| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
9. ஸாஸங்கஸிக்கா²பத³வண்ணனா
9. Sāsaṅkasikkhāpadavaṇṇanā
652-3. நவமே அந்தரந்தரா க⁴ரமெத்தா²தி அந்தரக⁴ரந்தி கா³மோ வுத்தோதி ஆஹ ‘‘அந்தோகா³மே’’தி. ‘‘பட²மங் ஜா²னங் உபஸம்பஜ்ஜ விஹரதீ’’தி (விப⁴॰ 624) இமஸ்ஸ விப⁴ங்கே³ ‘‘உபஸம்பஜ்ஜ’’ந்தி ஸானுஸாரங் உத்³த⁴டங். தங் ஸந்தா⁴யாஹ ‘‘உபஸம்பஜ்ஜந்திஆதீ³ஸு வியா’’தி. தஸ்ஸாபீதி ‘‘வுத்த²வஸ்ஸான’’ந்தி விப⁴ங்க³பத³ஸ்ஸபி. வுத்த²வஸ்ஸானந்தி ச நித்³தா⁴ரணே ஸாமிவசனங், ஏதேன ச புரிமஸிக்கா²பதே³ அனத்த²தகதி²னானங் கதி²னமாஸேபி அஸமாதா³னசாரோ ந லப்³ப⁴தீதி ஸித்³த⁴ங் ஹோதி, இதரதா² ஸிக்கா²பத³ஸ்ஸேவ நிரத்த²கத்தாதி த³ட்ட²ப்³ப³ங்.
652-3. Navame antarantarā gharametthāti antaragharanti gāmo vuttoti āha ‘‘antogāme’’ti. ‘‘Paṭhamaṃ jhānaṃ upasampajja viharatī’’ti (vibha. 624) imassa vibhaṅge ‘‘upasampajja’’nti sānusāraṃ uddhaṭaṃ. Taṃ sandhāyāha ‘‘upasampajjantiādīsu viyā’’ti. Tassāpīti ‘‘vutthavassāna’’nti vibhaṅgapadassapi. Vutthavassānanti ca niddhāraṇe sāmivacanaṃ, etena ca purimasikkhāpade anatthatakathinānaṃ kathinamāsepi asamādānacāro na labbhatīti siddhaṃ hoti, itarathā sikkhāpadasseva niratthakattāti daṭṭhabbaṃ.
பரிக்கே²பாரஹட்டா²னதோதி எத்த² கா³மபரியந்தே டி²தக⁴ரூபசாரதோ பட்டா²ய ஏகோ லெட்³டு³பாதோ பரிக்கே²பாரஹட்டா²னங் நாம. விஸுத்³தி⁴மக்³கே³பி ‘‘அபரிக்கி²த்தஸ்ஸ பட²மலெட்³டு³பாததோ பட்டா²யா’’தி (விஸுத்³தி⁴॰ 1.31) வுத்தங். தந்தி தங் பட²மஸேனாஸனாதி³ங். மஜ்ஜி²மனிகாயட்ட²கதா²யங் பன விஹாரஸ்ஸபி கா³மஸ்ஸேவ உபசாரங் நீஹரித்வா உபி⁴ன்னங் லெட்³டு³பாதானங் அந்தரா மினிதப்³ப³ந்தி வுத்தங்.
Parikkhepārahaṭṭhānatoti ettha gāmapariyante ṭhitagharūpacārato paṭṭhāya eko leḍḍupāto parikkhepārahaṭṭhānaṃ nāma. Visuddhimaggepi ‘‘aparikkhittassa paṭhamaleḍḍupātato paṭṭhāyā’’ti (visuddhi. 1.31) vuttaṃ. Tanti taṃ paṭhamasenāsanādiṃ. Majjhimanikāyaṭṭhakathāyaṃ pana vihārassapi gāmasseva upacāraṃ nīharitvā ubhinnaṃ leḍḍupātānaṃ antarā minitabbanti vuttaṃ.
‘‘கோஸம்பி³யங் அஞ்ஞதரோ பி⁴க்கு² கி³லானோ ஹோதீ’’தி ஆக³தத்தா ‘‘கோஸம்ப³கஸம்முதி அனுஞ்ஞாதா’’தி வுத்தங். ‘‘அயஞ்ச பச்சி²மதி³ஸங் க³தோ ஹோதீ’’தி இமினா அந்தரக⁴ரே சீவரங் நிக்கி²பித்வா தஸ்மிங் விஹாரே வஸந்தஸ்ஸ ஸகலம்பி சீவரமாஸங் விப்பவஸிதுங் வட்டதி, ததோ அஞ்ஞத்த² க³மனகிச்சே ஸதி விஹாரதோ ப³ஹி சா²ரத்தங் விப்பவாஸோ அனுஞ்ஞாதோதி தீ³பேதி. தேனாஹ ‘‘ஸேனாஸனங் ஆக³ந்த்வா ஸத்தமங் அருணங் உட்டா²பேது’’ந்திஆதி³. வஸித்வாதி அருணங் உட்டா²பெத்வா. தத்தே²வாதி தஸ்மிஞ்ஞேவ க³தட்டா²னே. அங்கா³னி பனெத்த² அட்ட²கதா²யமேவ வுத்தானி.
‘‘Kosambiyaṃ aññataro bhikkhu gilāno hotī’’ti āgatattā ‘‘kosambakasammuti anuññātā’’ti vuttaṃ. ‘‘Ayañca pacchimadisaṃ gato hotī’’ti iminā antaraghare cīvaraṃ nikkhipitvā tasmiṃ vihāre vasantassa sakalampi cīvaramāsaṃ vippavasituṃ vaṭṭati, tato aññattha gamanakicce sati vihārato bahi chārattaṃ vippavāso anuññātoti dīpeti. Tenāha ‘‘senāsanaṃ āgantvā sattamaṃ aruṇaṃ uṭṭhāpetu’’ntiādi. Vasitvāti aruṇaṃ uṭṭhāpetvā. Tatthevāti tasmiññeva gataṭṭhāne. Aṅgāni panettha aṭṭhakathāyameva vuttāni.
ஸாஸங்கஸிக்கா²பத³வண்ணனா நிட்டி²தா.
Sāsaṅkasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ஸாஸங்கஸிக்கா²பத³ங் • 9. Sāsaṅkasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 9. ஸாஸங்கஸிக்கா²பத³வண்ணனா • 9. Sāsaṅkasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. ஸாஸங்கஸிக்கா²பத³வண்ணனா • 9. Sāsaṅkasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. ஸாஸங்கஸிக்கா²பத³வண்ணனா • 9. Sāsaṅkasikkhāpadavaṇṇanā
