Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya

    ৫৫. সাতচ্চমূলকসপ্পাযকারীসুত্তং

    55. Sātaccamūlakasappāyakārīsuttaṃ

    ৭১৬. সাৰত্থিনিদানং। ‘‘চতারোমে, ভিক্খৰে, ঝাযী। কতমে চত্তারো? ইধ, ভিক্খৰে , একচ্চো ঝাযী সমাধিস্মিং সাতচ্চকারী হোতি, ন সমাধিস্মিং সপ্পাযকারী। ইধ পন, ভিক্খৰে, একচ্চো ঝাযী সমাধিস্মিং সপ্পাযকারী হোতি, ন সমাধিস্মিং সাতচ্চকারী। ইধ পন, ভিক্খৰে, একচ্চো ঝাযী নেৰ সমাধিস্মিং সাতচ্চকারী হোতি, ন চ সমাধিস্মিং সপ্পাযকারী। ইধ পন, ভিক্খৰে, একচ্চো ঝাযী সমাধিস্মিং সাতচ্চকারী চ হোতি, সমাধিস্মিং সপ্পাযকারী চ। তত্র, ভিক্খৰে, য্ৰাযং ঝাযী সমাধিস্মিং সাতচ্চকারী চ হোতি সমাধিস্মিং সপ্পাযকারী চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ। সেয্যথাপি, ভিক্খৰে, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডো তত্র অগ্গমক্খাযতি; এৰমেৰ খো, ভিক্খৰে, য্ৰাযং ঝাযী সমাধিস্মিং সাতচ্চকারী চ হোতি, সমাধিস্মিং সপ্পাযকারী অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চা’’তি। ইদমৰোচ ভগৰা। অত্তমনা তে ভিক্খূ ভগৰতো ভাসিতং অভিনন্দুন্তি। পঞ্চপঞ্ঞাসমং। (যথা পঞ্চপঞ্ঞাসং ৰেয্যাকরণানি হোন্তি তথা ৰিত্থারেতব্বানি।)

    716. Sāvatthinidānaṃ. ‘‘Catārome, bhikkhave, jhāyī. Katame cattāro? Idha, bhikkhave , ekacco jhāyī samādhismiṃ sātaccakārī hoti, na samādhismiṃ sappāyakārī. Idha pana, bhikkhave, ekacco jhāyī samādhismiṃ sappāyakārī hoti, na samādhismiṃ sātaccakārī. Idha pana, bhikkhave, ekacco jhāyī neva samādhismiṃ sātaccakārī hoti, na ca samādhismiṃ sappāyakārī. Idha pana, bhikkhave, ekacco jhāyī samādhismiṃ sātaccakārī ca hoti, samādhismiṃ sappāyakārī ca. Tatra, bhikkhave, yvāyaṃ jhāyī samādhismiṃ sātaccakārī ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ sātaccakārī ca hoti, samādhismiṃ sappāyakārī ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Pañcapaññāsamaṃ. (Yathā pañcapaññāsaṃ veyyākaraṇāni honti tathā vitthāretabbāni.)

    ঝানসংযুত্তং 1 সমত্তং।

    Jhānasaṃyuttaṃ 2 samattaṃ.

    তস্সুদ্দানং –

    Tassuddānaṃ –

    সমাধি সমাপত্তি ঠিতি চ, ৰুট্ঠানং কল্লিতারম্মণেন চ।

    Samādhi samāpatti ṭhiti ca, vuṭṭhānaṃ kallitārammaṇena ca;

    গোচরা অভিনীহারো সক্কচ্চ, সাতচ্চ অথোপি সপ্পাযন্তি॥

    Gocarā abhinīhāro sakkacca, sātacca athopi sappāyanti.

    খন্ধৰগ্গো ততিযো।

    Khandhavaggo tatiyo.

    তস্সুদ্দানং –

    Tassuddānaṃ –

    খন্ধ রাধসংযুত্তঞ্চ, দিট্ঠিওক্কন্ত 3 উপ্পাদা।

    Khandha rādhasaṃyuttañca, diṭṭhiokkanta 4 uppādā;

    কিলেস সারিপুত্তা চ, নাগা সুপণ্ণ গন্ধব্বা।

    Kilesa sāriputtā ca, nāgā supaṇṇa gandhabbā;

    ৰলাহ ৰচ্ছঝানন্তি , খন্ধৰগ্গম্হি তেরসাতি॥

    Valāha vacchajhānanti , khandhavaggamhi terasāti.

    খন্ধৰগ্গসংযুত্তপাল়ি নিট্ঠিতা।

    Khandhavaggasaṃyuttapāḷi niṭṭhitā.




    Next: ১. অজ্ঝত্তানিচ্চসুত্তং • 1. Ajjhattāniccasuttaṃ




    Footnotes:
    1. সমাধিসংযুত্তং (স্যা॰ কং॰)
    2. samādhisaṃyuttaṃ (syā. kaṃ.)
    3. ওক্কন্তি (সব্বত্থ)
    4. okkanti (sabbattha)



    Related texts:



    অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২-৫৫. সমাধিমূলকঠিতিসুত্তাদিৰণ্ণনা • 2-55. Samādhimūlakaṭhitisuttādivaṇṇanā

    টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২-৫৫. সমাধিমূলকঠিতিসুত্তাদিৰণ্ণনা • 2-55. Samādhimūlakaṭhitisuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact