப்³ப³ஜதிணேஹி ரஜ்ஜுங் கத்வா கதரஜ்ஜுப³ந்த⁴னஞ்ச, தங் அஸிஆதீ³ஹி சி²ந்தி³துங் ஸக்குணெய்யதாய ‘‘தி²ர’’ந்தி ந வத³ந்தீதி அத்தோ². ஸாரத்தரத்தாதி ரத்தா ஹுத்வா ரத்தா. ப³லவராக³ரத்தாதி அத்தோ². மணிகுண்ட³லேஸூதி மணீஸு ச குண்ட³லேஸு ச, மணிசித்தேஸு வா குண்ட³லேஸு. ஏதங் த³ள்ஹந்தி யே மணிகுண்ட³லேஸு ஸாரத்தரத்தா, தேஸு யோ ராகோ³, யா ச புத்ததா³ரேஸு அபெக்கா² தண்ஹா, ஏதங் கிலேஸமயங் ப³ந்த⁴னங் பண்டி³தபுரிஸா ‘‘த³ள்ஹ’’ந்தி வத³ந்தி.

Na taṃ daḷhaṃ bandhanamāhu dhīrāti ettha dhīrāti buddhādayo paṇḍitapurisā. Yaṃ saṅkhalikasaṅkhātaṃ ayena nibbattaṃ āyasaṃ addubandhanasaṅkhātaṃ dārumayañca pabbajatiṇehi rajjuṃ katvā katarajjubandhanañca, taṃ asiādīhi chindituṃ sakkuṇeyyatāya ‘‘thira’’nti na vadantīti attho. Sārattarattāti rattā hutvā rattā. Balavarāgarattāti attho. Maṇikuṇḍalesūti maṇīsu ca kuṇḍalesu ca, maṇicittesu vā kuṇḍalesu. Etaṃ daḷhanti ye maṇikuṇḍalesu sārattarattā, tesu yo rāgo, yā ca puttadāresu apekkhā taṇhā, etaṃ kilesamayaṃ bandhanaṃ paṇḍitapurisā ‘‘daḷha’’nti vadanti.

ஓஹாரினந்தி ஆகட்³டி⁴த்வா சதூஸு அபாயேஸு பாதனதோ அவஹரதி ஹெட்டா² ஹரதீதி ஓஹாரினங். ஸிதி²லந்தி ப³ந்த⁴னட்டா²னே ச²விஆதீ³னி அகோபெத்வா ப³ந்த⁴னபா⁴வம்பி அஜானாபெத்வா ஜலபத²த²லபதா²தீ³ஸு கம்மங் காதுங் தே³தீதி ஸிதி²லங். து³ப்பமுஞ்சந்தி லோப⁴வஸேன ஹி ஏகவாரம்பி உப்பன்னங் கிலேஸப³ந்த⁴னங் த³ட்ட²ட்டா²னதோ கச்ச²போ விய து³ம்மோசயங் ஹோதீதி து³ப்பமுஞ்சங். ஏதம்பி செ²த்வானாதி ஏதங் த³ள்ஹம்பி கிலேஸப³ந்த⁴னங் ஞாணக²க்³கே³ன சி²ந்தி³த்வா அனபெக்கி²னோ ஹுத்வா காமஸுக²ங் பஹாய பரிப்³ப³ஜந்தி பக்கமந்தி பப்³ப³ஜந்தி சாதி அத்தோ².

Ohārinanti ākaḍḍhitvā catūsu apāyesu pātanato avaharati heṭṭhā haratīti ohārinaṃ. Sithilanti bandhanaṭṭhāne chaviādīni akopetvā bandhanabhāvampi ajānāpetvā jalapathathalapathādīsu kammaṃ kātuṃ detīti sithilaṃ. Duppamuñcanti lobhavasena hi ekavārampi uppannaṃ kilesabandhanaṃ daṭṭhaṭṭhānato kacchapo viya dummocayaṃ hotīti duppamuñcaṃ. Etampi chetvānāti etaṃ daḷhampi kilesabandhanaṃ ñāṇakhaggena chinditvā anapekkhino hutvā kāmasukhaṃ pahāya paribbajanti pakkamanti pabbajanti cāti attho.

107.

சேதேதீதி அகுஸலசேதனாவஸேன சேதேதி. பகப்பேதீதி தமேவ அகுஸலசேதனங் காயவசீகம்மபா⁴வங் பாபனவஸேன கப்பேதி. அனுஸேதீதி ராகா³தி³அனுஸயோவ ஸந்தானே அப்பஹீனபா⁴வேன அனுஸேதி. ஆரம்மணமேதங் ஹோதி விஞ்ஞாணஸ்ஸ டி²தியாதி யதே³தங் சேதனங் பகப்பனங் அனுஸயனஞ்ச, ஏதங் அபி⁴ஸங்கா²ரவிஞ்ஞாணஸ்ஸ டி²தியா பவத்தியா பச்சயோ ஹோதீதி அத்தோ². ஆரம்மணே ஸதி பதிட்டா² விஞ்ஞாணஸ்ஸ ஹோதீதி யதா²வுத்தபச்சயே ஸதி அபி⁴ஸங்கா²ரவிஞ்ஞாணஸ்ஸ கம்மங் ஜவாபெத்வா படிஸந்தி⁴ஆகட்³ட⁴னஸமத்த²தாஸம்பாத³னதோ பதிட்டா² ஹோதி. ஆயதிங் புனப்³ப⁴வாபி⁴னிப்³ப³த்தி ஹோதீதி ஆயதிங் புனப்³ப⁴வஸங்கா²தா விஞ்ஞாணாதீ³னங் அபி⁴னிப்³ப³த்தி ஹோதி.

Cetetīti akusalacetanāvasena ceteti. Pakappetīti tameva akusalacetanaṃ kāyavacīkammabhāvaṃ pāpanavasena kappeti. Anusetīti rāgādianusayova santāne appahīnabhāvena anuseti. Ārammaṇametaṃ hoti viññāṇassa ṭhitiyāti yadetaṃ cetanaṃ pakappanaṃ anusayanañca, etaṃ abhisaṅkhāraviññāṇassa ṭhitiyā pavattiyā paccayo hotīti attho. Ārammaṇe sati patiṭṭhā viññāṇassa hotīti yathāvuttapaccaye sati abhisaṅkhāraviññāṇassa kammaṃ javāpetvā paṭisandhiākaḍḍhanasamatthatāsampādanato patiṭṭhā hoti. Āyatiṃ punabbhavābhinibbatti hotīti āyatiṃ punabbhavasaṅkhātā viññāṇādīnaṃ abhinibbatti hoti.

‘‘நோ சே, பி⁴க்க²வே, சேதேதீ’’திஆதி³னா அகுஸலகம்மமேவ படிக்கி²பதி. அயஞ்ஹெத்த² ஸங்கே²பத்தோ², யதி³பி கதா³சி யோனிஸோமனஸிகாரா அகுஸலசேதனா நப்பவத்ததி, அனுஸயா பன அப்பஹீனாதி, தே குஸலஸ்ஸ அபி⁴ஸங்கா²ரவிஞ்ஞாணஸ்ஸ பதிட்டா² ஹொந்தி யேவாதி. ஸதி ச அபி⁴ஸங்கா²ரவிஞ்ஞாணே ஆயதிங் புனப்³ப⁴வாபி⁴னிப்³ப³த்தி ஹோதீதி வத்துங் வட்டதியேவ. ததியவாரோ வுத்தபடிபக்க²னயேன வேதி³தப்³போ³.

‘‘No ce, bhikkhave, cetetī’’tiādinā akusalakammameva paṭikkhipati. Ayañhettha saṅkhepattho, yadipi kadāci yonisomanasikārā akusalacetanā nappavattati, anusayā pana appahīnāti, te kusalassa abhisaṅkhāraviññāṇassa patiṭṭhā honti yevāti. Sati ca abhisaṅkhāraviññāṇe āyatiṃ punabbhavābhinibbatti hotīti vattuṃ vaṭṭatiyeva. Tatiyavāro vuttapaṭipakkhanayena veditabbo.

108.

‘‘நேஸோ, பி⁴க்க²வே, அரியஸ்ஸ வினயே ஸமுத்³தோ³’’திஆதி³ யதி³ து³ப்பூரணட்டே²ன ஸங்ஸீத³னட்டே²ன து³ரதிக்கமனட்டே²ன ஸாக³ரோ ‘‘ஸமுத்³தோ³’’தி வுச்செய்ய, ததோ ஸதபா⁴கே³னபி ஸஹஸ்ஸபா⁴கே³னபி சக்கு²ஆதீ³ஸ்வேவ அயங் நயோ லப்³ப⁴தீதி த³ஸ்ஸேதுங் வுத்தங். தேனாஹ – ‘‘சக்கு², பி⁴க்க²வே, புரிஸஸ்ஸ ஸமுத்³தோ³, தஸ்ஸ ரூபமயோ வேகோ³’’தி, ரூபேஸு ஸத்தானங் ஆவிஞ்ச²னதோ ரூபாயதனமேவ வேகோ³ சக்கு²ஸ்ஸ வேகோ³தி அத்தோ².

‘‘Neso, bhikkhave, ariyassa vinaye samuddo’’tiādi yadi duppūraṇaṭṭhena saṃsīdanaṭṭhena duratikkamanaṭṭhena sāgaro ‘‘samuddo’’ti vucceyya, tato satabhāgenapi sahassabhāgenapi cakkhuādīsveva ayaṃ nayo labbhatīti dassetuṃ vuttaṃ. Tenāha – ‘‘cakkhu, bhikkhave, purisassa samuddo, tassa rūpamayo vego’’ti, rūpesu sattānaṃ āviñchanato rūpāyatanameva vego cakkhussa vegoti attho.

யோ தங் ரூபமயங் வேக³ங் ஸஹதீதி யோ பி⁴க்கு² ஸஹ விஸயேன சக்கு²ங் அனிச்சதோ து³க்க²தோ அனத்ததோ ஸம்மஸந்தோ தத்த² ச நிப்³பி³ந்த³ந்தோ விரஜ்ஜந்தோ தப்படிப³த்³த⁴தோ கிலேஸஜாலதோ விமுச்சந்தோ அபி⁴ப⁴வதி. அயங் வுச்சதி, பி⁴க்க²வே, அதரி சக்கு²ஸமுத்³த³ந்தி அயங் பி⁴க்கு² சக்கு²ஸங்கா²தங் ஸமுத்³த³ங் திண்ணோதி வுச்சதி.

Yo taṃ rūpamayaṃ vegaṃ sahatīti yo bhikkhu saha visayena cakkhuṃ aniccato dukkhato anattato sammasanto tattha ca nibbindanto virajjanto tappaṭibaddhato kilesajālato vimuccanto abhibhavati. Ayaṃ vuccati, bhikkhave, atari cakkhusamuddanti ayaṃ bhikkhu cakkhusaṅkhātaṃ samuddaṃ tiṇṇoti vuccati.

அபரோ நயோ – சக்கு², பி⁴க்க²வே, அரியஸ்ஸ வினயே ஸமுத்³தோ³தி யதி³பி து³ப்பூரணட்டே²ன யதி³ வா ஸமுத³னட்டே²ன ஸமுத்³தோ³, சக்கு²மேவ ஸமுத்³தோ³. தஸ்ஸ ஹி பத²விதோ யாவ அகனிட்ட²ப்³ரஹ்மலோகா நீலாதி³ஆரம்மணங் ஸமோஸரந்தங் பரிபுண்ணபா⁴வங் காதுங் ந ஸக்கோதி. ஏவங் து³ப்பூரணட்டே²னபி ஸமுத்³தோ³. சக்கு² ச தேஸு தேஸு நீலாதி³ஆரம்மணேஸு ஸமுதே³தி அஸங்வுதங் ஹுத்வா ஓஸரமானங் கிலேஸுப்பத்தியா காரணபா⁴வேன ஸதோ³ஸபா⁴வேன க³ச்ச²தீதி ஸமுத³னட்டே²னபி ஸமுத்³தோ³. ததா² சக்கு²ங் தண்ஹாஸோதாதீ³னங் உப்பத்தித்³வாரதாய தேஹி ஸந்தானஸ்ஸ ஸமுத³னட்டே²ன தேமனட்டே²ன ஸமுத்³தோ³. தஸ்ஸ ரூபமயோ வேகோ³தி ஸமுத்³த³ஸ்ஸ அப்பமாணோ ஊமிமயோ வேகோ³ விய தஸ்ஸாபி சக்கு²ஸமுத்³த³ஸ்ஸ ஸமோஸரந்தஸ்ஸ நீலாதி³பே⁴த³ஸ்ஸ ஆரம்மணஸ்ஸ வஸேன அப்பமெய்யோ ரூபமயோ வேகோ³ வேதி³தப்³போ³. யோ தங் ரூபமயங் வேக³ங் ஸஹதீதி யோ தங் சக்கு²ஸமுத்³தே³ ஸமோஸரந்தங் ரூபமயங் வேக³ங் மனாபே ரூபே ராக³ங், அமனாபே தோ³ஸங், அஸமபெக்க²னே மோஹந்தி ஏவங் ராகா³தி³கிலேஸே அனுப்பாதெ³ந்தோ உபெக்க²கபா⁴வேன ஸஹதி.

Aparo nayo – cakkhu, bhikkhave, ariyassa vinaye samuddoti yadipi duppūraṇaṭṭhena yadi vā samudanaṭṭhena samuddo, cakkhumeva samuddo. Tassa hi pathavito yāva akaniṭṭhabrahmalokā nīlādiārammaṇaṃ samosarantaṃ paripuṇṇabhāvaṃ kātuṃ na sakkoti. Evaṃ duppūraṇaṭṭhenapi samuddo. Cakkhu ca tesu tesu nīlādiārammaṇesu samudeti asaṃvutaṃ hutvā osaramānaṃ kilesuppattiyā kāraṇabhāvena sadosabhāvena gacchatīti samudanaṭṭhenapi samuddo. Tathā cakkhuṃ taṇhāsotādīnaṃ uppattidvāratāya tehi santānassa samudanaṭṭhena temanaṭṭhena samuddo. Tassa rūpamayo vegoti samuddassa appamāṇo ūmimayo vego viya tassāpi cakkhusamuddassa samosarantassa nīlādibhedassa ārammaṇassa vasena appameyyo rūpamayo vego veditabbo. Yo taṃ rūpamayaṃ vegaṃ sahatīti yo taṃ cakkhusamudde samosarantaṃ rūpamayaṃ vegaṃ manāpe rūpe rāgaṃ, amanāpe dosaṃ, asamapekkhane mohanti evaṃ rāgādikilese anuppādento upekkhakabhāvena sahati.

ஸஊமிந்திஆதீ³ஸு கிலேஸஊமீஹி ஸஊமிங். கிலேஸவட்டேஹி ஸாவட்டங். கிலேஸக³ஹேஹி ஸக³ஹங். கிலேஸரக்க²ஸேஹி ஸரக்க²ஸங். கோது⁴பாயாஸஸ்ஸ வா வஸேன ஸஊமிங். காமகு³ணவஸேன ஸாவட்டங். மாதுகா³மவஸேன ஸக³ஹங் ஸரக்க²ஸங். வுத்தஞ்ஹேதங் – ‘‘ஊமிப⁴யந்தி கோ², பி⁴க்க²வே, கோது⁴பாயாஸஸ்ஸேதங் அதி⁴வசனங் (இதிவு॰ 109; ம॰ நி॰ 2.162; அ॰ நி॰ 4.122). ததா² ஆவட்டந்தி கோ², பி⁴க்க²வே, பஞ்சன்னேதங் காமகு³ணானங் அதி⁴வசனங் (இதிவு॰ 109; ம॰ நி॰ 2.164; அ॰ நி॰ 4.122). க³ஹரக்க²ஸோதி கோ², பி⁴க்க²வே, மாதுகா³மஸ்ஸேதங் அதி⁴வசன’’ந்தி (இதிவு॰ 109). ஸேஸத்³வாரேஸுபி ஏஸேவ நயோ.

Saūmintiādīsu kilesaūmīhi saūmiṃ. Kilesavaṭṭehi sāvaṭṭaṃ. Kilesagahehi sagahaṃ. Kilesarakkhasehi sarakkhasaṃ. Kodhupāyāsassa vā vasena saūmiṃ. Kāmaguṇavasena sāvaṭṭaṃ. Mātugāmavasena sagahaṃ sarakkhasaṃ. Vuttañhetaṃ – ‘‘ūmibhayanti kho, bhikkhave, kodhupāyāsassetaṃ adhivacanaṃ (itivu. 109; ma. ni. 2.162; a. ni. 4.122). Tathā āvaṭṭanti kho, bhikkhave, pañcannetaṃ kāmaguṇānaṃ adhivacanaṃ (itivu. 109; ma. ni. 2.164; a. ni. 4.122). Gaharakkhasoti kho, bhikkhave, mātugāmassetaṃ adhivacana’’nti (itivu. 109). Sesadvāresupi eseva nayo.

ஸஊமிப⁴யங் து³த்தரங் அச்சதரீதி அனிச்சதாதி³ஊமிப⁴யேன ஸப⁴யங் து³ரதிக்கமங் அதிக்கமி. லோகந்தகூ³தி ஸங்ஸாரலோகஸ்ஸ அந்தங் க³தோ. பாரக³தோதி வுச்சதீதி நிப்³பா³னங் க³தோதி கதீ²யதி.

Saūmibhayaṃduttaraṃ accatarīti aniccatādiūmibhayena sabhayaṃ duratikkamaṃ atikkami. Lokantagūti saṃsāralokassa antaṃ gato. Pāragatoti vuccatīti nibbānaṃ gatoti kathīyati.

ப³ளிஸாதி ஸத்தானங் அனத்த²ஹேதுதாய ப³ளிஸா விய ப³ளிஸா. அனயாயாதி அனத்தா²ய. ப்³யாபா³தா⁴யாதி து³க்கா²ய. இட்டா²தி பரியிட்டா² வா அபரியிட்டா² வா ஸுகா²ரம்மணதாய இட்டா². காமனீயட்டே²ன கந்தா. மனஸ்ஸ வட்³ட⁴னட்டே²ன மனாபா. பியஸபா⁴வதாய பியரூபா. கிலேஸகாமஸஹிதத்தா காமூபஸங்ஹிதா. ராக³ஜனநட்டே²ன சித்தஸ்ஸ ரஞ்ஜனதோ ரஜனீயா. தஞ்சேதி தங் ரூபாரம்மணங், நீலாதி³வஸேன அனேகபே⁴த³பி⁴ன்னம்பி ஹி ரூபாயதனங் ரூபாரம்மணபா⁴வேன சக்கு²விஞ்ஞெய்யபா⁴வேன ச ஏகவித⁴தங் நாதிவத்ததீதி தங்ஸபா⁴வஸாமஞ்ஞங் க³ஹெத்வா ‘‘தஞ்சே’’தி வுத்தங். அபி⁴னந்த³தீதி அபி⁴னந்த³னபூ⁴தாய ஸப்பீதிகதண்ஹாய அபி⁴முகோ² நந்த³தி. அபி⁴வத³தீதி ‘‘அஹோ ஸுக²ங், அஹோ ஸுக²’’ந்தி வதா³பெந்தியா தண்ஹாயனவஸேன அபி⁴வத³தி. அஜ்ஜோ²ஸாய திட்ட²தீதி கி³லித்வா பரினிட்ட²பெத்வா திட்ட²தி. அயங் வுச்சதி, பி⁴க்க²வே, பி⁴க்கு² கி³லிதப³ளிஸோ மாரஸ்ஸாதி அயங், பி⁴க்கு², கிலேஸமாரஸ்ஸ ப³ளிஸபூ⁴தங் ரூபதண்ஹங் கி³லித்வா டி²தோதி வுச்சதி. ஸேஸவாரேஸுபி இமினா நயேன அத்தோ² வேதி³தப்³போ³. அபே⁴தீ³தி பி⁴ந்தி³. பரிபே⁴தீ³தி ஸப்³ப³பா⁴கே³ன பி⁴ந்தி³. ஸேஸங் உத்தானமேவ.

Baḷisāti sattānaṃ anatthahetutāya baḷisā viya baḷisā. Anayāyāti anatthāya. Byābādhāyāti dukkhāya. Iṭṭhāti pariyiṭṭhā vā apariyiṭṭhā vā sukhārammaṇatāya iṭṭhā. Kāmanīyaṭṭhena kantā. Manassa vaḍḍhanaṭṭhena manāpā. Piyasabhāvatāya piyarūpā. Kilesakāmasahitattā kāmūpasaṃhitā. Rāgajananaṭṭhena cittassa rañjanato rajanīyā. Tañceti taṃ rūpārammaṇaṃ, nīlādivasena anekabhedabhinnampi hi rūpāyatanaṃ rūpārammaṇabhāvena cakkhuviññeyyabhāvena ca ekavidhataṃ nātivattatīti taṃsabhāvasāmaññaṃ gahetvā ‘‘tañce’’ti vuttaṃ. Abhinandatīti abhinandanabhūtāya sappītikataṇhāya abhimukho nandati. Abhivadatīti ‘‘aho sukhaṃ, aho sukha’’nti vadāpentiyā taṇhāyanavasena abhivadati. Ajjhosāya tiṭṭhatīti gilitvā pariniṭṭhapetvā tiṭṭhati. Ayaṃ vuccati, bhikkhave, bhikkhu gilitabaḷiso mārassāti ayaṃ, bhikkhu, kilesamārassa baḷisabhūtaṃ rūpataṇhaṃ gilitvā ṭhitoti vuccati. Sesavāresupi iminā nayena attho veditabbo. Abhedīti bhindi. Paribhedīti sabbabhāgena bhindi. Sesaṃ uttānameva.

109.

அயங் லோகோ ஸந்தாபஜாதோதி அயங் ஸத்தலோகோ ஜாதஸந்தாபோ ஞாதிப்³யஸனாதி³வஸேன உப்பன்னஸோகஸந்தாபோ ச ராகா³தி³வஸேன உப்பன்னபரிளாஹஸந்தாபோ சாதி அத்தோ². ப²ஸ்ஸபரேதோதி அனேகேஹி து³க்க²ப²ஸ்ஸேஹி அபி⁴பூ⁴தோ. ரோத³ங் வத³தி அத்ததோதி தங் தங் அத்தனா பு²ட்ட²ங் து³க்க²ங் அபா⁴விதகாயதாய அதி⁴வாஸேதுங் அஸக்கொந்தோ ‘‘அஹோ து³க்க²ங், ஈதி³ஸங் து³க்க²ங் மய்ஹங் ஸத்துனோபி மா ஹோதூ’’திஆதி³னா விலபந்தோ வத³தி. கஸ்மா? யேன யேன ஹி மஞ்ஞந்தி, ததோ தங் ஹோதி அஞ்ஞதா², யஸ்மா ஏதே ஸத்தா யேன யேன பகாரேன அத்தனோ து³க்க²ஸ்ஸ படிகாரங் மஞ்ஞந்தி ஆஸீஸந்தி, தங் து³க்க²ங் ததோ அஞ்ஞேன பகாரேன திகிச்சி²தப்³ப³ங் ஹோதி. யேன வா பகாரேன அத்தனோ வட்³டி⁴ங் மஞ்ஞந்தி, ததோ அஞ்ஞதா² அவட்³டி⁴ ஏவ பன ஹோதி. ஏவங் அஞ்ஞதா²பா⁴விதங் இச்சா²விகா⁴தங் ஏவ பாபுணாதி. அயங் ப⁴வஸத்தோ காமாதி³ப⁴வேஸு ஸத்தோ ஸத்தலோகோ, ததா²பி ப⁴வமேவாபி⁴னந்த³தி, ந தத்த² நிப்³பி³ந்த³தி. யத³பி⁴னந்த³தி தங் ப⁴யந்தி யங் காமாதி³ப⁴வங் அபி⁴னந்த³தி, தங் ஜராமரணாதி³அனேகப்³யஸனானுப³ந்த⁴த்தா அதிவிய ப⁴யானகட்டே²ன ப⁴யங். யஸ்ஸ பா⁴யதீதி யதோ ஜராமரணாதி³தோ பா⁴யதி, தங் து³க்க²ஸ்ஸ அதி⁴ட்டா²னபா⁴வதோ து³க்க²து³க்க²தாய ச து³க்க²ந்தி.

Ayaṃ loko santāpajātoti ayaṃ sattaloko jātasantāpo ñātibyasanādivasena uppannasokasantāpo ca rāgādivasena uppannapariḷāhasantāpo cāti attho. Phassaparetoti anekehi dukkhaphassehi abhibhūto. Rodaṃ vadati attatoti taṃ taṃ attanā phuṭṭhaṃ dukkhaṃ abhāvitakāyatāya adhivāsetuṃ asakkonto ‘‘aho dukkhaṃ, īdisaṃ dukkhaṃ mayhaṃ sattunopi mā hotū’’tiādinā vilapanto vadati. Kasmā? Yena yena hi maññanti, tato taṃ hoti aññathā, yasmā ete sattā yena yena pakārena attano dukkhassa paṭikāraṃ maññanti āsīsanti, taṃ dukkhaṃ tato aññena pakārena tikicchitabbaṃ hoti. Yena vā pakārena attano vaḍḍhiṃ maññanti, tato aññathā avaḍḍhi eva pana hoti. Evaṃ aññathābhāvitaṃ icchāvighātaṃ eva pāpuṇāti. Ayaṃ bhavasatto kāmādibhavesu satto sattaloko, tathāpi bhavamevābhinandati, na tattha nibbindati. Yadabhinandati taṃ bhayanti yaṃ kāmādibhavaṃ abhinandati, taṃ jarāmaraṇādianekabyasanānubandhattā ativiya bhayānakaṭṭhena bhayaṃ. Yassa bhāyatīti yato jarāmaraṇādito bhāyati, taṃ dukkhassa adhiṭṭhānabhāvato dukkhadukkhatāya ca dukkhanti.

ப⁴வவிப்பஹானாயாதி ப⁴வஸ்ஸ பஜஹனத்தா²ய. கோ²தி அவதா⁴ரணத்தே² நிபாதோ. இத³ங் வுத்தங் ஹோதி – ஏகந்தேனேவ காமாதி³ப⁴வஸ்ஸ ஸமுத³யப்பஹானேன பஹானத்த²ங் இத³ங் மயா அதி⁴க³தங் மக்³க³ப்³ரஹ்மசரியங் வுஸ்ஸதீதி.

Bhavavippahānāyāti bhavassa pajahanatthāya. Khoti avadhāraṇatthe nipāto. Idaṃ vuttaṃ hoti – ekanteneva kāmādibhavassa samudayappahānena pahānatthaṃ idaṃ mayā adhigataṃ maggabrahmacariyaṃ vussatīti.

ஏவங் அரியஸ்ஸ மக்³க³ஸ்ஸ ஏகங்ஸேனேவ நிய்யானிகபா⁴வங் த³ஸ்ஸெத்வா இதா³னி அஞ்ஞமக்³க³ஸ்ஸ நிய்யானிகபா⁴வங் படிக்கி²பந்தோ ‘‘யே ஹி கேசீ’’திஆதி³மாஹ. தத்த² ப⁴வேனாதி ரூபப⁴வேன வா அரூபப⁴வேன வா. ப⁴வஸ்ஸாதி ஸங்ஸாரஸ்ஸ. விப்பமொக்க²ந்தி ப⁴வதோ விமுத்திங், ஸங்ஸாரஸுத்³தி⁴ந்தி அத்தோ². கிஞ்சாபி தே ஸமணப்³ராஹ்மணா தத்த² நிப்³பா³னஸஞ்ஞினோ, ப⁴வகா³மிகம்மேன பன ரூபாரூபஜ்ஜா²னேன , தங்னிப்³ப³த்தேன ச உபபத்திப⁴வேன ப⁴வவிஸுத்³தி⁴ங் வத³ந்தா ப⁴வேன ப⁴வவிப்பமொக்க²ங் வத³ந்தி நாம. தேனாஹ – ‘‘ஸப்³பே³ தே அவிப்பமுத்தா ப⁴வஸ்மாதி வதா³மீ’’தி. அத² வா ப⁴வேனாதி ப⁴வதி³ட்டி²யா, ப⁴வதி திட்ட²தி ஸஸ்ஸதந்தி ஹி பவத்தனதோ ஸஸ்ஸததி³ட்டி² ‘‘ப⁴வதி³ட்டீ²’’தி வுச்சதி. ப⁴வதி³ட்டி² ஏவ உத்தரபத³லோபேன ‘‘ப⁴வோ’’தி வுத்தா ப⁴வதண்ஹாதிஆதீ³ஸு விய. ப⁴வதி³ட்டி²வஸேன ஹி இதே⁴கச்சே ப⁴வவிஸேஸங்யேவ ப⁴வவிப்பமொக்க²ங் மஞ்ஞந்தி. யதா² தங் ப³கோ ப்³ரஹ்மா ஆஹ – ‘‘இத³ங் நிச்சங், இத³ங் து⁴வங், இத³ங் ஸஸ்ஸதங், இத³ங் அவிபரிணாமத⁴ம்ம’’ந்தி (ம॰ நி॰ 1.501; ஸங்॰ நி॰ 1.175). விப⁴வேனாதி உச்சே²த³தி³ட்டி²யா. விப⁴வதி வினஸ்ஸதி உச்சி²ஜ்ஜதீதி ஹி பவத்தனதோ உச்சே²த³தி³ட்டி² வுத்தனயேன ‘‘விப⁴வோ’’தி வுச்சதி. ப⁴வஸ்ஸ நிஸ்ஸரணமாஹங்ஸூதி ஸங்ஸாரஸுத்³தி⁴ங் வதி³ங்ஸு. உச்சே²த³தி³ட்டி²வஸேன ஹி இதே⁴கச்சே ஸங்ஸாரஸுத்³தி⁴ங் வத³ந்தி. ததா² ஹி வுத்தங் –

Evaṃ ariyassa maggassa ekaṃseneva niyyānikabhāvaṃ dassetvā idāni aññamaggassa niyyānikabhāvaṃ paṭikkhipanto ‘‘ye hi kecī’’tiādimāha. Tattha bhavenāti rūpabhavena vā arūpabhavena vā. Bhavassāti saṃsārassa. Vippamokkhanti bhavato vimuttiṃ, saṃsārasuddhinti attho. Kiñcāpi te samaṇabrāhmaṇā tattha nibbānasaññino, bhavagāmikammena pana rūpārūpajjhānena , taṃnibbattena ca upapattibhavena bhavavisuddhiṃ vadantā bhavena bhavavippamokkhaṃ vadanti nāma. Tenāha – ‘‘sabbe te avippamuttā bhavasmāti vadāmī’’ti. Atha vā bhavenāti bhavadiṭṭhiyā, bhavati tiṭṭhati sassatanti hi pavattanato sassatadiṭṭhi ‘‘bhavadiṭṭhī’’ti vuccati. Bhavadiṭṭhi eva uttarapadalopena ‘‘bhavo’’ti vuttā bhavataṇhātiādīsu viya. Bhavadiṭṭhivasena hi idhekacce bhavavisesaṃyeva bhavavippamokkhaṃ maññanti. Yathā taṃ bako brahmā āha – ‘‘idaṃ niccaṃ, idaṃ dhuvaṃ, idaṃ sassataṃ, idaṃ avipariṇāmadhamma’’nti (ma. ni. 1.501; saṃ. ni. 1.175). Vibhavenāti ucchedadiṭṭhiyā. Vibhavati vinassati ucchijjatīti hi pavattanato ucchedadiṭṭhi vuttanayena ‘‘vibhavo’’ti vuccati. Bhavassa nissaraṇamāhaṃsūti saṃsārasuddhiṃ vadiṃsu. Ucchedadiṭṭhivasena hi idhekacce saṃsārasuddhiṃ vadanti. Tathā hi vuttaṃ –

‘‘யதோ கோ², போ⁴, அயங் அத்தா ரூபீ சாதுமஹாபூ⁴திகோ…பே॰… நேவஸஞ்ஞானாஸஞ்ஞாயதனங் உபஸம்பஜ்ஜ விஹரதி. எத்தாவதா கோ², போ⁴, அயங் அத்தா ஸம்மா ஸமுச்சி²ன்னோ ஹோதீ’’தி (தீ³॰ நி॰ 1.91).

