| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៥៥. សាតច្ចមូលកសប្បាយការីសុត្តំ
55. Sātaccamūlakasappāyakārīsuttaṃ
៧១៦. សាវត្ថិនិទានំ។ ‘‘ចតារោមេ, ភិក្ខវេ, ឈាយី។ កតមេ ចត្តារោ? ឥធ, ភិក្ខវេ , ឯកច្ចោ ឈាយី សមាធិស្មិំ សាតច្ចការី ហោតិ, ន សមាធិស្មិំ សប្បាយការី។ ឥធ បន, ភិក្ខវេ, ឯកច្ចោ ឈាយី សមាធិស្មិំ សប្បាយការី ហោតិ, ន សមាធិស្មិំ សាតច្ចការី។ ឥធ បន, ភិក្ខវេ, ឯកច្ចោ ឈាយី នេវ សមាធិស្មិំ សាតច្ចការី ហោតិ, ន ច សមាធិស្មិំ សប្បាយការី។ ឥធ បន, ភិក្ខវេ, ឯកច្ចោ ឈាយី សមាធិស្មិំ សាតច្ចការី ច ហោតិ, សមាធិស្មិំ សប្បាយការី ច។ តត្រ, ភិក្ខវេ, យ្វាយំ ឈាយី សមាធិស្មិំ សាតច្ចការី ច ហោតិ សមាធិស្មិំ សប្បាយការី ច អយំ ឥមេសំ ចតុន្នំ ឈាយីនំ អគ្គោ ច សេដ្ឋោ ច មោក្ខោ ច ឧត្តមោ ច បវរោ ច។ សេយ្យថាបិ, ភិក្ខវេ, គវា ខីរំ, ខីរម្ហា ទធិ, ទធិម្ហា នវនីតំ, នវនីតម្ហា សប្បិ, សប្បិម្ហា សប្បិមណ្ឌោ តត្រ អគ្គមក្ខាយតិ; ឯវមេវ ខោ, ភិក្ខវេ, យ្វាយំ ឈាយី សមាធិស្មិំ សាតច្ចការី ច ហោតិ, សមាធិស្មិំ សប្បាយការី អយំ ឥមេសំ ចតុន្នំ ឈាយីនំ អគ្គោ ច សេដ្ឋោ ច មោក្ខោ ច ឧត្តមោ ច បវរោ ចា’’តិ។ ឥទមវោច ភគវា។ អត្តមនា តេ ភិក្ខូ ភគវតោ ភាសិតំ អភិនន្ទុន្តិ។ បញ្ចបញ្ញាសមំ។ (យថា បញ្ចបញ្ញាសំ វេយ្យាករណានិ ហោន្តិ តថា វិត្ថារេតព្ពានិ។)
716. Sāvatthinidānaṃ. ‘‘Catārome, bhikkhave, jhāyī. Katame cattāro? Idha, bhikkhave , ekacco jhāyī samādhismiṃ sātaccakārī hoti, na samādhismiṃ sappāyakārī. Idha pana, bhikkhave, ekacco jhāyī samādhismiṃ sappāyakārī hoti, na samādhismiṃ sātaccakārī. Idha pana, bhikkhave, ekacco jhāyī neva samādhismiṃ sātaccakārī hoti, na ca samādhismiṃ sappāyakārī. Idha pana, bhikkhave, ekacco jhāyī samādhismiṃ sātaccakārī ca hoti, samādhismiṃ sappāyakārī ca. Tatra, bhikkhave, yvāyaṃ jhāyī samādhismiṃ sātaccakārī ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ sātaccakārī ca hoti, samādhismiṃ sappāyakārī ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Pañcapaññāsamaṃ. (Yathā pañcapaññāsaṃ veyyākaraṇāni honti tathā vitthāretabbāni.)
តស្សុទ្ទានំ –
Tassuddānaṃ –
សមាធិ សមាបត្តិ ឋិតិ ច, វុដ្ឋានំ កល្លិតារម្មណេន ច;
Samādhi samāpatti ṭhiti ca, vuṭṭhānaṃ kallitārammaṇena ca;
គោចរា អភិនីហារោ សក្កច្ច, សាតច្ច អថោបិ សប្បាយន្តិ។
Gocarā abhinīhāro sakkacca, sātacca athopi sappāyanti.
ខន្ធវគ្គោ តតិយោ។
Khandhavaggo tatiyo.
តស្សុទ្ទានំ –
Tassuddānaṃ –
កិលេស សារិបុត្តា ច, នាគា សុបណ្ណ គន្ធព្ពា;
Kilesa sāriputtā ca, nāgā supaṇṇa gandhabbā;
វលាហ វច្ឆឈានន្តិ , ខន្ធវគ្គម្ហិ តេរសាតិ។
Valāha vacchajhānanti , khandhavaggamhi terasāti.
ខន្ធវគ្គសំយុត្តបាឡិ និដ្ឋិតា។
Khandhavaggasaṃyuttapāḷi niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ២-៥៥. សមាធិមូលកឋិតិសុត្តាទិវណ្ណនា • 2-55. Samādhimūlakaṭhitisuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ២-៥៥. សមាធិមូលកឋិតិសុត្តាទិវណ្ណនា • 2-55. Samādhimūlakaṭhitisuttādivaṇṇanā
