| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๕๕. สาตจฺจมูลกสปฺปายการีสุตฺตํ
55. Sātaccamūlakasappāyakārīsuttaṃ
๗๑๖. สาวตฺถินิทานํฯ ‘‘จตาโรเม, ภิกฺขเว, ฌายีฯ กตเม จตฺตาโร? อิธ, ภิกฺขเว , เอกโจฺจ ฌายี สมาธิสฺมิํ สาตจฺจการี โหติ, น สมาธิสฺมิํ สปฺปายการีฯ อิธ ปน, ภิกฺขเว, เอกโจฺจ ฌายี สมาธิสฺมิํ สปฺปายการี โหติ, น สมาธิสฺมิํ สาตจฺจการีฯ อิธ ปน, ภิกฺขเว, เอกโจฺจ ฌายี เนว สมาธิสฺมิํ สาตจฺจการี โหติ, น จ สมาธิสฺมิํ สปฺปายการีฯ อิธ ปน, ภิกฺขเว, เอกโจฺจ ฌายี สมาธิสฺมิํ สาตจฺจการี จ โหติ, สมาธิสฺมิํ สปฺปายการี จฯ ตตฺร, ภิกฺขเว, ยฺวายํ ฌายี สมาธิสฺมิํ สาตจฺจการี จ โหติ สมาธิสฺมิํ สปฺปายการี จ อยํ อิเมสํ จตุนฺนํ ฌายีนํ อโคฺค จ เสโฎฺฐ จ โมโกฺข จ อุตฺตโม จ ปวโร จฯ เสยฺยถาปิ, ภิกฺขเว, ควา ขีรํ, ขีรมฺหา ทธิ, ทธิมฺหา นวนีตํ, นวนีตมฺหา สปฺปิ, สปฺปิมฺหา สปฺปิมโณฺฑ ตตฺร อคฺคมกฺขายติ; เอวเมว โข, ภิกฺขเว, ยฺวายํ ฌายี สมาธิสฺมิํ สาตจฺจการี จ โหติ, สมาธิสฺมิํ สปฺปายการี อยํ อิเมสํ จตุนฺนํ ฌายีนํ อโคฺค จ เสโฎฺฐ จ โมโกฺข จ อุตฺตโม จ ปวโร จา’’ติฯ อิทมโวจ ภควาฯ อตฺตมนา เต ภิกฺขู ภควโต ภาสิตํ อภินนฺทุนฺติฯ ปญฺจปญฺญาสมํฯ (ยถา ปญฺจปญฺญาสํ เวยฺยากรณานิ โหนฺติ ตถา วิตฺถาเรตพฺพานิฯ)
716. Sāvatthinidānaṃ. ‘‘Catārome, bhikkhave, jhāyī. Katame cattāro? Idha, bhikkhave , ekacco jhāyī samādhismiṃ sātaccakārī hoti, na samādhismiṃ sappāyakārī. Idha pana, bhikkhave, ekacco jhāyī samādhismiṃ sappāyakārī hoti, na samādhismiṃ sātaccakārī. Idha pana, bhikkhave, ekacco jhāyī neva samādhismiṃ sātaccakārī hoti, na ca samādhismiṃ sappāyakārī. Idha pana, bhikkhave, ekacco jhāyī samādhismiṃ sātaccakārī ca hoti, samādhismiṃ sappāyakārī ca. Tatra, bhikkhave, yvāyaṃ jhāyī samādhismiṃ sātaccakārī ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ sātaccakārī ca hoti, samādhismiṃ sappāyakārī ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Pañcapaññāsamaṃ. (Yathā pañcapaññāsaṃ veyyākaraṇāni honti tathā vitthāretabbāni.)
ตสฺสุทฺทานํ –
Tassuddānaṃ –
สมาธิ สมาปตฺติ ฐิติ จ, วุฎฺฐานํ กลฺลิตารมฺมเณน จ;
Samādhi samāpatti ṭhiti ca, vuṭṭhānaṃ kallitārammaṇena ca;
โคจรา อภินีหาโร สกฺกจฺจ, สาตจฺจ อโถปิ สปฺปายนฺติฯ
Gocarā abhinīhāro sakkacca, sātacca athopi sappāyanti.
ขนฺธวโคฺค ตติโยฯ
Khandhavaggo tatiyo.
ตสฺสุทฺทานํ –
Tassuddānaṃ –
กิเลส สาริปุตฺตา จ, นาคา สุปณฺณ คนฺธพฺพา;
Kilesa sāriputtā ca, nāgā supaṇṇa gandhabbā;
วลาห วจฺฉฌานนฺติ , ขนฺธวคฺคมฺหิ เตรสาติฯ
Valāha vacchajhānanti , khandhavaggamhi terasāti.
ขนฺธวคฺคสํยุตฺตปาฬิ นิฎฺฐิตาฯ
Khandhavaggasaṃyuttapāḷi niṭṭhitā.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๒-๕๕. สมาธิมูลกฐิติสุตฺตาทิวณฺณนา • 2-55. Samādhimūlakaṭhitisuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๒-๕๕. สมาธิมูลกฐิติสุตฺตาทิวณฺณนา • 2-55. Samādhimūlakaṭhitisuttādivaṇṇanā