‘‘Yato kho, bho, ayaṃ attā rūpī cātumahābhūtiko…pe… nevasaññānāsaññāyatanaṃ upasampajja viharati. Ettāvatā kho, bho, ayaṃ attā sammā samucchinno hotī’’ti (dī. ni. 1.91).

அனிஸ்ஸடாதி அனிக்க²ந்தா. தத்த² காரணமாஹ – ‘‘உபதி⁴ஞ்ஹி படிச்ச து³க்க²மித³ங் ஸம்போ⁴தீ’’தி. தத்த² உபதி⁴ந்தி க²ந்தா⁴தி³உபதி⁴ங். கிங் வுத்தங் ஹோதி? யத்த² இமே தி³ட்டி²க³திகா நிப்³பா³னஸஞ்ஞினோ, தத்த² க²ந்தூ⁴பதி⁴கிலேஸூபதி⁴அபி⁴ஸங்கா²ரூபத⁴யோ அதி⁴க³தா ஞாதா. குதோ தஸ்ஸ து³க்க²னிஸ்ஸரணதாதி. யங் பன பரமத்த²தோ து³க்க²னிஸ்ஸரணங், தங் த³ஸ்ஸேதுங் ‘‘ஸப்³பு³பாதா³னக்க²யா நத்தி² து³க்க²ஸ்ஸ ஸம்ப⁴வோ’’தி வுத்தங்.

Anissaṭāti anikkhantā. Tattha kāraṇamāha – ‘‘upadhiñhi paṭicca dukkhamidaṃ sambhotī’’ti. Tattha upadhinti khandhādiupadhiṃ. Kiṃ vuttaṃ hoti? Yattha ime diṭṭhigatikā nibbānasaññino, tattha khandhūpadhikilesūpadhiabhisaṅkhārūpadhayo adhigatā ñātā. Kuto tassa dukkhanissaraṇatāti. Yaṃ pana paramatthato dukkhanissaraṇaṃ, taṃ dassetuṃ ‘‘sabbupādānakkhayā natthi dukkhassa sambhavo’’ti vuttaṃ.

லோகமிமங் பஸ்ஸாதி ப⁴க³வா அத்தனோ சித்தங் ஆலபதி. புதூ²தி விஸுங் விஸுங். அவிஜ்ஜாய பரேதந்தி மோஹேன அபி⁴பூ⁴தங். பூ⁴தந்தி க²ந்த⁴பஞ்சகங். பூ⁴தரதந்தி இத்தீ² புரிஸே, புரிஸோ இத்தி²யாதி ஏவங் அஞ்ஞமஞ்ஞங் ஸத்தேஸு ரதங், ததோ ஏவ ப⁴வா அபரிமுத்தா. யே ஹி கேசி ப⁴வாதி இத்தரக²ணா வா தீ³கா⁴யுகா வா ஸாதவந்தோ வா அஸாதவந்தோ வா ப⁴வா. ஸப்³ப³தீ⁴தி உத்³த⁴ங் அதோ⁴ திரியந்தி ஸப்³ப³த்த². ஸப்³ப³த்த²தாயாதி ஸப்³ப³பா⁴வேன. ஸப்³பே³ தே ப⁴வாதிஆதீ³ஸு ‘‘ஸப்³பே³பி ப⁴வா அனிச்சா’’திஆதி³னா விபஸ்ஸனாஸஹிதாய மக்³க³பஞ்ஞாய அவிபரீதங் பஸ்ஸதோ ப⁴வதண்ஹாபி பஹீயதி நிருஜ்ஜ²தி, விப⁴வங் உச்சே²த³ம்பி நாபி⁴னந்த³தி ந பத்தே²தி, தஸ்ஸ ஸப்³ப³ தண்ஹானங் அனவஸேஸதோ மக்³கே³ன நிருஜ்ஜ²னதோ நிப்³பா³னங் நிப்³பு³தி ஹோதி. தஸ்ஸ ஏவங் நிப்³பு³தஸ்ஸ பி⁴க்கு²னோ அனுபாதா³ கிலேஸாபி⁴ஸங்கா²ரானங் அனுபாதா³னதோ அக்³க³ஹணதோ புனப்³ப⁴வோ ந ஹோதி. ஏவங்பூ⁴தேன ச அபி⁴பூ⁴தோ பஞ்சவிதோ⁴பி மாரோ விஜிதோ அஸ்ஸ அனேன மாரேன ஸங்கா³மோ, ஸப்³பே³பி ப⁴வே ஸமதிக்கந்தோ இட்டா²னிட்டா²தீ³ஸு தாதி³லக்க²ணப்பத்தோதி.

Lokamimaṃ passāti bhagavā attano cittaṃ ālapati. Puthūti visuṃ visuṃ. Avijjāya paretanti mohena abhibhūtaṃ. Bhūtanti khandhapañcakaṃ. Bhūtaratanti itthī purise, puriso itthiyāti evaṃ aññamaññaṃ sattesu rataṃ, tato eva bhavā aparimuttā. Ye hi keci bhavāti ittarakhaṇā vā dīghāyukā vā sātavanto vā asātavanto vā bhavā. Sabbadhīti uddhaṃ adho tiriyanti sabbattha. Sabbatthatāyāti sabbabhāvena. Sabbe te bhavātiādīsu ‘‘sabbepi bhavā aniccā’’tiādinā vipassanāsahitāya maggapaññāya aviparītaṃ passato bhavataṇhāpi pahīyati nirujjhati, vibhavaṃ ucchedampi nābhinandati na pattheti, tassa sabba taṇhānaṃ anavasesato maggena nirujjhanato nibbānaṃ nibbuti hoti. Tassa evaṃ nibbutassa bhikkhuno anupādā kilesābhisaṅkhārānaṃ anupādānato aggahaṇato punabbhavo na hoti. Evaṃbhūtena ca abhibhūto pañcavidhopi māro vijito assa anena mārena saṅgāmo, sabbepi bhave samatikkanto iṭṭhāniṭṭhādīsu tādilakkhaṇappattoti.

அனுஸோதகா³மீ அந்த⁴புது²ஜ்ஜனோ படிஸோதகா³மீ கல்யாணபுது²ஜ்ஜனோ. டி²தத்தோ ஸெக்கோ². இதரோ அஸெக்கோ².

Anusotagāmī andhaputhujjano paṭisotagāmī kalyāṇaputhujjano. Ṭhitatto sekkho. Itaro asekkho.

110.

அபி⁴ஜாதிகோதி ஜாதியோ. கண்ஹாபி⁴ஜாதிகோதி கண்ஹே நீசே குலே ஜாதோ. கண்ஹங் த⁴ம்மங் அபி⁴ஜாயதீதி காளகங் த³ஸவித⁴ங் து³ஸ்ஸீலத⁴ம்மங் பஸவதி கரோதி, ஸோ தங் அபி⁴ஜாயித்வா நிரயே நிப்³ப³த்ததி. ஸுக்கங் த⁴ம்மந்தி ‘‘அஹங் புப்³பே³பி புஞ்ஞானங் அகதத்தா நீசே குலே நிப்³ப³த்தோ, இதா³னி புஞ்ஞங் கரிஸ்ஸாமீ’’தி புஞ்ஞஸங்கா²தங் ஸுக்கங் பண்ட³ரங் த⁴ம்மங் அபி⁴ஜாயதி, ஸோ தேன ஸக்³கே³ நிப்³ப³த்ததி. அகண்ஹங் அஸுக்கங் நிப்³பா³னந்தி நிப்³பா³னஞ்ஹி ஸசே கண்ஹங் ப⁴வெய்ய, கண்ஹவிபாகங் த³தெ³ய்ய. ஸுக்கங், ஸுக்கவிபாகங் த³தெ³ய்ய. த்³வின்னம்பி அப்பதா³னதோ பன ‘‘அகண்ஹங் அஸுக்க’’ந்தி வுத்தங். நிப்³பா³னந்தி செத்த² அரஹத்தங் அதி⁴ப்பேதங். தஞ்ஹி கிலேஸனிப்³பா³னந்தே ஜாதத்தா நிப்³பா³னங் நாம. தங் ஏஸ அபி⁴ஜாயதி பஸவதி கரோதி. ஸுக்காபி⁴ஜாதிகோதி ஸுக்கே உச்சே குலே ஜாதோ. ஸேஸங் வுத்தனயேனேவ வேதி³தப்³ப³ங். ‘‘கண்ஹங் கண்ஹவிபாக’’ந்திஆதி³கஸ்ஸ கம்மசதுக்கஸ்ஸ அத்தோ² ஹெட்டா² ஹாரஸம்பாதவாரே விப⁴த்தோ ஏவ.

Abhijātikoti jātiyo. Kaṇhābhijātikoti kaṇhe nīce kule jāto. Kaṇhaṃ dhammaṃ abhijāyatīti kāḷakaṃ dasavidhaṃ dussīladhammaṃ pasavati karoti, so taṃ abhijāyitvā niraye nibbattati. Sukkaṃ dhammanti ‘‘ahaṃ pubbepi puññānaṃ akatattā nīce kule nibbatto, idāni puññaṃ karissāmī’’ti puññasaṅkhātaṃ sukkaṃ paṇḍaraṃ dhammaṃ abhijāyati, so tena sagge nibbattati. Akaṇhaṃ asukkaṃ nibbānanti nibbānañhi sace kaṇhaṃ bhaveyya, kaṇhavipākaṃ dadeyya. Sukkaṃ, sukkavipākaṃ dadeyya. Dvinnampi appadānato pana ‘‘akaṇhaṃ asukka’’nti vuttaṃ. Nibbānanti cettha arahattaṃ adhippetaṃ. Tañhi kilesanibbānante jātattā nibbānaṃ nāma. Taṃ esa abhijāyati pasavati karoti. Sukkābhijātikoti sukke ucce kule jāto. Sesaṃ vuttanayeneva veditabbaṃ. ‘‘Kaṇhaṃ kaṇhavipāka’’ntiādikassa kammacatukkassa attho heṭṭhā hārasampātavāre vibhatto eva.

111.

மானுஸத்தந்தி மனுஸ்ஸபா⁴வங், மனுஸ்ஸயோனிந்தி அத்தோ². த்³வேதி கிச்சங் அகிச்சமேவ சாதி த்³வே. கிச்சானி த்வேவ கத்தப்³பா³னி, ந சாகிச்சங் கிஞ்சி கத்தப்³ப³ந்தி த³ஸ்ஸேதி. ஸுகிச்சந்திஆதி³ ‘‘கிச்ச’’ந்தி வுத்தானங் தேஸங் ஸரூபத³ஸ்ஸனங்.

Mānusattanti manussabhāvaṃ, manussayoninti attho. Dveti kiccaṃ akiccameva cāti dve. Kiccāni tveva kattabbāni, na cākiccaṃ kiñci kattabbanti dasseti. Sukiccantiādi ‘‘kicca’’nti vuttānaṃ tesaṃ sarūpadassanaṃ.

பதா⁴னானீதி உத்தமானி விஸிட்டா²னி. புரிமஸ்மிங் பப்³ப³ஜிதேஸூதி விஸயே பு⁴ம்மங். து³தியே அதி⁴கரணே. தத்த² நிப்³பா³னந்தி அரஹத்தங் அதி⁴ப்பேதங். கஸ்மா பனெத்த² ஆமிஸபரிச்சாகோ³ அரஹத்தேன ஸமது⁴ரோ நித்³தி³ட்டோ²தி? த³க்கி²ணெய்யேஸு த³க்கி²ணாய மஹப்ப²லபா⁴வத³ஸ்ஸனத்த²ங். யேன யேன வா பன வத்து²னாதி உச்சே²தா³தி³வத்து²னா. அஜ்ஜோ²ஸிதாதி ப⁴வதண்ஹாதி³வஸேன அஜ்ஜோ²ஸிதா. து³தியே யேன யேன வா பன வத்து²னாதி அமராவிக்கே²பவத்து²ஆதி³னா.

Padhānānīti uttamāni visiṭṭhāni. Purimasmiṃ pabbajitesūti visaye bhummaṃ. Dutiye adhikaraṇe. Tattha nibbānanti arahattaṃ adhippetaṃ. Kasmā panettha āmisapariccāgo arahattena samadhuro niddiṭṭhoti? Dakkhiṇeyyesu dakkhiṇāya mahapphalabhāvadassanatthaṃ. Yena yena vā pana vatthunāti ucchedādivatthunā. Ajjhositāti bhavataṇhādivasena ajjhositā. Dutiye yena yena vā pana vatthunāti amarāvikkhepavatthuādinā.

இமினா அஸுபே⁴ன கம்மவிபாகேனாதி அஸுப⁴ஸ்ஸ காயது³ச்சரிதாதி³கம்மஸ்ஸ விபாகத்தா அஸுபே⁴ன அஸிவேன கம்மவிபாகேன. இத³ங் பா³லலக்க²ணங் நிப்³ப³த்ததீதி புரிமஸ்மிங் ப⁴வே து³ச்சரிதஸமங்கி³தாய பா³லோ அயங் ப⁴வதீதி உபலக்க²ணங் ஜாயதி. இத³ங் ஸங்கிலேஸபா⁴கி³யங் ஸுத்தந்தி இத³ங் ஏவங் பவத்தங் ஸங்கிலேஸபா⁴கி³யங் நாம ஸுத்தங்.

Imināasubhena kammavipākenāti asubhassa kāyaduccaritādikammassa vipākattā asubhena asivena kammavipākena. Idaṃ bālalakkhaṇaṃ nibbattatīti purimasmiṃ bhave duccaritasamaṅgitāya bālo ayaṃ bhavatīti upalakkhaṇaṃ jāyati. Idaṃ saṃkilesabhāgiyaṃ suttanti idaṃ evaṃ pavattaṃ saṃkilesabhāgiyaṃ nāma suttaṃ.

இமினா ஸுபே⁴னாதி எத்த² வுத்தனயானுஸாரேன அத்தோ² வேதி³தப்³போ³. தத்த² மஹாபுரிஸலக்க²ணந்தி பண்டி³தலக்க²ணங். கிலேஸபூ⁴மீஹீதி கிலேஸட்டா²னேஹி கிலேஸாவத்தா²ஹி வா. ஸானுஸயஸ்ஸ பரியுட்டா²னங் ஜாயதீதி அப்பஹீனானுஸயஸ்ஸ பச்சயஸமாயோகே³ ராகா³த³யோ பரியுட்டா²னவஸேன பவத்தந்தி. பரியுட்டி²தோ ஸங்யுஜ்ஜதீதி யோ ராகா³தீ³ஹி பரியுட்டி²தசித்தோ, ஸோ காமராகா³தீ³ஹி ஸங்யுஜ்ஜதி நாம. ஸங்யுஜ்ஜந்தோ உபாதி³யதீதி யோ காமராக³ஸங்யோஜனாதீ³ஹி ஸங்யுத்தோ, ஸோ காமுபாதா³னாதீ³னி அகுஸலகம்மானி ச உபாதி³யதி. ஸேஸங் ஸப்³ப³த்த² உத்தானமேவ.

Iminā subhenāti ettha vuttanayānusārena attho veditabbo. Tattha mahāpurisalakkhaṇanti paṇḍitalakkhaṇaṃ. Kilesabhūmīhīti kilesaṭṭhānehi kilesāvatthāhi vā. Sānusayassa pariyuṭṭhānaṃ jāyatīti appahīnānusayassa paccayasamāyoge rāgādayo pariyuṭṭhānavasena pavattanti. Pariyuṭṭhito saṃyujjatīti yo rāgādīhi pariyuṭṭhitacitto, so kāmarāgādīhi saṃyujjati nāma. Saṃyujjanto upādiyatīti yo kāmarāgasaṃyojanādīhi saṃyutto, so kāmupādānādīni akusalakammāni ca upādiyati. Sesaṃ sabbattha uttānameva.

112.

ஏவங் ஸோளஸவிதே⁴ன ஸாஸனபட்டா²னங் நானாஸுத்தேஹி உதா³ஹரணவஸேன விப⁴ஜித்வா இதா³னி அட்ட²வீஸதிவிதே⁴ன ஸாஸனபட்டா²னங் த³ஸ்ஸெந்தேன யஸ்மா அயம்பி பட்டா²னவிபா⁴கோ³ மூலபதே³ஹி ஸங்க³ஹிதோ, ந இமஸ்ஸாபி தேஹி அஸங்க³ஹிதோ பதே³ஸோ அத்தி², தஸ்மா மூலபத³ங் விப⁴ஜிதப்³ப³தஞ்ச த³ஸ்ஸேதுங் ‘‘தத்த² கதமே அட்டா²ரஸ மூலபதா³’’தி புச்சா²ய வஸேன மூலபதா³னி உத்³த⁴ரித்வா ‘‘லோகியங் லோகுத்தர’’ந்திஆதி³னா நவதிகா, த²வோ சாதி அட்ட²வீஸதிவித⁴ங் ஸாஸனபட்டா²னங் உத்³தி³ட்ட²ங். தத்த² லோகியந்தி லோகே நியுத்தோ, லோகே வா விதி³தோ லோகியோ. இத⁴ பன லோகியோ அத்தோ² யஸ்மிங் ஸுத்தே வுத்தோ, தங் ஸுத்தங் லோகியங். ததா² லோகுத்தரங். யஸ்மிங் பன ஸுத்தே பதே³ஸேன லோகியோ, பதே³ஸேன லோகுத்தரோ வுத்தோ, தங் லோகியஞ்ச லோகுத்தரஞ்ச. யஞ்ச ஸத்தே அதி⁴ட்டா²ய ஸத்தபஞ்ஞத்திமுகே²ன தே³ஸிதங், தங் ஸத்தாதி⁴ட்டா²னங். த⁴ம்மவஸேனேவ தே³ஸிதங் த⁴ம்மாதி⁴ட்டா²னங். உப⁴யவஸேன தே³ஸிதங் ஸத்தாதி⁴ட்டா²னஞ்ச த⁴ம்மாதி⁴ட்டா²னஞ்ச. இமினா நயேன ஸப்³ப³பதே³ஸு அத்தோ² வேதி³தப்³போ³. பு³த்³தா⁴தீ³னங் பன கு³ணாபி⁴த்த²வனவஸேன பவத்தங் ஸுத்தங் த²வோ நாம.

Evaṃ soḷasavidhena sāsanapaṭṭhānaṃ nānāsuttehi udāharaṇavasena vibhajitvā idāni aṭṭhavīsatividhena sāsanapaṭṭhānaṃ dassentena yasmā ayampi paṭṭhānavibhāgo mūlapadehi saṅgahito, na imassāpi tehi asaṅgahito padeso atthi, tasmā mūlapadaṃ vibhajitabbatañca dassetuṃ ‘‘tattha katame aṭṭhārasa mūlapadā’’ti pucchāya vasena mūlapadāni uddharitvā ‘‘lokiyaṃ lokuttara’’ntiādinā navatikā, thavo cāti aṭṭhavīsatividhaṃ sāsanapaṭṭhānaṃ uddiṭṭhaṃ. Tattha lokiyanti loke niyutto, loke vā vidito lokiyo. Idha pana lokiyo attho yasmiṃ sutte vutto, taṃ suttaṃ lokiyaṃ. Tathā lokuttaraṃ. Yasmiṃ pana sutte padesena lokiyo, padesena lokuttaro vutto, taṃ lokiyañca lokuttarañca. Yañca satte adhiṭṭhāya sattapaññattimukhena desitaṃ, taṃ sattādhiṭṭhānaṃ. Dhammavaseneva desitaṃ dhammādhiṭṭhānaṃ. Ubhayavasena desitaṃ sattādhiṭṭhānañca dhammādhiṭṭhānañca. Iminā nayena sabbapadesu attho veditabbo. Buddhādīnaṃ pana guṇābhitthavanavasena pavattaṃ suttaṃ thavo nāma.

தத்த² ஸஜ்ஜுகீ²ரந்தி தங்க²ணங்யேவ தே⁴னுயா த²னேஹி நிக்க²ந்தங் அப்³பு⁴ண்ஹகீ²ரங். முச்சதீதி பரிணமதி. இத³ங் வுத்தங் ஹோதி – யதா² தே⁴னுயா த²னதோ நிக்க²ந்தங் கீ²ரங் தங்க²ணங்யேவ ந முச்சதி ந பரிணமதி ந த³தி⁴பா⁴வங் க³ச்ச²தி, தக்காதி³அம்பி³லஸமாயோக³தோ பன பரதோ காலந்தரேன பகதிங் ஜஹதி த³தி⁴பா⁴வங் பாபுணாதி, ஏவமேவங் பாபகம்மம்பி கிரியக்க²ணேயேவ ந விபச்சதி. யதி³ விபச்செய்ய, நானாக³தீனங் ஸபா⁴வட்டா²னங் ஸியா, ந கோசி பாபகம்மங் காதுங் விஸஹெய்ய. யாவ பன குஸலாபி⁴னிப்³ப³த்தக்க²ந்தா⁴ சரந்தி, தாவ தங் தே ரக்க²ந்தி, தேஸங் பே⁴தா³ அபாயேஸு நிப்³ப³த்தாபனவஸேன விபச்சதி. விபச்சமானஞ்ச ட³ஹந்தங் பா³லமன்வேதி, கிங் விய? ப⁴ஸ்மச்ச²ன்னோவ பாவகோ. யதா² ஹி சா²ரிகாய படிச்ச²ன்னோ வீதச்சிதங்கா³ரோ அக்கந்தோபி சா²ரிகாய படிச்ச²ன்னத்தா ந தாவ ட³ஹதி, சா²ரிகங் பன தாபெத்வா சம்மாதீ³னி ட³ஹனவஸேன யாவ மத்த²லுங்கா³ ட³ஹந்தோ க³ச்ச²தி, ஏவமேவங் பாபகம்மம்பி யேன கதங், தங் பா³லங் து³தியே வா ததியே வா அத்தபா⁴வே நிரயாதீ³ஸு நிப்³ப³த்தங் ட³ஹந்தங் அனுக³ச்ச²தீதி.

Tattha sajjukhīranti taṅkhaṇaṃyeva dhenuyā thanehi nikkhantaṃ abbhuṇhakhīraṃ. Muccatīti pariṇamati. Idaṃ vuttaṃ hoti – yathā dhenuyā thanato nikkhantaṃ khīraṃ taṅkhaṇaṃyeva na muccati na pariṇamati na dadhibhāvaṃ gacchati, takkādiambilasamāyogato pana parato kālantarena pakatiṃ jahati dadhibhāvaṃ pāpuṇāti, evamevaṃ pāpakammampi kiriyakkhaṇeyeva na vipaccati. Yadi vipacceyya, nānāgatīnaṃ sabhāvaṭṭhānaṃ siyā, na koci pāpakammaṃ kātuṃ visaheyya. Yāva pana kusalābhinibbattakkhandhā caranti, tāva taṃ te rakkhanti, tesaṃ bhedā apāyesu nibbattāpanavasena vipaccati. Vipaccamānañca ḍahantaṃ bālamanveti, kiṃ viya? Bhasmacchannova pāvako. Yathā hi chārikāya paṭicchanno vītaccitaṅgāro akkantopi chārikāya paṭicchannattā na tāva ḍahati, chārikaṃ pana tāpetvā cammādīni ḍahanavasena yāva matthaluṅgā ḍahanto gacchati, evamevaṃ pāpakammampi yena kataṃ, taṃ bālaṃ dutiye vā tatiye vā attabhāve nirayādīsu nibbattaṃ ḍahantaṃ anugacchatīti.

யஸ்ஸிந்த்³ரியானீதி தத்தா²யங் ஸங்கே²பத்தோ² – யஸ்ஸ பி⁴க்கு²னோ சே²கேன ஸாரதி²னா ஸுத³ந்தா அஸ்ஸா விய ச² இந்த்³ரியானி ஸமத²ங் த³ந்தபா⁴வங் நிப்³பி³ஸேவனபா⁴வங் க³தானி, தஸ்ஸ நவவித⁴ங் மானங் பஹாய டி²தத்தா பஹீனமானஸ்ஸ சதுன்னங் ஆஸவானங் அபா⁴வேன அனாஸவஸ்ஸ தாதி³பா⁴வே டி²தஸ்ஸ ததா²ரூபஸ்ஸ தே³வாபி பிஹயந்தி, மனுஸ்ஸாபி த³ஸ்ஸனஞ்ச ஆக³மனஞ்ச பத்தெ²ந்தியேவாதி. ஆஹாரே ஸதீதி ஆஹாரபடிப³த்³தே⁴ ச²ந்த³ராகே³ அப்பஹீனே ஸதி.

Yassindriyānīti tatthāyaṃ saṅkhepattho – yassa bhikkhuno chekena sārathinā sudantā assā viya cha indriyāni samathaṃ dantabhāvaṃ nibbisevanabhāvaṃ gatāni, tassa navavidhaṃ mānaṃ pahāya ṭhitattā pahīnamānassa catunnaṃ āsavānaṃ abhāvena anāsavassa tādibhāve ṭhitassa tathārūpassa devāpi pihayanti, manussāpi dassanañca āgamanañca patthentiyevāti. Āhāre satīti āhārapaṭibaddhe chandarāge appahīne sati.

113.

ஸப்³பா³ தி³ஸா அனுபரிக³ம்ம சேதஸாதி பரிதோ த³ஸபி தி³ஸா சித்தேன அனுக³ந்த்வா. நேவஜ்ஜ²கா³தி நேவ அதி⁴க³ச்செ²ய்ய. பியதரந்தி அதிஸயேன பியங். அத்தனாதி அத்ததோ. ஏவங் பியோ புது² அத்தா பரேஸந்தி ஏவங் கஸ்ஸசிபி அத்தனா பியதரஸ்ஸ அனுபலப்³ப⁴னவஸேன விஸுங் விஸுங் பரேஸங் ஸத்தானங் அத்தா பியோ. யஸ்மா ச ஏததே³வ, தஸ்மா ந ஹிங்ஸே பரங் அத்தகாமோ அத்தனோ ஸுக²காமோதி.

Sabbā disā anuparigamma cetasāti parito dasapi disā cittena anugantvā. Nevajjhagāti neva adhigaccheyya. Piyataranti atisayena piyaṃ. Attanāti attato. Evaṃ piyo puthu attā paresanti evaṃ kassacipi attanā piyatarassa anupalabbhanavasena visuṃ visuṃ paresaṃ sattānaṃ attā piyo. Yasmā ca etadeva, tasmā na hiṃse paraṃ attakāmo attano sukhakāmoti.

பூ⁴தாதி ஜாதா நிப்³ப³த்தா. ப⁴விஸ்ஸந்தீதி நிப்³ப³த்திஸ்ஸந்தி. பூ⁴தாதி வா கீ²ணாஸவா. தே ஹி பஹீனப⁴வத்தா பூ⁴தா ஏவ. க³மிஸ்ஸந்தீதி பரலோகங் க³மிஸ்ஸந்தி. கீ²ணாஸவா பன அனுபாதி³ஸேஸங் நிப்³பா³னங்.

Bhūtāti jātā nibbattā. Bhavissantīti nibbattissanti. Bhūtāti vā khīṇāsavā. Te hi pahīnabhavattā bhūtā eva. Gamissantīti paralokaṃ gamissanti. Khīṇāsavā pana anupādisesaṃ nibbānaṃ.

பியோ ச ஹோதீதி ஸுபரிஸுத்³தா⁴ய ஸீலஸம்பத்தியா, ஸுபரிஸுத்³தா⁴ய ச தி³ட்டி²ஸம்பத்தியா ஸமன்னாக³தோ பியோ பியாயிதப்³போ³ ஹோதி. வுத்தஞ்ஹேதங் –

Piyoca hotīti suparisuddhāya sīlasampattiyā, suparisuddhāya ca diṭṭhisampattiyā samannāgato piyo piyāyitabbo hoti. Vuttañhetaṃ –

‘‘ஸீலத³ஸ்ஸனஸம்பன்னங் , த⁴ம்மட்ட²ங் ஸச்சவாதி³னங்;

‘‘Sīladassanasampannaṃ , dhammaṭṭhaṃ saccavādinaṃ;

அத்தனோ கம்மகுப்³பா³னங், தங் ஜனோ குருதே பிய’’ந்தி. (த⁴॰ ப॰ 217);

Attano kammakubbānaṃ, taṃ jano kurute piya’’nti. (dha. pa. 217);

பாஸாணச்ச²த்தங் விய க³ருகாதப்³ப³தாய க³ரு. உத்தரிமனுஸ்ஸத⁴ம்மவஸேன ஸம்பா⁴வேதப்³ப³தாய பா⁴வனீயோ. ஸீலகு³ணேன வா பியக³ருஆதி³பா⁴வா வேதி³தப்³பா³. ததா² ஹி வுத்தங் – ‘‘ஆகங்கெ²ய்ய சே, பி⁴க்க²வே, பி⁴க்கு² ‘ஸப்³ரஹ்மசாரீனங் பியோ ச அஸ்ஸங் மனாபோ ச க³ரு ச பா⁴வனீயோ சா’தி, ஸீலெஸ்வேவஸ்ஸ பரிபூரகாரீ’’தி (ம॰ நி॰ 1.65).

Pāsāṇacchattaṃ viya garukātabbatāya garu. Uttarimanussadhammavasena sambhāvetabbatāya bhāvanīyo. Sīlaguṇena vā piyagaruādibhāvā veditabbā. Tathā hi vuttaṃ – ‘‘ākaṅkheyya ce, bhikkhave, bhikkhu ‘sabrahmacārīnaṃ piyo ca assaṃ manāpo ca garu ca bhāvanīyo cā’ti, sīlesvevassa paripūrakārī’’ti (ma. ni. 1.65).

