Library / Tipiṭaka / ཏིཔིཊཀ • Tipiṭaka / ནེཏྟིཝིབྷཱཝིནཱི • Nettivibhāvinī

    སཱསནཔཊྛཱནཝིབྷཱཝནཱ

    Sāsanapaṭṭhānavibhāvanā

    ༨༩. ‘‘ཏཏྠ ཀཏམཾ ནཡསམུཊྛཱན’’ནྟིཨཱདིནཱ ཨཱཙརིཡེན སབྦཐཱ ནཡསམུཊྛཱནཾ ཋཔིཏཾ, ཨམྷེཧི ཙ ཉཱཏཾ, ‘‘སོལ༹སཧཱརཔཉྩནཡཨཊྛཱརསམཱུལཔདེསུ ཨཊྛཱརས མཱུལཔདཱ ཀཐཾ ཝིབྷཏྟཱ, ཀུཧིཾ ཨམྷེཧི དཊྛབྦཱ’’ཏི ཝཏྟབྦབྷཱཝཏོ ‘‘ཏཏྠ ཨཊྛཱརས མཱུལཔདཱ ཀུཧིཾ དཊྛབྦཱ’’ཏིཨཱདི ཝུཏྟཾ། ཏཏྠཱཏི ཏེསུ སོལ༹སཧཱརཔཉྩནཡཨཊྛཱརསམཱུལཔདེསུ ཨཊྛཱརས མཱུལཔདཱ ཀེན པདེན ཨཱཙརིཡེན ཝིབྷཏྟཱ, ཀུཧིཾ ཨམྷེཧི ཝིཏྠཱརཏོ དཊྛབྦཱཏི པུཙྪཏི། ཨཊྛཱརས མཱུལཔདཱ སཱསནཔཊྛཱནེ མཡཱ ཝིབྷཏྟཱ, ཏུམྷེཧི ཙ ཝིཏྠཱརཏོ སཱསནཔཊྛཱནེ དཊྛབྦཱཏི ཝིསྶཛྫེཏི། ཝིབྷཏྟཱཡེཝ ཧི ཨཊྛཱརས མཱུལཔདཱ དཊྛབྦཱ བྷཝནྟི། ཨཊྛཀཐཱཡཾ (ནེཏྟི॰ ཨཊྛ॰ ༨༩) པན –

    89. ‘‘Tattha katamaṃ nayasamuṭṭhāna’’ntiādinā ācariyena sabbathā nayasamuṭṭhānaṃ ṭhapitaṃ, amhehi ca ñātaṃ, ‘‘soḷasahārapañcanayaaṭṭhārasamūlapadesu aṭṭhārasa mūlapadā kathaṃ vibhattā, kuhiṃ amhehi daṭṭhabbā’’ti vattabbabhāvato ‘‘tattha aṭṭhārasa mūlapadā kuhiṃ daṭṭhabbā’’tiādi vuttaṃ. Tatthāti tesu soḷasahārapañcanayaaṭṭhārasamūlapadesu aṭṭhārasa mūlapadā kena padena ācariyena vibhattā, kuhiṃ amhehi vitthārato daṭṭhabbāti pucchati. Aṭṭhārasa mūlapadā sāsanapaṭṭhāne mayā vibhattā, tumhehi ca vitthārato sāsanapaṭṭhāne daṭṭhabbāti vissajjeti. Vibhattāyeva hi aṭṭhārasa mūlapadā daṭṭhabbā bhavanti. Aṭṭhakathāyaṃ (netti. aṭṭha. 89) pana –

    ‘‘ཨེཝཾ སབྦཐཱ ནཡསམུཊྛཱནཾ ཝིབྷཛིཏྭཱ ཨིདཱནི སཱསནཔཊྛཱནཾ ཝིབྷཛནྟོ ཡསྨཱ སངྒཧཝཱརཱདཱིསུ མཱུལཔདེཧེཝ པཊྛཱནཾ སངྒཧེཏྭཱ སརཱུཔཏོ ན དསྶིཏཾ, ཏསྨཱ ཡཐཱ མཱུལཔདེཧི པཊྛཱནཾ ནིདྡྷཱརེཏབྦཾ, ཨེཝཾ པཊྛཱནཏོཔི མཱུལཔདཱནི ནིདྡྷཱརེཏབྦཱནཱིཏི དསྶནཏྠཾ ‘ཨཊྛཱརས མཱུལཔདཱ ཀུཧིཾ དཊྛབྦཱ? སཱསནཔཊྛཱནེ’ཏི ཨཱཧཱ’’ཏི –

    ‘‘Evaṃ sabbathā nayasamuṭṭhānaṃ vibhajitvā idāni sāsanapaṭṭhānaṃ vibhajanto yasmā saṅgahavārādīsu mūlapadeheva paṭṭhānaṃ saṅgahetvā sarūpato na dassitaṃ, tasmā yathā mūlapadehi paṭṭhānaṃ niddhāretabbaṃ, evaṃ paṭṭhānatopi mūlapadāni niddhāretabbānīti dassanatthaṃ ‘aṭṭhārasa mūlapadā kuhiṃ daṭṭhabbā? Sāsanapaṭṭhāne’ti āhā’’ti –

    ཝུཏྟཾ། སཱསནཔཊྛཱནེ ཨཊྛཱརས མཱུལཔདཱ དཊྛབྦཱཏི ཨཱཙརིཡེན ཝུཏྟཱ, ‘‘ཀཏམཾ ཏཾ སཱསནཔཊྛཱན’’ནྟི པུཙྪིཏབྦཏྟཱ ‘‘ཏཏྠ ཀཏམཾ སཱསནཔཊྛཱན’’ནྟིཨཱདི ཝུཏྟཾ། ཏཏྠཱཏི ཏེསུ ཨཊྛཱརསམཱུལཔདསཱསནཔཊྛཱནེསུ ཀཏམཾ ཏཾ སཱསནཔཊྛཱནནྟི ཨིདཱནི མཡཱ ནིདྡྷཱརིཡམཱནཾ བྷགཝཏཱ དེསིཏཾ སཾཀིལེསབྷཱགིཡཱདིསུཏྟཾ སཱསནཔཊྛཱནཾ ནཱམཱཏི ཝིསྶཛྫེཏི། སཱསནནྟི པརིཡཏྟིསཱསནཾ། པཊྛཱནནྟི ཏསྶ པརིཡཏྟིསཱསནསྶ སཾཀིལེསབྷཱགིཡཏཱདཱིཧི པཀཱརེཧི ཋཱནཾ པཝཏྟནཾ པཊྛཱནཾ, ཏཾདཱིཔནསུཏྟཾ པན ཨིདྷ པཊྛཱནཾ ནཱམ། ཏེན ཝུཏྟཾ – ‘‘སཾཀིལེསབྷཱགིཡཾ སུཏྟ’’ནྟིཨཱདི། ཨཐ ཝཱ སཱསནནྟི ཨདྷིསཱིལཨདྷིཙིཏྟཨདྷིཔཉྙཱསིཀྑཏྟཡཾ སཱསནཾ ནཱམ, ཏཾ སིཀྑཏྟཡཾ པཏིཊྛཧཏི ཨེཏེན སཾཀིལེསཱདིནཱཏི པཊྛཱནཾ, སིཀྑཏྟཡསྶ སཱསནསྶ པཊྛཱནནྟི སཱསནཔཊྛཱནཾ། ཏདཱདྷཱརབྷཱུཏཾ སུཏྟམྤི ཋཱནྱཱུཔཙཱརཏོ སཱསནཔཊྛཱནཾ ནཱམ། ཏཾ སཱསནཔཊྛཱནསུཏྟཾ སརཱུཔཏོ དསྶེཏུཾ –

    Vuttaṃ. Sāsanapaṭṭhāne aṭṭhārasa mūlapadā daṭṭhabbāti ācariyena vuttā, ‘‘katamaṃ taṃ sāsanapaṭṭhāna’’nti pucchitabbattā ‘‘tattha katamaṃ sāsanapaṭṭhāna’’ntiādi vuttaṃ. Tatthāti tesu aṭṭhārasamūlapadasāsanapaṭṭhānesu katamaṃ taṃ sāsanapaṭṭhānanti idāni mayā niddhāriyamānaṃ bhagavatā desitaṃ saṃkilesabhāgiyādisuttaṃ sāsanapaṭṭhānaṃ nāmāti vissajjeti. Sāsananti pariyattisāsanaṃ. Paṭṭhānanti tassa pariyattisāsanassa saṃkilesabhāgiyatādīhi pakārehi ṭhānaṃ pavattanaṃ paṭṭhānaṃ, taṃdīpanasuttaṃ pana idha paṭṭhānaṃ nāma. Tena vuttaṃ – ‘‘saṃkilesabhāgiyaṃ sutta’’ntiādi. Atha vā sāsananti adhisīlaadhicittaadhipaññāsikkhattayaṃ sāsanaṃ nāma, taṃ sikkhattayaṃ patiṭṭhahati etena saṃkilesādināti paṭṭhānaṃ, sikkhattayassa sāsanassa paṭṭhānanti sāsanapaṭṭhānaṃ. Tadādhārabhūtaṃ suttampi ṭhānyūpacārato sāsanapaṭṭhānaṃ nāma. Taṃ sāsanapaṭṭhānasuttaṃ sarūpato dassetuṃ –

    ‘‘སཾཀིལེསབྷཱགིཡཾ སུཏྟཾ, ཝཱསནཱབྷཱགིཡཾ སུཏྟཾ, ནིབྦེདྷབྷཱགིཡཾ སུཏྟཾ, ཨསེཀྑབྷཱགིཡཾ སུཏྟཾ, སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ, སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ, སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟཾ, སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ, སཾཀིལེསབྷཱགིཡཉྩ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ, ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ, ཏཎྷཱསཾཀིལེསབྷཱགིཡཾ སུཏྟཾ, དིཊྛིསཾཀིལེསབྷཱགིཡཾ སུཏྟཾ, དུཙྩརིཏསཾཀིལེསབྷཱགིཡཾ སུཏྟཾ, ཏཎྷཱཝོདཱནབྷཱགིཡཾ སུཏྟཾ, དིཊྛིཝོདཱནབྷཱགིཡཾ སུཏྟཾ, དུཙྩརིཏཝོདཱནབྷཱགིཡཾ སུཏྟ’’ནྟི –

    ‘‘Saṃkilesabhāgiyaṃ suttaṃ, vāsanābhāgiyaṃ suttaṃ, nibbedhabhāgiyaṃ suttaṃ, asekkhabhāgiyaṃ suttaṃ, saṃkilesabhāgiyañca vāsanābhāgiyañca suttaṃ, saṃkilesabhāgiyañca nibbedhabhāgiyañca suttaṃ, saṃkilesabhāgiyañca asekkhabhāgiyañca suttaṃ, saṃkilesabhāgiyañca nibbedhabhāgiyañca asekkhabhāgiyañca suttaṃ, saṃkilesabhāgiyañca vāsanābhāgiyañca nibbedhabhāgiyañca suttaṃ, vāsanābhāgiyañca nibbedhabhāgiyañca suttaṃ, taṇhāsaṃkilesabhāgiyaṃ suttaṃ, diṭṭhisaṃkilesabhāgiyaṃ suttaṃ, duccaritasaṃkilesabhāgiyaṃ suttaṃ, taṇhāvodānabhāgiyaṃ suttaṃ, diṭṭhivodānabhāgiyaṃ suttaṃ, duccaritavodānabhāgiyaṃ sutta’’nti –

    ཝུཏྟཾ། ‘‘ཏེསུ སུཏྟེསུ ཡེ སཾཀིལེསཱདཡོ བྷགཝཏཱ ཝུཏྟཱ, ཏེསུ སཾཀིལེསཱདཱིསུ སཾཀིལེསོ ཀིཏྟཀོ’’ཏི པུཙྪིཏབྦཏྟཱ ‘‘ཏཏྠ སཾཀིལེསོ ཏིཝིདྷོ ཏཎྷཱསཾཀིལེསོ དིཊྛིསཾཀིལེསོ དུཙྩརིཏསཾཀིལེསོ’’ཏི ཝུཏྟཾ། ཏཏྠཱཏི ཏེསུ སུཏྟནྟེསུ སཾཀིལེསཱདཱིསུ དྷམྨེསུ། ‘‘ཏིཝིདྷེ ཏསྨིཾ སཾཀིལེསེ ཏཎྷཱསཾཀིལེསོ ཀཏམེན ཀུསལེན ཝིསུཛ྄ཛྷཏཱི’’ཏི པུཙྪིཏབྦཏྟཱ ‘‘ཏཏྠ ཏཎྷཱསཾཀིལེསོ སམཐེན ཝིསུཛ྄ཛྷཏཱི’’ཏི ཝུཏྟཾ། ཏཏྠཱཏི ཏསྨིཾ ཏིཝིདྷེ ཏཎྷཱསཾཀིལེསཱདིཀེ། ‘‘སོ སམཐོ ཁནྡྷེསུ ཀཏམོ ཁནྡྷོ’’ཏི པུཙྪིཏབྦཏྟཱ ‘‘སོ སམཐོ སམཱདྷིཀྑནྡྷོ’’ཏི ཝུཏྟཾ། ‘‘དིཊྛིསཾཀིལེསོ ཀེན ཝིསུཛ྄ཛྷཏཱི’’ཏི པུཙྪིཏབྦཏྟཱ ‘‘དིཊྛིསཾཀིལེསོ ཝིཔསྶནཱཡ ཝིསུཛ྄ཛྷཏཱི’’ཏི ཝུཏྟཾ། ‘‘སཱ ཝིཔསྶནཱ ཀཏམོ ཁནྡྷོ’’ཏི ཝཏྟབྦཏྟཱ ‘‘སཱ ཝིཔསྶནཱ པཉྙཱཀྑནྡྷོ’’ཏི ཝུཏྟཾ། ‘‘དུཙྩརིཏསཾཀིལེསོ ཀེན ཝིསུཛ྄ཛྷཏཱི’’ཏི ཝཏྟབྦཏྟཱ ‘‘དུཙྩརིཏསཾཀིལེསོ སུཙརིཏེན ཝིསུཛ྄ཛྷཏཱི’’ཏི ཝུཏྟཾ། ‘‘ཏཾ སུཙརིཏཾ ཀཏམོ ཁནྡྷོ’’ཏི ཝཏྟབྦཏྟཱ ‘‘ཏཾ སུཙརིཏཾ སཱིལཀྑནྡྷོ’’ཏི ཝུཏྟཾ། ‘‘ཏསྨིཾ སཱིལེ ཋིཏསྶ པུགྒལསྶ ཀིཾ བྷཝཏཱི’’ཏི ཝཏྟབྦཏྟཱ ‘‘ཏསྶ སཱིལེ པཏིཊྛིཏསྶཱ’’ཏིཨཱདི ཝུཏྟཾ། སཱིལེ སུཙརིཏསངྑཱཏེ སཱིལཀྑནྡྷེ པཏིཊྛིཏསྶ ཏསྶ སཱིལཝནྟསྶ པུགྒལསྶ བྷཝེསུ ཀཱམབྷཝརཱུཔཱརཱུཔབྷཝེསུ ཨཱསཏྟི བྷཝཔཏྠནཱ ཡདི ཨུཔྤཛྫཏི, ཨེཝཾསཱཡནྟི ཨེཝཾ ཨསྶ ཨཡནྟི པདཙྪེདོ། ཨེཝཾ སཏི ཨསྶ སཱིལེ པཏིཊྛིཏསྶ ཨཡཾ ཨཱསཏྟི བྷཝཔཏྠནཱ སམཐཝིཔསྶནཱབྷཱཝནཱམཡཔུཉྙཀིརིཡཝཏྠུ ཙ བྷཝཏི, ཙ-སདྡེན དཱནམཡསཱིལམཡཔུཉྙཀིརིཡཝཏྠུ ཙ བྷཝཏཱིཏི ཨཏྠོ སངྒཧིཏོ། ཏཏྲཱཏི ཏེསུ ཀཱམབྷཝརཱུཔཱརཱུཔབྷཝེསུ ཨུཔཔཏྟིཡཱ སཾཝཏྟཏཱིཏི།

    Vuttaṃ. ‘‘Tesu suttesu ye saṃkilesādayo bhagavatā vuttā, tesu saṃkilesādīsu saṃkileso kittako’’ti pucchitabbattā ‘‘tattha saṃkileso tividho taṇhāsaṃkileso diṭṭhisaṃkileso duccaritasaṃkileso’’ti vuttaṃ. Tatthāti tesu suttantesu saṃkilesādīsu dhammesu. ‘‘Tividhe tasmiṃ saṃkilese taṇhāsaṃkileso katamena kusalena visujjhatī’’ti pucchitabbattā ‘‘tattha taṇhāsaṃkileso samathena visujjhatī’’ti vuttaṃ. Tatthāti tasmiṃ tividhe taṇhāsaṃkilesādike. ‘‘So samatho khandhesu katamo khandho’’ti pucchitabbattā ‘‘so samatho samādhikkhandho’’ti vuttaṃ. ‘‘Diṭṭhisaṃkileso kena visujjhatī’’ti pucchitabbattā ‘‘diṭṭhisaṃkileso vipassanāya visujjhatī’’ti vuttaṃ. ‘‘Sā vipassanā katamo khandho’’ti vattabbattā ‘‘sā vipassanā paññākkhandho’’ti vuttaṃ. ‘‘Duccaritasaṃkileso kena visujjhatī’’ti vattabbattā ‘‘duccaritasaṃkileso sucaritena visujjhatī’’ti vuttaṃ. ‘‘Taṃ sucaritaṃ katamo khandho’’ti vattabbattā ‘‘taṃ sucaritaṃ sīlakkhandho’’ti vuttaṃ. ‘‘Tasmiṃ sīle ṭhitassa puggalassa kiṃ bhavatī’’ti vattabbattā ‘‘tassa sīle patiṭṭhitassā’’tiādi vuttaṃ. Sīle sucaritasaṅkhāte sīlakkhandhe patiṭṭhitassa tassa sīlavantassa puggalassa bhavesu kāmabhavarūpārūpabhavesu āsatti bhavapatthanā yadi uppajjati, evaṃsāyanti evaṃ assa ayanti padacchedo. Evaṃ sati assa sīle patiṭṭhitassa ayaṃ āsatti bhavapatthanā samathavipassanābhāvanāmayapuññakiriyavatthu ca bhavati, ca-saddena dānamayasīlamayapuññakiriyavatthu ca bhavatīti attho saṅgahito. Tatrāti tesu kāmabhavarūpārūpabhavesu upapattiyā saṃvattatīti.

    ‘‘སཾཀིལེསཱདཡོ ཡེཧི སུཏྟེཧི དསྶིཏཱ, ཏཱནི སུཏྟཱནི ཀིཏྟཀཱནཱི’’ཏི ཝཏྟབྦཏྟཱ ‘‘ཨིམཱནི ཙཏྟཱརི སུཏྟཱནཱི’’ཏིཨཱདི ཝུཏྟཾ། ཨསཱདྷཱརཎཱནི སཾཀིལེསབྷཱགིཡསུཏྟཝཱསནཱབྷཱགིཡསུཏྟནིབྦེདྷབྷཱགིཡསུཏྟཨསེཀྑབྷཱགིཡསུཏྟཱནི ཙཏྟཱརི སུཏྟཱནི བྷཝནྟི, སཱདྷཱརཎཱནི སཾཀིལེསབྷཱགིཡཝཱསནཱབྷཱགིཡསུཏྟ, སཾཀིལེསབྷཱགིཡནིབྦེདྷབྷཱགིཡསུཏྟ, སཾཀིལེསབྷཱགིཡཨསེཀྑབྷཱགིཡསུཏྟ, ཝཱསནཱབྷཱགིཡནིབྦེདྷབྷཱགིཡསུཏྟཱནི ཀཏཱནི མིསྶིཏཱནི ཙཏྟཱརི བྷཝནྟི། ཨིཏི ཨཊྛ སུཏྟཱནི བྷཝནྟི། ཏཱནིཡེཝ ཝུཏྟཔྤཀཱརཱནི ཨཊྛ སུཏྟཱནི བྷཝནྟི། སཱདྷཱརཎཱནི ཝཱསནཱབྷཱགིཡཨསེཀྑབྷཱགིཡསུཏྟནིབྦེདྷབྷཱགིཡཨསེཀྑབྷཱགིཡསུཏྟ- སཾཀིལེསབྷཱགིཡཝཱསནཱབྷཱགིཡནིབྦེདྷབྷཱགིཡསུཏྟསཾཀིལེས- བྷཱགིཡཝཱསནཱབྷཱགིཡཨསེཀྑབྷཱགིཡསུཏྟ- སཾཀིལེསབྷཱགིཡནིབྦེདྷབྷཱགིཡཨསེཀྑབྷཱགིཡསུཏྟ- ཝཱསནཱབྷཱགིཡནིབྦེདྷབྷཱགིཡཨསེཀྑབྷཱགིཡསུཏྟ- སཾཀིལེསབྷཱགིཡཝཱསནཱབྷཱགིཡནིབྦེདྷབྷཱགིཡཨསེཀྑབྷཱགིཡསུཏྟ- ནེཝསཾཀིལེསབྷཱགིཡནཝཱསནཱ- བྷཱགིཡནནིབྦེདྷབྷཱགིཡནཨསེཀྑབྷཱགིཡསུཏྟཱནི ཀཏཱནི མིསྶིཏཱནི ཨཊྛ སུཏྟཱནི བྷཝནྟཱིཏི སོལ༹ས སུཏྟཱནི བྷཝནྟི། ཏེསུ སོལ༹སསུཏྟེསུ ཙཏྟཱརི ཨེཀཀཱནི སུཏྟཱནི ཙ ཙཏྟཱརི དུཀཱནི སུཏྟཱནི ཙ དྭེ ཏིཀཱནི ཙ པཱལི༹ཡཾ ཨཱགཏཱནི, དྭེ དུཀཱནི སུཏྟཱནི ཙ དྭེ ཏིཀཱནི ཙ དྭེ ཙཏུཀྐཱནི སུཏྟཱནི ཙ ཨཊྛཀཐཱཡཾ (ནེཏྟི॰ ཨཊྛ॰ ༨༩) ཨཱགཏཱནི།

    ‘‘Saṃkilesādayo yehi suttehi dassitā, tāni suttāni kittakānī’’ti vattabbattā ‘‘imāni cattāri suttānī’’tiādi vuttaṃ. Asādhāraṇāni saṃkilesabhāgiyasuttavāsanābhāgiyasuttanibbedhabhāgiyasuttaasekkhabhāgiyasuttāni cattāri suttāni bhavanti, sādhāraṇāni saṃkilesabhāgiyavāsanābhāgiyasutta, saṃkilesabhāgiyanibbedhabhāgiyasutta, saṃkilesabhāgiyaasekkhabhāgiyasutta, vāsanābhāgiyanibbedhabhāgiyasuttāni katāni missitāni cattāri bhavanti. Iti aṭṭha suttāni bhavanti. Tāniyeva vuttappakārāni aṭṭha suttāni bhavanti. Sādhāraṇāni vāsanābhāgiyaasekkhabhāgiyasuttanibbedhabhāgiyaasekkhabhāgiyasutta- saṃkilesabhāgiyavāsanābhāgiyanibbedhabhāgiyasuttasaṃkilesa- bhāgiyavāsanābhāgiyaasekkhabhāgiyasutta- saṃkilesabhāgiyanibbedhabhāgiyaasekkhabhāgiyasutta- vāsanābhāgiyanibbedhabhāgiyaasekkhabhāgiyasutta- saṃkilesabhāgiyavāsanābhāgiyanibbedhabhāgiyaasekkhabhāgiyasutta- nevasaṃkilesabhāgiyanavāsanā- bhāgiyananibbedhabhāgiyanaasekkhabhāgiyasuttāni katāni missitāni aṭṭha suttāni bhavantīti soḷasa suttāni bhavanti. Tesu soḷasasuttesu cattāri ekakāni suttāni ca cattāri dukāni suttāni ca dve tikāni ca pāḷiyaṃ āgatāni, dve dukāni suttāni ca dve tikāni ca dve catukkāni suttāni ca aṭṭhakathāyaṃ (netti. aṭṭha. 89) āgatāni.

    ‘‘ཡདི པཊྛཱནནཡེན ཝུཏྟཔྤཀཱརཱནི སོལ༹ས སུཏྟཱནིཡེཝ ཝིབྷཏྟཱནི, ཨེཝཾ སཏི སུཏྟགེཡྻཱདིནཝཝིདྷཾ སཀལཾ པརིཡཏྟིསཱསནཾ པཊྛཱནནཡེན ཨཝིབྷཏྟཾ བྷཝེཡྻཱ’’ཏི ཝཏྟབྦཏྟཱ ‘‘ཨིམེཧི སོལ༹སཧི སུཏྟེཧཱི’’ཏིཨཱདི ཝུཏྟཾ། པཊྛཱནནཡེན ཝིབྷཏྟེཧི སོལ༹སཧི ཨིམེཧི སུཏྟེཧི ནཝཝིདྷཾ སཀལཾ པརིཡཏྟིསུཏྟཾ པཊྛཱནནཡེན ཝིབྷཏྟཾཡེཝ ཧུཏྭཱ བྷིནྣཾ བྷཝཏི། སཾཀིལེསབྷཱགིཡཱདིཔབྷེདཱཡ གཱཐཱཡ གཱཐཱ ཨནུམིནིཏབྦཱ, སཾཀིལེསབྷཱགིཡཱདིཔབྷེདེན ཝེཡྻཱཀརཎེན ཝེཡྻཱཀརཎཾ ཨནུམིནིཏབྦཾ། སཾཀིལེསབྷཱགིཡཱདིཔབྷེདེན སུཏྟེན སུཏྟཾ ཨནུམིནིཏབྦཾ བྷཝཏིཡེཝཱཏི།

    ‘‘Yadi paṭṭhānanayena vuttappakārāni soḷasa suttāniyeva vibhattāni, evaṃ sati suttageyyādinavavidhaṃ sakalaṃ pariyattisāsanaṃ paṭṭhānanayena avibhattaṃ bhaveyyā’’ti vattabbattā ‘‘imehi soḷasahi suttehī’’tiādi vuttaṃ. Paṭṭhānanayena vibhattehi soḷasahi imehi suttehi navavidhaṃ sakalaṃ pariyattisuttaṃ paṭṭhānanayena vibhattaṃyeva hutvā bhinnaṃ bhavati. Saṃkilesabhāgiyādipabhedāya gāthāya gāthā anuminitabbā, saṃkilesabhāgiyādipabhedena veyyākaraṇena veyyākaraṇaṃ anuminitabbaṃ. Saṃkilesabhāgiyādipabhedena suttena suttaṃ anuminitabbaṃ bhavatiyevāti.

    ༩༠. ‘‘ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སཾཀིལེསབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ སཾཀིལེསབྷཱགིཡཾ སུཏྟ’’ནྟིཨཱདི ཝུཏྟཾ། ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ སཾཀིལེསབྷཱགིཡཾ སུཏྟཾ ནཱམཱཏི པུཙྪཏི།

    90. ‘‘Tesu soḷasasu saṃkilesabhāgiyādīsu suttesu katamaṃ saṃkilesabhāgiyaṃ sutta’’nti pucchitabbattā ‘‘tattha katamaṃ saṃkilesabhāgiyaṃ sutta’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu katamaṃ suttaṃ saṃkilesabhāgiyaṃ suttaṃ nāmāti pucchati.

    ‘‘ཀཱམནྡྷཱ ཛཱལསཉྪནྣཱ, ཏཎྷཱཚདནཚཱདིཏཱ།

    ‘‘Kāmandhā jālasañchannā, taṇhāchadanachāditā;

    པམཏྟབནྡྷནཱབདྡྷཱ, མཙྪཱཝ ཀུམིནཱམུཁེ།

    Pamattabandhanābaddhā, macchāva kumināmukhe;

    ཛརཱམརཎམནྭེནྟི, ཝཙྪོ ཁཱིརཔཀོཝ མཱཏར’’ནྟི༎ –

    Jarāmaraṇamanventi, vaccho khīrapakova mātara’’nti. –

    ཨིདཾ སུཏྟཾ སཾཀིལེསབྷཱགེ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཾ སུཏྟཾ ནཱམ། ཡེ སཏྟཱ ཀཱམནྡྷཱ ཀཱམེན ཨནྡྷཱ ཛཱལསཉྪནྣཱ ཏཎྷཱཚདནེན ཚཱདིཏཱ, པམཏྟབནྡྷནཱཡ བདྡྷཱ བནྡྷིཏབྦཱ, ཏེ སཏྟེ ཛརཱམརཎཾ ཨནྭེཏི, ཡཐཱ ཏཾ ཀུམིནཱམུཁེ ཡེ མཙྪཱ གཧིཏཱ, ཏེ མཙྪེ ཛརཱམརཎཾ ཨནྭེཏི ཨིཝ, ཨེཝཾ ཏེ སཏྟེ ཛརཱམརཎཾ ཨནྭེཏི། ཁཱིརཔཀོ ཝཙྪོ མཱཏརཾ ཨནྭེཏི ཨིཝ, ཨེཝཾ ཏེ སཏྟེ ཛརཱམརཎཾ ཨནྭེཏཱིཏི ཡོཛནཱ ཀཱཏབྦཱ། ཨཐ ཝཱ ཁཱིརཔཀོ ཝཙྪོ མཱཏརཾ ཨནྭེཏི ཨིཝ, ཀུམིནཱམུཁེ གཧིཏཱ མཙྪཱ ཛརཱམརཎཾ ཨནྭེནྟི ཨིཝ ཙ, ཨེཝཾ ཡེ སཏྟཱ ཀཱམནྡྷཱ པམཏྟབནྡྷནཱཡ བནྡྷིཏབྦཱ, ཏེ སཏྟཱ ཛརཱམརཎཾ ཨནྭེནྟཱིཏི ཡོཛནཱ།

    Idaṃ suttaṃ saṃkilesabhāge vācakañāpakabhāvena pavattanato saṃkilesabhāgiyaṃ suttaṃ nāma. Ye sattā kāmandhā kāmena andhā jālasañchannā taṇhāchadanena chāditā, pamattabandhanāya baddhā bandhitabbā, te satte jarāmaraṇaṃ anveti, yathā taṃ kumināmukhe ye macchā gahitā, te macche jarāmaraṇaṃ anveti iva, evaṃ te satte jarāmaraṇaṃ anveti. Khīrapako vaccho mātaraṃ anveti iva, evaṃ te satte jarāmaraṇaṃ anvetīti yojanā kātabbā. Atha vā khīrapako vaccho mātaraṃ anveti iva, kumināmukhe gahitā macchā jarāmaraṇaṃ anventi iva ca, evaṃ ye sattā kāmandhā pamattabandhanāya bandhitabbā, te sattā jarāmaraṇaṃ anventīti yojanā.

    ‘‘ཨིདཾ སུཏྟཾཡེཝཱ’’ཏི ཝཏྟབྦཏྟཱ –

    ‘‘Idaṃ suttaṃyevā’’ti vattabbattā –

    ‘‘ཙཏྟཱརིམཱནི, བྷིཀྑཝེ, ཨགཏིགམནཱནི། ཀཏམཱནི ཙཏྟཱརི? ཚནྡཱགཏིཾ གཙྪཏི, དོསཱགཏིཾ གཙྪཏི, མོཧཱགཏིཾ གཙྪཏི, བྷཡཱགཏིཾ གཙྪཏི, ཨིམཱནི ཁོ, བྷིཀྑཝེ, ཙཏྟཱརི ཨགཏིགམནཱནི། ཨིདམཝོཙ བྷགཝཱ, ཨིདཾ ཝཏྭཱན སུགཏོ, ཨཐཱཔརཾ ཨེཏདཝོཙ སཏྠཱ –

    ‘‘Cattārimāni, bhikkhave, agatigamanāni. Katamāni cattāri? Chandāgatiṃ gacchati, dosāgatiṃ gacchati, mohāgatiṃ gacchati, bhayāgatiṃ gacchati, imāni kho, bhikkhave, cattāri agatigamanāni. Idamavoca bhagavā, idaṃ vatvāna sugato, athāparaṃ etadavoca satthā –

    ‘‘ཚནྡཱ དོསཱ བྷཡཱ མོཧཱ, ཡོ དྷམྨཾ ཨཏིཝཏྟཏི།

    ‘‘Chandā dosā bhayā mohā, yo dhammaṃ ativattati;

    ནིཧཱིཡཏི ཏསྶ ཡསོ, ཀཱལ༹པཀྑེཝ ཙནྡིམཱ’’ཏི༎ –

    Nihīyati tassa yaso, kāḷapakkheva candimā’’ti. –

    ཨིདཾ སཾཀིལེསབྷཱགིཡཾ སུཏྟནྟི –

    Idaṃ saṃkilesabhāgiyaṃ suttanti –

    ཝུཏྟཾ། ཚནྡཱ ཚནྡཧེཏུནཱ དོསཱ དོསཧེཏུནཱ བྷཡཱ བྷཡཧེཏུནཱ མོཧཱ མོཧཧེཏུནཱ ཡོ རཱཛཱདིཀོ ཡོ ཝིནཡདྷརཱདིཀོ ཝཱ དྷམྨཾ སཔྤུརིསདྷམྨཾ ཨཏིཝཏྟཏི ཨཏིཀྐམིཏྭཱ ཝཏྟཏི, ཏསྶ རཱཛཱདིནོ ཝཱ ཏསྶ ཝིནཡདྷརཱདིནོ ཝཱ ཡསོ ཀིཏྟི ཙ པརིཝཱརོ ཙ བྷོགོ ཙ ནིཧཱིཡཏི། ཙནྡིམཱ ཀཱལ༹པཀྑེ པབྷཱཡ ནིཧཱིཡཏི ཨིཝ, ཨེཝཾ ནིཧཱིཡཏཱིཏི ཡོཛནཱ།

    Vuttaṃ. Chandā chandahetunā dosā dosahetunā bhayā bhayahetunā mohā mohahetunā yo rājādiko yo vinayadharādiko vā dhammaṃ sappurisadhammaṃ ativattati atikkamitvā vattati, tassa rājādino vā tassa vinayadharādino vā yaso kitti ca parivāro ca bhogo ca nihīyati. Candimā kāḷapakkhe pabhāya nihīyati iva, evaṃ nihīyatīti yojanā.

    ‘‘ཨེཏྟཀཾཡེཝཱ’’ཏི ཝཏྟབྦཏྟཱ ‘‘མནོཔུབྦངྒམཱ དྷམྨཱ…པེ॰… ཙཀྐཾཝ ཝཧཏོ པདནྟི ཨིདཾ སཾཀིལེསབྷཱགིཡཾ སུཏྟ’’ནྟི ཝུཏྟཾ། ཨཏྠོ པཱཀཊོ། ཨཊྛཀཐཱཡམྤི ཝིབྷཏྟོ།

    ‘‘Ettakaṃyevā’’ti vattabbattā ‘‘manopubbaṅgamā dhammā…pe… cakkaṃva vahato padanti idaṃ saṃkilesabhāgiyaṃ sutta’’nti vuttaṃ. Attho pākaṭo. Aṭṭhakathāyampi vibhatto.

    ‘‘མིདྡྷཱི ཡདཱ ཧོཏི མཧགྒྷསོ ཙ, ནིདྡཱཡིཏཱ སམྤརིཝཏྟསཱཡཱི།

    ‘‘Middhī yadā hoti mahagghaso ca, niddāyitā samparivattasāyī;

    མཧཱཝརཱཧོཝ ནིཝཱཔཔུཊྛོ, པུནཔྤུནཾ གབྦྷམུཔེཏི མནྡོ’’ཏི༎ –

    Mahāvarāhova nivāpapuṭṭho, punappunaṃ gabbhamupeti mando’’ti. –

    ཨིདཾ སུཏྟམྤི སཾཀིལེསབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཾ སུཏྟཾ ནཱམ། ནིཝཱཔཔུཊྛོ མཧཱཝརཱཧོ གཱམསཱུཀརོ ནིདྡཱཡིཏཱ སུཔནསཱིལོ སམྤརིཝཏྟསཱཡཱི ཧོཏི ཨིཝ, ཨེཝཾ ཡོ མནྡོ སཏྟོ ཡདཱ མཧགྒྷསོ ཧོཏི, སོ མནྡོ སཏྟོ མིདྡྷཱི ཐིནམིདྡྷཱབྷིབྷཱུཏོ ཧུཏྭཱ ནིདྡཱཡིཏཱ མུདུཕསྶསཡནེ མུདུཧཏྠེཧི པརཱམསིཏོ སམྤརིཝཏྟསཱཡཱི པུནཔྤུནཾ གབྦྷཾ ཨུཔེཏཱིཏི ཡོཛནཱ།

    Idaṃ suttampi saṃkilesabhāge visaye vācakañāpakabhāvena pavattanato saṃkilesabhāgiyaṃ suttaṃ nāma. Nivāpapuṭṭho mahāvarāho gāmasūkaro niddāyitā supanasīlo samparivattasāyī hoti iva, evaṃ yo mando satto yadā mahagghaso hoti, so mando satto middhī thinamiddhābhibhūto hutvā niddāyitā muduphassasayane muduhatthehi parāmasito samparivattasāyī punappunaṃ gabbhaṃ upetīti yojanā.

    ‘‘ཨཡསཱཝ མལཾ སམུཊྛིཏཾ, ཏཏུཊྛཱཡ ཏམེཝ ཁཱདཏི།

    ‘‘Ayasāva malaṃ samuṭṭhitaṃ, tatuṭṭhāya tameva khādati;

    ཨེཝཾ ཨཏིདྷོནཙཱརིནཾ, སཱནི ཀམྨཱནི ནཡནྟི དུགྒཏི’’ནྟི༎ –

    Evaṃ atidhonacārinaṃ, sāni kammāni nayanti duggati’’nti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ཨཡསཱ ཨཡཏོ སམུཊྛིཏཾ ཛཱཏམལཾ ཏཏུཊྛཱཡ ཏཏོ ཨཡཏོ ཨུཊྛཧིཏྭཱ ཏམེཝ ཨཡཾ ཁཱདཏི ཨིཝ, ཨེཝཾ ཨཏིདྷོནཙཱརིནཾ ཨཏིཀྐམིཏྭཱ དྷོནཙཱརིཔུགྒལཾ སཱནི སཡཾ ཀཏཱནི ཨཀུསལཀམྨཱནི དུགྒཏིཾ ནཡནྟཱིཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Ayasā ayato samuṭṭhitaṃ jātamalaṃ tatuṭṭhāya tato ayato uṭṭhahitvā tameva ayaṃ khādati iva, evaṃ atidhonacārinaṃ atikkamitvā dhonacāripuggalaṃ sāni sayaṃ katāni akusalakammāni duggatiṃ nayantīti yojanā.

    ‘‘ཙོརོ ཡཐཱ སནྡྷིམུཁེ གཧཱིཏོ, སཀམྨུནཱ ཧཉྙཏི བཛ྄ཛྷཏེ ཙ།

    ‘‘Coro yathā sandhimukhe gahīto, sakammunā haññati bajjhate ca;

    ཨེཝཾ ཨཡཾ པེཙྩ པཛཱ པརཏྠ, སཀམྨུནཱ ཧཉྙཏི བཛ྄ཛྷཏེ ཙཱ’’ཏི༎ –

    Evaṃ ayaṃ pecca pajā parattha, sakammunā haññati bajjhate cā’’ti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། སནྡྷིམུཁེ རཱཛཔུརིསཱདཱིཧི གཧིཏོ ཙོརོ སཀམྨུནཱ ཨཏྟནཱ ཀཏེན ཙོརཀམྨེན ཧཉྙཏི ཙ བཛ྄ཛྷཏེ ཙ ཡཐཱ, ཨེཝཾ ཨཡཾ པཱཔཀཱརིནཱི པཛཱ པརཏྠ པརལོཀེ པེཙྩ སཀམྨུནཱ སཡཾ ཀཏེན ཨཀུསལཀམྨུནཱ སཏྠཱདཱིཧི ཧཉྙཏི ཙ ཨདྡུབནྡྷནཱདཱིཧི བཛ྄ཛྷཏེ ཙཱཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Sandhimukhe rājapurisādīhi gahito coro sakammunā attanā katena corakammena haññati ca bajjhate ca yathā, evaṃ ayaṃ pāpakārinī pajā parattha paraloke pecca sakammunā sayaṃ katena akusalakammunā satthādīhi haññati ca addubandhanādīhi bajjhate cāti yojanā.

    ‘‘སུཁཀཱམཱནི བྷཱུཏཱནི, ཡོ དཎྜེན ཝིཧིཾསཏི།

    ‘‘Sukhakāmāni bhūtāni, yo daṇḍena vihiṃsati;

    ཨཏྟནོ སུཁམེསཱནོ, པེཙྩ སོ ན ལབྷཏེ སུཁ’’ནྟི༎ –

    Attano sukhamesāno, pecca so na labhate sukha’’nti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ཨཏྟནོ སུཁཾ ཨེསཱནོ ཨེསམཱནོ ཡོ སཏྟོ ཨཉྙཱནི སུཁཀཱམཱནི བྷཱུཏཱནི དཎྜེན ཝིཧིཾསཏི, སོ ཧིཾསཀོ སཏྟོ པརལོཀེ པེཙྩ སུཁཾ ན ལབྷཏཱིཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Attano sukhaṃ esāno esamāno yo satto aññāni sukhakāmāni bhūtāni daṇḍena vihiṃsati, so hiṃsako satto paraloke pecca sukhaṃ na labhatīti yojanā.

    ‘‘གུནྣཾ ཙེ ཏརམཱནཱནཾ, ཛིམྷཾ གཙྪཏི པུངྒཝོ།

    ‘‘Gunnaṃ ce taramānānaṃ, jimhaṃ gacchati puṅgavo;

    སབྦཱ ཏཱ ཛིམྷཾ གཙྪནྟི, ནེཏྟེ ཛིམྷཾ གཏེ སཏི༎

    Sabbā tā jimhaṃ gacchanti, nette jimhaṃ gate sati.

    ‘‘ཨེཝམེཝ མནུསྶེསུ, ཡོ ཧོཏི སེཊྛསམྨཏོ།

    ‘‘Evameva manussesu, yo hoti seṭṭhasammato;

    སོ ཙེ ཨདྷམྨཾ ཙརཏི, པགེཝ ཨིཏརཱ པཛཱ།

    So ce adhammaṃ carati, pageva itarā pajā;

    སབྦཾ རཊྛཾ དུཀྑཾ སེཏི, རཱཛཱ ཙེ ཧོཏི ཨདྷམྨིཀོ’’ཏི༎ –

    Sabbaṃ raṭṭhaṃ dukkhaṃ seti, rājā ce hoti adhammiko’’ti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ནདིཾ ཏརམཱནཱནཾ གུནྣཾ པུངྒཝོ ཛིམྷཾ ཙེ གཙྪཏི, ཨེཝཾ ནེཏྟེ ཛིམྷཾ གཏེ སཏི སབྦཱ ཏཱ གཱཝིཡོ ཛིམྷཾ གཙྪནྟི ཡཐཱ, ཨེཝམེཝ མནུསྶེསུ ཡོ རཱཛཱ སེཊྛསམྨཏོ, སོ རཱཛཱ ཨདྷམྨཾ ཙརཏི, ཨེཝཾ རཉྙེ ཨདྷམྨཾ ཙརནྟེ སཏི ཨིཏརཱ པཛཱ པགེཝ པཋམམེཝ ཨདྷམྨཾ ཙརཏི། རཱཛཱ ཨདྷམྨིཀོ ཙེ ཧོཏི, ཨེཝཾ རཉྙེ ཨདྷམྨིཀེ སཏི སབྦཾ རཊྛཾ དུཀྑཾ སེཏཱིཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Nadiṃ taramānānaṃ gunnaṃ puṅgavo jimhaṃ ce gacchati, evaṃ nette jimhaṃ gate sati sabbā tā gāviyo jimhaṃ gacchanti yathā, evameva manussesu yo rājā seṭṭhasammato, so rājā adhammaṃ carati, evaṃ raññe adhammaṃ carante sati itarā pajā pageva paṭhamameva adhammaṃ carati. Rājā adhammiko ce hoti, evaṃ raññe adhammike sati sabbaṃ raṭṭhaṃ dukkhaṃ setīti yojanā.

    ‘‘སུཀིཙྪརཱུཔཱ ཝཏིམེ མནུསྶཱ, ཀརོནྟི པཱཔཾ ཨུཔདྷཱིསུ རཏྟཱ།

    ‘‘Sukiccharūpā vatime manussā, karonti pāpaṃ upadhīsu rattā;

    གཙྪནྟི ཏེ བཧུཛནསནྣིཝཱསཾ, ནིརཡཾ ཨཝཱིཙིཾ ཀཊུཀཾ བྷཡཱནཀ’’ནྟི༎ –

    Gacchanti te bahujanasannivāsaṃ, nirayaṃ avīciṃ kaṭukaṃ bhayānaka’’nti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ཡེ མནུསྶཱ ཨུཔདྷཱིསུ ཀཱམགུཎཱུཔདྷཱིསུ རཏྟཱ རཱགཱབྷིབྷཱུཏཱ ཧུཏྭཱ པཱཔཾ ཨཀུསལཀམྨཾ ཀརོནྟི, ཨིམེ པཱཔཀམྨཀརཱ མནུསྶཱ སུཀིཙྪརཱུཔཱ ཝཏ སུཊྛུ ཀིཙྪཱཔནྣརཱུཔཱ ཝཏ བྷཝནྟི, ཏེ པཱཔཀམྨཀརཱ མནུསྶཱ ཀཊུཀཾ བྷཡཱནཀཾ བཧུཛནསནྣིཝཱསཾ ནིརཡཾ ཨཝཱིཙིཾ གཙྪནྟཱིཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Ye manussā upadhīsu kāmaguṇūpadhīsu rattā rāgābhibhūtā hutvā pāpaṃ akusalakammaṃ karonti, ime pāpakammakarā manussā sukiccharūpā vata suṭṭhu kicchāpannarūpā vata bhavanti, te pāpakammakarā manussā kaṭukaṃ bhayānakaṃ bahujanasannivāsaṃ nirayaṃ avīciṃ gacchantīti yojanā.

    ‘‘ཕལཾ ཝེ ཀདལིཾ ཧནྟི, ཕལཾ ཝེལུ༹ཾ ཕལཾ ནལ༹ཾ།

    ‘‘Phalaṃ ve kadaliṃ hanti, phalaṃ veḷuṃ phalaṃ naḷaṃ;

    སཀྐཱརོ ཀཱཔུརིསཾ ཧནྟི, གབྦྷོ ཨསྶཏརིཾ ཡཐཱ’’ཏི༎ –

    Sakkāro kāpurisaṃ hanti, gabbho assatariṃ yathā’’ti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ཕལཾ ཀདལིཡཱ ཕལཾ ཀདལིཾ ཝེ ཨེཀནྟེན ཧནྟི ཡཐཱ, ཕལཾ ཝེལུ༹ཾ ཝེ ཨེཀནྟེན ཧནྟི ཡཐཱ, ཕལཾ ནལ༹ཾ ཝེ ཨེཀནྟེན ཧནྟི ཡཐཱ, གབྦྷོ ཨསྶཏརིཾ མཱཏརཾ ཝེ ཨེཀནྟེན ཧནྟི ཡཐཱ, ཨེཝཾ སཀྐཱརོ ཀཱཔུརིསཾ ཝེ ཨེཀནྟེན ཧནྟཱིཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Phalaṃ kadaliyā phalaṃ kadaliṃ ve ekantena hanti yathā, phalaṃ veḷuṃ ve ekantena hanti yathā, phalaṃ naḷaṃ ve ekantena hanti yathā, gabbho assatariṃ mātaraṃ ve ekantena hanti yathā, evaṃ sakkāro kāpurisaṃ ve ekantena hantīti yojanā.

    ‘‘ཀོདྷམཀྑགརུ བྷིཀྑུ, ལཱབྷསཀྐཱརགཱརཝོ།

    ‘‘Kodhamakkhagaru bhikkhu, lābhasakkāragāravo;

    སུཁེཏྟེ པཱུཏིབཱིཛཾཝ, སདྡྷམྨེ ན ཝིརཱུཧཏཱི’’ཏི༎ –

    Sukhette pūtibījaṃva, saddhamme na virūhatī’’ti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། སུཁེཏྟེ སུནྡརེ ཁེཏྟེཔི ཁིཏྟཾ པཱུཏིབཱིཛཾ ན རུཧཏི ཨིཝ, ཨེཝཾ ཡོ བྷིཀྑུ ལཱབྷསཀྐཱརགཱརཝོ ཀོདྷཾ ཀུཛ྄ཛྷནལཀྑཎཾ ཀོདྷཾ, མཀྑཾ པརགུཎསཱིལམཀྑནལཀྑཎཾ མཀྑཉྩ གརུཾ ཀཏྭཱ ཙརཏི, སོ ཙརནྟོ བྷིཀྑུ སདྡྷམྨསྨིཾ ན རུཧཏཱིཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Sukhette sundare khettepi khittaṃ pūtibījaṃ na ruhati iva, evaṃ yo bhikkhu lābhasakkāragāravo kodhaṃ kujjhanalakkhaṇaṃ kodhaṃ, makkhaṃ paraguṇasīlamakkhanalakkhaṇaṃ makkhañca garuṃ katvā carati, so caranto bhikkhu saddhammasmiṃ na ruhatīti yojanā.

    ༩༡. ‘‘ཨིདྷཱཧཾ, བྷིཀྑཝེ, ཨེཀཙྩཾ པུགྒལཾ པདུཊྛཙིཏྟཾ ཨེཝཾ ཙེཏསཱ ཙེཏོ པརིཙྩ པཛཱནཱམི…པེ॰… ཨིཏི མེ སུཏ’’ནྟི ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། བྷིཀྑཝེ ཨིདྷ སཱསནེ, ལོཀེ ཝཱ ཨཧཾ ཨེཀཙྩཾ པུགྒལཾ པདུཊྛཙིཏྟཾ མམ ཙེཏསཱ ཏསྶ ཙེཏོ ཙིཏྟཾ པརིཙྩ པརིཙྪིནྡིཏྭཱ བུདྡྷཙཀྑུནཱ ཨེཝཾ པཛཱནཱམི། ‘‘ཀཐཾ པཛཱནཱམཱི’’ཏི ཙེ པུཙྪེཡྻ, ཡཉྩ པཊིཔདཾ པཊིཔནྣོ, ཡཉྩ མགྒཾ སམཱརུལ༹ྷོ ཨཡཾ པུགྒལོ ཡཐཱ ཡཱཡ དུཔྤཊིཔདཱཡ ཡེན དུམྨགྒེན ཨིརིཡཏི པཝཏྟཏི, ཏཱཡ དུཔྤཊིཔདཱཡ ཏེན དུམྨགྒེན ཨིམམྷི ཨིམསྨིཾ སམཡེ དུཔྤཊིཔཛྫནཀཱལེ ཨཡཾ དུཔྤཊིཔནྣཾ པཊིཔནྣོ དུམྨགྒསམཱརུལ༹ྷོ པུགྒལོ ཙེ ཀཱལཾ ཀརེཡྻ, ཨེཝཾ སཏི ཨཱབྷཏཾ ཝཏྠུ ནིཀྑིཏྟཾ ཡཐཱ, ཨེཝཾ ནིརཡེ ནིཀྑིཏྟོ། ཏཾ ཀིསྶ ཧེཏུ? བྷིཀྑཝེ ཨསྶ པུགྒལསྶ ཙིཏྟཾ པདུཊྛཾ པདོསིཏཾ ཧི ཡསྨཱ ཧོཏི, ཏསྨཱ ནིཀྑིཏྟོ། ཨེཝཾ ཨིདྷ སཱསནེ, ལོཀེ ཝཱ ཙེཏོཔདོསཧེཏུ ཙ པན ཨེཀཙྩེ སཏྟཱ པུགྒལཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ཨུཔཔཛྫནྟཱིཏི པཛཱནཱམཱིཏི། ཨེཏམཏྠཾ བྷགཝཱ ཨཝོཙ། ཏཏྠ ཏསྨིཾ སུཏྟེ ཨེཏཾ ‘‘པདུཊྛཙིཏྟཾ ཉཏྭཱན…པེ॰… ནིརཡཾ སོ ཨུཔཔཛྫཏཱི’’ཏི གཱཐཱཝཙནཾ ཨིཏི ཨེཝཾ ཝུཙྩཏི།

    91. ‘‘Idhāhaṃ, bhikkhave, ekaccaṃ puggalaṃ paduṭṭhacittaṃ evaṃ cetasā ceto paricca pajānāmi…pe… iti me suta’’nti idaṃ suttampi saṃkilesabhāgiyaṃ suttaṃ nāma. Bhikkhave idha sāsane, loke vā ahaṃ ekaccaṃ puggalaṃ paduṭṭhacittaṃ mama cetasā tassa ceto cittaṃ paricca paricchinditvā buddhacakkhunā evaṃ pajānāmi. ‘‘Kathaṃ pajānāmī’’ti ce puccheyya, yañca paṭipadaṃ paṭipanno, yañca maggaṃ samāruḷho ayaṃ puggalo yathā yāya duppaṭipadāya yena dummaggena iriyati pavattati, tāya duppaṭipadāya tena dummaggena imamhi imasmiṃ samaye duppaṭipajjanakāle ayaṃ duppaṭipannaṃ paṭipanno dummaggasamāruḷho puggalo ce kālaṃ kareyya, evaṃ sati ābhataṃ vatthu nikkhittaṃ yathā, evaṃ niraye nikkhitto. Taṃ kissa hetu? Bhikkhave assa puggalassa cittaṃ paduṭṭhaṃ padositaṃ hi yasmā hoti, tasmā nikkhitto. Evaṃ idha sāsane, loke vā cetopadosahetu ca pana ekacce sattā puggalā kāyassa bhedā paraṃ maraṇā apāyaṃ duggatiṃ vinipātaṃ upapajjantīti pajānāmīti. Etamatthaṃ bhagavā avoca. Tattha tasmiṃ sutte etaṃ ‘‘paduṭṭhacittaṃ ñatvāna…pe… nirayaṃ so upapajjatī’’ti gāthāvacanaṃ iti evaṃ vuccati.

    སཏྠཱ ཨིདྷ སཱསནེ, ལོཀེ ཝཱ པདུཊྛཙིཏྟཾ ཨེཀཙྩཾ པུགྒལཾ ཉཏྭཱན བྷིཀྑཱུནཾ སནྟིཀེ ཨེཏམཏྠཾ བྱཱཀཱསི། ཨིམམྷི ཨིམསྨིཾ སམཡེ ཨཡཾ པུགྒལོ ཙེ ཀཱལཾ ཀཡིརཱཐ, ཨེཝཾ སཏི པདུཊྛཙིཏྟསམངྒཱི ཧི ནིརཡསྨིཾ ཨུཔཔཛྫེཡྻ, པུགྒལསྶ ཙིཏྟཾ པདཱུསིཏཾ ཧི ཡསྨཱ ཧོཏི, ཏསྨཱ ཨུཔཔཛྫེཡྻ, ཙེཏོཔདོསཧེཏུ སཏྟཱ དུགྒཏིཾ གཙྪནྟི ཨཱབྷཏཾ ཝཏྠུཾ ནིཀྑིཔེཡྻ ཡཐཱ, ཨེཝམེཝཾ ཏཐཱཝིདྷོ དུཔྤཉྙོ སོ པདོསཙིཏྟོ པུགྒལོ ཀཱཡསྶ བྷེདཱ པརཾ མརཎཱ ནིརཡཾ ཨུཔཔཛྫཏཱིཏི ཨཡམྤི ཨཏྠོ བྷགཝཏཱ ཝུཏྟོ, ཨིཏི མེ མཡཱ སུཏནྟི ཡོཛནཱ།

    Satthā idha sāsane, loke vā paduṭṭhacittaṃ ekaccaṃ puggalaṃ ñatvāna bhikkhūnaṃ santike etamatthaṃ byākāsi. Imamhi imasmiṃ samaye ayaṃ puggalo ce kālaṃ kayirātha, evaṃ sati paduṭṭhacittasamaṅgī hi nirayasmiṃ upapajjeyya, puggalassa cittaṃ padūsitaṃ hi yasmā hoti, tasmā upapajjeyya, cetopadosahetu sattā duggatiṃ gacchanti ābhataṃ vatthuṃ nikkhipeyya yathā, evamevaṃ tathāvidho duppañño so padosacitto puggalo kāyassa bhedā paraṃ maraṇā nirayaṃ upapajjatīti ayampi attho bhagavatā vutto, iti me mayā sutanti yojanā.

    ‘‘སཙེ བྷཱཡཐ དུཀྑསྶ, སཙེ ཝོ དུཀྑམཔྤིཡཾ།

    ‘‘Sace bhāyatha dukkhassa, sace vo dukkhamappiyaṃ;

    མཱཀཏྠ པཱཔཀཾ ཀམྨཾ, ཨཱཝི ཝཱ ཡདི ཝཱ རཧོ༎

    Mākattha pāpakaṃ kammaṃ, āvi vā yadi vā raho.

    ‘‘སཙེ ཙ པཱཔཀཾ ཀམྨཾ, ཀརིསྶཐ ཀརོཐ ཝཱ།

    ‘‘Sace ca pāpakaṃ kammaṃ, karissatha karotha vā;

    ན ཝོ དུཀྑཱ པམུཏྱཏྠི, ཨུཔེཙྩཔི པལཱཡཏ’’ནྟི༎ –

    Na vo dukkhā pamutyatthi, upeccapi palāyata’’nti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། སཔྤུརིསཱ ཏུམྷེ དུཀྑསྶ ཛཱཏིདུཀྑཛརཱདུཀྑབྱཱདྷིདུཀྑམརཎདུཀྑཨཔཱཡདུཀྑ- ཨཏཱིཏཝཊྚམཱུལཀདུཀྑཨནཱགཏཝཊྚམཱུལཀདུཀྑཔཙྩུཔྤནྣཱཧཱརམཱུལཀདུཀྑཱཏི ཨཊྛཝིདྷསྶ དུཀྑསྶ སཙེ བྷཱཡཐ, ཝོ ཏུམྷེཧི དུཀྑཾ ཏཐཱ ཨཊྛཝིདྷཾ དུཀྑཾ སཙེ ཨཔྤིཡཾ, ཨེཝཾ སཏི ཨཱཝི ཝཱ ཡདི རཧོ ཝཱ པཱཔཀཾ ཀམྨཾ མཱཀཏྠ མཱ ཨཀཏྠ། སཔྤུརིསཱ ཏུམྷེ ཨཱཝི ཝཱ ཡདི རཧོ ཝཱ པཱཔཀཾ ཀམྨཾ སཙེ ཀརིསྶཐ ཝཱ སཙེ ཀརོཐ ཝཱ, ཨེཝཾ སཏི ཨུཔེཙྩཔི སཉྩིཙྩཱཔི པལཱཡཏཾ པལཱཡནྟཱནཾ ཝོ ཏུམྷཱཀཾ དུཀྑཱ ཨཊྛཝིདྷཱ དུཀྑཏོ པམུཏྟི མུཙྩནཾ ནཏྠེཝཱཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Sappurisā tumhe dukkhassa jātidukkhajarādukkhabyādhidukkhamaraṇadukkhaapāyadukkha- atītavaṭṭamūlakadukkhaanāgatavaṭṭamūlakadukkhapaccuppannāhāramūlakadukkhāti aṭṭhavidhassa dukkhassa sace bhāyatha, vo tumhehi dukkhaṃ tathā aṭṭhavidhaṃ dukkhaṃ sace appiyaṃ, evaṃ sati āvi vā yadi raho vā pāpakaṃ kammaṃ mākattha mā akattha. Sappurisā tumhe āvi vā yadi raho vā pāpakaṃ kammaṃ sace karissatha vā sace karotha vā, evaṃ sati upeccapi sañciccāpi palāyataṃ palāyantānaṃ vo tumhākaṃ dukkhā aṭṭhavidhā dukkhato pamutti muccanaṃ natthevāti yojanā.

    ‘‘ཨདྷམྨེན དྷནཾ ལདྡྷཱ, མུསཱཝཱདེན ཙཱུབྷཡཾ།

    ‘‘Adhammena dhanaṃ laddhā, musāvādena cūbhayaṃ;

    མམེཏི བཱལཱ མཉྙནྟི, ཏཾ ཀཐཾ ནུ བྷཝིསྶཏི༎

    Mameti bālā maññanti, taṃ kathaṃ nu bhavissati.

    ‘‘ཨནྟརཱཡཱ སུ བྷཝིསྶནྟི, སམྦྷཏསྶ ཝིནསྶཏི།

    ‘‘Antarāyā su bhavissanti, sambhatassa vinassati;

    མཏཱ སགྒཾ ན གཙྪནྟི, ནནུ ཨེཏྟཱཝཏཱ ཧཏཱ’’ཏི༎ –

    Matā saggaṃ na gacchanti, nanu ettāvatā hatā’’ti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ཡེ བཱལཱ ཨདྷམྨེན ཙ མུསཱཝཱདེན ཙ དྷནཾ སཝིཉྙཱཎཱཝིཉྙཱཎཾ སབྦཾ ལབྷིཏབྦཾ དྷནཾ ལདྡྷཱ ཨུབྷཡཾ དྷནཾ ‘‘མམ དྷན’’ནྟི མཉྙནྟི, ཏེསཾ བཱལཱནཾ ཏཾ ཨུབྷཡཾ དྷནཾ ཀཐཾ ཀེན ནུ པཀཱརེན བྷཝིསྶཏི, ཨདྷམྨེན སམྦྷཏཏྟཱ ཙིརཊྛིཏིཀཾ ན ཧོཏི། ཨནྟརཱཡཱ རཱཛནྟརཱཡཱདཡོ ཨནྟརཱཡཱ ཏེསཾ བཱལཱནཾ བྷཝིསྶནྟི། ཡེན ཨདྷམྨཝོཧཱརཱདིཀེན ཡཾ དྷནཾ སམྦྷཏཾ, ཨསྶ ཨདྷམྨཝོཧཱརཱདིཀསྶ ཏཾ སམྦྷཏཾ དྷནཾ ཝིནསྶཏི། མཏཱ མརནྟཱ ཏེ བཱལཱ སགྒཾ སུགཏིཾ ན གཙྪནྟི། སུགཏི ཧི སོབྷནེཧི བྷོགེཧི ཨགྒོཏི ‘‘སགྒོ’’ཏི ཨདྷིཔྤེཏཱ ། ཨེཏྟཱཝཏཱ ཨེཏྟཀེན དིཊྛདྷམྨིཀསམྤརཱཡིཀཱནཾ ཨཏྟཧིཏཱནཾ ཧཱཡནེན ཏེ བཱལཱ ཧཏཱ ཝིནཊྛཱ བྷཝནྟི ནནཱུཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Ye bālā adhammena ca musāvādena ca dhanaṃ saviññāṇāviññāṇaṃ sabbaṃ labhitabbaṃ dhanaṃ laddhā ubhayaṃ dhanaṃ ‘‘mama dhana’’nti maññanti, tesaṃ bālānaṃ taṃ ubhayaṃ dhanaṃ kathaṃ kena nu pakārena bhavissati, adhammena sambhatattā ciraṭṭhitikaṃ na hoti. Antarāyā rājantarāyādayo antarāyā tesaṃ bālānaṃ bhavissanti. Yena adhammavohārādikena yaṃ dhanaṃ sambhataṃ, assa adhammavohārādikassa taṃ sambhataṃ dhanaṃ vinassati. Matā marantā te bālā saggaṃ sugatiṃ na gacchanti. Sugati hi sobhanehi bhogehi aggoti ‘‘saggo’’ti adhippetā . Ettāvatā ettakena diṭṭhadhammikasamparāyikānaṃ attahitānaṃ hāyanena te bālā hatā vinaṭṭhā bhavanti nanūti yojanā.

    ‘‘ཀཐཾ ཁཎཏི ཨཏྟཱནཾ, ཀཐཾ མིཏྟེཧི ཛཱིརཏི།

    ‘‘Kathaṃ khaṇati attānaṃ, kathaṃ mittehi jīrati;

    ཀཐཾ ཝིཝཊྚཏེ དྷམྨཱ, ཀཐཾ སགྒཾ ན གཙྪཏི’’༎

    Kathaṃ vivaṭṭate dhammā, kathaṃ saggaṃ na gacchati’’.

    ‘‘ལོབྷཱ ཁཎཏི ཨཏྟཱནཾ, ལུདྡྷོ མིཏྟེཧི ཛཱིརཏི།

    ‘‘Lobhā khaṇati attānaṃ, luddho mittehi jīrati;

    ལོབྷཱ ཝིཝཊྚཏེ དྷམྨཱ, ལོབྷཱ སགྒཾ ན གཙྪཏཱི’’ཏི༎ –

    Lobhā vivaṭṭate dhammā, lobhā saggaṃ na gacchatī’’ti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ཡོཛནཏྠོ པཱཀཊོ།

    Idaṃ suttampi saṃkilesabhāgiyaṃ suttaṃ nāma. Yojanattho pākaṭo.

    ‘‘ཙརནྟི བཱལཱ དུམྨེདྷཱ, ཨམིཏྟེནེཝ ཨཏྟནཱ།

    ‘‘Caranti bālā dummedhā, amitteneva attanā;

    ཀརོནྟཱ པཱཔཀཾ ཀམྨཾ, ཡཾ ཧོཏི ཀཊུཀཔྥལཾ༎

    Karontā pāpakaṃ kammaṃ, yaṃ hoti kaṭukapphalaṃ.

    ‘‘ན ཏཾ ཀམྨཾ ཀཏཾ སཱདྷུ, ཡཾ ཀཏྭཱ ཨནུཏཔྤཏི།

    ‘‘Na taṃ kammaṃ kataṃ sādhu, yaṃ katvā anutappati;

    ཡསྶ ཨསྶུམུཁོ རོདཾ, ཝིཔཱཀཾ པཊིསེཝཏཱི’’ཏི༎ –

    Yassa assumukho rodaṃ, vipākaṃ paṭisevatī’’ti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། དུམྨེདྷཱ ནིཔྤཉྙཱ བཱལཱ ཨམིཏྟེན པཱཔཀཾ ཀམྨཾ ཀཏཾ ཨིཝ, ཨེཝཾ ཨཏྟནཱ ཀཊུཀཔྥལཾ ཡཾ ཀམྨཾ ཀཏཾ ཧོཏི, ཏཾ པཱཔཀཾ ཀཏཾ ཀམྨཾ ཀརོནྟཱ ཙརནྟི། ཡཾ ཀམྨཾ ཀཏྭཱ ཀརོནྟོ པཙྪཱ ཨནུཏཔྤཏི, ཏཾ ཀཏཾ ཀམྨཾ ན སཱདྷུ། ཡསྶ ཀམྨསྶ ཝིཔཱཀཾ རོདཾ རུདནྟོ ཨསྶུམུཁོ པཊིསེཝཏི, ཏཾ ཀཏཾ ཀམྨཾ ན སཱདྷཱུཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Dummedhā nippaññā bālā amittena pāpakaṃ kammaṃ kataṃ iva, evaṃ attanā kaṭukapphalaṃ yaṃ kammaṃ kataṃ hoti, taṃ pāpakaṃ kataṃ kammaṃ karontā caranti. Yaṃ kammaṃ katvā karonto pacchā anutappati, taṃ kataṃ kammaṃ na sādhu. Yassa kammassa vipākaṃ rodaṃ rudanto assumukho paṭisevati, taṃ kataṃ kammaṃ na sādhūti yojanā.

    ‘‘དུཀྐརཾ དུཏྟིཏིཀྑཉྩ…པེ॰… ཨཝཱིཏརཱགོ’’ཏི ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། སུཏྟཏྠོ ཨཊྛཀཐཱཡཾ ཝིཏྠཱརཏོ ཝུཏྟོ།

    ‘‘Dukkaraṃ duttitikkhañca…pe… avītarāgo’’ti idaṃ suttampi saṃkilesabhāgiyaṃ suttaṃ nāma. Suttattho aṭṭhakathāyaṃ vitthārato vutto.

    ‘‘ཨཔྤམེཡྻཾ པམིནནྟོ, ཀོདྷ ཝིདྭཱ ཝིཀཔྤཡེ།

    ‘‘Appameyyaṃ paminanto, kodha vidvā vikappaye;

    ཨཔྤམེཡྻཾ པམཱཡིནཾ, ནིཝུཏཾ ཏཾ མཉྙེ ཨཀིསྶཝ’’ནྟི༎ –

    Appameyyaṃ pamāyinaṃ, nivutaṃ taṃ maññe akissava’’nti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ཨིདྷ སཱསནེ ཨཔྤམེཡྻཾ ཨཔྤམེཡྻགུཎཾ ཁཱིཎཱསཝཾ པུགྒལཾ ‘‘ཨཡཾ ཁཱིཎཱསཝོ པུགྒལོ ཨེཏྟཀསཱིལོ ཨེཏྟཀསམཱདྷི ཨེཏྟཀཔཉྙོ’’ཏི པམིནནྟོ ཀོ པུཐུཛྫནོ ཝིཀཔྤཡེ། ཨཔྤམེཡྻཾ ཁཱིཎཱསཝཔུགྒལཾ པམཱཡིནཾ པམཱཡནྟཾ ཏཾ པུཐུཛྫནཾ ཨཡཾ ནིཝུཏཾ ཨཝཀུཛྫཔཉྙཾ ཨཀིསྶཝཾ ཨཔཉྙནྟི མཉྙེ མཉྙཱམཱིཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Idha sāsane appameyyaṃ appameyyaguṇaṃ khīṇāsavaṃ puggalaṃ ‘‘ayaṃ khīṇāsavo puggalo ettakasīlo ettakasamādhi ettakapañño’’ti paminanto ko puthujjano vikappaye. Appameyyaṃ khīṇāsavapuggalaṃ pamāyinaṃ pamāyantaṃ taṃ puthujjanaṃ ayaṃ nivutaṃ avakujjapaññaṃ akissavaṃ apaññanti maññe maññāmīti yojanā.

    ‘‘པུརིསསྶ ཧི ཛཱཏསྶ, ཀུཋཱརཱི ཛཱཡཏེ མུཁེ།

    ‘‘Purisassa hi jātassa, kuṭhārī jāyate mukhe;

    ཡཱཡ ཚིནྡཏི ཨཏྟཱནཾ, བཱལོ དུབྦྷཱསིཏཾ བྷཎཾ༎

    Yāya chindati attānaṃ, bālo dubbhāsitaṃ bhaṇaṃ.

    ‘‘ན ཧི སཏྠཾ སུནིསིཏཾ, ཝིསཾ ཧལཱཧལཾ ཨིཝ།

    ‘‘Na hi satthaṃ sunisitaṃ, visaṃ halāhalaṃ iva;

    ཨེཝཾ ཝིརདྡྷཾ པཱཏེཏི, ཝཱཙཱ དུབྦྷཱསིཏཱ ཡཐཱ’’ཏི༎ –

    Evaṃ viraddhaṃ pāteti, vācā dubbhāsitā yathā’’ti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། དུབྦྷཱསིཏཾ ཨརིཡཱུཔཝཱདསངྑཱཏཾ ཕརུསཝཱཙཾ བྷཎཾ བྷཎནྟོ བཱལོ དུཊྛོ པུརིསོ ཡཱཡ ཀུཋཱརཱིསདིསིཡཱ དུབྦྷཱསིཏཝཱཙཱཡ ཨཏྟཱནཾ ཚིནྡཏི, སཱ ཀུཋཱརཱིསདིསཱི དུབྦྷཱསིཏཝཱཙཱ ཛཱཏསྶ པུརིསསྶ མུཁེ ཛཱཡཏེ ཛཱཡཏི, སཱ དུབྦྷཱསིཏཝཱཙཱ མུཁེ ཛཱཡཏི ཨིཝ, ཨེཝཾ སུནིསིཏཾ སཏྠཾ མུཁེ ན ཛཱཡཏི, ཡཐཱ ཧལཱཧལཾ ཝིསཾ མུཁེ ན ཛཱཡཏི, དུབྦྷཱསིཏཱ ཝཱཙཱ ཨཔཱཡེསུ ཝིརདྡྷཾ པུགྒལཾ པཱཏེཏི ཡཐཱ, ཨེཝཾ སུནིསིཏཾ སཏྠཾ ཨཔཱཡེསུ ན པཱཏེཏི, ཧལཱཧལཾ ཝིསཾ ཨཔཱཡེསུ ན པཱཏེཏཱིཏི ཡོཛནཱ།

    Idaṃ suttampi saṃkilesabhāgiyaṃ suttaṃ nāma. Dubbhāsitaṃ ariyūpavādasaṅkhātaṃ pharusavācaṃ bhaṇaṃ bhaṇanto bālo duṭṭho puriso yāya kuṭhārīsadisiyā dubbhāsitavācāya attānaṃ chindati, sā kuṭhārīsadisī dubbhāsitavācā jātassa purisassa mukhe jāyate jāyati, sā dubbhāsitavācā mukhe jāyati iva, evaṃ sunisitaṃ satthaṃ mukhe na jāyati, yathā halāhalaṃ visaṃ mukhe na jāyati, dubbhāsitā vācā apāyesu viraddhaṃ puggalaṃ pāteti yathā, evaṃ sunisitaṃ satthaṃ apāyesu na pāteti, halāhalaṃ visaṃ apāyesu na pātetīti yojanā.

    ༩༢.

    92.

    ‘‘ཡོ ནིནྡིཡཾ པསཾསཏི, ཏཾ ཝཱ ནིནྡཏི ཡོ པསཾསིཡོ།

    ‘‘Yo nindiyaṃ pasaṃsati, taṃ vā nindati yo pasaṃsiyo;

    ཝིཙིནཱཏི མུཁེན སོ ཀལིཾ, ཀལིནཱ ཏེན སུཁཾ ན ཝིནྡཏི༎

    Vicināti mukhena so kaliṃ, kalinā tena sukhaṃ na vindati.

    ‘‘ཨཔྤམཏྟོ ཨཡཾ ཀལི, ཡོ ཨཀྑེསུ དྷནཔརཱཛཡོ།

    ‘‘Appamatto ayaṃ kali, yo akkhesu dhanaparājayo;

    སབྦསྶཱཔི སཧཱཔི ཨཏྟནཱ, ཨཡམེཝ མཧནྟཏརོ ཀལི།

    Sabbassāpi sahāpi attanā, ayameva mahantataro kali;

    ཡོ སུགཏེསུ མནཾ པདོསཡེ༎

    Yo sugatesu manaṃ padosaye.

    ‘‘སཏཾ སཧསྶཱནཾ ནིརབྦུདཱནཾ, ཚཏྟིཾསཏཱི པཉྩ ཙ ཨབྦུདཱནི།

    ‘‘Sataṃ sahassānaṃ nirabbudānaṃ, chattiṃsatī pañca ca abbudāni;

    ཡམརིཡགརཧཱི ནིརཡཾ ཨུཔེཏི, ཝཱཙཾ མནཉྩ པཎིདྷཱཡ པཱཔཀ’’ནྟི༎ –

    Yamariyagarahī nirayaṃ upeti, vācaṃ manañca paṇidhāya pāpaka’’nti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ཡོ པུགྒལོ ནིནྡིཡཾ དུཙྩརཾ དུསྶཱིལཾ པུགྒལཾ པསཾསཏི, སོ པསཾསཀོ པུགྒལོ མུཁེན ཀལིཾ ཝིཙིནཱཏི ཨུཔཙིནཱཏི, ཏེན ཀལིནཱ སུཁཾ ན ཝིནྡཏི། ཡོ སུཙཱརཱི སཱིལཝཱ པུགྒལོ པསཾསིཡོ ཧོཏི, ཏཾ ཝཱ སུཙཱརིཾ ཝཱ སཱིལཝནྟཾ པུགྒལཾ ཡོ པུགྒལོ ནིནྡཏི, སོ ནིནྡནྟོ པུགྒལོ མུཁེན ཀལིཾ ཝིཙིནཱཏི ཨུཔཙིནཱཏི, ཏེན ཀལིནཱ སུཁཾ ན ཝིནྡཏི།

    Idaṃ suttampi saṃkilesabhāgiyaṃ suttaṃ nāma. Yo puggalo nindiyaṃ duccaraṃ dussīlaṃ puggalaṃ pasaṃsati, so pasaṃsako puggalo mukhena kaliṃ vicināti upacināti, tena kalinā sukhaṃ na vindati. Yo sucārī sīlavā puggalo pasaṃsiyo hoti, taṃ vā sucāriṃ vā sīlavantaṃ puggalaṃ yo puggalo nindati, so nindanto puggalo mukhena kaliṃ vicināti upacināti, tena kalinā sukhaṃ na vindati.

    ཨཏྟནཱ སཧཱཔི སབྦསྶ དྷནསྶ ཝསེནཔི ཨཀྑེསུ ཡོ དྷནཔརཱཛཡོ བྷཝཏི, ཨཡཾ ཀལི ཨཡཾ དྷནཔརཱཛཡོ ཨཔྤམཏྟོ ཧོཏི། ཡོ པུགྒལོ སུགཏེསུ མནཾ པདོསཡེ, ཏསྶ པུགྒལསྶ ཡོ ཀལི བྷཝཏི, ཨཡམེཝ ཀལི མཧནྟཏརོ ཧོཏི།

    Attanā sahāpi sabbassa dhanassa vasenapi akkhesu yo dhanaparājayo bhavati, ayaṃ kali ayaṃ dhanaparājayo appamatto hoti. Yo puggalo sugatesu manaṃ padosaye, tassa puggalassa yo kali bhavati, ayameva kali mahantataro hoti.

    ཀསྨཱ? ཝཱཙཉྩ མནཉྩ པཎིདྷཱཡ ཨརིཡགརཧཱི པུགྒལོ ཡཾ ཀཱལཾ པཱཔཀཾ ནིརཡཾ ཨུཔེཏི, སོ ཀཱལོ ‘‘སཏཾ སཧསྶཱནཾ ནིརབྦུདཱནཉྩ ཚཏྟིཾས ནིརབྦུདཱནི ཙ པཉྩ ཨབྦུདཱནི ཙ ཡསྨིཾ ཀཱལེ གཎཱིཡནྟཱི’’ཏི ཏེན ཀཱལེན སམོ ཧོཏི, ཏསྨཱ མཧནྟཏརོ ཧོཏཱིཏི ཡོཛནཱ།

    Kasmā? Vācañca manañca paṇidhāya ariyagarahī puggalo yaṃ kālaṃ pāpakaṃ nirayaṃ upeti, so kālo ‘‘sataṃ sahassānaṃ nirabbudānañca chattiṃsa nirabbudāni ca pañca abbudāni ca yasmiṃ kāle gaṇīyantī’’ti tena kālena samo hoti, tasmā mahantataro hotīti yojanā.

    ‘‘ཡོ ལོབྷགུཎེ ཨནུཡུཏྟོ…པེ॰…

    ‘‘Yo lobhaguṇe anuyutto…pe…

    གཙྪསི ཁོ པཔཏཾ ཙིརརཏྟ’’ནྟི༎ –

    Gacchasi kho papataṃ ciraratta’’nti. –

    ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ། ཡོ པུགྒལོ ལོབྷགུཎེ ཨནུཡུཏྟོ ཨནུ པུནཔྤུནཾ ཡུཏྟོ ཧོཏི, སོ པུགྒལོ ཨཉྙེ པུགྒལེ ཝཙསཱ པརིབྷཱསཏི, ཨསྶདྡྷོ ཀདརིཡོ ཨཝདཉྙཱུ བུདྡྷཱནཾ ཨོཝཱདཉྙཱུ ན ཧོཏི, མཙྪརཱི པེསུཎིཡཾ པེསུཎིཡསྨིཾ ཨནུཡུཏྟོ ཧོཏི།

    Idaṃ suttampi saṃkilesabhāgiyaṃ suttaṃ nāma. Yo puggalo lobhaguṇe anuyutto anu punappunaṃ yutto hoti, so puggalo aññe puggale vacasā paribhāsati, assaddho kadariyo avadaññū buddhānaṃ ovādaññū na hoti, maccharī pesuṇiyaṃ pesuṇiyasmiṃ anuyutto hoti.

    མུཁདུགྒ མུཁཝིསམ ཝིབྷཱུཏ ཝིགཏབྷཱུཏ ཨནརིཡ བྷཱུནཧུ བུདྡྷིཝིནཱསཀ པཱཔཀ དུཀྐཊཀཱརི པུརིསནྟ པུརིསལཱམཀ ཀལི ཨལཀྑི ཨཝཛཱཏཔུཏྟ ཏྭཾ ནེརཡིཀོ ཨསི། ཨིདྷ ཨིདཱནི བཧུབྷཱཎཱི མཱ ཧོཧི།

    Mukhadugga mukhavisama vibhūta vigatabhūta anariya bhūnahu buddhivināsaka pāpaka dukkaṭakāri purisanta purisalāmaka kali alakkhi avajātaputta tvaṃ nerayiko asi. Idha idāni bahubhāṇī mā hohi.

    ཨཧིཏཱཡ རཛཾ ཨཏྟནི མཱ ཨཱཀིརསི མཱ པཀྑིཔསི། ཀིབྦིསཀཱརི ཏྭཾ སནྟེ ཁཱིཎཱསཝེ པུགྒལེ གརཧསི, བཧཱུནི དུཙྩརིཏཱནི ཀམྨཱནི ཙརསི, ཙརིཏྭཱ ཏྭཾ ཙིརརཏྟཾ རཙནཝིརཧིཏཾ པཔཏཾ ནརཀཾ ནིརཡཾ གཙྪསི ཁོ ཨེཀཾསེནཱཏི ཡོཛནཱ།

    Ahitāya rajaṃ attani mā ākirasi mā pakkhipasi. Kibbisakāri tvaṃ sante khīṇāsave puggale garahasi, bahūni duccaritāni kammāni carasi, caritvā tvaṃ cirarattaṃ racanavirahitaṃ papataṃ narakaṃ nirayaṃ gacchasi kho ekaṃsenāti yojanā.

    ནཱནཱཝིདྷཾ སཾཀིལེསབྷཱགིཡཾ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ ཝཱསནཱབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ཝཱསནཱབྷཱགིཡཾ སུཏྟ’’ནྟིཨཱདི ཝུཏྟཾ། ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ ཝཱསནཱབྷཱགིཡཾ སུཏྟཾ ནཱམཱཏི པུཙྪཏི། ‘‘མནོཔུབྦངྒམཱ དྷམྨཱ…པེ॰… ཚཱཡཱཝ ཨནཔཱཡིནཱི’’ཏི ཨིདཾ ཝཱསནཱབྷཱགེ པུཉྙབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཝཱསནཱབྷཱགིཡཾ སུཏྟཾ ནཱམ། ཨཏྠོ པཱཀཊོ།

    Nānāvidhaṃ saṃkilesabhāgiyaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ vāsanābhāgiyaṃ sutta’’nti pucchitabbattā ‘‘tattha katamaṃ vāsanābhāgiyaṃ sutta’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu katamaṃ suttaṃ vāsanābhāgiyaṃ suttaṃ nāmāti pucchati. ‘‘Manopubbaṅgamā dhammā…pe… chāyāva anapāyinī’’ti idaṃ vāsanābhāge puññabhāge visaye vācakañāpakabhāvena pavattanato vāsanābhāgiyaṃ suttaṃ nāma. Attho pākaṭo.

    ༩༣. ‘‘མཧཱནཱམོ སཀྐོ བྷགཝནྟཾ ཨེཏདཝོཙ…པེ॰… ཨཔཱཔིཀཱ ཀཱལངྐིརིཡཱ’’ཏི ཨིདཾ སུཏྟམྤི ཝཱསནཱབྷཱགེ པུཉྙབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཝཱསནཱབྷཱགིཡཾ སུཏྟཾ ནཱམ། ཨཏྠོ པཱཀཊོ།

    93. ‘‘Mahānāmo sakko bhagavantaṃ etadavoca…pe… apāpikā kālaṅkiriyā’’ti idaṃ suttampi vāsanābhāge puññabhāge visaye vācakañāpakabhāvena pavattanato vāsanābhāgiyaṃ suttaṃ nāma. Attho pākaṭo.

    ‘‘སུཁཀཱམཱནི བྷཱུཏཱནི, ཡོ དཎྜེན ན ཧིཾསཏི།

    ‘‘Sukhakāmāni bhūtāni, yo daṇḍena na hiṃsati;

    ཨཏྟནོ སུཁམེསཱནོ, པེཙྩ སོ ལབྷཏེ སུཁ’’ནྟི༎ –

    Attano sukhamesāno, pecca so labhate sukha’’nti. –

    ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ། ཨཏྠོ པཱཀཊོ།

    Idaṃ suttampi vāsanābhāgiyaṃ suttaṃ nāma. Attho pākaṭo.

    ‘‘གུནྣཾ ཙེ ཏརམཱནཱནཾ…པེ॰… རཱཛཱ ཙེ ཧོཏི དྷམྨིཀོ’’ཏི ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ། ཨཏྠོ པཱཀཊོ།

    ‘‘Gunnaṃ ce taramānānaṃ…pe… rājā ce hoti dhammiko’’ti idaṃ suttampi vāsanābhāgiyaṃ suttaṃ nāma. Attho pākaṭo.

    ༩༤. ‘‘བྷགཝཱ སཱཝཏྠིཡཾ ཝིཧརཏི…པེ॰… ཨེཝཾ པཛཱནཱཏཱི’’ཏི ཨིདཾ སུཏྟམྤི ཝཱསནཱ…པེ॰… སུཏྟཾ ནཱམ། ཨཏྠོ པཱཀཊོ།

    94. ‘‘Bhagavā sāvatthiyaṃ viharati…pe… evaṃ pajānātī’’ti idaṃ suttampi vāsanā…pe… suttaṃ nāma. Attho pākaṭo.

    ‘‘ཀསྨཱ བྷགཝཱ ཛནཔདཙཱརིཀཾ ཙརཏཱི’’ཏི པུཙྪེཡྻ, སཏྟཧི ཀཱརཎེཧི བུདྡྷཱ བྷགཝནྟོ ཛནཔདཙཱརིཀཾ ཙརནྟི། ཀཏམེཧི སཏྟཧི? དེསནྟརགཏཱནཾ ཝེནེཡྻཱནཾ ཝིནཡནཏྠཾ, ཏཏྲ ཋིཏཱནཾ ཨུསྶུཀྐསམུཔྤཱདནཏྠཾ, སཱཝཀཱནཾ ཨེཀསྨིཾ ཋཱནེ ནིབདྡྷཝཱསནིཝཱརཎཏྠཾ, ཨཏྟནོ ཙ ཏཏྠ ནིབདྡྷཝཱསེ ཨནཱསངྒདསྶནཏྠཾ, སམྦུདྡྷཝསིཏཊྛཱནཏཱཡ དེསཱནཾ ཙེཏིཡབྷཱཝསམྤཱདནཏྠཾ, བཧཱུནཾ སཏྟཱནཾ དསྶནཱུཔསངྐམནཱདཱིཧི པུཉྙོགྷཔྤསཝནཏྠཾ, ཨཝུཊྛིཨཱདིཨུཔདྡཝཱུཔསམནཏྠཉྩཱཏི ཨིམེཧི སཏྟཧི ཀཱརཎེཧི བུདྡྷཱ བྷགཝནྟོ ཛནཔདཙཱརིཀཾ ཙརནྟཱིཏི ཛནཔདཙརཎཀཱརཎཾ ཝེདིཏབྦཾ།

    ‘‘Kasmā bhagavā janapadacārikaṃ caratī’’ti puccheyya, sattahi kāraṇehi buddhā bhagavanto janapadacārikaṃ caranti. Katamehi sattahi? Desantaragatānaṃ veneyyānaṃ vinayanatthaṃ, tatra ṭhitānaṃ ussukkasamuppādanatthaṃ, sāvakānaṃ ekasmiṃ ṭhāne nibaddhavāsanivāraṇatthaṃ, attano ca tattha nibaddhavāse anāsaṅgadassanatthaṃ, sambuddhavasitaṭṭhānatāya desānaṃ cetiyabhāvasampādanatthaṃ, bahūnaṃ sattānaṃ dassanūpasaṅkamanādīhi puññoghappasavanatthaṃ, avuṭṭhiādiupaddavūpasamanatthañcāti imehi sattahi kāraṇehi buddhā bhagavanto janapadacārikaṃ carantīti janapadacaraṇakāraṇaṃ veditabbaṃ.

    ‘‘ཨེཀཔུཔྥཾ ཙཛིཏྭཱན, སཧསྶཾ ཀཔྤཀོཊིཡོ།

    ‘‘Ekapupphaṃ cajitvāna, sahassaṃ kappakoṭiyo;

    དེཝེ ཙེཝ མནུསྶེ ཙ, སེསེན པརིནིབྦུཏོ’’ཏི༎ –

    Deve ceva manusse ca, sesena parinibbuto’’ti. –

    ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ། སཧསྶཾ ཀཔྤཀོཊིཡོཏི སཧསྶཾ ཨཏྟབྷཱཝཏོ ཀོཊིཡོ།

    Idaṃ suttampi vāsanābhāgiyaṃ suttaṃ nāma. Sahassaṃ kappakoṭiyoti sahassaṃ attabhāvato koṭiyo.

    ‘‘ཨསྶཏྠེ ཧརིཏོབྷཱསེ, སཾཝིརཱུལ༹ྷམྷི པཱདཔེ།

    ‘‘Assatthe haritobhāse, saṃvirūḷhamhi pādape;

    ཨེཀཾ བུདྡྷགཏཾ སཉྙཾ, ཨལབྷིཾཧཾ པཏིསྶཏོ༎

    Ekaṃ buddhagataṃ saññaṃ, alabhiṃhaṃ patissato.

    ‘‘ཨཛྫ ཏིཾསཾ ཏཏོ ཀཔྤཱ, ནཱབྷིཛཱནཱམི དུགྒཏིཾ།

    ‘‘Ajja tiṃsaṃ tato kappā, nābhijānāmi duggatiṃ;

    ཏིསྶོ ཝིཛྫཱ སཙྪིཀཏཱ, ཏསྶཱ སཉྙཱཡ ཝཱསནཱ’’ཏི༎ –

    Tisso vijjā sacchikatā, tassā saññāya vāsanā’’ti. –

    ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ། ཧརིཏོབྷཱསེཏི ཧརིཏཨོབྷཱསེ། ཨལབྷིཾཧནྟི ཨཧཾ ཨལབྷིཾ།

    Idaṃ suttampi vāsanābhāgiyaṃ suttaṃ nāma. Haritobhāseti haritaobhāse. Alabhiṃhanti ahaṃ alabhiṃ.

    ‘‘པིཎྜཱཡ ཀོསལཾ པུརཾ…པེ॰… ཝིཔཱཀོ ཧོཏི ཨཙིནྟིཡོ’’ཏི ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ། ཨགྒཔུགྒལོ ཨནུཀམྤཀོ ཏཎྷཱནིགྷཱཏཀོ མུནི སམྦུདྡྷོ པུརེབྷཏྟཾ པིཎྜཱཡ པིཎྜཾ པཊིགྒཎྷིཏུཾ ཀོསལཾ པུརཾ པཱཝིསི།

    ‘‘Piṇḍāya kosalaṃ puraṃ…pe… vipāko hoti acintiyo’’ti idaṃ suttampi vāsanābhāgiyaṃ suttaṃ nāma. Aggapuggalo anukampako taṇhānighātako muni sambuddho purebhattaṃ piṇḍāya piṇḍaṃ paṭiggaṇhituṃ kosalaṃ puraṃ pāvisi.

    ཡསྶ པུརིསསྶ ཧཏྠེ སབྦཔུཔྥེཧི ཨལངྐཏོ ཝཊཾསཀོ པུཔྥཝཊཾསཀོཝ ཨཏྠི, སོ ཨཡཾ པུརིསོ རཱཛམགྒེན ཀོསལཔུརཾ པཝིསནྟཾ བྷིཀྑུསངྒྷཔུརཀྑཏཾ དེཝམཱནུསཔཱུཛིཏཾ སམྦུདྡྷཾ ཨདྡས, དིསྭཱ ཧཊྛོ ཙིཏྟཾ པསཱདེསི; པསཱདེཏྭཱ སམྦུདྡྷཾ ཨུཔསངྐམི།

    Yassa purisassa hatthe sabbapupphehi alaṅkato vaṭaṃsako pupphavaṭaṃsakova atthi, so ayaṃ puriso rājamaggena kosalapuraṃ pavisantaṃ bhikkhusaṅghapurakkhataṃ devamānusapūjitaṃ sambuddhaṃ addasa, disvā haṭṭho cittaṃ pasādesi; pasādetvā sambuddhaṃ upasaṅkami.

    ཨུཔསངྐམིཏྭཱ སོ ཨཡཾ པསནྣོ ཧུཏྭཱ སུརབྷིཾ ཝཎྞཝནྟཾ མནོརམཾ ཏཾ ཝཊཾསཀཾ སམྦུདྡྷསྶ སེཧི པཱཎཱིབྷི ཨུཔནཱམེསི།

    Upasaṅkamitvā so ayaṃ pasanno hutvā surabhiṃ vaṇṇavantaṃ manoramaṃ taṃ vaṭaṃsakaṃ sambuddhassa sehi pāṇībhi upanāmesi.

    ཏཏོ བུདྡྷསྶ ལཔནནྟརཱ ལཔནསྶ ཝདནསྶ ཨནྟརཱ ཨགྒིསིཁཱ ཝཎྞཱ སཧསྶརཾསི ཨོཀྐཱ པབྷཱ ནིཀྑམི, ཨབྦྷཱ ཝིཛྫུ ནིཀྑམཏི ཨིཝ, ཨེཝཾ ཨཱནནཱ སཧསྶརཾསི ནིཀྑམིཏྭཱ ཨཱདིཙྩབནྡྷུནོ སཱིསེ ཏིཀྑཏྟུཾ པདཀྑིཎཾ ཀརིཏྭཱན པརིཝཊྚེཏྭཱ མུདྡྷནི ཨནྟརདྷཱཡཐ།

    Tato buddhassa lapanantarā lapanassa vadanassa antarā aggisikhā vaṇṇā sahassaraṃsi okkā pabhā nikkhami, abbhā vijju nikkhamati iva, evaṃ ānanā sahassaraṃsi nikkhamitvā ādiccabandhuno sīse tikkhattuṃ padakkhiṇaṃ karitvāna parivaṭṭetvā muddhani antaradhāyatha.

    ཨཱནནྡོ ཨཙྪརིཡཾ ཨབྦྷུཏཾ ལོམཧཾསནཾ ཨིདཾ པཱཊིཧཱརིཡཾ དིསྭཱ ཙཱིཝརཾ ཨེཀཾསཾ ཀརིཏྭཱ ཨེཏཾ ཨབྲཝི – ‘‘མཧཱམུནི, སིཏཀམྨསྶ ཧེཏུ ཀོ? ཏཾ ཧེཏུཾ བྱཱཀརོཧི, དྷམྨཱལོཀོ བྷཝིསྶཏཱི’’ཏི།

    Ānando acchariyaṃ abbhutaṃ lomahaṃsanaṃ idaṃ pāṭihāriyaṃ disvā cīvaraṃ ekaṃsaṃ karitvā etaṃ abravi – ‘‘mahāmuni, sitakammassa hetu ko? Taṃ hetuṃ byākarohi, dhammāloko bhavissatī’’ti.

    ཡསྶ བྷགཝཏོ སབྦདྷམྨེསུ ཉཱཎཾ སདཱ པཝཏྟཏི, ཀངྑཱཝིཏརཎོ མུནི སོ བྷགཝཱ ཀངྑིཾ ཝེམཏིཀཾ ཨཱནནྡཾ ཐེརཾ ཨེཏཾ ཨབྲཝི། ཨཱནནྡ, ཡོ སོཔུརིསོ མཡི ཙིཏྟཾ པསཱདཡི, སོ པུརིསོ ཙཏུརཱསཱིཏིཀཔྤཱནི དུགྒཏིཾ ན གམིསྶཏི, དེཝེསུ དེཝསོབྷགྒཾ དིབྦཾ རཛྫཾ པསཱསིཏྭཱ མནུཛེསུ རཊྛེ སཀལརཊྛེ མནུཛིནྡོ རཱཛཱ བྷཝིསྶཏི། སོ པུརིསོ ཙརིམཾ པབྦཛིཏྭཱ, དྷམྨཏཾ སཙྪིཀཏྭཱ ཙ དྷུཏརཱགོ ཝཊཾསཀོ ནཱམ པཙྩེཀབུདྡྷོ བྷཝིསྶཏི།

    Yassa bhagavato sabbadhammesu ñāṇaṃ sadā pavattati, kaṅkhāvitaraṇo muni so bhagavā kaṅkhiṃ vematikaṃ ānandaṃ theraṃ etaṃ abravi. Ānanda, yo sopuriso mayi cittaṃ pasādayi, so puriso caturāsītikappāni duggatiṃ na gamissati, devesu devasobhaggaṃ dibbaṃ rajjaṃ pasāsitvā manujesu raṭṭhe sakalaraṭṭhe manujindo rājā bhavissati. So puriso carimaṃ pabbajitvā, dhammataṃ sacchikatvā ca dhutarāgo vaṭaṃsako nāma paccekabuddho bhavissati.

    ཏཐཱགཏེ ཝཱ སམྨཱསམྦུདྡྷེ ཝཱ པཙྩེཀསམྦུདྡྷེ ཝཱ ཏསྶ ཏཐཱགཏསྶ སཱཝཀེ ཝཱ ཙིཏྟེ པསནྣམྷི དཀྑིཎཱ ཨཔྤཀཱ ནཱམ ནཏྠི།

    Tathāgate vā sammāsambuddhe vā paccekasambuddhe vā tassa tathāgatassa sāvake vā citte pasannamhi dakkhiṇā appakā nāma natthi.

    བུདྡྷཱ ཨེཝཾ ཨེཏྟཀཱཏི ཨཙིནྟིཡཱ བྷཝནྟི། བུདྡྷདྷམྨཱ བུདྡྷགུཎཱ ཨེཝཾ ཨེཏྟཀཱཏི ཨཙིནྟིཡཱ བྷཝནྟི, ཨཙིནྟིཡེ པསནྣཱནཾ ཝིཔཱཀོ པུཉྙཝིཔཱཀོ ཨེཝཾ ཨེཏྟཀོཏི ཨཙིནྟིཡོ ཧོཏཱིཏི ཨེཏཾ ཨབྲཝཱིཏི ཡོཛནཱ།

    Buddhā evaṃ ettakāti acintiyā bhavanti. Buddhadhammā buddhaguṇā evaṃ ettakāti acintiyā bhavanti, acintiye pasannānaṃ vipāko puññavipāko evaṃ ettakoti acintiyo hotīti etaṃ abravīti yojanā.

    ༩༦. ‘‘ཨིདྷཱཧཾ , བྷིཀྑཝེ, ཨེཀཙྩཾ པུགྒལཾ…པེ॰… ཨཡམྤི ཨཏྠོ ཝུཏྟོ བྷགཝཏཱ ཨིཏི མེ སུཏ’’ནྟི ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ། བྷིཀྑཝེ, ཨིདྷ ཨིམསྨིཾ སཱསནེ ཨཧཾ ཨེཀཙྩཾ པུགྒལཾ ཨེཝཾ མམ ཙེཏསཱ ཨེཀཙྩསྶ པུགྒལསྶ ཙེཏོ ཙིཏྟཾ པརིཙྩ བུདྡྷཙཀྑུནཱ ཨེཝཾ པཛཱནཱམི, ཡཐཱ ཡེན པཀཱརེན ཨཡཾ པུགྒལོ ཡཉྩ དཱནཱདིཔཊིཔདཾ པཊིཔནྣོ, ཡཉྩ དསྶནཱདིམགྒཾ སམཱརུལ༹ྷོ ཧུཏྭཱ ཏཾ པཊིཔདཾ, མགྒཉྩ ཨིརིཡཏི པཝཏྟེཏི, ཨིམམྷི ཨིམསྨིཉྩ སམཡེ ཨཡཾ པུགྒལོ ཙེ ཀཱལཾ ཀརེཡྻ, ཨེཝཾ སཏི ཨཱབྷཏཾ ཝཏྠུཾ ནིཀྑིཔཏི ཡཐཱ, ཨེཝཾ ཏཱཡ པཊིཔདཱཡ ཏེན མགྒེན སགྒེ ཨཏྟནིཀྑིཏྟོ བྷཝེ། ཏཾ ཀིསྶ ཧེཏུ? བྷིཀྑཝེ, ཨསྶ པུགྒལསྶ ཙིཏྟཾ ཧི ཡསྨཱ པསནྣཾ པསཱདིཏཾ, ཏསྨཱ ནིཀྑིཏྟོ བྷཝེ། ཨིདྷ སཱསནེ, ལོཀེ ཝཱ ཨེཀཙྩེ སཏྟཱ པུགྒལཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཙེཏོཔསཱདཧེཏུ ཁོ པན ཨུཔཔཛྫནྟཱིཏི ཨེཝཾ ཨཧཾ པཛཱནཱམཱིཏི བྷགཝཱ ཨེཏམཏྠཾ ཨཝོཙ། ཏཏྠ ཏསྨིཾ ཨཏྠེ སངྒཧཝསེན པཝཏྟཾ ཨེཏཾ ‘‘པསནྣཙིཏྟཾ ཉཏྭཱན…པེ॰… སགྒཾ སོ ཨུཔཔཛྫཏཱི’’ཏི གཱཐཱཝཙནཾ ཝུཙྩཏི། ཨཡམྤི ཨཏྠོ བྷགཝཏཱ ཝུཏྟོ, ཨིཏི མེ མཡཱ སུཏནྟི ཡོཛནཱ།

    96. ‘‘Idhāhaṃ , bhikkhave, ekaccaṃ puggalaṃ…pe… ayampi attho vutto bhagavatā iti me suta’’nti idaṃ suttampi vāsanābhāgiyaṃ suttaṃ nāma. Bhikkhave, idha imasmiṃ sāsane ahaṃ ekaccaṃ puggalaṃ evaṃ mama cetasā ekaccassa puggalassa ceto cittaṃ paricca buddhacakkhunā evaṃ pajānāmi, yathā yena pakārena ayaṃ puggalo yañca dānādipaṭipadaṃ paṭipanno, yañca dassanādimaggaṃ samāruḷho hutvā taṃ paṭipadaṃ, maggañca iriyati pavatteti, imamhi imasmiñca samaye ayaṃ puggalo ce kālaṃ kareyya, evaṃ sati ābhataṃ vatthuṃ nikkhipati yathā, evaṃ tāya paṭipadāya tena maggena sagge attanikkhitto bhave. Taṃ kissa hetu? Bhikkhave, assa puggalassa cittaṃ hi yasmā pasannaṃ pasāditaṃ, tasmā nikkhitto bhave. Idha sāsane, loke vā ekacce sattā puggalā kāyassa bhedā paraṃ maraṇā sugatiṃ saggaṃ lokaṃ cetopasādahetu kho pana upapajjantīti evaṃ ahaṃ pajānāmīti bhagavā etamatthaṃ avoca. Tattha tasmiṃ atthe saṅgahavasena pavattaṃ etaṃ ‘‘pasannacittaṃ ñatvāna…pe… saggaṃ so upapajjatī’’ti gāthāvacanaṃ vuccati. Ayampi attho bhagavatā vutto, iti me mayā sutanti yojanā.

    ‘‘སུཝཎྞཙྪདནཾ ནཱཝཾ…པེ॰… ཨེཏཱདིསཾ ཀཏཔུཉྙཱ ལབྷི’’ནྟི ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ། ནཱརི དེཝདྷཱིཏཱ སུཝཎྞཙྪདནཾ སུཝཎྞཱལངྐཱརེཧི ཚཱདིཏཾ ནཱཝཾ ཨཱརུཡ྄ཧ ཏིཊྛསི, པོཀྑརཎིཾ དེཝཔོཀྑརཎིཾ ཨོགཱཧསི, པདུམཾ པཱཎིནཱ ཚིནྡསི།

    ‘‘Suvaṇṇacchadanaṃ nāvaṃ…pe… etādisaṃ katapuññā labhi’’nti idaṃ suttampi vāsanābhāgiyaṃ suttaṃ nāma. Nāri devadhītā suvaṇṇacchadanaṃ suvaṇṇālaṅkārehi chāditaṃ nāvaṃ āruyha tiṭṭhasi, pokkharaṇiṃ devapokkharaṇiṃ ogāhasi, padumaṃ pāṇinā chindasi.

    དེཝཏེ ཀེན ཀམྨེན ཏེ ཏཝ ཏཱདིསོ ཝཎྞོ ཏཱདིསོ ཨཱནུབྷཱཝོ ཏཱདིསཱི ཛུཏི བྷཝཏི, དེཝཏེ ཏེ ཏཝ ཡེ ཀེཙི བྷོགཱ མནསཱ ཨིཙྪིཏཱ བྷཝནྟི, ཏེ བྷོགཱ ཙ ཀེན ཀམྨེན ཨུཔྤཛྫནྟི། དེཝཏེ མེ པུཙྪིཏཱ ཏྭཾ སཾས སཾསཱཧི ཨིདཾ སབྦཾ ཀིསྶ ཀམྨསྶ ཙ ཕལནྟི སཀྐོ པུཙྪཏི།

    Devate kena kammena te tava tādiso vaṇṇo tādiso ānubhāvo tādisī juti bhavati, devate te tava ye keci bhogā manasā icchitā bhavanti, te bhogā ca kena kammena uppajjanti. Devate me pucchitā tvaṃ saṃsa saṃsāhi idaṃ sabbaṃ kissa kammassa ca phalanti sakko pucchati.

    དེཝརཱཛེན པུཙྪིཏཱ སཱ དེཝདྷཱིཏཱ ཨཏྟམནཱ ཧུཏྭཱ པཉྷཾ པུཊྛཱ སཀྐསྶ བྱཱཀཱསི། དེཝརཱཛཱ ཨདྡྷཱནཾ དཱིགྷམགྒཾ པཊིཔནྣཱ ཨཧཾ ཡསསྶིནོ ཀསྶཔསྶ བྷགཝཏོ མནོརམཾ ཐཱུཔཾ ཨདྡསྶཾ, དིསྭཱ ཏཏྠ ཐཱུཔེ ཙིཏྟཾ པསཱདེསིཾ། པསནྣཱཧཾ སེཧི པཱཎཱིཧི པདུམཔུཔྥེཧི པཱུཛེསིཾ། ཏསྶེཝ ཀམྨསྶ ཨིདཾ སབྦཾ ཕལཾ ཝིཔཱཀོ བྷཝེ། ཀཏཔུཉྙཱཧཾ ཨེཏཱདིསཾ ཕལཾ ཨལབྷིནྟི སཀྐསྶ བྱཱཀཱསི། ཨིཏི མེ སུཏནྟི མཧཱམོགྒལླཱནོ ཝདཏཱིཏི ཡོཛནཱ།

    Devarājena pucchitā sā devadhītā attamanā hutvā pañhaṃ puṭṭhā sakkassa byākāsi. Devarājā addhānaṃ dīghamaggaṃ paṭipannā ahaṃ yasassino kassapassa bhagavato manoramaṃ thūpaṃ addassaṃ, disvā tattha thūpe cittaṃ pasādesiṃ. Pasannāhaṃ sehi pāṇīhi padumapupphehi pūjesiṃ. Tasseva kammassa idaṃ sabbaṃ phalaṃ vipāko bhave. Katapuññāhaṃ etādisaṃ phalaṃ alabhinti sakkassa byākāsi. Iti me sutanti mahāmoggallāno vadatīti yojanā.

    ‘‘ཡཐཱནིདྡྷཱརིཏསུཏྟཱནིཡེཝ ཝཱསནཱབྷཱགིཡསུཏྟཱནི པརིཔུཎྞཱནཱི’’ཏི ཝཏྟབྦཏྟཱ ‘‘དཱནཀཐཱ སཱིལཀཐཱ སགྒཀཐཱ པུཉྙཀཐཱ པུཉྙཝིཔཱཀཀཐཱཏི ཨིདཾ ཝཱསནཱབྷཱགིཡ’’ནྟིཨཱདི ཝུཏྟཾ། ཏཏྠ ཡཱཡ དེསནཱཡ དཱནཉྩ དཱནཕལཉྩ དསྶིཏཾ, སཱ དེསནཱ དཱནཀཐཱ ནཱམ། ཡཱཡ དེསནཱཡ སཱིལཉྩ སཱིལཕལཉྩ དསྶིཏཾ, སཱ དེསནཱ སཱིལཀཐཱ ནཱམ། ཡཱཡ དེསནཱཡ སགྒཱ ཙ སགྒེསུ ནིབྦཏྟཱཔཀཉྩ ཀམྨཾ དསྶིཏཾ, སཱ སགྒཀཐཱ ནཱམ། ཡཱཡ དེསནཱཡ དཱནསཱིལབྷཱཝནཱདིཝསེན དསཝིདྷཾ པུཉྙཀམྨཾ དསྶིཏཾ, སཱ པུཉྙཀཐཱ ནཱམ། ཡཱཡ དེསནཱཡ ཏཱདིསསྶ པུཉྙཀམྨསྶ ཝིཝིདྷོ ཨཡཾ ཝིཔཱཀོ ཨིམསྶ པུཉྙསྶ ཝིཔཱཀོཏི ནིཡམེཏྭཱ དསྶིཏོ, སཱ པུཉྙཝིཔཱཀཀཐཱ ནཱམ།

    ‘‘Yathāniddhāritasuttāniyeva vāsanābhāgiyasuttāni paripuṇṇānī’’ti vattabbattā ‘‘dānakathā sīlakathā saggakathā puññakathā puññavipākakathāti idaṃ vāsanābhāgiya’’ntiādi vuttaṃ. Tattha yāya desanāya dānañca dānaphalañca dassitaṃ, sā desanā dānakathā nāma. Yāya desanāya sīlañca sīlaphalañca dassitaṃ, sā desanā sīlakathā nāma. Yāya desanāya saggā ca saggesu nibbattāpakañca kammaṃ dassitaṃ, sā saggakathā nāma. Yāya desanāya dānasīlabhāvanādivasena dasavidhaṃ puññakammaṃ dassitaṃ, sā puññakathā nāma. Yāya desanāya tādisassa puññakammassa vividho ayaṃ vipāko imassa puññassa vipākoti niyametvā dassito, sā puññavipākakathā nāma.

    དསབལདྷརཱནཾ སམྨཱསམྦུདྡྷཱནཾ ཨུདྡིསྶཀཏེསུ སརཱིརདྷཱཏུཾ ཨབྦྷནྟརེ ཋཔེཏྭཱ པཾསཱུཧི ཀཏེསུ ཐཱུཔེསུ ཡེ ནརཱ པསནྣཱ, ཏེ ནརཱ ཏཏྠ ཐཱུཔེ ཀཱརཾ པུཉྙཾ ཀཏྭཱ སགྒེསུ ཨུཔྤཛྫིཏྭཱ པམོདནྟཱིཏི ཡོཛནཱ། ཨིདཾ སུཏྟཾ ཝཱ…པེ॰… སུཏྟཾ།

    Dasabaladharānaṃ sammāsambuddhānaṃ uddissakatesu sarīradhātuṃ abbhantare ṭhapetvā paṃsūhi katesu thūpesu ye narā pasannā, te narā tattha thūpe kāraṃ puññaṃ katvā saggesu uppajjitvā pamodantīti yojanā. Idaṃ suttaṃ vā…pe… suttaṃ.

    ༩༧. དེཝཔུཏྟསརཱིརཝཎྞཱ དེཝཔུཏྟསརཱིརསདིསཝཎྞཱ སུབྷགསཎྛིཏི སོབྷགྒཡུཏྟསཎྛཱནཱ སབྦེ ཛནཱ ཨུདཀེན པཾསུཾ ཏེམེཏྭཱ ཐཱུཔཾ ཝཌྜྷེཐ, སོ ཨཡཾ ཐཱུཔོ ཀསྶ པུགྒལསྶ ཐཱུཔོཏི པུཙྪཏི།

    97.Devaputtasarīravaṇṇā devaputtasarīrasadisavaṇṇā subhagasaṇṭhiti sobhaggayuttasaṇṭhānā sabbe janā udakena paṃsuṃ temetvā thūpaṃ vaḍḍhetha, so ayaṃ thūpo kassa puggalassa thūpoti pucchati.

    སུགཏྟེ སུནྡརགཏྟེ དེཝཏེ ཏསྨིཾ ཐཱུཔེ པསནྣཱ ཨིམེ དེཝམནུཛཱ ཀཱརཾ པུཉྙཾ ཀརོནྟཱ ཧུཏྭཱ ཛརཱམརཎཏོ པམུཙྩརེ། སོ ཨཡཾ ཐཱུཔོ མཧེསིནོ དསབལདྷམྨདྷཱརིནོ སུགཏསྶ ཐཱུཔོཏི ཝེདིཏབྦོཏི ཨཱཧཱཏི ཡོཛནཱ། ཨིདཾ སུཏྟཾ ཝཱ…པེ॰… སུཏྟཾ།

    Sugatte sundaragatte devate tasmiṃ thūpe pasannā ime devamanujā kāraṃ puññaṃ karontā hutvā jarāmaraṇato pamuccare. So ayaṃ thūpo mahesino dasabaladhammadhārino sugatassa thūpoti veditabboti āhāti yojanā. Idaṃ suttaṃ vā…pe… suttaṃ.

    ཡཱཧཾ ཡཱ ཨཧཾ མཧེསིནོ ཐཱུཔཾ ཙཏྟཱརི ཨུཔྤལཱནི ཙ མཱལཉྩ ཨབྷིརོཔཡིཾ, ཏེན མཡཱ ཀཏཾ ཏཾ པུཉྙཾ ཨུལཱ༹རཾ ཝཏ ཨཱསི ཨཧོསི། ཏཏོ ཀཔྤཏོ ཨཛྫ ཀཔྤཱ ཏིཾསཾ དྷརནྟི སཏྠུནོ ཐཱུཔཾ པཱུཛེཏྭཱ ཏཏྟཀཱནི དུགྒཏིཾ ན ཛཱནཱམི, ཝིནིཔཱཏཾ ན གཙྪཱམཱིཏི ཡོཛནཱ། ཨིདཾ སུཏྟཾ ཝཱ…པེ॰… སུཏྟཾ།

    Yāhaṃ yā ahaṃ mahesino thūpaṃ cattāri uppalāni ca mālañca abhiropayiṃ, tena mayā kataṃ taṃ puññaṃ uḷāraṃ vata āsi ahosi. Tato kappato ajja kappā tiṃsaṃ dharanti satthuno thūpaṃ pūjetvā tattakāni duggatiṃ na jānāmi, vinipātaṃ na gacchāmīti yojanā. Idaṃ suttaṃ vā…pe… suttaṃ.

    ཨཧཾ བཱཏྟིཾསལཀྑཎདྷརསྶ བཱཏྟིཾསལཀྑཎདྷརེན སམྤནྣསྶ ཝིཛིཏཝིཛཡསྶ ལོཀནཱཐསྶ ཐཱུཔཾ ཨཔཱུཛེསིཾ, པཱུཛེཏྭཱ སཏསཧསྶཾ ཀཔྤེ ཨཱཡུཀཔྤེ པམུདིཏོ ཨཱསིཾ། མཡཱ ཡཾ པུཉྙཾ པསུཏཾ, ཏེན པུཉྙེན ཝིནིཔཱཏཾ ཨནཱགནྟུན ཨནཱགནྟྭཱ དེཝསོབྷགྒཾ སམྤཏྟིཾ ཙ དེཝརཛྫཱནི ཙ ཏཱནི ཨཀཱརིཾ ། ཨཐ ཝཱ དེཝསོབྷགྒཉྩ མཡཱ ཀཱརིཏཾ, རཛྫཱནི ཙ མཡཱ ཀཱརིཏཱནི།

    Ahaṃ bāttiṃsalakkhaṇadharassa bāttiṃsalakkhaṇadharena sampannassa vijitavijayassa lokanāthassa thūpaṃ apūjesiṃ, pūjetvā satasahassaṃ kappe āyukappe pamudito āsiṃ. Mayā yaṃ puññaṃ pasutaṃ, tena puññena vinipātaṃ anāgantuna anāgantvā devasobhaggaṃ sampattiṃ ca devarajjāni ca tāni akāriṃ . Atha vā devasobhaggañca mayā kāritaṃ, rajjāni ca mayā kāritāni.

    ཨདནྟདམཀསྶ སཱསནེ ཡཾ ཙཀྑུ པཉྙཱཙཀྑུ པཎིཧིཏཾ, ཏཐཱ ཙིཏྟཾ ཡཾ ཝིམུཏྟཙིཏྟཾ པཎིཧིཏཾ, ཏཾ སབྦཾ པཉྙཱཙཀྑུ ཝིམུཏྟཙིཏྟཾ མེ མཡཱ ལདྡྷཾ, ཨཧཾ ཝིདྷུཏལཏཱསངྑཱཏཏཎྷཱ ཧུཏྭཱ ཝིམུཏྟཙིཏྟཱ ཕལཝིམུཏྟཙིཏྟསམྤནྣཱ ཨམྷཱིཏི ཨཝོཙཱཏི ཡོཛནཱ། ཨིདཾ སུཏྟཾ ཝཱ…པེ॰… སུཏྟཾ།

    Adantadamakassa sāsane yaṃ cakkhu paññācakkhu paṇihitaṃ, tathā cittaṃ yaṃ vimuttacittaṃ paṇihitaṃ, taṃ sabbaṃ paññācakkhu vimuttacittaṃ me mayā laddhaṃ, ahaṃ vidhutalatāsaṅkhātataṇhā hutvā vimuttacittā phalavimuttacittasampannā amhīti avocāti yojanā. Idaṃ suttaṃ vā…pe… suttaṃ.

    ༩༨. ཝིམུཏྟཙིཏྟེ ཕལཝིམུཏྟཙིཏྟསམྤནྣེ ཨཁིལེ པཉྩཙེཏོཁཱིལརཧིཏེ ཨནཱསཝེ ཨརཎཝིཧཱརིམྷི ཨརཎཝིཧཱརསཱིལེ ཨསངྒམཱནསེ ཨལགྒམཱནསེ པཙྩེཀབུདྡྷསྨིཾ སཱམཱཀཔཏྠོདནམཏྟམེཝ དཀྑིཎཾ ཨདཱསིཾ།

    98.Vimuttacitte phalavimuttacittasampanne akhile pañcacetokhīlarahite anāsave araṇavihārimhi araṇavihārasīle asaṅgamānase alaggamānase paccekabuddhasmiṃ sāmākapatthodanamattameva dakkhiṇaṃ adāsiṃ.

    ཏསྨིཾ པཙྩེཀབུདྡྷེ ཨུཏྟམཾ དྷམྨཾ པཙྩེཀབོདྷིདྷམྨཾ ཨོཀཔྤཡིཾ ‘‘སོ ཨུཏྟམོ དྷམྨོ ཨཏྠཱི’’ཏི སདྡཧིཾ། ཨེཝཾ ཨརིཡཝིཧཱརེན ཝིཧཱརཱིཧི པཙྩེཀབུདྡྷེཧི མེ མམ སངྒམོ ཀཏོ སིཡཱ བྷཝེ, ཀུདཱསུཔི ཙ ཨཧཾ ཨཔེཀྑཝཱ མཱ བྷཝེཡྻནྟི མཱནསཾ ཏསྨིཉྩ དྷམྨེ པཎིདྷེསིཾ ‘‘ཨིམིནཱ པཙྩེཀབུདྡྷེན ལདྡྷདྷམྨཾ ཨཧམྤི སཙྪིཀརེཡྻ’’ནྟི ཙིཏྟཾ པཎིདཧིཾ།

    Tasmiṃ paccekabuddhe uttamaṃ dhammaṃ paccekabodhidhammaṃ okappayiṃ ‘‘so uttamo dhammo atthī’’ti saddahiṃ. Evaṃ ariyavihārena vihārīhi paccekabuddhehi me mama saṅgamo kato siyā bhave, kudāsupi ca ahaṃ apekkhavā mā bhaveyyanti mānasaṃ tasmiñca dhamme paṇidhesiṃ ‘‘iminā paccekabuddhena laddhadhammaṃ ahampi sacchikareyya’’nti cittaṃ paṇidahiṃ.

    ཏསྶེཝ པཙྩེཀབུདྡྷེ ཀཏསྶེཝ ཀམྨསྶ ཝིཔཱཀཏོ ཨཧཾ དཱིགྷཱཡུཀེསུ ཨམམེསུ ‘‘མམ པརིགྒཧོ’’ཏི པརིགྒཧཱབྷཱཝེན ཨཔརིགྒཧེསུ ཝིསེསགཱམཱིསུ ཨཧཱིནགཱམཱིསུ ཀུརཱུསུ ཨུཏྟརཀུརཱུསུ པཱཎཱིསུ སཏྟེསུ སཧསྶཀྑཏྟུཾ ཨུཔཔཛྫཐ ཨུཔཔཛྫིཾ།

    Tasseva paccekabuddhe katasseva kammassa vipākato ahaṃ dīghāyukesu amamesu ‘‘mama pariggaho’’ti pariggahābhāvena apariggahesu visesagāmīsu ahīnagāmīsu kurūsu uttarakurūsu pāṇīsu sattesu sahassakkhattuṃ upapajjatha upapajjiṃ.

    ཏསྶེཝ ཀམྨསྶ ཝིཔཱཀཏོ ཝིཙིཏྲམཱལཱབྷརཎཱནུལེཔཱིསུ ཡསསྶཱིསུ པརིཝཱརཝནྟེསུ ཏིདསོ དེཝོ ཨཧཾ ཝིསིཊྛཀཱཡཱུཔགཏོ ཧུཏྭཱ སཧསྶཀྑཏྟུཾ ཨུཔཔཛྫཐ།

    Tasseva kammassa vipākato vicitramālābharaṇānulepīsu yasassīsu parivāravantesu tidaso devo ahaṃ visiṭṭhakāyūpagato hutvā sahassakkhattuṃ upapajjatha.

    ཏསྶེཝ ཀམྨསྶ ཝིཔཱཀཏོ ཨཧཾ ཝིམུཏྟཙིཏྟོ ཨཁཱིལོ ཨནཱསཝོ ཧུཏྭཱ ཧིཏཱཧིཏཱསཱིཧི ཀུསལཱཀུསལཝཱིཏིཝཏྟེཧི ཨནྟིམདེཧདྷཱརིབྷི ཨིམེཧི པཙྩེཀབུདྡྷེཧི, བུདྡྷསཱཝཀེཧི ཝཱ མེ མམ སམཱགམོ ཨཱསི།

    Tasseva kammassa vipākato ahaṃ vimuttacitto akhīlo anāsavo hutvā hitāhitāsīhi kusalākusalavītivattehi antimadehadhāribhi imehi paccekabuddhehi, buddhasāvakehi vā me mama samāgamo āsi.

    ‘‘སཱིལཝཏོ ཡཾ ཨིཙྪིཏཾ, ཏཾ སམིཛ྄ཛྷཏེ’’ཏི ཨིམཾ ཝཙནཾ ཏཐཱགཏོ ཛིནོ པཙྩཀྑཾ ཀཏྭཱ ཨཝཙ ཁོ, ཡཐཱ ཡཐཱ ཡེན ཡེན པཀཱརེན མེ མནསཱ ཝིཙིནྟིཏཾ, ཏཐཱ ཏཐཱ ཏེན ཏེན པཀཱརེན སམིདྡྷཾ བྷཝཏི། ཨཡཾ བྷཝོ ཨནྟིམོ བྷཝོཏི ཡོཛནཱ། ཨིདཾ སུཏྟཾ ཝཱ…པེ॰… སུཏྟཾ།

    ‘‘Sīlavato yaṃ icchitaṃ, taṃ samijjhate’’ti imaṃ vacanaṃ tathāgato jino paccakkhaṃ katvā avaca kho, yathā yathā yena yena pakārena me manasā vicintitaṃ, tathā tathā tena tena pakārena samiddhaṃ bhavati. Ayaṃ bhavo antimo bhavoti yojanā. Idaṃ suttaṃ vā…pe… suttaṃ.

    ཨེཀཏིཾསམྷི ཀཔྤམྷི ཛིནོ ཨནེཛོ ཨནནྟདསྶཱི ‘‘སིཁཱི’’ཏི ཨིཏིནཱམཀོ ཨུཔྤཛྫི། ཏསྶཱཔི བྷགཝཏོ རཱཛཱ བྷཱཏཱ སིཁིདྡྷེ ཙ སིཁཱི ཨིཏིནཱམཀེ བུདྡྷེ ཙ ཏསྶ བྷགཝཏོ དྷམྨེ ཙ ཨབྷིཔྤསནྣོ ལོཀཝིནཱཡཀམྷི པརིནིབྦུཏེ སཏི དེཝཱཏིདེཝསྶ ནརུཏྟམསྶ མཧེསིནོ ཝིཔུལཾ མཧནྟཾ སམནྟཏོ གཱཝུཏིཀཾ ཐཱུཔཾ ཨཀཱསིཾ།

    Ekatiṃsamhi kappamhi jino anejo anantadassī ‘‘sikhī’’ti itināmako uppajji. Tassāpi bhagavato rājā bhātā sikhiddhe ca sikhī itināmake buddhe ca tassa bhagavato dhamme ca abhippasanno lokavināyakamhi parinibbute sati devātidevassa naruttamassa mahesino vipulaṃ mahantaṃ samantato gāvutikaṃ thūpaṃ akāsiṃ.

    ཏསྨིཾ ཐཱུཔེ བལིཾ པཱུཛཱབལིཾ ཨབྷིཧཱརཱི མནུསྶོ ཛཱཏིསུམནཾ པགྒཡ྄ཧ པཧཊྛོ པཱུཛེསི། ཨསྶ མནུསྶསྶ ཨེཀཾ པུཔྥཾ ཝཱཏེན པཧརིཏཾ ཧུཏྭཱ པཏིཏཾ། ཨཧཾ ཏཾ པཏིཏཾ ཨེཀཾ པུཔྥཾ གཧེཏྭཱ ཏསྶེཝ པུཔྥསཱམིཀསྶ ཨདཱསིཾ།

    Tasmiṃ thūpe baliṃ pūjābaliṃ abhihārī manusso jātisumanaṃ paggayha pahaṭṭho pūjesi. Assa manussassa ekaṃ pupphaṃ vātena paharitaṃ hutvā patitaṃ. Ahaṃ taṃ patitaṃ ekaṃ pupphaṃ gahetvā tasseva pupphasāmikassa adāsiṃ.

    སོ མནུསྶོ པུཔྥསཱམིཀོ ཨབྷིཔྤསནྣཙིཏྟོ ཧུཏྭཱ མཾ ‘‘ཏྭམེཝ ཨེཏཾ ཨེཀཾ པུཔྥཾ པཱུཛཱ’’ཏི ཨདཱསི། དདཱསཱིཏི ཨེཏྠ ད-ཀཱརོ ཨཱགམོ། ཨཧཾ ཏཾ ཨེཀཾ པུཔྥཾ གཧེཏྭཱ བུདྡྷཾ བུདྡྷགུཎཾ པུནཔྤུནཾ ཨནུསྶརནྟོ ཡསྨིཾ ཀཔྤེ ཨབྷིརོཔཡིཾ, ཏཏོ ཀཔྤཏོ ཨཛྫ ཀཔྤཱ ཏིཾསཾ ཨཧེསུཾ། ཏེསུ ཀཔྤེསུ དུགྒཏིཾ ནཱབྷིཛཱནཱམི, ཝིནིཔཱཏཉྩ ན གཙྪཱམི, ཨིདཾ ཕལཾ ཐཱུཔཔཱུཛཱཡ ཕལནྟི ཨཝོཙཱཏི ཡོཛནཱ། ཨིདཾ སུཏྟཾ ཝཱ…པེ॰… སུཏྟཾ།

    So manusso pupphasāmiko abhippasannacitto hutvā maṃ ‘‘tvameva etaṃ ekaṃ pupphaṃ pūjā’’ti adāsi. Dadāsīti ettha da-kāro āgamo. Ahaṃ taṃ ekaṃ pupphaṃ gahetvā buddhaṃ buddhaguṇaṃ punappunaṃ anussaranto yasmiṃ kappe abhiropayiṃ, tato kappato ajja kappā tiṃsaṃ ahesuṃ. Tesu kappesu duggatiṃ nābhijānāmi, vinipātañca na gacchāmi, idaṃ phalaṃ thūpapūjāya phalanti avocāti yojanā. Idaṃ suttaṃ vā…pe… suttaṃ.

    བྲཧྨདཏྟསྶ བྲཧྨདཏྟནཱམཀསྶ རཱཛིནོ ཀཔིལཾ ནཱམ ནགརཾ སུཝིབྷཏྟཾ བྷཱགཏོ སུཊྛུ ཝིབྷཏྟཾ, མཧཱཔཐཾ མཧཱཔཐསམྤནྣཾ ཨཱཀིཎྞཾ, ནཱནཱཛཱཏིཀེཧི མནུསྶེཧི པརིཔུཎྞཾ, ཨིདྡྷཾ ཕཱིཏཉྩ ཨཱསི།

    Brahmadattassa brahmadattanāmakassa rājino kapilaṃ nāma nagaraṃ suvibhattaṃ bhāgato suṭṭhu vibhattaṃ, mahāpathaṃ mahāpathasampannaṃ ākiṇṇaṃ, nānājātikehi manussehi paripuṇṇaṃ, iddhaṃ phītañca āsi.

    པཉྩཱལཱནཾ ཏཏྠ པུརུཏྟམེ ཨཧཾ ཀུམྨཱསཾ ཝིཀྐིཎིཾ, སོ ཨཧཾ ཡསསྶིནཾ ཨུཔརིཊྛཾ ཨུཔསམཱིཔེ ཋིཏཾ ཨརིཊྛཾ ནཱམ སམྦུདྡྷཾ པཙྩེཀབུདྡྷཾ ཨདྡསིཾ, དིསྭཱ ཧཊྛོ ཙིཏྟཾ པསཱདེཏྭཱ ནརུཏྟམཾ ཨརིཊྛཾ མེ གེཧསྨིཾ ཡཾ དྷུཝབྷཏྟཾ ཝིཛྫཐ ཝིཛྫི, ཏེན དྷུཝབྷཏྟེན ནིམནྟེསིཾ།

    Pañcālānaṃ tattha puruttame ahaṃ kummāsaṃ vikkiṇiṃ, so ahaṃ yasassinaṃ upariṭṭhaṃ upasamīpe ṭhitaṃ ariṭṭhaṃ nāma sambuddhaṃ paccekabuddhaṃ addasiṃ, disvā haṭṭho cittaṃ pasādetvā naruttamaṃ ariṭṭhaṃ me gehasmiṃ yaṃ dhuvabhattaṃ vijjatha vijji, tena dhuvabhattena nimantesiṃ.

    ཡཏོ ཙ ཡསྨིཾ ཀཱལེ ཙ ཀཏྟིཀོ ཡསྶཾ པནྣརསཱིཔུཎྞོ, སཱ པུཎྞམཱསཱི པནྣརསཱི ཨུཔཊྛིཏཱ, ཏཏོ ཙ ཏསྨིཾ ཀཱལེ ཙ ཨཧཾ ནཝཾ དུསྶཡུགཾ གཡ྄ཧ ཨརིཊྛསྶ ཨརིཊྛནཱམཀསྶ པཙྩེཀབུདྡྷསྶ ཨུཔནཱམེསིཾ།

    Yato ca yasmiṃ kāle ca kattiko yassaṃ pannarasīpuṇṇo, sā puṇṇamāsī pannarasī upaṭṭhitā, tato ca tasmiṃ kāle ca ahaṃ navaṃ dussayugaṃ gayha ariṭṭhassa ariṭṭhanāmakassa paccekabuddhassa upanāmesiṃ.

    ནརུཏྟམོ ཨནུཀམྤཀོ ཀཱརུཎིཀོ ཏཎྷཱནིགྷཱཏཀོ མུནི པཙྩེཀབུདྡྷོ པསནྣཙིཏྟཾ མཾ ཉཏྭཱན པཊིགྒཎྷི།

    Naruttamo anukampako kāruṇiko taṇhānighātako muni paccekabuddho pasannacittaṃ maṃ ñatvāna paṭiggaṇhi.

    ཨཧཾ ཀལྱཱཎཾ བུདྡྷཝཎྞིཏཾ ཀམྨཾ ཀརིཏྭཱན དེཝེ ཙ མནུསྶེ ཙ སནྡྷཱཝིཏྭཱ ཏཏོ ཙུཏོ བཱརཱཎསིཡཾ ནགརེ ཨཌྜྷེ ཀུལསྨིཾ སེཊྛིསྶ ཨེཀཔུཏྟཀོ ཨུཔྤཛྫིཾ, པཱཎེཧི ཙ པིཡཏརོ ཨཱསིཾ།

    Ahaṃ kalyāṇaṃ buddhavaṇṇitaṃ kammaṃ karitvāna deve ca manusse ca sandhāvitvā tato cuto bārāṇasiyaṃ nagare aḍḍhe kulasmiṃ seṭṭhissa ekaputtako uppajjiṃ, pāṇehi ca piyataro āsiṃ.

    ཏཏོ ཙ ཏསྨིཾ ཀཱལེ ཝིཉྙུཏཾ པཏྟོ ཧུཏྭཱ དེཝཔུཏྟེན ཙོདིཏོ ཨཧཾ པཱསཱདཱ ཨོརུཧིཏྭཱན སམྦུདྡྷཾ བྷགཝནྟཾ གོཏམཾ ཨུཔསངྐམིཾ།

    Tato ca tasmiṃ kāle viññutaṃ patto hutvā devaputtena codito ahaṃ pāsādā oruhitvāna sambuddhaṃ bhagavantaṃ gotamaṃ upasaṅkamiṃ.

    སོ སམྦུདྡྷོ བྷགཝཱ གོཏམོ ཨནུཀམྤཱཡ མེ དྷམྨཾ ཨདེསེསི། དུཀྑཾ དུཀྑསཙྩཉྩ དུཀྑསམུཔྤཱདཾ སམུདཡསཙྩཉྩ དུཀྑསྶ ཨཏིཀྐམཾ ནིརོདྷསཙྩཉྩ ཨརིཡཾ ཨཊྛངྒིཀཾ དུཀྑཱུཔསམགཱམིནཾ མགྒཾ མགྒསཙྩཉྩ ཨིཏི ཙཏྟཱརི སཙྩཱནི དེསིཏཱནི, ཏདུཔྤཱདཀཾ དྷམྨཾ མུནི བྷགཝཱ གོཏམོ ཨདེསཡི།

    So sambuddho bhagavā gotamo anukampāya me dhammaṃ adesesi. Dukkhaṃ dukkhasaccañca dukkhasamuppādaṃ samudayasaccañca dukkhassa atikkamaṃ nirodhasaccañca ariyaṃ aṭṭhaṅgikaṃ dukkhūpasamagāminaṃ maggaṃ maggasaccañca iti cattāri saccāni desitāni, taduppādakaṃ dhammaṃ muni bhagavā gotamo adesayi.

    ཨཧཾ ཏསྶ བྷགཝཏོ གོཏམསྶ ཝཙནཾ སུཏྭཱ སཱསནེ རཏོ ཧུཏྭཱ ཝིཧརིཾ, ཨཧཾ རཏྟིནྡིཝཾ ཨཏནྡིཏོ ཧུཏྭཱ སམཐཾ པཊིཝིཛ྄ཛྷིཾ།

    Ahaṃ tassa bhagavato gotamassa vacanaṃ sutvā sāsane rato hutvā vihariṃ, ahaṃ rattindivaṃ atandito hutvā samathaṃ paṭivijjhiṃ.

    ཨཛ྄ཛྷཏྟཉྩ ཡེ ཨཱསཝཱ, བཧིདྡྷཱ ཙ ཡེ ཨཱསཝཱ མགྒེན སམུཙྪིནྣཱ ཨཱསུཾ, སབྦེ ཏེ ཨཱསཝཱ མེ མམ ཝིཛྫིཾསུ, པུན ན ཙ ཨུཔྤཛྫརེ།

    Ajjhattañca ye āsavā, bahiddhā ca ye āsavā maggena samucchinnā āsuṃ, sabbe te āsavā me mama vijjiṃsu, puna na ca uppajjare.

    དུཀྑཾ ‘‘པརིཡནྟཀཏཾ ཡསྶ དུཀྑསྶཱ’’ཏི པརིཡནྟཀཏཾ ཨཱསི, ཨཡཾ སམུསྶཡོ ཛཱཏིམརཎསཾསཱརོ ཙརིམོ ཨནྟིམོ ཨཱསི, ཨིདཱནི ཨིམསྶ ཨཏྟབྷཱཝསྶ ཨནནྟརཾ པུནབྦྷཝོ མམ ནཏྠཱིཏི ཨཝོཙཱཏི ཡོཛནཱ། ཡཾ ནཱནཱཝིདྷཾ ཝཱསནཱབྷཱགིཡཾ སུཏྟཾ ཨུདཱཧརཎཝསེན ནིདྡྷཱརིཏཾ, ཨིདཾ ནཱནཱཝིདྷཾ སུཏྟཾ ཝཱསནཱབྷཱགེ པུཉྙཀོཊྛཱསེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཝཱསནཱབྷཱགིཡཾ སུཏྟཾ ནཱམ།

    Dukkhaṃ ‘‘pariyantakataṃ yassa dukkhassā’’ti pariyantakataṃ āsi, ayaṃ samussayo jātimaraṇasaṃsāro carimo antimo āsi, idāni imassa attabhāvassa anantaraṃ punabbhavo mama natthīti avocāti yojanā. Yaṃ nānāvidhaṃ vāsanābhāgiyaṃ suttaṃ udāharaṇavasena niddhāritaṃ, idaṃ nānāvidhaṃ suttaṃ vāsanābhāge puññakoṭṭhāse visaye vācakañāpakabhāvena pavattanato vāsanābhāgiyaṃ suttaṃ nāma.

    ནཱནཱཝིདྷཾ ཝཱསནཱབྷཱགིཡཾ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ ནིབྦེདྷབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ནིབྦེདྷབྷཱགིཡཾ སུཏྟ’’ནྟིཨཱདི ཝུཏྟཾ། ཏཏྠ ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ ནིབྦེདྷབྷཱགིཡཾ སུཏྟཾ ནཱམཱཏི པུཙྪཏི།

    Nānāvidhaṃ vāsanābhāgiyaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ nibbedhabhāgiyaṃ sutta’’nti pucchitabbattā ‘‘tattha katamaṃ nibbedhabhāgiyaṃ sutta’’ntiādi vuttaṃ. Tattha tesu soḷasasu saṃkilesabhāgiyādīsu suttesu katamaṃ suttaṃ nibbedhabhāgiyaṃ suttaṃ nāmāti pucchati.

    ཨུདྡྷཾ བྲཧྨལོཀེ ཨདྷོ ཀཱམཱཝཙརེ བྷཝེ སབྦདྷི སབྦེསུ བྷཝེསུ ཝིཔྤམུཏྟོ ཨརཧཱ ‘‘ཨཡཾ ནཱམ དྷམྨོ ཨཧཾ ཨསྨཱི’’ཏི ཨནཱནུཔསྶཱི, ཨེཝཾ ཝིམུཏྟོ ཨརཧཱ ཨཏིཎྞཔུབྦཾ ཨོགྷཾ ཨཔུནབྦྷཝཱཡ ཨུདཏཱརི ཨུཏྟིཎྞོཏི ཡོཛནཱ། ཨིདཾ སུཏྟཾ ནིབྦེདྷབྷཱགེ སེཀྑདྷམྨེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ནིབྦེདྷབྷཱགིཡཾ སུཏྟཾ ནཱམ།

    Uddhaṃ brahmaloke adho kāmāvacare bhave sabbadhi sabbesu bhavesu vippamutto arahā ‘‘ayaṃ nāma dhammo ahaṃ asmī’’ti anānupassī, evaṃ vimutto arahā atiṇṇapubbaṃ oghaṃ apunabbhavāya udatāri uttiṇṇoti yojanā. Idaṃ suttaṃ nibbedhabhāge sekkhadhamme visaye vācakañāpakabhāvena pavattanato nibbedhabhāgiyaṃ suttaṃ nāma.

    ‘‘ཨེཏྟཀམེཝཱ’’ཏི ཝཏྟབྦཏྟཱ ‘‘སཱིལཝཏོ’’ཏིཨཱདི ཝུཏྟཾ། ཨཱནནྡ, སཱིལཝཏོ པུགྒལསྶ ‘‘ཀིནྟི མེ མམ ཨཝིཔྤཊིསཱརོ ཛཱཡེཡྻ པཝཏྟེཡྻཱ’’ཏི ཙེཏནཱ ན ཀརཎཱིཡཱ ན ཀཱཏབྦཱ། ཨཱནནྡ, སཱིལཝཏོ ཨཝིཔྤཊིསཱརོ ཡཾ ཛཱཡེཡྻ པཝཏྟེཡྻ, ཨེསཱ ཨཝིཔྤཊིསཱརསྶ ཛཱཡནཱ པཝཏྟནཱ དྷམྨཏཱ བྷཝཏི། ཨཱནནྡ, ཨཝིཔྤཊིསཱརིནཱ པུགྒལེན ‘‘ཀིནྟི མེ མམ པཱམོཛྫཾ ཛཱཡེཡྻ པཝཏྟེཡྻཱ’’ཏི ཙེཏནཱ ན ཀརཎཱིཡཱ, ཨཱནནྡ, ཨཝིཔྤཊིསཱརིནོ པུགྒལསྶ པཱམོཛྫཾ ཡཾ ཛཱཡེཡྻ པཝཏྟེཡྻ, ཨེསཱ པཱམོཛྫསྶ ཛཱཡནཱ པཝཏྟནཱ དྷམྨཏཱ། སེསེསུཔི ཨིམསྶ ཡོཛནཱནཡཱནུསཱརེན ཡོཛནཱནཡོ གཧེཏབྦོ། ཨིདཾ སུཏྟམྤི ནིབྦེདྷབྷཱགིཡཾ སུཏྟཾ ནཱམ།

    ‘‘Ettakamevā’’ti vattabbattā ‘‘sīlavato’’tiādi vuttaṃ. Ānanda, sīlavato puggalassa ‘‘kinti me mama avippaṭisāro jāyeyya pavatteyyā’’ti cetanā na karaṇīyā na kātabbā. Ānanda, sīlavato avippaṭisāro yaṃ jāyeyya pavatteyya, esā avippaṭisārassa jāyanā pavattanā dhammatā bhavati. Ānanda, avippaṭisārinā puggalena ‘‘kinti me mama pāmojjaṃ jāyeyya pavatteyyā’’ti cetanā na karaṇīyā, ānanda, avippaṭisārino puggalassa pāmojjaṃ yaṃ jāyeyya pavatteyya, esā pāmojjassa jāyanā pavattanā dhammatā. Sesesupi imassa yojanānayānusārena yojanānayo gahetabbo. Idaṃ suttampi nibbedhabhāgiyaṃ suttaṃ nāma.

    ཨཱཏཱཔིནོ ཀིལེསཱནཾ ཨཱཏཱཔེན སམྨཔྤདྷཱནེན སམནྣཱགཏསྶ ཛྷཱཡཏོ ཛྷཱཡནྟསྶ བྲཱཧྨཎསྶ བཱཧིཏཔཱཔསྶ ཁཱིཎཱསཝསྶ དྷམྨཱ ཨནུལོམཔཙྩཡཱཀཱརཔཊིཝེདྷསཱདྷཀཱ བོདྷིཔཀྑིཡདྷམྨཱ ཡདཱ ཡསྨིཾ ཀཱལེ ཧཝེ ཨེཀནྟེན པཱཏུབྷཝནྟི ཨུཔྤཛྫནྟི། ཨཐ ཝཱ དྷམྨཱ ཙཏུཨརིཡསཙྩདྷམྨཱ པཱཏུབྷཝནྟི པཀཱསཡནྟི ཨབྷིསམཡཝསེན པཱཀཊཱ ཧོནྟི། ཨཐ ཝཱ པཱཏུབྷཝནཀཱལེ ཨསྶ ཨཱཏཱཔིནོ ཛྷཱཡཏོ བྲཱཧྨཎསྶ ཁཱིཎཱསཝསྶ སབྦཱ ཀངྑཱ ཝཔཡནྟི ཨཔགཙྪནྟི ནིརུཛ྄ཛྷནྟི། ཀསྨཱ? སཧེཏུདྷམྨཾ ཨཝིཛྫཱདིཀེན ཧེཏུནཱ སཧ པཝཏྟཾ སངྑཱརཱདིཀཾ སུཁེན ཨསམྨིསྶཾ དུཀྑཀྑནྡྷདྷམྨཾ ཡཏོ ཡསྨཱ པཛཱནཱཏི ཨཉྙཱསི པཊིཝིཛ྄ཛྷཏི , ཏཏོ ཏསྨཱ ཝཔཡནྟི ཨཔགཙྪནྟི ནིརུཛ྄ཛྷནྟཱིཏི ཡོཛནཱ། ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ།

    Ātāpino kilesānaṃ ātāpena sammappadhānena samannāgatassa jhāyato jhāyantassa brāhmaṇassa bāhitapāpassa khīṇāsavassa dhammā anulomapaccayākārapaṭivedhasādhakā bodhipakkhiyadhammā yadā yasmiṃ kāle have ekantena pātubhavanti uppajjanti. Atha vā dhammā catuariyasaccadhammā pātubhavanti pakāsayanti abhisamayavasena pākaṭā honti. Atha vā pātubhavanakāle assa ātāpino jhāyato brāhmaṇassa khīṇāsavassa sabbā kaṅkhā vapayanti apagacchanti nirujjhanti. Kasmā? Sahetudhammaṃ avijjādikena hetunā saha pavattaṃ saṅkhārādikaṃ sukhena asammissaṃ dukkhakkhandhadhammaṃ yato yasmā pajānāti aññāsi paṭivijjhati , tato tasmā vapayanti apagacchanti nirujjhantīti yojanā. Idaṃ suttaṃ nibbedhabhāgiyaṃ suttaṃ nāma.

    དུཏིཡགཱཐཱཡཾ པན པཙྩཡཱནཾ ཁཡཾ ཁཡསངྑཱཏཾ ནིབྦཱནཾ ཡཏོ ཡསྨཱ ཨཝེདི ཨཉྙཱསི པཊིཝིཛ྄ཛྷི, ཏཏོ ཏསྨཱ སབྦཱཔི ཀངྑཱ ཝཔཡནྟཱིཏི ཡོཛནཱ། ཨིདཾ སུཏྟཾ ནིབྦེདྷབྷཱགིཡཾ སུཏྟཾ།

    Dutiyagāthāyaṃ pana paccayānaṃ khayaṃ khayasaṅkhātaṃ nibbānaṃ yato yasmā avedi aññāsi paṭivijjhi, tato tasmā sabbāpi kaṅkhā vapayantīti yojanā. Idaṃ suttaṃ nibbedhabhāgiyaṃ suttaṃ.

    ཏིསྶ, ཏྭཾ ཀིཾ ནུ ཀུཛ྄ཛྷསི? མཱ ཀུཛ྄ཛྷི, ཏིསྶ, ཏེ ཏཝ ཨཀྐོདྷོ ཨཀུཛ྄ཛྷནཾ ཝརཾ ཨུཏྟམཾ, ཧི སཙྩཾ, ཏིསྶ, ཏཡཱ ཀོདྷམཱནམཀྑཝིནཡཏྠཾ བྲཧྨཙརིཡཾ ཝུསྶཏི ནཱུཏི བྷགཝཱ ཨཝོཙཱཏི ཡོཛནཱ།

    Tissa, tvaṃ kiṃ nu kujjhasi? Mā kujjhi, tissa, te tava akkodho akujjhanaṃ varaṃ uttamaṃ, hi saccaṃ, tissa, tayā kodhamānamakkhavinayatthaṃ brahmacariyaṃ vussati nūti bhagavā avocāti yojanā.

    ཨཱརཉྙཾ ཨཱརཉྙཀཾ པཾསུཀཱུལིཀཾ ཨཉྙཱཏུཉྪེན ཨཉྙཱཏཨནབྷིལཀྑིཏགྷརཔཊིཔཱཊིཡཱ ཋཏྭཱ ཨུཉྪེན པིཎྜཔཱཏཙརཎཝཱིརིཡེན ལདྡྷེན མིསྶཀབྷོཛནེན ཡཱཔེནྟཾ ནནྡཾ ཀདཱ ཀཱལེ ཨཧཾ པསྶེཡྻནྟི ཨཝོཙཱཏི ཡོཛནཱ། ཨིདཾ སུཏྟཾ ནིབྦེདྷབྷཱགིཡཾ སུཏྟཾ།

    Āraññaṃ āraññakaṃ paṃsukūlikaṃ aññātuñchena aññātaanabhilakkhitagharapaṭipāṭiyā ṭhatvā uñchena piṇḍapātacaraṇavīriyena laddhena missakabhojanena yāpentaṃ nandaṃ kadā kāle ahaṃ passeyyanti avocāti yojanā. Idaṃ suttaṃ nibbedhabhāgiyaṃ suttaṃ.

    གོཏམ , ཀིཾསུ ཀཏམཾ ཚེཏྭཱ ཝདྷིཏྭཱ ཝདྷནྟོ ཀོདྷཔརིལཱ༹ཧེན ཨཔརིདཡ྄ཧམཱནོ ཧུཏྭཱ སུཁཾ སེཏི སཡཏི, ཀིཾསུ ཀཏམཾ ཚེཏྭཱ ཝདྷིཏྭཱ ཝདྷནྟོ ཀོདྷཝིནཱསེན ཝིནཊྛདོམནསྶོ ཧུཏྭཱ ན སོཙཏི, གོཏམ, ཏྭཾ ཀིསྶ ཨེཀདྷམྨསྶ ཝདྷཾ ཝདྷནཾ རོཙེསཱིཏི བྲཱཧྨཎོ པུཙྪཏི།

    Gotama , kiṃsu katamaṃ chetvā vadhitvā vadhanto kodhapariḷāhena aparidayhamāno hutvā sukhaṃ seti sayati, kiṃsu katamaṃ chetvā vadhitvā vadhanto kodhavināsena vinaṭṭhadomanasso hutvā na socati, gotama, tvaṃ kissa ekadhammassa vadhaṃ vadhanaṃ rocesīti brāhmaṇo pucchati.

    བྲཱཧྨཎ, ཀོདྷཾ ཀུཛ྄ཛྷནཾ ཚེཏྭཱ ཝདྷིཏྭཱ ཝདྷནྟོ ཀོདྷཔརིལཱ༹ཧེན ཨཔརིདཡ྄ཧམཱནོ ཧུཏྭཱ སུཁཾ སེཏི སཡཏི, ཀོདྷཾ ཀུཛ྄ཛྷནཾ ཚེཏྭཱ ཝདྷིཏྭཱ ཝདྷནྟོ ཀོདྷཝིནཱསེན ཝིནཊྛདོམནསྶོ ཧུཏྭཱ ན སོཙཏི, ཝིསམཱུལསྶ ཝིསསདིསསྶ དུཀྑསྶ མཱུལབྷཱུཏསྶ མདྷུརགྒསྶ མདྷུརསངྑཱཏསྶ སུཁཔརིཡོསཱནསྶ ཀོདྷསྶ ཀུཛ྄ཛྷནསྶ ཝདྷཾ ཝདྷནཾ ཨརིཡཱ བུདྡྷཱདཡོ པུགྒལཱ པསཾསནྟི། ཧི སཙྩཾ ཏཾ ཀོདྷཾ ཀུཛ྄ཛྷནཾ ཚེཏྭཱ ཝདྷིཏྭཱ ཝདྷནྟོ ཀོདྷཝིནཱསེན ཝིནཊྛདོམནསྶོ ཧུཏྭཱ སེཏི སཡཏཱིཏི ཡོཛནཱ། མདྷུརགྒསྶཱཏི ཙ མདྷུརཾ ཙེཏསིཀསུཁཾ ཨསྶཱདཨགྒཾ པརིཡོསཱནཾ ཨསྶ ཀོདྷསྶཱཏི མདྷུརགྒོཏི སམཱསོ ཝེདིཏབྦོ། ཀུཛ྄ཛྷནྟསྶ ཧི ཨཀྐོསིཏྭཱ པརིབྷཱསིཏྭཱ པཧརིཏྭཱ པརིཡོསཱནེ ཙེཏསིཀསུཁསྶཱདོ ཨུཔྤཛྫཏཱིཏི། ཨིདཾ སུཏྟཾ ནིབྦེདྷབྷཱགིཡཾ སུཏྟཾ།

    Brāhmaṇa, kodhaṃ kujjhanaṃ chetvā vadhitvā vadhanto kodhapariḷāhena aparidayhamāno hutvā sukhaṃ seti sayati, kodhaṃ kujjhanaṃ chetvā vadhitvā vadhanto kodhavināsena vinaṭṭhadomanasso hutvā na socati, visamūlassa visasadisassa dukkhassa mūlabhūtassa madhuraggassa madhurasaṅkhātassa sukhapariyosānassa kodhassa kujjhanassa vadhaṃ vadhanaṃ ariyā buddhādayo puggalā pasaṃsanti. Hi saccaṃ taṃ kodhaṃ kujjhanaṃ chetvā vadhitvā vadhanto kodhavināsena vinaṭṭhadomanasso hutvā seti sayatīti yojanā. Madhuraggassāti ca madhuraṃ cetasikasukhaṃ assādaaggaṃ pariyosānaṃ assa kodhassāti madhuraggoti samāso veditabbo. Kujjhantassa hi akkositvā paribhāsitvā paharitvā pariyosāne cetasikasukhassādo uppajjatīti. Idaṃ suttaṃ nibbedhabhāgiyaṃ suttaṃ.

    གོཏམ, ཧནནྟོ དྷཱིརོ ཨུཔྤཏིཏཾ ཀིཾསུ ཀཏམཾ ཧནེ ཧནེཡྻ། ཝིནོདེནྟོ དྷཱིརོ ཛཱཏཾ ཀིཾསུ ཀཏམཾ ཝིནོདཡེ ཝིནོདཡེཡྻ། པཛཧནྟོ དྷཱིརོ ཀིཾ ཙ ཀཏམཾ པཛཧེ པཛཧེཡྻ། དྷཱིརསྶ ཀིསྶ དྷམྨསྶ ཨབྷིསམཡོ སུཁོཏི དེཝཏཱ པུཙྪཏི།

    Gotama, hananto dhīro uppatitaṃ kiṃsu katamaṃ hane haneyya. Vinodento dhīro jātaṃ kiṃsu katamaṃ vinodaye vinodayeyya. Pajahanto dhīro kiṃ ca katamaṃ pajahe pajaheyya. Dhīrassa kissa dhammassa abhisamayo sukhoti devatā pucchati.

    དེཝཔུཏྟ, ཧནནྟོ དྷཱིརོ ཨུཔྤཏིཏཾ ཀོདྷཾ ཀུཛ྄ཛྷནཾ ཧནེ ཧནེཡྻ། ཝིནོདེནྟོ དྷཱིརོ ཛཱཏཾ རཱགཾ ཝིནོདཡེ ཝིནོདཡེཡྻ། པཛཧནྟོ དྷཱིརོ ཨཝིཛྫཾ པཛཧེ པཛཧེཡྻ། སཙྩདྷམྨསྶ ཨབྷིསམཡོ སུཁོཏི བྷགཝཱ ཨཝོཙཱཏི ཡོཛནཱ། ཨིདཾ སུཏྟཾ ནིབྦེདྷབྷཱགིཡཾ སུཏྟཾ།

    Devaputta, hananto dhīro uppatitaṃ kodhaṃ kujjhanaṃ hane haneyya. Vinodento dhīro jātaṃ rāgaṃ vinodaye vinodayeyya. Pajahanto dhīro avijjaṃ pajahe pajaheyya. Saccadhammassa abhisamayo sukhoti bhagavā avocāti yojanā. Idaṃ suttaṃ nibbedhabhāgiyaṃ suttaṃ.

    ༡༠༡. བྷགཝཱ སཏྟིཡཱ ཨོམཊྛོ ཨུཔརིཏོ ཡཱཝ ཧེཊྛཱ ཝིདྡྷོ པུརིསོ སཏྟིཔྤཧཱནཱཡ ཝཱིརིཡཾ ཨཱརབྷཏི ཝིཡ, ཨགྒིནཱ མཏྠཀེ ཌཡ྄ཧམཱནོ ཨཱདིཏྟསིརོ པུརིསོ ཨགྒིནིབྦཱཔནཏྠཱཡ ཝཱིརིཡཾ ཨཱརབྷཏི ཨིཝ, ཨེཝཾ ཀཱམརཱགེན ཌཡ྄ཧམཱནོ བྷིཀྑུ ཀཱམརཱགཔྤཧཱནཱཡ ཀཱམརཱགཝིཀྑམྦྷནཱཡ ཨཔྤམཏྟོ ཝཱཡམམཱནོ སཏོ སཏིསམྤནྣོ ཧུཏྭཱ པརིབྦཛེ ཝིཧརེཡྻཱཏི དེཝཏཱ ཀཐེསི།

    101. Bhagavā sattiyā omaṭṭho uparito yāva heṭṭhā viddho puriso sattippahānāya vīriyaṃ ārabhati viya, agginā matthake ḍayhamāno ādittasiro puriso agginibbāpanatthāya vīriyaṃ ārabhati iva, evaṃ kāmarāgena ḍayhamāno bhikkhu kāmarāgappahānāya kāmarāgavikkhambhanāya appamatto vāyamamāno sato satisampanno hutvā paribbaje vihareyyāti devatā kathesi.

    བྷགཝཱ པན ‘‘སམུཙྪེདཔྤཧཱནཱཡ ཝཱིརིཡཾ ཨཱརབྷཱིཡཏཱི’’ཏི དསྶེཏུཾ ‘‘སཏྟིཡཱ ཝིཡ ཨོམཊྛོ’’ཏིཨཱདིམཱཧ། དེཝཔུཏྟ, སཏྟིཡཱ ཨོམཊྛོ པུརིསོ སཏྟིཔྤཧཱནཱཡ ཝཱིརིཡཾ ཨཱརབྷཏི ཝིཡ, ཨགྒིནཱ མཏྠཀེ ཌཡ྄ཧམཱནོ ཨཱདིཏྟསིརོ པུརིསོ ཨགྒིནིབྦཱཔནཏྠཱཡ ཝཱིརིཡཾ ཨཱརབྷཏི ཨིཝ, ཨེཝཾ སཀྐཱཡདིཊྛིཡཱ ཨབྷིབྷཱུཏོ བྷིཀྑུ སཀྐཱཡདིཊྛིཡཱ པཧཱནཱཡ མགྒེན སམུཙྪེདཔྤཧཱནཱཡ ཨཔྤམཏྟོ ཝཱཡམམཱནོ སཏོ སཏིསམྤནྣོ ཧུཏྭཱ པརིབྦཛེ ཝིཧརེཡྻཱཏི བྷགཝཱ ཨཝོཙཱཏི ཡོཛནཱ། ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ།

    Bhagavā pana ‘‘samucchedappahānāya vīriyaṃ ārabhīyatī’’ti dassetuṃ ‘‘sattiyā viya omaṭṭho’’tiādimāha. Devaputta, sattiyā omaṭṭho puriso sattippahānāya vīriyaṃ ārabhati viya, agginā matthake ḍayhamāno ādittasiro puriso agginibbāpanatthāya vīriyaṃ ārabhati iva, evaṃ sakkāyadiṭṭhiyā abhibhūto bhikkhu sakkāyadiṭṭhiyā pahānāya maggena samucchedappahānāya appamatto vāyamamāno sato satisampanno hutvā paribbaje vihareyyāti bhagavā avocāti yojanā. Idaṃ suttaṃ nibbedhabhāgiyaṃ suttaṃ nāma.

    སབྦེ ནིཙཡཱ བྷོགཱ ཁཡནྟཱ ཁཡཔརིཡོསཱནཱ བྷཝནྟི, སབྦེ སམུསྶཡཱ དྷམྨཱ པཏནནྟཱ པཏནཔརིཡོསཱནཱ བྷཝནྟི, སབྦེསཾ སཏྟཱནཾ མརཎམཱགམྨ སབྦེསཾ སཏྟཱནཾ ཛཱིཝིཏཾ ཨདྡྷུཝཾ བྷཝཏི, ཨིཏི ཨེཏཾ ཝུཏྟཔྤཀཱརཾ བྷཡཾ བྷཡཧེཏུཾ མརཎཾ སམྨུཏིམརཎཾ ཨཔེཀྑམཱནོ པཎྜིཏོ སུཁཱཝཧཱནི དིཊྛདྷམྨིཀསམྤརཱཡིཀསུཁཱཝཧཱནི པུཉྙཱནི དཱནསཱིལབྷཱཝནཱམཡཔུཉྙཱནི ཀཡིརཱཐཱཏི དེཝཏཱ ཨཝོཙ།

    Sabbe nicayā bhogā khayantā khayapariyosānā bhavanti, sabbe samussayā dhammā patanantā patanapariyosānā bhavanti, sabbesaṃ sattānaṃ maraṇamāgamma sabbesaṃ sattānaṃ jīvitaṃ addhuvaṃ bhavati, iti etaṃ vuttappakāraṃ bhayaṃ bhayahetuṃ maraṇaṃ sammutimaraṇaṃ apekkhamāno paṇḍito sukhāvahāni diṭṭhadhammikasamparāyikasukhāvahāni puññāni dānasīlabhāvanāmayapuññāni kayirāthāti devatā avoca.

    དེཝཔུཏྟ, སབྦེ ནིཙཡཱ བྷོགཱ ཁཡནྟཱ ཁཡཔརིཡོསཱནཱ, སབྦེ སམུསྶཡཱ དྷམྨཱ པཏནནྟཱ པཏནཔརིཡོསཱནཱ, སབྦེསཾ སཏྟཱནཾ མརཎམཱགམྨ སབྦེསཾ སཏྟཱནཾ ཛཱིཝིཏཾ ཨདྡྷུཝཾ, ཨིཏི ཨེཏཾ ཝུཏྟཔྤཀཱརཾ བྷཡཾ བྷཡཧེཏུཾ མརཎཾ ཨཔེཀྑམཱནོ སནྟིཔེཀྑོ སབྦསངྑཱརུཔསམཾ ནིབྦཱནཾ ཨཔེཀྑམཱནོ པཎྜིཏོ ལོཀཱམིསཾ ཀཱམགུཎཾ པཛཧེ པཛཧེཡྻཱཏི བྷགཝཱ ཨཝོཙཱཏི ཡོཛནཱ། ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ།

    Devaputta, sabbe nicayā bhogā khayantā khayapariyosānā, sabbe samussayā dhammā patanantā patanapariyosānā, sabbesaṃ sattānaṃ maraṇamāgamma sabbesaṃ sattānaṃ jīvitaṃ addhuvaṃ, iti etaṃ vuttappakāraṃ bhayaṃ bhayahetuṃ maraṇaṃ apekkhamāno santipekkho sabbasaṅkhārupasamaṃ nibbānaṃ apekkhamāno paṇḍito lokāmisaṃ kāmaguṇaṃ pajahe pajaheyyāti bhagavā avocāti yojanā. Idaṃ suttaṃ nibbedhabhāgiyaṃ suttaṃ nāma.

    མཱཝིདྷ ཡེསཾ མུནཱིནཾ ཙིཏྟཾ ཛྷཱནརཏཾ ཛྷཱནེ རཏཾ ཧོཏི, ཏེ མུནཡོ སུཁཾ སཡནྟི ན སོཙནྟི། པཉྙཝཱ མགྒཔཉྙཝཱ སུསམཱཧིཏོ ཨཱརདྡྷཝཱིརིཡོ པཧིཏཏྟོ ནིབྦཱནཾ པེསིཏཙིཏྟོ པུགྒལོ དུཏྟརཾ ཨོགྷཾ སཾསཱརོགྷཾ ཏརཏི།

    Māvidha yesaṃ munīnaṃ cittaṃ jhānarataṃ jhāne rataṃ hoti, te munayo sukhaṃ sayanti na socanti. Paññavā maggapaññavā susamāhito āraddhavīriyo pahitatto nibbānaṃ pesitacitto puggalo duttaraṃ oghaṃ saṃsāroghaṃ tarati.

    ཀཱམསཉྙཱཡ ཝིརཏོ ཝིགཏཙིཏྟོ ཡོ ཁཱིཎཱསཝོ སབྦསཾཡོཛནཱཏཱིཏོ ཨརཧཏྟམགྒེན སབྦེ སཾཡོཛནེ ཨཏཱིཏོ ནནྡིབྷཝཔརིཀྑཱིཎོ ཨཧོསི, སོ ཁཱིཎཱསཝོ གམྦྷཱིརེ སཾསཱརཎྞཝེ ན སཱིདཏཱིཏི ཡོཛནཱ། ནནྡིསངྑཱཏཱ ཏཎྷཱ ཙ ཀཱམབྷཝརཱུཔབྷཝཨརཱུཔབྷཝཱ ཙ ནནྡིབྷཝཱ, ནནྡིབྷཝཱ པརིཀྑཱིཎཱ ཡསྶ ཁཱིཎཱསཝསྶཱཏི ནནྡིབྷཝཔརིཀྑཱིཎོཏི སམཱསོ ཝེདིཏབྦོ། ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ།

    Kāmasaññāya virato vigatacitto yo khīṇāsavo sabbasaṃyojanātīto arahattamaggena sabbe saṃyojane atīto nandibhavaparikkhīṇo ahosi, so khīṇāsavo gambhīre saṃsāraṇṇave na sīdatīti yojanā. Nandisaṅkhātā taṇhā ca kāmabhavarūpabhavaarūpabhavā ca nandibhavā, nandibhavā parikkhīṇā yassa khīṇāsavassāti nandibhavaparikkhīṇoti samāso veditabbo. Idaṃ suttaṃ nibbedhabhāgiyaṃ suttaṃ nāma.

    ཨརཧཏཾ ཨརཧནྟཱནཾ བུདྡྷཔཙྩེཀབུདྡྷསཱཝཀཱནཾ དྷམྨཾ སུཙརིཏཱདིབྷེདཉྩ སཏྟཏིཾསབོདྷིཔཀྑིཡབྷེདཉྩ དྷམྨཾ ཡོ པཎྜིཏོ སདྡཧཱནོ སདྡཧནྟོ ཧུཏྭཱ ནིབྦཱནཔྤཏྟིཡཱ ཨཔྤམཏྟོ ཝིཙཀྑཎོ ཧུཏྭཱ སུསྶཱུསཾ སུསྶཱུསནྟོ བྷཝེ, སོ པཎྜིཏོ པཉྙཾ ལོཀིཡལོཀུཏྟརཔཉྙཾ ལབྷཏེ ལབྷཏི།

    Arahataṃ arahantānaṃ buddhapaccekabuddhasāvakānaṃ dhammaṃ sucaritādibhedañca sattatiṃsabodhipakkhiyabhedañca dhammaṃ yo paṇḍito saddahāno saddahanto hutvā nibbānappattiyā appamatto vicakkhaṇo hutvā sussūsaṃ sussūsanto bhave, so paṇḍito paññaṃ lokiyalokuttarapaññaṃ labhate labhati.

    ཡོ ཝཱིརིཡཝཱ པུགྒལོ པཏིརཱུཔདེསཀཱརཱི དེསཀཱལཱདཱིནི ཨཧཱཔེཏྭཱ ལོཀིཡལོཀུཏྟརདྷམྨཔཏིརཱུཔཾ ཨདྷིགམཱུཔཱཡཾ ཀརོཏི, དྷུརཝཱ ཙེཏསིཀཝཱིརིཡེན ཨནིཀྑིཏྟདྷུརོ ཨུཊྛཱཏཱ ཀཱཡིཀཝཱིརིཡཝསེན ཨུཊྛཱནསམྤནྣོ ཧོཏི, སོ ཝཱིརིཡཝཱ པུགྒལོ དྷནཾ ལོཀིཡལོཀུཏྟརདྷནཾ ཝིནྡཏེ ཨདྷིགཙྪཏི། སཙྩེན ཝཙཱིསཙྩེན ཙ པརམཏྠསཙྩེན ཙ བུདྡྷཱདིཀོ སཙྩདྷམྨེ ཋིཏོ སཔྤུརིསོ ཀིཏྟིཾ པཔྤོཏི། དདཾ དདནྟོ ཡཾ ཀིཉྩི ཨིཙྪིཏཾ པཏྠིཏཾ ཙཏུསངྒཧཝཏྠུཾ དདནྟོ སངྒཧནྟོ སཔྤུརིསོ མིཏྟཱནི ཨེཀནྟམིཏྟཱནི གནྠཏི སམྤཱདེཏི, ཨེཝཾ ཙཏཱུཧི སཙྩདྷམྨདྷིཏིཙཱགེཧི སམནྣཱགཏོ སོ སཔྤུརིསོ ཨསྨཱ ལོཀཱ པརཾ ལོཀཾ པེཙྩ གནྟྭཱ ཨེཀནྟེན སོཀཀཱརཎསྶ ཨབྷཱཝཏོ ན སོཙཏཱིཏི ཡོཛནཱ།

    Yo vīriyavā puggalo patirūpadesakārī desakālādīni ahāpetvā lokiyalokuttaradhammapatirūpaṃ adhigamūpāyaṃ karoti, dhuravā cetasikavīriyena anikkhittadhuro uṭṭhātā kāyikavīriyavasena uṭṭhānasampanno hoti, so vīriyavā puggalo dhanaṃ lokiyalokuttaradhanaṃ vindate adhigacchati. Saccena vacīsaccena ca paramatthasaccena ca buddhādiko saccadhamme ṭhito sappuriso kittiṃ pappoti. Dadaṃ dadanto yaṃ kiñci icchitaṃ patthitaṃ catusaṅgahavatthuṃ dadanto saṅgahanto sappuriso mittāni ekantamittāni ganthati sampādeti, evaṃ catūhi saccadhammadhiticāgehi samannāgato so sappuriso asmā lokā paraṃ lokaṃ pecca gantvā ekantena sokakāraṇassa abhāvato na socatīti yojanā.

    གོཏམ, སབྦགནྠཔྤཧཱིནོ ཏཱིཧི བྷཝེཧི ཝིཔྤམུཏྟོ སཏོ སཏིསམྤནྣོ ཏྭཾ, སམཎོ, ཨཉྙཾ དེཝམནུསྶཱདིཀཾ ཡཾ ཨནུསཱསསི ཡཾ ཨནུསཱསནཾ ཀརོསི, ཏཾ ཨནུསཱསནཾ སབྦགནྠཔྤཧཱིནསྶ ཏཱིཧི བྷཝེཧི ཝིཔྤམུཏྟསྶ སམཎསྶ ཏེ ཏཝ ན སཱདྷཱུཏི སཀྐནཱམཀོ མཱརཔཀྑིཀོ ཡཀྑོ གཱཐཱཡ ཨཛ྄ཛྷབྷཱསི།

    Gotama, sabbaganthappahīno tīhi bhavehi vippamutto sato satisampanno tvaṃ, samaṇo, aññaṃ devamanussādikaṃ yaṃ anusāsasi yaṃ anusāsanaṃ karosi, taṃ anusāsanaṃ sabbaganthappahīnassa tīhi bhavehi vippamuttassa samaṇassa te tava na sādhūti sakkanāmako mārapakkhiko yakkho gāthāya ajjhabhāsi.

    ‘‘སཀྐ སཀྐནཱམཀ ཡཀྑ ཨནུཀམྤིཏེན པུརིསེན སདྡྷིཾ ཡེན ཀེནཙི ཝཎྞེན ཀཱརཎེན སཾཝཱསོ ཨེཀསྨིཾ ཋཱནེ སཧཝཱསོ ཛཱཡཏི, ཏཾ ཨནུཀམྤིཏབྦཾ སཧཝཱསགཏཾ པུརིསཾ སཔྤཉྙོ མནསཱ ཨནུཀམྤིཏུཾ ན ཨརཧཏི ཨནུཀམྤིཏུཾཡེཝ ཨརཧཏི། ཡཱ ཨནུཀམྤཱ ཀརུཎཱ, ཡཱ ཨནུདྡཡཱ མེཏྟཱ, མུདིཏཱ ཙ ཨུཔྤནྣཱ, ཏཱཡ ཨནུཀམྤཱཡ ཀརུཎཱཡ, ཏཱཡ ཨནུདྡཡཱཡ མེཏྟཱཡ མུདིཏཱཡ ཙ སམུསྶཱཧིཏེན པསནྣེན མནསཱ ཡོ སཔྤཉྙོ སཔྤུརིསོ ཨཉྙཾ དེཝམནུསྶཱདིཀཾ ཡཾ ཨནུསཱསཏི ཡཾ ཨནུསཱསནཾ ཀརོཏི, སོ སཔྤཉྙོ སཔྤུརིསོ ཏེན ཨནུསཱསནེན སཾཡུཏྟོ ཀཱམཙྪནྡཱདཱིནཾ སཾཡོཛནཱནཾ ཝསེན ཨནནུལོམསཾཡོགེན སཾཡུཏྟོ ན ཧོཏཱིཏི བྷགཝཱ ཨཝོཙཱཏི ཡོཛནཱ།

    ‘‘Sakka sakkanāmaka yakkha anukampitena purisena saddhiṃ yena kenaci vaṇṇena kāraṇena saṃvāso ekasmiṃ ṭhāne sahavāso jāyati, taṃ anukampitabbaṃ sahavāsagataṃ purisaṃ sappañño manasā anukampituṃ na arahati anukampituṃyeva arahati. Yā anukampā karuṇā, yā anuddayā mettā, muditā ca uppannā, tāya anukampāya karuṇāya, tāya anuddayāya mettāya muditāya ca samussāhitena pasannena manasā yo sappañño sappuriso aññaṃ devamanussādikaṃ yaṃ anusāsati yaṃ anusāsanaṃ karoti, so sappañño sappuriso tena anusāsanena saṃyutto kāmacchandādīnaṃ saṃyojanānaṃ vasena ananulomasaṃyogena saṃyutto na hotīti bhagavā avocāti yojanā.

    ༡༠༢. སམཎ , རཱགོ ཙ དོསོ ཙ ཨིམེ དྭེ དྷམྨཱ ཀུཏོནིདཱནཱ, ཀིཾནིདཱནཱ, ཀིཾཔཙྩཡཱ བྷཝནྟི, ཨརཏི ཙ རཏི ཙ ལོམཧཾསོ ཙ ཨིམེ ཏཡོ ཀུཏོཛཱ ཀུཏོ བྷཝནྟི? ཀུམཱརཀཱ དྷངྐཾ ཀཱཀཾ གཧེཏྭཱ པཱདེ དཱིགྷསུཏྟཀེན བནྡྷིཏྭཱ སུཏྟཀོཊིཾ ཨངྒུལིཡཾ ཝེཋེཏྭཱ ཨོསཛནྟི ཨིཝ, ཨེཝཾ མནོཝིཏཀྐཱ ཀུཏོ སམུཊྛཱཡ ཙིཏྟཾ ཨོསཛནྟཱིཏི སཱུཙིལོམཡཀྑོ བྷགཝནྟཾ པུཙྪི།

    102. Samaṇa , rāgo ca doso ca ime dve dhammā kutonidānā, kiṃnidānā, kiṃpaccayā bhavanti, arati ca rati ca lomahaṃso ca ime tayo kutojā kuto bhavanti? Kumārakā dhaṅkaṃ kākaṃ gahetvā pāde dīghasuttakena bandhitvā suttakoṭiṃ aṅguliyaṃ veṭhetvā osajanti iva, evaṃ manovitakkā kuto samuṭṭhāya cittaṃ osajantīti sūcilomayakkho bhagavantaṃ pucchi.

    རཱགོ ཙ དོསོ ཙ ཨིམེ དྭེ དྷམྨཱ ཨིཏོནིདཱནཱ ཨིཏོ ཨཏྟབྷཱཝཏོ ནིདཱནཱ ཛཱཡནྟི; ཨརཏི ཙ རཏི ཙ ལོམཧཾསོ ཙ ཨིམེ ཏཡོ ཨིཏོཛཱ ཨིཏོ ཨཏྟཏོ བྷཝནྟི; ཀུམཱརཀཱ དྷངྐཾ ཀཱཀཾ གཧེཏྭཱ པཱདེ དཱིགྷསུཏྟཀེན བནྡྷིཏྭཱ སུཏྟཀོཊིཾ ཨངྒུལིཡཾ ཝེཋེཏྭཱ ཨོསཛནྟི ཨིཝ, ཨེཝཾ མནོཝིཏཀྐཱ ཨིཏོ ཨཏྟབྷཱཝཏོ སམུཊྛཱཡ ཙིཏྟཾ ཨོསཛནྟི།

    Rāgo ca doso ca ime dve dhammā itonidānā ito attabhāvato nidānā jāyanti; arati ca rati ca lomahaṃso ca ime tayo itojā ito attato bhavanti; kumārakā dhaṅkaṃ kākaṃ gahetvā pāde dīghasuttakena bandhitvā suttakoṭiṃ aṅguliyaṃ veṭhetvā osajanti iva, evaṃ manovitakkā ito attabhāvato samuṭṭhāya cittaṃ osajanti.

    ནིགྲོདྷསྶ ཁནྡྷཛཱ པཱརོཧཱ སཱཁཱསུ ཛཱཡནྟི ཨིཝ, ཝནེ རུཀྑཾ ནིསྶཱཡ ཛཱཏཱ མཱལུཝཱ ལཏཱ ཏཾ རུཀྑཾ ཨཛ྄ཛྷོཏྠརིཏྭཱ ཝིཏཏཱ ཨོཏཏཝིཏཏཱ ཏིཊྛཏི ཨིཝ, ཨེཝཾ, ཡཀྑ, ཏྭཾ སུཎོཧི སྣེཧཛཱ ཏཎྷཱསྣེཧཏོ ཛཱཏཱ ཨཏྟསམྦྷཱུཏཱ ཨཏྟནི སམྦྷཱུཏཱ པུན ཨནེཀཔྤཀཱརཱ མནོཝིཏཀྐཱ པཱཔམནོཝིཏཀྐཱ ཙེཝ ཏཾསམྤཡུཏྟཀིལེསཱ ཙ ཀཱམེསུ ཝཏྠུཀཱམེསུ ཝིསཏྟཱ ལགྒཱ སཾསིབྦིཏཱ ཋིཏཱ།

    Nigrodhassa khandhajā pārohā sākhāsu jāyanti iva, vane rukkhaṃ nissāya jātā māluvā latā taṃ rukkhaṃ ajjhottharitvā vitatā otatavitatā tiṭṭhati iva, evaṃ, yakkha, tvaṃ suṇohi snehajā taṇhāsnehato jātā attasambhūtā attani sambhūtā puna anekappakārā manovitakkā pāpamanovitakkā ceva taṃsampayuttakilesā ca kāmesu vatthukāmesu visattā laggā saṃsibbitā ṭhitā.

    ཡེ པཎྜིཏཱ ‘‘ཡཾ ནིདཱནཾ ཨསྶ ཨཏྟབྷཱཝསྶཱ’’ཏི ཡཏོནིདཱནཾ ནཾ ཀིལེསགཧནཾ སམུདཡསཙྩཾ པཛཱནནྟི, ཏེ པཎྜིཏཱ ཨཏྟབྷཱཝསངྑཱཏསྶ དུཀྑསཙྩསྶ ནིདཱནབྷཱུཏཾ ནཾ ཀིལེསགཧནཾ སམུདཡསཙྩཾ མགྒསཙྩེན ཝིནོདེནྟི། ཨཔུནབྦྷཝཱཡ ཨཔུནབྷཝསངྑཱཏཱཡ ནིརོདྷསཙྩཏྠཱཡ ཨཏིཎྞཔུབྦཾ ཨནམཏགྒེ སཾསཱརེ སུཔིནེནཱཔི ཨཏིཎྞཔུབྦཾ དུཏྟརཾ ཨིམཾ ཨོགྷཾ ཙཏུབྦིདྷཾ སཾཀིལེསོགྷཾ ཏརནྟཱིཏི བྷགཝཱ ཨཝོཙཱཏི ཡོཛནཱ།

    Ye paṇḍitā ‘‘yaṃ nidānaṃ assa attabhāvassā’’ti yatonidānaṃ naṃ kilesagahanaṃ samudayasaccaṃ pajānanti, te paṇḍitā attabhāvasaṅkhātassa dukkhasaccassa nidānabhūtaṃ naṃ kilesagahanaṃ samudayasaccaṃ maggasaccena vinodenti. Apunabbhavāya apunabhavasaṅkhātāya nirodhasaccatthāya atiṇṇapubbaṃ anamatagge saṃsāre supinenāpi atiṇṇapubbaṃ duttaraṃ imaṃ oghaṃ catubbidhaṃ saṃkilesoghaṃ tarantīti bhagavā avocāti yojanā.

    ‘‘བྷགཝཱ, སམཎདྷམྨསྶ ཀརཎཾ ནཱམ དུཀྐརཾ, བྷགཝཱ, སམཎདྷམྨསྶ ཀརཎཾ ནཱམ སུདུཀྐརཾ སུཊྛུཏརཾ དུཀྐར’’ནྟི ཨེཀོ ཀུལཔུཏྟོ པབྦཛིཏྭཱ སམཎདྷམྨཾ ཀཏྭཱ ཨརིཡབྷཱུམིཾ ཨཔྤཏྭཱ ཀཱལཾ ཀཏྭཱ དེཝལོཀེ ནིབྦཏྟོ, སོ དེཝཔུཏྟོ བྷགཝནྟཾ ཨུཔསངྐམིཏྭཱ ཨཱཧ། ཀཱམད, སཱིལསམཱཧིཏཱ ཋིཏཏྟཱ ཋིཏསབྷཱཝཱ སཏྟ སེཀྑཱ པུགྒལཱ དུཀྐརཾ ཝཱཔི སམཎདྷམྨཾ ཀརོནྟི། ཨནགཱརིཡུཔེཏསྶ ཨནགཱརིཡཾ ནིགྒེཧབྷཱཝཾ ཨུཔགཏསྶ པབྦཛིཏསྶ ཏུཊྛི ཙཏུཔཙྩཡསནྟོསོ སུཁཱཝཧཱ ཧོཏཱི’’ཏི བྷགཝཱ ཨཝོཙ།

    ‘‘Bhagavā, samaṇadhammassa karaṇaṃ nāma dukkaraṃ, bhagavā, samaṇadhammassa karaṇaṃ nāma sudukkaraṃ suṭṭhutaraṃ dukkara’’nti eko kulaputto pabbajitvā samaṇadhammaṃ katvā ariyabhūmiṃ appatvā kālaṃ katvā devaloke nibbatto, so devaputto bhagavantaṃ upasaṅkamitvā āha. Kāmada, sīlasamāhitā ṭhitattā ṭhitasabhāvā satta sekkhā puggalā dukkaraṃ vāpi samaṇadhammaṃ karonti. Anagāriyupetassa anagāriyaṃ niggehabhāvaṃ upagatassa pabbajitassa tuṭṭhi catupaccayasantoso sukhāvahā hotī’’ti bhagavā avoca.

    ‘‘བྷགཝཱ, ཡདིདཾ ཡཱ ཨེསཱ ཏུཊྛི སུཁཱཝཧཱ, ཨེསཱ ཏུཊྛི དུལླབྷཱ’’ཏི སོ དེཝཔུཏྟོ ཨཱཧ། ‘‘ཀཱམད, ཡེསཾ སེཀྑཱནཾ མནོ དིཝཱ ཙ རཏྟོ ཙ བྷཱཝནཱཡ རཏོ ཙིཏྟཝཱུཔསམེ རཏོ, ཏེ སེཀྑཱ དུལླབྷཾ ཝཱཔི ཏུསྶནཾ ལབྷནྟཱི’’ཏི བྷགཝཱ ཨཝོཙ།

    ‘‘Bhagavā, yadidaṃ yā esā tuṭṭhi sukhāvahā, esā tuṭṭhi dullabhā’’ti so devaputto āha. ‘‘Kāmada, yesaṃ sekkhānaṃ mano divā ca ratto ca bhāvanāya rato cittavūpasame rato, te sekkhā dullabhaṃ vāpi tussanaṃ labhantī’’ti bhagavā avoca.

    ‘‘བྷགཝཱ, ཡདིདཾ ཡཾ ཨིདཾ ཙིཏྟཾ བྷཱཝནཱཡ རཏཾ, ཏཾ ཙིཏྟཾ དུསྶམཱདཧ’’ནྟི སོ དེཝཔུཏྟོ ཨཱཧ། ‘‘ཀཱམད, ཡེ ཨརིཡཱ ཨིནྡྲིཡཱུཔསམེ རཏྟིནྡིཝཾ རཏཱ, ཏེ ཨརིཡཱ དུསྶམཱདཧཾ ཝཱཔི ཙིཏྟཾ སམཱདཧནྟི, ཀཱམད, ཏེ ཨརིཡཱ མཙྩུནོ ཛཱལཾ ཀིལེསཛཱལཾ ཚེཏྭཱ མགྒཾ གཙྪནྟཱི’’ཏི བྷགཝཱ ཨཝོཙ།

    ‘‘Bhagavā, yadidaṃ yaṃ idaṃ cittaṃ bhāvanāya rataṃ, taṃ cittaṃ dussamādaha’’nti so devaputto āha. ‘‘Kāmada, ye ariyā indriyūpasame rattindivaṃ ratā, te ariyā dussamādahaṃ vāpi cittaṃ samādahanti, kāmada, te ariyā maccuno jālaṃ kilesajālaṃ chetvā maggaṃ gacchantī’’ti bhagavā avoca.

    ‘‘བྷགཝཱ, ཡོ མགྒོ པུབྦབྷཱགཔཊིཔདཱཝསེན ཝིསམོ, སོ མགྒོ དུགྒམོ’’ཏི སོ དེཝཔུཏྟོ ཨཱཧ། ‘‘ཀཱམད, ཨརིཡཱ དུགྒམེ ཝིསམེ ཝཱཔི མགྒཾ གཙྪནྟི, ཨནརིཡཱ ཝིསམེ མགྒེ ཨཝཾསིརཱ པཔཏནྟི, ཨརིཡཱནཾ སོ མགྒོ སམོཝ བྷཝེ, ན ཨསམོ། ཧི སཙྩཾ ཝིསམེ ཝིསཏྟཀཱཡེ ཨརིཡཱ སམཱ བྷཝནྟཱི’’ཏི བྷགཝཱ ཨཝོཙཱཏི ཡོཛནཱ།

    ‘‘Bhagavā, yo maggo pubbabhāgapaṭipadāvasena visamo, so maggo duggamo’’ti so devaputto āha. ‘‘Kāmada, ariyā duggame visame vāpi maggaṃ gacchanti, anariyā visame magge avaṃsirā papatanti, ariyānaṃ so maggo samova bhave, na asamo. Hi saccaṃ visame visattakāye ariyā samā bhavantī’’ti bhagavā avocāti yojanā.

    ༡༠༣. ཡཾ ཛེཏཝནཾ ཨིསིསངྒྷནིསེཝིཏཾ དྷམྨརཱཛེན ཨཱཝུཏྠཾ, ཨིདཾ ཏཾ ཛེཏཝནཾ མམ པཱིཏིསཉྫནནཾ པཱིཏིཡཱ སཉྫནནཾ ཀརཾ ཧི ཀརཾ ཨེཝ།

    103. Yaṃ jetavanaṃ isisaṅghanisevitaṃ dhammarājena āvutthaṃ, idaṃ taṃ jetavanaṃ mama pītisañjananaṃ pītiyā sañjananaṃ karaṃ hi karaṃ eva.

    ཀམྨཾ མགྒཙེཏནཱཀམྨཉྩ ཝིཛྫཱ མགྒཔཉྙཱ ཙ དྷམྨོ སམཱདྷི ཙེཝ སམཱདྷིཔཀྑིཀོ ཙ དྷམྨོ སཱིལཾ, སཱིལེ ཋིཏསྶ ཛཱིཝིཏཾ ཨུཏྟམཾ, ཨེཏེན ཨཊྛངྒིཀེན མགྒེན སཏྟཱ སུཛ྄ཛྷནྟི, གོཏྟེན ཝཱ དྷནེན ཝཱ སཏྟཱ ན སུཛ྄ཛྷནྟི།

    Kammaṃ maggacetanākammañca vijjā maggapaññā ca dhammo samādhi ceva samādhipakkhiko ca dhammo sīlaṃ, sīle ṭhitassa jīvitaṃ uttamaṃ, etena aṭṭhaṅgikena maggena sattā sujjhanti, gottena vā dhanena vā sattā na sujjhanti.

    ཏསྨཱ མགྒེནེཝ སཏྟཱནཾ ཝིསུཛ྄ཛྷནཏོ ཨཏྟནོ ཨཏྠཾ སམྤསྶཾ པསྶནྟོ པཎྜིཏོ པོསོ ཡོནིསོ ཨུཔཱཡེན དྷམྨཾ བོདྷིཔཀྑིཡདྷམྨཾ ཝིཙིནེ ཝིཙིནེཡྻ, ཨེཝཾ ཝིཙིནནེ སཏི ཏཏྠ ཨརིཡམགྒེ ཝིཙིནནྟོ པུགྒལོ སུཛ྄ཛྷཏི།

    Tasmā maggeneva sattānaṃ visujjhanato attano atthaṃ sampassaṃ passanto paṇḍito poso yoniso upāyena dhammaṃ bodhipakkhiyadhammaṃ vicine vicineyya, evaṃ vicinane sati tattha ariyamagge vicinanto puggalo sujjhati.

    སཱརིཔུཏྟོ སཱིལེན ཙ ཨུཔསམེན ཙ པཱརངྒཏོ ཨིཝ, ཨེཝཾ ཡོཔི བྷིཀྑུ སཱིལེན ཙ ཨུཔསམེན ཙ པཱརངྒཏོ, སོ བྷིཀྑུ ཨེཏཱཝ པརམོ སཱརིཔུཏྟསདིསོཝ སིཡཱཏི ཨནཱཐཔིཎྜིཀནཱམོ དེཝཔུཏྟོ བྷགཝནྟཾ ཨུཔསངྐམིཏྭཱ ཨཱཧཱཏི ཡོཛནཱ། ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ།

    Sāriputto sīlena ca upasamena ca pāraṅgato iva, evaṃ yopi bhikkhu sīlena ca upasamena ca pāraṅgato, so bhikkhu etāva paramo sāriputtasadisova siyāti anāthapiṇḍikanāmo devaputto bhagavantaṃ upasaṅkamitvā āhāti yojanā. Idaṃ suttaṃ nibbedhabhāgiyaṃ suttaṃ nāma.

    ཨཏཱིཏཾ ཨཏཱིཏཀྑནྡྷཔཉྩཀཾ ཏཎྷཱདིཊྛཱིཧི ནཱནྭཱགམེཡྻ, ཨནཱགཏཾ ཨནཱགཏཀྑནྡྷཔཉྩཀཾ ཏཎྷཱདིཊྛཱིཧི ནཔྤཊིཀངྑེ ན པཏྠེཡྻ། ཡཾ ཡསྨཱ ཨཏཱིཏཾ པཧཱིནཾ ནིརུདྡྷཾ ཨཏྠངྒཏཾ, ཏསྨཱ ཨཏཱིཏསྶ པཧཱིནཏྟཱ ནིརུདྡྷཏྟཱ ཨཏྠངྒཏཏྟཱ ནཱནྭཱགམེཡྻ། ཡཾ ཡསྨཱ ཨནཱགཏཾ ཨཔྤཏྟཾ, ཏསྨཱ ན པཊིཀངྑེ།

    Atītaṃ atītakkhandhapañcakaṃ taṇhādiṭṭhīhi nānvāgameyya, anāgataṃ anāgatakkhandhapañcakaṃ taṇhādiṭṭhīhi nappaṭikaṅkhe na pattheyya. Yaṃ yasmā atītaṃ pahīnaṃ niruddhaṃ atthaṅgataṃ, tasmā atītassa pahīnattā niruddhattā atthaṅgatattā nānvāgameyya. Yaṃ yasmā anāgataṃ appattaṃ, tasmā na paṭikaṅkhe.

    པཙྩུཔྤནྣཾ ཁནྡྷཔཉྩཀཾ ཝཡདྷམྨཾ ཡཏྠ ཡཏྠ སནྟཱནེ ཝཱ, ཡཏྠ ཡཏྠ ཨརཉྙཱདཱིསུ ཝཱ ཨུཔྤནྣཾ, ཏཏྠ ཏཏྠ སནྟཱནེ ཝཱ, ཏཏྠ ཏཏྠ ཨརཉྙཱདཱིསུ ཝཱ ནཾ པཙྩུཔྤནྣདྷམྨཾ ཡཱཧི ཨནིཙྩཱནུཔསྶནཱདཱིཧི ཝིཔསྶཏི, ཏཱཧི ཨནིཙྩཱནུཔསྶནཱདཱིཧི ནིབྦཱནཾ རཱགཱདཱིཧི ཨསཾཧཱིརཾ ཨསཾཀུཔྤཾ བྷཝཏི, ཏཾ ནིབྦཱནཾ ཝིཔསྶཀོ པུགྒལོ ཝིདྭཱ ནིབྦཱནཱརམྨཎཾ ཕལསམཱཔཏྟིཾ ཨཔྤེནྟོ ཧུཏྭཱ ཨནུབྲཱུཧཡེ ཝཌྜྷེཡྻ།

    Paccuppannaṃ khandhapañcakaṃ vayadhammaṃ yattha yattha santāne vā, yattha yattha araññādīsu vā uppannaṃ, tattha tattha santāne vā, tattha tattha araññādīsu vā naṃ paccuppannadhammaṃ yāhi aniccānupassanādīhi vipassati, tāhi aniccānupassanādīhi nibbānaṃ rāgādīhi asaṃhīraṃ asaṃkuppaṃ bhavati, taṃ nibbānaṃ vipassako puggalo vidvā nibbānārammaṇaṃ phalasamāpattiṃ appento hutvā anubrūhaye vaḍḍheyya.

    ཨཱཏཔྤཾ སཾཀིལེསཱནཾ ཨཱཏཔནྟཾ ཝཱིརིཡཾ ཨཛྫེཝ ཀིཙྩཾ ཀཱཏབྦཾ, སུཝེ ཛཱིཝིཏཾ ཝཱ མརཎཾ ཝཱ ཀོ ཛཉྙཱ ཛཱནེཡྻ, ‘‘སུཝེ ཝཱ དཱནཱདིཔུཉྙཾ ཛཱནིསྶཱམཱི’’ཏི ཙིཏྟཾ ཨནུཔྤཱདེཏྭཱ ‘‘ཨཛྫེཝ ཀརིསྶཱམཱི’’ཏི ཨེཝཾ ཝཱིརིཡཾ ཀཱཏབྦཾ། ཧི སཙྩཾ མརཎཀཱརཎབྷཱཝཏཱཡ ཨཧིཝིཙྪིཀཝིསསཏྠཱདིཨནེཀཱཡ སེནཱཡ ཝསེན མཧཱསེནེན ཏེན མཙྩུནཱ སདྡྷིཾ མིཏྟསནྠཝཱཀཱརེན ཝཱ ལཉྫདཱནེན ཝཱ སངྒརཾ ནཏྠཱིཏི།

    Ātappaṃ saṃkilesānaṃ ātapantaṃ vīriyaṃ ajjeva kiccaṃ kātabbaṃ, suve jīvitaṃ vā maraṇaṃ vā ko jaññā jāneyya, ‘‘suve vā dānādipuññaṃ jānissāmī’’ti cittaṃ anuppādetvā ‘‘ajjeva karissāmī’’ti evaṃ vīriyaṃ kātabbaṃ. Hi saccaṃ maraṇakāraṇabhāvatāya ahivicchikavisasatthādianekāya senāya vasena mahāsenena tena maccunā saddhiṃ mittasanthavākārena vā lañjadānena vā saṅgaraṃ natthīti.

    ཨེཝཾ མནསི ཀཏྭཱ ཝིཧཱརིཾ ཝིཧརནྟཾ ཨཱཏཱཔིཾ ཨཧོརཏྟཾ ཨཏནྡིཏཾ ཨནལསཾ ཨུཊྛཱཧཀཾ སཔྤུརིསཾ ‘‘བྷདྡེཀརཏྟོ’’ཏི སནྟོ མུནི ཝེ ཨེཀནྟེན ཨཱཙིཀྑཏེ ཨཱཙིཀྑཏིཡེཝཱཏི ཡོཛནཱ།

    Evaṃ manasi katvā vihāriṃ viharantaṃ ātāpiṃ ahorattaṃ atanditaṃ analasaṃ uṭṭhāhakaṃ sappurisaṃ ‘‘bhaddekaratto’’ti santo muni ve ekantena ācikkhate ācikkhatiyevāti yojanā.

    ‘‘ཙཏྟཱརིམཱནི བྷིཀྑཝེ’’ཏྱཱདིསུཏྟཾ པཱལི༹ཏོ ཙ ཨཊྛཀཐཱཏོ ཙ པཱཀཊཾ།

    ‘‘Cattārimāni bhikkhave’’tyādisuttaṃ pāḷito ca aṭṭhakathāto ca pākaṭaṃ.

    ༡༠༤. ནཱནཱཝིདྷཾ ནིབྦེདྷབྷཱགིཡཾ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ ཨསེཀྑབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ཨསེཀྑབྷཱགིཡཾ སུཏྟ’’ནྟིཨཱདི ཝུཏྟཾ། ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ ཨསེཀྑབྷཱགིཡཾ སུཏྟཾ ནཱམཱཏི པུཙྪཏི།

    104. Nānāvidhaṃ nibbedhabhāgiyaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ asekkhabhāgiyaṃ sutta’’nti pucchitabbattā ‘‘tattha katamaṃ asekkhabhāgiyaṃ sutta’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu katamaṃ suttaṃ asekkhabhāgiyaṃ suttaṃ nāmāti pucchati.

    ཡསྶ ཨུཏྟམཔུརིསསྶ ཙིཏྟཾ སེལཱུཔམཾ ཋིཏཾ ལོཀདྷམྨཝཱཏེཧི ནཱནུཀམྤཏི, རཛནཱིཡེསུ ལཱབྷཱདཱིསུ ཝིརཏྟཾ བྷཝེ, སོ ཨུཏྟམཔུརིསོ ཀོཔནེཡྻེ ཨལཱབྷཱདིཀེ ན ཀུཔྤཏི, ཏསྶ ཨུཏྟམཔུརིསསྶ ཙིཏྟཾ ཨེཝཾ ཨནིཙྩཏཱདིནཱ བྷཱཝིཏཾ, ནཾ བྷཱཝིཏཙིཏྟཾ ཨུཏྟམཔུརིསཾ ཝཱིཏིཀྐནྟལོཀདྷམྨཧེཏུཀཾ དུཀྑཾ ཀུཏོ ཨེསྶཏཱིཏི ཡོཛནཱ། ཨིདཾ སུཏྟཾ ཨསེཀྑབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཨསེཀྑབྷཱགིཡཾ སུཏྟཾ ནཱམ། ཨེས ནཡོ ཨིཏོ པརེསུཔི ཝེདིཏབྦོ།

    Yassa uttamapurisassa cittaṃ selūpamaṃ ṭhitaṃ lokadhammavātehi nānukampati, rajanīyesu lābhādīsu virattaṃ bhave, so uttamapuriso kopaneyye alābhādike na kuppati, tassa uttamapurisassa cittaṃ evaṃ aniccatādinā bhāvitaṃ, naṃ bhāvitacittaṃ uttamapurisaṃ vītikkantalokadhammahetukaṃ dukkhaṃ kuto essatīti yojanā. Idaṃ suttaṃ asekkhabhāge visaye vācakañāpakabhāvena pavattanato asekkhabhāgiyaṃ suttaṃ nāma. Esa nayo ito paresupi veditabbo.

    ‘‘ཨསེཀྑབྷཱགིཡཾ སུཏྟཾ ཨིདམེཝཱ’’ཏི ཝཏྟབྦབྷཱཝཏོ ‘‘ཨཱཡསྨཏོ ཙཱ’’ཏིཨཱདི ཝུཏྟཾ།

    ‘‘Asekkhabhāgiyaṃ suttaṃ idamevā’’ti vattabbabhāvato ‘‘āyasmato cā’’tiādi vuttaṃ.

    ཡོ བྲཱཧྨཎོ བཱཧིཏཔཱཔདྷམྨཏྟཱ བཱཧིཏཔཱཔདྷམྨོ བྷཝེ, སོ བྲཱཧྨཎོ ནིགྒཏཧུཾཧུཾཀཏྟཱ ནིཧུཾཧུངྐོ བྷཝེ, ནིགྒཏཀིལེསཀསཱཝཏྟཱ ནིཀྐསཱཝོ བྷཝེ, སཱིལསཾཝརེན སཾཡཏཙིཏྟཏཱཡ ཡཏཏྟོ བྷཝེ, ཡོ བྲཱཧྨཎོ ཙཏུམགྒཉཱཎཝེདེཧི ཨནྟཾ ནིབྦཱནཾ གཏཏྟཱ ཝེདནྟགཱུ བྷཝེ, དྷམྨེན ཝུསིཏབྲཧྨཙརིཡཏྟཱ ཝུསིཏབྲཧྨཙརིཡོ བྷཝེ། ཡསྶ བྲཱཧྨཎསྶ ཀུཧིཉྩི ལོཀེ ཨུསྶདཱ རཱགུསྶདོ དོསུསྶདོ མོཧུསྶདོ མཱནུསྶདོ དིཊྛུསྶདོ ནཏྠི, སོ བྲཱཧྨཎོ བྲཧྨཝཱདཾ ‘‘ཨཧཾ བྲཱཧྨཎོམྷཱི’’ཏི ཝཱཙཾ ཝདེཡྻཱཏི བྷགཝཱ ཨཝོཙཱཏི ཡོཛནཱ།

    Yo brāhmaṇo bāhitapāpadhammattā bāhitapāpadhammo bhave, so brāhmaṇo niggatahuṃhuṃkattā nihuṃhuṅko bhave, niggatakilesakasāvattā nikkasāvo bhave, sīlasaṃvarena saṃyatacittatāya yatatto bhave, yo brāhmaṇo catumaggañāṇavedehi antaṃ nibbānaṃ gatattā vedantagū bhave, dhammena vusitabrahmacariyattā vusitabrahmacariyo bhave. Yassa brāhmaṇassa kuhiñci loke ussadā rāgussado dosussado mohussado mānussado diṭṭhussado natthi, so brāhmaṇo brahmavādaṃ ‘‘ahaṃ brāhmaṇomhī’’ti vācaṃ vadeyyāti bhagavā avocāti yojanā.

    ཡེ བུདྡྷཱ པཱཔཀེ ཨཀུསལེ དྷམྨེ བཱཧིཏྭཱ སདཱ ཙརནྟི སཏཱ སཏིསམྤནྣཱ ཁཱིཎསཾཡོཛནཱ, ཏེ བུདྡྷཱ ལོཀསྨིཾ བྲཱཧྨཎཱཏི ཝེ ཨེཀནྟེན ཀཐཱིཡནྟཱིཏི ཨཝོཙཱཏི ཡོཛནཱ།

    Ye buddhā pāpake akusale dhamme bāhitvā sadā caranti satā satisampannā khīṇasaṃyojanā, te buddhā lokasmiṃ brāhmaṇāti ve ekantena kathīyantīti avocāti yojanā.

    ཡཏྠ ནིབྦཱནེ ཨཱཔོ ཙ པཐཝཱི ཙ ཏེཛོ ཙ ཝཱཡོ ཙ ན གཱདྷཏི ན པཏིཊྛཧཏི, ཏཏྠ ནིབྦཱནེ སུཀྐཱ གཧཱ ཙེཝ ཏཱརཀཱ ཙ ན ཛོཏནྟི, ཏཏྠ ནིབྦཱནེ ཨཱདིཙྩོ ནཔྤཀཱསཏི, ཏཏྠ ནིབྦཱནེ ཙནྡིམཱ ན བྷཱཏི, ཏཏྠ ནིབྦཱནེ ཏམོ ན ཝིཛྫཏི།

    Yattha nibbāne āpo ca pathavī ca tejo ca vāyo ca na gādhati na patiṭṭhahati, tattha nibbāne sukkā gahā ceva tārakā ca na jotanti, tattha nibbāne ādicco nappakāsati, tattha nibbāne candimā na bhāti, tattha nibbāne tamo na vijjati.

    ཡོ བྲཱཧྨཎོ ཨཏྟནཱ སཡཾ མུནི མོནེན ཡདཱ ཏཾ ནིབྦཱནཾ ཨཝེདི ཝིནྡཏི པཊིལབྷཏི པཊིཝིཛ྄ཛྷཏི, ཨཐ པཊིཝིཛ྄ཛྷནཀྑཎེ སོ བྲཱཧྨཎོ རཱུཔཱ རཱུཔདྷམྨཏོ ཙ ཨརཱུཔཱ ཨརཱུཔདྷམྨཏོ ཙ སུཁདུཀྑཱ སུཁདུཀྑཏོ ཙ པམུཙྩཏཱིཏི ཨཝོཙཱཏི ཡོཛནཱ།

    Yo brāhmaṇo attanā sayaṃ muni monena yadā taṃ nibbānaṃ avedi vindati paṭilabhati paṭivijjhati, atha paṭivijjhanakkhaṇe so brāhmaṇo rūpā rūpadhammato ca arūpā arūpadhammato ca sukhadukkhā sukhadukkhato ca pamuccatīti avocāti yojanā.

    ཡཀྑ, ཡོ བྲཱཧྨཎོ སཀེསུ སཀཨཏྟབྷཱཝེསུ དྷམྨེསུ ཨུཔཱདཱནཀྑནྡྷེསུ སཙྩེསུ, དྷམྨེསུ ཙ པཱརགཱུ ཧོཏི, ཨཐ པཱརགམནཀྑཎེ སོ བྲཱཧྨཎོ ཨེཏཾ ཨཛཀལཱཔཀཾ ཏཡཱ ཝུཏྟཾ ཨེཏཾ པིསཱཙཾ ཀིལེསཔིསཱཙཉྩ , ཏཡཱ ཀཏཾ ཨཀྐུལཉྩ ཨཀྐུལཾ, པཀྐུལཀརཎཾ ཨཏིཝཏྟཏཱིཏི ཨཝོཙཱཏི ཡོཛནཱ།

    Yakkha, yo brāhmaṇo sakesu sakaattabhāvesu dhammesu upādānakkhandhesu saccesu, dhammesu ca pāragū hoti, atha pāragamanakkhaṇe so brāhmaṇo etaṃ ajakalāpakaṃ tayā vuttaṃ etaṃ pisācaṃ kilesapisācañca , tayā kataṃ akkulañca akkulaṃ, pakkulakaraṇaṃ ativattatīti avocāti yojanā.

    ཡོ བྷིཀྑུ ཨཱཡནྟིཾ ཨཱགཙྪནྟིཾ པུརཱཎདུཏིཡིཀཾ བྷརིཡཾ ཝཱ, ཨཉྙཾ ཨཱགཙྪནྟིཾ ཨིཏྠིཾ ཝཱ ཙིཏྟེན ན ཨབྷིནནྡཏི, པཀྐམནྟིཾ པུརཱཎདུཏིཡིཀཾ བྷརིཡཾ ཝཱ, ཨཉྙཾ པཀྐམནྟིཾ ཨིཏྠིཾ ཝཱ ཙིཏྟེན ན སོཙཏི, སངྒཱ པཉྩཝིདྷཏོཔི སངྒཏོ མུཏྟཾ སངྒཱམཛིཾ ཏཾ བྷིཀྑུཾ ‘‘བྲཱཧྨཎ’’ནྟི ཨཧཾ ཝདཱམཱིཏི ཨཝོཙཱཏི ཡོཛནཱ།

    Yo bhikkhu āyantiṃ āgacchantiṃ purāṇadutiyikaṃ bhariyaṃ vā, aññaṃ āgacchantiṃ itthiṃ vā cittena na abhinandati, pakkamantiṃ purāṇadutiyikaṃ bhariyaṃ vā, aññaṃ pakkamantiṃ itthiṃ vā cittena na socati, saṅgā pañcavidhatopi saṅgato muttaṃ saṅgāmajiṃ taṃ bhikkhuṃ ‘‘brāhmaṇa’’nti ahaṃ vadāmīti avocāti yojanā.

    ཨེཏྠ ནདིཡཾ བཧུཛནོ ནྷཱཡཏི, སོ བཧུཛནོ ནྷཱཡཀོ ཨུདཀེན ཨུདཀནྷཱནེན སུཙཱི ན ཧོཏི། ཡམྷི པུགྒལེ སཙྩཾ, སཙྩཏོ སེསདྷམྨོ ཙ ཨཏྠི, སོ པུགྒལོ སུཙཱི ཙ ཧོཏི, སོ པུགྒལོ བྲཱཧྨཎོ ཙ ཧོཏཱིཏི ཨཝོཙཱཏི ཡོཛནཱ; སུཙིཨསུཙིབྷཱཝོ ཊཱིཀཱཡཾ ཝིཏྠཱརཏོ ཝུཏྟོཝ།

    Ettha nadiyaṃ bahujano nhāyati, so bahujano nhāyako udakena udakanhānena sucī na hoti. Yamhi puggale saccaṃ, saccato sesadhammo ca atthi, so puggalo sucī ca hoti, so puggalo brāhmaṇo ca hotīti avocāti yojanā; suciasucibhāvo ṭīkāyaṃ vitthārato vuttova.

    ཨཱཏཱཔིནོ ཛྷཱཡཏོ ཡསྶ བྲཱཧྨཎསྶ དྷམྨཱ སཙྩདྷམྨཱ ཡདཱ ཧཝེ ཨེཀནྟེན པཱཏུབྷཝནྟི, ཏདཱ དྷམྨཱནཾ པཱཏུབྷཝནཀྑཎེ སོ བྲཱཧྨཎོ མཱརསེནཾ ཝིདྷཱུཔཡཾ ཝིདྷཱུཔཡནྟོ ཏིཊྛཏི། ‘‘ཀིམིཝཱ’’ཏི ཝཏྟབྦཏྟཱ ‘‘སཱུརིཡོཝ ཨོབྷཱསཡམནྟལིཀྑ’’ནྟི ཝུཏྟཾ། སཱུརིཡོ ཨནྟལིཀྑཾ ཨོབྷཱསཡནྟོ ཏིཊྛཏི ཨིཝ, ཨེཝཾ ཏིཊྛཏཱིཏི ཡོཛནཱ།

    Ātāpino jhāyato yassa brāhmaṇassa dhammā saccadhammā yadā have ekantena pātubhavanti, tadā dhammānaṃ pātubhavanakkhaṇe so brāhmaṇo mārasenaṃ vidhūpayaṃ vidhūpayanto tiṭṭhati. ‘‘Kimivā’’ti vattabbattā ‘‘sūriyova obhāsayamantalikkha’’nti vuttaṃ. Sūriyo antalikkhaṃ obhāsayanto tiṭṭhati iva, evaṃ tiṭṭhatīti yojanā.

    ཡོ པཾསུཀཱུལིཀོ བྷིཀྑུ སབྦཱནི ཙཏྟཱརི ཡོགཱནི ཨུཔཱཏིཝཏྟོ སཀིཉྩནེ ལོཀེ ཨཀིཉྩནོ ཨིརིཡཏི ཙཏུབྦིདྷཨིརིཡཱཔཐཾ ཝཏྟེཏི། ཨཔཧཱནདྷམྨཾ ཀེནཙི མགྒེན ཨཔྤཧཱནསབྷཱཝཾ ཨཔྤཏྟཀཱཡེན ཨཔྤཏྟཾ ཏེཝིཛྫཔཏྟཾ, ཨིརིཡམཱནཾ སནྟིནྡྲིཡཾ ཏཾ པཾསུཀཱུལིཀཾ བྷིཀྑུཾ ཏུམྷེ པསྶཐ།

    Yo paṃsukūliko bhikkhu sabbāni cattāri yogāni upātivatto sakiñcane loke akiñcano iriyati catubbidhairiyāpathaṃ vatteti. Apahānadhammaṃ kenaci maggena appahānasabhāvaṃ appattakāyena appattaṃ tevijjapattaṃ, iriyamānaṃ santindriyaṃ taṃ paṃsukūlikaṃ bhikkhuṃ tumhe passatha.

    ཨཱཛཱནིཡཾ པུརིསཨཱཛཱནཱིཡཾ ཛཱཏིབལནིསེདྷཾ ‘‘ཨཧཾ ཛཱཏིབྲཱཧྨཎོ’’ཏི ཛཱཏིམཏྟཀེན པཝཏྟམཱནབལནིསེདྷཀཾ ཏཾ པཾསུཀཱུལིཀཾ བྷིཀྑུཾ སམྦཧུལཱ ཨུལཱ༹རཱ དེཝཏཱ བྲཧྨཾ ཝིམཱནཾ ཨུཔསངྐམིཏྭཱ ཨིདྷ སཱསནེ, བྲཧྨཝིམཱནེ ཝཱ པསནྣཙིཏྟཱ ཧུཏྭཱ ནམསྶནྟི། ནིདྷཱཏི ཙ ཨེཏྠ ན-ཀཱརོ ཨཱགམོ།

    Ājāniyaṃ purisaājānīyaṃ jātibalanisedhaṃ ‘‘ahaṃ jātibrāhmaṇo’’ti jātimattakena pavattamānabalanisedhakaṃ taṃ paṃsukūlikaṃ bhikkhuṃ sambahulā uḷārā devatā brahmaṃ vimānaṃ upasaṅkamitvā idha sāsane, brahmavimāne vā pasannacittā hutvā namassanti. Nidhāti ca ettha na-kāro āgamo.

    པུརིསཱཛཉྙ ཏེ ཏཝ ཨམྷཱཀཾ ནམོ ཨཏྠུ, པུརིསུཏྟམ ཏེ ཏཝ ཨམྷཱཀཾ ནམོ ཨཏྠུ, ཡསྶ ཏེ ཏཝ ནིསྶཡཾ མཡཾ ནཱབྷིཛཱནཱམ, སོ ཏྭཾ ཀིཾ པུགྒལཾ ནིསྶཱཡ ཛྷཱཡསཱིཏི ཨཝོཙུནྟི ཡོཛནཱ།

    Purisājañña te tava amhākaṃ namo atthu, purisuttama te tava amhākaṃ namo atthu, yassa te tava nissayaṃ mayaṃ nābhijānāma, so tvaṃ kiṃ puggalaṃ nissāya jhāyasīti avocunti yojanā.

    ཡེ བྷིཀྑཱུ ཀཱལེན ཀཱལཾ དྷམྨསྶཝནཝསེན ཙིརརཏྟཾ སམེཏིཀཱ བྷཝནྟི, ཨིམེ བྷིཀྑཱུ སཧཱཡཱ ཧོནྟི ཝཏ། ནེསཾ སཧཱཡཱནཾ བྷིཀྑཱུནཾ དྷམྨེ བུདྡྷཔྤཝེདིཏེ དྷམྨེ སདྡྷམྨོ སམེཏི།

    Ye bhikkhū kālena kālaṃ dhammassavanavasena cirarattaṃ sametikā bhavanti, ime bhikkhū sahāyā honti vata. Nesaṃ sahāyānaṃ bhikkhūnaṃ dhamme buddhappavedite dhamme saddhammo sameti.

    ཀཔྤིནེན ཨརིཡཔྤཝེདིཏེ དྷམྨེ སུཝིནཱིཏཱ ཏེ སཧཱཡཀཱ བྷིཀྑཱུ སཝཱཧིནིཾ མཱརཾ ཛེཏྭཱ ཨནྟིམཾ དེཧཾ ཨཏྟབྷཱཝཾ དྷཱརེནྟཱིཏི ཨཝོཙཱཏི ཡོཛནཱ།

    Kappinena ariyappavedite dhamme suvinītā te sahāyakā bhikkhū savāhiniṃ māraṃ jetvā antimaṃ dehaṃ attabhāvaṃ dhārentīti avocāti yojanā.

    སིཐིལཾ ཝཱིརིཡཾ ཨཱརབྦྷ སབྦདུཀྑཔྤམོཙནཾ ཨིདཾ ནིབྦཱནཾ ཡོགཱཝཙརེན ན ཨདྷིགནྟབྦཾ, ཨཔྤེན ཨཔྤཀེན ཐཱམསཱ ཨིདཾ ནིབྦཱནཾ ན ཨདྷིགནྟབྦཾ།

    Sithilaṃ vīriyaṃ ārabbha sabbadukkhappamocanaṃ idaṃ nibbānaṃ yogāvacarena na adhigantabbaṃ, appena appakena thāmasā idaṃ nibbānaṃ na adhigantabbaṃ.

    ཨཡཉྩ ཡོགཱཝཙརོ བྷིཀྑུ དཧརོ, ཡོ པུརིསོ སཝཱཧིནིཾ མཱརཾ ཛེཏྭཱ ཨནྟིམཾ དེཧཾ ཨཏྟབྷཱཝཾ དྷཱརེཏི, སོ ཨཡཾ པུརིསོ སོ ཨུཏྟམཔུརིསོཝཱཏི ཨཝོཙཱཏི ཡོཛནཱ། ‘‘པུརིསོ’’ཏི ཝཏྟབྦེ ཚནྡཱནུརཀྑཎཝསེན ‘‘པོརིསོ’’ཏི ཝུཏྟཾ།

    Ayañca yogāvacaro bhikkhu daharo, yo puriso savāhiniṃ māraṃ jetvā antimaṃ dehaṃ attabhāvaṃ dhāreti, so ayaṃ puriso so uttamapurisovāti avocāti yojanā. ‘‘Puriso’’ti vattabbe chandānurakkhaṇavasena ‘‘poriso’’ti vuttaṃ.

    མོགྷརཱཛ, དུབྦཎྞཀོ ལཱུཁཙཱིཝརོ སདཱ སཏོ སཏིསམྤནྣོ ཁཱིཎཱསཝོ ཙ ཝིསཾཡུཏྟོ ཙ ཀཏཀིཙྩོ ཙ ཨནཱསཝོ ཙ ཏེཝིཛྫོ ཙ ཨིདྡྷིཔྤཏྟོ ཙ ཙེཏོཔརིཡཱཡཀོཝིདོ ཙ སོ བྷིཀྑུ སཝཱཧིནིཾ མཱརཾ ཛེཏྭཱ ཨནྟིམཾ དེཧཾ དྷཱརེཏཱིཏི ཨཝོཙཱཏི ཡོཛནཱ།

    Mogharāja, dubbaṇṇako lūkhacīvaro sadā sato satisampanno khīṇāsavo ca visaṃyutto ca katakicco ca anāsavo ca tevijjo ca iddhippatto ca cetopariyāyakovido ca so bhikkhu savāhiniṃ māraṃ jetvā antimaṃ dehaṃ dhāretīti avocāti yojanā.

    ༡༠༥. ‘‘ཏཐཱགཏོ’’ཏིཨཱདཱིསུ ཡོཛནཱ པཱཀཊཱ། ཨིདཾ སུཏྟཾ ཨསེཀྑབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཨསེཀྑབྷཱགིཡཾ སུཏྟཾ ནཱམ།

    105.‘‘Tathāgato’’tiādīsu yojanā pākaṭā. Idaṃ suttaṃ asekkhabhāge visaye vācakañāpakabhāvena pavattanato asekkhabhāgiyaṃ suttaṃ nāma.

    ༡༠༦. ནཱནཱཝིདྷཾ ཨསེཀྑབྷཱགིཡཾ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟ’’ནྟི ཝཏྟབྦཏྟཱ ‘‘ཏཏྠ ཀཏམཾ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟ’’ནྟིཨཱདི ཝུཏྟཾ། ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ནཱམཱཏི པུཙྪཏི།

    106. Nānāvidhaṃ asekkhabhāgiyaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca vāsanābhāgiyañca sutta’’nti vattabbattā ‘‘tattha katamaṃ saṃkilesabhāgiyañca vāsanābhāgiyañca sutta’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu katamaṃ suttaṃ saṃkilesabhāgiyañca vāsanābhāgiyañca suttaṃ nāmāti pucchati.

    ཚནྣཾ ཨཱཔཏྟིཾ ཨཱཔཛྫིཏྭཱ ཚནྣཾ ཚཱདེནྟཾ བྷིཀྑུཾ དུཀྐཊཱདིཝསྶོ ཨཏིཝསྶཏི, ཝིཝཊཾ ཨཱཔཏྟིཾ ཨཱཔཛྫིཏྭཱ ཝིཝཊཾ དེསེནྟཾ ཨཱཙིཀྑནྟཾ བྷིཀྑུཾ དུཀྐཊཱདིཝསྶོ ནཱཏིཝསྶཏི, ཏསྨཱ ཚནྣསྶ ཨཏིཝསྶནཏོ ཙ ཝིཝཊསྶ ནཱཏིཝསྶནཏོ ཙ ཚནྣཾ ཚཱདིཏབྦཾ ཨཱཔཏྟིཾ ཝིཝརེཐ དེསེཐ ཨཱརོཙེཐ , ཨེཝཾ ཝིཝརཎེ སཏི ཏཾ ཝིཝརནྟཾ བྷིཀྑུཾ དུཀྐཊཱདིཝསྶོ ནཱཏིཝསྶཏཱིཏི ཡོཛནཱ།

    Channaṃ āpattiṃ āpajjitvā channaṃ chādentaṃ bhikkhuṃ dukkaṭādivasso ativassati, vivaṭaṃ āpattiṃ āpajjitvā vivaṭaṃ desentaṃ ācikkhantaṃ bhikkhuṃ dukkaṭādivasso nātivassati, tasmā channassa ativassanato ca vivaṭassa nātivassanato ca channaṃ chāditabbaṃ āpattiṃ vivaretha desetha ārocetha , evaṃ vivaraṇe sati taṃ vivarantaṃ bhikkhuṃ dukkaṭādivasso nātivassatīti yojanā.

    ‘‘ཨིམསྨིཾ སུཏྟེ ཀིཏྟཀེན སཾཀིལེསོ དསྶིཏོ, ཀིཏྟཀེན ཝཱསནཱ དསྶིཏཱ’’ཏི པུཙྪིཏབྦཏྟཱ ‘‘ཚནྣམཏིཝསྶཏཱི’’ཏི སཾཀིལེསོ, ‘ཝིཝཊཾ ནཱཏིཝསྶཏཱི’ཏི ཝཱསནཱ, ‘ཏསྨཱ ཚནྣཾ ཝིཝརེཐ, ཨེཝཾ ཏཾ ནཱཏིཝསྶཏཱི’ཏི ཨཡཾ སཾཀིལེསོ ཙ ཝཱསནཱ ཙཱ’’ཏི ཝུཏྟཾ། ‘‘ཚནྣམཏིཝསྶཏཱི’’ཏི ཨེཏྟཀེན སཾཀིལེསོ དསྶིཏོ། ‘‘ཝིཝཊཾ ནཱཏིཝསྶཏཱི’’ཏི ཨེཏྟཀེན ཝཱསནཱ དསྶིཏཱ། ‘‘ཏསྨཱ ཚནྣཾ ཝིཝརེཐ, ཨེཝཾ ཏཾ ནཱཏིཝསྶཏཱི’’ཏི ཨེཏྟཀེན ཨཡཾ སཾཀིལེསོ ཙ དསྶིཏོ, ཨཡཾ ཝཱསནཱ ཙ དསྶིཏཱ། ཨིདཾ ‘‘ཚནྣཾ…པེ॰.. ཝསྶཏཱི’’ཏི སུཏྟཾ སཾཀིལེསབྷཱགེ ཝིསཡེ ཙ ཝཱསནཱབྷཱགེ ཝིསཡེ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ནཱམ།

    ‘‘Imasmiṃ sutte kittakena saṃkileso dassito, kittakena vāsanā dassitā’’ti pucchitabbattā ‘‘channamativassatī’’ti saṃkileso, ‘vivaṭaṃ nātivassatī’ti vāsanā, ‘tasmā channaṃ vivaretha, evaṃ taṃ nātivassatī’ti ayaṃ saṃkileso ca vāsanā cā’’ti vuttaṃ. ‘‘Channamativassatī’’ti ettakena saṃkileso dassito. ‘‘Vivaṭaṃ nātivassatī’’ti ettakena vāsanā dassitā. ‘‘Tasmā channaṃ vivaretha, evaṃ taṃ nātivassatī’’ti ettakena ayaṃ saṃkileso ca dassito, ayaṃ vāsanā ca dassitā. Idaṃ ‘‘channaṃ…pe... vassatī’’ti suttaṃ saṃkilesabhāge visaye ca vāsanābhāge visaye ca vācakañāpakabhāvena pavattanato saṃkilesabhāgiyañca vāsanābhāgiyañca suttaṃ nāma.

    ‘‘སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ཨེཏྟཀམེཝཱ’’ཏི ཝཏྟབྦཏྟཱ ‘‘ཙཏྟཱརོམེ མཧཱརཱཛཱ’’ཏིཨཱདི ཝུཏྟཾ། ‘‘ཏེསུ ཙཏཱུསུ པུགྒལེསུ ཀཏམེ པུགྒལཱ སཾཀིལེསབྷཱགིཡཱ, ཀཏམེ པུགྒལཱ ཝཱསནཱབྷཱགིཡཱ’’ཏི པུཙྪིཏབྦཏྟཱ ‘‘ཏཏྠ ཡོ ཙ པུགྒལོ’’ཏིཨཱདི ཝུཏྟཾ། ཏཏྠཱཏི ཏེསུ ཙཏཱུསུ ཏམོཏམཔརཱཡཎཱདཱིསུ པུགྒལེསུ། ཏསྶཏྠོ པཱཀཊོ། ཨིདཾ ‘‘ཙཏྟཱརོམེ’’ཏིཨཱདིཀཾ སུཏྟཾ སཾཀིལེསབྷཱགིཡེསུ དྭཱིསུ པུགྒལེསུ ཙ ཝཱསནཱབྷཱགིཡེསུ དྭཱིསུ པུགྒལེསུ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ནཱམ།

    ‘‘Saṃkilesabhāgiyañca vāsanābhāgiyañca suttaṃ ettakamevā’’ti vattabbattā ‘‘cattārome mahārājā’’tiādi vuttaṃ. ‘‘Tesu catūsu puggalesu katame puggalā saṃkilesabhāgiyā, katame puggalā vāsanābhāgiyā’’ti pucchitabbattā ‘‘tattha yo ca puggalo’’tiādi vuttaṃ. Tatthāti tesu catūsu tamotamaparāyaṇādīsu puggalesu. Tassattho pākaṭo. Idaṃ ‘‘cattārome’’tiādikaṃ suttaṃ saṃkilesabhāgiyesu dvīsu puggalesu ca vāsanābhāgiyesu dvīsu puggalesu ca vācakañāpakabhāvena pavattanato saṃkilesabhāgiyañca vāsanābhāgiyañca suttaṃ nāma.

    ནཱནཱཝིདྷཾ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ ནཱམཱ’’ཏི པུཙྪིཏབྦཏྟཱ ཏཏྠ ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟ’’ནྟིཨཱདི ཝུཏྟཾ། ཏསྶཏྠོ ཝུཏྟནཡེན ཝེདིཏབྦོ།

    Nānāvidhaṃ saṃkilesabhāgiyañca vāsanābhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca nibbedhabhāgiyañca suttaṃ nāmā’’ti pucchitabbattā tattha katamaṃsaṃkilesabhāgiyañca nibbedhabhāgiyañca sutta’’ntiādi vuttaṃ. Tassattho vuttanayena veditabbo.

    ཨཡསཾ ཡཾ བནྡྷནཉྩ དཱརུཛཾ ཡཾ བནྡྷནཉྩ པབྦཛཾ ཡཾ བནྡྷནཉྩ ལོཀེ ཨཏྠི, ཏཾ ཨཡསཱདིབནྡྷནཾ ‘‘དལ༹ྷཾ བནྡྷན’’ནྟི དྷཱིརཱ བུདྡྷཱདཡོ པཎྜིཏཔུརིསཱ ན ཨཱཧུ། མཎིཀུཎྜལེསུ ཙ པུཏྟེསུ ཙ དཱརེསུ ཙ ཡཱ སཱརཏྟརཏྟཱ བལཝརཱགརཏྟཱ ཨཔེཀྑཱ ལོཀེ ཝིཛྫཏི, ཏཾ སཱརཏྟརཏྟཨཔེཀྑཱསངྑཱཏཾ རཱགབནྡྷནཾ ‘‘དལ༹ྷཾ བནྡྷན’’ནྟི དྷཱིརཱ པཎྜིཏཔུརིསཱ ཨཱཧུ། ཨིམིནཱ སུཏྟཔྤདེསེན ཨཡཾ སཱརཏྟརཏྟཨཔེཀྑཱསངྑཱཏོ ཨཀུསལདྷམྨོ སཾཀིལེསོ དསྶིཏོ།

    Ayasaṃ yaṃ bandhanañca dārujaṃ yaṃ bandhanañca pabbajaṃ yaṃ bandhanañca loke atthi, taṃ ayasādibandhanaṃ ‘‘daḷhaṃ bandhana’’nti dhīrā buddhādayo paṇḍitapurisā na āhu. Maṇikuṇḍalesu ca puttesu ca dāresu ca yā sārattarattā balavarāgarattā apekkhā loke vijjati, taṃ sārattarattaapekkhāsaṅkhātaṃ rāgabandhanaṃ ‘‘daḷhaṃ bandhana’’nti dhīrā paṇḍitapurisā āhu. Iminā suttappadesena ayaṃ sārattarattaapekkhāsaṅkhāto akusaladhammo saṃkileso dassito.

    ‘‘ཀེན ནིབྦེདྷོ དསྶིཏོ’’ཏི ཝཏྟབྦཏྟཱ ‘‘ཨེཏ’’ནྟིཨཱདི ཝུཏྟཾ། དྷཱིརཱ པཎྜིཏཔུརིསཱ ཨེཏཾ རཱགབནྡྷནཾ ‘‘དལ༹ྷཾ བནྡྷན’’ནྟི ཨཱཧུ། ཨེཏཾ རཱགབནྡྷནཾ ཨོཧཱརིནཾ ཧེཊྛཱ ཨཔཱཡཾ ཨཝཧརཎཾ ཧོཏི, སིཐིལཾ བནྡྷནཊྛཱནེ ཚཝིཨཱདཱིནི ཨཀོཔེཏཏྟཱ སིཐིལཾ ཧོཏི, དུཔྤམུཉྩཾ ལོབྷཝསེན ཨེཀཝཱརམྤི ཨུཔྤནྣསྶ རཱགབནྡྷནསྶ དུམྨོཙཡཏྟཱ དུཔྤམུཉྩཾ ཧོཏི, པཎྜིཏཔུརིསཱ ཨེཏམྤི ཝུཏྟཔྤཀཱརཾ རཱགབནྡྷནམྤི མགྒེན ཚེཏྭཱན ཨནཔེཀྑིནོ ཧུཏྭཱ ཀཱམསུཁཾ པཧཱཡ པརིབྦཛནྟི། ཨིཏི ཨིམིནཱ སུཏྟཔྤདེསེན ཨཡཾ མགྒོ ནིབྦེདྷོ དསྶིཏོ། ཨིདཾ ‘‘ཨཡས’’ནྟིཨཱདིཀཾ སུཏྟཾ རཱགཱདིསཾཀིལེསབྷཱགེ ཝིསཡེ ཙ ཝཱསནཱབྷཱགེ ཝིསཡེ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ནཱམ།

    ‘‘Kena nibbedho dassito’’ti vattabbattā ‘‘eta’’ntiādi vuttaṃ. Dhīrā paṇḍitapurisā etaṃ rāgabandhanaṃ ‘‘daḷhaṃ bandhana’’nti āhu. Etaṃ rāgabandhanaṃ ohārinaṃ heṭṭhā apāyaṃ avaharaṇaṃ hoti, sithilaṃ bandhanaṭṭhāne chaviādīni akopetattā sithilaṃ hoti, duppamuñcaṃ lobhavasena ekavārampi uppannassa rāgabandhanassa dummocayattā duppamuñcaṃ hoti, paṇḍitapurisā etampi vuttappakāraṃ rāgabandhanampi maggena chetvāna anapekkhino hutvā kāmasukhaṃ pahāya paribbajanti. Iti iminā suttappadesena ayaṃ maggo nibbedho dassito. Idaṃ ‘‘ayasa’’ntiādikaṃ suttaṃ rāgādisaṃkilesabhāge visaye ca vāsanābhāge visaye ca vācakañāpakabhāvena pavattanato saṃkilesabhāgiyañca vāsanābhāgiyañca suttaṃ nāma.

    ༡༠༧. བྷིཀྑཝེ, ཡཉྩ ཙེཏེཏི ཡཉྩ ཙེཏནཾ ནིབྦཏྟེཏི, ཡཉྩ པཀཔྤེཏི ཡཉྩ པཀཔྤནཾ ཀརོཏི, ཡཉྩ ཨནུསེཏི ཡཉྩ ཨནུསཡནཾ བྷཝཏི, ཨེཏཾ ཙེཏནཾ ཨེཏཾ པཀཔྤནཾ ཨེཏཾ ཨནུསཡནཾ ཝིཉྙཱཎསྶ ཋིཏིཡཱ ཨཱརམྨཎཾ པཙྩཡོ ཧོཏི། ཨཱརམྨཎེ པཙྩཡེ སཏི ཏསྶ ཨབྷིསངྑཱར ཝིཉྙཱཎསྶ པཏིཊྛཱ ཧོཏི། ཏསྨིཾ ཨབྷིསངྑཱརཝིཉྙཱཎེ པཏིཊྛིཏེ ཝིརུལ༹ྷེ སཏི ཨཱཡཏིཾ པུནབྦྷཝཱབྷིནིབྦཏྟི ཝིཉྙཱཎཱདིནིབྦཏྟི ཧོཏི། ཨཱཡཏིཾ པུནབྦྷཝཱབྷིནིབྦཏྟིཡཱ སཏི ཨཱཡཏིཾ ཛཱཏིཛརཱམརཎཾ སམྦྷཝཏི། ཨཱཡཏིཾ སོཀ…པེ॰… སམུདཡོ ཧོཏི།

    107. Bhikkhave, yañca ceteti yañca cetanaṃ nibbatteti, yañca pakappeti yañca pakappanaṃ karoti, yañca anuseti yañca anusayanaṃ bhavati, etaṃ cetanaṃ etaṃ pakappanaṃ etaṃ anusayanaṃ viññāṇassa ṭhitiyā ārammaṇaṃ paccayo hoti. Ārammaṇe paccaye sati tassa abhisaṅkhāra viññāṇassa patiṭṭhā hoti. Tasmiṃ abhisaṅkhāraviññāṇe patiṭṭhite viruḷhe sati āyatiṃ punabbhavābhinibbatti viññāṇādinibbatti hoti. Āyatiṃ punabbhavābhinibbattiyā sati āyatiṃ jātijarāmaraṇaṃ sambhavati. Āyatiṃ soka…pe… samudayo hoti.

    བྷིཀྑཝེ, ཙེ ནོ ཙེཏེཏི, ཙེ ནོ པཀཔྤེཏི, ཨཐ ཏཐཱཔི ཙེ ཨནུསེཏི ཨནུསཡནཾ བྷཝཏི, ཨེཝཾ སཏི ཨེཏཾ ཨནུསཡནཾ ཝིཉྙཱཎསྶ ཨབྷིསངྑཱརཝིཉྙཱཎསྶ ཨཱརམྨཎཾ པཙྩཡོ ཧོཏི…པེ॰… སམུདཡོ ཧོཏི། ཨིཏི ཨིམིནཱ སུཏྟཔྤདེསེན ཨཡཾ ཝུཏྟཔྤཀཱརོ ཙེཏཡནཱདིཀོ ཨཀུསལདྷམྨོ སཾཀིལེསོ དསྶིཏོ།

    Bhikkhave, ce no ceteti, ce no pakappeti, atha tathāpi ce anuseti anusayanaṃ bhavati, evaṃ sati etaṃ anusayanaṃ viññāṇassa abhisaṅkhāraviññāṇassa ārammaṇaṃ paccayo hoti…pe… samudayo hoti. Iti iminā suttappadesena ayaṃ vuttappakāro cetayanādiko akusaladhammo saṃkileso dassito.

    ‘‘ཀེན ནིབྦེདྷོ དསྶིཏོ’’ཏི ཝཏྟབྦཏྟཱ ‘‘ཡཏོ ཙཱ’’ཏིཨཱདི ཝུཏྟཾ། བྷིཀྑཝེ, ཡཏོ ཙ ཨརིཡམགྒིཀོ ནེཝ ཙེཏེཏི, ནོ ཙ པཀཔྤེཏི, ནོ ཙ ཨནུསེཏི, ཨེཏཾ ཨཙེཏཡནཾ ཨེཏཾ ཨཀཔྤནཾ ཨེཏཾ ཨནནུསཡནཾ ཝིཉྙཱཎསྶ ཨབྷིསངྑཱརཝིཉྙཱཎསྶ ཨཱརམྨཎཾ པཙྩཡོ ན ཧོཏི…པེ॰… ཨཱཡཏིཾ ཛཱཏིཛརཱམརཎཾ ནིརུཛ྄ཛྷཏི, ཨཱཡཏིཾ སོཀ…པེ॰… ཡཱསཱ ནིརུཛ྄ཛྷནྟི…པེ॰… ནིརོདྷོ ཧོཏི། ཨིཏི ཨིམིནཱ སུཏྟཔྤདེསེན ཨཡཾ ཨརིཡམགྒོ ནིབྦེདྷོ དསྶིཏོ། ཨིདཾ ‘‘ཡཉྩ བྷིཀྑཝེ’’ཏིཨཱདིཀཾ སུཏྟཾ སཾཀིལེསབྷཱགེ ཝིསཡེ ཙ ནིབྦེདྷབྷཱགེ ཝིསཡེ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ ནཱམ།

    ‘‘Kena nibbedho dassito’’ti vattabbattā ‘‘yato cā’’tiādi vuttaṃ. Bhikkhave, yato ca ariyamaggiko neva ceteti, no ca pakappeti, no ca anuseti, etaṃ acetayanaṃ etaṃ akappanaṃ etaṃ ananusayanaṃ viññāṇassa abhisaṅkhāraviññāṇassa ārammaṇaṃ paccayo na hoti…pe… āyatiṃ jātijarāmaraṇaṃ nirujjhati, āyatiṃ soka…pe… yāsā nirujjhanti…pe… nirodho hoti. Iti iminā suttappadesena ayaṃ ariyamaggo nibbedho dassito. Idaṃ ‘‘yañca bhikkhave’’tiādikaṃ suttaṃ saṃkilesabhāge visaye ca nibbedhabhāge visaye ca vācakañāpakabhāvena pavattanato saṃkilesabhāgiyañca nibbedhabhāgiyañca suttaṃ nāma.

    ༡༠༨. ནཱནཱཝིདྷཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟ’’ནྟིཨཱདི ཝུཏྟཾ། ཏསྶཏྠོ ཝུཏྟནཡེན ཝེདིཏབྦོ།

    108. Nānāvidhaṃ saṃkilesabhāgiyañca nibbedhabhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca asekkhabhāgiyañca sutta’’nti pucchitabbattā ‘‘tattha katamaṃ saṃkilesabhāgiyañca asekkhabhāgiyañca sutta’’ntiādi vuttaṃ. Tassattho vuttanayena veditabbo.

    བྷིཀྑཝེ, ཨསྶུཏཝཱ པུཐུཛྫནོ སམུདྡོ ཛལསཱགརསམུདྡོ ‘‘སམུདྡོ སམུདྡོ’’ཏི བྷཱསཏི། ཀེནཊྛེན བྷཱསཏི? དུཔྤཱུརཎཊྛེན ཙ སཾསརཎཊྛེན ཙ དུརཏིཀྐམནཊྛེན ཙ སམུདྡོཏི བྷཱསཏི། ཨེཝཾ སཏི, བྷིཀྑཝེ, ཨེསོ ཛལསཱགརསམུདྡོ ཨརིཡསྶ བྷགཝཏོ ཝིནཡེ ཝུཏྟཔྤཀཱརཊྛེན སམུདྡོ ན ཧོཏི། བྷིཀྑཝེ, ཨེསོ ཛལསཱགརསམུདྡོ མཧཱ ཨུདཀརཱསི མཧཱ ཨུདཀཎྞཝོ ཧོཏི། བྷིཀྑཝེ, ཙཀྑུ པུརིསསྶ སམུདྡོ ཧོཏི, ཏསྶ ཙཀྑུསྶ རཱུཔམཡོ རཱུཔཱཡཏནམཡོ ཝེགོ། ཀེནཊྛེན? པཐཝིཏོ ཡཱཝ ཨཀནིཊྛབྲཧྨལོཀཱ ནཱིལཱདིརཱུཔཱརམྨཎཾ སམོསརནྟམྤི དུཔྤཱུརཎཊྛེན ཙ ཨནམཏགྒེ སཾསཱརེ སཾསརཎཊྛེན ཙ དུརཏིཀྐམནཊྛེན ཙ ཙཀྑུམེཝ སམུདྡོ ཧོཏི། ནཱིལཱདིརཱུཔཱཡཏནསྶ ཨཔྤམེཡྻསྶ ཨཔྤམེཡྻེན ཨཱུམིམཡེན ཝེགེན སཾསརཎཊྛེན ནཱིལཱདིརཱུཔམེཝ ཝེགོ ཧོཏི། ཨིཏི ཨིམིནཱ སུཏྟཔྤདེསེན ཨཡཾ ཙཀྑུ སམུདྡོ རཱུཔམཡོ ཝེགོ ཙ སཾཀིལེསོ སཾཀིལེསཧེཏུ དསྶིཏོ།

    Bhikkhave, assutavā puthujjano samuddo jalasāgarasamuddo ‘‘samuddo samuddo’’ti bhāsati. Kenaṭṭhena bhāsati? Duppūraṇaṭṭhena ca saṃsaraṇaṭṭhena ca duratikkamanaṭṭhena ca samuddoti bhāsati. Evaṃ sati, bhikkhave, eso jalasāgarasamuddo ariyassa bhagavato vinaye vuttappakāraṭṭhena samuddo na hoti. Bhikkhave, eso jalasāgarasamuddo mahā udakarāsi mahā udakaṇṇavo hoti. Bhikkhave, cakkhu purisassa samuddo hoti, tassa cakkhussa rūpamayo rūpāyatanamayo vego. Kenaṭṭhena? Pathavito yāva akaniṭṭhabrahmalokā nīlādirūpārammaṇaṃ samosarantampi duppūraṇaṭṭhena ca anamatagge saṃsāre saṃsaraṇaṭṭhena ca duratikkamanaṭṭhena ca cakkhumeva samuddo hoti. Nīlādirūpāyatanassa appameyyassa appameyyena ūmimayena vegena saṃsaraṇaṭṭhena nīlādirūpameva vego hoti. Iti iminā suttappadesena ayaṃ cakkhu samuddo rūpamayo vego ca saṃkileso saṃkilesahetu dassito.

    ‘‘ཀེན ཨསེཀྑོ དསྶིཏོ’’ཏི ཝཏྟབྦཏྟཱ ‘‘ཡོ ཏ’’ནྟིཨཱདི ཝུཏྟཾ། ཡསྨིཾ ཨརཧཏྟཕལེ ཋིཏོ ཡོ ཨརཧཱ རཱུཔམཡཾ ཏཾ ཝེགཾ སཧཏི མནཱཔེ རཱུཔེ རཱགཾ, ཨམནཱཔེ རཱུཔེ དོསཾ, ཨསམཔེཀྑནེ མོཧཾ ཨནུཔྤཱདེནྟོ ཧུཏྭཱ ཨུཔེཀྑཀབྷཱཝེན སཧཏི, ཨཡཾ ཨརཧཱ, བྷིཀྑཝེ, སཨཱུམིཾ སཱཝཊྚཾ སགཧཾ སརཀྑསཾ ཙཀྑུསམུདྡཾ ཨཏརཱིཏི ཝུཙྩཏི, ཏིཎྞོ པཱརངྒཏོ ཐལེ ཏིཊྛཏི བྲཱཧྨཎོཏི ཝུཙྩཏི། ཨིཏི ཨིམིནཱ སུཏྟཔྤདེསེན ཨཡཾ ཨརཧཏྟཕལབྷཱུཏོ ཨསེཀྑོ དསྶིཏོ།

    ‘‘Kena asekkho dassito’’ti vattabbattā ‘‘yo ta’’ntiādi vuttaṃ. Yasmiṃ arahattaphale ṭhito yo arahā rūpamayaṃ taṃ vegaṃ sahati manāpe rūpe rāgaṃ, amanāpe rūpe dosaṃ, asamapekkhane mohaṃ anuppādento hutvā upekkhakabhāvena sahati, ayaṃ arahā, bhikkhave, saūmiṃ sāvaṭṭaṃ sagahaṃ sarakkhasaṃ cakkhusamuddaṃ atarīti vuccati, tiṇṇo pāraṅgato thale tiṭṭhati brāhmaṇoti vuccati. Iti iminā suttappadesena ayaṃ arahattaphalabhūto asekkho dassito.

    ‘‘སོཏཾ བྷིཀྑཝེ’’ཏིཨཱདཱིསུཔི ཨིམིནཱ ནཡེན ཡཐཱསམྦྷཝཾ ཨཏྠོ ཝེདིཏབྦོ། ཨིདཾ ‘‘སམུདྡོ’’ཏིཨཱདིཀཾ སུཏྟཾ སཾཀིལེསབྷཱགེ ཝིསཡེ ཙ ཨསེཀྑབྷཱགེ ཝིསཡེ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟཾ ནཱམ།

    ‘‘Sotaṃbhikkhave’’tiādīsupi iminā nayena yathāsambhavaṃ attho veditabbo. Idaṃ ‘‘samuddo’’tiādikaṃ suttaṃ saṃkilesabhāge visaye ca asekkhabhāge visaye ca vācakañāpakabhāvena pavattanato saṃkilesabhāgiyañca asekkhabhāgiyañca suttaṃ nāma.

    ‘‘ཨེཏྟཀམེཝཱ’’ཏི ཝཏྟབྦཏྟཱ ‘‘ཚཡིམེ’’ཏིཨཱདི ཝུཏྟཾ། བྷིཀྑཝེ, ལོཀསྨིཾ སཏྟཱནཾ ཨནཡཱཡ ཨནཏྠཱཡ པཱཎཱིནཾ བྱཱབཱདྷཱཡ ཨིམེ མཡཱ ཝུཙྩམཱནཱ བལི༹སཱ ཚ བྷཝནྟི། ཀཏམེ ཚ? བྷིཀྑཝེ, ཙཀྑུཝིཉྙེཡྻཱ ཙཀྑུཝིཉྙཱཎེན ཝིཉྙེཡྻཱ ཨིཊྛཱ ཀནྟཱ ཀཱམནཱིཡཱ མནཱཔཱ མནཝཌྜྷཀཱ པིཡརཱུཔཱ པིཡསབྷཱཝཱ ཀཱམཱུཔསཾཧིཏཱ ཀིལེསཀཱམསཧིཏཱ རཛནཱིཡཱ རཱུཔཱ ནཱིལཱདིརཱུཔཱརམྨཎཱ སནྟི, ཏཾ ཝུཏྟཔྤཀཱརཾ རཱུཔཾ བྷིཀྑུ ཙེ ཨབྷིནནྡཏི སཔྤཱིཏིཀཏཎྷཱཡ ཨབྷིམུཁོ ནནྡཏི, ཙེ ཨབྷིཝདཏི ‘‘ཨཧོ སུཁཾ ཨཧོ སུཁ’’ནྟི ཝདཱཔེནྟིཡཱ ཏཎྷཱཡནཝསེན ཨབྷིཝདཏི, ཙེ ཨཛ྄ཛྷོསཱཡ ཏིཊྛཏི གིལིཏྭཱ ཝིཡ པརིནིཊྛཔེཏྭཱ ཏིཊྛཏི, ཨེཝཾ སཏི, བྷིཀྑཝེ, ཨཡཾ བྷིཀྑུ ‘‘གིལིཏབལི༹སོ…པེ॰… པཱཔིམཏོ’’ཏི ཝུཙྩཏི། ཨེཏྠ ཙ ནཱིལཱདིབྷེདེན ཨནེཀཝིདྷཏྟཱ ‘‘རཱུཔཱ ཨིཊྛཱ…པེ॰… རཛནཱིཡཱ’’ཏི བཧུཝཙནནིདྡེསོ ཀཏོཔི རཱུཔཱཡཏནརཱུཔཱརམྨཎབྷཱཝེན ཙ ཙཀྑུཝིཉྙེཡྻབྷཱཝེན ཙ ཨེཀཝིདྷཏཾ ཨནཏིཝཏྟནཏོ ‘‘ཏ’’ནྟི ཨེཀཝཙནནིདྡེསོ ཀཏོཏི ཝེདིཏབྦོ། ‘‘སནྟི, བྷིཀྑཝེ, སོཏཝིཉྙེཡྻཱ’’ཏིཨཱདཱིསུཔི ཨིམིནཱ ནཡེན ཡཐཱསམྦྷཝཾ ཨཏྠོ ཝེདིཏབྦོ། ཨིཏི ཨིམིནཱ སུཏྟཔྤདེསེན ཨཡཾ ཙཀྑུཝིཉྙེཡྻཱདིཀོ ཚབྦིདྷོ བལི༹སོ སཾཀིལེསོ ཀིལེསཧེཏུ དསྶིཏོ།

    ‘‘Ettakamevā’’ti vattabbattā ‘‘chayime’’tiādi vuttaṃ. Bhikkhave, lokasmiṃ sattānaṃ anayāya anatthāya pāṇīnaṃ byābādhāya ime mayā vuccamānā baḷisā cha bhavanti. Katame cha? Bhikkhave, cakkhuviññeyyā cakkhuviññāṇena viññeyyā iṭṭhā kantā kāmanīyā manāpā manavaḍḍhakā piyarūpā piyasabhāvā kāmūpasaṃhitā kilesakāmasahitā rajanīyā rūpā nīlādirūpārammaṇā santi, taṃ vuttappakāraṃ rūpaṃ bhikkhu ce abhinandati sappītikataṇhāya abhimukho nandati, ce abhivadati ‘‘aho sukhaṃ aho sukha’’nti vadāpentiyā taṇhāyanavasena abhivadati, ce ajjhosāya tiṭṭhati gilitvā viya pariniṭṭhapetvā tiṭṭhati, evaṃ sati, bhikkhave, ayaṃ bhikkhu ‘‘gilitabaḷiso…pe… pāpimato’’ti vuccati. Ettha ca nīlādibhedena anekavidhattā ‘‘rūpā iṭṭhā…pe… rajanīyā’’ti bahuvacananiddeso katopi rūpāyatanarūpārammaṇabhāvena ca cakkhuviññeyyabhāvena ca ekavidhataṃ anativattanato ‘‘ta’’nti ekavacananiddeso katoti veditabbo. ‘‘Santi, bhikkhave, sotaviññeyyā’’tiādīsupi iminā nayena yathāsambhavaṃ attho veditabbo. Iti iminā suttappadesena ayaṃ cakkhuviññeyyādiko chabbidho baḷiso saṃkileso kilesahetu dassito.

    ‘‘ཀེན ཨསེཀྑོ དསྶིཏོ’’ཏི ཝཏྟབྦཏྟཱ ‘‘སནྟི ཙཱ’’ཏིཨཱདི ཝུཏྟཾ།

    ‘‘Kena asekkho dassito’’ti vattabbattā ‘‘santi cā’’tiādi vuttaṃ.

    ཨབྷེདི བྷིནྡི, པརིབྷེདི པརིསམནྟཏོ བྷིནྡི། ཨིཏི ཨིམིནཱ སུཏྟཔྤདེསེན ཨཡཾ ཨརཧཏྟཕལབྷཱུཏོ ཨསེཀྑོ དསྶིཏོ། ཨིདཾ ‘‘ཚཡིམེ’’ཏིཨཱདིཀཾ སུཏྟཾ ཝུཏྟནཡེན སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟཾ ནཱམ།

    Abhedi bhindi, paribhedi parisamantato bhindi. Iti iminā suttappadesena ayaṃ arahattaphalabhūto asekkho dassito. Idaṃ ‘‘chayime’’tiādikaṃ suttaṃ vuttanayena saṃkilesabhāgiyañca asekkhabhāgiyañca suttaṃ nāma.

    ༡༠༩. ནཱནཱཝིདྷཾ སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟ’’ནྟིཨཱདི ཝུཏྟཾ།

    109. Nānāvidhaṃ saṃkilesabhāgiyañca asekkhabhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca nibbedhabhāgiyañca asekkhabhāgiyañca sutta’’nti pucchitabbattā ‘‘tattha katamaṃ saṃkilesabhāgiyañca nibbedhabhāgiyañca asekkhabhāgiyañca sutta’’ntiādi vuttaṃ.

    ཨཡཾ ལོཀོ སཏྟལོཀོ སནྟཱཔཛཱཏོ ཉཱཏིབྱསནཱདིཝསེན ཛཱཏསོཀསནྟཱཔོ ཙེཝ རཱགཱདིཝསེན ཛཱཏཔརིལཱ༹ཧསནྟཱཔོ ཙ ཕསྶཔརེཏོ ཨནེཀེཧི དུཀྑསམྥསྶེཧི ཨབྷིབྷཱུཏོ རོདཾ རོདནྟོ ཝདཏི། ཀིནྟི ཝདཏི? ཨཏྟནཱ ཕུཊྛཾ དུཀྑཾ ཨབྷཱཝིཏཀཱཡཏཱཡ ཨདྷིཝཱསེཏུཾ ཨསཀྐོནྟོ ཧུཏྭཱ ‘‘ཨཧོ དུཀྑཾ, ཨཱིདིསཾ དུཀྑཾ མཡ྄ཧཾ སཏྟུནོཔི མཱ ཧོཏཱུ’’ཏིཨཱདིནཱ རོདནྟོ ཝིལཔནྟོ ཝདཏི, ‘‘ཀསྨཱ ཨེཝཾ ཝདཏཱི’’ཏི ཝཏྟབྦཏྟཱ ‘‘ཨཏྟཏོ ཡེན ཡེན ཧི མཉྙནྟཱི’’ཏིཨཱདི ཝུཏྟཾ། ཨེཏེ སཏྟཱ ཡེན ཡེན ཀཱམཛ྄ཛྷོསཱདིནཱ པཀཱརེན ཨཏྟཏོ དུཀྑསྶ པཊིཀཱརཾ མཉྙནྟི, ཏཏོ པཀཱརཏོ ཨཉྙཐཱ ཨཉྙེན པཀཱརེན ཏཾ དུཀྑཾ ཏིཀིཙྪིཏབྦཾ ཧི ཡསྨཱ ཧོཏི།

    Ayaṃloko sattaloko santāpajāto ñātibyasanādivasena jātasokasantāpo ceva rāgādivasena jātapariḷāhasantāpo ca phassapareto anekehi dukkhasamphassehi abhibhūto rodaṃ rodanto vadati. Kinti vadati? Attanā phuṭṭhaṃ dukkhaṃ abhāvitakāyatāya adhivāsetuṃ asakkonto hutvā ‘‘aho dukkhaṃ, īdisaṃ dukkhaṃ mayhaṃ sattunopi mā hotū’’tiādinā rodanto vilapanto vadati, ‘‘kasmā evaṃ vadatī’’ti vattabbattā ‘‘attato yena yena hi maññantī’’tiādi vuttaṃ. Ete sattā yena yena kāmajjhosādinā pakārena attato dukkhassa paṭikāraṃ maññanti, tato pakārato aññathā aññena pakārena taṃ dukkhaṃ tikicchitabbaṃ hi yasmā hoti.

    ཨཉྙཐཱབྷཱཝཱིཏི ཡསྨཱ རོདཾ རོདནྟོ ཝདཏི, ཡེན ཡེན ཝཱ པརཝིཧིཾསཱདིཔཀཱརེན ཨཏྟནོ ཝཌྜྷིཾ མཉྙནྟི ཨཱསཱིསནྟི, ཏཏོ པཀཱརཏོ ཨཉྙཐཱ ཨཝཌྜྷི ཨེཝ ཧོཏི། ཏཾ ཨཱསཱིསིཏབྦཾ ཨཉྙཐཱབྷཱཝི ཨཝཌྜྷིཏབྷཱཝི ཨེཝ ཧི ཡསྨཱ ཧོཏི, ཏསྨཱ མཉྙིཏབྦསྶ ཨཱསཱིསིཏབྦསྶ ཨཉྙཐཱ བྷཝནསཱིལཏྟཱ རོདཾ རོདནྟོ ཝདཏི, ཨཡཾ སཏྟལོཀོ རོདནྟོ ཙ ཧུཏྭཱ ཝདཏི། ‘‘ཀི’’ནྟི པུཙྪིཏབྦཏྟཱ ‘‘བྷཝསཏྟོ’’ཏིཨཱདི ཝུཏྟཾ། བྷཝསཏྟོ ཀཱམབྷཝཱདཱིསུ སཏྟོ ཝིསཏྟོ ལོཀོ བྷཝམེཝ ཀཱམབྷཝཱདིབྷཝམེཝ ཨབྷིནནྡཏི། ཡཾ བྷཝཾ ཨབྷིནནྡཏི, ཏཾ ཛརཱམརཎཱདིཨནེཀབྱསནཱནུབནྡྷཏྟཱ བྷཡཱནཀཊྛེན བྷཡཾ ཧོཏི། ཡསྶ ཡཏོ ཛརཱམརཎཱདིཏོ བྷཱཡཏི, ཏཾ ཛརཱམརཎཱདིདུཀྑསྶ ཨདྷིཊྛཱནབྷཱཝཏོ དུཀྑཾ དུཀྑཱདྷིཊྛཱནཾ ཧོཏི། ཨིཏི ཨིམིནཱ སུཏྟཔྤདེསེན ཨཡཾ སནྟཱཔཱདིཀོ སཾཀིལེསོ སཾཀིལེསཧེཏུ དསྶིཏོ།

    Aññathābhāvīti yasmā rodaṃ rodanto vadati, yena yena vā paravihiṃsādipakārena attano vaḍḍhiṃ maññanti āsīsanti, tato pakārato aññathā avaḍḍhi eva hoti. Taṃ āsīsitabbaṃ aññathābhāvi avaḍḍhitabhāvi eva hi yasmā hoti, tasmā maññitabbassa āsīsitabbassa aññathā bhavanasīlattā rodaṃ rodanto vadati, ayaṃ sattaloko rodanto ca hutvā vadati. ‘‘Ki’’nti pucchitabbattā ‘‘bhavasatto’’tiādi vuttaṃ. Bhavasatto kāmabhavādīsu satto visatto loko bhavameva kāmabhavādibhavameva abhinandati. Yaṃ bhavaṃ abhinandati, taṃ jarāmaraṇādianekabyasanānubandhattā bhayānakaṭṭhena bhayaṃ hoti. Yassa yato jarāmaraṇādito bhāyati, taṃ jarāmaraṇādidukkhassa adhiṭṭhānabhāvato dukkhaṃ dukkhādhiṭṭhānaṃ hoti. Iti iminā suttappadesena ayaṃ santāpādiko saṃkileso saṃkilesahetu dassito.

    སཾཀིལེསོ དསྶིཏོ, ‘‘ཀེན ནིབྦེདྷོ དསྶིཏོ’’ཏི ཝཏྟབྦཏྟཱ ‘‘བྷཝཝིཔྤཧཱནཱཡ ཁོ’’ཏིཨཱདི ཝུཏྟཾ། བྷཝཝིཔྤཧཱནཱཡ ཁོ པན ཀཱམབྷཝཱདིཀསྶ བྷཝསྶ པཛཧནཏྠཱཡ ཨེཝ ཨིདཾ མཡཱ ཨདྷིགཏཾ མགྒབྲཧྨཙརིཡཾ ཝུསྶཏི། ཨིཏི ཨིམིནཱ སུཏྟཔྤདེསེན ཨཡཾ བྲཧྨཙརིཡབྷཱུཏོ མགྒོ ནིབྦེདྷོ དསྶིཏོ།

    Saṃkileso dassito, ‘‘kena nibbedho dassito’’ti vattabbattā ‘‘bhavavippahānāya kho’’tiādi vuttaṃ. Bhavavippahānāya kho pana kāmabhavādikassa bhavassa pajahanatthāya eva idaṃ mayā adhigataṃ maggabrahmacariyaṃ vussati. Iti iminā suttappadesena ayaṃ brahmacariyabhūto maggo nibbedho dassito.

    ‘‘བྷཝཝིཔྤཧཱནཱཡཱ’’ཏིཨཱདིནཱ ཨེཀནྟེན ནིཡྻཱནིཀམགྒོ ནིབྦེདྷོ ཨཱཙརིཡེན དསྶིཏོ, ཨམྷེཧི ཙ ཉཱཏོ, ‘‘ཀཏམོ ཨནིཡྻཱནིཀམགྒོ’’ཏི པུཙྪིཏབྦཏྟཱ ‘‘ཡེ ཧི ཀེཙི སམཎཱ ཝཱ’’ཏིཨཱདི ཝུཏྟཾ། ཧི-སདྡོ ཝཱཙཱསིལིཊྛཏྠོ། ཡེ ཀེཙི སམཎཱ ཝཱ ཡེ ཀེཙི བྲཱཧྨཎཱ ཝཱ བྷཝེན རཱུཔབྷཝེན བྷཝསྶ ཀཱམབྷཝསྶ ཝིཔྤམོཀྑཾ ཨཱཧཾསུ, བྷཝེན ཨརཱུཔབྷཝེན བྷཝསྶ ཀཱམབྷཝསྶ ཙེཝ རཱུཔབྷཝསྶ ཙ ཝིཔྤམོཀྑཾ ཨཱཧཾསུ, སབྦེ ཏེ སམཎཱ ཝཱ སབྦེ ཏེ བྲཱཧྨཎཱ ཝཱ བྷཝསྨཱ ཝུཏྟཔྤཀཱརབྷཝཏོ ཨཝིཔྤམུཏྟཱ བྷཝནྟཱིཏི ཨཧཾ ཝདཱམི།

    ‘‘Bhavavippahānāyā’’tiādinā ekantena niyyānikamaggo nibbedho ācariyena dassito, amhehi ca ñāto, ‘‘katamo aniyyānikamaggo’’ti pucchitabbattā ‘‘ye hi keci samaṇā vā’’tiādi vuttaṃ. Hi-saddo vācāsiliṭṭhattho. Ye keci samaṇā vā ye keci brāhmaṇā vā bhavena rūpabhavena bhavassa kāmabhavassa vippamokkhaṃ āhaṃsu, bhavena arūpabhavena bhavassa kāmabhavassa ceva rūpabhavassa ca vippamokkhaṃ āhaṃsu, sabbe te samaṇā vā sabbe te brāhmaṇā vā bhavasmā vuttappakārabhavato avippamuttā bhavantīti ahaṃ vadāmi.

    ‘‘རཱུཔབྷཝཱདིནཱ ཡེ ཙ ཀཱམབྷཝཱདིབྷཝསྶ ཝིཔྤམོཀྑཾ ཨཱཧཾསཱུ’’ཏི ཝཏྟབྦཏྟཱ ཝིབྷཝེན བྷཝསྶ ནིསྶརཎཾ ཨཱཧཾསཱུཏི དསྶེཏུཾ ‘‘ཡེ ཝཱ པནཱ’’ཏིཨཱདི ཝུཏྟཾ། ཡེ ཝཱ པན ཀེཙི སམཎཱ ཝཱ ཡེ ཝཱ པན ཀེཙི བྲཱཧྨཎཱ ཝཱ ཝིབྷཝེན ཨུཙྪེདདིཊྛིཡཱ བྷཝསྶ སཾསཱརབྷཝསྶ ནིསྶརཎཾ ཨཱཧཾསུ, སབྦེ ཏེ སམཎཱ ཝཱ སབྦེ ཏེ བྲཱཧྨཎཱ ཝཱ བྷཝསྨཱ སཾསཱརབྷཝཏོ ཨནིསྶཊཱཝ ཧོནྟཱིཏི ཨཧཾ ཝདཱམི། ‘‘ཀསྨཱ ཨནིསྶཊཱ’’ཏི ཝཏྟབྦཏྟཱ ཨནིསྶཊཀཱརཎཾ དསྶེཏུཾ ‘‘ཨུཔདྷིཾ ཧཱི’’ཏིཨཱདི ཝུཏྟཾ། ཨིདཾ དུཀྑཾ སཾསཱརདུཀྑཾ ཨུཔདྷིཾ ཁནྡྷཱུཔདྷིཀིལེསཱུཔདྷིཨབྷིསངྑཱརཱུཔདྷཡོ པཊིཙྩ ཧི ཡསྨཱ སམྦྷོཏི, ཏསྨཱ ཨནིསྶཊཱ ཧོནྟི། ཨིཏི ཨིམིནཱ སུཏྟཔྤདེསེན ཨཡཾ མིཙྪཱདིཊྛིསངྑཱཏོ སཾཀིལེསོ དསྶིཏོ།

    ‘‘Rūpabhavādinā ye ca kāmabhavādibhavassa vippamokkhaṃ āhaṃsū’’ti vattabbattā vibhavena bhavassa nissaraṇaṃ āhaṃsūti dassetuṃ ‘‘ye vā panā’’tiādi vuttaṃ. Ye vā pana keci samaṇā vā ye vā pana keci brāhmaṇā vā vibhavena ucchedadiṭṭhiyā bhavassa saṃsārabhavassa nissaraṇaṃ āhaṃsu, sabbe te samaṇā vā sabbe te brāhmaṇā vā bhavasmā saṃsārabhavato anissaṭāva hontīti ahaṃ vadāmi. ‘‘Kasmā anissaṭā’’ti vattabbattā anissaṭakāraṇaṃ dassetuṃ ‘‘upadhiṃ hī’’tiādi vuttaṃ. Idaṃ dukkhaṃ saṃsāradukkhaṃ upadhiṃ khandhūpadhikilesūpadhiabhisaṅkhārūpadhayo paṭicca hi yasmā sambhoti, tasmā anissaṭā honti. Iti iminā suttappadesena ayaṃ micchādiṭṭhisaṅkhāto saṃkileso dassito.

    ཡེ ཧི ‘‘ཀེཙཱི’’ཏིཨཱདིནཱ སཾཀིལེསོ དསྶིཏོ, ‘‘ཀེན ནིབྦེདྷོ དསྶིཏོ’’ཏི ཝཏྟབྦཏྟཱ ‘‘སབྦུཔཱདཱནཀྑཡཱ’’ཏིཨཱདི ཝུཏྟཾ། སབྦུཔཱདཱནཀྑཡཱ ཨརིཡམགྒཏོ དུཀྑསྶ སཾསཱརདུཀྑསྶ སམྦྷཝོ ནཏྠི། ཨིཏི ཨིམིནཱ སུཏྟཔྤདེསེན ཨཡཾ ཨརིཡམགྒོ ནིབྦེདྷོ དསྶིཏོ།

    Ye hi ‘‘kecī’’tiādinā saṃkileso dassito, ‘‘kena nibbedho dassito’’ti vattabbattā ‘‘sabbupādānakkhayā’’tiādi vuttaṃ. Sabbupādānakkhayā ariyamaggato dukkhassa saṃsāradukkhassa sambhavo natthi. Iti iminā suttappadesena ayaṃ ariyamaggo nibbedho dassito.

    ‘‘ཝུཏྟཔྤཀཱརཱ ཨཉྙསུཏྟཔྤདེསེནཔི དསྶིཏོ’’ཏི དསྶེཏུཾ ‘‘ལོཀམིམ’’ནྟིཨཱདི ཝུཏྟཾ། པུཐཱུ ཝིསུཾ ཝིསུཾ ཨཝིཛྫཱཡ པརེཏཾ ཨབྷིབྷཱུཏཾ བྷཱུཏརཏཾ བྷཱུཏེསུ ཨིཏྠིཔུརིསེསུ ཨཉྙམཉྙརཏཾ བྷཱུཏཾ ཁནྡྷཔཉྩཀཾ བྷཝེཧི ཨཔརིམུཏྟཾ ཨིམཾ ལོཀཾ མམ ཙིཏྟ ཏྭཾ པསྶ། ཡེ ཀེཙི བྷཝཱ ཨིཏྟརཁཎཱ ཝཱ བྷཝཱ, དཱིགྷཱཡུཀཱ ཝཱ བྷཝཱ, སཱཏཝནྟོ ཝཱ བྷཝཱ, ཨསཱཏཝནྟོ ཝཱ བྷཝཱ པཉྩཀྑནྡྷཱ སབྦདྷི ‘‘ཨུདྡྷཾ ཨདྷོ ཏིརིཡ’’ནྟི ཨིམེསུ སབྦེསུ སབྦཏྠཏཱཡ སབྦཏྠབྷཱཝེན ཨཧེསུཾ, སབྦེ ཏེ ཝུཏྟཔྤཀཱརཱ བྷཝཱ ནིཙྩདྷུཝརཧིཏཏྟཱ ཨནིཙྩཱ སམྤཱིལི༹ཏཏྟཱ དུཀྑཱ ཝིཔརིཎཱམབྷཱཝཏོ ཝིཔརིཎཱམདྷམྨཱ ཨཧེསུཾ། ཨིཏི ཨིམིནཱ སུཏྟཔྤདེསེན ཨཡཾ ཨཝིཛྫཱདིཀོ སཾཀིལེསོ དསྶིཏོ།

    ‘‘Vuttappakārā aññasuttappadesenapi dassito’’ti dassetuṃ ‘‘lokamima’’ntiādi vuttaṃ. Puthū visuṃ visuṃ avijjāya paretaṃ abhibhūtaṃ bhūtarataṃ bhūtesu itthipurisesu aññamaññarataṃ bhūtaṃ khandhapañcakaṃ bhavehi aparimuttaṃ imaṃ lokaṃ mama citta tvaṃ passa. Ye keci bhavā ittarakhaṇā vā bhavā, dīghāyukā vā bhavā, sātavanto vā bhavā, asātavanto vā bhavā pañcakkhandhā sabbadhi ‘‘uddhaṃ adho tiriya’’nti imesu sabbesu sabbatthatāya sabbatthabhāvena ahesuṃ, sabbe te vuttappakārā bhavā niccadhuvarahitattā aniccā sampīḷitattā dukkhā vipariṇāmabhāvato vipariṇāmadhammā ahesuṃ. Iti iminā suttappadesena ayaṃ avijjādiko saṃkileso dassito.

    ‘‘ལོཀམིམ’’ནྟིཨཱདིནཱ སཾཀིལེསོ དསྶིཏོ, ‘‘ཀེན ནིབྦེདྷོ དསྶིཏོ’’ཏི ཝཏྟབྦཏྟཱ ‘‘ཨེཝམེཏ’’ནྟིཨཱདི ཝུཏྟཾ། ཨེཝཾ ཝུཏྟཔྤཀཱརེན ཨེཏཾ ཁནྡྷཔཉྩཀཾ ཡཐཱབྷཱུཏཾ སམྨཔྤཉྙཱཡ སསྶ ཨཏྟནོ མགྒཔཉྙཱཡ, ཝིཔསྶནཱཔཉྙཱཡ ཝཱ པསྶཏོ པསྶནྟསྶ པུགྒལསྶ བྷཝཏཎྷཱ པཧཱིཡཏི, སམྨཔྤཉྙཱཡ ཡཐཱབྷཱུཏཾ ཁནྡྷཔཉྩཀཾ པསྶནྟོ ཝིབྷཝཾ ཨུཙྪེདདིཊྛིཾ ནཱབྷིནནྡཏི ན པཏྠེཏི། ཏསྶ པུགྒལསྶ སབྦསོ ཏཎྷཱནཾ ཁཡཱ ཨསེསཝིརཱགནིརོདྷོ ཨསེསཝིརཱགསངྑཱཏེན མགྒེན ནིརོདྷོ ནིརུཛ྄ཛྷནཾ ནིབྦཱནཾ ནིབྦུཏི ཧོཏི། ཨིཏི ཨིམིནཱ སུཏྟཔྤདེསེན ཨཡཾ མགྒོ ནིབྦེདྷོ དསྶིཏོ།

    ‘‘Lokamima’’ntiādinā saṃkileso dassito, ‘‘kena nibbedho dassito’’ti vattabbattā ‘‘evameta’’ntiādi vuttaṃ. Evaṃ vuttappakārena etaṃ khandhapañcakaṃ yathābhūtaṃ sammappaññāya sassa attano maggapaññāya, vipassanāpaññāya vā passato passantassa puggalassa bhavataṇhā pahīyati, sammappaññāya yathābhūtaṃ khandhapañcakaṃ passanto vibhavaṃ ucchedadiṭṭhiṃ nābhinandati na pattheti. Tassa puggalassa sabbaso taṇhānaṃ khayā asesavirāganirodho asesavirāgasaṅkhātena maggena nirodho nirujjhanaṃ nibbānaṃ nibbuti hoti. Iti iminā suttappadesena ayaṃ maggo nibbedho dassito.

    ‘‘ཨེཝམེཏ’’ནྟིཨཱདིནཱ ནིབྦེདྷོ དསྶིཏོ, ‘‘ཀེན ཨསེཀྑོ དསྶིཏོ’’ཏི ཝཏྟབྦཏྟཱ ‘‘ཏསྶ ནིབྦུཏསྶཱ’’ཏིཨཱདི ཝུཏྟཾ། ཏཎྷཱདིཊྛིནིབྦུཏསྶ ཏསྶ བྷིཀྑུནོ ཨནུཔཱདཱ ཀིལེསཱབྷིསངྑཱརཱནཾ ཨནུཔྤཱདནཏོ ཨགྒཧཎཏོ པུནབྦྷཝོ ན ཧོཏི, ཨེཝཾབྷཱུཏེན ཨརིཡཔུགྒལེན པུབྦེ ཨཏྟཱནཾ ཨབྷིབྷཱུཏོ པཉྩཝིདྷོ མཱརོ ཝིཛིཏོ ཨཧོསི, ཨནེན ཨརིཡཔུགྒལེན པཉྩཧི མཱརེཧི སངྒཱམོ ཝིཛིཏོ, སངྒཱམེ, ཨིཊྛཱནིཊྛཱདཱིསུ ཝཱ ཏཱདཱི ཏཱདིལཀྑཎཔྤཏྟོ ཨརིཡཔུགྒལོ སབྦབྷཝཱནི ཨུཔཙྩགཱ ཨཏིཀྐནྟོཝ ཛཱཏོ། ཨིཏི ཨིམིནཱ སུཏྟཔྤདེསེན ཨཡཾ ཨསེཀྑོ དསྶིཏོ། ཨིདཾ ཝུཏྟཔྤཀཱརཾ ‘‘ཨཡཾ ལོཀོ’’ཏིཨཱདིཀཾ སུཏྟཾ སཾཀིལེསབྷཱགེ ཝིསཡེ ཙ ནིབྦེདྷབྷཱགེ ཝིསཡེ ཙ ཨསེཀྑབྷཱགེ ཝིསཡེ ཙ ཝཱཙཀཉཱཔཀབྷཱཝེན ཨེཀདེསཝསེན པཝཏྟནཏོ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ ནཱམ།

    ‘‘Evameta’’ntiādinā nibbedho dassito, ‘‘kena asekkho dassito’’ti vattabbattā ‘‘tassa nibbutassā’’tiādi vuttaṃ. Taṇhādiṭṭhinibbutassa tassa bhikkhuno anupādā kilesābhisaṅkhārānaṃ anuppādanato aggahaṇato punabbhavo na hoti, evaṃbhūtena ariyapuggalena pubbe attānaṃ abhibhūto pañcavidho māro vijito ahosi, anena ariyapuggalena pañcahi mārehi saṅgāmo vijito, saṅgāme, iṭṭhāniṭṭhādīsu vā tādī tādilakkhaṇappatto ariyapuggalo sabbabhavāni upaccagā atikkantova jāto. Iti iminā suttappadesena ayaṃ asekkho dassito. Idaṃ vuttappakāraṃ ‘‘ayaṃ loko’’tiādikaṃ suttaṃ saṃkilesabhāge visaye ca nibbedhabhāge visaye ca asekkhabhāge visaye ca vācakañāpakabhāvena ekadesavasena pavattanato saṃkilesabhāgiyañca nibbedhabhāgiyañca asekkhabhāgiyañca suttaṃ nāma.

    ‘‘ཨེཏྟཀམེཝཱ’’ཏི ཝཏྟབྦཏྟཱ ‘‘ཙཏྟཱརོམེ’’ཏིཨཱདི ཝུཏྟཾ། ཨནྡྷཔུཐུཛྫནོ སཾསཱརསོཏསྶ ཨནུཀཱུལབྷཱཝེན གཙྪནཏོ ཨནུསོཏགཱམཱི ནཱམ, ཀལྱཱཎཔུཐུཛྫནོ སཾསཱརསོཏསྶ ནིབྦིདཱནུཔསྶནཱདཱིཧི པཊིཀྐཱུལཝསེན པཝཏྟནཏོ པཊིསོཏགཱམཱི ནཱམ, སེཀྑོ ཨཙལཔྤསཱདཱདིསམནྣཱགམེན ཋིཏསབྷཱཝཏྟཱ ཋིཏཏྟོ ནཱམ, ཨསེཀྑོ སཾསཱརཔཱརངྒཏཝསེན ཏིཊྛནཏོ ‘‘ཐལེ ཏིཊྛཏཱི’’ཏི ཝུཙྩཏི།

    ‘‘Ettakamevā’’ti vattabbattā ‘‘cattārome’’tiādi vuttaṃ. Andhaputhujjano saṃsārasotassa anukūlabhāvena gacchanato anusotagāmī nāma, kalyāṇaputhujjano saṃsārasotassa nibbidānupassanādīhi paṭikkūlavasena pavattanato paṭisotagāmī nāma, sekkho acalappasādādisamannāgamena ṭhitasabhāvattā ṭhitatto nāma, asekkho saṃsārapāraṅgatavasena tiṭṭhanato ‘‘thale tiṭṭhatī’’ti vuccati.

    ‘‘ཏེསུ ཙཏཱུསུ པུགྒལེསུ ཀཏམོ པུགྒལོ སཾཀིལེསབྷཱགིཡཱདཱི’’ཏི ཝཏྟབྦབྷཱཝཏོ ‘‘ཏཏྠ ཡོཡ’’ནྟིཨཱདི ཝུཏྟཾ།

    ‘‘Tesu catūsu puggalesu katamo puggalo saṃkilesabhāgiyādī’’ti vattabbabhāvato ‘‘tattha yoya’’ntiādi vuttaṃ.

    ༡༡༠. ནཱནཱཝིདྷཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམ’’ནྟིཨཱདི ཝུཏྟཾ།

    110. Nānāvidhaṃ saṃkilesabhāgiyañca nibbedhabhāgiyañca asekkhabhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ saṃkilesabhāgiyañca vāsanābhāgiyañca nibbedhabhāgiyañca sutta’’nti pucchitabbattā ‘‘tattha katama’’ntiādi vuttaṃ.

    ཨབྷིཛཱཏིཡོ པུགྒལཱ ཚ སཾཝིཛྫནྟི ལོཀསྨིཾ, ཀཎྷེ ནཱིཙེ ཀུལེ ནིབྦཏྟོ ཀཎྷཱབྷིཛཱཏིཀོ, ཀཎྷདྷམྨསམནྣཱགཏཏྟཱ ཝཱ ཀཎྷོ ཀཎྷཱབྷིཛཱཏིཀོ ཧུཏྭཱ ཀཎྷཾ ཀཱལ༹ཀཾ དསཝིདྷཾ དུསྶཱིལྱདྷམྨཾ ཨབྷིཛཱཡཏི པསཝཏི, ཨེསོ པུགྒལོ ཨཏྠི། ཝུཏྟཔྤཀཱརེན ཀཎྷོ ཀཎྷཱབྷིཛཱཏིཀོ ཧུཏྭཱ སུཀྐཾ དསཝིདྷཾ ཀུསལདྷམྨཾ ཨབྷིཛཱཡཏི, ཨེསོ པུགྒལོ ཨཏྠི། ཀཎྷོ ཀཎྷཱབྷིཛཱཏིཀོ ཧུཏྭཱ ཨཀཎྷཾ ཨསུཀྐཾ ཨཀཎྷཨསུཀྐཝིཔཱཀཾ ཨཙྩནྟདིཊྛཾ ནིབྦཱནཾ ཨཱརཱདྷེཏི, ཨེསོ པུགྒལོ ཨཏྠི། ཝུཏྟཝིཔརིཡཱཡེན ཏཡོ པུགྒལཱ ཛཱནིཏབྦཱ།

    Abhijātiyo puggalā cha saṃvijjanti lokasmiṃ, kaṇhe nīce kule nibbatto kaṇhābhijātiko, kaṇhadhammasamannāgatattā vā kaṇho kaṇhābhijātiko hutvā kaṇhaṃ kāḷakaṃ dasavidhaṃ dussīlyadhammaṃ abhijāyati pasavati, eso puggalo atthi. Vuttappakārena kaṇho kaṇhābhijātiko hutvā sukkaṃ dasavidhaṃ kusaladhammaṃ abhijāyati, eso puggalo atthi. Kaṇho kaṇhābhijātiko hutvā akaṇhaṃ asukkaṃ akaṇhaasukkavipākaṃ accantadiṭṭhaṃ nibbānaṃ ārādheti, eso puggalo atthi. Vuttavipariyāyena tayo puggalā jānitabbā.

    ‘‘ཏེསུ ཀཏམེ པུགྒལཱ སཾཀིལེསབྷཱགིཡཱ’’ཏིཨཱདིནཱ ཝཏྟབྦཏྟཱ ‘‘ཏཏྠ ཡོ ཙཱ’’ཏིཨཱདི ཝུཏྟཾ།

    ‘‘Tesu katame puggalā saṃkilesabhāgiyā’’tiādinā vattabbattā ‘‘tattha yo cā’’tiādi vuttaṃ.

    ‘‘ཨེཏྟཀམེཝཱ’’ཏི ཝཏྟབྦཏྟཱ ‘‘ཙཏྟཱརིམཱནཱི’’ཏིཨཱདི ཝུཏྟཾ།

    ‘‘Ettakamevā’’ti vattabbattā ‘‘cattārimānī’’tiādi vuttaṃ.

    ༡༡༡. ནཱནཱཝིདྷཾ སཾཀིལེསབྷཱགིཡཉྩ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ཝཱསནཱབྷཱགིཡཉྩ ནིབྦེདྷབྷཱགིཡཉྩཱ’’ཏིཨཱདི ཝུཏྟཾ།

    111. Nānāvidhaṃ saṃkilesabhāgiyañca vāsanābhāgiyañca nibbedhabhāgiyañca suttaṃ ācariyena niddhāritaṃ, amhehi ca ñātaṃ, ‘‘katamaṃ vāsanābhāgiyañca nibbedhabhāgiyañca sutta’’nti pucchitabbattā ‘‘tattha katamaṃ vāsanābhāgiyañca nibbedhabhāgiyañcā’’tiādi vuttaṃ.

    མཱནུསཏྟཾ མནུསྶབྷཱཝཾ ལདྡྷཱན ཀིཙྩཾ, ཨཀིཙྩཉྩ དྭེ བྷཝནྟི, དྭེ ཀིཙྩཱནིཡེཝ ཀཏྟབྦཱནི། ཏེནཱཧ ཨཊྛཀཐཱཙརིཡོ (ནེཏྟི॰ ཨཊྛ॰ ༡༡༡) ‘‘ཀཏྟབྦ’’ནྟི དསྶེཏི། ‘‘ཀཏམཾ ཀཏྟབྦཾ ཀིཙྩ’’ནྟི ཝཏྟབྦཏྟཱ ཀཏྟབྦཀིཙྩཾ དསྶེཏུཾ ‘‘སུཀིཙྩཾ ཙེཝཱ’’ཏིཨཱདི ཝུཏྟཾ། པུཉྙཱནི ཙ ཀཏྟབྦཏྟཱ སུཀིཙྩཾ ཨེཝ, སཾཡོཛནཝིཔྤཧཱནཾ ཝཱ ཀཏྟབྦཏྟཱ སུཀིཙྩཾ ནཱམཱཏི ཡོཛནཱ།

    Mānusattaṃ manussabhāvaṃ laddhāna kiccaṃ, akiccañca dve bhavanti, dve kiccāniyeva kattabbāni. Tenāha aṭṭhakathācariyo (netti. aṭṭha. 111) ‘‘kattabba’’nti dasseti. ‘‘Katamaṃ kattabbaṃ kicca’’nti vattabbattā kattabbakiccaṃ dassetuṃ ‘‘sukiccaṃ cevā’’tiādi vuttaṃ. Puññāni ca kattabbattā sukiccaṃ eva, saṃyojanavippahānaṃ vā kattabbattā sukiccaṃ nāmāti yojanā.

    ‘‘ཏཏྠ སུཏྟེ ཀཏམེན ཀཏམོ དསྶིཏོ’’ཏི ཝཏྟབྦཏྟཱ ‘‘སུཀིཙྩཾཙེཝ པུཉྙཱནཱིཏི ཝཱསནཱ, སཾཡོཛནཝིཔྤཧཱནཾ ཝཱཏི ནིབྦེདྷོ’’ཏི ཝུཏྟོ།

    ‘‘Tattha sutte katamena katamo dassito’’ti vattabbattā ‘‘sukiccaṃceva puññānīti vāsanā, saṃyojanavippahānaṃ vāti nibbedho’’ti vutto.

    ‘‘ཨེཏྟཀམེཝཱ’’ཏི ཝཏྟབྦཏྟཱ ‘‘པུཉྙཱནི ཀརིཏྭཱནཱ’’ཏིཨཱདི ཝུཏྟཾ། པུཉྙཱནི ཀརིཏྭཱན ཀཏཔུཉྙཱ པུགྒལཱ སགྒཱ སགྒཏོ སགྒཾཡེཝ ཝཛནྟི། སཾཡོཛནཔྤཧཱནཱ ཨརིཡཱ ཛརཱམརཎཱ ཛརཱམརཎཏོ ཝིཔྤམུཙྩནྟི།

    ‘‘Ettakamevā’’ti vattabbattā ‘‘puññāni karitvānā’’tiādi vuttaṃ. Puññāni karitvāna katapuññā puggalā saggā saggato saggaṃyeva vajanti. Saṃyojanappahānā ariyā jarāmaraṇā jarāmaraṇato vippamuccanti.

    ‘‘ཏཏྠ སུཏྟེ ཀཏམེན ཀཏམོ དསྶིཏོ’’ཏི ཝཏྟབྦཏྟཱ ‘‘པུཉྙཱནི ཀརིཏྭཱན, སགྒཱ སགྒཾ ཝཛནྟི ཀཏཔུཉྙཱ’ཏི ཝཱསནཱ, ‘སཾཡོཛནཔྤཧཱནཱ, ཛརཱམརཎཱ ཝིཔྤམུཙྩནྟཱི’ཏི ནིབྦེདྷོ’’ཏི ཝུཏྟཾ།

    ‘‘Tattha sutte katamena katamo dassito’’ti vattabbattā ‘‘puññāni karitvāna, saggā saggaṃ vajanti katapuññā’ti vāsanā, ‘saṃyojanappahānā, jarāmaraṇā vippamuccantī’ti nibbedho’’ti vuttaṃ.

    ‘‘ཨེཏྟཀམེཝཱ’’ཏི ཝཏྟབྦཏྟཱ ‘‘དྭེམཱནཱི’’ཏིཨཱདི ཝུཏྟཾ། ‘‘ཀཏམེན ཀཏམོ དསྶིཏོ’’ཏི ཝཏྟབྦཏྟཱ ‘‘ཏཏྠ ཡོ…པེ॰… ཨཡཾ ནིབྦེདྷོ’’ཏི ཝུཏྟཾ།

    ‘‘Ettakamevā’’ti vattabbattā ‘‘dvemānī’’tiādi vuttaṃ. ‘‘Katamena katamo dassito’’ti vattabbattā ‘‘tattha yo…pe… ayaṃ nibbedho’’ti vuttaṃ.

    ནཱནཱཝིདྷཾ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ , ‘‘ཀཏམཾ ཏཎྷཱསཾཀིལེསབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཏཎྷཱསཾཀིལེསབྷཱགིཡ’’ནྟིཨཱདི ཝུཏྟཾ། ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཏཎྷཱསཾཀིལེསབྷཱགིཡཾ སུཏྟཾ ཏཎྷཱཔཀྑེནེཝ ནིདྡིསིཏབྦཾ, བཧུཝིསཡཏྟཱ ནིཡམེཏྭཱན ནིདྡྷཱརེསྶཱམཱིཏི ཝུཏྟཾ ཧོཏི། ‘‘ཀེན པཀཱརེན ནིདྡིསིཏབྦ’’ནྟི ཝཏྟབྦཏྟཱ ‘‘ཏཱིཧི ཏཎྷཱཧཱི’’ཏིཨཱདི ཝུཏྟཾ། བྷཝཏཎྷཱཡཱཏི རཱུཔབྷཝཏཎྷཱཡ། ཝིབྷཝཏཎྷཱཡཱཏི ཨརཱུཔབྷཝཏཎྷཱཡ། ཡེན ཡེན ཝཱ པན ཝཏྠུནཱ ཏཎྷཱཔབྷེདཨུཙྪེདཱདིཝཏྠུནཱ ཨཛ྄ཛྷོསིཏཱ བྷཝཏཎྷཱདིཝསེན ཨཛ྄ཛྷོསིཏཱ, ཏེན ཏེན པཀཱརེན ཏཎྷཱདིནཱ ཝཱ ཏཎྷཱཔབྷེདཨུཙྪེདཱདིཝཏྠུནཱ ཝཱ ཏཎྷཱསཾཀིལེསབྷཱགིཡཾ སུཏྟཾ ནིདྡིསིཏབྦཾ།

    Nānāvidhaṃ vāsanābhāgiyañca nibbedhabhāgiyañca suttaṃ ācariyena niddhāritaṃ, amhehi ca ñātaṃ , ‘‘katamaṃ taṇhāsaṃkilesabhāgiyaṃ sutta’’nti pucchitabbattā ‘‘tattha taṇhāsaṃkilesabhāgiya’’ntiādi vuttaṃ. Tatthāti tesu soḷasasu saṃkilesabhāgiyādīsu suttesu taṇhāsaṃkilesabhāgiyaṃ suttaṃ taṇhāpakkheneva niddisitabbaṃ, bahuvisayattā niyametvāna niddhāressāmīti vuttaṃ hoti. ‘‘Kena pakārena niddisitabba’’nti vattabbattā ‘‘tīhi taṇhāhī’’tiādi vuttaṃ. Bhavataṇhāyāti rūpabhavataṇhāya. Vibhavataṇhāyāti arūpabhavataṇhāya. Yena yena vā pana vatthunā taṇhāpabhedaucchedādivatthunā ajjhositā bhavataṇhādivasena ajjhositā, tena tena pakārena taṇhādinā vā taṇhāpabhedaucchedādivatthunā vā taṇhāsaṃkilesabhāgiyaṃ suttaṃ niddisitabbaṃ.

    ཏཎྷཱསཾཀིལེསབྷཱགིཡཾ སུཏྟཾ ཏཎྷཱཔཀྑེནེཝ ནིདྡིསིཏབྦནྟི ཨཱཙརིཡེན ཝུཏྟཾ, ཨམྷེཧི ཙ ལཀྑིཏཾ, ‘‘དིཊྛིསཾཀིལེསབྷཱགིཡཾ སུཏྟཾ ཀེན པཀྑེན ནིདྡིསིཏབྦ’’ནྟི ཝཏྟབྦཏྟཱ ‘‘ཏཏྠ དིཊྛིསཾཀིལེསབྷཱགིཡ’’ནྟིཨཱདི ཝུཏྟཾ། ཡེན ཡེན ཝཱ པན ཝཏྠུནཱཏི དིཊྛིཔྤབྷེདཨམརཱཝིཀྑེཔཱདིཝཏྠུནཱ།

    Taṇhāsaṃkilesabhāgiyaṃ suttaṃ taṇhāpakkheneva niddisitabbanti ācariyena vuttaṃ, amhehi ca lakkhitaṃ, ‘‘diṭṭhisaṃkilesabhāgiyaṃ suttaṃ kena pakkhena niddisitabba’’nti vattabbattā ‘‘tattha diṭṭhisaṃkilesabhāgiya’’ntiādi vuttaṃ. Yena yena vā pana vatthunāti diṭṭhippabhedaamarāvikkhepādivatthunā.

    དིཊྛིསཾཀིལེསབྷཱགིཡཾ སུཏྟཾ དིཊྛིཔཀྑེནེཝ ནིདྡིསིཏབྦནྟི ཨཱཙརིཡེན ཝུཏྟཾ, ཨམྷེཧི ཙ ལཀྑིཏཾ, ‘‘དུཙྩརིཏསཾཀིལེསབྷཱགིཡཾ སུཏྟཾ ཀེན པཀཱརེན ནིདྡིསིཏབྦ’’ནྟི ཝཏྟབྦཏྟཱ ‘‘ཏཏྠ དུཙྩརིཏསཾཀིལེསབྷཱགིཡ’’ནྟིཨཱདི ཝུཏྟཾ། ཏཐེཝ ཝཏྟབྦཏྟཱ ‘‘ཏཏྠ ཏཎྷཱཝོདཱནབྷཱགིཡ’’ནྟིཨཱདི ཝུཏྟཾ, ‘‘དིཊྛིཝོདཱནབྷཱགིཡ’’ནྟིཨཱདི ཝུཏྟཾ, ‘‘དུཙྩརིཏཝོདཱནབྷཱགིཡ’’ནྟིཨཱདི ཝུཏྟཾ།

    Diṭṭhisaṃkilesabhāgiyaṃ suttaṃ diṭṭhipakkheneva niddisitabbanti ācariyena vuttaṃ, amhehi ca lakkhitaṃ, ‘‘duccaritasaṃkilesabhāgiyaṃ suttaṃ kena pakārena niddisitabba’’nti vattabbattā ‘‘tattha duccaritasaṃkilesabhāgiya’’ntiādi vuttaṃ. Tatheva vattabbattā ‘‘tattha taṇhāvodānabhāgiya’’ntiādi vuttaṃ, ‘‘diṭṭhivodānabhāgiya’’ntiādi vuttaṃ, ‘‘duccaritavodānabhāgiya’’ntiādi vuttaṃ.

    ༡༡༢. ཡསྨིཾ སཱསནཔཊྛཱནེ ཨཊྛཱརས མཱུལཔདཱ དཊྛབྦཱ, ཏཾ སཱསནཔཊྛཱནཾ སོལ༹སཧི སཾཀིལེསབྷཱགིཡཱདཱིཧི སུཏྟེཧི ཨེཀདེསནིདྡྷཱརཎཝསེན ཝིབྷཛིཏཾ, ཨམྷེཧི ཙ ཉཱཏཾ, ‘‘ཀིཾ པན ཏཾ སཱསནཔཊྛཱནཾ ཏེཧི སོལ༹སཧི ཨེཝ སཾཀིལེསབྷཱགིཡཱདཱིཧི ཝིབྷཛིཏབྦཾ, ཨུདཱཧུ ཨཉྙེཧི སུཏྟེཧིཔི ཝིབྷཛིཏབྦ’’ནྟི ཝཏྟབྦཏྟཱ ཨཉྙེཧི ཨཊྛཝཱིསསུཏྟེཧིཔི ཝིབྷཛིཏུཾ ‘‘ཏཏྠ ཀཏམེ ཨཊྛཱརས མཱུལཔདཱ? ལོཀིཡཾ ལོཀུཏྟར’’ནྟིཨཱདི ཝུཏྟཾ ། ‘‘ཡདི ཨཉྙེཧིཔི ཨཊྛཝཱིསསུཏྟེཧི ཝིབྷཛིཏབྦཾ, ཨེཝཾ སཏི ‘ལོཀིཡ’ནྟིཨཱདིཝཙནམེཝ ཝཏྟབྦཾ, ཀསྨཱ ‘ཏཏྠ ཀཏམེ ཨཊྛཱརས མཱུལཔདཱ’ཏི ཝུཏྟཱ’’ཏི ཙེ? ཏསྶ སཱསནཔཊྛཱནཝིབྷཱགོ ཨཊྛཱརསཧི མཱུལཔདེཧི སངྒཧིཏོ, ཨཊྛཱརས མཱུལཔདཱཔི ཝིབྷཛིཏེ སཱསནཔཊྛཱནེ དཊྛབྦཱ, ཏསྨཱ མཱུལཔདཱ ཝིབྷཏྟཱཡེཝ། ཏཱནི མཱུལཔདཱནི ཝིབྷཛིཏུཾ ‘‘ཏཏྠ ཀཏམེ ཨཊྛཱརས མཱུལཔདཱ’’ཏི ཝུཏྟཾ། ཨཊྛཀཐཱཡཾ (ནེཏྟི॰ ཨཊྛ॰ ༡༡༢) པན –

    112. Yasmiṃ sāsanapaṭṭhāne aṭṭhārasa mūlapadā daṭṭhabbā, taṃ sāsanapaṭṭhānaṃ soḷasahi saṃkilesabhāgiyādīhi suttehi ekadesaniddhāraṇavasena vibhajitaṃ, amhehi ca ñātaṃ, ‘‘kiṃ pana taṃ sāsanapaṭṭhānaṃ tehi soḷasahi eva saṃkilesabhāgiyādīhi vibhajitabbaṃ, udāhu aññehi suttehipi vibhajitabba’’nti vattabbattā aññehi aṭṭhavīsasuttehipi vibhajituṃ ‘‘tattha katame aṭṭhārasa mūlapadā? Lokiyaṃ lokuttara’’ntiādi vuttaṃ . ‘‘Yadi aññehipi aṭṭhavīsasuttehi vibhajitabbaṃ, evaṃ sati ‘lokiya’ntiādivacanameva vattabbaṃ, kasmā ‘tattha katame aṭṭhārasa mūlapadā’ti vuttā’’ti ce? Tassa sāsanapaṭṭhānavibhāgo aṭṭhārasahi mūlapadehi saṅgahito, aṭṭhārasa mūlapadāpi vibhajite sāsanapaṭṭhāne daṭṭhabbā, tasmā mūlapadā vibhattāyeva. Tāni mūlapadāni vibhajituṃ ‘‘tattha katame aṭṭhārasa mūlapadā’’ti vuttaṃ. Aṭṭhakathāyaṃ (netti. aṭṭha. 112) pana –

    ‘‘ཨེཝཾ སོལ༹སཝིདྷེན སཱསནཔཊྛཱནཾ ནཱནཱསུཏྟེཧི ཨུདཱཧརཎཝསེན ཝིབྷཛིཏྭཱ ཨིདཱནི ཨཊྛཝཱིསཏིཝིདྷེན སཱསནཔཊྛཱནཾ དསྶེནྟེན ཡསྨཱ ཨཡམྤི པཊྛཱནཝིབྷཱགོ མཱུལཔདེཧི སངྒཧིཏོ, ན ཨིམསྶཱཔི ཏེཧི ཨསངྒཧིཏོ པདེསོ ཨཏྠི, ཏསྨཱ མཱུལཔདཾ, ཝིབྷཛིཏབྦཏཉྩ དསྶེཏུཾ ‘ཏཏྠ ཀཏམེ ཨཊྛཱརས མཱུལཔདཱ’ཏི པུཙྪཱཡ ཝསེན མཱུལཔདཱནི ཨུདྡྷརིཏྭཱ ‘ལོཀིཡཾ ལོཀུཏྟར’ནྟིཨཱདིནཱ ནཝ ཏིཀཱ, ཐཝོ ཙཱཏི ཨཊྛཝཱིསཏིཝིདྷཾ སཱསནཔཊྛཱནཾ ཨུདྡིཊྛ’’ནྟི –

    ‘‘Evaṃ soḷasavidhena sāsanapaṭṭhānaṃ nānāsuttehi udāharaṇavasena vibhajitvā idāni aṭṭhavīsatividhena sāsanapaṭṭhānaṃ dassentena yasmā ayampi paṭṭhānavibhāgo mūlapadehi saṅgahito, na imassāpi tehi asaṅgahito padeso atthi, tasmā mūlapadaṃ, vibhajitabbatañca dassetuṃ ‘tattha katame aṭṭhārasa mūlapadā’ti pucchāya vasena mūlapadāni uddharitvā ‘lokiyaṃ lokuttara’ntiādinā nava tikā, thavo cāti aṭṭhavīsatividhaṃ sāsanapaṭṭhānaṃ uddiṭṭha’’nti –

    ཝུཏྟཾ། ཏཏྠཱཏི ཏེསུ སོལ༹སཧཱརཔཉྩཀནཡཨཊྛཱརསམཱུལཔདེསུ ཀཏམཱནི པདཱནི མཱུལཔདཱནི ཧོནྟཱིཏི པུཙྪཏི། ལོཀེ ནིཡུཏྟོ སབྷཱཝདྷམྨོཏི ལོཀིཡོ, ལོཀེ ཝཱ ཝིདཱུཧི ཝིདིཏོ སབྷཱཝོཏིཔི ལོཀིཡོ, ལོཀིཡོ སབྷཱཝདྷམྨོ ཨསྶ ཝིསེསསུཏྟསྶ ཨཏྠཱིཏི ཏཾ ཝིསེསསུཏྟཾ ལོཀིཡཾ ནཱམ། ཨེས ནཡོ ‘‘ལོཀུཏྟར’’ནྟིཨཱདཱིསུཔི ཝེདིཏབྦོ། ཛཱནཱཏཱིཏི ཉཱཎཾ, ཉཱཎཾ ཨསྶ ཝིསེསསུཏྟསྶ ཨཏྠཱིཏི ཉཱཎཾ། ཉཱཏབྦཱཏི ཉེཡྻཱ, ཉེཡྻཱ ཨསྶ ཝིསེསསུཏྟསྶ ཨཏྠཱིཏི ཉེཡྻཾ། ཨེསེཝ ནཡོ – ‘‘ཉཱཎཉྩ ཉེཡྻཉྩཱ’’ཏི ཨེཏྠཱཔི ཝེདིཏབྦོ། ནིབྦཱནཾ པཋམཾ པསྶཏཱིཏི དསྶནཾ, པཋམམགྒཉཱཎཾ, དསྶནཾ ཨསྶ ཝིསེསསུཏྟསྶ ཨཏྠཱིཏི དསྶནཾ། བྷཱཝནཱ ཨསྶ ཝིསེསསུཏྟསྶ པཱལི༹ཡཱ ཨཏྠཱིཏི བྷཱཝནཱ། ‘‘དསྶནཉྩ བྷཱཝནཱ ཙཱ’’ཏི ཨེཏྠཱཔི ཨེས ནཡོ ཝེདིཏབྦོ། སསྶ ཨཏྟནོ ཝཙནནྟི སཀཾ, སཀཾ ཝཙནཾ སཀཝཙནཾ, བྷགཝཏོ ཝཙནནྟི ཨཏྠོ། པརསྶ ཝཙནཾ པརཝཙནཾ། ཝིསྶཛྫནཱིཡོ ཨསྶ ཝིསེསསུཏྟསྶ ཨཏྠཱིཏི ཝིསྶཛྫནཱིཡཾ། ནཏྠི ཝིསྶཛྫནཱིཡོ ཨསྶ ཝིསེསསུཏྟསྶཱཏི ཨཝིསྶཛྫནཱིཡཾ། ཀམྨཾ ཨསྶ ཝིསེསསུཏྟསྶ ཨཏྠཱིཏི ཀམྨཾ། ཝིཔཱཀོ ཨསྶ པཱཋསྶ ཨཏྠཱིཏི ཝིཔཱཀོ ། སེསེསུཔི ཨསྶཏྠིཨཏྠོ གཧེཏབྦོ། ཨཐ ཝཱ ལོཀིཡཱདིཨཏྠོ མུཁྱཏྠོ, ཏཾཝཱཙཀསུཏྟམྤི ཋཱནྱཱུཔཙཱརེན ཝུཏྟཾ། བུདྡྷཱདཱིནཾ གུཎེ ཨབྷིཏྠཝཏི ཨེཏེན སུཏྟཔྤདེསེནཱཏི ཐཝོ, སུཏྟཔྤདེསོ།

    Vuttaṃ. Tatthāti tesu soḷasahārapañcakanayaaṭṭhārasamūlapadesu katamāni padāni mūlapadāni hontīti pucchati. Loke niyutto sabhāvadhammoti lokiyo, loke vā vidūhi vidito sabhāvotipi lokiyo, lokiyo sabhāvadhammo assa visesasuttassa atthīti taṃ visesasuttaṃ lokiyaṃ nāma. Esa nayo ‘‘lokuttara’’ntiādīsupi veditabbo. Jānātīti ñāṇaṃ, ñāṇaṃ assa visesasuttassa atthīti ñāṇaṃ. Ñātabbāti ñeyyā, ñeyyā assa visesasuttassa atthīti ñeyyaṃ. Eseva nayo – ‘‘ñāṇañca ñeyyañcā’’ti etthāpi veditabbo. Nibbānaṃ paṭhamaṃ passatīti dassanaṃ, paṭhamamaggañāṇaṃ, dassanaṃ assa visesasuttassa atthīti dassanaṃ. Bhāvanā assa visesasuttassa pāḷiyā atthīti bhāvanā. ‘‘Dassanañca bhāvanā cā’’ti etthāpi esa nayo veditabbo. Sassa attano vacananti sakaṃ, sakaṃ vacanaṃ sakavacanaṃ, bhagavato vacananti attho. Parassa vacanaṃ paravacanaṃ. Vissajjanīyo assa visesasuttassa atthīti vissajjanīyaṃ. Natthi vissajjanīyo assa visesasuttassāti avissajjanīyaṃ. Kammaṃ assa visesasuttassa atthīti kammaṃ. Vipāko assa pāṭhassa atthīti vipāko. Sesesupi assatthiattho gahetabbo. Atha vā lokiyādiattho mukhyattho, taṃvācakasuttampi ṭhānyūpacārena vuttaṃ. Buddhādīnaṃ guṇe abhitthavati etena suttappadesenāti thavo, suttappadeso.

    ‘‘ཏེསུ ཨཊྛཝཱིསཏིཝིདྷེསུ ལོཀིཡཱདཱིསུ སཱསནཔཊྛཱནསུཏྟེསུ ཀཏམཾ སུཏྟཾ ལོཀིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ལོཀིཡ’’ནྟིཨཱདི ཝུཏྟཾ། ཏཏྠཱཏི ཏེསུ ཨཊྛཝཱིསཏིཝིདྷེསུ ལོཀིཡཱདཱིསུ སཱསནཔཊྛཱནསུཏྟེསུ ཀཏམཾ སུཏྟཾ ལོཀིཡཾ སཱསནཔཊྛཱནཾ སུཏྟནྟི པུཙྪཏི།

    ‘‘Tesu aṭṭhavīsatividhesu lokiyādīsu sāsanapaṭṭhānasuttesu katamaṃ suttaṃ lokiyaṃ sutta’’nti pucchitabbattā ‘‘tattha katamaṃ lokiya’’ntiādi vuttaṃ. Tatthāti tesu aṭṭhavīsatividhesu lokiyādīsu sāsanapaṭṭhānasuttesu katamaṃ suttaṃ lokiyaṃ sāsanapaṭṭhānaṃ suttanti pucchati.

    བྷིཀྑཝེ, དྷེནུཡཱ ཐནེཧི ནིཀྑནྟཾ སཛྫུཁཱིརཾ ནིཀྑནྟཀྑཎེ ན མུཙྩཏི ན པརིཎམཏི ཁཱིརབྷཱཝཾ པཛཧིཏྭཱ དདྷིབྷཱཝཾ ན པཱཔུཎཱཏི, ཏཀྐཱདིཨམྦིལསམཱཡོགཏོ པཙྪཱ ཁཱིརབྷཱཝཾ པཛཧཏི དདྷིབྷཱཝཾ པཱཔུཎཱཏི ཨིཝ, ཨེཝཾ ཡེན བཱལེན པཱཔཾ ཡཾ ཀམྨཾ ཀཏཾ, ཏཾ ཀམྨཾ ཀརཎཀྑཎེ ཏསྶ བཱལསྶ ཨཔཱཡདུཀྑཱདིནིབྦཏྟཱཔནཝསེན ན ཝིཔཙྩཏི། དུཏིཡེ པན ཝཱ ཏཏིཡཱདིམྷི ཝཱ ཨཏྟབྷཱཝེ ཝིཔཙྩཏི། བྷསྨཙྪནྣོ ཚཱརིཀཱཡ པཊིཙྪནྣོ པཱཝཀོ ཨགྒི ཨཀྐནྟཾ ཛནཾ ཨཀྐམནཀྑཎེ ན ཌཧཏི། ཚཱརིཀཾ པན ཏཱཔེཏྭཱ ཀཱལནྟརེ ཌཧཏི ཨིཝ, ཨེཝཾ ཡེན བཱལེན པཱཔཾ ཡཾ ཀམྨཾ ཀཏཾ, ཏཾ ཀམྨཾ ཀརཎཀྑཎེ ཏཾ བཱལཾ ཨཔཱཡདུཀྑཱདིནིབྦཏྟཱཔནཝསེན ཌཧཱཔེནྟཾ ཧུཏྭཱ ན ཨནྭེཏི། དུཏིཡེ ཝཱ ཏཏིཡཱདིམྷི ཝཱ ཨཏྟབྷཱཝེ ཨཔཱཡདུཀྑཱདིནིབྦཏྟཱཔནཝསེན ཌཧཱཔེནྟཾ ཧུཏྭཱ ཌཧནྟཾ ཏཾ བཱལཾ ཏཾ ཨནྭེཏཱིཏི ཡོཛནཱ། ཨིདཾ ‘‘ན ཧི…པེ॰… པཱཝཀོ’’ཏི སུཏྟཾ ལོཀིཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀིཡཾ ནཱམ།

    Bhikkhave, dhenuyā thanehi nikkhantaṃ sajjukhīraṃ nikkhantakkhaṇe na muccati na pariṇamati khīrabhāvaṃ pajahitvā dadhibhāvaṃ na pāpuṇāti, takkādiambilasamāyogato pacchā khīrabhāvaṃ pajahati dadhibhāvaṃ pāpuṇāti iva, evaṃ yena bālena pāpaṃ yaṃ kammaṃ kataṃ, taṃ kammaṃ karaṇakkhaṇe tassa bālassa apāyadukkhādinibbattāpanavasena na vipaccati. Dutiye pana vā tatiyādimhi vā attabhāve vipaccati. Bhasmacchanno chārikāya paṭicchanno pāvako aggi akkantaṃ janaṃ akkamanakkhaṇe na ḍahati. Chārikaṃ pana tāpetvā kālantare ḍahati iva, evaṃ yena bālena pāpaṃ yaṃ kammaṃ kataṃ, taṃ kammaṃ karaṇakkhaṇe taṃ bālaṃ apāyadukkhādinibbattāpanavasena ḍahāpentaṃ hutvā na anveti. Dutiye vā tatiyādimhi vā attabhāve apāyadukkhādinibbattāpanavasena ḍahāpentaṃ hutvā ḍahantaṃ taṃ bālaṃ taṃ anvetīti yojanā. Idaṃ ‘‘na hi…pe… pāvako’’ti suttaṃ lokiye atthe vācakañāpakabhāvena pavattanato lokiyaṃ nāma.

    ‘‘ཨེཏྟཀམེཝ ལོཀིཡ’’ནྟི ཝཏྟབྦཏྟཱ ‘‘ཙཏྟཱརིམཱནཱི’’ཏིཨཱདི ཝུཏྟཾ། ཨཏྠོ པཱཀཊོ། ཨིདཾ ‘‘ཙཏྟཱརིམཱནི…པེ॰… ཀཱལ༹པཀྑེཝ ཙནྡིམཱ’’ཏི སུཏྟཾ ལོཀིཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀིཡཾ ནཱམ།

    ‘‘Ettakameva lokiya’’nti vattabbattā ‘‘cattārimānī’’tiādi vuttaṃ. Attho pākaṭo. Idaṃ ‘‘cattārimāni…pe… kāḷapakkheva candimā’’ti suttaṃ lokiye atthe vācakañāpakabhāvena pavattanato lokiyaṃ nāma.

    ‘‘ཨེཝཾ དུཝིདྷཾཡེཝ ལོཀིཡ’’ནྟི ཝཏྟབྦཏྟཱ ‘‘ཨཊྛིམེ, བྷིཀྑཝེ, ལོཀདྷམྨཱ’’ཏིཨཱདི ཝུཏྟཾ། ཨཏྠོ པཱཀཊོ། ཨིདཾ ‘‘ཨཊྛིམེ’’ཏིཨཱདིཀཾ སུཏྟཾ ལོཀིཡེསུ ཨཊྛཝིདྷེསུ ཨཏྠེསུ ཝཱཙཀཉཱཔཀབྷཱཝེན པཝཏྟནཏོ ལོཀིཡཾ ནཱམ།

    ‘‘Evaṃ duvidhaṃyeva lokiya’’nti vattabbattā ‘‘aṭṭhime, bhikkhave, lokadhammā’’tiādi vuttaṃ. Attho pākaṭo. Idaṃ ‘‘aṭṭhime’’tiādikaṃ suttaṃ lokiyesu aṭṭhavidhesu atthesu vācakañāpakabhāvena pavattanato lokiyaṃ nāma.

    ནཱནཱཝིདྷཾ ལོཀིཡཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སུཏྟཾ ལོཀུཏྟར’’ནྟི ཝཏྟབྦཏྟཱ ‘‘ཏཏྠ ཀཏམཾ ལོཀུཏྟར’’ནྟིཨཱདི ཝུཏྟཾ ། ཨིཏོ པརེསུཔི ཨེས ནཡོ ཝེདིཏབྦོ། ཏཏྠཱཏི ཏེསུ ཨཊྛཝཱིསཏིཝིདྷེསུ ལོཀིཡཱདཱིསུ སུཏྟེསུ།

    Nānāvidhaṃ lokiyaṃ ācariyena niddhāritaṃ, amhehi ca ñātaṃ, ‘‘katamaṃ suttaṃ lokuttara’’nti vattabbattā ‘‘tattha katamaṃ lokuttara’’ntiādi vuttaṃ . Ito paresupi esa nayo veditabbo. Tatthāti tesu aṭṭhavīsatividhesu lokiyādīsu suttesu.

    ཚེཀེན སཱརཐིནཱ སུདནྟཱ ཨསྶཱ སམཐངྒཏཱ ཡཐཱ, ཨེཝཾ པཧཱིནམཱནསྶ པཧཱིནནཝཝིདྷམཱནསྶ ཡསྶ ཨནཱསཝསྶ བྷིཀྑུནོ ཨིནྡྲིཡཱནི ཚབྦིདྷཱནི ཙཀྑུནྡྲིཡཱདཱིནི སམཐངྒཏཱནི། ཏཱདིནོ ཏཱདིལཀྑཎེན སམནྣཱགཏསྶ ཨནཱསཝསྶ ཏསྶ བྷིཀྑུནོ དེཝཱཔི མནུསྶཱཔི པིཧཡནྟཱིཏི ཡོཛནཱ། ཨིདཾ ‘‘ཡསྶིནྡྲིཡཱནཱི’’ཏིཨཱདིཀཾ སུཏྟཾ ལོཀུཏྟརེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀུཏྟརཾ ནཱམ།

    Chekena sārathinā sudantā assā samathaṅgatā yathā, evaṃ pahīnamānassa pahīnanavavidhamānassa yassa anāsavassa bhikkhuno indriyāni chabbidhāni cakkhundriyādīni samathaṅgatāni. Tādino tādilakkhaṇena samannāgatassa anāsavassa tassa bhikkhuno devāpi manussāpi pihayantīti yojanā. Idaṃ ‘‘yassindriyānī’’tiādikaṃ suttaṃ lokuttare atthe vācakañāpakabhāvena pavattanato lokuttaraṃ nāma.

    ‘‘ཨེཏྟཀམེཝཱ’’ཏི ཝཏྟབྦཏྟཱ ‘‘པཉྩིམཱནི བྷིཀྑཝེ ཨིནྡྲིཡཱནཱི’’ཏིཨཱདི ཝུཏྟཾ། ཨིདཾ ‘‘པཉྩིམཱནཱི’’ཏིཨཱདིཀཾ སུཏྟམྤི ལོཀུཏྟརེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀུཏྟརཾ ནཱམ། (༡)

    ‘‘Ettakamevā’’ti vattabbattā ‘‘pañcimāni bhikkhave indriyānī’’tiādi vuttaṃ. Idaṃ ‘‘pañcimānī’’tiādikaṃ suttampi lokuttare atthe vācakañāpakabhāvena pavattanato lokuttaraṃ nāma. (1)

    ‘‘ལདྡྷཱན མཱནུསཏྟཾ དྭེ, ཀིཙྩཾ ཨཀིཙྩམེཝ ཙཱ’’ཏིཨཱདིཀཱ དྭེ གཱཐཱ ཝུཏྟཱ། ཨིཧ གཱཐཱསུ ‘‘སུཀིཙྩཾ ཙེཝ པུཉྙཱནཱི’’ཏི ཡཾ གཱཐཱཔདཉྩ ‘‘པུཉྙཱནི ཀརིཏྭཱན, སགྒཱ སགྒཾ ཝཛནྟི ཀཏཔུཉྙཱ’’ཏི ཡཾ གཱཐཱཔདཉྩ ཝུཏྟཾ, ཨིདཾ གཱཐཱཔདཾ ལོཀིཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀིཡཾ ནཱམ།

    ‘‘Laddhāna mānusattaṃ dve, kiccaṃ akiccameva cā’’tiādikā dve gāthā vuttā. Iha gāthāsu ‘‘sukiccaṃ ceva puññānī’’ti yaṃ gāthāpadañca ‘‘puññāni karitvāna, saggā saggaṃ vajanti katapuññā’’ti yaṃ gāthāpadañca vuttaṃ, idaṃ gāthāpadaṃ lokiye atthe vācakañāpakabhāvena pavattanato lokiyaṃ nāma.

    ཨིཧ གཱཐཱསུ ‘‘སཾཡོཛནཝིཔྤཧཱནཾ ཝཱ’’ཏི ཡཾ གཱཐཱཔདཉྩ ‘‘སཾཡོཛནཝིཔྤཧཱནཱ, ཛརཱམརཎཱ ཝིཔྤམུཙྩནྟཱི’’ཏི ཡཾ གཱཐཱཔདཉྩ ཝུཏྟཾ, ཨིདཾ གཱཐཱཔདཾ ཝུཏྟནཡེན ལོཀུཏྟརཾ ནཱམ། ཨིདཾ ‘‘ལདྡྷཱནཱ’’ཏིཨཱདིཀཾ ཝུཏྟཔྤཀཱརེན ལོཀིཡཉྩ ལོཀུཏྟརཉྩ།

    Iha gāthāsu ‘‘saṃyojanavippahānaṃ vā’’ti yaṃ gāthāpadañca ‘‘saṃyojanavippahānā, jarāmaraṇā vippamuccantī’’ti yaṃ gāthāpadañca vuttaṃ, idaṃ gāthāpadaṃ vuttanayena lokuttaraṃ nāma. Idaṃ ‘‘laddhānā’’tiādikaṃ vuttappakārena lokiyañca lokuttarañca.

    བྷིཀྑཝེ, ཝིཉྙཱཎེ ཨཱཧཱརེ ཨཱཧཱརཔཊིབདྡྷེ ཚནྡརཱགེ སཏི ནཱམརཱུཔསྶ ཨཝཀྐནྟི ཧོཏི། ‘‘ཝིཉྙཱཎེ…པེ॰… ཧོཏཱི’’ཏི ཨིདཾ ཝུཏྟནཡེན ལོཀིཡཾ ནཱམ། ‘‘ཝིཉྙཱཎེ…པེ॰… ནིརོདྷོ’’ཏི ཨིདཾ སུཏྟཾ ལོཀུཏྟརཾ ནཱམ། ཨིདཾ ‘‘ཝིཉྙཱཎེ ཙེ བྷིཀྑཝེ’’ཏིཨཱདིཀཾ སུཏྟཾ ལོཀིཡེ ཨཏྠེ ཙ ལོཀུཏྟརེ ཨཏྠེ ཙ ཨེཀདེསཝསེན ཝཱཙཀཉཱཔཀཝསེན པཝཏྟནཏོ ལོཀིཡཉྩ ལོཀུཏྟརཉྩ། (༢)

    Bhikkhave, viññāṇe āhāre āhārapaṭibaddhe chandarāge sati nāmarūpassa avakkanti hoti. ‘‘Viññāṇe…pe… hotī’’ti idaṃ vuttanayena lokiyaṃ nāma. ‘‘Viññāṇe…pe… nirodho’’ti idaṃ suttaṃ lokuttaraṃ nāma. Idaṃ ‘‘viññāṇe ce bhikkhave’’tiādikaṃ suttaṃ lokiye atthe ca lokuttare atthe ca ekadesavasena vācakañāpakavasena pavattanato lokiyañca lokuttarañca. (2)

    ༡༡༣. སཏྟལོཀེ སབྦཱ དིསཱ ཨནུཔརིགམྨ ཀྭཙི དིསཱཡཾ ཙེཏསཱ ཨཏྟནཱ ཨཏྟཏོ པིཡཏརཾ ཨཉྙཾ ནེཝ ཨཛ྄ཛྷགཱ, ཨཏྟཱཝ པིཡཏརོ ཡཐཱ , ཨེཝཾ པརེསཾ སཏྟཱནཾ པུཐུ ཝིསུཾ ཝིསུཾ ཨཏྟཱཝ པིཡོ པིཡཏརོ, ཏསྨཱ ཨཏྟནོཝ པིཡཏརཏྟཱ ཨཏྟཀཱམོ ཨཏྟནོ ཧིཏཀཱམོ པཎྜིཏོ སཏྟལོཀོ ཨཏྟཱནཾ ཨུཔམཾ ཀཏྭཱ པརཾ ན ཧིཾསེ ན ཧིཾསེཡྻཱཏི ཡོཛནཱ། ཨིདཾ ‘‘སབྦཱ དིསཱ’’ཏིཨཱདིཀཾ སུཏྟཾ སཏྟེསུ ཝཱཙཀཉཱཔཀབྷཱཝེན པཝཏྟནཏོ སཏྟཱདྷིཊྛཱནཾ ནཱམ།

    113. Sattaloke sabbā disā anuparigamma kvaci disāyaṃ cetasā attanā attato piyataraṃ aññaṃ neva ajjhagā, attāva piyataro yathā , evaṃ paresaṃ sattānaṃ puthu visuṃ visuṃ attāva piyo piyataro, tasmā attanova piyatarattā attakāmo attano hitakāmo paṇḍito sattaloko attānaṃ upamaṃ katvā paraṃ na hiṃse na hiṃseyyāti yojanā. Idaṃ ‘‘sabbā disā’’tiādikaṃ suttaṃ sattesu vācakañāpakabhāvena pavattanato sattādhiṭṭhānaṃ nāma.

    ཡེ ཀེཙི ཁཱིཎཱསཝཱ པུགྒལཱ བྷཱུཏཱཝ ན བྷཝིསྶནྟི, སབྦེ ཏེ ཁཱིཎཱསཝཱ པུགྒལཱ དེཧཾ ཨཏྟབྷཱཝཾ པཧཱཡ ནིབྦཱནཾ གམིསྶནྟི། ཡེ ཙ པུཐུཛྫནཱདཡོ སཏྟཱ པུནབྦྷཝེསུ བྷཝིསྶནྟི, སབྦེ ཏེ པུཐུཛྫནཱདཡོ སཏྟཱ དེཧཾ ཨཏྟབྷཱཝཾ པཧཱཡ པརལོཀཾ གམིསྶནྟི, ཏཾ སབྦཛཱནིཾ སབྦསྶ སཏྟསྶ ཧཱནིཾ མརཎཾ, ཝིནཱསཾ ཝཱ ཀུསལོ ཡོ པུགྒལོ ཝིཛཱནཱཏི, སོ ཀུསལོ པུགྒལོ ཏཾ སབྦཛཱནིཾ ཝིདིཏྭཱ ཨཱཏཱཔིཡོ བྲཧྨཙརིཡཾ ཙརེཡྻཱཏི ཡོཛནཱ། ཨིདཾ ‘‘ཡེ ཀེཙཱི’’ཏིཨཱདིཀཾ ཝུཏྟནཡེན སཏྟཱདྷིཊྛཱནཾ།

    Ye keci khīṇāsavā puggalā bhūtāva na bhavissanti, sabbe te khīṇāsavā puggalā dehaṃ attabhāvaṃ pahāya nibbānaṃ gamissanti. Ye ca puthujjanādayo sattā punabbhavesu bhavissanti, sabbe te puthujjanādayo sattā dehaṃ attabhāvaṃ pahāya paralokaṃ gamissanti, taṃ sabbajāniṃ sabbassa sattassa hāniṃ maraṇaṃ, vināsaṃ vā kusalo yo puggalo vijānāti, so kusalo puggalo taṃ sabbajāniṃ viditvā ātāpiyo brahmacariyaṃ careyyāti yojanā. Idaṃ ‘‘ye kecī’’tiādikaṃ vuttanayena sattādhiṭṭhānaṃ.

    སཏྟཧི ཨངྒེཧི སམནྣཱགཏཾ ཀལྱཱཎམིཏྟཾ ཡཱཝཛཱིཝཾ ཀུསལེན པུགྒལེན ན ཝིཛཧིཏབྦཾ། ཀཏམེཧི སཏྟཧི? པརིསུདྡྷསཱིལསམྤཏྟིཔརིསུདྡྷདིཊྛིསམྤཏྟཱིཧི སམནྣཱགཏཏྟཱ པིཡོ ཙ པིཡཱཡིཏབྦོ ཙ ཧོཏི, པཱསཱཎཚཏྟཾ ཝིཡ གརུ ཙ ཧོཏི, སམྦྷཱཝེཏབྦཏཱཡ བྷཱཝནཱིཡོ ཙ ཧོཏི, ‘‘ཀཱལེན ཝདཱམི, ནོ ཨཀཱལེནཱ’’ཏིཨཱདིཀེ པཉྩདྷམྨེ ཨཏྟནི ཨུཔཊྛཱཔེཏྭཱ སབྲཧྨཙཱརཱིནཾ ཝཱ སིསྶཱནཾ ཝཱ ཝིནིཙྪཡཨུལླུམྤནཨོཝཱདདཱནབྷཱཝེ ཋཏྭཱ ཝཏྟཱ ཙ ཧོཏི, སབྲཧྨཙཱརཱིཧི ཝཱ སིསྶཱདཱིཧི ཝཱ ཝུཙྩམཱནོ སུཝཙོ ཧུཏྭཱ ཏེསཾ ཝཙནཀྑམོ ཙ ཧོཏི, སཙྩཔཊིཙྩསམུཔྤཱདཱདིགམྦྷཱིརཾ ཝཱ ཨཉྙཾ གམྦྷཱིརཾ ཝཱ ཀཐཾ ཀཏྟཱ ཙ ཧོཏི, དྷམྨཝིནཡཱདིཝསེནེཝ དཱིཔནཏོ ཨཊྛཱནེ ཙ ན ནིཡོཛཀོ ཧོཏི། ཨིམེཧི སཏྟཧི ཨངྒེཧི སམནྣཱགཏཾ ཀལྱཱཎམིཏྟཾ ཡཱཝཛཱིཝཾ ན ཝིཛཧིཏབྦཾ། ཨིདཾ ‘‘སཏྟཧཱི’’ཏིཨཱདིཝཙནཾ བྷགཝཱ ཨཝོཙ། ཨིདཾ ‘‘སཏྟཧཱི’’ཏིཨཱདིཀཾ ཝཙནཾ སུགཏོ ཝཏྭཱ ཨཐཱཔརཾ ཨེཏཾ གཱཐཱཝཙནཾ སཏྠཱ ཨཝོཙ། ཀིཾ ཨཝོཙ?

    Sattahi aṅgehi samannāgataṃ kalyāṇamittaṃ yāvajīvaṃ kusalena puggalena na vijahitabbaṃ. Katamehi sattahi? Parisuddhasīlasampattiparisuddhadiṭṭhisampattīhi samannāgatattā piyo ca piyāyitabbo ca hoti, pāsāṇachattaṃ viya garu ca hoti, sambhāvetabbatāya bhāvanīyo ca hoti, ‘‘kālena vadāmi, no akālenā’’tiādike pañcadhamme attani upaṭṭhāpetvā sabrahmacārīnaṃ vā sissānaṃ vā vinicchayaullumpanaovādadānabhāve ṭhatvā vattā ca hoti, sabrahmacārīhi vā sissādīhi vā vuccamāno suvaco hutvā tesaṃ vacanakkhamo ca hoti, saccapaṭiccasamuppādādigambhīraṃ vā aññaṃ gambhīraṃ vā kathaṃ kattā ca hoti, dhammavinayādivaseneva dīpanato aṭṭhāne ca na niyojako hoti. Imehi sattahi aṅgehi samannāgataṃ kalyāṇamittaṃ yāvajīvaṃ na vijahitabbaṃ. Idaṃ ‘‘sattahī’’tiādivacanaṃ bhagavā avoca. Idaṃ ‘‘sattahī’’tiādikaṃ vacanaṃ sugato vatvā athāparaṃ etaṃ gāthāvacanaṃ satthā avoca. Kiṃ avoca?

    ‘‘པིཡོ གརུ བྷཱཝནཱིཡོ, ཝཏྟཱ ཙ ཝཙནཀྑམོ།

    ‘‘Piyo garu bhāvanīyo, vattā ca vacanakkhamo;

    གམྦྷཱིརཉྩ ཀཐཾ ཀཏྟཱ, ན ཙཊྛཱནེ ནིཡོཛཀོ།

    Gambhīrañca kathaṃ kattā, na caṭṭhāne niyojako;

    ཏཾ མིཏྟཾ མིཏྟཀཱམེན, ཡཱཝཛཱིཝམྤི སེཝིཡ’’ནྟི༎ –

    Taṃ mittaṃ mittakāmena, yāvajīvampi seviya’’nti. –

    ཨེཏཾ གཱཐཱཝཙནཾ སཏྠཱ ཨཝོཙཱཏི ཡོཛནཱ། ‘‘ན ཙ ཨཊྛཱནཡོཛཀོ’’ཏི པཱཋོ ཨཏྠི། ཨིདཾ ‘‘སཏྟཧཱི’’ཏིཨཱདིཀཾ ཝཙནཾ སཏྟཱདྷིཊྛཱནཾ།

    Etaṃ gāthāvacanaṃ satthā avocāti yojanā. ‘‘Na ca aṭṭhānayojako’’ti pāṭho atthi. Idaṃ ‘‘sattahī’’tiādikaṃ vacanaṃ sattādhiṭṭhānaṃ.

    ལོཀེ ཡཾ ཀཱམསུཁཉྩ ཡཾ ཨིདཾ དིཝིཡཾ སུཁཉྩ ཨཏྠི, ཨེཏེ ཀཱམསུཁདིཝིཡསུཁཱ ཏཎྷཱཀྑཡསུཁསྶ སོལ༹སིཾ ཀལཾ ན ཨགྒྷནྟཱིཏི ཡོཛནཱ། ཨིདཾ ‘‘ཡཉྩཱ’’ཏིཨཱདིཀཾ སུཏྟཾ དྷམྨཱདྷིཊྛཱནཾ།

    Loke yaṃ kāmasukhañca yaṃ idaṃ diviyaṃ sukhañca atthi, ete kāmasukhadiviyasukhā taṇhākkhayasukhassa soḷasiṃ kalaṃ na agghantīti yojanā. Idaṃ ‘‘yañcā’’tiādikaṃ suttaṃ dhammādhiṭṭhānaṃ.

    ཡཏྠ ནིབྦཱནེ དུཀྑཾ ནིརུཛ྄ཛྷཏི, སམྨཱསམྦུདྡྷདེསིཏཾ ཨསོཀཾ ཝིརཛཾ ཁེམཾ ཏཾ ནིབྦཱནཾ སུསུཁཾ ཝཏཱཏི ཡོཛནཱ། ཨིདཾ ‘‘སུསུཁ’’ནྟིཨཱདིཀཾ སུཏྟམྤི དྷམྨཱདྷིཊྛཱནཾ། (༣)

    Yattha nibbāne dukkhaṃ nirujjhati, sammāsambuddhadesitaṃ asokaṃ virajaṃ khemaṃ taṃ nibbānaṃ susukhaṃ vatāti yojanā. Idaṃ ‘‘susukha’’ntiādikaṃ suttampi dhammādhiṭṭhānaṃ. (3)

    ཏཱིསུ བྷཝེསུ སཏྟཱནཾ ཛནནཏོ ཏཎྷཱསངྑཱཏཾ མཱཏརཉྩ, པིཏརཾ ནིསྶཱཡ མཱནསྶ ཨུཔྤཛྫནཏོ མཱནསངྑཱཏཾ པིཏརཉྩ, རཊྛེ ལོཀོ རཊྛིསྶརཾ རཱཛཱནཾ བྷཛཏི ཝིཡ དྭིནྣཾ སསྶཏུཙྪེདདིཊྛཱིནཾ སབྦདིཊྛིགཏེཧི བྷཛནཱིཡཏྟཱ སསྶཏུཙྪེདདིཊྛིསངྑཱཏེ ཁཏྟིཡེ དྭེ རཱཛཱནོ ཙ, ཨཱཡསཱདྷཀོ པུརིསོ རཊྛེ ཨཏྠཾ ཨནུཙརཏི ཨིཝ ནནྡིརཱགསྶ དྭཱདསཱཡཏནེ ཨནུཙརཎཏོ ནནྡིརཱགསངྑཱཏེན ཨནུཙརཎེན སཧ པཝཏྟནཊྛཱནཾ དྭཱདསཱཡཏནསངྑཱཏཾ རཊྛཉྩ ཁཱིཎཱསཝོ ཡོ བྲཱཧྨཎོ ཧནཏི, སོ བྲཱཧྨཎོ ཧནྟྭཱ ཨནཱིགྷོ ནིདྡུཀྑོ ཧུཏྭཱ ཡཱཏཱིཏི ཡོཛནཱ། ཨིཧ ‘‘མཱཏར’’ནྟིཨཱདིགཱཐཱཡཾ ‘‘མཱཏརཾ…པེ॰… ཧནྟྭཱ’’ཏི ཨིདཾ གཱཐཱཝཙནཾ དྷམྨཱདྷིཊྛཱནཾ། ‘‘ཨནཱིགྷོ ཡཱཏི བྲཱཧྨཎོ’’ཏི ཨིདཾ གཱཐཱཝཙནཾ སཏྟཱདྷིཊྛཱནཾ། ཨིདཾ ‘‘མཱཏར’’ནྟིཨཱདིཀཾ སུཏྟཾ སཏྟཱདྷིཊྛཱནཉྩ དྷམྨཱདྷིཊྛཱནཉྩ།

    Tīsu bhavesu sattānaṃ jananato taṇhāsaṅkhātaṃ mātarañca, pitaraṃ nissāya mānassa uppajjanato mānasaṅkhātaṃ pitarañca, raṭṭhe loko raṭṭhissaraṃ rājānaṃ bhajati viya dvinnaṃ sassatucchedadiṭṭhīnaṃ sabbadiṭṭhigatehi bhajanīyattā sassatucchedadiṭṭhisaṅkhāte khattiye dve rājāno ca, āyasādhako puriso raṭṭhe atthaṃ anucarati iva nandirāgassa dvādasāyatane anucaraṇato nandirāgasaṅkhātena anucaraṇena saha pavattanaṭṭhānaṃ dvādasāyatanasaṅkhātaṃ raṭṭhañca khīṇāsavo yo brāhmaṇo hanati, so brāhmaṇo hantvā anīgho niddukkho hutvā yātīti yojanā. Iha ‘‘mātara’’ntiādigāthāyaṃ ‘‘mātaraṃ…pe… hantvā’’ti idaṃ gāthāvacanaṃ dhammādhiṭṭhānaṃ. ‘‘Anīgho yāti brāhmaṇo’’ti idaṃ gāthāvacanaṃ sattādhiṭṭhānaṃ. Idaṃ ‘‘mātara’’ntiādikaṃ suttaṃ sattādhiṭṭhānañca dhammādhiṭṭhānañca.

    ‘‘ཙཏྟཱརོམེ བྷིཀྑཝེ ཨིདྡྷིཔཱདཱ’’ཏི ཨིདཾ སུཏྟཔྤདེསཝཙནཾ དྷམྨཱདྷིཊྛཱནཾ། སོ ཙཏཱུཧི ཨིདྡྷིཔཱདེཧི སམནྣཱགཏོ པུགྒལོ ཀཱཡེཔི ཀརཛཀཱཡེཔི ཙིཏྟཾ པཱདཀཛ྄ཛྷཱནཙིཏྟཾ སམོདཧཏི པཀྑིཔཏི, སོ པུགྒལོ དིསྶམཱནཀཱཡེན གནྟུཀཱམོ ཀརཛཀཱཡགཏིཀཾ པཱདཀཛ྄ཛྷཱནཙིཏྟཾ ཨདྷིཊྛཧཏི། ཙིཏྟེཔི པཱདཀཛ྄ཛྷཱནཙིཏྟེཔི ཀཱཡཾ ཀརཛཀཱཡཾ སམོདཧཏི པཀྑིཔཏི, སོ པུགྒལོ སཱིགྷཾ ཨཉྙཾ གནྟུཀཱམོ པཱདཀཛ྄ཛྷཱནཙིཏྟགཏིཀཾ ཀརཛཀཱཡཾ ཨདྷིཊྛཧཏི། ཀཱཡེ ཀརཛཀཱཡེ སུཁསཉྙཉྩ སུཁཝིཧཱརསཉྙཉྩ ལཧུསཉྙཉྩ ལཧུགམནསཉྙཉྩ ཨོཀྐམིཏྭཱ ཨཉྙཾ གམནེཡྻཾ ཨིཙྪིཏཊྛཱནཾ ཨེཀཙིཏྟཀྑཎེནེཝ ཙ གནྟྭཱ ཨུཔསམྤཛྫ ཝིཧརཏི། ཨིདཾ ‘‘སོ’’ཏིཨཱདིཀཾ སུཏྟཔྤདེསཝཙནཾ སཏྟཱདྷིཊྛཱནཾ། ཨིདཾ ‘‘ཙཏྟཱརོམེ’’ཏིཨཱདིཀཾ སུཏྟཾ སཏྟཱདྷིཊྛཱནཉྩ དྷམྨཱདྷིཊྛཱནཉྩ། (༤)

    ‘‘Cattārome bhikkhave iddhipādā’’ti idaṃ suttappadesavacanaṃ dhammādhiṭṭhānaṃ. So catūhi iddhipādehi samannāgato puggalo kāyepi karajakāyepi cittaṃ pādakajjhānacittaṃ samodahati pakkhipati, so puggalo dissamānakāyena gantukāmo karajakāyagatikaṃ pādakajjhānacittaṃ adhiṭṭhahati. Cittepi pādakajjhānacittepi kāyaṃ karajakāyaṃ samodahati pakkhipati, so puggalo sīghaṃ aññaṃ gantukāmo pādakajjhānacittagatikaṃ karajakāyaṃ adhiṭṭhahati. Kāye karajakāye sukhasaññañca sukhavihārasaññañca lahusaññañca lahugamanasaññañca okkamitvā aññaṃ gamaneyyaṃ icchitaṭṭhānaṃ ekacittakkhaṇeneva ca gantvā upasampajja viharati. Idaṃ ‘‘so’’tiādikaṃ suttappadesavacanaṃ sattādhiṭṭhānaṃ. Idaṃ ‘‘cattārome’’tiādikaṃ suttaṃ sattādhiṭṭhānañca dhammādhiṭṭhānañca. (4)

    ༡༡༤. ཡཾ སབྦཉྙུཏཉཱཎཾ ལོཀུཏྟརཾ ལོཀཾ ཨུཏྟརིཏྭཱ ཨབྷིབྷཝིཏྭཱ ཋིཏཾ, ཡེན སབྦཉྙུཏཉྙཱཎེན བྷགཝཱ ‘‘སབྦཉྙཱུ’’ཏི ཝུཙྩཏི, ཏསྶ སབྦཉྙུཏཉྙཱཎསྶ པརིཧཱནཾ ནཏྠི, ཏཾ སབྦཉྙུཏཉྙཱཎཾ སབྦཀཱལེ ཛཱནིཏུཾ ཨཱཝཛྫནཀཱལེ པཝཏྟཏཱིཏི ཡོཛནཱ། ཨིདཾ ‘‘ཡཾ ཏ’’ནྟིཨཱདིཀཾ ཉཱཎེ ཨཏྠེ ཝཱཙཀཉཱཔཀབྷཱཝེནཔི པཝཏྟནཏོ ཉཱཎཾ ནཱམ།

    114. Yaṃ sabbaññutañāṇaṃ lokuttaraṃ lokaṃ uttaritvā abhibhavitvā ṭhitaṃ, yena sabbaññutaññāṇena bhagavā ‘‘sabbaññū’’ti vuccati, tassa sabbaññutaññāṇassa parihānaṃ natthi, taṃ sabbaññutaññāṇaṃ sabbakāle jānituṃ āvajjanakāle pavattatīti yojanā. Idaṃ ‘‘yaṃ ta’’ntiādikaṃ ñāṇe atthe vācakañāpakabhāvenapi pavattanato ñāṇaṃ nāma.

    ཡཱཡ ནིབྦཱནགཱམིནིཡཱ མགྒཔཉྙཱཡ ཛཱཏིམརཎསངྑཡཾ པཛཱནཱཏི, སཱ ནིབྦཱནགཱམིནཱི མགྒཔཉྙཱ སབྦཱཧི ལོཀིཡཱཧི པཉྙཱཧི སེཊྛཱ པསཏྠཱཏི ཡོཛནཱ། ཨིདཾ ‘‘པཉྙཱ ཧཱི’’ཏིཨཱདིཀཾ ཝུཏྟནཡེན ཉཱཎཾ ནཱམ།

    Yāya nibbānagāminiyā maggapaññāya jātimaraṇasaṅkhayaṃ pajānāti, sā nibbānagāminī maggapaññā sabbāhi lokiyāhi paññāhi seṭṭhā pasatthāti yojanā. Idaṃ ‘‘paññā hī’’tiādikaṃ vuttanayena ñāṇaṃ nāma.

    ‘‘དྷོཏཀ, ཝོ ཏུམྷཱཀཾ སནྟིཾ ཨཧཾ ཀིཏྟཡིསྶཱམཱི’’ཏི བྷགཝཱ ཨཝོཙ། ‘‘དིཊྛེ དྷམྨེ དུཀྑཱདིདྷམྨེ ཝཱ ཨཏྟབྷཱཝེ ཝཱ སཏོ ཨནིཙྩཱནུཔསྶནཱདིསཏིསམྤནྣོ ཧུཏྭཱ ཙརཾ ཙརནྟོ ཡོགཱཝཙརོ ཨནཱིཏིཧཾ ཡཾ སནྟིཾ ཡཾ ནིབྦཱནཾ ཨརིཡམགྒེན ཝིདིཏྭཱ ལོཀེ སཾསཱརལོཀེ ཝིསཏྟིཀཾ ཝིསཔྤཀཾ ཏཎྷཾ ཏརེ ཏརེཡྻཱ’’ཏི བྷགཝཱ ཨཝོཙ།

    ‘‘Dhotaka, vo tumhākaṃ santiṃ ahaṃ kittayissāmī’’ti bhagavā avoca. ‘‘Diṭṭhe dhamme dukkhādidhamme vā attabhāve vā sato aniccānupassanādisatisampanno hutvā caraṃ caranto yogāvacaro anītihaṃ yaṃ santiṃ yaṃ nibbānaṃ ariyamaggena viditvā loke saṃsāraloke visattikaṃ visappakaṃ taṇhaṃ tare tareyyā’’ti bhagavā avoca.

    དྷོཏཀོ བྷགཝནྟཾ ཝདཏི ‘‘མཧེསི མཧནྟེ སཱིལཀྑནྡྷཱདཱི ཨེསནསཱིལ, གོཏམ, སཏོ ‘སབྦེ སངྑཱརཱ ཨནིཙྩཱ’ཏིཨཱདིསརཎསམྤནྣོ ཧུཏྭཱ ཙརཾ ཙརནྟོ ཡོགཱཝཙརོ ཨུཏྟམཾ ཡཾ སནྟིཾ ཡཾ ནིབྦཱནཾ ཨརིཡམགྒེན ཝིདིཏྭཱ ལོཀེ སཾསཱརལོཀེ ཝིསཏྟིཀཾ ཏཎྷཾ ཏརེ ཏརེཡྻཱཏི ཏཉྩ ཝཙནཾ ཏཉྩ སནྟིཾ ནིབྦཱནཾ ཨཧཾ ཨབྷིནནྡཱམི ཨབྷིཔཏྠཡཱམི, མཧེསི ཏྭཾ, ཡཉྩ སམྤཛཱནཱསཱི’’ཏི དྷོཏཀོ བྷགཝནྟཾ ཝདཏི།

    Dhotako bhagavantaṃ vadati ‘‘mahesi mahante sīlakkhandhādī esanasīla, gotama, sato ‘sabbe saṅkhārā aniccā’tiādisaraṇasampanno hutvā caraṃ caranto yogāvacaro uttamaṃ yaṃ santiṃ yaṃ nibbānaṃ ariyamaggena viditvā loke saṃsāraloke visattikaṃ taṇhaṃ tare tareyyāti tañca vacanaṃ tañca santiṃ nibbānaṃ ahaṃ abhinandāmi abhipatthayāmi, mahesi tvaṃ, yañca sampajānāsī’’ti dhotako bhagavantaṃ vadati.

    ‘‘དྷོཏཀཱ’’ཏི ཨཱལཔིཏྭཱ བྷགཝཱ དྷོཏཀཾ ཨཝོཙ། ‘‘ཨུདྡྷཾ ཨནཱགཏཾ ཨུཔརི ཨདྷོ ཨཏཱིཏཾ ཧེཊྛཱ ཙ ཏིརིཡཉྩཱཔི མཛ྄ཛྷེ པཙྩུཔྤནྣཾ པརིཏོ ཙ ལོཀེ སཾསཱརལོཀེ ཨེཏཾ ཏཎྷཾ བྷཝཱབྷཝཱཡ ཁུདྡཀབྷཝམཧནྟབྷཝཏྠཱཡ སངྒོ ལགྒོཏི ཝིདིཏྭཱ ཝིཙརནྟོ ཏྭཾ ཏཎྷཾ མཱཀཱསི མཱ ཨཀཱསཱི’’ཏི བྷགཝཱ དྷོཏཀཾ ཨཝོཙཱཏི ཡོཛནཱ། ཨིདཾ ‘‘ཀིཏྟཡིསྶཱམཱི’’ཏིཨཱདིཀཾ ཉེཡྻེ ཝིསཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ཉེཡྻཾ ནཱམ།

    ‘‘Dhotakā’’ti ālapitvā bhagavā dhotakaṃ avoca. ‘‘Uddhaṃ anāgataṃ upari adho atītaṃ heṭṭhā ca tiriyañcāpi majjhe paccuppannaṃ parito ca loke saṃsāraloke etaṃ taṇhaṃ bhavābhavāya khuddakabhavamahantabhavatthāya saṅgo laggoti viditvā vicaranto tvaṃ taṇhaṃ mākāsi mā akāsī’’ti bhagavā dhotakaṃ avocāti yojanā. Idaṃ ‘‘kittayissāmī’’tiādikaṃ ñeyye visaye atthe vācakañāpakabhāvena pavattanato ñeyyaṃ nāma.

    ‘‘ཨེཏྟཀམེཝཱ’’ཏི ཝཏྟབྦཏྟཱ ‘‘ཙཏུནྣཾ བྷིཀྑཝེ’’ཏིཨཱདི ཝུཏྟཾ། བྷིཀྑཝེ, ཙཏུནྣཾ ཨརིཡསཙྩཱནཾ ཨརིཡབྷཱཝཀརཱནཾ སཙྩཱནཾ ཨནནུབོདྷཱ ཨབུཛ྄ཛྷནེན ཨཔྤཊིཝེདྷཱ ཨཔྤཊིཝིཛ྄ཛྷནེན ཨེཝཾ ཨིམིནཱ ཀཱརཎེན མམཉྩེཝ ཏུམྷཱཀཉྩ དཱིགྷམདྡྷཱནཾ ཨིདཾ སནྡྷཱཝིཏཾ སནྡྷཱཝནཾ, ཨིདཾ སཾསརིཏཾ སཾསརཎཾ ཨཧོསཱིཏི, བྷིཀྑཝེ, ཨཛྫ ཏཡིདཾ ཏཾ ཨིདཾ དུཀྑཾ ཨརིཡསཙྩཾ མཡཱ ཨནུབུདྡྷཾ པཊིཝིདྡྷཾ…པེ॰… ཏཡིདཾ ཏཾ ཨིདཾ དུཀྑནིརོདྷགཱམིནཱི པཊིཔདཱ ཨརིཡསཙྩཾ མཡཱ ཨནུབུདྡྷཾ པཊིཝིདྡྷཾ, མམ བྷཝཏཎྷཱ ཨུཙྪིནྣཱ, བྷཝནེཏྟི ཏཎྷཱ ཁཱིཎཱ, ཨིདཱནི མམ པུནབྦྷཝོ ནཏྠི, ཨིཏི ཨིདཾ ‘‘ཙཏུནྣ’’ནྟིཨཱདིཀཾ བྷགཝཱ ཨཝོཙ, སུགཏོ ཨིདཾ ‘‘ཙཏུནྣ’’ནྟིཨཱདིཀཾ ཝཏྭཱ ཨཐཱཔརཾ ཨེཏཾ ‘‘ཙཏུནྣ’’ནྟིཨཱདིགཱཐཱཝཙནཾ སཏྠཱ ཨཝོཙཱཏི ཡོཛེཏྭཱ གཱཐཱཡཉྩ ཏཐེཝ ཡོཛནཱ ཀཱཏབྦཱ། ཨིདཾ ‘‘ཙཏུནྣ’’ནྟིཨཱདིཀཾ ཝུཏྟནཡེན ཉེཡྻཾ ནཱམ། (༥)

    ‘‘Ettakamevā’’ti vattabbattā ‘‘catunnaṃ bhikkhave’’tiādi vuttaṃ. Bhikkhave, catunnaṃ ariyasaccānaṃ ariyabhāvakarānaṃ saccānaṃ ananubodhā abujjhanena appaṭivedhā appaṭivijjhanena evaṃ iminā kāraṇena mamañceva tumhākañca dīghamaddhānaṃ idaṃ sandhāvitaṃ sandhāvanaṃ, idaṃ saṃsaritaṃ saṃsaraṇaṃ ahosīti, bhikkhave, ajja tayidaṃ taṃ idaṃ dukkhaṃ ariyasaccaṃ mayā anubuddhaṃ paṭividdhaṃ…pe… tayidaṃ taṃ idaṃ dukkhanirodhagāminī paṭipadā ariyasaccaṃ mayā anubuddhaṃ paṭividdhaṃ, mama bhavataṇhā ucchinnā, bhavanetti taṇhā khīṇā, idāni mama punabbhavo natthi, iti idaṃ ‘‘catunna’’ntiādikaṃ bhagavā avoca, sugato idaṃ ‘‘catunna’’ntiādikaṃ vatvā athāparaṃ etaṃ ‘‘catunna’’ntiādigāthāvacanaṃ satthā avocāti yojetvā gāthāyañca tatheva yojanā kātabbā. Idaṃ ‘‘catunna’’ntiādikaṃ vuttanayena ñeyyaṃ nāma. (5)

    ‘‘རཱུཔཾ ཨནིཙྩཾ…པེ॰… ཝིཉྙཱཎཾ ཨནིཙྩ’’ནྟི ཨིདཾ སུཏྟཾ ཉེཡྻེ རཱུཔཱདིདྷམྨེ ཝཱཙཀཉཱཔཀབྷཱཝེན པཝཏྟནཏོ ཉེཡྻཾ ནཱམ།

    ‘‘Rūpaṃ aniccaṃ…pe… viññāṇaṃ anicca’’nti idaṃ suttaṃ ñeyye rūpādidhamme vācakañāpakabhāvena pavattanato ñeyyaṃ nāma.

    ཨེཝཾ ‘‘རཱུཔཾ ཨནིཙྩ’’ནྟིཨཱདིནཱ པཀཱརེན ཛཱནཾ ཛཱནནྟོ ཨེཝཾ ‘‘རཱུཔཾ ཨནིཙྩ’’ནྟིཨཱདིནཱ པཀཱརེན པསྶཾ པསྶནྟོ ཨརིཡསཱཝཀོ ཨརིཡསྶ བྷགཝཏོ སཱཝཀོ ‘‘ཨིདཾ རཱུཔཾ ཨནིཙྩ’’ནྟི རཱུཔཾ པསྶཏི, ‘‘ཨཡཾ ཝེདནཱ ཨནིཙྩཱ’’ཏི ཝེདནཾ པསྶཏི, ‘‘ཨཡཾ སཉྙཱ ཨནིཙྩཱ’’ཏི སཉྙཾ པསྶཏི, ‘‘ཨིམེ སངྑཱརཱ ཨནིཙྩཱ’’ཏི སངྑཱརེ པསྶཏི, ‘‘ཨིདཾ ཝིཉྙཱཎཾ ཨནིཙྩ’’ནྟི ཝིཉྙཱཎཾ པསྶཏི། ཨིཏི ཨིདཾ སུཏྟཾ རཱུཔཱདིཔསྶནེ ཉཱཎེ ཝཱཙཀཉཱཔཀབྷཱཝེན པཝཏྟནཏོ ཉཱཎཾ ནཱམ།

    Evaṃ ‘‘rūpaṃ anicca’’ntiādinā pakārena jānaṃ jānanto evaṃ ‘‘rūpaṃ anicca’’ntiādinā pakārena passaṃ passanto ariyasāvako ariyassa bhagavato sāvako ‘‘idaṃ rūpaṃ anicca’’nti rūpaṃ passati, ‘‘ayaṃ vedanā aniccā’’ti vedanaṃ passati, ‘‘ayaṃ saññā aniccā’’ti saññaṃ passati, ‘‘ime saṅkhārā aniccā’’ti saṅkhāre passati, ‘‘idaṃ viññāṇaṃ anicca’’nti viññāṇaṃ passati. Iti idaṃ suttaṃ rūpādipassane ñāṇe vācakañāpakabhāvena pavattanato ñāṇaṃ nāma.

    སོ ‘‘རཱུཔཾ ཨནིཙྩ’’ནྟིཨཱདིནཱ པཀཱརེན པསྶནྟོ ཨརིཡསཱཝཀོ རཱུཔེན རཱུཔརཱགེན པརིམུཙྩཏི…པེ॰… ཝིཉྙཱཎམྷཱ ཝིཉྙཱཎརཱགམྷཱ པརིམུཙྩཏཱིཏི དུཀྑསྨཱ པརིམུཙྩཏཱིཏི ཨཧཾ ཝདཱམཱིཏི ཡོཛནཱ། ཨིདཾ ‘‘སོ པརིམུཙྩཏཱི’’ཏིཨཱདིཀཾ སུཏྟཾ ཉཱཎེ ཙ ཉེཡྻེ ཙ ཝཱཙཀཉཱཔཀབྷཱཝེན པཝཏྟནཏོ ཉཱཎཉྩ ཉེཡྻཉྩ ཧོཏི།

    So ‘‘rūpaṃ anicca’’ntiādinā pakārena passanto ariyasāvako rūpena rūparāgena parimuccati…pe… viññāṇamhā viññāṇarāgamhā parimuccatīti dukkhasmā parimuccatīti ahaṃ vadāmīti yojanā. Idaṃ ‘‘so parimuccatī’’tiādikaṃ suttaṃ ñāṇe ca ñeyye ca vācakañāpakabhāvena pavattanato ñāṇañca ñeyyañca hoti.

    སབྦེ པཉྩཀྑནྡྷཱ པཙྩཡེཧི སངྑརིཏཏྟཱ སངྑཱརཱ ཨཱདིཨནྟཝནྟབྷཱཝཏོ, ཨནིཙྩནྟིཀབྷཱཝཏོ, ཏཱཝཀཱལིཀབྷཱཝཏོ ཙ ཁཎཔརིཏྟབྷཱཝཏོ ཨནིཙྩཱ བྷཝནྟི། ཨིདཾ ‘‘སབྦེ སངྑཱརཱ ཨནིཙྩཱ’’ཏི སུཏྟཔྤདེསཝཙནཾ ཝུཏྟནཡེན ཉེཡྻཾ ནཱམ། ཡདཱ ཝིཔསྶནཱཀརཎཀཱལེ པཉྙཱཡ ཝིཔསྶནཱཔཉྙཱཡ པསྶཏི ཨནིཙྩཏཱདིཀཾ པསྶཏི། ཨིདཾ ‘‘ཡདཱ པཉྙཱཡ པསྶཏཱི’’ཏི སུཏྟཔྤདེསཝཙནཾ ཉཱཎཾ ནཱམ། ཨཐ པསྶནཀྑཎེ དུཀྑེ པཉྩཀྑནྡྷེ ཝིཔསྶཀོ ནིབྦིནྡཏི, ནིབྦིནྡནྟོ པུགྒལོ དུཀྑཱདིཛཱནནཱདིཝསེན ཙཏྟཱརི སཙྩཱནི པཊིཝིཛ྄ཛྷཏི, ཨེསོ ཙཏུསཙྩཔཊིཝེདྷོ ཝིསུདྡྷིཡཱ ཝིསུདྡྷཏྠཱཡ མགྒོཏི། ཨིདཾ ‘‘ཨཐཱ’’ཏིཨཱདིཀཾ སུཏྟཔྤདེསཝཙནཾ ཉཱཎཉྩ ཉེཡྻཉྩ ཧོཏི།

    Sabbe pañcakkhandhā paccayehi saṅkharitattā saṅkhārā ādiantavantabhāvato, aniccantikabhāvato, tāvakālikabhāvato ca khaṇaparittabhāvato aniccā bhavanti. Idaṃ ‘‘sabbe saṅkhārā aniccā’’ti suttappadesavacanaṃ vuttanayena ñeyyaṃ nāma. Yadā vipassanākaraṇakāle paññāya vipassanāpaññāya passati aniccatādikaṃ passati. Idaṃ ‘‘yadā paññāya passatī’’ti suttappadesavacanaṃ ñāṇaṃ nāma. Atha passanakkhaṇe dukkhe pañcakkhandhe vipassako nibbindati, nibbindanto puggalo dukkhādijānanādivasena cattāri saccāni paṭivijjhati, eso catusaccapaṭivedho visuddhiyā visuddhatthāya maggoti. Idaṃ ‘‘athā’’tiādikaṃ suttappadesavacanaṃ ñāṇañca ñeyyañca hoti.

    སོཎཱཏི སོཎཾ ཨཱལཔཏི། སམཎཱ བཱཧིརཀསམཎཱ བྲཱཧྨཎཱ ཛཱཏིབྲཱཧྨཎཱ ཨནིཙྩེན རཱུཔེན, དུཀྑེན རཱུཔེན, ཝིཔརིཎཱམདྷམྨེན རཱུཔེན ‘‘ཨཧཾ པརེཧི སེཡྻོ ཨུཏྟམོ ཨསྨཱི’’ཏི ཝཱ སམནུཔསྶནྟི, ‘‘ཨཧཾ པརེན སདིསོ སམཱནོ ཨསྨཱི’’ཏི ཝཱ སམནུཔསྶནྟི, ‘‘ཨཧཾ པརཏོ ཧཱིནོ ལཱམཀོ ཨསྨཱི’’ཏི ཝཱ སམནུཔསྶནྟི, ཡཐཱབྷཱུཏསྶ ཨདསྶནཱ ཨཉྙཏྲ ཝཛྫེཏྭཱ ཨཉྙཾ ཀིཾ ནཱམ ཀཱརཎཾ སིཡཱ, ཡཐཱབྷཱུཏཾ ཨདསྶནཏོ ཏཱཝ སམནུཔསྶནསྶ ཨཉྙཾ ཀཱརཎཾ ནཏྠི, ཡཐཱབྷཱུཏཾ ཨདསྶནམེཝ ཀཱརཎནྟི ཝེདིཏབྦཾ། ‘‘ཨནིཙྩཱཡ ཝེདནཱཡཱ’’ཏིཨཱདཱིསུཔི ཨིམིནཱ ཝུཏྟནཡེན ཝུཏྟནཡཱནུསཱརེན ཡོཛནཱ ཀཱཏབྦཱ། ཨིདཾ ‘‘ཡེ ཧི ཀེཙཱི’’ཏིཨཱདིཀཾ སུཏྟཔྤདེསཝཙནཾ ཉེཡྻཾ ནཱམ། ‘‘ཡེ ཙ ཁོ ཀེཙཱི’’ཏིཨཱདིཀོ སུཀྐཔཀྑོ པན ཝུཏྟཝིཔརིཡཱཡེན ཝེདིཏབྦོ། ཨིདཾ ‘‘ཡེ ཙ ཁོ’’ཏིཨཱདིཀཾ སུཏྟཔྤདེསཝཙནཾ ཉཱཎཾ ནཱམ། ཨིདཾ ‘‘ཡེ ཧི ཀེཙཱི’’ཏིཨཱདིཀཾ སུཏྟཾ ཉཱཎེ ཙ ཉེཡྻེ ཙ ཨཏྠེ ཝཱཙཀཉཱཔཀབྷཱཝེན པཝཏྟནཏོ ཉཱཎཉྩ ཉེཡྻཉྩ ཧོཏི། (༦)

    Soṇāti soṇaṃ ālapati. Samaṇā bāhirakasamaṇā brāhmaṇā jātibrāhmaṇā aniccena rūpena, dukkhena rūpena, vipariṇāmadhammena rūpena ‘‘ahaṃ parehi seyyo uttamo asmī’’ti vā samanupassanti, ‘‘ahaṃ parena sadiso samāno asmī’’ti vā samanupassanti, ‘‘ahaṃ parato hīno lāmako asmī’’ti vā samanupassanti, yathābhūtassa adassanā aññatra vajjetvā aññaṃ kiṃ nāma kāraṇaṃ siyā, yathābhūtaṃ adassanato tāva samanupassanassa aññaṃ kāraṇaṃ natthi, yathābhūtaṃ adassanameva kāraṇanti veditabbaṃ. ‘‘Aniccāya vedanāyā’’tiādīsupi iminā vuttanayena vuttanayānusārena yojanā kātabbā. Idaṃ ‘‘ye hi kecī’’tiādikaṃ suttappadesavacanaṃ ñeyyaṃ nāma. ‘‘Ye ca kho kecī’’tiādiko sukkapakkho pana vuttavipariyāyena veditabbo. Idaṃ ‘‘ye ca kho’’tiādikaṃ suttappadesavacanaṃ ñāṇaṃ nāma. Idaṃ ‘‘ye hi kecī’’tiādikaṃ suttaṃ ñāṇe ca ñeyye ca atthe vācakañāpakabhāvena pavattanato ñāṇañca ñeyyañca hoti. (6)

    ནཱནཱཝིདྷཾ ཉཱཎཉྩ ཉེཡྻཉྩ སཱསནཔཊྛཱནསུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ དསྶན’’ནྟི པུཙྪིཏབྦཏྟཱ ‘‘ཏཏྠ ཀཏམཾ དསྶན’’ནྟིཨཱདི ཝུཏྟཾ། ཏཏྠཱཏི ཏེསུ ལོཀིཡཱདཱིསུ ཨཊྛཝཱིསཏིཝིདྷེསུ སཱསནཔཊྛཱནེསུ སུཏྟེསུ ཀཏམཾ སུཏྟཾ དསྶནཾ ནཱམཱཏི པུཙྪཏི།

    Nānāvidhaṃ ñāṇañca ñeyyañca sāsanapaṭṭhānasuttaṃ ācariyena niddhāritaṃ, amhehi ca ñātaṃ, ‘‘katamaṃ dassana’’nti pucchitabbattā ‘‘tattha katamaṃ dassana’’ntiādi vuttaṃ. Tatthāti tesu lokiyādīsu aṭṭhavīsatividhesu sāsanapaṭṭhānesu suttesu katamaṃ suttaṃ dassanaṃ nāmāti pucchati.

    ༡༡༥. གམྦྷཱིརཔཉྙེན སབྦཉྙུབུདྡྷེན སུདེསིཏཱནི སངྑེཔཝིཏྠཱརཱདཱིཧི ཏེཧི ཏེཧི ནཡེཧི སུཊྛུ དེསིཏཱནི ཨརིཡསཙྩཱནི ཡེ བྷཱཝིཏབྷཱཝནཱ ཨརིཡཔུགྒལཱ པཉྙཱཨོབྷཱསེན ཝིབྷཱཝཡནྟི, ཏེ བྷཱཝིཏབྷཱཝནཱ ཨརིཡཔུགྒལཱ དེཝརཛྫཙཀྐཝཏྟིརཛྫཱདིཔམཱདཊྛཱནཾ ཨཱགམྨ བྷུསཾ པམཏྟཱ ཀིཉྩཱཔི ཧོནྟི, ཏཐཱཔི ཏེ བྷཱཝིཏབྷཱཝནཱ ཨརིཡཔུགྒལཱ སོཏཱཔཏྟིམགྒཉཱཎེན ཨབྷིསངྑཱརཝིཉྙཱཎསྶ ནིརོདྷེན ཨཊྛམབྷཝཱདཱིསུ ཨུཔྤཛྫནཱརཧཱནཾ ནཱམརཱུཔཱནཾ ནིརུདྡྷཏྟཱ ཨཊྛམཀྑཏྟུཝསེན ཨཊྛམཾ བྷཝཾ ན ཨཱདིཡནྟཱིཏི ཡོཛནཱ། ཨིདཾ ‘‘ཡེ ཨརིཡསཙྩཱནཱི’’ཏིཨཱདིཀཾ སུཏྟཾ དསྶནེ པཋམམགྒཉཱཎེ ཝཱཙཀཉཱཔཀབྷཱཝེན པཝཏྟནཏོ དསྶནཾ ནཱམ།

    115.Gambhīrapaññena sabbaññubuddhena sudesitāni saṅkhepavitthārādīhi tehi tehi nayehi suṭṭhu desitāni ariyasaccāni ye bhāvitabhāvanā ariyapuggalā paññāobhāsena vibhāvayanti, te bhāvitabhāvanā ariyapuggalā devarajjacakkavattirajjādipamādaṭṭhānaṃ āgamma bhusaṃ pamattā kiñcāpi honti, tathāpi te bhāvitabhāvanā ariyapuggalā sotāpattimaggañāṇena abhisaṅkhāraviññāṇassa nirodhena aṭṭhamabhavādīsu uppajjanārahānaṃ nāmarūpānaṃ niruddhattā aṭṭhamakkhattuvasena aṭṭhamaṃ bhavaṃ na ādiyantīti yojanā. Idaṃ ‘‘ye ariyasaccānī’’tiādikaṃ suttaṃ dassane paṭhamamaggañāṇe vācakañāpakabhāvena pavattanato dassanaṃ nāma.

    ནགརདྭཱརབཱཧཐིརཀརཎཏྠཾ ཨུམྨཱརབྦྷནྟརེ པཐཝིཡཾ ཨཊྛཧཏྠདསཧཏྠཔྤམཱཎཾ ཨཱཝཱཊཾ ཁཎིཏྭཱ ཏསྨིཾ ཨཱཝཱཊེ ཨུསྶཱཔིཏཏྟཱ པཐཝིསྶིཏོ པཐཝིནིསྶིཏོ ཨནྟོཔཐཝིནིསྶིཏོ ཨིནྡཁཱིལོ སཱརདཱརུམཡོ ཐམྦྷོ ཙཏུབྦྷི ཙཏཱུཧི དིསཱཧི ཨཱགཏེཧི ཝཱཏེཧི མཧཱཝཱཏེཧི ཨསམྤཀམྤིཡོ སམྤཀམྤིཏུཾ ཨསཀྐུཎེཡྻོ སིཡཱ ཡཐཱ, ཡོ སཔྤུརིསོ ཨརིཡསཙྩཱནི ཨཝེཙྩ པསྶཏི, ཏཾ སཔྤུརིསཾ སབྦཏིཏྠིཡཝཱདཝཱཏེཧི ཨསམྤཀམྤིཡཏྟཱ ཏཐཱུཔམཾ ཨཧཾ ཝདཱམཱིཏི ཡོཛནཱ། ཨིདཾ ‘‘ཡཐིནྡཁཱིལོ’’ཏིཨཱདིཀཾ སུཏྟཾ ཝུཏྟནཡེན དསྶནཾ ནཱམ།

    Nagaradvārabāhathirakaraṇatthaṃ ummārabbhantare pathaviyaṃ aṭṭhahatthadasahatthappamāṇaṃ āvāṭaṃ khaṇitvā tasmiṃ āvāṭe ussāpitattā pathavissito pathavinissito antopathavinissito indakhīlo sāradārumayo thambho catubbhi catūhi disāhi āgatehi vātehi mahāvātehi asampakampiyo sampakampituṃ asakkuṇeyyo siyā yathā, yo sappuriso ariyasaccāni avecca passati, taṃ sappurisaṃ sabbatitthiyavādavātehi asampakampiyattā tathūpamaṃ ahaṃ vadāmīti yojanā. Idaṃ ‘‘yathindakhīlo’’tiādikaṃ suttaṃ vuttanayena dassanaṃ nāma.

    བྷིཀྑཝེ, ཙཏཱུཧི སོཏཱཔཏྟིཡངྒེཧི སམནྣཱགཏོ ཨརིཡསཱཝཀོ ཨརིཡསྶ བྷགཝཏོ སམྨཱསམྦུདྡྷསྶ སཱཝཀོ ཨཱཙིཀྑིཏུཾ ཨཱཀངྑམཱནོ ཧུཏྭཱ ཨཏྟནཱཝ སཡམེཝ ཨཏྟཱནཾ བྱཱཀརེཡྻ ‘‘བྷོ, མམ ཨཏྟ ཨཧཾ ཨིདཱནི ཁཱིཎནིརཡོ ཨམྷི, ཁཱིཎཏིརཙྪཱནཡོནི ཨམྷི…པེ॰…. དུཀྑསྶནྟཾ ཀརིསྶཱམཱི’’ཏི བྱཱཀརེཡྻ། ཙཏུརངྒསརཱུཔཾ དསྶེཏུཾ ‘‘ཀཏམེཧི ཙཏཱུཧཱི’’ཏིཨཱདི ཝུཏྟཾ། ཨིདཾ ‘‘ཙཏཱུཧཱི’’ཏིཨཱདིཀཾ དསྶནཾ ནཱམ།

    Bhikkhave, catūhi sotāpattiyaṅgehi samannāgato ariyasāvako ariyassa bhagavato sammāsambuddhassa sāvako ācikkhituṃ ākaṅkhamāno hutvā attanāva sayameva attānaṃ byākareyya ‘‘bho, mama atta ahaṃ idāni khīṇanirayo amhi, khīṇatiracchānayoni amhi…pe…. dukkhassantaṃ karissāmī’’ti byākareyya. Caturaṅgasarūpaṃ dassetuṃ ‘‘katamehi catūhī’’tiādi vuttaṃ. Idaṃ ‘‘catūhī’’tiādikaṃ dassanaṃ nāma.

    ནཱནཱཝིདྷཾ དསྶནཾ ནིདྡྷཱརིཏཾ, ‘‘ཀཏམཱ བྷཱཝནཱ’’ཏི པུཙྪིཏབྦཏྟཱ ‘‘ཏཏྠ ཀཏམཱ བྷཱཝནཱ’’ཏིཨཱདི ཝུཏྟཾ།

    Nānāvidhaṃ dassanaṃ niddhāritaṃ, ‘‘katamā bhāvanā’’ti pucchitabbattā ‘‘tattha katamā bhāvanā’’tiādi vuttaṃ.

    ཨིདྷ སཱསནེ ཡསྶ ཨརིཡསཱཝཀསྶ ཨཛ྄ཛྷཏྟཾ ཀཱམབྷཝེ ནིབྦཏྟཱཔཀཱནཾ ཨོརམྦྷཱགིཡསཾཡོཛནཱནཾ པཛཧནཝསེན ཙ བཧིདྡྷཱ རཱུཔཱརཱུཔབྷཝེསུ ནིབྦཏྟཱཔཀཱནཾ ཨུདྡྷམྦྷཱགིཡསཾཡོཛནཱནཾ པཛཧནཝསེན ཙ ཨིནྡྲིཡཱནི སདྡྷིནྡྲིཡཱདཱིནི ཨིནྡྲིཡཱནི སུབྷཱཝིཏཱནི ཨརིཡམགྒབྷཱཝནཱཝསེན སུཊྛུ བྷཱཝིཏཱནི བྷཝནྟི, བྷཱཝིཏོ བྷཱཝིཏམགྒོ ས དནྟོ སོ ཨརིཡསཱཝཀོ ཨིམཾ ལོཀཉྩ པརཾ ལོཀཉྩ ནིབྦིཛ྄ཛྷ ནིབྦིཛ྄ཛྷིཏྭཱ པཊིཝིཛ྄ཛྷིཏྭཱ ཀཱལཾ མརཎཀཱལེ , ཀཱལཾཀིརིཡཾ ཝཱ ཀངྑཏི པཏྠེཏཱིཏི ཡོཛནཱ། ཨཡཾ ‘‘ཡསྶིནྡྲིཡཱནཱི’’ཏིཨཱདིཀཱ པཱལི༹ བྷཱཝནཱཡ ཝཱཙཀཉཱཔཀབྷཱཝེན པཝཏྟནཏོ བྷཱཝནཱ ནཱམ།

    Idha sāsane yassa ariyasāvakassa ajjhattaṃ kāmabhave nibbattāpakānaṃ orambhāgiyasaṃyojanānaṃ pajahanavasena ca bahiddhā rūpārūpabhavesu nibbattāpakānaṃ uddhambhāgiyasaṃyojanānaṃ pajahanavasena ca indriyāni saddhindriyādīni indriyāni subhāvitāni ariyamaggabhāvanāvasena suṭṭhu bhāvitāni bhavanti, bhāvito bhāvitamaggo sa danto so ariyasāvako imaṃ lokañca paraṃ lokañca nibbijjha nibbijjhitvā paṭivijjhitvā kālaṃ maraṇakāle , kālaṃkiriyaṃ vā kaṅkhati patthetīti yojanā. Ayaṃ ‘‘yassindriyānī’’tiādikā pāḷi bhāvanāya vācakañāpakabhāvena pavattanato bhāvanā nāma.

    དྷམྨཔདཱནི ཛྷཱནཝིཔསྶནཱམགྒཕལནིབྦཱནདྷམྨཀོཊྛཱསཱནི། ཨནབྷིཛ྄ཛྷཱ དྷམྨཔདཾ ཨནབྷིཛ྄ཛྷཱསཱིསེན ཨདྷིགཏཛྷཱནཝིཔསྶནཱམགྒནིབྦཱནདྷམྨཔདཾ ཀོཊྛཱསཾ། ཨེས ནཡོ སེསེསུཔི། ཨཡཾ ‘‘ཙཏྟཱརིམཱནཱི’’ཏིཨཱདིཀཱ པཱལི༹ ཝུཏྟནཡེན བྷཱཝནཱ ནཱམ། (༧)

    Dhammapadāni jhānavipassanāmaggaphalanibbānadhammakoṭṭhāsāni. Anabhijjhā dhammapadaṃ anabhijjhāsīsena adhigatajhānavipassanāmagganibbānadhammapadaṃ koṭṭhāsaṃ. Esa nayo sesesupi. Ayaṃ ‘‘cattārimānī’’tiādikā pāḷi vuttanayena bhāvanā nāma. (7)

    དེཝཔུཏྟ ཚིནྡནྟོ པུགྒལོ པཉྩ ཨོརམྦྷཱགིཡསཾཡོཛནཱནི ཧེཊྛཱ མགྒཏྟཡེན ཚིནྡེ ཚིནྡེཡྻ, པཛཧནྟོ པུགྒལོ པཉྩ ཨུདྡྷམྦྷཱགིཡསཾཡོཛནཱནི ཨརཧཏྟམགྒེན ཛཧེ པཛཧེཡྻ, བྷཱཝཡནྟོ པུགྒལོ པཉྩ སདྡྷིནྡྲིཡཱདཱིནི ཙ ཨུཏྟརི བྷཱཝཡེ བྷཱཝེཡྻ། པཉྩསངྒཱཏིགོ རཱགསངྒདོསསངྒམོཧསངྒམཱནསངྒདིཊྛིསངྒཱཏིགོ བྷིཀྑུ ཨོགྷཏིཎྞོཏི ཀཱམོགྷབྷཝོགྷདིཊྛོགྷཨཝིཛྫོགྷཏིཎྞོཏི ཝུཙྩཏི ཀཐཱིཡཏཱིཏི ཡོཛནཱ། ‘‘པཉྩ ཚིནྡེ པཉྩ ཛཧེ’’ཏི ཨིདཾ ཝཙནཾ དསྶནཾ ནཱམ། ‘‘པཉྩ ཙུཏྟརི…པེ॰… ཝུཙྩཏཱི’’ཏི ཨཡཾ པཱལི༹ བྷཱཝནཱ ནཱམ། ཨིདཾ ‘‘པཉྩཱ’’ཏིཨཱདིཀཾ སུཏྟཾ དསྶནཉྩ བྷཱཝནཱ ཙ ཧོཏི།

    Devaputta chindanto puggalo pañca orambhāgiyasaṃyojanāni heṭṭhā maggattayena chinde chindeyya, pajahanto puggalo pañca uddhambhāgiyasaṃyojanāni arahattamaggena jahe pajaheyya, bhāvayanto puggalo pañca saddhindriyādīni ca uttari bhāvaye bhāveyya. Pañcasaṅgātigo rāgasaṅgadosasaṅgamohasaṅgamānasaṅgadiṭṭhisaṅgātigo bhikkhu oghatiṇṇoti kāmoghabhavoghadiṭṭhoghaavijjoghatiṇṇoti vuccati kathīyatīti yojanā. ‘‘Pañca chinde pañca jahe’’ti idaṃ vacanaṃ dassanaṃ nāma. ‘‘Pañca cuttari…pe… vuccatī’’ti ayaṃ pāḷi bhāvanā nāma. Idaṃ ‘‘pañcā’’tiādikaṃ suttaṃ dassanañca bhāvanā ca hoti.

    ‘‘ཏཱིཎིམཱནི, བྷིཀྑཝེ’’ཏིཨཱདཱིསུ ཡོཛནཱ པཱཀཊཱ། (༨)

    ‘‘Tīṇimāni, bhikkhave’’tiādīsu yojanā pākaṭā. (8)

    ༡༡༦. ‘‘སབྦཔཱཔསྶ ཨཀརཎཾ…པེ॰… བུདྡྷཱན སཱསན’’ནྟི ཨིདཾ སུཏྟཾ སམྨཱསམྦུདྡྷསྶ ཝཙནབྷཱཝཏོ སཀཝཙནཾ ནཱམ། ཨཏྠོ ཧེཊྛཱ ཝུཏྟོཝ།

    116. ‘‘Sabbapāpassa akaraṇaṃ…pe… buddhāna sāsana’’nti idaṃ suttaṃ sammāsambuddhassa vacanabhāvato sakavacanaṃ nāma. Attho heṭṭhā vuttova.

    བྷིཀྑཝེ, བཱལསྶ བཱལལཀྑཎཱནི བཱལཨུཔལཀྑཎཀཱརཎཱནི བཱལནིམིཏྟཱནི ‘‘ཨཡཾ བཱལོ’’ཏི གཧཎཀཱརཎཱནི བཱལཱཔདཱནཱནི བཱལསྶ ཨཔདཱནཱནི པོརཱཎཱནི ཝིརུལ༹ྷཱནི ཀམྨཱནི ཡེཧི བཱལལཀྑཎཱདཱིཧི བཱལཾ ‘‘བཱལོ’’ཏི པརེ པཎྜིཏཱ སཉྫཱནནྟི, ཨིམཱནི བཱལལཀྑཎཱནི མཡཱ ཝུཙྩམཱནཱནི ཏཱིཎི། ཀཏམཱནི ཏཱིཎི? བྷིཀྑཝེ, བཱལོ དུཙྩིནྟིཏཙིནྟཱི ཙ དུཙྩིནྟིཏཾ ཨབྷིཛ྄ཛྷཱབྱཱཔཱདམིཙྪཱདསྶནཾ ཙིནྟཱི ཙ ཧོཏི, དུབྦྷཱསིཏབྷཱསཱི དུབྦྷཱསིཏཾ མུསཱཝཱདཱདིཾ བྷཱསཱི ཙ ཧོཏི. དུཀྐཊཀམྨཀཱརཱི ཙ དུཀྐཊཾ པཱཎཱཏིཔཱཏཱདིཀམྨཾ ཀཱརཱི ཙ ཧོཏི། བྷིཀྑཝེ, བཱལསྶ…པེ॰… བཱལཱཔདཱནཱནི ཨིམིནཱ མཡཱ ཝུཏྟཱནི ཏཱིཎི ཁོ བྷཝནྟི། སུཀྐཔཀྑོ པན ཝུཏྟཝིཔརིཡཱཡེན ཝེདིཏབྦོ། ཨིདཾ ‘‘ཏཱིཎིམཱནི བྷིཀྑཝེ’’ཏིཨཱདིཀཾ ཝཙནཾ སམྨཱསམྦུདྡྷསྶ ཝཙནབྷཱཝཏོ སཀཝཙནཾ ནཱམ།

    Bhikkhave, bālassa bālalakkhaṇāni bālaupalakkhaṇakāraṇāni bālanimittāni ‘‘ayaṃ bālo’’ti gahaṇakāraṇāni bālāpadānāni bālassa apadānāni porāṇāni viruḷhāni kammāni yehi bālalakkhaṇādīhi bālaṃ ‘‘bālo’’ti pare paṇḍitā sañjānanti, imāni bālalakkhaṇāni mayā vuccamānāni tīṇi. Katamāni tīṇi? Bhikkhave, bālo duccintitacintī ca duccintitaṃ abhijjhābyāpādamicchādassanaṃ cintī ca hoti, dubbhāsitabhāsī dubbhāsitaṃ musāvādādiṃ bhāsī ca hoti. dukkaṭakammakārī ca dukkaṭaṃ pāṇātipātādikammaṃ kārī ca hoti. Bhikkhave, bālassa…pe… bālāpadānāni iminā mayā vuttāni tīṇi kho bhavanti. Sukkapakkho pana vuttavipariyāyena veditabbo. Idaṃ ‘‘tīṇimāni bhikkhave’’tiādikaṃ vacanaṃ sammāsambuddhassa vacanabhāvato sakavacanaṃ nāma.

    པཐཝཱིསམོ ཝིཏྠཏོ སམྦོདྷོ ནཱམ ནཏྠི། པཱཏཾ ཝུཊྛཾ ཨུདཀཾ ཨཱབྷུསོ ལཱབྷི གཎྷཱཏཱིཏི པཱཏཱལོ, པཱཏཱལེན སམོ པཱཏཱལསམོ ནིནྣོ ན ཝིཛྫཏི། མེརུསམོ ཨུནྣཏོ ནཏྠི, ཙཀྐཝཏྟིསདིསོ པོརིསོ ནཏྠཱིཏི ཡོཛནཱ། ཨིདཾ ‘‘པཐཝཱིསམོ’’ཏིཨཱདིཀཾ ཝཙནཾ པརསྶ དེཝསྶ ཝཙནབྷཱཝཏོ པརཝཙནཾ ཧོཏི།

    Pathavīsamo vitthato sambodho nāma natthi. Pātaṃ vuṭṭhaṃ udakaṃ ābhuso lābhi gaṇhātīti pātālo, pātālena samo pātālasamo ninno na vijjati. Merusamo unnato natthi, cakkavattisadiso poriso natthīti yojanā. Idaṃ ‘‘pathavīsamo’’tiādikaṃ vacanaṃ parassa devassa vacanabhāvato paravacanaṃ hoti.

    ‘‘དེཝཱནཾ ཨིནྡ, ཏཝ སུབྷཱསིཏེན ཛཡོ ཧོཏཱི’’ཏི ཝཏྭཱ ‘‘ཝེཔཙིཏྟི, ཏཝ སུབྷཱསིཏེན ཛཡོ ཧོཏཱུ’’ཏི ཝཏྭཱ ‘‘ཝེཔཙིཏྟི, ཏྭཾ གཱཐཾ བྷཎ བྷཎཱཧཱི’’ཏི ཨཝོཙ། བྷིཀྑཝེ, ཨཐ ཁོ ཨསུརིནྡོ ཝེཔཙིཏྟི ཨིམཾ ཝུཙྩམཱནཾ གཱཐཾ ཨབྷཱསི ‘‘ཏེ པཊིསེདྷཀོ ནོ ཙེ ཨསྶ ནོ ཙེ བྷཝེཡྻ , ཨེཝཾ སཏི བཱལཱ བྷིཡྻོ པཀུཛ྄ཛྷེཡྻུཾ, ཏསྨཱ དྷཱིརོ པཎྜིཏོ བྷུསེན དཎྜེན བཱལཾ ནིསེདྷཡེ’’ཏི།

    ‘‘Devānaṃ inda, tava subhāsitena jayo hotī’’ti vatvā ‘‘vepacitti, tava subhāsitena jayo hotū’’ti vatvā ‘‘vepacitti, tvaṃ gāthaṃ bhaṇa bhaṇāhī’’ti avoca. Bhikkhave, atha kho asurindo vepacitti imaṃ vuccamānaṃ gāthaṃ abhāsi ‘‘te paṭisedhako no ce assa no ce bhaveyya , evaṃ sati bālā bhiyyo pakujjheyyuṃ, tasmā dhīro paṇḍito bhusena daṇḍena bālaṃ nisedhaye’’ti.

    གཱཐཱཡ, བྷིཀྑཝེ, ཨསུརིནྡེན ཝེཔཙིཏྟིནཱ བྷཱསིཏཱཡ ཨསུརཱ ཨནུམོདིཾསུ, དེཝཱ ཏུཎྷཱི ཨཧེསུཾ། བྷིཀྑཝེ, ཨཐ ཁོ ཨསུརིནྡོ ཝེཔཙིཏྟི དེཝཱནཾ ཨིནྡཾ སཀྐཾ ཨེཏཾ ཝཙནཾ ཨཝོཙ ‘‘དེཝཱནམིནྡ, ཏྭཾ གཱཐཾ བྷཎ བྷཎཱཧཱི’’ཏི ཨེཏཾ ཝཙནཾ ཨཝོཙ། བྷིཀྑཝེ, ཨཐ ཁོ དེཝཱནམིནྡོ སཀྐོ ཨིམཾ གཱཐཾ ཨབྷཱསི ‘‘བཱལསྶ པཊིསེདྷནཾ པརཾ པཙྩཏྠིཀཾ སངྐུཔིཏཾ ཉཏྭཱ སཏོ སཏིམཱ ཡོ པཎྜིཏོ ཀོདྷཏོ ཨུཔསམྨཏི, ཏསྶ པཎྜིཏསྶ ཨེཏདེཝ ཨུཔསམཾ ཝརནྟི ཨཧཾ མཉྙེ’’ཏི།

    Gāthāya, bhikkhave, asurindena vepacittinā bhāsitāya asurā anumodiṃsu, devā tuṇhī ahesuṃ. Bhikkhave, atha kho asurindo vepacitti devānaṃ indaṃ sakkaṃ etaṃ vacanaṃ avoca ‘‘devānaminda, tvaṃ gāthaṃ bhaṇa bhaṇāhī’’ti etaṃ vacanaṃ avoca. Bhikkhave, atha kho devānamindo sakko imaṃ gāthaṃ abhāsi ‘‘bālassa paṭisedhanaṃ paraṃ paccatthikaṃ saṅkupitaṃ ñatvā sato satimā yo paṇḍito kodhato upasammati, tassa paṇḍitassa etadeva upasamaṃ varanti ahaṃ maññe’’ti.

    གཱཐཱཡ, བྷིཀྑཝེ, དེཝཱནམིནྡེན སཀྐེན བྷཱསིཏཱཡ དེཝཱ ཨནུམོདིཾསུ, ཨསུརཱ ཏུཎྷཱི ཨཧེསུཾ། བྷིཀྑཝེ, ཨཐ ཁོ དེཝཱནམིནྡོ སཀྐོ ཨསུརིནྡཾ ཝེཔཙིཏྟིཾ ཨེཏཾ ཝཙནཾ ཨཝོཙ ‘‘ཝེཔཙིཏྟི, ཏྭཾ གཱཐཾ བྷཎཱཧཱི’’ཏི ཨེཏཾ ཝཙནཾ ཨཝོཙ། བྷིཀྑཝེ, ཨཐ ཁོ ཨསུརིནྡོ ཝེཔཙིཏྟི ཨིམཾ གཱཐཾ ཨབྷཱསི ‘‘ཝཱསཝ ཡདཱ ཏིཏིཀྑཏི, ཏདཱ ནཾ ཏིཏིཀྑནྟཾ པུགྒལཾ བཱལོ ‘‘ཨཡཾ མེ བྷཡཱ ཏིཏིཀྑཏཱི’’ཏི མཉྙཏི, ཏིཏིཀྑཱཡ ཨེཏདེཝ ཝཛྫཾ ཨཧཾ པསྶཱམི། ཝཱསཝ གོགཎོ པལཱཡིནཾ གཝཾ ཨཛ྄ཛྷོཏྠརཏི ཨིཝ, ཨེཝཾ དུམྨེདྷོ ཁམནྟཾ བྷིཡྻོ ཨཛ྄ཛྷཱརུཧཏི ཨཛ྄ཛྷོཏྠརཏི།

    Gāthāya, bhikkhave, devānamindena sakkena bhāsitāya devā anumodiṃsu, asurā tuṇhī ahesuṃ. Bhikkhave, atha kho devānamindo sakko asurindaṃ vepacittiṃ etaṃ vacanaṃ avoca ‘‘vepacitti, tvaṃ gāthaṃ bhaṇāhī’’ti etaṃ vacanaṃ avoca. Bhikkhave, atha kho asurindo vepacitti imaṃ gāthaṃ abhāsi ‘‘vāsava yadā titikkhati, tadā naṃ titikkhantaṃ puggalaṃ bālo ‘‘ayaṃ me bhayā titikkhatī’’ti maññati, titikkhāya etadeva vajjaṃ ahaṃ passāmi. Vāsava gogaṇo palāyinaṃ gavaṃ ajjhottharati iva, evaṃ dummedho khamantaṃ bhiyyo ajjhāruhati ajjhottharati.

    གཱཐཱཡ, བྷིཀྑཝེ, ཨསུརིནྡེན ཝེཔཙིཏྟིནཱ བྷཱསིཏཱཡ ཨསུརཱ ཨནུམོདིཾསུ, དེཝཱ ཏུཎྷཱི ཨཧེསུཾ། ཛཱཡམཱནེ ཙ གོཡུདྡྷེ པཋམཾ དྭེཡེཝ གོཎཱ ཡུཛ྄ཛྷནྟི, གོགཎོ པན ཡཱཝ ཨེཀོ གོཎོ ན པལཱཡཏི, ཏཱཝ ཨོལོཀེནྟོཝ ཏིཊྛཏི། ཡདཱ ཙ ཨེཀོ གོཎོ པལཱཡཏི , ཏདཱ སབྦོ གོཎོ ཏཾ པལཱཡིནཾ གཝཾ བྷིཡྻོ ཨཛ྄ཛྷོཏྠརཏཱིཏི གོཡུདྡྷསབྷཱཝོ ཝེདིཏབྦོ། ‘‘ཨཐ ཁོ’’ཏིཨཱདཱིནཾ ཡོཛནཏྠོ པཱཀཊོ།

    Gāthāya, bhikkhave, asurindena vepacittinā bhāsitāya asurā anumodiṃsu, devā tuṇhī ahesuṃ. Jāyamāne ca goyuddhe paṭhamaṃ dveyeva goṇā yujjhanti, gogaṇo pana yāva eko goṇo na palāyati, tāva olokentova tiṭṭhati. Yadā ca eko goṇo palāyati , tadā sabbo goṇo taṃ palāyinaṃ gavaṃ bhiyyo ajjhottharatīti goyuddhasabhāvo veditabbo. ‘‘Atha kho’’tiādīnaṃ yojanattho pākaṭo.

    ཝེཔཙིཏྟི, ཡོ པུགྒལོ ཏིཏིཀྑཏི, ཏཾ ཁམནྟཾ པུགྒལཾ ‘‘ཨཡཾ མེ བྷཡཱ ཏིཏིཀྑཏཱི’’ཏི ཀཱམཾ མཉྙཏུ ཝཱ, མཱ མཉྙཏུ ཝཱ, ཏཾ མཉྙནཾ ནིཔྥལམེཝ། ཨཏྠཱ སདཏྠཔརམཱ བྷཝནྟི། ཁནྟྱཱ ཁནྟིཏོ བྷིཡྻོ སདཏྠོ ནཱམ ན ཝིཛྫཏི།

    Vepacitti, yo puggalo titikkhati, taṃ khamantaṃ puggalaṃ ‘‘ayaṃ me bhayā titikkhatī’’ti kāmaṃ maññatu vā, mā maññatu vā, taṃ maññanaṃ nipphalameva. Atthā sadatthaparamā bhavanti. Khantyā khantito bhiyyo sadattho nāma na vijjati.

    ཡོ བལཝཱ སནྟོ དུབྦལསྶ ཧཝེ ཏིཏིཀྑཏཱིཏི ཏསྶ བལཝནྟསྶ ཏཾ ཏིཏིཀྑནཾ པརམཾ ཁནྟིནྟི སཔྤུརིསཱ ཨཱཧུ, དུབྦལོ ནིཙྩཾ ཁམཏི ཨེཝ།

    Yo balavā santo dubbalassa have titikkhatīti tassa balavantassa taṃ titikkhanaṃ paramaṃ khantinti sappurisā āhu, dubbalo niccaṃ khamati eva.

    ཡསྶ བཱལསྶ བཱལབལཾ ཨཏྠི, ཏསྶ བཱལསྶ བཱལབལཾ ‘‘ཨབལ’’ནྟི སཔྤུརིསཱ ཨཱཧུ, ཡསྶ དྷམྨགུཏྟསྶ ཡཾ བལཾ ཨཏྠི, ཏསྶ དྷམྨགུཏྟསྶ ཏསྶ བལསྶ པཊིཝཏྟཱ པཊིཔྥརིཏྭཱ ཝཏྟཱ ན ཝིཛྫཏི།

    Yassa bālassa bālabalaṃ atthi, tassa bālassa bālabalaṃ ‘‘abala’’nti sappurisā āhu, yassa dhammaguttassa yaṃ balaṃ atthi, tassa dhammaguttassa tassa balassa paṭivattā paṭippharitvā vattā na vijjati.

    ཝེཔཙིཏྟི, ཡོ པུགྒལོ ཀུདྡྷཾ པཋམཾ ཀུཛ྄ཛྷནྟསྶ པཊིཀུཛ྄ཛྷཏི, སོ པཊིཀུཛ྄ཛྷནྟོ པུགྒལོ ཏེན པཊིཀུཛ྄ཛྷནེན ཏསྶ པཋམཾ ཀུཛ྄ཛྷནྟསྶ པཱཔཔུགྒལསྶ པཱཔཔུགྒལཏོ པཱཔིཡོ ཨེཝ པཱཔཏརོ ཧཱིནཏརོ ཨེཝ བྷཝེ།

    Vepacitti, yo puggalo kuddhaṃ paṭhamaṃ kujjhantassa paṭikujjhati, so paṭikujjhanto puggalo tena paṭikujjhanena tassa paṭhamaṃ kujjhantassa pāpapuggalassa pāpapuggalato pāpiyo eva pāpataro hīnataro eva bhave.

    ཝེཔཙིཏྟི, ཡོ སཔྤུརིསོ སཏོ སཏིམཱ པརཾ སངྐུཔིཏཾ ཉཏྭཱ པཋམཾ ཀུཛ྄ཛྷནྟསྶ ཨཔྤཊིཀུཛ྄ཛྷནྟོཝ བྷཝེ, སོ སཔྤུརིསོ དུཛྫཡཾ སངྒཱམཾ ཛེཏི ནཱམ, ཨཏྟནོ ཙ པརསྶ ཙ ཨུབྷིནྣཾ ཨཏྠཾ ཙརཏི ནཱམ།

    Vepacitti, yo sappuriso sato satimā paraṃ saṅkupitaṃ ñatvā paṭhamaṃ kujjhantassa appaṭikujjhantova bhave, so sappuriso dujjayaṃ saṅgāmaṃ jeti nāma, attano ca parassa ca ubhinnaṃ atthaṃ carati nāma.

    ཨཏྟནོ ཙ པརསྶ ཙ ཏིཀིཙྪནྟཱནཾ ཨུབྷིནྣཾ ཀོདྷོ ཨུཔསམྨཏི, ཡེ ཛནཱ དྷམྨསྶ ཁནྟིདྷམྨསྶ ཨཏྠེ, ཙཏུསཙྩདྷམྨེ ཝཱ ཨཀོཝིདཱ བྷཝནྟི, ཏེ ཛནཱ ཁམནྟཾ སཔྤུརིསཾ ‘‘ཨཡཾ བཱལོ’’ཏི མཉྙནྟི, ཏེསཾ ཨཀོཝིདཱནཾ ཛནཱནཾ ཏཾ མཉྙནཾ ནིཔྥལནྟི།

    Attano ca parassa ca tikicchantānaṃ ubhinnaṃ kodho upasammati, ye janā dhammassa khantidhammassa atthe, catusaccadhamme vā akovidā bhavanti, te janā khamantaṃ sappurisaṃ ‘‘ayaṃ bālo’’ti maññanti, tesaṃ akovidānaṃ janānaṃ taṃ maññanaṃ nipphalanti.

    གཱཐཱསུ, བྷིཀྑཝེ, དེཝཱནམིནྡེན སཀྐེན བྷཱསིཏཱསུ དེཝཱ ཨནུམོདིཾསུ, ཨསུརཱ ཏུཎྷཱི ཨཧེསུནྟི ཡོཛནཱ། ཨིདཾ ‘‘བྷིཡྻོ བཱལཱ’’ཏིཨཱདིཀཾ ཝཙནཾ སཀྐཝེཔཙིཏྟཱིནཾ ཝཙནབྷཱཝཏོ པརཝཙནཾ ནཱམ། (༩)

    Gāthāsu, bhikkhave, devānamindena sakkena bhāsitāsu devā anumodiṃsu, asurā tuṇhī ahesunti yojanā. Idaṃ ‘‘bhiyyo bālā’’tiādikaṃ vacanaṃ sakkavepacittīnaṃ vacanabhāvato paravacanaṃ nāma. (9)

    ༡༡༧. པཏྟཾ ཨེཏརཧི ཨདྷིགཏཾ ཡཉྩ ཀཱམཱུཔཀརཎཾ, ཨཱཡཏིཾ པཏྟབྦཾ ཨདྷིགཏཾ ཡཉྩ ཀཱམཱུཔཀརཎཾ ཨཏྠི, ཨེཏཾ ཨུབྷཡཾ རཛཱནུཀིཎྞཾ རཱགརཛཱདིཀིཎྞཾ ཨིཏི ཨཱཏུརསྶ ཨཱཏུརཱནཾཡེཝ པུགྒལཱནཾ སནྟིཀེ ཨནུསིཀྑཏོ ཨནུསིཀྑནྟསྶ སིཀྑཱསཱརཱ ཧུཏྭཱ ཨུཔཊྛཧནྟི, སཱིལཾ ཝཏཾ ཛཱིཝིཏཾ བྲཧྨཙརིཡཾ ཨིམེ སིཀྑཱསཱརཱ ཧུཏྭཱ ཨུཔཊྛཧནྟཱིཏི ཡེ ཨུཔཊྛཱནསཱརཱ པུགྒལཱ སཱརཏོ གཧེཏྭཱ ཋིཏཱ། ཨེཏྠ སཱིལཾ ནཱམ ‘‘ན ཀརོམཱི’’ཏི ཨོརམཎཾ། ཝཏཾ ནཱམ བྷོཛནཀིཙྩཀརཎཱདི། ཛཱིཝིཏཾ ནཱམ ཨཱཛཱིཝོ། བྲཧྨཙརིཡཾ ནཱམ མེཐུནཝིརཏིཝིསེསབྷཱཝོ ཝེདིཏབྦོ། ཏེསཾ ཨུཔཊྛཱནསཱརཱནཾ པུགྒལཱནཾ ཨཡཾ ཝཱདོ ཨེཀོ པཋམོ ཨནྟོ ལཱམཀོ། ཡེ ཙ པུགྒལཱ ‘‘ཀཱམེསུ དོསོ ནཏྠཱི’’ཏི ཨེཝཾཝཱདིནོ ཨེཝཾདིཊྛིནོ ཧུཏྭཱ ཋིཏཱ, ཏེསཾ པུགྒལཱནཾ ཨཡཾ ཝཱདོ ཨེཀོ དུཏིཡོ ཨནྟོ ལཱམཀོ། ཨིཙྩེཏེ ཨུབྷོ ཨནྟཱ ཨནྟཝཱདཱ པུགྒལཱ ཀཊསིཝཌྜྷནཱ ཀཊསིཡོ དིཊྛིཾ ཝཌྜྷེནྟི། ཨེཏེ ཨུབྷོ ཨནྟེ ཨཏྟཀིལམཐཱནུཡོགེ ཀཱམསུཁལླིཀཱནུཡོགེ ཨེཀེ པུགྒལཱ ཨནབྷིཉྙཱཡ ཨོལཱིཡནྟི, ཨེཀེ པུགྒལཱ ཨཏིདྷཱཝནྟཱིཏི ཡོཛནཱ། ཨིདཾ ‘‘ཡཉྩ པཏྟ’’ནྟིཨཱདིཀཾ ཝཙནཾ པརེསཾ པུགྒལཱནཾ ཝཙནབྷཱཝཏོ པརཝཙནཾ ནཱམ།

    117.Pattaṃ etarahi adhigataṃ yañca kāmūpakaraṇaṃ, āyatiṃ pattabbaṃ adhigataṃ yañca kāmūpakaraṇaṃ atthi, etaṃ ubhayaṃ rajānukiṇṇaṃ rāgarajādikiṇṇaṃ iti āturassa āturānaṃyeva puggalānaṃ santike anusikkhato anusikkhantassa sikkhāsārā hutvā upaṭṭhahanti, sīlaṃ vataṃ jīvitaṃ brahmacariyaṃ ime sikkhāsārā hutvā upaṭṭhahantīti ye upaṭṭhānasārā puggalā sārato gahetvā ṭhitā. Ettha sīlaṃ nāma ‘‘na karomī’’ti oramaṇaṃ. Vataṃ nāma bhojanakiccakaraṇādi. Jīvitaṃ nāma ājīvo. Brahmacariyaṃ nāma methunavirativisesabhāvo veditabbo. Tesaṃ upaṭṭhānasārānaṃ puggalānaṃ ayaṃ vādo eko paṭhamo anto lāmako. Ye ca puggalā ‘‘kāmesu doso natthī’’ti evaṃvādino evaṃdiṭṭhino hutvā ṭhitā, tesaṃ puggalānaṃ ayaṃ vādo eko dutiyo anto lāmako. Iccete ubho antā antavādā puggalā kaṭasivaḍḍhanā kaṭasiyo diṭṭhiṃ vaḍḍhenti. Ete ubho ante attakilamathānuyoge kāmasukhallikānuyoge eke puggalā anabhiññāya olīyanti, eke puggalā atidhāvantīti yojanā. Idaṃ ‘‘yañca patta’’ntiādikaṃ vacanaṃ paresaṃ puggalānaṃ vacanabhāvato paravacanaṃ nāma.

    ཡེ ཙ སམྨཱདིཊྛིཔུགྒལཱ ཏེ ཨུབྷོ ཨནྟེ ཨཏྟཀིལམཐཱནུཡོགཀཱམསུཁལླིཀཱནུཡོགེ ཨབྷིཉྙཱཡ ཏཏྲ ཙ ཨནྟེ ན ཨཧེསུཾ། ཏེན ཙ ཨབྷིཛཱནནེན ཏེ ཨུབྷོ ཨནྟེ ན ཨམཉྙིཾསུ, ཏེསཾ སམྨཱདིཊྛིཔུགྒལཱནཾ ཝཊྚཾ ཏིཝིདྷཾ ཝཊྚཾ པཉྙཱཔནཱཡ ནཏྠི། ཨིཏི ཨེཝཾ ཨིདཾ ‘‘ཡེ ཙཱ’’ཏིཨཱདིཀཾ ཝཙནཾ བྷགཝཏོ ཝཙནབྷཱཝཏོ སཀཝཙནཾ ནཱམ། ཨཡཾ ཨུདཱནོ ‘‘ཡཉྩ པཏྟཾ…པེ॰… པཉྙཱཔནཱཡཱ’’ཏི ཨཡཾ ཨུདཱནོ ཝུཏྟནཡེན སཀཝཙནཉྩ པརཝཙནཉྩ ཧོཏི།

    Ye ca sammādiṭṭhipuggalā te ubho ante attakilamathānuyogakāmasukhallikānuyoge abhiññāya tatra ca ante na ahesuṃ. Tena ca abhijānanena te ubho ante na amaññiṃsu, tesaṃ sammādiṭṭhipuggalānaṃ vaṭṭaṃ tividhaṃ vaṭṭaṃ paññāpanāya natthi. Iti evaṃ idaṃ ‘‘ye cā’’tiādikaṃ vacanaṃ bhagavato vacanabhāvato sakavacanaṃ nāma. Ayaṃ udāno ‘‘yañca pattaṃ…pe… paññāpanāyā’’ti ayaṃ udāno vuttanayena sakavacanañca paravacanañca hoti.

    པསེནདི ནཱམ ཀོསལོ ཀོསལིསྶརོ རཱཛཱ བྷགཝནྟཾ ཨེཏཾ ‘‘ཨིདྷ མཡ྄ཧཾ…པེ॰… ཏེསཾ པིཡོ ཨཏྟཱ’’ཏི ཝཙནཾ ཨཝོཙ། བྷནྟེ, ཨིདྷ རཧོགཏསྶ པཊིསལླཱིནསྶ མཡ྄ཧཾ མམ ཙེཏསོ ཙིཏྟསྶ ཨེཝཾ པརིཝིཏཀྐོ ཨུདཔཱདི, ཀེསཾ སཏྟཱནཾ ཨཏྟཱ པིཡོ ནུ ཁོ, ཀེསཾ སཏྟཱནཾ ཨཏྟཱ ཨཔྤིཡོ ནུ ཁོ ཨིཏི ཨེཏཾ པརིཝིཏཀྐནཾ ཨུདཔཱདི། བྷནྟེ, ཏསྶ མཡ྄ཧཾ ཨེཏཾ པརིཝིཏཀྐནཾ ཨཧོསི, ཡེ ཙ ཀེཙི སཏྟཱ ཀཱཡེན དུཙྩརིཏཾ ཙརནྟི ཁོ…པེ॰… མནསཱ དུཙྩརིཏཾ ཙརནྟི ཁོ, ཏེསཾ སཏྟཱནཾ ཨཏྟཱ ཨཔྤིཡོ ཁོ། ཏེ དུཙྩརིཏཾ ཙརནྟཱ སཏྟཱ ‘‘ནོ ཨཏྟཱ པིཡོ’’ཏི ཨེཝཾ ཀིཉྩཱཔི ཝདེཡྻུཾ, ཨཐ ཁོ ཏེསཾ དུཙྩརིཏཾ ཙརནྟཱནཾ སཏྟཱནཾ ཨཏྟཱ ཨཔྤིཡོཝ། ཏཾ ཀིསྶ ཧེཏུ? ཨཔྤིཡོ ཨཔྤིཡསྶ ཨནཏྠཱཡ ཡཾ དུཙྩརིཏཾ ཀརེཡྻ, ཏཾ དུཙྩརིཏཾ ཏེ དུཙྩརིཏཾ ཙརནྟཱ སཏྟཱ ཨཏྟནཱཝ. སཡམེཝ། ཨཏྟནོ ཨནཏྠཱཡ ཧི ཡསྨཱ ཀརོནྟི, ཏསྨཱ ཏེསཾ དུཙྩརིཏཾ ཙརནྟཱནཾ སཏྟཱནཾ ཨཏྟཱ ཨཔྤིཡོཝཱཏི ཨེཏཾ པརིཝིཏཀྐནཾ ཨཧོསི།

    Pasenadi nāma kosalo kosalissaro rājā bhagavantaṃ etaṃ ‘‘idha mayhaṃ…pe… tesaṃ piyo attā’’ti vacanaṃ avoca. Bhante, idha rahogatassa paṭisallīnassa mayhaṃ mama cetaso cittassa evaṃ parivitakko udapādi, kesaṃ sattānaṃ attā piyo nu kho, kesaṃ sattānaṃ attā appiyo nu kho iti etaṃ parivitakkanaṃ udapādi. Bhante, tassa mayhaṃ etaṃ parivitakkanaṃ ahosi, ye ca keci sattā kāyena duccaritaṃ caranti kho…pe… manasā duccaritaṃ caranti kho, tesaṃ sattānaṃ attā appiyo kho. Te duccaritaṃ carantā sattā ‘‘no attā piyo’’ti evaṃ kiñcāpi vadeyyuṃ, atha kho tesaṃ duccaritaṃ carantānaṃ sattānaṃ attā appiyova. Taṃ kissa hetu? Appiyo appiyassa anatthāya yaṃ duccaritaṃ kareyya, taṃ duccaritaṃ te duccaritaṃ carantā sattā attanāva. sayameva. Attano anatthāya hi yasmā karonti, tasmā tesaṃ duccaritaṃ carantānaṃ sattānaṃ attā appiyovāti etaṃ parivitakkanaṃ ahosi.

    བྷནྟེ , ཡེ ཙ ཀེཙི སཏྟཱ ཀཱཡེན སུཙརིཏཾ ཙརནྟི ཁོ…པེ॰… མནསཱ སུཙརིཏཾ ཙརནྟི ཁོ, ཏེསཾ སུཙརིཏཾ ཙརནྟཱནཾ སཏྟཱནཾ ཨཏྟཱ པིཡོ ཁོ, ཏེ སུཙརིཏཾ ཙརནྟཱ སཏྟཱ ‘‘ནོ ཨཏྟཱ ཨཔྤིཡོ’’ཏི ཨེཝཾ ཀིཉྩཱཔི ཝདེཡྻུཾ, ཨཐ ཁོ ཏེསཾ སུཙརིཏཾ ཙརནྟཱནཾ སཏྟཱནཾ ཨཏྟཱ པིཡོཝ། ཏཾ ཀིསྶ ཧེཏུ? པིཡོ པིཡསྶ ཨཏྠཱཡ ཡཾ སུཙརིཏཾ ཙརེཡྻ, ཏཾ སུཙརིཏཾ ཏེ སུཙརིཏཾ ཙརནྟཱ སཏྟཱ ཨཏྟནཱཝ སཡམེཝ ཨཏྟནོ ཨཏྠཱཡ ཧི ཡསྨཱ ཀརོནྟི , ཏསྨཱ ཏེསཾ སུཙརིཏཾ ཙརནྟཱནཾ སཏྟཱནཾ ཨཏྟཱ པིཡོཝཱཏི ཨེཏཾ པརིཝིཏཀྐནཾ ཨཧོསི། ཨེཏཾ ཝཙནཾ ཨཝོཙཱཏི ཡོཛནཱ།

    Bhante , ye ca keci sattā kāyena sucaritaṃ caranti kho…pe… manasā sucaritaṃ caranti kho, tesaṃ sucaritaṃ carantānaṃ sattānaṃ attā piyo kho, te sucaritaṃ carantā sattā ‘‘no attā appiyo’’ti evaṃ kiñcāpi vadeyyuṃ, atha kho tesaṃ sucaritaṃ carantānaṃ sattānaṃ attā piyova. Taṃ kissa hetu? Piyo piyassa atthāya yaṃ sucaritaṃ careyya, taṃ sucaritaṃ te sucaritaṃ carantā sattā attanāva sayameva attano atthāya hi yasmā karonti , tasmā tesaṃ sucaritaṃ carantānaṃ sattānaṃ attā piyovāti etaṃ parivitakkanaṃ ahosi. Etaṃ vacanaṃ avocāti yojanā.

    ‘‘ཨེཝམེཏཾ མཧཱརཱཛཱ’’ཏི ཝཙནཾ པཋམཾ ཝཏྭཱ ‘‘ཡེ ཧི ཀེཙཱི’’ཏིཨཱདིཀེ བྷགཝཏོ ཝུཏྟཝཙནེཔི ཡོཛནཱ ཏཐེཝ ཀཱཏབྦཱ།

    ‘‘Evametaṃ mahārājā’’ti vacanaṃ paṭhamaṃ vatvā ‘‘ye hi kecī’’tiādike bhagavato vuttavacanepi yojanā tatheva kātabbā.

    གཱཐཱསུ པན ཡོ པཎྜིཏོ ཨཏྟཱནཾ ‘‘པིཡ’’ནྟི ཙེ ཛཉྙཱ, ཨེཝཾ སཏི སོ པཎྜིཏོ ནཾ ཨཏྟཱནཾ པཱཔེན ཀམྨེན ན སཾཡུཛེ ན སཾཡོཛེཡྻ, ཏཾ ཝཙནཾ ཧི སཙྩཾ པིཡཾ ཨཏྟཱནཾ སུལབྷཾ ན ཧོཏི, དུཀྐཊཀཱརིནཱ སུཁཾ སུལབྷཾ ན ཧོཏི།

    Gāthāsu pana yo paṇḍito attānaṃ ‘‘piya’’nti ce jaññā, evaṃ sati so paṇḍito naṃ attānaṃ pāpena kammena na saṃyuje na saṃyojeyya, taṃ vacanaṃ hi saccaṃ piyaṃ attānaṃ sulabhaṃ na hoti, dukkaṭakārinā sukhaṃ sulabhaṃ na hoti.

    ཨནྟཀེན མཙྩུནཱ ཨདྷིཔནྣསྶ མཱནུསཾ བྷཝཾ ཛཧཏོ པཛཧནྟསྶ ཏསྶ མརཎམུཁེ ཋིཏསྶ སཏྟསྶ ཀིཾ སཀཾ ཧོཏི, མརཎམུཁེ ཋིཏོ སོ སཏྟོ ཀིཉྩ ཨཱདཱཡ པརལོཀཾ གཙྪཏི, ཚཱཡཱ གཙྪནྟཾ སཏྟཾ ཨནཔཱཡིནཱི ཨིཝ, ཨེཝཾ ཨསྶ པརལོཀགཏསྶ སཏྟསྶ ཀིཉྩ ཨནུགཾ ཧོཏི།

    Antakena maccunā adhipannassa mānusaṃ bhavaṃ jahato pajahantassa tassa maraṇamukhe ṭhitassa sattassa kiṃ sakaṃ hoti, maraṇamukhe ṭhito so satto kiñca ādāya paralokaṃ gacchati, chāyā gacchantaṃ sattaṃ anapāyinī iva, evaṃ assa paralokagatassa sattassa kiñca anugaṃ hoti.

    ཨིཏི བྷགཝཱ ཨེཝཾ པུཙྪཏི, པུཙྪིཏྭཱ ‘‘ཨུབྷོ’’ཏིཨཱདིཝིསྶཛྫནཝཙནཉྩ ཨཱཧ། ཨིདྷ ལོཀེ ཡོ མཙྩོ ཡཾ པུཉྙཉྩ ཡཾ པཱཔཉྩ ཨུབྷོ ཀམྨེ ཀུརུཏེ ཀརོཏི, ཏསྶ པརལོཀགཏསྶ མཙྩསྶ ཏཾ པུཉྙཔཱཔདྭཡཾ སཀཾ ཧོཏི། པརལོཀཾ གཏོ མཙྩོ ཏཾཝ པུཉྙཔཱཔདྭཡཾ ཨཱདཱཡ པརལོཀཾ གཙྪཏི, ཚཱཡཱ གཙྪནྟཾ སཏྟཾ ཨནཔཱཡིནཱི ཨིཝ, ཨེཝཾ ཨསྶ པརལོཀགཏསྶ མཙྩསྶ ཏཾཝ པུཉྙཔཱཔདྭཡཾ ཨནུགཾ ཧོཏི།

    Iti bhagavā evaṃ pucchati, pucchitvā ‘‘ubho’’tiādivissajjanavacanañca āha. Idha loke yo macco yaṃ puññañca yaṃ pāpañca ubho kamme kurute karoti, tassa paralokagatassa maccassa taṃ puññapāpadvayaṃ sakaṃ hoti. Paralokaṃ gato macco taṃva puññapāpadvayaṃ ādāya paralokaṃ gacchati, chāyā gacchantaṃ sattaṃ anapāyinī iva, evaṃ assa paralokagatassa maccassa taṃva puññapāpadvayaṃ anugaṃ hoti.

    ཏསྨཱ པཎྜིཏོ སམྤརཱཡིཀཾ སམྤརཱཡེ ཕལནིབྦཏྟཱཔཀཾ ཀལྱཱཎཾ ནིཙཡཾ ནིཙཡནྟོ ཧུཏྭཱ ཀརེཡྻ། པཱཎིནཾ པརལོཀསྨིཾ པུཉྙཱནི པཏིཊྛཱ ཧོནྟི, ཨིཏི བྷགཝཱ ཨཱཧཱཏི ཡོཛནཱ ཀཱཏབྦཱ། ཨིདཾ ‘‘རཱཛཱ པསེནདཱི’’ཏིཨཱདིཀཾ སུཏྟཾ ཀོསལརཉྙོ ཝཙནབྷཱཝཏོ པརཝཙནཾ ཧོཏི། ‘‘ཨེཝམེཏཾ , མཧཱརཱཛ, ཨེཝམེཏཾ མཧཱརཱཛཱ’’ཏིཨཱདིཀཱ ཨནུགཱིཏི བྷགཝཏོ ཝཙནབྷཱཝཏོ སཀཝཙནཾ ཧོཏི། ཨིདཾ དྭཡཾ ཝཙནཾ སཀཝཙནཉྩ པརཝཙནཉྩ ཧོཏི། (༡༠)

    Tasmā paṇḍito samparāyikaṃ samparāye phalanibbattāpakaṃ kalyāṇaṃ nicayaṃ nicayanto hutvā kareyya. Pāṇinaṃ paralokasmiṃ puññāni patiṭṭhā honti, iti bhagavā āhāti yojanā kātabbā. Idaṃ ‘‘rājā pasenadī’’tiādikaṃ suttaṃ kosalarañño vacanabhāvato paravacanaṃ hoti. ‘‘Evametaṃ , mahārāja, evametaṃ mahārājā’’tiādikā anugīti bhagavato vacanabhāvato sakavacanaṃ hoti. Idaṃ dvayaṃ vacanaṃ sakavacanañca paravacanañca hoti. (10)

    ༡༡༨. པཉྷེ པུཙྪིཏེ ཨིདཾ དུཀྑསཙྩཾ ཨབྷིཉྙེཡྻཾ, ཨིདཾ སམུདཡསཙྩཾ པཧཱཏབྦཾ, ཨིདཾ མགྒསཙྩཾ བྷཱཝེཏབྦཾ, ཨིདཾ ནིརོདྷསཙྩཾ, ཕལཾ ཝཱ སཙྪིཀཱཏབྦཾ, ཨིམེ ཀུསལཱཀུསལཱ དྷམྨཱ ཨེཝཾ ཀུསལཱཀུསལབྷཱཝེན གཧིཏཱ ཨནཝཛྫསཱཝཛྫབྷཱཝེན ཝཱ གཧིཏཱ སུཁཝིཔཱཀདུཀྑཝིཔཱཀབྷཱཝེན ཝཱ གཧིཏཱ , ཨིདཾ ཨིཊྛཝིཔཱཀཾ ཨིདཾ ཨནིཊྛཝིཔཱཀཾ ཕལཾ ནིབྦཏྟཡཨིཏི ཨེཝཾགཧིཏཱནཾ ཏེསཾ ཀུསལཱཀུསལདྷམྨཱནཾ ཨཡཾ ཝུཌྜྷི ཨཏྠོ, ཨཡཾ ཧཱནི ཨཏྠོཏི། ཨིཏི ཨིདཾ ‘‘པཉྷེ པུཙྪིཏེ’’ཏིཨཱདིཀཾ སུཏྟཾ ཝིསྶཛྫནཱིཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ཝིསྶཛྫནཱིཡཾ ནཱམ།

    118. Pañhe pucchite idaṃ dukkhasaccaṃ abhiññeyyaṃ, idaṃ samudayasaccaṃ pahātabbaṃ, idaṃ maggasaccaṃ bhāvetabbaṃ, idaṃ nirodhasaccaṃ, phalaṃ vā sacchikātabbaṃ, ime kusalākusalā dhammā evaṃ kusalākusalabhāvena gahitā anavajjasāvajjabhāvena vā gahitā sukhavipākadukkhavipākabhāvena vā gahitā, idaṃ iṭṭhavipākaṃ idaṃ aniṭṭhavipākaṃ phalaṃ nibbattayaiti evaṃgahitānaṃ tesaṃ kusalākusaladhammānaṃ ayaṃ vuḍḍhi attho, ayaṃ hāni atthoti. Iti idaṃ ‘‘pañhe pucchite’’tiādikaṃ suttaṃ vissajjanīye atthe vācakañāpakabhāvena pavattanato vissajjanīyaṃ nāma.

    ‘‘ཨུལཱ༹རོ བུདྡྷོ བྷགཝཱ’’ཏི ཨིམིནཱ པདེན བུདྡྷཨུལཱ༹རཏཾ ཨེཀཾསེནེཝ ཨེཀཀོཊྛཱསེནེཝ ནིདྡིསེ། ‘‘སྭཱཀྑཱཏོ དྷམྨོ’’ཏི ཨིམིནཱ པདེན དྷམྨསྭཱཀྑཱཏཏཾ ཨེཀཾསེནེཝ ཨེཀཀོཊྛཱསེནེཝ ནིདྡིསེ། ‘‘སུཔྤཊིཔནྣོ སངྒྷོ’’ཏི ཨིམིནཱ པདེན སངྒྷསུཔྤཊིཔཏྟིཾ ཨེཀཾསེནེཝ ཨེཀཀོཊྛཱསེནེཝ ནིདྡིསེ ‘‘སབྦེ སངྑཱརཱ ཨནིཙྩཱ’’ཏི ཨིམིནཱ པདེན སངྑཱརཱནིཙྩཏཾ ཨེཀཾསེནེཝ ནིདྡིསེ། ‘‘སབྦེ སངྑཱརཱ དུཀྑཱ’’ཏི ཨིམིནཱ པདེན སངྑཱརདུཀྑཏཾ ཨེཀཾསེནེཝ ནིདྡིསེ། ‘‘སབྦེ དྷམྨཱ ཨནཏྟཱ’’ཏི ཨིམིནཱ པདེན དྷམྨཱནཏྟཏཾ ཨེཀཾསེནེཝ ནིདྡིསེ། ‘‘སབྦེ སངྑཱརཱ ཨནཏྟཱ’’ཏི ཨཝཏྭཱ ‘‘སབྦེ དྷམྨཱ ཨནཏྟཱ’’ཏི ཝུཏྟེན ཨིམིནཱ པདེན སངྑཱརེཧི ཨཉྙཾ ཡཾ ཝཱ པན མགྒཕལནིརོདྷསམཱཔཏྟིདྷམྨཛཱཏཾ ཨཏྠི, ཏཾ མགྒཕལནིརོདྷསམཱཔཏྟིདྷམྨཛཱཏམྤི ཨེཝཾཛཱཏིཡཾ ཨེཝཾ ཨེཀཾསབྱཱཀརཎཱིཡནྟི མགྒཕལནིརོདྷསམཱཔཏྟིདྷམྨཛཱཏསྶཱཔི ཨནཏྟཏཾ ཨེཀཾསེནེཝ ནིདྡིསེཏི ཡོཛནཱ། ཨིདཾ ‘‘ཨུལཱ༹རོ’’ཏིཨཱདིཀཾ སུཏྟཾ ཝིསྶཛྫནཱིཡེ བུདྡྷཨུལཱ༹རཏཱདིཀེ ཝཱཙཀཉཱཔཀབྷཱཝེན པཝཏྟནཏོ ཝིསྶཛྫནཱིཡཾ ནཱམ།

    ‘‘Uḷāro buddho bhagavā’’ti iminā padena buddhauḷārataṃ ekaṃseneva ekakoṭṭhāseneva niddise. ‘‘Svākkhāto dhammo’’ti iminā padena dhammasvākkhātataṃ ekaṃseneva ekakoṭṭhāseneva niddise. ‘‘Suppaṭipanno saṅgho’’ti iminā padena saṅghasuppaṭipattiṃ ekaṃseneva ekakoṭṭhāseneva niddise ‘‘sabbe saṅkhārā aniccā’’ti iminā padena saṅkhārāniccataṃ ekaṃseneva niddise. ‘‘Sabbe saṅkhārā dukkhā’’ti iminā padena saṅkhāradukkhataṃ ekaṃseneva niddise. ‘‘Sabbe dhammā anattā’’ti iminā padena dhammānattataṃ ekaṃseneva niddise. ‘‘Sabbe saṅkhārā anattā’’ti avatvā ‘‘sabbe dhammā anattā’’ti vuttena iminā padena saṅkhārehi aññaṃ yaṃ vā pana maggaphalanirodhasamāpattidhammajātaṃ atthi, taṃ maggaphalanirodhasamāpattidhammajātampi evaṃjātiyaṃ evaṃ ekaṃsabyākaraṇīyanti maggaphalanirodhasamāpattidhammajātassāpi anattataṃ ekaṃseneva niddiseti yojanā. Idaṃ ‘‘uḷāro’’tiādikaṃ suttaṃ vissajjanīye buddhauḷāratādike vācakañāpakabhāvena pavattanato vissajjanīyaṃ nāma.

    ནརདམྨསཱརཐི ཨཱཀངྑཏོ ཏེ བྷགཝཏོ མནསཱ སབྦཉྙུཏཉྙཱཎསཧིཏཱདིམནསཱ ཝིཙིནྟིཏཾ ཉེཡྻདྷམྨཾ དེཝཱ མནུསྶཱ སབྦེ པཱཎིནོ ན ཛཉྙཱ ན ཛཱནེཡྻུཾ། སནྟཾ ཨརཎཾ སམཱདྷིཾ ནིསེཝཏོ ཏེ བྷགཝཏོ མནསཱ ཝིཙིནྟིཏཱ ཀསིཎཱཔི སབྦེ པཱཎིནོ ན ཛཉྙཱ ན ཛཱནེཡྻུཾ། ཀསིཎཱཔི ཝཱ ཀསིཎཱརམྨཎཱཡ པཉྙཱཡཔི ན ཛཉྙཱ ན ཛཱནེཡྻུཾ། ཀསིཎཱཔཱིཏི ཨེཏྠ ཙ ‘‘ཀསིཎཱཡཔཱི’’ཏི ཝཏྟབྦེཔི ཡ-ཀཱར ལོཔཝསེན ‘‘ཀསིཎཱཔཱི’’ཏི ཝུཏྟཾ། ཨཐ ཝཱ ‘‘ཡཾ ཨཱཀངྑཏི ཡཾ ཨཱཀངྑནཾ ཀརོཏི, ཏཾ ཨཱཀངྑནཾ ཀིཾ ཀཏམ’’ནྟི པུཙྪིཏཾ པཉྷཾ ཨཉྙེསཾ ཨཝིསཡཏྟཱ ཨཝིསྶཛྫནཱིཡཾ ཧོཏཱིཏི ཡོཛནཱ། ཨིདཾ ‘‘ཨཱཀངྑཏོ’’ཏིཨཱདིཀཾ སུཏྟཾ ཨཝིསྶཛྫནཱིཡེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཨཝིསྶཛྫནཱིཡཾ ནཱམ།

    Naradammasārathi ākaṅkhato te bhagavato manasā sabbaññutaññāṇasahitādimanasā vicintitaṃ ñeyyadhammaṃ devā manussā sabbe pāṇino na jaññā na jāneyyuṃ. Santaṃ araṇaṃ samādhiṃ nisevato te bhagavato manasā vicintitā kasiṇāpi sabbe pāṇino na jaññā na jāneyyuṃ. Kasiṇāpi vā kasiṇārammaṇāya paññāyapi na jaññā na jāneyyuṃ. Kasiṇāpīti ettha ca ‘‘kasiṇāyapī’’ti vattabbepi ya-kāra lopavasena ‘‘kasiṇāpī’’ti vuttaṃ. Atha vā ‘‘yaṃ ākaṅkhati yaṃ ākaṅkhanaṃ karoti, taṃ ākaṅkhanaṃ kiṃ katama’’nti pucchitaṃ pañhaṃ aññesaṃ avisayattā avissajjanīyaṃ hotīti yojanā. Idaṃ ‘‘ākaṅkhato’’tiādikaṃ suttaṃ avissajjanīye visaye vācakañāpakabhāvena pavattanato avissajjanīyaṃ nāma.

    བྷགཝཱ སཱིལཀྑནྡྷེ སཱིལཀྑནྡྷཧེཏུ ཨེཏྟཀོ ཨེཏཔརིམཱཎོ, བྷགཝཱ སམཱདྷིཀྑནྡྷེ སམཱདྷིཀྑནྡྷཧེཏུ ཨེཏྟཀོ ཨེཏཔརིམཱཎོ, བྷགཝཱ པཉྙཱཀྑནྡྷེ པཉྙཱཀྑནྡྷཧེཏུ ཨེཏྟཀོ ཨེཏཔརིམཱཎོ, བྷགཝཱ ཝིམུཏྟིཀྑནྡྷེ ཝིམུཏྟིཀྑནྡྷཧེཏུ ཨེཏྟཀོ ཨེཏཔརིམཱཎོ, བྷགཝཱ ཝིམུཏྟིཉཱཎདསྶནཀྑནྡྷེ ཝིམུཏྟིཉཱཎདསྶནཀྑནྡྷཧེཏུ ཨེཏྟཀོ ཨེཏཔརིམཱཎོ, བྷགཝཱ ཨིརིཡཱཡཾ ཀཱཡཝཙཱིསམཱཙཱརེ ཀཱཡཝཙཱིསམཱཙཱརཧེཏུ ཨེཏྟཀོ ཨེཏཔརིམཱཎོ, བྷགཝཱ པབྷཱཝེ ཨཱནུབྷཱཝཧེཏུ ཨེཏྟཀོ ཨེཏཔརིམཱཎོ, བྷགཝཱ ཧིཏེསིཏཱཡཾ མེཏྟཱཧེཏུ ཨེཏྟཀོ ཨེཏཔརིམཱཎོ, བྷགཝཱ ཀརུཎཱཡཾ ཀརུཎཱཧེཏུ ཨེཏྟཀོ ཨེཏཔརིམཱཎོ, བྷགཝཱ ཨིདྡྷིཡཾ ཨིདྡྷིཝིདྷཧེཏུ ཨེཏྟཀོ ཨེཏཔརིམཱཎོཏི ཨཝིསྶཛྫནཱིཡོཏི ཡོཛནཱ། ཨིདཾ ‘‘ཨེཏྟཀོ’’ཏིཨཱདིཀཾ སུཏྟཾ ཨཝིསྶཛྫནཱིཡེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཨཝིསྶཛྫནཱིཡཾ ནཱམ།

    Bhagavā sīlakkhandhe sīlakkhandhahetu ettako etaparimāṇo, bhagavā samādhikkhandhe samādhikkhandhahetu ettako etaparimāṇo, bhagavā paññākkhandhe paññākkhandhahetu ettako etaparimāṇo, bhagavā vimuttikkhandhe vimuttikkhandhahetu ettako etaparimāṇo, bhagavā vimuttiñāṇadassanakkhandhe vimuttiñāṇadassanakkhandhahetu ettako etaparimāṇo, bhagavā iriyāyaṃ kāyavacīsamācāre kāyavacīsamācārahetu ettako etaparimāṇo, bhagavā pabhāve ānubhāvahetu ettako etaparimāṇo, bhagavā hitesitāyaṃ mettāhetu ettako etaparimāṇo, bhagavā karuṇāyaṃ karuṇāhetu ettako etaparimāṇo, bhagavā iddhiyaṃ iddhividhahetu ettako etaparimāṇoti avissajjanīyoti yojanā. Idaṃ ‘‘ettako’’tiādikaṃ suttaṃ avissajjanīye visaye vācakañāpakabhāvena pavattanato avissajjanīyaṃ nāma.

    བྷིཀྑཝེ, ཨརཧཏོ སམྨཱསམྦུདྡྷསྶ ཏཐཱགཏསྶ ལོཀེ ཨུཔྤཱདཱ ཨུཔྤཱདཧེཏུ ཏིཎྞཾ རཏནཱནཾ ཨུཔྤཱདོ སམྦྷཝཏི, ཨཱཡཏིཾ བུདྡྷརཏནསྶ ཨུཔྤཱདོ སམྦྷཝཏི, ཨེཀསྶ བུདྡྷརཏནསྶ དྷརམཱནཀྑཎེན ཧི ཨཉྙསྶ བུདྡྷརཏནསྶ ཨནུཔྤཛྫནཏོ ཨཱཡཏིནྟི ཝུཏྟཾ, དྷམྨརཏནསྶ ཨུཔྤཱདོ སམྦྷཝཏི, སངྒྷརཏནསྶ ཨུཔྤཱདོ སམྦྷཝཏཱིཏི ཏཱིཎི རཏནཱནི། ‘‘ཏཱནི ཏཱིཎི རཏནཱནི གུཎཏོ ཀིཾཔམཱཎཱནཱི’’ཏི པུཙྪིཏེ སཏི ཏཱནི ཏཱིཎི རཏནཱནི གུཎཏོ ཨེཏཔརིམཱཎཱནཱིཏི ན ཝིསྶཛྫིཏབྦཱནཱིཏི ཡོཛནཱ། ཨིདཾ ‘‘ཏཐཱགཏསྶཱ’’ཏིཨཱདིཀཾ སུཏྟཾ ཨཝིསྶཛྫནཱིཡེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཨཝིསྶཛྫནཱིཡཾ ནཱམ།

    Bhikkhave, arahato sammāsambuddhassa tathāgatassa loke uppādā uppādahetu tiṇṇaṃ ratanānaṃ uppādo sambhavati, āyatiṃ buddharatanassa uppādo sambhavati, ekassa buddharatanassa dharamānakkhaṇena hi aññassa buddharatanassa anuppajjanato āyatinti vuttaṃ, dhammaratanassa uppādo sambhavati, saṅgharatanassa uppādo sambhavatīti tīṇi ratanāni. ‘‘Tāni tīṇi ratanāni guṇato kiṃpamāṇānī’’ti pucchite sati tāni tīṇi ratanāni guṇato etaparimāṇānīti na vissajjitabbānīti yojanā. Idaṃ ‘‘tathāgatassā’’tiādikaṃ suttaṃ avissajjanīye visaye vācakañāpakabhāvena pavattanato avissajjanīyaṃ nāma.

    བུདྡྷཝིསཡོ པུགྒལཔརོ པུགྒལཔདྷཱནོ པཉྷོ ཨཝིསྶཛྫནཱིཡོ, བུདྡྷཝིསཡཱཝ པུགྒལཔརོཔརཉྙུཏཱ ཨཝིསྶཛྫནཱིཡཱ། བྷིཀྑཝེ, ཨཝིཛྫཱནཱིཝརཎཱནཾ སཏྟཱནཾ པུབྦཱ ཀོཊི ན པཉྙཱཡཏི ཏཎྷཱསཾཡོཛནཱནཾ, སཀིཾ ནིརཡཾ སནྡྷཱཝཏཾ སཾསརཏཾ སཏྟཱནཾ, སཀིཾ ཏིརཙྪཱནཡོནིཾ སནྡྷཱཝཏཾ སཾསརཏཾ སཏྟཱནཾ, སཀིཾ པེཏྟིཝིསཡཾ སནྡྷཱཝཏཾ སཾསརཏཾ སཏྟཱནཾ, སཀིཾ ཨསུརཡོནིཾ སནྡྷཱཝཏཾ སཾསརཏཾ སཏྟཱནཾ, སཀིཾ དེཝེ སནྡྷཱཝཏཾ སཾསརཏཾ སཏྟཱནཾ, སཀིཾ མནུསྶེ སནྡྷཱཝཏཾ སཾསརཏཾ སཏྟཱནཾ པུབྦཱ ཀོཊི ན པཉྙཱཡཏི ན དིསྶཏི ན ཨུཔལབྦྷཏཱིཏི། ‘‘སཱ པུབྦཱ ཀོཊི ཀཏམཱ’’ཏི ཀེནཙི ཀཏཾ པུཙྪནཾ ཨཝིསྶཛྫནཱིཡཾ སཾསཱརསྶ པུབྦཀོཊིཡཱ ཨབྷཱཝཏོ ཨཝིསྶཛྫནཱིཡཾ ཧོཏི། ‘‘ན པཉྙཱཡཏཱི’’ཏི དེསནཱ སཱཝཀཱནཾ ཉཱཎཝེཀལླེན ཀཏཱ, ན ཨཏྟནོ ཉཱཎཝེཀལླེན། ‘‘ན པཉྙཱཡཏཱི’’ཏི དེསནཱ ཨཏྟནོ ཙེཝ སཱཝཀཱནཉྩ ཉཱཎཝེཀལླེན ཀཱཏབྦཱ སིཡཱཏི ཙོདནཾ མནསི ཀཏྭཱ ‘‘དུཝིདྷཱ བུདྡྷཱནཾ བྷགཝནྟཱནཾ དེསནཱ’’ཏིཨཱདི ཝུཏྟཾ། ཨཏྟཱ ཨུཔནེཏབྦོ ཨེཏིསྶཱ དེསནཱཡཱཏི ཨཏྟཱུཔནཱཡིཀཱ། པརོ ཨུཔནེཏབྦོ ཨེཏིསྶཱ དེསནཱཡཱཏི པརཱུཔནཱཡིཀཱ། ‘‘ཀཏམཱ ཨཏྟཱུཔནཱཡིཀཱ དེསནཱ, ཀཏམཱ པརཱུཔནཱཡིཀཱ དེསནཱ’’ཏི པུཙྪིཏབྦཏྟཱ ནིཡམེཏྭཱ དསྶེཏུཾ ‘‘ན པཉྙཱཡཏཱི’’ཏིཨཱདི ཝུཏྟཾ། ‘‘ན པཉྙཱཡཏཱི’’ཏི དེསནཱ སཱཝཀཱནཾ ནེཏབྦཱནཾ ཝསེན དེསིཏཏྟཱ པརཱུཔནཱཡིཀཱ དེསནཱ ནཱམ, ‘‘ནཏྠི བུདྡྷཱནཾ བྷགཝནྟཱནཾ ཨཝིཛཱནནཱ’’ཏི དེསནཱ ཨཏྟནོ ནེཏབྦསྶ ཝསེན དེསིཏཏྟཱ ཨཏྟཱུཔནཱཡིཀཱ དེསནཱ ནཱམ། ‘‘ནཏྠི བུདྡྷཱནཾ བྷགཝནྟཱནཾ ཨཝིཛཱནནཱ’’ཏི ཝུཏྟཏྟཱ པུབྦཱཡ ཀོཊིཡཱ ཨབྷཱཝཏོ ཨེཝ ན པཉྙཱཡཏཱིཏི ཝིཉྙཱཡཏི, བྷགཝཏོ ཉཱཎསྶ པཉྙཱཔནཾ ཀཱཏུཾ ཨསམཏྠཏྟཱ ན པཉྙཱཡཏཱིཏི ན ཝིཉྙཱཡཏི ཏེན ཨཊྛཀཐཱཡཾ ‘‘ནཏྠི བུདྡྷཱནཾ བྷགཝནྟཱནཾ ཨཝིཛཱནནཱཏི ཨེཏེན པུརིམཱཡ ཀོཊིཡཱ ཨབྷཱཝཏོ ཨེཝ ན པཉྙཱཡཏི, ན ཏཏྠ ཉཱཎསྶ པཊིགྷཱཏོཏི དསྶེཏཱི’’ཏི (ནེཏྟི॰ ཨཊྛ॰ ༡༡༨) ཝུཏྟཾ།

    Buddhavisayo puggalaparo puggalapadhāno pañho avissajjanīyo, buddhavisayāva puggalaparoparaññutā avissajjanīyā. Bhikkhave, avijjānīvaraṇānaṃ sattānaṃ pubbā koṭi na paññāyati taṇhāsaṃyojanānaṃ, sakiṃ nirayaṃ sandhāvataṃ saṃsarataṃ sattānaṃ, sakiṃ tiracchānayoniṃ sandhāvataṃ saṃsarataṃ sattānaṃ, sakiṃ pettivisayaṃ sandhāvataṃ saṃsarataṃ sattānaṃ, sakiṃ asurayoniṃ sandhāvataṃ saṃsarataṃ sattānaṃ, sakiṃ deve sandhāvataṃ saṃsarataṃ sattānaṃ, sakiṃ manusse sandhāvataṃ saṃsarataṃ sattānaṃ pubbā koṭi na paññāyati na dissati na upalabbhatīti. ‘‘Sā pubbā koṭi katamā’’ti kenaci kataṃ pucchanaṃ avissajjanīyaṃ saṃsārassa pubbakoṭiyā abhāvato avissajjanīyaṃ hoti. ‘‘Na paññāyatī’’ti desanā sāvakānaṃ ñāṇavekallena katā, na attano ñāṇavekallena. ‘‘Na paññāyatī’’ti desanā attano ceva sāvakānañca ñāṇavekallena kātabbā siyāti codanaṃ manasi katvā ‘‘duvidhā buddhānaṃ bhagavantānaṃ desanā’’tiādi vuttaṃ. Attā upanetabbo etissā desanāyāti attūpanāyikā. Paro upanetabbo etissā desanāyāti parūpanāyikā. ‘‘Katamā attūpanāyikā desanā, katamā parūpanāyikā desanā’’ti pucchitabbattā niyametvā dassetuṃ ‘‘na paññāyatī’’tiādi vuttaṃ. ‘‘Na paññāyatī’’ti desanā sāvakānaṃ netabbānaṃ vasena desitattā parūpanāyikā desanā nāma, ‘‘natthi buddhānaṃ bhagavantānaṃ avijānanā’’ti desanā attano netabbassa vasena desitattā attūpanāyikā desanā nāma. ‘‘Natthi buddhānaṃ bhagavantānaṃ avijānanā’’ti vuttattā pubbāya koṭiyā abhāvato eva na paññāyatīti viññāyati, bhagavato ñāṇassa paññāpanaṃ kātuṃ asamatthattā na paññāyatīti na viññāyati tena aṭṭhakathāyaṃ ‘‘natthi buddhānaṃ bhagavantānaṃ avijānanāti etena purimāya koṭiyā abhāvato eva na paññāyati, na tattha ñāṇassa paṭighātoti dassetī’’ti (netti. aṭṭha. 118) vuttaṃ.

    ‘‘ཀཐཾ པན བུདྡྷཱནཾ བྷགཝནྟཱནཾ ཨཝིཛཱནནཱཡ ནཏྠིབྷཱཝོཝིཛཱནིཏབྦོ’’ཏི ཝཏྟབྦཏྟཱ ཨཝིཛཱནནཱཡ ནཏྠིབྷཱཝཾ ཛཱནཱཔེཏུཾ ‘‘ཡཐཱ བྷགཝཱ ཀོཀཱལིཀཾ བྷིཀྑུ’’ནྟིཨཱདི ཝུཏྟཾ། ཨཊྛཀཐཱཡཾ པན – ‘‘ཡཾ པན ཨཏྠི, ཏཾ ཨཉྙེསཾ ཨཔྤམེཡྻམྤི བྷགཝཏོ ན ཨཔྤམེཡྻནྟི བྷགཝཏོ སབྦཏྠ ཨཔྤཊིཧཏཉཱཎཏཾ དསྶེཏུཾ ‘ཡཐཱ བྷགཝཱ ཀོཀཱལིཀཾ བྷིཀྑུཾ ཨཱརབྦྷཱ’ཏིཨཱདིམཱཧཱ’’ཏི ཝུཏྟཾ། བྷགཝཱ ཀོཀཱལིཀཾ བྷིཀྑུཾ ཨཱརབྦྷ ‘‘ཀཱིཝ དཱིགྷཾ ནུ ཁོ, བྷནྟེ, པདུམེ ནིརཡེ ཨཱཡུཔྤམཱཎ’’ནྟི པཉྷཾ པུཙྪིཏྭཱ ནིསིནྣཾ ཨཉྙཏརཾ བྷིཀྑུཾ ཡཐཱ ཡེན པཀཱརེན ‘‘སེཡྻཐཱཔི…པེ॰… ཨཱགྷཱཏེཏྭཱ’’ཏི ཨེཝམཱཧ། ཏཏོ ཏེན པཀཱརེན ཨཝིཛཱནནཱཡ ནཏྠིབྷཱཝོ ཝིཛཱནིཏབྦོཏི ཨཏྠོ གཧེཏབྦོ།

    ‘‘Kathaṃ pana buddhānaṃ bhagavantānaṃ avijānanāya natthibhāvovijānitabbo’’ti vattabbattā avijānanāya natthibhāvaṃ jānāpetuṃ ‘‘yathā bhagavā kokālikaṃ bhikkhu’’ntiādi vuttaṃ. Aṭṭhakathāyaṃ pana – ‘‘yaṃ pana atthi, taṃ aññesaṃ appameyyampi bhagavato na appameyyanti bhagavato sabbattha appaṭihatañāṇataṃ dassetuṃ ‘yathā bhagavā kokālikaṃ bhikkhuṃ ārabbhā’tiādimāhā’’ti vuttaṃ. Bhagavā kokālikaṃ bhikkhuṃ ārabbha ‘‘kīva dīghaṃ nu kho, bhante, padume niraye āyuppamāṇa’’nti pañhaṃ pucchitvā nisinnaṃ aññataraṃ bhikkhuṃ yathā yena pakārena ‘‘seyyathāpi…pe… āghātetvā’’ti evamāha. Tato tena pakārena avijānanāya natthibhāvo vijānitabboti attho gahetabbo.

    བྷིཀྑུ, ཏྭཾ སལླཀྑེཧི, ཀོཀཱལིཀོ ཝཱིསཏིཁཱརིཀོ ཀོསལཀོ ཏིལཝཱཧོ རཱསིཾ ཀཏྭཱ ཋཔིཏོ, ཏཏོ ཏིལཏོ པུརིསོ ཝསྶསཏསྶ ཝསྶསཏསྶ ཨཙྩཡེན ཨེཀམེཀཾ ཏིལཾ ཨུདྡྷརེཡྻ, སོ ཝཱིསཏིཁཱརིཀོ ཀོསལཀོ ཏིལཝཱཧོ ཨིམིནཱ ཨུདྡྷརཱནུཔཀྐམེན ཁིཔྤཏརཾ པརིཀྑཡཾ པརིཡཱདཱནཾ སེཡྻཐཱཔི གཙྪེཡྻ, ཨེཀོ ཨབྦུདོ ནིརཡོ པརིཀྑཡཾ པརིཡཱདཱནཾ ན ཏྭེཝ གཙྪེཡྻ། ཝཱིསཏི ཨབྦུདཱ ནིརཡཱ ཏཏྟཀེ ཀཱལེ པརིཀྑཡཾ པརིཡཱདཱནཾ སེཡྻཐཱཔི གཙྪེཡྻུཾ, ཨེཝམེཝ ཨེཀོ ནིརབྦུདོ ནིརཡོ ཏཏྟཀེ ཀཱལེ པརིཀྑཡཾ པརིཡཱདཱནཾ ན ཏྭེཝ གཙྪེཡྻ། ཨེས ནཡོ སེསེསུཔི། སཱརིཔུཏྟམོགྒལླཱནེསུ ཙིཏྟཾ ཨཱགྷཱཏེཏྭཱ པདུམཾ ནིརཡཾ ཀོཀཱལིཀོ བྷིཀྑུ ཨུཔཔནྣོ ཁོ, བྷིཀྑུ, ཏྭཾ ཨེཝཾ སལླཀྑེཧཱིཏི བྷགཝཱ ཨཱཧཱཏི ཡོཛནཱ། བྷགཝཱ ‘‘ཨཡཾ ཨཔྤམེཡྻོ ཨཡཾ ཨསངྑྱེཡྻོ’’ཏི ཝཱ ན ཀིཉྩི ཨཱཧ། ‘‘ཏསྨིཾ ཨཔྤམེཡྻེ ཀཏམོ ཨཔྤམེཡྻོ, ཏསྨིཾ ཨསངྑྱེཡྻེ ཀཏམོ ཨསངྑྱེཡྻོ’’ཏི ཀེནཙི ཀཏཾ པུཙྪནཾ བུདྡྷཝིསཡཏྟཱ ཨཝིསྶཛྫནཱིཡཾ། ཨིདཾ ཨཔྤམེཡྻཨསངྑྱེཡྻསུཏྟཾ ཝུཏྟནཡེན ཨཝིསྶཛྫནཱིཡཾ། (༡༡)

    Bhikkhu, tvaṃ sallakkhehi, kokāliko vīsatikhāriko kosalako tilavāho rāsiṃ katvā ṭhapito, tato tilato puriso vassasatassa vassasatassa accayena ekamekaṃ tilaṃ uddhareyya, so vīsatikhāriko kosalako tilavāho iminā uddharānupakkamena khippataraṃ parikkhayaṃ pariyādānaṃ seyyathāpi gaccheyya, eko abbudo nirayo parikkhayaṃ pariyādānaṃ na tveva gaccheyya. Vīsati abbudā nirayā tattake kāle parikkhayaṃ pariyādānaṃ seyyathāpi gaccheyyuṃ, evameva eko nirabbudo nirayo tattake kāle parikkhayaṃ pariyādānaṃ na tveva gaccheyya. Esa nayo sesesupi. Sāriputtamoggallānesu cittaṃ āghātetvā padumaṃ nirayaṃ kokāliko bhikkhu upapanno kho, bhikkhu, tvaṃ evaṃ sallakkhehīti bhagavā āhāti yojanā. Bhagavā ‘‘ayaṃ appameyyo ayaṃ asaṅkhyeyyo’’ti vā na kiñci āha. ‘‘Tasmiṃ appameyye katamo appameyyo, tasmiṃ asaṅkhyeyye katamo asaṅkhyeyyo’’ti kenaci kataṃ pucchanaṃ buddhavisayattā avissajjanīyaṃ. Idaṃ appameyyaasaṅkhyeyyasuttaṃ vuttanayena avissajjanīyaṃ. (11)

    ༡༡༩. ‘‘ཡདཱ སོ ཨུཔཀོ’’ཏིཨཱདཱིསུ ཡོཛནཱ པཱཀཊཱ།

    119.‘‘Yadā so upako’’tiādīsu yojanā pākaṭā.

    ‘‘ཀཐཾ ཀེན པཀཱརེན ཛིནོ’’ཏི ཨུཔཀེན ཀཏཾ པུཙྪནཾ ‘‘ཀིལེསཔྤཧཱནཔཀཱརེན ཛིནོ’’ཏི ཝིསྶཛྫནཱིཡཏྟཱ ཝིསྶཛྫནཱིཡཾ། ‘‘ཀེན པཀཱརེན ཛིནོ’’ཏི ཨུཔཀེན ཀཏཾ པུཙྪནཾ ‘‘པཱཔཀཱནཾ དྷམྨཱནཾ ཛིཏཏྟཱ ཛིནོ’’ཏི ཝིསྶཛྫནཱིཡཏྟཱ ཝིསྶཛྫནཱིཡཾ། ‘‘ཀཏམོ ཛིནོ’’ཏི ཀཏཾ པུཙྪནཾ ‘‘རཱུཔཱདིཀོ ཛིནོ’’ཏི ཝཱ ‘‘རཱུཔཱདིཀཾ མུཉྩིཏྭཱ ཨཉྙོ ཛིནོ’’ཏི ཝཱ ཝིསྶཛྫེཏུཾ ཨསཀྐུཎེཡྻཏྟཱ ཨཝིསྶཛྫནཱིཡཾ། ‘‘ཀཏམོ ཨཱསཝཀྑཡོ, ཀཏམོ རཱགཀྑཡོ, ཀཏམོ དོསཀྑཡོ, ཀཏམོ མོཧཀྑཡོ’’ཏི ཀཏཾ པུཙྪནཾ ‘‘ནིབྦཱནཾ ཨཱསཝཀྑཡོ’’ཏི ཝཱ ‘‘ཨརཧཏྟམགྒོ ཨཱསཝཀྑཡོ’’ཏི ཝཱ ‘‘ཨརཧཏྟཕལཾ རཱགཀྑཡོ’’ཏི ཝཱ ཨིཏི ཨེཝམཱདིནཱ ཝིསྶཛྫནཱིཡཏྟཱ ཝིསྶཛྫནཱིཡཾ། ‘‘ཀིཏྟཀོ ཨཱསཝཀྑཡོ, ཀིཏྟཀོ རཱགཀྑཡོ, ཀིཏྟཀོ དོསཀྑཡོ, ཀིཏྟཀོ མོཧཀྑཡོ’’ཏི ཀཏཾ པུཙྪནཾ ‘‘ཨེཏྟཀོ ཨེཏཔརིམཱཎོ ཨཱསཝཀྑཡོ’’ཏི ཨེཝམཱདིནཱ ཨཝིསྶཛྫནཱིཡཏྟཱ ཨཝིསྶཛྫནཱིཡཾ། ཨིདཾ ཝུཏྟཔྤཀཱརཾ སུཏྟཾ ཝུཏྟནཡེན ཝིསྶཛྫནཱིཡཉྩ ཨཝིསྶཛྫནཱིཡཉྩ ཧོཏི། (༡༢)

    ‘‘Kathaṃ kena pakārena jino’’ti upakena kataṃ pucchanaṃ ‘‘kilesappahānapakārena jino’’ti vissajjanīyattā vissajjanīyaṃ. ‘‘Kena pakārena jino’’ti upakena kataṃ pucchanaṃ ‘‘pāpakānaṃ dhammānaṃ jitattā jino’’ti vissajjanīyattā vissajjanīyaṃ. ‘‘Katamo jino’’ti kataṃ pucchanaṃ ‘‘rūpādiko jino’’ti vā ‘‘rūpādikaṃ muñcitvā añño jino’’ti vā vissajjetuṃ asakkuṇeyyattā avissajjanīyaṃ. ‘‘Katamo āsavakkhayo, katamo rāgakkhayo, katamo dosakkhayo, katamo mohakkhayo’’ti kataṃ pucchanaṃ ‘‘nibbānaṃ āsavakkhayo’’ti vā ‘‘arahattamaggo āsavakkhayo’’ti vā ‘‘arahattaphalaṃ rāgakkhayo’’ti vā iti evamādinā vissajjanīyattā vissajjanīyaṃ. ‘‘Kittako āsavakkhayo, kittako rāgakkhayo, kittako dosakkhayo, kittako mohakkhayo’’ti kataṃ pucchanaṃ ‘‘ettako etaparimāṇo āsavakkhayo’’ti evamādinā avissajjanīyattā avissajjanīyaṃ. Idaṃ vuttappakāraṃ suttaṃ vuttanayena vissajjanīyañca avissajjanīyañca hoti. (12)

    ‘‘ཏཐཱགཏོ སཏྟོ ཨཏྠཱི’’ཏི པུཙྪནཾ ‘‘པཉྩཀྑནྡྷེ ཨུཔཱདཱཡ པཉྙཱཔེཏབྦོ སཏྟབྷཱུཏོ ཨཏྠཱི’’ཏི ཝིསྶཛྫནཱིཡཏྟཱ ཝིསྶཛྫནཱིཡཾ། ‘‘ཨཏྠི རཱུཔ’’ནྟི ཀཏཾ པུཙྪནཾ རཱུཔསྶ ཝིསྶཛྫམཱནཏྟཱ ‘‘ཨཱམནྟཱ’’ཏི ཝིསྶཛྫནཱིཡཏྟཱ ཝིསྶཛྫནཱིཡཾ, ‘‘རཱུཔཾ ཏཐཱགཏོ’’ཏི ཀཏཾ པུཙྪནཾ ཏཐཱབྷཱཝཏོ ཨལབྦྷནཏོ ཨཝིསྶཛྫནཱིཡཏྟཱ ཨཝིསྶཛྫནཱིཡཾ། ‘‘རཱུཔཝཱ ཏཐཱགཏོ’’ཏིཨཱདཱིསུཔི ཨེས ནཡོ ཡཐཱསམྦྷཝཾ ཡོཛེཏབྦོ། ཨིདཾ ཝུཏྟཔྤཀཱརཾ སུཏྟཾ ཝུཏྟནཡེན ཝིསྶཛྫནཱིཡཉྩ ཨཝིསྶཛྫནཱིཡཉྩ ཧོཏི།

    ‘‘Tathāgato satto atthī’’ti pucchanaṃ ‘‘pañcakkhandhe upādāya paññāpetabbo sattabhūto atthī’’ti vissajjanīyattā vissajjanīyaṃ. ‘‘Atthi rūpa’’nti kataṃ pucchanaṃ rūpassa vissajjamānattā ‘‘āmantā’’ti vissajjanīyattā vissajjanīyaṃ, ‘‘rūpaṃ tathāgato’’ti kataṃ pucchanaṃ tathābhāvato alabbhanato avissajjanīyattā avissajjanīyaṃ. ‘‘Rūpavā tathāgato’’tiādīsupi esa nayo yathāsambhavaṃ yojetabbo. Idaṃ vuttappakāraṃ suttaṃ vuttanayena vissajjanīyañca avissajjanīyañca hoti.

    ‘‘པསྶཏི བྷགཝཱ དིབྦེན ཙཀྑུནཱ…པེ॰… ཡཐཱཀམྨཱུཔགེ སཏྟེ པཛཱནཱཏཱི’’ཏི ཀཏཾ པུཙྪནཾ ‘‘པསྶཏི བྷགཝཱ’’ཏི ཝཱ…པེ॰… ‘‘པཛཱནཱཏི བྷགཝཱ’’ཏི ཝཱ ཝིསྶཛྫནཱིཡཏྟཱ ཝིསྶཛྫནཱིཡཾ། ‘‘ཀཏམེ སཏྟཱ, ཀཏམོ ཏཐཱགཏོ’’ཏི ཀཏཾ པུཙྪནཾ པརམཏྠཏོ ཨལབྦྷནཏོ ཨཝིསྶཛྫནཱིཡཏྟཱ ཨཝིསྶཛྫནཱིཡཾ།

    ‘‘Passati bhagavā dibbena cakkhunā…pe… yathākammūpage satte pajānātī’’ti kataṃ pucchanaṃ ‘‘passati bhagavā’’ti vā…pe… ‘‘pajānāti bhagavā’’ti vā vissajjanīyattā vissajjanīyaṃ. ‘‘Katame sattā, katamo tathāgato’’ti kataṃ pucchanaṃ paramatthato alabbhanato avissajjanīyattā avissajjanīyaṃ.

    ‘‘ཨཏྠི ཏཐཱགཏོ’’ཏི ཀཏཾ པུཙྪནཾ ཧེཊྛཱ ཝུཏྟནཡེན ཝིསྶཛྫནཱིཡཾ། ‘‘ཨཏྠི ཏཐཱགཏོ པརཾ མརཎཱ’’ཏི ཀཏཾ པུཙྪནཾ ‘‘ཨཏྠི ཏཐཱགཏོ པརཾ མརཎཱ’’ཏི ཝིསྶཛྫམཱནེ སཏི ཙ ཨིདྷལོཀོ ཨེཝ པརལོཀོཏི ཨཱཔཛྫཏི, ‘‘ནཏྠི ཏཐཱགཏོ པརཾ མརཎཱ’’ཏི ཝིསྶཛྫམཱནེ སཏི ཙ ཨིདྷལོཀཏོ ཨཉྙོ པརལོཀོཏི ཨཱཔཛྫཏི, ཏསྨཱ ཨཝིསྶཛྫནཱིཡཏྟཱ ཨཝིསྶཛྫནཱིཡཾ། ཨིདཾ ཝུཏྟཔྤཀཱརཾ སུཏྟཾ ཝིསྶཛྫནཱིཡེ ཝིསཡེ ཙ ཨཝིསྶཛྫནཱིཡེ ཝིསཡེ ཙ ཝཱཙཀཉཱཔཀབྷཱཝེན པཝཏྟནཏོ ཝིསྶཛྫནཱིཡཉྩ ཨཝིསྶཛྫནཱིཡཉྩ ཧོཏི།

    ‘‘Atthitathāgato’’ti kataṃ pucchanaṃ heṭṭhā vuttanayena vissajjanīyaṃ. ‘‘Atthi tathāgato paraṃ maraṇā’’ti kataṃ pucchanaṃ ‘‘atthi tathāgato paraṃ maraṇā’’ti vissajjamāne sati ca idhaloko eva paralokoti āpajjati, ‘‘natthi tathāgato paraṃ maraṇā’’ti vissajjamāne sati ca idhalokato añño paralokoti āpajjati, tasmā avissajjanīyattā avissajjanīyaṃ. Idaṃ vuttappakāraṃ suttaṃ vissajjanīye visaye ca avissajjanīye visaye ca vācakañāpakabhāvena pavattanato vissajjanīyañca avissajjanīyañca hoti.

    ༡༢༠. ནཱནཱཝིདྷཾ ཝིསྶཛྫནཱིཡཱཝིསྶཛྫནཱིཡསུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སུཏྟཾ ཀམྨ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ཀམྨ’’ནྟིཨཱདི ཝུཏྟཾ།

    120. Nānāvidhaṃ vissajjanīyāvissajjanīyasuttaṃ ācariyena niddhāritaṃ, amhehi ca ñātaṃ, ‘‘katamaṃ suttaṃ kamma’’nti pucchitabbattā ‘‘tattha katamaṃ kamma’’ntiādi vuttaṃ.

    ‘‘ཨནྟཀེནཱདྷིཔནྣསྶཱ’’ཏིཨཱདཱིསུ ཨཏྠོ ཧེཊྛཱ ཝུཏྟནཡཏྟཱ པཱཀཊོ ‘‘མརཎེནཱབྷིབྷཱུཏསྶ…པེ॰… ཚཱཡཱཝ ཨནཔཱཡིནཱི’’ཏི ཨིདཾ སུཏྟཾ པུཉྙཀམྨཔཱཔཀམྨདྭཡེ ཝཱཙཀཉཱཔཀབྷཱཝེན པཝཏྟནཏོ ཀམྨཾ ནཱམ།

    ‘‘Antakenādhipannassā’’tiādīsu attho heṭṭhā vuttanayattā pākaṭo ‘‘maraṇenābhibhūtassa…pe… chāyāva anapāyinī’’ti idaṃ suttaṃ puññakammapāpakammadvaye vācakañāpakabhāvena pavattanato kammaṃ nāma.

    བྷིཀྑཝེ, ཏུམྷེ པུན ཙཔརཾ ཀམྨཾ སལླཀྑེཐ། (ཨནུཊྛཱནགིལཱནཾ) ཨནུཊྛཱནགིལཱནསྶ པཱིཋསམཱརུལ༹ྷཾ པཱིཋསམཱརུལ༹ྷསྶ བཱལཾ བཱལསྶ ཝཱ མཉྩསམཱརུལ༹ྷཾ མཉྩསམཱརུལ༹ྷསྶ བཱལཾ བཱལསྶ ཝཱ ཚམཱཡཾ བྷཱུམིཡཾ སེམཱནཾ སེམཱནསྶ སཡནྟསྶ བཱལཾ བཱལསྶ ཝཱ ཀཱཡེན དུཙྩརིཏཱནི ཝཱཙཱཡ དུཙྩརིཏཱནི མནསཱ དུཙྩརིཏཱནི པཱཔཀཱནི ཡཱནི ཀམྨཱནི པུབྦེ པུབྦཀཱལེ ཝཱ ཨཏཱིཏེ ཨནེཀཀཔྤཀོཊིསཏསཧསྶེ ཝཱ ཨསྶ བཱལེན ཀཏཱནི, ཏཱནི པཱཔཀཱནི ཀམྨཱནི ཏམྷི པཱིཋསམཱརུལ༹ྷཱདིསམཡེ ཨོལམྦནྟི ཝིཡ ཨུཔཊྛཧནྟི ཨཛ྄ཛྷོལམྦནྟི ཝིཡ ཨུཔཊྛཧནྟི ཨབྷིཔྤལམྦནྟི ཝིཡ ཨུཔཊྛཧནྟི། བྷིཀྑཝེ , མཧཏཾ མཧནྟཱནཾ པབྦཏཀཱུཊཱནཾ ཚཱཡཱ སཱཡནྷསམཡཾ པཐཝིཡཾ སེཡྻཐཱཔི ཨོལམྦནྟི ཨཛ྄ཛྷོལམྦནྟི ཨབྷིཔྤལམྦནྟི ཡཐཱ, བྷིཀྑཝེ, ཨེཝམེཝ བཱལཾ…པེ॰… ཨབྷིཔྤལམྦནྟི། བྷིཀྑཝེ, ཏཏྲ ཏསྨིཾ ཨུཔཊྛཱནཱཀཱརེ ཨུཔཊྛཱནཱཀཱརཧེཏུ བཱལསྶ ཀཏཔཱཔསྶ ཨེཝཾ པརིཝིཏཀྐོ ཧོཏི ‘‘མེ མཡཱ ཀལྱཱཎཾ ཨཀཏཾ ཝཏ, མེ མཡཱ ཀུསལཾ ཨཀཏཾ ཝཏ, བྷཱིརུཏྟཱཎཾ ཀཏཾ ཝཏ, མེ མཡཱ པཱཔཾ ཀཏཾ ཝཏ, མེ མཡཱ ལུདྡཾ ཀཏཾ ཝཏ, མེ མཡཱ ཀིབྦིསཾ ཀཏཾ ཝཏ, བྷོ ཨགིལཱན སཔྤུརིས ཨཀཏཀལྱཱཎཱནཾ ཨཀཏཀུསལཱནཾ ཨཀཏབྷཱིརུཏྟཱཎཱནཾ ཀཏཔཱཔཱནཾ ཀཏལུདྡཱནཾ ཀཏཀིབྦིསཱནཾ ཡཱཝཏཱ གཏི དུགྒཏི ཨཏྠི, ཏཾ གཏིཾ ཨཧཾ པེཙྩ གཙྪཱམཱི’’ཏི ཨེཝཾ པརིཝིཏཀྐོ ཧོཏི། ཨེཝཾ ཝིཏཀྐེནྟོ སོ བཱལོ སོཙཏི ཀིལམཏི པརིདེཝཏི, ཨུརཏྟཱལི༹ཾ ཀནྡཏི སམྨོཧཾ ཨཱཔཛྫཏཱིཏི ཡོཛནཱ།

    Bhikkhave, tumhe puna caparaṃ kammaṃ sallakkhetha. (Anuṭṭhānagilānaṃ) anuṭṭhānagilānassa pīṭhasamāruḷhaṃ pīṭhasamāruḷhassa bālaṃ bālassa vā mañcasamāruḷhaṃ mañcasamāruḷhassa bālaṃ bālassa vā chamāyaṃ bhūmiyaṃ semānaṃ semānassa sayantassa bālaṃ bālassa vā kāyena duccaritāni vācāya duccaritāni manasā duccaritāni pāpakāni yāni kammāni pubbe pubbakāle vā atīte anekakappakoṭisatasahasse vā assa bālena katāni, tāni pāpakāni kammāni tamhi pīṭhasamāruḷhādisamaye olambanti viya upaṭṭhahanti ajjholambanti viya upaṭṭhahanti abhippalambanti viya upaṭṭhahanti. Bhikkhave , mahataṃ mahantānaṃ pabbatakūṭānaṃ chāyā sāyanhasamayaṃ pathaviyaṃ seyyathāpi olambanti ajjholambanti abhippalambanti yathā, bhikkhave, evameva bālaṃ…pe… abhippalambanti. Bhikkhave, tatra tasmiṃ upaṭṭhānākāre upaṭṭhānākārahetu bālassa katapāpassa evaṃ parivitakko hoti ‘‘me mayā kalyāṇaṃ akataṃ vata, me mayā kusalaṃ akataṃ vata, bhīruttāṇaṃ kataṃ vata, me mayā pāpaṃ kataṃ vata, me mayā luddaṃ kataṃ vata, me mayā kibbisaṃ kataṃ vata, bho agilāna sappurisa akatakalyāṇānaṃ akatakusalānaṃ akatabhīruttāṇānaṃ katapāpānaṃ kataluddānaṃ katakibbisānaṃ yāvatā gati duggati atthi, taṃ gatiṃ ahaṃ pecca gacchāmī’’ti evaṃ parivitakko hoti. Evaṃ vitakkento so bālo socati kilamati paridevati, urattāḷiṃ kandati sammohaṃ āpajjatīti yojanā.

    པབྦཏཀཱུཊཱནཾ ཚཱཡཱ ནཱམ སཱུརིཡུགྒམནཀཱལེཔི པཐཝིཡཱ ཨོལམྦནྟཱིཔི ཚཱཡཱ ཧཱཡནཝསེན ཨོལམྦནྟི། སཱཡནྷསམཡཾ པན ཚཱཡཱ ཝཌྜྷནཝསེན ཨོལམྦནྟི, ཏཐེཝ ཀམྨཱནིཔི ཏསྨིཾ ཀཱལེ ཝཌྜྷནཝསེན ཨུཔཊྛཧནྟི, ཏསྨཱ ཏམེཝ ཝཌྜྷནུཔཊྛཱནཾ སནྡྷཱཡ ‘‘སཱཡནྷསམཡ’’ནྟི ཝུཏྟཾ། སུཀྐཔཀྑེཔི ཡོཛནཱ ཀཎྷཔཀྑེ ཡོཛནཱནུསཱརེན ཀཱཏབྦཱ། ཨིདཾ ‘‘པུན ཙཔར’’ནྟིཨཱདིཀཾ སུཏྟདྭཡཾ ཀུསལཀམྨཨཀུསལཀམྨེསུ ཝཱཙཀཉཱཔཀབྷཱཝེན པཝཏྟནཏོ ཀམྨཾ ནཱམ།

    Pabbatakūṭānaṃ chāyā nāma sūriyuggamanakālepi pathaviyā olambantīpi chāyā hāyanavasena olambanti. Sāyanhasamayaṃ pana chāyā vaḍḍhanavasena olambanti, tatheva kammānipi tasmiṃ kāle vaḍḍhanavasena upaṭṭhahanti, tasmā tameva vaḍḍhanupaṭṭhānaṃ sandhāya ‘‘sāyanhasamaya’’nti vuttaṃ. Sukkapakkhepi yojanā kaṇhapakkhe yojanānusārena kātabbā. Idaṃ ‘‘puna capara’’ntiādikaṃ suttadvayaṃ kusalakammaakusalakammesu vācakañāpakabhāvena pavattanato kammaṃ nāma.

    ནཱནཱཝིདྷཾ ཀམྨཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམོ ཝིཔཱཀོ’’ཏི པུཙྪིཏབྦཏྟཱ ཏཏྠ ཀཏམོ ཝིཔཱཀོ’’ཏིཨཱདི ཝུཏྟཾ། ཏཏྠ ཏེསུ ཨཊྛཝཱིསཏིཝིདྷེསུ ལོཀིཡཱདཱིསུ སཱསནཔཊྛཱནེསུ ཀཏམོ ཝིཔཱཀོཏི པུཙྪཏི། བྷིཀྑཝེ, ཝོ ཏུམྷེཧི ཡེ མནུསྶཏྟསདྡྷཱཔཊིལཱབྷཱདཡོ པཊིལདྡྷཱ, ཏེ མནུསྶཏྟསདྡྷཱཔཊིལཱབྷཱདཡོ ཝོ ཏུམྷཱཀཾ ལཱབྷཱ བྷཝནྟི། ཏུམྷེཧི པབྦཛིཏྭཱ ཡཾ ཙཏུཔཱརིསུདྡྷིསཱིལཱདིསམྤཱདནཾ ལདྡྷཾ, ཏཾ ཙཏུཔཱརིསུདྡྷིསཱིལཱདིསམྤཱདནཾ ཝོ ཏུམྷཱཀཾ སུལདྡྷཾ བྷཝཏི། བྷིཀྑཝེ, ཡོ བུདྡྷུཔྤཱདོ ནཝམོ ཁཎོ ཏུམྷེཧི ལདྡྷོ, སོ བུདྡྷུཔྤཱདོ ནཝམོ ཁཎོ ཝོ ཏུམྷཱཀཾ བྲཧྨཙརིཡཝཱསཱཡ པཊིལདྡྷོ བྷཝཏི།

    Nānāvidhaṃ kammaṃ ācariyena niddhāritaṃ, amhehi ca ñātaṃ, ‘‘katamo vipāko’’ti pucchitabbattā tattha katamo vipāko’’tiādi vuttaṃ. Tattha tesu aṭṭhavīsatividhesu lokiyādīsu sāsanapaṭṭhānesu katamo vipākoti pucchati. Bhikkhave, vo tumhehi ye manussattasaddhāpaṭilābhādayo paṭiladdhā, te manussattasaddhāpaṭilābhādayo vo tumhākaṃ lābhā bhavanti. Tumhehi pabbajitvā yaṃ catupārisuddhisīlādisampādanaṃ laddhaṃ, taṃ catupārisuddhisīlādisampādanaṃ vo tumhākaṃ suladdhaṃ bhavati. Bhikkhave, yo buddhuppādo navamo khaṇo tumhehi laddho, so buddhuppādo navamo khaṇo vo tumhākaṃ brahmacariyavāsāya paṭiladdho bhavati.

    བྷིཀྑཝེ, མཡཱ ཚཕསྶཱཡཏནིཀཱ ནཱམ ནིརཡཱ དིཊྛཱ, ཏཏྠ ཏེསུ དིཊྛེསུ ཚཕསྶཱཡཏནིཀེསུ ནཱམ ནིརཡེསུ ཡཾ ཀིཉྩི རཱུཔཾ ཙཀྑུནཱ པསྶཏི, ཏཾ ཨནིཊྛརཱུཔཾཡེཝ པསྶཏི, ནོ ཨིཊྛརཱུཔཾ། ཨཀནྟརཱུཔཾཡེཝ པསྶཏི, ནོ ཀནྟརཱུཔཾ། ཨམནཱཔརཱུཔཾཡེཝ པསྶཏི, ནོ མནཱཔརཱུཔཾ།

    Bhikkhave, mayā chaphassāyatanikā nāma nirayā diṭṭhā, tattha tesu diṭṭhesu chaphassāyatanikesu nāma nirayesu yaṃ kiñci rūpaṃ cakkhunā passati, taṃ aniṭṭharūpaṃyeva passati, no iṭṭharūpaṃ. Akantarūpaṃyeva passati, no kantarūpaṃ. Amanāparūpaṃyeva passati, no manāparūpaṃ.

    ཡཾ ཀིཉྩི སདྡཾ སོཏེན…པེ॰… གྷཱནེན…པེ॰… ཛིཝ྄ཧཱཡ…པེ॰… ཀཱཡེན…པེ॰… ཡཾ ཀིཉྩི དྷམྨཾ མནསཱ ཝིཛཱནཱཏི, ཏཾ ཨནིཊྛདྷམྨཾཡེཝ ཝིཛཱནཱཏི, ནོ ཨིཊྛདྷམྨཾ། ཨཀནྟདྷམྨཾཡེཝ ཝིཛཱནཱཏི, ནོ ཀནྟདྷམྨཾ། ཨམནཱཔདྷམྨཾཡེཝ ཝིཛཱནཱཏི, ནོ མནཱཔདྷམྨནྟི པཱཋོ ཡུཏྟོ། ‘‘ཨནིཊྛརཱུཔཾཡེཝ ཝིཛཱནཱཏི, ནོ ཨིཊྛརཱུཔ’’ནྟིཨཱདིཔཱཋོ ཨཡུཏྟོ, ཀཏྠཙི པཱལི༹ཡཾ ཨཡུཏྟཔཱཋོ དིཊྛོ། སུཀྐཔཀྑེ ཝུཏྟནཡཝིཔརིཡཱཡེན ཡོཛནཱ ཀཱཏབྦཱ། ཨཡཾ ཝུཏྟཔྤཀཱརཱ ‘‘ལཱབྷཱ ཝོ, བྷིཀྑཝེ’’ཏིཨཱདིཀོ པཱཋོ ཝིཔཱཀེ ཝཱཙཀཉཱཔཀབྷཱཝེནེཝ པཝཏྟནཏོ ཝིཔཱཀོ ནཱམ།

    Yaṃ kiñci saddaṃ sotena…pe… ghānena…pe… jivhāya…pe… kāyena…pe… yaṃ kiñci dhammaṃ manasā vijānāti, taṃ aniṭṭhadhammaṃyeva vijānāti, no iṭṭhadhammaṃ. Akantadhammaṃyeva vijānāti, no kantadhammaṃ. Amanāpadhammaṃyeva vijānāti, no manāpadhammanti pāṭho yutto. ‘‘Aniṭṭharūpaṃyeva vijānāti, no iṭṭharūpa’’ntiādipāṭho ayutto, katthaci pāḷiyaṃ ayuttapāṭho diṭṭho. Sukkapakkhe vuttanayavipariyāyena yojanā kātabbā. Ayaṃ vuttappakārā ‘‘lābhā vo, bhikkhave’’tiādiko pāṭho vipāke vācakañāpakabhāveneva pavattanato vipāko nāma.

    མཱརིསཱ ནིརཡེ པཙྩམཱནཱནཾ ཨམྷཱཀཾ སབྦསོ ནིམུཛྫནཨུམྨུཛྫནཝསེན སཊྛིཝསྶསཧསྶཱནི པརིཔུཎྞཱནི, ནིརཡསྶ ཨནྟོ པརིཡོསཱནཾ ཀདཱ ཀསྨིཾ ཀཱལེ བྷཝིསྶཏི།

    Mārisā niraye paccamānānaṃ amhākaṃ sabbaso nimujjanaummujjanavasena saṭṭhivassasahassāni paripuṇṇāni, nirayassa anto pariyosānaṃ kadā kasmiṃ kāle bhavissati.

    ནིརཡསྶ ཨནྟོ པརིཡོསཱནཾ ནཏྠི། ནིརཡསྶ ཨནྟོ པརིཡོསཱནཾ ཀུཏོ ཨཏྠི? ནིརཡསྶ ཨནྟོ པརིཡོསཱནཾ ཨམྷཱཀཾ ན པཊིདིསྶཏི། མཱརིསཱ, ཡདཱ ཏུམྷེ ཙ ཨཧཉྩ སེཊྛིཔུཏྟཱ ཛཱཏཱ, ཏདཱ ཏུཡ྄ཧཾ ཏུམྷཱཀཉྩ མཡ྄ཧཾ མམ ཙ པཱཔཾ ཧི ཡསྨཱ པཀཏཾ པཀཱརེཧི ཀཏཾ, ཏསྨཱ ནིརཡསྶ ཨནྟོ པརིཡོསཱནཾ ཨམྷཱཀཾ ན དིསྶཏཱིཏི ཨཡཾ པཱཋོ ཝིཔཱཀེ ཝཱཙཀཉཱཔཀབྷཱཝེན པཝཏྟནཏོ ཝིཔཱཀོ ནཱམ། (༡༣)

    Nirayassa anto pariyosānaṃ natthi. Nirayassa anto pariyosānaṃ kuto atthi? Nirayassa anto pariyosānaṃ amhākaṃ na paṭidissati. Mārisā, yadā tumhe ca ahañca seṭṭhiputtā jātā, tadā tuyhaṃ tumhākañca mayhaṃ mama ca pāpaṃ hi yasmā pakataṃ pakārehi kataṃ, tasmā nirayassa anto pariyosānaṃ amhākaṃ na dissatīti ayaṃ pāṭho vipāke vācakañāpakabhāvena pavattanato vipāko nāma. (13)

    ༡༢༡. ཨདྷམྨཙཱརཱི ནརོ ཀུསལདྷམྨེསུ པམཏྟོ ཧི ཡསྨཱ ཧོཏི, ཏསྨཱ སོ ཨདྷམྨཙཱརཱི པམཏྟོ ནརོ ཡཧིཾ ཡཧིཾ ཡཾ ཡཾ དུགྒཏིཾ གཙྪཏི, ཏཾ ཏཾ གཙྪནྟཾ ཨདྷམྨཙཱརིཾ ནཾ ནརཾ ཨཏྟནཱ ཙརིཏོ སོ དྷམྨོཝ ཧནཏི། ཀིམིཝ ཧནཏི? སཡཾ ཨཏྟནཱ གཧིཏོ ཀཎྷསཔྤོ གཎྷནྟཾ ཛནཾ ཧནཏི ཡཐཱ, ཨེཝཾ ཨཏྟནཱ ཙརིཏོ ཨདྷམྨོ ཨདྷམྨཙཱརིཾ ནཾ ཧནཏི། ‘‘ན ཧི དྷམྨོ ཨདྷམྨོ ཙཱ’’ཏིཨཱདིགཱཐཱཡ ཨཏྠོ པཱཀཊོ། ཨིདཾ སུཏྟདྭཡཾ ཀམྨེ ཙ ཝིཔཱཀེ ཙ ཝཱཙཀཉཱཔཀབྷཱཝེན པཝཏྟནཏོ ཀམྨཉྩ ཝིཔཱཀོ ཙ ཧོཏི།

    121. Adhammacārī naro kusaladhammesu pamatto hi yasmā hoti, tasmā so adhammacārī pamatto naro yahiṃ yahiṃ yaṃ yaṃ duggatiṃ gacchati, taṃ taṃ gacchantaṃ adhammacāriṃ naṃ naraṃ attanā carito so dhammova hanati. Kimiva hanati? Sayaṃ attanā gahito kaṇhasappo gaṇhantaṃ janaṃ hanati yathā, evaṃ attanā carito adhammo adhammacāriṃ naṃ hanati. ‘‘Na hi dhammo adhammo cā’’tiādigāthāya attho pākaṭo. Idaṃ suttadvayaṃ kamme ca vipāke ca vācakañāpakabhāvena pavattanato kammañca vipāko ca hoti.

    བྷིཀྑཝེ, ཏུམྷེ པུཉྙཱནཾ མཱ བྷཱཡིཏྠ; བྷིཀྑཝེ, ཡདིདཾ ཡཾ ཨིདཾ ‘‘པུཉྙཱནཱི’’ཏི ཨདྷིཝཙནཾ པཝཏྟཾ; ཨེཏཾ ‘‘པུཉྙཱནཱི’’ཏི ཨདྷིཝཙནཾ ཨིཊྛསྶ ཀནྟསྶ པིཡསྶ མནཱཔསྶ སུཁསྶ སུཁཝིཔཱཀཛནཀསྶ ཀམྨསྶ ཨདྷིཝཙནཾ ཧོཏི། བྷིཀྑཝེ, ཨཧཾ དཱིགྷརཏྟཾ ཀཏཱནཾ པུཉྙཱནཾ དཱིགྷརཏྟཾ པཙྩནུབྷཱུཏཾ ཨིཊྛཾ ཀནྟཾ པིཡཾ མནཱཔཾ ཨབྷིཛཱནཱམི ཁོ། ‘‘ཀཐཾ ཨབྷིཛཱནཱམཱི’’ཏི ཙེ པུཙྪེཡྻ , པུབྦེ སཏྟ ཝསྶཱནི མེཏྟཙིཏྟཾ མེཏྟཱཡ སཧིཏཾ དུཏིཡཛ྄ཛྷཱནཙིཏྟཾ བྷཱཝེཏྭཱ སཏྟ སཾཝཊྚཝིཝཊྚཀཔྤེ ཨིམཾ ལོཀཾ མནུསྶལོཀཾ པུན ན ཨཱགམཱསིཾ། སཏྟ སཾཝཊྚཝིཝཊྚཀཔྤེཏི ཙེཏྠ སཾཝཊྚགྒཧཎེན སཾཝཊྚཊྛཱཡཱི, ཝིཝཊྚགྒཧཎེན ཝིཝཊྚཊྛཱཡཱིཔི གཧིཏཱཏི ཝེདིཏབྦཱ། སེསེསུཔི ཨེཝམེཝ གཧེཏབྦོ། བྷིཀྑཝེ, སཾཝཊྚམཱནེ ཀཔྤེ ཨཧཾ ཨཱབྷསྶརཱུཔགོ ཧོམི, ཝིཝཊྚཀཔྤེ སུཉྙཾ བྲཧྨཝིམཱནཾ ཨུཔཔཛྫཱམི། བྷིཀྑཝེ, ཏཏྲ བྲཧྨཝིམཱནེ ཏཏྲ ཨུཔཔཛྫམཱནེ ཨུཔཔཛྫམཱནཧེཏུ ཨཧཾ བྲཧྨཱ ཧོམི, ཨཉྙེ མཧཱནུབྷཱཝེན ཨབྷིབྷཝནཏོ ཨབྷིབྷཱུ, ཨཉྙེཧི ཨནབྷིབྷཝནཏོ ཨནབྷིབྷཱུཏོ མཧཱབྲཧྨཱ ཧོམི, ཨཉྙདཏྠུ ཨེཀཾསེན དསོ ཨཧཾ ཝསཝཏྟཱི ཧོམི།

    Bhikkhave, tumhe puññānaṃ mā bhāyittha; bhikkhave, yadidaṃ yaṃ idaṃ ‘‘puññānī’’ti adhivacanaṃ pavattaṃ; etaṃ ‘‘puññānī’’ti adhivacanaṃ iṭṭhassa kantassa piyassa manāpassa sukhassa sukhavipākajanakassa kammassa adhivacanaṃ hoti. Bhikkhave, ahaṃ dīgharattaṃ katānaṃ puññānaṃ dīgharattaṃ paccanubhūtaṃ iṭṭhaṃ kantaṃ piyaṃ manāpaṃ abhijānāmi kho. ‘‘Kathaṃ abhijānāmī’’ti ce puccheyya , pubbe satta vassāni mettacittaṃ mettāya sahitaṃ dutiyajjhānacittaṃ bhāvetvā satta saṃvaṭṭavivaṭṭakappe imaṃ lokaṃ manussalokaṃ puna na āgamāsiṃ. Satta saṃvaṭṭavivaṭṭakappeti cettha saṃvaṭṭaggahaṇena saṃvaṭṭaṭṭhāyī, vivaṭṭaggahaṇena vivaṭṭaṭṭhāyīpi gahitāti veditabbā. Sesesupi evameva gahetabbo. Bhikkhave, saṃvaṭṭamāne kappe ahaṃ ābhassarūpago homi, vivaṭṭakappe suññaṃ brahmavimānaṃ upapajjāmi. Bhikkhave, tatra brahmavimāne tatra upapajjamāne upapajjamānahetu ahaṃ brahmā homi, aññe mahānubhāvena abhibhavanato abhibhū, aññehi anabhibhavanato anabhibhūto mahābrahmā homi, aññadatthu ekaṃsena daso ahaṃ vasavattī homi.

    བྷིཀྑཝེ, ཨཧཾ དེཝཱནམིནྡོ སཀྐོ ཚཏྟིཾསཀྑཏྟུཾ ཨཧོསིཾ ཁོ, དྷམྨིཀོ དྷམྨརཱཛཱ ཙཱཏུརནྟོ ཝིཛིཏཱཝཱི ཛནཔདཏྠཱཝརིཡཔྤཏྟོ ཙཀྐརཏནཱདིསཏྟརཏནསམནྣཱགཏོ ཙཀྐཝཏྟིརཱཛཱ ཨནེཀསཏཀྑཏྟུཾ ཨཧོསིཾ, པདེསརཛྫསྶ རཱཛབྷཱཝེ ཀོ པན ཝཱདོ།

    Bhikkhave, ahaṃ devānamindo sakko chattiṃsakkhattuṃ ahosiṃ kho, dhammiko dhammarājā cāturanto vijitāvī janapadatthāvariyappatto cakkaratanādisattaratanasamannāgato cakkavattirājā anekasatakkhattuṃ ahosiṃ, padesarajjassa rājabhāve ko pana vādo.

    བྷིཀྑཝེ, ཏསྶ ཙཀྐཝཏྟིརཱཛབྷཱུཏསྶ མཡ྄ཧཾ ཨེཏཾ པརིཝིཏཀྐནཾ ཨཧོསི ‘‘ཡེན ཕལེན ཡེན ཝིཔཱཀེན ཨཧཾ ཨེཏརཧི ཨེཝཾམཧིདྡྷིཀོ ཨེཝཾམཧཱནུབྷཱཝོ ཨམྷི, ཏཾ ཨིདཾ ཕལཾ ཀིསྶ ཀམྨསྶ ཕལཾ ནུ ཁོ, སོ ཨཡཾ ཝིཔཱཀོ ཀིསྶ ཀམྨསྶ ཝིཔཱཀོ ནུ ཁོ’’ཏི ཨེཏཾ པརིཝིཏཀྐནཾ ཨཧོསི། བྷིཀྑཝེ, ཏསྶ ཝིཏཀྐེནྟསྶ མཡ྄ཧཾ ཨེཏཾ པརིཝིཏཀྐནཾ ཨཧོསི ‘‘ཡེན ཕལེན ཡེན ཝིཔཱཀེན ཨཧཾ ཨེཏརཧི ཨེཝཾམཧིདྡྷིཀོ ཨེཝཾམཧཱནུབྷཱཝོ ཨམྷི, མེ པཝཏྟཾ ཏཾ ཨིདཾ ཕལཾ ཏིཎྞཾ ཀམྨཱནཾ ཕལཾ ཁོ, སོ ཨཡཾ ཝིཔཱཀོ ཏིཎྞཾ ཀམྨཱནཾ ཝིཔཱཀོ ཁོ, སེཡྻཐིདཾ ཀཏམེསཾ ཏིཎྞཾ ཀམྨཱནཾ ཕལཾ ཝིཔཱཀོ? དཱནསྶ དམསྶ སཾཡམསྶཱཏི ཏིཎྞཾ ཀམྨཱནཾ ཕལཾ ཝིཔཱཀོ’’ཏི ཨེཏཾ པརིཝིཏཀྐནཾ ཨཧོསཱིཏི ཨཝོཙཱཏི ཡོཛནཱ།

    Bhikkhave, tassa cakkavattirājabhūtassa mayhaṃ etaṃ parivitakkanaṃ ahosi ‘‘yena phalena yena vipākena ahaṃ etarahi evaṃmahiddhiko evaṃmahānubhāvo amhi, taṃ idaṃ phalaṃ kissa kammassa phalaṃ nu kho, so ayaṃ vipāko kissa kammassa vipāko nu kho’’ti etaṃ parivitakkanaṃ ahosi. Bhikkhave, tassa vitakkentassa mayhaṃ etaṃ parivitakkanaṃ ahosi ‘‘yena phalena yena vipākena ahaṃ etarahi evaṃmahiddhiko evaṃmahānubhāvo amhi, me pavattaṃ taṃ idaṃ phalaṃ tiṇṇaṃ kammānaṃ phalaṃ kho, so ayaṃ vipāko tiṇṇaṃ kammānaṃ vipāko kho, seyyathidaṃ katamesaṃ tiṇṇaṃ kammānaṃ phalaṃ vipāko? Dānassa damassa saṃyamassāti tiṇṇaṃ kammānaṃ phalaṃ vipāko’’ti etaṃ parivitakkanaṃ ahosīti avocāti yojanā.

    ཏཏྠ ཏསྨིཾ ‘‘མཱ, བྷིཀྑཝེ, པུཉྙཱནཾ བྷཱཡིཏྠཱ’’ཏིཨཱདིཀེ སུཏྟེ ཡཉྩ དཱནཾ, ཡོ ཙ དམོ, ཡོ ཙ སཾཡམོ ཨཏྠི, ཨིདཾ དཱནཱདིཏྟཡཾ ཀམྨཾ, ཏཾཝཱཙཀཉཱཔཀཾ སུཏྟམྤི ཀམྨཾ ནཱམ། ཏཔྤཙྩཡོ ཏཾཀམྨཔཙྩཡོ པཙྩཡུཔྤནྣབྷཱུཏོ པཙྩནུབྷཱུཏོ ཡོ ཝིཔཱཀོ ཨཏྠི, ཨེཏཾ ཝིཔཱཀེ ཕལམྤི པཀྑིཔིཏབྦཾ, ཨཡཾ ཝིཔཱཀོ ཏཾཝཱཙཀཉཱཔཀོ པཱཋོཔི ཝིཔཱཀོ ནཱམ། ཙཱུལ༹ཀམྨཝིབྷངྒོ ཙཱུལ༹ཀམྨཝིཔཱཀཔུཐུཏྟཝིབྷཱགོ ཏཐཱ ཝཏྟབྦོ།

    Tattha tasmiṃ ‘‘mā, bhikkhave, puññānaṃ bhāyitthā’’tiādike sutte yañca dānaṃ, yo ca damo, yo ca saṃyamo atthi, idaṃ dānādittayaṃ kammaṃ, taṃvācakañāpakaṃ suttampi kammaṃ nāma. Tappaccayo taṃkammapaccayo paccayuppannabhūto paccanubhūto yo vipāko atthi, etaṃ vipāke phalampi pakkhipitabbaṃ, ayaṃ vipāko taṃvācakañāpako pāṭhopi vipāko nāma. Cūḷakammavibhaṅgo cūḷakammavipākaputhuttavibhāgo tathā vattabbo.

    ཏོདེཡྻཔུཏྟསྶ སུབྷསྶ མཱཎཝསྶ ཡཾ སུཏྟཾ བྷགཝཏཱ དེསིཏཾ, ཏཏྠ སུཏྟེ ཝུཏྟཱ ཡེ པཱཎཱཏིཔཱཏཱདཡོ དྷམྨཱ ཨཔྤཱཡུཀདཱིགྷཱཡུཀཏཱཡ སཾཝཏྟནྟི, ཡེ ཧིཾསནཱདཡོ དྷམྨཱ བཧྭཱབཱདྷཨཔྤཱབཱདྷཏཱཡ སཾཝཏྟནྟི, ཡེ ཨུསཱུཡནཱདཡོ དྷམྨཱ ཨཔྤེསཀྑམཧེསཀྑཏཱཡ སཾཝཏྟནྟི, ཡེ ཀོདྷཱདཡོ དྷམྨཱ དུབྦཎྞསུཝཎྞཏཱཡ སཾཝཏྟནྟི, ཡེ ཨགཱརཝཱདཡོ དྷམྨཱ ནཱིཙཀུལིཀཨུཙྩཀུལིཀཏཱཡ སཾཝཏྟནྟི, ཡེ མཙྪེརཱདཡོ དྷམྨཱ ཨཔྤབྷོགམཧཱབྷོགཏཱཡ སཾཝཏྟནྟི, ཡེ ཨསལླཀྑཎཱདཡོ དྷམྨཱ དུཔྤཉྙཔཉྙཝནྟཏཱཡ སཾཝཏྟནྟི། ཨིདཾ པཱཎཱཏིཔཱཏསཏྟཡུགཾ ཀམྨཾ, ཏཾཝཱཙཀཉཱཔཀཾ སུཏྟམྤི ཀམྨཾ ནཱམ། ཏཏྠ སུབྷསུཏྟེ ཡཱ ཨཔྤཱཡུཀདཱིགྷཱཡུཀཏཱ ཝུཏྟཱ…པེ॰… ཡཱ དུཔྤཉྙཔཉྙཝནྟཏཱ ཝུཏྟཱ, སོ ཨཡཾ ཨཔྤཱཡུཀདཱིགྷཱཡུཀཏཱདིཀོ ཝིཔཱཀོ, ཏཾཝཱཙཀཉཱཔཀཔཱཋོཔི ཝིཔཱཀོ། ཨིདཾ སུབྷསུཏྟཾ ཀུསལཱཀུསལཀམྨེ ཙེཝ ཝིཔཱཀེ ཙ ཝཱཙཀཉཱཔཀབྷཱཝེན པཝཏྟནཏོ ཀམྨཉྩ ཝིཔཱཀོ ཙ ཧོཏི། (༡༤)

    Todeyyaputtassa subhassa māṇavassa yaṃ suttaṃ bhagavatā desitaṃ, tattha sutte vuttā ye pāṇātipātādayo dhammā appāyukadīghāyukatāya saṃvattanti, ye hiṃsanādayo dhammā bahvābādhaappābādhatāya saṃvattanti, ye usūyanādayo dhammā appesakkhamahesakkhatāya saṃvattanti, ye kodhādayo dhammā dubbaṇṇasuvaṇṇatāya saṃvattanti, ye agāravādayo dhammā nīcakulikauccakulikatāya saṃvattanti, ye maccherādayo dhammā appabhogamahābhogatāya saṃvattanti, ye asallakkhaṇādayo dhammā duppaññapaññavantatāya saṃvattanti. Idaṃ pāṇātipātasattayugaṃ kammaṃ, taṃvācakañāpakaṃ suttampi kammaṃ nāma. Tattha subhasutte yā appāyukadīghāyukatā vuttā…pe… yā duppaññapaññavantatā vuttā, so ayaṃ appāyukadīghāyukatādiko vipāko, taṃvācakañāpakapāṭhopi vipāko. Idaṃ subhasuttaṃ kusalākusalakamme ceva vipāke ca vācakañāpakabhāvena pavattanato kammañca vipāko ca hoti. (14)

    ༡༢༢. ཡོ པུགྒལོ ཝཙཱིདུཙྩརིཏཔརིཝཛྫནེན ཝཱཙཱནུརཀྑཱི བྷཝེཡྻ, ཨབྷིཛ྄ཛྷཱདིཨནུཔྤཱདནེན མནསཱ སཾཝུཏོ བྷཝེཡྻ, པཱཎཱཏིཔཱཏཱདིཔཛཧནེན ཀཱཡེན ཨཀུསལཾ ན ཀཡིརཱ, ཨིཏི ཏཡོ ཨེཏེ ཀམྨཔཐེ ཝིསོདྷཡེ, སོ པུགྒལོ ཨིསིཔྤཝེདིཏཾ མགྒཾ ཨརིཡཾ ཨཊྛངྒིཀཾ མགྒཾ ཨཱརཱདྷཡེ ཨཱརཱདྷཡེཡྻཱཏི ཡོཛནཱ། ཨིདཾ ‘‘ཝཱཙཱནུརཀྑཱི’’ཏིཨཱདིཀཾ སུཏྟཾ ཀུསལེ ཝཱཙཀཉཱཔཀབྷཱཝེན པཝཏྟནཏོ ཀུསལཾ ནཱམ།

    122. Yo puggalo vacīduccaritaparivajjanena vācānurakkhī bhaveyya, abhijjhādianuppādanena manasā saṃvuto bhaveyya, pāṇātipātādipajahanena kāyena akusalaṃ na kayirā, iti tayo ete kammapathe visodhaye, so puggalo isippaveditaṃ maggaṃ ariyaṃ aṭṭhaṅgikaṃ maggaṃ ārādhaye ārādhayeyyāti yojanā. Idaṃ ‘‘vācānurakkhī’’tiādikaṃ suttaṃ kusale vācakañāpakabhāvena pavattanato kusalaṃ nāma.

    ཡསྶ པུགྒལསྶ ཀཱཡེན དུཀྐཊཾ དུགྒཏིསཾཝཏྟནིཡཀམྨཾ ནཏྠི, ཝཱཙཱཡ དུཀྐཊཀམྨཾ ནཏྠི, མནསཱ དུཀྐཊཀམྨཾ ནཏྠི, ཏཱིཧི ཋཱནེཧི ཨུཔྤཛྫནཊྛཱནེཧི སཾཝུཏཾ ཏཾ པུགྒལཾ ‘‘བྲཱཧྨཎ’’ནྟི ཨཧཾ ཝདཱམཱིཏི ཡོཛནཱ། ཨིདཾ གཱཐཱཝཙནཾ ཝུཏྟནཡེན ཀུསལཾ ནཱམ།

    Yassa puggalassa kāyena dukkaṭaṃ duggatisaṃvattaniyakammaṃ natthi, vācāya dukkaṭakammaṃ natthi, manasā dukkaṭakammaṃ natthi, tīhi ṭhānehi uppajjanaṭṭhānehi saṃvutaṃ taṃ puggalaṃ ‘‘brāhmaṇa’’nti ahaṃ vadāmīti yojanā. Idaṃ gāthāvacanaṃ vuttanayena kusalaṃ nāma.

    ‘‘ཏཱིཎིམཱནི, བྷིཀྑཝེ…པེ॰… ཀུསལམཱུལཱནཱི’’ཏི ཨིདཾ ཝཙནཾ ཝུཏྟནཡེན ཀུསལཾ། བྷིཀྑཝེ, ཀུསལཱནཾ དྷམྨཱནཾ སམཱཔཏྟིཡཱ ཝིཛྫཱ པུབྦངྒམཱ ཧོཏི, ཧིརཱི ཙ ཨོཏྟཔྤཉྩ ཨནུདེཝཱཏི ཡོཛནཱ། ཨིདཾ ཝཙནཾ ཝུཏྟནཡེན ཀུསལཾ ནཱམ།

    ‘‘Tīṇimāni, bhikkhave…pe… kusalamūlānī’’ti idaṃ vacanaṃ vuttanayena kusalaṃ. Bhikkhave, kusalānaṃ dhammānaṃ samāpattiyā vijjā pubbaṅgamā hoti, hirī ca ottappañca anudevāti yojanā. Idaṃ vacanaṃ vuttanayena kusalaṃ nāma.

    མཱལུཝཱ སཱལཾ རུཀྑཾ ཨོནཏཾ བྷཱུམིཡཾ པཏནཾ ཀརོཏི ཨིཝ, ཏཐཱ ཡསྶ ཛནསྶ ཨཙྩནྟཾ དྭཱིསུ ཏཱིསུ བྷཝེསུ དུསྶཱིལྱཾ ཨཏྠི, སོ ཛནོ ཨཏྟཱནཾ ཨོནཏཾ ཨཔཱཡེསུ པཱཀཊཾ ཀརོཏི། ཨནཏྠཀཱམོ ཛནོ ཡཐཱ ཨནཏྠཾ ཨིཙྪཏི, ཏཐཱ ཨནཏྠཾ ཀརོཏི ཡཐཱ, ཏཐཱ ཨཱིདིསོ དུསྶཱིལོ ནཾ ཨཏྟཱནཾ ཨནཏྠཾ ཀརོཏཱིཏི ཡོཛནཱ། ཨིདཾ ‘‘ཡསྶཱ’’ཏིཨཱདིཀཾ ཝཙནཾ ཝུཏྟནཡེན ཨཀུསལཾ།

    Māluvā sālaṃ rukkhaṃ onataṃ bhūmiyaṃ patanaṃ karoti iva, tathā yassa janassa accantaṃ dvīsu tīsu bhavesu dussīlyaṃ atthi, so jano attānaṃ onataṃ apāyesu pākaṭaṃ karoti. Anatthakāmo jano yathā anatthaṃ icchati, tathā anatthaṃ karoti yathā, tathā īdiso dussīlo naṃ attānaṃ anatthaṃ karotīti yojanā. Idaṃ ‘‘yassā’’tiādikaṃ vacanaṃ vuttanayena akusalaṃ.

    ཨསྨམཡཾ ཨསྨསངྑཱཏཾ པཱསཱཎམཎིམཡཾ ཝཛིརཾ ཝཛིརསྶ ཨུཊྛཱནསངྑཱཏཾ པཱསཱཎམཎིཾ ཨབྷིམཏྠཏི ཝིདྷཾསེཏི ཨིཝ, ཏཐཱ ཨཏྟནཱ ཧི སཡམེཝ ཀཏཾ ཨཏྟཛཾ ཨཏྟསམྦྷཝཾ པཱཔཾ དུམྨེདྷཾ པཱཔཾ ཀརོནྟཾ ཛནཾ ཨབྷིམཏྠཏཱིཏི ཡོཛནཱ། ཨིདཾ ‘‘ཨཏྟནཱ ཧཱི’’ཏིཨཱདིཀཾ ཝཙནཾ ཝུཏྟནཡེན ཨཀུསལཾ།

    Asmamayaṃ asmasaṅkhātaṃ pāsāṇamaṇimayaṃ vajiraṃ vajirassa uṭṭhānasaṅkhātaṃ pāsāṇamaṇiṃ abhimatthati vidhaṃseti iva, tathā attanā hi sayameva kataṃ attajaṃ attasambhavaṃ pāpaṃ dummedhaṃ pāpaṃ karontaṃ janaṃ abhimatthatīti yojanā. Idaṃ ‘‘attanā hī’’tiādikaṃ vacanaṃ vuttanayena akusalaṃ.

    དེཝཏེ ཀུསལེཧི ཝིཝཛྫིཏཱ ཨཀུསལཱ དས ཀམྨཔཐེ ནིསེཝིཡ ཀཏྭཱ གརཧཱ གཱརཡ྄ཧཱ བྷཝནྟི, བཱལམཏཱི མནྡབུདྡྷིནོ ནིརཡེསུ པཙྩརེཏི ཡོཛནཱ། ཨིདཾ ‘‘དས ཀམྨཔཐེ’’ཏིཨཱདིཀཾ སུཏྟཾ ཝུཏྟནཡེན ཨཀུསལཾ།

    Devate kusalehi vivajjitā akusalā dasa kammapathe niseviya katvā garahā gārayhā bhavanti, bālamatī mandabuddhino nirayesu paccareti yojanā. Idaṃ ‘‘dasa kammapathe’’tiādikaṃ suttaṃ vuttanayena akusalaṃ.

    ‘‘ཏཱིཎིམཱནི, བྷིཀྑཝེ…པེ॰… ཨཀུསལམཱུལཱནཱི’’ཏི ཨིདཾ ཝཙནཾ ཝུཏྟནཡེན ཨཀུསལཾ། (༡༥)

    ‘‘Tīṇimāni, bhikkhave…pe… akusalamūlānī’’ti idaṃ vacanaṃ vuttanayena akusalaṃ. (15)

    ཡཱདིསཾ ཡཾ བཱིཛཾ ཝཔཏེ, ཏཾ བཱིཛཾ ཏཱདིསཾ ཕལཾ ཧརཏེ ཨིཝ, ཏཐཱ ཀལྱཱཎཀཱརཱི པཎྜིཏོ ཀལྱཱཎཾ ཕལཾ ཧརཏེ, པཱཔཀཱརཱི བཱལོ ཙ པཱཔཀཾ ཕལཾ ཧརཏེཏི ཡོཛནཱ། ཏཏྠ ‘‘ཡཱདིས’’ནྟིཨཱདིཀེ སུཏྟེ ‘‘ཀལྱཱཎཀཱརཱི ཀལྱཱཎ’’ནྟི ཡཾ ཝཙནཾ ཨཱཧ, ཨིདཾ ཝཙནཾ ཀུསལཾ། ‘‘པཱཔཀཱརཱི ཙ པཱཔཀ’’ནྟི ཡཾ ཝཙནཾ ཨཱཧ, ཨིདཾ ཝཙནཾ ཨཀུསལཾ། ཨིདཾ དྭིཝཙནཾ ཝུཏྟནཡེན ཀུསལཉྩ ཨཀུསལཉྩ ཧོཏི།

    Yādisaṃ yaṃ bījaṃ vapate, taṃ bījaṃ tādisaṃ phalaṃ harate iva, tathā kalyāṇakārī paṇḍito kalyāṇaṃ phalaṃ harate, pāpakārī bālo ca pāpakaṃ phalaṃ harateti yojanā. Tattha ‘‘yādisa’’ntiādike sutte ‘‘kalyāṇakārī kalyāṇa’’nti yaṃ vacanaṃ āha, idaṃ vacanaṃ kusalaṃ. ‘‘Pāpakārī ca pāpaka’’nti yaṃ vacanaṃ āha, idaṃ vacanaṃ akusalaṃ. Idaṃ dvivacanaṃ vuttanayena kusalañca akusalañca hoti.

    ཀལྱཱཎཀཱརཱི སཔྤུརིསཱ སུབྷེན ཀམྨེན སུགྒཏིཾ ཝཛནྟི གཙྪནྟི, པཱཔཀཱརཱི ཀཱཔུརིསཱ ཨསུབྷེན ཀམྨུནཱ ཨཔཱཡབྷཱུམིཾ ཝཛནྟི གཙྪནྟི, ཀམྨསྶ ཨབྷིསངྑཱརཝིཉྙཱཎསཧགཏཀམྨསྶ ཁཡཱ ཁཡནཏོ ཝིམུཏྟཙེཏསཱ སམུཙྪེདཝིམུཏྟིཔཊིཔྤསྶདྡྷིཝིམུཏྟིཙིཏྟཱ ཏེ སཔྤུརིསཱ ཨསུབྷེ ནིབྦནྟི། ཀིམིཝ ནིབྦནྟི? ཨིནྡྷནཀྑཡཱ ཛོཏི ནིབྦཱཏི ཨིཝ, ཏཐཱ ཏེ སཔྤུརིསཱ ཀམྨསྶ ཁཡཱ ཨནཝསེསཁཡནཏོ ནིབྦནྟཱིཏི ཡོཛནཱ། ཏཏྠ ཏསྨིཾ ‘‘སུབྷེནཱ’’ཏིཨཱདིགཱཐཱཝཙནེ ‘‘སུབྷེན…པེ॰… སུགྒཏི’’ནྟི ཡཾ ཝཙནཾ ཨཱཧ, ཨིདཾ ‘‘སུབྷེན…པེ॰…སུགྒཏི’’ནྟི ཝཙནཾ ཀུསལེ ཝཱཙཀཉཱཔཀབྷཱཝེན པཝཏྟནཏོ ཀུསལཾ ནཱམ། ‘‘ཨཔཱཡབྷཱུམིཾ ཨསུབྷེན ཀམྨུནཱ’’ཏི ཡཾ ཝཙནཾ ཨཱཧ , ཨིདཾ ‘‘ཨཔཱཡ…པེ॰… ཀམྨུནཱ’’ཏི ཝཙནཾ ཨཀུསལེ ཝཱཙཀཉཱཔཀབྷཱཝེན པཝཏྟནཏོ ཨཀུསལཾ ནཱམ། ཨིདཾ ‘‘སུབྷེནཱ’’ཏིཨཱདིཀཾ གཱཐཱཝཙནཾ ཝུཏྟནཡེན ཀུསལཉྩ ཨཀུསལཉྩ ཧོཏི། (༡༦)

    Kalyāṇakārī sappurisā subhena kammena suggatiṃ vajanti gacchanti, pāpakārī kāpurisā asubhena kammunā apāyabhūmiṃ vajanti gacchanti, kammassa abhisaṅkhāraviññāṇasahagatakammassa khayā khayanato vimuttacetasā samucchedavimuttipaṭippassaddhivimutticittā te sappurisā asubhe nibbanti. Kimiva nibbanti? Indhanakkhayā joti nibbāti iva, tathā te sappurisā kammassa khayā anavasesakhayanato nibbantīti yojanā. Tattha tasmiṃ ‘‘subhenā’’tiādigāthāvacane ‘‘subhena…pe… suggati’’nti yaṃ vacanaṃ āha, idaṃ ‘‘subhena…pe…suggati’’nti vacanaṃ kusale vācakañāpakabhāvena pavattanato kusalaṃ nāma. ‘‘Apāyabhūmiṃ asubhena kammunā’’ti yaṃ vacanaṃ āha , idaṃ ‘‘apāya…pe… kammunā’’ti vacanaṃ akusale vācakañāpakabhāvena pavattanato akusalaṃ nāma. Idaṃ ‘‘subhenā’’tiādikaṃ gāthāvacanaṃ vuttanayena kusalañca akusalañca hoti. (16)

    ༡༢༣. ‘‘ཡཐཱཔི བྷམརོ པུཔྥཾ…པེ॰… མུནཱི ཙརེ’’ཏི ཨིདཾ གཱཐཱཝཙནཾ ཨནུཉྙཱཏེ ཙརཎེ ཝཱཙཀཉཱཔཀབྷཱཝེན པཝཏྟནཏོ ཨནུཉྙཱཏཾ ནཱམ།

    123.‘‘Yathāpi bhamaro pupphaṃ…pe… munī care’’ti idaṃ gāthāvacanaṃ anuññāte caraṇe vācakañāpakabhāvena pavattanato anuññātaṃ nāma.

    བྷམརོ ནཱམ པུཔྥརསཔིཝནགཧཎཝསེན ཙརཎཀོ མདྷུཀརཱདིཀོ བྷམརོ། སོ པུཔྥརསཾ གཎྷནྟོ མནྡཝེགོ ཧུཏྭཱ པུཔྥཉྩ ཝཎྞཉྩ གནྡྷཉྩ ཨཝིནཱསེཏྭཱ ཡཱཝདཏྠཾ པུཔྥརསཾ པིཝིཏྭཱ མདྷུཀརཎཏྠཱཡ ཙ པུཔྥརསཾ གཧེཏྭཱ མདྷུཀརཎཊྛཱནཾ ཝནསཎྜཾ པལེཏི། པུཔྥཝཎྞགནྡྷཱ པཱཀཏིཀཱཝ ཧོནྟི། ཨེཝམེཝ པིཎྜཱཡ གཱམཾ པཝིསནྟོ མུནི པསཱདཛནཀཾ ཨཱལོཀནཝིལོཀནགམནཏིཊྛནཱདིཀཾ ཛནེཏྭཱ པཱིཏིསོམནསྶསཧིཏཾ པསཱདཾ ཛནེཏྭཱ སདྡྷཱདེཡྻཾ པིཎྜཔཱཏཾ ཡཱཔནམཏྟཾ པཊིགྒཧེཏྭཱ གཱམཏོ ནིཀྑམིཏྭཱ ཨུདཀཕཱསུཀཊྛཱནེ ཝནེ བྷེསཛྫཾ ལིམྤནྟོ ཝིཡ, ཀནྟཱརེ པུཏྟམཾསཾ ཁཱདནྟོ ཝིཡ, པིཎྜཔཱཏཾ པཙྩཝེཀྑིཏྭཱ པརིབྷུཉྫིཏྭཱ བྷམརོ ཝནེ མདྷུཾ ཀརོཏི ཝིཡ, ཀམྨཊྛཱནཱནུརཱུཔཾ ཝནསཎྜཾ པཝིསིཏྭཱ ཛྷཱནམགྒཕལནིབྦཏྟནཏྠཱཡ སམཎདྷམྨཀརཎཏྠཱཡ གཱམེ ཙརེ ཙརེཡྻཱཏི ཨདྷིཔྤཱཡོ ཝེདིཏབྦོ།

    Bhamaro nāma puppharasapivanagahaṇavasena caraṇako madhukarādiko bhamaro. So puppharasaṃ gaṇhanto mandavego hutvā pupphañca vaṇṇañca gandhañca avināsetvā yāvadatthaṃ puppharasaṃ pivitvā madhukaraṇatthāya ca puppharasaṃ gahetvā madhukaraṇaṭṭhānaṃ vanasaṇḍaṃ paleti. Pupphavaṇṇagandhā pākatikāva honti. Evameva piṇḍāya gāmaṃ pavisanto muni pasādajanakaṃ ālokanavilokanagamanatiṭṭhanādikaṃ janetvā pītisomanassasahitaṃ pasādaṃ janetvā saddhādeyyaṃ piṇḍapātaṃ yāpanamattaṃ paṭiggahetvā gāmato nikkhamitvā udakaphāsukaṭṭhāne vane bhesajjaṃ limpanto viya, kantāre puttamaṃsaṃ khādanto viya, piṇḍapātaṃ paccavekkhitvā paribhuñjitvā bhamaro vane madhuṃ karoti viya, kammaṭṭhānānurūpaṃ vanasaṇḍaṃ pavisitvā jhānamaggaphalanibbattanatthāya samaṇadhammakaraṇatthāya gāme care careyyāti adhippāyo veditabbo.

    ‘‘ཏཱིཎིམཱནི, བྷིཀྑཝེ, བྷིཀྑཱུནཾ ཀརཎཱིཡཱནི…པེ॰… ཨིམཱནི ཁོ, བྷིཀྑཝེ, བྷིཀྑཱུནཾ ཏཱིཎི ཀརཎཱིཡཱནཱི’’ཏི ཨིདཾ སུཏྟཾ བྷགཝཏཱ ཨནུཉྙཱཏེ ཨཱཙཱརེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ཨནུཉྙཱཏཾ ནཱམ། ཏསྨིཾ སུཏྟེ ཡོ བྷིཀྑུ སཱིལཾ པཱཏི རཀྑཏི, ཨིཏི རཀྑཎཏོ སོ བྷིཀྑུ པཱཏི ནཱམ། ཡཾ སཱིལཾ ཏཾ པཱཏིཾ བྷིཀྑུཾ ཨཔཱཡཱདིདུཀྑཏོ མོཙེཏི, ཨིཏི མོཙནཏོ ཏཾ སཱིལཾ པཱཏིམོཀྑཾ ནཱམ། ཡེན སཱིལེན བྷིཀྑུ སཾཝརིཏབྦཙཀྑུནྡྲིཡཱདིཀཾ སཾཝརཏི, ཨིཏི སཾཝརཎཀརཎཏོ ཏཾ སཱིལཾ སཾཝརཾ ནཱམ, པཱཏིམོཀྑཾ ཨེཝ སཾཝརཾ པཱཏིམོཀྑསཾཝརཾ, པཱཏིམོཀྑསཾཝརེན སཾཝུཏོ སམནྣཱགཏོ ཧུཏྭཱ སཾཝུཎནཏོ ཙཏུཨིརིཡཱཔཐེསུ ཙཱརཀོ ཧོཏི, ཨིཏི སཾཝུཎནཏོ བྷིཀྑུ པཱཏིམོཀྑསཾཝརསཾཝུཏོ ནཱམ། ཝིཧརཏི ཙཏུཨིརིཡཱཔཐེ པཝཏྟེཏི། ཝཱརིཏྟཙཱརཾ ཝཛྫེཏྭཱ ཙཱརིཏྟསཱིལཾ ཨཱདཱཡ ཙརཎཾ ཨཱཙཱརོ, ཨགོཙརེ ཝཛྫེཏྭཱ གོཙརེ ཙརཎཾ གོཙརོཏི། ཨཏྠོ ཝུཙྩམཱནོ ཨཏིཝིཏྠཱརོ བྷཝིསྶཏི, ཏསྨཱ ཀིཉྩིམཏྟཾ ཀཐེཏྭཱ སཱསནཔཊྛཱནསུཏྟབྷཱཝཾ ཀཐེསྶཱམ།

    ‘‘Tīṇimāni, bhikkhave, bhikkhūnaṃ karaṇīyāni…pe… imāni kho, bhikkhave, bhikkhūnaṃ tīṇi karaṇīyānī’’ti idaṃ suttaṃ bhagavatā anuññāte ācāre atthe vācakañāpakabhāvena pavattanato anuññātaṃ nāma. Tasmiṃ sutte yo bhikkhu sīlaṃ pāti rakkhati, iti rakkhaṇato so bhikkhu pāti nāma. Yaṃ sīlaṃ taṃ pātiṃ bhikkhuṃ apāyādidukkhato moceti, iti mocanato taṃ sīlaṃ pātimokkhaṃ nāma. Yena sīlena bhikkhu saṃvaritabbacakkhundriyādikaṃ saṃvarati, iti saṃvaraṇakaraṇato taṃ sīlaṃ saṃvaraṃ nāma, pātimokkhaṃ eva saṃvaraṃ pātimokkhasaṃvaraṃ, pātimokkhasaṃvarena saṃvuto samannāgato hutvā saṃvuṇanato catuiriyāpathesu cārako hoti, iti saṃvuṇanato bhikkhu pātimokkhasaṃvarasaṃvuto nāma. Viharati catuiriyāpathe pavatteti. Vārittacāraṃ vajjetvā cārittasīlaṃ ādāya caraṇaṃ ācāro, agocare vajjetvā gocare caraṇaṃ gocaroti. Attho vuccamāno ativitthāro bhavissati, tasmā kiñcimattaṃ kathetvā sāsanapaṭṭhānasuttabhāvaṃ kathessāma.

    ‘‘ཨེཏྟཀམེཝ སུཏྟཾ ‘ཨནུཉྙཱཏ’ནྟི ནིདྡྷཱརིཏབྦ’’ནྟི ཝཏྟབྦཏྟཱ ‘‘དསཡིམེ, བྷིཀྑཝེ, དྷམྨཱ པབྦཛིཏེན ཨབྷིཎྷཾ པཙྩཝེཀྑིཏབྦཱ’’ཏིཨཱདི ཝུཏྟཾ། ཨིདཾ ‘‘དསཱ’’ཏིཨཱདིཀཾ སུཏྟམྤི ཨནུཉྙཱཏེ དསཝིདྷེ པཙྩཝེཀྑིཏབྦེ དྷམྨེ ཝཱཙཀཉཱཔཀབྷཱཝེན པཝཏྟནཏོ ཨནུཉྙཱཏཾ ནཱམ། ‘‘ཏཱིཎིམཱནི…པེ॰… ཀརཎཱིཡཱནཱི’’ཏི ཨིདཾ སུཏྟམྤི ཨནུཉྙཱཏེ ཏིཝིདྷེ སུཙརིཏེ ཝཱཙཀཉཱཔཀབྷཱཝེན པཝཏྟནཏོ ཨནུཉྙཱཏཾ ནཱམ།

    ‘‘Ettakameva suttaṃ ‘anuññāta’nti niddhāritabba’’nti vattabbattā ‘‘dasayime, bhikkhave, dhammā pabbajitena abhiṇhaṃ paccavekkhitabbā’’tiādi vuttaṃ. Idaṃ ‘‘dasā’’tiādikaṃ suttampi anuññāte dasavidhe paccavekkhitabbe dhamme vācakañāpakabhāvena pavattanato anuññātaṃ nāma. ‘‘Tīṇimāni…pe… karaṇīyānī’’ti idaṃ suttampi anuññāte tividhe sucarite vācakañāpakabhāvena pavattanato anuññātaṃ nāma.

    ནཱནཱཝིདྷཾ ཨནུཉྙཱཏཾ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སུཏྟཾ པཊིཀྑིཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ པཊིཀྑིཏྟ’’ནྟིཨཱདི ཝུཏྟཾ།

    Nānāvidhaṃ anuññātaṃ suttaṃ ācariyena niddhāritaṃ, amhehi ca ñātaṃ, ‘‘katamaṃ suttaṃ paṭikkhitta’’nti pucchitabbattā ‘‘tattha katamaṃ paṭikkhitta’’ntiādi vuttaṃ.

    ‘‘ནཏྠི པུཏྟསམཾ པེམཾ, ནཏྠི གོསམིཏཾ དྷནཾ།

    ‘‘Natthi puttasamaṃ pemaṃ, natthi gosamitaṃ dhanaṃ;

    ནཏྠི སཱུརིཡསམཱ ཨཱབྷཱ, སམུདྡཔརམཱ སརཱ’’ཏི༎ –

    Natthi sūriyasamā ābhā, samuddaparamā sarā’’ti. –

    ཨིདཾ དེཝཔུཏྟཝཙནཾ པཊིཀྑིཔནྟོ བྷགཝཱ –

    Idaṃ devaputtavacanaṃ paṭikkhipanto bhagavā –

    ‘‘ནཏྠི ཨཏྟསམཾ པེམཾ, ནཏྠི དྷཉྙསམཾ དྷནཾ།

    ‘‘Natthi attasamaṃ pemaṃ, natthi dhaññasamaṃ dhanaṃ;

    ནཏྠི པཉྙཱསམཱ ཨཱབྷཱ, ཝུཊྛི ཝེ པརམཱ སརཱ’’ཏི༎ –

    Natthi paññāsamā ābhā, vuṭṭhi ve paramā sarā’’ti. –

    གཱཐཾ ཨཱཧ། ཨེཏྠ ཨེཏསྨིཾ གཱཐཱདྭཡེ ཡཾ ‘‘ནཏྠི པུཏྟསམཾ པེམ’’ནྟིཨཱདིཀཾ པུརིམཀཾ ཧོཏི། ཨིདཾ ‘‘ནཏྠི པུཏྟསམཾ པེམ’’ནྟིཨཱདིཀཾ དེཝཔུཏྟཝཙནཾ བྷགཝཏཱ པཊིཀྑིཏྟཏྟཱ, པཊིཀྑིཏྟེ ཨཏྠེ པཝཏྟནཏོ ཙ པཊིཀྑིཏྟཾ ནཱམ།

    Gāthaṃ āha. Ettha etasmiṃ gāthādvaye yaṃ ‘‘natthi puttasamaṃ pema’’ntiādikaṃ purimakaṃ hoti. Idaṃ ‘‘natthi puttasamaṃ pema’’ntiādikaṃ devaputtavacanaṃ bhagavatā paṭikkhittattā, paṭikkhitte atthe pavattanato ca paṭikkhittaṃ nāma.

    དུབྦྷིཀྑཀཱལེ ཝཱ ཀནྟཱརེ ཝཱ མཱཏཱཔིཏརོ པུཏྟདྷཱིཏརོ གྷཱཏེཏྭཱཔི ཨཏྟཱནམེཝ པོསེནྟི, ཏསྨཱ ‘‘ནཏྠི ཨཏྟསམཾ པེམ’’ནྟི ཝུཏྟཾ། དུབྦྷིཀྑཀཱལཱདཱིསུ ཧིརཉྙསུཝཎྞསཱརཱདཱིནི, གོམཧིཾསཱདཱིནིཔི དྷཉྙགཧཎཏྠཱཡ དྷཉྙསྶཱམིཀཱནཾ དཏྭཱ དྷཉྙམེཝ གཎྷནྟི, ཏསྨཱ ‘‘ནཏྠི དྷཉྙསམཾ དྷན’’ནྟི ཝུཏྟཾ། སཱུརིཡཱདཱིནཾ ཨཱབྷཱ པཙྩུཔྤནྣཏམཾ ཨེཀདེསཾཝ ཝིནོདེཏི, པཉྙཱ པན དསསཧསྶིལོཀདྷཱཏུམྤི ཨེཀཔཛྫོཏཾ ཨེཀོབྷཱསཾ ཀཱཏུཾ སམཏྠཱ, ཨཏཱིཏཱནཱགཏཔཙྩུཔྤནྣདྷམྨཀོཊྛཱསེསུཔི པཊིཙྪཱདཀཾ ཀིལེསཏམམྤི ཝིདྷམཏི, ཏསྨཱ ‘‘ནཏྠི པཉྙཱསམཱ ཨཱབྷཱ’’ཏི ཝུཏྟཾ། སམུདྡོ བྷཱུམིཡཱ ཙ ཨེཀདེསེཡེཝ ཏིཊྛཏི, སོ ཙ དེཝེ ཨཝུཊྛེ སཏི ཁཡནསབྷཱཝོ བྷཝེཡྻ, ཝུཊྛི པན ཀོཊིསཏསཧསྶཙཀྐཝཱལེ༹སུཔི ཡཱཝ ཨཱབྷསྶརཱ བྲཧྨལོཀཱཔི པཱུརཱ བྷཝཏི, ཏསྨཱ ‘‘ཝུཊྛི ཝེ པརམཱསརཱ’’ཏི ཝུཏྟཾ།

    Dubbhikkhakāle vā kantāre vā mātāpitaro puttadhītaro ghātetvāpi attānameva posenti, tasmā ‘‘natthi attasamaṃ pema’’nti vuttaṃ. Dubbhikkhakālādīsu hiraññasuvaṇṇasārādīni, gomahiṃsādīnipi dhaññagahaṇatthāya dhaññassāmikānaṃ datvā dhaññameva gaṇhanti, tasmā ‘‘natthi dhaññasamaṃdhana’’nti vuttaṃ. Sūriyādīnaṃ ābhā paccuppannatamaṃ ekadesaṃva vinodeti, paññā pana dasasahassilokadhātumpi ekapajjotaṃ ekobhāsaṃ kātuṃ samatthā, atītānāgatapaccuppannadhammakoṭṭhāsesupi paṭicchādakaṃ kilesatamampi vidhamati, tasmā ‘‘natthi paññāsamā ābhā’’ti vuttaṃ. Samuddo bhūmiyā ca ekadeseyeva tiṭṭhati, so ca deve avuṭṭhe sati khayanasabhāvo bhaveyya, vuṭṭhi pana koṭisatasahassacakkavāḷesupi yāva ābhassarā brahmalokāpi pūrā bhavati, tasmā ‘‘vuṭṭhi ve paramāsarā’’ti vuttaṃ.

    ‘‘ཨིདམེཝ པཊིཀྑིཏྟཾ ནིདྡྷཱརིཏབྦ’’ནྟི ཝཏྟབྦཏྟཱ ‘‘ཏཱིཎིམཱནི བྷིཀྑཝེ’’ཏིཨཱདི ཝུཏྟཾ། ཨིདཾ ‘‘ཏཱིཎིམཱནཱི’’ཏིཨཱདིཀཾ སུཏྟམྤི པཊིཀྑིཏྟེ དུཙྩརིཏེ ཝཱཙཀཉཱཔཀབྷཱཝེན པཝཏྟནཏོ པཊིཀྑིཏྟཾ ནཱམ། (༡༧)

    ‘‘Idameva paṭikkhittaṃ niddhāritabba’’nti vattabbattā ‘‘tīṇimāni bhikkhave’’tiādi vuttaṃ. Idaṃ ‘‘tīṇimānī’’tiādikaṃ suttampi paṭikkhitte duccarite vācakañāpakabhāvena pavattanato paṭikkhittaṃ nāma. (17)

    ༡༢༤. ནཱནཱཝིདྷཾ པཊིཀྑིཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ ཨནུཉྙཱཏཉྩ པཊིཀྑིཏྟཉྩཱ’’ཏི པུཙྪིཏབྦཏྟཱ ‘‘ཏཏྠ ཀཏམཾ ཨནུཉྙཱཏཉྩཱ’’ཏིཨཱདི ཝུཏྟཾ།

    124. Nānāvidhaṃ paṭikkhittaṃ ācariyena niddhāritaṃ, amhehi ca ñātaṃ, ‘‘katamaṃ anuññātañca paṭikkhittañcā’’ti pucchitabbattā ‘‘tattha katamaṃ anuññātañcā’’tiādi vuttaṃ.

    བྷཱུརིཔཉྙབྷཱུརིཔཉྙཝནྟ གོཏམ, ཏཾ བྷཱུརིཔཉྙཾ གོཏམཾ ཨཧཾ པུཙྪཱམི། ཨིདྷ ལོཀེ ཨནེཀཱ ཡཱ ཛནཏཱ བྷཱིཏཱ, སཱ ཛནཏཱ ཀིཾསུ ཀཏམཱ བྷཝེ། ཡོ ཙ མགྒོ ཨནེཀཱཡཏནོ ཨིཏི པཝུཏྟོ, སོ ཙ མགྒོ ཀིཾསུ ཀཏམོ བྷཝེ། ཀིསྨིཾ དྷམྨེ ཋིཏོ ཛནོ པརལོཀཾ ན བྷཱཡེ ན བྷཱཡེཡྻཱཏི པུཙྪཏཱིཏི ཡོཛནཱ།

    Bhūripaññabhūripaññavanta gotama, taṃ bhūripaññaṃ gotamaṃ ahaṃ pucchāmi. Idha loke anekā yā janatā bhītā, sā janatā kiṃsu katamā bhave. Yo ca maggo anekāyatano iti pavutto, so ca maggo kiṃsu katamo bhave. Kismiṃ dhamme ṭhito jano paralokaṃ na bhāye na bhāyeyyāti pucchatīti yojanā.

    དེཝཔུཏྟ ཡོ ཛནོ སམྨཱཝཱཙཉྩ པཎིདྷཱཡ, སམྨཱམནཉྩ པཎིདྷཱཡ, ཀཱཡེན པཱཔཱནི ཨཀུབྦམཱནོ ཙ བྷཝེ, ཨཡཾ ཨེཀོ། བཧྭནྣཔཱནཾ གྷརཾ ཨཱཝསནྟོ ཙ བྷཝེ, ཨཡཾ ཨེཀོ། སདྡྷོ སདྡྷཱསམྤནྣོ ཙིཏྟམུདུབྷཱཝེན མུདུ ཙ བྷཝེ, ཨཡཾ ཨེཀོ། ཝདཉྙཱུ ཡཱཙཀཱནཾ ཡཱཙནཝསེན ཝུཏྟཝཙནཉྙཱུ ཧུཏྭཱ སཾཝིབྷཱགཱི ཙ བྷཝེ, ཨཡཾ ཨེཀོ། ཨིཏི ཨེཏེསུ ཙཏཱུསུ དྷམྨེསུ ཋིཏོ ཛནོ དྷམྨེསུ ཋིཏོ ཧུཏྭཱ པརལོཀཾ ན བྷཱཡེ ན བྷཱཡེཡྻཱཏི ཡོཛནཱ།

    Devaputta yo jano sammāvācañca paṇidhāya, sammāmanañca paṇidhāya, kāyena pāpāni akubbamāno ca bhave, ayaṃ eko. Bahvannapānaṃ gharaṃ āvasanto ca bhave, ayaṃ eko. Saddho saddhāsampanno cittamudubhāvena mudu ca bhave, ayaṃ eko. Vadaññū yācakānaṃ yācanavasena vuttavacanaññū hutvā saṃvibhāgī ca bhave, ayaṃ eko. Iti etesu catūsu dhammesu ṭhito jano dhammesu ṭhito hutvā paralokaṃ na bhāye na bhāyeyyāti yojanā.

    ‘‘ཏསྨིཾ སུཏྟེ ཀཏམཾ ཨནུཉྙཱཏཾ, ཀཏམཾ པཊིཀྑིཏྟཾ ནཱམཱ’’ཏི པུཙྪིཏབྦཏྟཱ ‘‘ཏཏྠ ཡཾ ཨཱཧཱ’’ཏིཨཱདི ཝུཏྟཾ། ཏཏྠ ཏསྨིཾ ‘‘ཀིཾསཱུདྷཱ’’ཏིཨཱདིཔཉྷཱཡ ཝིསྶཛྫནེ ‘‘ཝཱཙཾ མནཉྩཱ’’ཏིཨཱདིཝཙནེ ‘‘ཝཱཙཾ མནཉྩ པཎིདྷཱཡ སམྨཱ’’ཏི ཡཾ ཝཙནཾ བྷགཝཱ ཨཱཧ, ཨིདཾ ‘‘ཝཱཙཾ…པེ॰… སམྨཱ’’ཏི ཝཙནཾ ཨནུཉྙཱཏེ ཝཙནཱིཡཱདིཀེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ཨནུཉྙཱཏཾ ནཱམ། ‘‘ཀཱཡེན པཱཔཱནི ཨཀུབྦམཱནོ’’ཏི ཡཾ ཝཙནཾ ཨཱཧ, ཨིདཾ ‘‘ཀཱཡེན …པེ॰… མཱནོ’’ཏི ཝཙནཾ པཱཔཀུབྦེན པཊིཀྑིཏྟེ ཝུཏྟནཡེན པཝཏྟནཏོ པཊིཀྑིཏྟཾ ནཱམ། ‘‘བཧྭནྣ…པེ॰… ན བྷཱཡེ’’ཏི ཡཾ ཝཙནཾ ཨཱཧ, ཨིདཾ ‘‘བཧྭནྣ…པེ॰… ན བྷཱཡེ’’ཏི ཝཙནཾ ཝུཏྟནཡེན ཨནུཉྙཱཏཾ ནཱམ། ཨིདཾ ‘‘ཝཱཙ’’ནྟིཨཱདིཀཾ ཝཙནཾ ཝུཏྟནཡདྭཡེན ཨནུཉྙཱཏཉྩ པཊིཀྑིཏྟཉྩ ཧོཏི།

    ‘‘Tasmiṃ sutte katamaṃ anuññātaṃ, katamaṃ paṭikkhittaṃ nāmā’’ti pucchitabbattā ‘‘tattha yaṃ āhā’’tiādi vuttaṃ. Tattha tasmiṃ ‘‘kiṃsūdhā’’tiādipañhāya vissajjane ‘‘vācaṃ manañcā’’tiādivacane ‘‘vācaṃ manañca paṇidhāya sammā’’ti yaṃ vacanaṃ bhagavā āha, idaṃ ‘‘vācaṃ…pe… sammā’’ti vacanaṃ anuññāte vacanīyādike atthe vācakañāpakabhāvena pavattanato anuññātaṃ nāma. ‘‘Kāyena pāpāni akubbamāno’’ti yaṃ vacanaṃ āha, idaṃ ‘‘kāyena …pe… māno’’ti vacanaṃ pāpakubbena paṭikkhitte vuttanayena pavattanato paṭikkhittaṃ nāma. ‘‘Bahvanna…pe… na bhāye’’ti yaṃ vacanaṃ āha, idaṃ ‘‘bahvanna…pe… na bhāye’’ti vacanaṃ vuttanayena anuññātaṃ nāma. Idaṃ ‘‘vāca’’ntiādikaṃ vacanaṃ vuttanayadvayena anuññātañca paṭikkhittañca hoti.

    ‘‘སབྦཔཱཔསྶ ཨཀརཎ’’ནྟིཨཱདིཀོ ཝུཏྟཏྠོཝ། ‘‘ཏསྨིཾ སབྦཔཱཔསྶཱཏིཨཱདིཀེ ཀཏམཾ ཨནུཉྙཱཏཾ, ཀཏམཾ པཊིཀྑིཏྟ’’ནྟི ཝཏྟབྦབྷཱཝཏོ ‘‘ཏཏྠ ཡ’’ནྟིཨཱདི ཝུཏྟཾ།

    ‘‘Sabbapāpassa akaraṇa’’ntiādiko vuttatthova. ‘‘Tasmiṃ sabbapāpassātiādike katamaṃ anuññātaṃ, katamaṃ paṭikkhitta’’nti vattabbabhāvato ‘‘tattha ya’’ntiādi vuttaṃ.

    དེཝཱནམིནྡ, ཨཧཾ ཀཱཡསམཱཙཱརམྤི དུཝིདྷེན ཝདཱམི – སེཝིཏབྦཾ ཨནཝཛྫཾ ཀཱཡསམཱཙཱརམྤི ཝདཱམི, ཨསེཝིཏབྦཾ སཱཝཛྫཾ ཀཱཡསམཱཙཱརམྤི ཨཧཾ ཝདཱམི། ཝཙཱིསམཱཙཱརཱདཱིསུཔི ཝུཏྟནཡཱནུསཱརེན ཡོཛནཱ ཀཱཏབྦཱ།

    Devānaminda, ahaṃ kāyasamācārampi duvidhena vadāmi – sevitabbaṃ anavajjaṃ kāyasamācārampi vadāmi, asevitabbaṃ sāvajjaṃ kāyasamācārampi ahaṃ vadāmi. Vacīsamācārādīsupi vuttanayānusārena yojanā kātabbā.

    ‘‘ཀིཉྩ ཝཌྜྷནཧཱཡནཾ ཨཱགམྨ ཀཱཡསམཱཙཱརཱདིཀཾ སེཝིཏབྦཱསེཝིཏབྦབྷེདེན ཝུཏྟ’’ནྟི ཝཏྟབྦབྷཱཝཏོ ‘‘ཀིཉྩེཏཾ པཊིཙྩཱ’’ཏིཨཱདི ཝུཏྟཾ། ཨཀུསལདྷམྨཝཌྜྷནཾ, ཀུསལདྷམྨཧཱཡནཉྩ པཊིཙྩ ཀཱཡསམཱཙཱརཱདཡོ ན སེཝིཏབྦཱ, ཀུསལདྷམྨཝཌྜྷནཾ, ཨཀུསལདྷམྨཧཱཡནཉྩ པཊིཙྩ ཀཱཡསམཱཙཱརཱདཡོ སེཝིཏབྦཱཏི སལླཀྑེཏབྦཱ། (༡༨)

    ‘‘Kiñca vaḍḍhanahāyanaṃ āgamma kāyasamācārādikaṃ sevitabbāsevitabbabhedena vutta’’nti vattabbabhāvato ‘‘kiñcetaṃ paṭiccā’’tiādi vuttaṃ. Akusaladhammavaḍḍhanaṃ, kusaladhammahāyanañca paṭicca kāyasamācārādayo na sevitabbā, kusaladhammavaḍḍhanaṃ, akusaladhammahāyanañca paṭicca kāyasamācārādayo sevitabbāti sallakkhetabbā. (18)

    ༡༢༥. ནཱནཱཝིདྷཾ ཨནུཉྙཱཏཉྩ པཊིཀྑིཏྟཉྩ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམོ སུཏྟཝིསེསོ ཐཝོ’’ཏི པུཙྪིཏབྦཏྟཱ ཏཐཱ པུཙྪིཏྭཱ ཨཡཾ སུཏྟཝིསེསོ ཐཝོ ནཱམཱཏི ཝིཉྙཱཔེཏུཾ ‘‘ཏཏྠ ཀཏམོ ཐཝོ’’ཏིཨཱདི ཝུཏྟཾ། ཏཏྠ ཏཏྠཱཏི ཏེསུ ཨཊྛཝཱིསཏིཝིདྷེསུ ལོཀིཡཱདཱིསུ སཱསནཔཊྛཱནསུཏྟེསུ ཀཏམོ སུཏྟཝིསེསོ ཐཝོ ནཱམཱཏི པུཙྪཏི།

    125. Nānāvidhaṃ anuññātañca paṭikkhittañca ācariyena niddhāritaṃ, amhehi ca ñātaṃ, ‘‘katamo suttaviseso thavo’’ti pucchitabbattā tathā pucchitvā ayaṃ suttaviseso thavo nāmāti viññāpetuṃ ‘‘tattha katamo thavo’’tiādi vuttaṃ. Tattha tatthāti tesu aṭṭhavīsatividhesu lokiyādīsu sāsanapaṭṭhānasuttesu katamo suttaviseso thavo nāmāti pucchati.

    མགྒཱནཾ ཛངྒྷམགྒདིཊྛིམགྒཱདཱིནཾ ཨཊྛངྒིཀོ སམྨཱདིཊྛིམགྒངྒཱདིཨཊྛངྒིཀོ མགྒོ སེཊྛོ ཨུཏྟམོ། སཙྩཱནཾ ཝཙཱིསཙྩཁཏྟིཡཱདིསམྨུཏིསཙྩཔརམཏྠསཙྩཱནཾ ཙཏུརོ དུཀྑསམུདཡནིརོདྷནིརོདྷགཱམིནིཔཊིཔདཱཝསེན ཙཏུརོ ཨརིཡསཙྩཱ པདཱ སེཊྛཱ ཨུཏྟམཱ། དྷམྨཱནཾ སབྦསངྑཏསཔྤཙྩཡདྷམྨཱནཾ ཝིརཱགོ ཨསངྑཏནིབྦཱནསངྑཱཏོ ཝིརཱགོ དྷམྨོ སེཊྛོ ཨུཏྟམོ། དྭིཔདཱནཾ སབྦདེཝམནུསྶཱདཱིནཾ དྭིཔདཱནཾ ཙཀྑུམཱ པཉྩཝིདྷཙཀྑུམཱ བྷགཝཱ སེཊྛོ ཨུཏྟམོཏི ཡོཛནཱ། ཨཡཾ ‘‘མགྒཱནཊྛངྒིཀོ’’ཏིཨཱདིསུཏྟཝིསེསོ ཐཝེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ཐཝོ ནཱམ།

    Maggānaṃ jaṅghamaggadiṭṭhimaggādīnaṃ aṭṭhaṅgiko sammādiṭṭhimaggaṅgādiaṭṭhaṅgiko maggo seṭṭho uttamo. Saccānaṃ vacīsaccakhattiyādisammutisaccaparamatthasaccānaṃ caturo dukkhasamudayanirodhanirodhagāminipaṭipadāvasena caturo ariyasaccā padā seṭṭhā uttamā. Dhammānaṃ sabbasaṅkhatasappaccayadhammānaṃ virāgo asaṅkhatanibbānasaṅkhāto virāgo dhammo seṭṭho uttamo. Dvipadānaṃ sabbadevamanussādīnaṃ dvipadānaṃ cakkhumā pañcavidhacakkhumā bhagavā seṭṭho uttamoti yojanā. Ayaṃ ‘‘maggānaṭṭhaṅgiko’’tiādisuttaviseso thave atthe vācakañāpakabhāvena pavattanato thavo nāma.

    ‘‘ཨཡམེཝ སུཏྟཝིསེསོ ཐཝོ’’ཏི ཝཏྟབྦཏྟཱ ‘‘ཏཱིཎིམཱནི བྷིཀྑཝེ’’ཏིཨཱདི ཝུཏྟཾ། ཨཔདཱ ཨཧིམཙྪཱདཡོ ཝཱ, དྭིཔདཱ མནུསྶསཀུཎཔཀྑིཛཱཏིཀཱདཡོ ཝཱ, ཙཏུཔྤདཱ ཧཏྠིཨསྶགོམཧིཾསཱདཡོ ཝཱ, བཧུཔྤདཱ སཏཔདིཨཱདཡོ ཝཱ, རཱུཔིནོ ཀཱམརཱུཔསཏྟཱ ཝཱ, ཨརཱུཔིནོ ཨརཱུཔསཏྟཱ ཝཱ, སཉྙིནོ སཏྟཝིཉྙཱཎཊྛིཏིསཏྟཱ ཝཱ, ཨསཉྙིནོ ཨསཉྙསཏྟཱ ཝཱ, ནེཝསཉྙཱིནཱསཉྙིནོ བྷཝགྒེ ནིབྦཏྟསཏྟཱ ཝཱ ཡཱཝཏཱ ཡཏྟཀཱ སཏྟཱ སཾཝིཛྫནྟི, ཏེསཾ ཏཏྟཀཱནཾ ཨཔདཱདཱིནཾ སཏྟཱནཾ ཡདིདཾ ཡོ ཨཡཾ ཨརཧཾ སམྨཱསམྦུདྡྷོ ཏཐཱགཏོ ཨུཔྤནྣོ, སོ ཨཡཾ ཨརཧཾ སམྨཱསམྦུདྡྷོ ཏཐཱགཏོ ཨགྒཾ ཨགྒོཏི ཨཀྑཱཡཏི, སེཊྛཾ སེཊྛོཏི ཨཀྑཱཡཏི, པཝརཾ པཝརོཏི ཨཀྑཱཡཏི, ཨཡཾ པཋམོ ཨགྒོ།

    ‘‘Ayameva suttaviseso thavo’’ti vattabbattā ‘‘tīṇimāni bhikkhave’’tiādi vuttaṃ. Apadā ahimacchādayo vā, dvipadā manussasakuṇapakkhijātikādayo vā, catuppadā hatthiassagomahiṃsādayo vā, bahuppadā satapadiādayo vā, rūpino kāmarūpasattā vā, arūpino arūpasattā vā, saññino sattaviññāṇaṭṭhitisattā vā, asaññino asaññasattā vā, nevasaññīnāsaññino bhavagge nibbattasattā vā yāvatā yattakā sattā saṃvijjanti, tesaṃ tattakānaṃ apadādīnaṃ sattānaṃ yadidaṃ yo ayaṃ arahaṃ sammāsambuddho tathāgato uppanno, so ayaṃ arahaṃ sammāsambuddho tathāgato aggaṃ aggoti akkhāyati, seṭṭhaṃ seṭṭhoti akkhāyati, pavaraṃ pavaroti akkhāyati, ayaṃ paṭhamo aggo.

    སངྑཏཱནཾ དྷམྨཱནཾ ཝཱ སཔྤཙྩཡསབྷཱཝཱནཾ ཝཱ, ཨསངྑཏཱནཾ པཙྩཡེཧི ཨསངྑརིཏཱནཾ པཎྞཏྟིམཏྟབྷཱུཏཱནཾ དྷམྨཱནཾ ཝཱ ཡཱཝཏཱ ཡཏྟཀཱ པཎྞཏྟཱི ཝོཧརཱིཡནྟི, ཏཏྟཀེཧི པཎྞཏྟཱིཧི པཉྙཔེཏབྦཱནཾ ཏེསཾ སངྑཏཱསངྑཏཱནཾ དྷམྨཱནཾ ཡདིདཾ ཡོ ཨཡཾ མདནིམྨདནོ…པེ॰… ཡོ ཨཡཾ ནིརོདྷོ, ཡཾ ཨིདཾ ནིབྦཱནམགྒཕལཱནམཱལམྦཎཾ བྷཝཏི, སོ ཨཡཾ མདནིམྨདནཱདིཀོ དྷམྨོ ཨགྒཾ ཨགྒོཏི ཨཀྑཱཡཏི…པེ॰… ཨཀྑཱཡཏི, ཨཡཾ དུཏིཡོ ཨགྒོ།

    Saṅkhatānaṃ dhammānaṃ vā sappaccayasabhāvānaṃ vā, asaṅkhatānaṃ paccayehi asaṅkharitānaṃ paṇṇattimattabhūtānaṃ dhammānaṃ vā yāvatā yattakā paṇṇattī voharīyanti, tattakehi paṇṇattīhi paññapetabbānaṃ tesaṃ saṅkhatāsaṅkhatānaṃ dhammānaṃ yadidaṃ yo ayaṃ madanimmadano…pe… yo ayaṃ nirodho, yaṃ idaṃ nibbānamaggaphalānamālambaṇaṃ bhavati, so ayaṃ madanimmadanādiko dhammo aggaṃ aggoti akkhāyati…pe… akkhāyati, ayaṃ dutiyo aggo.

    སངྒྷཱནཾ ཡཱཝཏཱ པཎྞཏྟི, གཎཱནཾ ཡཱཝཏཱ པཎྞཏྟི, མཧཱཛནསནྣིཔཱཏཱནཾ ཡཱཝཏཱ པཎྞཏྟི ཝོཧརཱིཡནྟི, ཏཏྟཀེཧི པཎྞཏྟཱིཧི པཉྙཔེཏབྦཱནཾ ཏེསཾ སངྒྷགཎཱདཱིནཾ ཡཱནི ཨིམཱནི ཙཏྟཱརི པུགྒལཱནི པུརིསཡུགཱནི, ཡེ ཨིམེ ཨཊྛ པུརིསཔུགྒལཱ…པེ॰… ལོཀསྶ ཡཾ ཨིདཾ པུཉྙཀྑེཏྟཾ སཾཝིཛྫཏི, སོ ཨཡཾ ཙཏུཔུརིསཡུགཱདིཀོ ཏཐཱགཏསཱཝཀསངྒྷོ ཨགྒཾ ཨགྒོཏི ཨཀྑཱཡཏི…པེ॰… ཨཀྑཱཡཏི, ཨཡཾ ཏཏིཡོ ཨགྒོ། ཨིམཱནི ཏཱིཎི ཏཐཱགཏནིབྦཱནཨརིཡསངྒྷརཏནཱནི ཨགྒཱནི བྷཝནྟི།

    Saṅghānaṃ yāvatā paṇṇatti, gaṇānaṃ yāvatā paṇṇatti, mahājanasannipātānaṃ yāvatā paṇṇatti voharīyanti, tattakehi paṇṇattīhi paññapetabbānaṃ tesaṃ saṅghagaṇādīnaṃ yāni imāni cattāri puggalāni purisayugāni, ye ime aṭṭha purisapuggalā…pe… lokassa yaṃ idaṃ puññakkhettaṃ saṃvijjati, so ayaṃ catupurisayugādiko tathāgatasāvakasaṅgho aggaṃ aggoti akkhāyati…pe… akkhāyati, ayaṃ tatiyo aggo. Imāni tīṇi tathāgatanibbānaariyasaṅgharatanāni aggāni bhavanti.

    སབྦལོཀུཏྟརོ ཨཔདཱདིསབྦསཏྟལོཀཏོ ཨུཏྟརོ སཏྠཱ ཙ, ཀུསལཔཀྑཏོ ཀུསལཨནཝཛྫཔཀྑབྷཱཝཏོ ཨུཏྟརོ དྷམྨོ ཙ, ནརསཱིཧསྶ སཏྠུནོ གཎོ ཙ ཨིཏི ཏཱིཎི སཏྠུདྷམྨགཎརཏནཱནི ཨགྒཱནི, ཏཱནི ཏཱིཎི སཏྠུདྷམྨགཎརཏནཱནི ཝིསིསྶརེ གུཎཝསེན ཝིསིསྶནྟི།

    Sabbalokuttaro apadādisabbasattalokato uttaro satthā ca, kusalapakkhato kusalaanavajjapakkhabhāvato uttaro dhammo ca, narasīhassa satthuno gaṇo ca iti tīṇi satthudhammagaṇaratanāni aggāni, tāni tīṇi satthudhammagaṇaratanāni visissare guṇavasena visissanti.

    སམཎཔདུམསཉྩཡོ སརེ རུཧམཱནཾ པདུམཾ སོབྷནཾ ཨིཝ སཱསནེ སོབྷནསམཎཔདུམསམཱུཧོ གཎོ ཙ, དྷམྨཝརོ ཙ, ཝིདཱུནཾ སཀྐཏོ ནརཝརདམཀོ ནརཝརཱནཾ བྲཧྨདེཝམནུསྶརཱཛརཱཛམཧཱམཙྩཱདཱིནཾ དམཀོ ཨནུདམཀོ ཙཀྑུམཱ སམྦུདྡྷོ ཙ ཨིཏི ཏཱིཎི གཎདྷམྨབུདྡྷརཏནཱནི ལོཀསྶ ཨུཏྟརི བྷཝནྟི།

    Samaṇapadumasañcayo sare ruhamānaṃ padumaṃ sobhanaṃ iva sāsane sobhanasamaṇapadumasamūho gaṇo ca, dhammavaro ca, vidūnaṃ sakkato naravaradamako naravarānaṃ brahmadevamanussarājarājamahāmaccādīnaṃ damako anudamako cakkhumā sambuddho ca iti tīṇi gaṇadhammabuddharatanāni lokassa uttari bhavanti.

    ཨཔྤཊིསམོ སཏྠཱ ཙ, ནིརུཔདཱཧོ ནིགྒཏཨུཔདཱཧོ, སབྦོ དྷམྨོ ཙ ཨརིཡོ གཎཝརོ ཙ ཨིཏི ཡཱནི ཏཱིཎི བུདྡྷདྷམྨགཎརཏནཱནི ཨགྒཱནི, ཏཱནི ཏཱིཎི…པེ॰… ནཱནི ཁལུ ཨེཀཾསེན ཝིསིསྶརེ ཝིསིསྶནྟི།

    Appaṭisamo satthā ca, nirupadāho niggataupadāho, sabbo dhammo ca ariyo gaṇavaro ca iti yāni tīṇi buddhadhammagaṇaratanāni aggāni, tāni tīṇi…pe… nāni khalu ekaṃsena visissare visissanti.

    སཙྩནཱམོ ཨཝིཏཐསཙྩདེསནཏོ སཙྩནཱམོ ཁེམོ སབྦཱབྷིབྷཱུ སབྦེ མནུསྶདེཝཱདིཀེ ཨནབྷིབྷཝམཱནོཔི གུཎཱཏིརེཀཝསེན ཨབྷིབྷཝམཱནོ ཝིཡ པཝཏྟནཏོ སབྦཱབྷིབྷཱུ ཛིནོ ཙ, སཙྩདྷམྨོ ཨཝིཏཐསབྷཱཝཏོ སཙྩདྷམྨོ ཙ, ཏསྶ སཙྩདྷམྨསྶ ཨུཏྟརི ཨུཏྟམོ ཨཉྙོ དྷམྨོ ནཏྠི, ཝིཉྙཱུནཾ ནིཙྩཾ པཱུཛིཏོ པཱུཛཱརཧོ ཨརིཡསངྒྷོ ཙ ཨིཏི ཏཱིཎི ལོཀསྶ ཨུཏྟརི ཨུཏྟམཱནི བྷཝནྟི།

    Saccanāmo avitathasaccadesanato saccanāmo khemo sabbābhibhū sabbe manussadevādike anabhibhavamānopi guṇātirekavasena abhibhavamāno viya pavattanato sabbābhibhū jino ca, saccadhammo avitathasabhāvato saccadhammo ca, tassa saccadhammassa uttari uttamo añño dhammo natthi, viññūnaṃ niccaṃ pūjito pūjāraho ariyasaṅgho ca iti tīṇi lokassa uttari uttamāni bhavanti.

    ཨེཀཱཡནཔདསྶ ཝཙནཏྠོ ཨཊྛཀཐཱཡཾ (ནེཏྟི॰ ཨཊྛ॰ ༡༧༠) བཧུདྷཱ ཝུཏྟོ། ཛཱཏིཁཡནྟདསྶཱི ཧིཏཱནུཀམྤཱི བྷགཝཱ ཨེཀཱཡནཾ མགྒཾ པཛཱནཱཏི། ‘‘ཡཾ ཨེཀཱཡནཾ མགྒཾ པཛཱནཱཏི, ཏེན མགྒེན ཀིཾ ཏརཏཱི’’ཏི ཝཏྟབྦབྷཱཝཏོ ‘‘ཨེཏེན མགྒེནཱ’’ཏིཨཱདི ཝུཏྟཾ། ཡཾ མགྒཾ བྷགཝཱ ཛཱནཱཏི, ཨེཏེན མགྒེན པུབྦེ ཨཏཱིཏམདྡྷཱནཾ བུདྡྷཱདཡོ ཨརིཡཱ ཨོགྷཾ སཾསཱརོགྷཾ ཏརིཾསུ, ཨནཱགཏམདྡྷཱནཾ ཏརིསྶནྟི, ཡེ ཙཱཔི བུདྡྷཱདཡོ པཙྩུཔྤནྣེ ཨུཔྤཛྫནྟི, ཏེ ཙཱཔི བུདྡྷཱདཡོ པཙྩུཔྤནྣེ ཏརནྟི, ཝིསུདྡྷིཔེཀྑཱ ཝིསུདྡྷིཾ ཨཔེཀྑམཱནཱ སཏྟཱ དེཝམནུསྶསེཊྛཾ ཏཱདིསཾ ཡཐཱཝུཏྟགུཎཾ ཏཾ སམྨཱསམྦུདྡྷཾ ནམསྶནྟི, ཨིཏི ཨཡཾ ནཱནཱཝིདྷསུཏྟཝིསེསོཔི ཐཝེ རཏནཏྟཡེ, རཏནཏྟཡགུཎེ ཙ ཝཱཙཀཉཱཔཀབྷཱཝེན པཝཏྟནཏོ ཐཝོ ནཱམ། ཨིཙྩེཏཾ སཱསནཔཊྛཱནསུཏྟཝིསེསདསྶཀོ སཾཝཎྞནཱཝིསེསོཔི སཱསནཔཊྛཱནཾ ནཱམཱཏི ཝེདིཏབྦོ།

    Ekāyanapadassa vacanattho aṭṭhakathāyaṃ (netti. aṭṭha. 170) bahudhā vutto. Jātikhayantadassī hitānukampī bhagavā ekāyanaṃ maggaṃ pajānāti. ‘‘Yaṃ ekāyanaṃ maggaṃ pajānāti, tena maggena kiṃ taratī’’ti vattabbabhāvato ‘‘etena maggenā’’tiādi vuttaṃ. Yaṃ maggaṃ bhagavā jānāti, etena maggena pubbe atītamaddhānaṃ buddhādayo ariyā oghaṃ saṃsāroghaṃ tariṃsu, anāgatamaddhānaṃ tarissanti, ye cāpi buddhādayo paccuppanne uppajjanti, te cāpi buddhādayo paccuppanne taranti, visuddhipekkhā visuddhiṃ apekkhamānā sattā devamanussaseṭṭhaṃ tādisaṃ yathāvuttaguṇaṃ taṃ sammāsambuddhaṃ namassanti, iti ayaṃ nānāvidhasuttavisesopi thave ratanattaye, ratanattayaguṇe ca vācakañāpakabhāvena pavattanato thavo nāma. Iccetaṃ sāsanapaṭṭhānasuttavisesadassako saṃvaṇṇanāvisesopi sāsanapaṭṭhānaṃ nāmāti veditabbo.

    ཨམྷཱཀཱཙརིཡ ཏུམྷེཧི ཨམྷཱཀཱཙརིཡེཧི སོལ༹སཔྤབྷེདསཾཀིལེསབྷཱགིཡཱདིསཱསནཔཊྛཱནསུཏྟཉྩེཝ ཨཊྛཝཱིསཏིཝིདྷཾ ལོཀིཡཱདིསཱསནཔཊྛཱནསུཏྟཉྩ ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཏེསུ སཾཀིལེསབྷཱགིཡཱདཱིསུ སཱསནཔཊྛཱནསུཏྟཝིསེསེསུ ཀཏམཾ སུཏྟཝིསེསཾ ཀཏམེན སུཏྟཝིསེསེན སཾསནྡིཏྭཱ ནིདྡིསིཏབྦ’’ནྟི ཝཏྟབྦཏྟཱ ‘‘ཏཏྠ ལོཀིཡཾ སུཏྟ’’ནྟིཨཱདི ཨཱརདྡྷཾ། ཨཊྛཀཐཱཡཾ པན – ‘‘ཨེཝཾ དུཝིདྷམྤི སཱསནཔཊྛཱནཾ ནཱནཱསུཏྟཔདཱནི ཨུདཱཧརནྟེན ཝིབྷཛིཏྭཱ ཨིདཱནི སཾཀིལེསབྷཱགིཡཱདཱིཧི སཾསནྡིཏྭཱ དསྶེཏུཾ པུན ‘ལོཀིཡཾ སུཏྟ’ནྟིཨཱདི ཨཱརདྡྷ’’ནྟི (ནེཏྟི॰ ཨཊྛ॰ ༡༧༠) ཝུཏྟཾ།

    Amhākācariya tumhehi amhākācariyehi soḷasappabhedasaṃkilesabhāgiyādisāsanapaṭṭhānasuttañceva aṭṭhavīsatividhaṃ lokiyādisāsanapaṭṭhānasuttañca niddhāritaṃ, amhehi ca ñātaṃ, ‘‘tesu saṃkilesabhāgiyādīsu sāsanapaṭṭhānasuttavisesesu katamaṃ suttavisesaṃ katamena suttavisesena saṃsanditvā niddisitabba’’nti vattabbattā ‘‘tattha lokiyaṃsutta’’ntiādi āraddhaṃ. Aṭṭhakathāyaṃ pana – ‘‘evaṃ duvidhampi sāsanapaṭṭhānaṃ nānāsuttapadāni udāharantena vibhajitvā idāni saṃkilesabhāgiyādīhi saṃsanditvā dassetuṃ puna ‘lokiyaṃ sutta’ntiādi āraddha’’nti (netti. aṭṭha. 170) vuttaṃ.

    ཏཏྠ ཏཏྠཱཏི ཏེསུ སོལ༹སཝིདྷེསུ སཾཀིལེསབྷཱགིཡཱདཱིསུ སཱསནཔཊྛཱནསུཏྟཝིསེསེསུ ཙེཝ ཨཊྛཝཱིསཏིཝིདྷེསུ ལོཀིཡཱདཱིསུ སཱསནཔཊྛཱནསུཏྟཝིསེསེསུ ཙ ཨཀུསལཔཀྑེ པཝཏྟཾ ལོཀིཡཾ སུཏྟཾ སཾཀིལེསབྷཱགིཡསུཏྟེན སམཱནཏྠབྷཱཝེན སཾསནྡཏི, ཀུསལཔཀྑེ པཝཏྟཾ ལོཀིཡཾ སུཏྟཾ ཝཱསནཱབྷཱགིཡསུཏྟེན སམཱནཏྠབྷཱཝེན སཾསནྡཏི, ཏསྨཱ ལོཀིཡཾ སུཏྟཾ ཨེཀཝིདྷམྤི སཾཀིལེསབྷཱགིཡེན ཙ ཝཱསནཱབྷཱགིཡེན ཙ དྭཱིཧི སུཏྟེཧི ནིདྡིསིཏབྦཾ། དསྶནཔཀྑེ པཝཏྟཾ ལོཀུཏྟརཾ སུཏྟཾ དསྶནབྷཱགིཡེན སམཱནཏྠབྷཱཝེན སཾསནྡཏི, བྷཱཝནཱཔཀྑེ པཝཏྟཾ ལོཀུཏྟརཾ སུཏྟཾ བྷཱཝནཱབྷཱགིཡེན སམཱནཏྠབྷཱཝེན སཾསནྡཏི, ཨསེཀྑཔཀྑེ པཝཏྟཾ ལོཀུཏྟརཾ སུཏྟཾ ཨསེཀྑབྷཱགིཡེན སམཱནཏྠབྷཱཝེན སཾསནྡཏི, ཏསྨཱ ལོཀུཏྟརམྤི སུཏྟཾ དསྶནབྷཱགིཡེན ཙ བྷཱཝནཱབྷཱགིཡེན ཙ ཨསེཀྑབྷཱགིཡེན ཙ ཏཱིཧི སུཏྟེཧི ནིདྡིསིཏབྦཾ། ཝུཏྟནཡཱནུསཱརེན སེསེསུཔི སཾསནྡནཡོཛནཱ ཀཱཏབྦཱ།

    Tattha tatthāti tesu soḷasavidhesu saṃkilesabhāgiyādīsu sāsanapaṭṭhānasuttavisesesu ceva aṭṭhavīsatividhesu lokiyādīsu sāsanapaṭṭhānasuttavisesesu ca akusalapakkhe pavattaṃ lokiyaṃ suttaṃ saṃkilesabhāgiyasuttena samānatthabhāvena saṃsandati, kusalapakkhe pavattaṃ lokiyaṃ suttaṃ vāsanābhāgiyasuttena samānatthabhāvena saṃsandati, tasmā lokiyaṃ suttaṃ ekavidhampi saṃkilesabhāgiyena ca vāsanābhāgiyena ca dvīhi suttehi niddisitabbaṃ. Dassanapakkhe pavattaṃ lokuttaraṃ suttaṃ dassanabhāgiyena samānatthabhāvena saṃsandati, bhāvanāpakkhe pavattaṃ lokuttaraṃ suttaṃ bhāvanābhāgiyena samānatthabhāvena saṃsandati, asekkhapakkhe pavattaṃ lokuttaraṃ suttaṃ asekkhabhāgiyena samānatthabhāvena saṃsandati, tasmā lokuttarampi suttaṃ dassanabhāgiyena ca bhāvanābhāgiyena ca asekkhabhāgiyena ca tīhi suttehi niddisitabbaṃ. Vuttanayānusārena sesesupi saṃsandanayojanā kātabbā.

    ཨམྷཱཀཱཙརིཡ ཏུམྷེཧི ཨམྷཱཀཱཙརིཡེཧི ནཡདསྶནཝསེན སུཏྟཝིསེསསཾསནྡནཾ དསྶིཏཾ, ཨམྷེཧི ཙ ཉཱཏཾ, ‘‘ཀིམཏྠཱཡ སཾཀིལེསབྷཱགིཡཱདིབྷེདེན ཝིབྷཛིཏྭཱ བྷགཝཏཱ ཝུཏྟ’’ནྟི ཝཏྟབྦཏྟཱ ‘‘ཝཱསནཱབྷཱགིཡཾ སུཏྟཾ སཾཀིལེསབྷཱགིཡསྶ སུཏྟསྶ ནིགྒྷཱཏཱཡཱ’’ཏིཨཱདི ཝུཏྟཾ། ཨེཏྠ ཙ སུཏྟཝསེན སུཏྟཏྠཱ གཧིཏཱ།

    Amhākācariya tumhehi amhākācariyehi nayadassanavasena suttavisesasaṃsandanaṃ dassitaṃ, amhehi ca ñātaṃ, ‘‘kimatthāya saṃkilesabhāgiyādibhedena vibhajitvā bhagavatā vutta’’nti vattabbattā ‘‘vāsanābhāgiyaṃ suttaṃ saṃkilesabhāgiyassa suttassa nigghātāyā’’tiādi vuttaṃ. Ettha ca suttavasena suttatthā gahitā.

    ‘‘ཡཾ སཏྟཱདྷིཊྛཱནཾ ཨཱཙརིཡེན ནིདྡྷཱརིཏཾ, ཏཾ སཏྟཱདྷིཊྛཱནཾ ཀིཏྟཀེཧི སུཏྟེཧི ཝིབྷཛིཏྭཱ ནིདྡིསིཏབྦ’’ནྟི ཝཏྟབྦཏྟཱ ‘‘ལོཀུཏྟརཾ སུཏྟཾ སཏྟཱདྷིཊྛཱནཾ ཚབྦིསཏིཡཱ པུགྒལེཧི ནིདྡིསིཏབྦ’’ནྟི ཝུཏྟཾ། ‘‘ཏེ ཚབྦཱིསཏི པུགྒལཱ ཀཏིཧི སུཏྟེཧི སམནྭེསིཏབྦཱ’’ཏི ཝཏྟབྦཏྟཱ ‘‘ཏེ ཏཱིཧཱི’’ཏིཨཱདི ཝུཏྟཾ། དསྶནབྷཱགིཡེན སཏྟཱདྷིཊྛཱནེན, བྷཱཝནཱབྷཱགིཡེན སཏྟཱདྷིཊྛཱནེན, ཨསེཀྑབྷཱགིཡེན སཏྟཱདྷིཊྛཱནེན ཙཱཏི ཏཱིཧི སུཏྟེཧི ཏེ ཚབྦཱིསཏི པུགྒལཱ སམནྭེསིཏབྦཱ།

    ‘‘Yaṃ sattādhiṭṭhānaṃ ācariyena niddhāritaṃ, taṃ sattādhiṭṭhānaṃ kittakehi suttehi vibhajitvā niddisitabba’’nti vattabbattā ‘‘lokuttaraṃ suttaṃ sattādhiṭṭhānaṃ chabbisatiyā puggalehi niddisitabba’’nti vuttaṃ. ‘‘Te chabbīsati puggalā katihi suttehi samanvesitabbā’’ti vattabbattā ‘‘te tīhī’’tiādi vuttaṃ. Dassanabhāgiyena sattādhiṭṭhānena, bhāvanābhāgiyena sattādhiṭṭhānena, asekkhabhāgiyena sattādhiṭṭhānena cāti tīhi suttehi te chabbīsati puggalā samanvesitabbā.

    ‘‘ཀཏམེཧི ཀཏམེཧི ཀཏམཾ ཀཏམཾ སུཏྟཾ ནིདྡིསིཏབྦ’’ནྟི ཝཏྟབྦཏྟཱ ‘‘ཏཏྠ དསྶནབྷཱགིཡ’’ནྟིཨཱདི ཝུཏྟཾ། ཏཏྠ ཏཏྠཱཏི ཏེསུ ཏཱིསུ དསྶནབྷཱགིཡཱདཱིསུ སུཏྟེསུ། ཏཏྠཱཏི ཝཱ ཏེསུ ཚབྦཱིསཏིཡཱ པུགྒལེསུ། སཏྟཱདྷིཊྛཱནེཀདེསཾ དསྶནབྷཱགིཡཾ སུཏྟཾ ཨེཀབཱིཛིནཱ པུགྒལེན ཙ ནིདྡིསིཏབྦཾ…པེ॰… དྷམྨཱནུསཱརིནཱ པུགྒལེན ཙ ནིདྡིསིཏབྦཾ, ཨིཏི ཨིམེཧི པཉྩཧི པུགྒལེཧི སཏྟཱདྷིཊྛཱནེཀདེསཾ དསྶནབྷཱགིཡཾ སུཏྟཾ ནིདྡིསིཏབྦཾ། ཨེཏྠ ཙ དསྶནགྒཧཎེན སོཏཱཔཏྟིཕལཊྛཱཔི གཧིཏཱ, ཏསྨཱ ཨེཀབཱིཛིཀོལཾཀོལསཏྟཀྑཏྟུཔརམཱ ཕལཊྛཱཔི གཧིཏཱ།

    ‘‘Katamehi katamehi katamaṃ katamaṃ suttaṃ niddisitabba’’nti vattabbattā ‘‘tattha dassanabhāgiya’’ntiādi vuttaṃ. Tattha tatthāti tesu tīsu dassanabhāgiyādīsu suttesu. Tatthāti vā tesu chabbīsatiyā puggalesu. Sattādhiṭṭhānekadesaṃ dassanabhāgiyaṃ suttaṃ ekabījinā puggalena ca niddisitabbaṃ…pe… dhammānusārinā puggalena ca niddisitabbaṃ, iti imehi pañcahi puggalehi sattādhiṭṭhānekadesaṃ dassanabhāgiyaṃ suttaṃ niddisitabbaṃ. Ettha ca dassanaggahaṇena sotāpattiphalaṭṭhāpi gahitā, tasmā ekabījikolaṃkolasattakkhattuparamā phalaṭṭhāpi gahitā.

    སདྡྷཱནུསཱརཱི པན ཡོ ཝིཔསྶནཱཀྑཎེ སདྡྷཾ དྷུརཾ ཀཏྭཱ སོཏཱཔཏྟིམགྒཾ ནིབྦཏྟེཏི, སོ པུགྒལོ ནིབྦཏྟེཏབྦསོཏཱཔཏྟིམགྒཀྑཎེ སདྡྷཱནུསཱརཱི ནཱམ, སདྡྷཱཡ སམཱཔཏྟིཾ ཨནུསྶརཏི, ཨིཏི སདྡྷཱཡ སམཱཔཏྟིཡཱ ཨནུསྶརཎཏོ སོཏཱཔཏྟིམགྒཊྛོ པུགྒལོ སདྡྷཱནུསཱརཱི ནཱམ། སོ པུགྒལོ སོཏཱཔཏྟིཕལཀྑཎེ སདྡྷཱཡ ཝིམུཏྟཏྟཱ སདྡྷཱཝིམུཏྟོ ཧུཏྭཱ ཨེཀབཱིཛིཀོལཾཀོལསཏྟཀྑཏྟུཔརམོ བྷཝཏི། ཡོ པན པུགྒལོ ཝིཔསྶནཱཀྑཎེ པཉྙཾ དྷུརཾ ཀཏྭཱ སོཏཱཔཏྟིམགྒཾ ནིབྦཏྟེཏི, སོ པུགྒལོ ནིབྦཏྟེཏབྦསོཏཱཔཏྟིམགྒཀྑཎེ དྷམྨཱནུསཱརཱི ནཱམ, དྷམྨེན པཉྙཱཡ སམཱཔཏྟིཾ ཨནུསྶརཏི, ཨིཏི དྷམྨེན པཉྙཱཡ སམཱཔཏྟིཡཱ ཨནུསྶརཎཏོ དྷམྨཱནུསཱརཱི ནཱམ། སོ པུགྒལོ ཕལཀྑཎེ དིཊྛིཡཱ པཉྙཱཡ ནིརོདྷཾ པཏྟཏྟཱ དིཊྛིཔཏྟོ ཧུཏྭཱ ཨེཀབཱིཛི…པེ॰… པརམོ བྷཝཏི། དྷམྨོཏི ཙེཏྠ པཉྙཱ གཧིཏཱ། ཨིཏི པབྷེདཏོ དྭེ མགྒཊྛཱ, ཚ ཕལཊྛཱཏི ཨཊྛཧི ཨརིཡཔུགྒལེཧི, སམྤིཎྜིཏེ པན པཉྩཧི ཨརིཡཔུགྒལེཧི སཏྟཱདྷིཊྛཱནེཀདེསཾ དསྶནབྷཱགིཡཾ སུཏྟཾ ནིདྡིསིཏབྦཾ།

    Saddhānusārī pana yo vipassanākkhaṇe saddhaṃ dhuraṃ katvā sotāpattimaggaṃ nibbatteti, so puggalo nibbattetabbasotāpattimaggakkhaṇe saddhānusārī nāma, saddhāya samāpattiṃ anussarati, iti saddhāya samāpattiyā anussaraṇato sotāpattimaggaṭṭho puggalo saddhānusārī nāma. So puggalo sotāpattiphalakkhaṇe saddhāya vimuttattā saddhāvimutto hutvā ekabījikolaṃkolasattakkhattuparamo bhavati. Yo pana puggalo vipassanākkhaṇe paññaṃ dhuraṃ katvā sotāpattimaggaṃ nibbatteti, so puggalo nibbattetabbasotāpattimaggakkhaṇe dhammānusārī nāma, dhammena paññāya samāpattiṃ anussarati, iti dhammena paññāya samāpattiyā anussaraṇato dhammānusārī nāma. So puggalo phalakkhaṇe diṭṭhiyā paññāya nirodhaṃ pattattā diṭṭhipatto hutvā ekabīji…pe… paramo bhavati. Dhammoti cettha paññā gahitā. Iti pabhedato dve maggaṭṭhā, cha phalaṭṭhāti aṭṭhahi ariyapuggalehi, sampiṇḍite pana pañcahi ariyapuggalehi sattādhiṭṭhānekadesaṃ dassanabhāgiyaṃ suttaṃ niddisitabbaṃ.

    ཨིམེསཾ ཨེཀབཱིཛིཨཱདཱིནཾ པུགྒལཱནཾ སཏྟཱདྷིཊྛཱནེཀདེསཏྠཏྟཱ ཙེཝ དསྶནབྷཱགིཡཏྠཏྟཱ ཙ སཏྟཱདྷིཊྛཱནེཀདེསཾ དསྶནབྷཱགིཡཾ སུཏྟཾ ཨེཏྟཀེཧི པུགྒལེཧི ནིདྡིསིཏབྦནྟི ནིཡམེཏྭཱ ཨཱཙརིཡེན ཝིབྷཏྟཾ, ཨམྷེཧི ཙ ཉཱཏཾ, ‘‘སཏྟཱདྷིཊྛཱནེཀདེསཾ དསྶནབྷཱགིཡཾ སུཏྟཾ ཀིཏྟཀེཧི པུགྒལེཧི ནིདྡིསིཏབྦ’’ནྟི པུཙྪིཏབྦཏྟཱ –

    Imesaṃ ekabījiādīnaṃ puggalānaṃ sattādhiṭṭhānekadesatthattā ceva dassanabhāgiyatthattā ca sattādhiṭṭhānekadesaṃ dassanabhāgiyaṃ suttaṃ ettakehi puggalehi niddisitabbanti niyametvā ācariyena vibhattaṃ, amhehi ca ñātaṃ, ‘‘sattādhiṭṭhānekadesaṃ dassanabhāgiyaṃ suttaṃ kittakehi puggalehi niddisitabba’’nti pucchitabbattā –

    ‘‘བྷཱཝནཱབྷཱགིཡཾ སུཏྟཾ དྭཱདསཧི པུགྒལེཧི ནིདྡིསིཏབྦཾ སཀདཱགཱམིཕལསཙྪིཀིརིཡཱཡ པཊིཔནྣེན, སཀདཱགཱམིནཱ, ཨནཱགཱམིཕལསཙྪིཀིརིཡཱཡ པཊིཔནྣེན, ཨནཱགཱམིནཱ, ཨནྟརཱཔརིནིབྦཱཡིནཱ, ཨུཔཧཙྩཔརིནིབྦཱཡིནཱ, ཨསངྑཱརཔརིནིབྦཱཡིནཱ, སསངྑཱརཔརིནིབྦཱཡིནཱ , ཨུདྡྷཾསོཏེན ཨཀནིཊྛགཱམིནཱ, སདྡྷཱཝིམུཏྟེན, དིཊྛིཔྤཏྟེན, ཀཱཡསཀྑིནཱ ཙཱཏི བྷཱཝནཱབྷཱགིཡཾ སུཏྟཾ ཨིམེཧི དྭཱདསཧི པུགྒལེཧི ནིདྡིསིཏབྦ’’ནྟི –

    ‘‘Bhāvanābhāgiyaṃ suttaṃ dvādasahi puggalehi niddisitabbaṃ sakadāgāmiphalasacchikiriyāya paṭipannena, sakadāgāminā, anāgāmiphalasacchikiriyāya paṭipannena, anāgāminā, antarāparinibbāyinā, upahaccaparinibbāyinā, asaṅkhāraparinibbāyinā, sasaṅkhāraparinibbāyinā , uddhaṃsotena akaniṭṭhagāminā, saddhāvimuttena, diṭṭhippattena, kāyasakkhinā cāti bhāvanābhāgiyaṃ suttaṃ imehi dvādasahi puggalehi niddisitabba’’nti –

    ཝུཏྟཾ། ཏཏྠཱཔི སཏྟཱདྷིཊྛཱནེཀདེསཾ བྷཱཝནཱབྷཱགིཡཾ སུཏྟནྟི གཧེཏབྦཾ། སཀདཱ…པེ॰… པནྣེན སཀདཱགཱམིམགྒཊྛེན པུགྒལེན, སཀདཱགཱམིནཱ སཀདཱགཱམིཕལཊྛེན, ཨནཱགཱམི…པེ॰… པནྣེན ཨནཱགཱམིམགྒཊྛེན, ཨནཱགཱམིནཱ ཨནཱགཱམིཕལཊྛེན, ཨཝིཧཱདཱིསུ པཉྩསུ སུདྡྷཱཝཱསེསུ ཨཱཡུཝེམཛ྄ཛྷཾ ཨནཏིཀྐམིཏྭཱ ཨརཧཏྟཾ པཏྭཱ པརིནིབྦཱཡནསབྷཱཝེན ཨནྟརཱཔརིནིབྦཱཡཱིནཱམཀེན ཨནཱགཱམིནཱ, ཨཱཡུཝེམཛ྄ཛྷཾ ཨཏིཀྐམིཏྭཱ ཨརཧཏྟཾ པཏྭཱ པརིནིབྦཱཡནསབྷཱཝེན ཨུཔཧཙྩཔརིནིབྦཱཡཱིནཱམཀེན ཨནཱགཱམིནཱ, ཨསངྑཱརེན ཨཔྤཡོགེན ཨརཧཏྟཾ པཏྭཱ པརིནིབྦཱཡནསབྷཱཝེན ཨསངྑཱརཔརིནིབྦཱཡཱིནཱམཀེན ཨནཱགཱམིནཱ, སསངྑཱརེན སཔྤཡོགེན ཨརཧཏྟཾ པཏྭཱ པརིནིབྦཱཡནསབྷཱཝེན སསངྑཱརཔརིནིབྦཱཡཱིནཱམཀེན ཨནཱགཱམིནཱ, ཨཝིཧཱདཱིཧི ཨུདྡྷཾ ཨཏཔྤཱདཱིསུ ཨུཔཔཏྟིསོཏེན ཨརཧཏྟཾ པཏྭཱ པརིནིབྦཱཡནསབྷཱཝེན ཨུདྡྷཾསོཏནཱམཀེན ཨནཱགཱམིནཱ, ཨཀནིཊྛཾ གནྟྭཱ ཨརཧཏྟཾ པཏྭཱ པརིནིབྦཱཡནསབྷཱཝེན ཨཀནིཊྛགཱམཱིནཱམཀེན ཨནཱགཱམིནཱ, སདྡྷཱཡ ཝིམུཏྟཏྟཱ སདྡྷཱཝིམུཏྟནཱམཀེན ཨནཱགཱམིནཱ, དིཊྛིཡཱ པཉྙཱཡ ནིརོདྷཾ པཏྟཏྟཱ དིཊྛིཔྤཏྟནཱམཀེན ཨནཱགཱམིནཱ ཙཱཏི ཨིམེཧི ཨེཀཱདསཧི ཨཛྷཱནལཱབྷཱིཔུགྒལེཧི ཙ, ཀཱཡེན ནཱམཀཱཡེ ཕུཊྛཱནཾ ཨརཱུཔཛྷཱནཱནཾ ཨནནྟརཾ ནིབྦཱནཾ སཙྪིཀརོཏི, ཨིཏི སཙྪིཀརཎཏོ ཀཱཡསཀྑཱིནཱམཀེན ཛྷཱནལཱབྷིནཱ ཙཱཏི དྭཱདསཧི པུགྒལེཧི ནིདྡིསིཏབྦཾ།

    Vuttaṃ. Tatthāpi sattādhiṭṭhānekadesaṃ bhāvanābhāgiyaṃ suttanti gahetabbaṃ. Sakadā…pe… pannena sakadāgāmimaggaṭṭhena puggalena, sakadāgāminā sakadāgāmiphalaṭṭhena, anāgāmi…pe… pannena anāgāmimaggaṭṭhena, anāgāminā anāgāmiphalaṭṭhena, avihādīsu pañcasu suddhāvāsesu āyuvemajjhaṃ anatikkamitvā arahattaṃ patvā parinibbāyanasabhāvena antarāparinibbāyīnāmakena anāgāminā, āyuvemajjhaṃ atikkamitvā arahattaṃ patvā parinibbāyanasabhāvena upahaccaparinibbāyīnāmakena anāgāminā, asaṅkhārena appayogena arahattaṃ patvā parinibbāyanasabhāvena asaṅkhāraparinibbāyīnāmakena anāgāminā, sasaṅkhārena sappayogena arahattaṃ patvā parinibbāyanasabhāvena sasaṅkhāraparinibbāyīnāmakena anāgāminā, avihādīhi uddhaṃ atappādīsu upapattisotena arahattaṃ patvā parinibbāyanasabhāvena uddhaṃsotanāmakena anāgāminā, akaniṭṭhaṃ gantvā arahattaṃ patvā parinibbāyanasabhāvena akaniṭṭhagāmīnāmakena anāgāminā, saddhāya vimuttattā saddhāvimuttanāmakena anāgāminā, diṭṭhiyā paññāya nirodhaṃ pattattā diṭṭhippattanāmakena anāgāminā cāti imehi ekādasahi ajhānalābhīpuggalehi ca, kāyena nāmakāye phuṭṭhānaṃ arūpajhānānaṃ anantaraṃ nibbānaṃ sacchikaroti, iti sacchikaraṇato kāyasakkhīnāmakena jhānalābhinā cāti dvādasahi puggalehi niddisitabbaṃ.

    ཨིམེསཾ ཝུཏྟཔྤཀཱརཱནཾ པུགྒལཱནཾ སཏྟཱདྷིཊྛཱནེཀདེསཏྠཏྟཱ ཙེཝ བྷཱཝནཱབྷཱགིཡཏྠཏྟཱ ཙ སཏྟཱདྷིཊྛཱནེཀདེསཾ བྷཱཝནཱབྷཱགིཡཾ སུཏྟཾ ཨེཏྟཀེཧི པུགྒལེཧི ནིདྡིསིཏབྦནྟི ནིཡམེཏྭཱ ཨཱཙརིཡེན ཝིབྷཏྟཾ, ཨམྷེཧི ཙ ཉཱཏཾ, ‘‘ཀིཏྟཀེཧི པུགྒལེཧི སཏྟཱདྷིཊྛཱནེཀདེསཾ ཨསེཀྑབྷཱགིཡཾ སུཏྟཾ ནིདྡིསིཏབྦ’’ནྟི ཝཏྟབྦཏྟཱ –

    Imesaṃ vuttappakārānaṃ puggalānaṃ sattādhiṭṭhānekadesatthattā ceva bhāvanābhāgiyatthattā ca sattādhiṭṭhānekadesaṃ bhāvanābhāgiyaṃ suttaṃ ettakehi puggalehi niddisitabbanti niyametvā ācariyena vibhattaṃ, amhehi ca ñātaṃ, ‘‘kittakehi puggalehi sattādhiṭṭhānekadesaṃ asekkhabhāgiyaṃ suttaṃ niddisitabba’’nti vattabbattā –

    ‘‘ཨསེཀྑབྷཱགིཡཾ སུཏྟཾ ནཝཧི པུགྒལེཧི ནིདྡིསིཏབྦཾ སདྡྷཱཝིམུཏྟེན, པཉྙཱཝིམུཏྟེན, སུཉྙཏཝིམུཏྟེན, ཨནིམིཏྟཝིམུཏྟེན, ཨཔྤཎིཧིཏཝིམུཏྟེན, ཨུབྷཏོབྷཱགཝིམུཏྟེན, སམསཱིསིནཱ, པཙྩེཀབུདྡྷེཧི, སམྨཱསམྦུདྡྷེཧི ཙཱཏི ཨསེཀྑབྷཱགིཡཾ སུཏྟཾ ཨིམེཧི ནཝཧི པུགྒལེཧི ནིདྡིསིཏབྦ’’ནྟི –

    ‘‘Asekkhabhāgiyaṃ suttaṃ navahi puggalehi niddisitabbaṃ saddhāvimuttena, paññāvimuttena, suññatavimuttena, animittavimuttena, appaṇihitavimuttena, ubhatobhāgavimuttena, samasīsinā, paccekabuddhehi, sammāsambuddhehi cāti asekkhabhāgiyaṃ suttaṃ imehi navahi puggalehi niddisitabba’’nti –

    ཝུཏྟཾ ། ཏཏྠ སཏྟཱདྷིཊྛཱནེཀདེསཾ ཨསེཀྑབྷཱགིཡཾ སུཏྟཾ ནིདྡིསིཏབྦནྟི ཡོཛེཏབྦཾ། སདྡྷཱཡ ཀིལེསེཧི ཝིམུཏྟཏྟཱ ཨརཧཏྟཕལཀྑཎེ སདྡྷཱཝིམུཏྟོ ཨརཧཱ, ཏེན སདྡྷཱཝིམུཏྟེན། པཉྙཱཡ ཝིམུཏྟཏྟཱ ཨརཧཏྟཕལཀྑཎེ པཉྙཱཝིམུཏྟོ ཨརཧཱ, ཏེན པཉྙཱཝིམུཏྟེན། སུཉྙཏཝིཔསྶནཱསངྑཱཏེན ཨནཏྟཱནུཔསྶནེན ཝིམུཏྟཏྟཱ སུཉྙཏཝིམུཏྟོ ཨརཧཱ, ཏེན སུཉྙཏཝིམུཏྟེན། ཨནིམིཏྟཱནུཔསྶནཱསངྑཱཏེན ཨནིཙྩཱནུཔསྶནེན ཝིམུཏྟཏྟཱ ཨནིམིཏྟཝིམུཏྟོ ཨརཧཱ, ཏེན ཨནིམིཏྟཝིམུཏྟེན། ཨཔྤཎིཧིཏཱནུཔསྶནཱསངྑཱཏེན དུཀྑཱནུཔསྶནེན ཝིམུཏྟཏྟཱ ཨཔྤཎིཧིཏཝིམུཏྟོ ཨརཧཱ, ཏེན ཨཔྤཎིཧིཏཝིམུཏྟེན། ཨུབྷཏོ རཱུཔཀཱཡནཱམཀཱཡཏོ ཨུབྷཏོབྷཱགཏོ ཝིམུཏྟཏྟཱ ཨུབྷཏོབྷཱགཝིམུཏྟོ ཨརཧཱ, ཏེན ཨུབྷཏོབྷཱགཝིམུཏྟེན། པུརིམཱ པཉྩ པུགྒལཱ ཨཛྷཱནལཱབྷིནོ གཧིཏཱ, ཨུབྷཏོབྷཱགཝིམུཏྟོ པན ཛྷཱནལཱབྷཱིགཧིཏོ།

    Vuttaṃ . Tattha sattādhiṭṭhānekadesaṃ asekkhabhāgiyaṃ suttaṃ niddisitabbanti yojetabbaṃ. Saddhāya kilesehi vimuttattā arahattaphalakkhaṇe saddhāvimutto arahā, tena saddhāvimuttena. Paññāya vimuttattā arahattaphalakkhaṇe paññāvimutto arahā, tena paññāvimuttena. Suññatavipassanāsaṅkhātena anattānupassanena vimuttattā suññatavimutto arahā, tena suññatavimuttena. Animittānupassanāsaṅkhātena aniccānupassanena vimuttattā animittavimutto arahā, tena animittavimuttena. Appaṇihitānupassanāsaṅkhātena dukkhānupassanena vimuttattā appaṇihitavimutto arahā, tena appaṇihitavimuttena. Ubhato rūpakāyanāmakāyato ubhatobhāgato vimuttattā ubhatobhāgavimutto arahā, tena ubhatobhāgavimuttena. Purimā pañca puggalā ajhānalābhino gahitā, ubhatobhāgavimutto pana jhānalābhīgahito.

    སམསཱིསཱི ནཱམ ཨིརིཡཱཔཐསམསཱིསཱི, རོགསམསཱིསཱི, ཛཱིཝིཏསམསཱིསཱིཏི ཏིཝིདྷཱ ཧོནྟི། ཨིམེསུ ཏཱིསུ སམསཱིསཱིསུ ཡོ ཨརཧཱ ཙཏཱུསུ ཨིརིཡཱཔཐེསུ ཨེཀེཀསྨིཾ ཨིརིཡཱཔཐེ ཨརཧཏྟཾ པཏྭཱ ཨཉྙཾ ཨིརིཡཱཔཐཾ ཨསངྐམིཏྭཱ ཏསྨིཾ ཏསྨིཾ ཨིརིཡཱཔཐེཡེཝ པརིནིབྦཱཡཏི, ཨཡཾ ཨརཧཱ ཨིརིཡཱཔཐསམསཱིསཱི ནཱམ། ཡོ ཨརཧཱ ཡསྨིཾ རོགེ ཨུཔྤནྣེ ཨརཧཏྟཾ པཏྭཱ ཏཏོ རོགཏོ ཨནུཊྛཧིཏྭཱ ཏསྨིཾ རོགེཡེཝ པརིནིབྦཱཡཏི, ཨཡཾ ཨརཧཱ རོགསམསཱིསཱི ནཱམ། ཡོ ཨརཧཱ པཙྩཝེཀྑཎཝཱིཐིཡཱནནྟརཾ བྷཝངྒཾ ཨོཏརིཏྭཱ ཏཏོ མརཎཱསནྣཛཝནཝཱིཐིཡཱནནྟརམེཝ པརིནིབྦཱཡཏི, ཨཡཾ ཨརཧཱ ཝཱརསམཏཱཡ ཛཱིཝིཏསམསཱིསཱི ནཱམ། ཝཱརསམཏཱཏི ཙ པཙྩཝེཀྑཎཝཱིཐི མགྒཝིཐྱཱནུཝཏྟཀཏྟཱ པཙྩཝེཀྑཎཝཱིཐིཨནནྟརཾ པཝཏྟམཱནཱཡཔི མརཎཱསནྣཝཱིཐི མགྒཝཱིཐིཨནནྟརཾ པཝཏྟཱཏི ཝཏྟབྦཱརཧཱ, ཏསྨཱ ཝཱིཐིཨནནྟརཏཱ ཝཱརསམཏཱ ནཱམ། ཏཱཡ ཝཱརསམཏཱཡ ཙ ཛཱིཝིཏསམསཱིསཱི ཝུཏྟོ།

    Samasīsī nāma iriyāpathasamasīsī, rogasamasīsī, jīvitasamasīsīti tividhā honti. Imesu tīsu samasīsīsu yo arahā catūsu iriyāpathesu ekekasmiṃ iriyāpathe arahattaṃ patvā aññaṃ iriyāpathaṃ asaṅkamitvā tasmiṃ tasmiṃ iriyāpatheyeva parinibbāyati, ayaṃ arahā iriyāpathasamasīsī nāma. Yo arahā yasmiṃ roge uppanne arahattaṃ patvā tato rogato anuṭṭhahitvā tasmiṃ rogeyeva parinibbāyati, ayaṃ arahā rogasamasīsī nāma. Yo arahā paccavekkhaṇavīthiyānantaraṃ bhavaṅgaṃ otaritvā tato maraṇāsannajavanavīthiyānantarameva parinibbāyati, ayaṃ arahā vārasamatāya jīvitasamasīsī nāma. Vārasamatāti ca paccavekkhaṇavīthi maggavithyānuvattakattā paccavekkhaṇavīthianantaraṃ pavattamānāyapi maraṇāsannavīthi maggavīthianantaraṃ pavattāti vattabbārahā, tasmā vīthianantaratā vārasamatā nāma. Tāya vārasamatāya ca jīvitasamasīsī vutto.

    སཧ པཊིསམྦྷིདཱཧི ཨརཧཏྟཾ པཱཔུཎཱིཏི ཨེཏྠཔི པཙྩཝེཀྑཎཝཱིཐིཡཱནནྟརཾ བྷཝངྒཾ ཨོཏརིཏྭཱ བྷཝངྒཏོ ཝུཊྛཱཡ པཝཏྟཝཱིཐིཡཱ པཊིསམྦྷིདཱཉཱཎཱནི པཝཏྟནྟི། ཝུཏྟནཡེན ཝཱིཐིཨནནྟརཏཱཡ ཝཱརསམཏཱཡ ‘‘སཧ པཊིསམྦྷིདཱཧཱི’’ཏི ཝུཏྟཾ། བྷགཝཏོ སབྦཉྙུཏཉྙཱཎམྤི པཙྩཝེཀྑཎཝཱིཐིཡཱནནྟརཾ བྷཝངྒཾ ཨོཏརིཏྭཱ བྷཝངྒཏོ ཝུཊྛཱཡ པཝཏྟཝཱིཐིཡཱ པཋམཾ པཝཏྟཏཱིཏི ཝེདིཏབྦཾ། ཨིམིནཱ ཛཱིཝིཏསམསཱིསིནཱ, སབྦེཧི པཙྩེཀབུདྡྷེཧི, སབྦེཧི སམྨཱསམྦུདྡྷེཧི ཙཱཏི ཨིམེཧི ནཝཧི པུགྒལེཧི སཏྟཱདྷིཊྛཱནེཀདེསཾ ཨསེཀྑབྷཱགིཡཾ སུཏྟཾ ནིདྡིསིཏབྦཾ།

    Saha paṭisambhidāhi arahattaṃ pāpuṇīti etthapi paccavekkhaṇavīthiyānantaraṃ bhavaṅgaṃ otaritvā bhavaṅgato vuṭṭhāya pavattavīthiyā paṭisambhidāñāṇāni pavattanti. Vuttanayena vīthianantaratāya vārasamatāya ‘‘saha paṭisambhidāhī’’ti vuttaṃ. Bhagavato sabbaññutaññāṇampi paccavekkhaṇavīthiyānantaraṃ bhavaṅgaṃ otaritvā bhavaṅgato vuṭṭhāya pavattavīthiyā paṭhamaṃ pavattatīti veditabbaṃ. Iminā jīvitasamasīsinā, sabbehi paccekabuddhehi, sabbehi sammāsambuddhehi cāti imehi navahi puggalehi sattādhiṭṭhānekadesaṃ asekkhabhāgiyaṃ suttaṃ niddisitabbaṃ.

    ཨིམེསཾ པུགྒལཱནཾ སཏྟཱདྷིཊྛཱནེཀདེསཏྠཏྟཱ ཙེཝ ཨསེཀྑབྷཱགིཡཏྠཏྟཱ ཙ ཨེཝཾ ཨིམིནཱ ‘‘ལོཀུཏྟརཾ སུཏྟཾ སཏྟཱདྷིཊྛཱན’’ནྟིཨཱདིནཱ པཀཱརེན ཝུཏྟེཧི ཨིམེཧི ཚབྦཱིསཏིཡཱ པུགྒལེཧི ཨརིཡེཧི དསྶནབྷཱགིཡཝཱསནཱབྷཱགིཡཨསེཀྑབྷཱགིཡསུཏྟཱནཾ ཝསེན ལོཀུཏྟརཾ སུཏྟཾ སཏྟཱདྷིཊྛཱནེཀདེསཾ སུཏྟཾ ནིདྡིསིཏབྦཾ།

    Imesaṃ puggalānaṃ sattādhiṭṭhānekadesatthattā ceva asekkhabhāgiyatthattā ca evaṃ iminā ‘‘lokuttaraṃ suttaṃ sattādhiṭṭhāna’’ntiādinā pakārena vuttehi imehi chabbīsatiyā puggalehi ariyehi dassanabhāgiyavāsanābhāgiyaasekkhabhāgiyasuttānaṃ vasena lokuttaraṃ suttaṃ sattādhiṭṭhānekadesaṃ suttaṃ niddisitabbaṃ.

    ཨིམེསཾ ཚབྦཱིསཏིཡཱ པུགྒལཱནཾ སཀལལོཀུཏྟརསུཏྟཏྠཏྟཱ ཙེཝ སཏྟཱདྷིཊྛཱནེཀདེསསུཏྟཏྠཏྟཱ ཙ ལོཀུཏྟརཾ སཏྟཱདྷིཊྛཱནེཀདེསཾ སུཏྟཾ། ཨེཏྟཀེཧི པུགྒལེཧི ནིདྡིསིཏབྦནྟི ཨཱཙརིཡེན ནིཡམེཏྭཱ ཝིབྷཏྟཾ, ཨམྷེཧི ཙ ཉཱཏཾ, ‘‘ལོཀིཡཾ སཏྟཱདྷིཊྛཱནེཀདེསཾ སུཏྟཾ ཀིཏྟཀེཧི པུགྒལེཧི ནིདྡིསིཏབྦ’’ནྟི ཝཏྟབྦཏྟཱ ‘‘ལོཀིཡཾ སུཏྟཾ སཏྟཱདྷིཊྛཱནཾ ཨེཀཱུནཝཱིསཏིཡཱ པུགྒལེཧི ནིདྡིསིཏབྦ’’ནྟིཨཱདི ཝུཏྟཾ། ‘‘ཏེ ཨེཀཱུནཝཱིསཏི ལོཀིཡཱ པུགྒལཱ ཀཏམེཧི དྷམྨེཧི ནིདྡིཊྛཱ སམནྭེསིཏབྦཱ’’ཏི ཝཏྟབྦཏྟཱ ‘‘ཏེ ཙརིཏེཧཱི’’ཏིཨཱདི ཝུཏྟཾ། ཏེ ཨེཀཱུནཝཱིསཏི ལོཀིཡཱ པུགྒལཱ ཙརིཏེཧི ཙརིཏཝིསེསེཧི ནིདྡིཊྛཱ སམནྭེསིཏབྦཱཏི། ‘‘ཀཐཾ ཙརིཏེཧི ནིདྡིཊྛཱ’’ཏི ཝཏྟབྦཏྟཱ ‘‘ཀེཙི རཱགཙརིཏཱ’’ཏིཨཱདི ཝུཏྟཾ། རཱགཙརིཏདོསཙརིཏཱདཱིཧི ཙརིཏེཧི ཨེཀཱུནཝཱིསཏི ལོཀིཡཔུགྒལཱ རཱགཙརིཏཱ, ཀེཙི དོསཙརིཏཱ…པེ॰… མོཧཙརིཏོ ཙཱཏི ནིདྡིཊྛཱ། ཨིཏི ནིདྡིཊྛེཧི ཨིམེཧི ཨེཀཱུནཝཱིསཏིཡཱ པུགྒལེཧི ལོཀིཡསཏྟཱདྷིཊྛཱནེཀདེསཾ སུཏྟཾ ནིདྡིསིཏབྦཾ། ‘‘ལོཀིཡ’’ནྟི སཱམཉྙཝསེན ཝུཏྟམྤི ‘‘སཾཀིལེསབྷཱགིཡཾ ལོཀིཡ’’ནྟི ཝིསེསཏོ ཝིཉྙཱཏབྦཾ།

    Imesaṃ chabbīsatiyā puggalānaṃ sakalalokuttarasuttatthattā ceva sattādhiṭṭhānekadesasuttatthattā ca lokuttaraṃ sattādhiṭṭhānekadesaṃ suttaṃ. Ettakehi puggalehi niddisitabbanti ācariyena niyametvā vibhattaṃ, amhehi ca ñātaṃ, ‘‘lokiyaṃ sattādhiṭṭhānekadesaṃ suttaṃ kittakehi puggalehi niddisitabba’’nti vattabbattā ‘‘lokiyaṃ suttaṃ sattādhiṭṭhānaṃ ekūnavīsatiyā puggalehi niddisitabba’’ntiādi vuttaṃ. ‘‘Te ekūnavīsati lokiyā puggalā katamehi dhammehi niddiṭṭhā samanvesitabbā’’ti vattabbattā ‘‘te caritehī’’tiādi vuttaṃ. Te ekūnavīsati lokiyā puggalā caritehi caritavisesehi niddiṭṭhā samanvesitabbāti. ‘‘Kathaṃ caritehi niddiṭṭhā’’ti vattabbattā ‘‘keci rāgacaritā’’tiādi vuttaṃ. Rāgacaritadosacaritādīhi caritehi ekūnavīsati lokiyapuggalā rāgacaritā, keci dosacaritā…pe… mohacarito cāti niddiṭṭhā. Iti niddiṭṭhehi imehi ekūnavīsatiyā puggalehi lokiyasattādhiṭṭhānekadesaṃ suttaṃ niddisitabbaṃ. ‘‘Lokiya’’nti sāmaññavasena vuttampi ‘‘saṃkilesabhāgiyaṃ lokiya’’nti visesato viññātabbaṃ.

    ལོཀིཡཾ སཏྟཱདྷིཊྛཱནེཀདེསཾ སུཏྟཾ ཨེཏྟཀེཧི པུགྒལེཧི ནིདྡིསིཏབྦནྟི ཨཱཙརིཡེན ནིཡམེཏྭཱ ཝིབྷཏྟཾ, ཨམྷེཧི ཙ ཉཱཏཾ, ‘‘ཝཱསནཱབྷཱགིཡཾ སཏྟཱདྷིཊྛཱནེཀདེསཾ སུཏྟཾ ཀཏམེཧི པུགྒལེཧི ནིདྡིསིཏབྦ’’ནྟི ཝཏྟབྦཏྟཱ ‘‘ཝཱསནཱབྷཱགིཡ’’ནྟིཨཱདི ཝུཏྟཾ། ཝཱསནཱབྷཱགིཡཾ སཏྟཱདྷིཊྛཱནེཀདེསཾ སུཏྟཾ སཱིལཝནྟེཧི པུགྒལེཧི, དྷམྨེཧི ཙ ནིདྡིསིཏབྦནྟི ཡོཛེཏབྦཾ། ‘‘ཀིཏྟཀཱ སཱིལཝནྟཔུགྒལཱ’’ཏི ཝཏྟབྦཏྟཱ ‘‘ཏེ སཱིལཝནྟོ པཉྩ པུགྒལཱ’’ཏི ཝུཏྟཾ། ‘‘ཀིཏྟཀཱ དྷམྨཱ’’ཏི ཝཏྟབྦཏྟཱ ‘‘པཀཏིསཱིལ’’ནྟིཨཱདི ཝུཏྟཾ། ཨིདཾ ཝུཏྟཾ ཧོཏི – པཀཏིསཱིལཝནྟོ ཙ སམཱདཱནསཱིལཝནྟོ ཙ ཙིཏྟཔྤསཱདཝནྟོ ཙ སམཐཝནྟོ ཙ ཝིཔསྶནཱཝནྟོ ཙཱཏི པཉྩ པུགྒལཱ, པཀཏིསཱིལདྷམྨོ ཙ སམཱདཱནསཱིལདྷམྨོ ཙ ཙིཏྟཔྤསཱདདྷམྨོ ཙ སམཐདྷམྨོ ཙ ཝིཔསྶནཱདྷམྨོ ཙཱཏི པཉྩ དྷམྨཱཏི ཨིམེཧི པཉྩཧི པུགྒལེཧི, ཨིམེཧི པཉྩཧི དྷམྨེཧི ཝཱསནཱབྷཱགིཡཾ སཏྟཱདྷིཊྛཱནེཀདེསདྷམྨཱདྷིཊྛཱནེཀདེསཾ སུཏྟཾ ཡཐཱཀྐམཾ ནིདྡིསིཏབྦནྟི།

    Lokiyaṃ sattādhiṭṭhānekadesaṃ suttaṃ ettakehi puggalehi niddisitabbanti ācariyena niyametvā vibhattaṃ, amhehi ca ñātaṃ, ‘‘vāsanābhāgiyaṃ sattādhiṭṭhānekadesaṃ suttaṃ katamehi puggalehi niddisitabba’’nti vattabbattā ‘‘vāsanābhāgiya’’ntiādi vuttaṃ. Vāsanābhāgiyaṃ sattādhiṭṭhānekadesaṃ suttaṃ sīlavantehi puggalehi, dhammehi ca niddisitabbanti yojetabbaṃ. ‘‘Kittakā sīlavantapuggalā’’ti vattabbattā ‘‘te sīlavanto pañca puggalā’’ti vuttaṃ. ‘‘Kittakā dhammā’’ti vattabbattā ‘‘pakatisīla’’ntiādi vuttaṃ. Idaṃ vuttaṃ hoti – pakatisīlavanto ca samādānasīlavanto ca cittappasādavanto ca samathavanto ca vipassanāvanto cāti pañca puggalā, pakatisīladhammo ca samādānasīladhammo ca cittappasādadhammo ca samathadhammo ca vipassanādhammo cāti pañca dhammāti imehi pañcahi puggalehi, imehi pañcahi dhammehi vāsanābhāgiyaṃ sattādhiṭṭhānekadesadhammādhiṭṭhānekadesaṃ suttaṃ yathākkamaṃ niddisitabbanti.

    ལོཀུཏྟརཾ སཏྟཱདྷིཊྛཱནཾ སུཏྟཾ དསྶནབྷཱགིཡཝཱསནཱབྷཱགིཡཨསེཀྑབྷཱགིཡསུཏྟེཧི ནིདྡིསིཏབྦནྟི ཨཱཙརིཡེན ནིཡམེཏྭཱ ཝིབྷཏྟཾ, ཨམྷེཧི ཙ ཉཱཏཾ, ‘‘ལོཀུཏྟརཾ དྷམྨཱདྷིཊྛཱནཾ སུཏྟཾ ཀིཏྟཀེཧི སུཏྟེཧི ནིདྡིསིཏབྦ’’ནྟི ཝཏྟབྦཏྟཱ ‘‘ལོཀུཏྟརཾ སུཏྟཾ དྷམྨཱདྷིཊྛཱནཾ…པེ॰… ཨསེཀྑབྷཱགིཡེནཱ’’ཏི ཝུཏྟཾ།

    Lokuttaraṃ sattādhiṭṭhānaṃ suttaṃ dassanabhāgiyavāsanābhāgiyaasekkhabhāgiyasuttehi niddisitabbanti ācariyena niyametvā vibhattaṃ, amhehi ca ñātaṃ, ‘‘lokuttaraṃ dhammādhiṭṭhānaṃ suttaṃ kittakehi suttehi niddisitabba’’nti vattabbattā ‘‘lokuttaraṃ suttaṃ dhammādhiṭṭhānaṃ…pe… asekkhabhāgiyenā’’ti vuttaṃ.

    ‘‘ལོཀིཡཉྩ ལོཀུཏྟརཉྩ སཏྟཱདྷིཊྛཱནཉྩ དྷམྨཱདྷིཊྛཱནཉྩ ཀིཏྟཀེཧི ནིདྡིསིཏབྦ’’ནྟི ཝཏྟབྦཏྟཱ ‘‘ལོཀིཡཉྩ…པེ॰… ཨུབྷཡེན ནིདྡིསིཏབྦ’’ནྟི ཝུཏྟཾ། ཨུབྷཡེནཱཏི ལོཀིཡལོཀུཏྟརེན, སཏྟཱདྷིཊྛཱནདྷམྨཱདྷིཊྛཱནེན སམཱནཏྠབྷཱཝེན ནིདྡིསིཏབྦནྟི།

    ‘‘Lokiyañca lokuttarañca sattādhiṭṭhānañca dhammādhiṭṭhānañca kittakehi niddisitabba’’nti vattabbattā ‘‘lokiyañca…pe… ubhayena niddisitabba’’nti vuttaṃ. Ubhayenāti lokiyalokuttarena, sattādhiṭṭhānadhammādhiṭṭhānena samānatthabhāvena niddisitabbanti.

    ‘‘ཉཱཎཾ ཀིཏྟཀེཧི ནིདྡིསིཏབྦ’’ནྟི ཝཏྟབྦཏྟཱ ‘‘ཉཱཎཾ པཉྙཱཡཱ’’ཏིཨཱདི ཝུཏྟཾ། ཡསྨིཾ ཡསྨིཾ སུཏྟེ ཉཱཎཾ ཨཱགཏཾ, ཏསྨིཾ ཏསྨིཾ སུཏྟེ ཉཱཎཾ ཉཱཎཔརིཡཱཡེན པཉྙཱདིནཱ ནིདྡིསིཏབྦནྟི།

    ‘‘Ñāṇaṃ kittakehi niddisitabba’’nti vattabbattā ‘‘ñāṇaṃ paññāyā’’tiādi vuttaṃ. Yasmiṃ yasmiṃ sutte ñāṇaṃ āgataṃ, tasmiṃ tasmiṃ sutte ñāṇaṃ ñāṇapariyāyena paññādinā niddisitabbanti.

    ‘‘ཉེཡྻཾ ཀིཏྟཀེན ནིདྡིསིཏབྦ’’ནྟི ཝཏྟབྦཏྟཱ ‘‘ཉེཡྻཾ ཨཏཱིཏཱནཱགཏཔཙྩུཔྤནྣེཧཱི’’ཏིཨཱདི ཝུཏྟཾ། ཡསྨིཾ ཡསྨིཾ སུཏྟེ ཉེཡྻཾ ཨཱགཏཾ, ཏསྨིཾ ཏསྨིཾ སུཏྟེ ཉེཡྻཾ ཉེཡྻཔརིཡཱཡེན ནིདྡིསིཏབྦནྟི།

    ‘‘Ñeyyaṃ kittakena niddisitabba’’nti vattabbattā ‘‘ñeyyaṃ atītānāgatapaccuppannehī’’tiādi vuttaṃ. Yasmiṃ yasmiṃ sutte ñeyyaṃ āgataṃ, tasmiṃ tasmiṃ sutte ñeyyaṃ ñeyyapariyāyena niddisitabbanti.

    ‘‘ཉཱཎཉྩ ཉེཡྻཉྩ ཀིཏྟཀེན ནིདྡིསིཏབྦ’’ནྟི ཝཏྟབྦཏྟཱ ‘‘ཉཱཎཉྩ ཉེཡྻཉྩ ཏདུབྷཡེནཱ’’ཏིཨཱདི ཝུཏྟཾ། ཡསྨིཾ ཡསྨིཾ སུཏྟེ ཉཱཎཉེཡྻཱ ཨཱགཏཱ, ཏསྨིཾ ཏསྨིཾ སུཏྟེ ཉཱཎཉེཡྻཱ ཉཱཎཉེཡྻཔརིཡཱཡེན ནིདྡིསིཏབྦནྟི།

    ‘‘Ñāṇañca ñeyyañca kittakena niddisitabba’’nti vattabbattā ‘‘ñāṇañca ñeyyañca tadubhayenā’’tiādi vuttaṃ. Yasmiṃ yasmiṃ sutte ñāṇañeyyā āgatā, tasmiṃ tasmiṃ sutte ñāṇañeyyā ñāṇañeyyapariyāyena niddisitabbanti.

    དསྶནསུཏྟེ ཡཐཱ ནིདྡིཊྛཾ, ཏཐཱ ཨུཔདྷཱརཡིཏྭཱ ལབྦྷམཱནཏོ ནིདྡིསིཏབྦཾ། བྷཱཝནཱསུཏྟེ ཡཐཱ ནིདྡིཊྛཾ, ཏཐཱ ཨུཔདྷཱརཡིཏྭཱ ལབྦྷམཱནཏོ ནིདྡིསིཏབྦཾ། ཏདུབྷཡཾ དསྶནཉྩ བྷཱཝནཱ ཙ སུཏྟེ ཡཐཱ ནིདྡིཊྛཾ, ཏཐཱ ཨུཔདྷཱརཡིཏྭཱ ལབྦྷམཱནཏོ ནིདྡིསིཏབྦཾ།

    Dassanasutte yathā niddiṭṭhaṃ, tathā upadhārayitvā labbhamānato niddisitabbaṃ. Bhāvanāsutte yathā niddiṭṭhaṃ, tathā upadhārayitvā labbhamānato niddisitabbaṃ. Tadubhayaṃ dassanañca bhāvanā ca sutte yathā niddiṭṭhaṃ, tathā upadhārayitvā labbhamānato niddisitabbaṃ.

    ‘‘སཀཝཙནཾ པརཝཙན’’ནྟིཨཱདཱིསུཔི ཨེཝམེཝ ཝིསུཾ ཝིསུཾ ཙ ཨེཀཏོ ཙ སུཏྟེ ཡཐཱ ནིདྡིཊྛཾ, ཏཐཱ ཨུཔདྷཱརཡིཏྭཱ ལབྦྷམཱནཏོ ནིདྡིསིཏབྦནྟི ཡོཛནཱ ཀཱཏབྦཱ། ‘‘ཨེཏྟཀམེཝ ནིདྡིསིཏབྦ’’ནྟི ཝཏྟབྦཏྟཱ ‘‘ཡཾ ཝཱ པནཱ’’ཏིཨཱདི ཝུཏྟཾ།

    ‘‘Sakavacanaṃparavacana’’ntiādīsupi evameva visuṃ visuṃ ca ekato ca sutte yathā niddiṭṭhaṃ, tathā upadhārayitvā labbhamānato niddisitabbanti yojanā kātabbā. ‘‘Ettakameva niddisitabba’’nti vattabbattā ‘‘yaṃ vā panā’’tiādi vuttaṃ.

    ‘‘ཝིཔཱཀསྶ ཧེཏུ ཀམྨམེཝཱ’’ཏི ཝཏྟབྦཏྟཱ ‘‘དུཝིདྷོ ཧེཏཱུ’’ཏིཨཱདི ཝུཏྟཾ། ཀིལེསཱ སཾཀིལེསབྷཱགིཡསུཏྟེན སམཱནཏྠབྷཱཝེན ནིདྡིསིཏབྦཱ། ཏཎྷཱསངྑཱཏོ སམུདཡོ ཝཱ ཀིལེསསངྑཱཏོ སམུདཡོ ཝཱ ཨཀུསལསངྑཱཏོ སམུདཡོ ཝཱ སཾཀིལེསབྷཱགིཡེན སུཏྟེན སམཱནཏྠབྷཱཝེན ནིདྡིསིཏབྦོ། ལོཀིཡཀུསལཧེཏུསངྑཱཏོ སམུདཡོ ཝཱ ལོཀིཡཀུསལསངྑཱཏོ སམུདཡོ ཝཱ ཝཱསནཱབྷཱགིཡེན སུཏྟེན སམཱནཏྠབྷཱཝེན ནིདྡིསིཏབྦོ།

    ‘‘Vipākassa hetu kammamevā’’ti vattabbattā ‘‘duvidho hetū’’tiādi vuttaṃ. Kilesā saṃkilesabhāgiyasuttena samānatthabhāvena niddisitabbā. Taṇhāsaṅkhāto samudayo vā kilesasaṅkhāto samudayo vā akusalasaṅkhāto samudayo vā saṃkilesabhāgiyena suttena samānatthabhāvena niddisitabbo. Lokiyakusalahetusaṅkhāto samudayo vā lokiyakusalasaṅkhāto samudayo vā vāsanābhāgiyena suttena samānatthabhāvena niddisitabbo.

    ཀམྨཉྩ ཝིཔཱཀོ ཙ ཡཐཱརཧཾ ལབྦྷམཱནསུཏྟེན ནིདྡིསིཏབྦོཏི སཱམཉྙཝསེན ཝིབྷཏྟོ, ‘‘ཀུསལཾ ཀཏམེན ནིདྡིསིཏབྦ’’ནྟི ཝཏྟབྦཏྟཱ ‘‘ཏཏྠ ཀུསལ’’ནྟིཨཱདི ཝུཏྟཾ། ཏཏྠཱཏི ཏེསུ ཨཊྛཝཱིསཏིཡཱ སཱསནཔཊྛཱནསུཏྟེསུ ཀུསལཾ ཙཏཱུཧི སུཏྟེཧི སམཱནཏྠབྷཱཝེན ནིདྡིསིཏབྦཾ། ‘‘ཀཏམེཧི ཙཏཱུཧཱི’’ཏི ཝཏྟབྦཏྟཱ ‘‘ཝཱསནཱབྷཱགིཡེནཱ’’ཏིཨཱདི ཝུཏྟཾ། ལོཀིཡཀུསལཾ ཝཱསནཱབྷཱགིཡེན ནིདྡིསིཏབྦཾ སམཱནཏྠཏྟཱ, ལོཀུཏྟརཀུསལཾ དསྶནབྷཱགིཡེན, ཝཱསནཱབྷཱགིཡེན, ཨསེཀྑབྷཱགིཡེན ཙ ཡཐཱརཧཾ སམཱནཏྠབྷཱཝེན ནིདྡིསིཏབྦཾ། ཀུསལཾ ཨེཏྟཀེཧི ནིདྡིསིཏབྦནྟི ནིཡམེཏྭཱ ཝིབྷཏྟཾ, ‘‘ཨཀུསལཾ ཀཏམེན ནིདྡིསིཏབྦ’’ནྟི ཝཏྟབྦཏྟཱ ‘‘ཨཀུསལ’’ནྟིཨཱདི ཝུཏྟཾ། ‘‘ཀུསལཉྩ ཨཀུསལཉྩ ཀཏམེན ནིདྡིསིཏབྦ’’ནྟི ཝཏྟབྦཏྟཱ ‘‘ཀུསལཉྩ ཨཀུསལཉྩ ཏདུབྷཡེན ནིདྡིསིཏབྦ’’ནྟི ཝུཏྟཾ། ཡསྨིཾ ཡསྨིཾ སུཏྟེ ཏདུབྷཡཾ ཨཱགཏཾ, ཏསྨིཾ ཏསྨིཾ སུཏྟེ ཨཱགཏེན ཏདུབྷཡེན ནིདྡིསིཏབྦཾ།

    Kammañca vipāko ca yathārahaṃ labbhamānasuttena niddisitabboti sāmaññavasena vibhatto, ‘‘kusalaṃ katamena niddisitabba’’nti vattabbattā ‘‘tattha kusala’’ntiādi vuttaṃ. Tatthāti tesu aṭṭhavīsatiyā sāsanapaṭṭhānasuttesu kusalaṃ catūhi suttehi samānatthabhāvena niddisitabbaṃ. ‘‘Katamehi catūhī’’ti vattabbattā ‘‘vāsanābhāgiyenā’’tiādi vuttaṃ. Lokiyakusalaṃ vāsanābhāgiyena niddisitabbaṃ samānatthattā, lokuttarakusalaṃ dassanabhāgiyena, vāsanābhāgiyena, asekkhabhāgiyena ca yathārahaṃ samānatthabhāvena niddisitabbaṃ. Kusalaṃ ettakehi niddisitabbanti niyametvā vibhattaṃ, ‘‘akusalaṃ katamena niddisitabba’’nti vattabbattā ‘‘akusala’’ntiādi vuttaṃ. ‘‘Kusalañca akusalañca katamena niddisitabba’’nti vattabbattā ‘‘kusalañca akusalañca tadubhayena niddisitabba’’nti vuttaṃ. Yasmiṃ yasmiṃ sutte tadubhayaṃ āgataṃ, tasmiṃ tasmiṃ sutte āgatena tadubhayena niddisitabbaṃ.

    ‘‘ཨནུཉྙཱཏཾ ཀཏམེན ནིདྡིསིཏབྦ’’ནྟི ཝཏྟབྦཏྟཱ ‘‘ཨནུཉྙཱཏ’’ནྟིཨཱདི ཝུཏྟཾ། ཨནུཉྙཱཏཾ བྷགཝཏོ ཨནུཉྙཱཏཱཡ སམཱནཏཱཡ ནིདྡིསིཏབྦཾ། ‘‘ཀཏིཝིདྷཾ ཨནུཉྙཱཏ’’ནྟི ཝཏྟབྦཏྟཱ ‘‘ཏཾ པཉྩཝིདྷ’’ནྟིཨཱདི ཝུཏྟཾ། ཡཾ ཨནུཉྙཱཏཾ ཡཱསུ ཡཱསུ བྷཱུམཱིསུ དིསྶཏི, ཏཾ ཨནུཉྙཱཏཾ ཏཱསུ ཏཱསུ བྷཱུམཱིསུ ཨཱགཏེན སམཱནེན ཀཔྤིཡཱནུལོམེན ནིདྡིསིཏབྦཾ།

    ‘‘Anuññātaṃ katamena niddisitabba’’nti vattabbattā ‘‘anuññāta’’ntiādi vuttaṃ. Anuññātaṃ bhagavato anuññātāya samānatāya niddisitabbaṃ. ‘‘Katividhaṃ anuññāta’’nti vattabbattā ‘‘taṃ pañcavidha’’ntiādi vuttaṃ. Yaṃ anuññātaṃ yāsu yāsu bhūmīsu dissati, taṃ anuññātaṃ tāsu tāsu bhūmīsu āgatena samānena kappiyānulomena niddisitabbaṃ.

    ཨནུཉྙཱཏཾ ཨིམིནཱ ནིདྡིསིཏབྦནྟི ཨཱཙརིཡེན ནིཡམེཏྭཱ ཝིབྷཏྟཾ, ‘‘པཊིཀྑིཏྟཾ ཀཏམེན ནིདྡིསིཏབྦ’’ནྟི ཝཏྟབྦཏྟཱ ‘‘པཊིཀྑིཏྟཾ བྷགཝཏཱ’’ཏིཨཱདི ཝུཏྟཾ། བྷགཝཏཱ པཊིཀྑིཏྟཾ བྷགཝཏཱ པཊིཀྑིཏྟཀཱརཎེན སུཏྟེ ཨཱགཏེན ཝཏྠུནཱ ཀཱརཎཕལབྷཱཝེན ནིདྡིསིཏབྦཾ། ཡཾ པཊིཀྑིཏྟཾ ཡཱསུ ཡཱསུ བྷཱུམཱིསུ དིསྶཏི, ཏཾ པན པཊིཀྑིཏྟཾ ཏཱསུ ཏཱསུ བྷཱུམཱིསུ ཨཱགཏེན པཱཀཊེན ཨཀཔྤིཡཱནུལོམེན ནིདྡིསིཏབྦཾ།

    Anuññātaṃ iminā niddisitabbanti ācariyena niyametvā vibhattaṃ, ‘‘paṭikkhittaṃ katamena niddisitabba’’nti vattabbattā ‘‘paṭikkhittaṃ bhagavatā’’tiādi vuttaṃ. Bhagavatā paṭikkhittaṃ bhagavatā paṭikkhittakāraṇena sutte āgatena vatthunā kāraṇaphalabhāvena niddisitabbaṃ. Yaṃ paṭikkhittaṃ yāsu yāsu bhūmīsu dissati, taṃ pana paṭikkhittaṃ tāsu tāsu bhūmīsu āgatena pākaṭena akappiyānulomena niddisitabbaṃ.

    ‘‘ཨནུཉྙཱཏཉྩ པཊིཀྑིཏྟཉྩ ཀཏམེན ནིདྡིསིཏབྦ’’ནྟི ཝཏྟབྦཏྟཱ ‘‘ཨནུཉྙཱཏཉྩ པཊིཀྑིཏྟཉྩ ཏདུབྷཡེན ནིདྡིསིཏབྦ’’ནྟི ཝུཏྟཾ། ཡསྨིཾ ཡསྨིཾ སུཏྟེ ཨནུཉྙཱཏཉྩ པཊིཀྑིཏྟཉྩ ཨཱགཏཾ, ཏསྨིཾ ཏསྨིཾ སུཏྟེ ཨཱགཏེན ཏདུབྷཡེན ནིདྡིསིཏབྦཾ།

    ‘‘Anuññātañca paṭikkhittañca katamena niddisitabba’’nti vattabbattā ‘‘anuññātañca paṭikkhittañca tadubhayena niddisitabba’’nti vuttaṃ. Yasmiṃ yasmiṃ sutte anuññātañca paṭikkhittañca āgataṃ, tasmiṃ tasmiṃ sutte āgatena tadubhayena niddisitabbaṃ.

    ‘‘ཐཝོ ཀཏམེན ནིདྡིསིཏབྦོ’’ཏི ཝཏྟབྦཏྟཱ ‘‘ཐཝོ པསཾསཱཡཱ’’ཏིཨཱདི ཝུཏྟཾ། ཡསྨིཾ ཡསྨིཾ སུཏྟེ ཡཱ ཡཱ པསཾསཱ ཨཱགཏཱ, ཏསྨིཾ ཏསྨིཾ སུཏྟེ ཨཱགཏཱཡ ཏཱཡ ཏཱཡ པསཾསཱཡ ཐཝོ ནིདྡིསིཏབྦོ། ‘‘ཡོ ཐཝོ པསཾསཱཡ ནིདྡིསིཏབྦོ, སོ ཐཝོ ཀཏིཝིདྷེན ནིདྡིསིཏབྦོ’’ཏི ཝཏྟབྦཏྟཱ ‘‘སོ པཉྩཝིདྷེནཱ’’ཏིཨཱདི ཝུཏྟཾ། བྷགཝཏོ ཐཝོ ཙ དྷམྨསྶ ཐཝོ ཙ ཨརིཡསངྒྷསྶ ཐཝོ ཙ ཨརིཡདྷམྨཱནཾ སིཀྑཱཡ ཐཝོ ཙ ལོཀིཡགུཎསམྤཏྟིཡཱ ཐཝོ ཙཱཏི པཉྩཝིདྷེན ཝེདིཏབྦོ། ཨིཏི ཨེཝཾ ཝུཏྟཔྤཀཱརེན པཉྩཝིདྷེན ཐཝོ ནིདྡིསིཏབྦོ།

    ‘‘Thavo katamena niddisitabbo’’ti vattabbattā ‘‘thavo pasaṃsāyā’’tiādi vuttaṃ. Yasmiṃ yasmiṃ sutte yā yā pasaṃsā āgatā, tasmiṃ tasmiṃ sutte āgatāya tāya tāya pasaṃsāya thavo niddisitabbo. ‘‘Yo thavo pasaṃsāya niddisitabbo, so thavo katividhena niddisitabbo’’ti vattabbattā ‘‘so pañcavidhenā’’tiādi vuttaṃ. Bhagavato thavo ca dhammassa thavo ca ariyasaṅghassa thavo ca ariyadhammānaṃ sikkhāya thavo ca lokiyaguṇasampattiyā thavo cāti pañcavidhena veditabbo. Iti evaṃ vuttappakārena pañcavidhena thavo niddisitabbo.

    ཨམྷཱཀཱཙརིཡ ཨམྷཱཀཱཙརིཡེན ཨཊྛཱརས མཱུལཔདཱ སཱསནཔཊྛཱནེ དཊྛབྦཱཏི ཝུཏྟཱ, ‘‘ཀཏམཱནི ཏཱནི ཨཊྛཱརས མཱུལཔདཱནཱི’’ཏི པུཙྪིཏབྦཏྟཱ ‘‘ཨིནྡྲིཡབྷཱུམཱི’’ཏིཨཱདི ཝུཏྟཾ། སཱསནཔཊྛཱནེ ཨིནྡྲིཡབྷཱུམི སདྡྷིནྡྲིཡཱདིཨིནྡྲིཡབྷཱུམི ཡེཧི ནཝཧི པདེཧི ནིདྡིསིཏབྦཱ, སཱསནཔཊྛཱནེ ཀིལེསབྷཱུམི ཡེཧི ནཝཧི པདེཧི ནིདྡིསིཏབྦཱ, ཨེཝཾ ཨིམིནཱ པཀཱརེན ཨེཏཱནི མཱུལཔདཱནི ནཝ པདཱནི ཀུསལཔདཱནི, ནཝ པདཱནི ཨཀུསལཔདཱནཱིཏི ཨཊྛཱརས མཱུལཔདཱནི ཧོནྟི། སཱསནཔཊྛཱནེ དཊྛབྦཱ, ‘‘ཀེན ཀཱརཎེན ཨཊྛཱརས མཱུལཔདཱ སཱསནཔཊྛཱནེ དཊྛབྦཱཏི ཝིཉྙཱཡཏཱི’’ཏི ཝཏྟབྦཏྟཱ ‘‘ཏཐཱ ཧཱི’’ཏིཨཱདི ཝུཏྟཾ། ཏཐཱ ཧཱིཏི ཏཏོ ཨེཝ ཨཊྛཱརསམཱུལཔདཱནཾ སཱསནཔཊྛཱནེ དཊྛབྦཏྟཱ ‘‘ཨཊྛཱརས མཱུལཔདཱ ཀུཧིཾ དཊྛབྦཱ? སཱསནཔཊྛཱནེ’’ཏི ཡཾ ཝཙནཾ ཝུཏྟཾ, ཏེན ཝཙནེན ཝིཉྙཱཡཏཱིཏི། ‘‘ཀེན མཱུལཔདཱནཾ ནཝཀུསལཔདནཝཨཀུསལཔདབྷཱཝེན ཨཊྛཱརསབྷཱཝོ ཝིཉྙཱཡཏཱི’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ། ཏེན མཱུལཔདཱནཾ ནཝཀུསལཔདནཝཨཀུསལཔདབྷཱཝཏོ ཨཱཡསྨཱ མཧཱཀཙྩཱནོ –

    Amhākācariya amhākācariyena aṭṭhārasa mūlapadā sāsanapaṭṭhāne daṭṭhabbāti vuttā, ‘‘katamāni tāni aṭṭhārasa mūlapadānī’’ti pucchitabbattā ‘‘indriyabhūmī’’tiādi vuttaṃ. Sāsanapaṭṭhāne indriyabhūmi saddhindriyādiindriyabhūmi yehi navahi padehi niddisitabbā, sāsanapaṭṭhāne kilesabhūmi yehi navahi padehi niddisitabbā, evaṃ iminā pakārena etāni mūlapadāni nava padāni kusalapadāni, nava padāni akusalapadānīti aṭṭhārasa mūlapadāni honti. Sāsanapaṭṭhāne daṭṭhabbā, ‘‘kena kāraṇena aṭṭhārasa mūlapadā sāsanapaṭṭhāne daṭṭhabbāti viññāyatī’’ti vattabbattā ‘‘tathā hī’’tiādi vuttaṃ. Tathā hīti tato eva aṭṭhārasamūlapadānaṃ sāsanapaṭṭhāne daṭṭhabbattā ‘‘aṭṭhārasa mūlapadā kuhiṃ daṭṭhabbā? Sāsanapaṭṭhāne’’ti yaṃ vacanaṃ vuttaṃ, tena vacanena viññāyatīti. ‘‘Kena mūlapadānaṃ navakusalapadanavaakusalapadabhāvena aṭṭhārasabhāvo viññāyatī’’ti vattabbattā ‘‘tenāhā’’tiādi vuttaṃ. Tena mūlapadānaṃ navakusalapadanavaakusalapadabhāvato āyasmā mahākaccāno –

    ‘‘ནཝཧི ཙ པདེཧི ཀུསལཱ, ནཝཧི ཙ ཡུཛྫནྟི ཨཀུསལཔཀྑཱ།

    ‘‘Navahi ca padehi kusalā, navahi ca yujjanti akusalapakkhā;

    ཨེཏེ ཁོ མཱུལཔདཱ, བྷཝནྟི ཨཊྛཱརས པདཱནཱི’’ཏི༎ –

    Ete kho mūlapadā, bhavanti aṭṭhārasa padānī’’ti. –

    ཡཾ ཝཙནཾ ཨཱཧ, ཏེན ‘‘ནཝཧི…པེ॰… པདཱནཱི’’ཏི ཝཙནེན མཱུལཔདཱནཾ ནཝཀུསལཔདནཝཨཀུསལཔདབྷཱཝེན ཨཊྛཱརསབྷཱཝོ ཝིཉྙཱཡཏཱིཏི།

    Yaṃ vacanaṃ āha, tena ‘‘navahi…pe… padānī’’ti vacanena mūlapadānaṃ navakusalapadanavaakusalapadabhāvena aṭṭhārasabhāvo viññāyatīti.

    ‘‘ཡཾ ཡཾ སཾཀིལེསབྷཱགིཡཱདིསོལ༹སཝིདྷཾ སཱསནཔཊྛཱནཉྩེཝ ཡཾ ཡཾ ལོཀིཡཱདིཨཊྛཝཱིསཏིཝིདྷཾ སཱསནཔཊྛཱནཉྩ ཨཱཙརིཡེན ནིདྡྷཱརིཏཾ, ཨེཏྟཀམེཝ པརིཔུཎྞཾ, ཨཉྙཾ སཱསནཔཊྛཱནཾ ནིདྡྷཱརེཏྭཱ ཡུཏྟཾ ཡུཛྫིཏབྦཾ ནཏྠཱི’’ཏི ཝཏྟབྦཏྟཱ ‘‘ནིཡུཏྟཾ སཱསནཔཊྛཱན’’ནྟི ཝུཏྟཾ། ཡཐཱནིདྡྷཱརིཏསཱསནཔཊྛཱནཏོ ཡཾ ཡཾ ཨཉྙཾ སཱསནཔཊྛཱནཾ ནིདྡྷཱརིཏཾ ཨཏྠི, ཏཾ ཏཾ ཨཉྙཾ སཱསནཔཊྛཱནཾ ནིཡུཏྟཾ ཡཐཱརཧཾ ནིདྡྷཱརེཏྭཱ ཡུཏྟཾ ཡུཛྫིཏབྦནྟི ཨཏྠོ གཧེཏབྦོཏི།

    ‘‘Yaṃ yaṃ saṃkilesabhāgiyādisoḷasavidhaṃ sāsanapaṭṭhānañceva yaṃ yaṃ lokiyādiaṭṭhavīsatividhaṃ sāsanapaṭṭhānañca ācariyena niddhāritaṃ, ettakameva paripuṇṇaṃ, aññaṃ sāsanapaṭṭhānaṃ niddhāretvā yuttaṃ yujjitabbaṃ natthī’’ti vattabbattā ‘‘niyuttaṃ sāsanapaṭṭhāna’’nti vuttaṃ. Yathāniddhāritasāsanapaṭṭhānato yaṃ yaṃ aññaṃ sāsanapaṭṭhānaṃ niddhāritaṃ atthi, taṃ taṃ aññaṃ sāsanapaṭṭhānaṃ niyuttaṃ yathārahaṃ niddhāretvā yuttaṃ yujjitabbanti attho gahetabboti.

    ‘‘ཡཾ ལོཀོ པཱུཛཡཏེ…པེ॰… ནིཡུཏྟཾ སཱསནཔཊྛཱནནྟི ཡཏྟཀོ ཝཙནཀྐམོ བྷཱསིཏོ, ཨེཏྟཀེན ཝཙནཀྐམེན ཀིཾ ནེཏྟི སམཏྟཱ, ཨུདཱཧུ ཨསམཏྟཱ’’ཏི ཝཏྟབྦཏྟཱ ‘‘ཨེཏྟཱཝཏཱ’’ཏིཨཱདི ཝུཏྟཾ། ཨཱཡསྨཏཱ མཧཱཀཙྩཱནེན ཡཱ ནེཏྟི བྷཱསིཏཱ, བྷགཝཏཱ སཱ ནེཏྟི ཨནུམོདིཏཱ, མཱུལསངྒཱིཏིཡཾ སངྒཱཡནྟེཧི ཐེརཱསབྷེཧི ཡཱ ནེཏྟི སངྒཱིཏཱ, སཱ ནེཏྟི ‘‘ཡཾ ལོཀོ པཱུཛཡཏེ…པེ॰… ནིཡུཏྟཾ སཱསནཔཊྛཱན’’ནྟི ཨེཏྟཱཝཏཱ ཝཙནཀྐམེན སམཏྟཱ པརིཔུཎྞཱཝ ཧོཏི།

    ‘‘Yaṃ loko pūjayate…pe… niyuttaṃ sāsanapaṭṭhānanti yattako vacanakkamo bhāsito, ettakena vacanakkamena kiṃ netti samattā, udāhu asamattā’’ti vattabbattā ‘‘ettāvatā’’tiādi vuttaṃ. Āyasmatā mahākaccānena yā netti bhāsitā, bhagavatā sā netti anumoditā, mūlasaṅgītiyaṃ saṅgāyantehi therāsabhehi yā netti saṅgītā, sā netti ‘‘yaṃ loko pūjayate…pe… niyuttaṃ sāsanapaṭṭhāna’’nti ettāvatā vacanakkamena samattā paripuṇṇāva hoti.

    ཨིཏི སམཏྟཱཡ ཨཱཡསྨཏཱ མཧཱཀཙྩཱནེན བྷཱསིཏཱཡ བྷགཝཏཱ ཨནུམོདིཏཱཡ མཱུལསངྒཱིཏིཡཾ སངྒཱཡནྟེཧི ཐེརཱསབྷེཧི སངྒཱིཏཱཡ ནེཏྟིཡཱ ཨཏྠཝཎྞནཱ སདྡྷམྨཔཱལནཱམེན མཧཱདྷམྨརཱཛགུརུནཱ མཧཱཐེརེན རཙིཏཱ ཛིནཔུཏྟཱནཾ ཧིཏཀརཱ ནེཏྟིཝིབྷཱཝནཱ ཚབྦཱིསཱདྷིཀནཝསཏེ སཀྐརཱཛེ སཱཝཎམཱསེ སུཀྐཔཀྑེ ནཝམདིཝསེ སཱུརིཡུགྒམནསམཡེ སམཏྟཱ།

    Iti samattāya āyasmatā mahākaccānena bhāsitāya bhagavatā anumoditāya mūlasaṅgītiyaṃ saṅgāyantehi therāsabhehi saṅgītāya nettiyā atthavaṇṇanā saddhammapālanāmena mahādhammarājagurunā mahātherena racitā jinaputtānaṃ hitakarā nettivibhāvanā chabbīsādhikanavasate sakkarāje sāvaṇamāse sukkapakkhe navamadivase sūriyuggamanasamaye samattā.

    ཨིཏི སཱསནཔཊྛཱནེ སཏྟིབལཱནུརཱུཔཱ རཙིཏཱ ཝིབྷཱཝནཱ

    Iti sāsanapaṭṭhāne sattibalānurūpā racitā vibhāvanā

    ནིཊྛིཏཱ།

    Niṭṭhitā.




    Next: ནིགམནཀཐཱ • Nigamanakathā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ནེཏྟིཔྤཀརཎཔཱལི༹ • Nettippakaraṇapāḷi / སཱསནཔཊྛཱནཾ • Sāsanapaṭṭhānaṃ

    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā / སཱསནཔཊྛཱནཝཱརཝཎྞནཱ • Sāsanapaṭṭhānavāravaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཔྤཀརཎ-ཊཱིཀཱ • Nettippakaraṇa-ṭīkā / སཱསནཔཊྛཱནཝཱརཝཎྞནཱ • Sāsanapaṭṭhānavāravaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact