| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
9. සසඞ්‌ඛාරසුත්‌තවණ්‌ණනා
9. Sasaṅkhārasuttavaṇṇanā
169. නවමෙ සසඞ්‌ඛාරෙන දුක්‌ඛෙන කසිරෙන අධිමත්‌තපයොගං කත්‌වාව කිලෙසපරිනිබ්‌බානධම්‌මොති සසඞ්‌ඛාරපරිනිබ්‌බායී. අසඞ්‌ඛාරෙන අප්‌පයොගෙන අධිමත්‌තපයොගං අකත්‌වාව කිලෙසපරිනිබ්‌බානධම්‌මොති අසඞ්‌ඛාරපරිනිබ්‌බායී. ධම්‌මානුසාරී පුග්‌ගලො හි ආගමනම්‌හි කිලෙසෙ වික්‌ඛම්‌භෙන්‌තො අප්‌පදුක්‌ඛෙන අකසිරෙන අකිලමන්‌තොව වික්‌ඛම්‌භෙතුං සක්‌කොති. සද්‌ධානුසාරී පුග්‌ගලො පන දුක්‌ඛෙන කසිරෙන කිලමන්‌තො හුත්‌වා වික්‌ඛම්‌භෙතුං, තස්‌මා ධම්‌මානුසාරිස්‌ස පුබ්‌බභාගමග්‌ගක්‌ඛණෙ කිලෙසච්‌ඡෙදකං ඤාණං අදන්‌ධං තිඛිණං සූරං හුත්‌වා වහති. යථා නාම තිඛිණෙන අසිනා කදලිං ඡින්‌දන්‌තස්‌ස ඡින්‌නට්‌ඨානං මට්‌ඨං හොති, අතිසීඝං වහති, සද්‌දො න සුය්‍යති, බලවවායාමකිච්‌චං න හොති, එවරූපා ධම්‌මානුසාරිනො පුබ්‌බභාගභාවනා හොති. සද්‌ධානුසාරිනො පන පුබ්‌බභාගක්‌ඛණෙ කිලෙසච්‌ඡෙදකං ඤාණං දන්‌ධං අතිඛිණං අසූරං හුත්‌වා වහති. යථා නාම කුණ්‌ඨෙන අසිනා කදලිං ඡින්‌දන්‌තස්‌ස ඡින්‌නට්‌ඨානං න මට්‌ඨං හොති, අතිසීඝං න වහති, සද්‌දො සුය්‍යති, බලවවායාමකිච්‌චං ඉච්‌ඡිතබ්‌බං හොති, එවරූපා සද්‌ධානුසාරිනො පුබ්‌බභාගභාවනා හොති. එවං සන්‌තෙපි නෙසං කිලෙසක්‌ඛයෙ නානත්‌තං නත්‌ථි, අනවසෙසාව කිලෙසා ඛීයන්‌ති.
169. Navame sasaṅkhārena dukkhena kasirena adhimattapayogaṃ katvāva kilesaparinibbānadhammoti sasaṅkhāraparinibbāyī. Asaṅkhārena appayogena adhimattapayogaṃ akatvāva kilesaparinibbānadhammoti asaṅkhāraparinibbāyī. Dhammānusārī puggalo hi āgamanamhi kilese vikkhambhento appadukkhena akasirena akilamantova vikkhambhetuṃ sakkoti. Saddhānusārī puggalo pana dukkhena kasirena kilamanto hutvā vikkhambhetuṃ, tasmā dhammānusārissa pubbabhāgamaggakkhaṇe kilesacchedakaṃ ñāṇaṃ adandhaṃ tikhiṇaṃ sūraṃ hutvā vahati. Yathā nāma tikhiṇena asinā kadaliṃ chindantassa chinnaṭṭhānaṃ maṭṭhaṃ hoti, atisīghaṃ vahati, saddo na suyyati, balavavāyāmakiccaṃ na hoti, evarūpā dhammānusārino pubbabhāgabhāvanā hoti. Saddhānusārino pana pubbabhāgakkhaṇe kilesacchedakaṃ ñāṇaṃ dandhaṃ atikhiṇaṃ asūraṃ hutvā vahati. Yathā nāma kuṇṭhena asinā kadaliṃ chindantassa chinnaṭṭhānaṃ na maṭṭhaṃ hoti, atisīghaṃ na vahati, saddo suyyati, balavavāyāmakiccaṃ icchitabbaṃ hoti, evarūpā saddhānusārino pubbabhāgabhāvanā hoti. Evaṃ santepi nesaṃ kilesakkhaye nānattaṃ natthi, anavasesāva kilesā khīyanti.
සසඞ්‌ඛාරසුත්‌තවණ්‌ණනා නිට්‌ඨිතා.
Sasaṅkhārasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 9. සසඞ්‌ඛාරසුත්‌තං • 9. Sasaṅkhārasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. සසඞ්‌ඛාරසුත්‌තවණ්‌ණනා • 9. Sasaṅkhārasuttavaṇṇanā