வத்தாதி ‘‘காலேன வக்கா²மீ’’திஆதி³பஞ்சத⁴ம்மே அத்தனி உபட்டா²பெத்வா ஸப்³ரஹ்மசாரீனங் உல்லும்பனபா⁴வே ட²த்வா வத்தா. வசனக்க²மோதி ஸப்³ரஹ்மசாரீஹி யேன கேனசி வுச்சமானோ ஸுப்³ப³சோ ஹுத்வா பத³க்கி²ணக்³கா³ஹிதாய தேஸங் வசனங் க²மதீதி வசனக்க²மோ. வத்தாதி வா த⁴ம்மகதா²வஸேன வசனஸீலோ. வசனக்க²மோதி த⁴ம்மங் ஸங்வண்ணெந்தோ பரேஹி அஸங்ஹீரோ ஹுத்வா தேஸங் புச்சா²வசனக்க²மதாய வசனக்க²மோ. க³ம்பீ⁴ரஞ்ச கத²ங் கத்தாதி ஸச்சபடிச்சஸமுப்பாதா³தி³ங், அஞ்ஞங் வா க³ம்பீ⁴ரகத²ங் கத்தா. ந சட்டா²னே நியோஜகோதி த⁴ம்மவினயாதி³ங் அத⁴ம்மாவினயாதி³வஸேன அவத்வா த⁴ம்மவினயாதி³வஸேனேவ தீ³பனதோ ந ச அட்டா²னே நியோஜகோ.

Vattāti ‘‘kālena vakkhāmī’’tiādipañcadhamme attani upaṭṭhāpetvā sabrahmacārīnaṃ ullumpanabhāve ṭhatvā vattā. Vacanakkhamoti sabrahmacārīhi yena kenaci vuccamāno subbaco hutvā padakkhiṇaggāhitāya tesaṃ vacanaṃ khamatīti vacanakkhamo. Vattāti vā dhammakathāvasena vacanasīlo. Vacanakkhamoti dhammaṃ saṃvaṇṇento parehi asaṃhīro hutvā tesaṃ pucchāvacanakkhamatāya vacanakkhamo. Gambhīrañca kathaṃ kattāti saccapaṭiccasamuppādādiṃ, aññaṃ vā gambhīrakathaṃ kattā. Na caṭṭhāne niyojakoti dhammavinayādiṃ adhammāvinayādivasena avatvā dhammavinayādivaseneva dīpanato na ca aṭṭhāne niyojako.

மாதரங் பிதரங் ஹந்த்வாதி எத்த² ‘‘தண்ஹா ஜனேதி புரிஸ’’ந்தி (ஸங்॰ நி॰ 1.55-57) வசனதோ தீஸு ப⁴வேஸு ஸத்தானங் ஜனநதோ தண்ஹா மாதா நாம. ‘‘அஹங் அஸுகஸ்ஸ நாம ரஞ்ஞோ, ராஜமஹாமத்தஸ்ஸ வா புத்தோ’’தி பிதரங் நிஸ்ஸாய அஸ்மிமானஸ்ஸ உப்பஜ்ஜனதோ அஸ்மிமானோ பிதா நாம. லோகோ விய ராஜானங் யஸ்மா ஸப்³ப³தி³ட்டி²க³தானி த்³வே ஸஸ்ஸதுச்சே²த³தி³ட்டி²யோ ப⁴ஜந்தி, தஸ்மா ஸஸ்ஸதுச்சே²த³தி³ட்டி²யோ த்³வே க²த்தியா ராஜானோ நாம. த்³வாத³ஸாயதனானி வித்த²தட்டே²ன ரட்ட²ஸதி³ஸத்தா ரட்ட²ங் நாம. ஆயஸாத⁴கோ ஆயுத்தகபுரிஸோ விய தங்னிஸ்ஸிதோ நந்தி³ராகோ³ அனுசரோ நாம.

Mātaraṃ pitaraṃ hantvāti ettha ‘‘taṇhā janeti purisa’’nti (saṃ. ni. 1.55-57) vacanato tīsu bhavesu sattānaṃ jananato taṇhā mātā nāma. ‘‘Ahaṃ asukassa nāma rañño, rājamahāmattassa vā putto’’ti pitaraṃ nissāya asmimānassa uppajjanato asmimāno pitā nāma. Loko viya rājānaṃ yasmā sabbadiṭṭhigatāni dve sassatucchedadiṭṭhiyo bhajanti, tasmā sassatucchedadiṭṭhiyo dve khattiyā rājāno nāma. Dvādasāyatanāni vitthataṭṭhena raṭṭhasadisattā raṭṭhaṃ nāma. Āyasādhako āyuttakapuriso viya taṃnissito nandirāgo anucaro nāma.

அனீகோ⁴தி நித்³து³க்கோ². ப்³ராஹ்மணோதி கீ²ணாஸவோ. ஏதேன ஹி தண்ஹாத³யோ அரஹத்தமக்³க³ஞாணாஸினா ஹதா பா³ஹிதா. யாதீதி ஸோ ப்³ராஹ்மணோ நித்³து³க்கோ² ஹுத்வா யாதீதி.

Anīghoti niddukkho. Brāhmaṇoti khīṇāsavo. Etena hi taṇhādayo arahattamaggañāṇāsinā hatā bāhitā. Yātīti so brāhmaṇo niddukkho hutvā yātīti.

காயேதி கரஜகாயே. சித்தந்தி பாத³கஜ்ஜா²னசித்தங். ஸமோத³ஹதீதி பக்கி²பதி. யதா³ தி³ஸ்ஸமானேன காயேன க³ந்துகாமோ ஹோதி, ததா³ காயக³திகங் பாத³கஜ்ஜா²னசித்தங் அதி⁴ட்ட²ஹதீதி அத்தோ². சித்தேபி காயங் ஸமோத³ஹதீதி யதா³ ஸீக⁴ங் க³ந்துகாமோ ஹோதி, ததா³ பாத³கஜ்ஜா²னசித்தே காயங் பக்கி²பதி, சித்தக³திகங் காயங் அதி⁴ட்ட²ஹதீதி அத்தோ². காயே ஸுக²ஸஞ்ஞஞ்ச லஹுஸஞ்ஞஞ்ச ஓக்கமித்வாதி ‘‘ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்யா’’தி வுத்தனயேன (மஹாவ॰ 8, 137; தீ³॰ நி॰ 2.66; ம॰ நி॰ 1.282; 2.338; ஸங்॰ நி॰ 1.172) இத்³தி⁴மா காயே ஸுக²ஸஞ்ஞஞ்ச லஹுஸஞ்ஞஞ்ச ஓக்கமித்வா பரேஸங் தி³ஸ்ஸமானேன காயேன ஆராமராமணெய்யகாதீ³னி பெக்க²மானோ சித்தக்க²ணேனேவ இச்சி²தட்டா²னங் க³ச்ச²தி.

Kāyeti karajakāye. Cittanti pādakajjhānacittaṃ. Samodahatīti pakkhipati. Yadā dissamānena kāyena gantukāmo hoti, tadā kāyagatikaṃ pādakajjhānacittaṃ adhiṭṭhahatīti attho. Cittepi kāyaṃ samodahatīti yadā sīghaṃ gantukāmo hoti, tadā pādakajjhānacitte kāyaṃ pakkhipati, cittagatikaṃ kāyaṃ adhiṭṭhahatīti attho. Kāye sukhasaññañca lahusaññañca okkamitvāti ‘‘seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyyā’’ti vuttanayena (mahāva. 8, 137; dī. ni. 2.66; ma. ni. 1.282; 2.338; saṃ. ni. 1.172) iddhimā kāye sukhasaññañca lahusaññañca okkamitvā paresaṃ dissamānena kāyena ārāmarāmaṇeyyakādīni pekkhamāno cittakkhaṇeneva icchitaṭṭhānaṃ gacchati.

114.

யங் தங் லோகுத்தரங் ஞாணந்தி ஸப்³ப³ங் லோகங் உத்தரித்வா அபி⁴ப⁴வித்வா டி²தத்தா வுத்தங், ந பன லோகுத்தரபூ⁴மிகத்தா. ஸப்³ப³காலே பவத்ததீதி ஆவஜ்ஜனபடிப³த்³த⁴வுத்தித்தா வுத்தங், ந ஸததங் ஸமிதங் பவத்ததீதி. ந ஹி ஸப்³ப³ஞ்ஞுதஞ்ஞாணங் ப⁴க³வதோ ஸப்³ப³ஸ்மிங்யேவ காலே உப்பஜ்ஜதீதி ஸக்கா வத்துந்தி.

Yaṃ taṃ lokuttaraṃ ñāṇanti sabbaṃ lokaṃ uttaritvā abhibhavitvā ṭhitattā vuttaṃ, na pana lokuttarabhūmikattā. Sabbakāle pavattatīti āvajjanapaṭibaddhavuttittā vuttaṃ, na satataṃ samitaṃ pavattatīti. Na hi sabbaññutaññāṇaṃ bhagavato sabbasmiṃyeva kāle uppajjatīti sakkā vattunti.

கித்தயிஸ்ஸாமி தே ஸந்திந்தி ஸப்³ப³கிலேஸவூபஸமஹேதுதாய ஸந்திங் நிப்³பா³னங் த³ஸ்ஸெஸ்ஸாமி. தி³ட்டே² த⁴ம்மேதி தி³ட்டே² து³க்கா²தி³த⁴ம்மே, இமஸ்மிங் ஏவ வா அத்தபா⁴வே. அனீதிஹந்தி இதிஹாஸாதி ஏவங் ந இதிகிராய பவத்தங், அத்தபச்சக்க²ந்தி அத்தோ². யங் விதி³த்வா ஸதோ சரந்தி ‘‘ஸப்³பே³ ஸங்கா²ரா அனிச்சா’’திஆதி³னா (த⁴॰ ப॰ 277; தே²ரகா³॰ 676; நெத்தி॰ 5) நயேன ஸதோ ஹுத்வா சரந்தோ அரியமக்³கே³ன யங் ஸந்திங் விதி³த்வா. தரே லோகே விஸத்திகந்தி ஸங்கா²ரலோகே விஸப்பனதோ விஸத்திகஸங்கா²தங் தண்ஹங் தரே தரெய்ய ஸமதிக்கமெய்யாதி அத்தோ².

Kittayissāmi te santinti sabbakilesavūpasamahetutāya santiṃ nibbānaṃ dassessāmi. Diṭṭhe dhammeti diṭṭhe dukkhādidhamme, imasmiṃ eva vā attabhāve. Anītihanti itihāsāti evaṃ na itikirāya pavattaṃ, attapaccakkhanti attho. Yaṃ viditvā sato caranti ‘‘sabbe saṅkhārā aniccā’’tiādinā (dha. pa. 277; theragā. 676; netti. 5) nayena sato hutvā caranto ariyamaggena yaṃ santiṃ viditvā. Tare loke visattikanti saṅkhāraloke visappanato visattikasaṅkhātaṃ taṇhaṃ tare tareyya samatikkameyyāti attho.

தஞ்சாஹங் அபி⁴னந்தா³மீதி தங் வுத்தப்பகாரங் ஸந்திஜோதகங் தும்ஹாகங் வசனங் அஹங் பத்த²யாமி, தங் ஏவ வா ஸந்திங் உத்தமங் அபி⁴னந்தா³மீதி தோ⁴தகோ வத³தி. உத்³த⁴ங் அதோ⁴ திரியஞ்சாபி மஜ்ஜே²தி எத்த² உத்³த⁴ந்தி அனாக³தங் உபரி ச. அதோ⁴தி அதீதங் ஹெட்டா² ச. திரியஞ்சாபி மஜ்ஜே²தி பச்சுப்பன்னங் பரிதோ ச. ஏதங் விதி³த்வா ஸங்கோ³தீதி ஏதங் அனாக³தாதி³ங் ஸங்க³ஜனநட்டா²னந்தி ஞத்வா. ப⁴வாப⁴வாயாதி கு²த்³த³கானஞ்சேவ மஹந்தானஞ்ச ப⁴வானங் அத்தா²ய, ஸஸ்ஸதுச்சே²தா³ய வா.

Tañcāhaṃ abhinandāmīti taṃ vuttappakāraṃ santijotakaṃ tumhākaṃ vacanaṃ ahaṃ patthayāmi, taṃ eva vā santiṃ uttamaṃ abhinandāmīti dhotako vadati. Uddhaṃ adho tiriyañcāpi majjheti ettha uddhanti anāgataṃ upari ca. Adhoti atītaṃ heṭṭhā ca. Tiriyañcāpi majjheti paccuppannaṃ parito ca. Etaṃ viditvā saṅgotīti etaṃ anāgatādiṃ saṅgajananaṭṭhānanti ñatvā. Bhavābhavāyāti khuddakānañceva mahantānañca bhavānaṃ atthāya, sassatucchedāya vā.

அரியஸச்சானந்தி அரியபா⁴வகரானங் ஸச்சானங். அனநுபோ³தா⁴தி அபு³ஜ்ஜ²னேன அஜானநேன. அப்படிவேதா⁴தி அப்படிவிஜ்ஜ²னேன. ஸந்தா⁴விதந்தி ப⁴வதோ ப⁴வஸ்ஸ க³மனேன ஸந்தா⁴விதங். ஸங்ஸரிதந்தி புனப்புனங் க³மனவஸேன ஸங்ஸரிதங். மமஞ்சேவ தும்ஹாகஞ்சாதி மயா சேவ தும்ஹேஹி ச. அத² வா ஸந்தா⁴விதங் ஸங்ஸரிதந்தி ஸந்தா⁴வனங் ஸங்ஸரணங் மமஞ்சேவ தும்ஹாகஞ்ச அஹோஸீதி அத்தோ². ப⁴வனெத்தீதி ப⁴வாப⁴வங் நயனஸமத்தா² தண்ஹாரஜ்ஜு. ஸங்ஸிதந்தி ஸங்ஸரிதங். ஸமூஹதாதி ஸுட்டு² ஹதா சி²ன்னா அப்பவத்திகதா.

Ariyasaccānanti ariyabhāvakarānaṃ saccānaṃ. Ananubodhāti abujjhanena ajānanena. Appaṭivedhāti appaṭivijjhanena. Sandhāvitanti bhavato bhavassa gamanena sandhāvitaṃ. Saṃsaritanti punappunaṃ gamanavasena saṃsaritaṃ. Mamañceva tumhākañcāti mayā ceva tumhehi ca. Atha vā sandhāvitaṃ saṃsaritanti sandhāvanaṃ saṃsaraṇaṃ mamañceva tumhākañca ahosīti attho. Bhavanettīti bhavābhavaṃ nayanasamatthā taṇhārajju. Saṃsitanti saṃsaritaṃ. Samūhatāti suṭṭhu hatā chinnā appavattikatā.

ஸப்³பே³ ஸங்கா²ரா அனிச்சாதி பச்சயேஹி ஸங்க²ரீயந்தீதி ‘‘ஸங்கா²ரா’’தி லத்³த⁴னாமா பஞ்சக்க²ந்தா⁴. ஆதி³அந்தவந்ததோ அனிச்சந்திகதோ தாவகாலிகதோ க²ணபரித்ததோ ச ந நிச்சாதி அனிச்சா. யதா³ பஞ்ஞாய பஸ்ஸதீதி யதா³ விபஸ்ஸனாபஞ்ஞாய பஸ்ஸதி. அத² இமஸ்மிங் வட்டது³க்கே² நிப்³பி³ந்த³தி, நிப்³பி³ந்த³ந்தோ து³க்க²பரிஜானநாதி³வஸேன ஸச்சானி படிவிஜ்ஜ²தி. ஏஸ மக்³கோ³ விஸுத்³தி⁴யாதி ய்வாயங் வுத்தனயேன ஸச்சப்படிவேதோ⁴, ஏஸ விஸுத்³த⁴த்தா²ய மக்³கோ³. ஸப்³பே³ ஸங்கா²ரா து³க்கா²தி ஸப்³பே³ ஸங்கா²ரா அபி⁴ண்ஹஸம்படிபீளனட்டே²ன க²யட்டே²ன ச து³க்கா²தி. ஸேஸங் வுத்தனயமேவ. ஸப்³பே³ த⁴ம்மா அனத்தாதி ஸப்³பே³பி தேபூ⁴மகத⁴ம்மா பரதோ துச்ச²தோ ஸுஞ்ஞதோ அஸாரதோ அவஸவத்தனதோ ச அனத்தாதி. ஸேஸங் புரிமஸதி³ஸமேவ.

Sabbe saṅkhārā aniccāti paccayehi saṅkharīyantīti ‘‘saṅkhārā’’ti laddhanāmā pañcakkhandhā. Ādiantavantato aniccantikato tāvakālikato khaṇaparittato ca na niccāti aniccā. Yadā paññāya passatīti yadā vipassanāpaññāya passati. Atha imasmiṃ vaṭṭadukkhe nibbindati, nibbindanto dukkhaparijānanādivasena saccāni paṭivijjhati. Esa maggo visuddhiyāti yvāyaṃ vuttanayena saccappaṭivedho, esa visuddhatthāya maggo. Sabbe saṅkhārā dukkhāti sabbe saṅkhārā abhiṇhasampaṭipīḷanaṭṭhena khayaṭṭhena ca dukkhāti. Sesaṃ vuttanayameva. Sabbe dhammā anattāti sabbepi tebhūmakadhammā parato tucchato suññato asārato avasavattanato ca anattāti. Sesaṃ purimasadisameva.

ஸெய்யோதி விஸிட்டோ² உத்தமோ. ஸதி³ஸோதி ஸமானோ. ஹீனோதி லாமகோ. ஓமானோபி ஹி அத்தனோ அவங்கரணமுகே²னபி ஸங்பக்³க³ண்ஹனவஸேனேவ பவத்ததி. தேன வுத்தங் ‘‘ஹீனோஹமஸ்மீ’’தி. கிமஞ்ஞத்ர யதா²பூ⁴தஸ்ஸ அத³ஸ்ஸனாதி ஸரஸபப⁴ங்கு³தாய ஏகந்தேனேவ அனவட்டி²தஸபா⁴வேஹி ரூபத⁴ம்மேஹி ஸெய்யாதி³வஸேன அத்தனோ உக்கி²பனஸ்ஸ தேஸங் யதா²பூ⁴தங் அத³ஸ்ஸனங் அஞ்ஞாணங் வினா கிங் அஞ்ஞங் காரணங் ஸியா, அஞ்ஞங் கிஞ்சி காரணங் தஸ்ஸ நத்தீ²தி அத்தோ². வேத³னாதீ³ஸுபி ஏஸேவ நயோ. வுத்தவிபரியாயேன ஸுக்கபக்கோ² வேதி³தப்³போ³.

Seyyoti visiṭṭho uttamo. Sadisoti samāno. Hīnoti lāmako. Omānopi hi attano avaṅkaraṇamukhenapi saṃpaggaṇhanavaseneva pavattati. Tena vuttaṃ ‘‘hīnohamasmī’’ti. Kimaññatra yathābhūtassa adassanāti sarasapabhaṅgutāya ekanteneva anavaṭṭhitasabhāvehi rūpadhammehi seyyādivasena attano ukkhipanassa tesaṃ yathābhūtaṃ adassanaṃ aññāṇaṃ vinā kiṃ aññaṃ kāraṇaṃ siyā, aññaṃ kiñci kāraṇaṃ tassa natthīti attho. Vedanādīsupi eseva nayo. Vuttavipariyāyena sukkapakkho veditabbo.

115.

யே அரியஸச்சானி விபா⁴வயந்தீதி து³க்கா²தீ³னி அரியஸச்சானி பஞ்ஞாஓபா⁴ஸேன ஸச்சப்படிச்சா²த³ககிலேஸந்த⁴காரங் வித⁴மெத்வா அத்தனோ பகாஸானி பாகடானி கரொந்தி. க³ம்பீ⁴ரபஞ்ஞேனாதி அப்பமெய்யபஞ்ஞதாய ஸதே³வகஸ்ஸபி லோகஸ்ஸ ஞாணேன அலப்³ப⁴னெய்யபதிட்ட²பஞ்ஞேன ஸப்³ப³ஞ்ஞுனாதி வுத்தங் ஹோதி. ஸுதே³ஸிதானீதி ஸங்கே²பவித்தா²ராதீ³ஹி தேஹி தேஹி நயேஹி ஸுட்டு² தே³ஸிதானி. கிஞ்சாபி தே ஹொந்தி பு⁴ஸங் பமத்தாதி தே விபா⁴விதஅரியஸச்சா புக்³க³லா காமங் தே³வரஜ்ஜசக்கவத்திரஜ்ஜாதி³பமாத³ட்டா²னங் ஆக³ம்ம பு⁴ஸங் பமத்தா ஹொந்தி, ததா²பி ஸோதாபத்திமக்³க³ஞாணேன அபி⁴ஸங்கா²ரவிஞ்ஞாணஸ்ஸ நிரோதே⁴ன ட²பெத்வா ஸத்த ப⁴வே அனமதக்³கே³ ஸங்ஸாரே யே உப்பஜ்ஜெய்யுங் நாமஞ்ச ரூபஞ்ச, தேஸங் நிருத்³த⁴த்தா ந அட்ட²மங் ப⁴வங் ஆதி³யந்தி, ஸத்தமப⁴வேயேவ பன விபஸ்ஸனங் ஆரபி⁴த்வா அரஹத்தங் பாபுணந்தீதி அத்தோ².

Ye ariyasaccāni vibhāvayantīti dukkhādīni ariyasaccāni paññāobhāsena saccappaṭicchādakakilesandhakāraṃ vidhametvā attano pakāsāni pākaṭāni karonti. Gambhīrapaññenāti appameyyapaññatāya sadevakassapi lokassa ñāṇena alabbhaneyyapatiṭṭhapaññena sabbaññunāti vuttaṃ hoti. Sudesitānīti saṅkhepavitthārādīhi tehi tehi nayehi suṭṭhu desitāni. Kiñcāpi te honti bhusaṃ pamattāti te vibhāvitaariyasaccā puggalā kāmaṃ devarajjacakkavattirajjādipamādaṭṭhānaṃ āgamma bhusaṃ pamattā honti, tathāpi sotāpattimaggañāṇena abhisaṅkhāraviññāṇassa nirodhena ṭhapetvā satta bhave anamatagge saṃsāre ye uppajjeyyuṃ nāmañca rūpañca, tesaṃ niruddhattā na aṭṭhamaṃ bhavaṃ ādiyanti, sattamabhaveyeva pana vipassanaṃ ārabhitvā arahattaṃ pāpuṇantīti attho.

யதி²ந்த³கீ²லோதி எத்த² யதா²தி உபமாவசனங். இந்த³கீ²லோதி நக³ரத்³வாரதி²ரகரணத்த²ங் உம்மாரப்³ப⁴ந்தரே அட்ட² வா த³ஸ வா ஹத்தே² பத²விங் க²ணித்வா ஆகோடிதஸ்ஸ ஸாரதா³ருமயஸ்ஸ த²ம்ப⁴ஸ்ஸேதங் அதி⁴வசனங். பத²விஸ்ஸிதோ ஸியாதி க³ம்பீ⁴ரனேமிதாய அந்தோ பவிஸித்வா பூ⁴மினிஸ்ஸிதோ ஸியா ப⁴வெய்ய. சதுப்³பி⁴ வாதேஹீதி சதூஹி தி³ஸாஹி ஆக³தவாதேஹி. அஸம்பகம்பியோதி கம்பேதுங் வா சாலேதுங் வா அஸக்குணெய்யோ. ததூ²பமங்…பே॰… பஸ்ஸதீதி யோ சத்தாரி அரியஸச்சானி பஞ்ஞாய அஜ்ஜோ²கா³ஹெத்வா பஸ்ஸதி, தங் ஸப்புரிஸங் உத்தமபுரிஸங் ததா² த³ஸ்ஸனதோ ஸப்³ப³தித்தி²யவாத³வாதேஹி அஸம்பகம்பியதாய ததூ²பமங் யதா²வுத்தஇந்த³கீ²லூபமங் வதா³மீதி அத்தோ².

Yathindakhīloti ettha yathāti upamāvacanaṃ. Indakhīloti nagaradvārathirakaraṇatthaṃ ummārabbhantare aṭṭha vā dasa vā hatthe pathaviṃ khaṇitvā ākoṭitassa sāradārumayassa thambhassetaṃ adhivacanaṃ. Pathavissito siyāti gambhīranemitāya anto pavisitvā bhūminissito siyā bhaveyya. Catubbhi vātehīti catūhi disāhi āgatavātehi. Asampakampiyoti kampetuṃ vā cāletuṃ vā asakkuṇeyyo. Tathūpamaṃ…pe… passatīti yo cattāri ariyasaccāni paññāya ajjhogāhetvā passati, taṃ sappurisaṃ uttamapurisaṃ tathā dassanato sabbatitthiyavādavātehi asampakampiyatāya tathūpamaṃ yathāvuttaindakhīlūpamaṃ vadāmīti attho.

ஸோதாபத்தியங்கே³ஹீதி அரியஸோதாபஜ்ஜனஸ்ஸ அங்க³பூ⁴தேஹி. அரியஸாவகோதி அரியஸ்ஸ பு³த்³த⁴ஸ்ஸ ப⁴க³வதோ ஸத்³த⁴ம்மஸ்ஸவனந்தே ஜாதத்தா அரியஸாவகோ. கீ²ணனிரயொம்ஹீதி கீ²ணனிரயோ அம்ஹி. கீ²ணாபாயது³க்³க³திவினிபாதோதி இத³ங் நிரயாதீ³னங்யேவ வேவசனவஸேன வுத்தங். நிரயாத³யோ ஹி வட்³டி⁴ஸங்கா²ததோ அயதோ அபேதத்தா அபாயா. து³க்க²ஸ்ஸ க³தி படிஸரணந்தி து³க்³க³தியோ. து³க்கடகாரினோ விவஸா எத்த² நிபதந்தீதி வினிபாதா. ஸோதங் அரியமக்³க³ங் ஆதி³தோ பத்தோ அதி⁴க³தோதி ஸோதாபன்னோ. அகுப்பத⁴ம்மதாய மக்³க³ப²லானங் புது²ஜ்ஜனபா⁴வஸங்கா²தே விரூபே ந நிபதனஸபா⁴வோதி அவினிபாதத⁴ம்மோ. ததோ ஏவ த⁴ம்மனியாமேன நியததாய நியதோ. உபரிமக்³க³த்தயஸங்கா²தா ஸம்போ³தி⁴ அவஸ்ஸங் பத்தப்³ப³தாய அஸ்ஸ பரங் அயனங் க³தி படிஸரணந்தி ஸம்போ³தி⁴பராயணோ.

Sotāpattiyaṅgehīti ariyasotāpajjanassa aṅgabhūtehi. Ariyasāvakoti ariyassa buddhassa bhagavato saddhammassavanante jātattā ariyasāvako. Khīṇanirayomhīti khīṇanirayo amhi. Khīṇāpāyaduggativinipātoti idaṃ nirayādīnaṃyeva vevacanavasena vuttaṃ. Nirayādayo hi vaḍḍhisaṅkhātato ayato apetattā apāyā. Dukkhassa gati paṭisaraṇanti duggatiyo. Dukkaṭakārino vivasā ettha nipatantīti vinipātā. Sotaṃ ariyamaggaṃ ādito patto adhigatoti sotāpanno. Akuppadhammatāya maggaphalānaṃ puthujjanabhāvasaṅkhāte virūpe na nipatanasabhāvoti avinipātadhammo. Tato eva dhammaniyāmena niyatatāya niyato. Uparimaggattayasaṅkhātā sambodhi avassaṃ pattabbatāya assa paraṃ ayanaṃ gati paṭisaraṇanti sambodhiparāyaṇo.

நிவிட்டா²திஆதீ³னி பதா³னி அஞ்ஞமஞ்ஞவேவசனானேவ. ஸஹத⁴ம்மியாதி ஸப்³ரஹ்மசாரினோ. அரியகந்தேஹீதி அரியானங் கந்தேஹி பியேஹி மனாபேஹி. பஞ்ச ஸீலானி ஹி அரியஸாவகானங் கந்தானி ஹொந்தி, ப⁴வந்தரேபி அவிஜஹனதோ. தானி ஸந்தா⁴யேதங் வுத்தங். ஸப்³போ³பி பனெத்த² ஸங்வரோ லப்³ப⁴தியேவ. ஸோதாபன்னோஹமஸ்மீதி இத³ங் தே³ஸனாஸீஸமேவ. ஸகதா³கா³மிஆத³யோபி ‘‘ஸகதா³கா³மீஹமஸ்மீ’’திஆதி³னா நயேன ப்³யாகரொந்தியேவ. யதோ ஸப்³பே³ஸம்பி ஸிக்கா²பதா³விரோதே⁴ன யுத்தட்டா²னே ப்³யாகரணங் அனுஞ்ஞாதமேவாதி.

Niviṭṭhātiādīni padāni aññamaññavevacanāneva. Sahadhammiyāti sabrahmacārino. Ariyakantehīti ariyānaṃ kantehi piyehi manāpehi. Pañca sīlāni hi ariyasāvakānaṃ kantāni honti, bhavantarepi avijahanato. Tāni sandhāyetaṃ vuttaṃ. Sabbopi panettha saṃvaro labbhatiyeva. Sotāpannohamasmīti idaṃ desanāsīsameva. Sakadāgāmiādayopi ‘‘sakadāgāmīhamasmī’’tiādinā nayena byākarontiyeva. Yato sabbesampi sikkhāpadāvirodhena yuttaṭṭhāne byākaraṇaṃ anuññātamevāti.

யஸ்ஸிந்த்³ரியானீதி யஸ்ஸ அரியபுக்³க³லஸ்ஸ ஸத்³தா⁴தீ³னி இந்த்³ரியானி. ஸுபா⁴விதானீதி அரியமக்³க³பா⁴வனாவஸேன ஸுட்டு² பா⁴விதானி. அஜ்ஜ²த்தங் ப³ஹித்³தா⁴ சாதி ஓரம்பா⁴கி³யானங் உத்³த⁴ம்பா⁴கி³யானஞ்ச ஸங்யோஜனானங் பஜஹனவஸேன. தேனாஹ ‘‘ஸப்³ப³லோகே’’தி. நிப்³பி³ஜ்ஜா²தி நிப்³பி³ஜ்ஜி²த்வா படிவிஜ்ஜி²த்வா.

Yassindriyānīti yassa ariyapuggalassa saddhādīni indriyāni. Subhāvitānīti ariyamaggabhāvanāvasena suṭṭhu bhāvitāni. Ajjhattaṃ bahiddhā cāti orambhāgiyānaṃ uddhambhāgiyānañca saṃyojanānaṃ pajahanavasena. Tenāha ‘‘sabbaloke’’ti. Nibbijjhāti nibbijjhitvā paṭivijjhitvā.

த⁴ம்மபதா³னீதி த⁴ம்மகொட்டா²ஸானி. அனபி⁴ஜ்ஜா² த⁴ம்மபத³ங் நாம அலோபோ⁴ வா அலோப⁴ஸீஸேன அதி⁴க³தஜா²னவிபஸ்ஸனாமக்³க³ப²லனிப்³பா³னானி வா த³ஸஅஸுப⁴வஸேன வா அதி⁴க³தஜா²னாதீ³னி அனபி⁴ஜ்ஜா² த⁴ம்மபத³ங். சதுப்³ரஹ்மவிஹாரவஸேன அதி⁴க³தானி அப்³யாபாதோ³ த⁴ம்மபத³ங். த³ஸானுஸ்ஸதிஆஹாரேபடிக்கூலஸஞ்ஞாவஸேன அதி⁴க³தானி ஸம்மாஸதி த⁴ம்மபத³ங். த³ஸகஸிணஆனாபானவஸேன அதி⁴க³தானி ஸம்மாஸமாதி⁴ த⁴ம்மபத³ங்.

