| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၅. သသ္သတဒိဋ္ဌိနိဒ္ဒေသော
5. Sassatadiṭṭhiniddeso
၁၃၈. သက္ကာယဝတ္ထုကာယ သသ္သတဒိဋ္ဌိယာ ကတမေဟိ ပန္နရသဟိ အာကာရေဟိ အဘိနိဝေသော ဟောတိ? ဣဓ အသ္သုတဝာ ပုထုဇ္ဇနော အရိယာနံ အဒသ္သာဝီ အရိယဓမ္မသ္သ အကောဝိဒော အရိယဓမ္မေ အဝိနီတော သပ္ပုရိသာနံ အဒသ္သာဝီ သပ္ပုရိသဓမ္မသ္သ အကောဝိဒော သပ္ပုရိသဓမ္မေ အဝိနီတော ရူပဝန္တံ ဝာ အတ္တာနံ အတ္တနိ ဝာ ရူပံ ရူပသ္မိံ ဝာ အတ္တာနံ။ ဝေဒနာဝန္တံ ဝာ အတ္တာနံ။ပေ.။ သညာဝန္တံ ဝာ အတ္တာနံ။ သင္ခာရဝန္တံ ဝာ အတ္တာနံ။ ဝိညာဏဝန္တံ ဝာ အတ္တာနံ အတ္တနိ ဝာ ဝိညာဏံ ဝိညာဏသ္မိံ ဝာ အတ္တာနံ။
138. Sakkāyavatthukāya sassatadiṭṭhiyā katamehi pannarasahi ākārehi abhiniveso hoti? Idha assutavā puthujjano ariyānaṃ adassāvī ariyadhammassa akovido ariyadhamme avinīto sappurisānaṃ adassāvī sappurisadhammassa akovido sappurisadhamme avinīto rūpavantaṃ vā attānaṃ attani vā rūpaṃ rūpasmiṃ vā attānaṃ. Vedanāvantaṃ vā attānaṃ…pe… saññāvantaṃ vā attānaṃ… saṅkhāravantaṃ vā attānaṃ… viññāṇavantaṃ vā attānaṃ attani vā viññāṇaṃ viññāṇasmiṃ vā attānaṃ.
ကထံ ရူပဝန္တံ အတ္တာနံ သမနုပသ္သတိ? ဣဓေကစ္စော ဝေဒနံ။ သညံ။ သင္ခာရေ။ ဝိညာဏံ အတ္တတော သမနုပသ္သတိ။ တသ္သ ဧဝံ ဟောတိ – ‘‘အယံ ခော မေ အတ္တာ။ သော ခော ပန မေ အယံ အတ္တာ ဣမိနာ ရူပေန ရူပဝာ’’တိ။ ရူပဝန္တံ အတ္တာနံ သမနုပသ္သတိ။ သေယ္ယထာပိ ရုက္ခော ဆာယာသမ္ပန္နော အသ္သ။ တမေနံ ပုရိသော ဧဝံ ဝဒေယ္ယ – ‘‘အယံ ရုက္ခော, အယံ ဆာယာ; အညော ရုက္ခော, အညာ ဆာယာ။ သော ခော ပနာယံ ရုက္ခော ဣမာယ ဆာယာယ ဆာယာဝာ’’တိ။ ဆာယာဝန္တံ ရုက္ခံ သမနုပသ္သတိ။ ဧဝမေဝံ ဣဓေကစ္စော ဝေဒနံ။ပေ.။ အယံ ပဌမာ သက္ကာယဝတ္ထုကာ သသ္သတဒိဋ္ဌိ။ သသ္သတဒိဋ္ဌိ မိစ္ဆာဒိဋ္ဌိ။ပေ.။ ဣမာနိ သညောဇနာနိ, န စ ဒိဋ္ဌိယော။ ဧဝံ ရူပဝန္တံ အတ္တာနံ သမနုပသ္သတိ။ပေ.။ သက္ကာယဝတ္ထုကာယ သသ္သတဒိဋ္ဌိယာ ဣမေဟိ ပန္နရသဟိ အာကာရေဟိ အဘိနိဝေသော ဟောတိ။
Kathaṃ rūpavantaṃ attānaṃ samanupassati? Idhekacco vedanaṃ… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā iminā rūpena rūpavā’’ti. Rūpavantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā; añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco vedanaṃ…pe… ayaṃ paṭhamā sakkāyavatthukā sassatadiṭṭhi. Sassatadiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ rūpavantaṃ attānaṃ samanupassati…pe… sakkāyavatthukāya sassatadiṭṭhiyā imehi pannarasahi ākārehi abhiniveso hoti.
သသ္သတဒိဋ္ဌိနိဒ္ဒေသော ပဉ္စမော။
Sassatadiṭṭhiniddeso pañcamo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၅. သသ္သတဒိဋ္ဌိနိဒ္ဒေသဝဏ္ဏနာ • 5. Sassatadiṭṭhiniddesavaṇṇanā
