Library / Tipiṭaka / তিপিটক • Tipiṭaka / নেত্তিৰিভাৰিনী • Nettivibhāvinī

    সাসনপট্ঠানৰিভাৰনা

    Sāsanapaṭṭhānavibhāvanā

    ৮৯. ‘‘তত্থ কতমং নযসমুট্ঠান’’ন্তিআদিনা আচরিযেন সব্বথা নযসমুট্ঠানং ঠপিতং, অম্হেহি চ ঞাতং, ‘‘সোল়সহারপঞ্চনযঅট্ঠারসমূলপদেসু অট্ঠারস মূলপদা কথং ৰিভত্তা, কুহিং অম্হেহি দট্ঠব্বা’’তি ৰত্তব্বভাৰতো ‘‘তত্থ অট্ঠারস মূলপদা কুহিং দট্ঠব্বা’’তিআদি ৰুত্তং। তত্থাতি তেসু সোল়সহারপঞ্চনযঅট্ঠারসমূলপদেসু অট্ঠারস মূলপদা কেন পদেন আচরিযেন ৰিভত্তা, কুহিং অম্হেহি ৰিত্থারতো দট্ঠব্বাতি পুচ্ছতি। অট্ঠারস মূলপদা সাসনপট্ঠানে মযা ৰিভত্তা, তুম্হেহি চ ৰিত্থারতো সাসনপট্ঠানে দট্ঠব্বাতি ৰিস্সজ্জেতি। ৰিভত্তাযেৰ হি অট্ঠারস মূলপদা দট্ঠব্বা ভৰন্তি। অট্ঠকথাযং (নেত্তি॰ অট্ঠ॰ ৮৯) পন –

    89. ‘‘Tattha katamaṃ nayasamuṭṭhāna’’ntiādinā ācariyena sabbathā nayasamuṭṭhānaṃ ṭhapitaṃ, amhehi ca ñātaṃ, ‘‘soḷasahārapañcanayaaṭṭhārasamūlapadesu aṭṭhārasa mūlapadā kathaṃ vibhattā, kuhiṃ amhehi daṭṭhabbā’’ti vattabbabhāvato ‘‘tattha aṭṭhārasa mūlapadā kuhiṃ daṭṭhabbā’’tiādi vuttaṃ. Tatthāti tesu soḷasahārapañcanayaaṭṭhārasamūlapadesu aṭṭhārasa mūlapadā kena padena ācariyena vibhattā, kuhiṃ amhehi vitthārato daṭṭhabbāti pucchati. Aṭṭhārasa mūlapadā sāsanapaṭṭhāne mayā vibhattā, tumhehi ca vitthārato sāsanapaṭṭhāne daṭṭhabbāti vissajjeti. Vibhattāyeva hi aṭṭhārasa mūlapadā daṭṭhabbā bhavanti. Aṭṭhakathāyaṃ (netti. aṭṭha. 89) pana –

    ‘‘এৰং সব্বথা নযসমুট্ঠানং ৰিভজিত্ৰা ইদানি সাসনপট্ঠানং ৰিভজন্তো যস্মা সঙ্গহৰারাদীসু মূলপদেহেৰ পট্ঠানং সঙ্গহেত্ৰা সরূপতো ন দস্সিতং, তস্মা যথা মূলপদেহি পট্ঠানং নিদ্ধারেতব্বং, এৰং পট্ঠানতোপি মূলপদানি নিদ্ধারেতব্বানীতি দস্সনত্থং ‘অট্ঠারস মূলপদা কুহিং দট্ঠব্বা? সাসনপট্ঠানে’তি আহা’’তি –

    ‘‘Evaṃ sabbathā nayasamuṭṭhānaṃ vibhajitvā idāni sāsanapaṭṭhānaṃ vibhajanto yasmā saṅgahavārādīsu mūlapadeheva paṭṭhānaṃ saṅgahetvā sarūpato na dassitaṃ, tasmā yathā mūlapadehi paṭṭhānaṃ niddhāretabbaṃ, evaṃ paṭṭhānatopi mūlapadāni niddhāretabbānīti dassanatthaṃ ‘aṭṭhārasa mūlapadā kuhiṃ daṭṭhabbā? Sāsanapaṭṭhāne’ti āhā’’ti –

    ৰুত্তং। সাসনপট্ঠানে অট্ঠারস মূলপদা দট্ঠব্বাতি আচরিযেন ৰুত্তা, ‘‘কতমং তং সাসনপট্ঠান’’ন্তি পুচ্ছিতব্বত্তা ‘‘তত্থ কতমং সাসনপট্ঠান’’ন্তিআদি ৰুত্তং। তত্থাতি তেসু অট্ঠারসমূলপদসাসনপট্ঠানেসু কতমং তং সাসনপট্ঠানন্তি ইদানি মযা নিদ্ধারিযমানং ভগৰতা দেসিতং সংকিলেসভাগিযাদিসুত্তং সাসনপট্ঠানং নামাতি ৰিস্সজ্জেতি। সাসনন্তি পরিযত্তিসাসনং। পট্ঠানন্তি তস্স পরিযত্তিসাসনস্স সংকিলেসভাগিযতাদীহি পকারেহি ঠানং পৰত্তনং পট্ঠানং, তংদীপনসুত্তং পন ইধ পট্ঠানং নাম। তেন ৰুত্তং – ‘‘সংকিলেসভাগিযং সুত্ত’’ন্তিআদি। অথ ৰা সাসনন্তি অধিসীলঅধিচিত্তঅধিপঞ্ঞাসিক্খত্তযং সাসনং নাম, তং সিক্খত্তযং পতিট্ঠহতি এতেন সংকিলেসাদিনাতি পট্ঠানং, সিক্খত্তযস্স সাসনস্স পট্ঠানন্তি সাসনপট্ঠানং। তদাধারভূতং সুত্তম্পি ঠান্যূপচারতো সাসনপট্ঠানং নাম। তং সাসনপট্ঠানসুত্তং সরূপতো দস্সেতুং –

    Vuttaṃ. Sāsanapaṭṭhāne aṭṭhārasa mūlapadā daṭṭhabbāti ācariyena vuttā, ‘‘katamaṃ taṃ sāsanapaṭṭhāna’’nti pucchitabbattā ‘‘tattha katamaṃ sāsanapaṭṭhāna’’ntiādi vuttaṃ. Tatthāti tesu aṭṭhārasamūlapadasāsanapaṭṭhānesu katamaṃ taṃ sāsanapaṭṭhānanti idāni mayā niddhāriyamānaṃ bhagavatā desitaṃ saṃkilesabhāgiyādisuttaṃ sāsanapaṭṭhānaṃ nāmāti vissajjeti. Sāsananti pariyattisāsanaṃ. Paṭṭhānanti tassa pariyattisāsanassa saṃkilesabhāgiyatādīhi pakārehi ṭhānaṃ pavattanaṃ paṭṭhānaṃ, taṃdīpanasuttaṃ pana idha paṭṭhānaṃ nāma. Tena vuttaṃ – ‘‘saṃkilesabhāgiyaṃ sutta’’ntiādi. Atha vā sāsananti adhisīlaadhicittaadhipaññāsikkhattayaṃ sāsanaṃ nāma, taṃ sikkhattayaṃ patiṭṭhahati etena saṃkilesādināti paṭṭhānaṃ, sikkhattayassa sāsanassa paṭṭhānanti sāsanapaṭṭhānaṃ. Tadādhārabhūtaṃ suttampi ṭhānyūpacārato sāsanapaṭṭhānaṃ nāma. Taṃ sāsanapaṭṭhānasuttaṃ sarūpato dassetuṃ –

    ‘‘সংকিলেসভাগিযং সুত্তং, ৰাসনাভাগিযং সুত্তং, নিব্বেধভাগিযং সুত্তং, অসেক্খভাগিযং সুত্তং, সংকিলেসভাগিযঞ্চ ৰাসনাভাগিযঞ্চ সুত্তং, সংকিলেসভাগিযঞ্চ নিব্বেধভাগিযঞ্চ সুত্তং, সংকিলেসভাগিযঞ্চ অসেক্খভাগিযঞ্চ সুত্তং, সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্তং, সংকিলেসভাগিযঞ্চ ৰাসনাভাগিযঞ্চ নিব্বেধভাগিযঞ্চ সুত্তং, ৰাসনাভাগিযঞ্চ নিব্বেধভাগিযঞ্চ সুত্তং, তণ্হাসংকিলেসভাগিযং সুত্তং, দিট্ঠিসংকিলেসভাগিযং সুত্তং, দুচ্চরিতসংকিলেসভাগিযং সুত্তং, তণ্হাৰোদানভাগিযং সুত্তং, দিট্ঠিৰোদানভাগিযং সুত্তং, দুচ্চরিতৰোদানভাগিযং সুত্ত’’ন্তি –

    ‘‘Saṃkilesabhāgiyaṃ suttaṃ, vāsanābhāgiyaṃ suttaṃ, nibbedhabhāgiyaṃ suttaṃ, asekkhabhāgiyaṃ suttaṃ, saṃkilesabhāgiyañca vāsanābhāgiyañca suttaṃ, saṃkilesabhāgiyañca nibbedhabhāgiyañca suttaṃ, saṃkilesabhāgiyañca asekkhabhāgiyañca suttaṃ, saṃkilesabhāgiyañca nibbedhabhāgiyañca asekkhabhāgiyañca suttaṃ, saṃkilesabhāgiyañca vāsanābhāgiyañca nibbedhabhāgiyañca suttaṃ, vāsanābhāgiyañca nibbedhabhāgiyañca suttaṃ, taṇhāsaṃkilesabhāgiyaṃ suttaṃ, diṭṭhisaṃkilesabhāgiyaṃ suttaṃ, duccaritasaṃkilesabhāgiyaṃ suttaṃ, taṇhāvodānabhāgiyaṃ suttaṃ, diṭṭhivodānabhāgiyaṃ suttaṃ, duccaritavodānabhāgiyaṃ sutta’’nti –

    ৰুত্তং। ‘‘তেসু সুত্তেসু যে সংকিলেসাদযো ভগৰতা ৰুত্তা, তেসু সংকিলেসাদীসু সংকিলেসো কিত্তকো’’তি পুচ্ছিতব্বত্তা ‘‘তত্থ সংকিলেসো তিৰিধো তণ্হাসংকিলেসো দিট্ঠিসংকিলেসো দুচ্চরিতসংকিলেসো’’তি ৰুত্তং। তত্থাতি তেসু সুত্তন্তেসু সংকিলেসাদীসু ধম্মেসু। ‘‘তিৰিধে তস্মিং সংকিলেসে তণ্হাসংকিলেসো কতমেন কুসলেন ৰিসুজ্ঝতী’’তি পুচ্ছিতব্বত্তা ‘‘তত্থ তণ্হাসংকিলেসো সমথেন ৰিসুজ্ঝতী’’তি ৰুত্তং। তত্থাতি তস্মিং তিৰিধে তণ্হাসংকিলেসাদিকে। ‘‘সো সমথো খন্ধেসু কতমো খন্ধো’’তি পুচ্ছিতব্বত্তা ‘‘সো সমথো সমাধিক্খন্ধো’’তি ৰুত্তং। ‘‘দিট্ঠিসংকিলেসো কেন ৰিসুজ্ঝতী’’তি পুচ্ছিতব্বত্তা ‘‘দিট্ঠিসংকিলেসো ৰিপস্সনায ৰিসুজ্ঝতী’’তি ৰুত্তং। ‘‘সা ৰিপস্সনা কতমো খন্ধো’’তি ৰত্তব্বত্তা ‘‘সা ৰিপস্সনা পঞ্ঞাক্খন্ধো’’তি ৰুত্তং। ‘‘দুচ্চরিতসংকিলেসো কেন ৰিসুজ্ঝতী’’তি ৰত্তব্বত্তা ‘‘দুচ্চরিতসংকিলেসো সুচরিতেন ৰিসুজ্ঝতী’’তি ৰুত্তং। ‘‘তং সুচরিতং কতমো খন্ধো’’তি ৰত্তব্বত্তা ‘‘তং সুচরিতং সীলক্খন্ধো’’তি ৰুত্তং। ‘‘তস্মিং সীলে ঠিতস্স পুগ্গলস্স কিং ভৰতী’’তি ৰত্তব্বত্তা ‘‘তস্স সীলে পতিট্ঠিতস্সা’’তিআদি ৰুত্তং। সীলে সুচরিতসঙ্খাতে সীলক্খন্ধে পতিট্ঠিতস্স তস্স সীলৰন্তস্স পুগ্গলস্স ভৰেসু কামভৰরূপারূপভৰেসু আসত্তি ভৰপত্থনা যদি উপ্পজ্জতি, এৰংসাযন্তি এৰং অস্স অযন্তি পদচ্ছেদো। এৰং সতি অস্স সীলে পতিট্ঠিতস্স অযং আসত্তি ভৰপত্থনা সমথৰিপস্সনাভাৰনামযপুঞ্ঞকিরিযৰত্থু চ ভৰতি, চ-সদ্দেন দানমযসীলমযপুঞ্ঞকিরিযৰত্থু চ ভৰতীতি অত্থো সঙ্গহিতো। তত্রাতি তেসু কামভৰরূপারূপভৰেসু উপপত্তিযা সংৰত্ততীতি।

    Vuttaṃ. ‘‘Tesu suttesu ye saṃkilesādayo bhagavatā vuttā, tesu saṃkilesādīsu saṃkileso kittako’’ti pucchitabbattā ‘‘tattha saṃkileso tividho taṇhāsaṃkileso diṭṭhisaṃkileso duccaritasaṃkileso’’ti vuttaṃ. Tatthāti tesu suttantesu saṃkilesādīsu dhammesu. ‘‘Tividhe tasmiṃ saṃkilese taṇhāsaṃkileso katamena kusalena visujjhatī’’ti pucchitabbattā ‘‘tattha taṇhāsaṃkileso samathena visujjhatī’’ti vuttaṃ. Tatthāti tasmiṃ tividhe taṇhāsaṃkilesādike. ‘‘So samatho khandhesu katamo khandho’’ti pucchitabbattā ‘‘so samatho samādhikkhandho’’ti vuttaṃ. ‘‘Diṭṭhisaṃkileso kena visujjhatī’’ti pucchitabbattā ‘‘diṭṭhisaṃkileso vipassanāya visujjhatī’’ti vuttaṃ. ‘‘Sā vipassanā katamo khandho’’ti vattabbattā ‘‘sā vipassanā paññākkhandho’’ti vuttaṃ. ‘‘Duccaritasaṃkileso kena visujjhatī’’ti vattabbattā ‘‘duccaritasaṃkileso sucaritena visujjhatī’’ti vuttaṃ. ‘‘Taṃ sucaritaṃ katamo khandho’’ti vattabbattā ‘‘taṃ sucaritaṃ sīlakkhandho’’ti vuttaṃ. ‘‘Tasmiṃ sīle ṭhitassa puggalassa kiṃ bhavatī’’ti vattabbattā ‘‘tassa sīle patiṭṭhitassā’’tiādi vuttaṃ. Sīle sucaritasaṅkhāte sīlakkhandhe patiṭṭhitassa tassa sīlavantassa puggalassa bhavesu kāmabhavarūpārūpabhavesu āsatti bhavapatthanā yadi uppajjati, evaṃsāyanti evaṃ assa ayanti padacchedo. Evaṃ sati assa sīle patiṭṭhitassa ayaṃ āsatti bhavapatthanā samathavipassanābhāvanāmayapuññakiriyavatthu ca bhavati, ca-saddena dānamayasīlamayapuññakiriyavatthu ca bhavatīti attho saṅgahito. Tatrāti tesu kāmabhavarūpārūpabhavesu upapattiyā saṃvattatīti.

    ‘‘সংকিলেসাদযো যেহি সুত্তেহি দস্সিতা, তানি সুত্তানি কিত্তকানী’’তি ৰত্তব্বত্তা ‘‘ইমানি চত্তারি সুত্তানী’’তিআদি ৰুত্তং। অসাধারণানি সংকিলেসভাগিযসুত্তৰাসনাভাগিযসুত্তনিব্বেধভাগিযসুত্তঅসেক্খভাগিযসুত্তানি চত্তারি সুত্তানি ভৰন্তি, সাধারণানি সংকিলেসভাগিযৰাসনাভাগিযসুত্ত, সংকিলেসভাগিযনিব্বেধভাগিযসুত্ত, সংকিলেসভাগিযঅসেক্খভাগিযসুত্ত, ৰাসনাভাগিযনিব্বেধভাগিযসুত্তানি কতানি মিস্সিতানি চত্তারি ভৰন্তি। ইতি অট্ঠ সুত্তানি ভৰন্তি। তানিযেৰ ৰুত্তপ্পকারানি অট্ঠ সুত্তানি ভৰন্তি। সাধারণানি ৰাসনাভাগিযঅসেক্খভাগিযসুত্তনিব্বেধভাগিযঅসেক্খভাগিযসুত্ত- সংকিলেসভাগিযৰাসনাভাগিযনিব্বেধভাগিযসুত্তসংকিলেস- ভাগিযৰাসনাভাগিযঅসেক্খভাগিযসুত্ত- সংকিলেসভাগিযনিব্বেধভাগিযঅসেক্খভাগিযসুত্ত- ৰাসনাভাগিযনিব্বেধভাগিযঅসেক্খভাগিযসুত্ত- সংকিলেসভাগিযৰাসনাভাগিযনিব্বেধভাগিযঅসেক্খভাগিযসুত্ত- নেৰসংকিলেসভাগিযনৰাসনা- ভাগিযননিব্বেধভাগিযনঅসেক্খভাগিযসুত্তানি কতানি মিস্সিতানি অট্ঠ সুত্তানি ভৰন্তীতি সোল়স সুত্তানি ভৰন্তি। তেসু সোল়সসুত্তেসু চত্তারি এককানি সুত্তানি চ চত্তারি দুকানি সুত্তানি চ দ্ৰে তিকানি চ পাল়িযং আগতানি, দ্ৰে দুকানি সুত্তানি চ দ্ৰে তিকানি চ দ্ৰে চতুক্কানি সুত্তানি চ অট্ঠকথাযং (নেত্তি॰ অট্ঠ॰ ৮৯) আগতানি।

    ‘‘Saṃkilesādayo yehi suttehi dassitā, tāni suttāni kittakānī’’ti vattabbattā ‘‘imāni cattāri suttānī’’tiādi vuttaṃ. Asādhāraṇāni saṃkilesabhāgiyasuttavāsanābhāgiyasuttanibbedhabhāgiyasuttaasekkhabhāgiyasuttāni cattāri suttāni bhavanti, sādhāraṇāni saṃkilesabhāgiyavāsanābhāgiyasutta, saṃkilesabhāgiyanibbedhabhāgiyasutta, saṃkilesabhāgiyaasekkhabhāgiyasutta, vāsanābhāgiyanibbedhabhāgiyasuttāni katāni missitāni cattāri bhavanti. Iti aṭṭha suttāni bhavanti. Tāniyeva vuttappakārāni aṭṭha suttāni bhavanti. Sādhāraṇāni vāsanābhāgiyaasekkhabhāgiyasuttanibbedhabhāgiyaasekkhabhāgiyasutta- saṃkilesabhāgiyavāsanābhāgiyanibbedhabhāgiyasuttasaṃkilesa- bhāgiyavāsanābhāgiyaasekkhabhāgiyasutta- saṃkilesabhāgiyanibbedhabhāgiyaasekkhabhāgiyasutta- vāsanābhāgiyanibbedhabhāgiyaasekkhabhāgiyasutta- saṃkilesabhāgiyavāsanābhāgiyanibbedhabhāgiyaasekkhabhāgiyasutta- nevasaṃkilesabhāgiyanavāsanā- bhāgiyananibbedhabhāgiyanaasekkhabhāgiyasuttāni katāni missitāni aṭṭha suttāni bhavantīti soḷasa suttāni bhavanti. Tesu soḷasasuttesu cattāri ekakāni suttāni ca cattāri dukāni suttāni ca dve tikāni ca pāḷiyaṃ āgatāni, dve dukāni suttāni ca dve tikāni ca dve catukkāni suttāni ca aṭṭhakathāyaṃ (netti. aṭṭha. 89) āgatāni.

    ‘‘যদি পট্ঠাননযেন ৰুত্তপ্পকারানি সোল়স সুত্তানিযেৰ ৰিভত্তানি, এৰং সতি সুত্তগেয্যাদিনৰৰিধং সকলং পরিযত্তিসাসনং পট্ঠাননযেন অৰিভত্তং ভৰেয্যা’’তি ৰত্তব্বত্তা ‘‘ইমেহি সোল়সহি সুত্তেহী’’তিআদি ৰুত্তং। পট্ঠাননযেন ৰিভত্তেহি সোল়সহি ইমেহি সুত্তেহি নৰৰিধং সকলং পরিযত্তিসুত্তং পট্ঠাননযেন ৰিভত্তংযেৰ হুত্ৰা ভিন্নং ভৰতি। সংকিলেসভাগিযাদিপভেদায গাথায গাথা অনুমিনিতব্বা, সংকিলেসভাগিযাদিপভেদেন ৰেয্যাকরণেন ৰেয্যাকরণং অনুমিনিতব্বং। সংকিলেসভাগিযাদিপভেদেন সুত্তেন সুত্তং অনুমিনিতব্বং ভৰতিযেৰাতি।

    ‘‘Yadi paṭṭhānanayena vuttappakārāni soḷasa suttāniyeva vibhattāni, evaṃ sati suttageyyādinavavidhaṃ sakalaṃ pariyattisāsanaṃ paṭṭhānanayena avibhattaṃ bhaveyyā’’ti vattabbattā ‘‘imehi soḷasahi suttehī’’tiādi vuttaṃ. Paṭṭhānanayena vibhattehi soḷasahi imehi suttehi navavidhaṃ sakalaṃ pariyattisuttaṃ paṭṭhānanayena vibhattaṃyeva hutvā bhinnaṃ bhavati. Saṃkilesabhāgiyādipabhedāya gāthāya gāthā anuminitabbā, saṃkilesabhāgiyādipabhedena veyyākaraṇena veyyākaraṇaṃ anuminitabbaṃ. Saṃkilesabhāgiyādipabhedena suttena suttaṃ anuminitabbaṃ bhavatiyevāti.

    ৯০. ‘‘তেসু সোল়সসু সংকিলেসভাগিযাদীসু সুত্তেসু কতমং সংকিলেসভাগিযং সুত্ত’’ন্তি পুচ্ছিতব্বত্তা ‘‘তত্থ কতমং সংকিলেসভাগিযং সুত্ত’’ন্তিআদি ৰুত্তং। তত্থাতি তেসু সোল়সসু সংকিলেসভাগিযাদীসু সুত্তেসু কতমং সুত্তং সংকিলেসভাগিযং সুত্তং নামাতি পুচ্ছতি।

    90. ‘‘Tesu soḷasasu saṃkilesabhāgiyādīsu suttesu katamaṃ saṃkilesabhāgiyaṃ sutta’’nti pucchitabbattā ‘‘tattha katamaṃ saṃkilesabhāgiyaṃ sutta’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu katamaṃ suttaṃ saṃkilesabhāgiyaṃ suttaṃ nāmāti pucchati.

    ‘‘কামন্ধা জালসঞ্ছন্না, তণ্হাছদনছাদিতা।

    ‘‘Kāmandhā jālasañchannā, taṇhāchadanachāditā;

    পমত্তবন্ধনাবদ্ধা, মচ্ছাৰ কুমিনামুখে।

    Pamattabandhanābaddhā, macchāva kumināmukhe;

    জরামরণমন্ৰেন্তি, ৰচ্ছো খীরপকোৰ মাতর’’ন্তি॥ –

    Jarāmaraṇamanventi, vaccho khīrapakova mātara’’nti. –

    ইদং সুত্তং সংকিলেসভাগে ৰাচকঞাপকভাৰেন পৰত্তনতো সংকিলেসভাগিযং সুত্তং নাম। যে সত্তা কামন্ধা কামেন অন্ধা জালসঞ্ছন্না তণ্হাছদনেন ছাদিতা, পমত্তবন্ধনায বদ্ধা বন্ধিতব্বা, তে সত্তে জরামরণং অন্ৰেতি, যথা তং কুমিনামুখে যে মচ্ছা গহিতা, তে মচ্ছে জরামরণং অন্ৰেতি ইৰ, এৰং তে সত্তে জরামরণং অন্ৰেতি। খীরপকো ৰচ্ছো মাতরং অন্ৰেতি ইৰ, এৰং তে সত্তে জরামরণং অন্ৰেতীতি যোজনা কাতব্বা। অথ ৰা খীরপকো ৰচ্ছো মাতরং অন্ৰেতি ইৰ, কুমিনামুখে গহিতা মচ্ছা জরামরণং অন্ৰেন্তি ইৰ চ, এৰং যে সত্তা কামন্ধা পমত্তবন্ধনায বন্ধিতব্বা, তে সত্তা জরামরণং অন্ৰেন্তীতি যোজনা।

    Idaṃ suttaṃ saṃkilesabhāge vācakañāpakabhāvena pavattanato saṃkilesabhāgiyaṃ suttaṃ nāma. Ye sattā kāmandhā kāmena andhā jālasañchannā taṇhāchadanena chāditā, pamattabandhanāya baddhā bandhitabbā, te satte jarāmaraṇaṃ anveti, yathā taṃ kumināmukhe ye macchā gahitā, te macche jarāmaraṇaṃ anveti iva, evaṃ te satte jarāmaraṇaṃ anveti. Khīrapako vaccho mātaraṃ anveti iva, evaṃ te satte jarāmaraṇaṃ anvetīti yojanā kātabbā. Atha vā khīrapako vaccho mātaraṃ anveti iva, kumināmukhe gahitā macchā jarāmaraṇaṃ anventi iva ca, evaṃ ye sattā kāmandhā pamattabandhanāya bandhitabbā, te sattā jarāmaraṇaṃ anventīti yojanā.

    ‘‘ইদং সুত্তংযেৰা’’তি ৰত্তব্বত্তা –

    ‘‘Idaṃ suttaṃyevā’’ti vattabbattā –

    ‘‘চত্তারিমানি, ভিক্খৰে, অগতিগমনানি। কতমানি চত্তারি? ছন্দাগতিং গচ্ছতি, দোসাগতিং গচ্ছতি, মোহাগতিং গচ্ছতি, ভযাগতিং গচ্ছতি, ইমানি খো, ভিক্খৰে, চত্তারি অগতিগমনানি। ইদমৰোচ ভগৰা, ইদং ৰত্ৰান সুগতো, অথাপরং এতদৰোচ সত্থা –

    ‘‘Cattārimāni, bhikkhave, agatigamanāni. Katamāni cattāri? Chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati, imāni kho, bhikkhave, cattāri agatigamanāni. Idamavoca bhagavā, idaṃ vatvāna sugato, athāparaṃ etadavoca satthā –

    ‘‘ছন্দা দোসা ভযা মোহা, যো ধম্মং অতিৰত্ততি।

    ‘‘Chandā dosā bhayā mohā, yo dhammaṃ ativattati;

    নিহীযতি তস্স যসো, কাল়পক্খেৰ চন্দিমা’’তি॥ –

    Nihīyati tassa yaso, kāḷapakkheva candimā’’ti. –

    ইদং সংকিলেসভাগিযং সুত্তন্তি –

    Idaṃ saṃkilesabhāgiyaṃ suttanti –

    ৰুত্তং। ছন্দা ছন্দহেতুনা দোসা দোসহেতুনা ভযা ভযহেতুনা মোহা মোহহেতুনা যো রাজাদিকো যো ৰিনযধরাদিকো ৰা ধম্মং সপ্পুরিসধম্মং অতিৰত্ততি অতিক্কমিত্ৰা ৰত্ততি, তস্স রাজাদিনো ৰা তস্স ৰিনযধরাদিনো ৰা যসো কিত্তি চ পরিৰারো চ ভোগো চ নিহীযতি। চন্দিমা কাল়পক্খে পভায নিহীযতি ইৰ, এৰং নিহীযতীতি যোজনা।

    Vuttaṃ. Chandā chandahetunā dosā dosahetunā bhayā bhayahetunā mohā mohahetunā yo rājādiko yo vinayadharādiko vā dhammaṃ sappurisadhammaṃ ativattati atikkamitvā vattati, tassa rājādino vā tassa vinayadharādino vā yaso kitti ca parivāro ca bhogo ca nihīyati. Candimā kāḷapakkhe pabhāya nihīyati iva, evaṃ nihīyatīti yojanā.

    ‘‘এত্তকংযেৰা’’তি ৰত্তব্বত্তা ‘‘মনোপুব্বঙ্গমা ধম্মা…পে॰… চক্কংৰ ৰহতো পদন্তি ইদং সংকিলেসভাগিযং সুত্ত’’ন্তি ৰুত্তং। অত্থো পাকটো। অট্ঠকথাযম্পি ৰিভত্তো।

    ‘‘Ettakaṃyevā’’ti vattabbattā ‘‘manopubbaṅgamā dhammā…pe… cakkaṃva vahato padanti idaṃ saṃkilesabhāgiyaṃ sutta’’nti vuttaṃ. Attho pākaṭo. Aṭṭhakathāyampi vibhatto.

    ‘‘মিদ্ধী যদা হোতি মহগ্ঘসো চ, নিদ্দাযিতা সম্পরিৰত্তসাযী।

    ‘‘Middhī yadā hoti mahagghaso ca, niddāyitā samparivattasāyī;

    মহাৰরাহোৰ নিৰাপপুট্ঠো, পুনপ্পুনং গব্ভমুপেতি মন্দো’’তি॥ –

    Mahāvarāhova nivāpapuṭṭho, punappunaṃ gabbhamupeti mando’’ti. –

    ইদং সুত্তম্পি সংকিলেসভাগে ৰিসযে ৰাচকঞাপকভাৰেন পৰত্তনতো সংকিলেসভাগিযং সুত্তং নাম। নিৰাপপুট্ঠো মহাৰরাহো গামসূকরো নিদ্দাযিতা সুপনসীলো সম্পরিৰত্তসাযী হোতি ইৰ, এৰং যো মন্দো সত্তো যদা মহগ্ঘসো হোতি, সো মন্দো সত্তো মিদ্ধী থিনমিদ্ধাভিভূতো হুত্ৰা নিদ্দাযিতা মুদুফস্সসযনে মুদুহত্থেহি পরামসিতো সম্পরিৰত্তসাযী পুনপ্পুনং গব্ভং উপেতীতি যোজনা।

    Idaṃ suttampi saṃkilesabhāge visaye vācakañāpakabhāvena pavattanato saṃkilesabhāgiyaṃ suttaṃ nāma. Nivāpapuṭṭho mahāvarāho gāmasūkaro niddāyitā supanasīlo samparivattasāyī hoti iva, evaṃ yo mando satto yadā mahagghaso hoti, so mando satto middhī thinamiddhābhibhūto hutvā niddāyitā muduphassasayane muduhatthehi parāmasito samparivattasāyī punappunaṃ gabbhaṃ upetīti yojanā.

    ‘‘অযসাৰ মলং সমুট্ঠিতং, ততুট্ঠায তমেৰ খাদতি।

    ‘‘Ayasāva malaṃ samuṭṭhitaṃ, tatuṭṭhāya tameva khādati;

    এৰং অতিধোনচারিনং, সানি কম্মানি নযন্তি দুগ্গতি’’ন্তি॥ –

    Evaṃ atidhonacārinaṃ, sāni kammāni nayanti duggati’’nti. –

    ইদং সুত্তম্পি সংকিলেসভাগিযং সুত্তং নাম। অযসা অযতো সমুট্ঠিতং জাতমলং ততুট্ঠায ততো অযতো উট্ঠহিত্ৰা তমেৰ অযং খাদতি ইৰ, এৰং অতিধোনচারিনং অতিক্কমিত্ৰা ধোনচারিপুগ্গলং সানি সযং কতানি অকুসলকম্মানি দুগ্গতিং নযন্তীতি যোজনা।

    Idaṃ suttampi saṃkilesabhāgiyaṃ suttaṃ nāma. Ayasā ayato samuṭṭhitaṃ jātamalaṃ tatuṭṭhāya tato ayato uṭṭhahitvā tameva ayaṃ khādati iva, evaṃ atidhonacārinaṃ atikkamitvā dhonacāripuggalaṃ sāni sayaṃ katāni akusalakammāni duggatiṃ nayantīti yojanā.

    ‘‘চোরো যথা সন্ধিমুখে গহীতো, সকম্মুনা হঞ্ঞতি বজ্ঝতে চ।

    ‘‘Coro yathā sandhimukhe gahīto, sakammunā haññati bajjhate ca;

    এৰং অযং পেচ্চ পজা পরত্থ, সকম্মুনা হঞ্ঞতি বজ্ঝতে চা’’তি॥ –

    Evaṃ ayaṃ pecca pajā parattha, sakammunā haññati bajjhate cā’’ti. –

    ইদং সুত্তম্পি সংকিলেসভাগিযং সুত্তং নাম। সন্ধিমুখে রাজপুরিসাদীহি গহিতো চোরো সকম্মুনা অত্তনা কতেন চোরকম্মেন হঞ্ঞতি চ বজ্ঝতে চ যথা, এৰং অযং পাপকারিনী পজা পরত্থ পরলোকে পেচ্চ সকম্মুনা সযং কতেন অকুসলকম্মুনা সত্থাদীহি হঞ্ঞতি চ অদ্দুবন্ধনাদীহি বজ্ঝতে চাতি যোজনা।

    Idaṃ suttampi saṃkilesabhāgiyaṃ suttaṃ nāma. Sandhimukhe rājapurisādīhi gahito coro sakammunā attanā katena corakammena haññati ca bajjhate ca yathā, evaṃ ayaṃ pāpakārinī pajā parattha paraloke pecca sakammunā sayaṃ katena akusalakammunā satthādīhi haññati ca addubandhanādīhi bajjhate cāti yojanā.

    ‘‘সুখকামানি ভূতানি, যো দণ্ডেন ৰিহিংসতি।

    ‘‘Sukhakāmāni bhūtāni, yo daṇḍena vihiṃsati;

    অত্তনো সুখমেসানো, পেচ্চ সো ন লভতে সুখ’’ন্তি॥ –

    Attano sukhamesāno, pecca so na labhate sukha’’nti. –

    ইদং সুত্তম্পি সংকিলেসভাগিযং সুত্তং নাম। অত্তনো সুখং এসানো এসমানো যো সত্তো অঞ্ঞানি সুখকামানি ভূতানি দণ্ডেন ৰিহিংসতি, সো হিংসকো সত্তো পরলোকে পেচ্চ সুখং ন লভতীতি যোজনা।

    Idaṃ suttampi saṃkilesabhāgiyaṃ suttaṃ nāma. Attano sukhaṃ esāno esamāno yo satto aññāni sukhakāmāni bhūtāni daṇḍena vihiṃsati, so hiṃsako satto paraloke pecca sukhaṃ na labhatīti yojanā.

    ‘‘গুন্নং চে তরমানানং, জিম্হং গচ্ছতি পুঙ্গৰো।

    ‘‘Gunnaṃ ce taramānānaṃ, jimhaṃ gacchati puṅgavo;

    সব্বা তা জিম্হং গচ্ছন্তি, নেত্তে জিম্হং গতে সতি॥

    Sabbā tā jimhaṃ gacchanti, nette jimhaṃ gate sati.

    ‘‘এৰমেৰ মনুস্সেসু, যো হোতি সেট্ঠসম্মতো।

    ‘‘Evameva manussesu, yo hoti seṭṭhasammato;

    সো চে অধম্মং চরতি, পগেৰ ইতরা পজা।

    So ce adhammaṃ carati, pageva itarā pajā;

    সব্বং রট্ঠং দুক্খং সেতি, রাজা চে হোতি অধম্মিকো’’তি॥ –

    Sabbaṃ raṭṭhaṃ dukkhaṃ seti, rājā ce hoti adhammiko’’ti. –

    ইদং সুত্তম্পি সংকিলেসভাগিযং সুত্তং নাম। নদিং তরমানানং গুন্নং পুঙ্গৰো জিম্হং চে গচ্ছতি, এৰং নেত্তে জিম্হং গতে সতি সব্বা তা গাৰিযো জিম্হং গচ্ছন্তি যথা, এৰমেৰ মনুস্সেসু যো রাজা সেট্ঠসম্মতো, সো রাজা অধম্মং চরতি, এৰং রঞ্ঞে অধম্মং চরন্তে সতি ইতরা পজা পগেৰ পঠমমেৰ অধম্মং চরতি। রাজা অধম্মিকো চে হোতি, এৰং রঞ্ঞে অধম্মিকে সতি সব্বং রট্ঠং দুক্খং সেতীতি যোজনা।

    Idaṃ suttampi saṃkilesabhāgiyaṃ suttaṃ nāma. Nadiṃ taramānānaṃ gunnaṃ puṅgavo jimhaṃ ce gacchati, evaṃ nette jimhaṃ gate sati sabbā tā gāviyo jimhaṃ gacchanti yathā, evameva manussesu yo rājā seṭṭhasammato, so rājā adhammaṃ carati, evaṃ raññe adhammaṃ carante sati itarā pajā pageva paṭhamameva adhammaṃ carati. Rājā adhammiko ce hoti, evaṃ raññe adhammike sati sabbaṃ raṭṭhaṃ dukkhaṃ setīti yojanā.

    ‘‘সুকিচ্ছরূপা ৰতিমে মনুস্সা, করোন্তি পাপং উপধীসু রত্তা।

    ‘‘Sukiccharūpā vatime manussā, karonti pāpaṃ upadhīsu rattā;

    গচ্ছন্তি তে বহুজনসন্নিৰাসং, নিরযং অৰীচিং কটুকং ভযানক’’ন্তি॥ –

    Gacchanti te bahujanasannivāsaṃ, nirayaṃ avīciṃ kaṭukaṃ bhayānaka’’nti. –

    ইদং সুত্তম্পি সংকিলেসভাগিযং সুত্তং নাম। যে মনুস্সা উপধীসু কামগুণূপধীসু রত্তা রাগাভিভূতা হুত্ৰা পাপং অকুসলকম্মং করোন্তি, ইমে পাপকম্মকরা মনুস্সা সুকিচ্ছরূপা ৰত সুট্ঠু কিচ্ছাপন্নরূপা ৰত ভৰন্তি, তে পাপকম্মকরা মনুস্সা কটুকং ভযানকং বহুজনসন্নিৰাসং নিরযং অৰীচিং গচ্ছন্তীতি যোজনা।

    Idaṃ suttampi saṃkilesabhāgiyaṃ suttaṃ nāma. Ye manussā upadhīsu kāmaguṇūpadhīsu rattā rāgābhibhūtā hutvā pāpaṃ akusalakammaṃ karonti, ime pāpakammakarā manussā sukiccharūpā vata suṭṭhu kicchāpannarūpā vata bhavanti, te pāpakammakarā manussā kaṭukaṃ bhayānakaṃ bahujanasannivāsaṃ nirayaṃ avīciṃ gacchantīti yojanā.

    ‘‘ফলং ৰে কদলিং হন্তি, ফলং ৰেল়ুং ফলং নল়ং।

    ‘‘Phalaṃ ve kadaliṃ hanti, phalaṃ veḷuṃ phalaṃ naḷaṃ;

    সক্কারো কাপুরিসং হন্তি, গব্ভো অস্সতরিং যথা’’তি॥ –

    Sakkāro kāpurisaṃ hanti, gabbho assatariṃ yathā’’ti. –

    ইদং সুত্তম্পি সংকিলেসভাগিযং সুত্তং নাম। ফলং কদলিযা ফলং কদলিং ৰে একন্তেন হন্তি যথা, ফলং ৰেল়ুং ৰে একন্তেন হন্তি যথা, ফলং নল়ং ৰে একন্তেন হন্তি যথা, গব্ভো অস্সতরিং মাতরং ৰে একন্তেন হন্তি যথা, এৰং সক্কারো কাপুরিসং ৰে একন্তেন হন্তীতি যোজনা।

    Idaṃ suttampi saṃkilesabhāgiyaṃ suttaṃ nāma. Phalaṃ kadaliyā phalaṃ kadaliṃ ve ekantena hanti yathā, phalaṃ veḷuṃ ve ekantena hanti yathā, phalaṃ naḷaṃ ve ekantena hanti yathā, gabbho assatariṃ mātaraṃ ve ekantena hanti yathā, evaṃ sakkāro kāpurisaṃ ve ekantena hantīti yojanā.

    ‘‘কোধমক্খগরু ভিক্খু, লাভসক্কারগারৰো।

    ‘‘Kodhamakkhagaru bhikkhu, lābhasakkāragāravo;

    সুখেত্তে পূতিবীজংৰ, সদ্ধম্মে ন ৰিরূহতী’’তি॥ –

    Sukhette pūtibījaṃva, saddhamme na virūhatī’’ti. –

    ইদং সুত্তম্পি সংকিলেসভাগিযং সুত্তং নাম। সুখেত্তে সুন্দরে খেত্তেপি খিত্তং পূতিবীজং ন রুহতি ইৰ, এৰং যো ভিক্খু লাভসক্কারগারৰো কোধং কুজ্ঝনলক্খণং কোধং, মক্খং পরগুণসীলমক্খনলক্খণং মক্খঞ্চ গরুং কত্ৰা চরতি, সো চরন্তো ভিক্খু সদ্ধম্মস্মিং ন রুহতীতি যোজনা।

    Idaṃ suttampi saṃkilesabhāgiyaṃ suttaṃ nāma. Sukhette sundare khettepi khittaṃ pūtibījaṃ na ruhati iva, evaṃ yo bhikkhu lābhasakkāragāravo kodhaṃ kujjhanalakkhaṇaṃ kodhaṃ, makkhaṃ paraguṇasīlamakkhanalakkhaṇaṃ makkhañca garuṃ katvā carati, so caranto bhikkhu saddhammasmiṃ na ruhatīti yojanā.

    ৯১. ‘‘ইধাহং, ভিক্খৰে, একচ্চং পুগ্গলং পদুট্ঠচিত্তং এৰং চেতসা চেতো পরিচ্চ পজানামি…পে॰… ইতি মে সুত’’ন্তি ইদং সুত্তম্পি সংকিলেসভাগিযং সুত্তং নাম। ভিক্খৰে ইধ সাসনে, লোকে ৰা অহং একচ্চং পুগ্গলং পদুট্ঠচিত্তং মম চেতসা তস্স চেতো চিত্তং পরিচ্চ পরিচ্ছিন্দিত্ৰা বুদ্ধচক্খুনা এৰং পজানামি। ‘‘কথং পজানামী’’তি চে পুচ্ছেয্য, যঞ্চ পটিপদং পটিপন্নো, যঞ্চ মগ্গং সমারুল়্হো অযং পুগ্গলো যথা যায দুপ্পটিপদায যেন দুম্মগ্গেন ইরিযতি পৰত্ততি, তায দুপ্পটিপদায তেন দুম্মগ্গেন ইমম্হি ইমস্মিং সমযে দুপ্পটিপজ্জনকালে অযং দুপ্পটিপন্নং পটিপন্নো দুম্মগ্গসমারুল়্হো পুগ্গলো চে কালং করেয্য, এৰং সতি আভতং ৰত্থু নিক্খিত্তং যথা, এৰং নিরযে নিক্খিত্তো। তং কিস্স হেতু? ভিক্খৰে অস্স পুগ্গলস্স চিত্তং পদুট্ঠং পদোসিতং হি যস্মা হোতি, তস্মা নিক্খিত্তো। এৰং ইধ সাসনে, লোকে ৰা চেতোপদোসহেতু চ পন একচ্চে সত্তা পুগ্গলা কাযস্স ভেদা পরং মরণা অপাযং দুগ্গতিং ৰিনিপাতং উপপজ্জন্তীতি পজানামীতি। এতমত্থং ভগৰা অৰোচ। তত্থ তস্মিং সুত্তে এতং ‘‘পদুট্ঠচিত্তং ঞত্ৰান…পে॰… নিরযং সো উপপজ্জতী’’তি গাথাৰচনং ইতি এৰং ৰুচ্চতি।

    91. ‘‘Idhāhaṃ, bhikkhave, ekaccaṃ puggalaṃ paduṭṭhacittaṃ evaṃ cetasā ceto paricca pajānāmi…pe… iti me suta’’nti idaṃ suttampi saṃkilesabhāgiyaṃ suttaṃ nāma. Bhikkhave idha sāsane, loke vā ahaṃ ekaccaṃ puggalaṃ paduṭṭhacittaṃ mama cetasā tassa ceto cittaṃ paricca paricchinditvā buddhacakkhunā evaṃ pajānāmi. ‘‘Kathaṃ pajānāmī’’ti ce puccheyya, yañca paṭipadaṃ paṭipanno, yañca maggaṃ samāruḷho ayaṃ puggalo yathā yāya duppaṭipadāya yena dummaggena iriyati pavattati, tāya duppaṭipadāya tena dummaggena imamhi imasmiṃ samaye duppaṭipajjanakāle ayaṃ duppaṭipannaṃ paṭipanno dummaggasamāruḷho puggalo ce kālaṃ kareyya, evaṃ sati ābhataṃ vatthu nikkhittaṃ yathā, evaṃ niraye nikkhitto. Taṃ kissa hetu? Bhikkhave assa puggalassa cittaṃ paduṭṭhaṃ padositaṃ hi yasmā hoti, tasmā nikkhitto. Evaṃ idha sāsane, loke vā cetopadosahetu ca pana ekacce sattā puggalā kāyassa bhedā paraṃ maraṇā apāyaṃ duggatiṃ vinipātaṃ upapajjantīti pajānāmīti. Etamatthaṃ bhagavā avoca. Tattha tasmiṃ sutte etaṃ ‘‘paduṭṭhacittaṃ ñatvāna…pe… nirayaṃ so upapajjatī’’ti gāthāvacanaṃ iti evaṃ vuccati.

    সত্থা ইধ সাসনে, লোকে ৰা পদুট্ঠচিত্তং একচ্চং পুগ্গলং ঞত্ৰান ভিক্খূনং সন্তিকে এতমত্থং ব্যাকাসি। ইমম্হি ইমস্মিং সমযে অযং পুগ্গলো চে কালং কযিরাথ, এৰং সতি পদুট্ঠচিত্তসমঙ্গী হি নিরযস্মিং উপপজ্জেয্য, পুগ্গলস্স চিত্তং পদূসিতং হি যস্মা হোতি, তস্মা উপপজ্জেয্য, চেতোপদোসহেতু সত্তা দুগ্গতিং গচ্ছন্তি আভতং ৰত্থুং নিক্খিপেয্য যথা, এৰমেৰং তথাৰিধো দুপ্পঞ্ঞো সো পদোসচিত্তো পুগ্গলো কাযস্স ভেদা পরং মরণা নিরযং উপপজ্জতীতি অযম্পি অত্থো ভগৰতা ৰুত্তো, ইতি মে মযা সুতন্তি যোজনা।

    Satthā idha sāsane, loke vā paduṭṭhacittaṃ ekaccaṃ puggalaṃ ñatvāna bhikkhūnaṃ santike etamatthaṃ byākāsi. Imamhi imasmiṃ samaye ayaṃ puggalo ce kālaṃ kayirātha, evaṃ sati paduṭṭhacittasamaṅgī hi nirayasmiṃ upapajjeyya, puggalassa cittaṃ padūsitaṃ hi yasmā hoti, tasmā upapajjeyya, cetopadosahetu sattā duggatiṃ gacchanti ābhataṃ vatthuṃ nikkhipeyya yathā, evamevaṃ tathāvidho duppañño so padosacitto puggalo kāyassa bhedā paraṃ maraṇā nirayaṃ upapajjatīti ayampi attho bhagavatā vutto, iti me mayā sutanti yojanā.

    ‘‘সচে ভাযথ দুক্খস্স, সচে ৰো দুক্খমপ্পিযং।

    ‘‘Sace bhāyatha dukkhassa, sace vo dukkhamappiyaṃ;

    মাকত্থ পাপকং কম্মং, আৰি ৰা যদি ৰা রহো॥

    Mākattha pāpakaṃ kammaṃ, āvi vā yadi vā raho.

    ‘‘সচে চ পাপকং কম্মং, করিস্সথ করোথ ৰা।

    ‘‘Sace ca pāpakaṃ kammaṃ, karissatha karotha vā;

    ন ৰো দুক্খা পমুত্যত্থি, উপেচ্চপি পলাযত’’ন্তি॥ –

    Na vo dukkhā pamutyatthi, upeccapi palāyata’’nti. –

    ইদং সুত্তম্পি সংকিলেসভাগিযং সুত্তং নাম। সপ্পুরিসা তুম্হে দুক্খস্স জাতিদুক্খজরাদুক্খব্যাধিদুক্খমরণদুক্খঅপাযদুক্খ- অতীতৰট্টমূলকদুক্খঅনাগতৰট্টমূলকদুক্খপচ্চুপ্পন্নাহারমূলকদুক্খাতি অট্ঠৰিধস্স দুক্খস্স সচে ভাযথ, ৰো তুম্হেহি দুক্খং তথা অট্ঠৰিধং দুক্খং সচে অপ্পিযং, এৰং সতি আৰি ৰা যদি রহো ৰা পাপকং কম্মং মাকত্থ মা অকত্থ। সপ্পুরিসা তুম্হে আৰি ৰা যদি রহো ৰা পাপকং কম্মং সচে করিস্সথ ৰা সচে করোথ ৰা, এৰং সতি উপেচ্চপি সঞ্চিচ্চাপি পলাযতং পলাযন্তানং ৰো তুম্হাকং দুক্খা অট্ঠৰিধা দুক্খতো পমুত্তি মুচ্চনং নত্থেৰাতি যোজনা।

    Idaṃ suttampi saṃkilesabhāgiyaṃ suttaṃ nāma. Sappurisā tumhe dukkhassa jātidukkhajarādukkhabyādhidukkhamaraṇadukkhaapāyadukkha- atītavaṭṭamūlakadukkhaanāgatavaṭṭamūlakadukkhapaccuppannāhāramūlakadukkhāti aṭṭhavidhassa dukkhassa sace bhāyatha, vo tumhehi dukkhaṃ tathā aṭṭhavidhaṃ dukkhaṃ sace appiyaṃ, evaṃ sati āvi vā yadi raho vā pāpakaṃ kammaṃ mākattha mā akattha. Sappurisā tumhe āvi vā yadi raho vā pāpakaṃ kammaṃ sace karissatha vā sace karotha vā, evaṃ sati upeccapi sañciccāpi palāyataṃ palāyantānaṃ vo tumhākaṃ dukkhā aṭṭhavidhā dukkhato pamutti muccanaṃ natthevāti yojanā.

    ‘‘অধম্মেন ধনং লদ্ধা, মুসাৰাদেন চূভযং।

    ‘‘Adhammena dhanaṃ laddhā, musāvādena cūbhayaṃ;

    মমেতি বালা মঞ্ঞন্তি, তং কথং নু ভৰিস্সতি॥

    Mameti bālā maññanti, taṃ kathaṃ nu bhavissati.

    ‘‘অন্তরাযা সু ভৰিস্সন্তি, সম্ভতস্স ৰিনস্সতি।

    ‘‘Antarāyā su bhavissanti, sambhatassa vinassati;

    মতা সগ্গং ন গচ্ছন্তি, ননু এত্তাৰতা হতা’’তি॥ –

    Matā saggaṃ na gacchanti, nanu ettāvatā hatā’’ti. –

    ইদং সুত্তম্পি সংকিলেসভাগিযং সুত্তং নাম। যে বালা অধম্মেন চ মুসাৰাদেন চ ধনং সৰিঞ্ঞাণাৰিঞ্ঞাণং সব্বং লভিতব্বং ধনং লদ্ধা উভযং ধনং ‘‘মম ধন’’ন্তি মঞ্ঞন্তি, তেসং বালানং তং উভযং ধনং কথং কেন নু পকারেন ভৰিস্সতি, অধম্মেন সম্ভতত্তা চিরট্ঠিতিকং ন হোতি। অন্তরাযা রাজন্তরাযাদযো অন্তরাযা তেসং বালানং ভৰিস্সন্তি। যেন অধম্মৰোহারাদিকেন যং ধনং সম্ভতং, অস্স অধম্মৰোহারাদিকস্স তং সম্ভতং ধনং ৰিনস্সতি। মতা মরন্তা তে বালা সগ্গং সুগতিং ন গচ্ছন্তি। সুগতি হি সোভনেহি ভোগেহি অগ্গোতি ‘‘সগ্গো’’তি অধিপ্পেতা । এত্তাৰতা এত্তকেন দিট্ঠধম্মিকসম্পরাযিকানং অত্তহিতানং হাযনেন তে বালা হতা ৰিনট্ঠা ভৰন্তি ননূতি যোজনা।

    Idaṃ suttampi saṃkilesabhāgiyaṃ suttaṃ nāma. Ye bālā adhammena ca musāvādena ca dhanaṃ saviññāṇāviññāṇaṃ sabbaṃ labhitabbaṃ dhanaṃ laddhā ubhayaṃ dhanaṃ ‘‘mama dhana’’nti maññanti, tesaṃ bālānaṃ taṃ ubhayaṃ dhanaṃ kathaṃ kena nu pakārena bhavissati, adhammena sambhatattā ciraṭṭhitikaṃ na hoti. Antarāyā rājantarāyādayo antarāyā tesaṃ bālānaṃ bhavissanti. Yena adhammavohārādikena yaṃ dhanaṃ sambhataṃ, assa adhammavohārādikassa taṃ sambhataṃ dhanaṃ vinassati. Matā marantā te bālā saggaṃ sugatiṃ na gacchanti. Sugati hi sobhanehi bhogehi aggoti ‘‘saggo’’ti adhippetā . Ettāvatā ettakena diṭṭhadhammikasamparāyikānaṃ attahitānaṃ hāyanena te bālā hatā vinaṭṭhā bhavanti nanūti yojanā.

    ‘‘কথং খণতি অত্তানং, কথং মিত্তেহি জীরতি।

    ‘‘Kathaṃ khaṇati attānaṃ, kathaṃ mittehi jīrati;

    কথং ৰিৰট্টতে ধম্মা, কথং সগ্গং ন গচ্ছতি’’॥

    Kathaṃ vivaṭṭate dhammā, kathaṃ saggaṃ na gacchati’’.

    ‘‘লোভা খণতি অত্তানং, লুদ্ধো মিত্তেহি জীরতি।

    ‘‘Lobhā khaṇati attānaṃ, luddho mittehi jīrati;

    লোভা ৰিৰট্টতে ধম্মা, লোভা সগ্গং ন গচ্ছতী’’তি॥ –

    Lobhā vivaṭṭate dhammā, lobhā saggaṃ na gacchatī’’ti. –

    ইদং সুত্তম্পি সংকিলেসভাগিযং সুত্তং নাম। যোজনত্থো পাকটো।

    Idaṃ suttampi saṃkilesabhāgiyaṃ suttaṃ nāma. Yojanattho pākaṭo.

    ‘‘চরন্তি বালা দুম্মেধা, অমিত্তেনেৰ অত্তনা।

    ‘‘Caranti bālā dummedhā, amitteneva attanā;

    করোন্তা পাপকং কম্মং, যং হোতি কটুকপ্ফলং॥

    Karontā pāpakaṃ kammaṃ, yaṃ hoti kaṭukapphalaṃ.

    ‘‘ন তং কম্মং কতং সাধু, যং কত্ৰা অনুতপ্পতি।

    ‘‘Na taṃ kammaṃ kataṃ sādhu, yaṃ katvā anutappati;

    যস্স অস্সুমুখো রোদং, ৰিপাকং পটিসেৰতী’’তি॥ –

    Yassa assumukho rodaṃ, vipākaṃ paṭisevatī’’ti. –

    ইদং সুত্তম্পি সংকিলেসভাগিযং সুত্তং নাম। দুম্মেধা নিপ্পঞ্ঞা বালা অমিত্তেন পাপকং কম্মং কতং ইৰ, এৰং অত্তনা কটুকপ্ফলং যং কম্মং কতং হোতি, তং পাপকং কতং কম্মং করোন্তা চরন্তি। যং কম্মং কত্ৰা করোন্তো পচ্ছা অনুতপ্পতি, তং কতং কম্মং ন সাধু। যস্স কম্মস্স ৰিপাকং রোদং রুদন্তো অস্সুমুখো পটিসেৰতি, তং কতং কম্মং ন সাধূতি যোজনা।

    Idaṃ suttampi saṃkilesabhāgiyaṃ suttaṃ nāma. Dummedhā nippaññā bālā amittena pāpakaṃ kammaṃ kataṃ iva, evaṃ attanā kaṭukapphalaṃ yaṃ kammaṃ kataṃ hoti, taṃ pāpakaṃ kataṃ kammaṃ karontā caranti. Yaṃ kammaṃ katvā karonto pacchā anutappati, taṃ kataṃ kammaṃ na sādhu. Yassa kammassa vipākaṃ rodaṃ rudanto assumukho paṭisevati, taṃ kataṃ kammaṃ na sādhūti yojanā.

    ‘‘দুক্করং দুত্তিতিক্খঞ্চ…পে॰… অৰীতরাগো’’তি ইদং সুত্তম্পি সংকিলেসভাগিযং সুত্তং নাম। সুত্তত্থো অট্ঠকথাযং ৰিত্থারতো ৰুত্তো।

    ‘‘Dukkaraṃ duttitikkhañca…pe… avītarāgo’’ti idaṃ suttampi saṃkilesabhāgiyaṃ suttaṃ nāma. Suttattho aṭṭhakathāyaṃ vitthārato vutto.

    ‘‘অপ্পমেয্যং পমিনন্তো, কোধ ৰিদ্ৰা ৰিকপ্পযে।

    ‘‘Appameyyaṃ paminanto, kodha vidvā vikappaye;

    অপ্পমেয্যং পমাযিনং, নিৰুতং তং মঞ্ঞে অকিস্সৰ’’ন্তি॥ –

    Appameyyaṃ pamāyinaṃ, nivutaṃ taṃ maññe akissava’’nti. –

    ইদং সুত্তম্পি সংকিলেসভাগিযং সুত্তং নাম। ইধ সাসনে অপ্পমেয্যং অপ্পমেয্যগুণং খীণাসৰং পুগ্গলং ‘‘অযং খীণাসৰো পুগ্গলো এত্তকসীলো এত্তকসমাধি এত্তকপঞ্ঞো’’তি পমিনন্তো কো পুথুজ্জনো ৰিকপ্পযে। অপ্পমেয্যং খীণাসৰপুগ্গলং পমাযিনং পমাযন্তং তং পুথুজ্জনং অযং নিৰুতং অৰকুজ্জপঞ্ঞং অকিস্সৰং অপঞ্ঞন্তি মঞ্ঞে মঞ্ঞামীতি যোজনা।

    Idaṃ suttampi saṃkilesabhāgiyaṃ suttaṃ nāma. Idha sāsane appameyyaṃ appameyyaguṇaṃ khīṇāsavaṃ puggalaṃ ‘‘ayaṃ khīṇāsavo puggalo ettakasīlo ettakasamādhi ettakapañño’’ti paminanto ko puthujjano vikappaye. Appameyyaṃ khīṇāsavapuggalaṃ pamāyinaṃ pamāyantaṃ taṃ puthujjanaṃ ayaṃ nivutaṃ avakujjapaññaṃ akissavaṃ apaññanti maññe maññāmīti yojanā.

    ‘‘পুরিসস্স হি জাতস্স, কুঠারী জাযতে মুখে।

    ‘‘Purisassa hi jātassa, kuṭhārī jāyate mukhe;

    যায ছিন্দতি অত্তানং, বালো দুব্ভাসিতং ভণং॥

    Yāya chindati attānaṃ, bālo dubbhāsitaṃ bhaṇaṃ.

    ‘‘ন হি সত্থং সুনিসিতং, ৰিসং হলাহলং ইৰ।

    ‘‘Na hi satthaṃ sunisitaṃ, visaṃ halāhalaṃ iva;

    এৰং ৰিরদ্ধং পাতেতি, ৰাচা দুব্ভাসিতা যথা’’তি॥ –

    Evaṃ viraddhaṃ pāteti, vācā dubbhāsitā yathā’’ti. –

    ইদং সুত্তম্পি সংকিলেসভাগিযং সুত্তং নাম। দুব্ভাসিতং অরিযূপৰাদসঙ্খাতং ফরুসৰাচং ভণং ভণন্তো বালো দুট্ঠো পুরিসো যায কুঠারীসদিসিযা দুব্ভাসিতৰাচায অত্তানং ছিন্দতি, সা কুঠারীসদিসী দুব্ভাসিতৰাচা জাতস্স পুরিসস্স মুখে জাযতে জাযতি, সা দুব্ভাসিতৰাচা মুখে জাযতি ইৰ, এৰং সুনিসিতং সত্থং মুখে ন জাযতি, যথা হলাহলং ৰিসং মুখে ন জাযতি, দুব্ভাসিতা ৰাচা অপাযেসু ৰিরদ্ধং পুগ্গলং পাতেতি যথা, এৰং সুনিসিতং সত্থং অপাযেসু ন পাতেতি, হলাহলং ৰিসং অপাযেসু ন পাতেতীতি যোজনা।

    Idaṃ suttampi saṃkilesabhāgiyaṃ suttaṃ nāma. Dubbhāsitaṃ ariyūpavādasaṅkhātaṃ pharusavācaṃ bhaṇaṃ bhaṇanto bālo duṭṭho puriso yāya kuṭhārīsadisiyā dubbhāsitavācāya attānaṃ chindati, sā kuṭhārīsadisī dubbhāsitavācā jātassa purisassa mukhe jāyate jāyati, sā dubbhāsitavācā mukhe jāyati iva, evaṃ sunisitaṃ satthaṃ mukhe na jāyati, yathā halāhalaṃ visaṃ mukhe na jāyati, dubbhāsitā vācā apāyesu viraddhaṃ puggalaṃ pāteti yathā, evaṃ sunisitaṃ satthaṃ apāyesu na pāteti, halāhalaṃ visaṃ apāyesu na pātetīti yojanā.

    ৯২.

    92.

    ‘‘যো নিন্দিযং পসংসতি, তং ৰা নিন্দতি যো পসংসিযো।

    ‘‘Yo nindiyaṃ pasaṃsati, taṃ vā nindati yo pasaṃsiyo;

    ৰিচিনাতি মুখেন সো কলিং, কলিনা তেন সুখং ন ৰিন্দতি॥

    Vicināti mukhena so kaliṃ, kalinā tena sukhaṃ na vindati.

    ‘‘অপ্পমত্তো অযং কলি, যো অক্খেসু ধনপরাজযো।

    ‘‘Appamatto ayaṃ kali, yo akkhesu dhanaparājayo;

    সব্বস্সাপি সহাপি অত্তনা, অযমেৰ মহন্ততরো কলি।

    Sabbassāpi sahāpi attanā, ayameva mahantataro kali;

    যো সুগতেসু মনং পদোসযে॥

    Yo sugatesu manaṃ padosaye.

    ‘‘সতং সহস্সানং নিরব্বুদানং, ছত্তিংসতী পঞ্চ চ অব্বুদানি।

    ‘‘Sataṃ sahassānaṃ nirabbudānaṃ, chattiṃsatī pañca ca abbudāni;

    যমরিযগরহী নিরযং উপেতি, ৰাচং মনঞ্চ পণিধায পাপক’’ন্তি॥ –

    Yamariyagarahī nirayaṃ upeti, vācaṃ manañca paṇidhāya pāpaka’’nti. –

    ইদং সুত্তম্পি সংকিলেসভাগিযং সুত্তং নাম। যো পুগ্গলো নিন্দিযং দুচ্চরং দুস্সীলং পুগ্গলং পসংসতি, সো পসংসকো পুগ্গলো মুখেন কলিং ৰিচিনাতি উপচিনাতি, তেন কলিনা সুখং ন ৰিন্দতি। যো সুচারী সীলৰা পুগ্গলো পসংসিযো হোতি, তং ৰা সুচারিং ৰা সীলৰন্তং পুগ্গলং যো পুগ্গলো নিন্দতি, সো নিন্দন্তো পুগ্গলো মুখেন কলিং ৰিচিনাতি উপচিনাতি, তেন কলিনা সুখং ন ৰিন্দতি।

    Idaṃ suttampi saṃkilesabhāgiyaṃ suttaṃ nāma. Yo puggalo nindiyaṃ duccaraṃ dussīlaṃ puggalaṃ pasaṃsati, so pasaṃsako puggalo mukhena kaliṃ vicināti upacināti, tena kalinā sukhaṃ na vindati. Yo sucārī sīlavā puggalo pasaṃsiyo hoti, taṃ vā sucāriṃ vā sīlavantaṃ puggalaṃ yo puggalo nindati, so nindanto puggalo mukhena kaliṃ vicināti upacināti, tena kalinā sukhaṃ na vindati.

    অত্তনা সহাপি সব্বস্স ধনস্স ৰসেনপি অক্খেসু যো ধনপরাজযো ভৰতি, অযং কলি অযং ধনপরাজযো অপ্পমত্তো হোতি। যো পুগ্গলো সুগতেসু মনং পদোসযে, তস্স পুগ্গলস্স যো কলি ভৰতি, অযমেৰ কলি মহন্ততরো হোতি।

    Attanā sahāpi sabbassa dhanassa vasenapi akkhesu yo dhanaparājayo bhavati, ayaṃ kali ayaṃ dhanaparājayo appamatto hoti. Yo puggalo sugatesu manaṃ padosaye, tassa puggalassa yo kali bhavati, ayameva kali mahantataro hoti.

