| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
9. ஸாஸங்கஸிக்கா²பத³வண்ணனா
9. Sāsaṅkasikkhāpadavaṇṇanā
652. தேன ஸமயேனாதி ஸாஸங்கஸிக்கா²பத³ங். தத்த² வுத்த²வஸ்ஸா ஆரஞ்ஞகேஸூதி தே புப்³பே³பி அரஞ்ஞேயேவ விஹரிங்ஸு. து³ப்³ப³லசீவரத்தா பன பச்சயவஸேன கா³மந்தஸேனாஸனே வஸ்ஸங் வஸித்வா நிட்டி²தசீவரா ஹுத்வா ‘‘இதா³னி நிப்பலிபோ³தா⁴ ஸமணத⁴ம்மங் கரிஸ்ஸாமா’’தி ஆரஞ்ஞகேஸு ஸேனாஸனேஸு விஹரந்தி. கத்திகசோரகாதி கத்திகமாஸே சோரா. பரிபாதெந்தீதி உபத்³த³வந்தி, தத்த² தத்த² ஆதா⁴வித்வா உத்தாஸெந்தி பலாபெந்தி. அந்தரக⁴ரே நிக்கி²பிதுந்தி அந்தோகா³மே நிக்கி²பிதுங். ப⁴க³வா யஸ்மா பச்சயா நாம த⁴ம்மேன ஸமேன து³ல்லபா⁴, ஸல்லேக²வா ஹி பி⁴க்கு² மாதரம்பி விஞ்ஞாபேதுங் ந ஸக்கோதி. தஸ்மா சீவரகு³த்தத்த²ங் அந்தரக⁴ரே நிக்கி²பிதுங் அனுஜானாதி. பி⁴க்கூ²னங் பன அனுரூபத்தா அரஞ்ஞவாஸங் ந படிக்கி²பி.
652.Tenasamayenāti sāsaṅkasikkhāpadaṃ. Tattha vutthavassā āraññakesūti te pubbepi araññeyeva vihariṃsu. Dubbalacīvarattā pana paccayavasena gāmantasenāsane vassaṃ vasitvā niṭṭhitacīvarā hutvā ‘‘idāni nippalibodhā samaṇadhammaṃ karissāmā’’ti āraññakesu senāsanesu viharanti. Kattikacorakāti kattikamāse corā. Paripātentīti upaddavanti, tattha tattha ādhāvitvā uttāsenti palāpenti. Antaraghare nikkhipitunti antogāme nikkhipituṃ. Bhagavā yasmā paccayā nāma dhammena samena dullabhā, sallekhavā hi bhikkhu mātarampi viññāpetuṃ na sakkoti. Tasmā cīvaraguttatthaṃ antaraghare nikkhipituṃ anujānāti. Bhikkhūnaṃ pana anurūpattā araññavāsaṃ na paṭikkhipi.
653. உபவஸ்ஸங் கோ² பனாதி எத்த² உபவஸ்ஸந்தி உபவஸ்ஸ; உபவஸித்வாதி வுத்தங் ஹோதி. உபஸம்பஜ்ஜந்திஆதீ³ஸு விய ஹி எத்த² அனுனாஸிகோ த³ட்ட²ப்³போ³. வஸ்ஸங் உபக³ந்த்வா வஸித்வா சாதி அத்தோ². இமஸ்ஸ ச பத³ஸ்ஸ ‘‘ததா²ரூபேஸு பி⁴க்கு² ஸேனாஸனேஸு விஹரந்தோ’’தி இமினா ஸம்ப³ந்தோ⁴. கிங் வுத்தங் ஹோதி? வஸ்ஸங் உபக³ந்த்வா வஸித்வா ச ததோ பரங் பச்சி²மகத்திகபுண்ணமபரியோஸானகாலங் யானி கோ² பன தானி ஆரஞ்ஞகானி ஸேனாஸனானி ஸாஸங்கஸம்மதானி ஸப்படிப⁴யானி; ததா²ரூபேஸு பி⁴க்கு² ஸேனாஸனேஸு விஹரந்தோ ஆகங்க²மானோ திண்ணங் சீவரானங் அஞ்ஞதரங் சீவரங் அந்தரக⁴ரே நிக்கி²பெய்யாதி. யஸ்மா பன யோ வஸ்ஸங் உபக³ந்த்வா யாவ பட²மகத்திகபுண்ணமங் வஸதி, ஸோ வுட்ட²வஸ்ஸானங் அப்³ப⁴ந்தரோ ஹோதி, தஸ்மா இத³ங் அதிக³ஹனங் ப்³யஞ்ஜனவிசாரணங் அகத்வா பத³பா⁴ஜனே கேவலங் சீவரனிக்கே²பாரஹங் புக்³க³லங் த³ஸ்ஸேதுங் ‘‘வுட்ட²வஸ்ஸான’’ந்தி வுத்தங். தஸ்ஸாபி ‘‘பி⁴க்கு² ஸேனாஸனேஸு விஹரந்தோ’’தி இமினா ஸம்ப³ந்தோ⁴. அயஞ்ஹி எத்த² அத்தோ² ‘‘வுட்ட²வஸ்ஸானங் பி⁴க்கு² ஸேனாஸனேஸு விஹரந்தோ’’தி ஏவரூபானங் பி⁴க்கூ²னங் அப்³ப⁴ந்தரே யோ கோசி பி⁴க்கூ²தி வுத்தங் ஹோதி.
653.Upavassaṃ kho panāti ettha upavassanti upavassa; upavasitvāti vuttaṃ hoti. Upasampajjantiādīsu viya hi ettha anunāsiko daṭṭhabbo. Vassaṃ upagantvā vasitvā cāti attho. Imassa ca padassa ‘‘tathārūpesu bhikkhu senāsanesu viharanto’’ti iminā sambandho. Kiṃ vuttaṃ hoti? Vassaṃ upagantvā vasitvā ca tato paraṃ pacchimakattikapuṇṇamapariyosānakālaṃ yāni kho pana tāni āraññakāni senāsanāni sāsaṅkasammatāni sappaṭibhayāni; tathārūpesu bhikkhu senāsanesu viharanto ākaṅkhamāno tiṇṇaṃ cīvarānaṃ aññataraṃ cīvaraṃ antaraghare nikkhipeyyāti. Yasmā pana yo vassaṃ upagantvā yāva paṭhamakattikapuṇṇamaṃ vasati, so vuṭṭhavassānaṃ abbhantaro hoti, tasmā idaṃ atigahanaṃ byañjanavicāraṇaṃ akatvā padabhājane kevalaṃ cīvaranikkhepārahaṃ puggalaṃ dassetuṃ ‘‘vuṭṭhavassāna’’nti vuttaṃ. Tassāpi ‘‘bhikkhu senāsanesu viharanto’’ti iminā sambandho. Ayañhi ettha attho ‘‘vuṭṭhavassānaṃ bhikkhu senāsanesu viharanto’’ti evarūpānaṃ bhikkhūnaṃ abbhantare yo koci bhikkhūti vuttaṃ hoti.
அரஞ்ஞலக்க²ணங் அதி³ன்னாதா³னவண்ணனாயங் வுத்தங். அயங் பன விஸேஸோ – ஸசே விஹாரோ பரிக்கி²த்தோ ஹோதி, பரிக்கி²த்தஸ்ஸ கா³மஸ்ஸ இந்த³கீ²லதோ அபரிக்கி²த்தஸ்ஸ பரிக்கே²பாரஹட்டா²னதோ பட்டா²ய யாவ விஹாரபரிக்கே²பா மினிதப்³ப³ங். ஸசே விஹாரோ அபரிக்கி²த்தோ ஹோதி, யங் ஸப்³ப³பட²மங் ஸேனாஸனங் வா ப⁴த்தஸாலா வா து⁴வஸன்னிபாதட்டா²னங் வா போ³தி⁴வா சேதியங் வா தூ³ரே சேபி ஸேனாஸனதோ ஹோதி, தங் பரிச்சே²த³ங் கத்வா மினிதப்³ப³ங். ஸசேபி ஆஸன்னே கா³மோ ஹோதி, விஹாரே டி²தேஹி க⁴ரமானுஸகானங் ஸத்³தோ³ ஸூயதி, பப்³ப³தனதீ³ஆதீ³ஹி பன அந்தரிதத்தா ந ஸக்கா உஜுங் க³ந்துங், யோ சஸ்ஸ பகதிமக்³கோ³ ஹோதி, ஸசேபி நாவாய ஸஞ்சரிதப்³போ³, தேன மக்³கே³ன கா³மதோ பஞ்சத⁴னுஸதிகங் க³ஹேதப்³ப³ங். யோ ஆஸன்னகா³மஸ்ஸ அங்க³ஸம்பாத³னத்த²ங் ததோ ததோ மக்³க³ங் பித³ஹதி, அயங் ‘‘து⁴தங்க³சோரோ’’தி வேதி³தப்³போ³.
Araññalakkhaṇaṃ adinnādānavaṇṇanāyaṃ vuttaṃ. Ayaṃ pana viseso – sace vihāro parikkhitto hoti, parikkhittassa gāmassa indakhīlato aparikkhittassa parikkhepārahaṭṭhānato paṭṭhāya yāva vihāraparikkhepā minitabbaṃ. Sace vihāro aparikkhitto hoti, yaṃ sabbapaṭhamaṃ senāsanaṃ vā bhattasālā vā dhuvasannipātaṭṭhānaṃ vā bodhivā cetiyaṃ vā dūre cepi senāsanato hoti, taṃ paricchedaṃ katvā minitabbaṃ. Sacepi āsanne gāmo hoti, vihāre ṭhitehi gharamānusakānaṃ saddo sūyati, pabbatanadīādīhi pana antaritattā na sakkā ujuṃ gantuṃ, yo cassa pakatimaggo hoti, sacepi nāvāya sañcaritabbo, tena maggena gāmato pañcadhanusatikaṃ gahetabbaṃ. Yo āsannagāmassa aṅgasampādanatthaṃ tato tato maggaṃ pidahati, ayaṃ ‘‘dhutaṅgacoro’’ti veditabbo.
ஸாஸங்கஸம்மதானீதி ‘‘ஸாஸங்கானீ’’தி ஸம்மதானி; ஏவங் ஸஞ்ஞாதானீதி அத்தோ². பத³பா⁴ஜனே பன யேன காரணேன தானி ஸாஸங்கஸம்மதானி, தங் த³ஸ்ஸேதுங் ‘‘ஆராமே ஆராமூபசாரே’’திஆதி³ வுத்தங்.
Sāsaṅkasammatānīti ‘‘sāsaṅkānī’’ti sammatāni; evaṃ saññātānīti attho. Padabhājane pana yena kāraṇena tāni sāsaṅkasammatāni, taṃ dassetuṃ ‘‘ārāme ārāmūpacāre’’tiādi vuttaṃ.
ஸஹ படிப⁴யேன ஸப்படிப⁴யானி, ஸன்னிஹிதப³லவப⁴யானீதி அத்தோ². பத³பா⁴ஜனே பன யேன காரணேன தானி ஸப்படிப⁴யானி; தங் த³ஸ்ஸேதுங் ‘‘ஆராமே ஆராமூபசாரே’’திஆதி³ வுத்தங்.
Saha paṭibhayena sappaṭibhayāni, sannihitabalavabhayānīti attho. Padabhājane pana yena kāraṇena tāni sappaṭibhayāni; taṃ dassetuṃ ‘‘ārāme ārāmūpacāre’’tiādi vuttaṃ.
ஸமந்தா கோ³சரகா³மே நிக்கி²பெய்யாதி ஆரஞ்ஞகஸ்ஸ ஸேனாஸனஸ்ஸ ஸமந்தா ஸப்³ப³தி³ஸாபா⁴கே³ஸு அத்தனா அபி⁴ருசிதே கோ³சரகா³மே ஸதியா அங்க³ஸம்பத்தியா நிக்கி²பெய்ய.
Samantā gocaragāme nikkhipeyyāti āraññakassa senāsanassa samantā sabbadisābhāgesu attanā abhirucite gocaragāme satiyā aṅgasampattiyā nikkhipeyya.
தத்ராயங் அங்க³ஸம்பத்தி – புரிமிகாய உபக³ந்த்வா மஹாபவாரணாய பவாரிதோ ஹோதி, இத³மேகங் அங்க³ங். ஸசே பச்சி²மிகாய வா உபக³தோ ஹோதி சி²ன்னவஸ்ஸோ வா, நிக்கி²பிதுங் ந லப⁴தி. கத்திகமாஸோயேவ ஹோதி, இத³ங் து³தியங் அங்க³ங். கத்திகமாஸதோ பரங் ந லப⁴தி, பஞ்சத⁴னுஸதிகங் பச்சி²மமேவ பமாணயுத்தங் ஸேனாஸனங் ஹோதி, இத³ங் ததியங் அங்க³ங். ஊனப்பமாணே வா கா³வுததோ அதிரேகப்பமாணே வா ந லப⁴தி, யத்ர ஹி பிண்டா³ய சரித்வா புன விஹாரங் ப⁴த்தவேலாயங் ஸக்கா ஆக³ந்துங், ததே³வ இத⁴ அதி⁴ப்பேதங். நிமந்திதோ பன அத்³த⁴யோஜனம்பி யோஜனம்பி க³ந்த்வா வஸிதுங் பச்சேதி, இத³மப்பமாணங். ஸாஸங்கஸப்படிப⁴யமேவ ஹோதி, இத³ங் சதுத்த²ங் அங்க³ங். அனாஸங்கஅப்படிப⁴யே ஹி அங்க³யுத்தேபி ஸேனாஸனே வஸந்தோ நிக்கி²பிதுங் ந லப⁴தீதி.
Tatrāyaṃ aṅgasampatti – purimikāya upagantvā mahāpavāraṇāya pavārito hoti, idamekaṃ aṅgaṃ. Sace pacchimikāya vā upagato hoti chinnavasso vā, nikkhipituṃ na labhati. Kattikamāsoyeva hoti, idaṃ dutiyaṃ aṅgaṃ. Kattikamāsato paraṃ na labhati, pañcadhanusatikaṃ pacchimameva pamāṇayuttaṃ senāsanaṃ hoti, idaṃ tatiyaṃ aṅgaṃ. Ūnappamāṇe vā gāvutato atirekappamāṇe vā na labhati, yatra hi piṇḍāya caritvā puna vihāraṃ bhattavelāyaṃ sakkā āgantuṃ, tadeva idha adhippetaṃ. Nimantito pana addhayojanampi yojanampi gantvā vasituṃ pacceti, idamappamāṇaṃ. Sāsaṅkasappaṭibhayameva hoti, idaṃ catutthaṃ aṅgaṃ. Anāsaṅkaappaṭibhaye hi aṅgayuttepi senāsane vasanto nikkhipituṃ na labhatīti.
அஞ்ஞத்ர பி⁴க்கு²ஸம்முதியாதி யா உதோ³ஸிதஸிக்கா²பதே³ கோஸம்ப³கஸம்முதி (பாரா॰ 475) அனுஞ்ஞாதா தஸ்ஸா ஸம்முதியா அஞ்ஞத்ர; ஸசே ஸா லத்³தா⁴ ஹோதி, சா²ரத்தாதிரேகம்பி விப்பவஸிதுங் வட்டதி.
Aññatra bhikkhusammutiyāti yā udositasikkhāpade kosambakasammuti (pārā. 475) anuññātā tassā sammutiyā aññatra; sace sā laddhā hoti, chārattātirekampi vippavasituṃ vaṭṭati.
புன கா³மஸீமங் ஓக்கமித்வாதி ஸசே கோ³சரகா³மதோ புரத்தி²மாய தி³ஸாய ஸேனாஸனங்; அயஞ்ச பச்சி²மதி³ஸங் க³தோ ஹோதி, ஸேனாஸனங் ஆக³ந்த்வா ஸத்தமங் அருணங் உட்டா²பேதுங் அஸக்கொந்தேன கா³மஸீமம்பி ஓக்கமித்வா ஸபா⁴யங் வா யத்த² கத்த²சி வா வஸித்வா சீவரப்பவத்திங் ஞத்வா பக்கமிதுங் வட்டதீதி அத்தோ². ஏவங் அஸக்கொந்தேன தத்தே²வ டி²தேன பச்சுத்³த⁴ரிதப்³ப³ங், அதிரேகசீவரட்டா²னே ட²ஸ்ஸதீதி. ஸேஸங் உத்தானமேவ.
Puna gāmasīmaṃ okkamitvāti sace gocaragāmato puratthimāya disāya senāsanaṃ; ayañca pacchimadisaṃ gato hoti, senāsanaṃ āgantvā sattamaṃ aruṇaṃ uṭṭhāpetuṃ asakkontena gāmasīmampi okkamitvā sabhāyaṃ vā yattha katthaci vā vasitvā cīvarappavattiṃ ñatvā pakkamituṃ vaṭṭatīti attho. Evaṃ asakkontena tattheva ṭhitena paccuddharitabbaṃ, atirekacīvaraṭṭhāne ṭhassatīti. Sesaṃ uttānameva.
கதி²னஸமுட்டா²னங் – காயவாசதோ காயவாசாசித்ததோ ச ஸமுட்டா²தி, அகிரியா, நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மவசீகம்மங், திசித்தங், திவேத³னந்தி.
Kathinasamuṭṭhānaṃ – kāyavācato kāyavācācittato ca samuṭṭhāti, akiriyā, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
ஸாஸங்கஸிக்கா²பத³வண்ணனா நிட்டி²தா.
Sāsaṅkasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ஸாஸங்கஸிக்கா²பத³ங் • 9. Sāsaṅkasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. ஸாஸங்கஸிக்கா²பத³வண்ணனா • 9. Sāsaṅkasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. ஸாஸங்கஸிக்கா²பத³வண்ணனா • 9. Sāsaṅkasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 9. ஸாஸங்கஸிக்கா²பத³வண்ணனா • 9. Sāsaṅkasikkhāpadavaṇṇanā
