| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā |
੯. ਸਾਸਙ੍ਕਸਿਕ੍ਖਾਪਦવਣ੍ਣਨਾ
9. Sāsaṅkasikkhāpadavaṇṇanā
੬੫੨. ਤੇਨ ਸਮਯੇਨਾਤਿ ਸਾਸਙ੍ਕਸਿਕ੍ਖਾਪਦਂ। ਤਤ੍ਥ વੁਤ੍ਥવਸ੍ਸਾ ਆਰਞ੍ਞਕੇਸੂਤਿ ਤੇ ਪੁਬ੍ਬੇਪਿ ਅਰਞ੍ਞੇਯੇવ વਿਹਰਿਂਸੁ। ਦੁਬ੍ਬਲਚੀવਰਤ੍ਤਾ ਪਨ ਪਚ੍ਚਯવਸੇਨ ਗਾਮਨ੍ਤਸੇਨਾਸਨੇ વਸ੍ਸਂ વਸਿਤ੍વਾ ਨਿਟ੍ਠਿਤਚੀવਰਾ ਹੁਤ੍વਾ ‘‘ਇਦਾਨਿ ਨਿਪ੍ਪਲਿਬੋਧਾ ਸਮਣਧਮ੍ਮਂ ਕਰਿਸ੍ਸਾਮਾ’’ਤਿ ਆਰਞ੍ਞਕੇਸੁ ਸੇਨਾਸਨੇਸੁ વਿਹਰਨ੍ਤਿ। ਕਤ੍ਤਿਕਚੋਰਕਾਤਿ ਕਤ੍ਤਿਕਮਾਸੇ ਚੋਰਾ। ਪਰਿਪਾਤੇਨ੍ਤੀਤਿ ਉਪਦ੍ਦવਨ੍ਤਿ, ਤਤ੍ਥ ਤਤ੍ਥ ਆਧਾવਿਤ੍વਾ ਉਤ੍ਤਾਸੇਨ੍ਤਿ ਪਲਾਪੇਨ੍ਤਿ। ਅਨ੍ਤਰਘਰੇ ਨਿਕ੍ਖਿਪਿਤੁਨ੍ਤਿ ਅਨ੍ਤੋਗਾਮੇ ਨਿਕ੍ਖਿਪਿਤੁਂ। ਭਗવਾ ਯਸ੍ਮਾ ਪਚ੍ਚਯਾ ਨਾਮ ਧਮ੍ਮੇਨ ਸਮੇਨ ਦੁਲ੍ਲਭਾ, ਸਲ੍ਲੇਖવਾ ਹਿ ਭਿਕ੍ਖੁ ਮਾਤਰਮ੍ਪਿ વਿਞ੍ਞਾਪੇਤੁਂ ਨ ਸਕ੍ਕੋਤਿ। ਤਸ੍ਮਾ ਚੀવਰਗੁਤ੍ਤਤ੍ਥਂ ਅਨ੍ਤਰਘਰੇ ਨਿਕ੍ਖਿਪਿਤੁਂ ਅਨੁਜਾਨਾਤਿ। ਭਿਕ੍ਖੂਨਂ ਪਨ ਅਨੁਰੂਪਤ੍ਤਾ ਅਰਞ੍ਞવਾਸਂ ਨ ਪਟਿਕ੍ਖਿਪਿ।
652.Tenasamayenāti sāsaṅkasikkhāpadaṃ. Tattha vutthavassā āraññakesūti te pubbepi araññeyeva vihariṃsu. Dubbalacīvarattā pana paccayavasena gāmantasenāsane vassaṃ vasitvā niṭṭhitacīvarā hutvā ‘‘idāni nippalibodhā samaṇadhammaṃ karissāmā’’ti āraññakesu senāsanesu viharanti. Kattikacorakāti kattikamāse corā. Paripātentīti upaddavanti, tattha tattha ādhāvitvā uttāsenti palāpenti. Antaraghare nikkhipitunti antogāme nikkhipituṃ. Bhagavā yasmā paccayā nāma dhammena samena dullabhā, sallekhavā hi bhikkhu mātarampi viññāpetuṃ na sakkoti. Tasmā cīvaraguttatthaṃ antaraghare nikkhipituṃ anujānāti. Bhikkhūnaṃ pana anurūpattā araññavāsaṃ na paṭikkhipi.
੬੫੩. ਉਪવਸ੍ਸਂ ਖੋ ਪਨਾਤਿ ਏਤ੍ਥ ਉਪવਸ੍ਸਨ੍ਤਿ ਉਪવਸ੍ਸ; ਉਪવਸਿਤ੍વਾਤਿ વੁਤ੍ਤਂ ਹੋਤਿ। ਉਪਸਮ੍ਪਜ੍ਜਨ੍ਤਿਆਦੀਸੁ વਿਯ ਹਿ ਏਤ੍ਥ ਅਨੁਨਾਸਿਕੋ ਦਟ੍ਠਬ੍ਬੋ। વਸ੍ਸਂ ਉਪਗਨ੍ਤ੍વਾ વਸਿਤ੍વਾ ਚਾਤਿ ਅਤ੍ਥੋ। ਇਮਸ੍ਸ ਚ ਪਦਸ੍ਸ ‘‘ਤਥਾਰੂਪੇਸੁ ਭਿਕ੍ਖੁ ਸੇਨਾਸਨੇਸੁ વਿਹਰਨ੍ਤੋ’’ਤਿ ਇਮਿਨਾ ਸਮ੍ਬਨ੍ਧੋ। ਕਿਂ વੁਤ੍ਤਂ ਹੋਤਿ? વਸ੍ਸਂ ਉਪਗਨ੍ਤ੍વਾ વਸਿਤ੍વਾ ਚ ਤਤੋ ਪਰਂ ਪਚ੍ਛਿਮਕਤ੍ਤਿਕਪੁਣ੍ਣਮਪਰਿਯੋਸਾਨਕਾਲਂ ਯਾਨਿ ਖੋ ਪਨ ਤਾਨਿ ਆਰਞ੍ਞਕਾਨਿ ਸੇਨਾਸਨਾਨਿ ਸਾਸਙ੍ਕਸਮ੍ਮਤਾਨਿ ਸਪ੍ਪਟਿਭਯਾਨਿ; ਤਥਾਰੂਪੇਸੁ ਭਿਕ੍ਖੁ ਸੇਨਾਸਨੇਸੁ વਿਹਰਨ੍ਤੋ ਆਕਙ੍ਖਮਾਨੋ ਤਿਣ੍ਣਂ ਚੀવਰਾਨਂ ਅਞ੍ਞਤਰਂ ਚੀવਰਂ ਅਨ੍ਤਰਘਰੇ ਨਿਕ੍ਖਿਪੇਯ੍ਯਾਤਿ। ਯਸ੍ਮਾ ਪਨ ਯੋ વਸ੍ਸਂ ਉਪਗਨ੍ਤ੍વਾ ਯਾવ ਪਠਮਕਤ੍ਤਿਕਪੁਣ੍ਣਮਂ વਸਤਿ, ਸੋ વੁਟ੍ਠવਸ੍ਸਾਨਂ ਅਬ੍ਭਨ੍ਤਰੋ ਹੋਤਿ, ਤਸ੍ਮਾ ਇਦਂ ਅਤਿਗਹਨਂ ਬ੍ਯਞ੍ਜਨવਿਚਾਰਣਂ ਅਕਤ੍વਾ ਪਦਭਾਜਨੇ ਕੇવਲਂ ਚੀવਰਨਿਕ੍ਖੇਪਾਰਹਂ ਪੁਗ੍ਗਲਂ ਦਸ੍ਸੇਤੁਂ ‘‘વੁਟ੍ਠવਸ੍ਸਾਨ’’ਨ੍ਤਿ વੁਤ੍ਤਂ। ਤਸ੍ਸਾਪਿ ‘‘ਭਿਕ੍ਖੁ ਸੇਨਾਸਨੇਸੁ વਿਹਰਨ੍ਤੋ’’ਤਿ ਇਮਿਨਾ ਸਮ੍ਬਨ੍ਧੋ। ਅਯਞ੍ਹਿ ਏਤ੍ਥ ਅਤ੍ਥੋ ‘‘વੁਟ੍ਠવਸ੍ਸਾਨਂ ਭਿਕ੍ਖੁ ਸੇਨਾਸਨੇਸੁ વਿਹਰਨ੍ਤੋ’’ਤਿ ਏવਰੂਪਾਨਂ ਭਿਕ੍ਖੂਨਂ ਅਬ੍ਭਨ੍ਤਰੇ ਯੋ ਕੋਚਿ ਭਿਕ੍ਖੂਤਿ વੁਤ੍ਤਂ ਹੋਤਿ।
653.Upavassaṃ kho panāti ettha upavassanti upavassa; upavasitvāti vuttaṃ hoti. Upasampajjantiādīsu viya hi ettha anunāsiko daṭṭhabbo. Vassaṃ upagantvā vasitvā cāti attho. Imassa ca padassa ‘‘tathārūpesu bhikkhu senāsanesu viharanto’’ti iminā sambandho. Kiṃ vuttaṃ hoti? Vassaṃ upagantvā vasitvā ca tato paraṃ pacchimakattikapuṇṇamapariyosānakālaṃ yāni kho pana tāni āraññakāni senāsanāni sāsaṅkasammatāni sappaṭibhayāni; tathārūpesu bhikkhu senāsanesu viharanto ākaṅkhamāno tiṇṇaṃ cīvarānaṃ aññataraṃ cīvaraṃ antaraghare nikkhipeyyāti. Yasmā pana yo vassaṃ upagantvā yāva paṭhamakattikapuṇṇamaṃ vasati, so vuṭṭhavassānaṃ abbhantaro hoti, tasmā idaṃ atigahanaṃ byañjanavicāraṇaṃ akatvā padabhājane kevalaṃ cīvaranikkhepārahaṃ puggalaṃ dassetuṃ ‘‘vuṭṭhavassāna’’nti vuttaṃ. Tassāpi ‘‘bhikkhu senāsanesu viharanto’’ti iminā sambandho. Ayañhi ettha attho ‘‘vuṭṭhavassānaṃ bhikkhu senāsanesu viharanto’’ti evarūpānaṃ bhikkhūnaṃ abbhantare yo koci bhikkhūti vuttaṃ hoti.
ਅਰਞ੍ਞਲਕ੍ਖਣਂ ਅਦਿਨ੍ਨਾਦਾਨવਣ੍ਣਨਾਯਂ વੁਤ੍ਤਂ। ਅਯਂ ਪਨ વਿਸੇਸੋ – ਸਚੇ વਿਹਾਰੋ ਪਰਿਕ੍ਖਿਤ੍ਤੋ ਹੋਤਿ, ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਇਨ੍ਦਖੀਲਤੋ ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਤੋ ਪਟ੍ਠਾਯ ਯਾવ વਿਹਾਰਪਰਿਕ੍ਖੇਪਾ ਮਿਨਿਤਬ੍ਬਂ। ਸਚੇ વਿਹਾਰੋ ਅਪਰਿਕ੍ਖਿਤ੍ਤੋ ਹੋਤਿ, ਯਂ ਸਬ੍ਬਪਠਮਂ ਸੇਨਾਸਨਂ વਾ ਭਤ੍ਤਸਾਲਾ વਾ ਧੁવਸਨ੍ਨਿਪਾਤਟ੍ਠਾਨਂ વਾ ਬੋਧਿવਾ ਚੇਤਿਯਂ વਾ ਦੂਰੇ ਚੇਪਿ ਸੇਨਾਸਨਤੋ ਹੋਤਿ, ਤਂ ਪਰਿਚ੍ਛੇਦਂ ਕਤ੍વਾ ਮਿਨਿਤਬ੍ਬਂ। ਸਚੇਪਿ ਆਸਨ੍ਨੇ ਗਾਮੋ ਹੋਤਿ, વਿਹਾਰੇ ਠਿਤੇਹਿ ਘਰਮਾਨੁਸਕਾਨਂ ਸਦ੍ਦੋ ਸੂਯਤਿ, ਪਬ੍ਬਤਨਦੀਆਦੀਹਿ ਪਨ ਅਨ੍ਤਰਿਤਤ੍ਤਾ ਨ ਸਕ੍ਕਾ ਉਜੁਂ ਗਨ੍ਤੁਂ, ਯੋ ਚਸ੍ਸ ਪਕਤਿਮਗ੍ਗੋ ਹੋਤਿ, ਸਚੇਪਿ ਨਾવਾਯ ਸਞ੍ਚਰਿਤਬ੍ਬੋ, ਤੇਨ ਮਗ੍ਗੇਨ ਗਾਮਤੋ ਪਞ੍ਚਧਨੁਸਤਿਕਂ ਗਹੇਤਬ੍ਬਂ। ਯੋ ਆਸਨ੍ਨਗਾਮਸ੍ਸ ਅਙ੍ਗਸਮ੍ਪਾਦਨਤ੍ਥਂ ਤਤੋ ਤਤੋ ਮਗ੍ਗਂ ਪਿਦਹਤਿ, ਅਯਂ ‘‘ਧੁਤਙ੍ਗਚੋਰੋ’’ਤਿ વੇਦਿਤਬ੍ਬੋ।
Araññalakkhaṇaṃ adinnādānavaṇṇanāyaṃ vuttaṃ. Ayaṃ pana viseso – sace vihāro parikkhitto hoti, parikkhittassa gāmassa indakhīlato aparikkhittassa parikkhepārahaṭṭhānato paṭṭhāya yāva vihāraparikkhepā minitabbaṃ. Sace vihāro aparikkhitto hoti, yaṃ sabbapaṭhamaṃ senāsanaṃ vā bhattasālā vā dhuvasannipātaṭṭhānaṃ vā bodhivā cetiyaṃ vā dūre cepi senāsanato hoti, taṃ paricchedaṃ katvā minitabbaṃ. Sacepi āsanne gāmo hoti, vihāre ṭhitehi gharamānusakānaṃ saddo sūyati, pabbatanadīādīhi pana antaritattā na sakkā ujuṃ gantuṃ, yo cassa pakatimaggo hoti, sacepi nāvāya sañcaritabbo, tena maggena gāmato pañcadhanusatikaṃ gahetabbaṃ. Yo āsannagāmassa aṅgasampādanatthaṃ tato tato maggaṃ pidahati, ayaṃ ‘‘dhutaṅgacoro’’ti veditabbo.
ਸਾਸਙ੍ਕਸਮ੍ਮਤਾਨੀਤਿ ‘‘ਸਾਸਙ੍ਕਾਨੀ’’ਤਿ ਸਮ੍ਮਤਾਨਿ; ਏવਂ ਸਞ੍ਞਾਤਾਨੀਤਿ ਅਤ੍ਥੋ। ਪਦਭਾਜਨੇ ਪਨ ਯੇਨ ਕਾਰਣੇਨ ਤਾਨਿ ਸਾਸਙ੍ਕਸਮ੍ਮਤਾਨਿ, ਤਂ ਦਸ੍ਸੇਤੁਂ ‘‘ਆਰਾਮੇ ਆਰਾਮੂਪਚਾਰੇ’’ਤਿਆਦਿ વੁਤ੍ਤਂ।
Sāsaṅkasammatānīti ‘‘sāsaṅkānī’’ti sammatāni; evaṃ saññātānīti attho. Padabhājane pana yena kāraṇena tāni sāsaṅkasammatāni, taṃ dassetuṃ ‘‘ārāme ārāmūpacāre’’tiādi vuttaṃ.
ਸਹ ਪਟਿਭਯੇਨ ਸਪ੍ਪਟਿਭਯਾਨਿ, ਸਨ੍ਨਿਹਿਤਬਲવਭਯਾਨੀਤਿ ਅਤ੍ਥੋ। ਪਦਭਾਜਨੇ ਪਨ ਯੇਨ ਕਾਰਣੇਨ ਤਾਨਿ ਸਪ੍ਪਟਿਭਯਾਨਿ; ਤਂ ਦਸ੍ਸੇਤੁਂ ‘‘ਆਰਾਮੇ ਆਰਾਮੂਪਚਾਰੇ’’ਤਿਆਦਿ વੁਤ੍ਤਂ।
Saha paṭibhayena sappaṭibhayāni, sannihitabalavabhayānīti attho. Padabhājane pana yena kāraṇena tāni sappaṭibhayāni; taṃ dassetuṃ ‘‘ārāme ārāmūpacāre’’tiādi vuttaṃ.
ਸਮਨ੍ਤਾ ਗੋਚਰਗਾਮੇ ਨਿਕ੍ਖਿਪੇਯ੍ਯਾਤਿ ਆਰਞ੍ਞਕਸ੍ਸ ਸੇਨਾਸਨਸ੍ਸ ਸਮਨ੍ਤਾ ਸਬ੍ਬਦਿਸਾਭਾਗੇਸੁ ਅਤ੍ਤਨਾ ਅਭਿਰੁਚਿਤੇ ਗੋਚਰਗਾਮੇ ਸਤਿਯਾ ਅਙ੍ਗਸਮ੍ਪਤ੍ਤਿਯਾ ਨਿਕ੍ਖਿਪੇਯ੍ਯ।
Samantā gocaragāme nikkhipeyyāti āraññakassa senāsanassa samantā sabbadisābhāgesu attanā abhirucite gocaragāme satiyā aṅgasampattiyā nikkhipeyya.
ਤਤ੍ਰਾਯਂ ਅਙ੍ਗਸਮ੍ਪਤ੍ਤਿ – ਪੁਰਿਮਿਕਾਯ ਉਪਗਨ੍ਤ੍વਾ ਮਹਾਪવਾਰਣਾਯ ਪવਾਰਿਤੋ ਹੋਤਿ, ਇਦਮੇਕਂ ਅਙ੍ਗਂ। ਸਚੇ ਪਚ੍ਛਿਮਿਕਾਯ વਾ ਉਪਗਤੋ ਹੋਤਿ ਛਿਨ੍ਨવਸ੍ਸੋ વਾ, ਨਿਕ੍ਖਿਪਿਤੁਂ ਨ ਲਭਤਿ। ਕਤ੍ਤਿਕਮਾਸੋਯੇવ ਹੋਤਿ, ਇਦਂ ਦੁਤਿਯਂ ਅਙ੍ਗਂ। ਕਤ੍ਤਿਕਮਾਸਤੋ ਪਰਂ ਨ ਲਭਤਿ, ਪਞ੍ਚਧਨੁਸਤਿਕਂ ਪਚ੍ਛਿਮਮੇવ ਪਮਾਣਯੁਤ੍ਤਂ ਸੇਨਾਸਨਂ ਹੋਤਿ, ਇਦਂ ਤਤਿਯਂ ਅਙ੍ਗਂ। ਊਨਪ੍ਪਮਾਣੇ વਾ ਗਾવੁਤਤੋ ਅਤਿਰੇਕਪ੍ਪਮਾਣੇ વਾ ਨ ਲਭਤਿ, ਯਤ੍ਰ ਹਿ ਪਿਣ੍ਡਾਯ ਚਰਿਤ੍વਾ ਪੁਨ વਿਹਾਰਂ ਭਤ੍ਤવੇਲਾਯਂ ਸਕ੍ਕਾ ਆਗਨ੍ਤੁਂ, ਤਦੇવ ਇਧ ਅਧਿਪ੍ਪੇਤਂ। ਨਿਮਨ੍ਤਿਤੋ ਪਨ ਅਦ੍ਧਯੋਜਨਮ੍ਪਿ ਯੋਜਨਮ੍ਪਿ ਗਨ੍ਤ੍વਾ વਸਿਤੁਂ ਪਚ੍ਚੇਤਿ, ਇਦਮਪ੍ਪਮਾਣਂ। ਸਾਸਙ੍ਕਸਪ੍ਪਟਿਭਯਮੇવ ਹੋਤਿ, ਇਦਂ ਚਤੁਤ੍ਥਂ ਅਙ੍ਗਂ। ਅਨਾਸਙ੍ਕਅਪ੍ਪਟਿਭਯੇ ਹਿ ਅਙ੍ਗਯੁਤ੍ਤੇਪਿ ਸੇਨਾਸਨੇ વਸਨ੍ਤੋ ਨਿਕ੍ਖਿਪਿਤੁਂ ਨ ਲਭਤੀਤਿ।
Tatrāyaṃ aṅgasampatti – purimikāya upagantvā mahāpavāraṇāya pavārito hoti, idamekaṃ aṅgaṃ. Sace pacchimikāya vā upagato hoti chinnavasso vā, nikkhipituṃ na labhati. Kattikamāsoyeva hoti, idaṃ dutiyaṃ aṅgaṃ. Kattikamāsato paraṃ na labhati, pañcadhanusatikaṃ pacchimameva pamāṇayuttaṃ senāsanaṃ hoti, idaṃ tatiyaṃ aṅgaṃ. Ūnappamāṇe vā gāvutato atirekappamāṇe vā na labhati, yatra hi piṇḍāya caritvā puna vihāraṃ bhattavelāyaṃ sakkā āgantuṃ, tadeva idha adhippetaṃ. Nimantito pana addhayojanampi yojanampi gantvā vasituṃ pacceti, idamappamāṇaṃ. Sāsaṅkasappaṭibhayameva hoti, idaṃ catutthaṃ aṅgaṃ. Anāsaṅkaappaṭibhaye hi aṅgayuttepi senāsane vasanto nikkhipituṃ na labhatīti.
ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾਤਿ ਯਾ ਉਦੋਸਿਤਸਿਕ੍ਖਾਪਦੇ ਕੋਸਮ੍ਬਕਸਮ੍ਮੁਤਿ (ਪਾਰਾ॰ ੪੭੫) ਅਨੁਞ੍ਞਾਤਾ ਤਸ੍ਸਾ ਸਮ੍ਮੁਤਿਯਾ ਅਞ੍ਞਤ੍ਰ; ਸਚੇ ਸਾ ਲਦ੍ਧਾ ਹੋਤਿ, ਛਾਰਤ੍ਤਾਤਿਰੇਕਮ੍ਪਿ વਿਪ੍ਪવਸਿਤੁਂ વਟ੍ਟਤਿ।
Aññatra bhikkhusammutiyāti yā udositasikkhāpade kosambakasammuti (pārā. 475) anuññātā tassā sammutiyā aññatra; sace sā laddhā hoti, chārattātirekampi vippavasituṃ vaṭṭati.
ਪੁਨ ਗਾਮਸੀਮਂ ਓਕ੍ਕਮਿਤ੍વਾਤਿ ਸਚੇ ਗੋਚਰਗਾਮਤੋ ਪੁਰਤ੍ਥਿਮਾਯ ਦਿਸਾਯ ਸੇਨਾਸਨਂ; ਅਯਞ੍ਚ ਪਚ੍ਛਿਮਦਿਸਂ ਗਤੋ ਹੋਤਿ, ਸੇਨਾਸਨਂ ਆਗਨ੍ਤ੍વਾ ਸਤ੍ਤਮਂ ਅਰੁਣਂ ਉਟ੍ਠਾਪੇਤੁਂ ਅਸਕ੍ਕੋਨ੍ਤੇਨ ਗਾਮਸੀਮਮ੍ਪਿ ਓਕ੍ਕਮਿਤ੍વਾ ਸਭਾਯਂ વਾ ਯਤ੍ਥ ਕਤ੍ਥਚਿ વਾ વਸਿਤ੍વਾ ਚੀવਰਪ੍ਪવਤ੍ਤਿਂ ਞਤ੍વਾ ਪਕ੍ਕਮਿਤੁਂ વਟ੍ਟਤੀਤਿ ਅਤ੍ਥੋ। ਏવਂ ਅਸਕ੍ਕੋਨ੍ਤੇਨ ਤਤ੍ਥੇવ ਠਿਤੇਨ ਪਚ੍ਚੁਦ੍ਧਰਿਤਬ੍ਬਂ, ਅਤਿਰੇਕਚੀવਰਟ੍ਠਾਨੇ ਠਸ੍ਸਤੀਤਿ। ਸੇਸਂ ਉਤ੍ਤਾਨਮੇવ।
Puna gāmasīmaṃ okkamitvāti sace gocaragāmato puratthimāya disāya senāsanaṃ; ayañca pacchimadisaṃ gato hoti, senāsanaṃ āgantvā sattamaṃ aruṇaṃ uṭṭhāpetuṃ asakkontena gāmasīmampi okkamitvā sabhāyaṃ vā yattha katthaci vā vasitvā cīvarappavattiṃ ñatvā pakkamituṃ vaṭṭatīti attho. Evaṃ asakkontena tattheva ṭhitena paccuddharitabbaṃ, atirekacīvaraṭṭhāne ṭhassatīti. Sesaṃ uttānameva.
ਕਥਿਨਸਮੁਟ੍ਠਾਨਂ – ਕਾਯવਾਚਤੋ ਕਾਯવਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਅਕਿਰਿਯਾ, ਨੋਸਞ੍ਞਾવਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿવਜ੍ਜਂ, ਕਾਯਕਮ੍ਮવਚੀਕਮ੍ਮਂ, ਤਿਚਿਤ੍ਤਂ, ਤਿવੇਦਨਨ੍ਤਿ।
Kathinasamuṭṭhānaṃ – kāyavācato kāyavācācittato ca samuṭṭhāti, akiriyā, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
ਸਾਸਙ੍ਕਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Sāsaṅkasikkhāpadavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਿਭਙ੍ਗ • Mahāvibhaṅga / ੯. ਸਾਸਙ੍ਕਸਿਕ੍ਖਾਪਦਂ • 9. Sāsaṅkasikkhāpadaṃ
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ੯. ਸਾਸਙ੍ਕਸਿਕ੍ਖਾਪਦવਣ੍ਣਨਾ • 9. Sāsaṅkasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੯. ਸਾਸਙ੍ਕਸਿਕ੍ਖਾਪਦવਣ੍ਣਨਾ • 9. Sāsaṅkasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੯. ਸਾਸਙ੍ਕਸਿਕ੍ਖਾਪਦવਣ੍ਣਨਾ • 9. Sāsaṅkasikkhāpadavaṇṇanā