    কস্মা? ৰাচঞ্চ মনঞ্চ পণিধায অরিযগরহী পুগ্গলো যং কালং পাপকং নিরযং উপেতি, সো কালো ‘‘সতং সহস্সানং নিরব্বুদানঞ্চ ছত্তিংস নিরব্বুদানি চ পঞ্চ অব্বুদানি চ যস্মিং কালে গণীযন্তী’’তি তেন কালেন সমো হোতি, তস্মা মহন্ততরো হোতীতি যোজনা।

    Kasmā? Vācañca manañca paṇidhāya ariyagarahī puggalo yaṃ kālaṃ pāpakaṃ nirayaṃ upeti, so kālo ‘‘sataṃ sahassānaṃ nirabbudānañca chattiṃsa nirabbudāni ca pañca abbudāni ca yasmiṃ kāle gaṇīyantī’’ti tena kālena samo hoti, tasmā mahantataro hotīti yojanā.

    ‘‘যো লোভগুণে অনুযুত্তো…পে॰…

    ‘‘Yo lobhaguṇe anuyutto…pe…

    গচ্ছসি খো পপতং চিররত্ত’’ন্তি॥ –

    Gacchasi kho papataṃ ciraratta’’nti. –

    ইদং সুত্তম্পি সংকিলেসভাগিযং সুত্তং নাম। যো পুগ্গলো লোভগুণে অনুযুত্তো অনু পুনপ্পুনং যুত্তো হোতি, সো পুগ্গলো অঞ্ঞে পুগ্গলে ৰচসা পরিভাসতি, অস্সদ্ধো কদরিযো অৰদঞ্ঞূ বুদ্ধানং ওৰাদঞ্ঞূ ন হোতি, মচ্ছরী পেসুণিযং পেসুণিযস্মিং অনুযুত্তো হোতি।

    Idaṃ suttampi saṃkilesabhāgiyaṃ suttaṃ nāma. Yo puggalo lobhaguṇe anuyutto anu punappunaṃ yutto hoti, so puggalo aññe puggale vacasā paribhāsati, assaddho kadariyo avadaññū buddhānaṃ ovādaññū na hoti, maccharī pesuṇiyaṃ pesuṇiyasmiṃ anuyutto hoti.

    মুখদুগ্গ মুখৰিসম ৰিভূত ৰিগতভূত অনরিয ভূনহু বুদ্ধিৰিনাসক পাপক দুক্কটকারি পুরিসন্ত পুরিসলামক কলি অলক্খি অৰজাতপুত্ত ত্ৰং নেরযিকো অসি। ইধ ইদানি বহুভাণী মা হোহি।

    Mukhadugga mukhavisama vibhūta vigatabhūta anariya bhūnahu buddhivināsaka pāpaka dukkaṭakāri purisanta purisalāmaka kali alakkhi avajātaputta tvaṃ nerayiko asi. Idha idāni bahubhāṇī mā hohi.

    অহিতায রজং অত্তনি মা আকিরসি মা পক্খিপসি। কিব্বিসকারি ত্ৰং সন্তে খীণাসৰে পুগ্গলে গরহসি, বহূনি দুচ্চরিতানি কম্মানি চরসি, চরিত্ৰা ত্ৰং চিররত্তং রচনৰিরহিতং পপতং নরকং নিরযং গচ্ছসি খো একংসেনাতি যোজনা।

    Ahitāya rajaṃ attani mā ākirasi mā pakkhipasi. Kibbisakāri tvaṃ sante khīṇāsave puggale garahasi, bahūni duccaritāni kammāni carasi, caritvā tvaṃ cirarattaṃ racanavirahitaṃ papataṃ narakaṃ nirayaṃ gacchasi kho ekaṃsenāti yojanā.

    নানাৰিধং সংকিলেসভাগিযং সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং ৰাসনাভাগিযং সুত্ত’’ন্তি পুচ্ছিতব্বত্তা ‘‘তত্থ কতমং ৰাসনাভাগিযং সুত্ত’’ন্তিআদি ৰুত্তং। তত্থাতি তেসু সোল়সসু সংকিলেসভাগিযাদীসু সুত্তেসু কতমং সুত্তং ৰাসনাভাগিযং সুত্তং নামাতি পুচ্ছতি। ‘‘মনোপুব্বঙ্গমা ধম্মা…পে॰… ছাযাৰ অনপাযিনী’’তি ইদং ৰাসনাভাগে পুঞ্ঞভাগে ৰিসযে ৰাচকঞাপকভাৰেন পৰত্তনতো ৰাসনাভাগিযং সুত্তং নাম। অত্থো পাকটো।

    Nānāvidhaṃ saṃkilesabhāgiyaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ vāsanābhāgiyaṃ sutta’’nti pucchitabbattā ‘‘tattha katamaṃ vāsanābhāgiyaṃ sutta’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu katamaṃ suttaṃ vāsanābhāgiyaṃ suttaṃ nāmāti pucchati. ‘‘Manopubbaṅgamā dhammā…pe… chāyāva anapāyinī’’ti idaṃ vāsanābhāge puññabhāge visaye vācakañāpakabhāvena pavattanato vāsanābhāgiyaṃ suttaṃ nāma. Attho pākaṭo.

    ৯৩. ‘‘মহানামো সক্কো ভগৰন্তং এতদৰোচ…পে॰… অপাপিকা কালঙ্কিরিযা’’তি ইদং সুত্তম্পি ৰাসনাভাগে পুঞ্ঞভাগে ৰিসযে ৰাচকঞাপকভাৰেন পৰত্তনতো ৰাসনাভাগিযং সুত্তং নাম। অত্থো পাকটো।

    93. ‘‘Mahānāmo sakko bhagavantaṃ etadavoca…pe… apāpikā kālaṅkiriyā’’ti idaṃ suttampi vāsanābhāge puññabhāge visaye vācakañāpakabhāvena pavattanato vāsanābhāgiyaṃ suttaṃ nāma. Attho pākaṭo.

    ‘‘সুখকামানি ভূতানি, যো দণ্ডেন ন হিংসতি।

    ‘‘Sukhakāmāni bhūtāni, yo daṇḍena na hiṃsati;

    অত্তনো সুখমেসানো, পেচ্চ সো লভতে সুখ’’ন্তি॥ –

    Attano sukhamesāno, pecca so labhate sukha’’nti. –

    ইদং সুত্তম্পি ৰাসনাভাগিযং সুত্তং নাম। অত্থো পাকটো।

    Idaṃ suttampi vāsanābhāgiyaṃ suttaṃ nāma. Attho pākaṭo.

    ‘‘গুন্নং চে তরমানানং…পে॰… রাজা চে হোতি ধম্মিকো’’তি ইদং সুত্তম্পি ৰাসনাভাগিযং সুত্তং নাম। অত্থো পাকটো।

    ‘‘Gunnaṃ ce taramānānaṃ…pe… rājā ce hoti dhammiko’’ti idaṃ suttampi vāsanābhāgiyaṃ suttaṃ nāma. Attho pākaṭo.

    ৯৪. ‘‘ভগৰা সাৰত্থিযং ৰিহরতি…পে॰… এৰং পজানাতী’’তি ইদং সুত্তম্পি ৰাসনা…পে॰… সুত্তং নাম। অত্থো পাকটো।

    94. ‘‘Bhagavā sāvatthiyaṃ viharati…pe… evaṃ pajānātī’’ti idaṃ suttampi vāsanā…pe… suttaṃ nāma. Attho pākaṭo.

    ‘‘কস্মা ভগৰা জনপদচারিকং চরতী’’তি পুচ্ছেয্য, সত্তহি কারণেহি বুদ্ধা ভগৰন্তো জনপদচারিকং চরন্তি। কতমেহি সত্তহি? দেসন্তরগতানং ৰেনেয্যানং ৰিনযনত্থং, তত্র ঠিতানং উস্সুক্কসমুপ্পাদনত্থং, সাৰকানং একস্মিং ঠানে নিবদ্ধৰাসনিৰারণত্থং, অত্তনো চ তত্থ নিবদ্ধৰাসে অনাসঙ্গদস্সনত্থং, সম্বুদ্ধৰসিতট্ঠানতায দেসানং চেতিযভাৰসম্পাদনত্থং, বহূনং সত্তানং দস্সনূপসঙ্কমনাদীহি পুঞ্ঞোঘপ্পসৰনত্থং, অৰুট্ঠিআদিউপদ্দৰূপসমনত্থঞ্চাতি ইমেহি সত্তহি কারণেহি বুদ্ধা ভগৰন্তো জনপদচারিকং চরন্তীতি জনপদচরণকারণং ৰেদিতব্বং।

    ‘‘Kasmā bhagavā janapadacārikaṃ caratī’’ti puccheyya, sattahi kāraṇehi buddhā bhagavanto janapadacārikaṃ caranti. Katamehi sattahi? Desantaragatānaṃ veneyyānaṃ vinayanatthaṃ, tatra ṭhitānaṃ ussukkasamuppādanatthaṃ, sāvakānaṃ ekasmiṃ ṭhāne nibaddhavāsanivāraṇatthaṃ, attano ca tattha nibaddhavāse anāsaṅgadassanatthaṃ, sambuddhavasitaṭṭhānatāya desānaṃ cetiyabhāvasampādanatthaṃ, bahūnaṃ sattānaṃ dassanūpasaṅkamanādīhi puññoghappasavanatthaṃ, avuṭṭhiādiupaddavūpasamanatthañcāti imehi sattahi kāraṇehi buddhā bhagavanto janapadacārikaṃ carantīti janapadacaraṇakāraṇaṃ veditabbaṃ.

    ‘‘একপুপ্ফং চজিত্ৰান, সহস্সং কপ্পকোটিযো।

    ‘‘Ekapupphaṃ cajitvāna, sahassaṃ kappakoṭiyo;

    দেৰে চেৰ মনুস্সে চ, সেসেন পরিনিব্বুতো’’তি॥ –

    Deve ceva manusse ca, sesena parinibbuto’’ti. –

    ইদং সুত্তম্পি ৰাসনাভাগিযং সুত্তং নাম। সহস্সং কপ্পকোটিযোতি সহস্সং অত্তভাৰতো কোটিযো।

    Idaṃ suttampi vāsanābhāgiyaṃ suttaṃ nāma. Sahassaṃ kappakoṭiyoti sahassaṃ attabhāvato koṭiyo.

    ‘‘অস্সত্থে হরিতোভাসে, সংৰিরূল়্হম্হি পাদপে।

    ‘‘Assatthe haritobhāse, saṃvirūḷhamhi pādape;

    একং বুদ্ধগতং সঞ্ঞং, অলভিংহং পতিস্সতো॥

    Ekaṃ buddhagataṃ saññaṃ, alabhiṃhaṃ patissato.

    ‘‘অজ্জ তিংসং ততো কপ্পা, নাভিজানামি দুগ্গতিং।

    ‘‘Ajja tiṃsaṃ tato kappā, nābhijānāmi duggatiṃ;

    তিস্সো ৰিজ্জা সচ্ছিকতা, তস্সা সঞ্ঞায ৰাসনা’’তি॥ –

    Tisso vijjā sacchikatā, tassā saññāya vāsanā’’ti. –

    ইদং সুত্তম্পি ৰাসনাভাগিযং সুত্তং নাম। হরিতোভাসেতি হরিতওভাসে। অলভিংহন্তি অহং অলভিং।

    Idaṃ suttampi vāsanābhāgiyaṃ suttaṃ nāma. Haritobhāseti haritaobhāse. Alabhiṃhanti ahaṃ alabhiṃ.

    ‘‘পিণ্ডায কোসলং পুরং…পে॰… ৰিপাকো হোতি অচিন্তিযো’’তি ইদং সুত্তম্পি ৰাসনাভাগিযং সুত্তং নাম। অগ্গপুগ্গলো অনুকম্পকো তণ্হানিঘাতকো মুনি সম্বুদ্ধো পুরেভত্তং পিণ্ডায পিণ্ডং পটিগ্গণ্হিতুং কোসলং পুরং পাৰিসি।

    ‘‘Piṇḍāya kosalaṃ puraṃ…pe… vipāko hoti acintiyo’’ti idaṃ suttampi vāsanābhāgiyaṃ suttaṃ nāma. Aggapuggalo anukampako taṇhānighātako muni sambuddho purebhattaṃ piṇḍāya piṇḍaṃ paṭiggaṇhituṃ kosalaṃ puraṃ pāvisi.

    যস্স পুরিসস্স হত্থে সব্বপুপ্ফেহি অলঙ্কতো ৰটংসকো পুপ্ফৰটংসকোৰ অত্থি, সো অযং পুরিসো রাজমগ্গেন কোসলপুরং পৰিসন্তং ভিক্খুসঙ্ঘপুরক্খতং দেৰমানুসপূজিতং সম্বুদ্ধং অদ্দস, দিস্ৰা হট্ঠো চিত্তং পসাদেসি; পসাদেত্ৰা সম্বুদ্ধং উপসঙ্কমি।

    Yassa purisassa hatthe sabbapupphehi alaṅkato vaṭaṃsako pupphavaṭaṃsakova atthi, so ayaṃ puriso rājamaggena kosalapuraṃ pavisantaṃ bhikkhusaṅghapurakkhataṃ devamānusapūjitaṃ sambuddhaṃ addasa, disvā haṭṭho cittaṃ pasādesi; pasādetvā sambuddhaṃ upasaṅkami.

    উপসঙ্কমিত্ৰা সো অযং পসন্নো হুত্ৰা সুরভিং ৰণ্ণৰন্তং মনোরমং তং ৰটংসকং সম্বুদ্ধস্স সেহি পাণীভি উপনামেসি।

    Upasaṅkamitvā so ayaṃ pasanno hutvā surabhiṃ vaṇṇavantaṃ manoramaṃ taṃ vaṭaṃsakaṃ sambuddhassa sehi pāṇībhi upanāmesi.

    ততো বুদ্ধস্স লপনন্তরা লপনস্স ৰদনস্স অন্তরা অগ্গিসিখা ৰণ্ণা সহস্সরংসি ওক্কা পভা নিক্খমি, অব্ভা ৰিজ্জু নিক্খমতি ইৰ, এৰং আননা সহস্সরংসি নিক্খমিত্ৰা আদিচ্চবন্ধুনো সীসে তিক্খত্তুং পদক্খিণং করিত্ৰান পরিৰট্টেত্ৰা মুদ্ধনি অন্তরধাযথ।

    Tato buddhassa lapanantarā lapanassa vadanassa antarā aggisikhā vaṇṇā sahassaraṃsi okkā pabhā nikkhami, abbhā vijju nikkhamati iva, evaṃ ānanā sahassaraṃsi nikkhamitvā ādiccabandhuno sīse tikkhattuṃ padakkhiṇaṃ karitvāna parivaṭṭetvā muddhani antaradhāyatha.

    আনন্দো অচ্ছরিযং অব্ভুতং লোমহংসনং ইদং পাটিহারিযং দিস্ৰা চীৰরং একংসং করিত্ৰা এতং অব্রৰি – ‘‘মহামুনি, সিতকম্মস্স হেতু কো? তং হেতুং ব্যাকরোহি, ধম্মালোকো ভৰিস্সতী’’তি।

    Ānando acchariyaṃ abbhutaṃ lomahaṃsanaṃ idaṃ pāṭihāriyaṃ disvā cīvaraṃ ekaṃsaṃ karitvā etaṃ abravi – ‘‘mahāmuni, sitakammassa hetu ko? Taṃ hetuṃ byākarohi, dhammāloko bhavissatī’’ti.

    যস্স ভগৰতো সব্বধম্মেসু ঞাণং সদা পৰত্ততি, কঙ্খাৰিতরণো মুনি সো ভগৰা কঙ্খিং ৰেমতিকং আনন্দং থেরং এতং অব্রৰি। আনন্দ, যো সোপুরিসো মযি চিত্তং পসাদযি, সো পুরিসো চতুরাসীতিকপ্পানি দুগ্গতিং ন গমিস্সতি, দেৰেসু দেৰসোভগ্গং দিব্বং রজ্জং পসাসিত্ৰা মনুজেসু রট্ঠে সকলরট্ঠে মনুজিন্দো রাজা ভৰিস্সতি। সো পুরিসো চরিমং পব্বজিত্ৰা, ধম্মতং সচ্ছিকত্ৰা চ ধুতরাগো ৰটংসকো নাম পচ্চেকবুদ্ধো ভৰিস্সতি।

    Yassa bhagavato sabbadhammesu ñāṇaṃ sadā pavattati, kaṅkhāvitaraṇo muni so bhagavā kaṅkhiṃ vematikaṃ ānandaṃ theraṃ etaṃ abravi. Ānanda, yo sopuriso mayi cittaṃ pasādayi, so puriso caturāsītikappāni duggatiṃ na gamissati, devesu devasobhaggaṃ dibbaṃ rajjaṃ pasāsitvā manujesu raṭṭhe sakalaraṭṭhe manujindo rājā bhavissati. So puriso carimaṃ pabbajitvā, dhammataṃ sacchikatvā ca dhutarāgo vaṭaṃsako nāma paccekabuddho bhavissati.

    তথাগতে ৰা সম্মাসম্বুদ্ধে ৰা পচ্চেকসম্বুদ্ধে ৰা তস্স তথাগতস্স সাৰকে ৰা চিত্তে পসন্নম্হি দক্খিণা অপ্পকা নাম নত্থি।

    Tathāgate vā sammāsambuddhe vā paccekasambuddhe vā tassa tathāgatassa sāvake vā citte pasannamhi dakkhiṇā appakā nāma natthi.

    বুদ্ধা এৰং এত্তকাতি অচিন্তিযা ভৰন্তি। বুদ্ধধম্মা বুদ্ধগুণা এৰং এত্তকাতি অচিন্তিযা ভৰন্তি, অচিন্তিযে পসন্নানং ৰিপাকো পুঞ্ঞৰিপাকো এৰং এত্তকোতি অচিন্তিযো হোতীতি এতং অব্রৰীতি যোজনা।

    Buddhā evaṃ ettakāti acintiyā bhavanti. Buddhadhammā buddhaguṇā evaṃ ettakāti acintiyā bhavanti, acintiye pasannānaṃ vipāko puññavipāko evaṃ ettakoti acintiyo hotīti etaṃ abravīti yojanā.

    ৯৬. ‘‘ইধাহং , ভিক্খৰে, একচ্চং পুগ্গলং…পে॰… অযম্পি অত্থো ৰুত্তো ভগৰতা ইতি মে সুত’’ন্তি ইদং সুত্তম্পি ৰাসনাভাগিযং সুত্তং নাম। ভিক্খৰে, ইধ ইমস্মিং সাসনে অহং একচ্চং পুগ্গলং এৰং মম চেতসা একচ্চস্স পুগ্গলস্স চেতো চিত্তং পরিচ্চ বুদ্ধচক্খুনা এৰং পজানামি, যথা যেন পকারেন অযং পুগ্গলো যঞ্চ দানাদিপটিপদং পটিপন্নো, যঞ্চ দস্সনাদিমগ্গং সমারুল়্হো হুত্ৰা তং পটিপদং, মগ্গঞ্চ ইরিযতি পৰত্তেতি, ইমম্হি ইমস্মিঞ্চ সমযে অযং পুগ্গলো চে কালং করেয্য, এৰং সতি আভতং ৰত্থুং নিক্খিপতি যথা, এৰং তায পটিপদায তেন মগ্গেন সগ্গে অত্তনিক্খিত্তো ভৰে। তং কিস্স হেতু? ভিক্খৰে, অস্স পুগ্গলস্স চিত্তং হি যস্মা পসন্নং পসাদিতং, তস্মা নিক্খিত্তো ভৰে। ইধ সাসনে, লোকে ৰা একচ্চে সত্তা পুগ্গলা কাযস্স ভেদা পরং মরণা সুগতিং সগ্গং লোকং চেতোপসাদহেতু খো পন উপপজ্জন্তীতি এৰং অহং পজানামীতি ভগৰা এতমত্থং অৰোচ। তত্থ তস্মিং অত্থে সঙ্গহৰসেন পৰত্তং এতং ‘‘পসন্নচিত্তং ঞত্ৰান…পে॰… সগ্গং সো উপপজ্জতী’’তি গাথাৰচনং ৰুচ্চতি। অযম্পি অত্থো ভগৰতা ৰুত্তো, ইতি মে মযা সুতন্তি যোজনা।

    96. ‘‘Idhāhaṃ , bhikkhave, ekaccaṃ puggalaṃ…pe… ayampi attho vutto bhagavatā iti me suta’’nti idaṃ suttampi vāsanābhāgiyaṃ suttaṃ nāma. Bhikkhave, idha imasmiṃ sāsane ahaṃ ekaccaṃ puggalaṃ evaṃ mama cetasā ekaccassa puggalassa ceto cittaṃ paricca buddhacakkhunā evaṃ pajānāmi, yathā yena pakārena ayaṃ puggalo yañca dānādipaṭipadaṃ paṭipanno, yañca dassanādimaggaṃ samāruḷho hutvā taṃ paṭipadaṃ, maggañca iriyati pavatteti, imamhi imasmiñca samaye ayaṃ puggalo ce kālaṃ kareyya, evaṃ sati ābhataṃ vatthuṃ nikkhipati yathā, evaṃ tāya paṭipadāya tena maggena sagge attanikkhitto bhave. Taṃ kissa hetu? Bhikkhave, assa puggalassa cittaṃ hi yasmā pasannaṃ pasāditaṃ, tasmā nikkhitto bhave. Idha sāsane, loke vā ekacce sattā puggalā kāyassa bhedā paraṃ maraṇā sugatiṃ saggaṃ lokaṃ cetopasādahetu kho pana upapajjantīti evaṃ ahaṃ pajānāmīti bhagavā etamatthaṃ avoca. Tattha tasmiṃ atthe saṅgahavasena pavattaṃ etaṃ ‘‘pasannacittaṃ ñatvāna…pe… saggaṃ so upapajjatī’’ti gāthāvacanaṃ vuccati. Ayampi attho bhagavatā vutto, iti me mayā sutanti yojanā.

    ‘‘সুৰণ্ণচ্ছদনং নাৰং…পে॰… এতাদিসং কতপুঞ্ঞা লভি’’ন্তি ইদং সুত্তম্পি ৰাসনাভাগিযং সুত্তং নাম। নারি দেৰধীতা সুৰণ্ণচ্ছদনং সুৰণ্ণালঙ্কারেহি ছাদিতং নাৰং আরুয্হ তিট্ঠসি, পোক্খরণিং দেৰপোক্খরণিং ওগাহসি, পদুমং পাণিনা ছিন্দসি।

    ‘‘Suvaṇṇacchadanaṃ nāvaṃ…pe… etādisaṃ katapuññā labhi’’nti idaṃ suttampi vāsanābhāgiyaṃ suttaṃ nāma. Nāri devadhītā suvaṇṇacchadanaṃ suvaṇṇālaṅkārehi chāditaṃ nāvaṃ āruyha tiṭṭhasi, pokkharaṇiṃ devapokkharaṇiṃ ogāhasi, padumaṃ pāṇinā chindasi.

    দেৰতে কেন কম্মেন তে তৰ তাদিসো ৰণ্ণো তাদিসো আনুভাৰো তাদিসী জুতি ভৰতি, দেৰতে তে তৰ যে কেচি ভোগা মনসা ইচ্ছিতা ভৰন্তি, তে ভোগা চ কেন কম্মেন উপ্পজ্জন্তি। দেৰতে মে পুচ্ছিতা ত্ৰং সংস সংসাহি ইদং সব্বং কিস্স কম্মস্স চ ফলন্তি সক্কো পুচ্ছতি।

    Devate kena kammena te tava tādiso vaṇṇo tādiso ānubhāvo tādisī juti bhavati, devate te tava ye keci bhogā manasā icchitā bhavanti, te bhogā ca kena kammena uppajjanti. Devate me pucchitā tvaṃ saṃsa saṃsāhi idaṃ sabbaṃ kissa kammassa ca phalanti sakko pucchati.

    দেৰরাজেন পুচ্ছিতা সা দেৰধীতা অত্তমনা হুত্ৰা পঞ্হং পুট্ঠা সক্কস্স ব্যাকাসি। দেৰরাজা অদ্ধানং দীঘমগ্গং পটিপন্না অহং যসস্সিনো কস্সপস্স ভগৰতো মনোরমং থূপং অদ্দস্সং, দিস্ৰা তত্থ থূপে চিত্তং পসাদেসিং। পসন্নাহং সেহি পাণীহি পদুমপুপ্ফেহি পূজেসিং। তস্সেৰ কম্মস্স ইদং সব্বং ফলং ৰিপাকো ভৰে। কতপুঞ্ঞাহং এতাদিসং ফলং অলভিন্তি সক্কস্স ব্যাকাসি। ইতি মে সুতন্তি মহামোগ্গল্লানো ৰদতীতি যোজনা।

    Devarājena pucchitā sā devadhītā attamanā hutvā pañhaṃ puṭṭhā sakkassa byākāsi. Devarājā addhānaṃ dīghamaggaṃ paṭipannā ahaṃ yasassino kassapassa bhagavato manoramaṃ thūpaṃ addassaṃ, disvā tattha thūpe cittaṃ pasādesiṃ. Pasannāhaṃ sehi pāṇīhi padumapupphehi pūjesiṃ. Tasseva kammassa idaṃ sabbaṃ phalaṃ vipāko bhave. Katapuññāhaṃ etādisaṃ phalaṃ alabhinti sakkassa byākāsi. Iti me sutanti mahāmoggallāno vadatīti yojanā.

    ‘‘যথানিদ্ধারিতসুত্তানিযেৰ ৰাসনাভাগিযসুত্তানি পরিপুণ্ণানী’’তি ৰত্তব্বত্তা ‘‘দানকথা সীলকথা সগ্গকথা পুঞ্ঞকথা পুঞ্ঞৰিপাককথাতি ইদং ৰাসনাভাগিয’’ন্তিআদি ৰুত্তং। তত্থ যায দেসনায দানঞ্চ দানফলঞ্চ দস্সিতং, সা দেসনা দানকথা নাম। যায দেসনায সীলঞ্চ সীলফলঞ্চ দস্সিতং, সা দেসনা সীলকথা নাম। যায দেসনায সগ্গা চ সগ্গেসু নিব্বত্তাপকঞ্চ কম্মং দস্সিতং, সা সগ্গকথা নাম। যায দেসনায দানসীলভাৰনাদিৰসেন দসৰিধং পুঞ্ঞকম্মং দস্সিতং, সা পুঞ্ঞকথা নাম। যায দেসনায তাদিসস্স পুঞ্ঞকম্মস্স ৰিৰিধো অযং ৰিপাকো ইমস্স পুঞ্ঞস্স ৰিপাকোতি নিযমেত্ৰা দস্সিতো, সা পুঞ্ঞৰিপাককথা নাম।

    ‘‘Yathāniddhāritasuttāniyeva vāsanābhāgiyasuttāni paripuṇṇānī’’ti vattabbattā ‘‘dānakathā sīlakathā saggakathā puññakathā puññavipākakathāti idaṃ vāsanābhāgiya’’ntiādi vuttaṃ. Tattha yāya desanāya dānañca dānaphalañca dassitaṃ, sā desanā dānakathā nāma. Yāya desanāya sīlañca sīlaphalañca dassitaṃ, sā desanā sīlakathā nāma. Yāya desanāya saggā ca saggesu nibbattāpakañca kammaṃ dassitaṃ, sā saggakathā nāma. Yāya desanāya dānasīlabhāvanādivasena dasavidhaṃ puññakammaṃ dassitaṃ, sā puññakathā nāma. Yāya desanāya tādisassa puññakammassa vividho ayaṃ vipāko imassa puññassa vipākoti niyametvā dassito, sā puññavipākakathā nāma.

    দসবলধরানং সম্মাসম্বুদ্ধানং উদ্দিস্সকতেসু সরীরধাতুং অব্ভন্তরে ঠপেত্ৰা পংসূহি কতেসু থূপেসু যে নরা পসন্না, তে নরা তত্থ থূপে কারং পুঞ্ঞং কত্ৰা সগ্গেসু উপ্পজ্জিত্ৰা পমোদন্তীতি যোজনা। ইদং সুত্তং ৰা…পে॰… সুত্তং।

    Dasabaladharānaṃ sammāsambuddhānaṃ uddissakatesu sarīradhātuṃ abbhantare ṭhapetvā paṃsūhi katesu thūpesu ye narā pasannā, te narā tattha thūpe kāraṃ puññaṃ katvā saggesu uppajjitvā pamodantīti yojanā. Idaṃ suttaṃ vā…pe… suttaṃ.

    ৯৭. দেৰপুত্তসরীরৰণ্ণা দেৰপুত্তসরীরসদিসৰণ্ণা সুভগসণ্ঠিতি সোভগ্গযুত্তসণ্ঠানা সব্বে জনা উদকেন পংসুং তেমেত্ৰা থূপং ৰড্ঢেথ, সো অযং থূপো কস্স পুগ্গলস্স থূপোতি পুচ্ছতি।

    97.Devaputtasarīravaṇṇā devaputtasarīrasadisavaṇṇā subhagasaṇṭhiti sobhaggayuttasaṇṭhānā sabbe janā udakena paṃsuṃ temetvā thūpaṃ vaḍḍhetha, so ayaṃ thūpo kassa puggalassa thūpoti pucchati.

    সুগত্তে সুন্দরগত্তে দেৰতে তস্মিং থূপে পসন্না ইমে দেৰমনুজা কারং পুঞ্ঞং করোন্তা হুত্ৰা জরামরণতো পমুচ্চরে। সো অযং থূপো মহেসিনো দসবলধম্মধারিনো সুগতস্স থূপোতি ৰেদিতব্বোতি আহাতি যোজনা। ইদং সুত্তং ৰা…পে॰… সুত্তং।

    Sugatte sundaragatte devate tasmiṃ thūpe pasannā ime devamanujā kāraṃ puññaṃ karontā hutvā jarāmaraṇato pamuccare. So ayaṃ thūpo mahesino dasabaladhammadhārino sugatassa thūpoti veditabboti āhāti yojanā. Idaṃ suttaṃ vā…pe… suttaṃ.

    যাহং যা অহং মহেসিনো থূপং চত্তারি উপ্পলানি চ মালঞ্চ অভিরোপযিং, তেন মযা কতং তং পুঞ্ঞং উল়ারং ৰত আসি অহোসি। ততো কপ্পতো অজ্জ কপ্পা তিংসং ধরন্তি সত্থুনো থূপং পূজেত্ৰা তত্তকানি দুগ্গতিং ন জানামি, ৰিনিপাতং ন গচ্ছামীতি যোজনা। ইদং সুত্তং ৰা…পে॰… সুত্তং।

    Yāhaṃ yā ahaṃ mahesino thūpaṃ cattāri uppalāni ca mālañca abhiropayiṃ, tena mayā kataṃ taṃ puññaṃ uḷāraṃ vata āsi ahosi. Tato kappato ajja kappā tiṃsaṃ dharanti satthuno thūpaṃ pūjetvā tattakāni duggatiṃ na jānāmi, vinipātaṃ na gacchāmīti yojanā. Idaṃ suttaṃ vā…pe… suttaṃ.

    অহং বাত্তিংসলক্খণধরস্স বাত্তিংসলক্খণধরেন সম্পন্নস্স ৰিজিতৰিজযস্স লোকনাথস্স থূপং অপূজেসিং, পূজেত্ৰা সতসহস্সং কপ্পে আযুকপ্পে পমুদিতো আসিং। মযা যং পুঞ্ঞং পসুতং, তেন পুঞ্ঞেন ৰিনিপাতং অনাগন্তুন অনাগন্ত্ৰা দেৰসোভগ্গং সম্পত্তিং চ দেৰরজ্জানি চ তানি অকারিং । অথ ৰা দেৰসোভগ্গঞ্চ মযা কারিতং, রজ্জানি চ মযা কারিতানি।

    Ahaṃ bāttiṃsalakkhaṇadharassa bāttiṃsalakkhaṇadharena sampannassa vijitavijayassa lokanāthassa thūpaṃ apūjesiṃ, pūjetvā satasahassaṃ kappe āyukappe pamudito āsiṃ. Mayā yaṃ puññaṃ pasutaṃ, tena puññena vinipātaṃ anāgantuna anāgantvā devasobhaggaṃ sampattiṃ ca devarajjāni ca tāni akāriṃ . Atha vā devasobhaggañca mayā kāritaṃ, rajjāni ca mayā kāritāni.

    অদন্তদমকস্স সাসনে যং চক্খু পঞ্ঞাচক্খু পণিহিতং, তথা চিত্তং যং ৰিমুত্তচিত্তং পণিহিতং, তং সব্বং পঞ্ঞাচক্খু ৰিমুত্তচিত্তং মে মযা লদ্ধং, অহং ৰিধুতলতাসঙ্খাততণ্হা হুত্ৰা ৰিমুত্তচিত্তা ফলৰিমুত্তচিত্তসম্পন্না অম্হীতি অৰোচাতি যোজনা। ইদং সুত্তং ৰা…পে॰… সুত্তং।

    Adantadamakassa sāsane yaṃ cakkhu paññācakkhu paṇihitaṃ, tathā cittaṃ yaṃ vimuttacittaṃ paṇihitaṃ, taṃ sabbaṃ paññācakkhu vimuttacittaṃ me mayā laddhaṃ, ahaṃ vidhutalatāsaṅkhātataṇhā hutvā vimuttacittā phalavimuttacittasampannā amhīti avocāti yojanā. Idaṃ suttaṃ vā…pe… suttaṃ.

    ৯৮. ৰিমুত্তচিত্তে ফলৰিমুত্তচিত্তসম্পন্নে অখিলে পঞ্চচেতোখীলরহিতে অনাসৰে অরণৰিহারিম্হি অরণৰিহারসীলে অসঙ্গমানসে অলগ্গমানসে পচ্চেকবুদ্ধস্মিং সামাকপত্থোদনমত্তমেৰ দক্খিণং অদাসিং।

    98.Vimuttacitte phalavimuttacittasampanne akhile pañcacetokhīlarahite anāsave araṇavihārimhi araṇavihārasīle asaṅgamānase alaggamānase paccekabuddhasmiṃ sāmākapatthodanamattameva dakkhiṇaṃ adāsiṃ.

    তস্মিং পচ্চেকবুদ্ধে উত্তমং ধম্মং পচ্চেকবোধিধম্মং ওকপ্পযিং ‘‘সো উত্তমো ধম্মো অত্থী’’তি সদ্দহিং। এৰং অরিযৰিহারেন ৰিহারীহি পচ্চেকবুদ্ধেহি মে মম সঙ্গমো কতো সিযা ভৰে, কুদাসুপি চ অহং অপেক্খৰা মা ভৰেয্যন্তি মানসং তস্মিঞ্চ ধম্মে পণিধেসিং ‘‘ইমিনা পচ্চেকবুদ্ধেন লদ্ধধম্মং অহম্পি সচ্ছিকরেয্য’’ন্তি চিত্তং পণিদহিং।

    Tasmiṃ paccekabuddhe uttamaṃ dhammaṃ paccekabodhidhammaṃ okappayiṃ ‘‘so uttamo dhammo atthī’’ti saddahiṃ. Evaṃ ariyavihārena vihārīhi paccekabuddhehi me mama saṅgamo kato siyā bhave, kudāsupi ca ahaṃ apekkhavā mā bhaveyyanti mānasaṃ tasmiñca dhamme paṇidhesiṃ ‘‘iminā paccekabuddhena laddhadhammaṃ ahampi sacchikareyya’’nti cittaṃ paṇidahiṃ.

    তস্সেৰ পচ্চেকবুদ্ধে কতস্সেৰ কম্মস্স ৰিপাকতো অহং দীঘাযুকেসু অমমেসু ‘‘মম পরিগ্গহো’’তি পরিগ্গহাভাৰেন অপরিগ্গহেসু ৰিসেসগামীসু অহীনগামীসু কুরূসু উত্তরকুরূসু পাণীসু সত্তেসু সহস্সক্খত্তুং উপপজ্জথ উপপজ্জিং।

    Tasseva paccekabuddhe katasseva kammassa vipākato ahaṃ dīghāyukesu amamesu ‘‘mama pariggaho’’ti pariggahābhāvena apariggahesu visesagāmīsu ahīnagāmīsu kurūsu uttarakurūsu pāṇīsu sattesu sahassakkhattuṃ upapajjatha upapajjiṃ.

    তস্সেৰ কম্মস্স ৰিপাকতো ৰিচিত্রমালাভরণানুলেপীসু যসস্সীসু পরিৰারৰন্তেসু তিদসো দেৰো অহং ৰিসিট্ঠকাযূপগতো হুত্ৰা সহস্সক্খত্তুং উপপজ্জথ।

    Tasseva kammassa vipākato vicitramālābharaṇānulepīsu yasassīsu parivāravantesu tidaso devo ahaṃ visiṭṭhakāyūpagato hutvā sahassakkhattuṃ upapajjatha.

    তস্সেৰ কম্মস্স ৰিপাকতো অহং ৰিমুত্তচিত্তো অখীলো অনাসৰো হুত্ৰা হিতাহিতাসীহি কুসলাকুসলৰীতিৰত্তেহি অন্তিমদেহধারিভি ইমেহি পচ্চেকবুদ্ধেহি, বুদ্ধসাৰকেহি ৰা মে মম সমাগমো আসি।

    Tasseva kammassa vipākato ahaṃ vimuttacitto akhīlo anāsavo hutvā hitāhitāsīhi kusalākusalavītivattehi antimadehadhāribhi imehi paccekabuddhehi, buddhasāvakehi vā me mama samāgamo āsi.

    ‘‘সীলৰতো যং ইচ্ছিতং, তং সমিজ্ঝতে’’তি ইমং ৰচনং তথাগতো জিনো পচ্চক্খং কত্ৰা অৰচ খো, যথা যথা যেন যেন পকারেন মে মনসা ৰিচিন্তিতং, তথা তথা তেন তেন পকারেন সমিদ্ধং ভৰতি। অযং ভৰো অন্তিমো ভৰোতি যোজনা। ইদং সুত্তং ৰা…পে॰… সুত্তং।

    ‘‘Sīlavato yaṃ icchitaṃ, taṃ samijjhate’’ti imaṃ vacanaṃ tathāgato jino paccakkhaṃ katvā avaca kho, yathā yathā yena yena pakārena me manasā vicintitaṃ, tathā tathā tena tena pakārena samiddhaṃ bhavati. Ayaṃ bhavo antimo bhavoti yojanā. Idaṃ suttaṃ vā…pe… suttaṃ.

    একতিংসম্হি কপ্পম্হি জিনো অনেজো অনন্তদস্সী ‘‘সিখী’’তি ইতিনামকো উপ্পজ্জি। তস্সাপি ভগৰতো রাজা ভাতা সিখিদ্ধে চ সিখী ইতিনামকে বুদ্ধে চ তস্স ভগৰতো ধম্মে চ অভিপ্পসন্নো লোকৰিনাযকম্হি পরিনিব্বুতে সতি দেৰাতিদেৰস্স নরুত্তমস্স মহেসিনো ৰিপুলং মহন্তং সমন্ততো গাৰুতিকং থূপং অকাসিং।

    Ekatiṃsamhi kappamhi jino anejo anantadassī ‘‘sikhī’’ti itināmako uppajji. Tassāpi bhagavato rājā bhātā sikhiddhe ca sikhī itināmake buddhe ca tassa bhagavato dhamme ca abhippasanno lokavināyakamhi parinibbute sati devātidevassa naruttamassa mahesino vipulaṃ mahantaṃ samantato gāvutikaṃ thūpaṃ akāsiṃ.

    তস্মিং থূপে বলিং পূজাবলিং অভিহারী মনুস্সো জাতিসুমনং পগ্গয্হ পহট্ঠো পূজেসি। অস্স মনুস্সস্স একং পুপ্ফং ৰাতেন পহরিতং হুত্ৰা পতিতং। অহং তং পতিতং একং পুপ্ফং গহেত্ৰা তস্সেৰ পুপ্ফসামিকস্স অদাসিং।

    Tasmiṃ thūpe baliṃ pūjābaliṃ abhihārī manusso jātisumanaṃ paggayha pahaṭṭho pūjesi. Assa manussassa ekaṃ pupphaṃ vātena paharitaṃ hutvā patitaṃ. Ahaṃ taṃ patitaṃ ekaṃ pupphaṃ gahetvā tasseva pupphasāmikassa adāsiṃ.

    সো মনুস্সো পুপ্ফসামিকো অভিপ্পসন্নচিত্তো হুত্ৰা মং ‘‘ত্ৰমেৰ এতং একং পুপ্ফং পূজা’’তি অদাসি। দদাসীতি এত্থ দ-কারো আগমো। অহং তং একং পুপ্ফং গহেত্ৰা বুদ্ধং বুদ্ধগুণং পুনপ্পুনং অনুস্সরন্তো যস্মিং কপ্পে অভিরোপযিং, ততো কপ্পতো অজ্জ কপ্পা তিংসং অহেসুং। তেসু কপ্পেসু দুগ্গতিং নাভিজানামি, ৰিনিপাতঞ্চ ন গচ্ছামি, ইদং ফলং থূপপূজায ফলন্তি অৰোচাতি যোজনা। ইদং সুত্তং ৰা…পে॰… সুত্তং।

    So manusso pupphasāmiko abhippasannacitto hutvā maṃ ‘‘tvameva etaṃ ekaṃ pupphaṃ pūjā’’ti adāsi. Dadāsīti ettha da-kāro āgamo. Ahaṃ taṃ ekaṃ pupphaṃ gahetvā buddhaṃ buddhaguṇaṃ punappunaṃ anussaranto yasmiṃ kappe abhiropayiṃ, tato kappato ajja kappā tiṃsaṃ ahesuṃ. Tesu kappesu duggatiṃ nābhijānāmi, vinipātañca na gacchāmi, idaṃ phalaṃ thūpapūjāya phalanti avocāti yojanā. Idaṃ suttaṃ vā…pe… suttaṃ.

    ব্রহ্মদত্তস্স ব্রহ্মদত্তনামকস্স রাজিনো কপিলং নাম নগরং সুৰিভত্তং ভাগতো সুট্ঠু ৰিভত্তং, মহাপথং মহাপথসম্পন্নং আকিণ্ণং, নানাজাতিকেহি মনুস্সেহি পরিপুণ্ণং, ইদ্ধং ফীতঞ্চ আসি।

    Brahmadattassa brahmadattanāmakassa rājino kapilaṃ nāma nagaraṃ suvibhattaṃ bhāgato suṭṭhu vibhattaṃ, mahāpathaṃ mahāpathasampannaṃ ākiṇṇaṃ, nānājātikehi manussehi paripuṇṇaṃ, iddhaṃ phītañca āsi.

    পঞ্চালানং তত্থ পুরুত্তমে অহং কুম্মাসং ৰিক্কিণিং, সো অহং যসস্সিনং উপরিট্ঠং উপসমীপে ঠিতং অরিট্ঠং নাম সম্বুদ্ধং পচ্চেকবুদ্ধং অদ্দসিং, দিস্ৰা হট্ঠো চিত্তং পসাদেত্ৰা নরুত্তমং অরিট্ঠং মে গেহস্মিং যং ধুৰভত্তং ৰিজ্জথ ৰিজ্জি, তেন ধুৰভত্তেন নিমন্তেসিং।

    Pañcālānaṃ tattha puruttame ahaṃ kummāsaṃ vikkiṇiṃ, so ahaṃ yasassinaṃ upariṭṭhaṃ upasamīpe ṭhitaṃ ariṭṭhaṃ nāma sambuddhaṃ paccekabuddhaṃ addasiṃ, disvā haṭṭho cittaṃ pasādetvā naruttamaṃ ariṭṭhaṃ me gehasmiṃ yaṃ dhuvabhattaṃ vijjatha vijji, tena dhuvabhattena nimantesiṃ.

    যতো চ যস্মিং কালে চ কত্তিকো যস্সং পন্নরসীপুণ্ণো, সা পুণ্ণমাসী পন্নরসী উপট্ঠিতা, ততো চ তস্মিং কালে চ অহং নৰং দুস্সযুগং গয্হ অরিট্ঠস্স অরিট্ঠনামকস্স পচ্চেকবুদ্ধস্স উপনামেসিং।

    Yato ca yasmiṃ kāle ca kattiko yassaṃ pannarasīpuṇṇo, sā puṇṇamāsī pannarasī upaṭṭhitā, tato ca tasmiṃ kāle ca ahaṃ navaṃ dussayugaṃ gayha ariṭṭhassa ariṭṭhanāmakassa paccekabuddhassa upanāmesiṃ.

    নরুত্তমো অনুকম্পকো কারুণিকো তণ্হানিঘাতকো মুনি পচ্চেকবুদ্ধো পসন্নচিত্তং মং ঞত্ৰান পটিগ্গণ্হি।

    Naruttamo anukampako kāruṇiko taṇhānighātako muni paccekabuddho pasannacittaṃ maṃ ñatvāna paṭiggaṇhi.

    অহং কল্যাণং বুদ্ধৰণ্ণিতং কম্মং করিত্ৰান দেৰে চ মনুস্সে চ সন্ধাৰিত্ৰা ততো চুতো বারাণসিযং নগরে অড্ঢে কুলস্মিং সেট্ঠিস্স একপুত্তকো উপ্পজ্জিং, পাণেহি চ পিযতরো আসিং।

    Ahaṃ kalyāṇaṃ buddhavaṇṇitaṃ kammaṃ karitvāna deve ca manusse ca sandhāvitvā tato cuto bārāṇasiyaṃ nagare aḍḍhe kulasmiṃ seṭṭhissa ekaputtako uppajjiṃ, pāṇehi ca piyataro āsiṃ.

    ততো চ তস্মিং কালে ৰিঞ্ঞুতং পত্তো হুত্ৰা দেৰপুত্তেন চোদিতো অহং পাসাদা ওরুহিত্ৰান সম্বুদ্ধং ভগৰন্তং গোতমং উপসঙ্কমিং।

    Tato ca tasmiṃ kāle viññutaṃ patto hutvā devaputtena codito ahaṃ pāsādā oruhitvāna sambuddhaṃ bhagavantaṃ gotamaṃ upasaṅkamiṃ.

    সো সম্বুদ্ধো ভগৰা গোতমো অনুকম্পায মে ধম্মং অদেসেসি। দুক্খং দুক্খসচ্চঞ্চ দুক্খসমুপ্পাদং সমুদযসচ্চঞ্চ দুক্খস্স অতিক্কমং নিরোধসচ্চঞ্চ অরিযং অট্ঠঙ্গিকং দুক্খূপসমগামিনং মগ্গং মগ্গসচ্চঞ্চ ইতি চত্তারি সচ্চানি দেসিতানি, তদুপ্পাদকং ধম্মং মুনি ভগৰা গোতমো অদেসযি।

    So sambuddho bhagavā gotamo anukampāya me dhammaṃ adesesi. Dukkhaṃ dukkhasaccañca dukkhasamuppādaṃ samudayasaccañca dukkhassa atikkamaṃ nirodhasaccañca ariyaṃ aṭṭhaṅgikaṃ dukkhūpasamagāminaṃ maggaṃ maggasaccañca iti cattāri saccāni desitāni, taduppādakaṃ dhammaṃ muni bhagavā gotamo adesayi.

    অহং তস্স ভগৰতো গোতমস্স ৰচনং সুত্ৰা সাসনে রতো হুত্ৰা ৰিহরিং, অহং রত্তিন্দিৰং অতন্দিতো হুত্ৰা সমথং পটিৰিজ্ঝিং।

    Ahaṃ tassa bhagavato gotamassa vacanaṃ sutvā sāsane rato hutvā vihariṃ, ahaṃ rattindivaṃ atandito hutvā samathaṃ paṭivijjhiṃ.

    অজ্ঝত্তঞ্চ যে আসৰা, বহিদ্ধা চ যে আসৰা মগ্গেন সমুচ্ছিন্না আসুং, সব্বে তে আসৰা মে মম ৰিজ্জিংসু, পুন ন চ উপ্পজ্জরে।

    Ajjhattañca ye āsavā, bahiddhā ca ye āsavā maggena samucchinnā āsuṃ, sabbe te āsavā me mama vijjiṃsu, puna na ca uppajjare.

    দুক্খং ‘‘পরিযন্তকতং যস্স দুক্খস্সা’’তি পরিযন্তকতং আসি, অযং সমুস্সযো জাতিমরণসংসারো চরিমো অন্তিমো আসি, ইদানি ইমস্স অত্তভাৰস্স অনন্তরং পুনব্ভৰো মম নত্থীতি অৰোচাতি যোজনা। যং নানাৰিধং ৰাসনাভাগিযং সুত্তং উদাহরণৰসেন নিদ্ধারিতং, ইদং নানাৰিধং সুত্তং ৰাসনাভাগে পুঞ্ঞকোট্ঠাসে ৰিসযে ৰাচকঞাপকভাৰেন পৰত্তনতো ৰাসনাভাগিযং সুত্তং নাম।

    Dukkhaṃ ‘‘pariyantakataṃ yassa dukkhassā’’ti pariyantakataṃ āsi, ayaṃ samussayo jātimaraṇasaṃsāro carimo antimo āsi, idāni imassa attabhāvassa anantaraṃ punabbhavo mama natthīti avocāti yojanā. Yaṃ nānāvidhaṃ vāsanābhāgiyaṃ suttaṃ udāharaṇavasena niddhāritaṃ, idaṃ nānāvidhaṃ suttaṃ vāsanābhāge puññakoṭṭhāse visaye vācakañāpakabhāvena pavattanato vāsanābhāgiyaṃ suttaṃ nāma.

    নানাৰিধং ৰাসনাভাগিযং সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং নিব্বেধভাগিযং সুত্ত’’ন্তি পুচ্ছিতব্বত্তা ‘‘তত্থ কতমং নিব্বেধভাগিযং সুত্ত’’ন্তিআদি ৰুত্তং। তত্থ তেসু সোল়সসু সংকিলেসভাগিযাদীসু সুত্তেসু কতমং সুত্তং নিব্বেধভাগিযং সুত্তং নামাতি পুচ্ছতি।

    Nānāvidhaṃ vāsanābhāgiyaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ nibbedhabhāgiyaṃ sutta’’nti pucchitabbattā ‘‘tattha katamaṃ nibbedhabhāgiyaṃ sutta’’ntiādi vuttaṃ. Tattha tesu soḷasasu saṃkilesabhāgiyādīsu suttesu katamaṃ suttaṃ nibbedhabhāgiyaṃ suttaṃ nāmāti pucchati.

    উদ্ধং ব্রহ্মলোকে অধো কামাৰচরে ভৰে সব্বধি সব্বেসু ভৰেসু ৰিপ্পমুত্তো অরহা ‘‘অযং নাম ধম্মো অহং অস্মী’’তি অনানুপস্সী, এৰং ৰিমুত্তো অরহা অতিণ্ণপুব্বং ওঘং অপুনব্ভৰায উদতারি উত্তিণ্ণোতি যোজনা। ইদং সুত্তং নিব্বেধভাগে সেক্খধম্মে ৰিসযে ৰাচকঞাপকভাৰেন পৰত্তনতো নিব্বেধভাগিযং সুত্তং নাম।

    Uddhaṃ brahmaloke adho kāmāvacare bhave sabbadhi sabbesu bhavesu vippamutto arahā ‘‘ayaṃ nāma dhammo ahaṃ asmī’’ti anānupassī, evaṃ vimutto arahā atiṇṇapubbaṃ oghaṃ apunabbhavāya udatāri uttiṇṇoti yojanā. Idaṃ suttaṃ nibbedhabhāge sekkhadhamme visaye vācakañāpakabhāvena pavattanato nibbedhabhāgiyaṃ suttaṃ nāma.

    ‘‘এত্তকমেৰা’’তি ৰত্তব্বত্তা ‘‘সীলৰতো’’তিআদি ৰুত্তং। আনন্দ, সীলৰতো পুগ্গলস্স ‘‘কিন্তি মে মম অৰিপ্পটিসারো জাযেয্য পৰত্তেয্যা’’তি চেতনা ন করণীযা ন কাতব্বা। আনন্দ, সীলৰতো অৰিপ্পটিসারো যং জাযেয্য পৰত্তেয্য, এসা অৰিপ্পটিসারস্স জাযনা পৰত্তনা ধম্মতা ভৰতি। আনন্দ, অৰিপ্পটিসারিনা পুগ্গলেন ‘‘কিন্তি মে মম পামোজ্জং জাযেয্য পৰত্তেয্যা’’তি চেতনা ন করণীযা, আনন্দ, অৰিপ্পটিসারিনো পুগ্গলস্স পামোজ্জং যং জাযেয্য পৰত্তেয্য, এসা পামোজ্জস্স জাযনা পৰত্তনা ধম্মতা। সেসেসুপি ইমস্স যোজনানযানুসারেন যোজনানযো গহেতব্বো। ইদং সুত্তম্পি নিব্বেধভাগিযং সুত্তং নাম।

    ‘‘Ettakamevā’’ti vattabbattā ‘‘sīlavato’’tiādi vuttaṃ. Ānanda, sīlavato puggalassa ‘‘kinti me mama avippaṭisāro jāyeyya pavatteyyā’’ti cetanā na karaṇīyā na kātabbā. Ānanda, sīlavato avippaṭisāro yaṃ jāyeyya pavatteyya, esā avippaṭisārassa jāyanā pavattanā dhammatā bhavati. Ānanda, avippaṭisārinā puggalena ‘‘kinti me mama pāmojjaṃ jāyeyya pavatteyyā’’ti cetanā na karaṇīyā, ānanda, avippaṭisārino puggalassa pāmojjaṃ yaṃ jāyeyya pavatteyya, esā pāmojjassa jāyanā pavattanā dhammatā. Sesesupi imassa yojanānayānusārena yojanānayo gahetabbo. Idaṃ suttampi nibbedhabhāgiyaṃ suttaṃ nāma.

    আতাপিনো কিলেসানং আতাপেন সম্মপ্পধানেন সমন্নাগতস্স ঝাযতো ঝাযন্তস্স ব্রাহ্মণস্স বাহিতপাপস্স খীণাসৰস্স ধম্মা অনুলোমপচ্চযাকারপটিৰেধসাধকা বোধিপক্খিযধম্মা যদা যস্মিং কালে হৰে একন্তেন পাতুভৰন্তি উপ্পজ্জন্তি। অথ ৰা ধম্মা চতুঅরিযসচ্চধম্মা পাতুভৰন্তি পকাসযন্তি অভিসমযৰসেন পাকটা হোন্তি। অথ ৰা পাতুভৰনকালে অস্স আতাপিনো ঝাযতো ব্রাহ্মণস্স খীণাসৰস্স সব্বা কঙ্খা ৰপযন্তি অপগচ্ছন্তি নিরুজ্ঝন্তি। কস্মা? সহেতুধম্মং অৰিজ্জাদিকেন হেতুনা সহ পৰত্তং সঙ্খারাদিকং সুখেন অসম্মিস্সং দুক্খক্খন্ধধম্মং যতো যস্মা পজানাতি অঞ্ঞাসি পটিৰিজ্ঝতি , ততো তস্মা ৰপযন্তি অপগচ্ছন্তি নিরুজ্ঝন্তীতি যোজনা। ইদং সুত্তং নিব্বেধভাগিযং সুত্তং নাম।

    Ātāpino kilesānaṃ ātāpena sammappadhānena samannāgatassa jhāyato jhāyantassa brāhmaṇassa bāhitapāpassa khīṇāsavassa dhammā anulomapaccayākārapaṭivedhasādhakā bodhipakkhiyadhammā yadā yasmiṃ kāle have ekantena pātubhavanti uppajjanti. Atha vā dhammā catuariyasaccadhammā pātubhavanti pakāsayanti abhisamayavasena pākaṭā honti. Atha vā pātubhavanakāle assa ātāpino jhāyato brāhmaṇassa khīṇāsavassa sabbā kaṅkhā vapayanti apagacchanti nirujjhanti. Kasmā? Sahetudhammaṃ avijjādikena hetunā saha pavattaṃ saṅkhārādikaṃ sukhena asammissaṃ dukkhakkhandhadhammaṃ yato yasmā pajānāti aññāsi paṭivijjhati , tato tasmā vapayanti apagacchanti nirujjhantīti yojanā. Idaṃ suttaṃ nibbedhabhāgiyaṃ suttaṃ nāma.

    দুতিযগাথাযং পন পচ্চযানং খযং খযসঙ্খাতং নিব্বানং যতো যস্মা অৰেদি অঞ্ঞাসি পটিৰিজ্ঝি, ততো তস্মা সব্বাপি কঙ্খা ৰপযন্তীতি যোজনা। ইদং সুত্তং নিব্বেধভাগিযং সুত্তং।

    Dutiyagāthāyaṃ pana paccayānaṃ khayaṃ khayasaṅkhātaṃ nibbānaṃ yato yasmā avedi aññāsi paṭivijjhi, tato tasmā sabbāpi kaṅkhā vapayantīti yojanā. Idaṃ suttaṃ nibbedhabhāgiyaṃ suttaṃ.

    তিস্স, ত্ৰং কিং নু কুজ্ঝসি? মা কুজ্ঝি, তিস্স, তে তৰ অক্কোধো অকুজ্ঝনং ৰরং উত্তমং, হি সচ্চং, তিস্স, তযা কোধমানমক্খৰিনযত্থং ব্রহ্মচরিযং ৰুস্সতি নূতি ভগৰা অৰোচাতি যোজনা।

    Tissa, tvaṃ kiṃ nu kujjhasi? Mā kujjhi, tissa, te tava akkodho akujjhanaṃ varaṃ uttamaṃ, hi saccaṃ, tissa, tayā kodhamānamakkhavinayatthaṃ brahmacariyaṃ vussati nūti bhagavā avocāti yojanā.

    আরঞ্ঞং আরঞ্ঞকং পংসুকূলিকং অঞ্ঞাতুঞ্ছেন অঞ্ঞাতঅনভিলক্খিতঘরপটিপাটিযা ঠত্ৰা উঞ্ছেন পিণ্ডপাতচরণৰীরিযেন লদ্ধেন মিস্সকভোজনেন যাপেন্তং নন্দং কদা কালে অহং পস্সেয্যন্তি অৰোচাতি যোজনা। ইদং সুত্তং নিব্বেধভাগিযং সুত্তং।

    Āraññaṃ āraññakaṃ paṃsukūlikaṃ aññātuñchena aññātaanabhilakkhitagharapaṭipāṭiyā ṭhatvā uñchena piṇḍapātacaraṇavīriyena laddhena missakabhojanena yāpentaṃ nandaṃ kadā kāle ahaṃ passeyyanti avocāti yojanā. Idaṃ suttaṃ nibbedhabhāgiyaṃ suttaṃ.

    গোতম , কিংসু কতমং ছেত্ৰা ৰধিত্ৰা ৰধন্তো কোধপরিল়াহেন অপরিদয্হমানো হুত্ৰা সুখং সেতি সযতি, কিংসু কতমং ছেত্ৰা ৰধিত্ৰা ৰধন্তো কোধৰিনাসেন ৰিনট্ঠদোমনস্সো হুত্ৰা ন সোচতি, গোতম, ত্ৰং কিস্স একধম্মস্স ৰধং ৰধনং রোচেসীতি ব্রাহ্মণো পুচ্ছতি।

    Gotama , kiṃsu katamaṃ chetvā vadhitvā vadhanto kodhapariḷāhena aparidayhamāno hutvā sukhaṃ seti sayati, kiṃsu katamaṃ chetvā vadhitvā vadhanto kodhavināsena vinaṭṭhadomanasso hutvā na socati, gotama, tvaṃ kissa ekadhammassa vadhaṃ vadhanaṃ rocesīti brāhmaṇo pucchati.

    ব্রাহ্মণ, কোধং কুজ্ঝনং ছেত্ৰা ৰধিত্ৰা ৰধন্তো কোধপরিল়াহেন অপরিদয্হমানো হুত্ৰা সুখং সেতি সযতি, কোধং কুজ্ঝনং ছেত্ৰা ৰধিত্ৰা ৰধন্তো কোধৰিনাসেন ৰিনট্ঠদোমনস্সো হুত্ৰা ন সোচতি, ৰিসমূলস্স ৰিসসদিসস্স দুক্খস্স মূলভূতস্স মধুরগ্গস্স মধুরসঙ্খাতস্স সুখপরিযোসানস্স কোধস্স কুজ্ঝনস্স ৰধং ৰধনং অরিযা বুদ্ধাদযো পুগ্গলা পসংসন্তি। হি সচ্চং তং কোধং কুজ্ঝনং ছেত্ৰা ৰধিত্ৰা ৰধন্তো কোধৰিনাসেন ৰিনট্ঠদোমনস্সো হুত্ৰা সেতি সযতীতি যোজনা। মধুরগ্গস্সাতি চ মধুরং চেতসিকসুখং অস্সাদঅগ্গং পরিযোসানং অস্স কোধস্সাতি মধুরগ্গোতি সমাসো ৰেদিতব্বো। কুজ্ঝন্তস্স হি অক্কোসিত্ৰা পরিভাসিত্ৰা পহরিত্ৰা পরিযোসানে চেতসিকসুখস্সাদো উপ্পজ্জতীতি। ইদং সুত্তং নিব্বেধভাগিযং সুত্তং।

    Brāhmaṇa, kodhaṃ kujjhanaṃ chetvā vadhitvā vadhanto kodhapariḷāhena aparidayhamāno hutvā sukhaṃ seti sayati, kodhaṃ kujjhanaṃ chetvā vadhitvā vadhanto kodhavināsena vinaṭṭhadomanasso hutvā na socati, visamūlassa visasadisassa dukkhassa mūlabhūtassa madhuraggassa madhurasaṅkhātassa sukhapariyosānassa kodhassa kujjhanassa vadhaṃ vadhanaṃ ariyā buddhādayo puggalā pasaṃsanti. Hi saccaṃ taṃ kodhaṃ kujjhanaṃ chetvā vadhitvā vadhanto kodhavināsena vinaṭṭhadomanasso hutvā seti sayatīti yojanā. Madhuraggassāti ca madhuraṃ cetasikasukhaṃ assādaaggaṃ pariyosānaṃ assa kodhassāti madhuraggoti samāso veditabbo. Kujjhantassa hi akkositvā paribhāsitvā paharitvā pariyosāne cetasikasukhassādo uppajjatīti. Idaṃ suttaṃ nibbedhabhāgiyaṃ suttaṃ.

    গোতম, হনন্তো ধীরো উপ্পতিতং কিংসু কতমং হনে হনেয্য। ৰিনোদেন্তো ধীরো জাতং কিংসু কতমং ৰিনোদযে ৰিনোদযেয্য। পজহন্তো ধীরো কিং চ কতমং পজহে পজহেয্য। ধীরস্স কিস্স ধম্মস্স অভিসমযো সুখোতি দেৰতা পুচ্ছতি।

    Gotama, hananto dhīro uppatitaṃ kiṃsu katamaṃ hane haneyya. Vinodento dhīro jātaṃ kiṃsu katamaṃ vinodaye vinodayeyya. Pajahanto dhīro kiṃ ca katamaṃ pajahe pajaheyya. Dhīrassa kissa dhammassa abhisamayo sukhoti devatā pucchati.

    দেৰপুত্ত, হনন্তো ধীরো উপ্পতিতং কোধং কুজ্ঝনং হনে হনেয্য। ৰিনোদেন্তো ধীরো জাতং রাগং ৰিনোদযে ৰিনোদযেয্য। পজহন্তো ধীরো অৰিজ্জং পজহে পজহেয্য। সচ্চধম্মস্স অভিসমযো সুখোতি ভগৰা অৰোচাতি যোজনা। ইদং সুত্তং নিব্বেধভাগিযং সুত্তং।

    Devaputta, hananto dhīro uppatitaṃ kodhaṃ kujjhanaṃ hane haneyya. Vinodento dhīro jātaṃ rāgaṃ vinodaye vinodayeyya. Pajahanto dhīro avijjaṃ pajahe pajaheyya. Saccadhammassa abhisamayo sukhoti bhagavā avocāti yojanā. Idaṃ suttaṃ nibbedhabhāgiyaṃ suttaṃ.

    ১০১. ভগৰা সত্তিযা ওমট্ঠো উপরিতো যাৰ হেট্ঠা ৰিদ্ধো পুরিসো সত্তিপ্পহানায ৰীরিযং আরভতি ৰিয, অগ্গিনা মত্থকে ডয্হমানো আদিত্তসিরো পুরিসো অগ্গিনিব্বাপনত্থায ৰীরিযং আরভতি ইৰ, এৰং কামরাগেন ডয্হমানো ভিক্খু কামরাগপ্পহানায কামরাগৰিক্খম্ভনায অপ্পমত্তো ৰাযমমানো সতো সতিসম্পন্নো হুত্ৰা পরিব্বজে ৰিহরেয্যাতি দেৰতা কথেসি।

    101. Bhagavā sattiyā omaṭṭho uparito yāva heṭṭhā viddho puriso sattippahānāya vīriyaṃ ārabhati viya, agginā matthake ḍayhamāno ādittasiro puriso agginibbāpanatthāya vīriyaṃ ārabhati iva, evaṃ kāmarāgena ḍayhamāno bhikkhu kāmarāgappahānāya kāmarāgavikkhambhanāya appamatto vāyamamāno sato satisampanno hutvā paribbaje vihareyyāti devatā kathesi.

