| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
५५. सातच्चमूलकसप्पायकारीसुत्तं
55. Sātaccamūlakasappāyakārīsuttaṃ
७१६. सावत्थिनिदानं। ‘‘चतारोमे, भिक्खवे, झायी। कतमे चत्तारो? इध, भिक्खवे , एकच्चो झायी समाधिस्मिं सातच्चकारी होति, न समाधिस्मिं सप्पायकारी। इध पन, भिक्खवे, एकच्चो झायी समाधिस्मिं सप्पायकारी होति, न समाधिस्मिं सातच्चकारी। इध पन, भिक्खवे, एकच्चो झायी नेव समाधिस्मिं सातच्चकारी होति, न च समाधिस्मिं सप्पायकारी। इध पन, भिक्खवे, एकच्चो झायी समाधिस्मिं सातच्चकारी च होति, समाधिस्मिं सप्पायकारी च। तत्र, भिक्खवे, य्वायं झायी समाधिस्मिं सातच्चकारी च होति समाधिस्मिं सप्पायकारी च अयं इमेसं चतुन्नं झायीनं अग्गो च सेट्ठो च मोक्खो च उत्तमो च पवरो च। सेय्यथापि, भिक्खवे, गवा खीरं, खीरम्हा दधि, दधिम्हा नवनीतं, नवनीतम्हा सप्पि, सप्पिम्हा सप्पिमण्डो तत्र अग्गमक्खायति; एवमेव खो, भिक्खवे, य्वायं झायी समाधिस्मिं सातच्चकारी च होति, समाधिस्मिं सप्पायकारी अयं इमेसं चतुन्नं झायीनं अग्गो च सेट्ठो च मोक्खो च उत्तमो च पवरो चा’’ति। इदमवोच भगवा। अत्तमना ते भिक्खू भगवतो भासितं अभिनन्दुन्ति। पञ्चपञ्ञासमं। (यथा पञ्चपञ्ञासं वेय्याकरणानि होन्ति तथा वित्थारेतब्बानि।)
716. Sāvatthinidānaṃ. ‘‘Catārome, bhikkhave, jhāyī. Katame cattāro? Idha, bhikkhave , ekacco jhāyī samādhismiṃ sātaccakārī hoti, na samādhismiṃ sappāyakārī. Idha pana, bhikkhave, ekacco jhāyī samādhismiṃ sappāyakārī hoti, na samādhismiṃ sātaccakārī. Idha pana, bhikkhave, ekacco jhāyī neva samādhismiṃ sātaccakārī hoti, na ca samādhismiṃ sappāyakārī. Idha pana, bhikkhave, ekacco jhāyī samādhismiṃ sātaccakārī ca hoti, samādhismiṃ sappāyakārī ca. Tatra, bhikkhave, yvāyaṃ jhāyī samādhismiṃ sātaccakārī ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ sātaccakārī ca hoti, samādhismiṃ sappāyakārī ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Pañcapaññāsamaṃ. (Yathā pañcapaññāsaṃ veyyākaraṇāni honti tathā vitthāretabbāni.)
तस्सुद्दानं –
Tassuddānaṃ –
समाधि समापत्ति ठिति च, वुट्ठानं कल्लितारम्मणेन च।
Samādhi samāpatti ṭhiti ca, vuṭṭhānaṃ kallitārammaṇena ca;
गोचरा अभिनीहारो सक्कच्च, सातच्च अथोपि सप्पायन्ति॥
Gocarā abhinīhāro sakkacca, sātacca athopi sappāyanti.
खन्धवग्गो ततियो।
Khandhavaggo tatiyo.
तस्सुद्दानं –
Tassuddānaṃ –
किलेस सारिपुत्ता च, नागा सुपण्ण गन्धब्बा।
Kilesa sāriputtā ca, nāgā supaṇṇa gandhabbā;
वलाह वच्छझानन्ति , खन्धवग्गम्हि तेरसाति॥
Valāha vacchajhānanti , khandhavaggamhi terasāti.
खन्धवग्गसंयुत्तपाळि निट्ठिता।
Khandhavaggasaṃyuttapāḷi niṭṭhitā.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / २-५५. समाधिमूलकठितिसुत्तादिवण्णना • 2-55. Samādhimūlakaṭhitisuttādivaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / २-५५. समाधिमूलकठितिसुत्तादिवण्णना • 2-55. Samādhimūlakaṭhitisuttādivaṇṇanā