Dhammapadānīti dhammakoṭṭhāsāni. Anabhijjhā dhammapadaṃ nāma alobho vā alobhasīsena adhigatajhānavipassanāmaggaphalanibbānāni vā dasaasubhavasena vā adhigatajhānādīni anabhijjhā dhammapadaṃ. Catubrahmavihāravasena adhigatāni abyāpādo dhammapadaṃ. Dasānussatiāhārepaṭikkūlasaññāvasena adhigatāni sammāsati dhammapadaṃ. Dasakasiṇaānāpānavasena adhigatāni sammāsamādhi dhammapadaṃ.

பஞ்ச சி²ந்தே³தி ஹெட்டா² அபாயுபபத்திஸங்வத்தனிகானி பஞ்ச ஓரம்பா⁴கி³யஸங்யோஜனானி பாதே³ ப³த்³த⁴ரஜ்ஜுங் விய புரிஸோ ஸத்தே²ன ஹெட்டா² மக்³க³த்தயேன சி²ந்தெ³ய்ய. பஞ்ச ஜஹேதி உபரிதே³வலோகஸம்பாபகானி பஞ்ச உத்³த⁴ம்பா⁴கி³யஸங்யோஜனானி புரிஸோ கீ³வாய ப³த்³த⁴ரஜ்ஜுங் விய அரஹத்தமக்³கே³ன ஜஹெய்ய சி²ந்தெ³ய்யேவாதி அத்தோ². பஞ்ச சுத்தரி பா⁴வயேதி உத்³த⁴ம்பா⁴கி³யஸங்யோஜனானங் பஹானத்தா²ய ஸத்³தா⁴தீ³னி பஞ்சிந்த்³ரியானி உத்தரி பா⁴வெய்ய. பஞ்ச ஸங்கா³திகோ³தி ஏவங் ஸந்தே பஞ்சன்னங் ராக³தோ³ஸமோஹமானதி³ட்டி²ஸங்கா³னங் அதிக்கமனேன பஞ்சஸங்கா³திகோ³ ஹுத்வா பி⁴க்கு² ‘‘ஓக⁴திண்ணோ’’தி வுச்சதி, நித்திண்ணசதுரோகோ⁴தி வுச்சதீதி அத்தோ².

Pañca chindeti heṭṭhā apāyupapattisaṃvattanikāni pañca orambhāgiyasaṃyojanāni pāde baddharajjuṃ viya puriso satthena heṭṭhā maggattayena chindeyya. Pañca jaheti uparidevalokasampāpakāni pañca uddhambhāgiyasaṃyojanāni puriso gīvāya baddharajjuṃ viya arahattamaggena jaheyya chindeyyevāti attho. Pañca cuttari bhāvayeti uddhambhāgiyasaṃyojanānaṃ pahānatthāya saddhādīni pañcindriyāni uttari bhāveyya. Pañca saṅgātigoti evaṃ sante pañcannaṃ rāgadosamohamānadiṭṭhisaṅgānaṃ atikkamanena pañcasaṅgātigo hutvā bhikkhu ‘‘oghatiṇṇo’’ti vuccati, nittiṇṇacaturoghoti vuccatīti attho.

அனஞ்ஞாதங் அப்படிவித்³த⁴ங் சதுஸச்சத⁴ம்மங், அமதபத³ங்யேவ வா ஞஸ்ஸாமி ஜானிஸ்ஸாமீதி படிபன்னஸ்ஸ பட²மமக்³க³ட்ட²ஸ்ஸ இந்த்³ரியந்தி அனஞ்ஞாதஞ்ஞஸ்ஸாமீதிந்த்³ரியங். பட²மமக்³க³ஞாணஞ்ஹி தங்புப்³ப³பா⁴க³வஸேன ஏவங் வுத்தங். ஆஜானாதி பட²மமக்³கே³ன ஞாதமரியாத³ங் அனதிக்கமித்வா ஜானாதீதி அஞ்ஞோ, தஸ்ஸ இந்த்³ரியந்தி அஞ்ஞிந்த்³ரியங், ஹெட்டா² தீஸு ப²லேஸு, உபரி தீஸு மக்³கே³ஸு ச ஞாணஸ்ஸேதங் அதி⁴வசனங். அஞ்ஞாதாவினோ சதூஸு ஸச்சேஸு நிட்டி²தகிச்சஸ்ஸ அரஹதோ இந்த்³ரியந்தி அஞ்ஞாதாவிந்த்³ரியங், அக்³க³ப²லஞாணஸ்ஸேதங் அதி⁴வசனங். அனபி⁴ஸமேதஸ்ஸாதி அப்படிவித்³த⁴ஸ்ஸ. அபி⁴ஸமயாயாதி படிவேதா⁴ய.

Anaññātaṃ appaṭividdhaṃ catusaccadhammaṃ, amatapadaṃyeva vā ñassāmi jānissāmīti paṭipannassa paṭhamamaggaṭṭhassa indriyanti anaññātaññassāmītindriyaṃ. Paṭhamamaggañāṇañhi taṃpubbabhāgavasena evaṃ vuttaṃ. Ājānāti paṭhamamaggena ñātamariyādaṃ anatikkamitvā jānātīti añño, tassa indriyanti aññindriyaṃ, heṭṭhā tīsu phalesu, upari tīsu maggesu ca ñāṇassetaṃ adhivacanaṃ. Aññātāvino catūsu saccesu niṭṭhitakiccassa arahato indriyanti aññātāvindriyaṃ, aggaphalañāṇassetaṃ adhivacanaṃ. Anabhisametassāti appaṭividdhassa. Abhisamayāyāti paṭivedhāya.

116.

பா³லலக்க²ணானீதி பா³லஸ்ஸ உபலக்க²ணகாரணானி. பா³லனிமித்தானீதி ‘‘பா³லோ அய’’ந்தி க³ஹேதுங் நிமித்தானி காரணானி. பா³லாபதா³னானீதி பா³லஸ்ஸ போராணானி விருள்ஹானி கம்மானி. ‘‘து³ச்சிந்திதசிந்தீ’’திஆதீ³ஸு து³ச்சிந்திதங் அபி⁴ஜ்ஜ²ங் ப்³யாபாத³ங் மிச்சா²த³ஸ்ஸனஞ்ச சிந்தேதீதி து³ச்சிந்திதசிந்தீ. து³ப்³பா⁴ஸிதங் முஸாவாதா³தி³ங் பா⁴ஸதீதி து³ப்³பா⁴ஸிதபா⁴ஸீ. து³க்கடங் பாணாதிபாதாதி³கம்மங் கரோதீதி து³க்கடகம்மகாரீ. வுத்தவிபரியாயேன ஸுக்கபக்கோ² வேதி³தப்³போ³.

Bālalakkhaṇānīti bālassa upalakkhaṇakāraṇāni. Bālanimittānīti ‘‘bālo aya’’nti gahetuṃ nimittāni kāraṇāni. Bālāpadānānīti bālassa porāṇāni viruḷhāni kammāni. ‘‘Duccintitacintī’’tiādīsu duccintitaṃ abhijjhaṃ byāpādaṃ micchādassanañca cintetīti duccintitacintī. Dubbhāsitaṃ musāvādādiṃ bhāsatīti dubbhāsitabhāsī. Dukkaṭaṃ pāṇātipātādikammaṃ karotīti dukkaṭakammakārī. Vuttavipariyāyena sukkapakkho veditabbo.

பி⁴ய்யோதி உபரூபரி. பகுஜ்ஜெ²ய்யுந்தி விருஜ்ஜெ²ய்யுங். ‘‘பகுப்பெய்யு’’ந்திபி பாடோ². பு⁴ஸேனாதி த³ள்ஹேன. த³ண்டே³னாதி த³ண்ட³தா³னேன. தீ⁴ரோதி பண்டி³தோ ஸப்பஞ்ஞஜாதிகோ. நிஸேத⁴யேதி படிபா³ஹெய்ய. புன கிஞ்சி காதுங் வத்துங் வா அஸமத்த²ங் கரெய்யாதி அத்தோ².

Bhiyyoti uparūpari. Pakujjheyyunti virujjheyyuṃ. ‘‘Pakuppeyyu’’ntipi pāṭho. Bhusenāti daḷhena. Daṇḍenāti daṇḍadānena. Dhīroti paṇḍito sappaññajātiko. Nisedhayeti paṭibāheyya. Puna kiñci kātuṃ vattuṃ vā asamatthaṃ kareyyāti attho.

பரந்தி பச்சத்தி²கங். யோ ஸதோ உபஸம்மதீதி யோ ஸதிமா ஹுத்வா உபஸம்மதி, தஸ்ஸ உபஸமங்யேவாஹங் பா³லஸ்ஸ படிஸேத⁴னங் மஞ்ஞாமீதி அத்தோ².

Paranti paccatthikaṃ. Yo sato upasammatīti yo satimā hutvā upasammati, tassa upasamaṃyevāhaṃ bālassa paṭisedhanaṃ maññāmīti attho.

வஜ்ஜந்தி தோ³ஸங். யதா³ நங் மஞ்ஞதீதி யஸ்மா நங் மஞ்ஞதி. அஜ்ஜா²ருஹதீதி அஜ்ஜொ²த்த²ரதி. கோ³வ பி⁴ய்யோ பலாயினந்தி யதா² கோ³யூதே² தாவதே³வ த்³வே கா³வோ யுஜ்ஜ²ந்தே கோ³க³ணோ ஓலோகெந்தோ திட்ட²தி யாவ ந ஏகோ பலாயதி, யதா³ பன பலாயதி, அத² தங் பலாயீனங் ஸப்³போ³ கோ³க³ணோ பி⁴ய்யோ அஜ்ஜொ²த்த²ரதி, ஏவங் து³ம்மேதோ⁴ க²மந்தங் பி⁴ய்யோ அஜ்ஜொ²த்த²ரதீதி அத்தோ².

Vajjanti dosaṃ. Yadā naṃ maññatīti yasmā naṃ maññati. Ajjhāruhatīti ajjhottharati. Gova bhiyyo palāyinanti yathā goyūthe tāvadeva dve gāvo yujjhante gogaṇo olokento tiṭṭhati yāva na eko palāyati, yadā pana palāyati, atha taṃ palāyīnaṃ sabbo gogaṇo bhiyyo ajjhottharati, evaṃ dummedho khamantaṃ bhiyyo ajjhottharatīti attho.

ஸத³த்த²பரமாதி ஸகத்த²பரமா. க²ந்த்யா பி⁴ய்யோ ந விஜ்ஜதீதி தேஸு ஸகத்த²பரமேஸு அத்தே²ஸு க²ந்திதோ உத்தரிதரோ அஞ்ஞோ அத்தோ² ந விஜ்ஜதி. தமாஹு பரமங் க²ந்திந்தி யோ ப³லவா திதிக்க²தி, தஸ்ஸ தங் க²ந்திங் பரமங் ஆஹு. பா³லப³லங் நாம அஞ்ஞாணப³லங். தங் யஸ்ஸ ப³லங், அப³லமேவ தங், ந தங் ப³லந்தி ஆஹு கதெ²ந்தி தீ³பெந்தி. த⁴ம்மகு³த்தஸ்ஸாதி த⁴ம்மேன ரக்கி²தஸ்ஸ த⁴ம்மங் வா ரக்க²ந்தஸ்ஸ. படிவத்தாதி படிப்ப²ரித்வா வத்தா, படிப்பரித்வா வா யங் வா தங் வா வதெ³ய்யாஸி. த⁴ம்மட்ட²ங் பன சாலேதுங் ஸமத்தோ² நாம நத்தி². தஸ்ஸேவ தேன பாபியோதி தேன கோதே⁴ன தஸ்ஸேவ புக்³க³லஸ்ஸ பாபங் ஹோதி. கதரஸ்ஸாதி ? யோ குத்³த⁴ங் படிகுஜ்ஜ²தி, தஸ்ஸ. தத்த² குத்³த⁴ந்தி ஸம்பதா³னே உபயோக³வசனங், குத்³த⁴ஸ்ஸாதி அத்தோ². திகிச்ச²ந்தானந்தி ஏகவசனே ப³ஹுவசனங், திகிச்ச²ந்தந்தி அத்தோ². ஜனா மஞ்ஞந்தீதி ஏவரூபங் அத்தனோ ச பரஸ்ஸ சாதி உபி⁴ன்னங் அத்த²ங் திகிச்ச²ந்தங் நிப்பா²தெ³ந்தங் புக்³க³லங் ‘‘பா³லோ அய’’ந்தி அந்த⁴பா³லபுது²ஜ்ஜனா ஏவங் மஞ்ஞந்தி. யே த⁴ம்மஸ்ஸ அகோவிதா³தி யே சதுஸச்சத⁴ம்மே அகோவிதா³ அச்சே²கா, தே ஏவங் மஞ்ஞந்தீதி அத்தோ².

Sadatthaparamāti sakatthaparamā. Khantyā bhiyyo na vijjatīti tesu sakatthaparamesu atthesu khantito uttaritaro añño attho na vijjati. Tamāhu paramaṃ khantinti yo balavā titikkhati, tassa taṃ khantiṃ paramaṃ āhu. Bālabalaṃ nāma aññāṇabalaṃ. Taṃ yassa balaṃ, abalameva taṃ, na taṃ balanti āhu kathenti dīpenti. Dhammaguttassāti dhammena rakkhitassa dhammaṃ vā rakkhantassa. Paṭivattāti paṭippharitvā vattā, paṭipparitvā vā yaṃ vā taṃ vā vadeyyāsi. Dhammaṭṭhaṃ pana cāletuṃ samattho nāma natthi. Tasseva tena pāpiyoti tena kodhena tasseva puggalassa pāpaṃ hoti. Katarassāti ? Yo kuddhaṃ paṭikujjhati, tassa. Tattha kuddhanti sampadāne upayogavacanaṃ, kuddhassāti attho. Tikicchantānanti ekavacane bahuvacanaṃ, tikicchantanti attho. Janā maññantīti evarūpaṃ attano ca parassa cāti ubhinnaṃ atthaṃ tikicchantaṃ nipphādentaṃ puggalaṃ ‘‘bālo aya’’nti andhabālaputhujjanā evaṃ maññanti. Ye dhammassa akovidāti ye catusaccadhamme akovidā acchekā, te evaṃ maññantīti attho.

117.

பத்தந்தி அதி⁴க³தங் ஏதரஹி அனுபு⁴ய்யமானங் காமூபகரணங் பத்தப்³ப³ந்தி ததே³வ அனாக³தே அதி⁴க³ந்தப்³ப³ங் அனுப⁴விதப்³ப³ங், உப⁴யமேதங் ரஜானுகிண்ணந்தி தது³ப⁴யம்பி ராக³ரஜாதீ³ஹி அவகிண்ணங் . ஆதுரஸ்ஸாதி ராகா³தி³கிலேஸாதுரஸ்ஸ. அனுஸிக்க²தோதி கிலேஸப³ஹுலபுக்³க³லே அனுஸிக்க²தோ. யே ச ஸிக்கா²ஸாராதி யே யதா²ஸமாதி³ன்னங் ஸீலவதாதி³ஸங்கா²தங் ஸிக்க²ங் ஸாரதோ க³ஹெத்வா டி²தா. தேனாஹ – ‘‘ஸீலங் வதங் ஜீவிதங் ப்³ரஹ்மசரிய’’ந்தி. தத்த² யங் ‘‘ந கரோமீ’’தி ஓரமதி, தங் ஸீலங். யங் வேஸபோ⁴ஜனகிச்சசரணாதி³, தங் வதங். ஜீவிதந்தி ஆஜீவோ. ப்³ரஹ்மசரியந்தி மேது²னவிரதி. உபட்டா²னஸாராதி ஏதேஸங் ஸீலாதீ³னங் அனுட்டா²னஸாரா. ஏதேஹி ஏவ ஸங்ஸாரஸுத்³தீ⁴தி தானி ஸாரதோ க³ஹெத்வா டி²தாதி அத்தோ².

Pattanti adhigataṃ etarahi anubhuyyamānaṃ kāmūpakaraṇaṃ pattabbanti tadeva anāgate adhigantabbaṃ anubhavitabbaṃ, ubhayametaṃ rajānukiṇṇanti tadubhayampi rāgarajādīhi avakiṇṇaṃ . Āturassāti rāgādikilesāturassa. Anusikkhatoti kilesabahulapuggale anusikkhato. Ye ca sikkhāsārāti ye yathāsamādinnaṃ sīlavatādisaṅkhātaṃ sikkhaṃ sārato gahetvā ṭhitā. Tenāha – ‘‘sīlaṃ vataṃ jīvitaṃ brahmacariya’’nti. Tattha yaṃ ‘‘na karomī’’ti oramati, taṃ sīlaṃ. Yaṃ vesabhojanakiccacaraṇādi, taṃ vataṃ. Jīvitanti ājīvo. Brahmacariyanti methunavirati. Upaṭṭhānasārāti etesaṃ sīlādīnaṃ anuṭṭhānasārā. Etehi eva saṃsārasuddhīti tāni sārato gahetvā ṭhitāti attho.

இச்சேதே உபோ⁴ அந்தாதி இதி ஸீலப்³ப³தபராமாஸமுகே²ன அத்தகிலமதா²னுயோகோ³, காமேஸு அனவஜ்ஜஸஞ்ஞிதாமுகே²ன காமஸுக²ல்லிகானுயோகோ³ சாதி ஏதே உபோ⁴ அந்தா. தே ச கோ² யதா²க்கமங் ஆயதிங் பத்தப்³பே³, ஏதரஹி பத்தே ச ராக³ரஜாதி³ஓகிண்ணே காமகு³ணே அல்லீனேஹி கிலேஸாதுரானங் அனுஸிக்க²ந்தேஹி, ஸயஞ்ச கிலேஸாதுரேஹேவ படிபஜ்ஜிதப்³பா³, ததோ ஏவ ச தே கடஸிவட்³ட⁴னா அபராபரங் ஜராமரணேஹி ஸிவதி²காய வட்³ட⁴னஸீலா ஏகந்தேனேவ கடஸிங் வட்³டெ⁴ந்தி, ஸயங் வட்³ட⁴ந்தா பரே ச அந்தத்³வயே ஸமாத³பெந்தா வட்³டா⁴பெந்தி சாதி அத்தோ².

Iccete ubho antāti iti sīlabbataparāmāsamukhena attakilamathānuyogo, kāmesu anavajjasaññitāmukhena kāmasukhallikānuyogo cāti ete ubho antā. Te ca kho yathākkamaṃ āyatiṃ pattabbe, etarahi patte ca rāgarajādiokiṇṇe kāmaguṇe allīnehi kilesāturānaṃ anusikkhantehi, sayañca kilesātureheva paṭipajjitabbā, tato eva ca te kaṭasivaḍḍhanā aparāparaṃ jarāmaraṇehi sivathikāya vaḍḍhanasīlā ekanteneva kaṭasiṃ vaḍḍhenti, sayaṃ vaḍḍhantā pare ca antadvaye samādapentā vaḍḍhāpenti cāti attho.

உபோ⁴ அந்தே அனபி⁴ஞ்ஞாயாதி யதா²வுத்தே உபோ⁴ அந்தே அஜானித்வா. ஓலீயந்தி ஏகேதி ‘‘ஸஸ்ஸதோ அத்தா ச லோகோ சா’’தி ஓலீயனதண்ஹாபி⁴னிவேஸவஸேன அவலீயந்தி ஏகச்சே. அதிதா⁴வந்தி ஏகேதி ஏகச்சே – ‘‘உச்சி²ஜ்ஜதி வினஸ்ஸதி அத்தா ச லோகோ சா’’தி அதிதா⁴வனாபி⁴னிவேஸவஸேன அதிக்கமந்தி.

Ubho ante anabhiññāyāti yathāvutte ubho ante ajānitvā. Olīyanti eketi ‘‘sassato attā ca loko cā’’ti olīyanataṇhābhinivesavasena avalīyanti ekacce. Atidhāvanti eketi ekacce – ‘‘ucchijjati vinassati attā ca loko cā’’ti atidhāvanābhinivesavasena atikkamanti.

ந அமஞ்ஞிங்ஸு தேஸஞ்ச தண்ஹாதி³மஞ்ஞனானங் பஹீனத்தா. ததோ ஏவ அனுபாதா³பரினிப்³பா³னதோ திவித⁴ம்பி வட்டங் தேஸங் பஞ்ஞாபனாய நத்தீ²தி.

Naamaññiṃsu tesañca taṇhādimaññanānaṃ pahīnattā. Tato eva anupādāparinibbānato tividhampi vaṭṭaṃ tesaṃ paññāpanāya natthīti.

ஜஞ்ஞாதி ஜானெய்ய. ஸங்யுஜேதி ஸங்யோஜெய்ய. மானுஸந்தி மனுஸ்ஸானங் இத³ந்தி மானுஸங், மனுஸ்ஸப⁴வபரியாபன்னங். கிஞ்ஹி தஸ்ஸ ஸகங் ஹோதீதி தஸ்ஸ மச்சுமுக²ங் பவிஸந்தஸ்ஸ ஸத்தஸ்ஸ கிங் அஞ்ஞங் ஸகங் நாம அஞ்ஞத்ர கல்யாணகம்மதோ. கம்மஸ்ஸகா ஹி ஸத்தா. தேனாஹ – ‘‘தஸ்மா கரெய்ய கல்யாண’’ந்திஆதி³. தத்த² ஸம்பராயிகந்தி ஸம்பராயப²லனிப்³ப³த்தகங்.

Jaññāti jāneyya. Saṃyujeti saṃyojeyya. Mānusanti manussānaṃ idanti mānusaṃ, manussabhavapariyāpannaṃ. Kiñhi tassa sakaṃ hotīti tassa maccumukhaṃ pavisantassa sattassa kiṃ aññaṃ sakaṃ nāma aññatra kalyāṇakammato. Kammassakā hi sattā. Tenāha – ‘‘tasmā kareyya kalyāṇa’’ntiādi. Tattha samparāyikanti samparāyaphalanibbattakaṃ.

118.

இமே த⁴ம்மாதி இமே குஸலா வா அகுஸலா வா த⁴ம்மா. ஏவங்க³ஹிதாதி ஏவங் ஸமாதி³ன்னா உப்பாதி³தா. இத³ங் ப²லந்தி இத³ங் இட்ட²விபாகங் அனிட்ட²விபாகஞ்ச ப²லங். அயமத்தோ²தி அயங் வுட்³டி⁴, அயங் ஹானீதி அத்தோ². அஞ்ஞம்பி ஏவங்ஜாதியந்தி ஏகங்ஸப்³யாகரணீயங் வத³தி.

Ime dhammāti ime kusalā vā akusalā vā dhammā. Evaṃgahitāti evaṃ samādinnā uppāditā. Idaṃ phalanti idaṃ iṭṭhavipākaṃ aniṭṭhavipākañca phalaṃ. Ayamatthoti ayaṃ vuḍḍhi, ayaṃ hānīti attho. Aññampi evaṃjātiyanti ekaṃsabyākaraṇīyaṃ vadati.

ஆகங்க²தோ ந ஜானெய்யுந்தி தத்த² யேன ஹேதுனா ப⁴க³வதோ யா ஆகங்கா², ஸா அஞ்ஞேஸங் அவிஸயோதி ஆஹ – ‘‘கிந்தங் ப⁴க³வா ஆகங்க²தீதி. இத³ங் அவிஸஜ்ஜனீய’’ந்தி.

Ākaṅkhato na jāneyyunti tattha yena hetunā bhagavato yā ākaṅkhā, sā aññesaṃ avisayoti āha – ‘‘kintaṃ bhagavā ākaṅkhatīti. Idaṃ avisajjanīya’’nti.

எத்தகோதி ஏதபரிமாணோ. ஸீலக்க²ந்தே⁴தி ஸீலக்க²ந்த⁴ஹேது. ‘‘ஸீலக்க²ந்தே⁴னா’’திபி பாடோ². ஸேஸபதே³ஸுபி ஏஸேவ நயோ. இரியாயந்தி காயவசீஸமாசாரே. பபா⁴வேதி ஆனுபா⁴வே. ஹிதேஸிதாயந்தி மெத்தாய. இத்³தி⁴யந்தி இத்³தி⁴விதா⁴ய. எத்தகா பு³த்³த⁴கு³ணா, தே ச பச்சேகங் ஏவங்பபா⁴வா. ததா² மக்³க³ப²லனிப்³பா³னானி ஏவமானுபா⁴வானி. அரியஸங்கோ⁴ ஏவங்வித⁴கு³ணேஹி யுத்தோதி.

Ettakoti etaparimāṇo. Sīlakkhandheti sīlakkhandhahetu. ‘‘Sīlakkhandhenā’’tipi pāṭho. Sesapadesupi eseva nayo. Iriyāyanti kāyavacīsamācāre. Pabhāveti ānubhāve. Hitesitāyanti mettāya. Iddhiyanti iddhividhāya. Ettakā buddhaguṇā, te ca paccekaṃ evaṃpabhāvā. Tathā maggaphalanibbānāni evamānubhāvāni. Ariyasaṅgho evaṃvidhaguṇehi yuttoti.

திண்ணங் ரதனானங் மஹானுபா⁴வதா ந ஸப்³ப³தா² அஞ்ஞேஸங் விஸயோ, ப⁴க³வதோ ஏவ விஸயோதி ஆஹ – ‘‘பு³த்³த⁴விஸயோ அவிஸஜ்ஜனீயோ’’தி. தேன யோ அஞ்ஞோபி அத்தோ² பு³த்³த⁴விஸயோ, ஸோ அவிஸஜ்ஜனீயோதி த³ஸ்ஸேதி. வுத்தஞ்ஹேதங் ப⁴க³வதா – ‘‘பு³த்³த⁴விஸயோ அசிந்தெய்யோ ந சிந்தேதப்³போ³, யங் சிந்தெந்தோ உம்மாத³ஸ்ஸ விகா⁴தஸ்ஸ பா⁴கீ³ அஸ்ஸா’’தி (அ॰ நி॰ 4.77). கதமா புப்³பா³ கோடீதி அவிஸஜ்ஜனீயந்தி ‘‘கதமா புப்³பா³ கோடீ’’தி கேனசி கதங் புச்ச²னங் அவிஸஜ்ஜனீயங். கஸ்மா? ஸங்ஸாரஸ்ஸ புரிமாய கோடியா அபா⁴வதோ. தேனேவாஹ – ‘‘புரிமா, பி⁴க்க²வே, கோடி ந பஞ்ஞாயதீ’’தி (அ॰ நி॰ 10.61). தத்த² ந பஞ்ஞாயதீதி ந தி³ஸ்ஸதி, ந உபலப்³ப⁴தீதி அத்தோ². ந பஞ்ஞாயதீதி அஞ்ஞஸ்ஸ ஞாணவிஸயோ ந ஹோதீதி பன அத்த²ங் ஸந்தா⁴ய ‘‘ந பஞ்ஞாயதீதி ஸாவகானங் ஞாணவேகல்லேனா’’திஆதி³ வுத்தங். தத்த² அத்தூபனாயிகாதி அத்தா உபனேதப்³போ³ ஏதிஸ்ஸாதி அத்தூபனாயிகா. நத்தி² பு³த்³தா⁴னங் ப⁴க³வந்தானங் அவிஜானநாதி ஏதேன புரிமாய கோடியா அபா⁴வதோ ஏவ ந பஞ்ஞாயதி, ந தத்த² ஞாணஸ்ஸ படிகா⁴தோதி த³ஸ்ஸேதி.

Tiṇṇaṃ ratanānaṃ mahānubhāvatā na sabbathā aññesaṃ visayo, bhagavato eva visayoti āha – ‘‘buddhavisayo avisajjanīyo’’ti. Tena yo aññopi attho buddhavisayo, so avisajjanīyoti dasseti. Vuttañhetaṃ bhagavatā – ‘‘buddhavisayo acinteyyo na cintetabbo, yaṃ cintento ummādassa vighātassa bhāgī assā’’ti (a. ni. 4.77). Katamā pubbā koṭīti avisajjanīyanti ‘‘katamā pubbā koṭī’’ti kenaci kataṃ pucchanaṃ avisajjanīyaṃ. Kasmā? Saṃsārassa purimāya koṭiyā abhāvato. Tenevāha – ‘‘purimā, bhikkhave, koṭi na paññāyatī’’ti (a. ni. 10.61). Tattha na paññāyatīti na dissati, na upalabbhatīti attho. Na paññāyatīti aññassa ñāṇavisayo na hotīti pana atthaṃ sandhāya ‘‘na paññāyatīti sāvakānaṃ ñāṇavekallenā’’tiādi vuttaṃ. Tattha attūpanāyikāti attā upanetabbo etissāti attūpanāyikā. Natthi buddhānaṃ bhagavantānaṃ avijānanāti etena purimāya koṭiyā abhāvato eva na paññāyati, na tattha ñāṇassa paṭighātoti dasseti.

யங் பன அத்தி², தங் அஞ்ஞேஸங் அப்பமெய்யம்பி ப⁴க³வதோ ந அப்பமெய்யந்தி ப⁴க³வதோ ஸப்³ப³த்த² அப்படிஹதஞ்ஞாணதங் த³ஸ்ஸேதுங் ‘‘யதா² ப⁴க³வா கோகாலிகங் பி⁴க்கு²ங் ஆரப்³பா⁴’’திஆதி³மாஹ. தத்த² அஞ்ஞதரங் பி⁴க்கு²ந்தி நாமகொ³த்தேன அபாகடங். ‘‘கீவ தீ³க⁴ங் நு கோ², ப⁴ந்தே, பது³மே நிரயே ஆயுப்பமாண’’ந்தி பஞ்ஹங் புச்சி²த்வா நிஸின்னங் ஏகங் பி⁴க்கு²ங் ஏவமாஹாதி. எத்தா²யங் பாட²ஸேஸோ – தீ³க⁴ங் கோ², பி⁴க்கு², பது³மே நிரயே ஆயுப்பமாணங், தங் ந ஸுகரங் ஸங்கா²துங் ‘‘எத்தகானி வஸ்ஸானீ’’தி வா ‘‘எத்தகானி வஸ்ஸஸதானீ’’தி வா ‘‘எத்தகானி வஸ்ஸஸஹஸ்ஸானீ’’தி வா ‘‘எத்தகானி வஸ்ஸஸதஸஹஸ்ஸானீ’’தி வாதி. ஸக்கா பன, ப⁴ந்தே, உபமா காதுந்தி. ‘‘ஸக்கா பி⁴க்கூ²’’தி ப⁴க³வா அவோச. ஸெய்யதா²பி, பி⁴க்கு², வீஸதிகா²ரிகோ கோஸலகோ திலவாஹோ. ததோ புரிஸோ வஸ்ஸஸதஸ்ஸ வஸ்ஸஸதஸ்ஸ அச்சயேன ஏகமேகங் திலங் உத்³த⁴ரெய்ய. கி²ப்பதரங் கோ² ஸோ, பி⁴க்கு², வீஸதிகா²ரிகோ கோஸலகோ திலவாஹோ இமினா உபக்கமேன பரிக்க²யங் பரியாதா³னங் க³ச்செ²ய்ய, ந த்வேவ ஏகோ அப்³பு³தோ³ நிரயோ. ஸெய்யதா²பி, பி⁴க்கு², வீஸதி அப்³பு³தா³ நிரயா, ஏவமேகோ நிரப்³பு³தோ³ நிரயோதிஆதி³ (ஸங்॰ நி॰ 1.181; அ॰ நி॰ 10.89; ஸு॰ நி॰ கோகாலிகஸுத்த).