    ভগৰা পন ‘‘সমুচ্ছেদপ্পহানায ৰীরিযং আরভীযতী’’তি দস্সেতুং ‘‘সত্তিযা ৰিয ওমট্ঠো’’তিআদিমাহ। দেৰপুত্ত, সত্তিযা ওমট্ঠো পুরিসো সত্তিপ্পহানায ৰীরিযং আরভতি ৰিয, অগ্গিনা মত্থকে ডয্হমানো আদিত্তসিরো পুরিসো অগ্গিনিব্বাপনত্থায ৰীরিযং আরভতি ইৰ, এৰং সক্কাযদিট্ঠিযা অভিভূতো ভিক্খু সক্কাযদিট্ঠিযা পহানায মগ্গেন সমুচ্ছেদপ্পহানায অপ্পমত্তো ৰাযমমানো সতো সতিসম্পন্নো হুত্ৰা পরিব্বজে ৰিহরেয্যাতি ভগৰা অৰোচাতি যোজনা। ইদং সুত্তং নিব্বেধভাগিযং সুত্তং নাম।

    Bhagavā pana ‘‘samucchedappahānāya vīriyaṃ ārabhīyatī’’ti dassetuṃ ‘‘sattiyā viya omaṭṭho’’tiādimāha. Devaputta, sattiyā omaṭṭho puriso sattippahānāya vīriyaṃ ārabhati viya, agginā matthake ḍayhamāno ādittasiro puriso agginibbāpanatthāya vīriyaṃ ārabhati iva, evaṃ sakkāyadiṭṭhiyā abhibhūto bhikkhu sakkāyadiṭṭhiyā pahānāya maggena samucchedappahānāya appamatto vāyamamāno sato satisampanno hutvā paribbaje vihareyyāti bhagavā avocāti yojanā. Idaṃ suttaṃ nibbedhabhāgiyaṃ suttaṃ nāma.

    সব্বে নিচযা ভোগা খযন্তা খযপরিযোসানা ভৰন্তি, সব্বে সমুস্সযা ধম্মা পতনন্তা পতনপরিযোসানা ভৰন্তি, সব্বেসং সত্তানং মরণমাগম্ম সব্বেসং সত্তানং জীৰিতং অদ্ধুৰং ভৰতি, ইতি এতং ৰুত্তপ্পকারং ভযং ভযহেতুং মরণং সম্মুতিমরণং অপেক্খমানো পণ্ডিতো সুখাৰহানি দিট্ঠধম্মিকসম্পরাযিকসুখাৰহানি পুঞ্ঞানি দানসীলভাৰনামযপুঞ্ঞানি কযিরাথাতি দেৰতা অৰোচ।

    Sabbe nicayā bhogā khayantā khayapariyosānā bhavanti, sabbe samussayā dhammā patanantā patanapariyosānā bhavanti, sabbesaṃ sattānaṃ maraṇamāgamma sabbesaṃ sattānaṃ jīvitaṃ addhuvaṃ bhavati, iti etaṃ vuttappakāraṃ bhayaṃ bhayahetuṃ maraṇaṃ sammutimaraṇaṃ apekkhamāno paṇḍito sukhāvahāni diṭṭhadhammikasamparāyikasukhāvahāni puññāni dānasīlabhāvanāmayapuññāni kayirāthāti devatā avoca.

    দেৰপুত্ত, সব্বে নিচযা ভোগা খযন্তা খযপরিযোসানা, সব্বে সমুস্সযা ধম্মা পতনন্তা পতনপরিযোসানা, সব্বেসং সত্তানং মরণমাগম্ম সব্বেসং সত্তানং জীৰিতং অদ্ধুৰং, ইতি এতং ৰুত্তপ্পকারং ভযং ভযহেতুং মরণং অপেক্খমানো সন্তিপেক্খো সব্বসঙ্খারুপসমং নিব্বানং অপেক্খমানো পণ্ডিতো লোকামিসং কামগুণং পজহে পজহেয্যাতি ভগৰা অৰোচাতি যোজনা। ইদং সুত্তং নিব্বেধভাগিযং সুত্তং নাম।

    Devaputta, sabbe nicayā bhogā khayantā khayapariyosānā, sabbe samussayā dhammā patanantā patanapariyosānā, sabbesaṃ sattānaṃ maraṇamāgamma sabbesaṃ sattānaṃ jīvitaṃ addhuvaṃ, iti etaṃ vuttappakāraṃ bhayaṃ bhayahetuṃ maraṇaṃ apekkhamāno santipekkho sabbasaṅkhārupasamaṃ nibbānaṃ apekkhamāno paṇḍito lokāmisaṃ kāmaguṇaṃ pajahe pajaheyyāti bhagavā avocāti yojanā. Idaṃ suttaṃ nibbedhabhāgiyaṃ suttaṃ nāma.

    মাৰিধ যেসং মুনীনং চিত্তং ঝানরতং ঝানে রতং হোতি, তে মুনযো সুখং সযন্তি ন সোচন্তি। পঞ্ঞৰা মগ্গপঞ্ঞৰা সুসমাহিতো আরদ্ধৰীরিযো পহিতত্তো নিব্বানং পেসিতচিত্তো পুগ্গলো দুত্তরং ওঘং সংসারোঘং তরতি।

    Māvidha yesaṃ munīnaṃ cittaṃ jhānarataṃ jhāne rataṃ hoti, te munayo sukhaṃ sayanti na socanti. Paññavā maggapaññavā susamāhito āraddhavīriyo pahitatto nibbānaṃ pesitacitto puggalo duttaraṃ oghaṃ saṃsāroghaṃ tarati.

    কামসঞ্ঞায ৰিরতো ৰিগতচিত্তো যো খীণাসৰো সব্বসংযোজনাতীতো অরহত্তমগ্গেন সব্বে সংযোজনে অতীতো নন্দিভৰপরিক্খীণো অহোসি, সো খীণাসৰো গম্ভীরে সংসারণ্ণৰে ন সীদতীতি যোজনা। নন্দিসঙ্খাতা তণ্হা চ কামভৰরূপভৰঅরূপভৰা চ নন্দিভৰা, নন্দিভৰা পরিক্খীণা যস্স খীণাসৰস্সাতি নন্দিভৰপরিক্খীণোতি সমাসো ৰেদিতব্বো। ইদং সুত্তং নিব্বেধভাগিযং সুত্তং নাম।

    Kāmasaññāya virato vigatacitto yo khīṇāsavo sabbasaṃyojanātīto arahattamaggena sabbe saṃyojane atīto nandibhavaparikkhīṇo ahosi, so khīṇāsavo gambhīre saṃsāraṇṇave na sīdatīti yojanā. Nandisaṅkhātā taṇhā ca kāmabhavarūpabhavaarūpabhavā ca nandibhavā, nandibhavā parikkhīṇā yassa khīṇāsavassāti nandibhavaparikkhīṇoti samāso veditabbo. Idaṃ suttaṃ nibbedhabhāgiyaṃ suttaṃ nāma.

    অরহতং অরহন্তানং বুদ্ধপচ্চেকবুদ্ধসাৰকানং ধম্মং সুচরিতাদিভেদঞ্চ সত্ততিংসবোধিপক্খিযভেদঞ্চ ধম্মং যো পণ্ডিতো সদ্দহানো সদ্দহন্তো হুত্ৰা নিব্বানপ্পত্তিযা অপ্পমত্তো ৰিচক্খণো হুত্ৰা সুস্সূসং সুস্সূসন্তো ভৰে, সো পণ্ডিতো পঞ্ঞং লোকিযলোকুত্তরপঞ্ঞং লভতে লভতি।

    Arahataṃ arahantānaṃ buddhapaccekabuddhasāvakānaṃ dhammaṃ sucaritādibhedañca sattatiṃsabodhipakkhiyabhedañca dhammaṃ yo paṇḍito saddahāno saddahanto hutvā nibbānappattiyā appamatto vicakkhaṇo hutvā sussūsaṃ sussūsanto bhave, so paṇḍito paññaṃ lokiyalokuttarapaññaṃ labhate labhati.

    যো ৰীরিযৰা পুগ্গলো পতিরূপদেসকারী দেসকালাদীনি অহাপেত্ৰা লোকিযলোকুত্তরধম্মপতিরূপং অধিগমূপাযং করোতি, ধুরৰা চেতসিকৰীরিযেন অনিক্খিত্তধুরো উট্ঠাতা কাযিকৰীরিযৰসেন উট্ঠানসম্পন্নো হোতি, সো ৰীরিযৰা পুগ্গলো ধনং লোকিযলোকুত্তরধনং ৰিন্দতে অধিগচ্ছতি। সচ্চেন ৰচীসচ্চেন চ পরমত্থসচ্চেন চ বুদ্ধাদিকো সচ্চধম্মে ঠিতো সপ্পুরিসো কিত্তিং পপ্পোতি। দদং দদন্তো যং কিঞ্চি ইচ্ছিতং পত্থিতং চতুসঙ্গহৰত্থুং দদন্তো সঙ্গহন্তো সপ্পুরিসো মিত্তানি একন্তমিত্তানি গন্থতি সম্পাদেতি, এৰং চতূহি সচ্চধম্মধিতিচাগেহি সমন্নাগতো সো সপ্পুরিসো অস্মা লোকা পরং লোকং পেচ্চ গন্ত্ৰা একন্তেন সোককারণস্স অভাৰতো ন সোচতীতি যোজনা।

    Yo vīriyavā puggalo patirūpadesakārī desakālādīni ahāpetvā lokiyalokuttaradhammapatirūpaṃ adhigamūpāyaṃ karoti, dhuravā cetasikavīriyena anikkhittadhuro uṭṭhātā kāyikavīriyavasena uṭṭhānasampanno hoti, so vīriyavā puggalo dhanaṃ lokiyalokuttaradhanaṃ vindate adhigacchati. Saccena vacīsaccena ca paramatthasaccena ca buddhādiko saccadhamme ṭhito sappuriso kittiṃ pappoti. Dadaṃ dadanto yaṃ kiñci icchitaṃ patthitaṃ catusaṅgahavatthuṃ dadanto saṅgahanto sappuriso mittāni ekantamittāni ganthati sampādeti, evaṃ catūhi saccadhammadhiticāgehi samannāgato so sappuriso asmā lokā paraṃ lokaṃ pecca gantvā ekantena sokakāraṇassa abhāvato na socatīti yojanā.

    গোতম, সব্বগন্থপ্পহীনো তীহি ভৰেহি ৰিপ্পমুত্তো সতো সতিসম্পন্নো ত্ৰং, সমণো, অঞ্ঞং দেৰমনুস্সাদিকং যং অনুসাসসি যং অনুসাসনং করোসি, তং অনুসাসনং সব্বগন্থপ্পহীনস্স তীহি ভৰেহি ৰিপ্পমুত্তস্স সমণস্স তে তৰ ন সাধূতি সক্কনামকো মারপক্খিকো যক্খো গাথায অজ্ঝভাসি।

    Gotama, sabbaganthappahīno tīhi bhavehi vippamutto sato satisampanno tvaṃ, samaṇo, aññaṃ devamanussādikaṃ yaṃ anusāsasi yaṃ anusāsanaṃ karosi, taṃ anusāsanaṃ sabbaganthappahīnassa tīhi bhavehi vippamuttassa samaṇassa te tava na sādhūti sakkanāmako mārapakkhiko yakkho gāthāya ajjhabhāsi.

    ‘‘সক্ক সক্কনামক যক্খ অনুকম্পিতেন পুরিসেন সদ্ধিং যেন কেনচি ৰণ্ণেন কারণেন সংৰাসো একস্মিং ঠানে সহৰাসো জাযতি, তং অনুকম্পিতব্বং সহৰাসগতং পুরিসং সপ্পঞ্ঞো মনসা অনুকম্পিতুং ন অরহতি অনুকম্পিতুংযেৰ অরহতি। যা অনুকম্পা করুণা, যা অনুদ্দযা মেত্তা, মুদিতা চ উপ্পন্না, তায অনুকম্পায করুণায, তায অনুদ্দযায মেত্তায মুদিতায চ সমুস্সাহিতেন পসন্নেন মনসা যো সপ্পঞ্ঞো সপ্পুরিসো অঞ্ঞং দেৰমনুস্সাদিকং যং অনুসাসতি যং অনুসাসনং করোতি, সো সপ্পঞ্ঞো সপ্পুরিসো তেন অনুসাসনেন সংযুত্তো কামচ্ছন্দাদীনং সংযোজনানং ৰসেন অননুলোমসংযোগেন সংযুত্তো ন হোতীতি ভগৰা অৰোচাতি যোজনা।

    ‘‘Sakka sakkanāmaka yakkha anukampitena purisena saddhiṃ yena kenaci vaṇṇena kāraṇena saṃvāso ekasmiṃ ṭhāne sahavāso jāyati, taṃ anukampitabbaṃ sahavāsagataṃ purisaṃ sappañño manasā anukampituṃ na arahati anukampituṃyeva arahati. Yā anukampā karuṇā, yā anuddayā mettā, muditā ca uppannā, tāya anukampāya karuṇāya, tāya anuddayāya mettāya muditāya ca samussāhitena pasannena manasā yo sappañño sappuriso aññaṃ devamanussādikaṃ yaṃ anusāsati yaṃ anusāsanaṃ karoti, so sappañño sappuriso tena anusāsanena saṃyutto kāmacchandādīnaṃ saṃyojanānaṃ vasena ananulomasaṃyogena saṃyutto na hotīti bhagavā avocāti yojanā.

    ১০২. সমণ , রাগো চ দোসো চ ইমে দ্ৰে ধম্মা কুতোনিদানা, কিংনিদানা, কিংপচ্চযা ভৰন্তি, অরতি চ রতি চ লোমহংসো চ ইমে তযো কুতোজা কুতো ভৰন্তি? কুমারকা ধঙ্কং কাকং গহেত্ৰা পাদে দীঘসুত্তকেন বন্ধিত্ৰা সুত্তকোটিং অঙ্গুলিযং ৰেঠেত্ৰা ওসজন্তি ইৰ, এৰং মনোৰিতক্কা কুতো সমুট্ঠায চিত্তং ওসজন্তীতি সূচিলোমযক্খো ভগৰন্তং পুচ্ছি।

    102. Samaṇa , rāgo ca doso ca ime dve dhammā kutonidānā, kiṃnidānā, kiṃpaccayā bhavanti, arati ca rati ca lomahaṃso ca ime tayo kutojā kuto bhavanti? Kumārakā dhaṅkaṃ kākaṃ gahetvā pāde dīghasuttakena bandhitvā suttakoṭiṃ aṅguliyaṃ veṭhetvā osajanti iva, evaṃ manovitakkā kuto samuṭṭhāya cittaṃ osajantīti sūcilomayakkho bhagavantaṃ pucchi.

    রাগো চ দোসো চ ইমে দ্ৰে ধম্মা ইতোনিদানা ইতো অত্তভাৰতো নিদানা জাযন্তি; অরতি চ রতি চ লোমহংসো চ ইমে তযো ইতোজা ইতো অত্ততো ভৰন্তি; কুমারকা ধঙ্কং কাকং গহেত্ৰা পাদে দীঘসুত্তকেন বন্ধিত্ৰা সুত্তকোটিং অঙ্গুলিযং ৰেঠেত্ৰা ওসজন্তি ইৰ, এৰং মনোৰিতক্কা ইতো অত্তভাৰতো সমুট্ঠায চিত্তং ওসজন্তি।

    Rāgo ca doso ca ime dve dhammā itonidānā ito attabhāvato nidānā jāyanti; arati ca rati ca lomahaṃso ca ime tayo itojā ito attato bhavanti; kumārakā dhaṅkaṃ kākaṃ gahetvā pāde dīghasuttakena bandhitvā suttakoṭiṃ aṅguliyaṃ veṭhetvā osajanti iva, evaṃ manovitakkā ito attabhāvato samuṭṭhāya cittaṃ osajanti.

    নিগ্রোধস্স খন্ধজা পারোহা সাখাসু জাযন্তি ইৰ, ৰনে রুক্খং নিস্সায জাতা মালুৰা লতা তং রুক্খং অজ্ঝোত্থরিত্ৰা ৰিততা ওততৰিততা তিট্ঠতি ইৰ, এৰং, যক্খ, ত্ৰং সুণোহি স্নেহজা তণ্হাস্নেহতো জাতা অত্তসম্ভূতা অত্তনি সম্ভূতা পুন অনেকপ্পকারা মনোৰিতক্কা পাপমনোৰিতক্কা চেৰ তংসম্পযুত্তকিলেসা চ কামেসু ৰত্থুকামেসু ৰিসত্তা লগ্গা সংসিব্বিতা ঠিতা।

    Nigrodhassa khandhajā pārohā sākhāsu jāyanti iva, vane rukkhaṃ nissāya jātā māluvā latā taṃ rukkhaṃ ajjhottharitvā vitatā otatavitatā tiṭṭhati iva, evaṃ, yakkha, tvaṃ suṇohi snehajā taṇhāsnehato jātā attasambhūtā attani sambhūtā puna anekappakārā manovitakkā pāpamanovitakkā ceva taṃsampayuttakilesā ca kāmesu vatthukāmesu visattā laggā saṃsibbitā ṭhitā.

    যে পণ্ডিতা ‘‘যং নিদানং অস্স অত্তভাৰস্সা’’তি যতোনিদানং নং কিলেসগহনং সমুদযসচ্চং পজানন্তি, তে পণ্ডিতা অত্তভাৰসঙ্খাতস্স দুক্খসচ্চস্স নিদানভূতং নং কিলেসগহনং সমুদযসচ্চং মগ্গসচ্চেন ৰিনোদেন্তি। অপুনব্ভৰায অপুনভৰসঙ্খাতায নিরোধসচ্চত্থায অতিণ্ণপুব্বং অনমতগ্গে সংসারে সুপিনেনাপি অতিণ্ণপুব্বং দুত্তরং ইমং ওঘং চতুব্বিধং সংকিলেসোঘং তরন্তীতি ভগৰা অৰোচাতি যোজনা।

    Ye paṇḍitā ‘‘yaṃ nidānaṃ assa attabhāvassā’’ti yatonidānaṃ naṃ kilesagahanaṃ samudayasaccaṃ pajānanti, te paṇḍitā attabhāvasaṅkhātassa dukkhasaccassa nidānabhūtaṃ naṃ kilesagahanaṃ samudayasaccaṃ maggasaccena vinodenti. Apunabbhavāya apunabhavasaṅkhātāya nirodhasaccatthāya atiṇṇapubbaṃ anamatagge saṃsāre supinenāpi atiṇṇapubbaṃ duttaraṃ imaṃ oghaṃ catubbidhaṃ saṃkilesoghaṃ tarantīti bhagavā avocāti yojanā.

    ‘‘ভগৰা, সমণধম্মস্স করণং নাম দুক্করং, ভগৰা, সমণধম্মস্স করণং নাম সুদুক্করং সুট্ঠুতরং দুক্কর’’ন্তি একো কুলপুত্তো পব্বজিত্ৰা সমণধম্মং কত্ৰা অরিযভূমিং অপ্পত্ৰা কালং কত্ৰা দেৰলোকে নিব্বত্তো, সো দেৰপুত্তো ভগৰন্তং উপসঙ্কমিত্ৰা আহ। কামদ, সীলসমাহিতা ঠিতত্তা ঠিতসভাৰা সত্ত সেক্খা পুগ্গলা দুক্করং ৰাপি সমণধম্মং করোন্তি। অনগারিযুপেতস্স অনগারিযং নিগ্গেহভাৰং উপগতস্স পব্বজিতস্স তুট্ঠি চতুপচ্চযসন্তোসো সুখাৰহা হোতী’’তি ভগৰা অৰোচ।

    ‘‘Bhagavā, samaṇadhammassa karaṇaṃ nāma dukkaraṃ, bhagavā, samaṇadhammassa karaṇaṃ nāma sudukkaraṃ suṭṭhutaraṃ dukkara’’nti eko kulaputto pabbajitvā samaṇadhammaṃ katvā ariyabhūmiṃ appatvā kālaṃ katvā devaloke nibbatto, so devaputto bhagavantaṃ upasaṅkamitvā āha. Kāmada, sīlasamāhitā ṭhitattā ṭhitasabhāvā satta sekkhā puggalā dukkaraṃ vāpi samaṇadhammaṃ karonti. Anagāriyupetassa anagāriyaṃ niggehabhāvaṃ upagatassa pabbajitassa tuṭṭhi catupaccayasantoso sukhāvahā hotī’’ti bhagavā avoca.

    ‘‘ভগৰা, যদিদং যা এসা তুট্ঠি সুখাৰহা, এসা তুট্ঠি দুল্লভা’’তি সো দেৰপুত্তো আহ। ‘‘কামদ, যেসং সেক্খানং মনো দিৰা চ রত্তো চ ভাৰনায রতো চিত্তৰূপসমে রতো, তে সেক্খা দুল্লভং ৰাপি তুস্সনং লভন্তী’’তি ভগৰা অৰোচ।

    ‘‘Bhagavā, yadidaṃ yā esā tuṭṭhi sukhāvahā, esā tuṭṭhi dullabhā’’ti so devaputto āha. ‘‘Kāmada, yesaṃ sekkhānaṃ mano divā ca ratto ca bhāvanāya rato cittavūpasame rato, te sekkhā dullabhaṃ vāpi tussanaṃ labhantī’’ti bhagavā avoca.

    ‘‘ভগৰা, যদিদং যং ইদং চিত্তং ভাৰনায রতং, তং চিত্তং দুস্সমাদহ’’ন্তি সো দেৰপুত্তো আহ। ‘‘কামদ, যে অরিযা ইন্দ্রিযূপসমে রত্তিন্দিৰং রতা, তে অরিযা দুস্সমাদহং ৰাপি চিত্তং সমাদহন্তি, কামদ, তে অরিযা মচ্চুনো জালং কিলেসজালং ছেত্ৰা মগ্গং গচ্ছন্তী’’তি ভগৰা অৰোচ।

    ‘‘Bhagavā, yadidaṃ yaṃ idaṃ cittaṃ bhāvanāya rataṃ, taṃ cittaṃ dussamādaha’’nti so devaputto āha. ‘‘Kāmada, ye ariyā indriyūpasame rattindivaṃ ratā, te ariyā dussamādahaṃ vāpi cittaṃ samādahanti, kāmada, te ariyā maccuno jālaṃ kilesajālaṃ chetvā maggaṃ gacchantī’’ti bhagavā avoca.

    ‘‘ভগৰা, যো মগ্গো পুব্বভাগপটিপদাৰসেন ৰিসমো, সো মগ্গো দুগ্গমো’’তি সো দেৰপুত্তো আহ। ‘‘কামদ, অরিযা দুগ্গমে ৰিসমে ৰাপি মগ্গং গচ্ছন্তি, অনরিযা ৰিসমে মগ্গে অৰংসিরা পপতন্তি, অরিযানং সো মগ্গো সমোৰ ভৰে, ন অসমো। হি সচ্চং ৰিসমে ৰিসত্তকাযে অরিযা সমা ভৰন্তী’’তি ভগৰা অৰোচাতি যোজনা।

    ‘‘Bhagavā, yo maggo pubbabhāgapaṭipadāvasena visamo, so maggo duggamo’’ti so devaputto āha. ‘‘Kāmada, ariyā duggame visame vāpi maggaṃ gacchanti, anariyā visame magge avaṃsirā papatanti, ariyānaṃ so maggo samova bhave, na asamo. Hi saccaṃ visame visattakāye ariyā samā bhavantī’’ti bhagavā avocāti yojanā.

    ১০৩. যং জেতৰনং ইসিসঙ্ঘনিসেৰিতং ধম্মরাজেন আৰুত্থং, ইদং তং জেতৰনং মম পীতিসঞ্জননং পীতিযা সঞ্জননং করং হি করং এৰ।

    103. Yaṃ jetavanaṃ isisaṅghanisevitaṃ dhammarājena āvutthaṃ, idaṃ taṃ jetavanaṃ mama pītisañjananaṃ pītiyā sañjananaṃ karaṃ hi karaṃ eva.

    কম্মং মগ্গচেতনাকম্মঞ্চ ৰিজ্জা মগ্গপঞ্ঞা চ ধম্মো সমাধি চেৰ সমাধিপক্খিকো চ ধম্মো সীলং, সীলে ঠিতস্স জীৰিতং উত্তমং, এতেন অট্ঠঙ্গিকেন মগ্গেন সত্তা সুজ্ঝন্তি, গোত্তেন ৰা ধনেন ৰা সত্তা ন সুজ্ঝন্তি।

    Kammaṃ maggacetanākammañca vijjā maggapaññā ca dhammo samādhi ceva samādhipakkhiko ca dhammo sīlaṃ, sīle ṭhitassa jīvitaṃ uttamaṃ, etena aṭṭhaṅgikena maggena sattā sujjhanti, gottena vā dhanena vā sattā na sujjhanti.

    তস্মা মগ্গেনেৰ সত্তানং ৰিসুজ্ঝনতো অত্তনো অত্থং সম্পস্সং পস্সন্তো পণ্ডিতো পোসো যোনিসো উপাযেন ধম্মং বোধিপক্খিযধম্মং ৰিচিনে ৰিচিনেয্য, এৰং ৰিচিননে সতি তত্থ অরিযমগ্গে ৰিচিনন্তো পুগ্গলো সুজ্ঝতি।

    Tasmā maggeneva sattānaṃ visujjhanato attano atthaṃ sampassaṃ passanto paṇḍito poso yoniso upāyena dhammaṃ bodhipakkhiyadhammaṃ vicine vicineyya, evaṃ vicinane sati tattha ariyamagge vicinanto puggalo sujjhati.

    সারিপুত্তো সীলেন চ উপসমেন চ পারঙ্গতো ইৰ, এৰং যোপি ভিক্খু সীলেন চ উপসমেন চ পারঙ্গতো, সো ভিক্খু এতাৰ পরমো সারিপুত্তসদিসোৰ সিযাতি অনাথপিণ্ডিকনামো দেৰপুত্তো ভগৰন্তং উপসঙ্কমিত্ৰা আহাতি যোজনা। ইদং সুত্তং নিব্বেধভাগিযং সুত্তং নাম।

    Sāriputto sīlena ca upasamena ca pāraṅgato iva, evaṃ yopi bhikkhu sīlena ca upasamena ca pāraṅgato, so bhikkhu etāva paramo sāriputtasadisova siyāti anāthapiṇḍikanāmo devaputto bhagavantaṃ upasaṅkamitvā āhāti yojanā. Idaṃ suttaṃ nibbedhabhāgiyaṃ suttaṃ nāma.

    অতীতং অতীতক্খন্ধপঞ্চকং তণ্হাদিট্ঠীহি নান্ৰাগমেয্য, অনাগতং অনাগতক্খন্ধপঞ্চকং তণ্হাদিট্ঠীহি নপ্পটিকঙ্খে ন পত্থেয্য। যং যস্মা অতীতং পহীনং নিরুদ্ধং অত্থঙ্গতং, তস্মা অতীতস্স পহীনত্তা নিরুদ্ধত্তা অত্থঙ্গতত্তা নান্ৰাগমেয্য। যং যস্মা অনাগতং অপ্পত্তং, তস্মা ন পটিকঙ্খে।

    Atītaṃ atītakkhandhapañcakaṃ taṇhādiṭṭhīhi nānvāgameyya, anāgataṃ anāgatakkhandhapañcakaṃ taṇhādiṭṭhīhi nappaṭikaṅkhe na pattheyya. Yaṃ yasmā atītaṃ pahīnaṃ niruddhaṃ atthaṅgataṃ, tasmā atītassa pahīnattā niruddhattā atthaṅgatattā nānvāgameyya. Yaṃ yasmā anāgataṃ appattaṃ, tasmā na paṭikaṅkhe.

    পচ্চুপ্পন্নং খন্ধপঞ্চকং ৰযধম্মং যত্থ যত্থ সন্তানে ৰা, যত্থ যত্থ অরঞ্ঞাদীসু ৰা উপ্পন্নং, তত্থ তত্থ সন্তানে ৰা, তত্থ তত্থ অরঞ্ঞাদীসু ৰা নং পচ্চুপ্পন্নধম্মং যাহি অনিচ্চানুপস্সনাদীহি ৰিপস্সতি, তাহি অনিচ্চানুপস্সনাদীহি নিব্বানং রাগাদীহি অসংহীরং অসংকুপ্পং ভৰতি, তং নিব্বানং ৰিপস্সকো পুগ্গলো ৰিদ্ৰা নিব্বানারম্মণং ফলসমাপত্তিং অপ্পেন্তো হুত্ৰা অনুব্রূহযে ৰড্ঢেয্য।

    Paccuppannaṃ khandhapañcakaṃ vayadhammaṃ yattha yattha santāne vā, yattha yattha araññādīsu vā uppannaṃ, tattha tattha santāne vā, tattha tattha araññādīsu vā naṃ paccuppannadhammaṃ yāhi aniccānupassanādīhi vipassati, tāhi aniccānupassanādīhi nibbānaṃ rāgādīhi asaṃhīraṃ asaṃkuppaṃ bhavati, taṃ nibbānaṃ vipassako puggalo vidvā nibbānārammaṇaṃ phalasamāpattiṃ appento hutvā anubrūhaye vaḍḍheyya.

    আতপ্পং সংকিলেসানং আতপন্তং ৰীরিযং অজ্জেৰ কিচ্চং কাতব্বং, সুৰে জীৰিতং ৰা মরণং ৰা কো জঞ্ঞা জানেয্য, ‘‘সুৰে ৰা দানাদিপুঞ্ঞং জানিস্সামী’’তি চিত্তং অনুপ্পাদেত্ৰা ‘‘অজ্জেৰ করিস্সামী’’তি এৰং ৰীরিযং কাতব্বং। হি সচ্চং মরণকারণভাৰতায অহিৰিচ্ছিকৰিসসত্থাদিঅনেকায সেনায ৰসেন মহাসেনেন তেন মচ্চুনা সদ্ধিং মিত্তসন্থৰাকারেন ৰা লঞ্জদানেন ৰা সঙ্গরং নত্থীতি।

    Ātappaṃ saṃkilesānaṃ ātapantaṃ vīriyaṃ ajjeva kiccaṃ kātabbaṃ, suve jīvitaṃ vā maraṇaṃ vā ko jaññā jāneyya, ‘‘suve vā dānādipuññaṃ jānissāmī’’ti cittaṃ anuppādetvā ‘‘ajjeva karissāmī’’ti evaṃ vīriyaṃ kātabbaṃ. Hi saccaṃ maraṇakāraṇabhāvatāya ahivicchikavisasatthādianekāya senāya vasena mahāsenena tena maccunā saddhiṃ mittasanthavākārena vā lañjadānena vā saṅgaraṃ natthīti.

    এৰং মনসি কত্ৰা ৰিহারিং ৰিহরন্তং আতাপিং অহোরত্তং অতন্দিতং অনলসং উট্ঠাহকং সপ্পুরিসং ‘‘ভদ্দেকরত্তো’’তি সন্তো মুনি ৰে একন্তেন আচিক্খতে আচিক্খতিযেৰাতি যোজনা।

    Evaṃ manasi katvā vihāriṃ viharantaṃ ātāpiṃ ahorattaṃ atanditaṃ analasaṃ uṭṭhāhakaṃ sappurisaṃ ‘‘bhaddekaratto’’ti santo muni ve ekantena ācikkhate ācikkhatiyevāti yojanā.

    ‘‘চত্তারিমানি ভিক্খৰে’’ত্যাদিসুত্তং পাল়িতো চ অট্ঠকথাতো চ পাকটং।

    ‘‘Cattārimāni bhikkhave’’tyādisuttaṃ pāḷito ca aṭṭhakathāto ca pākaṭaṃ.

    ১০৪. নানাৰিধং নিব্বেধভাগিযং সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং অসেক্খভাগিযং সুত্ত’’ন্তি পুচ্ছিতব্বত্তা ‘‘তত্থ কতমং অসেক্খভাগিযং সুত্ত’’ন্তিআদি ৰুত্তং। তত্থাতি তেসু সোল়সসু সংকিলেসভাগিযাদীসু সুত্তেসু কতমং সুত্তং অসেক্খভাগিযং সুত্তং নামাতি পুচ্ছতি।

    104. Nānāvidhaṃ nibbedhabhāgiyaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ asekkhabhāgiyaṃ sutta’’nti pucchitabbattā ‘‘tattha katamaṃ asekkhabhāgiyaṃ sutta’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu katamaṃ suttaṃ asekkhabhāgiyaṃ suttaṃ nāmāti pucchati.

    যস্স উত্তমপুরিসস্স চিত্তং সেলূপমং ঠিতং লোকধম্মৰাতেহি নানুকম্পতি, রজনীযেসু লাভাদীসু ৰিরত্তং ভৰে, সো উত্তমপুরিসো কোপনেয্যে অলাভাদিকে ন কুপ্পতি, তস্স উত্তমপুরিসস্স চিত্তং এৰং অনিচ্চতাদিনা ভাৰিতং, নং ভাৰিতচিত্তং উত্তমপুরিসং ৰীতিক্কন্তলোকধম্মহেতুকং দুক্খং কুতো এস্সতীতি যোজনা। ইদং সুত্তং অসেক্খভাগে ৰিসযে ৰাচকঞাপকভাৰেন পৰত্তনতো অসেক্খভাগিযং সুত্তং নাম। এস নযো ইতো পরেসুপি ৰেদিতব্বো।

    Yassa uttamapurisassa cittaṃ selūpamaṃ ṭhitaṃ lokadhammavātehi nānukampati, rajanīyesu lābhādīsu virattaṃ bhave, so uttamapuriso kopaneyye alābhādike na kuppati, tassa uttamapurisassa cittaṃ evaṃ aniccatādinā bhāvitaṃ, naṃ bhāvitacittaṃ uttamapurisaṃ vītikkantalokadhammahetukaṃ dukkhaṃ kuto essatīti yojanā. Idaṃ suttaṃ asekkhabhāge visaye vācakañāpakabhāvena pavattanato asekkhabhāgiyaṃ suttaṃ nāma. Esa nayo ito paresupi veditabbo.

    ‘‘অসেক্খভাগিযং সুত্তং ইদমেৰা’’তি ৰত্তব্বভাৰতো ‘‘আযস্মতো চা’’তিআদি ৰুত্তং।

    ‘‘Asekkhabhāgiyaṃ suttaṃ idamevā’’ti vattabbabhāvato ‘‘āyasmato cā’’tiādi vuttaṃ.

    যো ব্রাহ্মণো বাহিতপাপধম্মত্তা বাহিতপাপধম্মো ভৰে, সো ব্রাহ্মণো নিগ্গতহুংহুংকত্তা নিহুংহুঙ্কো ভৰে, নিগ্গতকিলেসকসাৰত্তা নিক্কসাৰো ভৰে, সীলসংৰরেন সংযতচিত্ততায যতত্তো ভৰে, যো ব্রাহ্মণো চতুমগ্গঞাণৰেদেহি অন্তং নিব্বানং গতত্তা ৰেদন্তগূ ভৰে, ধম্মেন ৰুসিতব্রহ্মচরিযত্তা ৰুসিতব্রহ্মচরিযো ভৰে। যস্স ব্রাহ্মণস্স কুহিঞ্চি লোকে উস্সদা রাগুস্সদো দোসুস্সদো মোহুস্সদো মানুস্সদো দিট্ঠুস্সদো নত্থি, সো ব্রাহ্মণো ব্রহ্মৰাদং ‘‘অহং ব্রাহ্মণোম্হী’’তি ৰাচং ৰদেয্যাতি ভগৰা অৰোচাতি যোজনা।

    Yo brāhmaṇo bāhitapāpadhammattā bāhitapāpadhammo bhave, so brāhmaṇo niggatahuṃhuṃkattā nihuṃhuṅko bhave, niggatakilesakasāvattā nikkasāvo bhave, sīlasaṃvarena saṃyatacittatāya yatatto bhave, yo brāhmaṇo catumaggañāṇavedehi antaṃ nibbānaṃ gatattā vedantagū bhave, dhammena vusitabrahmacariyattā vusitabrahmacariyo bhave. Yassa brāhmaṇassa kuhiñci loke ussadā rāgussado dosussado mohussado mānussado diṭṭhussado natthi, so brāhmaṇo brahmavādaṃ ‘‘ahaṃ brāhmaṇomhī’’ti vācaṃ vadeyyāti bhagavā avocāti yojanā.

    যে বুদ্ধা পাপকে অকুসলে ধম্মে বাহিত্ৰা সদা চরন্তি সতা সতিসম্পন্না খীণসংযোজনা, তে বুদ্ধা লোকস্মিং ব্রাহ্মণাতি ৰে একন্তেন কথীযন্তীতি অৰোচাতি যোজনা।

    Ye buddhā pāpake akusale dhamme bāhitvā sadā caranti satā satisampannā khīṇasaṃyojanā, te buddhā lokasmiṃ brāhmaṇāti ve ekantena kathīyantīti avocāti yojanā.

    যত্থ নিব্বানে আপো চ পথৰী চ তেজো চ ৰাযো চ ন গাধতি ন পতিট্ঠহতি, তত্থ নিব্বানে সুক্কা গহা চেৰ তারকা চ ন জোতন্তি, তত্থ নিব্বানে আদিচ্চো নপ্পকাসতি, তত্থ নিব্বানে চন্দিমা ন ভাতি, তত্থ নিব্বানে তমো ন ৰিজ্জতি।

    Yattha nibbāne āpo ca pathavī ca tejo ca vāyo ca na gādhati na patiṭṭhahati, tattha nibbāne sukkā gahā ceva tārakā ca na jotanti, tattha nibbāne ādicco nappakāsati, tattha nibbāne candimā na bhāti, tattha nibbāne tamo na vijjati.

    যো ব্রাহ্মণো অত্তনা সযং মুনি মোনেন যদা তং নিব্বানং অৰেদি ৰিন্দতি পটিলভতি পটিৰিজ্ঝতি, অথ পটিৰিজ্ঝনক্খণে সো ব্রাহ্মণো রূপা রূপধম্মতো চ অরূপা অরূপধম্মতো চ সুখদুক্খা সুখদুক্খতো চ পমুচ্চতীতি অৰোচাতি যোজনা।

    Yo brāhmaṇo attanā sayaṃ muni monena yadā taṃ nibbānaṃ avedi vindati paṭilabhati paṭivijjhati, atha paṭivijjhanakkhaṇe so brāhmaṇo rūpā rūpadhammato ca arūpā arūpadhammato ca sukhadukkhā sukhadukkhato ca pamuccatīti avocāti yojanā.

    যক্খ, যো ব্রাহ্মণো সকেসু সকঅত্তভাৰেসু ধম্মেসু উপাদানক্খন্ধেসু সচ্চেসু, ধম্মেসু চ পারগূ হোতি, অথ পারগমনক্খণে সো ব্রাহ্মণো এতং অজকলাপকং তযা ৰুত্তং এতং পিসাচং কিলেসপিসাচঞ্চ , তযা কতং অক্কুলঞ্চ অক্কুলং, পক্কুলকরণং অতিৰত্ততীতি অৰোচাতি যোজনা।

    Yakkha, yo brāhmaṇo sakesu sakaattabhāvesu dhammesu upādānakkhandhesu saccesu, dhammesu ca pāragū hoti, atha pāragamanakkhaṇe so brāhmaṇo etaṃ ajakalāpakaṃ tayā vuttaṃ etaṃ pisācaṃ kilesapisācañca , tayā kataṃ akkulañca akkulaṃ, pakkulakaraṇaṃ ativattatīti avocāti yojanā.

    যো ভিক্খু আযন্তিং আগচ্ছন্তিং পুরাণদুতিযিকং ভরিযং ৰা, অঞ্ঞং আগচ্ছন্তিং ইত্থিং ৰা চিত্তেন ন অভিনন্দতি, পক্কমন্তিং পুরাণদুতিযিকং ভরিযং ৰা, অঞ্ঞং পক্কমন্তিং ইত্থিং ৰা চিত্তেন ন সোচতি, সঙ্গা পঞ্চৰিধতোপি সঙ্গতো মুত্তং সঙ্গামজিং তং ভিক্খুং ‘‘ব্রাহ্মণ’’ন্তি অহং ৰদামীতি অৰোচাতি যোজনা।

    Yo bhikkhu āyantiṃ āgacchantiṃ purāṇadutiyikaṃ bhariyaṃ vā, aññaṃ āgacchantiṃ itthiṃ vā cittena na abhinandati, pakkamantiṃ purāṇadutiyikaṃ bhariyaṃ vā, aññaṃ pakkamantiṃ itthiṃ vā cittena na socati, saṅgā pañcavidhatopi saṅgato muttaṃ saṅgāmajiṃ taṃ bhikkhuṃ ‘‘brāhmaṇa’’nti ahaṃ vadāmīti avocāti yojanā.

    এত্থ নদিযং বহুজনো ন্হাযতি, সো বহুজনো ন্হাযকো উদকেন উদকন্হানেন সুচী ন হোতি। যম্হি পুগ্গলে সচ্চং, সচ্চতো সেসধম্মো চ অত্থি, সো পুগ্গলো সুচী চ হোতি, সো পুগ্গলো ব্রাহ্মণো চ হোতীতি অৰোচাতি যোজনা; সুচিঅসুচিভাৰো টীকাযং ৰিত্থারতো ৰুত্তোৰ।

    Ettha nadiyaṃ bahujano nhāyati, so bahujano nhāyako udakena udakanhānena sucī na hoti. Yamhi puggale saccaṃ, saccato sesadhammo ca atthi, so puggalo sucī ca hoti, so puggalo brāhmaṇo ca hotīti avocāti yojanā; suciasucibhāvo ṭīkāyaṃ vitthārato vuttova.

    আতাপিনো ঝাযতো যস্স ব্রাহ্মণস্স ধম্মা সচ্চধম্মা যদা হৰে একন্তেন পাতুভৰন্তি, তদা ধম্মানং পাতুভৰনক্খণে সো ব্রাহ্মণো মারসেনং ৰিধূপযং ৰিধূপযন্তো তিট্ঠতি। ‘‘কিমিৰা’’তি ৰত্তব্বত্তা ‘‘সূরিযোৰ ওভাসযমন্তলিক্খ’’ন্তি ৰুত্তং। সূরিযো অন্তলিক্খং ওভাসযন্তো তিট্ঠতি ইৰ, এৰং তিট্ঠতীতি যোজনা।

    Ātāpino jhāyato yassa brāhmaṇassa dhammā saccadhammā yadā have ekantena pātubhavanti, tadā dhammānaṃ pātubhavanakkhaṇe so brāhmaṇo mārasenaṃ vidhūpayaṃ vidhūpayanto tiṭṭhati. ‘‘Kimivā’’ti vattabbattā ‘‘sūriyova obhāsayamantalikkha’’nti vuttaṃ. Sūriyo antalikkhaṃ obhāsayanto tiṭṭhati iva, evaṃ tiṭṭhatīti yojanā.

    যো পংসুকূলিকো ভিক্খু সব্বানি চত্তারি যোগানি উপাতিৰত্তো সকিঞ্চনে লোকে অকিঞ্চনো ইরিযতি চতুব্বিধইরিযাপথং ৰত্তেতি। অপহানধম্মং কেনচি মগ্গেন অপ্পহানসভাৰং অপ্পত্তকাযেন অপ্পত্তং তেৰিজ্জপত্তং, ইরিযমানং সন্তিন্দ্রিযং তং পংসুকূলিকং ভিক্খুং তুম্হে পস্সথ।

    Yo paṃsukūliko bhikkhu sabbāni cattāri yogāni upātivatto sakiñcane loke akiñcano iriyati catubbidhairiyāpathaṃ vatteti. Apahānadhammaṃ kenaci maggena appahānasabhāvaṃ appattakāyena appattaṃ tevijjapattaṃ, iriyamānaṃ santindriyaṃ taṃ paṃsukūlikaṃ bhikkhuṃ tumhe passatha.

    আজানিযং পুরিসআজানীযং জাতিবলনিসেধং ‘‘অহং জাতিব্রাহ্মণো’’তি জাতিমত্তকেন পৰত্তমানবলনিসেধকং তং পংসুকূলিকং ভিক্খুং সম্বহুলা উল়ারা দেৰতা ব্রহ্মং ৰিমানং উপসঙ্কমিত্ৰা ইধ সাসনে, ব্রহ্মৰিমানে ৰা পসন্নচিত্তা হুত্ৰা নমস্সন্তি। নিধাতি চ এত্থ ন-কারো আগমো।

    Ājāniyaṃ purisaājānīyaṃ jātibalanisedhaṃ ‘‘ahaṃ jātibrāhmaṇo’’ti jātimattakena pavattamānabalanisedhakaṃ taṃ paṃsukūlikaṃ bhikkhuṃ sambahulā uḷārā devatā brahmaṃ vimānaṃ upasaṅkamitvā idha sāsane, brahmavimāne vā pasannacittā hutvā namassanti. Nidhāti ca ettha na-kāro āgamo.

    পুরিসাজঞ্ঞ তে তৰ অম্হাকং নমো অত্থু, পুরিসুত্তম তে তৰ অম্হাকং নমো অত্থু, যস্স তে তৰ নিস্সযং মযং নাভিজানাম, সো ত্ৰং কিং পুগ্গলং নিস্সায ঝাযসীতি অৰোচুন্তি যোজনা।

    Purisājañña te tava amhākaṃ namo atthu, purisuttama te tava amhākaṃ namo atthu, yassa te tava nissayaṃ mayaṃ nābhijānāma, so tvaṃ kiṃ puggalaṃ nissāya jhāyasīti avocunti yojanā.

    যে ভিক্খূ কালেন কালং ধম্মস্সৰনৰসেন চিররত্তং সমেতিকা ভৰন্তি, ইমে ভিক্খূ সহাযা হোন্তি ৰত। নেসং সহাযানং ভিক্খূনং ধম্মে বুদ্ধপ্পৰেদিতে ধম্মে সদ্ধম্মো সমেতি।

    Ye bhikkhū kālena kālaṃ dhammassavanavasena cirarattaṃ sametikā bhavanti, ime bhikkhū sahāyā honti vata. Nesaṃ sahāyānaṃ bhikkhūnaṃ dhamme buddhappavedite dhamme saddhammo sameti.

    কপ্পিনেন অরিযপ্পৰেদিতে ধম্মে সুৰিনীতা তে সহাযকা ভিক্খূ সৰাহিনিং মারং জেত্ৰা অন্তিমং দেহং অত্তভাৰং ধারেন্তীতি অৰোচাতি যোজনা।

    Kappinena ariyappavedite dhamme suvinītā te sahāyakā bhikkhū savāhiniṃ māraṃ jetvā antimaṃ dehaṃ attabhāvaṃ dhārentīti avocāti yojanā.

    সিথিলং ৰীরিযং আরব্ভ সব্বদুক্খপ্পমোচনং ইদং নিব্বানং যোগাৰচরেন ন অধিগন্তব্বং, অপ্পেন অপ্পকেন থামসা ইদং নিব্বানং ন অধিগন্তব্বং।

    Sithilaṃ vīriyaṃ ārabbha sabbadukkhappamocanaṃ idaṃ nibbānaṃ yogāvacarena na adhigantabbaṃ, appena appakena thāmasā idaṃ nibbānaṃ na adhigantabbaṃ.

    অযঞ্চ যোগাৰচরো ভিক্খু দহরো, যো পুরিসো সৰাহিনিং মারং জেত্ৰা অন্তিমং দেহং অত্তভাৰং ধারেতি, সো অযং পুরিসো সো উত্তমপুরিসোৰাতি অৰোচাতি যোজনা। ‘‘পুরিসো’’তি ৰত্তব্বে ছন্দানুরক্খণৰসেন ‘‘পোরিসো’’তি ৰুত্তং।

    Ayañca yogāvacaro bhikkhu daharo, yo puriso savāhiniṃ māraṃ jetvā antimaṃ dehaṃ attabhāvaṃ dhāreti, so ayaṃ puriso so uttamapurisovāti avocāti yojanā. ‘‘Puriso’’ti vattabbe chandānurakkhaṇavasena ‘‘poriso’’ti vuttaṃ.

    মোঘরাজ, দুব্বণ্ণকো লূখচীৰরো সদা সতো সতিসম্পন্নো খীণাসৰো চ ৰিসংযুত্তো চ কতকিচ্চো চ অনাসৰো চ তেৰিজ্জো চ ইদ্ধিপ্পত্তো চ চেতোপরিযাযকোৰিদো চ সো ভিক্খু সৰাহিনিং মারং জেত্ৰা অন্তিমং দেহং ধারেতীতি অৰোচাতি যোজনা।

    Mogharāja, dubbaṇṇako lūkhacīvaro sadā sato satisampanno khīṇāsavo ca visaṃyutto ca katakicco ca anāsavo ca tevijjo ca iddhippatto ca cetopariyāyakovido ca so bhikkhu savāhiniṃ māraṃ jetvā antimaṃ dehaṃ dhāretīti avocāti yojanā.

    ১০৫. ‘‘তথাগতো’’তিআদীসু যোজনা পাকটা। ইদং সুত্তং অসেক্খভাগে ৰিসযে ৰাচকঞাপকভাৰেন পৰত্তনতো অসেক্খভাগিযং সুত্তং নাম।

    105.‘‘Tathāgato’’tiādīsu yojanā pākaṭā. Idaṃ suttaṃ asekkhabhāge visaye vācakañāpakabhāvena pavattanato asekkhabhāgiyaṃ suttaṃ nāma.

    ১০৬. নানাৰিধং অসেক্খভাগিযং সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং সংকিলেসভাগিযঞ্চ ৰাসনাভাগিযঞ্চ সুত্ত’’ন্তি ৰত্তব্বত্তা ‘‘তত্থ কতমং সংকিলেসভাগিযঞ্চ ৰাসনাভাগিযঞ্চ সুত্ত’’ন্তিআদি ৰুত্তং। তত্থাতি তেসু সোল়সসু সংকিলেসভাগিযাদীসু সুত্তেসু কতমং সুত্তং সংকিলেসভাগিযঞ্চ ৰাসনাভাগিযঞ্চ সুত্তং নামাতি পুচ্ছতি।

    106. Nānāvidhaṃ asekkhabhāgiyaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca vāsanābhāgiyañca sutta’’nti vattabbattā ‘‘tattha katamaṃ saṃkilesabhāgiyañca vāsanābhāgiyañca sutta’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu katamaṃ suttaṃ saṃkilesabhāgiyañca vāsanābhāgiyañca suttaṃ nāmāti pucchati.

    ছন্নং আপত্তিং আপজ্জিত্ৰা ছন্নং ছাদেন্তং ভিক্খুং দুক্কটাদিৰস্সো অতিৰস্সতি, ৰিৰটং আপত্তিং আপজ্জিত্ৰা ৰিৰটং দেসেন্তং আচিক্খন্তং ভিক্খুং দুক্কটাদিৰস্সো নাতিৰস্সতি, তস্মা ছন্নস্স অতিৰস্সনতো চ ৰিৰটস্স নাতিৰস্সনতো চ ছন্নং ছাদিতব্বং আপত্তিং ৰিৰরেথ দেসেথ আরোচেথ , এৰং ৰিৰরণে সতি তং ৰিৰরন্তং ভিক্খুং দুক্কটাদিৰস্সো নাতিৰস্সতীতি যোজনা।

    Channaṃ āpattiṃ āpajjitvā channaṃ chādentaṃ bhikkhuṃ dukkaṭādivasso ativassati, vivaṭaṃ āpattiṃ āpajjitvā vivaṭaṃ desentaṃ ācikkhantaṃ bhikkhuṃ dukkaṭādivasso nātivassati, tasmā channassa ativassanato ca vivaṭassa nātivassanato ca channaṃ chāditabbaṃ āpattiṃ vivaretha desetha ārocetha , evaṃ vivaraṇe sati taṃ vivarantaṃ bhikkhuṃ dukkaṭādivasso nātivassatīti yojanā.

    ‘‘ইমস্মিং সুত্তে কিত্তকেন সংকিলেসো দস্সিতো, কিত্তকেন ৰাসনা দস্সিতা’’তি পুচ্ছিতব্বত্তা ‘‘ছন্নমতিৰস্সতী’’তি সংকিলেসো, ‘ৰিৰটং নাতিৰস্সতী’তি ৰাসনা, ‘তস্মা ছন্নং ৰিৰরেথ, এৰং তং নাতিৰস্সতী’তি অযং সংকিলেসো চ ৰাসনা চা’’তি ৰুত্তং। ‘‘ছন্নমতিৰস্সতী’’তি এত্তকেন সংকিলেসো দস্সিতো। ‘‘ৰিৰটং নাতিৰস্সতী’’তি এত্তকেন ৰাসনা দস্সিতা। ‘‘তস্মা ছন্নং ৰিৰরেথ, এৰং তং নাতিৰস্সতী’’তি এত্তকেন অযং সংকিলেসো চ দস্সিতো, অযং ৰাসনা চ দস্সিতা। ইদং ‘‘ছন্নং…পে॰.. ৰস্সতী’’তি সুত্তং সংকিলেসভাগে ৰিসযে চ ৰাসনাভাগে ৰিসযে চ ৰাচকঞাপকভাৰেন পৰত্তনতো সংকিলেসভাগিযঞ্চ ৰাসনাভাগিযঞ্চ সুত্তং নাম।

    ‘‘Imasmiṃ sutte kittakena saṃkileso dassito, kittakena vāsanā dassitā’’ti pucchitabbattā ‘‘channamativassatī’’ti saṃkileso, ‘vivaṭaṃ nātivassatī’ti vāsanā, ‘tasmā channaṃ vivaretha, evaṃ taṃ nātivassatī’ti ayaṃ saṃkileso ca vāsanā cā’’ti vuttaṃ. ‘‘Channamativassatī’’ti ettakena saṃkileso dassito. ‘‘Vivaṭaṃ nātivassatī’’ti ettakena vāsanā dassitā. ‘‘Tasmā channaṃ vivaretha, evaṃ taṃ nātivassatī’’ti ettakena ayaṃ saṃkileso ca dassito, ayaṃ vāsanā ca dassitā. Idaṃ ‘‘channaṃ…pe... vassatī’’ti suttaṃ saṃkilesabhāge visaye ca vāsanābhāge visaye ca vācakañāpakabhāvena pavattanato saṃkilesabhāgiyañca vāsanābhāgiyañca suttaṃ nāma.

    ‘‘সংকিলেসভাগিযঞ্চ ৰাসনাভাগিযঞ্চ সুত্তং এত্তকমেৰা’’তি ৰত্তব্বত্তা ‘‘চত্তারোমে মহারাজা’’তিআদি ৰুত্তং। ‘‘তেসু চতূসু পুগ্গলেসু কতমে পুগ্গলা সংকিলেসভাগিযা, কতমে পুগ্গলা ৰাসনাভাগিযা’’তি পুচ্ছিতব্বত্তা ‘‘তত্থ যো চ পুগ্গলো’’তিআদি ৰুত্তং। তত্থাতি তেসু চতূসু তমোতমপরাযণাদীসু পুগ্গলেসু। তস্সত্থো পাকটো। ইদং ‘‘চত্তারোমে’’তিআদিকং সুত্তং সংকিলেসভাগিযেসু দ্ৰীসু পুগ্গলেসু চ ৰাসনাভাগিযেসু দ্ৰীসু পুগ্গলেসু চ ৰাচকঞাপকভাৰেন পৰত্তনতো সংকিলেসভাগিযঞ্চ ৰাসনাভাগিযঞ্চ সুত্তং নাম।

    ‘‘Saṃkilesabhāgiyañca vāsanābhāgiyañca suttaṃ ettakamevā’’ti vattabbattā ‘‘cattārome mahārājā’’tiādi vuttaṃ. ‘‘Tesu catūsu puggalesu katame puggalā saṃkilesabhāgiyā, katame puggalā vāsanābhāgiyā’’ti pucchitabbattā ‘‘tattha yo ca puggalo’’tiādi vuttaṃ. Tatthāti tesu catūsu tamotamaparāyaṇādīsu puggalesu. Tassattho pākaṭo. Idaṃ ‘‘cattārome’’tiādikaṃ suttaṃ saṃkilesabhāgiyesu dvīsu puggalesu ca vāsanābhāgiyesu dvīsu puggalesu ca vācakañāpakabhāvena pavattanato saṃkilesabhāgiyañca vāsanābhāgiyañca suttaṃ nāma.

    নানাৰিধং সংকিলেসভাগিযঞ্চ ৰাসনাভাগিযঞ্চ সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং সংকিলেসভাগিযঞ্চ নিব্বেধভাগিযঞ্চ সুত্তং নামা’’তি পুচ্ছিতব্বত্তা তত্থ কতমং সংকিলেসভাগিযঞ্চ নিব্বেধভাগিযঞ্চ সুত্ত’’ন্তিআদি ৰুত্তং। তস্সত্থো ৰুত্তনযেন ৰেদিতব্বো।

    Nānāvidhaṃ saṃkilesabhāgiyañca vāsanābhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca nibbedhabhāgiyañca suttaṃ nāmā’’ti pucchitabbattā tattha katamaṃsaṃkilesabhāgiyañca nibbedhabhāgiyañca sutta’’ntiādi vuttaṃ. Tassattho vuttanayena veditabbo.

    অযসং যং বন্ধনঞ্চ দারুজং যং বন্ধনঞ্চ পব্বজং যং বন্ধনঞ্চ লোকে অত্থি, তং অযসাদিবন্ধনং ‘‘দল়্হং বন্ধন’’ন্তি ধীরা বুদ্ধাদযো পণ্ডিতপুরিসা ন আহু। মণিকুণ্ডলেসু চ পুত্তেসু চ দারেসু চ যা সারত্তরত্তা বলৰরাগরত্তা অপেক্খা লোকে ৰিজ্জতি, তং সারত্তরত্তঅপেক্খাসঙ্খাতং রাগবন্ধনং ‘‘দল়্হং বন্ধন’’ন্তি ধীরা পণ্ডিতপুরিসা আহু। ইমিনা সুত্তপ্পদেসেন অযং সারত্তরত্তঅপেক্খাসঙ্খাতো অকুসলধম্মো সংকিলেসো দস্সিতো।

    Ayasaṃ yaṃ bandhanañca dārujaṃ yaṃ bandhanañca pabbajaṃ yaṃ bandhanañca loke atthi, taṃ ayasādibandhanaṃ ‘‘daḷhaṃ bandhana’’nti dhīrā buddhādayo paṇḍitapurisā na āhu. Maṇikuṇḍalesu ca puttesu ca dāresu ca yā sārattarattā balavarāgarattā apekkhā loke vijjati, taṃ sārattarattaapekkhāsaṅkhātaṃ rāgabandhanaṃ ‘‘daḷhaṃ bandhana’’nti dhīrā paṇḍitapurisā āhu. Iminā suttappadesena ayaṃ sārattarattaapekkhāsaṅkhāto akusaladhammo saṃkileso dassito.

    ‘‘কেন নিব্বেধো দস্সিতো’’তি ৰত্তব্বত্তা ‘‘এত’’ন্তিআদি ৰুত্তং। ধীরা পণ্ডিতপুরিসা এতং রাগবন্ধনং ‘‘দল়্হং বন্ধন’’ন্তি আহু। এতং রাগবন্ধনং ওহারিনং হেট্ঠা অপাযং অৰহরণং হোতি, সিথিলং বন্ধনট্ঠানে ছৰিআদীনি অকোপেতত্তা সিথিলং হোতি, দুপ্পমুঞ্চং লোভৰসেন একৰারম্পি উপ্পন্নস্স রাগবন্ধনস্স দুম্মোচযত্তা দুপ্পমুঞ্চং হোতি, পণ্ডিতপুরিসা এতম্পি ৰুত্তপ্পকারং রাগবন্ধনম্পি মগ্গেন ছেত্ৰান অনপেক্খিনো হুত্ৰা কামসুখং পহায পরিব্বজন্তি। ইতি ইমিনা সুত্তপ্পদেসেন অযং মগ্গো নিব্বেধো দস্সিতো। ইদং ‘‘অযস’’ন্তিআদিকং সুত্তং রাগাদিসংকিলেসভাগে ৰিসযে চ ৰাসনাভাগে ৰিসযে চ ৰাচকঞাপকভাৰেন পৰত্তনতো সংকিলেসভাগিযঞ্চ ৰাসনাভাগিযঞ্চ সুত্তং নাম।

    ‘‘Kena nibbedho dassito’’ti vattabbattā ‘‘eta’’ntiādi vuttaṃ. Dhīrā paṇḍitapurisā etaṃ rāgabandhanaṃ ‘‘daḷhaṃ bandhana’’nti āhu. Etaṃ rāgabandhanaṃ ohārinaṃ heṭṭhā apāyaṃ avaharaṇaṃ hoti, sithilaṃ bandhanaṭṭhāne chaviādīni akopetattā sithilaṃ hoti, duppamuñcaṃ lobhavasena ekavārampi uppannassa rāgabandhanassa dummocayattā duppamuñcaṃ hoti, paṇḍitapurisā etampi vuttappakāraṃ rāgabandhanampi maggena chetvāna anapekkhino hutvā kāmasukhaṃ pahāya paribbajanti. Iti iminā suttappadesena ayaṃ maggo nibbedho dassito. Idaṃ ‘‘ayasa’’ntiādikaṃ suttaṃ rāgādisaṃkilesabhāge visaye ca vāsanābhāge visaye ca vācakañāpakabhāvena pavattanato saṃkilesabhāgiyañca vāsanābhāgiyañca suttaṃ nāma.

    ১০৭. ভিক্খৰে, যঞ্চ চেতেতি যঞ্চ চেতনং নিব্বত্তেতি, যঞ্চ পকপ্পেতি যঞ্চ পকপ্পনং করোতি, যঞ্চ অনুসেতি যঞ্চ অনুসযনং ভৰতি, এতং চেতনং এতং পকপ্পনং এতং অনুসযনং ৰিঞ্ঞাণস্স ঠিতিযা আরম্মণং পচ্চযো হোতি। আরম্মণে পচ্চযে সতি তস্স অভিসঙ্খার ৰিঞ্ঞাণস্স পতিট্ঠা হোতি। তস্মিং অভিসঙ্খারৰিঞ্ঞাণে পতিট্ঠিতে ৰিরুল়্হে সতি আযতিং পুনব্ভৰাভিনিব্বত্তি ৰিঞ্ঞাণাদিনিব্বত্তি হোতি। আযতিং পুনব্ভৰাভিনিব্বত্তিযা সতি আযতিং জাতিজরামরণং সম্ভৰতি। আযতিং সোক…পে॰… সমুদযো হোতি।

    107. Bhikkhave, yañca ceteti yañca cetanaṃ nibbatteti, yañca pakappeti yañca pakappanaṃ karoti, yañca anuseti yañca anusayanaṃ bhavati, etaṃ cetanaṃ etaṃ pakappanaṃ etaṃ anusayanaṃ viññāṇassa ṭhitiyā ārammaṇaṃ paccayo hoti. Ārammaṇe paccaye sati tassa abhisaṅkhāra viññāṇassa patiṭṭhā hoti. Tasmiṃ abhisaṅkhāraviññāṇe patiṭṭhite viruḷhe sati āyatiṃ punabbhavābhinibbatti viññāṇādinibbatti hoti. Āyatiṃ punabbhavābhinibbattiyā sati āyatiṃ jātijarāmaraṇaṃ sambhavati. Āyatiṃ soka…pe… samudayo hoti.

    ভিক্খৰে, চে নো চেতেতি, চে নো পকপ্পেতি, অথ তথাপি চে অনুসেতি অনুসযনং ভৰতি, এৰং সতি এতং অনুসযনং ৰিঞ্ঞাণস্স অভিসঙ্খারৰিঞ্ঞাণস্স আরম্মণং পচ্চযো হোতি…পে॰… সমুদযো হোতি। ইতি ইমিনা সুত্তপ্পদেসেন অযং ৰুত্তপ্পকারো চেতযনাদিকো অকুসলধম্মো সংকিলেসো দস্সিতো।

    Bhikkhave, ce no ceteti, ce no pakappeti, atha tathāpi ce anuseti anusayanaṃ bhavati, evaṃ sati etaṃ anusayanaṃ viññāṇassa abhisaṅkhāraviññāṇassa ārammaṇaṃ paccayo hoti…pe… samudayo hoti. Iti iminā suttappadesena ayaṃ vuttappakāro cetayanādiko akusaladhammo saṃkileso dassito.

    ‘‘কেন নিব্বেধো দস্সিতো’’তি ৰত্তব্বত্তা ‘‘যতো চা’’তিআদি ৰুত্তং। ভিক্খৰে, যতো চ অরিযমগ্গিকো নেৰ চেতেতি, নো চ পকপ্পেতি, নো চ অনুসেতি, এতং অচেতযনং এতং অকপ্পনং এতং অননুসযনং ৰিঞ্ঞাণস্স অভিসঙ্খারৰিঞ্ঞাণস্স আরম্মণং পচ্চযো ন হোতি…পে॰… আযতিং জাতিজরামরণং নিরুজ্ঝতি, আযতিং সোক…পে॰… যাসা নিরুজ্ঝন্তি…পে॰… নিরোধো হোতি। ইতি ইমিনা সুত্তপ্পদেসেন অযং অরিযমগ্গো নিব্বেধো দস্সিতো। ইদং ‘‘যঞ্চ ভিক্খৰে’’তিআদিকং সুত্তং সংকিলেসভাগে ৰিসযে চ নিব্বেধভাগে ৰিসযে চ ৰাচকঞাপকভাৰেন পৰত্তনতো সংকিলেসভাগিযঞ্চ নিব্বেধভাগিযঞ্চ সুত্তং নাম।

    ‘‘Kena nibbedho dassito’’ti vattabbattā ‘‘yato cā’’tiādi vuttaṃ. Bhikkhave, yato ca ariyamaggiko neva ceteti, no ca pakappeti, no ca anuseti, etaṃ acetayanaṃ etaṃ akappanaṃ etaṃ ananusayanaṃ viññāṇassa abhisaṅkhāraviññāṇassa ārammaṇaṃ paccayo na hoti…pe… āyatiṃ jātijarāmaraṇaṃ nirujjhati, āyatiṃ soka…pe… yāsā nirujjhanti…pe… nirodho hoti. Iti iminā suttappadesena ayaṃ ariyamaggo nibbedho dassito. Idaṃ ‘‘yañca bhikkhave’’tiādikaṃ suttaṃ saṃkilesabhāge visaye ca nibbedhabhāge visaye ca vācakañāpakabhāvena pavattanato saṃkilesabhāgiyañca nibbedhabhāgiyañca suttaṃ nāma.

    ১০৮. নানাৰিধং সংকিলেসভাগিযঞ্চ নিব্বেধভাগিযঞ্চ সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং সংকিলেসভাগিযঞ্চ অসেক্খভাগিযঞ্চ সুত্ত’’ন্তি পুচ্ছিতব্বত্তা ‘‘তত্থ কতমং সংকিলেসভাগিযঞ্চ অসেক্খভাগিযঞ্চ সুত্ত’’ন্তিআদি ৰুত্তং। তস্সত্থো ৰুত্তনযেন ৰেদিতব্বো।

    108. Nānāvidhaṃ saṃkilesabhāgiyañca nibbedhabhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca asekkhabhāgiyañca sutta’’nti pucchitabbattā ‘‘tattha katamaṃ saṃkilesabhāgiyañca asekkhabhāgiyañca sutta’’ntiādi vuttaṃ. Tassattho vuttanayena veditabbo.

    ভিক্খৰে, অস্সুতৰা পুথুজ্জনো সমুদ্দো জলসাগরসমুদ্দো ‘‘সমুদ্দো সমুদ্দো’’তি ভাসতি। কেনট্ঠেন ভাসতি? দুপ্পূরণট্ঠেন চ সংসরণট্ঠেন চ দুরতিক্কমনট্ঠেন চ সমুদ্দোতি ভাসতি। এৰং সতি, ভিক্খৰে, এসো জলসাগরসমুদ্দো অরিযস্স ভগৰতো ৰিনযে ৰুত্তপ্পকারট্ঠেন সমুদ্দো ন হোতি। ভিক্খৰে, এসো জলসাগরসমুদ্দো মহা উদকরাসি মহা উদকণ্ণৰো হোতি। ভিক্খৰে, চক্খু পুরিসস্স সমুদ্দো হোতি, তস্স চক্খুস্স রূপমযো রূপাযতনমযো ৰেগো। কেনট্ঠেন? পথৰিতো যাৰ অকনিট্ঠব্রহ্মলোকা নীলাদিরূপারম্মণং সমোসরন্তম্পি দুপ্পূরণট্ঠেন চ অনমতগ্গে সংসারে সংসরণট্ঠেন চ দুরতিক্কমনট্ঠেন চ চক্খুমেৰ সমুদ্দো হোতি। নীলাদিরূপাযতনস্স অপ্পমেয্যস্স অপ্পমেয্যেন ঊমিমযেন ৰেগেন সংসরণট্ঠেন নীলাদিরূপমেৰ ৰেগো হোতি। ইতি ইমিনা সুত্তপ্পদেসেন অযং চক্খু সমুদ্দো রূপমযো ৰেগো চ সংকিলেসো সংকিলেসহেতু দস্সিতো।

    Bhikkhave, assutavā puthujjano samuddo jalasāgarasamuddo ‘‘samuddo samuddo’’ti bhāsati. Kenaṭṭhena bhāsati? Duppūraṇaṭṭhena ca saṃsaraṇaṭṭhena ca duratikkamanaṭṭhena ca samuddoti bhāsati. Evaṃ sati, bhikkhave, eso jalasāgarasamuddo ariyassa bhagavato vinaye vuttappakāraṭṭhena samuddo na hoti. Bhikkhave, eso jalasāgarasamuddo mahā udakarāsi mahā udakaṇṇavo hoti. Bhikkhave, cakkhu purisassa samuddo hoti, tassa cakkhussa rūpamayo rūpāyatanamayo vego. Kenaṭṭhena? Pathavito yāva akaniṭṭhabrahmalokā nīlādirūpārammaṇaṃ samosarantampi duppūraṇaṭṭhena ca anamatagge saṃsāre saṃsaraṇaṭṭhena ca duratikkamanaṭṭhena ca cakkhumeva samuddo hoti. Nīlādirūpāyatanassa appameyyassa appameyyena ūmimayena vegena saṃsaraṇaṭṭhena nīlādirūpameva vego hoti. Iti iminā suttappadesena ayaṃ cakkhu samuddo rūpamayo vego ca saṃkileso saṃkilesahetu dassito.

    ‘‘কেন অসেক্খো দস্সিতো’’তি ৰত্তব্বত্তা ‘‘যো ত’’ন্তিআদি ৰুত্তং। যস্মিং অরহত্তফলে ঠিতো যো অরহা রূপমযং তং ৰেগং সহতি মনাপে রূপে রাগং, অমনাপে রূপে দোসং, অসমপেক্খনে মোহং অনুপ্পাদেন্তো হুত্ৰা উপেক্খকভাৰেন সহতি, অযং অরহা, ভিক্খৰে, সঊমিং সাৰট্টং সগহং সরক্খসং চক্খুসমুদ্দং অতরীতি ৰুচ্চতি, তিণ্ণো পারঙ্গতো থলে তিট্ঠতি ব্রাহ্মণোতি ৰুচ্চতি। ইতি ইমিনা সুত্তপ্পদেসেন অযং অরহত্তফলভূতো অসেক্খো দস্সিতো।

    ‘‘Kena asekkho dassito’’ti vattabbattā ‘‘yo ta’’ntiādi vuttaṃ. Yasmiṃ arahattaphale ṭhito yo arahā rūpamayaṃ taṃ vegaṃ sahati manāpe rūpe rāgaṃ, amanāpe rūpe dosaṃ, asamapekkhane mohaṃ anuppādento hutvā upekkhakabhāvena sahati, ayaṃ arahā, bhikkhave, saūmiṃ sāvaṭṭaṃ sagahaṃ sarakkhasaṃ cakkhusamuddaṃ atarīti vuccati, tiṇṇo pāraṅgato thale tiṭṭhati brāhmaṇoti vuccati. Iti iminā suttappadesena ayaṃ arahattaphalabhūto asekkho dassito.

    ‘‘সোতং ভিক্খৰে’’তিআদীসুপি ইমিনা নযেন যথাসম্ভৰং অত্থো ৰেদিতব্বো। ইদং ‘‘সমুদ্দো’’তিআদিকং সুত্তং সংকিলেসভাগে ৰিসযে চ অসেক্খভাগে ৰিসযে চ ৰাচকঞাপকভাৰেন পৰত্তনতো সংকিলেসভাগিযঞ্চ অসেক্খভাগিযঞ্চ সুত্তং নাম।

    ‘‘Sotaṃbhikkhave’’tiādīsupi iminā nayena yathāsambhavaṃ attho veditabbo. Idaṃ ‘‘samuddo’’tiādikaṃ suttaṃ saṃkilesabhāge visaye ca asekkhabhāge visaye ca vācakañāpakabhāvena pavattanato saṃkilesabhāgiyañca asekkhabhāgiyañca suttaṃ nāma.

    ‘‘এত্তকমেৰা’’তি ৰত্তব্বত্তা ‘‘ছযিমে’’তিআদি ৰুত্তং। ভিক্খৰে, লোকস্মিং সত্তানং অনযায অনত্থায পাণীনং ব্যাবাধায ইমে মযা ৰুচ্চমানা বল়িসা ছ ভৰন্তি। কতমে ছ? ভিক্খৰে, চক্খুৰিঞ্ঞেয্যা চক্খুৰিঞ্ঞাণেন ৰিঞ্ঞেয্যা ইট্ঠা কন্তা কামনীযা মনাপা মনৰড্ঢকা পিযরূপা পিযসভাৰা কামূপসংহিতা কিলেসকামসহিতা রজনীযা রূপা নীলাদিরূপারম্মণা সন্তি, তং ৰুত্তপ্পকারং রূপং ভিক্খু চে অভিনন্দতি সপ্পীতিকতণ্হায অভিমুখো নন্দতি, চে অভিৰদতি ‘‘অহো সুখং অহো সুখ’’ন্তি ৰদাপেন্তিযা তণ্হাযনৰসেন অভিৰদতি, চে অজ্ঝোসায তিট্ঠতি গিলিত্ৰা ৰিয পরিনিট্ঠপেত্ৰা তিট্ঠতি, এৰং সতি, ভিক্খৰে, অযং ভিক্খু ‘‘গিলিতবল়িসো…পে॰… পাপিমতো’’তি ৰুচ্চতি। এত্থ চ নীলাদিভেদেন অনেকৰিধত্তা ‘‘রূপা ইট্ঠা…পে॰… রজনীযা’’তি বহুৰচননিদ্দেসো কতোপি রূপাযতনরূপারম্মণভাৰেন চ চক্খুৰিঞ্ঞেয্যভাৰেন চ একৰিধতং অনতিৰত্তনতো ‘‘ত’’ন্তি একৰচননিদ্দেসো কতোতি ৰেদিতব্বো। ‘‘সন্তি, ভিক্খৰে, সোতৰিঞ্ঞেয্যা’’তিআদীসুপি ইমিনা নযেন যথাসম্ভৰং অত্থো ৰেদিতব্বো। ইতি ইমিনা সুত্তপ্পদেসেন অযং চক্খুৰিঞ্ঞেয্যাদিকো ছব্বিধো বল়িসো সংকিলেসো কিলেসহেতু দস্সিতো।

    ‘‘Ettakamevā’’ti vattabbattā ‘‘chayime’’tiādi vuttaṃ. Bhikkhave, lokasmiṃ sattānaṃ anayāya anatthāya pāṇīnaṃ byābādhāya ime mayā vuccamānā baḷisā cha bhavanti. Katame cha? Bhikkhave, cakkhuviññeyyā cakkhuviññāṇena viññeyyā iṭṭhā kantā kāmanīyā manāpā manavaḍḍhakā piyarūpā piyasabhāvā kāmūpasaṃhitā kilesakāmasahitā rajanīyā rūpā nīlādirūpārammaṇā santi, taṃ vuttappakāraṃ rūpaṃ bhikkhu ce abhinandati sappītikataṇhāya abhimukho nandati, ce abhivadati ‘‘aho sukhaṃ aho sukha’’nti vadāpentiyā taṇhāyanavasena abhivadati, ce ajjhosāya tiṭṭhati gilitvā viya pariniṭṭhapetvā tiṭṭhati, evaṃ sati, bhikkhave, ayaṃ bhikkhu ‘‘gilitabaḷiso…pe… pāpimato’’ti vuccati. Ettha ca nīlādibhedena anekavidhattā ‘‘rūpā iṭṭhā…pe… rajanīyā’’ti bahuvacananiddeso katopi rūpāyatanarūpārammaṇabhāvena ca cakkhuviññeyyabhāvena ca ekavidhataṃ anativattanato ‘‘ta’’nti ekavacananiddeso katoti veditabbo. ‘‘Santi, bhikkhave, sotaviññeyyā’’tiādīsupi iminā nayena yathāsambhavaṃ attho veditabbo. Iti iminā suttappadesena ayaṃ cakkhuviññeyyādiko chabbidho baḷiso saṃkileso kilesahetu dassito.

    ‘‘কেন অসেক্খো দস্সিতো’’তি ৰত্তব্বত্তা ‘‘সন্তি চা’’তিআদি ৰুত্তং।

    ‘‘Kena asekkho dassito’’ti vattabbattā ‘‘santi cā’’tiādi vuttaṃ.

    অভেদি ভিন্দি, পরিভেদি পরিসমন্ততো ভিন্দি। ইতি ইমিনা সুত্তপ্পদেসেন অযং অরহত্তফলভূতো অসেক্খো দস্সিতো। ইদং ‘‘ছযিমে’’তিআদিকং সুত্তং ৰুত্তনযেন সংকিলেসভাগিযঞ্চ অসেক্খভাগিযঞ্চ সুত্তং নাম।

    Abhedi bhindi, paribhedi parisamantato bhindi. Iti iminā suttappadesena ayaṃ arahattaphalabhūto asekkho dassito. Idaṃ ‘‘chayime’’tiādikaṃ suttaṃ vuttanayena saṃkilesabhāgiyañca asekkhabhāgiyañca suttaṃ nāma.

    ১০৯. নানাৰিধং সংকিলেসভাগিযঞ্চ অসেক্খভাগিযঞ্চ সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্ত’’ন্তি পুচ্ছিতব্বত্তা ‘‘তত্থ কতমং সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্ত’’ন্তিআদি ৰুত্তং।

    109. Nānāvidhaṃ saṃkilesabhāgiyañca asekkhabhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca nibbedhabhāgiyañca asekkhabhāgiyañca sutta’’nti pucchitabbattā ‘‘tattha katamaṃ saṃkilesabhāgiyañca nibbedhabhāgiyañca asekkhabhāgiyañca sutta’’ntiādi vuttaṃ.

    অযং লোকো সত্তলোকো সন্তাপজাতো ঞাতিব্যসনাদিৰসেন জাতসোকসন্তাপো চেৰ রাগাদিৰসেন জাতপরিল়াহসন্তাপো চ ফস্সপরেতো অনেকেহি দুক্খসম্ফস্সেহি অভিভূতো রোদং রোদন্তো ৰদতি। কিন্তি ৰদতি? অত্তনা ফুট্ঠং দুক্খং অভাৰিতকাযতায অধিৰাসেতুং অসক্কোন্তো হুত্ৰা ‘‘অহো দুক্খং, ঈদিসং দুক্খং ময্হং সত্তুনোপি মা হোতূ’’তিআদিনা রোদন্তো ৰিলপন্তো ৰদতি, ‘‘কস্মা এৰং ৰদতী’’তি ৰত্তব্বত্তা ‘‘অত্ততো যেন যেন হি মঞ্ঞন্তী’’তিআদি ৰুত্তং। এতে সত্তা যেন যেন কামজ্ঝোসাদিনা পকারেন অত্ততো দুক্খস্স পটিকারং মঞ্ঞন্তি, ততো পকারতো অঞ্ঞথা অঞ্ঞেন পকারেন তং দুক্খং তিকিচ্ছিতব্বং হি যস্মা হোতি।

    Ayaṃloko sattaloko santāpajāto ñātibyasanādivasena jātasokasantāpo ceva rāgādivasena jātapariḷāhasantāpo ca phassapareto anekehi dukkhasamphassehi abhibhūto rodaṃ rodanto vadati. Kinti vadati? Attanā phuṭṭhaṃ dukkhaṃ abhāvitakāyatāya adhivāsetuṃ asakkonto hutvā ‘‘aho dukkhaṃ, īdisaṃ dukkhaṃ mayhaṃ sattunopi mā hotū’’tiādinā rodanto vilapanto vadati, ‘‘kasmā evaṃ vadatī’’ti vattabbattā ‘‘attato yena yena hi maññantī’’tiādi vuttaṃ. Ete sattā yena yena kāmajjhosādinā pakārena attato dukkhassa paṭikāraṃ maññanti, tato pakārato aññathā aññena pakārena taṃ dukkhaṃ tikicchitabbaṃ hi yasmā hoti.

    অঞ্ঞথাভাৰীতি যস্মা রোদং রোদন্তো ৰদতি, যেন যেন ৰা পরৰিহিংসাদিপকারেন অত্তনো ৰড্ঢিং মঞ্ঞন্তি আসীসন্তি, ততো পকারতো অঞ্ঞথা অৰড্ঢি এৰ হোতি। তং আসীসিতব্বং অঞ্ঞথাভাৰি অৰড্ঢিতভাৰি এৰ হি যস্মা হোতি, তস্মা মঞ্ঞিতব্বস্স আসীসিতব্বস্স অঞ্ঞথা ভৰনসীলত্তা রোদং রোদন্তো ৰদতি, অযং সত্তলোকো রোদন্তো চ হুত্ৰা ৰদতি। ‘‘কি’’ন্তি পুচ্ছিতব্বত্তা ‘‘ভৰসত্তো’’তিআদি ৰুত্তং। ভৰসত্তো কামভৰাদীসু সত্তো ৰিসত্তো লোকো ভৰমেৰ কামভৰাদিভৰমেৰ অভিনন্দতি। যং ভৰং অভিনন্দতি, তং জরামরণাদিঅনেকব্যসনানুবন্ধত্তা ভযানকট্ঠেন ভযং হোতি। যস্স যতো জরামরণাদিতো ভাযতি, তং জরামরণাদিদুক্খস্স অধিট্ঠানভাৰতো দুক্খং দুক্খাধিট্ঠানং হোতি। ইতি ইমিনা সুত্তপ্পদেসেন অযং সন্তাপাদিকো সংকিলেসো সংকিলেসহেতু দস্সিতো।

    Aññathābhāvīti yasmā rodaṃ rodanto vadati, yena yena vā paravihiṃsādipakārena attano vaḍḍhiṃ maññanti āsīsanti, tato pakārato aññathā avaḍḍhi eva hoti. Taṃ āsīsitabbaṃ aññathābhāvi avaḍḍhitabhāvi eva hi yasmā hoti, tasmā maññitabbassa āsīsitabbassa aññathā bhavanasīlattā rodaṃ rodanto vadati, ayaṃ sattaloko rodanto ca hutvā vadati. ‘‘Ki’’nti pucchitabbattā ‘‘bhavasatto’’tiādi vuttaṃ. Bhavasatto kāmabhavādīsu satto visatto loko bhavameva kāmabhavādibhavameva abhinandati. Yaṃ bhavaṃ abhinandati, taṃ jarāmaraṇādianekabyasanānubandhattā bhayānakaṭṭhena bhayaṃ hoti. Yassa yato jarāmaraṇādito bhāyati, taṃ jarāmaraṇādidukkhassa adhiṭṭhānabhāvato dukkhaṃ dukkhādhiṭṭhānaṃ hoti. Iti iminā suttappadesena ayaṃ santāpādiko saṃkileso saṃkilesahetu dassito.

    সংকিলেসো দস্সিতো, ‘‘কেন নিব্বেধো দস্সিতো’’তি ৰত্তব্বত্তা ‘‘ভৰৰিপ্পহানায খো’’তিআদি ৰুত্তং। ভৰৰিপ্পহানায খো পন কামভৰাদিকস্স ভৰস্স পজহনত্থায এৰ ইদং মযা অধিগতং মগ্গব্রহ্মচরিযং ৰুস্সতি। ইতি ইমিনা সুত্তপ্পদেসেন অযং ব্রহ্মচরিযভূতো মগ্গো নিব্বেধো দস্সিতো।

    Saṃkileso dassito, ‘‘kena nibbedho dassito’’ti vattabbattā ‘‘bhavavippahānāya kho’’tiādi vuttaṃ. Bhavavippahānāya kho pana kāmabhavādikassa bhavassa pajahanatthāya eva idaṃ mayā adhigataṃ maggabrahmacariyaṃ vussati. Iti iminā suttappadesena ayaṃ brahmacariyabhūto maggo nibbedho dassito.

    ‘‘ভৰৰিপ্পহানাযা’’তিআদিনা একন্তেন নিয্যানিকমগ্গো নিব্বেধো আচরিযেন দস্সিতো, অম্হেহি চ ঞাতো, ‘‘কতমো অনিয্যানিকমগ্গো’’তি পুচ্ছিতব্বত্তা ‘‘যে হি কেচি সমণা ৰা’’তিআদি ৰুত্তং। হি-সদ্দো ৰাচাসিলিট্ঠত্থো। যে কেচি সমণা ৰা যে কেচি ব্রাহ্মণা ৰা ভৰেন রূপভৰেন ভৰস্স কামভৰস্স ৰিপ্পমোক্খং আহংসু, ভৰেন অরূপভৰেন ভৰস্স কামভৰস্স চেৰ রূপভৰস্স চ ৰিপ্পমোক্খং আহংসু, সব্বে তে সমণা ৰা সব্বে তে ব্রাহ্মণা ৰা ভৰস্মা ৰুত্তপ্পকারভৰতো অৰিপ্পমুত্তা ভৰন্তীতি অহং ৰদামি।

    ‘‘Bhavavippahānāyā’’tiādinā ekantena niyyānikamaggo nibbedho ācariyena dassito, amhehi ca ñāto, ‘‘katamo aniyyānikamaggo’’ti pucchitabbattā ‘‘ye hi keci samaṇā vā’’tiādi vuttaṃ. Hi-saddo vācāsiliṭṭhattho. Ye keci samaṇā vā ye keci brāhmaṇā vā bhavena rūpabhavena bhavassa kāmabhavassa vippamokkhaṃ āhaṃsu, bhavena arūpabhavena bhavassa kāmabhavassa ceva rūpabhavassa ca vippamokkhaṃ āhaṃsu, sabbe te samaṇā vā sabbe te brāhmaṇā vā bhavasmā vuttappakārabhavato avippamuttā bhavantīti ahaṃ vadāmi.

    ‘‘রূপভৰাদিনা যে চ কামভৰাদিভৰস্স ৰিপ্পমোক্খং আহংসূ’’তি ৰত্তব্বত্তা ৰিভৰেন ভৰস্স নিস্সরণং আহংসূতি দস্সেতুং ‘‘যে ৰা পনা’’তিআদি ৰুত্তং। যে ৰা পন কেচি সমণা ৰা যে ৰা পন কেচি ব্রাহ্মণা ৰা ৰিভৰেন উচ্ছেদদিট্ঠিযা ভৰস্স সংসারভৰস্স নিস্সরণং আহংসু, সব্বে তে সমণা ৰা সব্বে তে ব্রাহ্মণা ৰা ভৰস্মা সংসারভৰতো অনিস্সটাৰ হোন্তীতি অহং ৰদামি। ‘‘কস্মা অনিস্সটা’’তি ৰত্তব্বত্তা অনিস্সটকারণং দস্সেতুং ‘‘উপধিং হী’’তিআদি ৰুত্তং। ইদং দুক্খং সংসারদুক্খং উপধিং খন্ধূপধিকিলেসূপধিঅভিসঙ্খারূপধযো পটিচ্চ হি যস্মা সম্ভোতি, তস্মা অনিস্সটা হোন্তি। ইতি ইমিনা সুত্তপ্পদেসেন অযং মিচ্ছাদিট্ঠিসঙ্খাতো সংকিলেসো দস্সিতো।

    ‘‘Rūpabhavādinā ye ca kāmabhavādibhavassa vippamokkhaṃ āhaṃsū’’ti vattabbattā vibhavena bhavassa nissaraṇaṃ āhaṃsūti dassetuṃ ‘‘ye vā panā’’tiādi vuttaṃ. Ye vā pana keci samaṇā vā ye vā pana keci brāhmaṇā vā vibhavena ucchedadiṭṭhiyā bhavassa saṃsārabhavassa nissaraṇaṃ āhaṃsu, sabbe te samaṇā vā sabbe te brāhmaṇā vā bhavasmā saṃsārabhavato anissaṭāva hontīti ahaṃ vadāmi. ‘‘Kasmā anissaṭā’’ti vattabbattā anissaṭakāraṇaṃ dassetuṃ ‘‘upadhiṃ hī’’tiādi vuttaṃ. Idaṃ dukkhaṃ saṃsāradukkhaṃ upadhiṃ khandhūpadhikilesūpadhiabhisaṅkhārūpadhayo paṭicca hi yasmā sambhoti, tasmā anissaṭā honti. Iti iminā suttappadesena ayaṃ micchādiṭṭhisaṅkhāto saṃkileso dassito.

    যে হি ‘‘কেচী’’তিআদিনা সংকিলেসো দস্সিতো, ‘‘কেন নিব্বেধো দস্সিতো’’তি ৰত্তব্বত্তা ‘‘সব্বুপাদানক্খযা’’তিআদি ৰুত্তং। সব্বুপাদানক্খযা অরিযমগ্গতো দুক্খস্স সংসারদুক্খস্স সম্ভৰো নত্থি। ইতি ইমিনা সুত্তপ্পদেসেন অযং অরিযমগ্গো নিব্বেধো দস্সিতো।

    Ye hi ‘‘kecī’’tiādinā saṃkileso dassito, ‘‘kena nibbedho dassito’’ti vattabbattā ‘‘sabbupādānakkhayā’’tiādi vuttaṃ. Sabbupādānakkhayā ariyamaggato dukkhassa saṃsāradukkhassa sambhavo natthi. Iti iminā suttappadesena ayaṃ ariyamaggo nibbedho dassito.

    ‘‘ৰুত্তপ্পকারা অঞ্ঞসুত্তপ্পদেসেনপি দস্সিতো’’তি দস্সেতুং ‘‘লোকমিম’’ন্তিআদি ৰুত্তং। পুথূ ৰিসুং ৰিসুং অৰিজ্জায পরেতং অভিভূতং ভূতরতং ভূতেসু ইত্থিপুরিসেসু অঞ্ঞমঞ্ঞরতং ভূতং খন্ধপঞ্চকং ভৰেহি অপরিমুত্তং ইমং লোকং মম চিত্ত ত্ৰং পস্স। যে কেচি ভৰা ইত্তরখণা ৰা ভৰা, দীঘাযুকা ৰা ভৰা, সাতৰন্তো ৰা ভৰা, অসাতৰন্তো ৰা ভৰা পঞ্চক্খন্ধা সব্বধি ‘‘উদ্ধং অধো তিরিয’’ন্তি ইমেসু সব্বেসু সব্বত্থতায সব্বত্থভাৰেন অহেসুং, সব্বে তে ৰুত্তপ্পকারা ভৰা নিচ্চধুৰরহিতত্তা অনিচ্চা সম্পীল়িতত্তা দুক্খা ৰিপরিণামভাৰতো ৰিপরিণামধম্মা অহেসুং। ইতি ইমিনা সুত্তপ্পদেসেন অযং অৰিজ্জাদিকো সংকিলেসো দস্সিতো।

    ‘‘Vuttappakārā aññasuttappadesenapi dassito’’ti dassetuṃ ‘‘lokamima’’ntiādi vuttaṃ. Puthū visuṃ visuṃ avijjāya paretaṃ abhibhūtaṃ bhūtarataṃ bhūtesu itthipurisesu aññamaññarataṃ bhūtaṃ khandhapañcakaṃ bhavehi aparimuttaṃ imaṃ lokaṃ mama citta tvaṃ passa. Ye keci bhavā ittarakhaṇā vā bhavā, dīghāyukā vā bhavā, sātavanto vā bhavā, asātavanto vā bhavā pañcakkhandhā sabbadhi ‘‘uddhaṃ adho tiriya’’nti imesu sabbesu sabbatthatāya sabbatthabhāvena ahesuṃ, sabbe te vuttappakārā bhavā niccadhuvarahitattā aniccā sampīḷitattā dukkhā vipariṇāmabhāvato vipariṇāmadhammā ahesuṃ. Iti iminā suttappadesena ayaṃ avijjādiko saṃkileso dassito.

    ‘‘লোকমিম’’ন্তিআদিনা সংকিলেসো দস্সিতো, ‘‘কেন নিব্বেধো দস্সিতো’’তি ৰত্তব্বত্তা ‘‘এৰমেত’’ন্তিআদি ৰুত্তং। এৰং ৰুত্তপ্পকারেন এতং খন্ধপঞ্চকং যথাভূতং সম্মপ্পঞ্ঞায সস্স অত্তনো মগ্গপঞ্ঞায, ৰিপস্সনাপঞ্ঞায ৰা পস্সতো পস্সন্তস্স পুগ্গলস্স ভৰতণ্হা পহীযতি, সম্মপ্পঞ্ঞায যথাভূতং খন্ধপঞ্চকং পস্সন্তো ৰিভৰং উচ্ছেদদিট্ঠিং নাভিনন্দতি ন পত্থেতি। তস্স পুগ্গলস্স সব্বসো তণ্হানং খযা অসেসৰিরাগনিরোধো অসেসৰিরাগসঙ্খাতেন মগ্গেন নিরোধো নিরুজ্ঝনং নিব্বানং নিব্বুতি হোতি। ইতি ইমিনা সুত্তপ্পদেসেন অযং মগ্গো নিব্বেধো দস্সিতো।

    ‘‘Lokamima’’ntiādinā saṃkileso dassito, ‘‘kena nibbedho dassito’’ti vattabbattā ‘‘evameta’’ntiādi vuttaṃ. Evaṃ vuttappakārena etaṃ khandhapañcakaṃ yathābhūtaṃ sammappaññāya sassa attano maggapaññāya, vipassanāpaññāya vā passato passantassa puggalassa bhavataṇhā pahīyati, sammappaññāya yathābhūtaṃ khandhapañcakaṃ passanto vibhavaṃ ucchedadiṭṭhiṃ nābhinandati na pattheti. Tassa puggalassa sabbaso taṇhānaṃ khayā asesavirāganirodho asesavirāgasaṅkhātena maggena nirodho nirujjhanaṃ nibbānaṃ nibbuti hoti. Iti iminā suttappadesena ayaṃ maggo nibbedho dassito.

    ‘‘এৰমেত’’ন্তিআদিনা নিব্বেধো দস্সিতো, ‘‘কেন অসেক্খো দস্সিতো’’তি ৰত্তব্বত্তা ‘‘তস্স নিব্বুতস্সা’’তিআদি ৰুত্তং। তণ্হাদিট্ঠিনিব্বুতস্স তস্স ভিক্খুনো অনুপাদা কিলেসাভিসঙ্খারানং অনুপ্পাদনতো অগ্গহণতো পুনব্ভৰো ন হোতি, এৰংভূতেন অরিযপুগ্গলেন পুব্বে অত্তানং অভিভূতো পঞ্চৰিধো মারো ৰিজিতো অহোসি, অনেন অরিযপুগ্গলেন পঞ্চহি মারেহি সঙ্গামো ৰিজিতো, সঙ্গামে, ইট্ঠানিট্ঠাদীসু ৰা তাদী তাদিলক্খণপ্পত্তো অরিযপুগ্গলো সব্বভৰানি উপচ্চগা অতিক্কন্তোৰ জাতো। ইতি ইমিনা সুত্তপ্পদেসেন অযং অসেক্খো দস্সিতো। ইদং ৰুত্তপ্পকারং ‘‘অযং লোকো’’তিআদিকং সুত্তং সংকিলেসভাগে ৰিসযে চ নিব্বেধভাগে ৰিসযে চ অসেক্খভাগে ৰিসযে চ ৰাচকঞাপকভাৰেন একদেসৰসেন পৰত্তনতো সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্তং নাম।

    ‘‘Evameta’’ntiādinā nibbedho dassito, ‘‘kena asekkho dassito’’ti vattabbattā ‘‘tassa nibbutassā’’tiādi vuttaṃ. Taṇhādiṭṭhinibbutassa tassa bhikkhuno anupādā kilesābhisaṅkhārānaṃ anuppādanato aggahaṇato punabbhavo na hoti, evaṃbhūtena ariyapuggalena pubbe attānaṃ abhibhūto pañcavidho māro vijito ahosi, anena ariyapuggalena pañcahi mārehi saṅgāmo vijito, saṅgāme, iṭṭhāniṭṭhādīsu vā tādī tādilakkhaṇappatto ariyapuggalo sabbabhavāni upaccagā atikkantova jāto. Iti iminā suttappadesena ayaṃ asekkho dassito. Idaṃ vuttappakāraṃ ‘‘ayaṃ loko’’tiādikaṃ suttaṃ saṃkilesabhāge visaye ca nibbedhabhāge visaye ca asekkhabhāge visaye ca vācakañāpakabhāvena ekadesavasena pavattanato saṃkilesabhāgiyañca nibbedhabhāgiyañca asekkhabhāgiyañca suttaṃ nāma.

    ‘‘এত্তকমেৰা’’তি ৰত্তব্বত্তা ‘‘চত্তারোমে’’তিআদি ৰুত্তং। অন্ধপুথুজ্জনো সংসারসোতস্স অনুকূলভাৰেন গচ্ছনতো অনুসোতগামী নাম, কল্যাণপুথুজ্জনো সংসারসোতস্স নিব্বিদানুপস্সনাদীহি পটিক্কূলৰসেন পৰত্তনতো পটিসোতগামী নাম, সেক্খো অচলপ্পসাদাদিসমন্নাগমেন ঠিতসভাৰত্তা ঠিতত্তো নাম, অসেক্খো সংসারপারঙ্গতৰসেন তিট্ঠনতো ‘‘থলে তিট্ঠতী’’তি ৰুচ্চতি।

    ‘‘Ettakamevā’’ti vattabbattā ‘‘cattārome’’tiādi vuttaṃ. Andhaputhujjano saṃsārasotassa anukūlabhāvena gacchanato anusotagāmī nāma, kalyāṇaputhujjano saṃsārasotassa nibbidānupassanādīhi paṭikkūlavasena pavattanato paṭisotagāmī nāma, sekkho acalappasādādisamannāgamena ṭhitasabhāvattā ṭhitatto nāma, asekkho saṃsārapāraṅgatavasena tiṭṭhanato ‘‘thale tiṭṭhatī’’ti vuccati.

    ‘‘তেসু চতূসু পুগ্গলেসু কতমো পুগ্গলো সংকিলেসভাগিযাদী’’তি ৰত্তব্বভাৰতো ‘‘তত্থ যোয’’ন্তিআদি ৰুত্তং।

    ‘‘Tesu catūsu puggalesu katamo puggalo saṃkilesabhāgiyādī’’ti vattabbabhāvato ‘‘tattha yoya’’ntiādi vuttaṃ.

    ১১০. নানাৰিধং সংকিলেসভাগিযঞ্চ নিব্বেধভাগিযঞ্চ অসেক্খভাগিযঞ্চ সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং সংকিলেসভাগিযঞ্চ ৰাসনাভাগিযঞ্চ নিব্বেধভাগিযঞ্চ সুত্ত’’ন্তি পুচ্ছিতব্বত্তা ‘‘তত্থ কতম’’ন্তিআদি ৰুত্তং।

    110. Nānāvidhaṃ saṃkilesabhāgiyañca nibbedhabhāgiyañca asekkhabhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca vāsanābhāgiyañca nibbedhabhāgiyañca sutta’’nti pucchitabbattā ‘‘tattha katama’’ntiādi vuttaṃ.

    অভিজাতিযো পুগ্গলা ছ সংৰিজ্জন্তি লোকস্মিং, কণ্হে নীচে কুলে নিব্বত্তো কণ্হাভিজাতিকো, কণ্হধম্মসমন্নাগতত্তা ৰা কণ্হো কণ্হাভিজাতিকো হুত্ৰা কণ্হং কাল়কং দসৰিধং দুস্সীল্যধম্মং অভিজাযতি পসৰতি, এসো পুগ্গলো অত্থি। ৰুত্তপ্পকারেন কণ্হো কণ্হাভিজাতিকো হুত্ৰা সুক্কং দসৰিধং কুসলধম্মং অভিজাযতি, এসো পুগ্গলো অত্থি। কণ্হো কণ্হাভিজাতিকো হুত্ৰা অকণ্হং অসুক্কং অকণ্হঅসুক্কৰিপাকং অচ্চন্তদিট্ঠং নিব্বানং আরাধেতি, এসো পুগ্গলো অত্থি। ৰুত্তৰিপরিযাযেন তযো পুগ্গলা জানিতব্বা।

    Abhijātiyo puggalā cha saṃvijjanti lokasmiṃ, kaṇhe nīce kule nibbatto kaṇhābhijātiko, kaṇhadhammasamannāgatattā vā kaṇho kaṇhābhijātiko hutvā kaṇhaṃ kāḷakaṃ dasavidhaṃ dussīlyadhammaṃ abhijāyati pasavati, eso puggalo atthi. Vuttappakārena kaṇho kaṇhābhijātiko hutvā sukkaṃ dasavidhaṃ kusaladhammaṃ abhijāyati, eso puggalo atthi. Kaṇho kaṇhābhijātiko hutvā akaṇhaṃ asukkaṃ akaṇhaasukkavipākaṃ accantadiṭṭhaṃ nibbānaṃ ārādheti, eso puggalo atthi. Vuttavipariyāyena tayo puggalā jānitabbā.

    ‘‘তেসু কতমে পুগ্গলা সংকিলেসভাগিযা’’তিআদিনা ৰত্তব্বত্তা ‘‘তত্থ যো চা’’তিআদি ৰুত্তং।

    ‘‘Tesu katame puggalā saṃkilesabhāgiyā’’tiādinā vattabbattā ‘‘tattha yo cā’’tiādi vuttaṃ.

    ‘‘এত্তকমেৰা’’তি ৰত্তব্বত্তা ‘‘চত্তারিমানী’’তিআদি ৰুত্তং।

    ‘‘Ettakamevā’’ti vattabbattā ‘‘cattārimānī’’tiādi vuttaṃ.

    ১১১. নানাৰিধং সংকিলেসভাগিযঞ্চ ৰাসনাভাগিযঞ্চ নিব্বেধভাগিযঞ্চ সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং ৰাসনাভাগিযঞ্চ নিব্বেধভাগিযঞ্চ সুত্ত’’ন্তি পুচ্ছিতব্বত্তা ‘‘তত্থ কতমং ৰাসনাভাগিযঞ্চ নিব্বেধভাগিযঞ্চা’’তিআদি ৰুত্তং।

    111. Nānāvidhaṃ saṃkilesabhāgiyañca vāsanābhāgiyañca nibbedhabhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ vāsanābhāgiyañca nibbedhabhāgiyañca sutta’’nti pucchitabbattā ‘‘tattha katamaṃ vāsanābhāgiyañca nibbedhabhāgiyañcā’’tiādi vuttaṃ.

    মানুসত্তং মনুস্সভাৰং লদ্ধান কিচ্চং, অকিচ্চঞ্চ দ্ৰে ভৰন্তি, দ্ৰে কিচ্চানিযেৰ কত্তব্বানি। তেনাহ অট্ঠকথাচরিযো (নেত্তি॰ অট্ঠ॰ ১১১) ‘‘কত্তব্ব’’ন্তি দস্সেতি। ‘‘কতমং কত্তব্বং কিচ্চ’’ন্তি ৰত্তব্বত্তা কত্তব্বকিচ্চং দস্সেতুং ‘‘সুকিচ্চং চেৰা’’তিআদি ৰুত্তং। পুঞ্ঞানি চ কত্তব্বত্তা সুকিচ্চং এৰ, সংযোজনৰিপ্পহানং ৰা কত্তব্বত্তা সুকিচ্চং নামাতি যোজনা।

    Mānusattaṃ manussabhāvaṃ laddhāna kiccaṃ, akiccañca dve bhavanti, dve kiccāniyeva kattabbāni. Tenāha aṭṭhakathācariyo (netti. aṭṭha. 111) ‘‘kattabba’’nti dasseti. ‘‘Katamaṃ kattabbaṃ kicca’’nti vattabbattā kattabbakiccaṃ dassetuṃ ‘‘sukiccaṃ cevā’’tiādi vuttaṃ. Puññāni ca kattabbattā sukiccaṃ eva, saṃyojanavippahānaṃ vā kattabbattā sukiccaṃ nāmāti yojanā.

    ‘‘তত্থ সুত্তে কতমেন কতমো দস্সিতো’’তি ৰত্তব্বত্তা ‘‘সুকিচ্চংচেৰ পুঞ্ঞানীতি ৰাসনা, সংযোজনৰিপ্পহানং ৰাতি নিব্বেধো’’তি ৰুত্তো।

    ‘‘Tattha sutte katamena katamo dassito’’ti vattabbattā ‘‘sukiccaṃceva puññānīti vāsanā, saṃyojanavippahānaṃ vāti nibbedho’’ti vutto.

    ‘‘এত্তকমেৰা’’তি ৰত্তব্বত্তা ‘‘পুঞ্ঞানি করিত্ৰানা’’তিআদি ৰুত্তং। পুঞ্ঞানি করিত্ৰান কতপুঞ্ঞা পুগ্গলা সগ্গা সগ্গতো সগ্গংযেৰ ৰজন্তি। সংযোজনপ্পহানা অরিযা জরামরণা জরামরণতো ৰিপ্পমুচ্চন্তি।

    ‘‘Ettakamevā’’ti vattabbattā ‘‘puññāni karitvānā’’tiādi vuttaṃ. Puññāni karitvāna katapuññā puggalā saggā saggato saggaṃyeva vajanti. Saṃyojanappahānā ariyā jarāmaraṇā jarāmaraṇato vippamuccanti.

    ‘‘তত্থ সুত্তে কতমেন কতমো দস্সিতো’’তি ৰত্তব্বত্তা ‘‘পুঞ্ঞানি করিত্ৰান, সগ্গা সগ্গং ৰজন্তি কতপুঞ্ঞা’তি ৰাসনা, ‘সংযোজনপ্পহানা, জরামরণা ৰিপ্পমুচ্চন্তী’তি নিব্বেধো’’তি ৰুত্তং।

    ‘‘Tattha sutte katamena katamo dassito’’ti vattabbattā ‘‘puññāni karitvāna, saggā saggaṃ vajanti katapuññā’ti vāsanā, ‘saṃyojanappahānā, jarāmaraṇā vippamuccantī’ti nibbedho’’ti vuttaṃ.

    ‘‘এত্তকমেৰা’’তি ৰত্তব্বত্তা ‘‘দ্ৰেমানী’’তিআদি ৰুত্তং। ‘‘কতমেন কতমো দস্সিতো’’তি ৰত্তব্বত্তা ‘‘তত্থ যো…পে॰… অযং নিব্বেধো’’তি ৰুত্তং।

    ‘‘Ettakamevā’’ti vattabbattā ‘‘dvemānī’’tiādi vuttaṃ. ‘‘Katamena katamo dassito’’ti vattabbattā ‘‘tattha yo…pe… ayaṃ nibbedho’’ti vuttaṃ.

    নানাৰিধং ৰাসনাভাগিযঞ্চ নিব্বেধভাগিযঞ্চ সুত্তং আচরিযেন নিদ্ধারিতং, অম্হেহি চ ঞাতং , ‘‘কতমং তণ্হাসংকিলেসভাগিযং সুত্ত’’ন্তি পুচ্ছিতব্বত্তা ‘‘তত্থ তণ্হাসংকিলেসভাগিয’’ন্তিআদি ৰুত্তং। তত্থাতি তেসু সোল়সসু সংকিলেসভাগিযাদীসু সুত্তেসু তণ্হাসংকিলেসভাগিযং সুত্তং তণ্হাপক্খেনেৰ নিদ্দিসিতব্বং, বহুৰিসযত্তা নিযমেত্ৰান নিদ্ধারেস্সামীতি ৰুত্তং হোতি। ‘‘কেন পকারেন নিদ্দিসিতব্ব’’ন্তি ৰত্তব্বত্তা ‘‘তীহি তণ্হাহী’’তিআদি ৰুত্তং। ভৰতণ্হাযাতি রূপভৰতণ্হায। ৰিভৰতণ্হাযাতি অরূপভৰতণ্হায। যেন যেন ৰা পন ৰত্থুনা তণ্হাপভেদউচ্ছেদাদিৰত্থুনা অজ্ঝোসিতা ভৰতণ্হাদিৰসেন অজ্ঝোসিতা, তেন তেন পকারেন তণ্হাদিনা ৰা তণ্হাপভেদউচ্ছেদাদিৰত্থুনা ৰা তণ্হাসংকিলেসভাগিযং সুত্তং নিদ্দিসিতব্বং।

    Nānāvidhaṃ vāsanābhāgiyañca nibbedhabhāgiyañca suttaṃ ācariyena niddhāritaṃ, amhehi ca ñātaṃ , ‘‘katamaṃ taṇhāsaṃkilesabhāgiyaṃ sutta’’nti pucchitabbattā ‘‘tattha taṇhāsaṃkilesabhāgiya’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu taṇhāsaṃkilesabhāgiyaṃ suttaṃ taṇhāpakkheneva niddisitabbaṃ, bahuvisayattā niyametvāna niddhāressāmīti vuttaṃ hoti. ‘‘Kena pakārena niddisitabba’’nti vattabbattā ‘‘tīhi taṇhāhī’’tiādi vuttaṃ. Bhavataṇhāyāti rūpabhavataṇhāya. Vibhavataṇhāyāti arūpabhavataṇhāya. Yena yena vā pana vatthunā taṇhāpabhedaucchedādivatthunā ajjhositā bhavataṇhādivasena ajjhositā, tena tena pakārena taṇhādinā vā taṇhāpabhedaucchedādivatthunā vā taṇhāsaṃkilesabhāgiyaṃ suttaṃ niddisitabbaṃ.

    তণ্হাসংকিলেসভাগিযং সুত্তং তণ্হাপক্খেনেৰ নিদ্দিসিতব্বন্তি আচরিযেন ৰুত্তং, অম্হেহি চ লক্খিতং, ‘‘দিট্ঠিসংকিলেসভাগিযং সুত্তং কেন পক্খেন নিদ্দিসিতব্ব’’ন্তি ৰত্তব্বত্তা ‘‘তত্থ দিট্ঠিসংকিলেসভাগিয’’ন্তিআদি ৰুত্তং। যেন যেন ৰা পন ৰত্থুনাতি দিট্ঠিপ্পভেদঅমরাৰিক্খেপাদিৰত্থুনা।

    Taṇhāsaṃkilesabhāgiyaṃ suttaṃ taṇhāpakkheneva niddisitabbanti ācariyena vuttaṃ, amhehi ca lakkhitaṃ, ‘‘diṭṭhisaṃkilesabhāgiyaṃ suttaṃ kena pakkhena niddisitabba’’nti vattabbattā ‘‘tattha diṭṭhisaṃkilesabhāgiya’’ntiādi vuttaṃ. Yena yena vā pana vatthunāti diṭṭhippabhedaamarāvikkhepādivatthunā.

    দিট্ঠিসংকিলেসভাগিযং সুত্তং দিট্ঠিপক্খেনেৰ নিদ্দিসিতব্বন্তি আচরিযেন ৰুত্তং, অম্হেহি চ লক্খিতং, ‘‘দুচ্চরিতসংকিলেসভাগিযং সুত্তং কেন পকারেন নিদ্দিসিতব্ব’’ন্তি ৰত্তব্বত্তা ‘‘তত্থ দুচ্চরিতসংকিলেসভাগিয’’ন্তিআদি ৰুত্তং। তথেৰ ৰত্তব্বত্তা ‘‘তত্থ তণ্হাৰোদানভাগিয’’ন্তিআদি ৰুত্তং, ‘‘দিট্ঠিৰোদানভাগিয’’ন্তিআদি ৰুত্তং, ‘‘দুচ্চরিতৰোদানভাগিয’’ন্তিআদি ৰুত্তং।

    Diṭṭhisaṃkilesabhāgiyaṃ suttaṃ diṭṭhipakkheneva niddisitabbanti ācariyena vuttaṃ, amhehi ca lakkhitaṃ, ‘‘duccaritasaṃkilesabhāgiyaṃ suttaṃ kena pakārena niddisitabba’’nti vattabbattā ‘‘tattha duccaritasaṃkilesabhāgiya’’ntiādi vuttaṃ. Tatheva vattabbattā ‘‘tattha taṇhāvodānabhāgiya’’ntiādi vuttaṃ, ‘‘diṭṭhivodānabhāgiya’’ntiādi vuttaṃ, ‘‘duccaritavodānabhāgiya’’ntiādi vuttaṃ.

    ১১২. যস্মিং সাসনপট্ঠানে অট্ঠারস মূলপদা দট্ঠব্বা, তং সাসনপট্ঠানং সোল়সহি সংকিলেসভাগিযাদীহি সুত্তেহি একদেসনিদ্ধারণৰসেন ৰিভজিতং, অম্হেহি চ ঞাতং, ‘‘কিং পন তং সাসনপট্ঠানং তেহি সোল়সহি এৰ সংকিলেসভাগিযাদীহি ৰিভজিতব্বং, উদাহু অঞ্ঞেহি সুত্তেহিপি ৰিভজিতব্ব’’ন্তি ৰত্তব্বত্তা অঞ্ঞেহি অট্ঠৰীসসুত্তেহিপি ৰিভজিতুং ‘‘তত্থ কতমে অট্ঠারস মূলপদা? লোকিযং লোকুত্তর’’ন্তিআদি ৰুত্তং । ‘‘যদি অঞ্ঞেহিপি অট্ঠৰীসসুত্তেহি ৰিভজিতব্বং, এৰং সতি ‘লোকিয’ন্তিআদিৰচনমেৰ ৰত্তব্বং, কস্মা ‘তত্থ কতমে অট্ঠারস মূলপদা’তি ৰুত্তা’’তি চে? তস্স সাসনপট্ঠানৰিভাগো অট্ঠারসহি মূলপদেহি সঙ্গহিতো, অট্ঠারস মূলপদাপি ৰিভজিতে সাসনপট্ঠানে দট্ঠব্বা, তস্মা মূলপদা ৰিভত্তাযেৰ। তানি মূলপদানি ৰিভজিতুং ‘‘তত্থ কতমে অট্ঠারস মূলপদা’’তি ৰুত্তং। অট্ঠকথাযং (নেত্তি॰ অট্ঠ॰ ১১২) পন –

    112. Yasmiṃ sāsanapaṭṭhāne aṭṭhārasa mūlapadā daṭṭhabbā, taṃ sāsanapaṭṭhānaṃ soḷasahi saṃkilesabhāgiyādīhi suttehi ekadesaniddhāraṇavasena vibhajitaṃ, amhehi ca ñātaṃ, ‘‘kiṃ pana taṃ sāsanapaṭṭhānaṃ tehi soḷasahi eva saṃkilesabhāgiyādīhi vibhajitabbaṃ, udāhu aññehi suttehipi vibhajitabba’’nti vattabbattā aññehi aṭṭhavīsasuttehipi vibhajituṃ ‘‘tattha katame aṭṭhārasa mūlapadā? Lokiyaṃ lokuttara’’ntiādi vuttaṃ . ‘‘Yadi aññehipi aṭṭhavīsasuttehi vibhajitabbaṃ, evaṃ sati ‘lokiya’ntiādivacanameva vattabbaṃ, kasmā ‘tattha katame aṭṭhārasa mūlapadā’ti vuttā’’ti ce? Tassa sāsanapaṭṭhānavibhāgo aṭṭhārasahi mūlapadehi saṅgahito, aṭṭhārasa mūlapadāpi vibhajite sāsanapaṭṭhāne daṭṭhabbā, tasmā mūlapadā vibhattāyeva. Tāni mūlapadāni vibhajituṃ ‘‘tattha katame aṭṭhārasa mūlapadā’’ti vuttaṃ. Aṭṭhakathāyaṃ (netti. aṭṭha. 112) pana –

    ‘‘এৰং সোল়সৰিধেন সাসনপট্ঠানং নানাসুত্তেহি উদাহরণৰসেন ৰিভজিত্ৰা ইদানি অট্ঠৰীসতিৰিধেন সাসনপট্ঠানং দস্সেন্তেন যস্মা অযম্পি পট্ঠানৰিভাগো মূলপদেহি সঙ্গহিতো, ন ইমস্সাপি তেহি অসঙ্গহিতো পদেসো অত্থি, তস্মা মূলপদং, ৰিভজিতব্বতঞ্চ দস্সেতুং ‘তত্থ কতমে অট্ঠারস মূলপদা’তি পুচ্ছায ৰসেন মূলপদানি উদ্ধরিত্ৰা ‘লোকিযং লোকুত্তর’ন্তিআদিনা নৰ তিকা, থৰো চাতি অট্ঠৰীসতিৰিধং সাসনপট্ঠানং উদ্দিট্ঠ’’ন্তি –

    ‘‘Evaṃ soḷasavidhena sāsanapaṭṭhānaṃ nānāsuttehi udāharaṇavasena vibhajitvā idāni aṭṭhavīsatividhena sāsanapaṭṭhānaṃ dassentena yasmā ayampi paṭṭhānavibhāgo mūlapadehi saṅgahito, na imassāpi tehi asaṅgahito padeso atthi, tasmā mūlapadaṃ, vibhajitabbatañca dassetuṃ ‘tattha katame aṭṭhārasa mūlapadā’ti pucchāya vasena mūlapadāni uddharitvā ‘lokiyaṃ lokuttara’ntiādinā nava tikā, thavo cāti aṭṭhavīsatividhaṃ sāsanapaṭṭhānaṃ uddiṭṭha’’nti –

    ৰুত্তং। তত্থাতি তেসু সোল়সহারপঞ্চকনযঅট্ঠারসমূলপদেসু কতমানি পদানি মূলপদানি হোন্তীতি পুচ্ছতি। লোকে নিযুত্তো সভাৰধম্মোতি লোকিযো, লোকে ৰা ৰিদূহি ৰিদিতো সভাৰোতিপি লোকিযো, লোকিযো সভাৰধম্মো অস্স ৰিসেসসুত্তস্স অত্থীতি তং ৰিসেসসুত্তং লোকিযং নাম। এস নযো ‘‘লোকুত্তর’’ন্তিআদীসুপি ৰেদিতব্বো। জানাতীতি ঞাণং, ঞাণং অস্স ৰিসেসসুত্তস্স অত্থীতি ঞাণং। ঞাতব্বাতি ঞেয্যা, ঞেয্যা অস্স ৰিসেসসুত্তস্স অত্থীতি ঞেয্যং। এসেৰ নযো – ‘‘ঞাণঞ্চ ঞেয্যঞ্চা’’তি এত্থাপি ৰেদিতব্বো। নিব্বানং পঠমং পস্সতীতি দস্সনং, পঠমমগ্গঞাণং, দস্সনং অস্স ৰিসেসসুত্তস্স অত্থীতি দস্সনং। ভাৰনা অস্স ৰিসেসসুত্তস্স পাল়িযা অত্থীতি ভাৰনা। ‘‘দস্সনঞ্চ ভাৰনা চা’’তি এত্থাপি এস নযো ৰেদিতব্বো। সস্স অত্তনো ৰচনন্তি সকং, সকং ৰচনং সকৰচনং, ভগৰতো ৰচনন্তি অত্থো। পরস্স ৰচনং পরৰচনং। ৰিস্সজ্জনীযো অস্স ৰিসেসসুত্তস্স অত্থীতি ৰিস্সজ্জনীযং। নত্থি ৰিস্সজ্জনীযো অস্স ৰিসেসসুত্তস্সাতি অৰিস্সজ্জনীযং। কম্মং অস্স ৰিসেসসুত্তস্স অত্থীতি কম্মং। ৰিপাকো অস্স পাঠস্স অত্থীতি ৰিপাকো । সেসেসুপি অস্সত্থিঅত্থো গহেতব্বো। অথ ৰা লোকিযাদিঅত্থো মুখ্যত্থো, তংৰাচকসুত্তম্পি ঠান্যূপচারেন ৰুত্তং। বুদ্ধাদীনং গুণে অভিত্থৰতি এতেন সুত্তপ্পদেসেনাতি থৰো, সুত্তপ্পদেসো।

    Vuttaṃ. Tatthāti tesu soḷasahārapañcakanayaaṭṭhārasamūlapadesu katamāni padāni mūlapadāni hontīti pucchati. Loke niyutto sabhāvadhammoti lokiyo, loke vā vidūhi vidito sabhāvotipi lokiyo, lokiyo sabhāvadhammo assa visesasuttassa atthīti taṃ visesasuttaṃ lokiyaṃ nāma. Esa nayo ‘‘lokuttara’’ntiādīsupi veditabbo. Jānātīti ñāṇaṃ, ñāṇaṃ assa visesasuttassa atthīti ñāṇaṃ. Ñātabbāti ñeyyā, ñeyyā assa visesasuttassa atthīti ñeyyaṃ. Eseva nayo – ‘‘ñāṇañca ñeyyañcā’’ti etthāpi veditabbo. Nibbānaṃ paṭhamaṃ passatīti dassanaṃ, paṭhamamaggañāṇaṃ, dassanaṃ assa visesasuttassa atthīti dassanaṃ. Bhāvanā assa visesasuttassa pāḷiyā atthīti bhāvanā. ‘‘Dassanañca bhāvanā cā’’ti etthāpi esa nayo veditabbo. Sassa attano vacananti sakaṃ, sakaṃ vacanaṃ sakavacanaṃ, bhagavato vacananti attho. Parassa vacanaṃ paravacanaṃ. Vissajjanīyo assa visesasuttassa atthīti vissajjanīyaṃ. Natthi vissajjanīyo assa visesasuttassāti avissajjanīyaṃ. Kammaṃ assa visesasuttassa atthīti kammaṃ. Vipāko assa pāṭhassa atthīti vipāko. Sesesupi assatthiattho gahetabbo. Atha vā lokiyādiattho mukhyattho, taṃvācakasuttampi ṭhānyūpacārena vuttaṃ. Buddhādīnaṃ guṇe abhitthavati etena suttappadesenāti thavo, suttappadeso.

    ‘‘তেসু অট্ঠৰীসতিৰিধেসু লোকিযাদীসু সাসনপট্ঠানসুত্তেসু কতমং সুত্তং লোকিযং সুত্ত’’ন্তি পুচ্ছিতব্বত্তা ‘‘তত্থ কতমং লোকিয’’ন্তিআদি ৰুত্তং। তত্থাতি তেসু অট্ঠৰীসতিৰিধেসু লোকিযাদীসু সাসনপট্ঠানসুত্তেসু কতমং সুত্তং লোকিযং সাসনপট্ঠানং সুত্তন্তি পুচ্ছতি।

    ‘‘Tesu aṭṭhavīsatividhesu lokiyādīsu sāsanapaṭṭhānasuttesu katamaṃ suttaṃ lokiyaṃ sutta’’nti pucchitabbattā ‘‘tattha katamaṃ lokiya’’ntiādi vuttaṃ. Tatthāti tesu aṭṭhavīsatividhesu lokiyādīsu sāsanapaṭṭhānasuttesu katamaṃ suttaṃ lokiyaṃ sāsanapaṭṭhānaṃ suttanti pucchati.

    ভিক্খৰে, ধেনুযা থনেহি নিক্খন্তং সজ্জুখীরং নিক্খন্তক্খণে ন মুচ্চতি ন পরিণমতি খীরভাৰং পজহিত্ৰা দধিভাৰং ন পাপুণাতি, তক্কাদিঅম্বিলসমাযোগতো পচ্ছা খীরভাৰং পজহতি দধিভাৰং পাপুণাতি ইৰ, এৰং যেন বালেন পাপং যং কম্মং কতং, তং কম্মং করণক্খণে তস্স বালস্স অপাযদুক্খাদিনিব্বত্তাপনৰসেন ন ৰিপচ্চতি। দুতিযে পন ৰা ততিযাদিম্হি ৰা অত্তভাৰে ৰিপচ্চতি। ভস্মচ্ছন্নো ছারিকায পটিচ্ছন্নো পাৰকো অগ্গি অক্কন্তং জনং অক্কমনক্খণে ন ডহতি। ছারিকং পন তাপেত্ৰা কালন্তরে ডহতি ইৰ, এৰং যেন বালেন পাপং যং কম্মং কতং, তং কম্মং করণক্খণে তং বালং অপাযদুক্খাদিনিব্বত্তাপনৰসেন ডহাপেন্তং হুত্ৰা ন অন্ৰেতি। দুতিযে ৰা ততিযাদিম্হি ৰা অত্তভাৰে অপাযদুক্খাদিনিব্বত্তাপনৰসেন ডহাপেন্তং হুত্ৰা ডহন্তং তং বালং তং অন্ৰেতীতি যোজনা। ইদং ‘‘ন হি…পে॰… পাৰকো’’তি সুত্তং লোকিযে অত্থে ৰাচকঞাপকভাৰেন পৰত্তনতো লোকিযং নাম।

    Bhikkhave, dhenuyā thanehi nikkhantaṃ sajjukhīraṃ nikkhantakkhaṇe na muccati na pariṇamati khīrabhāvaṃ pajahitvā dadhibhāvaṃ na pāpuṇāti, takkādiambilasamāyogato pacchā khīrabhāvaṃ pajahati dadhibhāvaṃ pāpuṇāti iva, evaṃ yena bālena pāpaṃ yaṃ kammaṃ kataṃ, taṃ kammaṃ karaṇakkhaṇe tassa bālassa apāyadukkhādinibbattāpanavasena na vipaccati. Dutiye pana vā tatiyādimhi vā attabhāve vipaccati. Bhasmacchanno chārikāya paṭicchanno pāvako aggi akkantaṃ janaṃ akkamanakkhaṇe na ḍahati. Chārikaṃ pana tāpetvā kālantare ḍahati iva, evaṃ yena bālena pāpaṃ yaṃ kammaṃ kataṃ, taṃ kammaṃ karaṇakkhaṇe taṃ bālaṃ apāyadukkhādinibbattāpanavasena ḍahāpentaṃ hutvā na anveti. Dutiye vā tatiyādimhi vā attabhāve apāyadukkhādinibbattāpanavasena ḍahāpentaṃ hutvā ḍahantaṃ taṃ bālaṃ taṃ anvetīti yojanā. Idaṃ ‘‘na hi…pe… pāvako’’ti suttaṃ lokiye atthe vācakañāpakabhāvena pavattanato lokiyaṃ nāma.

    ‘‘এত্তকমেৰ লোকিয’’ন্তি ৰত্তব্বত্তা ‘‘চত্তারিমানী’’তিআদি ৰুত্তং। অত্থো পাকটো। ইদং ‘‘চত্তারিমানি…পে॰… কাল়পক্খেৰ চন্দিমা’’তি সুত্তং লোকিযে অত্থে ৰাচকঞাপকভাৰেন পৰত্তনতো লোকিযং নাম।

    ‘‘Ettakameva lokiya’’nti vattabbattā ‘‘cattārimānī’’tiādi vuttaṃ. Attho pākaṭo. Idaṃ ‘‘cattārimāni…pe… kāḷapakkheva candimā’’ti suttaṃ lokiye atthe vācakañāpakabhāvena pavattanato lokiyaṃ nāma.

    ‘‘এৰং দুৰিধংযেৰ লোকিয’’ন্তি ৰত্তব্বত্তা ‘‘অট্ঠিমে, ভিক্খৰে, লোকধম্মা’’তিআদি ৰুত্তং। অত্থো পাকটো। ইদং ‘‘অট্ঠিমে’’তিআদিকং সুত্তং লোকিযেসু অট্ঠৰিধেসু অত্থেসু ৰাচকঞাপকভাৰেন পৰত্তনতো লোকিযং নাম।

    ‘‘Evaṃ duvidhaṃyeva lokiya’’nti vattabbattā ‘‘aṭṭhime, bhikkhave, lokadhammā’’tiādi vuttaṃ. Attho pākaṭo. Idaṃ ‘‘aṭṭhime’’tiādikaṃ suttaṃ lokiyesu aṭṭhavidhesu atthesu vācakañāpakabhāvena pavattanato lokiyaṃ nāma.

    নানাৰিধং লোকিযং আচরিযেন নিদ্ধারিতং, অম্হেহি চ ঞাতং, ‘‘কতমং সুত্তং লোকুত্তর’’ন্তি ৰত্তব্বত্তা ‘‘তত্থ কতমং লোকুত্তর’’ন্তিআদি ৰুত্তং । ইতো পরেসুপি এস নযো ৰেদিতব্বো। তত্থাতি তেসু অট্ঠৰীসতিৰিধেসু লোকিযাদীসু সুত্তেসু।

    Nānāvidhaṃ lokiyaṃ ācariyena niddhāritaṃ, amhehi ca ñātaṃ, ‘‘katamaṃ suttaṃ lokuttara’’nti vattabbattā ‘‘tattha katamaṃ lokuttara’’ntiādi vuttaṃ . Ito paresupi esa nayo veditabbo. Tatthāti tesu aṭṭhavīsatividhesu lokiyādīsu suttesu.

    ছেকেন সারথিনা সুদন্তা অস্সা সমথঙ্গতা যথা, এৰং পহীনমানস্স পহীননৰৰিধমানস্স যস্স অনাসৰস্স ভিক্খুনো ইন্দ্রিযানি ছব্বিধানি চক্খুন্দ্রিযাদীনি সমথঙ্গতানি। তাদিনো তাদিলক্খণেন সমন্নাগতস্স অনাসৰস্স তস্স ভিক্খুনো দেৰাপি মনুস্সাপি পিহযন্তীতি যোজনা। ইদং ‘‘যস্সিন্দ্রিযানী’’তিআদিকং সুত্তং লোকুত্তরে অত্থে ৰাচকঞাপকভাৰেন পৰত্তনতো লোকুত্তরং নাম।

    Chekena sārathinā sudantā assā samathaṅgatā yathā, evaṃ pahīnamānassa pahīnanavavidhamānassa yassa anāsavassa bhikkhuno indriyāni chabbidhāni cakkhundriyādīni samathaṅgatāni. Tādino tādilakkhaṇena samannāgatassa anāsavassa tassa bhikkhuno devāpi manussāpi pihayantīti yojanā. Idaṃ ‘‘yassindriyānī’’tiādikaṃ suttaṃ lokuttare atthe vācakañāpakabhāvena pavattanato lokuttaraṃ nāma.

