| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
१०. ससपण्डितचरिया
10. Sasapaṇḍitacariyā
१२५.
125.
‘‘पुनापरं यदा होमि, ससको पवनचारको।
‘‘Punāparaṃ yadā homi, sasako pavanacārako;
तिणपण्णसाकफलभक्खो, परहेठनविवज्जितो॥
Tiṇapaṇṇasākaphalabhakkho, paraheṭhanavivajjito.
१२६.
126.
‘‘मक्कटो च सिङ्गालो च, सुत्तपोतो चहं तदा।
‘‘Makkaṭo ca siṅgālo ca, suttapoto cahaṃ tadā;
१२७.
127.
‘‘अहं ते अनुसासामि, किरिये कल्याणपापके।
‘‘Ahaṃ te anusāsāmi, kiriye kalyāṇapāpake;
‘पापानि परिवज्जेथ, कल्याणे अभिनिविस्सथ’॥
‘Pāpāni parivajjetha, kalyāṇe abhinivissatha’.
१२८.
128.
‘‘उपोसथम्हि दिवसे, चन्दं दिस्वान पूरितं।
‘‘Uposathamhi divase, candaṃ disvāna pūritaṃ;
एतेसं तत्थ आचिक्खिं, दिवसो अज्जुपोसथो॥
Etesaṃ tattha ācikkhiṃ, divaso ajjuposatho.
१२९.
129.
‘‘दानानि पटियादेथ, दक्खिणेय्यस्स दातवे।
‘‘Dānāni paṭiyādetha, dakkhiṇeyyassa dātave;
दत्वा दानं दक्खिणेय्ये, उपवस्सथुपोसथं॥
Datvā dānaṃ dakkhiṇeyye, upavassathuposathaṃ.
१३०.
130.
‘‘ते मे साधूति वत्वान, यथासत्ति यथाबलं।
‘‘Te me sādhūti vatvāna, yathāsatti yathābalaṃ;
१३१.
131.
‘‘अहं निसज्ज चिन्तेसिं, दानं दक्खिणनुच्छवं।
‘‘Ahaṃ nisajja cintesiṃ, dānaṃ dakkhiṇanucchavaṃ;
‘यदिहं लभे दक्खिणेय्यं, किं मे दानं भविस्सति॥
‘Yadihaṃ labhe dakkhiṇeyyaṃ, kiṃ me dānaṃ bhavissati.
१३२.
132.
‘‘‘न मे अत्थि तिला मुग्गा, मासा वा तण्डुला घतं।
‘‘‘Na me atthi tilā muggā, māsā vā taṇḍulā ghataṃ;
अहं तिणेन यापेमि, न सक्का तिण दातवे॥
Ahaṃ tiṇena yāpemi, na sakkā tiṇa dātave.
१३३.
133.
‘‘‘यदि कोचि एति दक्खिणेय्यो, भिक्खाय मम सन्तिके।
‘‘‘Yadi koci eti dakkhiṇeyyo, bhikkhāya mama santike;
दज्जाहं सकमत्तानं, न सो तुच्छो गमिस्सति’॥
Dajjāhaṃ sakamattānaṃ, na so tuccho gamissati’.
१३४.
134.
‘‘मम सङ्कप्पमञ्ञाय, सक्को ब्राह्मणवण्णिना।
‘‘Mama saṅkappamaññāya, sakko brāhmaṇavaṇṇinā;
आसयं मे उपागच्छि, दानवीमंसनाय मे॥
Āsayaṃ me upāgacchi, dānavīmaṃsanāya me.
१३५.
135.
‘‘तमहं दिस्वान सन्तुट्ठो, इदं वचनमब्रविं।
‘‘Tamahaṃ disvāna santuṭṭho, idaṃ vacanamabraviṃ;
‘साधु खोसि अनुप्पत्तो, घासहेतु ममन्तिके॥
‘Sādhu khosi anuppatto, ghāsahetu mamantike.
१३६.
136.
‘‘‘अदिन्नपुब्बं दानवरं, अज्ज दस्सामि ते अहं।
‘‘‘Adinnapubbaṃ dānavaraṃ, ajja dassāmi te ahaṃ;
तुवं सीलगुणूपेतो, अयुत्तं ते परहेठनं॥
Tuvaṃ sīlaguṇūpeto, ayuttaṃ te paraheṭhanaṃ.
१३७.
137.
‘‘‘एहि अग्गिं पदीपेहि, नानाकट्ठे समानय।
‘‘‘Ehi aggiṃ padīpehi, nānākaṭṭhe samānaya;
अहं पचिस्समत्तानं, पक्कं त्वं भक्खयिस्ससि’॥
Ahaṃ pacissamattānaṃ, pakkaṃ tvaṃ bhakkhayissasi’.
१३८.
138.
‘‘‘साधू’ति सो हट्ठमनो, नानाकट्ठे समानयि।
‘‘‘Sādhū’ti so haṭṭhamano, nānākaṭṭhe samānayi;
महन्तं अकासि चितकं, कत्वा अङ्गारगब्भकं॥
Mahantaṃ akāsi citakaṃ, katvā aṅgāragabbhakaṃ.
१३९.
139.
‘‘अग्गिं तत्थ पदीपेसि, यथा सो खिप्पं महा भवे।
‘‘Aggiṃ tattha padīpesi, yathā so khippaṃ mahā bhave;
फोटेत्वा रजगते गत्ते, एकमन्तं उपाविसिं॥
Phoṭetvā rajagate gatte, ekamantaṃ upāvisiṃ.
१४०.
140.
तदुप्पतित्वा पपतिं, मज्झे जालसिखन्तरे॥
Taduppatitvā papatiṃ, majjhe jālasikhantare.
१४१.
141.
‘‘यथा सीतोदकं नाम, पविट्ठं यस्स कस्सचि।
‘‘Yathā sītodakaṃ nāma, paviṭṭhaṃ yassa kassaci;
समेति दरथपरिळाहं, अस्सादं देति पीति च॥
Sameti darathapariḷāhaṃ, assādaṃ deti pīti ca.
१४२.
142.
‘‘तथेव जलितं अग्गिं, पविट्ठस्स ममं तदा।
‘‘Tatheva jalitaṃ aggiṃ, paviṭṭhassa mamaṃ tadā;
सब्बं समेति दरथं, यथा सीतोदकं विय॥
Sabbaṃ sameti darathaṃ, yathā sītodakaṃ viya.
१४३.
143.
‘‘छविं चम्मं मंसं न्हारुं, अट्ठिं हदयबन्धनं।
‘‘Chaviṃ cammaṃ maṃsaṃ nhāruṃ, aṭṭhiṃ hadayabandhanaṃ;
केवलं सकलं कायं, ब्राह्मणस्स अदासह’’न्ति॥
Kevalaṃ sakalaṃ kāyaṃ, brāhmaṇassa adāsaha’’nti.
ससपण्डितचरियं दसमं।
Sasapaṇḍitacariyaṃ dasamaṃ.
अकित्तिवग्गो पठमो।
Akittivaggo paṭhamo.
तस्सुद्दानं –
Tassuddānaṃ –
अकित्तिब्राह्मणो सङ्खो, कुरुराजा धनञ्चयो।
Akittibrāhmaṇo saṅkho, kururājā dhanañcayo;
महासुदस्सनो राजा, महागोविन्दब्राह्मणो॥
Mahāsudassano rājā, mahāgovindabrāhmaṇo.
निमि चन्दकुमारो च, सिवि वेस्सन्तरो ससो।
Nimi candakumāro ca, sivi vessantaro saso;
अहमेव तदा आसिं, यो ते दानवरे अदा॥
Ahameva tadā āsiṃ, yo te dānavare adā.
एते दानपरिक्खारा, एते दानस्स पारमी।
Ete dānaparikkhārā, ete dānassa pāramī;
जीवितं याचके दत्वा, इमं पारमि पूरयिं॥
Jīvitaṃ yācake datvā, imaṃ pārami pūrayiṃ.
भिक्खाय उपगतं दिस्वा, सकत्तानं परिच्चजिं।
Bhikkhāya upagataṃ disvā, sakattānaṃ pariccajiṃ;
दानेन मे समो नत्थि, एसा मे दानपारमीति॥
Dānena me samo natthi, esā me dānapāramīti.
दानपारमिनिद्देसो निट्ठितो।
Dānapāraminiddeso niṭṭhito.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / १०. ससपण्डितचरियावण्णना • 10. Sasapaṇḍitacariyāvaṇṇanā
