| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅၅. သာတစ္စမူလကသပ္ပာယကာရီသုတ္တံ
55. Sātaccamūlakasappāyakārīsuttaṃ
၇၁၆. သာဝတ္ထိနိဒာနံ။ ‘‘စတာရောမေ, ဘိက္ခဝေ, ဈာယီ။ ကတမေ စတ္တာရော? ဣဓ, ဘိက္ခဝေ , ဧကစ္စော ဈာယီ သမာဓိသ္မိံ သာတစ္စကာရီ ဟောတိ, န သမာဓိသ္မိံ သပ္ပာယကာရီ။ ဣဓ ပန, ဘိက္ခဝေ, ဧကစ္စော ဈာယီ သမာဓိသ္မိံ သပ္ပာယကာရီ ဟောတိ, န သမာဓိသ္မိံ သာတစ္စကာရီ။ ဣဓ ပန, ဘိက္ခဝေ, ဧကစ္စော ဈာယီ နေဝ သမာဓိသ္မိံ သာတစ္စကာရီ ဟောတိ, န စ သမာဓိသ္မိံ သပ္ပာယကာရီ။ ဣဓ ပန, ဘိက္ခဝေ, ဧကစ္စော ဈာယီ သမာဓိသ္မိံ သာတစ္စကာရီ စ ဟောတိ, သမာဓိသ္မိံ သပ္ပာယကာရီ စ။ တတ္ရ, ဘိက္ခဝေ, ယ္ဝာယံ ဈာယီ သမာဓိသ္မိံ သာတစ္စကာရီ စ ဟောတိ သမာဓိသ္မိံ သပ္ပာယကာရီ စ အယံ ဣမေသံ စတုန္နံ ဈာယီနံ အဂ္ဂော စ သေဋ္ဌော စ မောက္ခော စ ဥတ္တမော စ ပဝရော စ။ သေယ္ယထာပိ, ဘိက္ခဝေ, ဂဝာ ခီရံ, ခီရမ္ဟာ ဒဓိ, ဒဓိမ္ဟာ နဝနီတံ, နဝနီတမ္ဟာ သပ္ပိ, သပ္ပိမ္ဟာ သပ္ပိမဏ္ဍော တတ္ရ အဂ္ဂမက္ခာယတိ; ဧဝမေဝ ခော, ဘိက္ခဝေ, ယ္ဝာယံ ဈာယီ သမာဓိသ္မိံ သာတစ္စကာရီ စ ဟောတိ, သမာဓိသ္မိံ သပ္ပာယကာရီ အယံ ဣမေသံ စတုန္နံ ဈာယီနံ အဂ္ဂော စ သေဋ္ဌော စ မောက္ခော စ ဥတ္တမော စ ပဝရော စာ’’တိ။ ဣဒမဝောစ ဘဂဝာ။ အတ္တမနာ တေ ဘိက္ခူ ဘဂဝတော ဘာသိတံ အဘိနန္ဒုန္တိ။ ပဉ္စပညာသမံ။ (ယထာ ပဉ္စပညာသံ ဝေယ္ယာကရဏာနိ ဟောန္တိ တထာ ဝိတ္ထာရေတဗ္ဗာနိ။)
716. Sāvatthinidānaṃ. ‘‘Catārome, bhikkhave, jhāyī. Katame cattāro? Idha, bhikkhave , ekacco jhāyī samādhismiṃ sātaccakārī hoti, na samādhismiṃ sappāyakārī. Idha pana, bhikkhave, ekacco jhāyī samādhismiṃ sappāyakārī hoti, na samādhismiṃ sātaccakārī. Idha pana, bhikkhave, ekacco jhāyī neva samādhismiṃ sātaccakārī hoti, na ca samādhismiṃ sappāyakārī. Idha pana, bhikkhave, ekacco jhāyī samādhismiṃ sātaccakārī ca hoti, samādhismiṃ sappāyakārī ca. Tatra, bhikkhave, yvāyaṃ jhāyī samādhismiṃ sātaccakārī ca hoti samādhismiṃ sappāyakārī ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ sātaccakārī ca hoti, samādhismiṃ sappāyakārī ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Pañcapaññāsamaṃ. (Yathā pañcapaññāsaṃ veyyākaraṇāni honti tathā vitthāretabbāni.)
တသ္သုဒ္ဒာနံ –
Tassuddānaṃ –
သမာဓိ သမာပတ္တိ ဌိတိ စ၊ ဝုဋ္ဌာနံ ကလ္လိတာရမ္မဏေန စ။
Samādhi samāpatti ṭhiti ca, vuṭṭhānaṃ kallitārammaṇena ca;
ဂောစရာ အဘိနီဟာရော သက္ကစ္စ၊ သာတစ္စ အထောပိ သပ္ပာယန္တိ။
Gocarā abhinīhāro sakkacca, sātacca athopi sappāyanti.
ခန္ဓဝဂ္ဂော တတိယော။
Khandhavaggo tatiyo.
တသ္သုဒ္ဒာနံ –
Tassuddānaṃ –
ကိလေသ သာရိပုတ္တာ စ၊ နာဂာ သုပဏ္ဏ ဂန္ဓဗ္ဗာ။
Kilesa sāriputtā ca, nāgā supaṇṇa gandhabbā;
ဝလာဟ ဝစ္ဆဈာနန္တိ ၊ ခန္ဓဝဂ္ဂမ္ဟိ တေရသာတိ။
Valāha vacchajhānanti , khandhavaggamhi terasāti.
ခန္ဓဝဂ္ဂသံယုတ္တပာဠိ နိဋ္ဌိတာ။
Khandhavaggasaṃyuttapāḷi niṭṭhitā.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂-၅၅. သမာဓိမူလကဌိတိသုတ္တာဒိဝဏ္ဏနာ • 2-55. Samādhimūlakaṭhitisuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂-၅၅. သမာဓိမူလကဌိတိသုတ္တာဒိဝဏ္ဏနာ • 2-55. Samādhimūlakaṭhitisuttādivaṇṇanā