    ‘‘এত্তকমেৰা’’তি ৰত্তব্বত্তা ‘‘পঞ্চিমানি ভিক্খৰে ইন্দ্রিযানী’’তিআদি ৰুত্তং। ইদং ‘‘পঞ্চিমানী’’তিআদিকং সুত্তম্পি লোকুত্তরে অত্থে ৰাচকঞাপকভাৰেন পৰত্তনতো লোকুত্তরং নাম। (১)

    ‘‘Ettakamevā’’ti vattabbattā ‘‘pañcimāni bhikkhave indriyānī’’tiādi vuttaṃ. Idaṃ ‘‘pañcimānī’’tiādikaṃ suttampi lokuttare atthe vācakañāpakabhāvena pavattanato lokuttaraṃ nāma. (1)

    ‘‘লদ্ধান মানুসত্তং দ্ৰে, কিচ্চং অকিচ্চমেৰ চা’’তিআদিকা দ্ৰে গাথা ৰুত্তা। ইহ গাথাসু ‘‘সুকিচ্চং চেৰ পুঞ্ঞানী’’তি যং গাথাপদঞ্চ ‘‘পুঞ্ঞানি করিত্ৰান, সগ্গা সগ্গং ৰজন্তি কতপুঞ্ঞা’’তি যং গাথাপদঞ্চ ৰুত্তং, ইদং গাথাপদং লোকিযে অত্থে ৰাচকঞাপকভাৰেন পৰত্তনতো লোকিযং নাম।

    ‘‘Laddhāna mānusattaṃ dve, kiccaṃ akiccameva cā’’tiādikā dve gāthā vuttā. Iha gāthāsu ‘‘sukiccaṃ ceva puññānī’’ti yaṃ gāthāpadañca ‘‘puññāni karitvāna, saggā saggaṃ vajanti katapuññā’’ti yaṃ gāthāpadañca vuttaṃ, idaṃ gāthāpadaṃ lokiye atthe vācakañāpakabhāvena pavattanato lokiyaṃ nāma.

    ইহ গাথাসু ‘‘সংযোজনৰিপ্পহানং ৰা’’তি যং গাথাপদঞ্চ ‘‘সংযোজনৰিপ্পহানা, জরামরণা ৰিপ্পমুচ্চন্তী’’তি যং গাথাপদঞ্চ ৰুত্তং, ইদং গাথাপদং ৰুত্তনযেন লোকুত্তরং নাম। ইদং ‘‘লদ্ধানা’’তিআদিকং ৰুত্তপ্পকারেন লোকিযঞ্চ লোকুত্তরঞ্চ।

    Iha gāthāsu ‘‘saṃyojanavippahānaṃ vā’’ti yaṃ gāthāpadañca ‘‘saṃyojanavippahānā, jarāmaraṇā vippamuccantī’’ti yaṃ gāthāpadañca vuttaṃ, idaṃ gāthāpadaṃ vuttanayena lokuttaraṃ nāma. Idaṃ ‘‘laddhānā’’tiādikaṃ vuttappakārena lokiyañca lokuttarañca.

    ভিক্খৰে, ৰিঞ্ঞাণে আহারে আহারপটিবদ্ধে ছন্দরাগে সতি নামরূপস্স অৰক্কন্তি হোতি। ‘‘ৰিঞ্ঞাণে…পে॰… হোতী’’তি ইদং ৰুত্তনযেন লোকিযং নাম। ‘‘ৰিঞ্ঞাণে…পে॰… নিরোধো’’তি ইদং সুত্তং লোকুত্তরং নাম। ইদং ‘‘ৰিঞ্ঞাণে চে ভিক্খৰে’’তিআদিকং সুত্তং লোকিযে অত্থে চ লোকুত্তরে অত্থে চ একদেসৰসেন ৰাচকঞাপকৰসেন পৰত্তনতো লোকিযঞ্চ লোকুত্তরঞ্চ। (২)

    Bhikkhave, viññāṇe āhāre āhārapaṭibaddhe chandarāge sati nāmarūpassa avakkanti hoti. ‘‘Viññāṇe…pe… hotī’’ti idaṃ vuttanayena lokiyaṃ nāma. ‘‘Viññāṇe…pe… nirodho’’ti idaṃ suttaṃ lokuttaraṃ nāma. Idaṃ ‘‘viññāṇe ce bhikkhave’’tiādikaṃ suttaṃ lokiye atthe ca lokuttare atthe ca ekadesavasena vācakañāpakavasena pavattanato lokiyañca lokuttarañca. (2)

    ১১৩. সত্তলোকে সব্বা দিসা অনুপরিগম্ম ক্ৰচি দিসাযং চেতসা অত্তনা অত্ততো পিযতরং অঞ্ঞং নেৰ অজ্ঝগা, অত্তাৰ পিযতরো যথা , এৰং পরেসং সত্তানং পুথু ৰিসুং ৰিসুং অত্তাৰ পিযো পিযতরো, তস্মা অত্তনোৰ পিযতরত্তা অত্তকামো অত্তনো হিতকামো পণ্ডিতো সত্তলোকো অত্তানং উপমং কত্ৰা পরং ন হিংসে ন হিংসেয্যাতি যোজনা। ইদং ‘‘সব্বা দিসা’’তিআদিকং সুত্তং সত্তেসু ৰাচকঞাপকভাৰেন পৰত্তনতো সত্তাধিট্ঠানং নাম।

    113. Sattaloke sabbā disā anuparigamma kvaci disāyaṃ cetasā attanā attato piyataraṃ aññaṃ neva ajjhagā, attāva piyataro yathā , evaṃ paresaṃ sattānaṃ puthu visuṃ visuṃ attāva piyo piyataro, tasmā attanova piyatarattā attakāmo attano hitakāmo paṇḍito sattaloko attānaṃ upamaṃ katvā paraṃ na hiṃse na hiṃseyyāti yojanā. Idaṃ ‘‘sabbā disā’’tiādikaṃ suttaṃ sattesu vācakañāpakabhāvena pavattanato sattādhiṭṭhānaṃ nāma.

    যে কেচি খীণাসৰা পুগ্গলা ভূতাৰ ন ভৰিস্সন্তি, সব্বে তে খীণাসৰা পুগ্গলা দেহং অত্তভাৰং পহায নিব্বানং গমিস্সন্তি। যে চ পুথুজ্জনাদযো সত্তা পুনব্ভৰেসু ভৰিস্সন্তি, সব্বে তে পুথুজ্জনাদযো সত্তা দেহং অত্তভাৰং পহায পরলোকং গমিস্সন্তি, তং সব্বজানিং সব্বস্স সত্তস্স হানিং মরণং, ৰিনাসং ৰা কুসলো যো পুগ্গলো ৰিজানাতি, সো কুসলো পুগ্গলো তং সব্বজানিং ৰিদিত্ৰা আতাপিযো ব্রহ্মচরিযং চরেয্যাতি যোজনা। ইদং ‘‘যে কেচী’’তিআদিকং ৰুত্তনযেন সত্তাধিট্ঠানং।

    Ye keci khīṇāsavā puggalā bhūtāva na bhavissanti, sabbe te khīṇāsavā puggalā dehaṃ attabhāvaṃ pahāya nibbānaṃ gamissanti. Ye ca puthujjanādayo sattā punabbhavesu bhavissanti, sabbe te puthujjanādayo sattā dehaṃ attabhāvaṃ pahāya paralokaṃ gamissanti, taṃ sabbajāniṃ sabbassa sattassa hāniṃ maraṇaṃ, vināsaṃ vā kusalo yo puggalo vijānāti, so kusalo puggalo taṃ sabbajāniṃ viditvā ātāpiyo brahmacariyaṃ careyyāti yojanā. Idaṃ ‘‘ye kecī’’tiādikaṃ vuttanayena sattādhiṭṭhānaṃ.

    সত্তহি অঙ্গেহি সমন্নাগতং কল্যাণমিত্তং যাৰজীৰং কুসলেন পুগ্গলেন ন ৰিজহিতব্বং। কতমেহি সত্তহি? পরিসুদ্ধসীলসম্পত্তিপরিসুদ্ধদিট্ঠিসম্পত্তীহি সমন্নাগতত্তা পিযো চ পিযাযিতব্বো চ হোতি, পাসাণছত্তং ৰিয গরু চ হোতি, সম্ভাৰেতব্বতায ভাৰনীযো চ হোতি, ‘‘কালেন ৰদামি, নো অকালেনা’’তিআদিকে পঞ্চধম্মে অত্তনি উপট্ঠাপেত্ৰা সব্রহ্মচারীনং ৰা সিস্সানং ৰা ৰিনিচ্ছযউল্লুম্পনওৰাদদানভাৰে ঠত্ৰা ৰত্তা চ হোতি, সব্রহ্মচারীহি ৰা সিস্সাদীহি ৰা ৰুচ্চমানো সুৰচো হুত্ৰা তেসং ৰচনক্খমো চ হোতি, সচ্চপটিচ্চসমুপ্পাদাদিগম্ভীরং ৰা অঞ্ঞং গম্ভীরং ৰা কথং কত্তা চ হোতি, ধম্মৰিনযাদিৰসেনেৰ দীপনতো অট্ঠানে চ ন নিযোজকো হোতি। ইমেহি সত্তহি অঙ্গেহি সমন্নাগতং কল্যাণমিত্তং যাৰজীৰং ন ৰিজহিতব্বং। ইদং ‘‘সত্তহী’’তিআদিৰচনং ভগৰা অৰোচ। ইদং ‘‘সত্তহী’’তিআদিকং ৰচনং সুগতো ৰত্ৰা অথাপরং এতং গাথাৰচনং সত্থা অৰোচ। কিং অৰোচ?

    Sattahi aṅgehi samannāgataṃ kalyāṇamittaṃ yāvajīvaṃ kusalena puggalena na vijahitabbaṃ. Katamehi sattahi? Parisuddhasīlasampattiparisuddhadiṭṭhisampattīhi samannāgatattā piyo ca piyāyitabbo ca hoti, pāsāṇachattaṃ viya garu ca hoti, sambhāvetabbatāya bhāvanīyo ca hoti, ‘‘kālena vadāmi, no akālenā’’tiādike pañcadhamme attani upaṭṭhāpetvā sabrahmacārīnaṃ vā sissānaṃ vā vinicchayaullumpanaovādadānabhāve ṭhatvā vattā ca hoti, sabrahmacārīhi vā sissādīhi vā vuccamāno suvaco hutvā tesaṃ vacanakkhamo ca hoti, saccapaṭiccasamuppādādigambhīraṃ vā aññaṃ gambhīraṃ vā kathaṃ kattā ca hoti, dhammavinayādivaseneva dīpanato aṭṭhāne ca na niyojako hoti. Imehi sattahi aṅgehi samannāgataṃ kalyāṇamittaṃ yāvajīvaṃ na vijahitabbaṃ. Idaṃ ‘‘sattahī’’tiādivacanaṃ bhagavā avoca. Idaṃ ‘‘sattahī’’tiādikaṃ vacanaṃ sugato vatvā athāparaṃ etaṃ gāthāvacanaṃ satthā avoca. Kiṃ avoca?

    ‘‘পিযো গরু ভাৰনীযো, ৰত্তা চ ৰচনক্খমো।

    ‘‘Piyo garu bhāvanīyo, vattā ca vacanakkhamo;

    গম্ভীরঞ্চ কথং কত্তা, ন চট্ঠানে নিযোজকো।

    Gambhīrañca kathaṃ kattā, na caṭṭhāne niyojako;

    তং মিত্তং মিত্তকামেন, যাৰজীৰম্পি সেৰিয’’ন্তি॥ –

    Taṃ mittaṃ mittakāmena, yāvajīvampi seviya’’nti. –

    এতং গাথাৰচনং সত্থা অৰোচাতি যোজনা। ‘‘ন চ অট্ঠানযোজকো’’তি পাঠো অত্থি। ইদং ‘‘সত্তহী’’তিআদিকং ৰচনং সত্তাধিট্ঠানং।

    Etaṃ gāthāvacanaṃ satthā avocāti yojanā. ‘‘Na ca aṭṭhānayojako’’ti pāṭho atthi. Idaṃ ‘‘sattahī’’tiādikaṃ vacanaṃ sattādhiṭṭhānaṃ.

    লোকে যং কামসুখঞ্চ যং ইদং দিৰিযং সুখঞ্চ অত্থি, এতে কামসুখদিৰিযসুখা তণ্হাক্খযসুখস্স সোল়সিং কলং ন অগ্ঘন্তীতি যোজনা। ইদং ‘‘যঞ্চা’’তিআদিকং সুত্তং ধম্মাধিট্ঠানং।

    Loke yaṃ kāmasukhañca yaṃ idaṃ diviyaṃ sukhañca atthi, ete kāmasukhadiviyasukhā taṇhākkhayasukhassa soḷasiṃ kalaṃ na agghantīti yojanā. Idaṃ ‘‘yañcā’’tiādikaṃ suttaṃ dhammādhiṭṭhānaṃ.

    যত্থ নিব্বানে দুক্খং নিরুজ্ঝতি, সম্মাসম্বুদ্ধদেসিতং অসোকং ৰিরজং খেমং তং নিব্বানং সুসুখং ৰতাতি যোজনা। ইদং ‘‘সুসুখ’’ন্তিআদিকং সুত্তম্পি ধম্মাধিট্ঠানং। (৩)

    Yattha nibbāne dukkhaṃ nirujjhati, sammāsambuddhadesitaṃ asokaṃ virajaṃ khemaṃ taṃ nibbānaṃ susukhaṃ vatāti yojanā. Idaṃ ‘‘susukha’’ntiādikaṃ suttampi dhammādhiṭṭhānaṃ. (3)

    তীসু ভৰেসু সত্তানং জননতো তণ্হাসঙ্খাতং মাতরঞ্চ, পিতরং নিস্সায মানস্স উপ্পজ্জনতো মানসঙ্খাতং পিতরঞ্চ, রট্ঠে লোকো রট্ঠিস্সরং রাজানং ভজতি ৰিয দ্ৰিন্নং সস্সতুচ্ছেদদিট্ঠীনং সব্বদিট্ঠিগতেহি ভজনীযত্তা সস্সতুচ্ছেদদিট্ঠিসঙ্খাতে খত্তিযে দ্ৰে রাজানো চ, আযসাধকো পুরিসো রট্ঠে অত্থং অনুচরতি ইৰ নন্দিরাগস্স দ্ৰাদসাযতনে অনুচরণতো নন্দিরাগসঙ্খাতেন অনুচরণেন সহ পৰত্তনট্ঠানং দ্ৰাদসাযতনসঙ্খাতং রট্ঠঞ্চ খীণাসৰো যো ব্রাহ্মণো হনতি, সো ব্রাহ্মণো হন্ত্ৰা অনীঘো নিদ্দুক্খো হুত্ৰা যাতীতি যোজনা। ইহ ‘‘মাতর’’ন্তিআদিগাথাযং ‘‘মাতরং…পে॰… হন্ত্ৰা’’তি ইদং গাথাৰচনং ধম্মাধিট্ঠানং। ‘‘অনীঘো যাতি ব্রাহ্মণো’’তি ইদং গাথাৰচনং সত্তাধিট্ঠানং। ইদং ‘‘মাতর’’ন্তিআদিকং সুত্তং সত্তাধিট্ঠানঞ্চ ধম্মাধিট্ঠানঞ্চ।

    Tīsu bhavesu sattānaṃ jananato taṇhāsaṅkhātaṃ mātarañca, pitaraṃ nissāya mānassa uppajjanato mānasaṅkhātaṃ pitarañca, raṭṭhe loko raṭṭhissaraṃ rājānaṃ bhajati viya dvinnaṃ sassatucchedadiṭṭhīnaṃ sabbadiṭṭhigatehi bhajanīyattā sassatucchedadiṭṭhisaṅkhāte khattiye dve rājāno ca, āyasādhako puriso raṭṭhe atthaṃ anucarati iva nandirāgassa dvādasāyatane anucaraṇato nandirāgasaṅkhātena anucaraṇena saha pavattanaṭṭhānaṃ dvādasāyatanasaṅkhātaṃ raṭṭhañca khīṇāsavo yo brāhmaṇo hanati, so brāhmaṇo hantvā anīgho niddukkho hutvā yātīti yojanā. Iha ‘‘mātara’’ntiādigāthāyaṃ ‘‘mātaraṃ…pe… hantvā’’ti idaṃ gāthāvacanaṃ dhammādhiṭṭhānaṃ. ‘‘Anīgho yāti brāhmaṇo’’ti idaṃ gāthāvacanaṃ sattādhiṭṭhānaṃ. Idaṃ ‘‘mātara’’ntiādikaṃ suttaṃ sattādhiṭṭhānañca dhammādhiṭṭhānañca.

    ‘‘চত্তারোমে ভিক্খৰে ইদ্ধিপাদা’’তি ইদং সুত্তপ্পদেসৰচনং ধম্মাধিট্ঠানং। সো চতূহি ইদ্ধিপাদেহি সমন্নাগতো পুগ্গলো কাযেপি করজকাযেপি চিত্তং পাদকজ্ঝানচিত্তং সমোদহতি পক্খিপতি, সো পুগ্গলো দিস্সমানকাযেন গন্তুকামো করজকাযগতিকং পাদকজ্ঝানচিত্তং অধিট্ঠহতি। চিত্তেপি পাদকজ্ঝানচিত্তেপি কাযং করজকাযং সমোদহতি পক্খিপতি, সো পুগ্গলো সীঘং অঞ্ঞং গন্তুকামো পাদকজ্ঝানচিত্তগতিকং করজকাযং অধিট্ঠহতি। কাযে করজকাযে সুখসঞ্ঞঞ্চ সুখৰিহারসঞ্ঞঞ্চ লহুসঞ্ঞঞ্চ লহুগমনসঞ্ঞঞ্চ ওক্কমিত্ৰা অঞ্ঞং গমনেয্যং ইচ্ছিতট্ঠানং একচিত্তক্খণেনেৰ চ গন্ত্ৰা উপসম্পজ্জ ৰিহরতি। ইদং ‘‘সো’’তিআদিকং সুত্তপ্পদেসৰচনং সত্তাধিট্ঠানং। ইদং ‘‘চত্তারোমে’’তিআদিকং সুত্তং সত্তাধিট্ঠানঞ্চ ধম্মাধিট্ঠানঞ্চ। (৪)

    ‘‘Cattārome bhikkhave iddhipādā’’ti idaṃ suttappadesavacanaṃ dhammādhiṭṭhānaṃ. So catūhi iddhipādehi samannāgato puggalo kāyepi karajakāyepi cittaṃ pādakajjhānacittaṃ samodahati pakkhipati, so puggalo dissamānakāyena gantukāmo karajakāyagatikaṃ pādakajjhānacittaṃ adhiṭṭhahati. Cittepi pādakajjhānacittepi kāyaṃ karajakāyaṃ samodahati pakkhipati, so puggalo sīghaṃ aññaṃ gantukāmo pādakajjhānacittagatikaṃ karajakāyaṃ adhiṭṭhahati. Kāye karajakāye sukhasaññañca sukhavihārasaññañca lahusaññañca lahugamanasaññañca okkamitvā aññaṃ gamaneyyaṃ icchitaṭṭhānaṃ ekacittakkhaṇeneva ca gantvā upasampajja viharati. Idaṃ ‘‘so’’tiādikaṃ suttappadesavacanaṃ sattādhiṭṭhānaṃ. Idaṃ ‘‘cattārome’’tiādikaṃ suttaṃ sattādhiṭṭhānañca dhammādhiṭṭhānañca. (4)

    ১১৪. যং সব্বঞ্ঞুতঞাণং লোকুত্তরং লোকং উত্তরিত্ৰা অভিভৰিত্ৰা ঠিতং, যেন সব্বঞ্ঞুতঞ্ঞাণেন ভগৰা ‘‘সব্বঞ্ঞূ’’তি ৰুচ্চতি, তস্স সব্বঞ্ঞুতঞ্ঞাণস্স পরিহানং নত্থি, তং সব্বঞ্ঞুতঞ্ঞাণং সব্বকালে জানিতুং আৰজ্জনকালে পৰত্ততীতি যোজনা। ইদং ‘‘যং ত’’ন্তিআদিকং ঞাণে অত্থে ৰাচকঞাপকভাৰেনপি পৰত্তনতো ঞাণং নাম।

    114. Yaṃ sabbaññutañāṇaṃ lokuttaraṃ lokaṃ uttaritvā abhibhavitvā ṭhitaṃ, yena sabbaññutaññāṇena bhagavā ‘‘sabbaññū’’ti vuccati, tassa sabbaññutaññāṇassa parihānaṃ natthi, taṃ sabbaññutaññāṇaṃ sabbakāle jānituṃ āvajjanakāle pavattatīti yojanā. Idaṃ ‘‘yaṃ ta’’ntiādikaṃ ñāṇe atthe vācakañāpakabhāvenapi pavattanato ñāṇaṃ nāma.

    যায নিব্বানগামিনিযা মগ্গপঞ্ঞায জাতিমরণসঙ্খযং পজানাতি, সা নিব্বানগামিনী মগ্গপঞ্ঞা সব্বাহি লোকিযাহি পঞ্ঞাহি সেট্ঠা পসত্থাতি যোজনা। ইদং ‘‘পঞ্ঞা হী’’তিআদিকং ৰুত্তনযেন ঞাণং নাম।

    Yāya nibbānagāminiyā maggapaññāya jātimaraṇasaṅkhayaṃ pajānāti, sā nibbānagāminī maggapaññā sabbāhi lokiyāhi paññāhi seṭṭhā pasatthāti yojanā. Idaṃ ‘‘paññā hī’’tiādikaṃ vuttanayena ñāṇaṃ nāma.

    ‘‘ধোতক, ৰো তুম্হাকং সন্তিং অহং কিত্তযিস্সামী’’তি ভগৰা অৰোচ। ‘‘দিট্ঠে ধম্মে দুক্খাদিধম্মে ৰা অত্তভাৰে ৰা সতো অনিচ্চানুপস্সনাদিসতিসম্পন্নো হুত্ৰা চরং চরন্তো যোগাৰচরো অনীতিহং যং সন্তিং যং নিব্বানং অরিযমগ্গেন ৰিদিত্ৰা লোকে সংসারলোকে ৰিসত্তিকং ৰিসপ্পকং তণ্হং তরে তরেয্যা’’তি ভগৰা অৰোচ।

    ‘‘Dhotaka, vo tumhākaṃ santiṃ ahaṃ kittayissāmī’’ti bhagavā avoca. ‘‘Diṭṭhe dhamme dukkhādidhamme vā attabhāve vā sato aniccānupassanādisatisampanno hutvā caraṃ caranto yogāvacaro anītihaṃ yaṃ santiṃ yaṃ nibbānaṃ ariyamaggena viditvā loke saṃsāraloke visattikaṃ visappakaṃ taṇhaṃ tare tareyyā’’ti bhagavā avoca.

    ধোতকো ভগৰন্তং ৰদতি ‘‘মহেসি মহন্তে সীলক্খন্ধাদী এসনসীল, গোতম, সতো ‘সব্বে সঙ্খারা অনিচ্চা’তিআদিসরণসম্পন্নো হুত্ৰা চরং চরন্তো যোগাৰচরো উত্তমং যং সন্তিং যং নিব্বানং অরিযমগ্গেন ৰিদিত্ৰা লোকে সংসারলোকে ৰিসত্তিকং তণ্হং তরে তরেয্যাতি তঞ্চ ৰচনং তঞ্চ সন্তিং নিব্বানং অহং অভিনন্দামি অভিপত্থযামি, মহেসি ত্ৰং, যঞ্চ সম্পজানাসী’’তি ধোতকো ভগৰন্তং ৰদতি।

    Dhotako bhagavantaṃ vadati ‘‘mahesi mahante sīlakkhandhādī esanasīla, gotama, sato ‘sabbe saṅkhārā aniccā’tiādisaraṇasampanno hutvā caraṃ caranto yogāvacaro uttamaṃ yaṃ santiṃ yaṃ nibbānaṃ ariyamaggena viditvā loke saṃsāraloke visattikaṃ taṇhaṃ tare tareyyāti tañca vacanaṃ tañca santiṃ nibbānaṃ ahaṃ abhinandāmi abhipatthayāmi, mahesi tvaṃ, yañca sampajānāsī’’ti dhotako bhagavantaṃ vadati.

    ‘‘ধোতকা’’তি আলপিত্ৰা ভগৰা ধোতকং অৰোচ। ‘‘উদ্ধং অনাগতং উপরি অধো অতীতং হেট্ঠা চ তিরিযঞ্চাপি মজ্ঝে পচ্চুপ্পন্নং পরিতো চ লোকে সংসারলোকে এতং তণ্হং ভৰাভৰায খুদ্দকভৰমহন্তভৰত্থায সঙ্গো লগ্গোতি ৰিদিত্ৰা ৰিচরন্তো ত্ৰং তণ্হং মাকাসি মা অকাসী’’তি ভগৰা ধোতকং অৰোচাতি যোজনা। ইদং ‘‘কিত্তযিস্সামী’’তিআদিকং ঞেয্যে ৰিসযে অত্থে ৰাচকঞাপকভাৰেন পৰত্তনতো ঞেয্যং নাম।

    ‘‘Dhotakā’’ti ālapitvā bhagavā dhotakaṃ avoca. ‘‘Uddhaṃ anāgataṃ upari adho atītaṃ heṭṭhā ca tiriyañcāpi majjhe paccuppannaṃ parito ca loke saṃsāraloke etaṃ taṇhaṃ bhavābhavāya khuddakabhavamahantabhavatthāya saṅgo laggoti viditvā vicaranto tvaṃ taṇhaṃ mākāsi mā akāsī’’ti bhagavā dhotakaṃ avocāti yojanā. Idaṃ ‘‘kittayissāmī’’tiādikaṃ ñeyye visaye atthe vācakañāpakabhāvena pavattanato ñeyyaṃ nāma.

    ‘‘এত্তকমেৰা’’তি ৰত্তব্বত্তা ‘‘চতুন্নং ভিক্খৰে’’তিআদি ৰুত্তং। ভিক্খৰে, চতুন্নং অরিযসচ্চানং অরিযভাৰকরানং সচ্চানং অননুবোধা অবুজ্ঝনেন অপ্পটিৰেধা অপ্পটিৰিজ্ঝনেন এৰং ইমিনা কারণেন মমঞ্চেৰ তুম্হাকঞ্চ দীঘমদ্ধানং ইদং সন্ধাৰিতং সন্ধাৰনং, ইদং সংসরিতং সংসরণং অহোসীতি, ভিক্খৰে, অজ্জ তযিদং তং ইদং দুক্খং অরিযসচ্চং মযা অনুবুদ্ধং পটিৰিদ্ধং…পে॰… তযিদং তং ইদং দুক্খনিরোধগামিনী পটিপদা অরিযসচ্চং মযা অনুবুদ্ধং পটিৰিদ্ধং, মম ভৰতণ্হা উচ্ছিন্না, ভৰনেত্তি তণ্হা খীণা, ইদানি মম পুনব্ভৰো নত্থি, ইতি ইদং ‘‘চতুন্ন’’ন্তিআদিকং ভগৰা অৰোচ, সুগতো ইদং ‘‘চতুন্ন’’ন্তিআদিকং ৰত্ৰা অথাপরং এতং ‘‘চতুন্ন’’ন্তিআদিগাথাৰচনং সত্থা অৰোচাতি যোজেত্ৰা গাথাযঞ্চ তথেৰ যোজনা কাতব্বা। ইদং ‘‘চতুন্ন’’ন্তিআদিকং ৰুত্তনযেন ঞেয্যং নাম। (৫)

    ‘‘Ettakamevā’’ti vattabbattā ‘‘catunnaṃ bhikkhave’’tiādi vuttaṃ. Bhikkhave, catunnaṃ ariyasaccānaṃ ariyabhāvakarānaṃ saccānaṃ ananubodhā abujjhanena appaṭivedhā appaṭivijjhanena evaṃ iminā kāraṇena mamañceva tumhākañca dīghamaddhānaṃ idaṃ sandhāvitaṃ sandhāvanaṃ, idaṃ saṃsaritaṃ saṃsaraṇaṃ ahosīti, bhikkhave, ajja tayidaṃ taṃ idaṃ dukkhaṃ ariyasaccaṃ mayā anubuddhaṃ paṭividdhaṃ…pe… tayidaṃ taṃ idaṃ dukkhanirodhagāminī paṭipadā ariyasaccaṃ mayā anubuddhaṃ paṭividdhaṃ, mama bhavataṇhā ucchinnā, bhavanetti taṇhā khīṇā, idāni mama punabbhavo natthi, iti idaṃ ‘‘catunna’’ntiādikaṃ bhagavā avoca, sugato idaṃ ‘‘catunna’’ntiādikaṃ vatvā athāparaṃ etaṃ ‘‘catunna’’ntiādigāthāvacanaṃ satthā avocāti yojetvā gāthāyañca tatheva yojanā kātabbā. Idaṃ ‘‘catunna’’ntiādikaṃ vuttanayena ñeyyaṃ nāma. (5)

    ‘‘রূপং অনিচ্চং…পে॰… ৰিঞ্ঞাণং অনিচ্চ’’ন্তি ইদং সুত্তং ঞেয্যে রূপাদিধম্মে ৰাচকঞাপকভাৰেন পৰত্তনতো ঞেয্যং নাম।

    ‘‘Rūpaṃ aniccaṃ…pe… viññāṇaṃ anicca’’nti idaṃ suttaṃ ñeyye rūpādidhamme vācakañāpakabhāvena pavattanato ñeyyaṃ nāma.

    এৰং ‘‘রূপং অনিচ্চ’’ন্তিআদিনা পকারেন জানং জানন্তো এৰং ‘‘রূপং অনিচ্চ’’ন্তিআদিনা পকারেন পস্সং পস্সন্তো অরিযসাৰকো অরিযস্স ভগৰতো সাৰকো ‘‘ইদং রূপং অনিচ্চ’’ন্তি রূপং পস্সতি, ‘‘অযং ৰেদনা অনিচ্চা’’তি ৰেদনং পস্সতি, ‘‘অযং সঞ্ঞা অনিচ্চা’’তি সঞ্ঞং পস্সতি, ‘‘ইমে সঙ্খারা অনিচ্চা’’তি সঙ্খারে পস্সতি, ‘‘ইদং ৰিঞ্ঞাণং অনিচ্চ’’ন্তি ৰিঞ্ঞাণং পস্সতি। ইতি ইদং সুত্তং রূপাদিপস্সনে ঞাণে ৰাচকঞাপকভাৰেন পৰত্তনতো ঞাণং নাম।

    Evaṃ ‘‘rūpaṃ anicca’’ntiādinā pakārena jānaṃ jānanto evaṃ ‘‘rūpaṃ anicca’’ntiādinā pakārena passaṃ passanto ariyasāvako ariyassa bhagavato sāvako ‘‘idaṃ rūpaṃ anicca’’nti rūpaṃ passati, ‘‘ayaṃ vedanā aniccā’’ti vedanaṃ passati, ‘‘ayaṃ saññā aniccā’’ti saññaṃ passati, ‘‘ime saṅkhārā aniccā’’ti saṅkhāre passati, ‘‘idaṃ viññāṇaṃ anicca’’nti viññāṇaṃ passati. Iti idaṃ suttaṃ rūpādipassane ñāṇe vācakañāpakabhāvena pavattanato ñāṇaṃ nāma.

    সো ‘‘রূপং অনিচ্চ’’ন্তিআদিনা পকারেন পস্সন্তো অরিযসাৰকো রূপেন রূপরাগেন পরিমুচ্চতি…পে॰… ৰিঞ্ঞাণম্হা ৰিঞ্ঞাণরাগম্হা পরিমুচ্চতীতি দুক্খস্মা পরিমুচ্চতীতি অহং ৰদামীতি যোজনা। ইদং ‘‘সো পরিমুচ্চতী’’তিআদিকং সুত্তং ঞাণে চ ঞেয্যে চ ৰাচকঞাপকভাৰেন পৰত্তনতো ঞাণঞ্চ ঞেয্যঞ্চ হোতি।

    So ‘‘rūpaṃ anicca’’ntiādinā pakārena passanto ariyasāvako rūpena rūparāgena parimuccati…pe… viññāṇamhā viññāṇarāgamhā parimuccatīti dukkhasmā parimuccatīti ahaṃ vadāmīti yojanā. Idaṃ ‘‘so parimuccatī’’tiādikaṃ suttaṃ ñāṇe ca ñeyye ca vācakañāpakabhāvena pavattanato ñāṇañca ñeyyañca hoti.

    সব্বে পঞ্চক্খন্ধা পচ্চযেহি সঙ্খরিতত্তা সঙ্খারা আদিঅন্তৰন্তভাৰতো, অনিচ্চন্তিকভাৰতো, তাৰকালিকভাৰতো চ খণপরিত্তভাৰতো অনিচ্চা ভৰন্তি। ইদং ‘‘সব্বে সঙ্খারা অনিচ্চা’’তি সুত্তপ্পদেসৰচনং ৰুত্তনযেন ঞেয্যং নাম। যদা ৰিপস্সনাকরণকালে পঞ্ঞায ৰিপস্সনাপঞ্ঞায পস্সতি অনিচ্চতাদিকং পস্সতি। ইদং ‘‘যদা পঞ্ঞায পস্সতী’’তি সুত্তপ্পদেসৰচনং ঞাণং নাম। অথ পস্সনক্খণে দুক্খে পঞ্চক্খন্ধে ৰিপস্সকো নিব্বিন্দতি, নিব্বিন্দন্তো পুগ্গলো দুক্খাদিজাননাদিৰসেন চত্তারি সচ্চানি পটিৰিজ্ঝতি, এসো চতুসচ্চপটিৰেধো ৰিসুদ্ধিযা ৰিসুদ্ধত্থায মগ্গোতি। ইদং ‘‘অথা’’তিআদিকং সুত্তপ্পদেসৰচনং ঞাণঞ্চ ঞেয্যঞ্চ হোতি।

    Sabbe pañcakkhandhā paccayehi saṅkharitattā saṅkhārā ādiantavantabhāvato, aniccantikabhāvato, tāvakālikabhāvato ca khaṇaparittabhāvato aniccā bhavanti. Idaṃ ‘‘sabbe saṅkhārā aniccā’’ti suttappadesavacanaṃ vuttanayena ñeyyaṃ nāma. Yadā vipassanākaraṇakāle paññāya vipassanāpaññāya passati aniccatādikaṃ passati. Idaṃ ‘‘yadā paññāya passatī’’ti suttappadesavacanaṃ ñāṇaṃ nāma. Atha passanakkhaṇe dukkhe pañcakkhandhe vipassako nibbindati, nibbindanto puggalo dukkhādijānanādivasena cattāri saccāni paṭivijjhati, eso catusaccapaṭivedho visuddhiyā visuddhatthāya maggoti. Idaṃ ‘‘athā’’tiādikaṃ suttappadesavacanaṃ ñāṇañca ñeyyañca hoti.

    সোণাতি সোণং আলপতি। সমণা বাহিরকসমণা ব্রাহ্মণা জাতিব্রাহ্মণা অনিচ্চেন রূপেন, দুক্খেন রূপেন, ৰিপরিণামধম্মেন রূপেন ‘‘অহং পরেহি সেয্যো উত্তমো অস্মী’’তি ৰা সমনুপস্সন্তি, ‘‘অহং পরেন সদিসো সমানো অস্মী’’তি ৰা সমনুপস্সন্তি, ‘‘অহং পরতো হীনো লামকো অস্মী’’তি ৰা সমনুপস্সন্তি, যথাভূতস্স অদস্সনা অঞ্ঞত্র ৰজ্জেত্ৰা অঞ্ঞং কিং নাম কারণং সিযা, যথাভূতং অদস্সনতো তাৰ সমনুপস্সনস্স অঞ্ঞং কারণং নত্থি, যথাভূতং অদস্সনমেৰ কারণন্তি ৰেদিতব্বং। ‘‘অনিচ্চায ৰেদনাযা’’তিআদীসুপি ইমিনা ৰুত্তনযেন ৰুত্তনযানুসারেন যোজনা কাতব্বা। ইদং ‘‘যে হি কেচী’’তিআদিকং সুত্তপ্পদেসৰচনং ঞেয্যং নাম। ‘‘যে চ খো কেচী’’তিআদিকো সুক্কপক্খো পন ৰুত্তৰিপরিযাযেন ৰেদিতব্বো। ইদং ‘‘যে চ খো’’তিআদিকং সুত্তপ্পদেসৰচনং ঞাণং নাম। ইদং ‘‘যে হি কেচী’’তিআদিকং সুত্তং ঞাণে চ ঞেয্যে চ অত্থে ৰাচকঞাপকভাৰেন পৰত্তনতো ঞাণঞ্চ ঞেয্যঞ্চ হোতি। (৬)

    Soṇāti soṇaṃ ālapati. Samaṇā bāhirakasamaṇā brāhmaṇā jātibrāhmaṇā aniccena rūpena, dukkhena rūpena, vipariṇāmadhammena rūpena ‘‘ahaṃ parehi seyyo uttamo asmī’’ti vā samanupassanti, ‘‘ahaṃ parena sadiso samāno asmī’’ti vā samanupassanti, ‘‘ahaṃ parato hīno lāmako asmī’’ti vā samanupassanti, yathābhūtassa adassanā aññatra vajjetvā aññaṃ kiṃ nāma kāraṇaṃ siyā, yathābhūtaṃ adassanato tāva samanupassanassa aññaṃ kāraṇaṃ natthi, yathābhūtaṃ adassanameva kāraṇanti veditabbaṃ. ‘‘Aniccāya vedanāyā’’tiādīsupi iminā vuttanayena vuttanayānusārena yojanā kātabbā. Idaṃ ‘‘ye hi kecī’’tiādikaṃ suttappadesavacanaṃ ñeyyaṃ nāma. ‘‘Ye ca kho kecī’’tiādiko sukkapakkho pana vuttavipariyāyena veditabbo. Idaṃ ‘‘ye ca kho’’tiādikaṃ suttappadesavacanaṃ ñāṇaṃ nāma. Idaṃ ‘‘ye hi kecī’’tiādikaṃ suttaṃ ñāṇe ca ñeyye ca atthe vācakañāpakabhāvena pavattanato ñāṇañca ñeyyañca hoti. (6)

    নানাৰিধং ঞাণঞ্চ ঞেয্যঞ্চ সাসনপট্ঠানসুত্তং আচরিযেন নিদ্ধারিতং, অম্হেহি চ ঞাতং, ‘‘কতমং দস্সন’’ন্তি পুচ্ছিতব্বত্তা ‘‘তত্থ কতমং দস্সন’’ন্তিআদি ৰুত্তং। তত্থাতি তেসু লোকিযাদীসু অট্ঠৰীসতিৰিধেসু সাসনপট্ঠানেসু সুত্তেসু কতমং সুত্তং দস্সনং নামাতি পুচ্ছতি।

    Nānāvidhaṃ ñāṇañca ñeyyañca sāsanapaṭṭhānasuttaṃ ācariyena niddhāritaṃ, amhehi ca ñātaṃ, ‘‘katamaṃ dassana’’nti pucchitabbattā ‘‘tattha katamaṃ dassana’’ntiādi vuttaṃ. Tatthāti tesu lokiyādīsu aṭṭhavīsatividhesu sāsanapaṭṭhānesu suttesu katamaṃ suttaṃ dassanaṃ nāmāti pucchati.

    ১১৫. গম্ভীরপঞ্ঞেন সব্বঞ্ঞুবুদ্ধেন সুদেসিতানি সঙ্খেপৰিত্থারাদীহি তেহি তেহি নযেহি সুট্ঠু দেসিতানি অরিযসচ্চানি যে ভাৰিতভাৰনা অরিযপুগ্গলা পঞ্ঞাওভাসেন ৰিভাৰযন্তি, তে ভাৰিতভাৰনা অরিযপুগ্গলা দেৰরজ্জচক্কৰত্তিরজ্জাদিপমাদট্ঠানং আগম্ম ভুসং পমত্তা কিঞ্চাপি হোন্তি, তথাপি তে ভাৰিতভাৰনা অরিযপুগ্গলা সোতাপত্তিমগ্গঞাণেন অভিসঙ্খারৰিঞ্ঞাণস্স নিরোধেন অট্ঠমভৰাদীসু উপ্পজ্জনারহানং নামরূপানং নিরুদ্ধত্তা অট্ঠমক্খত্তুৰসেন অট্ঠমং ভৰং ন আদিযন্তীতি যোজনা। ইদং ‘‘যে অরিযসচ্চানী’’তিআদিকং সুত্তং দস্সনে পঠমমগ্গঞাণে ৰাচকঞাপকভাৰেন পৰত্তনতো দস্সনং নাম।

    115.Gambhīrapaññena sabbaññubuddhena sudesitāni saṅkhepavitthārādīhi tehi tehi nayehi suṭṭhu desitāni ariyasaccāni ye bhāvitabhāvanā ariyapuggalā paññāobhāsena vibhāvayanti, te bhāvitabhāvanā ariyapuggalā devarajjacakkavattirajjādipamādaṭṭhānaṃ āgamma bhusaṃ pamattā kiñcāpi honti, tathāpi te bhāvitabhāvanā ariyapuggalā sotāpattimaggañāṇena abhisaṅkhāraviññāṇassa nirodhena aṭṭhamabhavādīsu uppajjanārahānaṃ nāmarūpānaṃ niruddhattā aṭṭhamakkhattuvasena aṭṭhamaṃ bhavaṃ na ādiyantīti yojanā. Idaṃ ‘‘ye ariyasaccānī’’tiādikaṃ suttaṃ dassane paṭhamamaggañāṇe vācakañāpakabhāvena pavattanato dassanaṃ nāma.

    নগরদ্ৰারবাহথিরকরণত্থং উম্মারব্ভন্তরে পথৰিযং অট্ঠহত্থদসহত্থপ্পমাণং আৰাটং খণিত্ৰা তস্মিং আৰাটে উস্সাপিতত্তা পথৰিস্সিতো পথৰিনিস্সিতো অন্তোপথৰিনিস্সিতো ইন্দখীলো সারদারুমযো থম্ভো চতুব্ভি চতূহি দিসাহি আগতেহি ৰাতেহি মহাৰাতেহি অসম্পকম্পিযো সম্পকম্পিতুং অসক্কুণেয্যো সিযা যথা, যো সপ্পুরিসো অরিযসচ্চানি অৰেচ্চ পস্সতি, তং সপ্পুরিসং সব্বতিত্থিযৰাদৰাতেহি অসম্পকম্পিযত্তা তথূপমং অহং ৰদামীতি যোজনা। ইদং ‘‘যথিন্দখীলো’’তিআদিকং সুত্তং ৰুত্তনযেন দস্সনং নাম।

    Nagaradvārabāhathirakaraṇatthaṃ ummārabbhantare pathaviyaṃ aṭṭhahatthadasahatthappamāṇaṃ āvāṭaṃ khaṇitvā tasmiṃ āvāṭe ussāpitattā pathavissito pathavinissito antopathavinissito indakhīlo sāradārumayo thambho catubbhi catūhi disāhi āgatehi vātehi mahāvātehi asampakampiyo sampakampituṃ asakkuṇeyyo siyā yathā, yo sappuriso ariyasaccāni avecca passati, taṃ sappurisaṃ sabbatitthiyavādavātehi asampakampiyattā tathūpamaṃ ahaṃ vadāmīti yojanā. Idaṃ ‘‘yathindakhīlo’’tiādikaṃ suttaṃ vuttanayena dassanaṃ nāma.

    ভিক্খৰে, চতূহি সোতাপত্তিযঙ্গেহি সমন্নাগতো অরিযসাৰকো অরিযস্স ভগৰতো সম্মাসম্বুদ্ধস্স সাৰকো আচিক্খিতুং আকঙ্খমানো হুত্ৰা অত্তনাৰ সযমেৰ অত্তানং ব্যাকরেয্য ‘‘ভো, মম অত্ত অহং ইদানি খীণনিরযো অম্হি, খীণতিরচ্ছানযোনি অম্হি…পে॰…. দুক্খস্সন্তং করিস্সামী’’তি ব্যাকরেয্য। চতুরঙ্গসরূপং দস্সেতুং ‘‘কতমেহি চতূহী’’তিআদি ৰুত্তং। ইদং ‘‘চতূহী’’তিআদিকং দস্সনং নাম।

    Bhikkhave, catūhi sotāpattiyaṅgehi samannāgato ariyasāvako ariyassa bhagavato sammāsambuddhassa sāvako ācikkhituṃ ākaṅkhamāno hutvā attanāva sayameva attānaṃ byākareyya ‘‘bho, mama atta ahaṃ idāni khīṇanirayo amhi, khīṇatiracchānayoni amhi…pe…. dukkhassantaṃ karissāmī’’ti byākareyya. Caturaṅgasarūpaṃ dassetuṃ ‘‘katamehi catūhī’’tiādi vuttaṃ. Idaṃ ‘‘catūhī’’tiādikaṃ dassanaṃ nāma.

    নানাৰিধং দস্সনং নিদ্ধারিতং, ‘‘কতমা ভাৰনা’’তি পুচ্ছিতব্বত্তা ‘‘তত্থ কতমা ভাৰনা’’তিআদি ৰুত্তং।

    Nānāvidhaṃ dassanaṃ niddhāritaṃ, ‘‘katamā bhāvanā’’ti pucchitabbattā ‘‘tattha katamā bhāvanā’’tiādi vuttaṃ.

    ইধ সাসনে যস্স অরিযসাৰকস্স অজ্ঝত্তং কামভৰে নিব্বত্তাপকানং ওরম্ভাগিযসংযোজনানং পজহনৰসেন চ বহিদ্ধা রূপারূপভৰেসু নিব্বত্তাপকানং উদ্ধম্ভাগিযসংযোজনানং পজহনৰসেন চ ইন্দ্রিযানি সদ্ধিন্দ্রিযাদীনি ইন্দ্রিযানি সুভাৰিতানি অরিযমগ্গভাৰনাৰসেন সুট্ঠু ভাৰিতানি ভৰন্তি, ভাৰিতো ভাৰিতমগ্গো স দন্তো সো অরিযসাৰকো ইমং লোকঞ্চ পরং লোকঞ্চ নিব্বিজ্ঝ নিব্বিজ্ঝিত্ৰা পটিৰিজ্ঝিত্ৰা কালং মরণকালে , কালংকিরিযং ৰা কঙ্খতি পত্থেতীতি যোজনা। অযং ‘‘যস্সিন্দ্রিযানী’’তিআদিকা পাল়ি ভাৰনায ৰাচকঞাপকভাৰেন পৰত্তনতো ভাৰনা নাম।

    Idha sāsane yassa ariyasāvakassa ajjhattaṃ kāmabhave nibbattāpakānaṃ orambhāgiyasaṃyojanānaṃ pajahanavasena ca bahiddhā rūpārūpabhavesu nibbattāpakānaṃ uddhambhāgiyasaṃyojanānaṃ pajahanavasena ca indriyāni saddhindriyādīni indriyāni subhāvitāni ariyamaggabhāvanāvasena suṭṭhu bhāvitāni bhavanti, bhāvito bhāvitamaggo sa danto so ariyasāvako imaṃ lokañca paraṃ lokañca nibbijjha nibbijjhitvā paṭivijjhitvā kālaṃ maraṇakāle , kālaṃkiriyaṃ vā kaṅkhati patthetīti yojanā. Ayaṃ ‘‘yassindriyānī’’tiādikā pāḷi bhāvanāya vācakañāpakabhāvena pavattanato bhāvanā nāma.

    ধম্মপদানি ঝানৰিপস্সনামগ্গফলনিব্বানধম্মকোট্ঠাসানি। অনভিজ্ঝা ধম্মপদং অনভিজ্ঝাসীসেন অধিগতঝানৰিপস্সনামগ্গনিব্বানধম্মপদং কোট্ঠাসং। এস নযো সেসেসুপি। অযং ‘‘চত্তারিমানী’’তিআদিকা পাল়ি ৰুত্তনযেন ভাৰনা নাম। (৭)

    Dhammapadāni jhānavipassanāmaggaphalanibbānadhammakoṭṭhāsāni. Anabhijjhā dhammapadaṃ anabhijjhāsīsena adhigatajhānavipassanāmagganibbānadhammapadaṃ koṭṭhāsaṃ. Esa nayo sesesupi. Ayaṃ ‘‘cattārimānī’’tiādikā pāḷi vuttanayena bhāvanā nāma. (7)

    দেৰপুত্ত ছিন্দন্তো পুগ্গলো পঞ্চ ওরম্ভাগিযসংযোজনানি হেট্ঠা মগ্গত্তযেন ছিন্দে ছিন্দেয্য, পজহন্তো পুগ্গলো পঞ্চ উদ্ধম্ভাগিযসংযোজনানি অরহত্তমগ্গেন জহে পজহেয্য, ভাৰযন্তো পুগ্গলো পঞ্চ সদ্ধিন্দ্রিযাদীনি চ উত্তরি ভাৰযে ভাৰেয্য। পঞ্চসঙ্গাতিগো রাগসঙ্গদোসসঙ্গমোহসঙ্গমানসঙ্গদিট্ঠিসঙ্গাতিগো ভিক্খু ওঘতিণ্ণোতি কামোঘভৰোঘদিট্ঠোঘঅৰিজ্জোঘতিণ্ণোতি ৰুচ্চতি কথীযতীতি যোজনা। ‘‘পঞ্চ ছিন্দে পঞ্চ জহে’’তি ইদং ৰচনং দস্সনং নাম। ‘‘পঞ্চ চুত্তরি…পে॰… ৰুচ্চতী’’তি অযং পাল়ি ভাৰনা নাম। ইদং ‘‘পঞ্চা’’তিআদিকং সুত্তং দস্সনঞ্চ ভাৰনা চ হোতি।

    Devaputta chindanto puggalo pañca orambhāgiyasaṃyojanāni heṭṭhā maggattayena chinde chindeyya, pajahanto puggalo pañca uddhambhāgiyasaṃyojanāni arahattamaggena jahe pajaheyya, bhāvayanto puggalo pañca saddhindriyādīni ca uttari bhāvaye bhāveyya. Pañcasaṅgātigo rāgasaṅgadosasaṅgamohasaṅgamānasaṅgadiṭṭhisaṅgātigo bhikkhu oghatiṇṇoti kāmoghabhavoghadiṭṭhoghaavijjoghatiṇṇoti vuccati kathīyatīti yojanā. ‘‘Pañca chinde pañca jahe’’ti idaṃ vacanaṃ dassanaṃ nāma. ‘‘Pañca cuttari…pe… vuccatī’’ti ayaṃ pāḷi bhāvanā nāma. Idaṃ ‘‘pañcā’’tiādikaṃ suttaṃ dassanañca bhāvanā ca hoti.

    ‘‘তীণিমানি, ভিক্খৰে’’তিআদীসু যোজনা পাকটা। (৮)

    ‘‘Tīṇimāni, bhikkhave’’tiādīsu yojanā pākaṭā. (8)

    ১১৬. ‘‘সব্বপাপস্স অকরণং…পে॰… বুদ্ধান সাসন’’ন্তি ইদং সুত্তং সম্মাসম্বুদ্ধস্স ৰচনভাৰতো সকৰচনং নাম। অত্থো হেট্ঠা ৰুত্তোৰ।

    116. ‘‘Sabbapāpassa akaraṇaṃ…pe… buddhāna sāsana’’nti idaṃ suttaṃ sammāsambuddhassa vacanabhāvato sakavacanaṃ nāma. Attho heṭṭhā vuttova.

    ভিক্খৰে, বালস্স বাললক্খণানি বালউপলক্খণকারণানি বালনিমিত্তানি ‘‘অযং বালো’’তি গহণকারণানি বালাপদানানি বালস্স অপদানানি পোরাণানি ৰিরুল়্হানি কম্মানি যেহি বাললক্খণাদীহি বালং ‘‘বালো’’তি পরে পণ্ডিতা সঞ্জানন্তি, ইমানি বাললক্খণানি মযা ৰুচ্চমানানি তীণি। কতমানি তীণি? ভিক্খৰে, বালো দুচ্চিন্তিতচিন্তী চ দুচ্চিন্তিতং অভিজ্ঝাব্যাপাদমিচ্ছাদস্সনং চিন্তী চ হোতি, দুব্ভাসিতভাসী দুব্ভাসিতং মুসাৰাদাদিং ভাসী চ হোতি. দুক্কটকম্মকারী চ দুক্কটং পাণাতিপাতাদিকম্মং কারী চ হোতি। ভিক্খৰে, বালস্স…পে॰… বালাপদানানি ইমিনা মযা ৰুত্তানি তীণি খো ভৰন্তি। সুক্কপক্খো পন ৰুত্তৰিপরিযাযেন ৰেদিতব্বো। ইদং ‘‘তীণিমানি ভিক্খৰে’’তিআদিকং ৰচনং সম্মাসম্বুদ্ধস্স ৰচনভাৰতো সকৰচনং নাম।

    Bhikkhave, bālassa bālalakkhaṇāni bālaupalakkhaṇakāraṇāni bālanimittāni ‘‘ayaṃ bālo’’ti gahaṇakāraṇāni bālāpadānāni bālassa apadānāni porāṇāni viruḷhāni kammāni yehi bālalakkhaṇādīhi bālaṃ ‘‘bālo’’ti pare paṇḍitā sañjānanti, imāni bālalakkhaṇāni mayā vuccamānāni tīṇi. Katamāni tīṇi? Bhikkhave, bālo duccintitacintī ca duccintitaṃ abhijjhābyāpādamicchādassanaṃ cintī ca hoti, dubbhāsitabhāsī dubbhāsitaṃ musāvādādiṃ bhāsī ca hoti. dukkaṭakammakārī ca dukkaṭaṃ pāṇātipātādikammaṃ kārī ca hoti. Bhikkhave, bālassa…pe… bālāpadānāni iminā mayā vuttāni tīṇi kho bhavanti. Sukkapakkho pana vuttavipariyāyena veditabbo. Idaṃ ‘‘tīṇimāni bhikkhave’’tiādikaṃ vacanaṃ sammāsambuddhassa vacanabhāvato sakavacanaṃ nāma.

    পথৰীসমো ৰিত্থতো সম্বোধো নাম নত্থি। পাতং ৰুট্ঠং উদকং আভুসো লাভি গণ্হাতীতি পাতালো, পাতালেন সমো পাতালসমো নিন্নো ন ৰিজ্জতি। মেরুসমো উন্নতো নত্থি, চক্কৰত্তিসদিসো পোরিসো নত্থীতি যোজনা। ইদং ‘‘পথৰীসমো’’তিআদিকং ৰচনং পরস্স দেৰস্স ৰচনভাৰতো পরৰচনং হোতি।

    Pathavīsamo vitthato sambodho nāma natthi. Pātaṃ vuṭṭhaṃ udakaṃ ābhuso lābhi gaṇhātīti pātālo, pātālena samo pātālasamo ninno na vijjati. Merusamo unnato natthi, cakkavattisadiso poriso natthīti yojanā. Idaṃ ‘‘pathavīsamo’’tiādikaṃ vacanaṃ parassa devassa vacanabhāvato paravacanaṃ hoti.

    ‘‘দেৰানং ইন্দ, তৰ সুভাসিতেন জযো হোতী’’তি ৰত্ৰা ‘‘ৰেপচিত্তি, তৰ সুভাসিতেন জযো হোতূ’’তি ৰত্ৰা ‘‘ৰেপচিত্তি, ত্ৰং গাথং ভণ ভণাহী’’তি অৰোচ। ভিক্খৰে, অথ খো অসুরিন্দো ৰেপচিত্তি ইমং ৰুচ্চমানং গাথং অভাসি ‘‘তে পটিসেধকো নো চে অস্স নো চে ভৰেয্য , এৰং সতি বালা ভিয্যো পকুজ্ঝেয্যুং, তস্মা ধীরো পণ্ডিতো ভুসেন দণ্ডেন বালং নিসেধযে’’তি।

    ‘‘Devānaṃ inda, tava subhāsitena jayo hotī’’ti vatvā ‘‘vepacitti, tava subhāsitena jayo hotū’’ti vatvā ‘‘vepacitti, tvaṃ gāthaṃ bhaṇa bhaṇāhī’’ti avoca. Bhikkhave, atha kho asurindo vepacitti imaṃ vuccamānaṃ gāthaṃ abhāsi ‘‘te paṭisedhako no ce assa no ce bhaveyya , evaṃ sati bālā bhiyyo pakujjheyyuṃ, tasmā dhīro paṇḍito bhusena daṇḍena bālaṃ nisedhaye’’ti.

    গাথায, ভিক্খৰে, অসুরিন্দেন ৰেপচিত্তিনা ভাসিতায অসুরা অনুমোদিংসু, দেৰা তুণ্হী অহেসুং। ভিক্খৰে, অথ খো অসুরিন্দো ৰেপচিত্তি দেৰানং ইন্দং সক্কং এতং ৰচনং অৰোচ ‘‘দেৰানমিন্দ, ত্ৰং গাথং ভণ ভণাহী’’তি এতং ৰচনং অৰোচ। ভিক্খৰে, অথ খো দেৰানমিন্দো সক্কো ইমং গাথং অভাসি ‘‘বালস্স পটিসেধনং পরং পচ্চত্থিকং সঙ্কুপিতং ঞত্ৰা সতো সতিমা যো পণ্ডিতো কোধতো উপসম্মতি, তস্স পণ্ডিতস্স এতদেৰ উপসমং ৰরন্তি অহং মঞ্ঞে’’তি।

    Gāthāya, bhikkhave, asurindena vepacittinā bhāsitāya asurā anumodiṃsu, devā tuṇhī ahesuṃ. Bhikkhave, atha kho asurindo vepacitti devānaṃ indaṃ sakkaṃ etaṃ vacanaṃ avoca ‘‘devānaminda, tvaṃ gāthaṃ bhaṇa bhaṇāhī’’ti etaṃ vacanaṃ avoca. Bhikkhave, atha kho devānamindo sakko imaṃ gāthaṃ abhāsi ‘‘bālassa paṭisedhanaṃ paraṃ paccatthikaṃ saṅkupitaṃ ñatvā sato satimā yo paṇḍito kodhato upasammati, tassa paṇḍitassa etadeva upasamaṃ varanti ahaṃ maññe’’ti.

    গাথায, ভিক্খৰে, দেৰানমিন্দেন সক্কেন ভাসিতায দেৰা অনুমোদিংসু, অসুরা তুণ্হী অহেসুং। ভিক্খৰে, অথ খো দেৰানমিন্দো সক্কো অসুরিন্দং ৰেপচিত্তিং এতং ৰচনং অৰোচ ‘‘ৰেপচিত্তি, ত্ৰং গাথং ভণাহী’’তি এতং ৰচনং অৰোচ। ভিক্খৰে, অথ খো অসুরিন্দো ৰেপচিত্তি ইমং গাথং অভাসি ‘‘ৰাসৰ যদা তিতিক্খতি, তদা নং তিতিক্খন্তং পুগ্গলং বালো ‘‘অযং মে ভযা তিতিক্খতী’’তি মঞ্ঞতি, তিতিক্খায এতদেৰ ৰজ্জং অহং পস্সামি। ৰাসৰ গোগণো পলাযিনং গৰং অজ্ঝোত্থরতি ইৰ, এৰং দুম্মেধো খমন্তং ভিয্যো অজ্ঝারুহতি অজ্ঝোত্থরতি।

    Gāthāya, bhikkhave, devānamindena sakkena bhāsitāya devā anumodiṃsu, asurā tuṇhī ahesuṃ. Bhikkhave, atha kho devānamindo sakko asurindaṃ vepacittiṃ etaṃ vacanaṃ avoca ‘‘vepacitti, tvaṃ gāthaṃ bhaṇāhī’’ti etaṃ vacanaṃ avoca. Bhikkhave, atha kho asurindo vepacitti imaṃ gāthaṃ abhāsi ‘‘vāsava yadā titikkhati, tadā naṃ titikkhantaṃ puggalaṃ bālo ‘‘ayaṃ me bhayā titikkhatī’’ti maññati, titikkhāya etadeva vajjaṃ ahaṃ passāmi. Vāsava gogaṇo palāyinaṃ gavaṃ ajjhottharati iva, evaṃ dummedho khamantaṃ bhiyyo ajjhāruhati ajjhottharati.

    গাথায, ভিক্খৰে, অসুরিন্দেন ৰেপচিত্তিনা ভাসিতায অসুরা অনুমোদিংসু, দেৰা তুণ্হী অহেসুং। জাযমানে চ গোযুদ্ধে পঠমং দ্ৰেযেৰ গোণা যুজ্ঝন্তি, গোগণো পন যাৰ একো গোণো ন পলাযতি, তাৰ ওলোকেন্তোৰ তিট্ঠতি। যদা চ একো গোণো পলাযতি , তদা সব্বো গোণো তং পলাযিনং গৰং ভিয্যো অজ্ঝোত্থরতীতি গোযুদ্ধসভাৰো ৰেদিতব্বো। ‘‘অথ খো’’তিআদীনং যোজনত্থো পাকটো।

    Gāthāya, bhikkhave, asurindena vepacittinā bhāsitāya asurā anumodiṃsu, devā tuṇhī ahesuṃ. Jāyamāne ca goyuddhe paṭhamaṃ dveyeva goṇā yujjhanti, gogaṇo pana yāva eko goṇo na palāyati, tāva olokentova tiṭṭhati. Yadā ca eko goṇo palāyati , tadā sabbo goṇo taṃ palāyinaṃ gavaṃ bhiyyo ajjhottharatīti goyuddhasabhāvo veditabbo. ‘‘Atha kho’’tiādīnaṃ yojanattho pākaṭo.

    ৰেপচিত্তি, যো পুগ্গলো তিতিক্খতি, তং খমন্তং পুগ্গলং ‘‘অযং মে ভযা তিতিক্খতী’’তি কামং মঞ্ঞতু ৰা, মা মঞ্ঞতু ৰা, তং মঞ্ঞনং নিপ্ফলমেৰ। অত্থা সদত্থপরমা ভৰন্তি। খন্ত্যা খন্তিতো ভিয্যো সদত্থো নাম ন ৰিজ্জতি।

    Vepacitti, yo puggalo titikkhati, taṃ khamantaṃ puggalaṃ ‘‘ayaṃ me bhayā titikkhatī’’ti kāmaṃ maññatu vā, mā maññatu vā, taṃ maññanaṃ nipphalameva. Atthā sadatthaparamā bhavanti. Khantyā khantito bhiyyo sadattho nāma na vijjati.

    যো বলৰা সন্তো দুব্বলস্স হৰে তিতিক্খতীতি তস্স বলৰন্তস্স তং তিতিক্খনং পরমং খন্তিন্তি সপ্পুরিসা আহু, দুব্বলো নিচ্চং খমতি এৰ।

    Yo balavā santo dubbalassa have titikkhatīti tassa balavantassa taṃ titikkhanaṃ paramaṃ khantinti sappurisā āhu, dubbalo niccaṃ khamati eva.

    যস্স বালস্স বালবলং অত্থি, তস্স বালস্স বালবলং ‘‘অবল’’ন্তি সপ্পুরিসা আহু, যস্স ধম্মগুত্তস্স যং বলং অত্থি, তস্স ধম্মগুত্তস্স তস্স বলস্স পটিৰত্তা পটিপ্ফরিত্ৰা ৰত্তা ন ৰিজ্জতি।

    Yassa bālassa bālabalaṃ atthi, tassa bālassa bālabalaṃ ‘‘abala’’nti sappurisā āhu, yassa dhammaguttassa yaṃ balaṃ atthi, tassa dhammaguttassa tassa balassa paṭivattā paṭippharitvā vattā na vijjati.

    ৰেপচিত্তি, যো পুগ্গলো কুদ্ধং পঠমং কুজ্ঝন্তস্স পটিকুজ্ঝতি, সো পটিকুজ্ঝন্তো পুগ্গলো তেন পটিকুজ্ঝনেন তস্স পঠমং কুজ্ঝন্তস্স পাপপুগ্গলস্স পাপপুগ্গলতো পাপিযো এৰ পাপতরো হীনতরো এৰ ভৰে।

    Vepacitti, yo puggalo kuddhaṃ paṭhamaṃ kujjhantassa paṭikujjhati, so paṭikujjhanto puggalo tena paṭikujjhanena tassa paṭhamaṃ kujjhantassa pāpapuggalassa pāpapuggalato pāpiyo eva pāpataro hīnataro eva bhave.

    ৰেপচিত্তি, যো সপ্পুরিসো সতো সতিমা পরং সঙ্কুপিতং ঞত্ৰা পঠমং কুজ্ঝন্তস্স অপ্পটিকুজ্ঝন্তোৰ ভৰে, সো সপ্পুরিসো দুজ্জযং সঙ্গামং জেতি নাম, অত্তনো চ পরস্স চ উভিন্নং অত্থং চরতি নাম।

    Vepacitti, yo sappuriso sato satimā paraṃ saṅkupitaṃ ñatvā paṭhamaṃ kujjhantassa appaṭikujjhantova bhave, so sappuriso dujjayaṃ saṅgāmaṃ jeti nāma, attano ca parassa ca ubhinnaṃ atthaṃ carati nāma.

    অত্তনো চ পরস্স চ তিকিচ্ছন্তানং উভিন্নং কোধো উপসম্মতি, যে জনা ধম্মস্স খন্তিধম্মস্স অত্থে, চতুসচ্চধম্মে ৰা অকোৰিদা ভৰন্তি, তে জনা খমন্তং সপ্পুরিসং ‘‘অযং বালো’’তি মঞ্ঞন্তি, তেসং অকোৰিদানং জনানং তং মঞ্ঞনং নিপ্ফলন্তি।

    Attano ca parassa ca tikicchantānaṃ ubhinnaṃ kodho upasammati, ye janā dhammassa khantidhammassa atthe, catusaccadhamme vā akovidā bhavanti, te janā khamantaṃ sappurisaṃ ‘‘ayaṃ bālo’’ti maññanti, tesaṃ akovidānaṃ janānaṃ taṃ maññanaṃ nipphalanti.

