| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. ஸாஸபஸுத்தங்
6. Sāsapasuttaṃ
129. ஸாவத்தி²யங் விஹரதி. அத² கோ² அஞ்ஞதரோ பி⁴க்கு² யேன ப⁴க³வா…பே॰… ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘கீவதீ³கோ⁴, நு கோ², ப⁴ந்தே, கப்போ’’தி? ‘‘தீ³கோ⁴ கோ², பி⁴க்கு², கப்போ. ஸோ ந ஸுகரோ ஸங்கா²துங் எத்தகானி வஸ்ஸானி இதி வா…பே॰… எத்தகானி வஸ்ஸஸதஸஹஸ்ஸானி இதி வா’’தி.
129. Sāvatthiyaṃ viharati. Atha kho aññataro bhikkhu yena bhagavā…pe… ekamantaṃ nisinno kho so bhikkhu bhagavantaṃ etadavoca – ‘‘kīvadīgho, nu kho, bhante, kappo’’ti? ‘‘Dīgho kho, bhikkhu, kappo. So na sukaro saṅkhātuṃ ettakāni vassāni iti vā…pe… ettakāni vassasatasahassāni iti vā’’ti.
‘‘ஸக்கா பன, ப⁴ந்தே, உபமங் காது’’ந்தி? ‘‘ஸக்கா, பி⁴க்கூ²’’தி ப⁴க³வா அவோச. ‘‘ஸெய்யதா²பி, பி⁴க்கு², ஆயஸங் நக³ரங் யோஜனங் ஆயாமேன யோஜனங் வித்தா²ரேன யோஜனங் உப்³பே³தே⁴ன, புண்ணங் ஸாஸபானங் கு³ளிகாப³த்³த⁴ங் 1. ததோ புரிஸோ வஸ்ஸஸதஸ்ஸ வஸ்ஸஸதஸ்ஸ அச்சயேன ஏகமேகங் ஸாஸபங் உத்³த⁴ரெய்ய. கி²ப்பதரங் கோ² ஸோ, பி⁴க்கு² மஹாஸாஸபராஸி இமினா உபக்கமேன பரிக்க²யங் பரியாதா³னங் க³ச்செ²ய்ய, ந த்வேவ கப்போ. ஏவங் தீ³கோ⁴ கோ², பி⁴க்கு², கப்போ. ஏவங் தீ³கா⁴னங் கோ², பி⁴க்கு², கப்பானங் நேகோ கப்போ ஸங்ஸிதோ, நேகங் கப்பஸதங் ஸங்ஸிதங், நேகங் கப்பஸஹஸ்ஸங் ஸங்ஸிதங், நேகங் கப்பஸதஸஹஸ்ஸங் ஸங்ஸிதங். தங் கிஸ்ஸ ஹேது? அனமதக்³கோ³யங், பி⁴க்கு², ஸங்ஸாரோ …பே॰… அலங் விமுச்சிது’’ந்தி. ச²ட்ட²ங்.
‘‘Sakkā pana, bhante, upamaṃ kātu’’nti? ‘‘Sakkā, bhikkhū’’ti bhagavā avoca. ‘‘Seyyathāpi, bhikkhu, āyasaṃ nagaraṃ yojanaṃ āyāmena yojanaṃ vitthārena yojanaṃ ubbedhena, puṇṇaṃ sāsapānaṃ guḷikābaddhaṃ 2. Tato puriso vassasatassa vassasatassa accayena ekamekaṃ sāsapaṃ uddhareyya. Khippataraṃ kho so, bhikkhu mahāsāsaparāsi iminā upakkamena parikkhayaṃ pariyādānaṃ gaccheyya, na tveva kappo. Evaṃ dīgho kho, bhikkhu, kappo. Evaṃ dīghānaṃ kho, bhikkhu, kappānaṃ neko kappo saṃsito, nekaṃ kappasataṃ saṃsitaṃ, nekaṃ kappasahassaṃ saṃsitaṃ, nekaṃ kappasatasahassaṃ saṃsitaṃ. Taṃ kissa hetu? Anamataggoyaṃ, bhikkhu, saṃsāro …pe… alaṃ vimuccitu’’nti. Chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ஸாஸபஸுத்தவண்ணனா • 6. Sāsapasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. ஸாஸபஸுத்தவண்ணனா • 6. Sāsapasuttavaṇṇanā