Yaṃ pana atthi, taṃ aññesaṃ appameyyampi bhagavato na appameyyanti bhagavato sabbattha appaṭihataññāṇataṃ dassetuṃ ‘‘yathā bhagavā kokālikaṃ bhikkhuṃ ārabbhā’’tiādimāha. Tattha aññataraṃ bhikkhunti nāmagottena apākaṭaṃ. ‘‘Kīva dīghaṃ nu kho, bhante, padume niraye āyuppamāṇa’’nti pañhaṃ pucchitvā nisinnaṃ ekaṃ bhikkhuṃ evamāhāti. Etthāyaṃ pāṭhaseso – dīghaṃ kho, bhikkhu, padume niraye āyuppamāṇaṃ, taṃ na sukaraṃ saṅkhātuṃ ‘‘ettakāni vassānī’’ti vā ‘‘ettakāni vassasatānī’’ti vā ‘‘ettakāni vassasahassānī’’ti vā ‘‘ettakāni vassasatasahassānī’’ti vāti. Sakkā pana, bhante, upamā kātunti. ‘‘Sakkā bhikkhū’’ti bhagavā avoca. Seyyathāpi, bhikkhu, vīsatikhāriko kosalako tilavāho. Tato puriso vassasatassa vassasatassa accayena ekamekaṃ tilaṃ uddhareyya. Khippataraṃ kho so, bhikkhu, vīsatikhāriko kosalako tilavāho iminā upakkamena parikkhayaṃ pariyādānaṃ gaccheyya, na tveva eko abbudo nirayo. Seyyathāpi, bhikkhu, vīsati abbudā nirayā, evameko nirabbudo nirayotiādi (saṃ. ni. 1.181; a. ni. 10.89; su. ni. kokālikasutta).

தத்த² வீஸதிகா²ரிகோதி மாக³த⁴கேன பத்தே²ன சத்தாரோ பத்தா² கோஸலரட்டே² ஏகோ பத்தோ² ஹோதி. தேன பத்தே²ன சத்தாரோ பத்தா² ஆள்ஹகங், சத்தாரி ஆள்ஹகானி தோ³ணங், சதுதோ³ணா மானிகா, சதுமானிகா கா²ரீ. தாய கா²ரியா வீஸதிகா²ரிகோ திலவாஹோ. திலவாஹோதி திலஸகடங். அப்³பு³தோ³ நிரயோதி அப்³பு³தோ³ நாம ஏகோ பச்சேகனிரயோ நத்தி², அவீசிம்ஹி ஏவ பன அப்³பு³த³க³ணனாய பச்சனோகாஸோ ‘‘அப்³பு³தோ³ நிரயோ’’தி வுத்தோ. ஏஸ நயோ நிரப்³பு³தா³தீ³ஸுபி.

Tattha vīsatikhārikoti māgadhakena patthena cattāro patthā kosalaraṭṭhe eko pattho hoti. Tena patthena cattāro patthā āḷhakaṃ, cattāri āḷhakāni doṇaṃ, catudoṇā mānikā, catumānikā khārī. Tāya khāriyā vīsatikhāriko tilavāho. Tilavāhoti tilasakaṭaṃ. Abbudo nirayoti abbudo nāma eko paccekanirayo natthi, avīcimhi eva pana abbudagaṇanāya paccanokāso ‘‘abbudo nirayo’’ti vutto. Esa nayo nirabbudādīsupi.

தத்த² வஸ்ஸக³ணனாபி ஏவங் வேதி³தப்³பா³ – யதா² ஹி ஸதங்ஸதஸஹஸ்ஸானி கோடி ஹோதி. ஏவங் ஸதங்ஸதஸஹஸ்ஸகோடியோ பகோடி நாம. ஸதங்ஸதஸஹஸ்ஸபகோடியோ கோடிபகோடி நாம. ஸதங்ஸதஸஹஸ்ஸகோடிபகோடியோ நஹுதங். ஸதங்ஸதஸஹஸ்ஸனஹுதானி நின்னஹுதங். ஸதங்ஸதஸஹஸ்ஸானி நின்னஹுதானி ஏகோ அப்³பு³தோ³. ததோ வீஸதிகு³ணோ நிரப்³பு³தோ³. ஏஸ நயோ ஸப்³ப³த்த². அயஞ்ச க³ணனா அபரிசிதானங் து³க்கராதி வுத்தங் – ‘‘தங் ந ஸுகரங் ஸங்கா²து’’ந்தி. கேசி பன ‘‘தத்த² தத்த² பரிதே³வனானத்தேன கம்மகாரணனானத்தேனபி இமானி நாமானி லத்³தா⁴னீ’’தி வத³ந்தி. அபரே ‘‘ஸீதனரகா ஏதே’’தி. சித்தங் ஆகா⁴தெத்வாதி சித்தங் பதூ³ஸெத்வா.

Tattha vassagaṇanāpi evaṃ veditabbā – yathā hi sataṃsatasahassāni koṭi hoti. Evaṃ sataṃsatasahassakoṭiyo pakoṭi nāma. Sataṃsatasahassapakoṭiyo koṭipakoṭi nāma. Sataṃsatasahassakoṭipakoṭiyo nahutaṃ. Sataṃsatasahassanahutāni ninnahutaṃ. Sataṃsatasahassāni ninnahutāni eko abbudo. Tato vīsatiguṇo nirabbudo. Esa nayo sabbattha. Ayañca gaṇanā aparicitānaṃ dukkarāti vuttaṃ – ‘‘taṃ na sukaraṃ saṅkhātu’’nti. Keci pana ‘‘tattha tattha paridevanānattena kammakāraṇanānattenapi imāni nāmāni laddhānī’’ti vadanti. Apare ‘‘sītanarakā ete’’ti. Cittaṃ āghātetvāti cittaṃ padūsetvā.

119.

கத²ங் ஜினோதி பகாரபுச்சா². கேன ஜினோதி காரணபுச்சா². கேன காரணேன கேன ஹேதுனா காய படிபத்தியா ஜினோதி புச்ச²தி. கத²ந்தி பன கேன பகாரேன கிங் அதீதானங், உதா³ஹு அனாக³தானங் பச்சுப்பன்னானங் கிலேஸானங் பஹானேன ஜினோதி புச்ச²தி, தஸ்மா தங் ‘‘விஸஜ்ஜனீய’’ந்தி வுத்தங். கதமோ ஜினோதி கிங் ரூபங் ஜினோ, உதா³ஹு வேத³னா ஸஞ்ஞா ஸங்கா²ரா விஞ்ஞாணங் ஜினோ. ரூபாதி³வினிமுத்தோ வா அஞ்ஞோ ஜினோ, யோ ‘‘அத்தா’’தி வுச்சதீதி இமமத்த²ங் ஸந்தா⁴யாஹ ‘‘அவிஸஜ்ஜனீய’’ந்தி. கித்தகோதி பமாணதோ கிங்பரிமாணோ.

Kathaṃ jinoti pakārapucchā. Kena jinoti kāraṇapucchā. Kena kāraṇena kena hetunā kāya paṭipattiyā jinoti pucchati. Kathanti pana kena pakārena kiṃ atītānaṃ, udāhu anāgatānaṃ paccuppannānaṃ kilesānaṃ pahānena jinoti pucchati, tasmā taṃ ‘‘visajjanīya’’nti vuttaṃ. Katamo jinoti kiṃ rūpaṃ jino, udāhu vedanā saññā saṅkhārā viññāṇaṃ jino. Rūpādivinimutto vā añño jino, yo ‘‘attā’’ti vuccatīti imamatthaṃ sandhāyāha ‘‘avisajjanīya’’nti. Kittakoti pamāṇato kiṃparimāṇo.

அத்தி² ததா²க³தோதி அத்தி² ஸத்தோ. ய்வாயமாயஸ்மா ‘‘ஏவங்னாமோ ஏவங்கொ³த்தோ’’தி பஞ்சக்க²ந்தே⁴ உபாதா³ய பஞ்ஞபீயதி, தஸ்ஸ புக்³க³லஸ்ஸ அதி⁴ப்பேதத்தா வுத்தங் ‘‘விஸஜ்ஜனீய’’ந்தி. ரூபங் ததா²க³தோதி ரூபங் அத்தாதி ஸக்காயதி³ட்டி²வஸேன புச்ச²தீதி கத்வா வுத்தங் ‘‘அவிஸஜ்ஜனீய’’ந்தி. இமினா நயேன ஸப்³ப³பதே³ஸு அத்தோ² வேதி³தப்³போ³.

Atthitathāgatoti atthi satto. Yvāyamāyasmā ‘‘evaṃnāmo evaṃgotto’’ti pañcakkhandhe upādāya paññapīyati, tassa puggalassa adhippetattā vuttaṃ ‘‘visajjanīya’’nti. Rūpaṃ tathāgatoti rūpaṃ attāti sakkāyadiṭṭhivasena pucchatīti katvā vuttaṃ ‘‘avisajjanīya’’nti. Iminā nayena sabbapadesu attho veditabbo.

120.

பா³லங் பீட²ஸமாருள்ஹந்திஆதீ³னி ஸாமிஅத்தே² உபயோக³வசனானி. காயேன து³ச்சரிதானீதி காயேன து³ட்டு² கதானி. ஓலப்³ப⁴ந்தீதி அவலம்ப³ந்தி அவத்த²ரியந்தி. ஸேஸபத³த்³வயங் தஸ்ஸேவ வேவசனங். ஓலம்ப³னாதி³ஆகாரேன ஹி தானி உபட்ட²ஹந்தி, தஸ்மா ஏவங் வுத்தங். மஹதந்தி மஹந்தானங். பத²வியங் ஓலம்ப³ந்தீதி பத²விதலே பத்த²ரந்தி. ஸேஸபத³த்³வயங் தஸ்ஸேவ வேவசனங். பத்த²ரணாகாரோயேவ ஹேஸ. தத்ர, பி⁴க்க²வே, பா³லஸ்ஸாதி தஸ்மிங் உபட்ட²ஹனாகாரே பா³லஸ்ஸ ஏவங் ஹோதி.

Bālaṃ pīṭhasamāruḷhantiādīni sāmiatthe upayogavacanāni. Kāyena duccaritānīti kāyena duṭṭhu katāni. Olabbhantīti avalambanti avatthariyanti. Sesapadadvayaṃ tasseva vevacanaṃ. Olambanādiākārena hi tāni upaṭṭhahanti, tasmā evaṃ vuttaṃ. Mahatanti mahantānaṃ. Pathaviyaṃ olambantīti pathavitale pattharanti. Sesapadadvayaṃ tasseva vevacanaṃ. Pattharaṇākāroyeva hesa. Tatra, bhikkhave, bālassāti tasmiṃ upaṭṭhahanākāre bālassa evaṃ hoti.

லாபா⁴ வோ, பி⁴க்க²வேதி பி⁴க்க²வே, யே இமே தும்ஹேஹி படிலத்³தா⁴ மனுஸ்ஸத்தஸத்³தா⁴படிலாபா⁴த³யோ, லாபா⁴ வோ தும்ஹாகங் லாபா⁴ ஏவ. ஸுலத்³த⁴ந்தி யம்பித³ங் பப்³ப³ஜித்வா சதுபாரிஸுத்³தி⁴ஸீலாதி³ஸம்பாத³னங் லத்³த⁴ங், தம்பி ஸுலத்³த⁴ங். க²ணோ வோ படிலத்³தோ⁴தி அட்ட²அக்க²ணவஜ்ஜிதோ நவமோயங் க²ணோ படிலத்³தோ⁴ மக்³க³ப்³ரஹ்மசரியவாஸாய. ‘‘தி³ட்டா² மயா’’திஆதி³னா ஏகதே³ஸனித³ஸ்ஸனேன அட்ட² அக்க²ணே விபா⁴வேதி.

Lābhāvo, bhikkhaveti bhikkhave, ye ime tumhehi paṭiladdhā manussattasaddhāpaṭilābhādayo, lābhā vo tumhākaṃ lābhā eva. Suladdhanti yampidaṃ pabbajitvā catupārisuddhisīlādisampādanaṃ laddhaṃ, tampi suladdhaṃ. Khaṇo vo paṭiladdhoti aṭṭhaakkhaṇavajjito navamoyaṃ khaṇo paṭiladdho maggabrahmacariyavāsāya. ‘‘Diṭṭhā mayā’’tiādinā ekadesanidassanena aṭṭha akkhaṇe vibhāveti.

121.

யஹிங் யஹிந்தி யங் யங் து³க்³க³திங் யோ க³ச்ச²தி. ஸோ நங் அத⁴ம்மோதி யோ அத⁴ம்மோ தேன சரிதோ, ஸோ நங் அத⁴ம்மசாரிங் புக்³க³லங். ஹனாதீதி பா³த⁴தி.

Yahiṃ yahinti yaṃ yaṃ duggatiṃ yo gacchati. So naṃ adhammoti yo adhammo tena carito, so naṃ adhammacāriṃ puggalaṃ. Hanātīti bādhati.

அப்பேஸக்க²தாதி அப்பானுபா⁴வதா. து³ப்³ப³ண்ணதாதி விரூபதா பீ³ப⁴ச்ச²தா. து³ப்பஞ்ஞதாதி நிப்பஞ்ஞதா அஹேதுகபடிஸந்தி⁴வஸேன ஏளமூக³தா.

Appesakkhatāti appānubhāvatā. Dubbaṇṇatāti virūpatā bībhacchatā. Duppaññatāti nippaññatā ahetukapaṭisandhivasena eḷamūgatā.

122.

வாசானுரக்கீ²தி சதுன்னங் வசீது³ச்சரிதானங் பரிவஜ்ஜனேன வாசானுரக்கீ². அபி⁴ஜ்ஜா²தீ³னங் அனுப்பாத³னேன மனஸா ஸுட்டு² ஸங்வுதோ. பாணாதிபாதாத³யோ பஜஹந்தோ காயேன ச அகுஸலங் ந கயிரா, ஏதே தயோ கம்மபதே² விஸோத⁴யே. ஏவங் விஸோதெ⁴ந்தோ ஹி ஸீலக்க²ந்தா⁴தீ³னங் ஏஸகேஹி பு³த்³தா⁴தீ³ஹி இஸீஹி பவேதி³தங் அரியங் அட்ட²ங்கி³கங் மக்³க³ங் ஆராதெ⁴ய்யாதி. து³க்கடந்தி காயேன வாசாய மனஸா ச து³க்கடங் ஸாவஜ்ஜங் து³க்கு²த்³ரயங் து³க்³க³திஸங்வத்தனியங் கம்மங் யஸ்ஸ நத்தி². ஸங்வுதங் தீஹி டா²னேஹீதி ஏதேஹி தீஹி காரணேஹி காயது³ச்சரிதாதீ³னங் பவேஸனிவாரணதோ பிஹிதங், தங் அஹங் ‘‘ப்³ராஹ்மண’’ந்தி வதா³மீதி.

Vācānurakkhīti catunnaṃ vacīduccaritānaṃ parivajjanena vācānurakkhī. Abhijjhādīnaṃ anuppādanena manasā suṭṭhu saṃvuto. Pāṇātipātādayo pajahanto kāyena ca akusalaṃ na kayirā, ete tayo kammapathe visodhaye. Evaṃ visodhento hi sīlakkhandhādīnaṃ esakehi buddhādīhi isīhi paveditaṃ ariyaṃ aṭṭhaṅgikaṃ maggaṃ ārādheyyāti. Dukkaṭanti kāyena vācāya manasā ca dukkaṭaṃ sāvajjaṃ dukkhudrayaṃ duggatisaṃvattaniyaṃ kammaṃ yassa natthi. Saṃvutaṃ tīhiṭhānehīti etehi tīhi kāraṇehi kāyaduccaritādīnaṃ pavesanivāraṇato pihitaṃ, taṃ ahaṃ ‘‘brāhmaṇa’’nti vadāmīti.

அச்சந்தது³ஸ்ஸீல்யந்தி ஏகந்தது³ஸ்ஸீலபா⁴வோ. கி³ஹீ வாபி ஜாதிதோ பட்டா²ய த³ஸ அகுஸலகம்மபதே² கரொந்தோ, பப்³ப³ஜிதோ வாபி உபஸம்பன்னதி³வஸதோ பட்டா²ய க³ருகாபத்திங் ஆபஜ்ஜமானோ அச்சந்தது³ஸ்ஸீலோ நாம. இத⁴ பன யோ த்³வீஸு தீஸு அத்தபா⁴வேஸு து³ஸ்ஸீலோ, தஸ்ஸ க³தியா ஆக³தங் து³ஸ்ஸீலபா⁴வங் ஸந்தா⁴யேதங் வுத்தங். து³ஸ்ஸீலபா⁴வோதி செத்த² து³ஸ்ஸீலஸ்ஸ ச² த்³வாரானி நிஸ்ஸாய உப்பன்னா தண்ஹா வேதி³தப்³பா³. மாலுவா ஸாலமிவொத்த²தந்தி யஸ்ஸ புக்³க³லஸ்ஸ தங் தண்ஹாஸங்கா²தங் து³ஸ்ஸீல்யங். யதா² நாம மாலுவா ஸாலங் ஒத்த²தங் தே³வே வஸ்ஸந்தே பத்தேஹி உத³கங் படிச்சி²த்வா ஸங்ப⁴ஞ்ஜனவஸேன ஸப்³ப³த்த²கமேவ பரியோனந்த⁴தி, ஏவங் அத்தபா⁴வங் ஒத்த²தங் பரியோனந்தி⁴த்வா டி²தங் ஸோ மாலுவாய ஸங்ப⁴ஞ்ஜித்வா பூ⁴மியங் பாதியமானோ ருக்கோ² விய தாய து³ஸ்ஸீல்யஸங்கா²தாய தண்ஹாய ஸங்ப⁴ஞ்ஜித்வா அபாயேஸு பாதியமானோ, யதா² நங் அனத்த²காமோ தி³ஸோ இச்ச²தி, ததா² அத்தானங் கரோதி நாமாதி அத்தோ².

Accantadussīlyanti ekantadussīlabhāvo. Gihī vāpi jātito paṭṭhāya dasa akusalakammapathe karonto, pabbajito vāpi upasampannadivasato paṭṭhāya garukāpattiṃ āpajjamāno accantadussīlo nāma. Idha pana yo dvīsu tīsu attabhāvesu dussīlo, tassa gatiyā āgataṃ dussīlabhāvaṃ sandhāyetaṃ vuttaṃ. Dussīlabhāvoti cettha dussīlassa cha dvārāni nissāya uppannā taṇhā veditabbā. Māluvā sālamivotthatanti yassa puggalassa taṃ taṇhāsaṅkhātaṃ dussīlyaṃ. Yathā nāma māluvā sālaṃ otthataṃ deve vassante pattehi udakaṃ paṭicchitvā saṃbhañjanavasena sabbatthakameva pariyonandhati, evaṃ attabhāvaṃ otthataṃ pariyonandhitvā ṭhitaṃ so māluvāya saṃbhañjitvā bhūmiyaṃ pātiyamāno rukkho viya tāya dussīlyasaṅkhātāya taṇhāya saṃbhañjitvā apāyesu pātiyamāno, yathā naṃ anatthakāmo diso icchati, tathā attānaṃ karoti nāmāti attho.

‘‘அத்தனா ஹி கத’’ந்தி கா³தா²ய அயங் ஸங்கே²பத்தோ² – யதா² பாஸாணமயங் பாஸாணஸம்ப⁴வங் வஜிரங் தமேவ அஸ்மமயங் மணிங் அத்தனோ உட்டா²னட்டா²னஸங்கா²தங் பாஸாணமணிங் கா²யித்வா சி²த்³தா³சி²த்³த³ங் க²ண்டா³க²ண்ட³ங் கத்வா அபரிபோ⁴க³ங் கரோதி, ஏவமேவங் அத்தனா கதங் அத்தனி ஜாதங் அத்தஸம்ப⁴வங் பாபங் து³ம்மேத⁴ங் நிப்பஞ்ஞங் புக்³க³லங் சதூஸு அபாயேஸு அபி⁴மத்த²தி கந்ததி வித்³த⁴ங்ஸேதீதி.

‘‘Attanā hi kata’’nti gāthāya ayaṃ saṅkhepattho – yathā pāsāṇamayaṃ pāsāṇasambhavaṃ vajiraṃ tameva asmamayaṃ maṇiṃ attano uṭṭhānaṭṭhānasaṅkhātaṃ pāsāṇamaṇiṃ khāyitvā chiddāchiddaṃ khaṇḍākhaṇḍaṃ katvā aparibhogaṃ karoti, evamevaṃ attanā kataṃ attani jātaṃ attasambhavaṃ pāpaṃ dummedhaṃ nippaññaṃ puggalaṃ catūsu apāyesu abhimatthati kantati viddhaṃsetīti.

நிஸேவியாதி கத்வா. க³ரஹாதி கா³ரய்ஹா. பா³லமதீதி மந்த³பு³த்³தி⁴னோ. க²யா ச கம்மஸ்ஸாதி கம்மக்க²யகரஞாணேன கம்மஸ்ஸ கே²பனதோ. விமுத்தசேதஸோதி ஸமுச்சே²த³விமுத்தியா படிப்பஸ்ஸத்³தி⁴விமுத்தியா ச விமுத்தசித்தோ. நிப்³ப³ந்தி தே ஜோதிரிவிந்த⁴னக்க²யாதி யதா² நாம அனுபாதா³னோ ஜாதவேதோ³ நிப்³பா³யதி, ஏவமேவங் அபி⁴ஸங்கா²ரஸ்ஸ விஞ்ஞாணஸ்ஸ அனவஸேஸக்க²யா நிப்³பா³யதி.

Niseviyāti katvā. Garahāti gārayhā. Bālamatīti mandabuddhino. Khayā ca kammassāti kammakkhayakarañāṇena kammassa khepanato. Vimuttacetasoti samucchedavimuttiyā paṭippassaddhivimuttiyā ca vimuttacitto. Nibbanti te jotirivindhanakkhayāti yathā nāma anupādāno jātavedo nibbāyati, evamevaṃ abhisaṅkhārassa viññāṇassa anavasesakkhayā nibbāyati.

123.

‘‘யதா²பி ப⁴மரோ’’தி கா³தா²யங் ப⁴மரோதி யா காசி மது⁴கரஜாதி. புப்ப²ந்தி புப்பா²ராமே சரந்தோ புப்ப²ஞ்ச தஸ்ஸ வண்ணஞ்ச க³ந்த⁴ஞ்ச அஹேட²யங் அஹேட²யந்தோ அவினாஸெந்தோ சரதீதி அத்தோ². ஏவங் சரித்வா ச பலேதி ரஸமாதா³யாதி யாவத³த்த²ங் ரஸங் பிவித்வா அபரம்பி மது⁴கரணத்தா²ய ரஸங் க³ஹெத்வா டே³தி. ஸோ ஏகங் வனக³ஹனங் அஜ்ஜோ²கா³ஹெத்வா ருக்க²ஸுஸிராதீ³ஸு தங் ரஜமிஸ்ஸகங் ரஸங் ட²பெத்வா அனுபுப்³பே³ன மது⁴ரரஸங் மது⁴ங் கரோதி, ந தஸ்ஸ புப்பா²ராமே சரிதபச்சயா புப்ப²ங் வா தஸ்ஸ வண்ணோ வா க³ந்தோ⁴ வா வினஸ்ஸதி, அத² கோ² புப்ப²ங் பாகதிகமேவ ஹோதி. ஏவங் கா³மே முனீ சரேதி ஏவங் ஸெக்கோ² அஸெக்கோ² வா அனகா³ரியமுனி குலபடிபாடியா கா³மே பி⁴க்க²ங் க³ண்ஹந்தோ சரெய்யாதி அத்தோ². ந ஹி தஸ்ஸ கா³மே சரணபச்சயா ஸத்³தா⁴ஹானி வா போ⁴க³ஹானி வா ஹோதி, ஸத்³தா⁴பி போ⁴கா³பி பாகதிகாவ ஹொந்தி. ஏவங் சரித்வா ச பன கா³மதோ நிக்க²மித்வா ப³ஹிகா³மே உத³கபா²ஸுகட்டா²னே ஸங்கா⁴டிங் பஞ்ஞபெத்வா நிஸின்னோ அக்க²ப⁴ஞ்ஜன- (மி॰ ப॰ 6.1.2) வணலேபனபுத்தமங்ஸூபமவஸேன (மி॰ ப॰ 6.1.2; ஸங்॰ நி॰ 2.63) பச்சவெக்க²ந்தோ பிண்ட³பாதங் பரிபு⁴ஞ்ஜித்வா ததா²ரூபங் வனஸண்ட³ங் அனுபவிஸித்வா அஜ்ஜ²த்திககம்மட்டா²னங் ஸம்மஸந்தோ மக்³க³ப²லானி ஹத்த²க³தானேவ கரோதி. அஸெக்க²முனி பன தி³ட்ட²த⁴ம்மஸுக²விஹாரமனுயுஞ்ஜதி. அயமஸ்ஸ ப⁴மரேன மது⁴கரேன ஸரிக்க²தா. கீ²ணாஸவோ பனெத்த² அதி⁴ப்பேதோதி.

‘‘Yathāpi bhamaro’’ti gāthāyaṃ bhamaroti yā kāci madhukarajāti. Pupphanti pupphārāme caranto pupphañca tassa vaṇṇañca gandhañca aheṭhayaṃ aheṭhayanto avināsento caratīti attho. Evaṃ caritvā ca paleti rasamādāyāti yāvadatthaṃ rasaṃ pivitvā aparampi madhukaraṇatthāya rasaṃ gahetvā ḍeti. So ekaṃ vanagahanaṃ ajjhogāhetvā rukkhasusirādīsu taṃ rajamissakaṃ rasaṃ ṭhapetvā anupubbena madhurarasaṃ madhuṃ karoti, na tassa pupphārāme caritapaccayā pupphaṃ vā tassa vaṇṇo vā gandho vā vinassati, atha kho pupphaṃ pākatikameva hoti. Evaṃ gāme munī careti evaṃ sekkho asekkho vā anagāriyamuni kulapaṭipāṭiyā gāme bhikkhaṃ gaṇhanto careyyāti attho. Na hi tassa gāme caraṇapaccayā saddhāhāni vā bhogahāni vā hoti, saddhāpi bhogāpi pākatikāva honti. Evaṃ caritvā ca pana gāmato nikkhamitvā bahigāme udakaphāsukaṭṭhāne saṅghāṭiṃ paññapetvā nisinno akkhabhañjana- (mi. pa. 6.1.2) vaṇalepanaputtamaṃsūpamavasena (mi. pa. 6.1.2; saṃ. ni. 2.63) paccavekkhanto piṇḍapātaṃ paribhuñjitvā tathārūpaṃ vanasaṇḍaṃ anupavisitvā ajjhattikakammaṭṭhānaṃ sammasanto maggaphalāni hatthagatāneva karoti. Asekkhamuni pana diṭṭhadhammasukhavihāramanuyuñjati. Ayamassa bhamarena madhukarena sarikkhatā. Khīṇāsavo panettha adhippetoti.

பாதிமொக்க²ஸங்வரஸங்வுதோ விஹரதீதி யோ நங் பாதி ரக்க²தி, தங் மொக்கே²தி மோசேதி ஆபாயிகாதீ³ஹி து³க்கே²ஹீதி பாதிமொக்கோ². ஸோ ஏவ காயிகவாசஸிகஸ்ஸ வீதிக்கமஸ்ஸ ஸங்வரணதோ பித³ஹனதோ ஸங்வரோ. தேன பாதிமொக்க²ஸங்வரேன ஸங்வுதோ ஸமன்னாக³தோ ஹுத்வா ஸப்³பி³ரியாபதே²ஸு சரதி. ஆசாரகோ³சரஸம்பன்னோதி ஆசாரேன ச கோ³சரேன ச ஸம்பன்னோ. அணுமத்தேஸூதி அப்பமத்தகேஸு. வஜ்ஜேஸூதி அகுஸலத⁴ம்மேஸு. ப⁴யத³ஸ்ஸாவீதி ப⁴யங் த³ஸ்ஸீ. ஸமாதா³ய ஸிக்க²தி ஸிக்கா²பதே³ஸூதி ஸிக்கா²பதே³ஸு யங் கிஞ்சி ஸிக்கி²தப்³ப³ங், தங் ஸப்³ப³ங் ஸம்மா ஆதி³யித்வா ஸிக்க²தி.

Pātimokkhasaṃvarasaṃvuto viharatīti yo naṃ pāti rakkhati, taṃ mokkheti moceti āpāyikādīhi dukkhehīti pātimokkho. So eva kāyikavācasikassa vītikkamassa saṃvaraṇato pidahanato saṃvaro. Tena pātimokkhasaṃvarena saṃvuto samannāgato hutvā sabbiriyāpathesu carati. Ācāragocarasampannoti ācārena ca gocarena ca sampanno. Aṇumattesūti appamattakesu. Vajjesūti akusaladhammesu. Bhayadassāvīti bhayaṃ dassī. Samādāya sikkhati sikkhāpadesūti sikkhāpadesu yaṃ kiñci sikkhitabbaṃ, taṃ sabbaṃ sammā ādiyitvā sikkhati.

காயகம்மவசீகம்மேன ஸமன்னாக³தோ, குஸலேன பரிஸுத்³தா⁴ஜீவோதி எத்த² ஆசாரகோ³சரக்³க³ஹணேனேவ குஸலே காயகம்மே வசீகம்மே ச க³ஹிதேபி யஸ்மா இத³ங் ஆஜீவபாரிஸுத்³தி⁴ஸீலங் ந ஆகாஸாதீ³ஸு உப்பஜ்ஜதி, காயவசீத்³வாரேஸு ஏவ பன உப்பஜ்ஜதி, தஸ்மா தஸ்ஸ உப்பத்தித்³வாரத³ஸ்ஸனத்த²ங் ‘‘காயவசீகம்மேன ஸமன்னாக³தோ, குஸலேனா’’தி வுத்தங். யஸ்மா பன தேன ஸமன்னாக³தோ, தஸ்மா பரிஸுத்³தா⁴ஜீவோ, ஆஜீவபாரிஸுத்³தி⁴பி ஸீலமேவாதி த³ஸ்ஸனத்த²ங் ஏதங் வுத்தங். வுத்தஞ்ஹேதங் – ‘‘கதமே ச த²பதி குஸலா ஸீலா? குஸலங் காயகம்மங் குஸலங் வசீகம்மங், பரிஸுத்³த⁴ங் ஆஜீவம்பி கோ² அஹங் த²பதி ஸீலஸ்மிங் வதா³மீ’’தி (ம॰ நி॰ 2.265). ஆரத்³த⁴வீரியோதி யஸ்ஸ காயிகங் சேதஸிகஞ்ச வீரியங் ஆரத்³த⁴ங் ஹோதி, ஸோ ‘‘ஆரத்³த⁴வீரியோ’’தி வுச்சதி. தத்த² யோ க³ணஸங்க³ணிகங் வினோதெ³த்வா சதூஸு இரியாபதே²ஸு அட்ட²ஆரம்ப⁴வத்து²வஸேன ஏககோ ஹோதி, தஸ்ஸ காயிகங் வீரியங் ஆரத்³த⁴ங் நாம ஹோதி. யோ சித்தஸங்க³ணிகங் வினோதெ³த்வா அட்ட²ஸமாபத்திவஸேன ஏககோ ஹோதி, க³மனாதீ³ஸு உப்பன்னகிலேஸங் உப்பன்னட்டா²னேயேவ நிக்³க³ண்ஹித்வா ஜா²னங் நிப்³ப³த்தேதி, தஸ்ஸ சேதஸிகங் வீரியங் ஆரத்³த⁴ங் நாம ஹோதி. ஏவங் ஆரத்³த⁴வீரியோ. தா²மவாதி டி²திமா. த³ள்ஹபரக்கமோதி தி²ரபரக்கமோ. அனிக்கி²த்தது⁴ரோ…பே॰… ஸச்சி²கிரியாயாதி ஸங்கிலேஸத⁴ம்மானங் பஹானத்த²ங் வோதா³னத⁴ம்மானங் ஸம்பாத³னத்த²ங் , பச்சக்க²கரணத்த²ஞ்ச து⁴ரங் அனிக்கி²பித்வா வீரியங் உஸ்ஸுக்காபெந்தோ விஹரதி. பஞ்ஞவாதி பஞ்சன்னங் க²ந்தா⁴னங் உத³யப்³ப³யபரிக்³கா³ஹிகாய பஞ்ஞாய ஸமன்னாக³தோ. தேனாஹ ‘‘உத³யத்த²கா³மினியா’’தி.