    গাথাসু, ভিক্খৰে, দেৰানমিন্দেন সক্কেন ভাসিতাসু দেৰা অনুমোদিংসু, অসুরা তুণ্হী অহেসুন্তি যোজনা। ইদং ‘‘ভিয্যো বালা’’তিআদিকং ৰচনং সক্কৰেপচিত্তীনং ৰচনভাৰতো পরৰচনং নাম। (৯)

    Gāthāsu, bhikkhave, devānamindena sakkena bhāsitāsu devā anumodiṃsu, asurā tuṇhī ahesunti yojanā. Idaṃ ‘‘bhiyyo bālā’’tiādikaṃ vacanaṃ sakkavepacittīnaṃ vacanabhāvato paravacanaṃ nāma. (9)

    ১১৭. পত্তং এতরহি অধিগতং যঞ্চ কামূপকরণং, আযতিং পত্তব্বং অধিগতং যঞ্চ কামূপকরণং অত্থি, এতং উভযং রজানুকিণ্ণং রাগরজাদিকিণ্ণং ইতি আতুরস্স আতুরানংযেৰ পুগ্গলানং সন্তিকে অনুসিক্খতো অনুসিক্খন্তস্স সিক্খাসারা হুত্ৰা উপট্ঠহন্তি, সীলং ৰতং জীৰিতং ব্রহ্মচরিযং ইমে সিক্খাসারা হুত্ৰা উপট্ঠহন্তীতি যে উপট্ঠানসারা পুগ্গলা সারতো গহেত্ৰা ঠিতা। এত্থ সীলং নাম ‘‘ন করোমী’’তি ওরমণং। ৰতং নাম ভোজনকিচ্চকরণাদি। জীৰিতং নাম আজীৰো। ব্রহ্মচরিযং নাম মেথুনৰিরতিৰিসেসভাৰো ৰেদিতব্বো। তেসং উপট্ঠানসারানং পুগ্গলানং অযং ৰাদো একো পঠমো অন্তো লামকো। যে চ পুগ্গলা ‘‘কামেসু দোসো নত্থী’’তি এৰংৰাদিনো এৰংদিট্ঠিনো হুত্ৰা ঠিতা, তেসং পুগ্গলানং অযং ৰাদো একো দুতিযো অন্তো লামকো। ইচ্চেতে উভো অন্তা অন্তৰাদা পুগ্গলা কটসিৰড্ঢনা কটসিযো দিট্ঠিং ৰড্ঢেন্তি। এতে উভো অন্তে অত্তকিলমথানুযোগে কামসুখল্লিকানুযোগে একে পুগ্গলা অনভিঞ্ঞায ওলীযন্তি, একে পুগ্গলা অতিধাৰন্তীতি যোজনা। ইদং ‘‘যঞ্চ পত্ত’’ন্তিআদিকং ৰচনং পরেসং পুগ্গলানং ৰচনভাৰতো পরৰচনং নাম।

    117.Pattaṃ etarahi adhigataṃ yañca kāmūpakaraṇaṃ, āyatiṃ pattabbaṃ adhigataṃ yañca kāmūpakaraṇaṃ atthi, etaṃ ubhayaṃ rajānukiṇṇaṃ rāgarajādikiṇṇaṃ iti āturassa āturānaṃyeva puggalānaṃ santike anusikkhato anusikkhantassa sikkhāsārā hutvā upaṭṭhahanti, sīlaṃ vataṃ jīvitaṃ brahmacariyaṃ ime sikkhāsārā hutvā upaṭṭhahantīti ye upaṭṭhānasārā puggalā sārato gahetvā ṭhitā. Ettha sīlaṃ nāma ‘‘na karomī’’ti oramaṇaṃ. Vataṃ nāma bhojanakiccakaraṇādi. Jīvitaṃ nāma ājīvo. Brahmacariyaṃ nāma methunavirativisesabhāvo veditabbo. Tesaṃ upaṭṭhānasārānaṃ puggalānaṃ ayaṃ vādo eko paṭhamo anto lāmako. Ye ca puggalā ‘‘kāmesu doso natthī’’ti evaṃvādino evaṃdiṭṭhino hutvā ṭhitā, tesaṃ puggalānaṃ ayaṃ vādo eko dutiyo anto lāmako. Iccete ubho antā antavādā puggalā kaṭasivaḍḍhanā kaṭasiyo diṭṭhiṃ vaḍḍhenti. Ete ubho ante attakilamathānuyoge kāmasukhallikānuyoge eke puggalā anabhiññāya olīyanti, eke puggalā atidhāvantīti yojanā. Idaṃ ‘‘yañca patta’’ntiādikaṃ vacanaṃ paresaṃ puggalānaṃ vacanabhāvato paravacanaṃ nāma.

    যে চ সম্মাদিট্ঠিপুগ্গলা তে উভো অন্তে অত্তকিলমথানুযোগকামসুখল্লিকানুযোগে অভিঞ্ঞায তত্র চ অন্তে ন অহেসুং। তেন চ অভিজাননেন তে উভো অন্তে ন অমঞ্ঞিংসু, তেসং সম্মাদিট্ঠিপুগ্গলানং ৰট্টং তিৰিধং ৰট্টং পঞ্ঞাপনায নত্থি। ইতি এৰং ইদং ‘‘যে চা’’তিআদিকং ৰচনং ভগৰতো ৰচনভাৰতো সকৰচনং নাম। অযং উদানো ‘‘যঞ্চ পত্তং…পে॰… পঞ্ঞাপনাযা’’তি অযং উদানো ৰুত্তনযেন সকৰচনঞ্চ পরৰচনঞ্চ হোতি।

    Ye ca sammādiṭṭhipuggalā te ubho ante attakilamathānuyogakāmasukhallikānuyoge abhiññāya tatra ca ante na ahesuṃ. Tena ca abhijānanena te ubho ante na amaññiṃsu, tesaṃ sammādiṭṭhipuggalānaṃ vaṭṭaṃ tividhaṃ vaṭṭaṃ paññāpanāya natthi. Iti evaṃ idaṃ ‘‘ye cā’’tiādikaṃ vacanaṃ bhagavato vacanabhāvato sakavacanaṃ nāma. Ayaṃ udāno ‘‘yañca pattaṃ…pe… paññāpanāyā’’ti ayaṃ udāno vuttanayena sakavacanañca paravacanañca hoti.

    পসেনদি নাম কোসলো কোসলিস্সরো রাজা ভগৰন্তং এতং ‘‘ইধ ময্হং…পে॰… তেসং পিযো অত্তা’’তি ৰচনং অৰোচ। ভন্তে, ইধ রহোগতস্স পটিসল্লীনস্স ময্হং মম চেতসো চিত্তস্স এৰং পরিৰিতক্কো উদপাদি, কেসং সত্তানং অত্তা পিযো নু খো, কেসং সত্তানং অত্তা অপ্পিযো নু খো ইতি এতং পরিৰিতক্কনং উদপাদি। ভন্তে, তস্স ময্হং এতং পরিৰিতক্কনং অহোসি, যে চ কেচি সত্তা কাযেন দুচ্চরিতং চরন্তি খো…পে॰… মনসা দুচ্চরিতং চরন্তি খো, তেসং সত্তানং অত্তা অপ্পিযো খো। তে দুচ্চরিতং চরন্তা সত্তা ‘‘নো অত্তা পিযো’’তি এৰং কিঞ্চাপি ৰদেয্যুং, অথ খো তেসং দুচ্চরিতং চরন্তানং সত্তানং অত্তা অপ্পিযোৰ। তং কিস্স হেতু? অপ্পিযো অপ্পিযস্স অনত্থায যং দুচ্চরিতং করেয্য, তং দুচ্চরিতং তে দুচ্চরিতং চরন্তা সত্তা অত্তনাৰ. সযমেৰ। অত্তনো অনত্থায হি যস্মা করোন্তি, তস্মা তেসং দুচ্চরিতং চরন্তানং সত্তানং অত্তা অপ্পিযোৰাতি এতং পরিৰিতক্কনং অহোসি।

    Pasenadi nāma kosalo kosalissaro rājā bhagavantaṃ etaṃ ‘‘idha mayhaṃ…pe… tesaṃ piyo attā’’ti vacanaṃ avoca. Bhante, idha rahogatassa paṭisallīnassa mayhaṃ mama cetaso cittassa evaṃ parivitakko udapādi, kesaṃ sattānaṃ attā piyo nu kho, kesaṃ sattānaṃ attā appiyo nu kho iti etaṃ parivitakkanaṃ udapādi. Bhante, tassa mayhaṃ etaṃ parivitakkanaṃ ahosi, ye ca keci sattā kāyena duccaritaṃ caranti kho…pe… manasā duccaritaṃ caranti kho, tesaṃ sattānaṃ attā appiyo kho. Te duccaritaṃ carantā sattā ‘‘no attā piyo’’ti evaṃ kiñcāpi vadeyyuṃ, atha kho tesaṃ duccaritaṃ carantānaṃ sattānaṃ attā appiyova. Taṃ kissa hetu? Appiyo appiyassa anatthāya yaṃ duccaritaṃ kareyya, taṃ duccaritaṃ te duccaritaṃ carantā sattā attanāva. sayameva. Attano anatthāya hi yasmā karonti, tasmā tesaṃ duccaritaṃ carantānaṃ sattānaṃ attā appiyovāti etaṃ parivitakkanaṃ ahosi.

    ভন্তে , যে চ কেচি সত্তা কাযেন সুচরিতং চরন্তি খো…পে॰… মনসা সুচরিতং চরন্তি খো, তেসং সুচরিতং চরন্তানং সত্তানং অত্তা পিযো খো, তে সুচরিতং চরন্তা সত্তা ‘‘নো অত্তা অপ্পিযো’’তি এৰং কিঞ্চাপি ৰদেয্যুং, অথ খো তেসং সুচরিতং চরন্তানং সত্তানং অত্তা পিযোৰ। তং কিস্স হেতু? পিযো পিযস্স অত্থায যং সুচরিতং চরেয্য, তং সুচরিতং তে সুচরিতং চরন্তা সত্তা অত্তনাৰ সযমেৰ অত্তনো অত্থায হি যস্মা করোন্তি , তস্মা তেসং সুচরিতং চরন্তানং সত্তানং অত্তা পিযোৰাতি এতং পরিৰিতক্কনং অহোসি। এতং ৰচনং অৰোচাতি যোজনা।

    Bhante , ye ca keci sattā kāyena sucaritaṃ caranti kho…pe… manasā sucaritaṃ caranti kho, tesaṃ sucaritaṃ carantānaṃ sattānaṃ attā piyo kho, te sucaritaṃ carantā sattā ‘‘no attā appiyo’’ti evaṃ kiñcāpi vadeyyuṃ, atha kho tesaṃ sucaritaṃ carantānaṃ sattānaṃ attā piyova. Taṃ kissa hetu? Piyo piyassa atthāya yaṃ sucaritaṃ careyya, taṃ sucaritaṃ te sucaritaṃ carantā sattā attanāva sayameva attano atthāya hi yasmā karonti , tasmā tesaṃ sucaritaṃ carantānaṃ sattānaṃ attā piyovāti etaṃ parivitakkanaṃ ahosi. Etaṃ vacanaṃ avocāti yojanā.

    ‘‘এৰমেতং মহারাজা’’তি ৰচনং পঠমং ৰত্ৰা ‘‘যে হি কেচী’’তিআদিকে ভগৰতো ৰুত্তৰচনেপি যোজনা তথেৰ কাতব্বা।

    ‘‘Evametaṃ mahārājā’’ti vacanaṃ paṭhamaṃ vatvā ‘‘ye hi kecī’’tiādike bhagavato vuttavacanepi yojanā tatheva kātabbā.

    গাথাসু পন যো পণ্ডিতো অত্তানং ‘‘পিয’’ন্তি চে জঞ্ঞা, এৰং সতি সো পণ্ডিতো নং অত্তানং পাপেন কম্মেন ন সংযুজে ন সংযোজেয্য, তং ৰচনং হি সচ্চং পিযং অত্তানং সুলভং ন হোতি, দুক্কটকারিনা সুখং সুলভং ন হোতি।

    Gāthāsu pana yo paṇḍito attānaṃ ‘‘piya’’nti ce jaññā, evaṃ sati so paṇḍito naṃ attānaṃ pāpena kammena na saṃyuje na saṃyojeyya, taṃ vacanaṃ hi saccaṃ piyaṃ attānaṃ sulabhaṃ na hoti, dukkaṭakārinā sukhaṃ sulabhaṃ na hoti.

    অন্তকেন মচ্চুনা অধিপন্নস্স মানুসং ভৰং জহতো পজহন্তস্স তস্স মরণমুখে ঠিতস্স সত্তস্স কিং সকং হোতি, মরণমুখে ঠিতো সো সত্তো কিঞ্চ আদায পরলোকং গচ্ছতি, ছাযা গচ্ছন্তং সত্তং অনপাযিনী ইৰ, এৰং অস্স পরলোকগতস্স সত্তস্স কিঞ্চ অনুগং হোতি।

    Antakena maccunā adhipannassa mānusaṃ bhavaṃ jahato pajahantassa tassa maraṇamukhe ṭhitassa sattassa kiṃ sakaṃ hoti, maraṇamukhe ṭhito so satto kiñca ādāya paralokaṃ gacchati, chāyā gacchantaṃ sattaṃ anapāyinī iva, evaṃ assa paralokagatassa sattassa kiñca anugaṃ hoti.

    ইতি ভগৰা এৰং পুচ্ছতি, পুচ্ছিত্ৰা ‘‘উভো’’তিআদিৰিস্সজ্জনৰচনঞ্চ আহ। ইধ লোকে যো মচ্চো যং পুঞ্ঞঞ্চ যং পাপঞ্চ উভো কম্মে কুরুতে করোতি, তস্স পরলোকগতস্স মচ্চস্স তং পুঞ্ঞপাপদ্ৰযং সকং হোতি। পরলোকং গতো মচ্চো তংৰ পুঞ্ঞপাপদ্ৰযং আদায পরলোকং গচ্ছতি, ছাযা গচ্ছন্তং সত্তং অনপাযিনী ইৰ, এৰং অস্স পরলোকগতস্স মচ্চস্স তংৰ পুঞ্ঞপাপদ্ৰযং অনুগং হোতি।

    Iti bhagavā evaṃ pucchati, pucchitvā ‘‘ubho’’tiādivissajjanavacanañca āha. Idha loke yo macco yaṃ puññañca yaṃ pāpañca ubho kamme kurute karoti, tassa paralokagatassa maccassa taṃ puññapāpadvayaṃ sakaṃ hoti. Paralokaṃ gato macco taṃva puññapāpadvayaṃ ādāya paralokaṃ gacchati, chāyā gacchantaṃ sattaṃ anapāyinī iva, evaṃ assa paralokagatassa maccassa taṃva puññapāpadvayaṃ anugaṃ hoti.

    তস্মা পণ্ডিতো সম্পরাযিকং সম্পরাযে ফলনিব্বত্তাপকং কল্যাণং নিচযং নিচযন্তো হুত্ৰা করেয্য। পাণিনং পরলোকস্মিং পুঞ্ঞানি পতিট্ঠা হোন্তি, ইতি ভগৰা আহাতি যোজনা কাতব্বা। ইদং ‘‘রাজা পসেনদী’’তিআদিকং সুত্তং কোসলরঞ্ঞো ৰচনভাৰতো পরৰচনং হোতি। ‘‘এৰমেতং , মহারাজ, এৰমেতং মহারাজা’’তিআদিকা অনুগীতি ভগৰতো ৰচনভাৰতো সকৰচনং হোতি। ইদং দ্ৰযং ৰচনং সকৰচনঞ্চ পরৰচনঞ্চ হোতি। (১০)

    Tasmā paṇḍito samparāyikaṃ samparāye phalanibbattāpakaṃ kalyāṇaṃ nicayaṃ nicayanto hutvā kareyya. Pāṇinaṃ paralokasmiṃ puññāni patiṭṭhā honti, iti bhagavā āhāti yojanā kātabbā. Idaṃ ‘‘rājā pasenadī’’tiādikaṃ suttaṃ kosalarañño vacanabhāvato paravacanaṃ hoti. ‘‘Evametaṃ , mahārāja, evametaṃ mahārājā’’tiādikā anugīti bhagavato vacanabhāvato sakavacanaṃ hoti. Idaṃ dvayaṃ vacanaṃ sakavacanañca paravacanañca hoti. (10)

    ১১৮. পঞ্হে পুচ্ছিতে ইদং দুক্খসচ্চং অভিঞ্ঞেয্যং, ইদং সমুদযসচ্চং পহাতব্বং, ইদং মগ্গসচ্চং ভাৰেতব্বং, ইদং নিরোধসচ্চং, ফলং ৰা সচ্ছিকাতব্বং, ইমে কুসলাকুসলা ধম্মা এৰং কুসলাকুসলভাৰেন গহিতা অনৰজ্জসাৰজ্জভাৰেন ৰা গহিতা সুখৰিপাকদুক্খৰিপাকভাৰেন ৰা গহিতা , ইদং ইট্ঠৰিপাকং ইদং অনিট্ঠৰিপাকং ফলং নিব্বত্তযইতি এৰংগহিতানং তেসং কুসলাকুসলধম্মানং অযং ৰুড্ঢি অত্থো, অযং হানি অত্থোতি। ইতি ইদং ‘‘পঞ্হে পুচ্ছিতে’’তিআদিকং সুত্তং ৰিস্সজ্জনীযে অত্থে ৰাচকঞাপকভাৰেন পৰত্তনতো ৰিস্সজ্জনীযং নাম।

    118. Pañhe pucchite idaṃ dukkhasaccaṃ abhiññeyyaṃ, idaṃ samudayasaccaṃ pahātabbaṃ, idaṃ maggasaccaṃ bhāvetabbaṃ, idaṃ nirodhasaccaṃ, phalaṃ vā sacchikātabbaṃ, ime kusalākusalā dhammā evaṃ kusalākusalabhāvena gahitā anavajjasāvajjabhāvena vā gahitā sukhavipākadukkhavipākabhāvena vā gahitā, idaṃ iṭṭhavipākaṃ idaṃ aniṭṭhavipākaṃ phalaṃ nibbattayaiti evaṃgahitānaṃ tesaṃ kusalākusaladhammānaṃ ayaṃ vuḍḍhi attho, ayaṃ hāni atthoti. Iti idaṃ ‘‘pañhe pucchite’’tiādikaṃ suttaṃ vissajjanīye atthe vācakañāpakabhāvena pavattanato vissajjanīyaṃ nāma.

    ‘‘উল়ারো বুদ্ধো ভগৰা’’তি ইমিনা পদেন বুদ্ধউল়ারতং একংসেনেৰ এককোট্ঠাসেনেৰ নিদ্দিসে। ‘‘স্ৰাক্খাতো ধম্মো’’তি ইমিনা পদেন ধম্মস্ৰাক্খাততং একংসেনেৰ এককোট্ঠাসেনেৰ নিদ্দিসে। ‘‘সুপ্পটিপন্নো সঙ্ঘো’’তি ইমিনা পদেন সঙ্ঘসুপ্পটিপত্তিং একংসেনেৰ এককোট্ঠাসেনেৰ নিদ্দিসে ‘‘সব্বে সঙ্খারা অনিচ্চা’’তি ইমিনা পদেন সঙ্খারানিচ্চতং একংসেনেৰ নিদ্দিসে। ‘‘সব্বে সঙ্খারা দুক্খা’’তি ইমিনা পদেন সঙ্খারদুক্খতং একংসেনেৰ নিদ্দিসে। ‘‘সব্বে ধম্মা অনত্তা’’তি ইমিনা পদেন ধম্মানত্ততং একংসেনেৰ নিদ্দিসে। ‘‘সব্বে সঙ্খারা অনত্তা’’তি অৰত্ৰা ‘‘সব্বে ধম্মা অনত্তা’’তি ৰুত্তেন ইমিনা পদেন সঙ্খারেহি অঞ্ঞং যং ৰা পন মগ্গফলনিরোধসমাপত্তিধম্মজাতং অত্থি, তং মগ্গফলনিরোধসমাপত্তিধম্মজাতম্পি এৰংজাতিযং এৰং একংসব্যাকরণীযন্তি মগ্গফলনিরোধসমাপত্তিধম্মজাতস্সাপি অনত্ততং একংসেনেৰ নিদ্দিসেতি যোজনা। ইদং ‘‘উল়ারো’’তিআদিকং সুত্তং ৰিস্সজ্জনীযে বুদ্ধউল়ারতাদিকে ৰাচকঞাপকভাৰেন পৰত্তনতো ৰিস্সজ্জনীযং নাম।

    ‘‘Uḷāro buddho bhagavā’’ti iminā padena buddhauḷārataṃ ekaṃseneva ekakoṭṭhāseneva niddise. ‘‘Svākkhāto dhammo’’ti iminā padena dhammasvākkhātataṃ ekaṃseneva ekakoṭṭhāseneva niddise. ‘‘Suppaṭipanno saṅgho’’ti iminā padena saṅghasuppaṭipattiṃ ekaṃseneva ekakoṭṭhāseneva niddise ‘‘sabbe saṅkhārā aniccā’’ti iminā padena saṅkhārāniccataṃ ekaṃseneva niddise. ‘‘Sabbe saṅkhārā dukkhā’’ti iminā padena saṅkhāradukkhataṃ ekaṃseneva niddise. ‘‘Sabbe dhammā anattā’’ti iminā padena dhammānattataṃ ekaṃseneva niddise. ‘‘Sabbe saṅkhārā anattā’’ti avatvā ‘‘sabbe dhammā anattā’’ti vuttena iminā padena saṅkhārehi aññaṃ yaṃ vā pana maggaphalanirodhasamāpattidhammajātaṃ atthi, taṃ maggaphalanirodhasamāpattidhammajātampi evaṃjātiyaṃ evaṃ ekaṃsabyākaraṇīyanti maggaphalanirodhasamāpattidhammajātassāpi anattataṃ ekaṃseneva niddiseti yojanā. Idaṃ ‘‘uḷāro’’tiādikaṃ suttaṃ vissajjanīye buddhauḷāratādike vācakañāpakabhāvena pavattanato vissajjanīyaṃ nāma.

    নরদম্মসারথি আকঙ্খতো তে ভগৰতো মনসা সব্বঞ্ঞুতঞ্ঞাণসহিতাদিমনসা ৰিচিন্তিতং ঞেয্যধম্মং দেৰা মনুস্সা সব্বে পাণিনো ন জঞ্ঞা ন জানেয্যুং। সন্তং অরণং সমাধিং নিসেৰতো তে ভগৰতো মনসা ৰিচিন্তিতা কসিণাপি সব্বে পাণিনো ন জঞ্ঞা ন জানেয্যুং। কসিণাপি ৰা কসিণারম্মণায পঞ্ঞাযপি ন জঞ্ঞা ন জানেয্যুং। কসিণাপীতি এত্থ চ ‘‘কসিণাযপী’’তি ৰত্তব্বেপি য-কার লোপৰসেন ‘‘কসিণাপী’’তি ৰুত্তং। অথ ৰা ‘‘যং আকঙ্খতি যং আকঙ্খনং করোতি, তং আকঙ্খনং কিং কতম’’ন্তি পুচ্ছিতং পঞ্হং অঞ্ঞেসং অৰিসযত্তা অৰিস্সজ্জনীযং হোতীতি যোজনা। ইদং ‘‘আকঙ্খতো’’তিআদিকং সুত্তং অৰিস্সজ্জনীযে ৰিসযে ৰাচকঞাপকভাৰেন পৰত্তনতো অৰিস্সজ্জনীযং নাম।

    Naradammasārathi ākaṅkhato te bhagavato manasā sabbaññutaññāṇasahitādimanasā vicintitaṃ ñeyyadhammaṃ devā manussā sabbe pāṇino na jaññā na jāneyyuṃ. Santaṃ araṇaṃ samādhiṃ nisevato te bhagavato manasā vicintitā kasiṇāpi sabbe pāṇino na jaññā na jāneyyuṃ. Kasiṇāpi vā kasiṇārammaṇāya paññāyapi na jaññā na jāneyyuṃ. Kasiṇāpīti ettha ca ‘‘kasiṇāyapī’’ti vattabbepi ya-kāra lopavasena ‘‘kasiṇāpī’’ti vuttaṃ. Atha vā ‘‘yaṃ ākaṅkhati yaṃ ākaṅkhanaṃ karoti, taṃ ākaṅkhanaṃ kiṃ katama’’nti pucchitaṃ pañhaṃ aññesaṃ avisayattā avissajjanīyaṃ hotīti yojanā. Idaṃ ‘‘ākaṅkhato’’tiādikaṃ suttaṃ avissajjanīye visaye vācakañāpakabhāvena pavattanato avissajjanīyaṃ nāma.

    ভগৰা সীলক্খন্ধে সীলক্খন্ধহেতু এত্তকো এতপরিমাণো, ভগৰা সমাধিক্খন্ধে সমাধিক্খন্ধহেতু এত্তকো এতপরিমাণো, ভগৰা পঞ্ঞাক্খন্ধে পঞ্ঞাক্খন্ধহেতু এত্তকো এতপরিমাণো, ভগৰা ৰিমুত্তিক্খন্ধে ৰিমুত্তিক্খন্ধহেতু এত্তকো এতপরিমাণো, ভগৰা ৰিমুত্তিঞাণদস্সনক্খন্ধে ৰিমুত্তিঞাণদস্সনক্খন্ধহেতু এত্তকো এতপরিমাণো, ভগৰা ইরিযাযং কাযৰচীসমাচারে কাযৰচীসমাচারহেতু এত্তকো এতপরিমাণো, ভগৰা পভাৰে আনুভাৰহেতু এত্তকো এতপরিমাণো, ভগৰা হিতেসিতাযং মেত্তাহেতু এত্তকো এতপরিমাণো, ভগৰা করুণাযং করুণাহেতু এত্তকো এতপরিমাণো, ভগৰা ইদ্ধিযং ইদ্ধিৰিধহেতু এত্তকো এতপরিমাণোতি অৰিস্সজ্জনীযোতি যোজনা। ইদং ‘‘এত্তকো’’তিআদিকং সুত্তং অৰিস্সজ্জনীযে ৰিসযে ৰাচকঞাপকভাৰেন পৰত্তনতো অৰিস্সজ্জনীযং নাম।

    Bhagavā sīlakkhandhe sīlakkhandhahetu ettako etaparimāṇo, bhagavā samādhikkhandhe samādhikkhandhahetu ettako etaparimāṇo, bhagavā paññākkhandhe paññākkhandhahetu ettako etaparimāṇo, bhagavā vimuttikkhandhe vimuttikkhandhahetu ettako etaparimāṇo, bhagavā vimuttiñāṇadassanakkhandhe vimuttiñāṇadassanakkhandhahetu ettako etaparimāṇo, bhagavā iriyāyaṃ kāyavacīsamācāre kāyavacīsamācārahetu ettako etaparimāṇo, bhagavā pabhāve ānubhāvahetu ettako etaparimāṇo, bhagavā hitesitāyaṃ mettāhetu ettako etaparimāṇo, bhagavā karuṇāyaṃ karuṇāhetu ettako etaparimāṇo, bhagavā iddhiyaṃ iddhividhahetu ettako etaparimāṇoti avissajjanīyoti yojanā. Idaṃ ‘‘ettako’’tiādikaṃ suttaṃ avissajjanīye visaye vācakañāpakabhāvena pavattanato avissajjanīyaṃ nāma.

    ভিক্খৰে, অরহতো সম্মাসম্বুদ্ধস্স তথাগতস্স লোকে উপ্পাদা উপ্পাদহেতু তিণ্ণং রতনানং উপ্পাদো সম্ভৰতি, আযতিং বুদ্ধরতনস্স উপ্পাদো সম্ভৰতি, একস্স বুদ্ধরতনস্স ধরমানক্খণেন হি অঞ্ঞস্স বুদ্ধরতনস্স অনুপ্পজ্জনতো আযতিন্তি ৰুত্তং, ধম্মরতনস্স উপ্পাদো সম্ভৰতি, সঙ্ঘরতনস্স উপ্পাদো সম্ভৰতীতি তীণি রতনানি। ‘‘তানি তীণি রতনানি গুণতো কিংপমাণানী’’তি পুচ্ছিতে সতি তানি তীণি রতনানি গুণতো এতপরিমাণানীতি ন ৰিস্সজ্জিতব্বানীতি যোজনা। ইদং ‘‘তথাগতস্সা’’তিআদিকং সুত্তং অৰিস্সজ্জনীযে ৰিসযে ৰাচকঞাপকভাৰেন পৰত্তনতো অৰিস্সজ্জনীযং নাম।

    Bhikkhave, arahato sammāsambuddhassa tathāgatassa loke uppādā uppādahetu tiṇṇaṃ ratanānaṃ uppādo sambhavati, āyatiṃ buddharatanassa uppādo sambhavati, ekassa buddharatanassa dharamānakkhaṇena hi aññassa buddharatanassa anuppajjanato āyatinti vuttaṃ, dhammaratanassa uppādo sambhavati, saṅgharatanassa uppādo sambhavatīti tīṇi ratanāni. ‘‘Tāni tīṇi ratanāni guṇato kiṃpamāṇānī’’ti pucchite sati tāni tīṇi ratanāni guṇato etaparimāṇānīti na vissajjitabbānīti yojanā. Idaṃ ‘‘tathāgatassā’’tiādikaṃ suttaṃ avissajjanīye visaye vācakañāpakabhāvena pavattanato avissajjanīyaṃ nāma.

    বুদ্ধৰিসযো পুগ্গলপরো পুগ্গলপধানো পঞ্হো অৰিস্সজ্জনীযো, বুদ্ধৰিসযাৰ পুগ্গলপরোপরঞ্ঞুতা অৰিস্সজ্জনীযা। ভিক্খৰে, অৰিজ্জানীৰরণানং সত্তানং পুব্বা কোটি ন পঞ্ঞাযতি তণ্হাসংযোজনানং, সকিং নিরযং সন্ধাৰতং সংসরতং সত্তানং, সকিং তিরচ্ছানযোনিং সন্ধাৰতং সংসরতং সত্তানং, সকিং পেত্তিৰিসযং সন্ধাৰতং সংসরতং সত্তানং, সকিং অসুরযোনিং সন্ধাৰতং সংসরতং সত্তানং, সকিং দেৰে সন্ধাৰতং সংসরতং সত্তানং, সকিং মনুস্সে সন্ধাৰতং সংসরতং সত্তানং পুব্বা কোটি ন পঞ্ঞাযতি ন দিস্সতি ন উপলব্ভতীতি। ‘‘সা পুব্বা কোটি কতমা’’তি কেনচি কতং পুচ্ছনং অৰিস্সজ্জনীযং সংসারস্স পুব্বকোটিযা অভাৰতো অৰিস্সজ্জনীযং হোতি। ‘‘ন পঞ্ঞাযতী’’তি দেসনা সাৰকানং ঞাণৰেকল্লেন কতা, ন অত্তনো ঞাণৰেকল্লেন। ‘‘ন পঞ্ঞাযতী’’তি দেসনা অত্তনো চেৰ সাৰকানঞ্চ ঞাণৰেকল্লেন কাতব্বা সিযাতি চোদনং মনসি কত্ৰা ‘‘দুৰিধা বুদ্ধানং ভগৰন্তানং দেসনা’’তিআদি ৰুত্তং। অত্তা উপনেতব্বো এতিস্সা দেসনাযাতি অত্তূপনাযিকা। পরো উপনেতব্বো এতিস্সা দেসনাযাতি পরূপনাযিকা। ‘‘কতমা অত্তূপনাযিকা দেসনা, কতমা পরূপনাযিকা দেসনা’’তি পুচ্ছিতব্বত্তা নিযমেত্ৰা দস্সেতুং ‘‘ন পঞ্ঞাযতী’’তিআদি ৰুত্তং। ‘‘ন পঞ্ঞাযতী’’তি দেসনা সাৰকানং নেতব্বানং ৰসেন দেসিতত্তা পরূপনাযিকা দেসনা নাম, ‘‘নত্থি বুদ্ধানং ভগৰন্তানং অৰিজাননা’’তি দেসনা অত্তনো নেতব্বস্স ৰসেন দেসিতত্তা অত্তূপনাযিকা দেসনা নাম। ‘‘নত্থি বুদ্ধানং ভগৰন্তানং অৰিজাননা’’তি ৰুত্তত্তা পুব্বায কোটিযা অভাৰতো এৰ ন পঞ্ঞাযতীতি ৰিঞ্ঞাযতি, ভগৰতো ঞাণস্স পঞ্ঞাপনং কাতুং অসমত্থত্তা ন পঞ্ঞাযতীতি ন ৰিঞ্ঞাযতি তেন অট্ঠকথাযং ‘‘নত্থি বুদ্ধানং ভগৰন্তানং অৰিজাননাতি এতেন পুরিমায কোটিযা অভাৰতো এৰ ন পঞ্ঞাযতি, ন তত্থ ঞাণস্স পটিঘাতোতি দস্সেতী’’তি (নেত্তি॰ অট্ঠ॰ ১১৮) ৰুত্তং।

    Buddhavisayo puggalaparo puggalapadhāno pañho avissajjanīyo, buddhavisayāva puggalaparoparaññutā avissajjanīyā. Bhikkhave, avijjānīvaraṇānaṃ sattānaṃ pubbā koṭi na paññāyati taṇhāsaṃyojanānaṃ, sakiṃ nirayaṃ sandhāvataṃ saṃsarataṃ sattānaṃ, sakiṃ tiracchānayoniṃ sandhāvataṃ saṃsarataṃ sattānaṃ, sakiṃ pettivisayaṃ sandhāvataṃ saṃsarataṃ sattānaṃ, sakiṃ asurayoniṃ sandhāvataṃ saṃsarataṃ sattānaṃ, sakiṃ deve sandhāvataṃ saṃsarataṃ sattānaṃ, sakiṃ manusse sandhāvataṃ saṃsarataṃ sattānaṃ pubbā koṭi na paññāyati na dissati na upalabbhatīti. ‘‘Sā pubbā koṭi katamā’’ti kenaci kataṃ pucchanaṃ avissajjanīyaṃ saṃsārassa pubbakoṭiyā abhāvato avissajjanīyaṃ hoti. ‘‘Na paññāyatī’’ti desanā sāvakānaṃ ñāṇavekallena katā, na attano ñāṇavekallena. ‘‘Na paññāyatī’’ti desanā attano ceva sāvakānañca ñāṇavekallena kātabbā siyāti codanaṃ manasi katvā ‘‘duvidhā buddhānaṃ bhagavantānaṃ desanā’’tiādi vuttaṃ. Attā upanetabbo etissā desanāyāti attūpanāyikā. Paro upanetabbo etissā desanāyāti parūpanāyikā. ‘‘Katamā attūpanāyikā desanā, katamā parūpanāyikā desanā’’ti pucchitabbattā niyametvā dassetuṃ ‘‘na paññāyatī’’tiādi vuttaṃ. ‘‘Na paññāyatī’’ti desanā sāvakānaṃ netabbānaṃ vasena desitattā parūpanāyikā desanā nāma, ‘‘natthi buddhānaṃ bhagavantānaṃ avijānanā’’ti desanā attano netabbassa vasena desitattā attūpanāyikā desanā nāma. ‘‘Natthi buddhānaṃ bhagavantānaṃ avijānanā’’ti vuttattā pubbāya koṭiyā abhāvato eva na paññāyatīti viññāyati, bhagavato ñāṇassa paññāpanaṃ kātuṃ asamatthattā na paññāyatīti na viññāyati tena aṭṭhakathāyaṃ ‘‘natthi buddhānaṃ bhagavantānaṃ avijānanāti etena purimāya koṭiyā abhāvato eva na paññāyati, na tattha ñāṇassa paṭighātoti dassetī’’ti (netti. aṭṭha. 118) vuttaṃ.

    ‘‘কথং পন বুদ্ধানং ভগৰন্তানং অৰিজাননায নত্থিভাৰোৰিজানিতব্বো’’তি ৰত্তব্বত্তা অৰিজাননায নত্থিভাৰং জানাপেতুং ‘‘যথা ভগৰা কোকালিকং ভিক্খু’’ন্তিআদি ৰুত্তং। অট্ঠকথাযং পন – ‘‘যং পন অত্থি, তং অঞ্ঞেসং অপ্পমেয্যম্পি ভগৰতো ন অপ্পমেয্যন্তি ভগৰতো সব্বত্থ অপ্পটিহতঞাণতং দস্সেতুং ‘যথা ভগৰা কোকালিকং ভিক্খুং আরব্ভা’তিআদিমাহা’’তি ৰুত্তং। ভগৰা কোকালিকং ভিক্খুং আরব্ভ ‘‘কীৰ দীঘং নু খো, ভন্তে, পদুমে নিরযে আযুপ্পমাণ’’ন্তি পঞ্হং পুচ্ছিত্ৰা নিসিন্নং অঞ্ঞতরং ভিক্খুং যথা যেন পকারেন ‘‘সেয্যথাপি…পে॰… আঘাতেত্ৰা’’তি এৰমাহ। ততো তেন পকারেন অৰিজাননায নত্থিভাৰো ৰিজানিতব্বোতি অত্থো গহেতব্বো।

    ‘‘Kathaṃ pana buddhānaṃ bhagavantānaṃ avijānanāya natthibhāvovijānitabbo’’ti vattabbattā avijānanāya natthibhāvaṃ jānāpetuṃ ‘‘yathā bhagavā kokālikaṃ bhikkhu’’ntiādi vuttaṃ. Aṭṭhakathāyaṃ pana – ‘‘yaṃ pana atthi, taṃ aññesaṃ appameyyampi bhagavato na appameyyanti bhagavato sabbattha appaṭihatañāṇataṃ dassetuṃ ‘yathā bhagavā kokālikaṃ bhikkhuṃ ārabbhā’tiādimāhā’’ti vuttaṃ. Bhagavā kokālikaṃ bhikkhuṃ ārabbha ‘‘kīva dīghaṃ nu kho, bhante, padume niraye āyuppamāṇa’’nti pañhaṃ pucchitvā nisinnaṃ aññataraṃ bhikkhuṃ yathā yena pakārena ‘‘seyyathāpi…pe… āghātetvā’’ti evamāha. Tato tena pakārena avijānanāya natthibhāvo vijānitabboti attho gahetabbo.

    ভিক্খু, ত্ৰং সল্লক্খেহি, কোকালিকো ৰীসতিখারিকো কোসলকো তিলৰাহো রাসিং কত্ৰা ঠপিতো, ততো তিলতো পুরিসো ৰস্সসতস্স ৰস্সসতস্স অচ্চযেন একমেকং তিলং উদ্ধরেয্য, সো ৰীসতিখারিকো কোসলকো তিলৰাহো ইমিনা উদ্ধরানুপক্কমেন খিপ্পতরং পরিক্খযং পরিযাদানং সেয্যথাপি গচ্ছেয্য, একো অব্বুদো নিরযো পরিক্খযং পরিযাদানং ন ত্ৰেৰ গচ্ছেয্য। ৰীসতি অব্বুদা নিরযা তত্তকে কালে পরিক্খযং পরিযাদানং সেয্যথাপি গচ্ছেয্যুং, এৰমেৰ একো নিরব্বুদো নিরযো তত্তকে কালে পরিক্খযং পরিযাদানং ন ত্ৰেৰ গচ্ছেয্য। এস নযো সেসেসুপি। সারিপুত্তমোগ্গল্লানেসু চিত্তং আঘাতেত্ৰা পদুমং নিরযং কোকালিকো ভিক্খু উপপন্নো খো, ভিক্খু, ত্ৰং এৰং সল্লক্খেহীতি ভগৰা আহাতি যোজনা। ভগৰা ‘‘অযং অপ্পমেয্যো অযং অসঙ্খ্যেয্যো’’তি ৰা ন কিঞ্চি আহ। ‘‘তস্মিং অপ্পমেয্যে কতমো অপ্পমেয্যো, তস্মিং অসঙ্খ্যেয্যে কতমো অসঙ্খ্যেয্যো’’তি কেনচি কতং পুচ্ছনং বুদ্ধৰিসযত্তা অৰিস্সজ্জনীযং। ইদং অপ্পমেয্যঅসঙ্খ্যেয্যসুত্তং ৰুত্তনযেন অৰিস্সজ্জনীযং। (১১)

    Bhikkhu, tvaṃ sallakkhehi, kokāliko vīsatikhāriko kosalako tilavāho rāsiṃ katvā ṭhapito, tato tilato puriso vassasatassa vassasatassa accayena ekamekaṃ tilaṃ uddhareyya, so vīsatikhāriko kosalako tilavāho iminā uddharānupakkamena khippataraṃ parikkhayaṃ pariyādānaṃ seyyathāpi gaccheyya, eko abbudo nirayo parikkhayaṃ pariyādānaṃ na tveva gaccheyya. Vīsati abbudā nirayā tattake kāle parikkhayaṃ pariyādānaṃ seyyathāpi gaccheyyuṃ, evameva eko nirabbudo nirayo tattake kāle parikkhayaṃ pariyādānaṃ na tveva gaccheyya. Esa nayo sesesupi. Sāriputtamoggallānesu cittaṃ āghātetvā padumaṃ nirayaṃ kokāliko bhikkhu upapanno kho, bhikkhu, tvaṃ evaṃ sallakkhehīti bhagavā āhāti yojanā. Bhagavā ‘‘ayaṃ appameyyo ayaṃ asaṅkhyeyyo’’ti vā na kiñci āha. ‘‘Tasmiṃ appameyye katamo appameyyo, tasmiṃ asaṅkhyeyye katamo asaṅkhyeyyo’’ti kenaci kataṃ pucchanaṃ buddhavisayattā avissajjanīyaṃ. Idaṃ appameyyaasaṅkhyeyyasuttaṃ vuttanayena avissajjanīyaṃ. (11)

    ১১৯. ‘‘যদা সো উপকো’’তিআদীসু যোজনা পাকটা।

    119.‘‘Yadā so upako’’tiādīsu yojanā pākaṭā.

    ‘‘কথং কেন পকারেন জিনো’’তি উপকেন কতং পুচ্ছনং ‘‘কিলেসপ্পহানপকারেন জিনো’’তি ৰিস্সজ্জনীযত্তা ৰিস্সজ্জনীযং। ‘‘কেন পকারেন জিনো’’তি উপকেন কতং পুচ্ছনং ‘‘পাপকানং ধম্মানং জিতত্তা জিনো’’তি ৰিস্সজ্জনীযত্তা ৰিস্সজ্জনীযং। ‘‘কতমো জিনো’’তি কতং পুচ্ছনং ‘‘রূপাদিকো জিনো’’তি ৰা ‘‘রূপাদিকং মুঞ্চিত্ৰা অঞ্ঞো জিনো’’তি ৰা ৰিস্সজ্জেতুং অসক্কুণেয্যত্তা অৰিস্সজ্জনীযং। ‘‘কতমো আসৰক্খযো, কতমো রাগক্খযো, কতমো দোসক্খযো, কতমো মোহক্খযো’’তি কতং পুচ্ছনং ‘‘নিব্বানং আসৰক্খযো’’তি ৰা ‘‘অরহত্তমগ্গো আসৰক্খযো’’তি ৰা ‘‘অরহত্তফলং রাগক্খযো’’তি ৰা ইতি এৰমাদিনা ৰিস্সজ্জনীযত্তা ৰিস্সজ্জনীযং। ‘‘কিত্তকো আসৰক্খযো, কিত্তকো রাগক্খযো, কিত্তকো দোসক্খযো, কিত্তকো মোহক্খযো’’তি কতং পুচ্ছনং ‘‘এত্তকো এতপরিমাণো আসৰক্খযো’’তি এৰমাদিনা অৰিস্সজ্জনীযত্তা অৰিস্সজ্জনীযং। ইদং ৰুত্তপ্পকারং সুত্তং ৰুত্তনযেন ৰিস্সজ্জনীযঞ্চ অৰিস্সজ্জনীযঞ্চ হোতি। (১২)

    ‘‘Kathaṃ kena pakārena jino’’ti upakena kataṃ pucchanaṃ ‘‘kilesappahānapakārena jino’’ti vissajjanīyattā vissajjanīyaṃ. ‘‘Kena pakārena jino’’ti upakena kataṃ pucchanaṃ ‘‘pāpakānaṃ dhammānaṃ jitattā jino’’ti vissajjanīyattā vissajjanīyaṃ. ‘‘Katamo jino’’ti kataṃ pucchanaṃ ‘‘rūpādiko jino’’ti vā ‘‘rūpādikaṃ muñcitvā añño jino’’ti vā vissajjetuṃ asakkuṇeyyattā avissajjanīyaṃ. ‘‘Katamo āsavakkhayo, katamo rāgakkhayo, katamo dosakkhayo, katamo mohakkhayo’’ti kataṃ pucchanaṃ ‘‘nibbānaṃ āsavakkhayo’’ti vā ‘‘arahattamaggo āsavakkhayo’’ti vā ‘‘arahattaphalaṃ rāgakkhayo’’ti vā iti evamādinā vissajjanīyattā vissajjanīyaṃ. ‘‘Kittako āsavakkhayo, kittako rāgakkhayo, kittako dosakkhayo, kittako mohakkhayo’’ti kataṃ pucchanaṃ ‘‘ettako etaparimāṇo āsavakkhayo’’ti evamādinā avissajjanīyattā avissajjanīyaṃ. Idaṃ vuttappakāraṃ suttaṃ vuttanayena vissajjanīyañca avissajjanīyañca hoti. (12)

    ‘‘তথাগতো সত্তো অত্থী’’তি পুচ্ছনং ‘‘পঞ্চক্খন্ধে উপাদায পঞ্ঞাপেতব্বো সত্তভূতো অত্থী’’তি ৰিস্সজ্জনীযত্তা ৰিস্সজ্জনীযং। ‘‘অত্থি রূপ’’ন্তি কতং পুচ্ছনং রূপস্স ৰিস্সজ্জমানত্তা ‘‘আমন্তা’’তি ৰিস্সজ্জনীযত্তা ৰিস্সজ্জনীযং, ‘‘রূপং তথাগতো’’তি কতং পুচ্ছনং তথাভাৰতো অলব্ভনতো অৰিস্সজ্জনীযত্তা অৰিস্সজ্জনীযং। ‘‘রূপৰা তথাগতো’’তিআদীসুপি এস নযো যথাসম্ভৰং যোজেতব্বো। ইদং ৰুত্তপ্পকারং সুত্তং ৰুত্তনযেন ৰিস্সজ্জনীযঞ্চ অৰিস্সজ্জনীযঞ্চ হোতি।

    ‘‘Tathāgato satto atthī’’ti pucchanaṃ ‘‘pañcakkhandhe upādāya paññāpetabbo sattabhūto atthī’’ti vissajjanīyattā vissajjanīyaṃ. ‘‘Atthi rūpa’’nti kataṃ pucchanaṃ rūpassa vissajjamānattā ‘‘āmantā’’ti vissajjanīyattā vissajjanīyaṃ, ‘‘rūpaṃ tathāgato’’ti kataṃ pucchanaṃ tathābhāvato alabbhanato avissajjanīyattā avissajjanīyaṃ. ‘‘Rūpavā tathāgato’’tiādīsupi esa nayo yathāsambhavaṃ yojetabbo. Idaṃ vuttappakāraṃ suttaṃ vuttanayena vissajjanīyañca avissajjanīyañca hoti.

    ‘‘পস্সতি ভগৰা দিব্বেন চক্খুনা…পে॰… যথাকম্মূপগে সত্তে পজানাতী’’তি কতং পুচ্ছনং ‘‘পস্সতি ভগৰা’’তি ৰা…পে॰… ‘‘পজানাতি ভগৰা’’তি ৰা ৰিস্সজ্জনীযত্তা ৰিস্সজ্জনীযং। ‘‘কতমে সত্তা, কতমো তথাগতো’’তি কতং পুচ্ছনং পরমত্থতো অলব্ভনতো অৰিস্সজ্জনীযত্তা অৰিস্সজ্জনীযং।

    ‘‘Passati bhagavā dibbena cakkhunā…pe… yathākammūpage satte pajānātī’’ti kataṃ pucchanaṃ ‘‘passati bhagavā’’ti vā…pe… ‘‘pajānāti bhagavā’’ti vā vissajjanīyattā vissajjanīyaṃ. ‘‘Katame sattā, katamo tathāgato’’ti kataṃ pucchanaṃ paramatthato alabbhanato avissajjanīyattā avissajjanīyaṃ.

    ‘‘অত্থি তথাগতো’’তি কতং পুচ্ছনং হেট্ঠা ৰুত্তনযেন ৰিস্সজ্জনীযং। ‘‘অত্থি তথাগতো পরং মরণা’’তি কতং পুচ্ছনং ‘‘অত্থি তথাগতো পরং মরণা’’তি ৰিস্সজ্জমানে সতি চ ইধলোকো এৰ পরলোকোতি আপজ্জতি, ‘‘নত্থি তথাগতো পরং মরণা’’তি ৰিস্সজ্জমানে সতি চ ইধলোকতো অঞ্ঞো পরলোকোতি আপজ্জতি, তস্মা অৰিস্সজ্জনীযত্তা অৰিস্সজ্জনীযং। ইদং ৰুত্তপ্পকারং সুত্তং ৰিস্সজ্জনীযে ৰিসযে চ অৰিস্সজ্জনীযে ৰিসযে চ ৰাচকঞাপকভাৰেন পৰত্তনতো ৰিস্সজ্জনীযঞ্চ অৰিস্সজ্জনীযঞ্চ হোতি।

    ‘‘Atthitathāgato’’ti kataṃ pucchanaṃ heṭṭhā vuttanayena vissajjanīyaṃ. ‘‘Atthi tathāgato paraṃ maraṇā’’ti kataṃ pucchanaṃ ‘‘atthi tathāgato paraṃ maraṇā’’ti vissajjamāne sati ca idhaloko eva paralokoti āpajjati, ‘‘natthi tathāgato paraṃ maraṇā’’ti vissajjamāne sati ca idhalokato añño paralokoti āpajjati, tasmā avissajjanīyattā avissajjanīyaṃ. Idaṃ vuttappakāraṃ suttaṃ vissajjanīye visaye ca avissajjanīye visaye ca vācakañāpakabhāvena pavattanato vissajjanīyañca avissajjanīyañca hoti.

    ১২০. নানাৰিধং ৰিস্সজ্জনীযাৰিস্সজ্জনীযসুত্তং আচরিযেন নিদ্ধারিতং, অম্হেহি চ ঞাতং, ‘‘কতমং সুত্তং কম্ম’’ন্তি পুচ্ছিতব্বত্তা ‘‘তত্থ কতমং কম্ম’’ন্তিআদি ৰুত্তং।

    120. Nānāvidhaṃ vissajjanīyāvissajjanīyasuttaṃ ācariyena niddhāritaṃ, amhehi ca ñātaṃ, ‘‘katamaṃ suttaṃ kamma’’nti pucchitabbattā ‘‘tattha katamaṃ kamma’’ntiādi vuttaṃ.

    ‘‘অন্তকেনাধিপন্নস্সা’’তিআদীসু অত্থো হেট্ঠা ৰুত্তনযত্তা পাকটো ‘‘মরণেনাভিভূতস্স…পে॰… ছাযাৰ অনপাযিনী’’তি ইদং সুত্তং পুঞ্ঞকম্মপাপকম্মদ্ৰযে ৰাচকঞাপকভাৰেন পৰত্তনতো কম্মং নাম।

    ‘‘Antakenādhipannassā’’tiādīsu attho heṭṭhā vuttanayattā pākaṭo ‘‘maraṇenābhibhūtassa…pe… chāyāva anapāyinī’’ti idaṃ suttaṃ puññakammapāpakammadvaye vācakañāpakabhāvena pavattanato kammaṃ nāma.

    ভিক্খৰে, তুম্হে পুন চপরং কম্মং সল্লক্খেথ। (অনুট্ঠানগিলানং) অনুট্ঠানগিলানস্স পীঠসমারুল়্হং পীঠসমারুল়্হস্স বালং বালস্স ৰা মঞ্চসমারুল়্হং মঞ্চসমারুল়্হস্স বালং বালস্স ৰা ছমাযং ভূমিযং সেমানং সেমানস্স সযন্তস্স বালং বালস্স ৰা কাযেন দুচ্চরিতানি ৰাচায দুচ্চরিতানি মনসা দুচ্চরিতানি পাপকানি যানি কম্মানি পুব্বে পুব্বকালে ৰা অতীতে অনেককপ্পকোটিসতসহস্সে ৰা অস্স বালেন কতানি, তানি পাপকানি কম্মানি তম্হি পীঠসমারুল়্হাদিসমযে ওলম্বন্তি ৰিয উপট্ঠহন্তি অজ্ঝোলম্বন্তি ৰিয উপট্ঠহন্তি অভিপ্পলম্বন্তি ৰিয উপট্ঠহন্তি। ভিক্খৰে , মহতং মহন্তানং পব্বতকূটানং ছাযা সাযন্হসমযং পথৰিযং সেয্যথাপি ওলম্বন্তি অজ্ঝোলম্বন্তি অভিপ্পলম্বন্তি যথা, ভিক্খৰে, এৰমেৰ বালং…পে॰… অভিপ্পলম্বন্তি। ভিক্খৰে, তত্র তস্মিং উপট্ঠানাকারে উপট্ঠানাকারহেতু বালস্স কতপাপস্স এৰং পরিৰিতক্কো হোতি ‘‘মে মযা কল্যাণং অকতং ৰত, মে মযা কুসলং অকতং ৰত, ভীরুত্তাণং কতং ৰত, মে মযা পাপং কতং ৰত, মে মযা লুদ্দং কতং ৰত, মে মযা কিব্বিসং কতং ৰত, ভো অগিলান সপ্পুরিস অকতকল্যাণানং অকতকুসলানং অকতভীরুত্তাণানং কতপাপানং কতলুদ্দানং কতকিব্বিসানং যাৰতা গতি দুগ্গতি অত্থি, তং গতিং অহং পেচ্চ গচ্ছামী’’তি এৰং পরিৰিতক্কো হোতি। এৰং ৰিতক্কেন্তো সো বালো সোচতি কিলমতি পরিদেৰতি, উরত্তাল়িং কন্দতি সম্মোহং আপজ্জতীতি যোজনা।

    Bhikkhave, tumhe puna caparaṃ kammaṃ sallakkhetha. (Anuṭṭhānagilānaṃ) anuṭṭhānagilānassa pīṭhasamāruḷhaṃ pīṭhasamāruḷhassa bālaṃ bālassa vā mañcasamāruḷhaṃ mañcasamāruḷhassa bālaṃ bālassa vā chamāyaṃ bhūmiyaṃ semānaṃ semānassa sayantassa bālaṃ bālassa vā kāyena duccaritāni vācāya duccaritāni manasā duccaritāni pāpakāni yāni kammāni pubbe pubbakāle vā atīte anekakappakoṭisatasahasse vā assa bālena katāni, tāni pāpakāni kammāni tamhi pīṭhasamāruḷhādisamaye olambanti viya upaṭṭhahanti ajjholambanti viya upaṭṭhahanti abhippalambanti viya upaṭṭhahanti. Bhikkhave , mahataṃ mahantānaṃ pabbatakūṭānaṃ chāyā sāyanhasamayaṃ pathaviyaṃ seyyathāpi olambanti ajjholambanti abhippalambanti yathā, bhikkhave, evameva bālaṃ…pe… abhippalambanti. Bhikkhave, tatra tasmiṃ upaṭṭhānākāre upaṭṭhānākārahetu bālassa katapāpassa evaṃ parivitakko hoti ‘‘me mayā kalyāṇaṃ akataṃ vata, me mayā kusalaṃ akataṃ vata, bhīruttāṇaṃ kataṃ vata, me mayā pāpaṃ kataṃ vata, me mayā luddaṃ kataṃ vata, me mayā kibbisaṃ kataṃ vata, bho agilāna sappurisa akatakalyāṇānaṃ akatakusalānaṃ akatabhīruttāṇānaṃ katapāpānaṃ kataluddānaṃ katakibbisānaṃ yāvatā gati duggati atthi, taṃ gatiṃ ahaṃ pecca gacchāmī’’ti evaṃ parivitakko hoti. Evaṃ vitakkento so bālo socati kilamati paridevati, urattāḷiṃ kandati sammohaṃ āpajjatīti yojanā.

    পব্বতকূটানং ছাযা নাম সূরিযুগ্গমনকালেপি পথৰিযা ওলম্বন্তীপি ছাযা হাযনৰসেন ওলম্বন্তি। সাযন্হসমযং পন ছাযা ৰড্ঢনৰসেন ওলম্বন্তি, তথেৰ কম্মানিপি তস্মিং কালে ৰড্ঢনৰসেন উপট্ঠহন্তি, তস্মা তমেৰ ৰড্ঢনুপট্ঠানং সন্ধায ‘‘সাযন্হসময’’ন্তি ৰুত্তং। সুক্কপক্খেপি যোজনা কণ্হপক্খে যোজনানুসারেন কাতব্বা। ইদং ‘‘পুন চপর’’ন্তিআদিকং সুত্তদ্ৰযং কুসলকম্মঅকুসলকম্মেসু ৰাচকঞাপকভাৰেন পৰত্তনতো কম্মং নাম।

    Pabbatakūṭānaṃ chāyā nāma sūriyuggamanakālepi pathaviyā olambantīpi chāyā hāyanavasena olambanti. Sāyanhasamayaṃ pana chāyā vaḍḍhanavasena olambanti, tatheva kammānipi tasmiṃ kāle vaḍḍhanavasena upaṭṭhahanti, tasmā tameva vaḍḍhanupaṭṭhānaṃ sandhāya ‘‘sāyanhasamaya’’nti vuttaṃ. Sukkapakkhepi yojanā kaṇhapakkhe yojanānusārena kātabbā. Idaṃ ‘‘puna capara’’ntiādikaṃ suttadvayaṃ kusalakammaakusalakammesu vācakañāpakabhāvena pavattanato kammaṃ nāma.

    নানাৰিধং কম্মং আচরিযেন নিদ্ধারিতং, অম্হেহি চ ঞাতং, ‘‘কতমো ৰিপাকো’’তি পুচ্ছিতব্বত্তা তত্থ কতমো ৰিপাকো’’তিআদি ৰুত্তং। তত্থ তেসু অট্ঠৰীসতিৰিধেসু লোকিযাদীসু সাসনপট্ঠানেসু কতমো ৰিপাকোতি পুচ্ছতি। ভিক্খৰে, ৰো তুম্হেহি যে মনুস্সত্তসদ্ধাপটিলাভাদযো পটিলদ্ধা, তে মনুস্সত্তসদ্ধাপটিলাভাদযো ৰো তুম্হাকং লাভা ভৰন্তি। তুম্হেহি পব্বজিত্ৰা যং চতুপারিসুদ্ধিসীলাদিসম্পাদনং লদ্ধং, তং চতুপারিসুদ্ধিসীলাদিসম্পাদনং ৰো তুম্হাকং সুলদ্ধং ভৰতি। ভিক্খৰে, যো বুদ্ধুপ্পাদো নৰমো খণো তুম্হেহি লদ্ধো, সো বুদ্ধুপ্পাদো নৰমো খণো ৰো তুম্হাকং ব্রহ্মচরিযৰাসায পটিলদ্ধো ভৰতি।

    Nānāvidhaṃ kammaṃ ācariyena niddhāritaṃ, amhehi ca ñātaṃ, ‘‘katamo vipāko’’ti pucchitabbattā tattha katamo vipāko’’tiādi vuttaṃ. Tattha tesu aṭṭhavīsatividhesu lokiyādīsu sāsanapaṭṭhānesu katamo vipākoti pucchati. Bhikkhave, vo tumhehi ye manussattasaddhāpaṭilābhādayo paṭiladdhā, te manussattasaddhāpaṭilābhādayo vo tumhākaṃ lābhā bhavanti. Tumhehi pabbajitvā yaṃ catupārisuddhisīlādisampādanaṃ laddhaṃ, taṃ catupārisuddhisīlādisampādanaṃ vo tumhākaṃ suladdhaṃ bhavati. Bhikkhave, yo buddhuppādo navamo khaṇo tumhehi laddho, so buddhuppādo navamo khaṇo vo tumhākaṃ brahmacariyavāsāya paṭiladdho bhavati.

    ভিক্খৰে, মযা ছফস্সাযতনিকা নাম নিরযা দিট্ঠা, তত্থ তেসু দিট্ঠেসু ছফস্সাযতনিকেসু নাম নিরযেসু যং কিঞ্চি রূপং চক্খুনা পস্সতি, তং অনিট্ঠরূপংযেৰ পস্সতি, নো ইট্ঠরূপং। অকন্তরূপংযেৰ পস্সতি, নো কন্তরূপং। অমনাপরূপংযেৰ পস্সতি, নো মনাপরূপং।

    Bhikkhave, mayā chaphassāyatanikā nāma nirayā diṭṭhā, tattha tesu diṭṭhesu chaphassāyatanikesu nāma nirayesu yaṃ kiñci rūpaṃ cakkhunā passati, taṃ aniṭṭharūpaṃyeva passati, no iṭṭharūpaṃ. Akantarūpaṃyeva passati, no kantarūpaṃ. Amanāparūpaṃyeva passati, no manāparūpaṃ.

    যং কিঞ্চি সদ্দং সোতেন…পে॰… ঘানেন…পে॰… জিৰ্হায…পে॰… কাযেন…পে॰… যং কিঞ্চি ধম্মং মনসা ৰিজানাতি, তং অনিট্ঠধম্মংযেৰ ৰিজানাতি, নো ইট্ঠধম্মং। অকন্তধম্মংযেৰ ৰিজানাতি, নো কন্তধম্মং। অমনাপধম্মংযেৰ ৰিজানাতি, নো মনাপধম্মন্তি পাঠো যুত্তো। ‘‘অনিট্ঠরূপংযেৰ ৰিজানাতি, নো ইট্ঠরূপ’’ন্তিআদিপাঠো অযুত্তো, কত্থচি পাল়িযং অযুত্তপাঠো দিট্ঠো। সুক্কপক্খে ৰুত্তনযৰিপরিযাযেন যোজনা কাতব্বা। অযং ৰুত্তপ্পকারা ‘‘লাভা ৰো, ভিক্খৰে’’তিআদিকো পাঠো ৰিপাকে ৰাচকঞাপকভাৰেনেৰ পৰত্তনতো ৰিপাকো নাম।

    Yaṃ kiñci saddaṃ sotena…pe… ghānena…pe… jivhāya…pe… kāyena…pe… yaṃ kiñci dhammaṃ manasā vijānāti, taṃ aniṭṭhadhammaṃyeva vijānāti, no iṭṭhadhammaṃ. Akantadhammaṃyeva vijānāti, no kantadhammaṃ. Amanāpadhammaṃyeva vijānāti, no manāpadhammanti pāṭho yutto. ‘‘Aniṭṭharūpaṃyeva vijānāti, no iṭṭharūpa’’ntiādipāṭho ayutto, katthaci pāḷiyaṃ ayuttapāṭho diṭṭho. Sukkapakkhe vuttanayavipariyāyena yojanā kātabbā. Ayaṃ vuttappakārā ‘‘lābhā vo, bhikkhave’’tiādiko pāṭho vipāke vācakañāpakabhāveneva pavattanato vipāko nāma.

    মারিসা নিরযে পচ্চমানানং অম্হাকং সব্বসো নিমুজ্জনউম্মুজ্জনৰসেন সট্ঠিৰস্সসহস্সানি পরিপুণ্ণানি, নিরযস্স অন্তো পরিযোসানং কদা কস্মিং কালে ভৰিস্সতি।

    Mārisā niraye paccamānānaṃ amhākaṃ sabbaso nimujjanaummujjanavasena saṭṭhivassasahassāni paripuṇṇāni, nirayassa anto pariyosānaṃ kadā kasmiṃ kāle bhavissati.

    নিরযস্স অন্তো পরিযোসানং নত্থি। নিরযস্স অন্তো পরিযোসানং কুতো অত্থি? নিরযস্স অন্তো পরিযোসানং অম্হাকং ন পটিদিস্সতি। মারিসা, যদা তুম্হে চ অহঞ্চ সেট্ঠিপুত্তা জাতা, তদা তুয্হং তুম্হাকঞ্চ ময্হং মম চ পাপং হি যস্মা পকতং পকারেহি কতং, তস্মা নিরযস্স অন্তো পরিযোসানং অম্হাকং ন দিস্সতীতি অযং পাঠো ৰিপাকে ৰাচকঞাপকভাৰেন পৰত্তনতো ৰিপাকো নাম। (১৩)

    Nirayassa anto pariyosānaṃ natthi. Nirayassa anto pariyosānaṃ kuto atthi? Nirayassa anto pariyosānaṃ amhākaṃ na paṭidissati. Mārisā, yadā tumhe ca ahañca seṭṭhiputtā jātā, tadā tuyhaṃ tumhākañca mayhaṃ mama ca pāpaṃ hi yasmā pakataṃ pakārehi kataṃ, tasmā nirayassa anto pariyosānaṃ amhākaṃ na dissatīti ayaṃ pāṭho vipāke vācakañāpakabhāvena pavattanato vipāko nāma. (13)

    ১২১. অধম্মচারী নরো কুসলধম্মেসু পমত্তো হি যস্মা হোতি, তস্মা সো অধম্মচারী পমত্তো নরো যহিং যহিং যং যং দুগ্গতিং গচ্ছতি, তং তং গচ্ছন্তং অধম্মচারিং নং নরং অত্তনা চরিতো সো ধম্মোৰ হনতি। কিমিৰ হনতি? সযং অত্তনা গহিতো কণ্হসপ্পো গণ্হন্তং জনং হনতি যথা, এৰং অত্তনা চরিতো অধম্মো অধম্মচারিং নং হনতি। ‘‘ন হি ধম্মো অধম্মো চা’’তিআদিগাথায অত্থো পাকটো। ইদং সুত্তদ্ৰযং কম্মে চ ৰিপাকে চ ৰাচকঞাপকভাৰেন পৰত্তনতো কম্মঞ্চ ৰিপাকো চ হোতি।

    121. Adhammacārī naro kusaladhammesu pamatto hi yasmā hoti, tasmā so adhammacārī pamatto naro yahiṃ yahiṃ yaṃ yaṃ duggatiṃ gacchati, taṃ taṃ gacchantaṃ adhammacāriṃ naṃ naraṃ attanā carito so dhammova hanati. Kimiva hanati? Sayaṃ attanā gahito kaṇhasappo gaṇhantaṃ janaṃ hanati yathā, evaṃ attanā carito adhammo adhammacāriṃ naṃ hanati. ‘‘Na hi dhammo adhammo cā’’tiādigāthāya attho pākaṭo. Idaṃ suttadvayaṃ kamme ca vipāke ca vācakañāpakabhāvena pavattanato kammañca vipāko ca hoti.

    ভিক্খৰে, তুম্হে পুঞ্ঞানং মা ভাযিত্থ; ভিক্খৰে, যদিদং যং ইদং ‘‘পুঞ্ঞানী’’তি অধিৰচনং পৰত্তং; এতং ‘‘পুঞ্ঞানী’’তি অধিৰচনং ইট্ঠস্স কন্তস্স পিযস্স মনাপস্স সুখস্স সুখৰিপাকজনকস্স কম্মস্স অধিৰচনং হোতি। ভিক্খৰে, অহং দীঘরত্তং কতানং পুঞ্ঞানং দীঘরত্তং পচ্চনুভূতং ইট্ঠং কন্তং পিযং মনাপং অভিজানামি খো। ‘‘কথং অভিজানামী’’তি চে পুচ্ছেয্য , পুব্বে সত্ত ৰস্সানি মেত্তচিত্তং মেত্তায সহিতং দুতিযজ্ঝানচিত্তং ভাৰেত্ৰা সত্ত সংৰট্টৰিৰট্টকপ্পে ইমং লোকং মনুস্সলোকং পুন ন আগমাসিং। সত্ত সংৰট্টৰিৰট্টকপ্পেতি চেত্থ সংৰট্টগ্গহণেন সংৰট্টট্ঠাযী, ৰিৰট্টগ্গহণেন ৰিৰট্টট্ঠাযীপি গহিতাতি ৰেদিতব্বা। সেসেসুপি এৰমেৰ গহেতব্বো। ভিক্খৰে, সংৰট্টমানে কপ্পে অহং আভস্সরূপগো হোমি, ৰিৰট্টকপ্পে সুঞ্ঞং ব্রহ্মৰিমানং উপপজ্জামি। ভিক্খৰে, তত্র ব্রহ্মৰিমানে তত্র উপপজ্জমানে উপপজ্জমানহেতু অহং ব্রহ্মা হোমি, অঞ্ঞে মহানুভাৰেন অভিভৰনতো অভিভূ, অঞ্ঞেহি অনভিভৰনতো অনভিভূতো মহাব্রহ্মা হোমি, অঞ্ঞদত্থু একংসেন দসো অহং ৰসৰত্তী হোমি।

    Bhikkhave, tumhe puññānaṃ mā bhāyittha; bhikkhave, yadidaṃ yaṃ idaṃ ‘‘puññānī’’ti adhivacanaṃ pavattaṃ; etaṃ ‘‘puññānī’’ti adhivacanaṃ iṭṭhassa kantassa piyassa manāpassa sukhassa sukhavipākajanakassa kammassa adhivacanaṃ hoti. Bhikkhave, ahaṃ dīgharattaṃ katānaṃ puññānaṃ dīgharattaṃ paccanubhūtaṃ iṭṭhaṃ kantaṃ piyaṃ manāpaṃ abhijānāmi kho. ‘‘Kathaṃ abhijānāmī’’ti ce puccheyya , pubbe satta vassāni mettacittaṃ mettāya sahitaṃ dutiyajjhānacittaṃ bhāvetvā satta saṃvaṭṭavivaṭṭakappe imaṃ lokaṃ manussalokaṃ puna na āgamāsiṃ. Satta saṃvaṭṭavivaṭṭakappeti cettha saṃvaṭṭaggahaṇena saṃvaṭṭaṭṭhāyī, vivaṭṭaggahaṇena vivaṭṭaṭṭhāyīpi gahitāti veditabbā. Sesesupi evameva gahetabbo. Bhikkhave, saṃvaṭṭamāne kappe ahaṃ ābhassarūpago homi, vivaṭṭakappe suññaṃ brahmavimānaṃ upapajjāmi. Bhikkhave, tatra brahmavimāne tatra upapajjamāne upapajjamānahetu ahaṃ brahmā homi, aññe mahānubhāvena abhibhavanato abhibhū, aññehi anabhibhavanato anabhibhūto mahābrahmā homi, aññadatthu ekaṃsena daso ahaṃ vasavattī homi.

    ভিক্খৰে, অহং দেৰানমিন্দো সক্কো ছত্তিংসক্খত্তুং অহোসিং খো, ধম্মিকো ধম্মরাজা চাতুরন্তো ৰিজিতাৰী জনপদত্থাৰরিযপ্পত্তো চক্করতনাদিসত্তরতনসমন্নাগতো চক্কৰত্তিরাজা অনেকসতক্খত্তুং অহোসিং, পদেসরজ্জস্স রাজভাৰে কো পন ৰাদো।

    Bhikkhave, ahaṃ devānamindo sakko chattiṃsakkhattuṃ ahosiṃ kho, dhammiko dhammarājā cāturanto vijitāvī janapadatthāvariyappatto cakkaratanādisattaratanasamannāgato cakkavattirājā anekasatakkhattuṃ ahosiṃ, padesarajjassa rājabhāve ko pana vādo.

    ভিক্খৰে, তস্স চক্কৰত্তিরাজভূতস্স ময্হং এতং পরিৰিতক্কনং অহোসি ‘‘যেন ফলেন যেন ৰিপাকেন অহং এতরহি এৰংমহিদ্ধিকো এৰংমহানুভাৰো অম্হি, তং ইদং ফলং কিস্স কম্মস্স ফলং নু খো, সো অযং ৰিপাকো কিস্স কম্মস্স ৰিপাকো নু খো’’তি এতং পরিৰিতক্কনং অহোসি। ভিক্খৰে, তস্স ৰিতক্কেন্তস্স ময্হং এতং পরিৰিতক্কনং অহোসি ‘‘যেন ফলেন যেন ৰিপাকেন অহং এতরহি এৰংমহিদ্ধিকো এৰংমহানুভাৰো অম্হি, মে পৰত্তং তং ইদং ফলং তিণ্ণং কম্মানং ফলং খো, সো অযং ৰিপাকো তিণ্ণং কম্মানং ৰিপাকো খো, সেয্যথিদং কতমেসং তিণ্ণং কম্মানং ফলং ৰিপাকো? দানস্স দমস্স সংযমস্সাতি তিণ্ণং কম্মানং ফলং ৰিপাকো’’তি এতং পরিৰিতক্কনং অহোসীতি অৰোচাতি যোজনা।

    Bhikkhave, tassa cakkavattirājabhūtassa mayhaṃ etaṃ parivitakkanaṃ ahosi ‘‘yena phalena yena vipākena ahaṃ etarahi evaṃmahiddhiko evaṃmahānubhāvo amhi, taṃ idaṃ phalaṃ kissa kammassa phalaṃ nu kho, so ayaṃ vipāko kissa kammassa vipāko nu kho’’ti etaṃ parivitakkanaṃ ahosi. Bhikkhave, tassa vitakkentassa mayhaṃ etaṃ parivitakkanaṃ ahosi ‘‘yena phalena yena vipākena ahaṃ etarahi evaṃmahiddhiko evaṃmahānubhāvo amhi, me pavattaṃ taṃ idaṃ phalaṃ tiṇṇaṃ kammānaṃ phalaṃ kho, so ayaṃ vipāko tiṇṇaṃ kammānaṃ vipāko kho, seyyathidaṃ katamesaṃ tiṇṇaṃ kammānaṃ phalaṃ vipāko? Dānassa damassa saṃyamassāti tiṇṇaṃ kammānaṃ phalaṃ vipāko’’ti etaṃ parivitakkanaṃ ahosīti avocāti yojanā.

    তত্থ তস্মিং ‘‘মা, ভিক্খৰে, পুঞ্ঞানং ভাযিত্থা’’তিআদিকে সুত্তে যঞ্চ দানং, যো চ দমো, যো চ সংযমো অত্থি, ইদং দানাদিত্তযং কম্মং, তংৰাচকঞাপকং সুত্তম্পি কম্মং নাম। তপ্পচ্চযো তংকম্মপচ্চযো পচ্চযুপ্পন্নভূতো পচ্চনুভূতো যো ৰিপাকো অত্থি, এতং ৰিপাকে ফলম্পি পক্খিপিতব্বং, অযং ৰিপাকো তংৰাচকঞাপকো পাঠোপি ৰিপাকো নাম। চূল়কম্মৰিভঙ্গো চূল়কম্মৰিপাকপুথুত্তৰিভাগো তথা ৰত্তব্বো।

    Tattha tasmiṃ ‘‘mā, bhikkhave, puññānaṃ bhāyitthā’’tiādike sutte yañca dānaṃ, yo ca damo, yo ca saṃyamo atthi, idaṃ dānādittayaṃ kammaṃ, taṃvācakañāpakaṃ suttampi kammaṃ nāma. Tappaccayo taṃkammapaccayo paccayuppannabhūto paccanubhūto yo vipāko atthi, etaṃ vipāke phalampi pakkhipitabbaṃ, ayaṃ vipāko taṃvācakañāpako pāṭhopi vipāko nāma. Cūḷakammavibhaṅgo cūḷakammavipākaputhuttavibhāgo tathā vattabbo.

    তোদেয্যপুত্তস্স সুভস্স মাণৰস্স যং সুত্তং ভগৰতা দেসিতং, তত্থ সুত্তে ৰুত্তা যে পাণাতিপাতাদযো ধম্মা অপ্পাযুকদীঘাযুকতায সংৰত্তন্তি, যে হিংসনাদযো ধম্মা বহ্ৰাবাধঅপ্পাবাধতায সংৰত্তন্তি, যে উসূযনাদযো ধম্মা অপ্পেসক্খমহেসক্খতায সংৰত্তন্তি, যে কোধাদযো ধম্মা দুব্বণ্ণসুৰণ্ণতায সংৰত্তন্তি, যে অগারৰাদযো ধম্মা নীচকুলিকউচ্চকুলিকতায সংৰত্তন্তি, যে মচ্ছেরাদযো ধম্মা অপ্পভোগমহাভোগতায সংৰত্তন্তি, যে অসল্লক্খণাদযো ধম্মা দুপ্পঞ্ঞপঞ্ঞৰন্ততায সংৰত্তন্তি। ইদং পাণাতিপাতসত্তযুগং কম্মং, তংৰাচকঞাপকং সুত্তম্পি কম্মং নাম। তত্থ সুভসুত্তে যা অপ্পাযুকদীঘাযুকতা ৰুত্তা…পে॰… যা দুপ্পঞ্ঞপঞ্ঞৰন্ততা ৰুত্তা, সো অযং অপ্পাযুকদীঘাযুকতাদিকো ৰিপাকো, তংৰাচকঞাপকপাঠোপি ৰিপাকো। ইদং সুভসুত্তং কুসলাকুসলকম্মে চেৰ ৰিপাকে চ ৰাচকঞাপকভাৰেন পৰত্তনতো কম্মঞ্চ ৰিপাকো চ হোতি। (১৪)

    Todeyyaputtassa subhassa māṇavassa yaṃ suttaṃ bhagavatā desitaṃ, tattha sutte vuttā ye pāṇātipātādayo dhammā appāyukadīghāyukatāya saṃvattanti, ye hiṃsanādayo dhammā bahvābādhaappābādhatāya saṃvattanti, ye usūyanādayo dhammā appesakkhamahesakkhatāya saṃvattanti, ye kodhādayo dhammā dubbaṇṇasuvaṇṇatāya saṃvattanti, ye agāravādayo dhammā nīcakulikauccakulikatāya saṃvattanti, ye maccherādayo dhammā appabhogamahābhogatāya saṃvattanti, ye asallakkhaṇādayo dhammā duppaññapaññavantatāya saṃvattanti. Idaṃ pāṇātipātasattayugaṃ kammaṃ, taṃvācakañāpakaṃ suttampi kammaṃ nāma. Tattha subhasutte yā appāyukadīghāyukatā vuttā…pe… yā duppaññapaññavantatā vuttā, so ayaṃ appāyukadīghāyukatādiko vipāko, taṃvācakañāpakapāṭhopi vipāko. Idaṃ subhasuttaṃ kusalākusalakamme ceva vipāke ca vācakañāpakabhāvena pavattanato kammañca vipāko ca hoti. (14)

    ১২২. যো পুগ্গলো ৰচীদুচ্চরিতপরিৰজ্জনেন ৰাচানুরক্খী ভৰেয্য, অভিজ্ঝাদিঅনুপ্পাদনেন মনসা সংৰুতো ভৰেয্য, পাণাতিপাতাদিপজহনেন কাযেন অকুসলং ন কযিরা, ইতি তযো এতে কম্মপথে ৰিসোধযে, সো পুগ্গলো ইসিপ্পৰেদিতং মগ্গং অরিযং অট্ঠঙ্গিকং মগ্গং আরাধযে আরাধযেয্যাতি যোজনা। ইদং ‘‘ৰাচানুরক্খী’’তিআদিকং সুত্তং কুসলে ৰাচকঞাপকভাৰেন পৰত্তনতো কুসলং নাম।

    122. Yo puggalo vacīduccaritaparivajjanena vācānurakkhī bhaveyya, abhijjhādianuppādanena manasā saṃvuto bhaveyya, pāṇātipātādipajahanena kāyena akusalaṃ na kayirā, iti tayo ete kammapathe visodhaye, so puggalo isippaveditaṃ maggaṃ ariyaṃ aṭṭhaṅgikaṃ maggaṃ ārādhaye ārādhayeyyāti yojanā. Idaṃ ‘‘vācānurakkhī’’tiādikaṃ suttaṃ kusale vācakañāpakabhāvena pavattanato kusalaṃ nāma.

    যস্স পুগ্গলস্স কাযেন দুক্কটং দুগ্গতিসংৰত্তনিযকম্মং নত্থি, ৰাচায দুক্কটকম্মং নত্থি, মনসা দুক্কটকম্মং নত্থি, তীহি ঠানেহি উপ্পজ্জনট্ঠানেহি সংৰুতং তং পুগ্গলং ‘‘ব্রাহ্মণ’’ন্তি অহং ৰদামীতি যোজনা। ইদং গাথাৰচনং ৰুত্তনযেন কুসলং নাম।

    Yassa puggalassa kāyena dukkaṭaṃ duggatisaṃvattaniyakammaṃ natthi, vācāya dukkaṭakammaṃ natthi, manasā dukkaṭakammaṃ natthi, tīhi ṭhānehi uppajjanaṭṭhānehi saṃvutaṃ taṃ puggalaṃ ‘‘brāhmaṇa’’nti ahaṃ vadāmīti yojanā. Idaṃ gāthāvacanaṃ vuttanayena kusalaṃ nāma.

    ‘‘তীণিমানি, ভিক্খৰে…পে॰… কুসলমূলানী’’তি ইদং ৰচনং ৰুত্তনযেন কুসলং। ভিক্খৰে, কুসলানং ধম্মানং সমাপত্তিযা ৰিজ্জা পুব্বঙ্গমা হোতি, হিরী চ ওত্তপ্পঞ্চ অনুদেৰাতি যোজনা। ইদং ৰচনং ৰুত্তনযেন কুসলং নাম।

    ‘‘Tīṇimāni, bhikkhave…pe… kusalamūlānī’’ti idaṃ vacanaṃ vuttanayena kusalaṃ. Bhikkhave, kusalānaṃ dhammānaṃ samāpattiyā vijjā pubbaṅgamā hoti, hirī ca ottappañca anudevāti yojanā. Idaṃ vacanaṃ vuttanayena kusalaṃ nāma.

    মালুৰা সালং রুক্খং ওনতং ভূমিযং পতনং করোতি ইৰ, তথা যস্স জনস্স অচ্চন্তং দ্ৰীসু তীসু ভৰেসু দুস্সীল্যং অত্থি, সো জনো অত্তানং ওনতং অপাযেসু পাকটং করোতি। অনত্থকামো জনো যথা অনত্থং ইচ্ছতি, তথা অনত্থং করোতি যথা, তথা ঈদিসো দুস্সীলো নং অত্তানং অনত্থং করোতীতি যোজনা। ইদং ‘‘যস্সা’’তিআদিকং ৰচনং ৰুত্তনযেন অকুসলং।

    Māluvā sālaṃ rukkhaṃ onataṃ bhūmiyaṃ patanaṃ karoti iva, tathā yassa janassa accantaṃ dvīsu tīsu bhavesu dussīlyaṃ atthi, so jano attānaṃ onataṃ apāyesu pākaṭaṃ karoti. Anatthakāmo jano yathā anatthaṃ icchati, tathā anatthaṃ karoti yathā, tathā īdiso dussīlo naṃ attānaṃ anatthaṃ karotīti yojanā. Idaṃ ‘‘yassā’’tiādikaṃ vacanaṃ vuttanayena akusalaṃ.

    অস্মমযং অস্মসঙ্খাতং পাসাণমণিমযং ৰজিরং ৰজিরস্স উট্ঠানসঙ্খাতং পাসাণমণিং অভিমত্থতি ৰিধংসেতি ইৰ, তথা অত্তনা হি সযমেৰ কতং অত্তজং অত্তসম্ভৰং পাপং দুম্মেধং পাপং করোন্তং জনং অভিমত্থতীতি যোজনা। ইদং ‘‘অত্তনা হী’’তিআদিকং ৰচনং ৰুত্তনযেন অকুসলং।

    Asmamayaṃ asmasaṅkhātaṃ pāsāṇamaṇimayaṃ vajiraṃ vajirassa uṭṭhānasaṅkhātaṃ pāsāṇamaṇiṃ abhimatthati vidhaṃseti iva, tathā attanā hi sayameva kataṃ attajaṃ attasambhavaṃ pāpaṃ dummedhaṃ pāpaṃ karontaṃ janaṃ abhimatthatīti yojanā. Idaṃ ‘‘attanā hī’’tiādikaṃ vacanaṃ vuttanayena akusalaṃ.

    দেৰতে কুসলেহি ৰিৰজ্জিতা অকুসলা দস কম্মপথে নিসেৰিয কত্ৰা গরহা গারয্হা ভৰন্তি, বালমতী মন্দবুদ্ধিনো নিরযেসু পচ্চরেতি যোজনা। ইদং ‘‘দস কম্মপথে’’তিআদিকং সুত্তং ৰুত্তনযেন অকুসলং।

    Devate kusalehi vivajjitā akusalā dasa kammapathe niseviya katvā garahā gārayhā bhavanti, bālamatī mandabuddhino nirayesu paccareti yojanā. Idaṃ ‘‘dasa kammapathe’’tiādikaṃ suttaṃ vuttanayena akusalaṃ.

    ‘‘তীণিমানি, ভিক্খৰে…পে॰… অকুসলমূলানী’’তি ইদং ৰচনং ৰুত্তনযেন অকুসলং। (১৫)

    ‘‘Tīṇimāni, bhikkhave…pe… akusalamūlānī’’ti idaṃ vacanaṃ vuttanayena akusalaṃ. (15)

    যাদিসং যং বীজং ৰপতে, তং বীজং তাদিসং ফলং হরতে ইৰ, তথা কল্যাণকারী পণ্ডিতো কল্যাণং ফলং হরতে, পাপকারী বালো চ পাপকং ফলং হরতেতি যোজনা। তত্থ ‘‘যাদিস’’ন্তিআদিকে সুত্তে ‘‘কল্যাণকারী কল্যাণ’’ন্তি যং ৰচনং আহ, ইদং ৰচনং কুসলং। ‘‘পাপকারী চ পাপক’’ন্তি যং ৰচনং আহ, ইদং ৰচনং অকুসলং। ইদং দ্ৰিৰচনং ৰুত্তনযেন কুসলঞ্চ অকুসলঞ্চ হোতি।

    Yādisaṃ yaṃ bījaṃ vapate, taṃ bījaṃ tādisaṃ phalaṃ harate iva, tathā kalyāṇakārī paṇḍito kalyāṇaṃ phalaṃ harate, pāpakārī bālo ca pāpakaṃ phalaṃ harateti yojanā. Tattha ‘‘yādisa’’ntiādike sutte ‘‘kalyāṇakārī kalyāṇa’’nti yaṃ vacanaṃ āha, idaṃ vacanaṃ kusalaṃ. ‘‘Pāpakārī ca pāpaka’’nti yaṃ vacanaṃ āha, idaṃ vacanaṃ akusalaṃ. Idaṃ dvivacanaṃ vuttanayena kusalañca akusalañca hoti.

    কল্যাণকারী সপ্পুরিসা সুভেন কম্মেন সুগ্গতিং ৰজন্তি গচ্ছন্তি, পাপকারী কাপুরিসা অসুভেন কম্মুনা অপাযভূমিং ৰজন্তি গচ্ছন্তি, কম্মস্স অভিসঙ্খারৰিঞ্ঞাণসহগতকম্মস্স খযা খযনতো ৰিমুত্তচেতসা সমুচ্ছেদৰিমুত্তিপটিপ্পস্সদ্ধিৰিমুত্তিচিত্তা তে সপ্পুরিসা অসুভে নিব্বন্তি। কিমিৰ নিব্বন্তি? ইন্ধনক্খযা জোতি নিব্বাতি ইৰ, তথা তে সপ্পুরিসা কম্মস্স খযা অনৰসেসখযনতো নিব্বন্তীতি যোজনা। তত্থ তস্মিং ‘‘সুভেনা’’তিআদিগাথাৰচনে ‘‘সুভেন…পে॰… সুগ্গতি’’ন্তি যং ৰচনং আহ, ইদং ‘‘সুভেন…পে॰…সুগ্গতি’’ন্তি ৰচনং কুসলে ৰাচকঞাপকভাৰেন পৰত্তনতো কুসলং নাম। ‘‘অপাযভূমিং অসুভেন কম্মুনা’’তি যং ৰচনং আহ , ইদং ‘‘অপায…পে॰… কম্মুনা’’তি ৰচনং অকুসলে ৰাচকঞাপকভাৰেন পৰত্তনতো অকুসলং নাম। ইদং ‘‘সুভেনা’’তিআদিকং গাথাৰচনং ৰুত্তনযেন কুসলঞ্চ অকুসলঞ্চ হোতি। (১৬)

    Kalyāṇakārī sappurisā subhena kammena suggatiṃ vajanti gacchanti, pāpakārī kāpurisā asubhena kammunā apāyabhūmiṃ vajanti gacchanti, kammassa abhisaṅkhāraviññāṇasahagatakammassa khayā khayanato vimuttacetasā samucchedavimuttipaṭippassaddhivimutticittā te sappurisā asubhe nibbanti. Kimiva nibbanti? Indhanakkhayā joti nibbāti iva, tathā te sappurisā kammassa khayā anavasesakhayanato nibbantīti yojanā. Tattha tasmiṃ ‘‘subhenā’’tiādigāthāvacane ‘‘subhena…pe… suggati’’nti yaṃ vacanaṃ āha, idaṃ ‘‘subhena…pe…suggati’’nti vacanaṃ kusale vācakañāpakabhāvena pavattanato kusalaṃ nāma. ‘‘Apāyabhūmiṃ asubhena kammunā’’ti yaṃ vacanaṃ āha , idaṃ ‘‘apāya…pe… kammunā’’ti vacanaṃ akusale vācakañāpakabhāvena pavattanato akusalaṃ nāma. Idaṃ ‘‘subhenā’’tiādikaṃ gāthāvacanaṃ vuttanayena kusalañca akusalañca hoti. (16)

    ১২৩. ‘‘যথাপি ভমরো পুপ্ফং…পে॰… মুনী চরে’’তি ইদং গাথাৰচনং অনুঞ্ঞাতে চরণে ৰাচকঞাপকভাৰেন পৰত্তনতো অনুঞ্ঞাতং নাম।

    123.‘‘Yathāpi bhamaro pupphaṃ…pe… munī care’’ti idaṃ gāthāvacanaṃ anuññāte caraṇe vācakañāpakabhāvena pavattanato anuññātaṃ nāma.

    ভমরো নাম পুপ্ফরসপিৰনগহণৰসেন চরণকো মধুকরাদিকো ভমরো। সো পুপ্ফরসং গণ্হন্তো মন্দৰেগো হুত্ৰা পুপ্ফঞ্চ ৰণ্ণঞ্চ গন্ধঞ্চ অৰিনাসেত্ৰা যাৰদত্থং পুপ্ফরসং পিৰিত্ৰা মধুকরণত্থায চ পুপ্ফরসং গহেত্ৰা মধুকরণট্ঠানং ৰনসণ্ডং পলেতি। পুপ্ফৰণ্ণগন্ধা পাকতিকাৰ হোন্তি। এৰমেৰ পিণ্ডায গামং পৰিসন্তো মুনি পসাদজনকং আলোকনৰিলোকনগমনতিট্ঠনাদিকং জনেত্ৰা পীতিসোমনস্সসহিতং পসাদং জনেত্ৰা সদ্ধাদেয্যং পিণ্ডপাতং যাপনমত্তং পটিগ্গহেত্ৰা গামতো নিক্খমিত্ৰা উদকফাসুকট্ঠানে ৰনে ভেসজ্জং লিম্পন্তো ৰিয, কন্তারে পুত্তমংসং খাদন্তো ৰিয, পিণ্ডপাতং পচ্চৰেক্খিত্ৰা পরিভুঞ্জিত্ৰা ভমরো ৰনে মধুং করোতি ৰিয, কম্মট্ঠানানুরূপং ৰনসণ্ডং পৰিসিত্ৰা ঝানমগ্গফলনিব্বত্তনত্থায সমণধম্মকরণত্থায গামে চরে চরেয্যাতি অধিপ্পাযো ৰেদিতব্বো।

    Bhamaro nāma puppharasapivanagahaṇavasena caraṇako madhukarādiko bhamaro. So puppharasaṃ gaṇhanto mandavego hutvā pupphañca vaṇṇañca gandhañca avināsetvā yāvadatthaṃ puppharasaṃ pivitvā madhukaraṇatthāya ca puppharasaṃ gahetvā madhukaraṇaṭṭhānaṃ vanasaṇḍaṃ paleti. Pupphavaṇṇagandhā pākatikāva honti. Evameva piṇḍāya gāmaṃ pavisanto muni pasādajanakaṃ ālokanavilokanagamanatiṭṭhanādikaṃ janetvā pītisomanassasahitaṃ pasādaṃ janetvā saddhādeyyaṃ piṇḍapātaṃ yāpanamattaṃ paṭiggahetvā gāmato nikkhamitvā udakaphāsukaṭṭhāne vane bhesajjaṃ limpanto viya, kantāre puttamaṃsaṃ khādanto viya, piṇḍapātaṃ paccavekkhitvā paribhuñjitvā bhamaro vane madhuṃ karoti viya, kammaṭṭhānānurūpaṃ vanasaṇḍaṃ pavisitvā jhānamaggaphalanibbattanatthāya samaṇadhammakaraṇatthāya gāme care careyyāti adhippāyo veditabbo.

    ‘‘তীণিমানি, ভিক্খৰে, ভিক্খূনং করণীযানি…পে॰… ইমানি খো, ভিক্খৰে, ভিক্খূনং তীণি করণীযানী’’তি ইদং সুত্তং ভগৰতা অনুঞ্ঞাতে আচারে অত্থে ৰাচকঞাপকভাৰেন পৰত্তনতো অনুঞ্ঞাতং নাম। তস্মিং সুত্তে যো ভিক্খু সীলং পাতি রক্খতি, ইতি রক্খণতো সো ভিক্খু পাতি নাম। যং সীলং তং পাতিং ভিক্খুং অপাযাদিদুক্খতো মোচেতি, ইতি মোচনতো তং সীলং পাতিমোক্খং নাম। যেন সীলেন ভিক্খু সংৰরিতব্বচক্খুন্দ্রিযাদিকং সংৰরতি, ইতি সংৰরণকরণতো তং সীলং সংৰরং নাম, পাতিমোক্খং এৰ সংৰরং পাতিমোক্খসংৰরং, পাতিমোক্খসংৰরেন সংৰুতো সমন্নাগতো হুত্ৰা সংৰুণনতো চতুইরিযাপথেসু চারকো হোতি, ইতি সংৰুণনতো ভিক্খু পাতিমোক্খসংৰরসংৰুতো নাম। ৰিহরতি চতুইরিযাপথে পৰত্তেতি। ৰারিত্তচারং ৰজ্জেত্ৰা চারিত্তসীলং আদায চরণং আচারো, অগোচরে ৰজ্জেত্ৰা গোচরে চরণং গোচরোতি। অত্থো ৰুচ্চমানো অতিৰিত্থারো ভৰিস্সতি, তস্মা কিঞ্চিমত্তং কথেত্ৰা সাসনপট্ঠানসুত্তভাৰং কথেস্সাম।

    ‘‘Tīṇimāni, bhikkhave, bhikkhūnaṃ karaṇīyāni…pe… imāni kho, bhikkhave, bhikkhūnaṃ tīṇi karaṇīyānī’’ti idaṃ suttaṃ bhagavatā anuññāte ācāre atthe vācakañāpakabhāvena pavattanato anuññātaṃ nāma. Tasmiṃ sutte yo bhikkhu sīlaṃ pāti rakkhati, iti rakkhaṇato so bhikkhu pāti nāma. Yaṃ sīlaṃ taṃ pātiṃ bhikkhuṃ apāyādidukkhato moceti, iti mocanato taṃ sīlaṃ pātimokkhaṃ nāma. Yena sīlena bhikkhu saṃvaritabbacakkhundriyādikaṃ saṃvarati, iti saṃvaraṇakaraṇato taṃ sīlaṃ saṃvaraṃ nāma, pātimokkhaṃ eva saṃvaraṃ pātimokkhasaṃvaraṃ, pātimokkhasaṃvarena saṃvuto samannāgato hutvā saṃvuṇanato catuiriyāpathesu cārako hoti, iti saṃvuṇanato bhikkhu pātimokkhasaṃvarasaṃvuto nāma. Viharati catuiriyāpathe pavatteti. Vārittacāraṃ vajjetvā cārittasīlaṃ ādāya caraṇaṃ ācāro, agocare vajjetvā gocare caraṇaṃ gocaroti. Attho vuccamāno ativitthāro bhavissati, tasmā kiñcimattaṃ kathetvā sāsanapaṭṭhānasuttabhāvaṃ kathessāma.

    ‘‘এত্তকমেৰ সুত্তং ‘অনুঞ্ঞাত’ন্তি নিদ্ধারিতব্ব’’ন্তি ৰত্তব্বত্তা ‘‘দসযিমে, ভিক্খৰে, ধম্মা পব্বজিতেন অভিণ্হং পচ্চৰেক্খিতব্বা’’তিআদি ৰুত্তং। ইদং ‘‘দসা’’তিআদিকং সুত্তম্পি অনুঞ্ঞাতে দসৰিধে পচ্চৰেক্খিতব্বে ধম্মে ৰাচকঞাপকভাৰেন পৰত্তনতো অনুঞ্ঞাতং নাম। ‘‘তীণিমানি…পে॰… করণীযানী’’তি ইদং সুত্তম্পি অনুঞ্ঞাতে তিৰিধে সুচরিতে ৰাচকঞাপকভাৰেন পৰত্তনতো অনুঞ্ঞাতং নাম।

    ‘‘Ettakameva suttaṃ ‘anuññāta’nti niddhāritabba’’nti vattabbattā ‘‘dasayime, bhikkhave, dhammā pabbajitena abhiṇhaṃ paccavekkhitabbā’’tiādi vuttaṃ. Idaṃ ‘‘dasā’’tiādikaṃ suttampi anuññāte dasavidhe paccavekkhitabbe dhamme vācakañāpakabhāvena pavattanato anuññātaṃ nāma. ‘‘Tīṇimāni…pe… karaṇīyānī’’ti idaṃ suttampi anuññāte tividhe sucarite vācakañāpakabhāvena pavattanato anuññātaṃ nāma.

    নানাৰিধং অনুঞ্ঞাতং সুত্তং আচরিযেন নিদ্ধারিতং, অম্হেহি চ ঞাতং, ‘‘কতমং সুত্তং পটিক্খিত্ত’’ন্তি পুচ্ছিতব্বত্তা ‘‘তত্থ কতমং পটিক্খিত্ত’’ন্তিআদি ৰুত্তং।

    Nānāvidhaṃ anuññātaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ suttaṃ paṭikkhitta’’nti pucchitabbattā ‘‘tattha katamaṃ paṭikkhitta’’ntiādi vuttaṃ.

    ‘‘নত্থি পুত্তসমং পেমং, নত্থি গোসমিতং ধনং।

    ‘‘Natthi puttasamaṃ pemaṃ, natthi gosamitaṃ dhanaṃ;

    নত্থি সূরিযসমা আভা, সমুদ্দপরমা সরা’’তি॥ –

    Natthi sūriyasamā ābhā, samuddaparamā sarā’’ti. –

    ইদং দেৰপুত্তৰচনং পটিক্খিপন্তো ভগৰা –

    Idaṃ devaputtavacanaṃ paṭikkhipanto bhagavā –

    ‘‘নত্থি অত্তসমং পেমং, নত্থি ধঞ্ঞসমং ধনং।

    ‘‘Natthi attasamaṃ pemaṃ, natthi dhaññasamaṃ dhanaṃ;

    নত্থি পঞ্ঞাসমা আভা, ৰুট্ঠি ৰে পরমা সরা’’তি॥ –

    Natthi paññāsamā ābhā, vuṭṭhi ve paramā sarā’’ti. –

    গাথং আহ। এত্থ এতস্মিং গাথাদ্ৰযে যং ‘‘নত্থি পুত্তসমং পেম’’ন্তিআদিকং পুরিমকং হোতি। ইদং ‘‘নত্থি পুত্তসমং পেম’’ন্তিআদিকং দেৰপুত্তৰচনং ভগৰতা পটিক্খিত্তত্তা, পটিক্খিত্তে অত্থে পৰত্তনতো চ পটিক্খিত্তং নাম।

    Gāthaṃ āha. Ettha etasmiṃ gāthādvaye yaṃ ‘‘natthi puttasamaṃ pema’’ntiādikaṃ purimakaṃ hoti. Idaṃ ‘‘natthi puttasamaṃ pema’’ntiādikaṃ devaputtavacanaṃ bhagavatā paṭikkhittattā, paṭikkhitte atthe pavattanato ca paṭikkhittaṃ nāma.

    দুব্ভিক্খকালে ৰা কন্তারে ৰা মাতাপিতরো পুত্তধীতরো ঘাতেত্ৰাপি অত্তানমেৰ পোসেন্তি, তস্মা ‘‘নত্থি অত্তসমং পেম’’ন্তি ৰুত্তং। দুব্ভিক্খকালাদীসু হিরঞ্ঞসুৰণ্ণসারাদীনি, গোমহিংসাদীনিপি ধঞ্ঞগহণত্থায ধঞ্ঞস্সামিকানং দত্ৰা ধঞ্ঞমেৰ গণ্হন্তি, তস্মা ‘‘নত্থি ধঞ্ঞসমং ধন’’ন্তি ৰুত্তং। সূরিযাদীনং আভা পচ্চুপ্পন্নতমং একদেসংৰ ৰিনোদেতি, পঞ্ঞা পন দসসহস্সিলোকধাতুম্পি একপজ্জোতং একোভাসং কাতুং সমত্থা, অতীতানাগতপচ্চুপ্পন্নধম্মকোট্ঠাসেসুপি পটিচ্ছাদকং কিলেসতমম্পি ৰিধমতি, তস্মা ‘‘নত্থি পঞ্ঞাসমা আভা’’তি ৰুত্তং। সমুদ্দো ভূমিযা চ একদেসেযেৰ তিট্ঠতি, সো চ দেৰে অৰুট্ঠে সতি খযনসভাৰো ভৰেয্য, ৰুট্ঠি পন কোটিসতসহস্সচক্কৰাল়েসুপি যাৰ আভস্সরা ব্রহ্মলোকাপি পূরা ভৰতি, তস্মা ‘‘ৰুট্ঠি ৰে পরমাসরা’’তি ৰুত্তং।

    Dubbhikkhakāle vā kantāre vā mātāpitaro puttadhītaro ghātetvāpi attānameva posenti, tasmā ‘‘natthi attasamaṃ pema’’nti vuttaṃ. Dubbhikkhakālādīsu hiraññasuvaṇṇasārādīni, gomahiṃsādīnipi dhaññagahaṇatthāya dhaññassāmikānaṃ datvā dhaññameva gaṇhanti, tasmā ‘‘natthi dhaññasamaṃdhana’’nti vuttaṃ. Sūriyādīnaṃ ābhā paccuppannatamaṃ ekadesaṃva vinodeti, paññā pana dasasahassilokadhātumpi ekapajjotaṃ ekobhāsaṃ kātuṃ samatthā, atītānāgatapaccuppannadhammakoṭṭhāsesupi paṭicchādakaṃ kilesatamampi vidhamati, tasmā ‘‘natthi paññāsamā ābhā’’ti vuttaṃ. Samuddo bhūmiyā ca ekadeseyeva tiṭṭhati, so ca deve avuṭṭhe sati khayanasabhāvo bhaveyya, vuṭṭhi pana koṭisatasahassacakkavāḷesupi yāva ābhassarā brahmalokāpi pūrā bhavati, tasmā ‘‘vuṭṭhi ve paramāsarā’’ti vuttaṃ.

    ‘‘ইদমেৰ পটিক্খিত্তং নিদ্ধারিতব্ব’’ন্তি ৰত্তব্বত্তা ‘‘তীণিমানি ভিক্খৰে’’তিআদি ৰুত্তং। ইদং ‘‘তীণিমানী’’তিআদিকং সুত্তম্পি পটিক্খিত্তে দুচ্চরিতে ৰাচকঞাপকভাৰেন পৰত্তনতো পটিক্খিত্তং নাম। (১৭)

    ‘‘Idameva paṭikkhittaṃ niddhāritabba’’nti vattabbattā ‘‘tīṇimāni bhikkhave’’tiādi vuttaṃ. Idaṃ ‘‘tīṇimānī’’tiādikaṃ suttampi paṭikkhitte duccarite vācakañāpakabhāvena pavattanato paṭikkhittaṃ nāma. (17)

    ১২৪. নানাৰিধং পটিক্খিত্তং আচরিযেন নিদ্ধারিতং, অম্হেহি চ ঞাতং, ‘‘কতমং অনুঞ্ঞাতঞ্চ পটিক্খিত্তঞ্চা’’তি পুচ্ছিতব্বত্তা ‘‘তত্থ কতমং অনুঞ্ঞাতঞ্চা’’তিআদি ৰুত্তং।

    124. Nānāvidhaṃ paṭikkhittaṃ ācariyena niddhāritaṃ, amhehi ca ñātaṃ, ‘‘katamaṃ anuññātañca paṭikkhittañcā’’ti pucchitabbattā ‘‘tattha katamaṃ anuññātañcā’’tiādi vuttaṃ.

    ভূরিপঞ্ঞভূরিপঞ্ঞৰন্ত গোতম, তং ভূরিপঞ্ঞং গোতমং অহং পুচ্ছামি। ইধ লোকে অনেকা যা জনতা ভীতা, সা জনতা কিংসু কতমা ভৰে। যো চ মগ্গো অনেকাযতনো ইতি পৰুত্তো, সো চ মগ্গো কিংসু কতমো ভৰে। কিস্মিং ধম্মে ঠিতো জনো পরলোকং ন ভাযে ন ভাযেয্যাতি পুচ্ছতীতি যোজনা।

    Bhūripaññabhūripaññavanta gotama, taṃ bhūripaññaṃ gotamaṃ ahaṃ pucchāmi. Idha loke anekā yā janatā bhītā, sā janatā kiṃsu katamā bhave. Yo ca maggo anekāyatano iti pavutto, so ca maggo kiṃsu katamo bhave. Kismiṃ dhamme ṭhito jano paralokaṃ na bhāye na bhāyeyyāti pucchatīti yojanā.

    দেৰপুত্ত যো জনো সম্মাৰাচঞ্চ পণিধায, সম্মামনঞ্চ পণিধায, কাযেন পাপানি অকুব্বমানো চ ভৰে, অযং একো। বহ্ৰন্নপানং ঘরং আৰসন্তো চ ভৰে, অযং একো। সদ্ধো সদ্ধাসম্পন্নো চিত্তমুদুভাৰেন মুদু চ ভৰে, অযং একো। ৰদঞ্ঞূ যাচকানং যাচনৰসেন ৰুত্তৰচনঞ্ঞূ হুত্ৰা সংৰিভাগী চ ভৰে, অযং একো। ইতি এতেসু চতূসু ধম্মেসু ঠিতো জনো ধম্মেসু ঠিতো হুত্ৰা পরলোকং ন ভাযে ন ভাযেয্যাতি যোজনা।

    Devaputta yo jano sammāvācañca paṇidhāya, sammāmanañca paṇidhāya, kāyena pāpāni akubbamāno ca bhave, ayaṃ eko. Bahvannapānaṃ gharaṃ āvasanto ca bhave, ayaṃ eko. Saddho saddhāsampanno cittamudubhāvena mudu ca bhave, ayaṃ eko. Vadaññū yācakānaṃ yācanavasena vuttavacanaññū hutvā saṃvibhāgī ca bhave, ayaṃ eko. Iti etesu catūsu dhammesu ṭhito jano dhammesu ṭhito hutvā paralokaṃ na bhāye na bhāyeyyāti yojanā.

    ‘‘তস্মিং সুত্তে কতমং অনুঞ্ঞাতং, কতমং পটিক্খিত্তং নামা’’তি পুচ্ছিতব্বত্তা ‘‘তত্থ যং আহা’’তিআদি ৰুত্তং। তত্থ তস্মিং ‘‘কিংসূধা’’তিআদিপঞ্হায ৰিস্সজ্জনে ‘‘ৰাচং মনঞ্চা’’তিআদিৰচনে ‘‘ৰাচং মনঞ্চ পণিধায সম্মা’’তি যং ৰচনং ভগৰা আহ, ইদং ‘‘ৰাচং…পে॰… সম্মা’’তি ৰচনং অনুঞ্ঞাতে ৰচনীযাদিকে অত্থে ৰাচকঞাপকভাৰেন পৰত্তনতো অনুঞ্ঞাতং নাম। ‘‘কাযেন পাপানি অকুব্বমানো’’তি যং ৰচনং আহ, ইদং ‘‘কাযেন …পে॰… মানো’’তি ৰচনং পাপকুব্বেন পটিক্খিত্তে ৰুত্তনযেন পৰত্তনতো পটিক্খিত্তং নাম। ‘‘বহ্ৰন্ন…পে॰… ন ভাযে’’তি যং ৰচনং আহ, ইদং ‘‘বহ্ৰন্ন…পে॰… ন ভাযে’’তি ৰচনং ৰুত্তনযেন অনুঞ্ঞাতং নাম। ইদং ‘‘ৰাচ’’ন্তিআদিকং ৰচনং ৰুত্তনযদ্ৰযেন অনুঞ্ঞাতঞ্চ পটিক্খিত্তঞ্চ হোতি।

    ‘‘Tasmiṃ sutte katamaṃ anuññātaṃ, katamaṃ paṭikkhittaṃ nāmā’’ti pucchitabbattā ‘‘tattha yaṃ āhā’’tiādi vuttaṃ. Tattha tasmiṃ ‘‘kiṃsūdhā’’tiādipañhāya vissajjane ‘‘vācaṃ manañcā’’tiādivacane ‘‘vācaṃ manañca paṇidhāya sammā’’ti yaṃ vacanaṃ bhagavā āha, idaṃ ‘‘vācaṃ…pe… sammā’’ti vacanaṃ anuññāte vacanīyādike atthe vācakañāpakabhāvena pavattanato anuññātaṃ nāma. ‘‘Kāyena pāpāni akubbamāno’’ti yaṃ vacanaṃ āha, idaṃ ‘‘kāyena …pe… māno’’ti vacanaṃ pāpakubbena paṭikkhitte vuttanayena pavattanato paṭikkhittaṃ nāma. ‘‘Bahvanna…pe… na bhāye’’ti yaṃ vacanaṃ āha, idaṃ ‘‘bahvanna…pe… na bhāye’’ti vacanaṃ vuttanayena anuññātaṃ nāma. Idaṃ ‘‘vāca’’ntiādikaṃ vacanaṃ vuttanayadvayena anuññātañca paṭikkhittañca hoti.

    ‘‘সব্বপাপস্স অকরণ’’ন্তিআদিকো ৰুত্তত্থোৰ। ‘‘তস্মিং সব্বপাপস্সাতিআদিকে কতমং অনুঞ্ঞাতং, কতমং পটিক্খিত্ত’’ন্তি ৰত্তব্বভাৰতো ‘‘তত্থ য’’ন্তিআদি ৰুত্তং।

    ‘‘Sabbapāpassa akaraṇa’’ntiādiko vuttatthova. ‘‘Tasmiṃ sabbapāpassātiādike katamaṃ anuññātaṃ, katamaṃ paṭikkhitta’’nti vattabbabhāvato ‘‘tattha ya’’ntiādi vuttaṃ.

    দেৰানমিন্দ, অহং কাযসমাচারম্পি দুৰিধেন ৰদামি – সেৰিতব্বং অনৰজ্জং কাযসমাচারম্পি ৰদামি, অসেৰিতব্বং সাৰজ্জং কাযসমাচারম্পি অহং ৰদামি। ৰচীসমাচারাদীসুপি ৰুত্তনযানুসারেন যোজনা কাতব্বা।

    Devānaminda, ahaṃ kāyasamācārampi duvidhena vadāmi – sevitabbaṃ anavajjaṃ kāyasamācārampi vadāmi, asevitabbaṃ sāvajjaṃ kāyasamācārampi ahaṃ vadāmi. Vacīsamācārādīsupi vuttanayānusārena yojanā kātabbā.

    ‘‘কিঞ্চ ৰড্ঢনহাযনং আগম্ম কাযসমাচারাদিকং সেৰিতব্বাসেৰিতব্বভেদেন ৰুত্ত’’ন্তি ৰত্তব্বভাৰতো ‘‘কিঞ্চেতং পটিচ্চা’’তিআদি ৰুত্তং। অকুসলধম্মৰড্ঢনং, কুসলধম্মহাযনঞ্চ পটিচ্চ কাযসমাচারাদযো ন সেৰিতব্বা, কুসলধম্মৰড্ঢনং, অকুসলধম্মহাযনঞ্চ পটিচ্চ কাযসমাচারাদযো সেৰিতব্বাতি সল্লক্খেতব্বা। (১৮)

    ‘‘Kiñca vaḍḍhanahāyanaṃ āgamma kāyasamācārādikaṃ sevitabbāsevitabbabhedena vutta’’nti vattabbabhāvato ‘‘kiñcetaṃ paṭiccā’’tiādi vuttaṃ. Akusaladhammavaḍḍhanaṃ, kusaladhammahāyanañca paṭicca kāyasamācārādayo na sevitabbā, kusaladhammavaḍḍhanaṃ, akusaladhammahāyanañca paṭicca kāyasamācārādayo sevitabbāti sallakkhetabbā. (18)

    ১২৫. নানাৰিধং অনুঞ্ঞাতঞ্চ পটিক্খিত্তঞ্চ আচরিযেন নিদ্ধারিতং, অম্হেহি চ ঞাতং, ‘‘কতমো সুত্তৰিসেসো থৰো’’তি পুচ্ছিতব্বত্তা তথা পুচ্ছিত্ৰা অযং সুত্তৰিসেসো থৰো নামাতি ৰিঞ্ঞাপেতুং ‘‘তত্থ কতমো থৰো’’তিআদি ৰুত্তং। তত্থ তত্থাতি তেসু অট্ঠৰীসতিৰিধেসু লোকিযাদীসু সাসনপট্ঠানসুত্তেসু কতমো সুত্তৰিসেসো থৰো নামাতি পুচ্ছতি।

    125. Nānāvidhaṃ anuññātañca paṭikkhittañca ācariyena niddhāritaṃ, amhehi ca ñātaṃ, ‘‘katamo suttaviseso thavo’’ti pucchitabbattā tathā pucchitvā ayaṃ suttaviseso thavo nāmāti viññāpetuṃ ‘‘tattha katamo thavo’’tiādi vuttaṃ. Tattha tatthāti tesu aṭṭhavīsatividhesu lokiyādīsu sāsanapaṭṭhānasuttesu katamo suttaviseso thavo nāmāti pucchati.

    মগ্গানং জঙ্ঘমগ্গদিট্ঠিমগ্গাদীনং অট্ঠঙ্গিকো সম্মাদিট্ঠিমগ্গঙ্গাদিঅট্ঠঙ্গিকো মগ্গো সেট্ঠো উত্তমো। সচ্চানং ৰচীসচ্চখত্তিযাদিসম্মুতিসচ্চপরমত্থসচ্চানং চতুরো দুক্খসমুদযনিরোধনিরোধগামিনিপটিপদাৰসেন চতুরো অরিযসচ্চা পদা সেট্ঠা উত্তমা। ধম্মানং সব্বসঙ্খতসপ্পচ্চযধম্মানং ৰিরাগো অসঙ্খতনিব্বানসঙ্খাতো ৰিরাগো ধম্মো সেট্ঠো উত্তমো। দ্ৰিপদানং সব্বদেৰমনুস্সাদীনং দ্ৰিপদানং চক্খুমা পঞ্চৰিধচক্খুমা ভগৰা সেট্ঠো উত্তমোতি যোজনা। অযং ‘‘মগ্গানট্ঠঙ্গিকো’’তিআদিসুত্তৰিসেসো থৰে অত্থে ৰাচকঞাপকভাৰেন পৰত্তনতো থৰো নাম।

    Maggānaṃ jaṅghamaggadiṭṭhimaggādīnaṃ aṭṭhaṅgiko sammādiṭṭhimaggaṅgādiaṭṭhaṅgiko maggo seṭṭho uttamo. Saccānaṃ vacīsaccakhattiyādisammutisaccaparamatthasaccānaṃ caturo dukkhasamudayanirodhanirodhagāminipaṭipadāvasena caturo ariyasaccā padā seṭṭhā uttamā. Dhammānaṃ sabbasaṅkhatasappaccayadhammānaṃ virāgo asaṅkhatanibbānasaṅkhāto virāgo dhammo seṭṭho uttamo. Dvipadānaṃ sabbadevamanussādīnaṃ dvipadānaṃ cakkhumā pañcavidhacakkhumā bhagavā seṭṭho uttamoti yojanā. Ayaṃ ‘‘maggānaṭṭhaṅgiko’’tiādisuttaviseso thave atthe vācakañāpakabhāvena pavattanato thavo nāma.

    ‘‘অযমেৰ সুত্তৰিসেসো থৰো’’তি ৰত্তব্বত্তা ‘‘তীণিমানি ভিক্খৰে’’তিআদি ৰুত্তং। অপদা অহিমচ্ছাদযো ৰা, দ্ৰিপদা মনুস্সসকুণপক্খিজাতিকাদযো ৰা, চতুপ্পদা হত্থিঅস্সগোমহিংসাদযো ৰা, বহুপ্পদা সতপদিআদযো ৰা, রূপিনো কামরূপসত্তা ৰা, অরূপিনো অরূপসত্তা ৰা, সঞ্ঞিনো সত্তৰিঞ্ঞাণট্ঠিতিসত্তা ৰা, অসঞ্ঞিনো অসঞ্ঞসত্তা ৰা, নেৰসঞ্ঞীনাসঞ্ঞিনো ভৰগ্গে নিব্বত্তসত্তা ৰা যাৰতা যত্তকা সত্তা সংৰিজ্জন্তি, তেসং তত্তকানং অপদাদীনং সত্তানং যদিদং যো অযং অরহং সম্মাসম্বুদ্ধো তথাগতো উপ্পন্নো, সো অযং অরহং সম্মাসম্বুদ্ধো তথাগতো অগ্গং অগ্গোতি অক্খাযতি, সেট্ঠং সেট্ঠোতি অক্খাযতি, পৰরং পৰরোতি অক্খাযতি, অযং পঠমো অগ্গো।

    ‘‘Ayameva suttaviseso thavo’’ti vattabbattā ‘‘tīṇimāni bhikkhave’’tiādi vuttaṃ. Apadā ahimacchādayo vā, dvipadā manussasakuṇapakkhijātikādayo vā, catuppadā hatthiassagomahiṃsādayo vā, bahuppadā satapadiādayo vā, rūpino kāmarūpasattā vā, arūpino arūpasattā vā, saññino sattaviññāṇaṭṭhitisattā vā, asaññino asaññasattā vā, nevasaññīnāsaññino bhavagge nibbattasattā vā yāvatā yattakā sattā saṃvijjanti, tesaṃ tattakānaṃ apadādīnaṃ sattānaṃ yadidaṃ yo ayaṃ arahaṃ sammāsambuddho tathāgato uppanno, so ayaṃ arahaṃ sammāsambuddho tathāgato aggaṃ aggoti akkhāyati, seṭṭhaṃ seṭṭhoti akkhāyati, pavaraṃ pavaroti akkhāyati, ayaṃ paṭhamo aggo.

    সঙ্খতানং ধম্মানং ৰা সপ্পচ্চযসভাৰানং ৰা, অসঙ্খতানং পচ্চযেহি অসঙ্খরিতানং পণ্ণত্তিমত্তভূতানং ধম্মানং ৰা যাৰতা যত্তকা পণ্ণত্তী ৰোহরীযন্তি, তত্তকেহি পণ্ণত্তীহি পঞ্ঞপেতব্বানং তেসং সঙ্খতাসঙ্খতানং ধম্মানং যদিদং যো অযং মদনিম্মদনো…পে॰… যো অযং নিরোধো, যং ইদং নিব্বানমগ্গফলানমালম্বণং ভৰতি, সো অযং মদনিম্মদনাদিকো ধম্মো অগ্গং অগ্গোতি অক্খাযতি…পে॰… অক্খাযতি, অযং দুতিযো অগ্গো।

    Saṅkhatānaṃ dhammānaṃ vā sappaccayasabhāvānaṃ vā, asaṅkhatānaṃ paccayehi asaṅkharitānaṃ paṇṇattimattabhūtānaṃ dhammānaṃ vā yāvatā yattakā paṇṇattī voharīyanti, tattakehi paṇṇattīhi paññapetabbānaṃ tesaṃ saṅkhatāsaṅkhatānaṃ dhammānaṃ yadidaṃ yo ayaṃ madanimmadano…pe… yo ayaṃ nirodho, yaṃ idaṃ nibbānamaggaphalānamālambaṇaṃ bhavati, so ayaṃ madanimmadanādiko dhammo aggaṃ aggoti akkhāyati…pe… akkhāyati, ayaṃ dutiyo aggo.

    সঙ্ঘানং যাৰতা পণ্ণত্তি, গণানং যাৰতা পণ্ণত্তি, মহাজনসন্নিপাতানং যাৰতা পণ্ণত্তি ৰোহরীযন্তি, তত্তকেহি পণ্ণত্তীহি পঞ্ঞপেতব্বানং তেসং সঙ্ঘগণাদীনং যানি ইমানি চত্তারি পুগ্গলানি পুরিসযুগানি, যে ইমে অট্ঠ পুরিসপুগ্গলা…পে॰… লোকস্স যং ইদং পুঞ্ঞক্খেত্তং সংৰিজ্জতি, সো অযং চতুপুরিসযুগাদিকো তথাগতসাৰকসঙ্ঘো অগ্গং অগ্গোতি অক্খাযতি…পে॰… অক্খাযতি, অযং ততিযো অগ্গো। ইমানি তীণি তথাগতনিব্বানঅরিযসঙ্ঘরতনানি অগ্গানি ভৰন্তি।

    Saṅghānaṃ yāvatā paṇṇatti, gaṇānaṃ yāvatā paṇṇatti, mahājanasannipātānaṃ yāvatā paṇṇatti voharīyanti, tattakehi paṇṇattīhi paññapetabbānaṃ tesaṃ saṅghagaṇādīnaṃ yāni imāni cattāri puggalāni purisayugāni, ye ime aṭṭha purisapuggalā…pe… lokassa yaṃ idaṃ puññakkhettaṃ saṃvijjati, so ayaṃ catupurisayugādiko tathāgatasāvakasaṅgho aggaṃ aggoti akkhāyati…pe… akkhāyati, ayaṃ tatiyo aggo. Imāni tīṇi tathāgatanibbānaariyasaṅgharatanāni aggāni bhavanti.

    সব্বলোকুত্তরো অপদাদিসব্বসত্তলোকতো উত্তরো সত্থা চ, কুসলপক্খতো কুসলঅনৰজ্জপক্খভাৰতো উত্তরো ধম্মো চ, নরসীহস্স সত্থুনো গণো চ ইতি তীণি সত্থুধম্মগণরতনানি অগ্গানি, তানি তীণি সত্থুধম্মগণরতনানি ৰিসিস্সরে গুণৰসেন ৰিসিস্সন্তি।

    Sabbalokuttaro apadādisabbasattalokato uttaro satthā ca, kusalapakkhato kusalaanavajjapakkhabhāvato uttaro dhammo ca, narasīhassa satthuno gaṇo ca iti tīṇi satthudhammagaṇaratanāni aggāni, tāni tīṇi satthudhammagaṇaratanāni visissare guṇavasena visissanti.

    সমণপদুমসঞ্চযো সরে রুহমানং পদুমং সোভনং ইৰ সাসনে সোভনসমণপদুমসমূহো গণো চ, ধম্মৰরো চ, ৰিদূনং সক্কতো নরৰরদমকো নরৰরানং ব্রহ্মদেৰমনুস্সরাজরাজমহামচ্চাদীনং দমকো অনুদমকো চক্খুমা সম্বুদ্ধো চ ইতি তীণি গণধম্মবুদ্ধরতনানি লোকস্স উত্তরি ভৰন্তি।

    Samaṇapadumasañcayo sare ruhamānaṃ padumaṃ sobhanaṃ iva sāsane sobhanasamaṇapadumasamūho gaṇo ca, dhammavaro ca, vidūnaṃ sakkato naravaradamako naravarānaṃ brahmadevamanussarājarājamahāmaccādīnaṃ damako anudamako cakkhumā sambuddho ca iti tīṇi gaṇadhammabuddharatanāni lokassa uttari bhavanti.

    অপ্পটিসমো সত্থা চ, নিরুপদাহো নিগ্গতউপদাহো, সব্বো ধম্মো চ অরিযো গণৰরো চ ইতি যানি তীণি বুদ্ধধম্মগণরতনানি অগ্গানি, তানি তীণি…পে॰… নানি খলু একংসেন ৰিসিস্সরে ৰিসিস্সন্তি।

    Appaṭisamo satthā ca, nirupadāho niggataupadāho, sabbo dhammo ca ariyo gaṇavaro ca iti yāni tīṇi buddhadhammagaṇaratanāni aggāni, tāni tīṇi…pe… nāni khalu ekaṃsena visissare visissanti.

    সচ্চনামো অৰিতথসচ্চদেসনতো সচ্চনামো খেমো সব্বাভিভূ সব্বে মনুস্সদেৰাদিকে অনভিভৰমানোপি গুণাতিরেকৰসেন অভিভৰমানো ৰিয পৰত্তনতো সব্বাভিভূ জিনো চ, সচ্চধম্মো অৰিতথসভাৰতো সচ্চধম্মো চ, তস্স সচ্চধম্মস্স উত্তরি উত্তমো অঞ্ঞো ধম্মো নত্থি, ৰিঞ্ঞূনং নিচ্চং পূজিতো পূজারহো অরিযসঙ্ঘো চ ইতি তীণি লোকস্স উত্তরি উত্তমানি ভৰন্তি।

    Saccanāmo avitathasaccadesanato saccanāmo khemo sabbābhibhū sabbe manussadevādike anabhibhavamānopi guṇātirekavasena abhibhavamāno viya pavattanato sabbābhibhū jino ca, saccadhammo avitathasabhāvato saccadhammo ca, tassa saccadhammassa uttari uttamo añño dhammo natthi, viññūnaṃ niccaṃ pūjito pūjāraho ariyasaṅgho ca iti tīṇi lokassa uttari uttamāni bhavanti.

    একাযনপদস্স ৰচনত্থো অট্ঠকথাযং (নেত্তি॰ অট্ঠ॰ ১৭০) বহুধা ৰুত্তো। জাতিখযন্তদস্সী হিতানুকম্পী ভগৰা একাযনং মগ্গং পজানাতি। ‘‘যং একাযনং মগ্গং পজানাতি, তেন মগ্গেন কিং তরতী’’তি ৰত্তব্বভাৰতো ‘‘এতেন মগ্গেনা’’তিআদি ৰুত্তং। যং মগ্গং ভগৰা জানাতি, এতেন মগ্গেন পুব্বে অতীতমদ্ধানং বুদ্ধাদযো অরিযা ওঘং সংসারোঘং তরিংসু, অনাগতমদ্ধানং তরিস্সন্তি, যে চাপি বুদ্ধাদযো পচ্চুপ্পন্নে উপ্পজ্জন্তি, তে চাপি বুদ্ধাদযো পচ্চুপ্পন্নে তরন্তি, ৰিসুদ্ধিপেক্খা ৰিসুদ্ধিং অপেক্খমানা সত্তা দেৰমনুস্সসেট্ঠং তাদিসং যথাৰুত্তগুণং তং সম্মাসম্বুদ্ধং নমস্সন্তি, ইতি অযং নানাৰিধসুত্তৰিসেসোপি থৰে রতনত্তযে, রতনত্তযগুণে চ ৰাচকঞাপকভাৰেন পৰত্তনতো থৰো নাম। ইচ্চেতং সাসনপট্ঠানসুত্তৰিসেসদস্সকো সংৰণ্ণনাৰিসেসোপি সাসনপট্ঠানং নামাতি ৰেদিতব্বো।

    Ekāyanapadassa vacanattho aṭṭhakathāyaṃ (netti. aṭṭha. 170) bahudhā vutto. Jātikhayantadassī hitānukampī bhagavā ekāyanaṃ maggaṃ pajānāti. ‘‘Yaṃ ekāyanaṃ maggaṃ pajānāti, tena maggena kiṃ taratī’’ti vattabbabhāvato ‘‘etena maggenā’’tiādi vuttaṃ. Yaṃ maggaṃ bhagavā jānāti, etena maggena pubbe atītamaddhānaṃ buddhādayo ariyā oghaṃ saṃsāroghaṃ tariṃsu, anāgatamaddhānaṃ tarissanti, ye cāpi buddhādayo paccuppanne uppajjanti, te cāpi buddhādayo paccuppanne taranti, visuddhipekkhā visuddhiṃ apekkhamānā sattā devamanussaseṭṭhaṃ tādisaṃ yathāvuttaguṇaṃ taṃ sammāsambuddhaṃ namassanti, iti ayaṃ nānāvidhasuttavisesopi thave ratanattaye, ratanattayaguṇe ca vācakañāpakabhāvena pavattanato thavo nāma. Iccetaṃ sāsanapaṭṭhānasuttavisesadassako saṃvaṇṇanāvisesopi sāsanapaṭṭhānaṃ nāmāti veditabbo.

    অম্হাকাচরিয তুম্হেহি অম্হাকাচরিযেহি সোল়সপ্পভেদসংকিলেসভাগিযাদিসাসনপট্ঠানসুত্তঞ্চেৰ অট্ঠৰীসতিৰিধং লোকিযাদিসাসনপট্ঠানসুত্তঞ্চ নিদ্ধারিতং, অম্হেহি চ ঞাতং, ‘‘তেসু সংকিলেসভাগিযাদীসু সাসনপট্ঠানসুত্তৰিসেসেসু কতমং সুত্তৰিসেসং কতমেন সুত্তৰিসেসেন সংসন্দিত্ৰা নিদ্দিসিতব্ব’’ন্তি ৰত্তব্বত্তা ‘‘তত্থ লোকিযং সুত্ত’’ন্তিআদি আরদ্ধং। অট্ঠকথাযং পন – ‘‘এৰং দুৰিধম্পি সাসনপট্ঠানং নানাসুত্তপদানি উদাহরন্তেন ৰিভজিত্ৰা ইদানি সংকিলেসভাগিযাদীহি সংসন্দিত্ৰা দস্সেতুং পুন ‘লোকিযং সুত্ত’ন্তিআদি আরদ্ধ’’ন্তি (নেত্তি॰ অট্ঠ॰ ১৭০) ৰুত্তং।

    Amhākācariya tumhehi amhākācariyehi soḷasappabhedasaṃkilesabhāgiyādisāsanapaṭṭhānasuttañceva aṭṭhavīsatividhaṃ lokiyādisāsanapaṭṭhānasuttañca niddhāritaṃ, amhehi ca ñātaṃ, ‘‘tesu saṃkilesabhāgiyādīsu sāsanapaṭṭhānasuttavisesesu katamaṃ suttavisesaṃ katamena suttavisesena saṃsanditvā niddisitabba’’nti vattabbattā ‘‘tattha lokiyaṃsutta’’ntiādi āraddhaṃ. Aṭṭhakathāyaṃ pana – ‘‘evaṃ duvidhampi sāsanapaṭṭhānaṃ nānāsuttapadāni udāharantena vibhajitvā idāni saṃkilesabhāgiyādīhi saṃsanditvā dassetuṃ puna ‘lokiyaṃ sutta’ntiādi āraddha’’nti (netti. aṭṭha. 170) vuttaṃ.

    তত্থ তত্থাতি তেসু সোল়সৰিধেসু সংকিলেসভাগিযাদীসু সাসনপট্ঠানসুত্তৰিসেসেসু চেৰ অট্ঠৰীসতিৰিধেসু লোকিযাদীসু সাসনপট্ঠানসুত্তৰিসেসেসু চ অকুসলপক্খে পৰত্তং লোকিযং সুত্তং সংকিলেসভাগিযসুত্তেন সমানত্থভাৰেন সংসন্দতি, কুসলপক্খে পৰত্তং লোকিযং সুত্তং ৰাসনাভাগিযসুত্তেন সমানত্থভাৰেন সংসন্দতি, তস্মা লোকিযং সুত্তং একৰিধম্পি সংকিলেসভাগিযেন চ ৰাসনাভাগিযেন চ দ্ৰীহি সুত্তেহি নিদ্দিসিতব্বং। দস্সনপক্খে পৰত্তং লোকুত্তরং সুত্তং দস্সনভাগিযেন সমানত্থভাৰেন সংসন্দতি, ভাৰনাপক্খে পৰত্তং লোকুত্তরং সুত্তং ভাৰনাভাগিযেন সমানত্থভাৰেন সংসন্দতি, অসেক্খপক্খে পৰত্তং লোকুত্তরং সুত্তং অসেক্খভাগিযেন সমানত্থভাৰেন সংসন্দতি, তস্মা লোকুত্তরম্পি সুত্তং দস্সনভাগিযেন চ ভাৰনাভাগিযেন চ অসেক্খভাগিযেন চ তীহি সুত্তেহি নিদ্দিসিতব্বং। ৰুত্তনযানুসারেন সেসেসুপি সংসন্দনযোজনা কাতব্বা।

    Tattha tatthāti tesu soḷasavidhesu saṃkilesabhāgiyādīsu sāsanapaṭṭhānasuttavisesesu ceva aṭṭhavīsatividhesu lokiyādīsu sāsanapaṭṭhānasuttavisesesu ca akusalapakkhe pavattaṃ lokiyaṃ suttaṃ saṃkilesabhāgiyasuttena samānatthabhāvena saṃsandati, kusalapakkhe pavattaṃ lokiyaṃ suttaṃ vāsanābhāgiyasuttena samānatthabhāvena saṃsandati, tasmā lokiyaṃ suttaṃ ekavidhampi saṃkilesabhāgiyena ca vāsanābhāgiyena ca dvīhi suttehi niddisitabbaṃ. Dassanapakkhe pavattaṃ lokuttaraṃ suttaṃ dassanabhāgiyena samānatthabhāvena saṃsandati, bhāvanāpakkhe pavattaṃ lokuttaraṃ suttaṃ bhāvanābhāgiyena samānatthabhāvena saṃsandati, asekkhapakkhe pavattaṃ lokuttaraṃ suttaṃ asekkhabhāgiyena samānatthabhāvena saṃsandati, tasmā lokuttarampi suttaṃ dassanabhāgiyena ca bhāvanābhāgiyena ca asekkhabhāgiyena ca tīhi suttehi niddisitabbaṃ. Vuttanayānusārena sesesupi saṃsandanayojanā kātabbā.

    অম্হাকাচরিয তুম্হেহি অম্হাকাচরিযেহি নযদস্সনৰসেন সুত্তৰিসেসসংসন্দনং দস্সিতং, অম্হেহি চ ঞাতং, ‘‘কিমত্থায সংকিলেসভাগিযাদিভেদেন ৰিভজিত্ৰা ভগৰতা ৰুত্ত’’ন্তি ৰত্তব্বত্তা ‘‘ৰাসনাভাগিযং সুত্তং সংকিলেসভাগিযস্স সুত্তস্স নিগ্ঘাতাযা’’তিআদি ৰুত্তং। এত্থ চ সুত্তৰসেন সুত্তত্থা গহিতা।

    Amhākācariya tumhehi amhākācariyehi nayadassanavasena suttavisesasaṃsandanaṃ dassitaṃ, amhehi ca ñātaṃ, ‘‘kimatthāya saṃkilesabhāgiyādibhedena vibhajitvā bhagavatā vutta’’nti vattabbattā ‘‘vāsanābhāgiyaṃ suttaṃ saṃkilesabhāgiyassa suttassa nigghātāyā’’tiādi vuttaṃ. Ettha ca suttavasena suttatthā gahitā.

    ‘‘যং সত্তাধিট্ঠানং আচরিযেন নিদ্ধারিতং, তং সত্তাধিট্ঠানং কিত্তকেহি সুত্তেহি ৰিভজিত্ৰা নিদ্দিসিতব্ব’’ন্তি ৰত্তব্বত্তা ‘‘লোকুত্তরং সুত্তং সত্তাধিট্ঠানং ছব্বিসতিযা পুগ্গলেহি নিদ্দিসিতব্ব’’ন্তি ৰুত্তং। ‘‘তে ছব্বীসতি পুগ্গলা কতিহি সুত্তেহি সমন্ৰেসিতব্বা’’তি ৰত্তব্বত্তা ‘‘তে তীহী’’তিআদি ৰুত্তং। দস্সনভাগিযেন সত্তাধিট্ঠানেন, ভাৰনাভাগিযেন সত্তাধিট্ঠানেন, অসেক্খভাগিযেন সত্তাধিট্ঠানেন চাতি তীহি সুত্তেহি তে ছব্বীসতি পুগ্গলা সমন্ৰেসিতব্বা।

    ‘‘Yaṃ sattādhiṭṭhānaṃ ācariyena niddhāritaṃ, taṃ sattādhiṭṭhānaṃ kittakehi suttehi vibhajitvā niddisitabba’’nti vattabbattā ‘‘lokuttaraṃ suttaṃ sattādhiṭṭhānaṃ chabbisatiyā puggalehi niddisitabba’’nti vuttaṃ. ‘‘Te chabbīsati puggalā katihi suttehi samanvesitabbā’’ti vattabbattā ‘‘te tīhī’’tiādi vuttaṃ. Dassanabhāgiyena sattādhiṭṭhānena, bhāvanābhāgiyena sattādhiṭṭhānena, asekkhabhāgiyena sattādhiṭṭhānena cāti tīhi suttehi te chabbīsati puggalā samanvesitabbā.

    ‘‘কতমেহি কতমেহি কতমং কতমং সুত্তং নিদ্দিসিতব্ব’’ন্তি ৰত্তব্বত্তা ‘‘তত্থ দস্সনভাগিয’’ন্তিআদি ৰুত্তং। তত্থ তত্থাতি তেসু তীসু দস্সনভাগিযাদীসু সুত্তেসু। তত্থাতি ৰা তেসু ছব্বীসতিযা পুগ্গলেসু। সত্তাধিট্ঠানেকদেসং দস্সনভাগিযং সুত্তং একবীজিনা পুগ্গলেন চ নিদ্দিসিতব্বং…পে॰… ধম্মানুসারিনা পুগ্গলেন চ নিদ্দিসিতব্বং, ইতি ইমেহি পঞ্চহি পুগ্গলেহি সত্তাধিট্ঠানেকদেসং দস্সনভাগিযং সুত্তং নিদ্দিসিতব্বং। এত্থ চ দস্সনগ্গহণেন সোতাপত্তিফলট্ঠাপি গহিতা, তস্মা একবীজিকোলংকোলসত্তক্খত্তুপরমা ফলট্ঠাপি গহিতা।

    ‘‘Katamehi katamehi katamaṃ katamaṃ suttaṃ niddisitabba’’nti vattabbattā ‘‘tattha dassanabhāgiya’’ntiādi vuttaṃ. Tattha tatthāti tesu tīsu dassanabhāgiyādīsu suttesu. Tatthāti vā tesu chabbīsatiyā puggalesu. Sattādhiṭṭhānekadesaṃ dassanabhāgiyaṃ suttaṃ ekabījinā puggalena ca niddisitabbaṃ…pe… dhammānusārinā puggalena ca niddisitabbaṃ, iti imehi pañcahi puggalehi sattādhiṭṭhānekadesaṃ dassanabhāgiyaṃ suttaṃ niddisitabbaṃ. Ettha ca dassanaggahaṇena sotāpattiphalaṭṭhāpi gahitā, tasmā ekabījikolaṃkolasattakkhattuparamā phalaṭṭhāpi gahitā.

    সদ্ধানুসারী পন যো ৰিপস্সনাক্খণে সদ্ধং ধুরং কত্ৰা সোতাপত্তিমগ্গং নিব্বত্তেতি, সো পুগ্গলো নিব্বত্তেতব্বসোতাপত্তিমগ্গক্খণে সদ্ধানুসারী নাম, সদ্ধায সমাপত্তিং অনুস্সরতি, ইতি সদ্ধায সমাপত্তিযা অনুস্সরণতো সোতাপত্তিমগ্গট্ঠো পুগ্গলো সদ্ধানুসারী নাম। সো পুগ্গলো সোতাপত্তিফলক্খণে সদ্ধায ৰিমুত্তত্তা সদ্ধাৰিমুত্তো হুত্ৰা একবীজিকোলংকোলসত্তক্খত্তুপরমো ভৰতি। যো পন পুগ্গলো ৰিপস্সনাক্খণে পঞ্ঞং ধুরং কত্ৰা সোতাপত্তিমগ্গং নিব্বত্তেতি, সো পুগ্গলো নিব্বত্তেতব্বসোতাপত্তিমগ্গক্খণে ধম্মানুসারী নাম, ধম্মেন পঞ্ঞায সমাপত্তিং অনুস্সরতি, ইতি ধম্মেন পঞ্ঞায সমাপত্তিযা অনুস্সরণতো ধম্মানুসারী নাম। সো পুগ্গলো ফলক্খণে দিট্ঠিযা পঞ্ঞায নিরোধং পত্তত্তা দিট্ঠিপত্তো হুত্ৰা একবীজি…পে॰… পরমো ভৰতি। ধম্মোতি চেত্থ পঞ্ঞা গহিতা। ইতি পভেদতো দ্ৰে মগ্গট্ঠা, ছ ফলট্ঠাতি অট্ঠহি অরিযপুগ্গলেহি, সম্পিণ্ডিতে পন পঞ্চহি অরিযপুগ্গলেহি সত্তাধিট্ঠানেকদেসং দস্সনভাগিযং সুত্তং নিদ্দিসিতব্বং।

    Saddhānusārī pana yo vipassanākkhaṇe saddhaṃ dhuraṃ katvā sotāpattimaggaṃ nibbatteti, so puggalo nibbattetabbasotāpattimaggakkhaṇe saddhānusārī nāma, saddhāya samāpattiṃ anussarati, iti saddhāya samāpattiyā anussaraṇato sotāpattimaggaṭṭho puggalo saddhānusārī nāma. So puggalo sotāpattiphalakkhaṇe saddhāya vimuttattā saddhāvimutto hutvā ekabījikolaṃkolasattakkhattuparamo bhavati. Yo pana puggalo vipassanākkhaṇe paññaṃ dhuraṃ katvā sotāpattimaggaṃ nibbatteti, so puggalo nibbattetabbasotāpattimaggakkhaṇe dhammānusārī nāma, dhammena paññāya samāpattiṃ anussarati, iti dhammena paññāya samāpattiyā anussaraṇato dhammānusārī nāma. So puggalo phalakkhaṇe diṭṭhiyā paññāya nirodhaṃ pattattā diṭṭhipatto hutvā ekabīji…pe… paramo bhavati. Dhammoti cettha paññā gahitā. Iti pabhedato dve maggaṭṭhā, cha phalaṭṭhāti aṭṭhahi ariyapuggalehi, sampiṇḍite pana pañcahi ariyapuggalehi sattādhiṭṭhānekadesaṃ dassanabhāgiyaṃ suttaṃ niddisitabbaṃ.

    ইমেসং একবীজিআদীনং পুগ্গলানং সত্তাধিট্ঠানেকদেসত্থত্তা চেৰ দস্সনভাগিযত্থত্তা চ সত্তাধিট্ঠানেকদেসং দস্সনভাগিযং সুত্তং এত্তকেহি পুগ্গলেহি নিদ্দিসিতব্বন্তি নিযমেত্ৰা আচরিযেন ৰিভত্তং, অম্হেহি চ ঞাতং, ‘‘সত্তাধিট্ঠানেকদেসং দস্সনভাগিযং সুত্তং কিত্তকেহি পুগ্গলেহি নিদ্দিসিতব্ব’’ন্তি পুচ্ছিতব্বত্তা –

    Imesaṃ ekabījiādīnaṃ puggalānaṃ sattādhiṭṭhānekadesatthattā ceva dassanabhāgiyatthattā ca sattādhiṭṭhānekadesaṃ dassanabhāgiyaṃ suttaṃ ettakehi puggalehi niddisitabbanti niyametvā ācariyena vibhattaṃ, amhehi ca ñātaṃ, ‘‘sattādhiṭṭhānekadesaṃ dassanabhāgiyaṃ suttaṃ kittakehi puggalehi niddisitabba’’nti pucchitabbattā –

    ‘‘ভাৰনাভাগিযং সুত্তং দ্ৰাদসহি পুগ্গলেহি নিদ্দিসিতব্বং সকদাগামিফলসচ্ছিকিরিযায পটিপন্নেন, সকদাগামিনা, অনাগামিফলসচ্ছিকিরিযায পটিপন্নেন, অনাগামিনা, অন্তরাপরিনিব্বাযিনা, উপহচ্চপরিনিব্বাযিনা, অসঙ্খারপরিনিব্বাযিনা, সসঙ্খারপরিনিব্বাযিনা , উদ্ধংসোতেন অকনিট্ঠগামিনা, সদ্ধাৰিমুত্তেন, দিট্ঠিপ্পত্তেন, কাযসক্খিনা চাতি ভাৰনাভাগিযং সুত্তং ইমেহি দ্ৰাদসহি পুগ্গলেহি নিদ্দিসিতব্ব’’ন্তি –

    ‘‘Bhāvanābhāgiyaṃ suttaṃ dvādasahi puggalehi niddisitabbaṃ sakadāgāmiphalasacchikiriyāya paṭipannena, sakadāgāminā, anāgāmiphalasacchikiriyāya paṭipannena, anāgāminā, antarāparinibbāyinā, upahaccaparinibbāyinā, asaṅkhāraparinibbāyinā, sasaṅkhāraparinibbāyinā , uddhaṃsotena akaniṭṭhagāminā, saddhāvimuttena, diṭṭhippattena, kāyasakkhinā cāti bhāvanābhāgiyaṃ suttaṃ imehi dvādasahi puggalehi niddisitabba’’nti –

    ৰুত্তং। তত্থাপি সত্তাধিট্ঠানেকদেসং ভাৰনাভাগিযং সুত্তন্তি গহেতব্বং। সকদা…পে॰… পন্নেন সকদাগামিমগ্গট্ঠেন পুগ্গলেন, সকদাগামিনা সকদাগামিফলট্ঠেন, অনাগামি…পে॰… পন্নেন অনাগামিমগ্গট্ঠেন, অনাগামিনা অনাগামিফলট্ঠেন, অৰিহাদীসু পঞ্চসু সুদ্ধাৰাসেসু আযুৰেমজ্ঝং অনতিক্কমিত্ৰা অরহত্তং পত্ৰা পরিনিব্বাযনসভাৰেন অন্তরাপরিনিব্বাযীনামকেন অনাগামিনা, আযুৰেমজ্ঝং অতিক্কমিত্ৰা অরহত্তং পত্ৰা পরিনিব্বাযনসভাৰেন উপহচ্চপরিনিব্বাযীনামকেন অনাগামিনা, অসঙ্খারেন অপ্পযোগেন অরহত্তং পত্ৰা পরিনিব্বাযনসভাৰেন অসঙ্খারপরিনিব্বাযীনামকেন অনাগামিনা, সসঙ্খারেন সপ্পযোগেন অরহত্তং পত্ৰা পরিনিব্বাযনসভাৰেন সসঙ্খারপরিনিব্বাযীনামকেন অনাগামিনা, অৰিহাদীহি উদ্ধং অতপ্পাদীসু উপপত্তিসোতেন অরহত্তং পত্ৰা পরিনিব্বাযনসভাৰেন উদ্ধংসোতনামকেন অনাগামিনা, অকনিট্ঠং গন্ত্ৰা অরহত্তং পত্ৰা পরিনিব্বাযনসভাৰেন অকনিট্ঠগামীনামকেন অনাগামিনা, সদ্ধায ৰিমুত্তত্তা সদ্ধাৰিমুত্তনামকেন অনাগামিনা, দিট্ঠিযা পঞ্ঞায নিরোধং পত্তত্তা দিট্ঠিপ্পত্তনামকেন অনাগামিনা চাতি ইমেহি একাদসহি অঝানলাভীপুগ্গলেহি চ, কাযেন নামকাযে ফুট্ঠানং অরূপঝানানং অনন্তরং নিব্বানং সচ্ছিকরোতি, ইতি সচ্ছিকরণতো কাযসক্খীনামকেন ঝানলাভিনা চাতি দ্ৰাদসহি পুগ্গলেহি নিদ্দিসিতব্বং।

    Vuttaṃ. Tatthāpi sattādhiṭṭhānekadesaṃ bhāvanābhāgiyaṃ suttanti gahetabbaṃ. Sakadā…pe… pannena sakadāgāmimaggaṭṭhena puggalena, sakadāgāminā sakadāgāmiphalaṭṭhena, anāgāmi…pe… pannena anāgāmimaggaṭṭhena, anāgāminā anāgāmiphalaṭṭhena, avihādīsu pañcasu suddhāvāsesu āyuvemajjhaṃ anatikkamitvā arahattaṃ patvā parinibbāyanasabhāvena antarāparinibbāyīnāmakena anāgāminā, āyuvemajjhaṃ atikkamitvā arahattaṃ patvā parinibbāyanasabhāvena upahaccaparinibbāyīnāmakena anāgāminā, asaṅkhārena appayogena arahattaṃ patvā parinibbāyanasabhāvena asaṅkhāraparinibbāyīnāmakena anāgāminā, sasaṅkhārena sappayogena arahattaṃ patvā parinibbāyanasabhāvena sasaṅkhāraparinibbāyīnāmakena anāgāminā, avihādīhi uddhaṃ atappādīsu upapattisotena arahattaṃ patvā parinibbāyanasabhāvena uddhaṃsotanāmakena anāgāminā, akaniṭṭhaṃ gantvā arahattaṃ patvā parinibbāyanasabhāvena akaniṭṭhagāmīnāmakena anāgāminā, saddhāya vimuttattā saddhāvimuttanāmakena anāgāminā, diṭṭhiyā paññāya nirodhaṃ pattattā diṭṭhippattanāmakena anāgāminā cāti imehi ekādasahi ajhānalābhīpuggalehi ca, kāyena nāmakāye phuṭṭhānaṃ arūpajhānānaṃ anantaraṃ nibbānaṃ sacchikaroti, iti sacchikaraṇato kāyasakkhīnāmakena jhānalābhinā cāti dvādasahi puggalehi niddisitabbaṃ.

    ইমেসং ৰুত্তপ্পকারানং পুগ্গলানং সত্তাধিট্ঠানেকদেসত্থত্তা চেৰ ভাৰনাভাগিযত্থত্তা চ সত্তাধিট্ঠানেকদেসং ভাৰনাভাগিযং সুত্তং এত্তকেহি পুগ্গলেহি নিদ্দিসিতব্বন্তি নিযমেত্ৰা আচরিযেন ৰিভত্তং, অম্হেহি চ ঞাতং, ‘‘কিত্তকেহি পুগ্গলেহি সত্তাধিট্ঠানেকদেসং অসেক্খভাগিযং সুত্তং নিদ্দিসিতব্ব’’ন্তি ৰত্তব্বত্তা –

    Imesaṃ vuttappakārānaṃ puggalānaṃ sattādhiṭṭhānekadesatthattā ceva bhāvanābhāgiyatthattā ca sattādhiṭṭhānekadesaṃ bhāvanābhāgiyaṃ suttaṃ ettakehi puggalehi niddisitabbanti niyametvā ācariyena vibhattaṃ, amhehi ca ñātaṃ, ‘‘kittakehi puggalehi sattādhiṭṭhānekadesaṃ asekkhabhāgiyaṃ suttaṃ niddisitabba’’nti vattabbattā –

    ‘‘অসেক্খভাগিযং সুত্তং নৰহি পুগ্গলেহি নিদ্দিসিতব্বং সদ্ধাৰিমুত্তেন, পঞ্ঞাৰিমুত্তেন, সুঞ্ঞতৰিমুত্তেন, অনিমিত্তৰিমুত্তেন, অপ্পণিহিতৰিমুত্তেন, উভতোভাগৰিমুত্তেন, সমসীসিনা, পচ্চেকবুদ্ধেহি, সম্মাসম্বুদ্ধেহি চাতি অসেক্খভাগিযং সুত্তং ইমেহি নৰহি পুগ্গলেহি নিদ্দিসিতব্ব’’ন্তি –

    ‘‘Asekkhabhāgiyaṃ suttaṃ navahi puggalehi niddisitabbaṃ saddhāvimuttena, paññāvimuttena, suññatavimuttena, animittavimuttena, appaṇihitavimuttena, ubhatobhāgavimuttena, samasīsinā, paccekabuddhehi, sammāsambuddhehi cāti asekkhabhāgiyaṃ suttaṃ imehi navahi puggalehi niddisitabba’’nti –

    ৰুত্তং । তত্থ সত্তাধিট্ঠানেকদেসং অসেক্খভাগিযং সুত্তং নিদ্দিসিতব্বন্তি যোজেতব্বং। সদ্ধায কিলেসেহি ৰিমুত্তত্তা অরহত্তফলক্খণে সদ্ধাৰিমুত্তো অরহা, তেন সদ্ধাৰিমুত্তেন। পঞ্ঞায ৰিমুত্তত্তা অরহত্তফলক্খণে পঞ্ঞাৰিমুত্তো অরহা, তেন পঞ্ঞাৰিমুত্তেন। সুঞ্ঞতৰিপস্সনাসঙ্খাতেন অনত্তানুপস্সনেন ৰিমুত্তত্তা সুঞ্ঞতৰিমুত্তো অরহা, তেন সুঞ্ঞতৰিমুত্তেন। অনিমিত্তানুপস্সনাসঙ্খাতেন অনিচ্চানুপস্সনেন ৰিমুত্তত্তা অনিমিত্তৰিমুত্তো অরহা, তেন অনিমিত্তৰিমুত্তেন। অপ্পণিহিতানুপস্সনাসঙ্খাতেন দুক্খানুপস্সনেন ৰিমুত্তত্তা অপ্পণিহিতৰিমুত্তো অরহা, তেন অপ্পণিহিতৰিমুত্তেন। উভতো রূপকাযনামকাযতো উভতোভাগতো ৰিমুত্তত্তা উভতোভাগৰিমুত্তো অরহা, তেন উভতোভাগৰিমুত্তেন। পুরিমা পঞ্চ পুগ্গলা অঝানলাভিনো গহিতা, উভতোভাগৰিমুত্তো পন ঝানলাভীগহিতো।

    Vuttaṃ . Tattha sattādhiṭṭhānekadesaṃ asekkhabhāgiyaṃ suttaṃ niddisitabbanti yojetabbaṃ. Saddhāya kilesehi vimuttattā arahattaphalakkhaṇe saddhāvimutto arahā, tena saddhāvimuttena. Paññāya vimuttattā arahattaphalakkhaṇe paññāvimutto arahā, tena paññāvimuttena. Suññatavipassanāsaṅkhātena anattānupassanena vimuttattā suññatavimutto arahā, tena suññatavimuttena. Animittānupassanāsaṅkhātena aniccānupassanena vimuttattā animittavimutto arahā, tena animittavimuttena. Appaṇihitānupassanāsaṅkhātena dukkhānupassanena vimuttattā appaṇihitavimutto arahā, tena appaṇihitavimuttena. Ubhato rūpakāyanāmakāyato ubhatobhāgato vimuttattā ubhatobhāgavimutto arahā, tena ubhatobhāgavimuttena. Purimā pañca puggalā ajhānalābhino gahitā, ubhatobhāgavimutto pana jhānalābhīgahito.

    সমসীসী নাম ইরিযাপথসমসীসী, রোগসমসীসী, জীৰিতসমসীসীতি তিৰিধা হোন্তি। ইমেসু তীসু সমসীসীসু যো অরহা চতূসু ইরিযাপথেসু একেকস্মিং ইরিযাপথে অরহত্তং পত্ৰা অঞ্ঞং ইরিযাপথং অসঙ্কমিত্ৰা তস্মিং তস্মিং ইরিযাপথেযেৰ পরিনিব্বাযতি, অযং অরহা ইরিযাপথসমসীসী নাম। যো অরহা যস্মিং রোগে উপ্পন্নে অরহত্তং পত্ৰা ততো রোগতো অনুট্ঠহিত্ৰা তস্মিং রোগেযেৰ পরিনিব্বাযতি, অযং অরহা রোগসমসীসী নাম। যো অরহা পচ্চৰেক্খণৰীথিযানন্তরং ভৰঙ্গং ওতরিত্ৰা ততো মরণাসন্নজৰনৰীথিযানন্তরমেৰ পরিনিব্বাযতি, অযং অরহা ৰারসমতায জীৰিতসমসীসী নাম। ৰারসমতাতি চ পচ্চৰেক্খণৰীথি মগ্গৰিথ্যানুৰত্তকত্তা পচ্চৰেক্খণৰীথিঅনন্তরং পৰত্তমানাযপি মরণাসন্নৰীথি মগ্গৰীথিঅনন্তরং পৰত্তাতি ৰত্তব্বারহা, তস্মা ৰীথিঅনন্তরতা ৰারসমতা নাম। তায ৰারসমতায চ জীৰিতসমসীসী ৰুত্তো।

    Samasīsī nāma iriyāpathasamasīsī, rogasamasīsī, jīvitasamasīsīti tividhā honti. Imesu tīsu samasīsīsu yo arahā catūsu iriyāpathesu ekekasmiṃ iriyāpathe arahattaṃ patvā aññaṃ iriyāpathaṃ asaṅkamitvā tasmiṃ tasmiṃ iriyāpatheyeva parinibbāyati, ayaṃ arahā iriyāpathasamasīsī nāma. Yo arahā yasmiṃ roge uppanne arahattaṃ patvā tato rogato anuṭṭhahitvā tasmiṃ rogeyeva parinibbāyati, ayaṃ arahā rogasamasīsī nāma. Yo arahā paccavekkhaṇavīthiyānantaraṃ bhavaṅgaṃ otaritvā tato maraṇāsannajavanavīthiyānantarameva parinibbāyati, ayaṃ arahā vārasamatāya jīvitasamasīsī nāma. Vārasamatāti ca paccavekkhaṇavīthi maggavithyānuvattakattā paccavekkhaṇavīthianantaraṃ pavattamānāyapi maraṇāsannavīthi maggavīthianantaraṃ pavattāti vattabbārahā, tasmā vīthianantaratā vārasamatā nāma. Tāya vārasamatāya ca jīvitasamasīsī vutto.

    সহ পটিসম্ভিদাহি অরহত্তং পাপুণীতি এত্থপি পচ্চৰেক্খণৰীথিযানন্তরং ভৰঙ্গং ওতরিত্ৰা ভৰঙ্গতো ৰুট্ঠায পৰত্তৰীথিযা পটিসম্ভিদাঞাণানি পৰত্তন্তি। ৰুত্তনযেন ৰীথিঅনন্তরতায ৰারসমতায ‘‘সহ পটিসম্ভিদাহী’’তি ৰুত্তং। ভগৰতো সব্বঞ্ঞুতঞ্ঞাণম্পি পচ্চৰেক্খণৰীথিযানন্তরং ভৰঙ্গং ওতরিত্ৰা ভৰঙ্গতো ৰুট্ঠায পৰত্তৰীথিযা পঠমং পৰত্ততীতি ৰেদিতব্বং। ইমিনা জীৰিতসমসীসিনা, সব্বেহি পচ্চেকবুদ্ধেহি, সব্বেহি সম্মাসম্বুদ্ধেহি চাতি ইমেহি নৰহি পুগ্গলেহি সত্তাধিট্ঠানেকদেসং অসেক্খভাগিযং সুত্তং নিদ্দিসিতব্বং।

    Saha paṭisambhidāhi arahattaṃ pāpuṇīti etthapi paccavekkhaṇavīthiyānantaraṃ bhavaṅgaṃ otaritvā bhavaṅgato vuṭṭhāya pavattavīthiyā paṭisambhidāñāṇāni pavattanti. Vuttanayena vīthianantaratāya vārasamatāya ‘‘saha paṭisambhidāhī’’ti vuttaṃ. Bhagavato sabbaññutaññāṇampi paccavekkhaṇavīthiyānantaraṃ bhavaṅgaṃ otaritvā bhavaṅgato vuṭṭhāya pavattavīthiyā paṭhamaṃ pavattatīti veditabbaṃ. Iminā jīvitasamasīsinā, sabbehi paccekabuddhehi, sabbehi sammāsambuddhehi cāti imehi navahi puggalehi sattādhiṭṭhānekadesaṃ asekkhabhāgiyaṃ suttaṃ niddisitabbaṃ.

    ইমেসং পুগ্গলানং সত্তাধিট্ঠানেকদেসত্থত্তা চেৰ অসেক্খভাগিযত্থত্তা চ এৰং ইমিনা ‘‘লোকুত্তরং সুত্তং সত্তাধিট্ঠান’’ন্তিআদিনা পকারেন ৰুত্তেহি ইমেহি ছব্বীসতিযা পুগ্গলেহি অরিযেহি দস্সনভাগিযৰাসনাভাগিযঅসেক্খভাগিযসুত্তানং ৰসেন লোকুত্তরং সুত্তং সত্তাধিট্ঠানেকদেসং সুত্তং নিদ্দিসিতব্বং।

    Imesaṃ puggalānaṃ sattādhiṭṭhānekadesatthattā ceva asekkhabhāgiyatthattā ca evaṃ iminā ‘‘lokuttaraṃ suttaṃ sattādhiṭṭhāna’’ntiādinā pakārena vuttehi imehi chabbīsatiyā puggalehi ariyehi dassanabhāgiyavāsanābhāgiyaasekkhabhāgiyasuttānaṃ vasena lokuttaraṃ suttaṃ sattādhiṭṭhānekadesaṃ suttaṃ niddisitabbaṃ.

    ইমেসং ছব্বীসতিযা পুগ্গলানং সকললোকুত্তরসুত্তত্থত্তা চেৰ সত্তাধিট্ঠানেকদেসসুত্তত্থত্তা চ লোকুত্তরং সত্তাধিট্ঠানেকদেসং সুত্তং। এত্তকেহি পুগ্গলেহি নিদ্দিসিতব্বন্তি আচরিযেন নিযমেত্ৰা ৰিভত্তং, অম্হেহি চ ঞাতং, ‘‘লোকিযং সত্তাধিট্ঠানেকদেসং সুত্তং কিত্তকেহি পুগ্গলেহি নিদ্দিসিতব্ব’’ন্তি ৰত্তব্বত্তা ‘‘লোকিযং সুত্তং সত্তাধিট্ঠানং একূনৰীসতিযা পুগ্গলেহি নিদ্দিসিতব্ব’’ন্তিআদি ৰুত্তং। ‘‘তে একূনৰীসতি লোকিযা পুগ্গলা কতমেহি ধম্মেহি নিদ্দিট্ঠা সমন্ৰেসিতব্বা’’তি ৰত্তব্বত্তা ‘‘তে চরিতেহী’’তিআদি ৰুত্তং। তে একূনৰীসতি লোকিযা পুগ্গলা চরিতেহি চরিতৰিসেসেহি নিদ্দিট্ঠা সমন্ৰেসিতব্বাতি। ‘‘কথং চরিতেহি নিদ্দিট্ঠা’’তি ৰত্তব্বত্তা ‘‘কেচি রাগচরিতা’’তিআদি ৰুত্তং। রাগচরিতদোসচরিতাদীহি চরিতেহি একূনৰীসতি লোকিযপুগ্গলা রাগচরিতা, কেচি দোসচরিতা…পে॰… মোহচরিতো চাতি নিদ্দিট্ঠা। ইতি নিদ্দিট্ঠেহি ইমেহি একূনৰীসতিযা পুগ্গলেহি লোকিযসত্তাধিট্ঠানেকদেসং সুত্তং নিদ্দিসিতব্বং। ‘‘লোকিয’’ন্তি সামঞ্ঞৰসেন ৰুত্তম্পি ‘‘সংকিলেসভাগিযং লোকিয’’ন্তি ৰিসেসতো ৰিঞ্ঞাতব্বং।

    Imesaṃ chabbīsatiyā puggalānaṃ sakalalokuttarasuttatthattā ceva sattādhiṭṭhānekadesasuttatthattā ca lokuttaraṃ sattādhiṭṭhānekadesaṃ suttaṃ. Ettakehi puggalehi niddisitabbanti ācariyena niyametvā vibhattaṃ, amhehi ca ñātaṃ, ‘‘lokiyaṃ sattādhiṭṭhānekadesaṃ suttaṃ kittakehi puggalehi niddisitabba’’nti vattabbattā ‘‘lokiyaṃ suttaṃ sattādhiṭṭhānaṃ ekūnavīsatiyā puggalehi niddisitabba’’ntiādi vuttaṃ. ‘‘Te ekūnavīsati lokiyā puggalā katamehi dhammehi niddiṭṭhā samanvesitabbā’’ti vattabbattā ‘‘te caritehī’’tiādi vuttaṃ. Te ekūnavīsati lokiyā puggalā caritehi caritavisesehi niddiṭṭhā samanvesitabbāti. ‘‘Kathaṃ caritehi niddiṭṭhā’’ti vattabbattā ‘‘keci rāgacaritā’’tiādi vuttaṃ. Rāgacaritadosacaritādīhi caritehi ekūnavīsati lokiyapuggalā rāgacaritā, keci dosacaritā…pe… mohacarito cāti niddiṭṭhā. Iti niddiṭṭhehi imehi ekūnavīsatiyā puggalehi lokiyasattādhiṭṭhānekadesaṃ suttaṃ niddisitabbaṃ. ‘‘Lokiya’’nti sāmaññavasena vuttampi ‘‘saṃkilesabhāgiyaṃ lokiya’’nti visesato viññātabbaṃ.

    লোকিযং সত্তাধিট্ঠানেকদেসং সুত্তং এত্তকেহি পুগ্গলেহি নিদ্দিসিতব্বন্তি আচরিযেন নিযমেত্ৰা ৰিভত্তং, অম্হেহি চ ঞাতং, ‘‘ৰাসনাভাগিযং সত্তাধিট্ঠানেকদেসং সুত্তং কতমেহি পুগ্গলেহি নিদ্দিসিতব্ব’’ন্তি ৰত্তব্বত্তা ‘‘ৰাসনাভাগিয’’ন্তিআদি ৰুত্তং। ৰাসনাভাগিযং সত্তাধিট্ঠানেকদেসং সুত্তং সীলৰন্তেহি পুগ্গলেহি, ধম্মেহি চ নিদ্দিসিতব্বন্তি যোজেতব্বং। ‘‘কিত্তকা সীলৰন্তপুগ্গলা’’তি ৰত্তব্বত্তা ‘‘তে সীলৰন্তো পঞ্চ পুগ্গলা’’তি ৰুত্তং। ‘‘কিত্তকা ধম্মা’’তি ৰত্তব্বত্তা ‘‘পকতিসীল’’ন্তিআদি ৰুত্তং। ইদং ৰুত্তং হোতি – পকতিসীলৰন্তো চ সমাদানসীলৰন্তো চ চিত্তপ্পসাদৰন্তো চ সমথৰন্তো চ ৰিপস্সনাৰন্তো চাতি পঞ্চ পুগ্গলা, পকতিসীলধম্মো চ সমাদানসীলধম্মো চ চিত্তপ্পসাদধম্মো চ সমথধম্মো চ ৰিপস্সনাধম্মো চাতি পঞ্চ ধম্মাতি ইমেহি পঞ্চহি পুগ্গলেহি, ইমেহি পঞ্চহি ধম্মেহি ৰাসনাভাগিযং সত্তাধিট্ঠানেকদেসধম্মাধিট্ঠানেকদেসং সুত্তং যথাক্কমং নিদ্দিসিতব্বন্তি।

    Lokiyaṃ sattādhiṭṭhānekadesaṃ suttaṃ ettakehi puggalehi niddisitabbanti ācariyena niyametvā vibhattaṃ, amhehi ca ñātaṃ, ‘‘vāsanābhāgiyaṃ sattādhiṭṭhānekadesaṃ suttaṃ katamehi puggalehi niddisitabba’’nti vattabbattā ‘‘vāsanābhāgiya’’ntiādi vuttaṃ. Vāsanābhāgiyaṃ sattādhiṭṭhānekadesaṃ suttaṃ sīlavantehi puggalehi, dhammehi ca niddisitabbanti yojetabbaṃ. ‘‘Kittakā sīlavantapuggalā’’ti vattabbattā ‘‘te sīlavanto pañca puggalā’’ti vuttaṃ. ‘‘Kittakā dhammā’’ti vattabbattā ‘‘pakatisīla’’ntiādi vuttaṃ. Idaṃ vuttaṃ hoti – pakatisīlavanto ca samādānasīlavanto ca cittappasādavanto ca samathavanto ca vipassanāvanto cāti pañca puggalā, pakatisīladhammo ca samādānasīladhammo ca cittappasādadhammo ca samathadhammo ca vipassanādhammo cāti pañca dhammāti imehi pañcahi puggalehi, imehi pañcahi dhammehi vāsanābhāgiyaṃ sattādhiṭṭhānekadesadhammādhiṭṭhānekadesaṃ suttaṃ yathākkamaṃ niddisitabbanti.

    লোকুত্তরং সত্তাধিট্ঠানং সুত্তং দস্সনভাগিযৰাসনাভাগিযঅসেক্খভাগিযসুত্তেহি নিদ্দিসিতব্বন্তি আচরিযেন নিযমেত্ৰা ৰিভত্তং, অম্হেহি চ ঞাতং, ‘‘লোকুত্তরং ধম্মাধিট্ঠানং সুত্তং কিত্তকেহি সুত্তেহি নিদ্দিসিতব্ব’’ন্তি ৰত্তব্বত্তা ‘‘লোকুত্তরং সুত্তং ধম্মাধিট্ঠানং…পে॰… অসেক্খভাগিযেনা’’তি ৰুত্তং।

    Lokuttaraṃ sattādhiṭṭhānaṃ suttaṃ dassanabhāgiyavāsanābhāgiyaasekkhabhāgiyasuttehi niddisitabbanti ācariyena niyametvā vibhattaṃ, amhehi ca ñātaṃ, ‘‘lokuttaraṃ dhammādhiṭṭhānaṃ suttaṃ kittakehi suttehi niddisitabba’’nti vattabbattā ‘‘lokuttaraṃ suttaṃ dhammādhiṭṭhānaṃ…pe… asekkhabhāgiyenā’’ti vuttaṃ.

    ‘‘লোকিযঞ্চ লোকুত্তরঞ্চ সত্তাধিট্ঠানঞ্চ ধম্মাধিট্ঠানঞ্চ কিত্তকেহি নিদ্দিসিতব্ব’’ন্তি ৰত্তব্বত্তা ‘‘লোকিযঞ্চ…পে॰… উভযেন নিদ্দিসিতব্ব’’ন্তি ৰুত্তং। উভযেনাতি লোকিযলোকুত্তরেন, সত্তাধিট্ঠানধম্মাধিট্ঠানেন সমানত্থভাৰেন নিদ্দিসিতব্বন্তি।

    ‘‘Lokiyañca lokuttarañca sattādhiṭṭhānañca dhammādhiṭṭhānañca kittakehi niddisitabba’’nti vattabbattā ‘‘lokiyañca…pe… ubhayena niddisitabba’’nti vuttaṃ. Ubhayenāti lokiyalokuttarena, sattādhiṭṭhānadhammādhiṭṭhānena samānatthabhāvena niddisitabbanti.

    ‘‘ঞাণং কিত্তকেহি নিদ্দিসিতব্ব’’ন্তি ৰত্তব্বত্তা ‘‘ঞাণং পঞ্ঞাযা’’তিআদি ৰুত্তং। যস্মিং যস্মিং সুত্তে ঞাণং আগতং, তস্মিং তস্মিং সুত্তে ঞাণং ঞাণপরিযাযেন পঞ্ঞাদিনা নিদ্দিসিতব্বন্তি।

    ‘‘Ñāṇaṃ kittakehi niddisitabba’’nti vattabbattā ‘‘ñāṇaṃ paññāyā’’tiādi vuttaṃ. Yasmiṃ yasmiṃ sutte ñāṇaṃ āgataṃ, tasmiṃ tasmiṃ sutte ñāṇaṃ ñāṇapariyāyena paññādinā niddisitabbanti.

    ‘‘ঞেয্যং কিত্তকেন নিদ্দিসিতব্ব’’ন্তি ৰত্তব্বত্তা ‘‘ঞেয্যং অতীতানাগতপচ্চুপ্পন্নেহী’’তিআদি ৰুত্তং। যস্মিং যস্মিং সুত্তে ঞেয্যং আগতং, তস্মিং তস্মিং সুত্তে ঞেয্যং ঞেয্যপরিযাযেন নিদ্দিসিতব্বন্তি।

    ‘‘Ñeyyaṃ kittakena niddisitabba’’nti vattabbattā ‘‘ñeyyaṃ atītānāgatapaccuppannehī’’tiādi vuttaṃ. Yasmiṃ yasmiṃ sutte ñeyyaṃ āgataṃ, tasmiṃ tasmiṃ sutte ñeyyaṃ ñeyyapariyāyena niddisitabbanti.

    ‘‘ঞাণঞ্চ ঞেয্যঞ্চ কিত্তকেন নিদ্দিসিতব্ব’’ন্তি ৰত্তব্বত্তা ‘‘ঞাণঞ্চ ঞেয্যঞ্চ তদুভযেনা’’তিআদি ৰুত্তং। যস্মিং যস্মিং সুত্তে ঞাণঞেয্যা আগতা, তস্মিং তস্মিং সুত্তে ঞাণঞেয্যা ঞাণঞেয্যপরিযাযেন নিদ্দিসিতব্বন্তি।

    ‘‘Ñāṇañca ñeyyañca kittakena niddisitabba’’nti vattabbattā ‘‘ñāṇañca ñeyyañca tadubhayenā’’tiādi vuttaṃ. Yasmiṃ yasmiṃ sutte ñāṇañeyyā āgatā, tasmiṃ tasmiṃ sutte ñāṇañeyyā ñāṇañeyyapariyāyena niddisitabbanti.

    দস্সনসুত্তে যথা নিদ্দিট্ঠং, তথা উপধারযিত্ৰা লব্ভমানতো নিদ্দিসিতব্বং। ভাৰনাসুত্তে যথা নিদ্দিট্ঠং, তথা উপধারযিত্ৰা লব্ভমানতো নিদ্দিসিতব্বং। তদুভযং দস্সনঞ্চ ভাৰনা চ সুত্তে যথা নিদ্দিট্ঠং, তথা উপধারযিত্ৰা লব্ভমানতো নিদ্দিসিতব্বং।

    Dassanasutte yathā niddiṭṭhaṃ, tathā upadhārayitvā labbhamānato niddisitabbaṃ. Bhāvanāsutte yathā niddiṭṭhaṃ, tathā upadhārayitvā labbhamānato niddisitabbaṃ. Tadubhayaṃ dassanañca bhāvanā ca sutte yathā niddiṭṭhaṃ, tathā upadhārayitvā labbhamānato niddisitabbaṃ.

    ‘‘সকৰচনং পরৰচন’’ন্তিআদীসুপি এৰমেৰ ৰিসুং ৰিসুং চ একতো চ সুত্তে যথা নিদ্দিট্ঠং, তথা উপধারযিত্ৰা লব্ভমানতো নিদ্দিসিতব্বন্তি যোজনা কাতব্বা। ‘‘এত্তকমেৰ নিদ্দিসিতব্ব’’ন্তি ৰত্তব্বত্তা ‘‘যং ৰা পনা’’তিআদি ৰুত্তং।

    ‘‘Sakavacanaṃparavacana’’ntiādīsupi evameva visuṃ visuṃ ca ekato ca sutte yathā niddiṭṭhaṃ, tathā upadhārayitvā labbhamānato niddisitabbanti yojanā kātabbā. ‘‘Ettakameva niddisitabba’’nti vattabbattā ‘‘yaṃ vā panā’’tiādi vuttaṃ.

    ‘‘ৰিপাকস্স হেতু কম্মমেৰা’’তি ৰত্তব্বত্তা ‘‘দুৰিধো হেতূ’’তিআদি ৰুত্তং। কিলেসা সংকিলেসভাগিযসুত্তেন সমানত্থভাৰেন নিদ্দিসিতব্বা। তণ্হাসঙ্খাতো সমুদযো ৰা কিলেসসঙ্খাতো সমুদযো ৰা অকুসলসঙ্খাতো সমুদযো ৰা সংকিলেসভাগিযেন সুত্তেন সমানত্থভাৰেন নিদ্দিসিতব্বো। লোকিযকুসলহেতুসঙ্খাতো সমুদযো ৰা লোকিযকুসলসঙ্খাতো সমুদযো ৰা ৰাসনাভাগিযেন সুত্তেন সমানত্থভাৰেন নিদ্দিসিতব্বো।

    ‘‘Vipākassa hetu kammamevā’’ti vattabbattā ‘‘duvidho hetū’’tiādi vuttaṃ. Kilesā saṃkilesabhāgiyasuttena samānatthabhāvena niddisitabbā. Taṇhāsaṅkhāto samudayo vā kilesasaṅkhāto samudayo vā akusalasaṅkhāto samudayo vā saṃkilesabhāgiyena suttena samānatthabhāvena niddisitabbo. Lokiyakusalahetusaṅkhāto samudayo vā lokiyakusalasaṅkhāto samudayo vā vāsanābhāgiyena suttena samānatthabhāvena niddisitabbo.

    কম্মঞ্চ ৰিপাকো চ যথারহং লব্ভমানসুত্তেন নিদ্দিসিতব্বোতি সামঞ্ঞৰসেন ৰিভত্তো, ‘‘কুসলং কতমেন নিদ্দিসিতব্ব’’ন্তি ৰত্তব্বত্তা ‘‘তত্থ কুসল’’ন্তিআদি ৰুত্তং। তত্থাতি তেসু অট্ঠৰীসতিযা সাসনপট্ঠানসুত্তেসু কুসলং চতূহি সুত্তেহি সমানত্থভাৰেন নিদ্দিসিতব্বং। ‘‘কতমেহি চতূহী’’তি ৰত্তব্বত্তা ‘‘ৰাসনাভাগিযেনা’’তিআদি ৰুত্তং। লোকিযকুসলং ৰাসনাভাগিযেন নিদ্দিসিতব্বং সমানত্থত্তা, লোকুত্তরকুসলং দস্সনভাগিযেন, ৰাসনাভাগিযেন, অসেক্খভাগিযেন চ যথারহং সমানত্থভাৰেন নিদ্দিসিতব্বং। কুসলং এত্তকেহি নিদ্দিসিতব্বন্তি নিযমেত্ৰা ৰিভত্তং, ‘‘অকুসলং কতমেন নিদ্দিসিতব্ব’’ন্তি ৰত্তব্বত্তা ‘‘অকুসল’’ন্তিআদি ৰুত্তং। ‘‘কুসলঞ্চ অকুসলঞ্চ কতমেন নিদ্দিসিতব্ব’’ন্তি ৰত্তব্বত্তা ‘‘কুসলঞ্চ অকুসলঞ্চ তদুভযেন নিদ্দিসিতব্ব’’ন্তি ৰুত্তং। যস্মিং যস্মিং সুত্তে তদুভযং আগতং, তস্মিং তস্মিং সুত্তে আগতেন তদুভযেন নিদ্দিসিতব্বং।

    Kammañca vipāko ca yathārahaṃ labbhamānasuttena niddisitabboti sāmaññavasena vibhatto, ‘‘kusalaṃ katamena niddisitabba’’nti vattabbattā ‘‘tattha kusala’’ntiādi vuttaṃ. Tatthāti tesu aṭṭhavīsatiyā sāsanapaṭṭhānasuttesu kusalaṃ catūhi suttehi samānatthabhāvena niddisitabbaṃ. ‘‘Katamehi catūhī’’ti vattabbattā ‘‘vāsanābhāgiyenā’’tiādi vuttaṃ. Lokiyakusalaṃ vāsanābhāgiyena niddisitabbaṃ samānatthattā, lokuttarakusalaṃ dassanabhāgiyena, vāsanābhāgiyena, asekkhabhāgiyena ca yathārahaṃ samānatthabhāvena niddisitabbaṃ. Kusalaṃ ettakehi niddisitabbanti niyametvā vibhattaṃ, ‘‘akusalaṃ katamena niddisitabba’’nti vattabbattā ‘‘akusala’’ntiādi vuttaṃ. ‘‘Kusalañca akusalañca katamena niddisitabba’’nti vattabbattā ‘‘kusalañca akusalañca tadubhayena niddisitabba’’nti vuttaṃ. Yasmiṃ yasmiṃ sutte tadubhayaṃ āgataṃ, tasmiṃ tasmiṃ sutte āgatena tadubhayena niddisitabbaṃ.

    ‘‘অনুঞ্ঞাতং কতমেন নিদ্দিসিতব্ব’’ন্তি ৰত্তব্বত্তা ‘‘অনুঞ্ঞাত’’ন্তিআদি ৰুত্তং। অনুঞ্ঞাতং ভগৰতো অনুঞ্ঞাতায সমানতায নিদ্দিসিতব্বং। ‘‘কতিৰিধং অনুঞ্ঞাত’’ন্তি ৰত্তব্বত্তা ‘‘তং পঞ্চৰিধ’’ন্তিআদি ৰুত্তং। যং অনুঞ্ঞাতং যাসু যাসু ভূমীসু দিস্সতি, তং অনুঞ্ঞাতং তাসু তাসু ভূমীসু আগতেন সমানেন কপ্পিযানুলোমেন নিদ্দিসিতব্বং।

    ‘‘Anuññātaṃ katamena niddisitabba’’nti vattabbattā ‘‘anuññāta’’ntiādi vuttaṃ. Anuññātaṃ bhagavato anuññātāya samānatāya niddisitabbaṃ. ‘‘Katividhaṃ anuññāta’’nti vattabbattā ‘‘taṃ pañcavidha’’ntiādi vuttaṃ. Yaṃ anuññātaṃ yāsu yāsu bhūmīsu dissati, taṃ anuññātaṃ tāsu tāsu bhūmīsu āgatena samānena kappiyānulomena niddisitabbaṃ.

    অনুঞ্ঞাতং ইমিনা নিদ্দিসিতব্বন্তি আচরিযেন নিযমেত্ৰা ৰিভত্তং, ‘‘পটিক্খিত্তং কতমেন নিদ্দিসিতব্ব’’ন্তি ৰত্তব্বত্তা ‘‘পটিক্খিত্তং ভগৰতা’’তিআদি ৰুত্তং। ভগৰতা পটিক্খিত্তং ভগৰতা পটিক্খিত্তকারণেন সুত্তে আগতেন ৰত্থুনা কারণফলভাৰেন নিদ্দিসিতব্বং। যং পটিক্খিত্তং যাসু যাসু ভূমীসু দিস্সতি, তং পন পটিক্খিত্তং তাসু তাসু ভূমীসু আগতেন পাকটেন অকপ্পিযানুলোমেন নিদ্দিসিতব্বং।

    Anuññātaṃ iminā niddisitabbanti ācariyena niyametvā vibhattaṃ, ‘‘paṭikkhittaṃ katamena niddisitabba’’nti vattabbattā ‘‘paṭikkhittaṃ bhagavatā’’tiādi vuttaṃ. Bhagavatā paṭikkhittaṃ bhagavatā paṭikkhittakāraṇena sutte āgatena vatthunā kāraṇaphalabhāvena niddisitabbaṃ. Yaṃ paṭikkhittaṃ yāsu yāsu bhūmīsu dissati, taṃ pana paṭikkhittaṃ tāsu tāsu bhūmīsu āgatena pākaṭena akappiyānulomena niddisitabbaṃ.

    ‘‘অনুঞ্ঞাতঞ্চ পটিক্খিত্তঞ্চ কতমেন নিদ্দিসিতব্ব’’ন্তি ৰত্তব্বত্তা ‘‘অনুঞ্ঞাতঞ্চ পটিক্খিত্তঞ্চ তদুভযেন নিদ্দিসিতব্ব’’ন্তি ৰুত্তং। যস্মিং যস্মিং সুত্তে অনুঞ্ঞাতঞ্চ পটিক্খিত্তঞ্চ আগতং, তস্মিং তস্মিং সুত্তে আগতেন তদুভযেন নিদ্দিসিতব্বং।

    ‘‘Anuññātañca paṭikkhittañca katamena niddisitabba’’nti vattabbattā ‘‘anuññātañca paṭikkhittañca tadubhayena niddisitabba’’nti vuttaṃ. Yasmiṃ yasmiṃ sutte anuññātañca paṭikkhittañca āgataṃ, tasmiṃ tasmiṃ sutte āgatena tadubhayena niddisitabbaṃ.

    ‘‘থৰো কতমেন নিদ্দিসিতব্বো’’তি ৰত্তব্বত্তা ‘‘থৰো পসংসাযা’’তিআদি ৰুত্তং। যস্মিং যস্মিং সুত্তে যা যা পসংসা আগতা, তস্মিং তস্মিং সুত্তে আগতায তায তায পসংসায থৰো নিদ্দিসিতব্বো। ‘‘যো থৰো পসংসায নিদ্দিসিতব্বো, সো থৰো কতিৰিধেন নিদ্দিসিতব্বো’’তি ৰত্তব্বত্তা ‘‘সো পঞ্চৰিধেনা’’তিআদি ৰুত্তং। ভগৰতো থৰো চ ধম্মস্স থৰো চ অরিযসঙ্ঘস্স থৰো চ অরিযধম্মানং সিক্খায থৰো চ লোকিযগুণসম্পত্তিযা থৰো চাতি পঞ্চৰিধেন ৰেদিতব্বো। ইতি এৰং ৰুত্তপ্পকারেন পঞ্চৰিধেন থৰো নিদ্দিসিতব্বো।

    ‘‘Thavo katamena niddisitabbo’’ti vattabbattā ‘‘thavo pasaṃsāyā’’tiādi vuttaṃ. Yasmiṃ yasmiṃ sutte yā yā pasaṃsā āgatā, tasmiṃ tasmiṃ sutte āgatāya tāya tāya pasaṃsāya thavo niddisitabbo. ‘‘Yo thavo pasaṃsāya niddisitabbo, so thavo katividhena niddisitabbo’’ti vattabbattā ‘‘so pañcavidhenā’’tiādi vuttaṃ. Bhagavato thavo ca dhammassa thavo ca ariyasaṅghassa thavo ca ariyadhammānaṃ sikkhāya thavo ca lokiyaguṇasampattiyā thavo cāti pañcavidhena veditabbo. Iti evaṃ vuttappakārena pañcavidhena thavo niddisitabbo.

    অম্হাকাচরিয অম্হাকাচরিযেন অট্ঠারস মূলপদা সাসনপট্ঠানে দট্ঠব্বাতি ৰুত্তা, ‘‘কতমানি তানি অট্ঠারস মূলপদানী’’তি পুচ্ছিতব্বত্তা ‘‘ইন্দ্রিযভূমী’’তিআদি ৰুত্তং। সাসনপট্ঠানে ইন্দ্রিযভূমি সদ্ধিন্দ্রিযাদিইন্দ্রিযভূমি যেহি নৰহি পদেহি নিদ্দিসিতব্বা, সাসনপট্ঠানে কিলেসভূমি যেহি নৰহি পদেহি নিদ্দিসিতব্বা, এৰং ইমিনা পকারেন এতানি মূলপদানি নৰ পদানি কুসলপদানি, নৰ পদানি অকুসলপদানীতি অট্ঠারস মূলপদানি হোন্তি। সাসনপট্ঠানে দট্ঠব্বা, ‘‘কেন কারণেন অট্ঠারস মূলপদা সাসনপট্ঠানে দট্ঠব্বাতি ৰিঞ্ঞাযতী’’তি ৰত্তব্বত্তা ‘‘তথা হী’’তিআদি ৰুত্তং। তথা হীতি ততো এৰ অট্ঠারসমূলপদানং সাসনপট্ঠানে দট্ঠব্বত্তা ‘‘অট্ঠারস মূলপদা কুহিং দট্ঠব্বা? সাসনপট্ঠানে’’তি যং ৰচনং ৰুত্তং, তেন ৰচনেন ৰিঞ্ঞাযতীতি। ‘‘কেন মূলপদানং নৰকুসলপদনৰঅকুসলপদভাৰেন অট্ঠারসভাৰো ৰিঞ্ঞাযতী’’তি ৰত্তব্বত্তা ‘‘তেনাহা’’তিআদি ৰুত্তং। তেন মূলপদানং নৰকুসলপদনৰঅকুসলপদভাৰতো আযস্মা মহাকচ্চানো –

    Amhākācariya amhākācariyena aṭṭhārasa mūlapadā sāsanapaṭṭhāne daṭṭhabbāti vuttā, ‘‘katamāni tāni aṭṭhārasa mūlapadānī’’ti pucchitabbattā ‘‘indriyabhūmī’’tiādi vuttaṃ. Sāsanapaṭṭhāne indriyabhūmi saddhindriyādiindriyabhūmi yehi navahi padehi niddisitabbā, sāsanapaṭṭhāne kilesabhūmi yehi navahi padehi niddisitabbā, evaṃ iminā pakārena etāni mūlapadāni nava padāni kusalapadāni, nava padāni akusalapadānīti aṭṭhārasa mūlapadāni honti. Sāsanapaṭṭhāne daṭṭhabbā, ‘‘kena kāraṇena aṭṭhārasa mūlapadā sāsanapaṭṭhāne daṭṭhabbāti viññāyatī’’ti vattabbattā ‘‘tathā hī’’tiādi vuttaṃ. Tathā hīti tato eva aṭṭhārasamūlapadānaṃ sāsanapaṭṭhāne daṭṭhabbattā ‘‘aṭṭhārasa mūlapadā kuhiṃ daṭṭhabbā? Sāsanapaṭṭhāne’’ti yaṃ vacanaṃ vuttaṃ, tena vacanena viññāyatīti. ‘‘Kena mūlapadānaṃ navakusalapadanavaakusalapadabhāvena aṭṭhārasabhāvo viññāyatī’’ti vattabbattā ‘‘tenāhā’’tiādi vuttaṃ. Tena mūlapadānaṃ navakusalapadanavaakusalapadabhāvato āyasmā mahākaccāno –

    ‘‘নৰহি চ পদেহি কুসলা, নৰহি চ যুজ্জন্তি অকুসলপক্খা।

    ‘‘Navahi ca padehi kusalā, navahi ca yujjanti akusalapakkhā;

    এতে খো মূলপদা, ভৰন্তি অট্ঠারস পদানী’’তি॥ –

    Ete kho mūlapadā, bhavanti aṭṭhārasa padānī’’ti. –

    যং ৰচনং আহ, তেন ‘‘নৰহি…পে॰… পদানী’’তি ৰচনেন মূলপদানং নৰকুসলপদনৰঅকুসলপদভাৰেন অট্ঠারসভাৰো ৰিঞ্ঞাযতীতি।

    Yaṃ vacanaṃ āha, tena ‘‘navahi…pe… padānī’’ti vacanena mūlapadānaṃ navakusalapadanavaakusalapadabhāvena aṭṭhārasabhāvo viññāyatīti.

    ‘‘যং যং সংকিলেসভাগিযাদিসোল়সৰিধং সাসনপট্ঠানঞ্চেৰ যং যং লোকিযাদিঅট্ঠৰীসতিৰিধং সাসনপট্ঠানঞ্চ আচরিযেন নিদ্ধারিতং, এত্তকমেৰ পরিপুণ্ণং, অঞ্ঞং সাসনপট্ঠানং নিদ্ধারেত্ৰা যুত্তং যুজ্জিতব্বং নত্থী’’তি ৰত্তব্বত্তা ‘‘নিযুত্তং সাসনপট্ঠান’’ন্তি ৰুত্তং। যথানিদ্ধারিতসাসনপট্ঠানতো যং যং অঞ্ঞং সাসনপট্ঠানং নিদ্ধারিতং অত্থি, তং তং অঞ্ঞং সাসনপট্ঠানং নিযুত্তং যথারহং নিদ্ধারেত্ৰা যুত্তং যুজ্জিতব্বন্তি অত্থো গহেতব্বোতি।

    ‘‘Yaṃ yaṃ saṃkilesabhāgiyādisoḷasavidhaṃ sāsanapaṭṭhānañceva yaṃ yaṃ lokiyādiaṭṭhavīsatividhaṃ sāsanapaṭṭhānañca ācariyena niddhāritaṃ, ettakameva paripuṇṇaṃ, aññaṃ sāsanapaṭṭhānaṃ niddhāretvā yuttaṃ yujjitabbaṃ natthī’’ti vattabbattā ‘‘niyuttaṃ sāsanapaṭṭhāna’’nti vuttaṃ. Yathāniddhāritasāsanapaṭṭhānato yaṃ yaṃ aññaṃ sāsanapaṭṭhānaṃ niddhāritaṃ atthi, taṃ taṃ aññaṃ sāsanapaṭṭhānaṃ niyuttaṃ yathārahaṃ niddhāretvā yuttaṃ yujjitabbanti attho gahetabboti.

    ‘‘যং লোকো পূজযতে…পে॰… নিযুত্তং সাসনপট্ঠানন্তি যত্তকো ৰচনক্কমো ভাসিতো, এত্তকেন ৰচনক্কমেন কিং নেত্তি সমত্তা, উদাহু অসমত্তা’’তি ৰত্তব্বত্তা ‘‘এত্তাৰতা’’তিআদি ৰুত্তং। আযস্মতা মহাকচ্চানেন যা নেত্তি ভাসিতা, ভগৰতা সা নেত্তি অনুমোদিতা, মূলসঙ্গীতিযং সঙ্গাযন্তেহি থেরাসভেহি যা নেত্তি সঙ্গীতা, সা নেত্তি ‘‘যং লোকো পূজযতে…পে॰… নিযুত্তং সাসনপট্ঠান’’ন্তি এত্তাৰতা ৰচনক্কমেন সমত্তা পরিপুণ্ণাৰ হোতি।

    ‘‘Yaṃ loko pūjayate…pe… niyuttaṃ sāsanapaṭṭhānanti yattako vacanakkamo bhāsito, ettakena vacanakkamena kiṃ netti samattā, udāhu asamattā’’ti vattabbattā ‘‘ettāvatā’’tiādi vuttaṃ. Āyasmatā mahākaccānena yā netti bhāsitā, bhagavatā sā netti anumoditā, mūlasaṅgītiyaṃ saṅgāyantehi therāsabhehi yā netti saṅgītā, sā netti ‘‘yaṃ loko pūjayate…pe… niyuttaṃ sāsanapaṭṭhāna’’nti ettāvatā vacanakkamena samattā paripuṇṇāva hoti.

    ইতি সমত্তায আযস্মতা মহাকচ্চানেন ভাসিতায ভগৰতা অনুমোদিতায মূলসঙ্গীতিযং সঙ্গাযন্তেহি থেরাসভেহি সঙ্গীতায নেত্তিযা অত্থৰণ্ণনা সদ্ধম্মপালনামেন মহাধম্মরাজগুরুনা মহাথেরেন রচিতা জিনপুত্তানং হিতকরা নেত্তিৰিভাৰনা ছব্বীসাধিকনৰসতে সক্করাজে সাৰণমাসে সুক্কপক্খে নৰমদিৰসে সূরিযুগ্গমনসমযে সমত্তা।

    Iti samattāya āyasmatā mahākaccānena bhāsitāya bhagavatā anumoditāya mūlasaṅgītiyaṃ saṅgāyantehi therāsabhehi saṅgītāya nettiyā atthavaṇṇanā saddhammapālanāmena mahādhammarājagurunā mahātherena racitā jinaputtānaṃ hitakarā nettivibhāvanā chabbīsādhikanavasate sakkarāje sāvaṇamāse sukkapakkhe navamadivase sūriyuggamanasamaye samattā.

    ইতি সাসনপট্ঠানে সত্তিবলানুরূপা রচিতা ৰিভাৰনা

    Iti sāsanapaṭṭhāne sattibalānurūpā racitā vibhāvanā

    নিট্ঠিতা।

    Niṭṭhitā.




    Next: নিগমনকথা • Nigamanakathā




    Related texts:



    তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / সাসনপট্ঠানং • Sāsanapaṭṭhānaṃ

    অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / সাসনপট্ঠানৰারৰণ্ণনা • Sāsanapaṭṭhānavāravaṇṇanā

    টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / সাসনপট্ঠানৰারৰণ্ণনা • Sāsanapaṭṭhānavāravaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact