| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၉. သသင္ခာရသုတ္တဝဏ္ဏနာ
9. Sasaṅkhārasuttavaṇṇanā
၁၆၉. နဝမေ သသင္ခာရေန ဒုက္ခေန ကသိရေန အဓိမတ္တပယောဂံ ကတ္ဝာဝ ကိလေသပရိနိဗ္ဗာနဓမ္မောတိ သသင္ခာရပရိနိဗ္ဗာယီ။ အသင္ခာရေန အပ္ပယောဂေန အဓိမတ္တပယောဂံ အကတ္ဝာဝ ကိလေသပရိနိဗ္ဗာနဓမ္မောတိ အသင္ခာရပရိနိဗ္ဗာယီ။ ဓမ္မာနုသာရီ ပုဂ္ဂလော ဟိ အာဂမနမ္ဟိ ကိလေသေ ဝိက္ခမ္ဘေန္တော အပ္ပဒုက္ခေန အကသိရေန အကိလမန္တောဝ ဝိက္ခမ္ဘေတုံ သက္ကောတိ။ သဒ္ဓာနုသာရီ ပုဂ္ဂလော ပန ဒုက္ခေန ကသိရေန ကိလမန္တော ဟုတ္ဝာ ဝိက္ခမ္ဘေတုံ, တသ္မာ ဓမ္မာနုသာရိသ္သ ပုဗ္ဗဘာဂမဂ္ဂက္ခဏေ ကိလေသစ္ဆေဒကံ ဉာဏံ အဒန္ဓံ တိခိဏံ သူရံ ဟုတ္ဝာ ဝဟတိ။ ယထာ နာမ တိခိဏေန အသိနာ ကဒလိံ ဆိန္ဒန္တသ္သ ဆိန္နဋ္ဌာနံ မဋ္ဌံ ဟောတိ, အတိသီဃံ ဝဟတိ, သဒ္ဒော န သုယ္ယတိ, ဗလဝဝာယာမကိစ္စံ န ဟောတိ, ဧဝရူပာ ဓမ္မာနုသာရိနော ပုဗ္ဗဘာဂဘာဝနာ ဟောတိ။ သဒ္ဓာနုသာရိနော ပန ပုဗ္ဗဘာဂက္ခဏေ ကိလေသစ္ဆေဒကံ ဉာဏံ ဒန္ဓံ အတိခိဏံ အသူရံ ဟုတ္ဝာ ဝဟတိ။ ယထာ နာမ ကုဏ္ဌေန အသိနာ ကဒလိံ ဆိန္ဒန္တသ္သ ဆိန္နဋ္ဌာနံ န မဋ္ဌံ ဟောတိ, အတိသီဃံ န ဝဟတိ, သဒ္ဒော သုယ္ယတိ, ဗလဝဝာယာမကိစ္စံ ဣစ္ဆိတဗ္ဗံ ဟောတိ, ဧဝရူပာ သဒ္ဓာနုသာရိနော ပုဗ္ဗဘာဂဘာဝနာ ဟောတိ။ ဧဝံ သန္တေပိ နေသံ ကိလေသက္ခယေ နာနတ္တံ နတ္ထိ, အနဝသေသာဝ ကိလေသာ ခီယန္တိ။
169. Navame sasaṅkhārena dukkhena kasirena adhimattapayogaṃ katvāva kilesaparinibbānadhammoti sasaṅkhāraparinibbāyī. Asaṅkhārena appayogena adhimattapayogaṃ akatvāva kilesaparinibbānadhammoti asaṅkhāraparinibbāyī. Dhammānusārī puggalo hi āgamanamhi kilese vikkhambhento appadukkhena akasirena akilamantova vikkhambhetuṃ sakkoti. Saddhānusārī puggalo pana dukkhena kasirena kilamanto hutvā vikkhambhetuṃ, tasmā dhammānusārissa pubbabhāgamaggakkhaṇe kilesacchedakaṃ ñāṇaṃ adandhaṃ tikhiṇaṃ sūraṃ hutvā vahati. Yathā nāma tikhiṇena asinā kadaliṃ chindantassa chinnaṭṭhānaṃ maṭṭhaṃ hoti, atisīghaṃ vahati, saddo na suyyati, balavavāyāmakiccaṃ na hoti, evarūpā dhammānusārino pubbabhāgabhāvanā hoti. Saddhānusārino pana pubbabhāgakkhaṇe kilesacchedakaṃ ñāṇaṃ dandhaṃ atikhiṇaṃ asūraṃ hutvā vahati. Yathā nāma kuṇṭhena asinā kadaliṃ chindantassa chinnaṭṭhānaṃ na maṭṭhaṃ hoti, atisīghaṃ na vahati, saddo suyyati, balavavāyāmakiccaṃ icchitabbaṃ hoti, evarūpā saddhānusārino pubbabhāgabhāvanā hoti. Evaṃ santepi nesaṃ kilesakkhaye nānattaṃ natthi, anavasesāva kilesā khīyanti.
သသင္ခာရသုတ္တဝဏ္ဏနာ နိဋ္ဌိတာ။
Sasaṅkhārasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၉. သသင္ခာရသုတ္တံ • 9. Sasaṅkhārasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၉. သသင္ခာရသုတ္တဝဏ္ဏနာ • 9. Sasaṅkhārasuttavaṇṇanā