Kāyakammavacīkammena samannāgato, kusalena parisuddhājīvoti ettha ācāragocaraggahaṇeneva kusale kāyakamme vacīkamme ca gahitepi yasmā idaṃ ājīvapārisuddhisīlaṃ na ākāsādīsu uppajjati, kāyavacīdvāresu eva pana uppajjati, tasmā tassa uppattidvāradassanatthaṃ ‘‘kāyavacīkammena samannāgato, kusalenā’’ti vuttaṃ. Yasmā pana tena samannāgato, tasmā parisuddhājīvo, ājīvapārisuddhipi sīlamevāti dassanatthaṃ etaṃ vuttaṃ. Vuttañhetaṃ – ‘‘katame ca thapati kusalā sīlā? Kusalaṃ kāyakammaṃ kusalaṃ vacīkammaṃ, parisuddhaṃ ājīvampi kho ahaṃ thapati sīlasmiṃ vadāmī’’ti (ma. ni. 2.265). Āraddhavīriyoti yassa kāyikaṃ cetasikañca vīriyaṃ āraddhaṃ hoti, so ‘‘āraddhavīriyo’’ti vuccati. Tattha yo gaṇasaṅgaṇikaṃ vinodetvā catūsu iriyāpathesu aṭṭhaārambhavatthuvasena ekako hoti, tassa kāyikaṃ vīriyaṃ āraddhaṃ nāma hoti. Yo cittasaṅgaṇikaṃ vinodetvā aṭṭhasamāpattivasena ekako hoti, gamanādīsu uppannakilesaṃ uppannaṭṭhāneyeva niggaṇhitvā jhānaṃ nibbatteti, tassa cetasikaṃ vīriyaṃ āraddhaṃ nāma hoti. Evaṃ āraddhavīriyo. Thāmavāti ṭhitimā. Daḷhaparakkamoti thiraparakkamo. Anikkhittadhuro…pe… sacchikiriyāyāti saṃkilesadhammānaṃ pahānatthaṃ vodānadhammānaṃ sampādanatthaṃ , paccakkhakaraṇatthañca dhuraṃ anikkhipitvā vīriyaṃ ussukkāpento viharati. Paññavāti pañcannaṃ khandhānaṃ udayabbayapariggāhikāya paññāya samannāgato. Tenāha ‘‘udayatthagāminiyā’’ti.

நத்தி² புத்தஸமங் பேமந்தி மாதாபிதரோ விரூபேபி அத்தனோ புத்தகே ஸுவண்ணபி³ம்ப³கங் விய மஞ்ஞந்தி மாலாகு³ளே விய ஸீஸாதீ³ஸு கத்வா பரிஹரமானா. தேஹி உஹதி³தாபி ஓமுத்திதாபி க³ந்த⁴விலேபனங் படிச்ச²ந்தா விய ஸோமனஸ்ஸங் ஆபஜ்ஜந்தி. தேனாஹ – ‘‘நத்தி² புத்தஸமங் பேம’’ந்தி. புத்தபேமேன ஸமங் பேமங் நாம நத்தீ²தி வுத்தங் ஹோதி. கோ³ஸமிதந்தி கோ³ஹி ஸமங் கோ³த⁴னஸதி³ஸங் அஞ்ஞங் த⁴னங் நாம நத்தி². ஸூரியஸமா ஆபா⁴தி ஸூரியாபா⁴ய ஸமா அஞ்ஞா ஆபா⁴ நாம நத்தி². ஸமுத்³த³பரமாதி யே கேசி அஞ்ஞே ஸரா நாம, ஸப்³பே³ தே ஸமுத்³த³பரமா. ஸமுத்³தோ³ தேஸங் உத்தமோ, ஸமுத்³த³ஸதி³ஸங் அஞ்ஞங் உத³கங் நிதா³னங் நாம நத்தி² ப⁴க³வாதி வத³தி.

Natthi puttasamaṃ pemanti mātāpitaro virūpepi attano puttake suvaṇṇabimbakaṃ viya maññanti mālāguḷe viya sīsādīsu katvā pariharamānā. Tehi uhaditāpi omuttitāpi gandhavilepanaṃ paṭicchantā viya somanassaṃ āpajjanti. Tenāha – ‘‘natthi puttasamaṃ pema’’nti. Puttapemena samaṃ pemaṃ nāma natthīti vuttaṃ hoti. Gosamitanti gohi samaṃ godhanasadisaṃ aññaṃ dhanaṃ nāma natthi. Sūriyasamā ābhāti sūriyābhāya samā aññā ābhā nāma natthi. Samuddaparamāti ye keci aññe sarā nāma, sabbe te samuddaparamā. Samuddo tesaṃ uttamo, samuddasadisaṃ aññaṃ udakaṃ nidānaṃ nāma natthi bhagavāti vadati.

யஸ்மா பன அத்தபேமேன ஸமங் பேமங் நத்தி². மாதாபிதரோ ஹி ச²ட்³டெ³த்வாபி புத்ததீ⁴தரோ அபோஸெத்வா அத்தானமேவ போஸெந்தி. த⁴ஞ்ஞேன ச ஸமங் த⁴னங் நாம நத்தி². ததா²ரூபே ஹி காலே ஹிரஞ்ஞஸுவண்ணாதீ³னிபி கோ³மஹிங்ஸாதீ³னிபி த⁴ஞ்ஞக்³க³ஹணத்த²ங் த⁴ஞ்ஞஸாமிகானமேவ ஸந்திகங் க³ஹெத்வா க³ச்ச²ந்தி. பஞ்ஞாய ச ஸமா ஆபா⁴ நாம நத்தி². ஸூரியாத³யோ ஹி ஏகதே³ஸங்யேவ ஓபா⁴ஸெந்தி, பச்சுப்பன்னமேவ ச தமங் வினோதெ³ந்தி, பஞ்ஞா பன த³ஸஸஹஸ்ஸிம்பி லோகதா⁴துங் ஏகபஜ்ஜோதங் காதுங் ஸக்கோதி, அதீதங்ஸாதி³படிச்சா²த³கஞ்ச தமங் வித⁴மதி. மேக⁴வுட்டி²யா ச ஸமோ ஸரோ நாம நத்தி². நதீ³ வா ஹி ஹோது தளாகாதீ³னி வா, வுட்டி²ஸமோ ஸரோ நாம நத்தி². மேக⁴வுட்டி²யா ஹி பச்சி²ன்னாய மஹாஸமுத்³தே³ அங்கு³லிபப்³ப³தேமனமத்தம்பி உத³கங் ந ஹோதி, வுட்டி²யா பன பவத்தமானாய யாவ ஆப⁴ஸ்ஸரப⁴வனாபி ஏகோத³கங் ஹோதி. தஸ்மா ப⁴க³வா தே³வதாவசனங் படிக்கி²பனவஸேன படிகா³த²ங் வத³ந்தோ ‘‘நத்தி² அத்தஸமங் பேம’’ந்திஆதி³மாஹ.

Yasmā pana attapemena samaṃ pemaṃ natthi. Mātāpitaro hi chaḍḍetvāpi puttadhītaro aposetvā attānameva posenti. Dhaññena ca samaṃ dhanaṃ nāma natthi. Tathārūpe hi kāle hiraññasuvaṇṇādīnipi gomahiṃsādīnipi dhaññaggahaṇatthaṃ dhaññasāmikānameva santikaṃ gahetvā gacchanti. Paññāya ca samā ābhā nāma natthi. Sūriyādayo hi ekadesaṃyeva obhāsenti, paccuppannameva ca tamaṃ vinodenti, paññā pana dasasahassimpi lokadhātuṃ ekapajjotaṃ kātuṃ sakkoti, atītaṃsādipaṭicchādakañca tamaṃ vidhamati. Meghavuṭṭhiyā ca samo saro nāma natthi. Nadī vā hi hotu taḷākādīni vā, vuṭṭhisamo saro nāma natthi. Meghavuṭṭhiyā hi pacchinnāya mahāsamudde aṅgulipabbatemanamattampi udakaṃ na hoti, vuṭṭhiyā pana pavattamānāya yāva ābhassarabhavanāpi ekodakaṃ hoti. Tasmā bhagavā devatāvacanaṃ paṭikkhipanavasena paṭigāthaṃ vadanto ‘‘natthi attasamaṃ pema’’ntiādimāha.

124.

கிங்ஸூத⁴ பீ⁴தாதி கிங் நு பீ⁴தா. மக்³கோ³ சனேகாயதனோ பவுத்தோதி அட்ட²திங்ஸாரம்மணவஸேன அனேகேஹி காரணேஹி மக்³கோ³ கதி²தோ, ஏவங் ஸந்தே கிஸ்ஸ பீ⁴தா ஹுத்வா அயங் ஜனதா த்³வாஸட்டி² தி³ட்டி²யோ அக்³க³ஹேஸீதி வத³தி. பூ⁴ரிபஞ்ஞாதி ப³ஹுபஞ்ஞ உஸ்ஸன்னபஞ்ஞ. பரலோகங் ந பா⁴யேதி இமஸ்மா லோகா பரலோகங் க³ச்ச²ந்தோ ந பா⁴யெய்ய.

Kiṃsūdha bhītāti kiṃ nu bhītā. Maggo canekāyatano pavuttoti aṭṭhatiṃsārammaṇavasena anekehi kāraṇehi maggo kathito, evaṃ sante kissa bhītā hutvā ayaṃ janatā dvāsaṭṭhi diṭṭhiyo aggahesīti vadati. Bhūripaññāti bahupañña ussannapañña. Paralokaṃ na bhāyeti imasmā lokā paralokaṃ gacchanto na bhāyeyya.

பணிதா⁴யாதி ட²பெத்வா. க⁴ரமாவஸந்தோதி அனாத²பிண்டி³காத³யோ விய ப³ஹ்வன்னபானே க⁴ரே வஸந்தோ. ஸங்விபா⁴கீ³தி அச்ச²ராய க³ஹிதம்பி நகே²ன பா²லெத்வா பரஸ்ஸ த³த்வாவ பு⁴ஞ்ஜனஸீலோ. வத³ஞ்ஞூதி யாசகானங் யாசனவஸேன வுத்தவசனஞ்ஞூ, வசனீயோ வா. எத்த² ச வாசந்தி சத்தாரி வசீஸுசரிதானி க³ஹிதானி. மனந்தி தீணி மனோஸுசரிதானி. காயேனாதி தீணி காயஸுசரிதானி. இமே த³ஸ குஸலகம்மபதா² புப்³ப³ஸுத்³தி⁴அங்க³ங் நாம. ‘‘ப³ஹ்வன்னபானங் க⁴ரமாவஸந்தோ’’தி இமினா யஞ்ஞஉபக்க²ரோ க³ஹிதோ. ஸத்³தோ⁴தி ஏகங் அங்க³ங், முதூ³தி ஏகங், ஸங்விபா⁴கீ³தி ஏகங், வத³ஞ்ஞூதி ஏகந்தி இமானி சத்தாரி அங்கா³னி ஸந்தா⁴ய ‘‘ஏதேஸு த⁴ம்மேஸு டி²தோ சதூஸூ’’தி ஆஹ.

Paṇidhāyāti ṭhapetvā. Gharamāvasantoti anāthapiṇḍikādayo viya bahvannapāne ghare vasanto. Saṃvibhāgīti accharāya gahitampi nakhena phāletvā parassa datvāva bhuñjanasīlo. Vadaññūti yācakānaṃ yācanavasena vuttavacanaññū, vacanīyo vā. Ettha ca vācanti cattāri vacīsucaritāni gahitāni. Mananti tīṇi manosucaritāni. Kāyenāti tīṇi kāyasucaritāni. Ime dasa kusalakammapathā pubbasuddhiaṅgaṃ nāma. ‘‘Bahvannapānaṃ gharamāvasanto’’ti iminā yaññaupakkharo gahito. Saddhoti ekaṃ aṅgaṃ, mudūti ekaṃ, saṃvibhāgīti ekaṃ, vadaññūti ekanti imāni cattāri aṅgāni sandhāya ‘‘etesu dhammesu ṭhito catūsū’’ti āha.

அபரோ நயோ – ‘‘வாச’’ந்திஆதீ³னி தீணி அங்கா³னி, ‘‘ப³ஹ்வன்னபான’’ந்தி இமினா யஞ்ஞஉபக்க²ரோவ க³ஹிதோ, ‘‘ஸத்³தோ⁴ முது³ ஸங்விபா⁴கீ³ வத³ஞ்ஞூ’’தி ஏகங் அங்க³ங்.

Aparo nayo – ‘‘vāca’’ntiādīni tīṇi aṅgāni, ‘‘bahvannapāna’’nti iminā yaññaupakkharova gahito, ‘‘saddho mudu saṃvibhāgī vadaññū’’ti ekaṃ aṅgaṃ.

அபரோ து³கனயோ நாம ஹோதி – ‘‘வாசங் மனஞ்சா’’தி ஏகங் அங்க³ங், ‘‘காயேன பாபானி அகுப்³ப³மானோ ப³ஹ்வன்னபானங் க⁴ரமாவஸந்தோ’’தி ஏகங், ‘‘ஸத்³தோ⁴ முதூ³’’தி ஏகங், ‘‘ஸங்விபா⁴கீ³ வத³ஞ்ஞூ’’தி ஏகந்தி ஏதேஸு சதூஸு த⁴ம்மேஸு டி²தோ த⁴ம்மே டி²தோ நாம ஹோதி. ஸோ இதோ பரலோகங் க³ச்ச²ந்தோந பா⁴யதி.

Aparo dukanayo nāma hoti – ‘‘vācaṃ manañcā’’ti ekaṃ aṅgaṃ, ‘‘kāyena pāpāni akubbamāno bahvannapānaṃ gharamāvasanto’’ti ekaṃ, ‘‘saddho mudū’’ti ekaṃ, ‘‘saṃvibhāgī vadaññū’’ti ekanti etesu catūsu dhammesu ṭhito dhamme ṭhito nāma hoti. So ito paralokaṃ gacchantona bhāyati.

காயஸமாசாரம்பீதிஆதி³ பாதிமொக்க²ஸங்வரத³ஸ்ஸனங். தத்த² து³விதே⁴னாதி த்³விவிதே⁴ன, த்³வீஹி கொட்டா²ஸேஹீதி அத்தோ². ஜஞ்ஞாதி ஜானெய்ய. ஸீலகதா² ச நாமேஸா கம்மபத²வஸேன வா பண்ணத்திவஸேன வா கதே²தப்³பா³. தத்த² கம்மபத²வஸேன தாவ கதெ²ந்தேன அஸேவிதப்³ப³காயஸமாசாரோ பாணாதிபாதாதி³ன்னாதா³னமிச்சா²சாரேஹி கதே²தப்³போ³. பண்ணத்திவஸேன காயத்³வாரே பஞ்ஞத்தஸிக்கா²பத³வீதிக்கமவஸேன. ஸேவிதப்³ப³காயஸமாசாரோ பாணாதிபாதாதி³வேரமணீஹி சேவ காயத்³வாரே பஞ்ஞத்தஸிக்கா²பத³அவீதிக்கமேன ச கதே²தப்³போ³.

Kāyasamācārampītiādi pātimokkhasaṃvaradassanaṃ. Tattha duvidhenāti dvividhena, dvīhi koṭṭhāsehīti attho. Jaññāti jāneyya. Sīlakathā ca nāmesā kammapathavasena vā paṇṇattivasena vā kathetabbā. Tattha kammapathavasena tāva kathentena asevitabbakāyasamācāro pāṇātipātādinnādānamicchācārehi kathetabbo. Paṇṇattivasena kāyadvāre paññattasikkhāpadavītikkamavasena. Sevitabbakāyasamācāro pāṇātipātādiveramaṇīhi ceva kāyadvāre paññattasikkhāpadaavītikkamena ca kathetabbo.

அஸேவிதப்³ப³வசீஸமாசாரோ முஸாவாதா³தி³வசீது³ச்சரிதேன சேவ வசீத்³வாரே பஞ்ஞத்தஸிக்கா²பத³வீதிக்கமேன ச கதே²தப்³போ³. ஸேவிதப்³ப³வசீஸமாசாரோ முஸாவாதா³தி³வேரமணீஹி சேவ வசீத்³வாரே பஞ்ஞத்தஸிக்கா²பத³அவீதிக்கமேன ச கதே²தப்³போ³.

Asevitabbavacīsamācāro musāvādādivacīduccaritena ceva vacīdvāre paññattasikkhāpadavītikkamena ca kathetabbo. Sevitabbavacīsamācāro musāvādādiveramaṇīhi ceva vacīdvāre paññattasikkhāpadaavītikkamena ca kathetabbo.

பரியேஸனா பன காயவாசாஹி பரியேஸனா ஏவ, ஸா காயவசீஸமாசாரக்³க³ஹணேன க³ஹிதாபி யஸ்மா ஆஜீவட்ட²மகஸீலங் நாம ஏதஸ்மிங்யேவ த்³வாரத்³வயே உப்பஜ்ஜதி, ந ஆகாஸே, தஸ்மா ஆஜீவட்ட²மகஸீலத³ஸ்ஸனத்த²ங் விஸுங் வுத்தா. தத்த² நஸேவிதப்³ப³பரியேஸனா அனரியபரியேஸனாய கதே²தப்³பா³, ஸேவிதப்³ப³பரியேஸனா அரியபரியேஸனாய. வுத்தஞ்ஹேதங் – ‘‘கதமா ச, பி⁴க்க²வே, அனரியபரியேஸனா? இத⁴, பி⁴க்க²வே, ஏகச்சோ அத்தனா ஜாதித⁴ம்மோ ஸமானோ ஜாதித⁴ம்மங்யேவ பரியேஸதீ’’திஆதி³ (ம॰ நி॰ 1.274). ததா² ‘‘கதமா ச, பி⁴க்க²வே, அரியபரியேஸனா? இத⁴, பி⁴க்க²வே, ஏகச்சோ அத்தனா ஜாதித⁴ம்மோ ஸமானோ ஜாதித⁴ம்மே ஆதீ³னவங் விதி³த்வா அஜாதங் அனுத்தரங் யோக³க்கே²மங் நிப்³பா³னங் பரியேஸதீ’’திஆதி³ (ம॰ நி॰ 1.275).

Pariyesanā pana kāyavācāhi pariyesanā eva, sā kāyavacīsamācāraggahaṇena gahitāpi yasmā ājīvaṭṭhamakasīlaṃ nāma etasmiṃyeva dvāradvaye uppajjati, na ākāse, tasmā ājīvaṭṭhamakasīladassanatthaṃ visuṃ vuttā. Tattha nasevitabbapariyesanā anariyapariyesanāya kathetabbā, sevitabbapariyesanā ariyapariyesanāya. Vuttañhetaṃ – ‘‘katamā ca, bhikkhave, anariyapariyesanā? Idha, bhikkhave, ekacco attanā jātidhammo samāno jātidhammaṃyeva pariyesatī’’tiādi (ma. ni. 1.274). Tathā ‘‘katamā ca, bhikkhave, ariyapariyesanā? Idha, bhikkhave, ekacco attanā jātidhammo samāno jātidhamme ādīnavaṃ viditvā ajātaṃ anuttaraṃ yogakkhemaṃ nibbānaṃ pariyesatī’’tiādi (ma. ni. 1.275).

170.

மக்³கா³னட்ட²ங்கி³கோதி ஜங்க⁴மக்³கா³த³யோ வா ஹொந்து த்³வாஸட்டி²தி³ட்டி²க³தமக்³கா³ வா, ஸப்³பே³ஸம்பி மக்³கா³னங் ஸம்மாதி³ட்டி²ஆதீ³ஹி அட்ட²ஹி அங்கே³ஹி மிச்சா²தி³ட்டி²ஆதீ³னங் அட்ட²ன்னங் பாபத⁴ம்மானங் பஹானகரோ நிரோத⁴ங் ஆரம்மணங் கத்வா சதூஸுபி ஸச்சேஸு து³க்க²பரிஜானநாதி³கிச்சங் ஸாத⁴யமானோ அட்ட²ங்கி³கோ மக்³கோ³ ஸெட்டோ² உத்தமோ. ஸச்சானங் சதுரோ பதா³தி ‘‘ஸச்சங் ப⁴ணே ந குஜ்ஜெ²ய்யா’’தி (த⁴॰ ப॰ 224) ஆக³தங் வசீஸச்சங் வா ஹோது, ‘‘ஸச்சோ ப்³ராஹ்மணோ, ஸச்சோ க²த்தியோ’’திஆதி³பே⁴த³ங் ஸம்முதிஸச்சங் வா, ‘‘இத³மேவ ஸச்சங் மோக⁴மஞ்ஞ’’ந்தி (ம॰ நி॰ 3.331; உதா³॰ 54; மஹானி॰ 20) தி³ட்டி²ஸச்சங் வா, ‘‘ஏகஞ்ஹி ஸச்சங் ந து³தியமத்தீ²’’தி (ஸு॰ நி॰ 890; மஹானி॰ 119) வுத்தங் பரமத்த²ஸச்சங் வா ஹோது. ஸப்³பே³ஸம்பி இமேஸங் ஸச்சானங் பரிஜானிதப்³ப³ட்டே²ன பஹாதப்³ப³ட்டே²ன ஸச்சி²காதப்³ப³ட்டே²ன பா⁴வேதப்³ப³ட்டே²ன ஏகபடிவேத⁴ட்டே²ன தத²படிவேத⁴ட்டே²ன ச ‘‘து³க்க²ங் அரியஸச்ச’’ந்திஆத³யோ (மஹாவ॰ 14; தீ³॰ நி॰ 2.387; ம॰ நி॰ 1.120) சதுரோ பதா³ ஸெட்டா² நாம. விராகோ³ ஸெட்டோ² த⁴ம்மானந்தி ‘‘யாவதா, பி⁴க்க²வே, த⁴ம்மா ஸங்க²தா வா அஸங்க²தா வா, விராகோ³ தேஸங் த⁴ம்மானங் அக்³க³மக்கா²யதீ’’தி (அ॰ நி॰ 4.34; 5.32; இதிவு॰ 90) வசனதோ நிப்³பா³னஸங்கா²தோ விராகோ³ ஸப்³ப³த⁴ம்மானங் ஸெட்டோ². த்³விபதா³னஞ்ச சக்கு²மாதி ஸப்³பே³ஸம்பி தே³வமனுஸ்ஸாதி³பே⁴தா³னங் த்³விபதா³னங் பஞ்சஹி சக்கூ²ஹி சக்கு²மா ப⁴க³வாவ ஸெட்டோ²தி.

Maggānaṭṭhaṅgikoti jaṅghamaggādayo vā hontu dvāsaṭṭhidiṭṭhigatamaggā vā, sabbesampi maggānaṃ sammādiṭṭhiādīhi aṭṭhahi aṅgehi micchādiṭṭhiādīnaṃ aṭṭhannaṃ pāpadhammānaṃ pahānakaro nirodhaṃ ārammaṇaṃ katvā catūsupi saccesu dukkhaparijānanādikiccaṃ sādhayamāno aṭṭhaṅgiko maggo seṭṭho uttamo. Saccānaṃ caturo padāti ‘‘saccaṃ bhaṇe na kujjheyyā’’ti (dha. pa. 224) āgataṃ vacīsaccaṃ vā hotu, ‘‘sacco brāhmaṇo, sacco khattiyo’’tiādibhedaṃ sammutisaccaṃ vā, ‘‘idameva saccaṃ moghamañña’’nti (ma. ni. 3.331; udā. 54; mahāni. 20) diṭṭhisaccaṃ vā, ‘‘ekañhi saccaṃ na dutiyamatthī’’ti (su. ni. 890; mahāni. 119) vuttaṃ paramatthasaccaṃ vā hotu. Sabbesampi imesaṃ saccānaṃ parijānitabbaṭṭhena pahātabbaṭṭhena sacchikātabbaṭṭhena bhāvetabbaṭṭhena ekapaṭivedhaṭṭhena tathapaṭivedhaṭṭhena ca ‘‘dukkhaṃ ariyasacca’’ntiādayo (mahāva. 14; dī. ni. 2.387; ma. ni. 1.120) caturo padā seṭṭhā nāma. Virāgo seṭṭho dhammānanti ‘‘yāvatā, bhikkhave, dhammā saṅkhatā vā asaṅkhatā vā, virāgo tesaṃ dhammānaṃ aggamakkhāyatī’’ti (a. ni. 4.34; 5.32; itivu. 90) vacanato nibbānasaṅkhāto virāgo sabbadhammānaṃ seṭṭho. Dvipadānañca cakkhumāti sabbesampi devamanussādibhedānaṃ dvipadānaṃ pañcahi cakkhūhi cakkhumā bhagavāva seṭṭhoti.

அக்³கா³னீதி உத்தமானி. யாவதாதி யத்தகா. அபதா³தி நிப்பதா³ அஹிமச்சா²த³யோ. த்³விபதா³தி மனுஸ்ஸபக்கி²ஜாதாத³யோ. சதுப்பதா³தி ஹத்தி²அஸ்ஸாத³யோ . ப³ஹுப்பதா³தி ஸதபதி³ஆத³யோ. ரூபினோதி காமாவசரரூபாவசரஸத்தா. அஸஞ்ஞினோதி அஸஞ்ஞீப⁴வே நிப்³ப³த்தஸத்தா. நேவஸஞ்ஞீனாஸஞ்ஞினோதி ப⁴வக்³கே³ நிப்³ப³த்தஸத்தா. அக்³க³மக்கா²யதீதி கு³ணேஹி அக்³கோ³ உத்தமோ ஸெட்டோ² அக்கா²யதி.

Aggānīti uttamāni. Yāvatāti yattakā. Apadāti nippadā ahimacchādayo. Dvipadāti manussapakkhijātādayo. Catuppadāti hatthiassādayo . Bahuppadāti satapadiādayo. Rūpinoti kāmāvacararūpāvacarasattā. Asaññinoti asaññībhave nibbattasattā. Nevasaññīnāsaññinoti bhavagge nibbattasattā. Aggamakkhāyatīti guṇehi aggo uttamo seṭṭho akkhāyati.

அஸங்க²தானந்தி நிப்³பா³னமேவ வுத்தங். விராகோ³திஆதீ³னி ச நிப்³பா³னஸ்ஸேவ நாமானி. தஞ்ஹி ஆக³ம்ம ஸப்³பே³ கிலேஸா விரஜ்ஜந்தி, ஸப்³பே³ ராக³மதா³த³யோ மதா³ நிம்மதா³ ஹொந்தி அபா⁴வங் க³ச்ச²ந்தி , ஸப்³பா³ பிபாஸா வினயங் உபெந்தி, ஸப்³பே³ ஆலயா ஸமுக்³கா⁴தங் க³ச்ச²ந்தி, வட்டானி உபச்சி²ஜ்ஜந்தி, தண்ஹா கீ²யதி, ஸப்³ப³பரிளாஹா வூபஸம்மந்தி, வட்டது³க்க²ங் நிருஜ்ஜ²தி நிப்³பா³யதி. தஸ்மா தங் ஏதானி நாமானி லப⁴தீதி.

Asaṅkhatānanti nibbānameva vuttaṃ. Virāgotiādīni ca nibbānasseva nāmāni. Tañhi āgamma sabbe kilesā virajjanti, sabbe rāgamadādayo madā nimmadā honti abhāvaṃ gacchanti , sabbā pipāsā vinayaṃ upenti, sabbe ālayā samugghātaṃ gacchanti, vaṭṭāni upacchijjanti, taṇhā khīyati, sabbapariḷāhā vūpasammanti, vaṭṭadukkhaṃ nirujjhati nibbāyati. Tasmā taṃ etāni nāmāni labhatīti.

த⁴ம்மோ ச குஸலக்க²தோதி தஸ்ஸ ஸத்து²னோ த⁴ம்மோ ச குஸலோ அனவஜ்ஜோ, அனவஜ்ஜத்தா ஏவ படிபக்கே²ஹி ராகா³தீ³ஹி கிலேஸேஹி ஸப்³ப³தித்தி²யவாதே³ஹி ச அபரிக்க²தோ. தானி தீணி விஸிஸ்ஸரேதி ஏதானி தீணி ரதனானி லோகே ஸப்³ப³ரதனேஹி விஸிஸ்ஸந்தி கு³ணவஸேன ஸப்³ப³லோகங் அதிஸெந்தீதி அத்தோ².

Dhammo ca kusalakkhatoti tassa satthuno dhammo ca kusalo anavajjo, anavajjattā eva paṭipakkhehi rāgādīhi kilesehi sabbatitthiyavādehi ca aparikkhato. Tāni tīṇi visissareti etāni tīṇi ratanāni loke sabbaratanehi visissanti guṇavasena sabbalokaṃ atisentīti attho.

ஸமணபது³மஸஞ்சயோ க³ணோதி பது³மஸதி³ஸானங் அரியஸமணானங் ஸமூஹஸங்கா²தோ க³ணோ. பது³மந்தி ஹி பரிபுண்ணஸதபத்தஸ்ஸ ஸரோருஹஸ்ஸ நாமங். அரியபுக்³க³லா ச ஸப்³ப³தா²பி பரிபுண்ணகு³ணாதி பது³மஸதி³ஸா வுத்தா. விதூ³னங் ஸக்கதோதி விதூ³ஹி பண்டி³தேஹி ஸக்கதோ. நரவரத³மகோதி நரவரோ ச புரிஸானங் த³மகோ நாயகோ சாதி அத்தோ². லோகஸ்ஸ உத்தரீதி லோகஸ்ஸ உபரி டி²தானி, ஸப்³ப³லோகே உத்தமானீதி அத்தோ².

Samaṇapadumasañcayo gaṇoti padumasadisānaṃ ariyasamaṇānaṃ samūhasaṅkhāto gaṇo. Padumanti hi paripuṇṇasatapattassa saroruhassa nāmaṃ. Ariyapuggalā ca sabbathāpi paripuṇṇaguṇāti padumasadisā vuttā. Vidūnaṃ sakkatoti vidūhi paṇḍitehi sakkato. Naravaradamakoti naravaro ca purisānaṃ damako nāyako cāti attho. Lokassa uttarīti lokassa upari ṭhitāni, sabbaloke uttamānīti attho.

நிருபதா³ஹோதி ராக³பரிளாஹாதீ³ஹி அனுபதா³ஹோ. ஸச்சனாமோதி அவிதத²னாமோ யதா²பு⁴ச்சகு³ணேஹி ஆக³தனாமோ. ஸப்³பா³பி⁴பூ⁴தி ஸப்³ப³லோகங் அத்தனோ கு³ணேஹி அபி⁴ப⁴வித்வா டி²தோ. ஸச்சத⁴ம்மோதி வட்டதோ ஏகந்தனிஸ்ஸரணபா⁴வேன அவிததோ² ஸஹ பரியத்தியா நவவிதோ⁴பி லோகுத்தரத⁴ம்மோ, ததோ ஏவ நத்த²ஞ்ஞோ தஸ்ஸ உத்தரீதி தஸ்ஸ உத்தரி அதி⁴ககு³ணோ அஞ்ஞோ ச த⁴ம்மோ நத்தீ²தி அத்தோ². அரியஸங்கோ⁴வ நிச்சங் ஸப்³ப³காலங் விதூ³ஹி ஸப்³ப³பண்டி³தேஹி பூஜிதோ.

Nirupadāhoti rāgapariḷāhādīhi anupadāho. Saccanāmoti avitathanāmo yathābhuccaguṇehi āgatanāmo. Sabbābhibhūti sabbalokaṃ attano guṇehi abhibhavitvā ṭhito. Saccadhammoti vaṭṭato ekantanissaraṇabhāvena avitatho saha pariyattiyā navavidhopi lokuttaradhammo, tato eva natthañño tassa uttarīti tassa uttari adhikaguṇo añño ca dhammo natthīti attho. Ariyasaṅghova niccaṃ sabbakālaṃ vidūhi sabbapaṇḍitehi pūjito.

‘‘ஏகாயன’’ந்தி கா³தா²ய ஏகாயனந்தி ஏகங் மக்³க³ங். மக்³க³ஸ்ஸ ஹி –

‘‘Ekāyana’’nti gāthāya ekāyananti ekaṃ maggaṃ. Maggassa hi –

‘‘மக்³கோ³ பந்தோ² பதோ² பஜ்ஜோ, அஞ்ஜஸங் வடுமாயனங்;

‘‘Maggo pantho patho pajjo, añjasaṃ vaṭumāyanaṃ;

நாவா உத்தரஸேது ச, குல்லோ ச பி⁴ஸி ஸங்க³மோ’’தி. (சூளனி॰ பாராயனத்து²திகா³தா²னித்³தே³ஸ 101) –

Nāvā uttarasetu ca, kullo ca bhisi saṅgamo’’ti. (cūḷani. pārāyanatthutigāthāniddesa 101) –

ப³ஹூனி நாமானி, ஸ்வாயங் இத⁴ அயனநாமேன வுத்தோ. தஸ்மா ஏகாயனந்தி ஏகமக்³க³ங், ந த்³வேதா⁴பத²பூ⁴தந்தி அத்தோ². அத² வா ஏகேன அயிதப்³ப³ந்தி ஏகாயனங். க³ணஸங்க³ணிகங் பஹாய விவேகட்டே²ன பவிவித்தேன படிபஜ்ஜிதப்³ப³ந்தி அத்தோ². அயந்தி வா ஏதேனாதி அயனோ, ஸங்ஸாரதோ நிப்³பா³னங் க³ச்ச²ந்தீதி அத்தோ². ஏகஸ்ஸ வா ஸப்³ப³ஸத்தஸெட்ட²ஸ்ஸ ப⁴க³வதோ அயனோதி ஏகாயனோ. கிஞ்சாபி ஹி தேன அஞ்ஞேபி அயந்தி, ததா²பி ப⁴க³வதோவ ஸோ அயனோ, தேன உப்பாதி³தத்தா. யதா²ஹ – ‘‘ஸோ ஹி, ப்³ராஹ்மண, ப⁴க³வா அனுப்பன்னஸ்ஸ மக்³க³ஸ்ஸ உப்பாதே³தா’’திஆதி³ (ம॰ நி॰ 3.79). அயதீதி வா அயனோ, க³ச்ச²தி பவத்ததீதி அத்தோ². ஏகஸ்மிங் இமஸ்மிங்யேவ த⁴ம்மவினயே அயனோ, ந அஞ்ஞத்தா²தி ஏகாயனோ. யதா²ஹ – ‘‘இமஸ்மிங் கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³ உபலப்³ப⁴தீ’’தி (தீ³॰ நி॰ 2.214). அபி ச புப்³ப³பா⁴கே³ நானாமுக²பா⁴வனாய பவத்தோபி அபரபா⁴கே³ ஏகங் நிப்³பா³னமேவ அயதி க³ச்ச²தீதி ஏகாயனோ, தங் ஏகாயனங்.

Bahūni nāmāni, svāyaṃ idha ayananāmena vutto. Tasmā ekāyananti ekamaggaṃ, na dvedhāpathabhūtanti attho. Atha vā ekena ayitabbanti ekāyanaṃ. Gaṇasaṅgaṇikaṃ pahāya vivekaṭṭhena pavivittena paṭipajjitabbanti attho. Ayanti vā etenāti ayano, saṃsārato nibbānaṃ gacchantīti attho. Ekassa vā sabbasattaseṭṭhassa bhagavato ayanoti ekāyano. Kiñcāpi hi tena aññepi ayanti, tathāpi bhagavatova so ayano, tena uppāditattā. Yathāha – ‘‘so hi, brāhmaṇa, bhagavā anuppannassa maggassa uppādetā’’tiādi (ma. ni. 3.79). Ayatīti vā ayano, gacchati pavattatīti attho. Ekasmiṃ imasmiṃyeva dhammavinaye ayano, na aññatthāti ekāyano. Yathāha – ‘‘imasmiṃ kho, subhadda, dhammavinaye ariyo aṭṭhaṅgiko maggo upalabbhatī’’ti (dī. ni. 2.214). Api ca pubbabhāge nānāmukhabhāvanāya pavattopi aparabhāge ekaṃ nibbānameva ayati gacchatīti ekāyano, taṃ ekāyanaṃ.

ஜாதிக²யந்தத³ஸ்ஸீதி ஜாதியா க²யஸங்கா²தோ அந்தோ ஜாதிக²யந்தோ. ஜாதியா அச்சந்தக²யந்தோ நிப்³பா³னங், தங் பஸ்ஸீதி ஜாதிக²யந்தத³ஸ்ஸீ. ‘‘மக்³க³ங் பஜானாதி ஹிதானுகம்பீ’’திபி பாடோ². தஸ்ஸத்தோ² – வுத்தப்பகாரங் ஏகாயனஸங்கா²தங் மக்³க³ங் ஸயம்பு⁴ஞாணேன ப⁴க³வா பஜானாதி, ஜானந்தோ ச தேன தேன ஹிதேன ஸத்தே அனுகம்பதீதி. இதா³னி தஸ்ஸ மக்³க³ஸ்ஸ ஏகாயனபா⁴வங், தீஸுபி காலேஸு ஏகந்தனிய்யானதஞ்ச விபா⁴வேதுங் ‘‘ஏதேன மக்³கே³ன தரிங்ஸு புப்³பே³, தரிஸ்ஸந்தி யே ச தரந்தி ஓக⁴’’ந்தி ஆஹ. தஸ்ஸத்தோ² – யே அதீதமத்³தா⁴னங் காமோகா⁴தி³சதுப்³பி³த⁴ங் ஓக⁴ங் தரிங்ஸு, யே தங் அனாக³தமத்³தா⁴னங் தரிஸ்ஸந்தி, ஏதரஹி ச தரந்தி, தே ஸப்³பே³ ஏதேனேவ மக்³கே³ன, ந அஞ்ஞேனாதி. விஸுத்³தி⁴பெக்கா²தி சதுரோக⁴னித்த²ரணேன அச்சந்தவிஸுத்³தி⁴ங் நிப்³பா³னங் அபெக்க²ந்தா, பரினிப்³பா³யிதுகாமாதி அத்தோ².

Jātikhayantadassīti jātiyā khayasaṅkhāto anto jātikhayanto. Jātiyā accantakhayanto nibbānaṃ, taṃ passīti jātikhayantadassī. ‘‘Maggaṃ pajānāti hitānukampī’’tipi pāṭho. Tassattho – vuttappakāraṃ ekāyanasaṅkhātaṃ maggaṃ sayambhuñāṇena bhagavā pajānāti, jānanto ca tena tena hitena satte anukampatīti. Idāni tassa maggassa ekāyanabhāvaṃ, tīsupi kālesu ekantaniyyānatañca vibhāvetuṃ ‘‘etena maggena tariṃsu pubbe, tarissanti ye ca taranti ogha’’nti āha. Tassattho – ye atītamaddhānaṃ kāmoghādicatubbidhaṃ oghaṃ tariṃsu, ye taṃ anāgatamaddhānaṃ tarissanti, etarahi ca taranti, te sabbe eteneva maggena, na aññenāti. Visuddhipekkhāti caturoghanittharaṇena accantavisuddhiṃ nibbānaṃ apekkhantā, parinibbāyitukāmāti attho.

ஏவங் து³வித⁴ம்பி ஸாஸனபட்டா²னங் நானாஸுத்தபதா³னி உதா³ஹரந்தேன விப⁴ஜித்வா இதா³னி ஸங்கிலேஸபா⁴கி³யாதீ³ஹி ஸங்ஸந்தி³த்வா த³ஸ்ஸேதுங் புன ‘‘லோகியங் ஸுத்த’’ந்திஆதி³ ஆரத்³த⁴ங். தத்த² த³ஸ்ஸனபா⁴கி³யேன ச பா⁴வனாபா⁴கி³யேன சாதி நிப்³பே³த⁴பா⁴கி³யேன. நிப்³பே³த⁴பா⁴கி³யமேவ ஹி த³ஸ்ஸனபா⁴கி³யங் பா⁴வனாபா⁴கி³யந்தி த்³விதா⁴ பி⁴ந்தி³த்வா த³ஸ்ஸிதங். லோகியஞ்ச லோகுத்தரஞ்சாதி லோகியங் லோகுத்தரஞ்ச ஸுத்தங், ஸங்கிலேஸபா⁴கி³யாதீ³ஹி த³ஸ்ஸனபா⁴கி³யாதீ³ஹி சாதி உப⁴யேஹி நித்³தி³ஸிதப்³ப³ந்தி அதி⁴ப்பாயோ. யஸ்மிங் ஸுத்தேதிஆதி³ நித்³தி³ஸனாகாரத³ஸ்ஸனங். தத்த² ஸங்கிலேஸபா⁴கி³யந்தி ஸங்கிலேஸகொட்டா²ஸஸஹிதங், ஸங்கிலேஸத்த²தீ³பனந்தி அத்தோ². ஏஸ நயோ ஸேஸேஸுபி.

Evaṃ duvidhampi sāsanapaṭṭhānaṃ nānāsuttapadāni udāharantena vibhajitvā idāni saṃkilesabhāgiyādīhi saṃsanditvā dassetuṃ puna ‘‘lokiyaṃ sutta’’ntiādi āraddhaṃ. Tattha dassanabhāgiyena ca bhāvanābhāgiyena cāti nibbedhabhāgiyena. Nibbedhabhāgiyameva hi dassanabhāgiyaṃ bhāvanābhāgiyanti dvidhā bhinditvā dassitaṃ. Lokiyañca lokuttarañcāti lokiyaṃ lokuttarañca suttaṃ, saṃkilesabhāgiyādīhi dassanabhāgiyādīhi cāti ubhayehi niddisitabbanti adhippāyo. Yasmiṃ suttetiādi niddisanākāradassanaṃ. Tattha saṃkilesabhāgiyanti saṃkilesakoṭṭhāsasahitaṃ, saṃkilesatthadīpananti attho. Esa nayo sesesupi.

ஏவங் லோகியத்திகஸ்ஸ ஸங்கிலேஸபா⁴கி³யாதீ³ஹி சதூஹி பதே³ஹி ஸங்ஸந்த³னங் த³ஸ்ஸெத்வா இமினா நயேன ஸேஸதிகானங் ஸேஸபதா³னஞ்ச ஸங்ஸந்த³னங் ஸுவிஞ்ஞெய்யந்தி தங் அனுத்³த⁴ரித்வா ஸங்கிலேஸபா⁴கி³யாதீ³னங் ஸமதிக்கமனங் த³ஸ்ஸேதுங் ‘‘வாஸனாபா⁴கி³யங் ஸுத்த’’ந்திஆதி³ வுத்தங். தத்த² யதி³பி ஸங்கிலேஸபா⁴கி³யங் ஸுத்தங், வாஸனாபா⁴கி³யஞ்ச ஸுத்தங் லோகியமேவ. ததா²பி லோகுத்தரஸுத்தானி விய லோகியஸுத்தானங் வாஸனாபா⁴கி³யங் ஸுத்தங் ஸங்கிலேஸபா⁴கி³யஸ்ஸ ஸமதிக்கமாய ஹோதீதி இமமத்த²ங் த³ஸ்ஸேதுங் ‘‘வாஸனாபா⁴கி³யங் ஸுத்தங் ஸங்கிலேஸபா⁴கி³யஸ்ஸ ஸுத்தஸ்ஸ நிக்³கா⁴தாயா’’தி வுத்தங். தத்த² நிக்³கா⁴தாயாதி பஹானாய. ஸுத்தஸீஸேன செத்த² ஸுத்தத்தோ² க³ஹிதோதி த³ட்ட²ப்³ப³ங். யஸ்மா ச வோதா³னத⁴ம்மா விய ஸங்கிலேஸத⁴ம்மானங் த³ஸ்ஸனபூ⁴மிஸமதிக்கமனேனேவ பா⁴வனாபூ⁴மி அதி⁴க³ந்தப்³பா³, தஸ்மா ‘‘பா⁴வனாபா⁴கி³யங் ஸுத்தங் த³ஸ்ஸனபா⁴கி³யஸ்ஸ ஸுத்தஸ்ஸ படினிஸ்ஸக்³கா³யா’’தி வுத்தங். யஸ்மா பன அஸெக்க²த⁴ம்மேஸு உப்பன்னேஸு மக்³க³பா⁴வனாகிச்சங் நாம நத்தி². ஜா²னபா⁴வனாபி தி³ட்ட²த⁴ம்மஸுக²விஹாரத்தா² ஏவ ஹோதி, தஸ்மா ‘‘அஸெக்க²பா⁴கி³யங் ஸுத்தங் பா⁴வனாபா⁴கி³யஸ்ஸ ஸுத்தஸ்ஸ படினிஸ்ஸக்³கா³ய, அஸெக்க²பா⁴கி³யங் ஸுத்தங் தி³ட்ட²த⁴ம்மஸுக²விஹாரத்த²’’ந்தி ச வுத்தங்.

Evaṃ lokiyattikassa saṃkilesabhāgiyādīhi catūhi padehi saṃsandanaṃ dassetvā iminā nayena sesatikānaṃ sesapadānañca saṃsandanaṃ suviññeyyanti taṃ anuddharitvā saṃkilesabhāgiyādīnaṃ samatikkamanaṃ dassetuṃ ‘‘vāsanābhāgiyaṃ sutta’’ntiādi vuttaṃ. Tattha yadipi saṃkilesabhāgiyaṃ suttaṃ, vāsanābhāgiyañca suttaṃ lokiyameva. Tathāpi lokuttarasuttāni viya lokiyasuttānaṃ vāsanābhāgiyaṃ suttaṃ saṃkilesabhāgiyassa samatikkamāya hotīti imamatthaṃ dassetuṃ ‘‘vāsanābhāgiyaṃ suttaṃ saṃkilesabhāgiyassa suttassa nigghātāyā’’ti vuttaṃ. Tattha nigghātāyāti pahānāya. Suttasīsena cettha suttattho gahitoti daṭṭhabbaṃ. Yasmā ca vodānadhammā viya saṃkilesadhammānaṃ dassanabhūmisamatikkamaneneva bhāvanābhūmi adhigantabbā, tasmā ‘‘bhāvanābhāgiyaṃ suttaṃ dassanabhāgiyassa suttassa paṭinissaggāyā’’ti vuttaṃ. Yasmā pana asekkhadhammesu uppannesu maggabhāvanākiccaṃ nāma natthi. Jhānabhāvanāpi diṭṭhadhammasukhavihāratthā eva hoti, tasmā ‘‘asekkhabhāgiyaṃ suttaṃ bhāvanābhāgiyassa suttassa paṭinissaggāya, asekkhabhāgiyaṃ suttaṃ diṭṭhadhammasukhavihārattha’’nti ca vuttaṃ.

இதா³னி திகபதே³ஹேவ ஸங்ஸந்தி³த்வா த³ஸ்ஸேதுங் ‘‘லோகுத்தர’’ந்திஆதி³ வுத்தங். ஏகபீ³ஜினாதிஆதீ³ஸு யோ ஸோதாபன்னோ ஹுத்வா ஏகமேவ அத்தபா⁴வங் ஜனெத்வா அரஹத்தங் பாபுணாதி, அயங் ஏகபீ³ஜீ நாம. யதா²ஹ –

Idāni tikapadeheva saṃsanditvā dassetuṃ ‘‘lokuttara’’ntiādi vuttaṃ. Ekabījinātiādīsu yo sotāpanno hutvā ekameva attabhāvaṃ janetvā arahattaṃ pāpuṇāti, ayaṃ ekabījī nāma. Yathāha –

‘‘கதமோ ச புக்³க³லோ ஏகபீ³ஜீ? இதே⁴கச்சோ புக்³க³லோ திண்ணங் ஸங்யோஜனானங் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ. ஸோ ஏகங்யேவ மானுஸகங் ப⁴வங் நிப்³ப³த்தெத்வா து³க்க²ஸ்ஸந்தங் கரோதி. அயங் வுச்சதி புக்³க³லோ ஏகபீ³ஜீ’’தி (பு॰ ப॰ 33).

‘‘Katamo ca puggalo ekabījī? Idhekacco puggalo tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyaṇo. So ekaṃyeva mānusakaṃ bhavaṃ nibbattetvā dukkhassantaṃ karoti. Ayaṃ vuccati puggalo ekabījī’’ti (pu. pa. 33).

யோ பன த்³வே வா தீணி வா குலானி ஸந்தா⁴வித்வா ஸங்ஸரித்வா து³க்க²ஸ்ஸந்தங் கரோதி, அயங் கோலங்கோலோ நாம. யதா²ஹ –

Yo pana dve vā tīṇi vā kulāni sandhāvitvā saṃsaritvā dukkhassantaṃ karoti, ayaṃ kolaṃkolo nāma. Yathāha –

‘‘கதமோ ச புக்³க³லோ கோலங்கோலோ? இதே⁴கச்சோ புக்³க³லோ திண்ணங்…பே॰… பராயணோ. ஸோ த்³வே வா தீணி வா குலானி ஸந்தா⁴வித்வா ஸங்ஸரித்வா து³க்க²ஸ்ஸந்தங் கரோதி. அயங் வுச்சதி புக்³க³லோ கோலங்கோலோ’’தி (பு॰ ப॰ 32).

‘‘Katamo ca puggalo kolaṃkolo? Idhekacco puggalo tiṇṇaṃ…pe… parāyaṇo. So dve vā tīṇi vā kulāni sandhāvitvā saṃsaritvā dukkhassantaṃ karoti. Ayaṃ vuccati puggalo kolaṃkolo’’ti (pu. pa. 32).

தத்த² குலானீதி ப⁴வே. த்³வே வா தீணி வாதி இத³மெத்த² தே³ஸனாமத்தமேவ. யாவ ச²ட்ட²ப⁴வா ஸங்ஸரந்தோபி கோலங்கோலோ ஹோதி ஏவ.

Tattha kulānīti bhave. Dve vā tīṇi vāti idamettha desanāmattameva. Yāva chaṭṭhabhavā saṃsarantopi kolaṃkolo hoti eva.

யோ பன ஸத்த ப⁴வே ஸங்ஸரித்வா து³க்க²ஸ்ஸந்தங் கரோதி, அயங் ஸத்தக்க²த்துபரமோ நாம. யதா²ஹ –

Yo pana satta bhave saṃsaritvā dukkhassantaṃ karoti, ayaṃ sattakkhattuparamo nāma. Yathāha –

‘‘கதமோ ச புக்³க³லோ ஸத்தக்க²த்துபரமோ? இதே⁴கச்சோ…பே॰… பராயணோ. ஸோ ஸத்தக்க²த்துங் தே³வே சேவ மானுஸே ச ஸந்தா⁴வித்வா ஸங்ஸரித்வா து³க்க²ஸ்ஸந்தங் கரோதி. அயங் வுச்சதி புக்³க³லோ ஸத்தக்க²த்துபரமோ’’தி (பு॰ ப॰ 31).

‘‘Katamo ca puggalo sattakkhattuparamo? Idhekacco…pe… parāyaṇo. So sattakkhattuṃ deve ceva mānuse ca sandhāvitvā saṃsaritvā dukkhassantaṃ karoti. Ayaṃ vuccati puggalo sattakkhattuparamo’’ti (pu. pa. 31).

கோ பன தேஸங் ஏதங் பபே⁴த³ங் நியமேதீதி? கேசி தாவ ‘‘புப்³ப³ஹேது நியமேதீ’’தி வத³ந்தி. கேசி ‘‘பட²மமக்³கோ³’’, கேசி ‘‘உபரி தயோ மக்³கா³’’. கேசி ‘‘திண்ணங் மக்³கா³னங் விபஸ்ஸனா’’தி. தத்த² புப்³ப³ஹேது நியமேதீதி வாதே³ பட²மமக்³க³ஸ்ஸ உபனிஸ்ஸயோ கதோ நாம ஹோதி. உபரி தயோ மக்³கா³ நிருபனிஸ்ஸயா உப்பன்னாதி ஆபஜ்ஜதி. பட²மமக்³கோ³ நியமேதீதி வாதே³ உபரி திண்ணங் மக்³கா³னங் நிரத்த²கதா ஆபஜ்ஜதி. உபரி தயோ மக்³கா³ நியமெந்தீதி வாதே³ ‘‘பட²மமக்³கே³ அனுப்பன்னே ஏவ உபரி தயோ மக்³கா³ உப்பன்னா’’தி ஆபஜ்ஜதி. விபஸ்ஸனா நியமேதீதி வாதோ³ பன யுஜ்ஜதி. ஸசே ஹி உபரி திண்ணங் மக்³கா³னங் விபஸ்ஸனா ப³லவதீ ஹோதி, ஏகபீ³ஜீ நாம ஹோதி. ததோ மந்த³தரா கோலங்கோலோ. ததோ மந்த³தரா ஸத்தக்க²த்துபரமோதி. எத்த² ச யோ மனுஸ்ஸேஸு ஏவ ஸத்தக்க²த்துங் ஸங்ஸரித்வா அரஹத்தங் பாபுணாதி, யோ ச தே³வேஸுயேவ ஸத்தக்க²த்துங் ஸங்ஸரித்வா அரஹத்தங் பாபுணாதி, இமே ந இதா⁴தி⁴ப்பேதா. யோ பன காலேன தே³வேஸு, காலேன மனுஸ்ஸேஸூதி வோமிஸ்ஸகனயேன ஸங்ஸரித்வா அரஹத்தங் பாபுணாதி, ஸோ இதா⁴தி⁴ப்பேதோ. தஸ்மா ‘‘ஸத்தக்க²த்துபரமோ’’தி இத³ங் இத⁴ட்ட²கவோகிண்ணவட்டஜ்ஜா²ஸயஸ்ஸ வஸேன வேதி³தப்³ப³ங். வட்டஜ்ஜா²ஸயோ ஹி ஆதி³தோ பட்டா²ய ச² தே³வலோகே ஸோதெ⁴த்வா அகனிட்டே² ட²த்வா பரினிப்³பா³யிஸ்ஸதி.

Ko pana tesaṃ etaṃ pabhedaṃ niyametīti? Keci tāva ‘‘pubbahetu niyametī’’ti vadanti. Keci ‘‘paṭhamamaggo’’, keci ‘‘upari tayo maggā’’. Keci ‘‘tiṇṇaṃ maggānaṃ vipassanā’’ti. Tattha pubbahetu niyametīti vāde paṭhamamaggassa upanissayo kato nāma hoti. Upari tayo maggā nirupanissayā uppannāti āpajjati. Paṭhamamaggo niyametīti vāde upari tiṇṇaṃ maggānaṃ niratthakatā āpajjati. Upari tayo maggā niyamentīti vāde ‘‘paṭhamamagge anuppanne eva upari tayo maggā uppannā’’ti āpajjati. Vipassanā niyametīti vādo pana yujjati. Sace hi upari tiṇṇaṃ maggānaṃ vipassanā balavatī hoti, ekabījī nāma hoti. Tato mandatarā kolaṃkolo. Tato mandatarā sattakkhattuparamoti. Ettha ca yo manussesu eva sattakkhattuṃ saṃsaritvā arahattaṃ pāpuṇāti, yo ca devesuyeva sattakkhattuṃ saṃsaritvā arahattaṃ pāpuṇāti, ime na idhādhippetā. Yo pana kālena devesu, kālena manussesūti vomissakanayena saṃsaritvā arahattaṃ pāpuṇāti, so idhādhippeto. Tasmā ‘‘sattakkhattuparamo’’ti idaṃ idhaṭṭhakavokiṇṇavaṭṭajjhāsayassa vasena veditabbaṃ. Vaṭṭajjhāsayo hi ādito paṭṭhāya cha devaloke sodhetvā akaniṭṭhe ṭhatvā parinibbāyissati.

தத்த² யோ ஸத்³த⁴ங் து⁴ரங் கத்வா ஸோதாபத்திமக்³க³ங் நிப்³ப³த்தேதி, ஸோ மக்³க³க்க²ணே ஸத்³தா⁴னுஸாரீ நாம ஹோதி. ப²லக்க²ணே பன ஸத்³தா⁴விமுத்தோ நாம ஹுத்வா வுத்தனயேன ஏகபீ³ஜிஆதி³பே⁴தோ³ ஹோதி. யோ பன பஞ்ஞங் து⁴ரங் கத்வா ஸோதாபத்திமக்³க³ங் நிப்³ப³த்தேதி, ஸோ மக்³க³க்க²ணே த⁴ம்மானுஸாரீ நாம. ப²லக்க²ணே பன தி³ட்டி²ப்பத்தோ நாம ஹுத்வா ஏகபீ³ஜிஆதி³பே⁴தோ³ ஹோதி. இத³ஞ்ச அட்ட²ன்னங் விமொக்கா²னங் அலாபி⁴னோ வஸேன வுத்தங். லாபீ⁴ பன ப²லக்க²ணே காயஸக்கீ² நாம ஹோதி. தத்த² யே ஸத்³தா⁴விமுத்ததி³ட்டி²ப்பத்தகாயஸக்கி²னாமகா தயோ ஸோதாபன்னா, தே ஏகபீ³ஜிஆதீ³ஹி தீஹேவ ஸங்க³ஹெத்வா வுத்தங் – ‘‘பஞ்சஹி புக்³க³லேஹி நித்³தி³ஸிதப்³ப³ங் ஏகபீ³ஜினா…பே॰… த⁴ம்மானுஸாரினா’’தி, ஏவங் பஞ்சஹி.

Tattha yo saddhaṃ dhuraṃ katvā sotāpattimaggaṃ nibbatteti, so maggakkhaṇe saddhānusārī nāma hoti. Phalakkhaṇe pana saddhāvimutto nāma hutvā vuttanayena ekabījiādibhedo hoti. Yo pana paññaṃ dhuraṃ katvā sotāpattimaggaṃ nibbatteti, so maggakkhaṇe dhammānusārī nāma. Phalakkhaṇe pana diṭṭhippatto nāma hutvā ekabījiādibhedo hoti. Idañca aṭṭhannaṃ vimokkhānaṃ alābhino vasena vuttaṃ. Lābhī pana phalakkhaṇe kāyasakkhī nāma hoti. Tattha ye saddhāvimuttadiṭṭhippattakāyasakkhināmakā tayo sotāpannā, te ekabījiādīhi tīheva saṅgahetvā vuttaṃ – ‘‘pañcahi puggalehi niddisitabbaṃ ekabījinā…pe… dhammānusārinā’’ti, evaṃ pañcahi.

த்³வாத³ஸஹி புக்³க³லேஹீதி ஸகதா³கா³மிமக்³க³ட்டோ², ஸகதா³கா³மீ, அனாகா³மிமக்³க³ட்டோ², அபே⁴தே³ன அனாகா³மீ, அந்தராபரினிப்³பா³யிஆத³யோ பஞ்ச, ஸத்³தா⁴விமுத்ததி³ட்டி²ப்பத்தகாயஸக்கி²னோ தயோதி பே⁴தே³ன அட்டா²தி, ஏவங் த்³வாத³ஸஹி. தத்த² ஹி யோ அவிஹாதீ³ஸு தத்த² தத்த² ஆயுவேமஜ்ஜ²ங் அப்பத்வா பரினிப்³பா³யதி, அயங் அந்தராபரினிப்³பா³யீ. யோ பன ஆயுவேமஜ்ஜ²ங் அதிக்கமித்வா அரஹத்தங் பாபுணாதி, அயங் உபஹச்சபரினிப்³பா³யீ. ததா² யோ அவிஹாதீ³ஸு உபபன்னோ அஸங்கா²ரேன அப்பயோகே³ன அரஹத்தங் அதி⁴க³ச்ச²தி, அயங் அஸங்கா²ரபரினிப்³பா³யீ. யோ பன ஸஸங்கா²ரேன ஸப்பயோகே³ன அரஹத்தங் அதி⁴க³ச்ச²தி, அயங் ஸஸங்கா²ரபரினிப்³பா³யீ. உத்³த⁴ங் உபரூபரி ப்³ரஹ்மலோகே உபபத்திஸோதோ ஏதஸ்ஸாதி உத்³த⁴ங்ஸோதோ. படிஸந்தி⁴வஸேன அகனிட்டே² க³ச்ச²தீதி அகனிட்ட²கா³மீ.

Dvādasahipuggalehīti sakadāgāmimaggaṭṭho, sakadāgāmī, anāgāmimaggaṭṭho, abhedena anāgāmī, antarāparinibbāyiādayo pañca, saddhāvimuttadiṭṭhippattakāyasakkhino tayoti bhedena aṭṭhāti, evaṃ dvādasahi. Tattha hi yo avihādīsu tattha tattha āyuvemajjhaṃ appatvā parinibbāyati, ayaṃ antarāparinibbāyī. Yo pana āyuvemajjhaṃ atikkamitvā arahattaṃ pāpuṇāti, ayaṃ upahaccaparinibbāyī. Tathā yo avihādīsu upapanno asaṅkhārena appayogena arahattaṃ adhigacchati, ayaṃ asaṅkhāraparinibbāyī. Yo pana sasaṅkhārena sappayogena arahattaṃ adhigacchati, ayaṃ sasaṅkhāraparinibbāyī. Uddhaṃ uparūpari brahmaloke upapattisoto etassāti uddhaṃsoto. Paṭisandhivasena akaniṭṭhe gacchatīti akaniṭṭhagāmī.

தத்த² அத்தி² உத்³த⁴ங்ஸோதோ அகனிட்ட²கா³மீ அத்தி² உத்³த⁴ங்ஸோதோ ந அகனிட்ட²கா³மீ, அத்தி² ந உத்³த⁴ங்ஸோதோ அகனிட்ட²கா³மீ அத்தி² ந உத்³த⁴ங்ஸோதோ ந அகனிட்ட²கா³மீதி. தத்த² யோ இத⁴ அனாகா³மிப²லங் பத்வா அவிஹாதீ³ஸு நிப்³ப³த்தோ தத்த² யாவதாயுகங் ட²த்வா உபரூபரி நிப்³ப³த்தித்வா அகனிட்ட²ங் பாபுணாதி, அயங் உத்³த⁴ங்ஸோதோ அகனிட்ட²கா³மீ நாம. யோ பன அவிஹாதீ³ஸு நிப்³ப³த்தோ தத்தே²வ அபரினிப்³பா³யித்வா அகனிட்ட²ம்பி அப்பத்வா உபரூபரி ப்³ரஹ்மலோகே பரினிப்³பா³யதி, அயங் உத்³த⁴ங்ஸோதோ ந அகனிட்ட²கா³மீ நாம. யோ இதோ சவித்வா அகனிட்டே²யேவ நிப்³ப³த்ததி, அயங் ந உத்³த⁴ங்ஸோதோ அகனிட்ட²கா³மீ நாம. யோ பன அவிஹாதீ³ஸு சதூஸு அஞ்ஞதரஸ்மிங் நிப்³ப³த்தித்வா தத்தே²வ பரினிப்³பா³யதி, அயங் ந உத்³த⁴ங்ஸோதோ ந அகனிட்ட²கா³மீ நாம. ஸத்³தா⁴விமுத்தாத³யோ வுத்தவிபா⁴கா³யேவ.

Tattha atthi uddhaṃsoto akaniṭṭhagāmī atthi uddhaṃsoto na akaniṭṭhagāmī, atthi na uddhaṃsoto akaniṭṭhagāmī atthi na uddhaṃsoto na akaniṭṭhagāmīti. Tattha yo idha anāgāmiphalaṃ patvā avihādīsu nibbatto tattha yāvatāyukaṃ ṭhatvā uparūpari nibbattitvā akaniṭṭhaṃ pāpuṇāti, ayaṃ uddhaṃsoto akaniṭṭhagāmī nāma. Yo pana avihādīsu nibbatto tattheva aparinibbāyitvā akaniṭṭhampi appatvā uparūpari brahmaloke parinibbāyati, ayaṃ uddhaṃsoto na akaniṭṭhagāmī nāma. Yo ito cavitvā akaniṭṭheyeva nibbattati, ayaṃ na uddhaṃsoto akaniṭṭhagāmī nāma. Yo pana avihādīsu catūsu aññatarasmiṃ nibbattitvā tattheva parinibbāyati, ayaṃ na uddhaṃsoto na akaniṭṭhagāmī nāma. Saddhāvimuttādayo vuttavibhāgāyeva.

நவஹி புக்³க³லேஹீதி எத்த² அட்ட²ன்னங் விமொக்கா²னங் அலாபீ⁴ அரஹா பஞ்ஞாவிமுத்தோ நாம. தேஸங் பன லாபீ⁴ விக்க²ம்ப⁴னஸமுச்சே²த³விமொக்க²வஸேன உபோ⁴ஹி பா⁴கே³ஹி ரூபகாயனாமகாயஸங்கா²ததோ உப⁴தோ பா⁴க³தோ விமுத்தத்தா உப⁴தோபா⁴க³விமுத்தோ நாம. ஸமஸீஸினாதி எத்த² திவிதோ⁴ ஸமஸீஸீ – இரியாபத²ஸமஸீஸீ, ரோக³ஸமஸீஸீ, ஜீவிதஸமஸீஸீதி.

Navahi puggalehīti ettha aṭṭhannaṃ vimokkhānaṃ alābhī arahā paññāvimutto nāma. Tesaṃ pana lābhī vikkhambhanasamucchedavimokkhavasena ubhohi bhāgehi rūpakāyanāmakāyasaṅkhātato ubhato bhāgato vimuttattā ubhatobhāgavimutto nāma. Samasīsināti ettha tividho samasīsī – iriyāpathasamasīsī, rogasamasīsī, jīvitasamasīsīti.

தத்ர யோ டா²னாதீ³ஸு இரியாபதே²ஸு யேனேவ இரியாபதே²ன ஸமன்னாக³தோ ஹுத்வா விபஸ்ஸனங் ஆரப⁴தி, தேனேவ இரியாபதே²ன அரஹத்தங் பத்வா பரினிப்³பா³யதி, அயங் இரியாபத²ஸமஸீஸீ நாம. யோ பன ஏகங் ரோக³ங் பத்வா அந்தோரோகே³ ஏவ விபஸ்ஸனங் பட்ட²பெத்வா அரஹத்தங் பத்வா தேனேவ ரோகே³ன பரினிப்³பா³யதி, அயங் ரோக³ஸமஸீஸீ நாம. பலிபோ³த⁴ஸீஸங் தண்ஹா, ப³ந்த⁴னஸீஸங் மானோ, பராமாஸஸீஸங் தி³ட்டி², விக்கே²பஸீஸங் உத்³த⁴ச்சங், கிலேஸஸீஸங் அவிஜ்ஜா, அதி⁴மொக்க²ஸீஸங் ஸத்³தா⁴, பக்³க³ஹஸீஸங் வீரியங், உபட்டா²னஸீஸங் ஸதி, அவிக்கே²பஸீஸங் ஸமாதி⁴, த³ஸ்ஸனஸீஸங் பஞ்ஞா, பவத்தஸீஸங் ஜீவிதிந்த்³ரியங், கோ³சரஸீஸங் விமொக்கோ², ஸங்கா²ரஸீஸங் நிரோதோ⁴தி தேரஸஸு ஸீஸேஸு கிலேஸஸீஸங் அவிஜ்ஜங் அரஹத்தமக்³கோ³ பரியாதி³யதி, பவத்தஸீஸங் ஜீவிதிந்த்³ரியங் சுதிசித்தங் பரியாதி³யதி. தத்த² அவிஜ்ஜாபரியாதா³யகங் சித்தங் ஜீவிதிந்த்³ரியங் பரியாதா³துங் ந ஸக்கோதி. ஜீவிதிந்த்³ரியபரியாதா³யகங் அவிஜ்ஜங் பரியாதா³துங் ந ஸக்கோதி. அஞ்ஞங் அவிஜ்ஜாபரியாதா³யகங் சித்தங், அஞ்ஞங் ஜீவிதிந்த்³ரியபரியாதா³யகங். யஸ்ஸ சேதங் ஸீஸத்³வயங் ஸமங் பரியாதா³னங் க³ச்ச²தி, ஸோ ஜீவிதஸமஸீஸீ நாம.

Tatra yo ṭhānādīsu iriyāpathesu yeneva iriyāpathena samannāgato hutvā vipassanaṃ ārabhati, teneva iriyāpathena arahattaṃ patvā parinibbāyati, ayaṃ iriyāpathasamasīsī nāma. Yo pana ekaṃ rogaṃ patvā antoroge eva vipassanaṃ paṭṭhapetvā arahattaṃ patvā teneva rogena parinibbāyati, ayaṃ rogasamasīsī nāma. Palibodhasīsaṃ taṇhā, bandhanasīsaṃ māno, parāmāsasīsaṃ diṭṭhi, vikkhepasīsaṃ uddhaccaṃ, kilesasīsaṃ avijjā, adhimokkhasīsaṃ saddhā, paggahasīsaṃ vīriyaṃ, upaṭṭhānasīsaṃ sati, avikkhepasīsaṃ samādhi, dassanasīsaṃ paññā, pavattasīsaṃ jīvitindriyaṃ, gocarasīsaṃ vimokkho, saṅkhārasīsaṃ nirodhoti terasasu sīsesu kilesasīsaṃ avijjaṃ arahattamaggo pariyādiyati, pavattasīsaṃ jīvitindriyaṃ cuticittaṃ pariyādiyati. Tattha avijjāpariyādāyakaṃ cittaṃ jīvitindriyaṃ pariyādātuṃ na sakkoti. Jīvitindriyapariyādāyakaṃ avijjaṃ pariyādātuṃ na sakkoti. Aññaṃ avijjāpariyādāyakaṃ cittaṃ, aññaṃ jīvitindriyapariyādāyakaṃ. Yassa cetaṃ sīsadvayaṃ samaṃ pariyādānaṃ gacchati, so jīvitasamasīsī nāma.

கத²ங் பனித³ங் ஸமங் ஹோதீதி? வாரஸமதாய. யஸ்மிஞ்ஹி வாரே மக்³க³வுட்டா²னங் ஹோதி, ஸோதாபத்திமக்³கே³ பஞ்ச பச்சவெக்க²ணானி, ஸகதா³கா³மிமக்³கே³ பஞ்ச, அனாகா³மிமக்³கே³ பஞ்ச, அரஹத்தமக்³கே³ சத்தாரீதி ஏகூனவீஸதிமே பச்சவெக்க²ணஞாணே பதிட்டா²ய ப⁴வங்க³ங் ஓதரித்வா பரினிப்³பா³யதோ இமாய வாரஸமதாய இத³ங் உப⁴யஸீஸபரியாதா³னம்பி ஸமங் ஹோதி நாம. தேனாயங் புக்³க³லோ ‘‘ஜீவிதஸமஸீஸீ’’தி வுச்சதி, அயமேவ இதா⁴தி⁴ப்பேதோ. ஏவங் ஸுஞ்ஞதவிமுத்தாத³யோ தயோ ஸத்³தா⁴விமுத்தோ பஞ்ஞாவிமுத்தோ உப⁴தோபா⁴க³விமுத்தோ ஸமஸீஸீதி ஸத்த ஸாவகா அரஹந்தோ, பச்சேகபு³த்³தோ⁴, ஸம்மாஸம்பு³த்³தோ⁴தி இமேஹி நவஹி புக்³க³லேஹி அஸெக்க²பா⁴கி³யங் ஸுத்தங் நித்³தி³ஸிதப்³ப³ங்.

Kathaṃ panidaṃ samaṃ hotīti? Vārasamatāya. Yasmiñhi vāre maggavuṭṭhānaṃ hoti, sotāpattimagge pañca paccavekkhaṇāni, sakadāgāmimagge pañca, anāgāmimagge pañca, arahattamagge cattārīti ekūnavīsatime paccavekkhaṇañāṇe patiṭṭhāya bhavaṅgaṃ otaritvā parinibbāyato imāya vārasamatāya idaṃ ubhayasīsapariyādānampi samaṃ hoti nāma. Tenāyaṃ puggalo ‘‘jīvitasamasīsī’’ti vuccati, ayameva idhādhippeto. Evaṃ suññatavimuttādayo tayo saddhāvimutto paññāvimutto ubhatobhāgavimutto samasīsīti satta sāvakā arahanto, paccekabuddho, sammāsambuddhoti imehi navahi puggalehi asekkhabhāgiyaṃ suttaṃ niddisitabbaṃ.

ராக³சரிதோதி ராக³ஸஹிதங் சரிதங் ஏதஸ்ஸாதி ராக³சரிதோ. ராகே³ன வா சரிதோ பவத்திதோ ராக³சரிதோ, ராக³ஜ்ஜா²ஸயோ ராகா³தி⁴கோதி அத்தோ². ஏஸ நயோ ஸேஸேஸுபி. ராக³முகே² டி²தோதி ராக³பரியுட்டா²னே டி²தோ, பரியுட்டி²தராகோ³தி அத்தோ². ஸேஸபதே³ஸுபி ஏஸேவ நயோ.

Rāgacaritoti rāgasahitaṃ caritaṃ etassāti rāgacarito. Rāgena vā carito pavattito rāgacarito, rāgajjhāsayo rāgādhikoti attho. Esa nayo sesesupi. Rāgamukhe ṭhitoti rāgapariyuṭṭhāne ṭhito, pariyuṭṭhitarāgoti attho. Sesapadesupi eseva nayo.

வாஸனாபா⁴கி³யங் ஸுத்தந்தி லோகியங் ஸத்தாதி⁴ட்டா²னங் வாஸனாபா⁴கி³யங் ஸுத்தங். லோகியங் ஸத்தாதி⁴ட்டா²னங் ஸங்கிலேஸபா⁴கி³யஞ்ஹி ஸுத்தங் ராக³சரிதேஹி புக்³க³லேஹி நித்³தி³ட்ட²ங். தத்த² ‘‘லோகியங், ஸத்தாதி⁴ட்டா²ன’’ந்தி பத³த்³வயங் அனுவத்தமானங் கத்வா வுத்தங் ‘‘வாஸனாபா⁴கி³ய’’ந்தி. ஸீலவந்தேஹீதி ஸீலவந்தாதீ³ஹி புக்³க³லேஹி. பகதிஸீலந்திஆதி³ யேஹி ஸமன்னாக³தா, தே புக்³க³லா. தேஸங் த³ஸ்ஸனேன புக்³க³லானங் உபலக்க²ணங். அத² வா த⁴ம்மாதி⁴ட்டா²னங் பகதிஸீலாதி³வஸேன, ஸத்தாதி⁴ட்டா²னங் பகதிஸீலவந்தாதி³வஸேன வேதி³தப்³ப³ந்தி இமஸ்ஸ நயஸ்ஸ த³ஸ்ஸனத்த²ங் ‘‘ஸீலவந்தேஹி நித்³தி³ஸிதப்³ப³’’ந்தி வத்வா ‘‘பகதிஸீல’’ந்திஆதி³ வுத்தங். தங் பகதிஸீலாதீ³னங் பஞ்சன்னங் ஏவ க³ஹணங் நித³ஸ்ஸனமத்தங், பத்திதா³னஅப்³ப⁴னுமோத³னத⁴ம்மஸ்ஸவனதே³ஸனாதி³ட்டி²ஜுகம்மாதீ³னம்பி செத்த² ஸம்ப⁴வதோ. தேஸம்பி வா எத்தே²வ ஸங்க³ஹெத்வா த³ஸ்ஸனத்த²ங் ‘‘பஞ்சா’’தி வுத்தங்.

Vāsanābhāgiyaṃ suttanti lokiyaṃ sattādhiṭṭhānaṃ vāsanābhāgiyaṃ suttaṃ. Lokiyaṃ sattādhiṭṭhānaṃ saṃkilesabhāgiyañhi suttaṃ rāgacaritehi puggalehi niddiṭṭhaṃ. Tattha ‘‘lokiyaṃ, sattādhiṭṭhāna’’nti padadvayaṃ anuvattamānaṃ katvā vuttaṃ ‘‘vāsanābhāgiya’’nti. Sīlavantehīti sīlavantādīhi puggalehi. Pakatisīlantiādi yehi samannāgatā, te puggalā. Tesaṃ dassanena puggalānaṃ upalakkhaṇaṃ. Atha vā dhammādhiṭṭhānaṃ pakatisīlādivasena, sattādhiṭṭhānaṃ pakatisīlavantādivasena veditabbanti imassa nayassa dassanatthaṃ ‘‘sīlavantehi niddisitabba’’nti vatvā ‘‘pakatisīla’’ntiādi vuttaṃ. Taṃ pakatisīlādīnaṃ pañcannaṃ eva gahaṇaṃ nidassanamattaṃ, pattidānaabbhanumodanadhammassavanadesanādiṭṭhijukammādīnampi cettha sambhavato. Tesampi vā ettheva saṅgahetvā dassanatthaṃ ‘‘pañcā’’ti vuttaṃ.

தத்த² பகதிஸீலந்தி ஸம்பத்தவிரதிஸீலங். சித்தப்பஸாதோ³தி கம்மப²லஸத்³தா⁴ ரதனத்தயஸத்³தா⁴ ச. ஞாணங் பஞ்ஞாய நித்³தி³ஸிதப்³ப³ந்தி யஸ்மிங் ஸுத்தே பஞ்ஞா ஆக³தா, தங் ஸுத்தங் ஞாணந்தி நித்³தி³ஸிதப்³ப³ங். ந கேவலங் பஞ்ஞாபரியாயேனேவ, அத² கோ² பஞ்ஞிந்த்³ரியாதி³பரியாயேனபி யத்த² பஞ்ஞா ஆக³தா, தங் ஸுத்தங் ஞாணந்தி நித்³தி³ஸிதப்³ப³ந்தி த³ஸ்ஸேதுங் ‘‘பஞ்ஞிந்த்³ரியேனா’’திஆதி³ வுத்தங். தஸ்ஸத்தோ² – ஹெட்டா² வுத்தோ ஏவ. யங் வா பனாதிஆதீ³ஸு யங் வா அஞ்ஞங் கிஞ்சி பஞ்ஞாய அதி⁴வசனங். ஸப்³ப³ங் தங் யத்த² கத்த²சி ஸுத்தே ஆக³தங், தங் ஸுத்தங் ஞாணந்தி நித்³தி³ஸிதப்³ப³ந்தி அத்தோ².

Tattha pakatisīlanti sampattaviratisīlaṃ. Cittappasādoti kammaphalasaddhā ratanattayasaddhā ca. Ñāṇaṃ paññāya niddisitabbanti yasmiṃ sutte paññā āgatā, taṃ suttaṃ ñāṇanti niddisitabbaṃ. Na kevalaṃ paññāpariyāyeneva, atha kho paññindriyādipariyāyenapi yattha paññā āgatā, taṃ suttaṃ ñāṇanti niddisitabbanti dassetuṃ ‘‘paññindriyenā’’tiādi vuttaṃ. Tassattho – heṭṭhā vutto eva. Yaṃ vā panātiādīsu yaṃ vā aññaṃ kiñci paññāya adhivacanaṃ. Sabbaṃ taṃ yattha katthaci sutte āgataṃ, taṃ suttaṃ ñāṇanti niddisitabbanti attho.

அஜ்ஜ²த்திகபா³ஹிரேஹீதி யஸ்மிங் ஸுத்தே அஜ்ஜ²த்திகானி ஆயதனானி, பா³ஹிரானி ச ஆயதனானி ஆக³தானி, தங் ஸுத்தங் தேஹி ஆயதனேஹி ஞாணங் ஞெய்யந்தி நித்³தி³ஸிதப்³ப³ங். பஞ்ஞாபி ஆரம்மணபூ⁴தா ஞெய்யந்தி ஞெய்யதோ விஸுங் கத்வா பஞ்ஞா வுத்தா. ததா² ஹி பஞ்ஞா ஞாணந்தரஸ்ஸ ஆரம்மணந்தி கத்த²சி ஸுத்தே ஞெய்யபா⁴வேனபி வுச்சதி. யங் கிஞ்சி ஆரம்மணபூ⁴தந்தி யங் கிஞ்சி ஞாணஸ்ஸ விஸயபூ⁴தங் ரூபாதி³. அஜ்ஜ²த்திகங் வா பா³ஹிரங் வாதி வா-ஸத்³தே³ன ஓளாரிகாதி³ங் ஸங்க³ண்ஹாதி. ஸப்³ப³ங் தங் ஸங்க²தேன அஸங்க²தேன சாதி ஸப்³ப³ங் தங் யதா²ஸம்ப⁴வங் ஸங்க²தபா⁴வேன அஸங்க²தபா⁴வேன ச ஞெய்யந்தி நித்³தி³ஸிதப்³ப³ங். ஞெய்யத⁴ம்மவஸேன ஹி ஞெய்யஸுத்தங் ஞெய்யந்தி வுச்சதீதி.

Ajjhattikabāhirehīti yasmiṃ sutte ajjhattikāni āyatanāni, bāhirāni ca āyatanāni āgatāni, taṃ suttaṃ tehi āyatanehi ñāṇaṃ ñeyyanti niddisitabbaṃ. Paññāpi ārammaṇabhūtā ñeyyanti ñeyyato visuṃ katvā paññā vuttā. Tathā hi paññā ñāṇantarassa ārammaṇanti katthaci sutte ñeyyabhāvenapi vuccati. Yaṃ kiñci ārammaṇabhūtanti yaṃ kiñci ñāṇassa visayabhūtaṃ rūpādi. Ajjhattikaṃ vā bāhiraṃ vāti vā-saddena oḷārikādiṃ saṅgaṇhāti. Sabbaṃ taṃ saṅkhatena asaṅkhatena cāti sabbaṃ taṃ yathāsambhavaṃ saṅkhatabhāvena asaṅkhatabhāvena ca ñeyyanti niddisitabbaṃ. Ñeyyadhammavasena hi ñeyyasuttaṃ ñeyyanti vuccatīti.

யங் வா பன கிஞ்சி ப⁴க³வா அஞ்ஞதரவசனங் பா⁴ஸதீதி லோகியலோகுத்தராதி³ஸுத்தேஸு ஏகஸ்மிங் ஸுத்தே த்³வே. தேஸு யங் வா பன கிஞ்சி அஞ்ஞதரவசனங் ஏகஸ்ஸேவ கத²னங் பா⁴ஸதி நித்³தி³ஸதி. ஸப்³ப³ங் தங் யதா²னித்³தி³ட்ட²ங் தா⁴ரயிதப்³ப³ந்தி தங் யதா² ஸப்³ப³ங் ஸுத்தங் லோகியாதீ³ஸு யதி³ அஞ்ஞதரவஸேன, அத² உப⁴யவஸேன யதா² யதா² நித்³தி³ட்ட²ங், ததா² ததா² க³ஹேதப்³ப³ங், தங் தங் பதா⁴னபா⁴வேன நித்³தி³ஸிதப்³ப³ந்தி அத்தோ².

Yaṃ vā pana kiñci bhagavā aññataravacanaṃ bhāsatīti lokiyalokuttarādisuttesu ekasmiṃ sutte dve. Tesu yaṃ vā pana kiñci aññataravacanaṃ ekasseva kathanaṃ bhāsati niddisati. Sabbaṃ taṃ yathāniddiṭṭhaṃ dhārayitabbanti taṃ yathā sabbaṃ suttaṃ lokiyādīsu yadi aññataravasena, atha ubhayavasena yathā yathā niddiṭṭhaṃ, tathā tathā gahetabbaṃ, taṃ taṃ padhānabhāvena niddisitabbanti attho.

கிலேஸஸஹிதஞ்ஞேவ கம்மங் விபாகஸ்ஸ ஹேது, ந இதரந்தி வுத்தங் ‘‘து³விதோ⁴ ஹேது யஞ்ச கம்மங் யே ச கிலேஸா’’தி. ஸமுத³யோ கிலேஸாதி எத்த² ‘‘ஸமுத³யோ’’தி ஏதேன ஸமுத³யபக்கி²யா வுத்தா. ‘‘கிலேஸா’’தி ச கிலேஸவந்தோ, ஸங்கிலிட்டா²தி அத்தோ². யங் தி³ஸ்ஸதீதி யங் யங் தி³ஸ்ஸதி. தாஸு தாஸு பூ⁴மீஸூதி புது²ஜ்ஜனபூ⁴மிஆதீ³ஸு. கப்பியானுலோமேனாதி கப்பியேன ச கப்பியானுலோமேன ச. தத்த² கப்பியங் பாளியங் ஸரூபதோ வுத்தங், கப்பியானுலோமங் மஹாபதே³ஸவஸேன நயதோ த³ஸ்ஸிதங். படிக்கி²த்தகாரணேனாதி யேன காரணேன ப⁴க³வதா யங் படிக்கி²த்தங், தேன காரணேன தங் நித்³தி³ஸிதப்³ப³ங். ஏகந்தேன ஸராகா³தி³ஸங்வத்தனமேவ ஹி ப⁴க³வதா படிக்கி²த்தங், தங் ஸராகா³ய ஸங்வத்தனாதி³காரணேன நித்³தி³ஸிதப்³ப³ங் . த⁴ம்மஸ்ஸாதி அஸங்க²தத⁴ம்மஸ்ஸ. அரியத⁴ம்மானந்தி மக்³க³ப²லத⁴ம்மானங். ஸேஸங் ஸுவிஞ்ஞெய்யமேவ.

Kilesasahitaññeva kammaṃ vipākassa hetu, na itaranti vuttaṃ ‘‘duvidho hetu yañca kammaṃ ye ca kilesā’’ti. Samudayo kilesāti ettha ‘‘samudayo’’ti etena samudayapakkhiyā vuttā. ‘‘Kilesā’’ti ca kilesavanto, saṃkiliṭṭhāti attho. Yaṃ dissatīti yaṃ yaṃ dissati. Tāsu tāsu bhūmīsūti puthujjanabhūmiādīsu. Kappiyānulomenāti kappiyena ca kappiyānulomena ca. Tattha kappiyaṃ pāḷiyaṃ sarūpato vuttaṃ, kappiyānulomaṃ mahāpadesavasena nayato dassitaṃ. Paṭikkhittakāraṇenāti yena kāraṇena bhagavatā yaṃ paṭikkhittaṃ, tena kāraṇena taṃ niddisitabbaṃ. Ekantena sarāgādisaṃvattanameva hi bhagavatā paṭikkhittaṃ, taṃ sarāgāya saṃvattanādikāraṇena niddisitabbaṃ . Dhammassāti asaṅkhatadhammassa. Ariyadhammānanti maggaphaladhammānaṃ. Sesaṃ suviññeyyameva.

எத்த² ச யதா² ஸங்கிலேஸபா⁴கி³யாதீ³னங் அஞ்ஞமஞ்ஞங் ஸங்ஸக்³க³தோ அனேகவிதோ⁴ பட்டா²னபே⁴தோ³ இச்சி²தோ, ஏவங் லோகியஸத்தாதி⁴ட்டா²னாதி³ஸங்ஸக்³க³தோபி அனேகவிதோ⁴ பட்டா²னபே⁴தோ³ ஸம்ப⁴வதி. பாளியங் பன உப⁴யத்தா²பி ஏகதே³ஸத³ஸ்ஸனவஸேன ஆக³தத்தா நயத³ஸ்ஸனந்தி வேதி³தப்³ப³ங். ஸக்கா ஹி இமினா நயேன விஞ்ஞுனா தே நித்³தா⁴ரேதுந்தி. யதா² ச ஸங்கிலேஸபா⁴கி³யாதீ³னங் லோகியாதீ³னஞ்ச விஸுங் விஸுங் ஸங்ஸக்³க³பே⁴த³வஸேன அயங் பட்டா²னபே⁴தோ³ அனேகவிதோ⁴ லப்³ப⁴தி, ஏவங் உப⁴யேஸம்பி ஸங்ஸக்³க³வஸேன அயங் நயோ யதா²ரஹங் லப்³ப⁴தேவ. லப்³ப⁴தி ஹி லோகியங் ஸுத்தங் கிஞ்சி ஸங்கிலேஸபா⁴கி³யங், கிஞ்சி வாஸனாபா⁴கி³யங். ததா² லோகுத்தரங் ஸுத்தங் கிஞ்சி நிப்³பே³த⁴பா⁴கி³யங், கிஞ்சி அஸெக்க²பா⁴கி³யந்தி. ஸேஸேஸுபி ஏஸேவ நயோ.

Ettha ca yathā saṃkilesabhāgiyādīnaṃ aññamaññaṃ saṃsaggato anekavidho paṭṭhānabhedo icchito, evaṃ lokiyasattādhiṭṭhānādisaṃsaggatopi anekavidho paṭṭhānabhedo sambhavati. Pāḷiyaṃ pana ubhayatthāpi ekadesadassanavasena āgatattā nayadassananti veditabbaṃ. Sakkā hi iminā nayena viññunā te niddhāretunti. Yathā ca saṃkilesabhāgiyādīnaṃ lokiyādīnañca visuṃ visuṃ saṃsaggabhedavasena ayaṃ paṭṭhānabhedo anekavidho labbhati, evaṃ ubhayesampi saṃsaggavasena ayaṃ nayo yathārahaṃ labbhateva. Labbhati hi lokiyaṃ suttaṃ kiñci saṃkilesabhāgiyaṃ, kiñci vāsanābhāgiyaṃ. Tathā lokuttaraṃ suttaṃ kiñci nibbedhabhāgiyaṃ, kiñci asekkhabhāgiyanti. Sesesupi eseva nayo.

ஏவங் ஸோளஸவிதே⁴ பட்டா²னே அட்ட²வீஸதிவித⁴ங் பட்டா²னங் பக்கி²பித்வா, அட்ட²வீஸதிவிதே⁴ ச பட்டா²னே ஸோளஸவித⁴ங் பக்கி²பித்வா யதா²ரஹங் து³கதிகாதி³பே⁴தே³ன ஸம்ப⁴வதோ பட்டா²னவிபா⁴கோ³ வேதி³தப்³போ³, ஸோ ச கோ² தீஸு பிடகேஸு லப்³ப⁴மானஸ்ஸ ஸுத்தபத³ஸ்ஸ வஸேன. யஸ்மா பன தானி தானி ஸுத்தபதா³னி உதா³ஹரணவஸேன நித்³தா⁴ரெத்வா இமஸ்மிங் அத்தே² வித்தா²ரியமானே அதிபபஞ்சோ ஹோதி, அதிபா⁴ரியா ச நெத்திஸங்வண்ணனா, ஸக்கா ச இமினா நயேன விஞ்ஞுனா அயமத்தோ² விஞ்ஞாதுங், தஸ்மா ந தங் வித்தா²ரயிம்ஹ. தேனேவ ஹி பாளியங் அஞ்ஞமஞ்ஞஸங்ஸக்³க³வஸேன பட்டா²னவிபா⁴கோ³ ஏகதே³ஸேனேவ த³ஸ்ஸிதோ, ந நிப்பதே³ஸதோதி.

Evaṃ soḷasavidhe paṭṭhāne aṭṭhavīsatividhaṃ paṭṭhānaṃ pakkhipitvā, aṭṭhavīsatividhe ca paṭṭhāne soḷasavidhaṃ pakkhipitvā yathārahaṃ dukatikādibhedena sambhavato paṭṭhānavibhāgo veditabbo, so ca kho tīsu piṭakesu labbhamānassa suttapadassa vasena. Yasmā pana tāni tāni suttapadāni udāharaṇavasena niddhāretvā imasmiṃ atthe vitthāriyamāne atipapañco hoti, atibhāriyā ca nettisaṃvaṇṇanā, sakkā ca iminā nayena viññunā ayamattho viññātuṃ, tasmā na taṃ vitthārayimha. Teneva hi pāḷiyaṃ aññamaññasaṃsaggavasena paṭṭhānavibhāgo ekadeseneva dassito, na nippadesatoti.

ஸாஸனபட்டா²னவாரவண்ணனா நிட்டி²தா.

Sāsanapaṭṭhānavāravaṇṇanā niṭṭhitā.

Next: நிக³மனகதா² • Nigamanakathā

Related texts:

திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / ஸாஸனபட்டா²னங் • Sāsanapaṭṭhānaṃ

டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / ஸாஸனபட்டா²னவாரவண்ணனா • Sāsanapaṭṭhānavāravaṇṇanā

டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / ஸாஸனபட்டா²னவிபா⁴வனா • Sāsanapaṭṭhānavibhāvanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact